انفلات صباحي مبكر ... وكلوا من عماد عبدالله

الى س. (أنثي ما بين عينيها يمر الاستواء)
مع احتمال تساقط الامطار



القاك وين أطلب رضاك ,,

ما الدنيا كيف ,,

تفهم غناك ,,

ما الكون جفل ,,

سرج خيول العاشقيك ,, ورحل معاك

.....

بلقاك ,,

مكان خاطري القديم

زحمة حجا ,,

وزمنا وسيم ,,

و,, الشارع

الناس و,, البيوت

والجاي منك , وليك بفوت

كل الخرايط و,, المدن

مليانة بيك ,,

شرقانة بى حرفى البموت ,,

ما بين شفاهك , أغنيات

يا رافعة راية مشتهاى ,,

يا ,,

ساكنة فى أقصى الوريد ,,

باكر بجيك ,,

بحضن ملامحى الفى وشيك ,,

بقلد مناى ,,

اتوسدك , واحلم براى

انك معاى ,,

مخزونة فى عصبي الرحيل

مشدودة لى

حلمى الرجوع

مسكوبة فى جوف الضلوع ,,

مطر ,, دعاش

او ,,

كلمة فى خاطر فراش

هبش الورود بى ريدك

فرتق ,, بكارة عطرك المختوم جواك

ألقاك وين ,,أطلب رضاك

فى هذه المدن الهلاك ,,

فى الزحمة غازلنى الطريق ,,

كانت عيونك فلسفات ,,

ونقاش هوية,, وانفلات

من كل اشكال الشتات ,,

مين الهداك للنيل ,,

صحانى ,, نص الليل

عشق الجروف دينى , , توراتى والانجيل

كل الكلام فينى ,,

والباقى ,, شدة حيل

نتلاقى فى المطرة ,,

لابسانى غيمة شوق ,,

وعشق الوطن ,, وهواك

القاك وين ,,

أطلب رضاك ,,

ما الدنيا كيف ,,

تفهم غناك

ما الكون جفل ,,

سرج خيول العاشقيك ,, ورحل معاك

رحلت سفاينك فى وريد لهفة مسافر للرجوع ,,

اتمردت سكك القوافى

التايهة فى ليل الخنوع ,,

حرقت شموسك ,, طينة الحرف البناضل

سلطة الكضب المؤسس للقرف

كذب هى الكلمات ,,

حين يغشاها الترف ,,

يغشاك امان زمن التواصل والشرف ,,

بغشانى نبضك صاحى فى عمق المواجع , او براجع

فى رزيم حرفا نزف ,,

و ,, نتوسد الوطن الجميل

نتوسد ,, الوطن ,, الجميل

ثم ,,

نشرع فى الغناء

عااازة فى هواك ,,

هكذا غنى الخليل ,, ثم غاب

لو نغنى ما استطاب

لو ,, نغنى ,, ما استطاب

اللهم ارفق بعبادك البكائين

ابراهيم عدلان ..

اللهم داري سوءة عشقنا , وعافنا واياكم

من فداحة ما تحت المربوط ..

Quote: بغشانى نبضك صاحى فى عمق المواجع , او براجع فى رزيم حرفا نزف ,, و ,, نتوسد الوطن الجميل نتوسد ,, الوطن ,, الجميل ثم ,, نشرع فى الغناء عااازة فى هواك ,, هكذا غنى الخليل ,, ثم غاب لو نغنى ما استطاب لو ,, نغنى ,, ما استطاب

و قالت الناس اللديحة : المتسبب تبكي الريشة ..
فأنا حيطتك القصيرة ..
عندك الربطة و التوب المحزق .. و سين صاد جذرها التربيعي عند عمك ود الرضي ..
الله يرضي علينا و عليك يا مشرف ..
( وا ضيعة الوتر اللي ما غنيت معاهو ولا عزف )
( في صدفة عابرة بلا كلام قلبي الرهيف بالهم نزف )
ود الذين آمنوا ..

لو نغني ما استطاب ..
لو نغني ما ستطاب ..

قال : يا مشرف .
قال : نعم .
قال : ما تاكل سمك ولا بيض .

اما السين ايها العماد البكاء

( على وزن المشاء لاسامة الخواض )

فقد اتاك بعض ذكرها ترتيلا ..

واما المربوط ذو الفتقة الواحدة , فقد كان زرعيا ومباغتا

جدا ذات زقاق شديد الحنان والحنين بحى البوسته , تماما بين فريق

الجعليين وفريق الرباطاب حيث يسكن بعض العمراب

كان - أذكره - محكم اسفلة ( ومجدوع ) باهمال عند الصدر

وصاحبته تلك الصبية

والتى لا تطال

قاتلها الحب

فقد اهدتنى سهدا مقيم ...

وحمى لم تخرج بأمر بخور التيمان

وادعية حسن ابوسبيب

وحبوب الكلوروكوين

اربعا ثم اثنتين اثنتين

ما زال طعم مرارتهما ( الصبية والكلوروكوين ) عالقا بلسان قلبى

الحمدلله ان شفانى منهن ...

بعد نصيحه جدى الذي يبدو انهن اصبن منه هوى قبلى

ان ابقى فى فريق الجعليين ...

Quote: انفلات صباحي مبكر

فَلَتن شوف يا حلاتن ..
قالو ليَّ جَنْ هبابن
الحبايب حبابن
الناعسات كاحلاتن .
و الله بريد غلاتن

Quote: ذات زقاق شديد الحنان والحنين بحى البوسته , تماما بين فريق الجعليين وفريق الرباطاب حيث يسكن بعض العمراب

الللللله .. عوجة و الله يا صاحب ..
لعله لم يكن زقاقا باتجاهين يا مشرف .. !!!
لأنك و الحال كذلك لا محالة هالكٌ إن تواجهت و تلك المجرمة القاتلة فيستو فيستو ..

Quote: واما المربوط ذو الفتقة الواحدة , فقد كان زرعيا ومباغتا جدا

يفتق القلب هذا الأبو فتقة واحدة إبن الكـ......... ده ياخ ..

Quote: محكم اسفلة ( ومجدوع ) باهمال عند الصدر

و هذا الإهمال يعد مخالفة يا صاحبي ..
كل الإهمالات في الدنيا تعاقب عليها القوانين .. إشمعني هذا ؟؟؟
مع إن عواقب هذا الجدعة بإهمال دائما مميتة ..
أو بالميت تتسبب في إعاقات جسيمة .. و ربما مستديمة .
فنصف نزلاء التيجاني الماحي هم ضحايا هذا الجدع بإهمال ..
أما إن كان الجدع بإهمال " على الصدر " ..
فما في إلا أحمد شرفي و نعم المصير ..

في أي المنزلين أنت يا مشرف ياخي ؟؟؟

العماد البكاء ..

الشارع/الحمي اليقود عند الانعطاف يسارا للتجانى الماحى

مرورا بفريق الرباطاب

وخطاها .. والهدب المكحل

لفتة التوب الانيق ..

خطاها يا عماد ,, خطاها ... كلو منك

و..ترجع خطاك
بتفرض وجودك
وترفض سكوتنا
وترسم ملامحك ..
خرايط بيوتنا
تعرج قلوبنا
دروبنا البتبدأ
تفارق دروبك
وتنكر هواك ..
و.. بلقاك
وبتلقينى ..
برغم الخوف المالى عيونك


ومالينى


برغم الحزن الساكن فيك
وساكن فينى
برغمى و.. رغمك
بفضل عشقك فينى خيال


محض قصايد


ما


بتتقال
فيها عيونك سكة دمى



لفة حنينة , وذات الناصيه
وشارع واسع


وحس اطفال

الا براى شاباى ..

شاباى بالحيل ..

للبت الفارده جناح الريد ..

للبلد الشاقى محيط العتمه نواحى الليل

وطالى صباح ..

غنا وافراح ..

ونبضا صاح ..

شاباى بالحيل ..

للبت الحاكت فى ضحكاتها صهيل الخيل

فى البلد الراح ..

اسي واتراح ..

وحزنو مباح

للنيل والليل ..

وغنا المداح