Post: #1
Title: أنتي يا بت الحرام ( حارة المساخيت 2)
Author: حبيب نورة
Date: 08-12-2007, 07:24 PM
مسخوت .... يالدينك فرض الشوق ....
يالبسمل حوقل فيكا حنين .... يالمؤمن قلبك قال آمين
ولا الضالين تذكار الركعة الفي محرابك ..... مجنون يا الصلّت ليك الدمعة
و أتشهّد وجعك وكنا نردد .. قرآن الروح في نافلة شوق !!
مسخوت يا نبي الحرف الباقي رسالة ... ومودي خطانا صراط الفال ...!
شيطان القول .... ما تسجنوا حسّوا بي قول بسم الله !!!
الكلمة الفيهت أبليس متدسي .... تذاكر رحلة لي شجرة حوّة
ما تدفن حلمك ورقة توت ..... ما تضاري كلامك بين أمرين
يا هابيل العشق الساكن مجري الدم !! يا قابيل الفرقة الخوف الهم !!
كنا أتنين ..... أبليس وقلم .... التالت فينا قصايد الجن اللحمر ...
أتوسدنا الورق الاغبش .... خططنا شوارعو مدن كلمات.... مسخوت يالوجعك في الغنيات
مجروح يالفرحك في الآهات ....
و أنتي يا بت الحرام
مسخوتة كمان .... معطونة في جردل حليب القمرة....
وشبعانة من غيوم السنسنة الحمراء....
وكمان تاوق من نفَسك البرق البشلع خُمرة ..... وانا بين خَمرة وهجك
وسطوة وعي الروح شان شوفتك ....
وسلطة حكم ( أب تكُّو ) الفي (قراقوش) عينيك !!!
مترجي عدالة ظلمك .... و صحوة حلمك ... رهافة بشَّة صوتك .. متين في سمعي
و قوة نبض النّفَس القيَّل فيني ... نقاط الضعف الكانت فيني !
مسخوتة برضو يا أنتي ونفَسك قدلة أكسجينة مرقت لي صُفاح
في عصرية طابقة البوخــــــــــــة ! يعلم الرئة قلة الشغلة و يديها أجازة عشان
تتفرغ للشهيق!
وزفيرك يعني أيه طعم الحريق ... في دنيا ضيق
نفس أتساع نقر الألم .... ما بين ضلوعك و الدموع ... ما بين رحيلك و الرجوع
مدنكلة و دغرية.... نديانة زي مرقة برتقالة في ساعة عِصير ..... وانا بين عصير الروعة
و أحلام الغنا ........ في الدهشة شارب جعمتين!
وعارفك برضو مسخوتة ....زي زمني كدة !
شكرن كتيرن!
|
Post: #2
Title: Re: أنتي يا بت الحرام ( حارة المساخيت 2)
Author: حبيب نورة
Date: 08-12-2007, 08:45 PM
Parent: #1
قالت لي
يا مسخوت عليك الله في داعي لي شيل الحال ودق الطار ؟
آآآآي بدق ليك طار
ولو ما عاجبك بعمل ليك ظار و بفتح ليك بار؟
المافي شنو؟
خربشة كديس الميتافيزيقيا
و نقيد جدادة أم بلينا جارتنا
و أزعاج شافعة أنعام مرة خالي
دي ما كلها حاجات تخلي الواحد يواصل نزيف؟
و يمطر خريف؟
كدي تاني أعملي شخيت وتعالي بعيد!
بي نفس درجة المكر واللؤم في نفسية كلبة الجيران النفساء
والجراء في حالة شفط غريب جدا للحليب
يعني الا أغير شارعي شان أمش أجيب السكر من دكان آدم فور؟!
كلبة مسخوتة
بتحمل نفس الجينات الوراثية اللازمة لأنتاج الكلوروفيل
المادة الخدرا
لكن بتفك السطلة
وبتخليك زي النفسك تجري
ونفسك تديها نومة
يعني ما عارف تعمل شنو !!
انتي يا بت الحرام!!!!
سنواصل السختة
شكرن كتيرن!
|
Post: #3
Title: Re: أنتي يا بت الحرام ( حارة المساخيت 2)
Author: حبيب نورة
Date: 08-12-2007, 09:06 PM
Parent: #2
يا مسخوتة
يا هناية !! أنتي أفتراضية و أفكارك مشتتة
وترتيبك فوضجي
يجمعنا أننا نحمل نفس الهوية
مجانين و كُفــــّار وكمان أولاد حرام !!
أتي بتمدي علي زمن منفلت وطائش .....
وانا بجابد في تاريخ ممزق نتيجة لي عوامل بيلوغرافيا سجمانة!
النيل يمصمص في صفق الليمون قرفان من ضفافو
والقمرة مادَّة شلوفــتها لي أي ثعلوق في الشوارع
كاتبة في اليافطة مومس عمومي !!
تماماً زي زمني دة
زمااااااااان كان السماء بيت أحرار !
هسة النجوم مرقت للريبا و التلاف
خلت الأنارة و قبّلت علي الجرارة وممارسة الدعارة !
يا هناية زكرتيني دفاتري القديمة قبل ما تهجم عليها عوامل التعرية
و تصيبها أعراض أنيميا السافنا الفقيرة !
كنا أتنين !
بعد ما ضهورنا أتكسرت من قعدة الضل
هو أتوكل علي شنطة هاند باق غبشة وبي كراع خدراء
وقطعت وضوهو مضيفة طيارة الساعة أربعة حزيناً
حسب توقيت الرحيل المحلي !
مهموم مصنقر في كنبة شكــرن !
والمضيفة نامت بي الباقي ونزل قبل المطار في محطة غربة !
قهر و فراق اهل !
أنا
انا بقيت كابتن الفريق في دافوري الكوتشينة !
ولبست الفنيلة نمرة عشرة في ماراثون دفار الألزامية العالمي
عالم أفتراضي قبيح
من غير زول يشاركك الوقوف في صف البول جمب عمود السينما الوطنية !
ومدارس الكمبوني وحائط المبكي المقابل لكلوزيوم
عالم أفتراضي ود حرام !
زينا كدة ومشاويرك مافيها الشايل معاك هم الشيرنغ وصحن البوش!
في مدينةٍ الله فيها ضابطٌ في الجيش !!!!
طوبي لنا نحن أولاد الحرام
وطوبي لست الشاي
يا هناية يا أفتراضية أنتي
غبشـــــة .... لكن حقتي !
البقرة التي يملكها صاحبها تدر من اللبن أكثر من البقرة التي تملكها الحكومة !
آيــة ماركسية كنا بنصلي بيها فريضة العشم
أيام تصوفنا الشيوعي !
أيام كنا فيها حيران في خلاوي أنبياءنا (لينين) و(ماركس) و(خروتشوف)
أيام كنا نصنع فيها من ثلوج موسكو كعبةً بيضاء !
ونختلف و لكن مذاهبنا كلها في حضرة (كامي) و (سارتر) و(كولن ولسون)
هسة
هسة انا حاسي أني براي
وانا آآآآآآآآه من كونك تشعر أنو اللمة الكبيرة دي كلها
حواليك ولا تسوي شئ !
المجموعة (فاي) دي لو بقت صغيرة واللا كان كبيرة
برضو بتفضل المجموعة ( فاي ) !
أنا آآآآآه
زولي كان بديني الترجمة الفورية لي أيي لوَّايـــــــــــة !
بعرف أني بتوحم علي صحن فول !
هسة بقي يغير ( الآي بي أدريس) كل يوم
ويحرق في باندويث محطات القطاري والسفن
وهانية الكانت أفتراضية !
قالت لي ما بطلع معاك الا بعد صلاة العشاء
يعني لو الأمام بتاعكم دة عايز يثبت لينا أنو حافظ سورة البقرة
أرجع تاني لي وجعي الأفتراضي ؟؟؟
وهويتي الأفتراضية ؟؟؟؟
مجنون وكافر و كمان ود حرام ؟؟؟؟؟
|
Post: #4
Title: Re: أنتي يا بت الحرام ( حارة المساخيت 2)
Author: معتز تروتسكى
Date: 08-12-2007, 09:48 PM
Parent: #3
راهنت الدنيا على شوف الكون بمنظار ثابت زى شحتفة الروح ...
الروح طلعت فسحة وغابت فى اعماق الزول الراد لمن جاتو كوفارة من عشقو الجاط ...
العشق نار تاهت من نار جهنم ... وزعوها على مدار الساعة بالحرفنة ... اتشاكلت مع بعض الالهام وحكاوى الليل القاعد للناس كية فى حلوقهم ... الليل الساكت تقول اخرس .. يحاكى القلب واللوعة والجرسة ايضا معه على تزييف الشحتفة وغلغلة الاحساس المجرم ..
اتاريها مرات الروح بتشرد والزول صاحى حتى حدود الامكنة ... تتوه من مدار التيه وتقفز على زانة الرادار والطيش .. وتلتقيها .. تتعارك معها حتى الرحيق .. وفى غيب الكون الزول طاشى من عقلنة الوعى الى روحو الهاربة من نبضو على ايجاد الكبت وتفسير معانى التيه والوله ... قرأت فى حلم جاط بضفائر الوعد الخاطئ ان الانسان مجرم بالفطرة حتى يتيقن من التوبة على معالم سور الصين العظيم ... عندها سوف يكون على مرمى حجر من الاحساس بكشف الارتهان ... وفينى ايضا ارتهنت جزء من مسارب خلية تاهت من نبض الكلام الحى .. واللغة العاشرة فى السكة يااااا وجع البعد ...
هنا .. حيث كل التقويم اشتر ... وبصمة الطفل الجريح بمشرط لزج يكاوى الطير الريح على ارسال جيش من غناوى حقيبة الفن يتقدمه ضابط من فن حريف دقس من زمنو ... يقول لهم :
العيون النوركن بجهرا
غير جمالكن مين السهرا
اخفى ريدتك مرة واجهرا
نار غرامك ربك يقهرا
...
يا رجل من فرح البدايات الممسوخة وممكنة ...
ذات مرة من المرارت ... حاولت ان اوصل شوقى الى طفلة جميلة زى وهجك ... ما قدرت .. تعرف عملت شنو ؟ .. جانى احساس انو اجضمها ... وفعلا فعلت .. ثم استرحت بعدها ولكن شوقى ازداد هى تضحك رغم الالم وانا اعتصر الالم ... قتلنى البعد المعفن بسيفه اربعة عشر مرة فى اليوم ... كنت فى يوم من الايام طريح كم مرة كدا ... وكم مرة تانية برضو ... يبدو انو وعلى ما اظن بنات حواء الحلوت ديل فيهن واحدة عينة من فصيلة امها بت عم حبوبتها ... وصادفت بؤبؤاً عميقا واردته قتيلا ... وصادرتنى منكم ايها المجانين ...
صديقى فى الغياب ...
لا احتمل ان اقول لك شيئا ... كل الاشياء هربت منى وانا اكوس فى الشارع الجاز عن معنى مفقود ...
هنا اتعاطى الالم كل مرة بالبعد وارتهان الالم المعفن ... لكنى وبحمد الله ارنو على الشفاء الان ... وتبقت اشياء سوف تتم فى حينها واعود حيث كنت معكم ...
تصدق : كُلى وعين ؟؟ ...
لك فى الغياب كل الاشياء ولك الحضور والنار .
انا فى حالة البشتنة والتيه والوله ليك يا معفن [ممكن تتصل على ضروري فقط]..
|
Post: #6
Title: Re: أنتي يا بت الحرام ( حارة المساخيت 2)
Author: حبيب نورة
Date: 08-15-2007, 05:43 PM
Parent: #4
انا متفق تماماً مع ضرورة أيجاد غلغلة متوازية مع خط سير الركشة
ومصر أني أديك حق اللبن !!
علي الأقل تشرط فاتورة الحليب
وتتنازل عن حقك في تركة مريم السعدية!
و بدل سليمة بائعة اللبن\
تسمي بنتك الجاية من رحم الفجأة
سلمي
ولازم تكون ظالمة!
من شابه أباه ما ظلم!
غايتو
مشتهيك
زي المحطات المتوحمة علي طقطقة كماسرة شوقي ليك
في الحقيقة قريت ما بين سطورك
وعجبني البوس تحت الحزام
أما حكاية
وبمناسبة البت المسخوتة
قالت لي علي فكرة
انا محتاجة أديك تذاكر لي جواك!!
وانا من عصير الدهشة شارب جغمتين
سعلتها!!
كيفن عاد!!!!
قالت لي بكون مطمنة عليك وانا محكر جواك
زي نجمة سادر في علاك!!
أجي يا كدة؟؟؟؟؟
شكرن كتيرن!
|
Post: #7
Title: Re: أنتي يا بت الحرام ( حارة المساخيت 2)
Author: حبيب نورة
Date: 08-23-2007, 01:27 PM
Parent: #6
البت
ست التسالي
مرة كدة سألتني في فجائية
تسعة درجات حسب مقياس شمارتر!
انت يا سردفة البنات القاعد ترجاهم في السوق العربي ديل
ما عندهن أهل؟؟؟؟
انا طبعن ما لقيت لي رد أقولو ليها
وحتي كيس التسالي القاعد بقرمش فيه ما عاد ينفع لأيجاد آلية بديلة
لجدلية الطرح الشكلو ح يكون عقيم مع ست التسالي
ما شايف قدامي اية مداخل للخروج
وكل الطرق تؤدي لأثبات انطلاقة البنات القاعدات يجوني ديل
وبالتالي أنطلاقتي انا!
يعني أنطلاقتي بقت معروفة لي كل الناس
اليسوي والمايسواش
الغريبة بعد دة كلو
برضو فلانات ماذالت مصرة علي السؤال دة
بالرغم من أنها أخدت ترقية أستثنائية
وبقت ست شاي أد الدنيا
في سوق الكلاكلة اللفة
غايتو جنس محن وتهاويل
سنعود لاحقا!
شكرن كتيرن!
|
Post: #8
Title: Re: أنتي يا بت الحرام ( حارة المساخيت 2)
Author: حبيب نورة
Date: 09-03-2007, 07:04 PM
Parent: #7
*
|
|