Post: #1
Title: شبال مزخرف بالنجوم -- هدية
Author: أبوذر بابكر
Date: 07-13-2007, 01:52 PM
لكل الزملاء العزاز
الشرفونا قريب
وللقدام كمان
النص إتنشر زمان هنا قبل كم سنة
والمحبة شديدة
|
Post: #2
Title: Re: شبال مزخرف بالنجوم -- هدية
Author: أبوذر بابكر
Date: 07-13-2007, 01:55 PM
Parent: #1
يا جايه من عمق الألق
مرسومه بى لون الصفا
ومسقيه من روح العبق
جايه وحِداك الأغنيات
شايله فى إيد الخريف
وفى إيدك التانية الوفا
كل الدروب
وقفت تبارك طلتك
تتمعنك
مندهشه كيف
إنه الفراش إنضم ليك
سمّاك حديقه
وفيك سرح
كيف الكلام
حاضن حروفو ومشتهيك
سواك حقيقه
عشان يحاول يكتبك
عنوان فرح
وكيف الشمس
نست الغروب
لبست ألق جيتك طِرح
بدل الشفق
يا جايه من عمق الألق
جايه ومعاك الأمسيات
نديانه بى معنى الحضور
نتقاسم الأيام هدايا
شويه ريد
وشويه عيد
شويه زهرات للفريق
وشويه غنوات للصبايا
وكل ألوان البريق
تشعل تفاصيل الحكايه
تعلن صباحك
ونشوة الريد الدفق
يا جايه من عمق الألق
يا جايه زى لحنا رزين
من جوه من بوح الوتر
موسق خطاويك بالحنين
يا طلتك
ضحكة نجيمة بعيدة عاشقه
وغمزه فى وجنة قمر
يا طلتك
إشراقة فى الزمن الضنين
شبّال مزخرف بالنجوم
موسم سنا
وإيقاع مدوزن فى نسق
يا جايه من عمق الألق
يا مارقه من ضوء القصيده
وطالعه من زهو النشيد
نشوان مقام الريده
فى زحمة غناى
طربان مبلل بى شذاكِ
ودمعة الفرح العنيد
روّضتى حزن الليل معاى
جيتك وطن
خليت أساى
ومعاكى خلانى الشجن
جيتك وطن
فتّ المواجع والرهق
يا جايه من عمق الألق
|
Post: #3
Title: Re: شبال مزخرف بالنجوم -- هدية
Author: هاشم أحمد خلف الله
Date: 07-13-2007, 04:15 PM
Parent: #2
آهـ انا منك آهـ يا ابو ذر ايه الحلاوة دي كلها انتا عارف القصيدة دي ممكن تتلحن وتتغني وانا
لها وخلال الأيام القادمة دي إنشاء الله اجيب ليك خبرها , كلام ينقط عسل ودا ما شبال مزخرف بالنجوم دا
شبال مزخرف بالكواكب والثناء . بس انتا خليك قريب علي فكرة امبارح إستمتعنا بحفل تكريم الفنان
سيف نورين وجلسنا انا والاخ صلاح شتات لحظات طويلة ذكرناك فيها بالخير طبعاً وكنت اتمني لو كنت
معنا .عموماً الجايات اكتر من الرايحات , بس خليك انتا في جدة مع السخانة والرطوبة العالية دي .
|
Post: #7
Title: Re: شبال مزخرف بالنجوم -- هدية
Author: أبوذر بابكر
Date: 07-14-2007, 06:48 AM
Parent: #3
أهلا يا هاشم
يا نبع الطيبة الغزير
كيفك يا زول يا زين
تعرف يا هاشم ما أفتكر نضمى زى ده ممكن يتلحن أو يتغنى
شغل الغناء براهو وشغل النضمى الساى براهو
ده طبعا على حسب كلام الناس المختصين، ناس المزيكا يعنى
بعدين قلت لى إنت وصلاح شتات قعدتو "تقطعو" فينى مش
عارفه بكون فال ليك شنو الود الشرير
كويس ما مشكلة لكين الله بوديكم النار
شوف فى الرياض دى انصحك تبعد من اتنين
صلاح شتات وتمبس
ديل الإتنين مسجلين خطر
الود معتصم صاح غتيت ومكار جدا
لكين ما شرير زى الإتنين ديل
شكرا ليك يا حلو
المهم أنا كلمتك غايتو
|
Post: #15
Title: Re: شبال مزخرف بالنجوم -- هدية
Author: أبوذر بابكر
Date: 07-15-2007, 06:58 AM
Parent: #2
Quote: وكيف الشمس
نست الغروب
لبست ألق جيتك طِرح
بدل الشفق
يا جايه من عمق الألق |
|
Post: #16
Title: Re: شبال مزخرف بالنجوم -- هدية
Author: أبوذر بابكر
Date: 07-16-2007, 02:06 PM
Parent: #2
Quote: كيف الكلام
حاضن حروفو ومشتهيك
سواك حقيقه
عشان يحاول يكتبك
عنوان فرح
|
|
Post: #4
Title: Re: شبال مزخرف بالنجوم -- هدية
Author: محمد عثمان
Date: 07-13-2007, 05:06 PM
Parent: #1
الحبيب...أبوذر..
ما اروعك.....
وانت تغزل خلايا الاحساس و تجعل الحرف
ترياقا شافيا و انت تنقل لنا كل هذه الاحااسيس
و الالق الجميل...
شكرا للقصيدة والشباال الراائع..
و المحبة شديدة...
|
Post: #8
Title: Re: شبال مزخرف بالنجوم -- هدية
Author: أبوذر بابكر
Date: 07-14-2007, 07:13 AM
Parent: #4
محمد عثمان
كيفك يا فنان
الروعة يا صديقى ما بتكتمل إلا بيك
منك وفيك
مشكور يا سمح
وتستاهل الشبال
|
Post: #5
Title: Re: شبال مزخرف بالنجوم -- هدية
Author: هند محمد
Date: 07-13-2007, 08:09 PM
Parent: #1
حقيقى قمة الروعه استاذ ابوذر ..لى موعد دائم مع قصائدك لن أخلفه ..
تسلم وتسلم حروفك ..
|
Post: #6
Title: Re: شبال مزخرف بالنجوم -- هدية
Author: mohmed khalail
Date: 07-14-2007, 01:27 AM
Parent: #5
ابازر
في طلة الا وعي .. وغادي
حضورك ..غيب اللحظات هِنا..
وشبّع الاحساس.........غُنا
ادركت انك ما ....اعتيادي
مودتي
|
Post: #10
Title: Re: شبال مزخرف بالنجوم -- هدية
Author: أبوذر بابكر
Date: 07-14-2007, 07:19 AM
Parent: #6
محمد خليل
فى حضورك نغنى
والألق يمتد هادى
تخضر أوراق التمنى
ويزهر الفرح البنادى
والمحبة اشد
تعرف يا محمد إسمك دائما بذكرنى واحد من الصحاب العزاز
زميلنا محمد خليل محمد الحلفاوى، بيطرة الخرطوم
|
Post: #9
Title: Re: شبال مزخرف بالنجوم -- هدية
Author: أبوذر بابكر
Date: 07-14-2007, 07:14 AM
Parent: #5
هند
صباحاتك ألق
وأنا لى موعد مع الفرح
لما يزهر حضورك وتتفتح زهورك
شكرا كتير على الإسعاد
|
Post: #11
Title: Re: شبال مزخرف بالنجوم -- هدية
Author: ماجدة عوض خوجلى
Date: 07-14-2007, 07:31 AM
Parent: #1
صباحك كلو خير يارب ومفرح ذى كلامك
كنت عايزة اقتبس جزء لقيتا كلها اجمل من بعضها
شكرا ليك كتير على هذا الجمال .
تحياتى
|
Post: #12
Title: Re: شبال مزخرف بالنجوم -- هدية
Author: mohmed khalail
Date: 07-14-2007, 07:46 AM
Parent: #11
ابوذر
لك ولمحمد خليل الحلفاوي الف تحية
دايماً الاخ الاستاذ عزمي احمد خليل بصر على اني حلفاوي من (عنديهم) عشان الاسم حتى بعد ما عرف اني
كردفاني قال لي: يعني شنو المسيرية ديل بكونو خطفوك صغير.
لك كل الود
محمد
|
Post: #14
Title: Re: شبال مزخرف بالنجوم -- هدية
Author: أبوذر بابكر
Date: 07-14-2007, 03:25 PM
Parent: #12
مجددا ليك السلام يا محمد يا خليل
وعبرك تحايا للشاعر الفنان عزمى
وعبر عزمى المحبة لكل أهلنا وأحبابنا النوبيين وين ما كانوا
وعبرك تانى
تحايا بألق المردوم وريحة التبلدى والرمال بعد المطر
لكردفان كلها
كرفان السمحة أم ناس سمحين
والله يا محمد أنا الكنت بتمنى يخطفونى الحلفاويين ديل وأنا صغير
عشان أبقى حلفاوى وأتعلم اللغة النوبية
كنت بقول الكلام ده برضو سبحان الله لصديقنا الحبيب الفنان المليان بالإبداع
وهبة ولولى، وهو بالمناسبة شقيق المطرب صالح ولولى
وكل واحد فيهم فنان اكتر من التانى
شكرا كتير يا ابو حميد
|
Post: #13
Title: Re: شبال مزخرف بالنجوم -- هدية
Author: أبوذر بابكر
Date: 07-14-2007, 10:33 AM
Parent: #11
العزيزة ماجدة
المكان إزداد ألق
بى جيتك المفرحة
والصباح فاض بالحبور
نور وزهور وعطور
إن شاء الله ايامك كلها عافية وسعادة وطيبة
والجمال جانا بى جيتك يا ماجدة يا مجيدة
شكر كتير وتقدير غزير وود وفير
ليكِ
|
Post: #17
Title: Re: شبال مزخرف بالنجوم -- هدية
Author: عبدالله داش
Date: 07-18-2007, 06:18 PM
Parent: #1
دعوه أولى
للدهشــه فقط
..
.
.
بجيك إذا
إمتد العمر لحظات
بجيك بالجد
|
Post: #21
Title: Re: شبال مزخرف بالنجوم -- هدية
Author: أبوذر بابكر
Date: 07-19-2007, 01:39 PM
Parent: #17
الزول الدعاش
يا عبد الله داش
جيتك وصول المواسم المحملة
بالقرنفل وورد الأغانى
الأغانى الملونة بالعطر
المعطرة باللون
وتلقانى مستنيك
جنب الشمس عشان أهديك كم حزمة كده من الضوء
وكمية كبيرة من المحبة
|
Post: #23
Title: Re: شبال مزخرف بالنجوم -- هدية
Author: عبدالله داش
Date: 07-20-2007, 09:42 AM
Parent: #21
إحتمـال ....
الجيه سالكه دروب ضهب
ودرانه
من كيف الغنا
قولك سَــكَر حس الشعور
وبعدين
فى ظهر السكه
كم حاجه
ب تْعــز إحتمالية الرجوع
جمعه سمحه
يا صاحب
|
Post: #18
Title: Re: شبال مزخرف بالنجوم -- هدية
Author: Alsa7afa_30
Date: 07-18-2007, 07:19 PM
Parent: #1
روووعة X روووعة...
|
Post: #24
Title: Re: شبال مزخرف بالنجوم -- هدية
Author: أبوذر بابكر
Date: 07-20-2007, 02:29 PM
Parent: #18
| Quote: روووعة X روووعة = الصحافة 30 |
إزيك يا فنان
الروعة تستكمل
ويبقى المكان أجنل
بى جيتك السمحة
|
Post: #19
Title: Re: شبال مزخرف بالنجوم -- هدية
Author: awad okasha
Date: 07-18-2007, 07:39 PM
Parent: #1
| Quote: شغل النضمى الساى براهو |
يا زول انضم وفجر حروفك ، الغنا امرو هين .
شكري ومودتي 
|
Post: #20
Title: Re: شبال مزخرف بالنجوم -- هدية
Author: ابوبكر يوسف إبراهيم
Date: 07-19-2007, 11:30 AM
Parent: #19
أباذر
ضمخت وجداننا بهذا الضوع من الدفق الحالم ، حملتنا إلى هناك بين الغيوم فسبحنا في فضاءآت جميلة لا تعرف إلا للصبابة منهلاً .. هذه المشاعر الإنسانية لا تنبع إلا عن أصالة.. أنت وحدك في قصيدتك إبن الأصالة فيبدو أنك تقف عنيداً أمام القوافي فتطيعك صاغرة ..يبدو أنك أحببت جنيات عبقر فأحببنك وأطعنك أنك ترصف حواري الوجد بالشعر وتسيجهب بهذه القصائد النميقة والمواويل كأنها رجع عزفك على ناي القصيدة .. لن تبيعك صاحبة الشبال بقبلة غاشَّة ولن تهدم حلمك الجميل لذا كان صدق الإحساس في النظم والصنعة وإمتلاكك لأدواتك وقد طحت بي الأبيات التالية إيما طحي فساقتني نحوها كما الشادوف وهو يروي ظمأ الجروف .. أبدعت فأمتعت .. دعني أحمل ربابتي وأترنم وأقول راوياً عنك:
وكيف الشمس
نست الغروب
لبست ألق جيتك طِرح
بدل الشفق
يا جايه من عمق الألق
جايه ومعاك الأمسيات
نديانه بى معنى الحضور
نتقاسم الأيام هدايا
شويه ريد
وشويه عيد
شويه زهرات للفريق
وشويه غنوات للصبايا
وكل ألوان البريق
تشعل تفاصيل الحكايه
تعلن صباحك
ونشوة الريد الدفق
يا جايه من عمق الألق
يا جايه زى لحنا رزين
من جوه من بوح الوتر
موسق خطاويك بالحنين
يا طلتك
ضحكة نجيمة بعيدة عاشقه
وغمزه فى وجنة قمر
يا طلتك
إشراقة فى الزمن الضنين
شبّال مزخرف بالنجوم
موسم سنا
وإيقاع مدوزن فى نسق
يا جايه من عمق الألق
|
Post: #22
Title: Re: شبال مزخرف بالنجوم -- هدية
Author: عبد المنعم سيد احمد
Date: 07-19-2007, 01:48 PM
Parent: #20
شكرا الشاعر
ابو ذر
للهدية الراقية
النجوم ياصديقى تتلالا فى حضرة
حرفك الاخضر..
|
Post: #25
Title: Re: شبال مزخرف بالنجوم -- هدية
Author: Ishraga Mustafa
Date: 07-20-2007, 02:34 PM
Parent: #22
Quote: يا مارقه من ضوء القصيده
وطالعه من زهو النشيد
نشوان مقام الريده
فى زحمة غناى
طربان مبلل بى شذاكِ
ودمعة الفرح العنيد
روّضتى حزن الليل معاى
جيتك وطن
خليت أساى
ومعاكى خلانى الشجن
جيتك وطن
فتّ المواجع والرهق
يا جايه من عمق الألق |
هدية تسكن الروح بالطرب الشجى
كتابة بيفسدها تعليقى خليها كدى
|
Post: #26
Title: Re: شبال مزخرف بالنجوم -- هدية
Author: شهاب الفاتح عثمان
Date: 07-20-2007, 06:32 PM
Parent: #25
Quote: [كيف الكلام
حاضن حروفو ومشتهيك
سواك حقيقه
عشان يحاول يكتبك
عنوان فرح |
وشبـــال وقدلــه
في حضره المبدع و الابداع
ويا عندليب جيب وجيـــب ....
|
Post: #27
Title: Re: شبال مزخرف بالنجوم -- هدية
Author: شمس الدين خواجات
Date: 07-20-2007, 07:13 PM
Parent: #26
Quote: وإيقاع مدوزن فى نسق
|
تبا لك ايها الجميل ,,
يا ذرور ,,
دوزن كما تحب ,,
واظنك كما حكانى التاج عنك ,,
بمزاج ,,,
ودى ياصديق,,
وبرضو تقول من الذين فيهم شفاء للناس,,
|
Post: #33
Title: Re: شبال مزخرف بالنجوم -- هدية
Author: أبوذر بابكر
Date: 07-22-2007, 06:40 AM
Parent: #27
شمس الدين
يا شمسنا الوفية
يا مشاوير المعزات الندية
إنت و"التاج" مأواكم الروح
مع الجميلين والأحباب
الذين فعلا فيهم شفاء للناس
وحسن أولئك صديقا
|
Post: #32
Title: Re: شبال مزخرف بالنجوم -- هدية
Author: أبوذر بابكر
Date: 07-22-2007, 06:37 AM
Parent: #26
الشهاب الوهاج
كيفنك يا سمح
وحروفك تغتح شبابيك الغنا
تنادى الضوء معاها
وتجيب لينا النجوم
ونرقص سوا
شكرا يا دكتور على إسعادنا بى طلتك المفرحة
|
Post: #31
Title: Re: شبال مزخرف بالنجوم -- هدية
Author: أبوذر بابكر
Date: 07-22-2007, 06:34 AM
Parent: #25
جيتك كفاية يا إشراقة
تسمن وتغنى من كل الكلام
يا جاية من منبع الإشراق
ودى وتقديرى الكتير
|
Post: #30
Title: Re: شبال مزخرف بالنجوم -- هدية
Author: أبوذر بابكر
Date: 07-21-2007, 03:32 PM
Parent: #22
منعم
كيفك يا سمح
يا ريت الهدية تكون قدر مقامك العالى
وتليق بى حسك النديان
وإنت القمر فى حضرة النجوم
تسلم كتير
|
Post: #29
Title: Re: شبال مزخرف بالنجوم -- هدية
Author: أبوذر بابكر
Date: 07-21-2007, 09:21 AM
Parent: #20
يا ابابكر
حياك الخالق يا صديقى
وأدامك طيبا وسعيدا بمثل ما اسعدنى حضورك الوريف
وليتنى والله أكون ولو جزءاً يسيرا مما قلدت به جيد اللحظة هنا
من إطراء باذخ لا نتطاول لنبلغ ذراه العالية مثلك
نحاول يا صديقى أن نشارك ولو بالقليل مما قد يضع بعض ألوان وقليل من الفرح هنا وهناك
وليتنا نستطيع
أحييك وأنحنى
ثم أهديك المودة هميمة والمعزة عميمة
|
Post: #28
Title: Re: شبال مزخرف بالنجوم -- هدية
Author: أبوذر بابكر
Date: 07-20-2007, 08:35 PM
Parent: #19
يا ألف مرحب يا عوض
وأقعد جوه المعزة
أهلا وحقلا وسهلا
وكل الحاجات السمحة الباقية
تتفجر فيك بى حنان وريدة
|
|