Post: #1
Title: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير !!!!!!!
Author: تاج السر حسن
Date: 07-22-2007, 10:28 AM
اسيك الأيفوارى .. اده سيك لى 2 اخوانا وحبايبنا وبنريدهم (موت) .. قبل كم شهر كده .. وأكبر غلط يرتكبو أنسان انه يلعب "وست" مع زول حريف وعلى سفر .. عشان "السيك" صعب تتسداها وتأخد بى تارك .. اها "أسييييييييك" جانا براهو لحدى هنا ولابد من أن نكرم وفادته ونتسد لى حبايبنا الحلوين!!
اما رجاؤنا لى ناس الأسماعيلى الكرماء فنقول لهم كونوا رحماء مع شوية "حنيه" .. الزول اغلبوا لكن ما تكتلو .. نعم تطاولوا لفترة من الزمان .. فاكرين القصة "قطن" و"شلف" وحمام ميت وسيشل وموريشوص .. ما عارفين فى صيادين جوائز و"نتف" ريش وشفاته وهمباته .. نعم حذرناهم من زمان وقلنا ليهم شوفوا ليكم لاعبين غير العواجيز والرواكيب والكورة أصبحت "مروة" وخد وهات قبل كل شئ .. نعم قلنا ليهم ابعدوا السماسرة غير النزيهين من تسجيلات المحترفين "المضروبين" وكفايه "ديوب" .. براهو عمل ليكم "غرغينه" .. نعم قلنا ليهم وما سمعوا الكلام .. وهسه قالوا "المشكله" شداد .. يعنى المشكله ما "المليار" ولا شيخ علاء الدين "الطيار" !!
آخر نكته .. قالوا علاء الدين "طياره" جابوا ليهو ولد طلع من بطن امو سائق "موتر"!!
بالله يا ناس الأسماعيلى الوصيه فى الذمه .. الرأفه واللطف فالزول صغير فى سنو .. وما بقدر على "الهبباى" وطول من دور الثمانيه و"سيطان السقط" .. ومهما كان برضو فرعنا الصغير وبنريدو (موت) عشان كده بندور ليهو "الجضيم" لكن ما بترضى ليهو "البهدله" !!!
اللهم لا أسالك رد القضاء وانما اللطف فيه .. وقلبى على كل من اصر أن يحضر "المجزره" من داخل استاد الأسماعيليه!!!
____________
مخارجه:-
داخلين الأستاد "تجننو" مارقين "تحننو" !!!!!!!!!!!!
|
Post: #2
Title: Re: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير
Author: السمؤال بدرالدين
Date: 07-22-2007, 10:34 AM
Parent: #1
تاج السر
والله لو ما عارف كلمة قوارير معناها شنو تبقي مصيبة
ولو عارفها وكتبتها تبقي مصيبتين
لكن ما لقيتك
خليها مستورة احسن
|
Post: #5
Title: Re: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير
Author: تاج السر حسن
Date: 07-22-2007, 10:45 AM
Parent: #2
يا السمؤال
"قوارير" جمع .. قرقرقرقرقرقر .. وحقوق الطبع محفوظه للدكتوره "بيان"!!
|
Post: #3
Title: Re: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير
Author: أبوالزفت
Date: 07-22-2007, 10:35 AM
Parent: #1
الاخ الحبيب تاج السر
قبل ما اقراء كلامك
هاك التوقعات
Quote:
الهلال X اسيك تعادل 1/1
المريخ X الاسماعيلي فوز المريخ 1/0 |
بقراء وبرد ليك
توقعات الهلالXاسيك والمريخXالاسماعيلى 22/7/2007
|
Post: #6
Title: Re: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير
Author: abuguta
Date: 07-22-2007, 10:53 AM
Parent: #3
ياشباب ليه انتو عاوزين طوالى الناس تمدح
خلو تاج السر فى قدحو
و مزمل فى مدحو
وبكرة ياخوانا تصحو
ناس زعلو وناس فرحو
انا بقول ليكم اخر كلام
المريخ لو هزم الدراويس فى الترعة
تانى ما بقيف قدامو الا البحر هو الصفاقص التونسى
يعنى نهائى فى الكنفدرالية..وسوف يكون كاس محمول بالتونسية
والترعة دى ياجماعة هى قرية الاسماعيلى
عندها ترعة زى كنار الجزيرة تبدا من السد العالى جنوبا وتنتهى فى قناة السويس شمالا
كلام تاج السر ليس ضار بصحة الكرة
لكنه نار تجلى الصدى
نتمنى للمريخ ان يحقق نجاحا
|
Post: #11
Title: Re: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير
Author: تاج السر حسن
Date: 07-22-2007, 11:01 AM
Parent: #6
حبينا ابو قوته
الله يدينا الفى مرادنا .. كما يقول صاحبهم!!
مربوطه اخت الثمانيه بى جاى .. ومربوطه بت عم "السبعه" بى هناك .. والأتو يكون رابط!!
|
Post: #7
Title: Re: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير
Author: تاج السر حسن
Date: 07-22-2007, 10:54 AM
Parent: #3
يا ابو الزفت
طبعا نحنا لو اتغلبنا وطلعنا "الطيش" برضو افضل من "الصغار" حتى لو طلعو الأول وده موضوع اتحسم بفضل الأتحاد الأفريقى لمن سمح للأندية الراسبة فى دورى ال 16 من منافسات كاس الأندية الأبطال انها تشارك مع ناس "الكونفدراليه" !!
رغم هذا فلو انتصر الهلال بهدف واحد فقط بعتبر الهلال مهزوم ولو المريخ انهزم ب 2 فقط سوف انزل بوست تهنيئه وأعتبر المريخ منتصر .. ناسك ديل ما عارفين "المرفعين" الأسمو الأسماعيلى .. والله لو عارفين كانوا كلهم بقو زى "علاء الدين طياره" يقابضو فيهم فى المطار واحد واحد من الأدارة وحتى الأحتياطى.
|
Post: #4
Title: Re: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير
Author: السمؤال بدرالدين
Date: 07-22-2007, 10:41 AM
Parent: #1
ابو الزفت
سلام
تاج السر ده بيكرة المريخ اكتر من حبو للهلال
ارج للبوست فوق كتب سطرين عن كورة الهلال
وصفحة كاملة عن المريخ
ده يسمو شنو
صحي الهلالاب مريخاب زعلانين
|
Post: #8
Title: Re: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير
Author: اساسي
Date: 07-22-2007, 10:56 AM
Parent: #4
والله يا تجتوج اسحن تكون البضاعة في رفوفها معروفة
بس المحيرني اني دايما كنت بعتقد انك زول واعي وبتميز وبتعرف الحق من الباطل والحكاية ما عاوزة حرفنة كتيرة عشان تتعرف
كيف زول زيك واعي وصاحب قلم وصاحب مبادئ ومثل وقيم تمر عليهو حاجة زي دي ويراهن علي نعجة عرجاء جرباء؟؟
مع حصان ادهم اغر ؟؟
من تجي في منطقة الهلال دي امورك بتتكوجن وكانها منطقة الظل لك لا تستطيع الرؤية فيها
مثل المنطقة المظلمة لسائق السيارة
طلع راسك يا صاح واستطكشف الطريق افيال عاجية بالجوار
واسود مريخية ضارية تتلزز بقرمشة الدراويش
|
Post: #12
Title: Re: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير
Author: تاج السر حسن
Date: 07-22-2007, 11:05 AM
Parent: #8
يا اساسى
حدى يشعر بالسعادة ويمشى يختار البعاد ؟؟
______________
يا اخى انت ماشايف نحنا ماشغالين كتير بالهلال لأنه عارف بعمل شنو ويغلب منو ومتين ووين، وفى كل الظروف هسه لو كنت هلالابى كنت تكون خالف كراع فى كراع ومشنق طاقيتك لو جيت الطيش تمد لسانك "للقوارير" !!!
|
Post: #9
Title: Re: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير
Author: تاج السر حسن
Date: 07-22-2007, 10:58 AM
Parent: #4
السمؤال كتب:-
Quote: تاج السر ده بيكرة المريخ اكتر من حبو للهلال
ارجع للبوست فوق كتب سطرين عن كورة الهلال
وصفحة كاملة عن المريخ |
- انا يالسمؤال بحب "المريخ" .. مووووووووووووت !!!
وصاحب العقل يميز.
- كتبت عن الهلال سطرين لأنه "مضمون" .. الكلام فى "الناكر" !!!
|
Post: #10
Title: Re: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير
Author: abuguta
Date: 07-22-2007, 11:00 AM
Parent: #4
"| Quote: قوارير" جمع .. قرقرقرقرقرقر .. وحقوق الطبع محفوظه للدكتوره "بيان"!! |
والله يا تاج السر لغة حديد
انا حالى قلت تجتوج دا بطلع من الزنقة دى كيف
صحى بيان تسمى ناس قرقرقر قوارير..ولها حق التصرف فى ذلك
لكن ياتجتوج..وين صعوبة الاسماعيلى البتخلى المريخ ما يهزمو
لكن الاسماعيلى تدنى مستواه الشهور الاخيرة...
واصبح ملطشة فرق القمة المصرية
|
Post: #13
Title: Re: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير
Author: abuguta
Date: 07-22-2007, 11:05 AM
Parent: #10
Quote: طلع راسك يا صاح واستطكشف الطريق افيال عاجية بالجوار
واسود مريخية ضارية تتلزز بقرمشة الدراويش |
والله يااساسى
انا عاوز اوقلك حاجة
خلى تاج السر الذى سكن هوى الهلال مخيخيه
وسكن مع الهلال فى حى واحد
انا ود الجزيرة العفين دا براهن على الهلال لا يهزم فى داره ابدا
نحن اسى بندعو معاكم الله يدروش الدراويش,,ويجعل شوتاهم طيش
|
Post: #15
Title: Re: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير
Author: تاج السر حسن
Date: 07-22-2007, 11:12 AM
Parent: #10
يا ابقوته يا اخوى
الأسماعيلى ده اسالنى منو .. تعرف المصريين ديل حقارين خلاص .. امبارح قاعد فى القهوة بشرب فى شاى .. والقهوة مليانه ناس والنجم الساحلى التونسى لاعب ضد شبيبة القبائل الجزائرى، كنت بتفرج براى والمصريين يلعبوا فى الطاوله والضمنه .. يعنى ما بهتمو بى اى فريق او أى مباراة ما فيها طرف مصرى .. اها جماعتك قاموا براهم اتشالقو زى عادتهم ودعوا الأسماعيلى فى السودان ومشى ناقص 8 لاعبين .. تعادل معاهم وهم ماخدين الموضوع جد .. شئ شلالاليت وشئ ضرب .. وشئ طفش .. وقرش بتاعت سليمان الله يطراهو بالخير .. الليله دى الا يرجعو لسليمان الفارسى وبدل خندق واحد يعملوا خندقين .. كدى اتذكر واحد اسمه "محمد فضل" بياخد الكورة بى صدرو وبرسلها "قنبله" اسال منو ناس الأهلى .. عذبهم "رايح جاى"!!
|
Post: #14
Title: Re: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير
Author: Deng
Date: 07-22-2007, 11:05 AM
Parent: #1
تاج السر الرشاشة.
هسع كده بيني وبينك كده, عقلك الباطن بقول لك شنوا؟
دينق.
|
Post: #16
Title: Re: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير
Author: تاج السر حسن
Date: 07-22-2007, 11:29 AM
Parent: #14
يا دينق
عقلى الباطن بقول لى كيف دينق بقى مريخابى ؟
ما سمع بى ايزاك أحد افضل لاعبى الهلال والسودان سابقا .. ولا ما بعرف ريتشارد أحد افضل لاعبى الهلال والسودان حاليا؟؟
يا دينق
حدى يشعر بالسعادة ويمشى يختار البعاد؟؟
|
Post: #18
Title: Re: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير
Author: تاج السر حسن
Date: 07-22-2007, 11:47 AM
Parent: #17
يا محمد عادل يا اخوى الصغير
القلب ده ما فى زول بتحكم فيهو .. هسه فى زول بقدر يختار يحب سودانيه ولا مصريه ولا أسبانيه .. ولا .. ولا ؟؟
اها انا بحب الهلال رمز الجمال .. ثم الأهلى المصرى .. ثم الأهلى السعودى .. ثم الشعب الأماراتى.. ثم ما نشستر يونايتد.
ثم من ؟؟
بحب "للمريخ" ... مووووووووووووت !!
|
Post: #19
Title: Re: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير
Author: تاج السر حسن
Date: 07-22-2007, 12:06 PM
Parent: #18
نسيت أن اذكر بأن مدرب المريخ الحالى "اتوفستر" حينما أشرف على نادى الزمالك المصرى انهزم من الأهلى هزيمه ثقيله بلغت 6/1، وكان "اتوفيستر" وقتها مثل "الثعبان .. يخرج لسانو ثم يبلعو وهكذا طول الوقت .. ووشو بقى زى الفشفاش !!
|
Post: #20
Title: Re: يا اسيك عايزين نتسد "السيك" .. ورجاء يا ناس "الأسماعيلى" رفقا بالقوارير
Author: تاج السر حسن
Date: 07-22-2007, 02:25 PM
Parent: #19
الأخوه فى مصر ارجو الا يشمتوا علينا ويحكموا على كرتنا من خلال اداء فرعنا الصغير مساء اليوم بعد أن اقنعهم الهلال بسحره الحلال !!
|
|