البورداب بين اللعب المنظم والشوت الضفاري

في بوستي الأول (لحظة شهيق) واليتيم حينها تحدثت عن بداية علاقتي بالمنبر وكيف أن جهلاً باللغة الإنجليزية حال بيني وبين دخولي المنبر أنذاك وتساءلت في السياق عن الأسباب الموضوعية والذاتية لهجرة عصافير الفرح أوالفنانين و نعود اليوم للمنبر وتاريخية العلاقة بيننا , فبعد سنون *1 تطورت علاقتي بالكمبيوتر , ونسبياً باللغة الإنجليزية فعلمت أن الدخول للمنبر له شروطه وهي شروط تطلب إجراءات ترشيح وتثنية , قبول ورد فآثرت التمرمغ*2 في ضله وأصبحت منبرياً أكثر من المنابرة ( المنابرة مفردة خاصتي سأضرب عليها حائطاً من الفكرية وكل من وقف بسورحديقتها , من حاول فك ضفائرها , مفقود مفقود مفقود ) , الهام انني عدت للمنبر ووجدت اسماء لمعت واسماء توارت بزحمة الحياة وتبدلت الموضوعات فطغي السياسي علي ما عداه من فكري وثقافي وفني , والمسرح (رهاب رهاب) عدا أنفاس مازالت تشهق تزفر بما هو مفيد وملفات قمة في الفخامة ولغة علمية متادبة وخلاف يشهيك الخلاف كلمة بكلمة , منطق بمنطق , وأخالفك الرأي وأحترم رأيك فكان (كلما إقترب الحزب الشيوعي من الواقع كلما إبتعد عن الماركسية لعدلان أحمدعبدالعزيز) وكان (الحزب الشيوعي هل هو حزب ميتافيزيقي لقاسم قور) وكان (منصور مفتاح وشيعته ومران علي الصبرالجميل لمحمد عكاشة) فتمتع نفسك بالدهشة مارا ًمروراً هادئاً بنجدة البورداب للطفل الرائع محمد (د.بيان وبورداب العالم) ونجدة الأسرة السودانية بمطار الدوحة (تراجي وبورداب الدوحة وامريكا) فتحول المنبر إلي دولة يحكمها شعبها بإمكانياته الفكرية والاكاديمية يتداولون السلطات دون تبرم ينشئون وزارات شئون إجتماعية دون ضجيج ويختلفون بكل أدب حيناً معارضة منظمة( ولعب مموسق) . . . وحيناً يحيلون البورد لساحة من ساحات الوغي أن فقدت التركيز فيها تجد نفسك ( شايت ضفاري ) ومهاجم حتي نفسك و في كم بوست !!! وتدخل ميدان (الدافوري السياسي ) وتجد العالم قٌولب (بضم القاف كسر الياء) فقط يساراً او يميناً فمن لم يجدك بمركبته فلا يظن فيك خيراً فأنت بلا أدني شك إمتطيت المركبة الاخري والتي يكون راكبوها أيضاً غير ظاني فيك خيراً فأنت لست بمركبتهم , فتكون يمينياً ( قاعدياً بن لادنياً) ويسارياً ( فيدلياً كاستروياً ) في ان واحد ( أي مركب شريحتين!!!)

* 1 سنون هي هي سنوات ولكني أستخدمها لزج نفسي زجاً سط قبيلة المثقفين
* 2 التمرمغ هي التمسح مبنيً ومعنيً

سلامات يا احمد

اكتب ما تراه صحيحا .. المسألة هنا شلليات واكوام
تلقى زول بقول كلام تعجب له
تمشى موقف تاني تلقاه كاتب ضدوا
اي زول هنا شغال ون مان شو
يبدل الشخصيات على حسب الموقف..
وهذا ما يفسد المنبر..

هناك اناس يجب تعالمهم معاملة السكارى في شارع بيتكم..
تسفهم تماما...
واصلها هيجات بتمر وتنتهي على مافيش..

د. بيان سلام
عجبني جدا" تعليق الشاب القال (لو دخلت بوست ولقيت عجاجتوا في السماء وواحدة شليلة ساطور وسفروك تعرف إنوا بيان في البوست دة) عجبني وخوفني هسع خايف يجي منو يقول شنوا ماعارف وألقي نفسي في حيص بيص بوردي ويتحول البوست دة لحالة من حالات موقف مواصلات الحاج يوسف خبط وضرب ونبذ ونشل !!! عشان كدة حقوا أبيعوا , أأجروا .. أو أبدلوا بأي بوست تاني وبدون فرق
تسلمي للحضوروللمتابعة

يقال إنو البوردابي في أول بوست بكون ظريف وماسك العصاية من النص وردوده كلها تبتدئ بـ (الشفيف فلان، الرائعة علانة، الـ...)
لكن من البوست التاني بتعرف هلالابي ولا مريخابي وردوده كلها تبدئ بضربات من نقطة الجزاء (العوير فلان، البايخة علانة، الـ...)
لكن الظاهر وقعنا في محامي عكليتة، دلوقت سعادتك ليك بوستين وكم مداخلة وما عرفناك لأي العرضتين (شمال ولا جنوب) تنتمي
يا مان كفاك
هات م الآخر
شايت على وين!؟

احمد موسى
بودراب كندا ديل بشوتو شوت ولاشوتات دايروكان ديك

يا محمد عادل ياخ انا أشرف داخل بي تثنيتوا يعني (الريًََُال)علي قول أخوانا الخليجيين كفيلي وبصراحة انا راجعت قوانين المنتدي ما لقيت لو المثني سحب تثنيتوا بحصل شنوا خفت قلت معناها في بنود سرية وكدة !!! وراجعت قوانين منتديات شبيهة لقيت نفس الورطة عشان كدة انا ماشي عل العجين ما ألخبطوش
ويا أشرف انا لسة في الربع ساعة الأولي مرحلة جس نبض الفريق التاني وخوفي من المرتدات اصبر علي شوية وحنصل النهائي وأطمئنك أنا شايل مستندات رسمية بالإنتماء عارف الورطات (القاع) تحصل علي قول أهلنا السناجك ماكلين البلد والحروف