حكاية عبد الجبار الما بعرف الهظار

حكاية عبد الجبار الما بعرف الهظار


عبد الجبار رجل سوداني 100% ( جنوين ) ما فيه أي ذرة من انه يكون فيه شي تايواني او كوري، بيصحي من الصباح زهجان وصاري وشه ، لو النور قاطع او ما قاطع هو صاري وشه، لو في كتاحة او ما في كتاحة هو وشه مصرور ، لو با يته معاه او ما بايتة نفس الشي ، بيدخل الحمام اذا الموية قاطعة او ماقاطعة بيسب بالعبارة المعتادة ( دي بلد دي)، ما بحب حزب الامة لكن بريد المهدي وعنده راي في الاتحاديين لكن بحترم الازهري لانه رفع العلم ، عنده راي في الشيوعيين لكن زعل لما طردوهم من البرلمان، بيكره وبشدة كل ادوات شرب الموية من كبابي وجكوك وكيزان. منضبط عبد الجبار في مواعيد الترحيل يؤدي عمله وفق منظوره الشخصي ودايما بيقول:

(انا بشتغل للحكومة قدر قروشها ، خلي ناس ادريس علم الهدى اليشتغلوا هم )، وإدريس هذا شاب صغير لم ينبت شاربه بعد ولكنه اجتهد لكي يربي دقينة أهلته لترأس الاتحاد في الجامعة رغما عن انه لايفرق بين المذاهب الاربعة والقبل الاربعة ، معلوماته في الواجب والمندوب زي معلومات عبد الجبار في اللغة الكورية، لكنه ذرب اللسان فصيح العبارة ، يهوى السهر والجكس سرا ويجاهر بالتكبير والتهليل ، تم تعيينه في مصلحة عبد الجبار قبل اربعة اعوام واصبح رئيس لجنة تسيير الزواج والمسؤل المالي للجنة ، وأدوه عربية هيونداي جياد آخر موديل وعبد الجبار عليه بالترحيل . ما علينا
في صباح احد الايام وعبد الجبار خت السفة بتاعة بعد الفطور وطرح وشه ( اصلو ما بنطرح الا بعد سفة الفطور الساعة عشرة واول كلمة بيقولها عادة اها .. امبارح الغلب منو . واذا ما في كورة اها الجديد في البلد شنو) ولانه امس ما كان في كورة فرد عبد الجبار ضهره على الكرسي وقال
- اها .. الجديد في البد شنو
- وين انت يا عبد الجبار ما سمعت
- سمعت شنو؟!
- الحكومة عملت لجنة
- ما عادي الحكومة دي بتعمل لجان الجديد شنو !!
- دي لجنة عملوها للفصل السياسي
- شنو؟
- لجنة عشان تفصل الناس سياسيا
- بالله؟!
- وحات عبد الله
- واللجنة دي حتبدا عملها متين
- ابتدت وهسة بعد شوية حيجونا في المصلحة هنا
واثناء الحديث تدخل احدى الموظفات ومعروفة بي لقافتها وشمشرتها ( ناس اللجنة جو، وهسى قاعدين يشربو شاي مع المدير ومعاهم ادريس)
لم ينتظر عبد الجبار واتجه الى مكتب المدير
- السلام عليكم
- وعليكم السلام
- انتو ناس لجنة الفصل السياسي
يرد عليه احدهم وهو يرتدي بدلة سفاري رمادية
- ايوة
- طيب انا عايز اتفصل سياسيا المطلوب شنو
- المطلوب انك تكتب طلب توضح فيه اسباب مقنعة للفصل السياسي ومعاها استرحام بانه ظروفك السياسية الراهنة بتستوجب فصلك
- كويس وبعد ين
- ولا قبلين نحن كلجنة منبثقة من اللجنة الرئيسية مهمتنا استلام الطلبات وتقديمها للجنة فرز الطلبات
- ودي شنو
- دي لجنة منبثقة من اللجنة الرئيسية مهمتها فرز الطلبات بعد كدة ترفعها للجنة دراسة الطلبات ، ولجنة دراسة الطلبات بتدرس كل حالة على حدة ثم ترفع تقريرها النهائي للجنة القانونية المنبثقة من لجنة الفصل السياسي وتقوم اللجنة القانونية بدراسة التقرير وايجاد المخرج القانوني ومن ثم ترفع رايها الفني ، وبعدين تجتمع لجنة الفصل وتكون لجنة لصياغة التوصيات لرفعها لمجلس الوزراء
- طيب ولجنة فرز الطلبات حتجتمع متين
- هي لسة ما اتكونت حتتكون بعد ما لجان استلام الطلبات تكمل مهمتها
- لجان؟!!!
- ايوة في لجنة في اتبرة ، ولجنة في مدني ، اللجان في كل مكان
فجأة يرفع احد اعضاء لجنة الفصل نضارته السميكة ويعاين شدييييد ويصرخ
- عبد الجبار
ينظر اليه عبد الجبار باستغراب
- الطاهر
- آي الطاهر ، شفت انت بالذات يا عبد الجبار ما حنفصلك ما حنفصلك مش لو بقيت معارض ، لو عملت انقلاب عدييييييل ما حنفصلك ، فما تتعب نفسك وتضيع زمنا

د/محمد حسن


ظريف وجميل بوستك


مودتى

إسماعيل محمد أحمد عباس..........

الاخ اسمعيل محمد احمد عباس

ظريف وراقي احساسك العلمنى الكتابة
شكرا ليك

يعني عبدالجبار دا مافي ليهو أي طريقة يهظر ؟
الآن أصبحت الوظائف تشترى يا دكتور ..
يدفعوا ليك مبالغ لترك وظيفتك قسراً عشان يدوها لموالي ..
السيناريو أصبح مخيف في بلد كل رجالها ونسائها يلهثون وراء لقمة العيش ..
ومعظم خريجيها يبحثون على وظائف يشتغلون فيها ..

بس المحيرني انو إدريس دا وزير للمياه والري ما قايلو شغال في مصلحة حكومية


شكراً يا دكتور على الكتابة الراقية ..