(الفكة) او سرقة النساء..ترياق ضد الزمن.. ام انحراف في بوصلة الاخلاق؟

اسباب سرقة الفَكَّة.. (الغاية تبرر الوسيلة)

نحن نفعل هذا ..اتدرون لماذا؟

1. بخل الزوج
2. الاستفادة م أخطاء الزواج الأول بسرقة الزوج الثاني..
3. القرش الأبيض لليوم الأسود.
4. فوائد ما بعد الخدمة..!
5. سرقة مقننة.. محاولة تقليص مصادر الصرف الأخرى..!
6. توفير ضد إسراف الزوج..!
7. زوج بـ(جيب) مليان.. يعني (عين) كثيرة الزوغان..!
8. تقرب من الزوج وذلك بفك زنقته حينما (يزنقه) الدائنون..
9. السرقة من الزوج لحماية الأبناء من السرقة..

قواعد الاستيلاء على ما في جيب الزوج؟

1. السرقة بمعرفة الزوج وموافقته..
2. دون علمه.. ثم بعلمه لاحقا..
3. السرقة بغرض السيطرة..
4. الإكثار من الطلبات وشراء كل ما تقع عيوننا عليه..
5. تغيير الجلابية التي يذهب بها الى السوق بواحدة اخرى وبسرعة.

تكتيك الزوجة في اقتلاع واستخدام المال
6. لا تخبريه أبدا بأنه لديك مبلغ من المال..
7. لزوم منع العودة الطوعية إلى الوطن
8. المباعدة بين كل (هَبُرة) والتانية (ما في كل مرة تسلم الجرة)
9. اختيار التوقيت المناسب..
10. البدء بكميات بسيطة، لزوم جس النبض..

تفرعاتها:
1. سرقة المحال التجارية الكبيرة
2. ما غلا ثمنه وخف وزنه
3. استخدام الاطفال في السرقة، لمزاياه الكثيرة
4. الاستفادة من الحقيبة المدرسية لاخفاء الغنائم
5. الاستفادة من الملابس كمخابئ..
6. سرقة بيوت الافراح
7. وسرقات اخرى سنكشف عنها لاحقا..

11. "المرة الوحيدة التي سمح فيها الإسلام للمرأة الأخذ من مال زوجها دون علمه هي عندما يكون الزوج شحيحا وبخيلا..". * هل هذا صحيح؟" علماء المنبر ..مدد..!! ..النجدة..!
12. السرقة سببها عدم الامان من الزوج...صح؟ الحقونا يا ناس علم النفس ..

*نقلا عن صحيفة الوطن السعودية

ومنكم نستفيد
حليمه يا مجنونه
الغبار ده شنو

غايتو الليله
بيربطو ليك بي ورا البوست ده
شي مقاشيش وشي مفاريك وشي.........
المهم نحنا معاك وبنحميك


مودتي

اخي احمد
سلامات..
لسع (الشعفوفة) ماشة عليك..

شعفوفه؟؟؟؟؟؟؟؟؟
شعفوفة شنو دي ام كبك (بضم الكاف) عديييييييل
لكن الواحد كويس انو يكون محصن يعني البوست ده
اشتريناهو منك وانا واخوي احمد الشايقي بندفع
القيمه بس انتي حددي

مودتي

احمد العربي..
ده والجايات (هُوَادة).. اها قصرت معاك؟

والغريبة ياحليمة اختي..
أن النساء لتي تسرق ازواجها لأسباب كثيرة....اعتقد ان اقواها ايجاد الأمان او خلقه..
نجـد ان ازواجهن شديدي الثقه فيهن لدرجة بعيده!



تحياتي وعيد حب سعيد

مني

منى بت عوض..
نُوَّارتنا..
يديك العافية..
طول عمرك لماحة..

ايوه.. كده الكلام دخل الحوش ( أقصد الجيب)!!
لكن نحنا من باب الاحتياط بنستعمل (ضهرية العربية كمحفظة) و الاكثر ذكاء بستعملوا بطاقات الصراف..
و من باب الاحتياط نخليها بعيدة و نجر من الدكان..
رأيك شنو!!
و المسألة أصلا ممتعة ، لأنو العكننة دى بتخفف على الزول العكننة الاكبر" على وزن الشيطان الاكبر"!!

Quote: لكن نحنا من باب الاحتياط بنستعمل (ضهرية العربية كمحفظة) و الاكثر ذكاء بستعملوا بطاقات الصراف..

اسعد يا ريفي..
اسعد الله ايامك..
حمدا لله على السلامة
يعني يا اسعد المخبأ دا عارفنو من زماااااااان..
تحب اقولك الباقي وين؟ ولا احسن اخليها بعد شوية.. لقدام..
خالص مودتي..

كيفية خداع الرجل..ماذا تقول المرأة ..؟

1. الإكثار من المساج..
2. خليك مسكينة زي النعاج
3. كتري من أكل الدجاج
4. التأنث التقيل، خاصة بعد الخامسة مساء

الازواج المغتربين.. مدللون ام مستغفلون؟

الزوجة (المغتربة)..داهية بماء ابليس معجونة..
ام مغلوبة على امرها وممكونة؟

يلا يا ممكونة في انتظارك..

حينما اعطاها قفاه، مدت لسانها ساخرة منه ومن حبه.
وقررت فش غلها فيه وكشف المستور في شخصية الرجل الـ(بحبها) مسحور..

Quote: احمد العربي.. ده والجايات (هُوَادة).. اها قصرت معاك؟

ابدا حاشاك التقصير
ونحنا من جانبنا بنعلن الحمايه
بس لو المفاريك دورت قولي عوك
طبعا ممكن تجيك بالماسنجر

احمد العربي..
كيفنك؟
مادام فيها مفاريك معناها شكلة نسائية بحتة..
ما تنسي تكتيك (المِعِّيط)

الزوله الرائعه حليمه
المعيط ده والله ما بنعرف ليهو
نحنا ناس ام دلدوم سسسسسسسسسسسسسسسسسسسسسسسساكت زي ما قال عماد عبد الله
وام دلدوم دي ما بنعمله مع الحريم
لكن البتجي شايله مفراكته
بنهدده بتزويج راجله من فوق ليها
وامشي بوست الماذون بتلقي الوصفه
وده واحد من التكتيكات
المهم انتي تكملى الخيط ده للنهايه
علشان البيعه تتم
خالص الود

Quote: نحنا ناس ام دلدوم سسسسسسسسسسسسسسسسسسسسسسسساكت زي ما قال عماد عبد الله وام دلدوم دي ما بنعمله مع الحريم لكن البتجي شايله مفراكته بنهدده بتزويج راجله من فوق ليها

احمد
خليك ون واي وركز على ام دلدوم دي بس..
(ام دلدوم دي عين العقل).

دبابيس نسائية: ما بين الرجل والمرأة ..الاخوة كرمازوف

*عزاز محمد أبو الشام

1. ماذا تفعلين إذا قرر زوجك ترك المنزل؟ هل تقولين له " قطر عجيب يودي ما
يجيب" وتصفعين الباب خلفه؟
2. اذا قلت لزوجك بأنه يوسف في الجمال، وصدق هو هذه الفرية، بينما هو في الواقع
أبو الأسود الدؤلي، لا تبتئسي، لستِ الوحيدة التي تمارس هذه السفسطائية كل يوم. معظم
النساء يفعلن نفس الشئ
بما ان الرجال شديدي التشابه، بل وجهين لعملة واحدة، خذيه بعيداً عن الآخرين وقولي
له انه ليس له شبيه، لا تدعي الآخرين يسمعونك.. الاحتياط واجب..من يعرف، قد
تحتاجين لترديد هذه العبارة مرة أخري، في موقف آخر شبيه بهذا..!!
4. لا تدعي زوجك يسرح بفكره بعيداً. إن العالم الخارجي صغير جدا ومليء بالأخريات
اللائي يستنجدن بالشيخ أبي شرا ويردنه بشدةـ ولو راجل مرا- ويرتضين المناصفة،
التي لا تكون في الغالب في صالحك..!!
5. و من اجل إراحة البال، تخيري الصغار منهم دائما. ويما أنهم لا ينضجون أبدا،
من الأفضل أن تعملي علي إعادة تشكيله.
6. لا تنسي أن تعريف العازب يقول: انه الرجل الذي فاتته فرصة جعل امرأة ما تعيسة..!!
شفتي من الصباح أنا قاعدة أقول ليك في شنو؟؟
7. لكي يساعدك الرجل في إنجاز أمر ما، الجئي إلي الاعتراف بأنك صرت متقدمة في السن،
حتى ولو لم يكن الأمر كذلك. ولكن لا تنسي التبعات المستقبلية للراحة الوقتية...!!
وبطريقتك غايتو..!!
8. رغم الاعتراف الدائم بان الحب اعمي، إلا إن الزواج نظره 66.
9. إن الحصول علي رجل شديد الالتزام بك وبمنزله، يستلزم البحث الجاد في
مستشفي التجاني الماحي..للجماعة إياهم..!!
10. وإذا سالك أي الكتب تفضلين مطالعته، لا تترددي في إخباره انك تفضلين بشدة مطالعة
دفتر الشيكات ومافي داعي للتذاكي(من الذكاء) والتثاقف(من الثقافة).. ما ح يصدق
إلا الدفتر، وهو بالطبع ليس "دفتر العودة إلي الوطن" للكاتب ايمي سيزير..
11. تذكري أن حس الفكاهة لا يعني الاجتهاد في استنباط و إطلاق النكات، ولكن بالضرورة
الاستفادة من سيناريو الفيلم الذي يعتبر رجلك بطله الوحيد.
ليس بالضرورة إتباع التعليمات السابقة، بإمكانك الإضافة والحذف والإلغاء والتعديل،
لكنك لن تخرجي عن هذا النطاق..
إن حدث ذلك أفيدينا..

مع شكة دبوسية أخري..

*صحفية سودانية مقيمة بالسعودية

نقلاَ عن سودانجا..
http://sudanja.org/modules.php?name=News&file=article&sid=248

ذكر اللواعج والشوق . المرحلة الاولي قبل الاضراب عن ذلك..!!

الفتح:
البساتين حَنَّتْ
رمت تفاح قُبَّالي الرواة ما غَنَتْ
جيت واقف قريب بسلكهن بَتْصَنَّتْ
لقيت مكتوب يا داير وِصَالْنَا إتْحَنَّطْ

على ود بابكر:
حاوَرَتَ لَعْبَتْهِنْ أُمَّاتْ حِجُولَنْ رَنَّتْ
وِتْ ماك مجتهد بالفاضي مابْ تَتْقَنَتْ
كَمَّلْتَ الصِنَعْ لَمَّنْ لَبَاسي إتْشَنَّطْ (اي اهترأت ملابسي)
وبي دفع الفلوس راقت معاى وِسْتَنَتْ

حليمة
سلام.،
ولتسرق عقله ولبه قبل جيبه..
ساعتها سوف يترنح (هذا) المدعو (الرجل).. وسوف يتلذذ كذلك بالهزيمة..

Quote: ولتسرق عقله ولبه قبل جيبه.. ساعتها سوف يترنح (هذا) المدعو (الرجل).. وسوف يتلذذ كذلك بالهزيمة..

الاخ سماعين
تحياتي..
الا قول لي ياتو الاولي بالسرقة اولاَ: الجيب ام القلب..؟ والله انا يخيل سرقة الاول اسهل بكثير من التاني..
خالص مودتي..

ياحليمه سلام عليك والله دنيا النساء بخير

وكتر خيرك كتير آنستينى كتير وضحكت وانا لوحدى

ذى المجنون ..لكن قولى لى بعد ماينسرق الاول بفضل

شنو مبقعد (هلو) اجوف ..ياشيخه يديك العافيه ..

وطبعا كل الطربقه الظريفه ممكن تتفكك وتبقى شكله جاده

مبتحلها ام دلدوم ولا البنيه وتشيلى شيلتك ولا كنش ولا مفاريك

مع الشكر الجزيل بهذه الاستراحه الظريفه

الاخ شاذلي مساك الله بالف خير
والحمد لله انك ضحكت في غربتك..
يا اخوي شاذلي النسوان بخير والرجال برضو بخير.. (شوف عبارة برضو دي).. وفي الاساس ليش هناك جيبين؟ هذا التساؤل الاول.. ولماذا لا يكون هناك جيبين؟ هذا هو التساؤل الثاني.. التساول الاول تفرضه ظروف الحياة الجديدة.. والتساؤل الثاني تفرضه الظروف الاقتصادية الجديدة كذلك ونظرة الاهل الى البنت باعتبارها مصدر اقتصادي معطل عن العمل في الخليج.. والتساؤل الثالث الذي اخرته مخصوص.. ماذا تفعل المراة وهي تصادف خبرات جديدة من مختلف الجنسيات بعضها بارع في (الهبر) مهما كان وضعه الاجتماعي والاقتصادي.. والنوعية دي انا بعرف منها نماذج يا ساتر..ممكن تشغل سرقة "بالباطن".
لو وضعت هذه الاشياء في اطار جاد لانفض الناس من حوله ولم يقرأوا البوست .. وبعدين القراءة الجادة قد تخلق مشاكل بين الاثنين.. لذا وضعتها في اطار كوميدي.. عشان السارق والمسروق يقرأون في لحظة ابتسامة والباقي بطريقتهم..
لك خالص مودتي
وبالله كتر المرور وتابع البوست..
خالص مودتي..
حليمة

العزيزة حليمة

سلامات

تعرفي اباحة ان تأخذ المرأة من مال زوجها دون اذن ما يكفي حاجتها وحاجة عيالها
بتوري ان المرأة شريكة في هذا المال..
كما انه لا يجب ان تعطي المرأة من مال زوجها اي طرف خارجي دون اذن الزوج
وهذا سبب السرقة تريد الزوجة ان ترسل لاهلها مال او كماليات فتسرق.
فهي التي ترفض دائما ان يعطي زوجها مال لاهله تسرق لتعطي اهلها..
مع ان هذا حرام

اخبرتني صديقتي المتدينة انه عندما تزوجت اخبرت زوجها ان يعطيها اذن مفتوح
في ان تخرج اذا كان غير موجود دون اذنه ولا تنتظر عودته
وانها كريمة جدا لا يمكن ان ياتي احد دون ان تكرمه
ووبذلك ستتصرف في ماله ومؤنته. حيث اذا اتت سيدة من اطرافها
عمة خالة فهي تعطيها صابون او قروش كما هي العادة
وتخجل ان تسأل زوجها.
وأن تدخل اعمامها وخيلانها واولادهم اذا اتو لزيارتها دون ان يكون موجود
فهي لا تستطيع ردهم من باب بيتها
وافق الزوج وعفا لها..

في المقابل تجدي رجال ملتوين لا يمكن الا ان تكون المرأة ملتوبة
حتى تحقق ما تريده..
مرات فراغ عين المرأة ونظرتها لزوجها كخاتم المنى يحعلها تنزلق لمثل هذه الامور..
وكذلك مفهوم الرجل السوداني انه المرة المفروض ما تعرف قروشك
دي برضو مشكلة كبيرة.. فلا تستطيع المرأة ان تقدر امكانية زوجها..
اذكر عندما كنت اعمل في الجامعة كنا فقط انا واخت اخرى
فكنا نعرف الفوائد والزيادات
اذكر احدهم قال لي ممازحا اوعى تكلمي النوسان جايانا زيادات.
فكما ترين المرأة هنا مغيبة تماما عن الوضع المالي..
للرجل.
من تجاربي ان كلما قل تعليم المرأة كلما كانت اشطر في السرقات والاختلاسات
وتسخير زوجها لخدمة اسرتها..
التعليم يفسد فرص المرأة في عمل الاشياء الملتوية
والدوران.
ففكرة من الشمارة للخمارة فكرة جهنمية تعمل على تقصيص جناح الرجل
حيث لا يزيد ماله ويتوفر حتى عينو ما تزوغ..
اذكر مرة تزوج رجل كانت زوجته اقتصادية جدا
عقب خبر زواجه اتلمينا مجموعة من النساء صدفة
سال زوج صديقتي زوجته: اها اجتماعكن اسفر عن شنو؟
قالت ليه انه الراجل سروالو ما يفوت ركبتو.
ودي برضو حكمة قديمة
يعني منذ البداية جداتنا قمنا بافقار ازواجهن
بحيل متعددة مثل بناء غرف في المنزل بدون سبب.
لاحظي بيوت القرى كم غرفة في المنزل
كلما زاد المحصول ظهرت "عوضة"
ودي خطة سستمتك. يمارسنها الان النساء
بشراء الذهب والتياب وتغير الاثاث..
او الدخول في مشروع بناء منزل
افقار من اللمهد الى اللحد

Quote: نجـد ان ازواجهن شديدي الثقه فيهن لدرجة بعيده!

دي البتحيرني شديد يا منى..

حامد الجامعي:
إن وقفت مهيرة وطَبَّقولها البَدَّه
وان رجعت تَخُتُ الرَضة فوق الرضه
عاوز قبل اموت دَفُرة وبلاش من صَدَّه

على محمد حجاج:
اكَلَنْ كافي موجودنا وابَنْ يَوَالْفَنا
وامَّلْنَا الرجوع بالفَلًسَة ما قَبَلْنا
من قُبَالي انا والمُزَمِلين والغَنَّا
جُمُلة الياسَعِن في كتفه عَلَّقْ شَنَّا

Quote: تعرفي اباحة ان تأخذ المرأة من مال زوجها دون اذن ما يكفي حاجتها وحاجة عيالها بتوري ان المرأة شريكة في هذا المال.. كما انه لا يجب ان تعطي المرأة من مال زوجها اي طرف خارجي دون اذن الزوج وهذا سبب السرقة تريد الزوجة ان ترسل لاهلها مال او كماليات فتسرق. فهي التي ترفض دائما ان يعطي زوجها مال لاهله تسرق لتعطي اهلها.. مع ان هذا حرام

العزيزة د. بيان
خالص مودتي.. تعرفي بعدما رفعت البوست دا عرفت انو اعياد الحب على الابواب..
شكرا لك على مداخلتك الرائعة والتي حوت الكثير المثير..
تعرفي يا بيان، يظهر انو معايير الاخلاق دي بقت مرنة وقربت تبقي فضفاضة.. يعني الزوجة زمان ما زي هسع.. الزمن دا البت بقت مصدر دخل اقتصادي لاهلها.. بمعني زي ما كبروها وخرجوها من الجامعة، اهلها بيكونوا في الغالب محتاجين ليها اقتصاديا.. يقوم يجي اخونا مغترب يتزوجها وتغترب الخليج وتقعد في البيت تطبخ وتغسل وتشاهد في الفضائيات.. وبهناك السودان عامل زي حوض الرملة.. اصلو ما بتبلا..
يكون الاهل ضايقين ضيق شديد على دخريهم القاعد ساكت ممحن.
ومن هنا يبدأ الشد والجذب وربما السلب.

Quote: في المقابل تجدي رجال ملتوين لا يمكن الا ان تكون المرأة ملتوبة حتى تحقق ما تريده..

ابصم بالعشرة على الكلام دا..بعرف واحدة محامية ضربتها فلسة صاح.. راحت مدرسة بناتها باعت (درادم) الدلكة بتاعتها..كانت 12 دردوم.. وكسبت 60 ريال في ذلك اليوم..دا طبعا بعدما تعذرت الفكة..

Quote: مرات فراغ عين المرأة ونظرتها لزوجها كخاتم المنى يحعلها تنزلق لمثل هذه الامور..

تفتكري يا بيان كان اغلبنا لقي طريقة يخلي بيها الراجل زي خاتم المنى كان رفض؟ ما اظن.. غايتو كان عارفاها قولي لي عووك.

Quote: وكذلك مفهوم الرجل السوداني انه المرة المفروض ما تعرف قروشك

هنا مربط الفرس..

Quote: من تجاربي ان كلما قل تعليم المرأة كلما كانت اشطر في السرقات والاختلاسات وتسخير زوجها لخدمة اسرتها.. التعليم يفسد فرص المرأة في عمل الاشياء الملتوية والدوران.

الكلام دا وقع لي فوق جرح.. انا والله بعرف واحدات من جنس الصنف دا، غير مصاريفهن الشهرية التي تتجاوز الالف ريال، دي طبعا طالع منها الدهب والملابس وكل الاشياء التانية..وكمان الخير بيصل اخواتهن طالبات الدراسات العليا..موش الخير بيصل ..الخير منضبط في الوصول الى مسجلي كليات الدراسات العليا ..تصوري..
غايتو ضيعنا مستقبلنا ساكت بالقراية..

العزيزة د. بيان
جيتك راجعة تاني للمعايير الاقتصادية لحبوباتنا زمان.. غايتو المعايير دي اشتغلت معاهن صاح.. وتعتمد على نظافة الجيب اول باول..
تقول جدتي التي رغم (غتاتها) ظل جدي يذكرها دائما ولم يتزوج عليها، رغم انه عاش عشر سنوات بعد موتها.. لهما الرحمة.
تقول جدتي مدينة: اتدهني خُري (اي اجعلي الزيت يسيل عن شعرك مجاري عدييييل)
والبسي جُري (اي خلي التوب طويييييل عشان يتوسخ طوالي ويتغسل طوالي وبالتالي يكمل سريع)
واكلي ******** (اها دا ما بقدر اقولوا)
خالص مودتي
حليمة

الخت حليمة
تحياتى

Quote: كيفية خداع الرجل..ماذا تقول المرأة ..؟ 1. الإكثار من المساج.. 2. خليك مسكينة زي النعاج 3. كتري من أكل الدجاج 4. التأنث التقيل، خاصة بعد الخامسة مساء

غايتو دى بالغتى فيها عديل مافكرتى بالله تعملى ليكى درس عصر
الكلام ده مفيد اناغايتو بحاول اعمم الفايده

Quote: غايتو دى بالغتى فيها عديل مافكرتى بالله تعملى ليكى درس عصر الكلام ده مفيد اناغايتو بحاول اعمم الفايده

يا لسعدي ..يا لسعدي
ماجدة عوض ذاااتها جاءات لعندي
العزيزة ماجدة..
بقيتي ونورتي وضويتي..
قربي اضانك جاي.. الفكرة موجودة.. والبوست دا جس نبض ومسح اولي للسوق، فان صحت التجارة..دي ياها البصارة..
اقوم اعمل ركن زي دكان ود البصير واطلق عليه اسم: "بصيركو للائتلاف.. بصيركو ما في خلاف"
او اسم " دكان ود البصير والشطارة ما من كتير"
مع الاحتفاظ للمؤلف بحقوق الطبع..
وانت يا ماجدة ما بتحجزي مكان بس .. انت نديك التَنْدة..
حسب الاغنية القديمة:
يا راكب التنده
اديني معاك سنده
على فكرة التنده هي كنبة المسرح في البص او الحافلة..
اها رايك شنو؟
خالص مودتي

مشهد أول..

أب كَريق قَلَّع...!!!

كانت أجمل النساء في عينيه... رغم ان الوضع لم يكن ذلك ..ولم يشاطره الآخرون نفس الفكرة..كانوا يرددون: القَلِبْ ووكتين يعشق لِكَة". ورددوا بأنه عميان، وان مصيره يفتح..

كان أكثر ما يعجبه فيها أسنانها المفلجة.. وهي اكثر ما كان يكرهه الآخرين فيها..
عام في بحر حبها أربعة سنوات.. ثم أجاد العوم .. فطفا على السطح..
يبدو انه لم يعد يحتاج إلى النظارة كثيرا ليرَ جيدا..!
تراجعت الميزات الجمالية كثيراَ.. وتراجع (الجيب) كذلك..
صرخت في وجهه يوما، حينما رفض ان يعطيها مبلغا من المال ..
الله يلعن أبو دي عيشة دي..!
فردد نفس صرختها بـ(كرم حاتمي)...الله يلعن ابو وعم وخال وجِد دي عيشة دي..
واقفة لي كل صباح فوق راسي..بخلقتك الما بتشبه النسوان دي .. وسنيناتك العاملات زي المفتاح الانجليزي..

في ذلك اليوم.. وحينما نام.. تسللت يدها بخفة إلى جزلانه.. فاختارت من كل فئة ورقية، فئات صغيرة..وضعتها في علبة عسل فارغة.. وحفرت حفرة صغيرة في أرضية الغرفة، أودعت فيها العلبة ، وساوت الأرض جيدا وكنست الغرفة كذلك ورشتها بالماء..
جلست بالقرب من خزنتها الجديدة وهي تردد بغضب ممزوج بالألم: انا مفتاح انجليزي...انا مفتاح انجليزي.. مَخَيَّر الله..!!
ستارة

مشهد شعري

اعلان حالة الافلاس..!!

بعد ما كنت دي محلوبة ودي محويه
تابعت غيهن بقيت اشرب البقنيه
هملت دار ابوي الناس تلاوم فيه
لي كبر النفس النخدم اليوميه

_______________________________________________________________________________

الزمن القبيل كانت كتيرة حلاتنا
والريد والعشق ما في حدا فاتنا
بقينا متحدرين عبراتنا
يا دَبلوسة هُسُ ما فيش عتاب بيناتنا

على محمد حَجَّاج

الأخت حليمة
سلملم

Quote: الا قول لي ياتو الاولي بالسرقة اولاَ: الجيب ام القلب..؟ والله انا يخيل سرقة الاول اسهل بكثير من التاني.. خالص مودتي..

هذه تعتمد على أسلوب التعامل.. هل التعامل إستراتيجي أم تكتيكي... فإذا كان النوع الأول يجب عليها أن تركز على لبه قبل جيبه.. إما إذ كان الثاني فيجب عليها أن تكون عملية ولتهجم على الجيب بلا هوادة أو رحمة.. بل ولتمزقه شر تمزيق.، (هذه ليست فتوى)
وقع ليك كلامي.،

Quote: إستراتيجي أم تكتيكي

سماعين عساك طيب
يا اخوي داخل لي في الغريق كدي مالك؟ خطة (أ ) وخطة (ب) والخطط البديلة.. وتدويل القضية
يعني استرايتيجيتكم دي كان بالغت وسميناها استراتيجية شمولية، وبعيدة المدى ولا دائمة الصلاحية ولا يوجد لها تاريخ انتهاء ، ما بتتجاوز الاربعة سنوات كان الواحدة فينا بقت مس يونيفيرس خلي (صاحبتنا الفوق في اب كريق قلع)..!!
بعدين انا الاستراتيجية دي ما بحب فيها غير الحرف الرابع بس.
اما التكتكة، يعنيني فيها كلمة تِك، واعني بها تكة الجزلان التي يعقبها هاك.. او اكون انا صاحبة التكة واهَيّك نفسي براي بضرب ضراعي دا..
اما اذا وجدت التكتكة الناااااااااعمة فدا عز الطلب..
شفتني لسع مسطحة كيف يا سماعين؟
مودتي ..
حليمة

في رأيي السرقة خطأ و مرض يحتاج لمداواة بواسطة الطبيب المختص

و مهما كان الزوج بخيلا فلا أجدني أبيحه

على الزوج و الزوجة (أيها عالم بالأمر) أن يذهبا للطبيب النفسي و أن ينفذا ما يطلبه منهما

و هكذا يكون الأبناء في مأمن من الإنحراف

الاخ مالك الجاك
شكرا على المرور وعلى رايك الواضح في السرقة..
اوافق على معظم ما قلته واسالك بدوري، هل توافق على ان يخصص الزوج لزوجته مصروفا شهريا او ربع سنوي او سنويا يكون وقفا عليها هي ام لا؟
و هل تجوز السرقة من الزوج ان كان بخيلا ومقترا على زوجته واطفاله؟
ماذا لوكان بخل الزوج سببا في انحراف الابناء انفسهم؟

حليمة
سلامات يا خيتي ... والفلانتين القابل على امنياتك


ياختي لزومه شنو تبقى المرأة معلقة في جيب راجلها من الاساس ؟؟

غايتو العلاقة الاقطاعية دي بين الرجل والمراة ابدا تب ما بتعجبني
والعجب كان حوجتني اسرق!!!


سنغود كان الله مد في بطارية الجهاز

العزيزة عزاز
حاجزة ليك كل ورود الفلاتين دا والجايات وبمختلف الوانها..

Quote: ياختي لزومه شنو تبقى المرأة معلقة في جيب راجلها من الاساس ؟؟

دا السؤال..
بس ما بين الحالة الاولي والحالة التانية...هل هناك محطة وسطي؟ ما هي خصائصها ، ان وجدت؟

Quote: غايتو العلاقة الاقطاعية دي بين الرجل والمراة ابدا تب ما بتعجبني والعجب كان حوجتني اسرق!!!

اها كيف الدبارة كان بقيتي من اصحاب الحاجة؟
البطارية لازم ما تخلص ولازم تعودي؟
اقراي دبابيسك حقت زماااااااااااااااااااااان
وتعالي..
خالص مودتي..
حليمة

حليمة اختي
سلام
نوع اخر من السرقة انك تركب البص في ليون
وعندما ياتي المفتش ويطالبك بالتذكرة تعمل
فيها نايم وبل تفسح اليه المجال ليجلس بقربك

CE N'EST PAS VRAI...
ASSEYEZ -VOUS

Quote: حليمة اختي سلام نوع اخر من السرقة انك تركب البص في ليون وعندما ياتي المفتش ويطالبك بالتذكرة تعمل فيها نايم وبل تفسح اليه المجال ليجلس بقربك

يونيكسو
واو
"البعرفونا انشاء الله ما يحضرونا"
كيف حالك
رغبتي في معرفة هذه الزميلة البرلومة العزيزة في الكارانت نوف بيراش لا تعادلها سوي رغبة في معرفتك

حليمة الحكيمة ....

وليه دة كلو .. عموما انا اولا بيني وبين المال عدم استلطاف ويغظيني ان بقي في جيبي فاولي ان تستفيد منه سامية وبناتي وابني وامي واخواني واخواتي وكل الحوليا ان لزم الامر بس هو ما بكفيش دة كلو ونرجع لاحلام وخيالات بت الخليفة الكبيرة فانا دائما احلم بفلوس كتيرة وكلو واحد يكون عندو البكفيه ...الحياة كانت حتبقي احلي ... وبعدين ماهي شركة كلو واحد عندو مهام يقوم بيها فلذا الشفافية ضرورية لمقابلة المفاجات ( ما حدش عامل كونتراتو مع الحياة ... كما كان يقول احد اقربائ رحمه الله ).العندو يدي التاني ...فلذا ارقام الا اي تي ام معروفة لدي الطرفيين والاي بانكنغ باسويردز كمان .. والفواتير كلها بتكون مرمية هنا وهناك ... لزومو شنو الدسدسة .. بس انا بدسدس مرات لاني حسابي في شبكة الامزون بتاع الكتب بيخذلني وحبي لل electronic gizmo , gadgets , PDA...etc هو السبب...يعني انا السارق مش سامية والحاضر يكلم الغائب والعاملات محاميات اها قضية سقعة ( مش يا ميمات ؟؟؟ )

مودتي
ابوبكر

مشهد شعري رقم 2

الاعتراف بالمقلب
على محمد حجاج

انا كل شئ جربتو
ولقيت الصبر اخير اصَحَبُ لي صاحبتو
الما بشتغل طَلَّقُ تغلبو رقبتو
قالو الناس كتير لي وانا جربتو
................................................
من شافت قروشك جات عليك تتصلبت
قال ليك براك ما فيش نعمة تبت
عينك فوقه نيتك صبت
قبال تلبس الخازوق جميل ومَنَبَتُ
...................................................
ان بقت ليهن ايدك دوام عَطايا
يقولن ليك براك انت ما في مِرَايا
يمرقنك من خريف اب نونايا
عُقْبال تلبس الخازوق جميل وُوِصايا
..................................................
اكلنْ كافي موجودنا وسلاحِنْ شوربْ
واملنا الرجوع والهَمْ بقالنا مَقولَبْ
ما عِرِفْتَ طيهن الفيهو ستين لولبْ
جملة الياسَعِنْ إنْخَلَّ ومخه إتُقولَبْ
.....................................................
الخلاني بتقلب على نيران اللظي المحمية
ساهرت النجوم وابَنْ الغَميضْ عينيه
ولدا ما اشتغل بقت جريدتو قوية
كيف اتقلد أم شلاخ برا نَقُديه
Money Talks And Some times Walks
الاخيرة من عندي
ما راي النساء في هذه الحملات المستعرة؟

الاخ العزيز ابو بكر سيد حمد
صبحك الله بالخير
شكرا على المرور والمداخلة الكبيرة التي ان دلت على شئ انما تدل على اخلاق سودانية بتاعت زمااااااااااااان الرائعة..
زي ما قلت يا ابو بكر الحياة دي شركة.. صاح .. بش شركة الزواج دي امين الخزنة فيها هو المدير العام والتنفيذي وعضو مجلس الادارة المنتدب.. وقع ليك كلامي .. يعني ممكن يتنازل عن كل المناصب ما عدا منصب واحد: امين الخزنة.
دا اصلو ما بفرط فيهو..
صحيح على راي قريبك ما فيش حد عامل كونتراكتو مع الحياة.. بس شعار معظم الرجال في الفرضية الجاية دي.. القرش الابيض لليوم الاسود.. والفرضية التي تعمدت تاخيرها قليلا هي : تجديد الشباب دي معناها كمان يا ابو بكر يا خوي المرة التانية او التالتة او الرابعة .. وفي بعض الاحيان التسريح لزوم عدم تجاوز العدد اربعة والباقية تاتي .. انا بعرف رجال بالكيفية دي وصل عدد نساؤهم الى تمانية..

Quote: لزومو شنو الدسدسة .. بس انا بدسدس مرات لاني حسابي في شبكة الامزون بتاع الكتب بيخذلني وحبي لل electronic gizmo , gadgets , PDA...etc هو السبب...يعني انا السارق مش سامية والحاضر يكلم الغائب والعاملات محاميات اها قضية سقعة ( مش يا ميمات ؟؟؟ )

شفت يا ابو بكر موش قلت ليك انت نوعية بقت قليلة.. وحالتك هذه لا يمكن اطلاقها على كل الرجال..وغايتو اريتنا بدسدستك.. تحياتي للاخت سامية امين الخزنة.. وخليك شديدة يا سامية..

العزيزة حليمة

مودتي

موضوع رائع وان جاءت مداخلتي متاخرة ولكن أعتقد أن سرقة القلب أهم سرقة الجيب فاذا استطاعت أن

تسرقي قلبه سيفتح لها جيبه على مصراعيه ويكفي المؤمنين حينئذ شر القتال ثانيا إذا سرقت قلبه

ستشعر بنشوة الانتصار وحينما تسرق جيبه ستذوق مرارة الهزيمة أليس كذلك ؟ ودمت .

الأخت العزيزة حليمة

تحياتي

سآتي إلى ( سِفْر الفكة ) برواقة :

Quote: 8. تقرب من الزوج وذلك بفك زنقته حينما (يزنقه) الدائنون..

هذا البند يقع تحت طائلة ( الغاية تبرر الوسيلة ) بالفعل ..
و لكن أيقبل الزوج بفك زنقته بأن يعرف أنه كان مسروقا ؟
البعض ربما يقبل .. لأن فك الزنقة تشفع للسرقة حسنة النية.
و البعض لن يقبل رفضه مبدأ ( البرشتة ) جملة و تفصيلا

تخريمة :

زوجة أحد أصدقائي كانت تسرق قليلا من ( زجاجة العرقي ) و تضعها في ( جركن ) باإضافة لسرقة الفكة.. و عندما تجده ذات ليلة ( يحك ) رأسه من الزهج و القرفة و الخرمة .. تأتيه بكأس مترعة فيكافؤها أيما مكافأة .. و هكذا دواليك.

تخريمة فرعية : ذات ليلة .. وجدته خرماناً .. فجلست بقربه و قالت له : الليلة الجركن مافيهو شي عشان نسيت أبرشت الأيام الفاتت دي. خليني أونسك لغاية ما تنوم.
فقال لها و هو يوليها ظهره مستقبلا الحائط: بس فالحة تجبدي الفكة.

بجيك راجع كان الله هون

الأخ العزيز أبو جهينة

خالص تحياتي وشكرا على المرور..

ضحكت كثيرا وأنا اقرأ قصة صاحبنا الذي كانت زوجته تفك زنقة "كيفه" بطريقتها المبتكرة ديك.. وتذكرت قصة واحد صاحبنا كان كل يوم يسهر مع أصحابه ويجي راجع آخر الليل ويكون قد عمر رأسه تماما.. وحينما تحايلت عليه زوجته في احد الأيام وأحضرت الكيف إلى البيت.. وبعد العشاء الجامد.. وتعبئة الراس تماماَ..عدل صاحبنا مركوبه وبداء يلبس..
صاحت به زوجته اجي ماشي وين .. انت نسيت ولا شنو دا ما بيتك؟
رد عليها قائلاَ: يا وليه أنا ماشي أبيت خلاس.. أنا أصلي محل بشرب ما برقد..
في انتظارك..
مودتي..
حليمة

ياحليمه ياالجاز لالالالالالالا

دى مابفوته ليك ..من قبيل قلت الزول القال ليك مجنونه

بى قلبى قلت ليه مجنون انته ياخى..لكن دى قويه شديد

Quote: ياحليمه ياالجاز لالالالالالالا

الاخ الشاذلي سعدت والله بالمرور الصباحي..
والاقتباس اعلاه، شاكرة لك انك لم تضيف اليها عبارة جاز وجنبو كبريت..
خالص مودتي..
حليمة

Quote: أعتقد أن سرقة القلب أهم سرقة الجيب فاذا استطاعت أن تسرقي قلبه سيفتح لها جيبه على مصراعيه

يا ربي ما هي الية سرقة القلب؟ ومدي صلاحيتها وتاريخ انتهائها؟ ولا خبطات القلب ونبضاته (الحبية)، نسبة الى الحب، دائمة الصلاحية؟

الأخت عواطف..
سلامات..
سعدت بالمرور ..
بس قولي لي يا عواطف.. القلب دا كان اتلقي ما خلاص بينسف أي شئ.. بس القلب دا موضوعه شائك ونسبي كمان.. يعني تكسب قلبه لكم من الزمن؟
راجينك تجي راجعة بعد ما تكوني دورتي حكاية القلب دي في راسك كويس.. وشفتيها ماشة ولا لا؟
مودتي ..
حليمة

لماذا يبخل الرجال على زوجاتهم بالمال؟
لماذا ينقلب حال الكرماء.. (ان وجدوا) ؟
كيف يخبئ الرجال فلوسهم؟
هل الرجال مسئولين عن سرقة النساء؟

خريجات من احسن الجامعات السودانية.. عاطلات في الخليج.. ابعاد الحاضر وافاق المستقبل! مخاطر الفَلَسْ..!

حليمة الحكيمة

مودتي

Quote: شفت يا ابو بكر موش قلت ليك انت نوعية بقت قليلة.. وحالتك هذه لا يمكن اطلاقها على كل الرجال..وغايتو اريتنا بدسدستك.. تحياتي للاخت سامية امين الخزنة.. وخليك شديدة يا سامية..

اكيد كتار بس الظروف ما تعرفنا بيهم والا لاختل ميزاننا الاجتماعي اختلالا شديدا اكثر مما نراه...
اي شئ ما فطرة بيكون له اعراض جانبية غير مستحبة .. الدسدسة ما فطرة لكن الحماية(الغطاء) فطرة ..الانسان يولد وما فيهو دسدسة لكن بيحاول يغطي اما ما لايريد ان يراه غيره حماية له او حماية من الحر والبرد وعوامل طبيعية .. نحن لا ندسدس اجسادنا ولكن نغطيها ولا ندسدس بيوتنا ولكن نحميها بابواب وكذلك خزائننا ... الخ ... الدسدسة قبيحة . ابغض شعور لما احاول ادسدس اشياء اشتريها من وراء سامية (وهي الحقيقة بتشتري لي كل اشيائ لانها صارت اعلم باحتياجاتي مني وتعلم متي وكيف -خربتني تب ) وعموما الاشياء البدسدسا ذكرتها في ردي السابق وهي تجعل مني غشيما حين ادسدسها لانها لا تعمل الا عيان بيان .. يعني اشتري كمومبيوتر وادسو وين ؟؟؟

البجرب عدم الدسدسة بيكون سعيد .. انا ما بهمني اخلع ملابسي وفي جيوبها اشياء كثيرة او اتركها عي الطاولة او الكومدينو او في مكتبي في البيت ..الخ .. ما عندي حاجة ادسدسا واكيد لو سامية او ولدي او بناتي اخدو فلوس من جيبي بيكونو محتاجيين ليها في الحظة دييك ...
بسيطة ..علي ايه الدسدسة ...

ابو بكر الرجل الاستثنائي
كيف حالك..
واحدة صاحبتي قرت الرد بتاعك ده واللي قبله
قالت لي اسأليهو ما عندو اولاد عم كتار زيو كدا
شفت..موش قلت ليك..
سامية امسكي كويس..

مقايس الازواج لاختيار الزوجات
1. ان تكون امراة عاملة..!
2. ان كانت مقيمة في الخليج عز الطلب.!!
3. ان كان عندها غرين كارد.. يتكالبون عليها ويتقاتلون في سبيلها..
4. ان كانت مغتربة في اوروبا برضو سوقها حار..
5. ان لا يكون سبق لها الزواج.. لان المثل السوداني يقول ما تعرس ام "الدَرْفون" ولو مدفون.. والدرفون هو الطفل الصغير..!!
6. وفوق هذا وذاك ليس ان تكون صغيرة السن فقط، بل ان تظل كذلك على طووووووووول..!!
7. ان تكون مثقفة عند الطلب وست بيت تمام لا توجع الراس ولا تثير الغضب.
8. بمعني اخر .. ان تكون تقدمية حتى النخاع وتقليدية الى القاع..
9. والبقية تأتي...

عزيزتي حليمة

Quote: بو بكر الرجل الاستثنائي

ان اكون استثنائيا في مثل امور حياتية اساسية كهذه يزعجني كثيرا حيث ان الامر يخص اجيال من بناتناوابنائنا . اكيد في القري والبادية حيث غالبية السكان وحيث الحياة تتطلب تضامنا اكثر فهنالك الامر عادي ...

Quote: كيف حالك.. واحدة صاحبتي قرت الرد بتاعك ده واللي قبله قالت لي اسأليهو ما عندو اولاد عم كتار زيو كدا شفت..موش قلت ليك..

كلهم كهول وعجائز وبعضهم جد

Quote: سامية امسكي كويس..

ياحليمة انا امسك فيها كويس ..

لماذا يريدها الأزواج بالمواصفات السابقة...؟

لماذا يريدها الأزواج بالمواصفات السابقة...؟

1. ان تكون معيلة لنفسها، لان الاعتماد على النفس فضيلة...!!
2. يتضمن ذلك اعتمادها على نفسها في شراء لوازمها واكسواراتها ..الخ.
3. مصدر دخل في حالة سعودة أو ظبينة أو عمننة وظيفة الزوج..
4. ضمان إقامة الزوج في البلد المضيف في حال (تفنيشه).. حيث ينتقل إلى خانة المحرم وهي اخف وطأة من التفنيش.
5. الاضطلاع بمصاريف البيت، في حال تعطل الزوج عن العمل أو المشاركة في المصارف في حال كونه ما زال عاملاَ..
6. ضمان دخولها الدائم في (ختات) وبالتالي ، توفر وتوفير (السيولة)، عند وخارج الضرورة.. (خارج الضرورة، تعني ساكت كدا بس)..!!
7. وان تقوم كذلك بإعطاء دروس خصوصية في بعض الأحيان لزوم (الضخ) المتواصل للنقود.
8. أن تطوع وتمارس بعض مواهبها المقبورة، إن وجدت، في فتح طرق أخرى للدخل..كأن يكون لها إلمام ببعض الفنون، مثل (رسمة)
الإخصاب في الزهرة، فتصير (نقاشة) أي حنانة على مستوى الجيران ، ثم الحدائق.. ثم تشتهر، وتهطل الفلوس كالأرز عليها..
9. ومن لم يكن لديها رصيد من التعليم يضيفها إلى قائمة الموظفات، ويضعها في خانة صف الضرائب والذي منه في تأشيرة المغتربين،
يمكنها مزاولة مهن أخرى، نواصل ترقيمها مع المهن السابقة، غير أننا نضعها تحت بند غير معلن" أخواتنا المدروشات"..
10. أن تكون مفتولة العضلات وبإمكانها القيام بأعمال المساج، وتنظيف الجسم من الشعر، أو على ابسط الفروض، تجيد مهنة المشاط
خاصة (الشتات) والذي منه. وما كلو دخل...!!
11. أن تجمع مجموعة من الإكسسوارات المحلية كـ(الجدلة) و(صينية الحنة) ومستلزماتها وأن تقوم بتأجيرها، بعد ان تكون قد صممت
لها بيزنس كارد جميل يدل على كيفية التواصل معها والوصول اليها وبالتالي والوصول (سيد الاسم).. الجيب..!
12. باختصار ان تكون لها عقلية تجارية تبز الآسيويات، فتنجح في بيع (الخُمْرة ) والعطور السودانية في الحدائق العامة..
13. ان تكون( ملحلحة ) كفاية لتعرف قيمة الوقت، فتمارس مهنة التجارة وتؤدي المهام المنزلية في نفس الوقت، بمعني ان تقوم بـ"توريق" الملوخية
او الخدرة في الحديقة في أثناء (تفسيح) الأطفال كذلك في الحدائق العامة.
14. وان عملت في منتزه، تخصم ميزانية فسحة الأطفال من الميزانية العامة، ويكثر عدد الجارات اللائي يخطبن ودها..
15. تكون لديها عجلة تروللي تبيع فيها الكرات والبالونات والحلويات" مهنة كبيرات السن".

والبقية تأتي...
أنت يا الكبرتوك..
البنات فاتوك
في القطار الطار..
ألا رحم الله الشاعر الكبير خليل بن فرح.. ترى لو عاش حتى زماننا هذا، ماذا سيكون رأيه؟ من فات الآخر الآن؟
في هذه الجزئية...من المسروق؟ الزوج؟ الزوجة؟ الاثنان؟ ام العمر؟

لنا عودة..
ودمتم سالمين..
حليمة

Quote: ياحليمة انا امسك فيها كويس ..

الاخ العزيز ابو بكر..
خالص مودتي واقول ليك الله "يعطيكما" العافية.. ولن ازيد.
اما بخصوص اولاد عمك الكبار وعجائز واجداد .. لن ازيد واقول ليك الجماعة قالوا ليك برضو عز الطلب..
وباب الامل ما زال مشرعا...و...و..
انا قلت حاجة؟ ما اظني...

با حراميات ! وأنا كل مرة أقول با ربى القروش دى صرفتها وووووووين

بعد ده غايتو إلا نسلمها ليكم فى يدكم والحساب ولد

عين العقل...
الاخ العزيز ترهاقا..
شكرا لك على المرور..
بس يا ربي دا ح يكون رايك لو طالعت كل البوست ولا ح تعمل زي واحد في جدودي. كان شعارو..المال بختو في جراب والجراب في جراب وبدفنوا تحت التراب وبتمنالو الخراب..
شفت..
خالص مودتي..
حليمة

الأخت حليمة
والله بوستك دا سينما بس
بالمناسبة عندي ود أعمي زمان كل ما إلقي ليو حاجة تعجبو إقول ليك الكلام والله الحاجة دي - سينما بس –
لكن بالمناسبة في خبر ما جميل داير أقول ليكن أنتن
عندي واحد صاحبي مرتو سرقت منو
طوالي جرّ ليا ط
وعليك أمان الله لي يوم الليلة
الياصفا ما أستاصف

برجع وعاي حاجات من السحارة أقصد الضهرية

زين العابدين

ملحوظية
?!Get Back To U Soon

ملحوظية دي والله في زول عندنا في الحليلة قاعد أقولها طبعاً عمنا دا قاصد – ملحوظة – يا جماعة ما تشيلوا حالنا تقولوا نحن
أهل
ال ع و ض

زين العابدين - الحليلة

Quote: لكن بالمناسبة في خبر ما جميل داير أقول ليكن أنتن عندي واحد صاحبي مرتو سرقت منو طوالي جرّ ليا ط وعليك أمان الله لي يوم الليلة الياصفا ما أستاصف

شكيتو علي الله صاحبك دا يا زين العابدين.. !!!!! يعني طفش المرة ورجع عَزّابي تاني ؟ وعشان شنو؟ شوية ملالين (هبرتها منو) والله ما عندو حق.. بس صاحبك دا ينطبق عليه المثل البقول الاعزب هو الرجل الذي فاتته الفرصة لجعل امراة ما تعيسة..اها دا الفرصة جاتو تقدل لغاية عندو، وبعد وصل الميس نفد بجلدو..غايتو يا الرجال.. بعد العرس الله بتم بصيرتكم وببقي نظركم ستة على ستة..حتى ولو كان بشوف طشاش ساكت..
شكرا لك على المرور.. بس دايرة اعرف الولية دي طفشت وين؟
وااااا خجلتاهـ..!!!
خالص مودتي ...
حليمة

سلام حليمه
مشيتى وين انتى فوتى درس العصر بتاعك احنا مش اتفقنا اننا نعمم الفايدة
على اكبر نطاق جريا وراء الاجر وكده

Quote: Quote: كيفية خداع الرجل..ماذا تقول المرأة ..؟ 1. الإكثار من المساج.. 2. خليك مسكينة زي النعاج 3. كتري من أكل الدجاج 4. التأنث التقيل، خاصة بعد الخامسة مساء

ماجدة عوض..غالية والطلب رخيص...جبناهو ليك لغاية عندك.. خلي النفضا شوية عشان نعمل ليهو ابديتنغ.. لسع دا السيناريو الخارجي..بس
ما تطولي الغيبة، عشان قطرنا قام..
خالص مودتي يا غالية..
حليمة

ياحليمة

Quote: ودمتم سالمين..

منو دييل ؟؟ اليطيرو الرجال ؟ انتو عاملات ليهم هليلة قد كدة ليه ؟ انتن ما بتسمعن غني ولا شعر الرجال ؟ ما كلو عنكن وكلو بكاء وجعيير لانو واحدة منكن فتحت ليهم كباري .. هسع شايف في التلفزيون راجل بعضلات وببكي يغني لانو عينيه شقية وجابت لقلبو ازية وطالب الرحمة من الجنس اللطيف ؟ انتن ما عارفات قدركن سااي ؟؟ اها انا عمري ما سمعت راجل غنو ليهو الا الخيبان الفسدان الظهر في الزمن الردئ ة وقال "راجل المرة " يعني راجل -المفروض- غني لراجل - ياعيب الشوم - ومش امراة غنت لراجل .. انتن ارصدتكن عالية بس ساكت مضيعات نفسكن .. انتن ما شفتن الرجال بحوصو عيونم كيف لما يشوفو حلاوة الجنس اللطيف .. ؟ ما يغشوكن ساكت ؟ سوقم باير ..بس دعاية سااي ...

اما بخصوص عجائز البرابرة المصرات عليهن صحباتكن فلا حول ولا قوة الا بالله العلي العظيم .. انتن ما عارفات الرطان منا لم يعجز ويبقي بتاع معاش بيسوي شنو ؟ عندو راي في كل شي ..ما تنسن نحن شغل المطبخ بنعرفو كويس والتدبير المنزلي وحاجات كتيرة واها من الصباح الشاي مالو اسود واللبن ما فيهو لاكتوز والملح كترتي والصحن دة شكلو ما عاجبني دة للغرف بس و....!!

Quote: انتن ما بتسمعن غني ولا شعر الرجال ؟

سمعنا ي ابو بكر واشتهرتو بسببنا.. انتو ما سمعتو هنهنات النساء (لما كن بنات) حينما تعلقن ببعضكم وتعلق ذلك البعض ببعضيات (واحدات) اخريات، وتعلقن هن بدورهن بواحدين اخرين.. ومن هنا جاء البكاء والانين المزدوج.. بكيتم الحبيبات المفقودات، التي جاء مغتربون وخطفوهن على جيادهم البيضاء وصرتم تصرخون خطفها ...خطفها.. وابتليتمونا بقصة فاطمة السمحة، بينما المراة خطفتم قلبها واصر والدها على ان الخاطف ابن عمها الذي لم يجد له قلبا اخر ليخطفه، فاقر بانه مخطوف في حوش عمه الذي لا يبعد عنه مرمي حجر..
وبعدين يا ابو بكر موش في واحدة فينا انشوت لما ريحة الشية طقت وصرخت بانها لن تعيد قصتها مرة اخرى فاختطفها مغني وجعل يصرخ ويستصرخ العالم على لسانها:صدقني ما بقدر اعيد قصة غرام بالشوق مضت.. رحلة عذاب..موش عارفة ايه..انا ما بقدر اكمل عشان ما عندي مناديل بعدين ابو الوليدات يقوم على هسع فيجعلني اصرخ: صدقني ما بقدر افيد..
وصلت من العمر عتيا وبس فاضل لي القيد.. :no
مع الاعتذار للشاعرة حكمات محمد..
شكرا ليك على مرورك المحفز منذ ضربة البداية. وبالمناسبة (البرابرة لهسع صفهم طويل مهما تعللوا):
خالص شكري وتقديري
حليمة

كيفك يا حليمة

تعرفى الحل الوحيد عشان المرة ما تسرقك تسلما الفلوس وتحاسبا أول بأول
دى بحكمة (دس قروشك تحت مخدة الحرامى)

بالمناسبة قصة سرقة الأعراس هواية ومتكررة بين النساء مهما كانت المجتمعات
ده من شنو ؟

عندنا واحد صاحبنا فى ود نباوى عائل والدته التى لا حولة ولا قوة لها 30 سنة
حياتا من الجبنة للمصلاية ومافى زول جايب خبرا
الراجل دخل فى زنقة مالية قرب يخش السجن

قالت ليه ودينى سوق الصياغ . طلعت صرة فيها دهب (كسر)
الراجل فكا زنقتو وإشترى بيت

قال ليها يا حجة ده كلو مدكناهو
قالت ليهو يا ولدى إنت قايلنى ما حريم

تحياتى

حليمه
منوره البورد والله
وبوست جميل جدا ومفيد

Quote: 7. زوج بـ(جيب) مليان.. يعني (عين) كثيرة الزوغان..!

دي ضحكتني جدا
يعني لو النساء عملوا بيها الرجال واطاتهم اصبحت.

مودتي.
تراجي.

حذف للتكرار

Quote: منوره البورد والله

هلا والله بتراجي مصطفي.. والله سعدت بضحكتك .. وبالله كلما زهجت من الدافوري والكتاحة بتاعت البوستات التانية.. تعالي عندنا اخدي ليك سندة عندنا..
وبهذه المناسبة نهديك طرفة حقيقية.. اعتاد احد ارباب العمل في السعودية ان يحيه احد موظفيه من المصريين حينما يراه، قائلا.. نورت المحل يا بيه.. كل يوم نورت المحل يا بيه.. والرج ينبسط للاخر..وكان مع المصري عامل موظف باكستان.. وفي احد الايام غاب الموظف المصري.. وحضر رب العمل الذي اعتاد ان يسمع اسطوانة النور بتاعتو دي ..فاراد الموظف الباكستاني ان يحي الرجل بنفس التحية التي يحبها، فوقف الباكستاني على حيلو واستعدل وقفته ثم طارت العبارة من راسه .. ونظر حواليه وراي لمبة، فتذكر ان العبارة مرتبطة بالضوء.. فسارع بالوقوف امام الرجل قائلا: انت لمبة كبييييير..
خالص مودتي ..
حليمة

حذف للتكرار
زين العابدين- الحليلة

ياحليمه الشكر موصول ليك كل صباح وده بوست ربنا يجعله فىميزان حسناتك

(شفتى ممكونين قدر شنو) واكرر حاذرى الفتاوى.. وفتاوى الفتوات وخاصه

العوا..... منهن. ما بفهمن التلميح ودايرات الكلام الصريح .. والطرفه

دايره ليها شرح ومواصلة ذى اها الراجل رد على الباكستانى قال ليه شنو.

وبمناسبة لمبة الباكستانى الكبييييره هاكى الطرفه دى فى القصه القصيره دى ...

على شاب فى التين من العمر وحيد امه وابوه فى ريف وطنا الحبيب ميسورين

الحال بمعيار القريه كنتين الحله واكتر من حواشه ولاباس من عدد البقر والضأن
..
والحوش كبير وغرف مقطعه معاها حيشان وشجر نيم يتلمو تحتها بمناسبه وبدون

قوم قدر الله الوالد توفى عليه الرحمه. بعد الحبس اتحزمت الام الجميله ذات القوام

السمهرى..والخ والخ...وتتقاسم العمل مع على ولده هى فى الكنتين لما يرجع على من

الحواشات وقبل ده فى الصباح الباكر هى حلبت البقر ووزعت اللبن على مواعين ناس

الحله الرطلين اب اربعه اب سته الخ ولملمت الملييلنات..وحضرت الشاى وفكة الريق

فى الاوانى الظريفه النضيفه الممستكه كعادة من زمن المرحوم.

وعادة كرمان الملالين او قولى الملايمه و بصريح العبارة سرقتن يوم كلهن ويوم نصهن

ومنو البقول للسمح ف او يحقق معاه وفى تقديره بيكون فى مستقبل وحيده

والقرش الابيض لليوم الاسود ومهما كان ضامن الرجال ضامن المويه فى الغربال.

وهى وقفت من الولاده من على البقا صبى تانى اضانا ما صنت على الرغم من اهتمامه بى رقبته وابو على

شى دخان لمن شايل ومصفر الساقين الجميلات وشى دلكه لى رقبته ولى ابو على والبيت مابيخلى من عود

الصندل المطلوق كبرته للأخر.

ماها مشغوله بايراد الكنتين كله جروره وقدر الكاش بيدوهو البكمه فى الكنتين

مابعرف مكانه العلبه الا المرحوم وعلى احيانا.

عبد الباقى ذى مبقوله الامريكان (ينق مان)ذى فات الاربعينات ومن فقراء الريف

من والد مسن وايضا والده ماها مسنه ولكن من كترة الشقاوه والفقر تبدو كذلك

واخوان اتنين واخت: صغار فى الابتدائيه وكلهم وامانيهم ومستقبلم متلمين ومتكلين

على فرد حواشه الله خلاها سبعه فدان ماها خمسه لانها واقعه فى طرف البيت والبيت ده

معنى بيه آخر نمر الحواشات.وبقرتين وشوية نعاج .

عبد الباقى كاتم الآهه الحاره وداقى سدره وشايل شيلته ودوما فى باله .

يقومو الصغار ويزيلو الغبار...

وراجع عبد الباقى من الحواشات شايل عشى البهايم تلاته كلاليك قصب نصيبه فى القطع من الحواشات

المراقدات حواشتم كلكتين قش من حواشته وفى طريقه عديل لزريبة البهائم التى تعرف مواعيد

جيته كما وانها تشم رائحته والفش على البعدوتتحرك البهائم استعدادا لوجبة العشاء وعندما

همت احداهما بالوقوف وقعت على وجههاولم تستطع رجلاها ان تحملاها على الوقوف فهى عباره عن

كومة عظام وهنا تذكرت حقيقة بطن بتشيلى رجلين -( مقولةمن دار غرب- رد الله غربتهم واغتص من

كل من ضراهم وشردهم- انه نعم المولى ونعم النصير.)وتذكرت وكيف انها قطعت تلك المسافات

على الاقدام وهى تتضرع من شنقل طوبايه للجنينه للفاشر ابودكنه للحمره حتى الوصول غرب امدرمان

وعندها قالت الله يكفينى شر العين والجزارين وبتاعين الكيرى مابرحمو وهى تمنى نفسها عما سمعته

فى دار بحر وفرة الماء واعلاف اصناف واشكال شى اصفر قصب واحمر عيش ود مقد واخضر برسيم وباختصار

ماء وخضره ووجه حسن فريذيان مستورد وامنية ولسان حاله ( يضوفنا الما يشوقنا) وهى فى هذه الاحلام

الورديه يصبح اليوم 30يونيو 1989

ويصبح الحال كانما حريق مركبه فضائيه وهى تدور حول الارض واصبحت تبكى حالها بدمعه والانسان

بدمعتين والكل لاحول ولاقوه الا بالله انفقد البصر والبصيره وهى تقول الحمد لله لاجلب سوق ولا كيرى

والاعمار بيدالله.

وفى هذا الاثناء صحت البهائم على صرير باب الزريبه وكذا الحاجه فاطمه والدة عبدالباقى

ختفت الحاجه الفانوس الوحيد متحلقين حوله الاولاد واختم بذاكرو وبصوت واحد يمه الفانو

وقبل ان يتموها نهرتم الحاجه ياشفع ما سامعين اخوكم فى الزريبه داكى الليله ما كاتلين

ليكم خمة عقارب وساكين الدبيب فطاطا الاطفال رؤؤسهم خجلا مدركين تعب اخيهم وجهده

وهناك البهائم تحاول عبثا ان تموء ولكن كان صوتها مكسورا امبو والحاء تجى مضغمة

مي والعين هى ايضا وهى تحاول ان تشكر صاحبها وهى تعلم جهده وتعبه وهى تحاول ان تحمد

الله لآن كل قد علم صلاته وتسبيحه.وكل منهم يعلم ماتخصه من العليقه واحدين قصب وآخرين القش

علق للبهائم ورجع غبدالباقى وامه وفى الطريق هم عبدالباقى بالمواصله خارج من الساحه

الى الدكان كما هو اعتاد فبادرته امه ياولدى نحن قايلين العنبلوق الفى ده نخته للضحيه لكن الاولاد دايرين مصاريف المدرسه وحق الكتب والناظر اللعين ده قال ليهم الما بجيب المصاريف وحق الكتب مايجى المدرسه وبندخل الاحتياطى البعده فرد خلاص نبيعه نحن المضحين ليها شنوعاد ياولدى مابقت عادة وعاده الله ما قطعه نخلى الاولاد يشوفو اللحم عند الجيران وكمان نعلات للمدرسه ماعندهم حفو تب
والهدوم

الفى جلدم دى كل يوم ارقع فيها طيب النعاج والله فى شوفى النعاج غرزن وردت حاجه فاطمه باندهاش شديد

غرزن غرزن كيفن لقنو وين لى طول انا فكيتن قلت يطلقن كرعينن ويرعن اها فى بستان ود ناس

مساعدعندهم خرفان للضحيه للبيع بدوعلو فيهن قالو لى اطلقن معاهم الرعو اها مابعيد سامع كترابتن

ربطت والبرقه دى هسع بقى لبنه موبه وفبه ريحه وصاده من الاكل والشراب قربت تطرش فردت الحاجه اظن

وحمه كعب فتبادلو نظره وضحكه خبيثه وقالت ليه الله يفرج الحال.

انا حضرت ليك العشا لبن رايب بى حرف كسره

فلم يعر ذلك اهتمامه بل بادلها السؤال الاولاد اتعشو فاجابته آى منه هو ذاته

واعاد السؤال عن والده فاجابته شرب شاى المغرب بعد الصلاه ولما يقوم للعشا خاته ليه حقه

خلاص ختى لى حقى جنب العنقريب اصله العنقريب كرابه مهتوك لما اجى اكربه لا انا بكربو ليك

لانها اعتادة تكريب العنقريب الجوه اوضته ابو السروج.

واصل عبدالباقى فى مشيه والواطه كبسه ضلمه بالحيل مابتشوف الماشى عليك الا كان وقع

الكرعين فى الواطه وترامى اصوات تعلو وتنخفض بين الحيشان وعندما دلف لساخة الدكان

شاف ليه جوقة نسوان واحدات يهرجن وواحدات يضحكن وبتقول ليها

هى ياختى فاكه كبسته لى شنو ماكفاها الخمسه الختتن ديل هو الواحد على رقبته قادر يعيش

والله ابوهم من شدة الجرى كمل من لحم الدنياداير يقع على وشه هس واحد بس كان مرض ساكت داير

ليهو خمة قروش السبتاليه كان اتلقى الحكيم وتعالى شوفى الدوا بى كم

هى خلى دا الناظر الذمر ذمر اب عيونا حمر الكريه ده ما قال للاولاد الما بجيب مصاريف المدرسه

وحق الكتب بعد بكره بنرفته ودخل ناس الاحتياطى عليك الله شوفى المابخجل ده الناس فى شنو هوفى

شنو الناس ماقادره تاكل ولاتشرب بعد ده لا مره ولاراجل كل واحد يصم ورااكينو ويقبل الحيطه

عليك الرسول ولاده لزوما شنو الناس اتعلقو ظنب الاطفال

وهنا ترصعه ليلى وبضحكه عاليه فى محاوله لتغطى على صوت حيات وتقول ليها الله يجازيك ناس الدكان

سمعوك هى ما يسمعو انا برجع اكلمن الولاده الما لاقيه مدرسه ولاعلاج اليبطلوها يدو وشهم الحيطه

لمن يلقو ليهم حل للحاله دى ويتراوحن وتختفى اصواتن.

كان عبدالباقى قد القى بالسلام على على سيد الدكان والشخصان الآخران وهم يتحدثو بصوت خفيض

ولم يفرز بتكلمو فى شنو لانه مرخى اضانه لحديث كورة الحريم الماشات فى الضلمه عله يفزن من

اصواتن منه هن؟

ولما رجع بسمعه لى ناس الدكان كان ود الفضل وود الفضل هو امام الجامع ذولا مستنير

ماهو متزمت.. بيقول لى على وود الجاك ذولكم ده ماتقولو ليه انا كلمتكم بس جيبوها ليهو

بللفه وادوه راسو اصلو الحريم ديل دى عادتن سرقة قروش الراجل ويدخلو بيهن الصناديق

فى قرية عشره هناك فى واحده عاملالين راس بدبرن وخاصه لما الرجل يكون ماسك شديد وجبار

وذولكم ده معروف صعب وجبار شديد والولاده دى من الله يهب من يشاء اناثا ويهب من يشاء الذكور

ويجعل من يشاء عقيما صدق الله العظيم فى محاوله للاشاره لمعنى الآيه الكريمه

وايمكن تكون حاله نفسيه بتكلم فينى الحاجه مرتى داكى الليله مشن يشوفوها قالو موروده ليها

كم يوم ولقوها حمة الملاريا تشيل وتخت فيهاوراقده ليها فى عنقريب غرييييق والبيت ضلمه يا الله

عرفناها اللمبه ماها فانوس بكوتيه فى الطاقه والله دمعتى قربت تطفر منى بالله البت كانت ذى

الرتينه يوم عرسه وقفت ذى حصان ود العمده الوش الشلوخ المطارق ذى المساطر الساقين ديل ما

يشبهن الاسيقان ام الحسن (ام على سيد الدكان) هسه دى حرقه حريق لمن زرقت ويبست وقال

لقيناهو بيصلى صلاة شنو الصلعه المقابله الحر. ولقيناها ممشوقه بى قرض اظنها مشقت رقبة براها

والله اظنها كان دايره تموت الا تحضر موية بروده براها فى رجال فقر.

وقال ليها قالو دوه الملاريا قالو قديم وناس كتار سوى ليهم حساسيه يعنى نافد وكمان بى خمة قروش

طيب ما يوديها الخرتوم ماظنيتو يسويها.


جانى البارح زعلان ويهرج ويشكى وداير يطلق وماتفرز من كلامه حاجه بس كل كلمه والتانيه لاجنا

ولا تنا وكمان سرقة قروش ..لاجنا ولاتنا وكمان سرقة قروش..لاجنا ولا تنا وكمان سرقة قروش

قلت ليه ياخينا كدى استغفر وبراحه فهمنى الحاصل شنو..

وقبل ده ناس بخيته كلمونى سمعو كواريكو وسمعوها بتقول ليه انا القروش بدور بيهم شنو واوديهم

وين ماترانى من فزع الويقود لللدايات وزريبة البهايم واب عشرين متل النسوان العندهن العده

ولا الدولاب ولا حتى السحاره السجيمانه دى القروش اختهن وين ولا متل النسوان البجيبولن الدهن ولا

ولا الحنه الهدوم الفوق جلدنا اتقطعن من عدم الصوبيين وهو يقول لها الجزلان فيهو خمسه ورقات

امات عشره لقيتن اربعه الخامسه مشت وين لاعندنا شافع نقول شاله ولازولا جانا داخل البيت فيه

شيطان وكمان يشيل واحده ويخلى الباقيات وكان حرامى يفتح الجزلان يشيل منو البكفيهوويخلى الباقى

ما يشيل الجزلان كله..

قال لى انت يامولانا بتذكر انا جيت شلت منك الرصاصات تميت بيهن عرش المستراح لما كشفناهو

ومرقنا الجزلان بعد تعب اها من ديك بقيت دخلتى البيت امرق الجزلان اختو تحت كراع العنقريب

وما بذكر افتحو الا ف الدكان اذكر الشاى ولا السكر وكمين مرات القا مسروته منه ورقه ولاورقتين

والفكه يوت مقسومه النص وقدر ماانضم واهرج مافى فايده وهى تحلف وتتقطع وبلقص ضهره ما دنقرت

تحت العنقريب شالت ليها جزلان يامولانا ذى ماات بتقول ان كيدن كبير يامولانا خلنى انفارقه واريح

واريح رقبتى منها(وفى الحقيقه حليفة فى محلها لانها ما بتدنقر, ويقطع الحدي بتشيل عصاته المتكوله على الحيطه

وتجر بيها الجزلان لى جوه الاوضه وبسرعه فائقه اعتادت عليها تسرت واحده من الورقات ايا كانت وتعلق

الجزلان فى طرف العصايا وترجعه فى مكانه بالضبط وتخت العصايا فى مكانه ) وبسرعه تحشرن مع اخواتن

فى العلبه المدفونه فى البكمه وهى تتمتم اللكوريك ويملا الحله كواريك البصدقه منو

ماسكنى كل يوم لاجنه ولاتنا ..جنه فوق شنو فوق العنقريب الماشايلنى لى رقبتى ولا فى عنقريبه

اب كرابا مهرود رضينا بالهم والهم ماراضيبنا ولا اخليهن ليك نجيب ليك منطوطه نبقالنا كمان

فوق ضر ومقايس...

ويواصل مولانا ود الفضل ويقطع الحديث الحق ياود الجاك اذن العشا انا بلحقك

اها ياحليمه نتمها ليك الاسبوع القادم كان الله هون والى ان نلقاك وعشاق البوست ترقدو عافيه

حذف للتكرار

Quote: تعرفى الحل الوحيد عشان المرة ما تسرقك تسلما الفلوس وتحاسبا أول بأول دى بحكمة (دس قروشك تحت مخدة الحرامى)

والله لو عندك زمالة محاسبين ..برضو تطلع (فشنك)..
عندي قريبي بتاع شعر حلمنتيشي، بعد ما غرق في بحر النسوان للطيش.. قرر الاضراب عن ذلك.. فانشد معلنا عن توجهه الجديد، ومؤكدا على انه (خلا الدار خلا) بعد تركه لامور الدنيا وعلى راسها النساء:
احمد ود على من البنات وآ لومو
ترك غيهن بقي في صلاتو وصومو
والبقع البحر لابد يميز (اي يكرب) عومو

بعدين يا رافت يا اخوي ..تراهو عندنا بنغاليات ممشطات بضفائرهن بس نحن ما جايبين خبر.. بركة الـ محمد يونس البنغالي ما سمع، كان يقوم يطالب بملكية فكرية ويقول عند فرع لجرامين بنك في السودان تديره حاجة عشة ولا النية.
تسلم يا رافت وطول عمرك خلوق..
شكرا لك على المرور الذي اسعدني كثيرا.. وانشاء الله ما نكابرك في الشينة..

Quote: قالت ليهو يا ولدى إنت قايلنى ما حريم

شفت كيف يا قريبي وليه نحن يا رجال لازم نتعلم من الايام .. يعني حتي بنك الفقراء بتاع البنغالي محمد يونس ما بيقدر ينافس الام دي .. يعني هسع منو اليدوهو جائزة نوبل ...؟

الاستاذة حليمة
موضوع شيق وجميل و ما خسارة قرايته و متابعته للاخر .......لكن انت تعالى البنات الاهلهم مروقين...شديد ...شديد... ليه بناتهم بتبور !!!!

بكري ابو بكري سيد الحوش ذااااتو بعندنا بجاي..
يا لسعدنا...يا لسعدنا.. والله وماك طالبني حليفة... دي مناسبة تستاهل الضبيحة، الا الجداد فَرَ.. اي طار..

Quote: لكن انت تعالى البنات الاهلهم مروقين...شديد ...شديد... ليه بناتهم بتبور !!!!

اها والله دي جديدة لنج على..القروش يا بكري من زمان بتمشي على القروش.. زي الخواجات ما بقولوا..
Money walks and sometimes talks
بس الزمن دا القرش اخد دورته وبقي يجمع السياسة معاهو.. يعني الاغنياء اللي كانوا لزمن قريب فقراء بقوا يحتمون بالسياسة.. ما كل اولادهم.. ولد عند ناس السياسة لزوم تسهيل الامور التجارية، اذا وصلوا النسابة للسلطة والباقين يدفروهم على ناس القروش.. يعني قروش تكب فوق القروش..
اتذكر حبوبتي والقصة الطريفة التي كانت تحكيها لينا عن كيف ان ابنة الجارعودو عرسها ود عوج الدرب.. طيب مالو الجار عودو ومالو عوج الدرب..كنا نتساءل في البداية.. ما الاتنين ظزيانين ، اي غنيانين، كان ردها ياتينا..
سمح المشكلة شنو كانت بت عوج الدرب عرسها ود الجار عودو والعكس صحيح، فتجيب محتجة.. عليك امانة الله قالوا ليك بنات عوج الدرب ديل الواحدة من شناتها الا تقولي بسم الله الرحمن الرحيم حتى تعايني في وشها.. الحالة دي بالنهار وبالليل، ان لاقتك الا يربطوك في القيد ..
يا حبوبة بالغتي للدرجة ؟
فتتحمس قائلة : انا ما قلت ليكن.. وتكون قالت لينا القصة اليتيمة ديك عشرين مرة.. بس نحن نتظاهر بانها ما قالت قصتها حجوة ام ضبيبينة ديك..
فتبدا قائلة: قالوا ليك الجار عودو كان عندو بت عرجاء.. وجاء خطبها ود عوج الدرب.. لا هي شافته ولا هو شافها..
نقاطعها يا حبوبة هم الاتنين موش في الحلة.. فتجيب لا لا كل واحدة في حالة تانية..
اها..
فتواصل امات الولد جن خطبنها من امهاتها.. قاموا وروهن البت العديلة ما العرجاء..
وبس رجعن كلمنو قال ليهن خطبنا ليك فلانة.. اها فلانة دي لا هو شافها لا هي شافته.. العريس كل مرة يجي يسال اماتو: اها شفتنها كويسة بتتقابل؟
يقومن اماتو يقولن ليهو اي ما بطالة ما عندها عوجة.. سماحتها ان بتدور بها بتدور تسويها منضرة تشوف فيها وشك.. المرة حلاتها في لهاتها..
والولد ذاتو كان اعرج
واخفت امهاته هذه الحقيقة عن اهل العروس..
خلاصة القصة ،حينما حضرت (السيرة) شعرت امهات العريس بتبكيت الضمير.. طوالي جابن دلوكتهن وكن يردن ايصال رسالة الى امهات العروس توضح الوضع الصحي للعريس.. فجعلن يرددن..
عروسنا ما تفزي (اي لا تهربي)
وعريسنا مشيهو غُزي غُزي (اي ان العريس اعرج)
امهات العروس خطفن بسرعة شديدة (جركانة موية) وحولنها بدورهن الى دلوكة وجعلن يردد نفس الرسالة لاهل العريس..
عروسنا مِي فَزّازة (اي ان عروسنا يستحيل ان تهرب ..لماذا؟)
وحتها غَزازة (اي ان عروسنا بدورها عرجاء)
ومنذ ذلك الحين ما فتئت جدتي رحمة الله عليها تعيد على اسماعنا.. ان عروسكن خلاس.. وان ما عروسكن..مخيرالله عليكن.. اقرأن ساكت..ومنذ ذلك الحين وانا اراقب في دورة المال بين الاغنياء ، الاقيها ياها ذاتها فكرة ناس عوج الدرب والجار عودو..
شكرا جزيلا على المرور الجميل .. واسفة لاطالة القصة..
خالص تقديري لأبا كبير .. سيد الحوش ..بكري.
حليمة

الاخ ابو بكر ..
ينسب الى الشيخ فرح ود تكتوك في الحديث عن النساء- والعهدة على الراوي - انه قال:
فيهن خميم
فيهن رميم
فيهن عقارب ساكنات الهشيم
فيهن دهب مصرور قديم -
زي المراة الفي حكاية اخونا رأفت..
وانا اضيف من عندي
فيهن نوبل قديم
- اي نساء مستحقات لجائزة نوبل.. بس الفرد نوبل ما دايب حبر، اي ما جايب خبر على راي واحد قريبي (الثغ) او الْجَن.
شكرا على المرور الذي اسعدني كثيرا يا اخو البنات..
حليمة

يابكري

Quote: لكن انت تعالى البنات الاهلهم مروقين...شديد ...شديد... ليه بناتهم بتبور !!!!

وفق معرفة متواضعة الرجل السبب في اغلب الحالات حيث يتهياء لاي واحد ان العامل المادي " الترويقة " ربما تكون سببا في ان يرفض ( اذا كانت امكاناته عادية ) .. وفي حالات اخري وهي حين يكون الطرفيين مروقيين تكون توقعات الطرفيين في حجم ماديات الاخر سببا .. ضمن اشياء كثيرة يجب ان تتغير في مجتمعاتنا الذكورية هو النظر الي كفاءة الانسان كانسان قادر او قادرة علي العطاء ... الدنيا دوارة والمروق اليوم يصير فقيرا غدا او بالعكس ...

ألأخت حليمه.موضوعك جميل ومنظم.ولكن كل شيخ وليه طريقتو.وأنتوا يا معشر النساْء.ما بعجبكم العجب ولا الصيام فى رجب .طبعآ ما كل النساء.ويكفىإن كيدكن عظيم.
ومداخلة حفيدتى عواطف(عشان أسمها عواطف أدريس اسماعيل وردت على مره بالجد اسماعيل)واضحه والقلب والبطن أقصر طريق لكسب الرجل.وطبعآ ده ماسر أكيد انتوا حافظننا حفظ.ولكن نحن معشر الرجال بنديكم الفرصه عشان تشبعوا هوهياتكم البوليسيه.لكن بكون جميل لما يكون بمزاجنا .تحياتى
اسماعيل عباس

الاخ اسماعيل عباس
شكرا لك على هذه الاطلالة عبر هذا البوست..وعلى كلمات الطيبات..
بس عندي ليك نصيحة صغيرونة.. غايتو حكاية المزاج دي كان طلعتوها بره احسن ..لانو النسوان ديل برضاكم بشيلن براهو بيشيلن. ولو دخلت فيها المحاسبة والتدقيقات الحسابية .. والواردات والمنصرفات وبنود التوفير..الخ. بقومن يطالبن بمرتب وعلاوة وترقيات ويمكن يكون فيها فوائد ما بعد الخدمة.. اقول ليك قولة.. انا فكرة فوائد ما بعد الخدمة بقت تستهويني من هسع..
لك خالص تقديري..
حليمة

Quote: قالت له : الليلة الجركن مافيهو شي

Quote: فقال لها و هو يوليها ظهره مستقبلا الحائط: بس فالحة تجبدي الفكة.

تفتيحة بدرجة (أركان شفتنه)
.....................................................................

*تحياتى أختى حليمة,وموضوع (جبيد)الفكة ذكرنى بموضوع هل هناك كذب أبيض وآخر بلون أدكن؟
*أنا استسلمت وبقيت من أنصار (الدس تحت مخدة الحرامى)وماقصدى زرزرتها,بس النلم فيها أول
بلنتى:ـ
بمبدأ لكل حادثة حديث,إحتمال الخطة تتغير,إن شاءت عاملناها مثل الأخ أبو بكر ,وإن شاءت فالحساب ولد.ولاتلومن إلا نفسها,وعاش العازب حرا يرفرف علمه بين السحب الآلى والجرورة وأسهم داوجونز.

Quote: ,وعاش العازب حرا يرفرف علمه بين السحب الآلى والجرورة وأسهم داوجونز.

ونحن من جانبنا يا باشمهندس محمد نقول يسقط العازب ولو كان راسمالو كارب..
يحيا العرسان ولو كان العريس فلسان.
لكن بيني وبينك، تراكي نحيض مادام قابض في داو جونز والسحب الالي (بدلا عن الجرورة، ورديفها الطَلَقْ، باسقاط الالف وخدرت وحمرت) ما عندك عوجة تب. بس الشعار الفوق مرفوض، مرفوض مرفوض... يا ولدي..
شكرا لك على المرور.. والمداخلة اللطيفة..
بس تسقط حرية العُزَّاب
ولو كانت لخشم الباب

Quote: شكرا لك على المرور.. بس دايرة اعرف الولية دي طفشت وين؟

لي قواعدا سالمة




اخر مرة اتصلت عليو
قلت ليو:
يا اب احمد
اها علي قلبك والا علي ربك?


وزدتو
اسع ماشاء الله المرة دي جابت ليك وليد ظريف وسميتو احمد بعد دا تسوي سواتك دي
قال لي:
والله كان جابت لي فصل مدرسة اولاد حا اجر ليها ط
بديو شهرين كدي وبتصل عليو
والله انا كل يوم اشحد الله احلب اللبن بيناتن



زين العابدين- الحليلة

Quote: لي قواعدا سالمة

دي العوجة ذاتها يا زين العابدين يا خوي...
خلاص غير الاستراتيجية بتاعتك دي وبدل حليب اللبن الاصلو غنمايتو ولا نعجتو ولا ناقتو غازرة بيهو، شتت لبن بودرة ..

دايرة أشارك في البوست دا يا حليمة..
لكن..
خايفة أكشف أوراقي.. !!!

Quote: الزوجة (المغتربة)..داهية بماء ابليس معجونة.. ام مغلوبة على امرها وممكونة؟ يلا يا ممكونة في انتظارك..

هلا والله بممكونة الفي العز مَغّلَقْ ساسا
شفت الدعوة دي وجهناها ليك من يوم 14 فبراير.. وفي انتظارك منذ ذلك الحين..

Quote: دايرة أشارك في البوست دا يا حليمة.. لكن.. خايفة أكشف أوراقي.. !!!

والله يا ممكونة تراكي عامرة.. دا قايلة ما خليت ولا ورقة توت واحدة.. اجي القاك لسع "مورقة"..
خلاص حتى الورق..
خالص تحياتي وتقديري على الطلة المقدرة لدى.. شديد
حليمة

Quote: هلا والله بممكونة الفي العز مَغّلَقْ ساسا شفت الدعوة دي وجهناها ليك من يوم 14 فبراير.. وفي انتظارك منذ ذلك الحين..

في داعي يا حليمة تجيبي لي تُهمة..يوم الفالانتاين؟؟؟!!!
يوم النكسَة مالو؟؟!!!

قالوا - و يكفينا شر قلنا و قالوا- واحدة صِحَت يوم الفالانتاين من الصباح و قالت ل راجلها..
(( الليلة حلمانة جبت لي طقم دهب ما حصل بمناسبة عيد الحب!!)).
راجلها إبتسم و قال ليها...بعدين لمن أجي من الشغل ح أفسر ليك الحلم.
قعدت صاحبتنا تتبسم و تتكشم النهار كلو..
لمن جه من الشغل جاب ليها....
....
.....
.....
كتاب تفسير الأحلام!!!!

Quote: كتاب تفسير الأحلام!!!!

هاهاهاهاها قطعتي مصاريني بالضحك... اريتو كان اداها تمن الكتاب نقدا..

الاخت حليمة
والله العظيم دا من اجمل البوستات الانا قريتا
وقرتو معاى زوجتى امانى عثمان حامد_المحامى
وقالت ليك كشفتى اسرارنا وح تشتكيك واعملى حسابك

Quote: الاخت حليمة والله العظيم دا من اجمل البوستات الانا قريتا وقرتو معاى زوجتى امانى عثمان حامد_المحامى وقالت ليك كشفتى اسرارنا وح تشتكيك واعملى حسابك

لا..لا ...لا حقك علينا يا استاذة اماني .. وعشان ما تزعلي هاك الطرفة دي .. يقال ان احد الرجال من الذين عينهم حمرا وشرارة والشنب ولا النعام ادم الله يرحمه" ما ينط لي واحد قريب النعام ادم ويقول لي بتتريقي على النعام ادم الذي فناني الشعبي رقم واحد واكن له كل تقدير".. اخونا اخونا دا اصلو ما بخاف من مرته والقروش دي بعينها ما بتشوفها.. دخل في غلاط مع اصحابو العارف خبرو واتهموه بالخوف من مرته .. حلف طلاق مغلظ انو ما قاعد يخاف منها.. المهم قرروا يمشوا معاه البيت.. في البداية كان مشي بخطي عادية بس اول ما قرب للبيت بقت خطاهو تتثاقل.. لما وصلوا عتبة البيت ، الا رفعوهو رفع من اباطينه..اول ما المرة شافته صرخت فيهو: كنت وين من الصباح موش قلت ليك امشي السوق جيب الخدار.. يلا سريع.. والجماعة يعاينو ويتغامزوا مستنين الراجل ينتر فيها ، ويوريها العين الحمراء كما ادعي.. قام صاحبنا رد بصوت راجف واحتجاج ضعيف.. انا السوق بمشي ليهو وانا الخدار بجيبوا ،، الا والله العظيم بالتلاتة ما اورق الخدرة(الملوخية ) زي كل مرة.. فردت اسمع مخصوم منك حق السجاير والتمباك والذي منه..
اها انا من ما حكوا لي الطرفة ...اتساءل من اليوم داك ماهو "الذي منه".. فيردون علي ياخي دي ما نكتة..وبس ماسكين لي في كدي عكاز الاعمي..
الاخ العزيز على عمر على
والاخت العزيزة اماني عثمان حامد..
ادخلتم البهجة على نفسي حقا، وفرحت ايما فرح.. بانكم قرأتم البوست وحكمتم عليه وعلى محتويات بالجمال والجودة.. بس يا اماني عندي طلب صغير عندك.. قرب اضانك جاي وانت يا عمر عن اذنك الطلب نسائي.. يا اماني اتضامني معاي وانا بجيب ليك خبر الرجال ديل..
فتكم بعافية.. السر انتهي يا عمر..
خالص مودتي ...
حليمة

Quote: كتاب تفسير الأحلام

دة بس راجل ضيق الافق وما عندو نظرة مستقبلية بعيدة ...
دهب كان احسن ليهو .. لانو الرجال اول ما تضربم فلسة وتطير فلوس المعاش ما بلقو سند الا في دهب زوجاتن .. الدهب دائما بحل عقد مادية كتيرة في البيوت السودانية التي لا تعرف ثقافة التوفيير ... التوفيير الوحيد هو الدهب دة العند الزوجة .. هي عارفة انو بعد عمر طويل هي خالاهو وراها يا لبتها يا لولدا او لزوجا ( لو ما بقي لئيم واتزوج بيهو مرة تانية )...
قبل كام شهر سامية فجاة قالت لي تعال نشتري صكوك وانا بحكم اني رجل ككل الرجال السودانيين لا اعرف توفيير وبالتالي ما كنت عارف صكوك شنو .. قت ليها بشنو ؟ قالت لي ما عليك انا بعت دهبي اصلو هنا بما نلبسو ووو ومشينا واشترينا صكوك علي قدر الفي وباسمي ؟ والارباح رغم هامشيتها انا البحصدا ؟ اها منو المستفيد هي والا انا ؟
يا رجال جاتكم اوا ؟ اسمعو كلام زوجاتكم ؟وبطلو المحلسة .. راجل مفلس يسوي بيهو شنو .. مش كفاية مستحملات شناتنا ؟

Quote: مش كفاية مستحملات شناتنا ؟

استميح الاخت حليمة ، بعد التحية وعظيم الاحترام .
الشنة والفلس مشكلة ، بس الشنة والفلس حالة موضوعية متفاوتة من شخص لآخر ، والتعميم فيه إخلال .. من النساء السودانيات جميلات ظاهراً وباطناً ، والبعض شينات شنة مرة ظاهراً وباطنا .. والمسألة فيها دخن كثيف .
شكراًحليمة

Quote: من النساء السودانيات جميلات ظاهراً وباطناً ، والبعض شينات شنة مرة ظاهراً وباطنا .. والمسألة فيها دخن كثيف .

والله يا عبد الرحمن في الزمن العلينا دا النسوان، وكذلك الرجال، خارجيا كلهم ماشين يكونوا جميلين..ووسيمين.. بس ركك على الشرتيت.. او الفكة.. ما شفت الفضائيات وكيف انها بتزرع فينا الجمال.. ده في نص ساعة البوصة تبقي عروسة.. والسمراء تصبح شقراء والشقراء تزيد شقروة.. والبقية تاتي وبس الرك على القرش..
يعني الشينة دي الا تعرفها من جوة.. ودا بالاختلاط ومرات بعد ما الفاس تقع الراس ..
في البداية قربت اقول ليك بتفق معاك في نسبية معايير الجمال والفلس .. بس لقيت انو كان الفلس طار .. الشنا ذاتها بتطير.. قبل سنتين كنت احضرت مع اسرتي برنامج اسمه The Swan والله كان البرنامج بجيب لينا جنس شنات نسوان وبعد تلاتة شهور عمليات تجميل وصنفرة تقيلة يطلعن الوحدة فيهن مس يونيفيرس..
يا عبد الرحمن انت "البدون" السياسية دي خاتيها في بروفايلك مالك ..دي ما بتجيب "طراوة" في البلد الانت قاعد فيها.. دي
سعدت والله كثيرا بمرورك.. وما تحرمنا الطلة
خالص مودتي
حليمة

Quote: يا رجال جاتكم اوا ؟ اسمعو كلام زوجاتكم ؟وبطلو المحلسة .. راجل مفلس يسوي بيهو شنو .. مش كفاية مستحملات شناتنا ؟

والله يا ابو بكر عداك العيب .. في دي والله في واحدات شهيدات الصبر الفلسي وصبر الصبر ذاتو. اخونا الفوق دا..في اخر الجملة بعد التلاتة نقاط وبيبدا بعبارة مش وبعديها كفاية والباقي تمو براااااااااااااااك..

حليمة المبدعة .. الف تحية ليك ..
يااختى نحن دايرين جنسا الحاجات البتشطف تراب البورد
الكتير ده ...

اسمعينى انتى قلتى :

Quote: 1. الإكثار من المساج.. 2. خليك مسكينة زي النعاج 3. كتري من أكل الدجاج 4. التأنث التقيل، خاصة بعد الخامسة مساء

اها يابت الناس اكان فى زى ده ومتوفر
حــــــــــــــلال عليها ومابتحتاج تسرق الفكة
انا بفك وبديها براى فى كل مره ..... وحق الدجاج كــــاش

Quote: اسمعينى انتى قلتى : Quote: 1. الإكثار من المساج.. 2. خليك مسكينة زي النعاج 3. كتري من أكل الدجاج 4. التأنث التقيل، خاصة بعد الخامسة مساء اها يابت الناس اكان فى زى ده ومتوفر حــــــــــــــلال عليها ومابتحتاج تسرق الفكة انا بفك وبديها براى فى كل مره ..... وحق الدجاج كــــاش

الاخ سيليكون اكاد ابصم بالعشرة على كلامك دا.. واقول ليك انت صاح مية المية ودا كان اصلو التكتيك والاستراتيجية، لولا ظهور المنافسين الجدد.. ناس راجل المرا حلو..حلا
وقبلانة بي انشاء الله راجل اختي..
شكرا على المرور الجميل
وفتك بعافية.. ما تطول الانقطاع
مودتي ..
حليمة
وفتك بعافية..

اضافة ..
السرقة بغرض التجميل وتشمل هذه الكوافير والمناكير والبوديكير والساونا وافة الافات عيادات التجميل..[/
B]
اعرف شابة متوسطة الجمال، عادية المظهر والملبس.. مرحة ، ضاحكة ، مقبلة على الحياة.. بحكم علاقتي بها كنت اعرف ان يدها تمتد الى جيوب اخوانها وابيها دون استئذانهم.. وحينما يوشك امرها ينكشف كانت تبادر بالاعتراف الى انها اخذت الفيهو النصيب.. كانت موظفة في احدي المصالح الحكومية..
كان لها هاجس واحد.. تحسين احد معالم شكلها العام...لذا كان همها الأساسي توفير المال بأي شكل..
غبت عنها قرابة العقد من الزمان..ثم التقينا.. كانت هي نفسها لم تتغير كثيرا.. نفس المرح والاقبال على الحياة.. وان بدا فيها شئ مختلف.. وحينما رأتني اتفرس فيها لمعرفة ماذا تغير فيها.. اشارت الى الجزء العلوي من جسدها.. ثم قالت: خلاص طار..
سالت وقد ازداد استغرابي: ما الذي طار؟
ردت المرحوم الكان هنا..
حينها أدركت انها قد حققت ما كانت تصبو اليه..
ما زلت مستغربة.. من قوة المد القادم الينا بقوة.. عيادات التجميل والتي اطلقت عليها في احد المرات " ورشات الجمال"
الروابط التالية:
http://halima.8m.net/war1.htm
http://halima.8m.net/war2.htm
http://halima.8m.net/war3.htm

ودمتم سالمين
حليمة

Quote: ما زلت مستغربة.. من قوة المد القادم الينا بقوة.. عيادات التجميل والتي اطلقت عليها في احد المرات " ورشات الجمال"

أزيدك من الشِعِر..بيت..
أو بالأصح..
أزيد الطين..بلٌة !!!
نوناتو..الفي وجناتو

Quote: سمعت بكل عمليات التجميل دي..... إزالة تجاعيد الوجه عملية شد الوجه و الرقبة( إزالة التجاعيد) إعادة صقل الجلد بواسطة الليزر عملية شد الجبين و رفع الحاجبين شد الجلد بالخيوط الذهبية عملية شد الجفنين عملية تجميل الأنف عملية تجميل الأذنيين عملية شفط الدهون عملية حقن الدهون عملية شد البطن (تصحيح ترهل البطن) عملية تصغير وشد الثديين عملية تكبير الثديين إزالة الوشم إعادة الحيوية (تجديد حيوية الجلد و إزالة التجاعيد ) بواسطة الليزر الشامات و الوحمات الدموية و الدوالي الوريدية و الشعيرات الدموية فى الوجة عملية إزالة الشعر بشكل دائم عمليةإعادة الشعر حقن بالكولجين حقن بمادة روستلين[ لكن... أُحبطت جداً جداً جداً جداً... لمن عرفت إنو في عملية تجميل تُجرى من داخل الخد...لزرع (( نونة )) أو (( غمازة ))..!! /QUOTE] نقلا عن سودانيات على الرابط التالي: http://sudaniyat.net/vb/showthread.php?t=2540 صاحبة المادة اعلاه هي السيدة ممكونة.. المتمكنة تماما من اي موضوع تطرقه.. كنت قد كتبت قبل ثلاثة سنوات عن ورشة الجمال ، منشور في الروابط الثلاثة اعلاه..لكن حكاية حفر الخدود من الداخل لعمل النونات، وجدتها من اكثر الاشياء قرفا.. ده انا السرقة الصغيرة لتصغير الثدي للمذكورة اعلاه استهجنتها اما وقد وصل الامر الى كل هذه العمليات.. فحقو نقلب البوست دا من الاول وندوره عمليات تجميل ويلا ننادي بدق الشفائف، الشلوخ، الوشم، تخريم الاذن بعدة اتجاهات.. تصليح الاضنين الكرت، تصغيرها ومطها لزوم تكبيرها.. تصغير الشفائف، بدلا عن تكبيرها.. والبقية تاتي..كدي النشوف انا زمان كتبت شنو؟ شكرا لممكونة.. مودتي ... حليمة

---

Post: #99 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-22-2007, 07:12 PM Parent: #98 الكلام التالي مقتطفات من ثلاثة حلقات كتبتها عن ورشة الجمال قبل ثلاثة اعوام.. واثارت مداخلة ممكونة اليوم شجون كثيرة وشعرت بالغيرة على الياتنا الجمالية البالية، وقررت ان انفض الغبار عنها توثيقا للجيل الجديد.. لمزيد من الاطلاع.. الروابط الثلاثة .. قريييييبة ما بعيدة من هنا.. مداخلتين تلاتة.. وما دام الشغلانية فيها هبرة هبرتين للجيب.. يبقي يا اخوانا قارنوا ما بين المواصفات اعلاه والمواصفات ادناه.. وانتو مخيرين.. انا العلي سويتو..no: :no جينات وراثية محسنة للبيع..!! الماعاجبو العجب..تكشيرة عند الطلب..!! • مغشوشون أم مستغفلون أم ماذا؟؟ • صار للمال أذن وشفتين، وسعي بساقين وقدمين.. مدخلين : الأول: يا أم لسانن لِسَع مَعَجَن كلمة كلمة وحروفها ضَجَن..!! الثاني: الجمال في الأنبياء خالق مشاكل ويكفيكم أخوان يوسف الرامِنو في البير..!! من قال أن الجمال صعب وان الدمامة دائمة فقد كذب..!! وجه حسب الطلب..!! بطريقة فاني الشهيرة، علي عرش الجمال تصبحين الاميرة..!! كما تزرع تحصد..!! لا يغشك الغشاشون.. انت جميلة من غير صناع..!! تأصيل الإعلانات: عملاً ب(كل زول عاجبو الصارو) سندعو نحن أيضا إلي الدعاية إلي المشتقات الجمالية السودانية ونرفع شعارات العملاق الفتية: *السماحة واجب أوجب ومن قال أن الدمامة، سائدة فقد كذب.. *كتري من الجرجير يجر شعرك بتحت لي السرير.. *مع مسواك الأراك رائحة الفم الكريهة ما بْ تَـبْراك *وبكريم ماما الأصيل شعرك يبقي يجر طوييييييييييل.. *وبالفستان الطويل كل من يراك ليك يشيل(أي يعز ويقدر)..!! *المشاط والماشطات في سلم المجتمع أحسن الدرجات.. *الدلكة والكركم والجردقة والحلبة دوا من الحر والعجاج..وهن ذاتهن أحسن أنواع المساج.. الطلح ساونتنا الأصيلة وقوي العضم بالبليلة..!!* * والماعندها الدهب ما تسوي الحِد ليها حيلة..!! شَدَّتْ والرِمة وحراسها وشليل وأم طِويرة ألعابنا الأصيلة* واحدين يلعبوها عرايا وواحدين بالفنيلة..!! الدنيا أعَمَاها بقود المَكَسَر وكتري عند الغدا من الكستر* خلي كلامك طاعم وصوتك ما تخشنيهو..هَيْ انتي نسيتي..* انتي ما من النواعم..!! *نَجْر الكلام ما بغلبنا.. ياها صنعتنا العليها بنقدر..!! والجازرلو ديك في الحِلة علينا ما يتشطر..!* ماني الاضينة ..أنا ألفي المجالس ديشي محكر..* واعلانك جيبو لا تتأخر.. *عندنا مسيخ كلامك يبقي سكر.. *وِنْ دُرْتَ الكعب..طَـلـَقْ منو ماب نتأخر..! لمزيد من التفاصيل الإعلانية...زوروا: www.asalatco.com يا سلام.. خاتمة: لم نورد الكثير من المعايير الجمالية القديمة، لاندثار معظمها، التي لم تعد تعنينا والجديدة في انتظار أن تأتينا.. لم يعد الجمال أن تكون المرأة (ريانة كعود القصب) كما يقول عبقري الرواية العربية الطيب صالح في وصف حسنة بنت محمود في (موسم الهجرة إلي الشمال)، وإنما صارت المعايير أكثر تقشفاً في هذا الخصوص. إن الجمال ومفاهيمنا الجمالية صارت هي الاخري تأتينا من الغرب.. ان المفاهيم الجمالية صارت تتغير مثل فساتينك اليومية.. نحن في انتظار الجديد الذي قد لا ينطبق علينا البتة.. المهم أن (نباصر) لنا طريقة أو أخري للدخول .. وبادِ ذي بدء... الرياضة واجبة يا أخواتي.. تلك هي البداية.. وأول الخيط في العودة إلي المربع الأول.. ودمتم سالمين ومسودنين او سودانيين..كلو ما واحد.. حليمة

---

Post: #100 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-23-2007, 07:52 AM Parent: #99 عمليات تجميلية بسيطة لشد الوجه، مهداة الى النساء والي (بعضهم) ان اراد التجريب..ما دفعني اليها هو عدم كلفتها التي قد لا تدفع اليد الى الدخول في جيب الطرف الاخر.. ونعود بعدها لموضوعنا ...سيد الاسم. Quote: عزيزتى كما نعرف أن الوجه هو المرآة التى يرى فيها الإنسان شخصيته ومراحل نموه وتكوينه والآثار التى أضافها الزمن والعمر عليه ، ونحن نحب أن نرى وجهنا مشرقاً ونضراً دائماً وأن نظهر لمن حولنا فى أبهى صورة .. وقد تبدأ آثار العمر فى الظهور على الوجه فى أعمار مختلفة ومن هذه العوامل الشمس والأتربة والرطوبة ، وتحلم كل سيدة أن تكون في أحسن صورة وأجمل شكل والعلاج بسيط كما أنه غير مكلف يمكن أن تصنعى بنفسك قناعا لشد البشرة من الطبيعة وبدون جراحى ويتكون فى الآتى: القناع الأولى: اخلطي حفنة من ثمار الفراولة مع العنب ونصف ثمرة كمثري ونصف ثمره تفاح وعصير ثمرة برتقال في الخلاط ثم قومي بوضع طبقة خفيفة من العسل علي الوجه وضعي فوقها خليط الفاكهة ثم اتركي القناع لمده نصف ساعة ثم قومي بشطفه بماء فاتر . القناع الثانية : اخلطي ملعقة من العسل مع بياض بيضة واحدة وملعقة صغيرة من الجلسرين ( موجود بالصيدلية ) وكمية كافية من الطحين للحصول على عجينة سهلة الاستخدام كقناع على الوجه قومى بتوزيع الخليط بشكل متجانس على كامل بشرة الوجه والرقبة ودعيه كذلك لمدة 10 دقائق ثم اشطفيه بالماء الفاتر. هذه الأقنعة عزيزتى هى من صنع يديك وهى وصفات طبيعية للمحافظة على بشرتك نضرة مشدودة بدون جراحة وهى سهلة وسوف ترين الفرق بعد استخدامها . نقلا عن هداية نت على الرابط التالي: http://news.hedayah.net/?xpage=view&EgyxpID=37493

---

Post: #101 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: abubakr Date: 02-23-2007, 08:00 AM Parent: #1 حليمة .. شنو التطلعات البرجوازية دي .. الحاجات دي انا بفتح بيها مطعم وارتاح من الانا فيها ابني مدن مش بيت واحد لحدما حوصت .. بعدين مالو بناتنا وزوجاتنا واخواتنا مهن سمحات وغطسة في موية النيل وقعدة في الحوش والهمبريب و مصالحة مع النفس كفاية Quote: القناع الأولى: اخلطي حفنة من ثمار الفراولة مع العنب ونصف ثمرة كمثري ونصف ثمره تفاح وعصير ثمرة برتقال في الخلاط ثم قومي بوضع طبقة خفيفة من العسل علي الوجه وضعي فوقها خليط الفاكهة ثم اتركي القناع لمده نصف ساعة ثم قومي بشطفه بماء فاتر . القناع الثانية : اخلطي ملعقة من العسل مع بياض بيضة واحدة وملعقة صغيرة من الجلسرين ( موجود بالصيدلية ) وكمية كافية من الطحين للحصول على عجينة سهلة الاستخدام كقناع على الوجه قومى بتوزيع الخليط بشكل متجانس على كامل بشرة الوجه والرقبة ودعيه كذلك لمدة 10 دقائق ثم اشطفيه بالماء الفاتر .

---

Post: #102 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-23-2007, 08:16 AM Parent: #101 Quote: حليمة .. شنو التطلعات البرجوازية دي .. الحاجات دي انا بفتح بيها مطعم وارتاح من الانا فيها ابني مدن مش بيت واحد لحدما حوصت .. الرجل الاستثائ ابو بكر صبحك الله بالخير تعرف يا ابو بكر وانا قاعدة بكتب في الاشياء دي، قلت يا حليمة هسع كان لقيتي الحاجات أول شيئ بتفكري تعمليهو بيها شنو؟ من غير تردد كنت ح اكلها.. المغصة كمان صوت الخلاط الشغال ارررررررررررر. يجيب لي الشفع وابوهم جارين . اها والله دي تقوم فيها معركة زي معركة همشكوريب.. وموش كان ادعيت انو دا لتجليط الوش.. دا لو جلطت الوش عديل ، ح يخرتوهو ويلحسوهو.. بس اسوي شنو في واحدات عينهن مليانة وكمان معاهن واحدات في شان التجميل ممكن يدفعن الغالي والنفيس.. قلنا اخير نجيب الخلطة من قفة الفكهاني.. موش اخير يا ابو بكر من الخدود البحفرو فيها بالدربكين دي عشان يسووا النونات فيها.. والله انا قلبي يدق من أمبارح.. قائلة روحي كتبت قبل تلاتة سنوات عن عمليات التجميل وما خليت شئ فيها ما اتطرقت ليهو.. رجعتني العزيزة ممكونة امبارح بقوة للمستجدات في العمليات..ومن امبارح وانا اردد بصدق : النسوان ديل مجانين ولا شنو؟ خالص مودتي.. حليمة

---

Post: #103 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: abubakr Date: 02-23-2007, 02:17 PM Parent: #1 Quote: رجعتني العزيزة ممكونة امبارح بقوة للمستجدات في العمليات..ومن امبارح وانا اردد بصدق : النسوان ديل مجانين ولا شنو؟ لظروف قاهرة البنشوفن من اهلنا السودانيات شوية او بالكاد في السنة تقابل واحدة غير سامية واخواتها واختي وامي في احيان تاريخية كل خمس سنيين ... اصلو مما استرقوني الاعراب منذ عقود اها شغال ومرات يوم الجمعة ...والبشوفهن كتيرات لكن سودانيات ما في .. عموما بشوف كتيرات في التلفزيون ووحدات لونن غريب يمكن من ضوء الكاميرات ..واهو انا في حالة توهان في ماضي لما كنت هناك ويادوبك الواحد يرفع راسو يعاين لواحدة الا زميلاتنا وصاحبتنا في الدراسة والشغل وباعتبار انهن كلهن جميلات ( بالله ما في واحد يجي ناطي في حلقي يقول وفيهن شينات ) في الجامعة كانن شوية وكنت مصاحب واحد - هسع دكتور كبير بس بتاع انعام - قدامي بتلات سنوات لكن صاحبي وكان قيافة وعارف حاجات كتيرة اها يوم الجمعة اصخي دغش واترجاهو وامشي معاه الي الصينية الجنب البركس ( الكان بيقيف فيها بشري القيافة بتاع المرور - دة للفوق الخمسيين من قراء هذا المنبر ياود ميلاد لاني لو قت الزول منو بتعرفو ما كان من امدر وانت التقول شغال كاتب سجلات عند دايات امدر ) وتجي باصات الرحلات الماشة معلوف والماشة الجبل ووو وصاحبي بيعرف كويس البص الفيهو بنات انشاء الله واحدة واها ياخدني معاهو. يعني واحدة بس كفاية تحلي الرحلة.. ولا كان في شغلات من البتقول عليها ممكونة ولا الفروت سلاد بتاع حليمة ... بس انسان جميل كما خلقها الخالق ... يعني ناس فضل اله محمد والمرحوم علي عبد القيوم وكامل ع الماجدوعوض جاد الرب وسبدرات (بتاع زمان) واللي جو بعدم ( ناس يا سيدة لا ) وناس الحلمنتيش الريقم نشف بس من "طلة " وتوصيلة الي لفة داخلية بحر العرب ( الحدود المعترف بها دوليا حينئذ) دحين كانو غنو وكتبو شعر للكوسة والبطيخ والفروت سلاد والزبادي ....؟ زمنكم شين كان مصرات علي تحوييل الفوق الكوميدينو الي بنجر وباذنجان بدل الصندل و الفرير دمور ...

---

Post: #107 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-23-2007, 04:48 PM Parent: #103 الرجل الاستثنائي ابو بكر مساء الخير تعرف بركة البقيت على بص واحد.. ده نحن لما اتخرجنا ما شفنا البصات دي ..ناش شعبة اللغة الفرنسية هرونا دراسة لما كنا بنتمني ان اليوم يكون اكتر من اربعة وعشرين ساعة وبارونا ليك رفت لغاية سنة رابعة .. دخلنا سنة اولي 84 طالب لما وصلنا سنة رابعة كنا 14 طالب .. سافروا عشرة لفرنسا قضوا سنة دراسية وبقوا الاربعة بوراهم.. عشان كدا البصات دي بعينا ما شفناها.. ولما اتخرجنا من الجامعة اجبرونا على ان تكون سكتنا واحدة بس.. وحدودنا الاقليمية تقع ما بين الـMain liberary وداخليات السنتر والتي كانت تبدأ بالقانون وبحر العرب وتنتهي بالبراري او المناهل كما كان يطلق عليها.. كمان كل ادوات التجميل التي عرفناها كانت القناع بالروب..لما اللبن كان مطلوق لينا ساكت.. كان اقصي التجميل لدينا تزجيج الحواجب والكحل.. فقط، وشوية عطور.. بس بعد ما كبرنا اكتشفنا اننا كنا عبيطات الجامعة.. ده تراهو في جنس حاجات، ولا في الطير ولا في الباقير.. وده مثل كانت تطلقه حبوبتي ..بس الله يرحمها الزمن من خلاني اسالها عن معناه.. عشان كدي السوال ممنوع.. نرجع الى اختلاف المفاهيم الجمالية.. مرة قاعدة احضر في برنامج اوبرا وكانت الحلقة عن عمليات التجميل والسرقة.. السرقة كانت جزئية اخرى .. التركيز على التجميل.. جابت اوبرا واحدة بعد التجميل .. في الواقع كان الزولة ديك عمرها 26 خاضت اكتر من 28 عملية تجميل .. والله صورتها قبل التجميل كانت افضل بكتير من صورتها بعد التقطيع والتنتف..كانت عايزة انفها يكون زي مايكل جاكسون..طبعا الدكاترة جبدوا الانف جاي جاي.. والله العظيم المسكينة حصلت مرحلة بقت ما بتقدر تنظف انفها الا تدخل فيهو عود اضان.. من شدة فتحته ما بقت صغيرة.. وبعدين الشغلانية مرض .. قالت هي مصرة تواصل في عمليات التجميل للانف لحدما الدكاترة قالوا ليها الانف ده بعد دا بقع كان باصرناهو اكتر من كدي.. عشان تمول العمليات دي كانت بتسرق الكرديت كارد بتاع امها .. المهم الشغلانية جرت.. تعرف دا عند الخواجات ما غريب شديد .. بس عندنا نحن دا يكتلوا فوقه عديل.. وطبعا مع مراعاة اختلاف المفاهيم من منطقة الى التانية اومن بلد الى التاني.. بمناسبة اختلاف المفاهيم.. دي احكي ليك الحكاية دي وقعت معاي انا.. عندي صاج مدور بعمل فيه الكسرة والقراصة يوم الجمعة .. وعندي "شملة" قماش رسلتها لي امي لزوم الزواق النسائي.. في ولد بنغالي بييجي يساعدني في نظافة البيت.. لما ليك اليوم داك في الصاج ليفو تمام لحدي ما خلاه المونيوم ابيييييض تاني.. وقعدت كم يوم افتش للشملة التي وضعتها عند طريق الخطأ في الغسالة.. لاكتشف بعد عدة ايام.. انها مغسلة ومكوية مع عباياتي السوداء .D فتك بعافية.. حليمة:

---

Post: #108 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: bayan Date: 02-23-2007, 06:45 PM Parent: #107 حليمة الكتابة اليوم تلقيت رسالة من بوب وبوب هذا رجل لطيف يتابع كتاباتي ويشد عضدي ويرفض ان اتراخى تحت الضربات. ويقرا كل ما اكتب في كل البوردات.. وهو قارئ مخلص منذ سنوات اعتز به كثيرا يراسلني في الاعياد والمناسبات وعندما اتغيب.. فبوب صديقي الاسفيري وقارئي العزيز كتب لي رسالة عنوانها اعتراف. وذكر انه يحبك كثيرا ويحب الطريقة المدهشة خاصتك في الكتابة.. وها انا اتنازل لك عن قارئ العزيز الذي لولاه لتركت السايبر من سنوات.. واعلن لك عن حبي لك واعجابي بك انا و بوب.. ودمتي وكل سنة وانت بالف خير..

---

Post: #110 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-24-2007, 07:31 AM Parent: #108 Quote: كتب لي رسالة عنوانها اعتراف. وذكر انه يحبك كثيرا ويحب الطريقة المدهشة خاصتك في الكتابة.. العزيزة بيان.. خالص تحياتي لك وللاخ بوب.. لا تدري كم تركت كلماتك والكلمات الطيبات، التي نقلتها على لسان الاخ بوب اثرها الكبير على نفسي.. واعطتني دفعات كبيرة للكتابة.. "دا انا افتش يا بيان في المعجبين زي دم الحجامة.. يقوم يجيني واحد لغاية عندي.. هذه مناسبة جديرة بالاحتفاء.." خالص مودتي لاخ بوب ولك يا عزيزة.. حليمة

---

Post: #109 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: abubakr Date: 02-23-2007, 06:54 PM Parent: #1 Quote: عشان كدا البصات دي بعينا ما شفناها.. يا حليمة كلامي عن تاريخ بعيد زمن ما الجامعة كلها مافيها الفيين بالطلبة والمرسيين والعامليين فيها ومزعيين علي المين كمبص والخرطوم غرب (كلية الطب ) وشمبات (الزراعة والبيطرة ) يعني بحساب اليوميين دييل فصل دراسي واحد .. لذا عشرة بصات او اقل كانن كفاية ...والطالبات كانن شوية وكلهن في نظرنا سمحات وبلا مكياج ... القراية ام دق هناك كانت ام كيك ( Kick ) يا ما شفنا وسمعنا جعيير لناس وصلو السنة التالتة وقالو ليهم كيك اوت وواحدين نهائي طب او هندسة ربيت اما حكاية صصبنش وديسمسزد في السنتتين تلاوائل فما تعدي ... انا كنت في كلية الطلبة كلهم ما بعرفوها وين بس بعرفو انها ط وراء الشدر داك جنب المتحف -قبل ما يبقي مكتب المدير " وما كانو بشوفونا لانو زي الوطاويط كنا بنظهر بالليل بعدما المكيسيين يكونو اتقدلو لحدود بحر العرب طراحة كعابي وعمك السر قفل ... اما حكاية المكياج الفيجي Vegi (from Vegeterian) دة فما سمعت بيهو الا بعد ما شيبنا وبقينا نشوف برامج تايرا واوبرا والطباخة رايشيل راي .. ما تقولي لي يا شايب شن بتسوي تعاين لنايرا واوبرا ورايشيل ... الموضوع هو انو معظم السنة انا وسامية وضياء برانا - لانو البنات بيكونن مسافرات- ودة ما عندو شغل بينا وفي عالمو براهو واها سامية عندها اكتر من شهادة في متابعة تلفزيونات العالم وانا بحاول مرة مرة اشاركها لكن دايما بتقول لي " اقوم ارجع لكمبيوتراتك وخليني اتابع بدون ازعاج " والحقيقة انا مزعج .. دائما ما بحضر الحلقات ولا الافلام ولا المسلسلات من الاول وهاك يا " الله دي مش كانت امبارح بتبكي ؟ حصل شنو ؟ ودة مش وقع من الحصان في السبق ؟ وتايرا دي سمنت شوية ؟ راشيل تشبه الفلبينات ؟ اوبرا دي ياريت بس تجي دارفور وتوزع شوية حاجات بدل ما بتزغط في الامريكيات السمان دييل ؟ ودي مش ابوها المغني ابو خشما كبير وووووووووووووووووووو"

---

Post: #111 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-24-2007, 07:52 AM Parent: #109 Quote: اما حكاية المكياج الفيجي Vegi (from Vegeterian) دة فما سمعت بيهو الا بعد ما شيبنا وبقينا نشوف برامج تايرا واوبرا والطباخة رايشيل راي .. ابو بكر الرجل الرائع كيف حالك.. والله المكياج دا ماشي من زمان بس التواضع السوداني الجم.. جعل شعرائنا يتغنون لنوع واحد من الخضروات.. هسع كان ذكرتك ببتذكر..شبهت البنت الجميلة بالليمون، مع تعدد استعمالات هذه الاخيرة حتى للحالات المرضية.. وشبهة البنت بقطعة السكر، وكذلك العنكوليب وهو احد مراحل نمو القصب.. والبرتكان كان له ، في اطار الفواكه، القصب المعلي، والعنب، مع ان معظم الشعراء لم يراه وبالتالي لم يذوقه..واغرب شئ غني الشعراء للملوخية، او(الخُدْرة) حينما شبهو الشفائف الموشومة بالخدرة على اطلاقها..وغني الشعراء كذلك للمنقة..واهمل التِبِشْ، والعجور والجرجير والطماطم.. وتجاسر اعضاء هيئة حلمنتيش وتغنوا للطوب الاحمر (الضانقيل) والحائطة التي تتكل عليهاشقيقة المحبوبة ولم يغنوا للجير او الاسمنت او المونة الحرة او البلدية.. خدك احمر زي طوب وكنت قائلك مخطوبة فيردد الكورس : حوا والدة..حوا والدة.. لاقيت اختك في الحيطة وحالا حالا حبيتا فيردد الكورس.. بالغت ..بالغت.. الى اخرها.. كمان ما تنسي الذرة بانواعها، والتي كما قال المرحوم البروفيسور احمد الطيب زين العابدين عليه الرحمة، اننا امة فريدة.. نتغذي من الذرة ومنها نصنع مساجنا(الدلكة) ومنها نصنع مشروباتنا غير الكحولية(الابريه) والمشروبات الكحولية كمان (المريسة واخواتها).. انا بس زعلانة.. الشعراء ديل كان غنوا كمان للبصل والفجل ديل مالهم.. والله عندهم فوائد صحية لا تحصي.. ما بالهم لم يشبهوا خدود البنت بالبصلة.. بدل الجضوم.. مالو كان قالوا حبيبتي يا الفجلة جيتي ناطة زي العِجْلة والباقي متروك لمخيلة الشعراء خالص ودي..

---

Post: #112 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: هجو الأقرع Date: 02-24-2007, 09:20 AM Parent: #1 الاخت حليمة ، صراحة هذا البوست ينطبق على كل البيوت السودانيه ، لقد اعطيت كل بيت حقو وشوية، بس سؤالى بنات المغتربين بعد الزواج كيف ، وانا اقصد المتواجدات فى الخارج . اما سرقة النسوان ، غالبا ما ترجع على البيت بالفائدة ، ولى عودة لهذا الموضوع الشيق .

---

Post: #113 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-24-2007, 09:52 AM Parent: #112 Quote: بس سؤالى بنات المغتربين بعد الزواج كيف ، وانا اقصد المتواجدات فى الخارج . اما سرقة النسوان ، غالبا ما ترجع على البيت بالفائدة ، ولى عودة لهذا الموضوع الشيق . الاخ هجو صبحك الله بالخير.. شكرا على هذه الزيارة والسؤال "الكماشة".. والله يا هجو، ديل حسب علمي المتواضع و بما انو الاسرة قاعدة في الغالب معاها في نفس البلد.. في معظم الاحيان بيكون التركيز على الورقات الكبيرة.. ودي غالبا تلف بعناية وتوضع في زجاجة ريحة او تحت طرقات الكسرة حين التحجج بالغداء مع الجماعة يوم الجمعة..او كأن يكون "الهبر" في شكل شراء ملابس اقل من المقاس او فايتة المقاس او الوانها غير مناسبة، وتجريبها ثم التذمر منهالاحقا، ثم ياتي الاقتراح من الزوج ، الذي يريد ان يسد دي بطينة ودي بعجينة، بان تهديها لاي زول تاني من اقاربها .. وتكون بكدا قادته من اضانه ووصلته للمكان الذي تبغاه.. اما فوائد الفكة.. فانت الصادق.. فوائدها على البيت كبيرة شديد.. في حاجة انا عايزة الفت انتباه الناس اليها.. في السابق لم تكن البنت مصدر دخل.. في الوقت الراهن.. انقلب الوضع..يعني حقو الناس تجلس وتتناقش في الموضوع دا وتصل ليها لقرار فيه.. في انتظار وعدك بالعودة مرة اخري سلمت اخ هجو.. ولك خالص شكري وتقديري.. حليمة

---

Post: #114 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: abubakr Date: 02-24-2007, 02:39 PM Parent: #1 حليمة الحكيمة ... يبدو انو في حاجات كتيرة فاتت اسرتي الصغيرة ... لا انا دسدست البيزات ولا هم شالو الفكة فبقيت هنا زي الاطرش في الزفة ...وكمان المكياج النباتي دة ما شفتو ... قبل شهريين كان في عرس ابن خالة اولادي .. وبعدين بناتي اهو بيلسن مناطلين وقمصان لنق اسليغز زي زيهن واخر تعاون في استعمال قمصاني .. ولكن يوم العرس ودي اول مرة يقبلن يروحن عرس وكانت الكبيرة اعلنت يوم ما كنا ماشيين نفرء الفاتحة في مكالمة هاتفيةمن مكان ما هي واختها بيدرسن ,وهي بتسال عن ال !!!Verdict ( نتيجة رحلتنا الي بيت العروس؟) من بكان ما هي في " I am asking ONLY because he is my first cousin " اها يوم العرس طلعت بيهن سامية ورجعت وبعدين جينا طالعيين بشان نسافر الي مكان العرس فلقيت لي بتيين زيادة ناقص اتنين بتاعني ؟ شفتي كيف ...؟ لاول مرة رضين يلبسن اسكيرتات وبسرحن شعرن خارج الشكل الدراسي ( يعني الكبيرة وهي بتعمل مرة مرة و بتحضر ماجستير برضو , طالبة طالبة ).. وكانت قصة انتهت بنهاية العرس واهو رجعن لقمصاني لحد ما رجعن بكانن بالسلامة .. اما ياخي ود الاقرع ..رغم كل السلبيات التي لازمت الاغتراب الجماعي والقسري و اسقاطات سوء ادارة للبلاد والعباد وبحكم الطبيعة ان الانسان يتطلع الي ما هو احسن " اخلاقياوماديا " و وفق معايير الزمان فاكيد نسلنا يتطلع الي ما هو الاحسن مستعينا بثوابت لم نتنازل نحن عنها فذهبت اليهم مع الرضاعة وما يرونه فينا .. اطفالنا ليسو منفصليين عن واقعنا تماما حتي ولو لم يرو بلادهم بعد ..اننا مراة بلادنا عندهم ..ان عكسنا جميلا راؤوه كذلك لحين ان يروه باعينهم .. اولادي لم يرو البلاد الا يافعيين لكنهم سودانيين وبرابرة اينما ذهبو ولهم نظرتهم في كيف سيكون سودانهم وان الذي هو الان بماسيه وسلبياته هو نسخة سوداننا نحن .. كل امالنا في ان نورثهم سودانا احسن من الذي يرونه في الصحف والتلفزيون وويقراءون عنه .. ولكن الم يكن فهم سيصنعو نسختهم التي تناسب امالهم وطموحاتهم .. واكيد مافي فكة يسرقونها ...

---

Post: #123 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-25-2007, 11:04 AM Parent: #114 الاخ ابو بكر الرجل الرائع.. خالص شكري وتقديري على هذا الدعم المتواصل.. راجع الهوتميل خاصتك بخصوص نفس الموضوع تحياتي لك ولجميع افراد اسرتك.. مودتي ... حليمة

---

Post: #115 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: celecon Date: 02-24-2007, 08:47 PM Parent: #1 حليمة يارائعة ولذيذة .... Quote: انا بس زعلانة.. الشعراء ديل كان غنوا كمان للبصل والفجل ديل مالهم.. والله عندهم فوائد صحية لا تحصي.. ما بالهم لم يشبهوا خدود البنت بالبصلة.. بدل الجضوم.. مالو كان قالوا حبيبتي يا الفجلة جيتي ناطة زي العِجْلة الله يجازى محنك ... اكتبى عليك الله وماتقيفى يا اخى انتى كمية من الابداع .... تحياتى ليك

---

Post: #124 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-25-2007, 11:07 AM Parent: #115 Quote: الله يجازى محنك ... اكتبى عليك الله وماتقيفى يا اخى انتى كمية من الابداع .... الاخ سيليكون.. خالص تحياتي والله غالي والطلب رخيص.. تاني البوقفني ما بتوقف.. فقط كتر الطلة.. شكرا لك على هذا المرور والتشجيع مودتي .. حليمة

---

Post: #116 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: عبد المنعم سليمان Date: 02-24-2007, 08:51 PM Parent: #1 Quote: الله يجازى محنك ... اكتبى عليك الله وماتقيفى يا اخى انتى كمية من الابداع .... والله يا سيليكون البشوفا تكتب يقول اسمها تماضر ما حليمة انا غايتو عجبني بوست لوطنة المجتمع ياااخ دااااك بوست ملوطن بشكل تحياتي يا حليمة منعم

---

Post: #117 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: celecon Date: 02-24-2007, 08:56 PM Parent: #116 منعم اللذيذ والله حليمة دى كتابة جنس كتابة بس اوعه تقوم تكتبك .. بعدين يامان والله كده مرات الواحد بيخاف من عنوانين بوستاتها وتخاف يكون فيها هواء شديد ... بعدين تعال هنا العاجبك فى بوستها داك شنو اوع بس تكون من مناصرين اللوطنة ... الله يديها العافية فتحت ابواب الرجال بيخافوا منها ..

---

Post: #125 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-25-2007, 11:10 AM Parent: #116 Quote: انا غايتو عجبني بوست لوطنة المجتمع ياااخ دااااك بوست ملوطن بشكل سمح مالك ماظهرت بهناك .. كنت بتاوق من بعيد لبعيد؟ الاخ عبد المنعم.. الله يسلمك من كل شر..ويسلم اطفال الموجودين او الجايين من المد الاعلامي الجايي علينا دا.. قول امين.. شكرا على المرور الذي اسعدني كثيراَ.. مودتي حليمة

---

Post: #118 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: د.محمد حسن Date: 02-24-2007, 08:59 PM Parent: #1 بس نحن عارفيين ومطنشين ايوم صباحا اكتشفت اختفاء بعض الفكة وعملت مصهين نجن يا حليمة الخرمنا التعريفة ما بنعرغها مشت وين مودتي

---

Post: #127 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-25-2007, 11:18 AM Parent: #118 Quote: بس نحن عارفيين ومطنشين ايوم صباحا اكتشفت اختفاء بعض الفكة وعملت مصهين نجن يا حليمة الخرمنا التعريفة ما بنعرغها مشت وين والله عجبتني عبارتك ..طلعتوا تفتيحة يا د. محمد.. ودا انا الانسلخت عن بنات جلدتي واشيل وابصر في الرجال..!!! احنا اللي دهنا السما دوكو.. على راي اخوانا المصريين.. والله يخيل لي بنهاية البوست دا انا اللي بطلع مكيشة جنس تكييش.. قلت لي بتنسرقوا بعلمكم.. سمح ما تباصروها عديييييل.. بدل (الهبروا ملوا) اسعدني مرورك كثيرا.. خالص مودتي.. حليمة

---

Post: #119 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: عبد المنعم سليمان Date: 02-24-2007, 09:03 PM Parent: #1 Quote: بوستها داك شنو اوع بس تكون من مناصرين اللوطنة ... لا يا سيليكون انا مع الخولنه

---

Post: #128 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-25-2007, 11:21 AM Parent: #119 Quote: Quote: بوستها داك شنو اوع بس تكون من مناصرين اللوطنة ... لا يا سيليكون انا مع الخولنه عبد المنعم.. الله يغطيك بتوب السترة، ليوم الدين ..وتبرأ من الاتنين.. ابصقها هسع دي.. مودتي.. حليمة

---

Post: #120 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: abubakr Date: 02-24-2007, 09:07 PM Parent: #1 Quote: الله يديها العافية فتحت ابواب الرجال بيخافوا منها .. خلو الابواب كلها تنفتح عشان الشركا يشوفو بعض كويس ويتحركو جو شركتهم بحرية واطمئنان .. مافي شريك يدسدس من التاني ... تسلمي حليمة الحكيمة ...

---

Post: #121 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: celecon Date: 02-24-2007, 09:10 PM Parent: #1 Quote: خلو الابواب كلها تنفتح عشان الشركا يشوفو بعض كويس ويتحركو جو شركتهم بحرية واطمئنان .. مافي شريك يدسدس من التاني ... كلام واعى من انسان واعى تسلم ابوبكر ...

---

Post: #126 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-25-2007, 11:11 AM Parent: #121 ابو بكر لزام التقيلة والعاطلة دراجا وروني العدو واقعدو فراجا.. مودتي .. حليمة

---

Post: #122 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: Ashraf el-Halabi Date: 02-25-2007, 02:36 AM Parent: #1 يا حليمة الكلام دا كان زمان دلوقت المرأة عندها مرتب وتشارك في دعم الميزانية زيها زي الرجل أيام الصالح العام كان عادي تلقى الرجل قاعد في البيت والمرأة هي الممول المالي الرئيسي للأسرة أها، في حالات زي دي هل يحق لأب شنب أن (يجازف الفكة)؟

---

Post: #129 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-25-2007, 11:33 AM Parent: #122 Quote: يا حليمة الكلام دا كان زمان دلوقت المرأة عندها مرتب وتشارك في دعم الميزانية زيها زي الرجل أيام الصالح العام كان عادي تلقى الرجل قاعد في البيت والمرأة هي الممول المالي الرئيسي للأسرة أها، في حالات زي دي هل يحق لأب شنب أن (يجازف الفكة)؟ الاخ اشرف الحلبي كيف حالك؟ تعرف الكلام دا كان بتاع امبارح كان قلنا ليهو باي باي وعفا الله عما سلف.. بس الكلام دا متواصل اكتر وسط شريحة اجتماعية معينة وهي شريحة المغتربين.. الذين صارت معظم زوجاتهم الخريجات عاطلات عن العمل في ظل وضع اقتصادي صعب لاسرتها ..ومستقبل مسدود امامها..ما معنى كدا انو البوست دا مخصص للمغتربات فقط.. لكل الناس.. بس اكتر شريحة بقدر اتكلم عنها هي شريحة المغتربات.. تانيا.. هل الصالح العام انتهي يا ربي وانا ما جايبة خبر؟ تالتا.. ايام الصالح الجد.. ما كانن النسوان من مسكنتهن.. بحوجنكم لانو ايديكم تدخل في الجيب خلسة.. كانن بدنكم المرتب كلو عديل.. ومرات بياخدوه بعضكم (الرجال) قلع عديييل.. ودي كانت عندها نتائج درامية ساتطرق لها لاحقا.. ومرات يثقل كاهل المراة المسكينة بعبء لا تستطيع مجاراته وتكون النتيجة ايضا درامية.. وساتطرق لها لاحقا..من خلال مشاهداتي للنساء في سجن النساء بامدرمان. اماسؤالك عن هل من حق اب شنب ان تتسلل يده خلسة الى حقيبة المراة؟ والله يظهر انو اب شنب دا سرو (باتع)... طوالي كاسر ضلع في المراة المسكينة دي ..امه داعية ليهو.. يكفي اب شنب انو يصر وشو، طوالي الفلوس بووووووووووو تجيهو.. حاجة تغيظ في اب شنب دا!!!!! فتك بعافية.. حليمة

---

Post: #210 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: فاروق حامد محمد Date: 04-06-2007, 00:52 AM Parent: #122 حليمة فوووووووووووووووق

---

Post: #130 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: هجو الأقرع Date: 02-25-2007, 11:45 AM Parent: #1 الاخت الفاضلة حليمة ، هنالك سرقة من بعض نساء المغتربين عينى عينك ، تقول ليك فى صندوق بتاع حريم الخته خمسمائة ريال ، وعشان تساعدنا فى رسوم المدارس ، او تجديد العفش ، والله التلاجة عاوزة تبديل وانت يا غافل ليك الله وتقول الصرفة حقتنا الاخيرة، وهى تكون متفقة معى ولدها الكبير او اخوها، والله النوع القاهر البركب التكسى براه فى الغربه ، وبعد ان تقبض فى نصف المده ، (مش الاخيرة) وتدخل انت ذات مساء ورسوم الجامعات فى السودان ومصاريف الداخليه شاله فكرك ، وإلا تسمع صوت الكشكشه مع غسيل العيده فى المطبخ ، ويخيل اليك ان الماسورة انكسرت ، والله سير الغسالة باظ وهذا هم جديد، وتسرع مسرعا وترى حرمك المصون وقد انتهت من الغسيل وهى تنظر الى غوائشها الجديده، اها الواحد يعمل شنو؟

---

Post: #131 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-25-2007, 11:58 AM Parent: #130 Quote: هنالك سرقة من بعض نساء المغتربين عينى عينك ، تقول ليك فى صندوق بتاع حريم الخته خمسمائة ريال ، وعشان تساعدنا فى رسوم المدارس ، او تجديد العفش ، والله التلاجة عاوزة تبديل وانت يا غافل ليك الله وتقول الصرفة حقتنا الاخيرة، وهى تكون متفقة معى ولدها الكبير او اخوها، والله النوع القاهر البركب التكسى براه فى الغربه ، وبعد ان تقبض فى نصف المده ، (مش الاخيرة) وتدخل انت ذات مساء ورسوم الجامعات فى السودان ومصاريف الداخليه شاله فكرك ، وإلا تسمع صوت الكشكشه مع غسيل العيده فى المطبخ ، ويخيل اليك ان الماسورة انكسرت ، والله سير الغسالة باظ وهذا هم جديد، وتسرع مسرعا وترى حرمك المصون وقد انتهت من الغسيل وهى تنظر الى غوائشها الجديده، اها الواحد يعمل شنو؟ هِيْ يا ود الاقرع كتر خيرك وبارك الله فيك.. والله يجعلها في ميزان حسناك.. دي تراني انا طلعت واحد ما واحدة...يعني هسع بفتش لَيْ لوش فيه دموع ما لاقياهو.. يعني هو تراهو واحد من الاستراتيجيات النسائية.. الحاجات دي .. والله لكن انا ما غبيانة شديد.. قلت توعدك بالصرفة الاخيرة وتاخذ الفي النص والا تتفاجأ بالغويشات يقولن شوووووووووو... دا انا قلبي القاعد يشوشو هسع.. ويدق زي الدلوكة في اضني.. هسع راجيني يا هجو اوريك الحل شنو؟ ما انا التكتيك دا جديد بالنسبة لي لنج..لكن والله عفارم عليها وعفيت منها.. اقول شنو.. تؤخذ الحياة غلابا.. فتك بعافية.. آل صندوق آل..انقرع!!..

---

Post: #132 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: هجو الأقرع Date: 02-25-2007, 12:23 PM Parent: #131 أمانة ما اتلومت لوم با بت الناس ، انا جهزت تلفونات الاصحاب وكنت فى انتظار النصيحة ، لكن راجع ليك بى بنات المغتربين بعد الزواج ، والله قلت الاستاذه خبيرة بكيد النساء ، لكن الفيك اتعرفت ، ربما بخلتى علينا بالنصيحة مدارة لبنات جنسك ، شكتيك على تراجى .

---

Post: #133 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: abubakr Date: 02-25-2007, 01:41 PM Parent: #1 Quote: وهى تنظر الى غوائشها الجديده، اها الواحد يعمل شنو؟ يا شيخنا تفاءلو خيرا تجدوه ... الغويشات دي اكيد بتنفع في يومها .. بس اصبر ....هي حتوديهم وين ...يا لبتها يالبت بتها يا لولدها يوم ما تقدر انت ...... بالعكس يوم تلقي شوية بيزات زيدهن غويشة وما حتندم ....

---

Post: #134 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: هجو الأقرع Date: 02-25-2007, 02:48 PM Parent: #133 اخى الكريم ، بعدين لما تجى نقول ليها بيعى ، تقول ليك سجمى دايرنو يقولو باعو دهبن ، اسع اكان جاءت واحده من اخواتى تلقانى يايعة الدهب ، المشكلة اختنا حليمة عندها الحل و لكن رافضة.

---

Post: #135 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-25-2007, 10:02 PM Parent: #134 فاقطع لبانة من تعرض وصله ولشر واصل خلة صرامها واحبُ المجامل بالجزيل وصرمه باق اذا ظلعت وذاغ قوامها بطليح أسفار تركن بقية منها فاحنق صلبها وسنامها وإذا تعالي لحمها وتقطعت بعد الكلال صرامها فلها هباب في الذمام كانها (الباقي غلبني) والله يظهر اني مفارقتكم فراق أخينا "الطريفي لبعيره" زوجة تتفاخر على زوجها الذي اكتشف انه مغشوش "صناديق" وتذكره بماضيه. أتذكر اذ عراقيك الدمورية (وزن عشرة) وإذ نعلاك من "تموت تخليه" السير* فرد الزوج المَغَبون : بلحيل ..اذكره ولا أنساه فقالت الزوجة: فسبحان الذي وهبك اياني، وأحالك من النوم فوق عنقريب "القد" الى السرير فضقت نوم المرتبة الاسليب هاي بدل نوم الحبال، والمرقوت والصراصير وسقاك الشربات الساااااقطة من الكورة ام قعر * والثلاجة بدل الزير او تذكر انك لم تكن تعرف السجائر وكيف ان كيفك كان في "التمطير" وكيف انك كنت دوما جالب خدارك الباير.. ناس الطمام والجرجير وكيف انني صنفرتك بعد كذا حمام.. لا وعلمتك اداب الطعام و اكل الفطير ولم تكن تعرف سوى الفتريتة والعاب الحِزِنْقيل الحِجير فطأطأ الزوج راسه ، ثم رفعه قائلا.. حَرَّمْ تسكتي، الا ادخلك بدل الصندوق صندوقين.. واعزلي الصرفة العاجباك.. هو الدهب ذاتو ما دخرينا.. انت على الطلاق صاح صاح وما صاح برضو صاح.. اها يا هجو اديتكم أسبوع كامل، كان تقدروا تردوا على ابياتي اليتيمة دي..ويحيا التضامن النسوي.. فتك بعافية.. خالص مودتي.. حليمة

---

Post: #136 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: هجو الأقرع Date: 02-25-2007, 11:11 PM Parent: #135 B] الاخت الفاضلة بت الرجال حليمة ، لسنا فى حاجةالى اسبوع ، واحد عاوز يورى حرمته حجمها الطبيعى بعد ان اصبحت فى عزه ونعيمة سبحان الله هل نسيت لما كنت فى الحفلات ذى طفل عوير هل نيست يوم خطوبتك جابوك من عند الغدير وكنت مرافقة المعيز وارخص انواع الحمير واستبدلت الكركار باغلى انواع العطور وبعد البورة اصبحت من ربات الخدور وبعد البلاستيك لبست كشكاش السرور فسبحان الذى خلاك مداما ونساك طبيخ البابور فيا ابنة عاتكة ان لم تعقلى جبت غيرك احلى حور واعلمى ان الله حقا وانك قشاشة ومعراكة السرور اها يا اختى القصيدة دى قال واحد لمرتو والان ماشة سراط مستقيم ، واتفقوا اذا غضب منها قدم الناس يقول يا ابنة عاتكة واخوتنا تقوم صوف وتفهم المطلوب .

---

Post: #139 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-26-2007, 08:24 AM Parent: #136 هجو الاقرع كيفنك؟ انا راجعالك.. بس صاحبك بتاع المعلقة دا.. مادام عنده المقدرة يحول راعية المعيز والحمير الى ليدي.. ليش ما مشي ليهن من الاول.. لماذا هذا الجانب الانساني بعدين التكشيرة دي بعد كم سنة؟ انت قريت اب كريق قلع حقتي.. يا في نهاية الصفحة الاولي او بداية التانية.. ياهو كلامي ذااااتو القلتو..والله انا خايفة صاحبك دا يكون شايل توب الطرقة(الحد او بيت العدة) في شنطتو.. يعني خطوتين والقبر..وخلي نسميها الرضينا ونسميهو الصليل.. وبادي ذي بدء نقول الصِليل النسيم هبالو جاتو الرضينا لدلالو ربي يحسن فعالو ويطول عمرو ويزيد دلو ودلالو وما يشيل الاخرة قبال ما يحلل مالو نعمنو زولا تليفة المولي ادالو وقبال منو ادي ابوهو وايضا كذلك خالو دا اب كراعا متل القحف ما ضاق لنعالو ومن كتفو ان ختا الملود عُقُب شال شوتالو النعمة جات دافرة سايقالو ورقد من تالا الصعيد النسيم هبالو الهي ما يموت يقعد لامن يكمل مالو والحول الجايي يلقاهو يفتل في حبالو انا راجعة ليك يا ود الاقرع وبعصماء لن تستطيع مناطحتى فيها.. خليك جاهز.. فتك بعافية.. خالص مودتي.. حليمة

---

Post: #137 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: Sabah Hussein Date: 02-26-2007, 04:44 AM Parent: #1 حليمه يامدهشه بطريقتك دى بتكتولى ليك زول وعليك الله اكشفى حال العالم دا كلوا واستورينا نحن فى عـرضك ياختى

---

Post: #138 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: bayan Date: 02-26-2007, 06:16 AM Parent: #137 Quote: لا يا سيليكون انا مع الخولنه بعرف كل الهوايات من جمع الطوابع لغاية تصبير الحيونات عمري ما سمعت بزول هوايتو السفاهة الا عبدالمنعم دا عجبي!

---

Post: #141 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-26-2007, 08:50 AM Parent: #138 بيان يا المابتتوصفي وزي الدهب تتلاصفي احكمي الوليدات والبنيات حكما شفي وبالصوت لحمهم نتفي ممكونة يا الما بتتلفي وفوتك يفوت ما بتنجفي مريودة يا الما بتنجفي خالص مودتي ..يا غالية حليمة

---

Post: #146 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: عبد المنعم سليمان Date: 02-26-2007, 10:46 AM Parent: #138 Quote: بعرف كل الهوايات من جمع الطوابع لغاية تصبير الحيونات عمري ما سمعت بزول هوايتو السفاهة الا عبدالمنعم دا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ معليش يا استاذه حليمه ع الكلام الفوق ده وما وقتو !!

---

Post: #140 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-26-2007, 08:46 AM Parent: #137 الغالية صباح شكرا على المرور والدعم الجميل تعرفي .. يظهر اني ح اخذلك.. اصلي قمت من البداية ونزعت كل ورق التوت عن النساء..وبعدين قمت الملم في اطراف الموضوع عشان ادخلهم في نفس المحنة الدخلت نفسنافيها.. تصدي لي من امبارح واحد اسمه هجو الاقرع.. الناطق الرسمي باسم الرجال..وقعدت لي بالمرصاد.. كلما اكتب مداخلة اهاجم فيها الرجال.. القي ود الاقرع واقف بالمرصاد.. يقوم يرجعني للمربع الاول وهو النساء.. عشان كدا خليك واقفة معاي..ينوبك في ثواب.. فتك بعافية يا غالية وماتطولي الغيبة خالص مودتي.. حليمة

---

Post: #142 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-26-2007, 08:54 AM Parent: #140 السرقة من اجل الأسرة..!!! المكان: سجن النساء - امدرمان الزمان 1990 في ثنايا الحكاية كانت القصة...في البداية والنهاية... جلست إمامي شابة باهرة الجمال في بداية الثلاثينات من العمر، تنتمي إلى إحدى المدن التي كان لها باع طويل في النهوض بالمرأة.. كان الاتفاق أن لا اسألها عن بياناتها الشخصية.. وان يكون التركيز فقط على التهمة التي تسبب في دخولها السجن..وكان ديدننا أن تشعر السجينة بالارتياح معنا (أقول معنا لأنه كان معي الزميل العزيز حسن احمد حسن، مدير التحرير آنذاك، بمجلة سوداناو) لم نلجأ إلى المغالطة أو إشعارها بأنها مذنبة.. كانت في حاجة ماسة الى شخص يصغي إليها.. وكنا نريد معرفة السبب الذي من تقضي عقوبة عامين في السجن.. حكت تلك الفتاة الباهرة الحسن والتي تعمل محامية، أنها كانت تؤجر هي وإخوتها الذين يدرسون في مختلف المراحل الدراسية الجامعية ،من احدي السيدات في الخرطوم ، جزء من بيتها.. وبحكم الطبيعة السودانية، كان هناك تداخل بين العائلتين: صاحبة البيت والمستأجرين.. وحسب رواية صاحبتنا السجينة، في احدي المرات فقدت ربة المنزل مبلغا كبيرا من المال، فاتهمتها بسرقته.. وبعد التحري والتدقيق والتمحيص، تمت إدانتها بسرقة المال، وحكم عليها بالسجن عامين...كان أكثر مما يحز في نفسها طفلتها الرضيعة التي تركتها مع والدتها.. قرائن الأحوال تقول ان المبلغ الذي كان يرصده لها زوجها،بالإضافة إلى الدعم الإضافي الذي تتلقاه من أسرتها لم يكن كافياَ.. أمها كانت في المعاش وكذلك والدها..أكثرت حديثها عن إخوتها والعبء الذي يشكلونه عليها.. كأنما تلتمس العذر، لفعلتها غير المنطوقة..وتلقي باللائمة عليهم.. سألناها إذا كانت قد استأنفت أو تنوي الاستئناف، فردت بالنفي.. على الرغم من كونها خريجة قانون وتعمل بالمحاماة..لم نصر عليها عما إذا كانت سارقة أم لا.. ولم تجتهد كثيرا في نفي التهمة عنها..كانت آليتنا معروفة بالنسبة إليها.. كانت المأساة مجسدة في ملامح تلك الشابة.. جامعات تنتظر الاقساط.. وافواه تنتظر الطعام.. وصاحبة منزل تنتظر الايجار عند مطلع كل شهر.. وغيره..وغيره.. كان ذلك قبل سبعة عشرة عاما.. ترى كيف يكون الحال اليوم؟

---

Post: #179 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: Shazali Date: 03-02-2007, 02:56 PM Parent: #140 ياحليمه ياختى انت ماسمعت بى الصباح انلاح لافايده فى المصباح اسرقن انشاااااا الله متخلو ملين اصلن جايبنهن لى شنو.....ده كلام ده الله يدينا العافيه ونجيب القروش وانتن اسرقنهن .. بعد ده البوست جاب ليه ( لمة حريم وهوشة كريم)واصلها (نعمة كريم ) ولكن بالرفيرنق للسطر اعلاه (اسرقن) يديك العافيه ياحليمه والله مبسوط منك تب ..كبيتى المويه فى الجحره.. اهه الحقى اقرى المساهمه الماها خمج مساهمه مختزله من قصه قصيره وحالة ماتمت والطرفه ماوصلناها اليلى اكان عجبتك بنتمها ليك واكان لا ؟؟ البوست بعد ده ماااااااا مخلينو ليك ولحررتى سوقو براكى تحت تحت؟؟؟؟؟!!!!!!!!!

---

Post: #143 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: Sabah Hussein Date: 02-26-2007, 09:22 AM Parent: #1 ياحليمه إن دا حالك انتى بى درب ووانا بى درب كشف الحال دا ماحلو والمره من قامت الدنيا بتسرق من الراجل يعنى عايزه المره تنط بالحيطه وتسرق ولا شنو والسرقه ذاتها خشم بيوت هى يابومه المره بعد تسرق قلب الراجل وتنهزوا من بيتهم ضحا ونصـت نهار جيبوا شـن طعمو لو انسرق وبعدين ياحليمه ياختى انتى معانا ولا مع الخيانه سـرق الراجل ياها كارنا وكار كبارنا من زمن الصحابه الشغلانيه مدوره مافى زوله فتت اسرارنا الأ انتى ومن الليله القاك فى اى بوست تقولى فى ذى كلامك دا انابـردومك وصيه فى الذمه انكشى العالم دا وارمى تانى بجيب ليك المحافير بينى وبينك يستهل كشف الحال بس بى تحـت تحـت

---

Post: #144 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-26-2007, 10:02 AM Parent: #143 نتائج سرقة الازواج من زوجاتهم.. المكان سجن النساء- امدرمان الزمان: 1990 صاحبة هذه القصة احدي النساء في مقتبل العمر من احدي مدن الاقليم الجنوبي.. محكوم عليها بالاعدام لقتلها ضرتها.. جلست امامنا شخصية هادئة جدا.. بشوشة.. خجولة.. ابعد ما تكون عن تلك التهمة الشنيعة.. سألناها عما إذا كانت قد قتلت ضرتها.. أجابت بالإيجاب.. طلبنا منها حكاية قصتها.. فقالت إنها مسئولة مسئولية تامة عن إعالة أسرتها.. خاصة وان زوجها لم يكتف بالتنصل عن مهامه الأسرية تجاه أسرته.. بل تزوج امرأة ثانية.. وطلب منها أن تعولهما الاثنين أيضا.. قالت إنها رفضت في البداية، الا انه لم يصغ إليها، فكان يحضر إلى المنزل ويحمل كل ما لذ وطاب.. حسب تعبيرها، لعروسه الجديدة.. حزت هذه الفعلة في نفسها كثيرا.. وقررت التمرد.. فكانت ترفض، وكان لا يتورع عن ضربها أمام غريمتها..وسبها بأقذع الألفاظ.. ونسبة لضيق ذات اليد، خاصة وان مهنتها الأولى لم تكن تدر دخلا كثيرا عليها (اعتقد ان مهنتها الأولى كانت غسل الملابس) اتجهت إلى صناعة الخمور المحلية، لربحيتها الكثير، على الرغم من مخاطر(الكشات) وخلافه.. وحسب روايتها.. صار الزوج لا يكتفي بأخذ المواد التموينية له ولعروسه.. بل (يقتلع) غصبا عنها الفلوس التي كانت تجنيها من صناعة الخمور البلدية.. اكتشفت ان زوجها اكتشف مخبأها السري واخذ كل الحصيلة التي وفرتها.. ولم يكتف بذلك. كان يضربها لأقل نبرة تذمر ..كما هجرها هجرا تاما لصالح الزوجة الجديدة.. في لحظة من اللحظات قررت الإبقاء على حياته وسلبه سعادته الجديدة.. فأخذت أداة ضخمة وهشمت بها رأس غريمتها، فقتلتها في الحال.. لم تقاوم الشرطة التي اعتقلتها ولم تنكر ارتكابها للجريمة.. سألتها لماذا لم أبقت على زوجها.. ردت قائلة: هو يقعد .. بس هي لا.. هل أنت نادمة على ارتكابك هذه الجريمة؟ سألناها لا...كان ردها.. ثم أردفت " أنا كان ندمانة .. بس ندمانة على حاجة واحدة ..وليدي الصغير دايرة أشوفو قبل ما اموت.." جاهدت لإكمال هذه العبارة بصعوبة.. تهدج صوتها وارتعشت شفتاها.. انحدرت دمعتان حرتان.. ثم غطت وجهها بطرف ثوبها وانخرطت في بكاء صامت..يقطعه (نهنهات) صغيرة، قوية، مكبوتة، وخلجات الجزء العلوي من جسدها وقد ألقت به على الطاولة أمامنا..

---

Post: #145 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-26-2007, 10:10 AM Parent: #143 انت يا صباح "كدَّكْتى" البوست دا ولا شنو؟ كلما حاولت ارد عليك يتنح يقيف..عموما ما تزعلي المداخلة الفوق دي انشاء الله تفش ليك غلك شوية.. بعدين ما دام السرقة من قديم الزمان.. ما كفاية الهبرتنو زمان وتخلن الرجال ديل يفتحوا شوية ويدوا برضا الطرفين.. اها خلينا نعقد صلح من اول وجديد.. شروطك شنو غير الفوق ديل؟ خالص مودتي.. حليمة

---

Post: #147 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: فيصل نوبي Date: 02-26-2007, 10:50 AM Parent: #145 سلام للجميع و الاخص ست البوست حليمة قصة سرقة النساء فرفرتوها لكن في سؤال أساسي .. ليه أغلب النساء ما بيدبرن مما يسرقن .. يعني من النادر جدا تلاقي واحدة إشترت ليها حاجة قٌيمة من مصروفها أو سرقاتها .. يكون من قلة المصروف و لا من صغر مبالغ السرقات ؟

---

Post: #148 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-26-2007, 11:09 AM Parent: #147 Quote: لكن في سؤال أساسي .. ليه أغلب النساء ما بيدبرن مما يسرقن .. يعني من النادر جدا تلاقي واحدة إشترت ليها حاجة قٌيمة من مصروفها أو سرقاتها .. يكون من قلة المصروف و لا من صغر مبالغ السرقات ؟ عشان الضرب ما يمين والعرق ما جبين عرفت يا فيصل يا نوبي..؟؟ وبعدين كان تابعت البوست من البداية بتلقي الحبوبات شعارهن: من الشُمارة للخُمارة... تكون زي ديك العدة..طالعة تخرب نازلة تخرب، وتفريغ يدي الراجل اول باول.. شفت جنس التركة دي؟ شكرا على المرور الذي جلب معه جرب سؤال واحرج اللي بعدك..

---

Post: #181 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: Shazali Date: 03-02-2007, 09:34 PM Parent: #143 ياصباح صباحك نور ياختى وزى ماقلتى بى عضمة لسانك من الله خلق الدنيا وخلق الانسان انتن سراقات تسرقن الباك .. وتسرقن الراجل كله بى شحمو ولحمه وتجدعن عضم... تسرقن القروش.. تسرقن القروش بى وراهو وكمان على عينك ياتاجر النبيح حق الصندوق ..حق الصندوق حق الخته ياراجل الشهر مادخل.. والخته ولا الصندوق الشافه منشاف... وتسرقن قلوب الرجال ابان قلوبا ميته وذاكرتن ضعيفه..السرق الباك فى الجنه وتوسوس مع ابليس ياناس منو.. السرق راجل... وقال .... حله منو ياناس..انتن تسرقن الكحله من العين قف... وعلى الرغم من ذلك!!! جعل بيننا وبينكم موده ورحمه ودى حكمته..اعمار الدنيا بالتى هى احسن... احسن كيف ؟؟؟؟ نواصله فى القادم كان الله هون وترقدو عافيه.

---

Post: #190 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 04-01-2007, 10:02 PM Parent: #181 الاخ شاذلي.. مساك الله بالخير اعذرني اخي العزيز.. يا عيب الشوم على راي اخواننا الشوام.. وسجمي رسمي على راي نسوان المدينة الواقعة شمالنا.. صدقني لم ارى مداخلتك سوي الان، وذلك بعد اخراج البوست من الصفحة العاشرة ومراجعته.. لك العتبي حتى ترضي.. دا من ناحية.. والناحية التانية انا كنت متعاطفة معاك .. لكن لما لقيتك سالي لسانك لحِبَيِبْتي صباح، قررت اخذ حقنامضاعف منك.. وبركة كراعك الجابتك لغاية عندنا.. سمح اسمعني زين.. Quote: وتسرقن الراجل كله بى شحمو ولحمه وتجدعن عضم... بالله السارق التاني منو؟ نحن تقوموا تملونا اولاد وتفكونا عكس الهوا.. انت ما سمعت احد الشعراء اقاربي يشتم احد الرجال لانه تزوج المراة التي تعلق بها.. ما شفنا الكعيرو قيل تحت ليمونة الا قيد الهوان كسر السنين في قرونا. Quote: السرق الباك فى الجنه وتوسوس مع ابليس ياناس منو.. ما دايرة ادخل في المسائل الدينية، لكن والله الباك (بتاعك) دا كان كدي باين عليهو تعبان.. Quote: انتن تسرقن الكحله من العين عليك امان الله.. مادام نحن بنسرق الكحل من العين.. انتو جنس الرجال، تلحسوا قضاية العين (القذي) كان بقت في عين مرا.. اها شفت.. Quote: ..اعمار الدنيا بالتى هى احسن... احسن كيف ؟؟؟؟ نواصله فى القادم كان الله هون وترقدو عافيه. وينك انت يا بوي؟ ما راجينك؟ تخريمة تصالحية: في انتظارك وفي اضنينا بدندن حس قطارك.. قنب طولا.. فتك بعافية

---

Post: #149 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: معتصم الطاهر Date: 02-26-2007, 12:31 PM Parent: #1 عزاز شامى : Quote: ياختي لزومه شنو تبقى المرأة معلقة في جيب راجلها من الاساس ؟؟ غايتو العلاقة الاقطاعية دي بين الرجل والمراة ابدا تب ما بتعجبني والعجب كان حوجتني اسرق!!! أحبها عاملة وأن تكفى مصاريفها حاجاتها هى وما تعطيه لأهلها وأن تأخذ مصروفها من الرجل ( حتى لو كان مرتبها أكبر منه) وأن يكثرا من التهادى .. حليمة العزيزة وعزاز الحليمة أمسكوا فى بعض والله انكما و ممكونة لعز البنات فى المنبر .. وحلمنا بمرأة تستحق ليس فى هذا انقاص من قدر الآخريات بقدر ما هو ( ضرب مثل)

---

Post: #150 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: خالدة البدوي Date: 02-26-2007, 03:59 PM Parent: #149 زولتنا الجميلة حليمة لك الود والاشواق الكثيرة ،، Quote: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ ليه الرجال يوصلو النساء إلى المرحلة دي وليه النساء ما دام وصلوا للمرحلة دي ما تكون ( الفكة ) هدية للمسروق منه لزيادة المودة ،،، لك كل الود يا حبيبة ،،،

---

Post: #155 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-27-2007, 07:37 AM Parent: #150 Quote: ليه الرجال يوصلو النساء إلى المرحلة دي وليه النساء ما دام وصلوا للمرحلة دي ما تكون ( الفكة ) هدية للمسروق منه لزيادة المودة ،،، العزيزة خالدة ..كل التحايا والود.. الجزء الاول تساؤل جميل جدا وتحميل للرجل للوضع الاقتصادي والاجتماعي والاخلاقي الموجودة فيه هذه الشريحة من النساء.. اما ان تكون السرقة بغرض التقرب من الطرف التاني.. فاعتقد ان هذه الجزئية صعبة التنفيذ او بمعنى اصح، تحتاج ان يسبقها تفريغ نفسي، ومعالجة ذاتية.. فمادامت وصلت مرحلة الاخذ منه دون رضاه، لا اعتقد ان استعدادها النفسي يكون كبيرا لدرجة انها تعيد "المسروقات" اليه مرة اخرى.. على العموم دعينا نفكر في الوضع سويا وبروية.. دمتي يا غالية وما تطولي الغيبة.. حليمة

---

Post: #154 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-27-2007, 07:28 AM Parent: #149 Quote: أحبها عاملة وأن تكفى مصاريفها حاجاتها هى وما تعطيه لأهلها وأن تأخذ مصروفها من الرجل ( حتى لو كان مرتبها أكبر منه) وأن يكثرا من التهادى .. الاخ معتصم الطاهر صباحك خير شكرا لك يا سيدي على هذا المرور وهذه الصراحة اللطيفة.. انت اول واحد يقول رايه في الوضع الاقتصادي للمراة بصراحة شديداً.. جامعا بين الوضعين الاقتصاديين الدنوي والديني.. اعجبتني صراحتك وقوة رأيك حقاَ.. رجاء كتر من الطلة.. عشان بنحتاج في الايام القادمة لمثل رايك بشدة .. خالص مودتي.. حليمة

---

Post: #151 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: abubakr Date: 02-26-2007, 05:28 PM Parent: #1 ام خالد ... زعلت كتير للمحامية السجينة والتانية القاتلة ...ظروف حياة معقدة للرجل دور والمراة كذلك في ذلك ..ولكن خالدة جابت من الاخر .. وفيصل عايزنا نرجع تاني لحكاوي ودالاقرع مع الدهب ...؟؟ ومعتصم عايزها عاملة وصباح مصرة علي المحافظة علي "التراث !!!" وعزاز كالعادة رافعة لواء استنهاض همم المراة ضد الفكر الذكوري الاقطاعي وانا لايص ... لزومو دة كلو شنو؟ ما تحبو بعض وخلاص ...انا مستعد احب الدنيا دي كلها لانو لقيت بعد مماحكة وطرازانيات ومرجلة في الفاضي والمليان وصوت عالي ووو كل اساليب اثبات الذات الذكورية انو الحب بحل لي كل مشاكلي ...حب متوازن ما فيهو خيالات ولا افتراضات .. حب بتاع Smart Partnership النتيجة فيها مضمونة Win-Win جربن وجربو وما بتخسروا .. صدقو رجلا كهلا ليس فيلسوفا ولا عبقريا ولا اي حاجة بني ادم ....

---

Post: #152 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: عزاز شامي Date: 02-27-2007, 06:40 AM Parent: #151 أؤيد كلام الأخ أبو بكر ... في جلسة فطور صباحية في المكتب، وبعد تحديق في دوائر قهوتي اعترفت بصوت عال لزملائي/تي بأن معادلة المجتمع اختلت عندما بدأنا كنساء في مقارنة منتهى أهدافنا بـ(الرجل) من حيث الحقوق و القيم! أنجح العلاقات بين الرجل والمرأة هي التي يعرف فيها الطرفين دورهما الطبيعي و يؤديه بالشكل المطلوب، قوة الرجل وتفوقه في بعض الجوانب تكمل ضعف المرأة و رقتها في الجوانب الأخرى وتزيد من قوة كليهما.. تنقلب الآية متى حاول أحد الطرفان عكس الآية أو (المساومة) على دوره الطبيعي في العلاقة... الحياة أجمل عندما لا يهدده (نجاحي) أو (ذكائي) الحياة أجمل عندما أيقن داخليا بأني قوية بمفردي و (أقوى) و (أسعد) وهو معي! صباحكم فل!

---

Post: #153 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: فيصل نوبي Date: 02-27-2007, 07:12 AM Parent: #152 Quote: الحياة أجمل عندما لا يهدده (نجاحي) أو (ذكائي) الحياة أجمل عندما أيقن داخليا بأني قوية بمفردي و (أقوى) و (أسعد) وهو معي! صباحك ورد.

---

Post: #156 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: bayan Date: 02-27-2007, 07:44 AM Parent: #153 Quote: بيان يا المابتتوصفي وزي الدهب تتلاصفي احكمي الوليدات والبنيات حكما شفي وبالصوت لحمهم نتفي ممكونة يا الما بتتلفي وفوتك يفوت ما بتنجفي مريودة يا الما بتنجفي خالص مودتي ..يا غالية It is just pay back time dearest

---

Post: #159 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-27-2007, 08:06 AM Parent: #153 فيصل يا نوبي مرحبتين تجينا واليوم السعيد الجابك لينا مرحبتين حباب

---

Post: #158 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-27-2007, 07:56 AM Parent: #152 Quote: أنجح العلاقات بين الرجل والمرأة هي التي يعرف فيها الطرفين دورهما الطبيعي و يؤديه بالشكل المطلوب، قوة الرجل وتفوقه في بعض الجوانب تكمل ضعف المرأة و رقتها في الجوانب الأخرى وتزيد من قوة كليهما.. تنقلب الآية متى حاول أحد الطرفان عكس الآية أو (المساومة) على دوره الطبيعي في العلاقة... الحياة أجمل عندما لا يهدده (نجاحي) أو (ذكائي) الحياة أجمل عندما أيقن داخليا بأني قوية بمفردي و (أقوى) و (أسعد) وهو معي! انت عليك نضم درر..وافكار زمردات ويواقيت في خاصرة الزمن الجايي.. Quote: الحياة أجمل عندما لا يهدده (نجاحي) أو (ذكائي) تعرفين لماذا قلت الزمن الجايي.. لان هذا الاقتباس الاخير هو مربط الفرس. مازالت هناك اغلبية، ترفض ندية المراة العملية والفكرية، حتى ولو كانت الفوائد المادية لهذا النجاح تعم كليهما..ولدى كم هائل من القصص التي وقف فيها الرجال حجر عثرة امام نجاح النساء.. رغم التشجيع المبدئي.. الذي تلاه انسحاب مخزل.. امراة ذكية وناجحة ومساوية فكرية(بلاش نقول متفوقة، حتى لا نعطي الفرصة لفرضية الرفض ) تعني ان Two men can't live under one roof فرضية رددها كثير من كانوا مشاعل علم لنا هناك في ام نخيل (جامعة الخرطوم)..بغض النظر عن الوضعية التي ادرجت فيها.. شفتي حجم المأساة.. (تساولات)ك، وفكرتك تنفع موضوع بوست جاد.. يجلس فيه الاثنان وينزعان ورقة التوت، التي تغلف غلظة انا رجل.. واستكانة "كونها" امراة.. خالص مودتي

---

Post: #157 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-27-2007, 07:46 AM Parent: #151 Quote: لزومو دة كلو شنو؟ ما تحبو بعض وخلاص ...انا مستعد احب الدنيا دي كلها لانو لقيت بعد مماحكة وطرازانيات ومرجلة في الفاضي والمليان وصوت عالي ووو كل اساليب اثبات الذات الذكورية انو الحب بحل لي كل مشاكلي ...حب متوازن ما فيهو خيالات ولا افتراضات .. حب بتاع Smart Partnership النتيجة فيها مضمونة Win-Win جربن وجربو وما بتخسروا .. اها يا جماعة اخونا العزيز والرائع.. ويستحق ان نسبغ كل الالقاب الجميلة عليه، وضع امامكم خلاصة تجربته الرائعة في الحياة.. كلمة واحدة هي المفتاح لكل المشاكل.. الحب تخريمة: هيصوا يلا..حبوا يلا غنوا.. باكر تكمل الاغاني .. تقوموا تجنوا..

---

Post: #160 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: abubakr Date: 02-27-2007, 08:36 AM Parent: #1 عزاز وفيصل ومن في عمرهم .... انتو في مرحلة مابين جيل مجتمع ما زالت الذكورية غالبةفيه رغم اقتحام المراة لمجالات كثيرة كانت حكرا للرجل وبين تطلعات جيلكم بما يعيش ويري حوله في مجتمعات اخري ودون ان يتنازل عن خصوصية مجتمعه وكيانه .. المعادلة ليست صعبة ولكنها تحتاج الي عزيمة وتوازن ومراعاة ومقدرة to work around it ...الاشياء هنا ليست صنمية وثوابت لا تتغير .. المفيد واضح وافتراضات صارت عرفا او تقليدا ليست ملزمة ما لم تكن لفائدة الجميع ...في مثل هذه المرحلة الانتقالية تكون هنلك بعض التنازلات او التعامل التدريجي مع تلك الافتراضات وعموما البعض كذلك يفضل " الصدمة" او "التصادمية" ...ما يهم كما ذكرت في مداخلة اعلاه هو ان يربح الجميع ... مساء امس تابعت برنامجا اسبوعيا (اتابعه كلما سمحت الظروف) في قناة النيل الازرق " كلام نسوان" لا اذكر اسماء المشتركات انما كن من الفريقيين : فريق مستعد لتنازلات واخر للصدام وكل فريق كان مقنعا ..الفريقيين اشتركا في امر واحد وهو ان يخرج الاثنيين :الزوجة والزوج او الرجل والمراة رابحيين win-win siuation وهذه خطوة متقدمة ومهمة في كفاح المراة السودانية اي تجاوز مرحلة القبول والانصياع لافتراضات وسطوة المجتمع الذكوري وصولا الي حل يرضي الطرفيين ويسعدهما

---

Post: #161 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: احمد العمار Date: 02-27-2007, 09:33 AM Parent: #160 العزيزة / حليمة والله من بداية هذا البوست وانا متابع ومستمتع بس بدون مداخلات لكن تعرفى تذكرت حاجة دايمة الحدوث معاى عشان كدا قلت اشوف رأيك فيها شنو تعرفى دايما الواحد مرات كتيرة بنسى ليهو ورقة مهمة فى جيبو او مرات بنسى ( فكة ) ومرات مناديل ورق ، اها ساعة الغسيل المرا تقوم ترمى الملابس بحاجات دى فى الغسالة المشكلة وين ؟ * مناديل الورقة بتذوب فى الجيب وتفتفت وتخرب الدنيا * الاوراق المهمة وعادة بتكون صغيرة تكون المعلومة الفيها انتهت * اما القروش عادة تلاقها معجونة لكن بتتصلح وبعد داك تحصل الشكلة انتى متفتشى الجيوب دى قبل الغسيل وانتى وانتى حاضر المرة الجاية افتش الجيوب قبل الغسيل وتكرر العملية ، لا انا ابعد الحاجات من الجيوب ولا هى تفتش الجيوب . فالظاهر حاجيبها ليك تديها شوية معلومات تشجعهاعلى تنظيف الجيوب قبل الغسيل ولا رأيك شنو ؟؟؟؟؟؟؟؟؟؟؟؟؟؟ أحمد العمار

---

Post: #164 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-27-2007, 07:38 PM Parent: #161 Quote: تعرفى دايما الواحد مرات كتيرة بنسى ليهو ورقة مهمة فى جيبو او مرات بنسى ( فكة ) ومرات مناديل ورق ، اها ساعة الغسيل المرا تقوم ترمى الملابس بحاجات دى فى الغسالة المشكلة وين ؟ * مناديل الورقة بتذوب فى الجيب وتفتفت وتخرب الدنيا * الاوراق المهمة وعادة بتكون صغيرة تكون المعلومة الفيها انتهت * اما القروش عادة تلاقها معجونة لكن بتتصلح وبعد داك تحصل الشكلة انتى متفتشى الجيوب دى قبل الغسيل وانتى وانتى حاضر المرة الجاية افتش الجيوب قبل الغسيل وتكرر العملية ، لا انا ابعد الحاجات من الجيوب ولا هى تفتش الجيوب . فالظاهر حاجيبها ليك تديها شوية معلومات تشجعهاعلى تنظيف الجيوب قبل الغسيل ولا رأيك شنو ؟؟؟؟؟؟؟؟؟؟؟؟؟؟ كدي يا احمد العمار النحكي ليك الحكاية البسيطة دي.. يقال ان احد الاغنياء كانت امواله محرقة ليهو روحو.. فذهب في احدي المرات إلى الشيخ العبيد ود بدر وقال له : يا مولانا انا دايرك تديني واحد من حيرانك ديل عشان يمشي يلف بالحلال وينادي ويقول يا اخوانا: احمد ود امحمد زين (الاسم من عندي) قال ليكم المسافرين كلهم ينزلوا بعندي.. وبدا الناس يتوافدون زرافات ووحدانا..السنة الاولي كلها كملها ضبيحة للضيفان.. شي مرارة وشي كمونية وشي شية، والجماعة مبسوطين على الاخر، واغطية عند النوم ومراتب ايضا كذلك وزيت للمسوح من الغبشة وكذلك لزوم محاربة البعوض.. وفي العام التالي، بدأت (فُطامة الضيفان.. بقي خروف واحد يتم الطبيخ منه للجميع واقتصرت الصحون على صحنين فقط واحد سلطة والتاني ملاح ويكة، ولما يغيروا ليهم منها تكون بامية مطبوخة...العام التالت ، بقي ود امحمد زين يكرم الضيفان بكسرة بموية.. وبرضو الجماعة من قوة عينهم واصلوا التوافد زرافات ووحدانا..فتعب الرجل تعبا شديدا خاصة وان استراتيجية تنفير الضيفان بما فيه صرة الوش وجلد الاطفال، عند رؤية الضيفان، لم تجدِ فتيلا.. فذهب في العام الثالث إلى الشيخ العبيد ود بدر .. يقال ان الرجل ابتسم حينما راه وايقن ان للرجل مطلب اخر.. فجعل الرجل يزح ويقرب من الشيخ العبيد وفي اخر المطاف تشجع وقال: ابونا الشيخ أنا جيتك وقاصدك في طلب.. خير.. رد الشيخ ود بدر.. فطأطأ ود امحمد زين برأسه إلى الأرض ثم قال أبوي الشيخ، أنا بدورك تديني واحد من حيرانك ، في شان بدورو يحوم الحلال ويكورك ويقول يا المسافرين ويا القاعدين، ود امحمد زين بقول ليكم ما عندو لا عجين لا طحين.. الحاضر يكلم الغايب يا السامعين.. فضحك الشيخ وقال له يا ابني ارفع راسك.. الشينة ما بتدور ليها روري (اعلان) في الحلة.. امش الضيف ووكتين يجيك ما تقدم ليهو شي ..عاين فيهو ساي لامن ياخد قعدتو ويقوم.. الخبر بعد داك براهو بينطلق في الحلة.. دحين يا ود العمار .. أخير ليك ياتو ؟ تستعمل التكنولوجيا بما فيها هارديسك ويو اس بي ومثيلاتها، وتخزن في كم محل ، وتخلي المرة دي بهداوتها ورضاوتها.. والله تبقي رفيق لود امحمد زين.. والله تجيبها لي اصنفرها ليك جنس صنفرة و أخليها ليك (هَــبَّــار) بس..!! ولا عذر لمن انذر..

---

Post: #175 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: احمد العمار Date: 02-28-2007, 09:43 AM Parent: #164 Quote: دحين يا ود العمار .. أخير ليك ياتو ؟ تستعمل التكنولوجيا بما فيها هارديسك ويو اس بي ومثيلاتها، وتخزن في كم محل ، وتخلي المرة دي بهداوتها ورضاوتها.. والله تبقي رفيق لود امحمد زين.. والله تجيبها لي اصنفرها ليك جنس صنفرة و أخليها ليك (هَــبَّــار) بس..!! ولا عذر لمن انذر.. والله يا حليمة بعد قصتك بتاعت ود الزين دا احسن لينا حالنا زاتو، لا ( صنفرة ولا شنكل ) واحسن نستفيد من خبراتك دى فى حاجات تانية . ودمتى حكيمة يا حليمة أحمد العمار

---

Post: #162 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: abubakr Date: 02-27-2007, 09:58 AM Parent: #1 حليمة الحكيمة Quote: هيصوا يلا..حبوا يلا غنوا.. باكر تكمل الاغاني .. تقوموا تجنوا.. ومالو .. جنا من حب وغني ما اخير من جنا من احتراب وموسيقي عسكرية ...المجانيين الحبيبيين بتلقيهم اخر سلطنة وغني اما مجانيين الكدر فياشايلين حجارة يضقعو بيها خلق الله يا سيخ يشجو بيهو راس واحد غلبان .... اها ياتو الاحسن

---

Post: #165 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-27-2007, 07:50 PM Parent: #162 Quote: هيصوا يلا..حبوا يلا غنوا.. باكر تكمل الاغاني .. تقوموا تجنوا.. ومالو .. جا نمن حب وغني ما اخير من جنا من احتراب وموسيقي عسكرية ...المجانيين الحبيبيين بتلقيهم اخر سلطنة وغني اما مجانيين الكدر فياشايلين حجارة يضقعو بيها خلق الله يا سيخ يشجو بيهو راس واحد غلبان .... اها ياتو الاحسن تعرف يا ابو بكر انا حس الفكاهة والنقد اليومين ديل عندي متوفر بكثرة.. والفكاهة هي المخلية الواحدة لايص في الدنيا دي .. وفي اطار الفكاهة دي .. مادام كل شئ داخل السوق الاسود..ما ممكن الموسيقي ذاتها تغش السوق الاسود ودي البخلي الناس حافظة الاغاني كلها وبعدين بما ان مخيلة الشعراء ما عادت كريمة كما في السابق.. تقوم الناس تحفظ كل الاغاني لدرجة يرقموها.. وتقول للواحد داير الاغنية رقم كم.. تذكر الرقم وتدمدم ترقد.. وبس تسوح في ملكوت الله..تقوم الاغاني الجديدة والشباب الاخضر يدخل السوق الاسود.. وبعد داك وين والله الا الواحد يحارب السوق الاسود بان يبلغ ليهو شريط يخليهو شغال بجوة بس.. شكرا لك يا ايها الرجل الرائع.. اخونا ابو بكر فتك بعافية

---

Post: #163 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: celecon Date: 02-27-2007, 10:05 AM Parent: #1 كلام أعجبنى: المرأة رقيقة وهي أنثى الرجل عظيم وهو رجل المرأة ليست جميلة وهي تؤدي دور الرجل الرجل لا يبدو وسيما وهو يؤدي دور المرأه المرأة سر سعادة المنزل الرجل سر سعادة الكون المرأة تصون عندما لا تخون الرجل يخون عندما لا يجد من يصون المرأة اليد اليمنى للرجل الرجل أصابع تلك اليد اليمنى . المرأة أقوى من الرجل بعذوبة أنوثتها الرجل أقوى من المرأة بعنفوان رجولته المرأة و الرجل عظماء وهم يؤدون دورهم بلغة التفاهم والصدق والحب .. اللغة التي لا يفهمها سواهما. وأخيرا جميلة المرأة حينما تظل امرأة ووسيم الرجل حينما يبدو رجل.

---

Post: #166 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-27-2007, 08:02 PM Parent: #163 Quote: المرأة رقيقة وهي أنثى سيليكون: يا ابني والله انثي دي الزمن دا الا في الاربعين يوم الاولي لعرسها.. انت بتهظر Quote: لمرأة ليست جميلة وهي تؤدي دور الرجل الرجل لا يبدو وسيما وهو يؤدي دور المرأه قبل ما تسترسل في الكلام السمح دا ارجع للبوست بتاعي الاول ولبوست شغال هسع بتاع حبيب ابو نورة عن الفيمنزم. Quote: المرأة سر سعادة المنزل الرجل سر سعادة الكون المراة ملح الارض والرجل سعادة الروح.. بس لما يكون هناك علاقة "من غير شلوخ" وسل روح والله يا سيليكون الكلام سمح..قلنا شنو.. سمح الكلام..

---

Post: #167 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: هجو الأقرع Date: 02-27-2007, 08:43 PM Parent: #163 الاخت حليمة الحكيمة ، عليكى الله شوفى كيد النساء كيف والسرقة عينى عينك ، لى زميل دراسة عاش وتربى فى عز وخير واسرة يقودها والد ، السوق ، المسجد ، البيت ، توفت الام ، ومرت ايام عصيبة على الاسرة ، وفى اول اجازة قصدت منزلهم للعزاء، بعد طرق الباب خرجت لى شابة لم اعرفها ولم الفها من قبل ، الم استطيع ان اعزيها لاننى ادركت انها غربية ، فسالت عن افراد الاسرة ، فقالت انا مش عاجباك ، قلت لااقصد بس عم فلان او والاده قالت تفضل ، وبعد لحظات جاء العم الوقور وروائح الطيب تمشى امامه وعزيته واصرت هذه الغريبة على الجلوس ، طبعا انا عرفت انها مرتو ، وتسالت ببراءة ما عرفتنى بالاخت قال يا اخى دى ما عروس عمك ، لم اقل مبروك وسالت عن صديقى وبقية الاسرة ، فقال الرجل الجماعة فى عمارتى القديمة التى تعرفها ، وخرجت احمل هم صديقى ، ذهبت وبعد السلام والكلام استفسرت فقال، اخى ان هذا الشيطان دخل علينا بالساحق والماحق ، قال جاءت يوما الى ابى فى باب عمارتنا الجديده ، واقنعت ابى ان امها توفيت وان زوج امها طردها واختها الصغيرة لكى يتزوج ، وانها موظفة جديدة وسوف تحاول ان تدفع جزء من الايجار الى ان تتيسر امورها ، وصدق ابى ، إلا ان الشيطان ضيق الخناق على ابى وحاصرته بانوثتها الطاغية حتى تزوجها ، وجاءت للعيش معنا بعد سنة من وفاة امى ، بداية استطاعت ان تضايق اخواتى البنات فطلبن منى الرحيل ، واجهت والدى بكل ادب ، فقال تحملو شوية، قال ايقنت ان الحل ليس عند والدى، الا ان بعد مدة اقنعت هذه الشيطانة والدى انها تشك فى سلوك احد اخواتى جن جونى ، و( قال ضربتها كف جامد) وقال ابوى خلاص امشوا العمارة الثانية ، بعد شهر علمت ان ابى سجل لها البيت الكبير بيع وشراء مع سيارة جديدة، بل وصلت بها الوقاحة ان احضرت احد اقرباؤها لخطبت احد شقيقاتى ، وطلبت منه ان يكف لان هذا والده وختم بدمعة حارة.

---

Post: #171 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-28-2007, 08:55 AM Parent: #167 Quote: جاءت يوما الى ابى فى باب عمارتنا الجديده ، واقنعت ابى ان امها توفيت وان زوج امها طردها واختها الصغيرة لكى يتزوج ، وانها موظفة جديدة وسوف تحاول ان تدفع جزء من الايجار الى ان تتيسر امورها ، وصدق ابى ، إلا ان الشيطان ضيق الخناق على ابى وحاصرته بانوثتها الطاغية حتى تزوجها ، وجاءت للعيش معنا بعد سنة من وفاة امى ، بداية استطاعت ان تضايق اخواتى البنات فطلبن منى الرحيل ، واجهت والدى بكل ادب ، فقال تحملو شوية، قال ايقنت ان الحل ليس عند والدى، ود الاقرع صباحاتك خير جاء الثعلب يوما يمشي في ثياب المحتاجين (وقد يكون) يبحث عن البيع في حارة الشارينِ فقال لها (الختيار) لبيك ماذا تبغينِ؟ قالت اخت سراتي اناواخياتي الى حينِ وعجنت عجنتها وخبزت خبزتها فكانت من الساكنينِ (الضاربين بكل ابيض مخزم) والطاعنين بالسكين السنينِ (الحيزبونات) الراميات بكل الشهادات العلميات والمغرمات بالدكاكينِ.. وفي السوقِ العربيِّ كانت لهن صولات وجولات بلغن تسعة وتسعينِ وما بين دكاكين الزيوت و (المقاضي)، وقعن صريعات، وكان (الختايير) لهن خير المعينِ شمروا وقد عضوا جلاليبهم في اسنانهم، فبانت (تِكَكْ) سراويلهم المتسخة كانياب الدلافينِ ومُنِىَ كل موعود (خمسين)، بنفحات عشرينِِ فاشتري كل، دستة بناطلين وخنق بها كرشه القمينِ وصار كلُّْ، (ناركوك) صغير يحبو امامها، انيابه لم تبين ثم تأبطها وغطس بها شهرا كاملا لم يبينِ وحينما حان (كتابه)، ظهرت صاحبة الدكاكين وترجلت من عربتها الفارهة، وكتحت الترابة في افواه الباقينِ مودتي يا ود الاقرع.. ودا الزمن العلينا..وكان درت بفتح بوست كامل بنوع القصص دي.. الله يجيب العواقب سليمة.. ماعندنا شيئ قدر دا نورث، لكن نطلب من الله ان نقوم قرون بقر ونقعد قرون بقر..

---

Post: #168 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: معتصم الطاهر Date: 02-27-2007, 11:28 PM Parent: #1 سؤال سهل الأجابة يستعصى على الكتابة! لماذا لا تتزوج البنات الذكيات الجميلات ...! ثم لماذا يهرب الرجل من زواج المرأة ( القوية)؟ بدعاوى مثل صديقة فقط زى أختى ..

---

Post: #172 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-28-2007, 09:08 AM Parent: #168 Quote: سؤال سهل الأجابة يستعصى على الكتابة! معتصم خلينا نستعدل التساؤل.. سؤال سهل الكتابة، يستعصي على الاجابة Quote: لماذا لا تتزوج البنات الذكيات الجميلات ...! تتزوج الجميلات وتسقط في هذا الاختبار الاجتماعي الذكيات.. Quote: لماذا يهرب الرجل من زواج المرأة ( القوية)؟ أأمن على كل تساؤلات الاخ ابو بكر اعلاه.. هل المقصود بكلمة "القوية" المراة القوية الشخصية، ام القوية البنية؟ هذه الاخيرة اجتهد كل من كريستيان ديور وغي لاروش ونانا ريتشي في جعلها تذوب رقة وصبابة.. اذا ذلك يعني القوة الداخلية.. السؤال المعكوس مادام هي شخصية قوية لماذا تتزوج واحد شخصيته ضعيفة؟ هل يبحث كل عن الناقصو؟ خالص مودتي .. حليمة

---

Post: #169 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: abubakr Date: 02-28-2007, 04:35 AM Parent: #1 عزيزي معتصم Quote: لماذا يهرب الرجل من زواج المرأة ( القوية)؟ ما هو تعريف "القوية "؟؟ هل اعتزاز بنفس وهذا المفروض يجعل الرجل يتمسك بها ويهرب اليها لا منها ؟ ام مقدرة علي التعبير عن نفسها وحقها وكذلك هذه محمدة فالشريك القوي المطالب المدافع عن حقه يقوي الشراكة ؟ هل الرافضة لان تكون بلا اسم " جماعة" و "ناس البيت " و"الاولاد" وفي هذه الحالة كمان تاكيد لشخصها كان الاولي ان يعترف به الشريك او المجتمع دون ان تؤكده هي ؟ ماانيت به ( هذا السؤال) مهم حيث تتداول الجملة بكثرة احيانا ؟ لك مودتي ابوبكر

---

Post: #173 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-28-2007, 09:13 AM Parent: #169 Quote: هل الرافضة لان تكون بلا اسم " جماعة" و "ناس البيت " و"الاولاد" واضيف الى هذا البزنس كارد.. يروح الواحد ملصقه في الباب ، بدلا عن الفحمة او قلم الشيني وعبارة حضرت ولم اجدكم.. الغريبة هو يضيف (كم) الجمع لـ(حضرت) لزوم الضيافة، ويرفعها في كرته.. ابو بكر اخونا.. شكرا لك يا سيدي على هذا الدعم المتواصل.. لك الود كله.. حليمة

---

Post: #170 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: سيف اليزل الماحي Date: 02-28-2007, 08:18 AM Parent: #1 . تحياتي للحضور هنا واحد من الجماعة البكرهو النسوان كراهية الموت والبعتقدو إنو بلاوي الدنيا كلها من كيدهن العظيم، قالوا صاحبنا ده كان جالس مع جماعة بيتكلموا عن الاتحاد النسائي وتاريخو ومساهامتو ومشاكلو الخ ، صاحبنا لمن اخد فرصة قال ليهم: أنا قايتو ماعارف .. لكن الإتحاد النسائي ده من دخلوهو النسوان ديل إنتهى. هسي واحد تفتيحة زي صاحبنا ده النسوان بيسرقوه ؟ البيتسرقو ديل الداقسين ناس المساواة والرافعين شعار كيدهن جميل! مع تحياتي سيف اليزل

---

Post: #174 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 02-28-2007, 09:35 AM Parent: #170 يا لسعدي.. يا لسعدي سيف اليزل ذااااتو دق الباب وجاء لعندي بمناسبة الزيارة وكراهية صاحبنا الفوق للنسوان دي.. هاك الطرفة دي.. يقال ان احدهم كان كارها للنساء كرها شديد.. واستمر كذلك لم يتزوج حتى كان على مشارف الخمسين.. فجاءت اليه امه يوما وقالت له: هوي يا ولد كل اخوانك عرسوا ما عدا اتنين، و انا كل يوم امشي ناقصة، كان ما عرست ما عافية منك؟ بب رمتها ليهو.. عدم عرس يقابله عدم عفو عام، مفتوح الصلاحية.. المهم بعد كم يوم "طنطنة" و"صرة" وش، قرر ان يدخل السجن (الذهبي) بكرعيه.. كان الوقت شتاء، امه قد تدمدمت ببطانيتها.. جاء جلس الى جانبهاوقال ليها خلاص يا امي انا قررت اعرس.. الولية فت صنقت واطلقت زغرودة طوووويلة.. وقررت ان تزوجه ابنة اختها.. بالرغم من تحفظاتها عليها، باعتبارها بت مدارس و"مقرطاها" حبتين.. المهم.. ذهبت المراة الى بيت شقيقتها.. وذهب صاحبنا وبدأ يسترق السمع، وكله امل ان ترفض البنت.. وسمع امه تقول لاختها: والله يا اختي طالبين القرب منكم.. بندور مخلتكم(مخلطكم)، رحبت الشقيقة كثيرا مما زاد في استياء الولد.. وسالت الاخت اها ياتو في اولادك البتدوري تناسبينا بيهو فقالت الام.. فلان ولدي .. وذكرت اسم صاحبنا.. فقفزت الاخت : بري يا يمة سجم خشمي .. ولدك العجوز دا.. فوجدها صاحبنا فرصة مناسبة وبدأ يطرق على الشباك بكل سرور،، يا خالة .. يا خالة .. اديني معاك كلمة.. بركة الجات منك .. بركة الجات منك.. انا خلي بتك دي العرس ده ذاتو بطني طامة منو.. اها يا امي تاني .. طلاق بعد عقد .. ما تفتحي خشمك وتجيبي لي السيرة دي..

---

Post: #177 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 03-01-2007, 09:14 AM Parent: #174 سرقات أخرى الرجــــــــالة تطـــيـــــر ..!! جلست تحكي قصتها..وقد ترقرقت في عينيها دموع جاهدت لكفكفتها. جامعية تحمل درجة الماجستير بامتياز ، من جامعة مرموقة..رزقت ثلاثة أطفال من زوجها الذي لم يكن مؤهله التعليمي يتجاوز الشهادة السودانية.. كانت أوضاعنا المادية بالغة السوء خاصة مع وجود الأطفال وزيادة متطلبات الحياة المعيشية في هنا.. ظللت اكنس واغسل واكوي واطبخ، وأمارس كل حياة النساء من زينة ورواق، وخلافه، والعن كل صباح حياتي واندب حظي، خاصة حينما اعرف الأوضاع العملية والمادية الممتازة، لزميلاتي اللائي تقل درجاتهن كثيرا عن درجتي.. في ذات يوم قرأت إعلانا عن وظيفة في مكان مرموق جدا، بنفس درجتي العلمية، وبمخصصات يسيل لها اللعاب. لم أكن احلم بها قط..، وظيفة كأنما فصلت خصيصا علي، والأعجب والأغرب إن دخلها الشهري يساوي ما يكسبه زوجي في ست شهور.. أطلعته على خبر الوظيفة ففرح جدا.. وسمح لي بتقديم أوراقي.. بل أخذها بنفذلك النهاراذكر ذلك النهار الصيفي وقد حضر في منتصف النهار الشديد الحر، من المكتب وهو ينادي ويصيح بفرح طفولي ...يلا .. يلا الشهادات عشان أوديها.. أكبرت فيه تصرفه وزغرد الأمل في قلبي ودبت الحياة في عروقي..وحمدت الله سرا وعلانية على أن زوجي لا يلقي بالا إلى الفوارق العلمية التي بيننا.. ووقفت بكل صدق أمام المرآة وبدأت اتجمل.. تواصل (ن..ع) قصتها قائلة: بعد أسبوع واحد اتصل على مدير شئون المستخدمين بالجهة صاحبة الإعلان وطلب إلى الحضور لإجراء المقابلة الشفهية و الفحوصات الطبية توطئة لتوقيع عقد العمل.. كدت أطير من الفرح.. وانتظرت بفارغ الصبر ساعة عودته من المكتب.. جلست أتخيل حالنا وقد ذهب أبنائنا إلى أفضل المدارس لتلقي تعليمهم..وانأ حالي وقد انصلحت أحوالي المادية، وجرت الفلوس في يدي.. وكيف أنني سأحقق أمنية أمي، بان تزور الحبيب المصطفي، عليه أفضل السلام.. وكيف أنني سأساعد أبناء شقيقي المتوقي.. وكيف أنني سأرسل إلى جدتي ذلك الراديو الصغير الذي تحلم به والذي يمكنها من متابعة نشرة " الميتين" (نشرة الثامنة مساء بتوقيت السودان المحلي) والترحم عليهم..الخ. شيدت قصورا من الامال..ولم أكن ادري بان الرياح على وشك أن تهب على قصوري الرملية. قفزت إليه وتعلقت برقبته، حينما رأيته يدلف إلى الداخل وزففت إليه الخبر السعيد.. أو كما كنت أتوهم.. في الحال اكفهر وجهه وانقلب حاله وسألني بكل فتور: انتي جادة في الكلام دا؟ - طبعا.. كانت إجابتي الممزوجة بالاستغراب.. - انسي الموضوع دا..!! - ليه؟ - بس كدا..! - كيف ؟ بس كدا.. ياخي جاوبني عشان شنو أنساه، وآنت اخدت شهاداتي ومشيت قدمتها بنفسك.. دا كلو كان عشان شنو؟ - عشان كنت شايفك كل يوم زهجانة وصارة وشك من الصباح للمسا.. قلت أنفس عنك شوية.. بس شغل مافي .. حاولت سرد كل مزايا الوظيفة الجديدة..لكنه أصم أذنيه عن كل كلماتي، ونداءاتي وتوسلاتي ثم آهاتي.. صرخت ، وبكيت وأضربت عن الحديث معه.. ثم لجأت إلى بعض كبار السن من أقاربي للتوسط بيننا، خاصة وان الجهة المخدمة كانت في انتظار رد من جهتي خلال اسبوع يؤكد قبولي العرض أو رفضه.. كانت حجته في البداية أن الأطفال صغار ولا يمكن تركهم بين أيدي الخادمة.. فاقترحت أن نحضر والدتي أو والدته أو أي واحدة من أقاربنا للبقاء معنا، فرفض، ثم تحجج في آخر الأمر بأنه "عايز كدا وبس". بس الأخيرة، تعني انه "راجل " والمفروض بي كـ"مرة" اسمع كلامه وبس.. فوافقه كثير من أقاربي الذين استنجدت بهم على "بسه" هذه والتزم من لم يعجبهم الحال الصمت.. كلمة واحدة جعلت مصيري معلقا بين يدي ذلك الرجل الجهلول..زوجي.. - ثم ماذا؟ سألتها.. - لا شي.. انتصرت إرادته البليدة وطالبني الجميع في آخر المطاف، بصرف النظر عن الوظيفة للإبقاء على حياتي الزوجية.. واصلت مشوار الكنس والطبخ والنظافة والغسيل وكي الملابس وألغيت من ذاكرتي ممارسة حياة النساء العادية.. وصرت أراه من غير تلك الهالة التي صنعتها حوله، خاصة حينما قدمت ابن الجيران ، إلى أهلي قائلة بأنه الرجل المناسب لي للارتباط به.. تلك الهالة التي لم يكن يراها سواي.. يا لقصر نظري..!! - الم يكن من الممكن أن تعمل من داخل المنزل في نفس مجالك أو في التدريس.؟ سألتها.. - منين يا حسرة، على رأي إخوانا المصريين..أنا اسكن في حياة شعبي، كل ساكنيه، ناس على قدر حالهم.. قد اعمل بالتدريس ولكن في الغالب دون فائدة تذكر، وبالمجان.. تصدقي يا حليمة.. آخر مرة شفت فيها القروش لما كنت بعمل في إجراءاتي للحضور إلى هنا..المغصة انو راجلي دا راجل موميائي.. وانا دا كلو ما كنت شايفاهو..!!

---

Post: #180 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: salma subhi Date: 03-02-2007, 03:01 PM Parent: #177 حليمة اذيك الفكة مهمة شديد ياحليمة وسمّوها فكة علشان تفك الضيق في بعض الظروف...غايتوا بتي بتجمع فيها قالت دايرة تشتري عربية.. ...ما حاولت أحرجها

---

Post: #183 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 03-03-2007, 07:58 AM Parent: #180 Quote: الفكة مهمة شديد ياحليمة وسمّوها فكة علشان تفك الضيق في بعض الظروف...غايتوا بتي بتجمع فيها قالت دايرة تشتري عربية.. ...ما حاولت أحرجها ضحكت كثيرا يا صباح.. وقلت والله بنتك اعقل منك.. مادام بتجمع في الفلوس من هسع دي.. يعني قناعة وصلت اليها امها بعد تجارب كثيرة.. تعرفي ياصباح ما جيل الاوراق المالية والنشرة الاقتصادية والاسهم .. الاسهم هنا في السعودية الناس تكون واقفة قدام التلفزيون وفي خشمهم كلمة واحدة واختها.. حمرت.. خصرت.. يعني حمراء وتعني الهبوط وخضراء وتعني الارتفاع.. شفتي الظاهر بتك دي متابعة الشريط الاقتصادي المتحرك.. شكرا لك على المرور مودتي حليمة

---

Post: #182 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: abubakr Date: 03-02-2007, 10:46 PM Parent: #1 وين ناس حقوق الانسان ؟ يعني الا تقوم حرب؟؟؟ انا اتكدرت والساعة الان الواحدة صباحا والقصة دي يا حليمة حتبقي معاي لحد ما اطلع للشغل اصلو عقلي بينشط بالليل ...شنو يعني سيادتو "عايز كدة " .. طيب وين هي "انا عايزة كدة " و"كدة" حقتو خاوية زي راسة وكدة حقتها كلها خضرة وخير ... دة امعان في ظلم البشر باسماء مختلفة وحقوق مفترضة ...

---

Post: #184 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 03-03-2007, 08:12 AM Parent: #182 Quote: وين ناس حقوق الانسان ؟ ابو بكر .. اخونا دا ما هو الحكومة ذااااااتو والناس اهالي.. هي بس تمامة جرتق.. زوجة تمرقو من العقر، ويكمل بها دينه، ان وجد، والباقي خليهو ساكت. Quote: الرجــــــالة تطييييييييير !!!!

---

Post: #185 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 03-10-2007, 08:45 AM Parent: #184 ما سر صمت الرجال تجاه سرقات النساء؟ هل هو احتفاء بالثامن من مارس، ام انحناء امام العاصفة حتى تمر بسلام.. كل 8 مارس وانتم "مهبورين".. وكل 8 مارس والنساء في قمة التمكين (التمكين الجيبي).. يا ايتها المراة ، بكل الوان طيفك.. كل عام وانت بالف عام من السعادة والهناء.. والله يكفيكن شر عين خلقه.. 8 مارس قام.. يا سلام خلي البورد ضلام يا سلام بهذه المناسبة اهديكن من غير زعل.."كارثة مارس" تحت في الصفحة التالية.. مودتي .. حليمة

---

Post: #186 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 03-10-2007, 08:52 AM Parent: #185 كــــارثة مــارس..!! 1/2 ما المانع أن تقدم لنا في ذكري يوم المرأة العالمي خدمات فندقية خمسة نجوم، طالما نحن جرسونات 363 يوماً؟ لماذا لا نتبادل الأدوار، فاستأسد يوماً واحداً..ويخلص حقو قديم وجديد في باقي السنة؟؟ مارس شهر الكوارث عاد..فعادت اليَّ احلي الليالي..!! : تيتي.. تيتي متل ما رحتي جيتي.. حاشية: تيتي طيبة الذكر هي الذكر السنوية للثامن من مارس والتي تعرف بيوم المرأة العالمي.. مارس ليس من الشهور المحمودة الذكر.. يكاد يكون التؤأم للرقم 13 لدي الغربيين.. هل تذكر كل النساء الثامن من مارس من كل عام ؟ قلة فقط هي التي تمتلك المعرفة بحكم الوراثة أو الممارسة.. أما الغالبية وأنا منهن- تمر ذكري هذا اليوم من كل عام ناهيك عن أن تمر بخاطري, علي الرغم من أنها أحد مظاهر الثقافة في هذا الزمن والأبهة الاجتماعية . ما أحوجن إلي ذلك..!! كيف لا والكم قد فغر فاه متجاوزاً الكُم.. كـًل ياكـُمي..!! رغم كل الهرطقات اللفظية والمعرفية والوجاهية-هذه من عندي- السابقة لا اذكرها ..مثلها مثل رفيقتها المرحومة ذكر الزواج..!! ليس نكران جميل مني..ببساطة شديدة لم تحتل هذه الذكري حيزاً كبيراً لا في عقلي الباطن ولا الظاهر.. حينما كنت في المهنة، كانت بعض المنظمات النسائية تتطوع وتخسر من جيبها لتذكيرنا بها.. فنجتمع ونسولف ونتقهوج ونأكل الكيك حلو الطعم في إحدى القاعات المكندشة ونعود نعتلي الدفارات عائدات مساء نفس اليوم إلى مساكننا..!! لعل المفارقة بين الضل البارد وقهوته الحلوة وبين الدفار نقل مواشي، متون وحواشي، هي التي تجعلنا نستطعم الكيك لفترة طويل..ونلوك كذلك ذكري مارس..!! ولكن ماذا لو تم تفعيل ذكري مارس بحيث تصير اكثر جدوي وفاعلية؟ يا حرام.. ماذا لو تبنت القوانين الوضعية إعطاء المرأة حق يوم كامل..أربعة وعشرين ساعة بالتمام والكمال.. إجازة كاملة عن الأمومة والزواج مع الإعفاء التام عن ضريبة مشتقات الأمومة التي تشمل إعداد الطعام ومصاقرة المطبخ من بداية الدوام.. آنذاك، سيكون لمارس صدي واسع .. يوم واحد يا أخوانا.. ************** ما الذي يمنع أن تكون كل الأيام أعيادا لهما الاثنين، وليس أن تكون القسمة ضيزي. يوم واحد لها وكل الأيام له، رغماً عن عدم التصريح بان كل باقي السنة رجالية. لماذا لا تكون كل الأيام 8 مارس للاثنين. وليس سنة كاملة كل أربعة أعوام، لواحد منهما وللآخر يوم واحد.. ماذا لو قبل الزوج في ذلك اليوم بالاضطلاع بالأعباء المنزلية من نظافة وطبخ ورعاية الأبناء وتلبية مطالبهم ؟ ما الضير في أن تقديم خدمات فندقية خمسة نجوم، لنا في ذلك اليوم ، طالما نحن جرسونات 363 يوماً؟ ما المانع أن نتبادل الأدوار، فاستأسد في ذلك اليوم و "يستنعم" هو؟ ************** أضغاث أحلام.. يا فتاح يا عليم.. يا رزاق يا كريم.. اليوم هو اليوم الموعود..عنكبة عكننة .. مغبونة أنا..!! يا حليلو مشوار السنين..!! اليوم أمر.. وغداً الله كريم.. " أصحو متأخرة من النوم وابدأ اطَـِرق في حسي: ما جهزت ليّ هدومي ليه؟-علي فرضية أنني موظفة أو مثقفة- ما كلو زي بعض- وين الفطور ؟ الشاي بارد ليه؟ غيرت للولد البامبرز، رضعتو البزازة الكبيرة بتاعت الحليب ؟ جهزت للأولاد الفطور والعصير بنفس الطريقة بتاعتي ؟ وضعت دفاتر اليوم في الشنطة ؟ إنشاء الله ما نسيت الأقلام والاساتيك؟ الثورة انطلقت..!! فش غل تمام.!! محاسبة صرا طية. وهو يرتجف، أمامي.. !! يا سلام!! إحساس جميل بالهيمنة!! قد تمتد يدي بحثاً عن شنبي لأبرمه!!!. فجأة يخطر علي بالي سفر "المثقفاتية" والجماعة بتاعين "الشِبَك".. اخترع لي سفراً مفاجئاً لمواساة المرأة الفلسطينية أو الكشميرية أو حتى الأفغانية-اللائى لم يترك لهن الإعلام أوراق توت يسترن بها غبنهن الاجتماعي- ، في أوضاعهن المأساوية. أقدامكن لابو ابراهيم وإنشاء الله ما يكابروكن في الشينة.. في حضرة الكاميرات، ساكون آخر أبهة ، ابتسامات محسوسة ومصافحات مدروسة... سأتكلم – إن طلب مني ذلك أو لم يطلب-عن حقوق الإنسان والمساواة بين الجنسين، أصرح بأنه لا يوجد ما يسمي " بالجندرة" في حياتي. ومروراً بالجندرة أتطرق إلي "قريباتها القـُندُرة والفندرة والصندرة والشَرَاية والنَقَدَة.. وكيف ان الحضارة أنثى والذي يقوم علي تفعليها رجل.. كما لا انسي الوقوف عن أطلال صراع الحضارات الطارف والتليد.. واحلل بذلك ثمن التذكرة والفندق والنثريات اليومية لأعود واضمن ذلك في التقرير الذي أكون قد أعددته مسبقاً.. كل ذلك في يوم واحد اسمه الثامن من مارس..! لن انسي السوق.. لب الموضوع أساس السفر. والصور الفوتوغرافية.. لزوم التوثيق.. سأبتسم للكاميرا.. اكثر مما ابتسم لزوجي وأبنائي.. اجتهاد تام في استيفاء كل شروط القدوم والاستقدام..!! ولا انسي أن المرور علي عناوين الأخبار حتى لا تفوتني المواكبة.." طبعاً.. موش مثقفة؟".. سأردد كالببغاء المقولة المحفوظة : "نحن أمة سياسية. نتنفس السياسية ونلوكها ونمضغها ولا نلفظ القضية.. لا نفرق بين الصاروخ ولا الطيارة ولا الغارة الجوية..!! نحن "قواعد" سياسية ، مسيسة ضليعة وضالعة ورؤوس فارغة.. نحن أمة موغلة في الضياع المعرفي.. والمعرفة الضياعية.. ضياع القاعدة "المكربة" ناتج عن ضيعة الرؤوس الضائعة..التي اجتهدت في الأعمال التوثيقية، فجعلت لكل حادثة حديث موثق، ودفنت كل المواثيق والوثائق القديمة أقامت علي أكوامها وثائقها الجديدة.. كاميرا فلان الفلان.. إعلام علان العلاني.. وصور جانبية وصور بابتسامة وصور ذات ابتسامة رمادية، كل حسب الأوضاع والوضعية.. وصور عادية لزوم الأرشفة والاختيار المعلب..لفلان الفلاني.. ألبومات صور.. ما بين "القاش" والقاشات ..ضاعت الحواشات".. سأتحدث عن هجرة الريف إلي المركز وهرب المركز إلي الخارج.. عن الريف الداخل والحضر الخارج. و"سأسولف" وأُسوِف عن ترييف الحضر وإفراغ الريف .. عن ضياع الاثنين .. سأتحدث عن إدبار الريف عن الدَبَر والمايو والزريزيرة والفترينة وتعلقه الغريب بالرغيف !! "آ القمح أمانة ماك سمح". سأتطرق أيضا إلي الخارطة المتمددة ..والداخل المتقلص.. وحسن المعيشة المتفلت..وعن الانفلات الاجتماعي.. وائتلاف الانفلات.. وتضج الحروف والمفردات.. لسان أعجمي يرطن وآخر عربي مبين.. ألفاظ تتلاعب.. كلمات ملعوبة ومحسوبة ومحفوظة مثل أحاجى الحبوبة.. لعبة في لعبة هي الحياة.. وما أعجب إلا من راغب في ازدياد.. عجبي..!! كما أن "الموجب" واجب.. ستشكرني الأخريات.. ويدعين لي بان " لا يكابرنني في الشين." مكابرة مدعومة.. "الموجب واجب". سنتعازم.. يعزمنني مرة .. واعزمهن مرات كثيرة.. "يا مقدم السبت ، تلقي الأحد." والكراع الغبشة بتجيب الممسحة.. ويصير البيرديوم من الثوابت في حياتي.. سأنتعش وتخرج من غرفة الإنعاش نثرياتي..!! ستصير الأمور تمام.. حدث يا سلام.. وينطلق قطاري.. "الأبيض قام يا سلام خلي الحلة تمام.." غدا نواصل حليمة

---

Post: #187 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 03-10-2007, 04:55 PM Parent: #186 كارثة مارس 2/2 صباح الخير أيها العالم.. لا مساك الله بالشر أيها الثامن من مارس.. ليت شمس التاسع منك لا تشرق أبدا.. لن تسقط الراية.. الأربع والعشرين ستتمدد.. يا لمقلب الفيمينزم..!! اليوم أمر.. وغداً إحساس آخر.. قد يكون امَرّ؟؟ اللهم اجعل أبو الوليدات ضمن الفئة، التي جعلت من بين أيديها سداً ومن خلفها سداً و أغشيتها فهي عمياء عن القراءة والسمع في هذا اليوم.. ابتسم.. حسنة ليست مضروبة(من ضرائب). شمس مارس توشك علي الغروب. سأقضي أمسية بيضاء.. لن يغمض لي فيها جفن.. لن أتنازل عن عرش اعتليته بعرق جبيني.. وسيل عرق أخريات وآخرين.. أخوان بنية.. الله يجازي محن الفيمينزم.. ليت شمس التاسع لا تشرق.. يخيب الرجاء يؤاد الأمل الوليد.. هه .. ابتسم .. "التتفاولو تتناولو" كانت جدتي تردد.. "الغبطة فكرة." صرخ مفكر فذ.. جدتي كانت كذلك..!! صباح الخير أيها العالم..!! مساء الخير أيها الإحساس الجميل..!! ابتسم..!! لن تقف في صف لترد ثمنها..!! تقدير وعرفان.. يا للحلم الجميل الذي رفع رايته رجال ونساء أعزاء آلو علي أنفسهم الوقوف في وجه عادات وتقاليد المجتمع دون الخروج عليه، فوجد التغيير تربة خصبة، فانبت ثماره.. من كل لون بهيج.. في مثل هذه الذكري نزجي التحية لذكري الشيخ بابكر بدري الذي اخذ علي عاتقه تعليم المرأة قبل قرن من الزمان في مدينة رفاعة في ذلك المنزل "الطيني" ، لتضطلع أسرته بإنشاء أول جامعة نسائية في أفريقيا قاطبة، تعمل علي النهوض بمقدرات المرأة في الريف. والتحية أيضا لروح الشاعر الفذ خليل بن فرح الذي أراد للمرأة السودانية اللحاق بركاب الأخريات والانعتاق من قبضة العادات والتقاليد التي كانت تضع متطلبات خروجها في أربع او ثلاث حالات: من بطن أمها للدنيا ومن بيت أبوها لبيت راجلها ومن هذا الأخير للمقابر.. "انتي يا الكبرتوك، البنات فاتوك في القطار الطار". وللكثيرات تتقدمهن خالدة زاهر سرور سادات رائدة الطب وعزيزة رمضان رائدة التمريض، والسسترات بتول محمد عيسي وجنيدابية صلاح الدين اللائي ناهضن خفاض المرأة ولحواء البصير والأستاذات مدينة وفاطمة طالب وثريا امبابي و حاجة كاشف بدري و وفاطمة شوقي وغيرهن من رائدات التعليم.. وكذلك د. امال نور الدائم في مجال الصيدلة وزينب شبيكة في مجال الهندسة سنية الرشيد في مجال القضاء..الخ . كما لا ننسي الوقوف عند ذكري الصحافيات الأوائل اللائى اصدرن مجلة صوت المرأة منذ الخمسينات: فاطمة احمد إبراهيم، والمرحومة د. زينب الفاتح البدوي.. وغيرهن وغيرهم من الكوكبة السودانية التي أضاءت شمعة في دياجير ظلام تلك الأيام.. لابد من وإسدال الستار علي النفخات العنترية.. اللهم اجعله خير..!! الثامن من مارس أدبر والتاسع من مارس اقبل.. صابحنا الواقع النكرة وطارت الفكرة الـ"..." ليت اليوم لم تشرق شمسه..!! تيتي ..تيتي.. غيرتي شكلك ولا نسيتي..؟؟ ودمتم حليمة

---

Post: #188 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 04-01-2007, 08:29 AM Parent: #187 فوق.. لحين عودتي قريبا.. حليمة

---

Post: #189 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: abubakr Date: 04-01-2007, 03:47 PM Parent: #1 Quote: لحين عودتي قريبا.. ما تبقي زي الفاتت بعد تلات اسابيع .. كنتي مشغولة تعدي الفكة ؟؟؟

---

Post: #191 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 04-02-2007, 11:03 AM Parent: #189 Quote: ما تبقي زي الفاتت بعد تلات اسابيع .. كنتي مشغولة تعدي الفكة ؟؟؟ الاخ العزيز ابو بكر لك شكري وتقديري على متابعة ما اكتبه، وحثي على المواصلة في الكتابة.. لظروف خارجة عن ارادتي.. توقفت في الفترة السابقة.. ساعود للكتابة الراتبة ابتداء من الاسبوع القادم.. وساعاود الطلة بين الفنية والاخرى.. خالص مودتي يا ابو ضياء.. حليمة

---

Post: #192 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 04-02-2007, 11:50 AM Parent: #191 حكايات نساء المغتربين الحكاية الاولي كنت التقي بها، في احدى الحدائق العامة في عطلة نهاية الاسبوع، حينما اذهب بابنائي.. كانت امراة جميلة، شيك جدا.. من النوع الذي يعرف كيف تختار ملابسه وملابس ابنائها بعناية فائقة.. من الواضح اانها ترتاد افخم المحلات التجارية في المدينة التي اعيش فيها.. كانت اثار النعمة بادية عليها خلافا لكثير من النساء اللائي اجدهن معها، الامر الذي ينبئك ان زوجها من اصحاب المداخيل المرتفعة.. لاحظت انها اختفت لفترة طويلة..فلم تمنعني معرفتي السطحية بها من السؤال عنها، كما هو الحال لدى السودانيين. - هه انتِ ما عارف؟ - ابدا .. عارفة شنو؟ هو انا كان عرفت كنت سألت؟ - يا ختى اجارك الله ديل حالهم ما بقي حال.. - في شنو؟ مالهم الحصل شنو؟ احكي لي قصتهم.. انبرت محدثتي تحكي القصة من تلقاء نفسها.. كانت زينت(وهذا ليس اسمها الحقيقي) جارتي، تتطلع الى مستويات فوق مستواها..عشان كدا كنا شاكين انو ايدها خفيفة، لانو مستوى دخل زوجها اكتر من عادي، وبالكاد لا يتجاوز الاكل والشراب.. قاطعتها كيف عرفتي انو ايدها خفيفة؟ - مرة تشاجرت مع زوجها، وتخانقوا.. ضربها، لجأت الينا.. عرفنا من زوجها الذي حضر لاحقاَ، بانها كانت تاخذ مبالغ من محفظته دون اذن منه، وتذهب الى السوق للتبضع.. يوميا تذهب زينب الى السوق.. فادمنت التبضع الذي اصبح مرضا مزمنا. لاحظنا بدورنا تزامن اختفاء اشياء صغيرة قيمة من بيتنا، عقب بعض زياراتها لنا.. - يعني انت شاكين في انها تسرقكم ولستم متاكدين؟ - طبعا.. حتى لو تأكدنا ما ماشين نشتكيها، هي برضو سودانية متلنا.. المهم العلاقة فترت بيناتنا، لان حضورها لزيارتنا اصبح غير مرغوب فيه.. نقعد نتونس معاها ولا نقفل في الغرف؟ - وبعدين؟ - راجلها فنشوه من الشغل.. - يا لطيف.. اها وبعدين.. وبس .. اقترح عليها العودة الى السودان.. فرفضت - ليه؟ -تمشي كيفن؟ ولا بيت ولا عفش .. ولا شيئ، ايد ورا وايد قدام.. رفضت طلبه، فما كان من الزوج الا ان ذهب بمفرده، تاركا كل الاسرة في رقبتها.. للاسف هسع الام والبت في السجن.. - سجن؟ اعوذ بالله .. الحصل شنو؟ - قبضوها بتسرق من واحد في المحلات.. والبت تابعت ليها واحدة ما كويسة، رفدوها من المدرسة وهسع هناك في اشاعة بتقول انها حامل؟ - طيب هسع هي وين؟ - ماعارفة.. طيب الاولاد وين؟ - ديل قالوا بقوا بتاعين مخدرات.. - يا اخوانا الكلام دا شنو الما بنبلع دا.. - الوصلها للدرك دا شنو؟ - خفة الايد والتطلع لبعيد.. والبوبار في بيت الايجار.. كنت اتمنى ان يكون خيال الجارة هو الذي ضخمها..سالت نساء اخريات، فاكدن لي معظم ما ورد في القصة.. اشعر بحزن عميق على الدرك السحيق الذي وصلت اليه بعض الاسر.. نواصل

---

Post: #193 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: فاروق حامد محمد Date: 04-02-2007, 12:07 PM Parent: #192 حليمة الحكيمة ... المدهشة .... حليمة ... (روعنة) المنبر ... حليمة ... (نورنة) المنبر ... حليمة ... (حكمنة) المنبر ..... حليمة الأخت الرائعة روعة أهل السودان ..... لم يعتدل مزاج الكتابة بعد ... أدعو لي ,,,, فائق احترامي ومحبتي لك ولزغب الحواصل وكل فرد في أسرتك الكريمة.......

---

Post: #194 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 04-02-2007, 12:17 PM Parent: #193 Quote: حليمة الحكيمة ... المدهشة .... حليمة ... (روعنة) المنبر ... حليمة ... (نورنة) المنبر ... حليمة ... (حكمنة) المنبر ..... حليمة الأخت الرائعة روعة أهل السودان ..... لم يعتدل مزاج الكتابة بعد ... أدعو لي ,,,, فائق احترامي ومحبتي لك ولزغب الحواصل وكل فرد في أسرتك الكريمة....... الاخ العزيز جدا الاستاذ فاروق والله دا كتير علي شديد، لما (معسمنى) طلتك عندى بالدنيا.. وطلتك علينا كبورداب تساوي الكثير من عودة الحيوية و(المناكفة) الدافعة، والتي افتقدناها في الايام الماضية.. حمدا لله على سلامة الطلة.. وفي انتظار اعتدال المزاج.. خالص ودي لك يا ايها الرجل الرائع.. تخريمة: اخوي العزيز ود سيد احمد ابو بكر بقي عندو رفيق: ود امحمد فاروق.. حليمة

---

Post: #195 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: abubakr Date: 04-02-2007, 01:34 PM Parent: #1 Quote: لم يعتدل مزاج الكتابة بعد ... أدعو لي ,,,, العكر المزاج شنو ؟ ما عنكم "بنة" كدة انزل القهوة التحت بيتكم وعدل مزاجك وتعال؟ واللا متكدر من اعمال ودشيقوق وتزويرو للانتخابات ؟ بعدين الجو متكدر دحين ومطرة وكبسيبة و مكتبي الراقي(تحتها خطين) قرب يطير ما اصلو بشان نكون خفيفيين مكاتبنا بنعملا من الورق او احيانا بورتاكب خشب زي الورق ؟؟ما نحن بنبني البنايات السمحة ونقعد في مكاتبنا الورقية الفاخرة ... شفت كيف ؟ الغريبة مع كدة مزاجي علي كيفو وانا بخلي مزاجي لوحدو واحيانا بقفلو وانا بشتغل من غيرو ؟

---

Post: #196 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 04-03-2007, 08:22 AM Parent: #195 حكايات نساء المغتربين الحكاية الثانية كان (ن. ع. ع.) يعمل في إحدى شركات القطاع الخاص، بمرتب يجعله في حالة مستورة.. زوجته (ع.ن.) التي رزق منها بدستة إلا قليلا من الأبناء، تتوق دوما إلى العمل لتحسين الوضع المعيشي، فكان يرفض بشدة بحجة (خلاص مستورة والحمد لله). استمرت الحياة رتيبة، وهادئة إلا من بعض (المناقرات) بين الفنية والأخرى.. خاصة حينما يطالبها بعض إخوتها بإرسال بعض الأشياء او قليل من (الكاش). (ع.ن.) كانت لها صداقات مع جنسيات متعددة في امتدت خارج العمارة التي تسكنها إلى العمائر المجاورة.. كما اشتهرت بإجادة الساونا السودانية (دخانها دا راكب ودا ناصل) على رأي حبوبتي.. شاءت إرادة الله ان يتعرض الزوج لحادث حركة لزم على إثره، فتضرر اقتصاد المنزل.. تدهورت نفسيات الزوج والزوجة.. خاصة بعد ان فقد الزوج الشغل وأصبح ملازما المنزل بصورة دائمة ، فتحولت (المناقرات) الخفيفة الى شجار دائم.. بعد فترة أصيب الزوج بأرق دائم، مما اثر على صحته.. حمله أبناءه إلى المشفي.. وهم يتهيئون للأسوأ. في المستشفي كان اخبر الطبيب أبناءه أن والدهم يعاني من نوبة عصبية حادة نتيجة إدمانه المخدرات..!! صعق الأبناء .. ونظر كل منهم إلى الآخر.. لا شك أن الطبيب مخطئ.. ده ابونا يوم واحد ما دخل وقت صلاة في التاني.. مخدرات كمان؟ ذهبوا إلى مشفي آخر، وطالبوا بإعادة الفحص.. نفس النتيجة.. أصابع الاتهام أشارت إلى الأبناء ثم استبعدتهم.. وأشارت أخيرا الى الزوجة، فركز الاتهام عليها.. كانت (ع.ن.)، قد سلكت دروبا جديدة في كسب الرزق..خاصة وانه لا يحتاج الى رأسمال علمي او فكري لمزاولته.. لذلك كانت الوسيلة الوحيدة لاسكات الزوج، هي بإعطائه المخدرات لينام طيلة النهار.. ولكنها لم تكن تدري أن حبل حيلتها قصير، رغم اعتقادها التام، بمتانة سمكه..

---

Post: #197 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: abubakr Date: 04-03-2007, 09:30 AM Parent: #1 اها يا حليمة ..واصلي ...بقت فيها مخدرات .. واصلي النشوف اخرتا من هللة وريالات الي سجن ومخدرات ..

---

Post: #198 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 04-03-2007, 11:26 AM Parent: #197 Quote: بقت فيها مخدرات .. واصلي النشوف اخرتا من هللة وريالات الي سجن ومخدرات .. ابوبكر الله يكضب الشينة.. يظهر انو الحال بقي من بعضو..!

---

Post: #199 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: هجو الأقرع Date: 04-03-2007, 07:06 PM Parent: #1 الفاضلة الرائعة بت عمنا حليمة ، والله محلك هذا المكان الوحيد الذى ناخذ فيه راحتنا بعيدا عن المناكفة والملاسنة ، كثر الله من امثالك ، عندى يومين اجازه من بكرة وسوف اعود عشان ارتاح معكم والشلة الظريفة ، زوجتى ام محمد لو كانت عضوة لرفعت البوست دوما ، بكرة بسرق افكارها وبرجع ليكم ، (جعلى مدرين ).

---

Post: #204 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 04-04-2007, 07:40 AM Parent: #199 Quote: الفاضلة الرائعة بت عمنا حليمة الارباب ود الارباب هجو حـديثك حار وبارِد كـلو لينا بفيــد ومن جدك وأبوك إت للسـراية عقيـد فرنتالك لي راس الخيول ليهو جضيـض حـوبتك قـربت مثـل الدِقـن للييـد Quote: اخى ابو بكر تعال تاوق ، عندى حاجة لنج بعد اذن ست البوست . نجيبلك عنقريب هبابي ونسولف معاك بباقي القصيدة الاحتفالية.. حـديثك حار وبارد كلُ لينا عقـارب هدوك من عِشا أصبح تدقش القـارب فرنتالك على رأس الخيول متكـارب وحوبتك قربت مثل الدِقـن للشـارب اها يا هجو قصرت معاك؟ العنقريب الهبابي في انتظارك..

---

Post: #200 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: abubakr Date: 04-03-2007, 07:21 PM Parent: #1 عزيزي هجو انا كمان بجي اتاوق ولو لقيتلي بكان بجلس ارتاح .. Quote: بكرة بسرق افكارها وبرجع ليكم ، (جعلى مدرين ). انت ما شايف القصص الفوق دي وكلها من السرقة ..انت بس تاووق سااي وكان جاتك افكار واقعات معليش ...

---

Post: #201 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: هجو الأقرع Date: 04-03-2007, 07:24 PM Parent: #200 اخى ابو بكر تعال تاوق ، عندى حاجة لنج بعد اذن ست البوست .

---

Post: #202 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: فاروق حامد محمد Date: 04-03-2007, 11:44 PM Parent: #201 Quote: العكر المزاج شنو ؟ ما عنكم "بنة" كدة انزل القهوة التحت بيتكم وعدل مزاجك وتعال؟ واللا متكدر من اعمال ودشيقوق وتزويرو للانتخابات ؟ بعدين الجو متكدر دحين ومطرة وكبسيبة و مكتبي الراقي(تحتها خطين) قرب يطير ما اصلو بشان نكون خفيفيين مكاتبنا بنعملا من الورق او احيانا بورتاكب خشب زي الورق ؟؟ما نحن بنبني البنايات السمحة ونقعد في مكاتبنا الورقية الفاخرة ... شفت كيف ؟ الغريبة مع كدة مزاجي علي كيفو وانا بخلي مزاجي لوحدو واحيانا بقفلو وانا بشتغل من غيرو ؟ أبوبكر الجميل العكر المزاج كترة الشغل لزوم سد مصاريف الجامعات لولد وبنتين وبنت في الابتدائي في مدرسة خاصة ...... الجامعات يا أبكر بعشرات الآلاف من الدولارات ... انتو زمان قريتوا مجانا وبتاكلوا وتشربوا وتسكنوا مجانا وكمان بدوكم bursary وجزء كبير كان بتدلع ويمشي لأقرب دكتور يكتب ليه special diet ... الكيزان بعد ما قروا مجانا ولم يكن بمقدور أي من أبائهم أن يدفع حتى للمدرسة.. الأولية .... ولولا التكافل الاجتماعي ومجانية التعليم لما أستطاع أي منهم أن يكمل المدرسة المتوسطة على أكثر تقدير .. ولما تسنموا ذرى السلطة قرروا الانتقام منا بالغاء مجانية التعليم وسحق الطبقة الوسطى سحقا كاملا ونهائيا حتى يضطروا الى الخروج نهائيا من السودان ليخلوا لهم الجو فيبيضوا ويصفروا.... ذلك أنهم يعلمون أن بقاءهم مع وجود طبقة وسطى مزدهرة هو أمر أقرب الى الاستحالة...... حين تضطر للكتابة والترجمة بصورة متواصلة ليلا ونهارا لتسد مصاريف السمستر التاني بما يزيد على 15 ألف دولار وإلا سيوقفونهم عن الدراسة ألا يعكر هذا المزاج يا شيخ أبكر ؟؟؟؟؟ قول يا الله يا شيخ ...........!!!!! لو كان يطلب من أبائنا مثل هذه المصاريف لكنا الآن عتالة مع أهلنا الجعليين الذين يرفضون العمل تحت سلطة أي شخص ... وتقول لّي (بنة) !!!!!!!!!

---

Post: #206 Title: Re: (الفكة) او سرقة النساء..ترياق ضد الزمن.. ام انحراف في بوصلة الاخلاق؟ Author: حليمة محمد عبد الرحمن Date: 04-04-2007, 08:13 AM Parent: #202 Quote: العكر المزاج كترة الشغل لزوم سد مصاريف الجامعات لولد وبنتين وبنت في الابتدائي في مدرسة خاصة ...... الجامعات يا أبكر بعشرات الآلاف من الدولارات ود حامد .. مالك قلبت المواجع؟ نستعدل الاغنية عشان تلائم الوضع الحالي: اشوف الماضي فيك (امبارح) اريت امبارح تكون هسع.. تامل معي الابيات التالية: الليلة هاش دقراً مراصع الهام قمصانه شاش الخاصمك تعـبان زدته إنطقـاش خليت قنايته تسوج من غير قماش نغيرها عشان تلائم واقع الحال الليلة هاش مصروفا قد النافوخ وجيب القماش الاباهو مع العايشين ما عاش والدخلو زادو انطقاش خلاهو تور ساقية، قافي الطحين ما بنحاش في العنقريب ما ضاق انبراش ساقية واسوقا يسوج لامن الكراع ينحاش والبال اشتغل والفكر زاد اندراش خليت قنايتو تسوج من غير قماش.. Quote: لو كان يطلب من أبائنا مثل هذه المصاريف لكنا الآن عتالة مع أهلنا الجعليين الذين يرفضون العمل تحت سلطة أي شخص ... وتقول لّي (بنة) !!!!!!!!! صدقت.. كان انا ذاتي كان اكون سايقة مليشيا من الاطفال (فريق كرة قدم باحتياطيهو) واحد في سراتي واتين قابضين في طرفي وواحد ماسكاه بايدي التانية والباقين سارحين ولا فوق العد بنشلو في الموية.. واخر سفنجة في كرعي ومسرحي مسايري من قدام ولاوية كل واحدة في اضان وممشطة الباقي، قادرية ولا (بعُرُفْ). الا رحم الله (الامس).. فقد درسنا من الابتدائي حتى الجامعة ولم نكلف والدينا سوي قرش الفطور ، ثم خمس ريال الفطور بعد ان تطورت مطالبنا.. الذين يرفضون العمل تحت سلطة أي شخص ... وتقول لّي (بنة) !!!!!!!!!

كان همنا الاساسي نبني البيت ونرجع.. ونسينا اننا ماشين نزيد.. وكذلك طلباتنا.. ما زال البيت صقيعة لم ندق في اساسها طوبة واحدة..
ونستصعب ان نفعل ذلك الان مع الالوف المؤلفة في المدارس الخاصة، والايجارات المهولة وحسن المعيشة المتفلت..
وكان الله في عوننا مدروشين درشة تيران الساقية.. وبرضو ما في فائدة..
والحمد لله على كل حال..

Quote: عزيزي هجو انا كمان بجي اتاوق ولو لقيتلي بكان بجلس ارتاح .. Quote: بكرة بسرق افكارها وبرجع ليكم ، (جعلى مدرين ). انت ما شايف القصص الفوق دي وكلها من السرقة ..انت بس تاووق سااي وكان جاتك افكار واقعات معليش ...

اخوي ابو بكر هاك الابيات الجميلات ديل وانشاء الله كلمة واحدة صعبة ما تعتر ليك:
أبو نُقُـل وخصيلـة
مو شـيخ التُرُك موهو قـويد الحيلـة
أب راياً وسيع في الشـورة والتدبيـرة
رحـل الكُـحُل الما بتـوازنو عديلـة
أب كـفاً مهـل ما بمد عطايتو قليلـة

قول عووووك.. كان استصعبت شئ .. ولا اقولك الارابيب هجو وود حامد عندهم مشكلة مع العامية القوية دي..

Quote: حين تضطر للكتابة والترجمة بصورة متواصلة ليلا ونهارا لتسد مصاريف

يا ناس الله شفتو شغل راقي زي دة بعكنن ... ما نحنا يالفارووق بنكع زييك بشان البنات الفي الجامعة والولد وايجارات دبي الاسطورية والبنزين (شغلنا بعيد بكلف بنزين كتير) ورسوم الخدمات العجيبة اي حاجة هنا رسوم خدمات دي غير رسوم المعاملة يعنمي مثلا تدفع رسوم لمعاملة معينة ويطلبو منك رسوم خدمات يعني الموظف البيسلمك المعاملة والباركنج حتي تحت العمارات _ياركنج يكذا الف !!!)ووووووو وبعد كلو تعال شوف شغاليين ايه وبنتعامل مع شنو ومنو ..انا بناء وانت تتخيل الباقي وتجي تقول شغل سمح زي البتاعك بيعكنن ..هسع الواحد يسوي شنو في الفار الجاري بجاي .. البنية القاعدة قدامي في صندوق البورتاكبن اخر كوارييك ...فتك بعافية .. نشوف الحاصل ونرجع ...

ابوبكر
والله في حاجات في شغل الترجمة والقراية ام دق، والشغل الزي الواسوق دي .. اخير منها مليون مرة الجقلبة بين الرملة والاسمنت وحفر العماير اللي تحت التشييد..
خليها على الله ساكت..
الراجل ممكون.. ونحن ايضا كذلك..
في هذا الزمن المتهالك..

Quote: والله في حاجات في شغل الترجمة والقراية ام دق، والشغل الزي الواسوق دي .. اخير منها مليون مرة الجقلبة بين الرملة والاسمنت وحفر العماير اللي تحت التشييد..

ياحليمة .. اليوم فقط وتحت درجة حرارة قاربت الاربعيين ورطوبة وجو مترب قضيت 4 ساعات من منتصف النهار الي الرابعة تحت الشمس اتحرك من منطقة سكنية الي اخري مترجلا في معظم الاوقات .. كان العطش يزغلل عيوننا رغم زجاجات كثيرة من الماء ... وليس فسحة او زيارة انما تفتيش وترتيب ووووو...

اها دة كيف وترجمة وانا زاولت ترجمة تقنية في مرات كثيرة ورغم صعوبتها واحتياجها لتركيز وهدوء بال الا ان عدة جولات مثل التي ذكرتها اعلاه في الاسبوع تقول للعكننة يا بلاش ....

Quote: والله دا كتير علي شديد، لما (معسمنى)

والله يا حليمة ما أود قوله عنك معسمني أنا .....

بس ألقى وقت ... ومزاج !!

الغالي ابو بكر
وود حامد فاروق..
يظهر انو الحال من بعضو.. بما انا باك منه محسود..!
بس شنو قصة الصوفية التي طرات فجاة على فاروق وقرب يبقي شيخ طريقة عديل..!!
اذا استمريت كدا السنة جاية ح نرقيك (عقيد) عديل.. ما يقوم هجو يسمع
عقيد دي ويقوم ينط فيها..
لحدي السنة الجاية نديك الاكسارسايس الشعري دا..

وكت الليل برد مسك العدد بي تِمة
واصحب نيلو زاد طافح مكفي الامة
كم عتق المتاهيم بي ودار الذمة
(فاروق) الفحول الفي حجاك ماهمه
ينتفي ما بين الاقواس والاعتذار للشاعر..!
زيتنا في بينتا..

Quote: بس شنو قصة الصوفية التي طرات فجاة على فاروق وقرب يبقي شيخ طريقة عديل..!!

حليمة . يبدو لي والله اعلم ان هناك صوفية في كل اهل السودان باختلاف اثنياتهم واديانهم ... ربما نوعية حياة اجتمعت عليها كل اصقاع البلاد او الغالب منها .. لا علم لي ببلد تكثر فيه حوليات وساحات رقص قبلية اثنية وروحانيات ترتبط بالموت والحياة من مولد وزواج كالسودان ..حتي جلسات في رويال والريفيرا في زمان بعيد كانت تتحول الي حولية- غالبا من تانيب لضمير او استيقاظ متاخر له- اخر الليل .. ما زلت اذكر عيد الميلاد اول سبعينات القرن الماضي وفي قلول( وهذا مكان من ابداع الخالق في جبل مرة .. اليس محزنا ان تكون اجمل بقاع سوداننا مسرحا لابشع ما صنعناه في اهلنا وانفسنا جنوبا وغربا وشرقا وشمالا) وبردها الذي يعصر العظام في ديسمبر حين تحولت ليلة ميلاد24 ديسمبر قصدنا منها احتفالية ونحن طلبة لمدرسينا من اهل اوروبا والغرب الي حولية صد ح فيها محاضر " السراي يالسراي" فتمايل الجميع بمختلف اديانهم حتي الصباح ...في شدة ضجرنا وعندما يرفض وجداننا حتي ما احببناه يوما من غناء ما تسمع مديحا الا وتغشاك حالة تذهب ضجرك وكدرك .. نختلف علي فنانيين ومغنيين وسياسيين ولكن ليس المديح ..فانعم بصوفية مكتسبة يالفارووق وابشري يا حليمة فستكونيين اول معازييم حولية فارووق قريبا

الى حين عودة..
اتمنى ان لا تكون حولية الفاروق ود حامد قد فاتتني
يا ابو بكر .. انا غايتو شايلة مقصي (خشمي) التقليدي
وحايمة.. في انتظار الفتة..