Post: #1
Title: صورة بروفايل إيمان صالح ....!!!!!!!!
Author: عمران حسن صالح
Date: 06-20-2007, 07:11 PM
وشيها المتعب الجاد الرحيم
الطيب السمح المعافى .. رهاب رهاب ينشاف وسيم
(حميد يصف السرة بت عوض الكريم)
.........................................................................
المحنة الظاهرة في العيون ...
الابتسامة (الحزينة نوعاً ما ) ...
النظرة (الحنينة ) ...
الوداعة....
الشلوخ ...
الشلوفة المدقوقة
الشعر الإتملى شيب
التوب العجيب ... ملبوس باستمرار ... للصلاة وزيارة الجيران ... واستقبال الحبان
كم أتمنى أن أحتضن هذه الأم ...
ياخي دي مليانة بي حاجات عجيبة ....
كل الحنان الفي أهلنا الكبار ... مسجل هنا
.......................
الوجوه الكئيبة ، ولا تحمل أي مشاعر ، أراها كل يوم هنا ... في حي الأسفلت الهنا والهناك ...
في الإشارات ... والوزارات ...
يزيل غبننا ... وحزننا ... وهمنا ...
(قلدة) ... وبالعربي حضنه من هذه الأم ...
بل نظرة فقط
لك التحية والحب ....
ابنك عمران ود الزهراء بت على ود الأرباب
|
Post: #2
Title: Re: صورة بروفايل إيمان صالح ....!!!!!!!!
Author: تماضر الخنساء حمزه
Date: 06-20-2007, 07:14 PM
Parent: #1
عارف ياعمران ؟؟
التوب ده فيو ريحة حميمة شديد
الغريبة إنها مابتروح خالس
أنا معاي واحد ليهو سبعة سنين
لو تصدقني مازلتا أشم فيهو ريحتها الطيبة
الله إخلي أمهاتنا وحبوباتنا
ديل الغوالي
|
Post: #3
Title: Re: تماضر الخنساء حمزه
Author: عمران حسن صالح
Date: 06-20-2007, 07:39 PM
Parent: #2
العزيزة تماضر
حباب بت البلد :
Quote: عارف ياعمران ؟؟
التوب ده فيو ريحة حميمة شديد
الغريبة إنها مابتروح خالس
أنا معاي واحد ليهو سبعة سنين
لو تصدقني مازلتا أشم فيهو ريحتها الطيبة |
تصدقي يا تماضر
كمية المحنة الفي التوب دي
هي الخلتك تقولي كل الحنان الفي حروفك ديل :
وبعيد عنّك.
بعيش مشدوه..
إطارد في غُنايَّ ..ذبول..
وذي تقول ..ببقى شئ..وناقصني زول..
بعيد عنّك..بسافر في عيون الناس..
أفتِّش فيها عن معناك..
ياحزني..
البعيشك....في الفرح إحساس..
....
يديك العافية .... .
|
Post: #4
Title: Re: تماضر الخنساء حمزه
Author: هاشم أحمد خلف الله
Date: 06-20-2007, 07:45 PM
Parent: #3
يا سلام عليك ياعمران والله جبت لي ريحة السودان وسبحان الله امهاتنا في السن دي بيشبوه بعض شديد خلاص يعني تصور الصورة دي علي طول ذكرتني امي الله يمد في أيامها وإنشاء الله انا نازل إجازة والله
عشانا هي وبس لا عندي بناء ولا ماشي اشتري لي عقار , ربنا يسعدك يا عمران يا حنين .
|
Post: #9
Title: Re: تماضر الخنساء حمزه
Author: إيمان صالح
Date: 06-20-2007, 09:06 PM
Parent: #4
ان شاء الله يا هاشم ياخوي الله يخليها ليك
ايمان
|
Post: #8
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-20-2007, 09:04 PM
Parent: #2
ياحليلك يا تماضر
دمعتي جرت
الله يرد غربتنا
ايمان
|
Post: #5
Title: Re: هاشم أحمد خلف الله
Author: عمران حسن صالح
Date: 06-20-2007, 08:31 PM
Parent: #1
الحبيب الوجيه هاشم
| Quote: عشانا هي وبس لا عندي بناء ولا ماشي اشتري لي عقار , ربنا يسعدك يا عمران يا حنين . |
وصدقني هؤلاء هم البناء والعقار ...
وهم سعادتنا في الدنيا والآخرة ...
وهم زادنـــا هنا ...
وقوتنا ...
|
Post: #6
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-20-2007, 08:55 PM
Parent: #1
وووب علي يا عمران
عاد ما خلعتني خلعة السواد
عافية ليك
كدي الناخد نفسي واجيك
ايمان
|
Post: #7
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-20-2007, 09:02 PM
Parent: #1
|
Post: #10
Title: Re: صورة بروفايل إيمان صالح ....!!!!!!!!
Author: هاشم أحمد خلف الله
Date: 06-20-2007, 09:11 PM
Parent: #7
إيمان سلامات والله بعد شوفتا الصور دي فكرت اقدم إجازتي من 20/7/2007م إلي 1/7/2007م , شوفي
الدنيا دي كيف فراقا ربنا إنشاء الله يجمعنا كلنا في السودان تامين لامين وفي وجودهم نكون
سعيدين كتر الف خيرك علي الصور يا إيمان .
|
Post: #11
Title: Re: صورة بروفايل إيمان صالح ....!!!!!!!!
Author: عصام عبد الحفيظ
Date: 06-20-2007, 09:22 PM
Parent: #10
ويمكن بكرة
يا هاشم
|
Post: #17
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-21-2007, 06:22 AM
Parent: #11
عصام الفنان
وحاة النبي انا اجازتي يوم الاتنين
اها جارية جري
يومين ما بقعدهم بعد كلامكم ده
ايمان
|
Post: #16
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-21-2007, 06:17 AM
Parent: #10
ربنا إنشاء الله يجمعنا كلنا في السودان تامين لامين وفي وجودهم نكون
سعيدين
إن شاء الله يا هاشم
آآآآآآميـــــــــــــــــن
ايمان
|
Post: #12
Title: Re: صورة بروفايل إيمان صالح ....!!!!!!!!
Author: Amir Omer
Date: 06-21-2007, 00:06 AM
Parent: #1
عمران أخوي ....
شوف الخطوط في جبهتا
زي السنين متحسرا
كدي هسي عاين لي عيونا ولاحظا
ما حاسي بي ، كمية الحنان متدفقا؟
ولاَّ ما حاسي بالشوق المعشعش
في عيونا ولهفتا؟
حابسة الدموع جوات عيونا
والدمعة كانت فرتَّ
بتحرق دنيا ماااااا بتريحا
بالله ما حاسي بدموعا بتغلي كيف؟
فيها الحنان واللهفة والاشواق
فيها النسايم الحلوة ، والدمعات
بتغلي من حرَّ الفراق
مشتاقة ناسها وأحبتها
تضمهم بشوق شديييييييييد
مشتاقة لي فرحاً كبير
عشان تكمل ضحكتا
|
Post: #13
Title: Re: صورة بروفايل إيمان صالح ....!!!!!!!!
Author: عفاف أبو حريرة
Date: 06-21-2007, 04:18 AM
Parent: #12
Quote: المحنة الظاهرة في العيون ...
الابتسامة (الحزينة نوعاً ما ) ...
النظرة (الحنينة ) ...
الوداعة....
الشلوخ ...
الشلوفة المدقوقة
الشعر الإتملى شيب
التوب العجيب ... ملبوس باستمرار ... للصلاة وزيارة الجيران ... واستقبال الحبان |
عمران فيك شفافيه ما عاديه
الشكر ليك ولي الحبيبه ايمان
رجعتونا لي طاري ناس حنان
|
Post: #14
Title: Re: صورة بروفايل إيمان صالح ....!!!!!!!!
Author: doma
Date: 06-21-2007, 04:44 AM
Parent: #13
اجمل صوره اشوفها الفه غير عاديه في نظراتها تحس فيها طعم المحنه وتشم فيها عطر الارض .
وهي امراه جممممميله جدا جمال ما اعتيادي اعني انها من الجميلات الغنوا ليهن بدور القلعه وجوهرا .
|
Post: #21
Title: Re: صورة بروفايل إيمان صالح ....!!!!!!!!
Author: سوسن عبد الله
Date: 06-21-2007, 06:47 AM
Parent: #14
بالضبط كما قلتي عزيزتي دوما إلفه غير عادية ومحنة
وكمان إحساس بالأمان معاهم.
ديل ناس من الزمن الجميل النقي.
|
Post: #24
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-21-2007, 07:36 AM
Parent: #21
شفتي يا سوسن المحنة الظاهرة في وشوشهن وعيونهن؟
ايمان
|
Post: #23
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-21-2007, 07:35 AM
Parent: #14
عاد يا دومة الغالية
انا اصلي كله كله ما ودرت الصورة الانتي كنتي خاتاها
عادي ياها الصورة الصحي سمحة
ايمان
|
Post: #32
Title: Re: صورة بروفايل إيمان صالح ....!!!!!!!!
Author: doma
Date: 06-21-2007, 08:39 AM
Parent: #23
الصورتان لملكات جمال مع اعتبار فارق السن بين الملكتين يا ايمان
وهي والده الدكتوره بيان
|
Post: #19
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-21-2007, 06:25 AM
Parent: #13
عفاف
الشكر ليك انتي يا الحبيبة
ايمان
|
Post: #50
Title: Re: عفاف أبو حريرة
Author: عمران حسن صالح
Date: 06-21-2007, 05:40 PM
Parent: #13
أختنا الغالية عفاف
وإنت يا سيدتي ست الحنان
أراه في عيون وليداتك وبنياتك
رغم إنتمائهم للجفاف الهنا
إلا أن عيونهم ... وسلامهم ... وكلامهم ...
فيه حنان ناس بلدي ...
ولولاك ما كان ...
فالأم هنا هي التربية ... نحن طبعاً ناس دوامات بس
|
Post: #18
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-21-2007, 06:24 AM
Parent: #12
امير
الحاجة دي كان شفتها صورة من خالتي الله يرحمها
كل ما اعاين لي وشيشها ابكي
الله يرحمها
ايمان
|
Post: #34
Title: Re: صورة بروفايل إيمان صالح ....!!!!!!!!
Author: Amir Omer
Date: 06-21-2007, 09:07 AM
Parent: #18
| Quote: الحاجة دي كان شفتها صورة من خالتي الله يرحمها |
والله يا إيمان الحاجَّة دي فيها شبهنا كلنا
عارفة بتشبه حبوبتي الله يرحمها شبه خرافي .... لما أنا زاتي أتخلعت في الشبه
غايتو السويتوها فيني إنتي وعمران لا بتتحكي لا بتتوصف
مودتي
|
Post: #35
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-21-2007, 09:17 AM
Parent: #34
الله يرحمها حبوبتك يا امير
لكن السواها فينا عمران لا حكت لا بقت
انا مسيكينة وقاعدة في حالي
لما لقيت البوست لما اتهجمت
ايمان
|
Post: #49
Title: Re: Amir Omer
Author: عمران حسن صالح
Date: 06-21-2007, 05:06 PM
Parent: #12
Quote: بتغلي من حرَّ الفراق
مشتاقة ناسها وأحبتها
تضمهم بشوق شديييييييييد
مشتاقة لي فرحاً كبير
عشان تكمل ضحكتا |
حنين يا أمير
|
Post: #90
Title: Re: Amir Omer
Author: Amir Omer
Date: 06-22-2007, 02:32 PM
Parent: #49
والله ما أحن منك يا عمران
يديك العافية
خليتني كل يوم الصباح أجي اصبَّح على الصورة دي قبل
ما أطلع على شغلي ...
مودتي
أمير عمر
|
Post: #15
Title: Re: صورة بروفايل إيمان صالح ....!!!!!!!!
Author: Elmosley
Date: 06-21-2007, 05:53 AM
Parent: #1
من شعر
دكتور عبد الرحيم عبد الحليم
جاتني صورتك
جاتني صورتك يا حنونة
زى سحابة شوق هتونة
في مغارب لملمت
شوق العصافير
لى غصونة
وزى صباحات لملمت لون الحليب
في لون عيونا
وزى حصاد جاب للسنابل
أحلى أيام في سنينا
جاتني من عبر المسافات
الضنينة
جات ترش السلوى
فوق ناري الدفينة
وتطفي نار حزني
وتقالدني
وتوانسني
وترشني بي موسيقاها الحنينة.
جاتني صورتك
يا وطن في غربتي
الطالت سنينا
وهدت الزمن المولي
وخلت اللحظات أمينة
ولونت شكل المسا الدامي
بريشة ياسمينة
وخففت حمل اشتياقاتي الطويلة
ومستكينة
وخففت جرح البعاد بى بنسلينا
يا حبيبة الصورة لملمت الوطن
يا حبيبة الصورة أنستني المحن
وجسدت شفق المغارب
بي شجونا
وكنت أشعر اني
ساكن في جفونا
واني مزروع في عيون الصورة
والطلعة الرصينة
واني جاييك فوق فرس
أفراحي أقدل في المدينة
يا نجيماتن بيزرع نورا
في قلبي
الأحاسيس الحنينة
|
Post: #20
Title: Re: صورة بروفايل إيمان صالح ....!!!!!!!!
Author: ضحيه ابراهيم
Date: 06-21-2007, 06:40 AM
Parent: #15
الاستاذ عمران/ الاخت ايمان الفنان الجميل هاشم
هيجتم اشجاننا وجعلتمونا نذرف دمعا هتونا واعدتمونا لى زمن المحنة والاحضان البتنبض بالمحنة والمحبة الصادقة وزمن ينتظروك لامن تجى اخر الليل و(يغتغتو ليك فى عشاك) او يغطوك وانت نايم والعجيب كمان كان جاتك حمى ولا لمت فيك ملاريا تلقى ست الحبايب تعسكر جنبك عديييييييييل..
استاذى الموصلى..
لن انسى هذا المشهد ماحييت على ظهر هذه البسيطة حينما صدحت تشدو برائعتك الجميلة (رسالة الى امى) وضج الحضور بصالون ابى ساندرا عند زيارتك لنا فى الدوحة العام الماضى ولمحت من على البعد الاستاذالاديب الخلوق المهذب /عبد الغنى كرم الله وهو يجهش بالبكاء وتذكر والدته واظنه قرر فى تلك الايام مباشرة النزول الى ارض الوطن..
شاركتة الدمعات فى تلك الاثناء وترحمت على روح والدتى التى لم ارها منذ خروجى من السودان لها الرحمه .
شكرا لكم جميعا ودمتم..
|
Post: #22
Title: Re: صورة بروفايل إيمان صالح ....!!!!!!!!
Author: على محمد على بشير
Date: 06-21-2007, 07:23 AM
Parent: #20
ربنا يرد غربتنا كلنا ونستمتع بى صحبة وقرب امهاتنا واباءنا
عمران وايمان
الله يرخى شباحات مقاومتكم
جهجهتونا الله يجهجهكم قولوا امين 
|
Post: #27
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-21-2007, 07:41 AM
Parent: #22
امين يا علي
عمران سواها واختفى
عاد الليلة الله يستر فاتورة التلفونات
ايمان
|
Post: #28
Title: Re: صورة بروفايل إيمان صالح ....!!!!!!!!
Author: Sidig Rahama Elnour
Date: 06-21-2007, 08:12 AM
Parent: #22
الملف الشخصي ل إيمان صالح
اللقب: إيمان صالح
عدد البوستات: 789
تاريخ التسجيل: 02-11-2005
محل الاقامة: المملكة العربية السعودية
: Not shown
عنوان مكتبتى بسودانيزاونلاين دوت كم :
اكلات مفضلة:
الاسم الحقيقى: إيمان صالح
التلفون: لا بالله
الجامعة/المعهد: جامعي
الحالة الاجتماعية: Married
العنوان الدائم: السعودية
الفنان المفضل: وردي
اللون السياسى: اببببببببيض
النوع: Female
الهوايات المفضلة: الإستماع للشعر والموسيقى
الوظيفة: محاضرة
تاريخ الميلاد: غايتو جنس عدم شغلة
درست المرحلة الابتدائية فى ......و سنة....:
درست المرحلة الثانوية فى ......و سنة....:
درست المرحلة المتوسطة فى ......و سنة....:
شاعرك المفضل: كتيرين
عدد الاطفال: 1
معلومات اضافية:
مكان العمل: الجامعة
مكان الميلاد فى السودان: امدرمان
صورتى:
| Quote: وأنا هناك مند أزمنة في يدي جمر وسؤال , يستيقظ الحزن في قلبي ووجهي عندما أرى رجال الحكومات وتجار الكلمات تبايع على قضيتي وتوكد إحتواء الوضع وجدتي تسكن في خيمتها وتمسك بالسبحة تقايض خسارة العمر بخضوع الحكمة وبيان الصمت , وتسدل ستارة تفتق الدهشة على حلمِ يسر الناضرين ،،، فتصيح (يا ولدي يا ولدي) فأهب اليها مسرعاً لأخفف عنها وهج الأسئلة فتحضنني حتى أشتم رائحة ثوبها وأتذوق طعم اللبن المتعفن فيه فأحس حينها بالامان ، واعرف انها كشجرة السنط التي تقاوم الموت بالحياة ، والحياة بالصبر ، والصبر بالإيمان ، والإيمان باليقين. |
جزء من نص عن القاش تم نشره في موقع كسلا
لكن طلعتو زيتنا يا عمران وإيمان بصوركم وتعليقاتكم
ضحية أنا أشارك المبدع عبدالغني كرم الله دموعه كل ما أسمع أغنية (رسالة الى أمي) فهاشم صديق والموصلي قدموا عملاً رائعاً في هذة الأغنية المعبرة.
لو لم تمت أمي لما تجرأت على الفراق وأرتكبت حماقة الغربة رحم الله جدتي ووالدتي وأسكنهما فسيح الجنات
صديق ود السارة بت فاطنة بت تكونة
|
Post: #31
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-21-2007, 08:35 AM
Parent: #28
عاد يا صديق يا ود السارة الله يرحمها
هباش جنس هبيش
هسه الموديك تقابض في حاجاتي دي شنو؟
ان شاء الله الله يخليك لي اخياتك واخوانك
ويخليهم ليك كلهم
ايمان
|
Post: #26
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-21-2007, 07:39 AM
Parent: #20
ضحية
على قولك
عمران هيج اشجاننا وخلى البوست ومشى
وعلقه لي في رقبتي
وانا دمعتي في عيني
ايمان
|
Post: #51
Title: Re: صورة بروفايل إيمان صالح ....!!!!!!!!
Author: عمران حسن صالح
Date: 06-21-2007, 05:44 PM
Parent: #20
ود إبراهيم
الله يفك محنتنا ...
ويرجعنا لي حضن حبوباتنا وأماتنا
|
Post: #58
Title: Re: صورة بروفايل إيمان صالح ....!!!!!!!!
Author: Elmosley
Date: 06-21-2007, 08:20 PM
Parent: #20
حبيبنا ضحية هاجرنا جميعا وكان الوطن الام هو الضحية
تسلم وما اجمل دوحتكم بكم
|
Post: #25
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-21-2007, 07:38 AM
Parent: #15
الرسول يا الموصلي ما تخت لينا اغنية بكتب ليك رسالة طويلة يا امي
عشان باقي دميعاتنا يكملن الليلة
ايمان
|
Post: #29
Title: Re: صورة بروفايل إيمان صالح ....!!!!!!!!
Author: عمران حسن صالح
Date: 06-21-2007, 08:21 AM
Parent: #25
الناس الحلوين الهنا ديل كلهم
والله أنا البوست فاتح قدامي
بس والله خميسي مشاتر ومليان ورق قدامي وما قادر أرفع راسي
وكل مرة أعمل كليك رفرش وأشوف الناس الحنان ديل هنا
وبرجع ليهم واحد واحد
وإيمان صالح يا حبايب ليست طرف في الردود ...
الله يديها العافية ما قصرت تب ...
بس اللوم فوق أخوكم المليان شغل على آخر الإسبوع
بجيكم صــــــاد ....
|
Post: #30
Title: Re: صورة بروفايل إيمان صالح ....!!!!!!!!
Author: عمران حسن صالح
Date: 06-21-2007, 08:21 AM
Parent: #25
مكرر محنة ساكت....
|
Post: #33
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-21-2007, 08:39 AM
Parent: #30
خلاص سمعنا يا عمران
الله يعينك
خلص شغلك وتعال استلم البوست
انا كملت الدموع
ايمان
|
Post: #36
Title: Re: صورة بروفايل إيمان صالح ....!!!!!!!!
Author: سوسن عبد الله
Date: 06-21-2007, 09:21 AM
Parent: #33
فــوق ...
عشان أستاذنا الموصلي ينزل لينا "رسالة إلى أمي"
|
Post: #38
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-21-2007, 09:43 AM
Parent: #36
تسلمي يا سوسن
هدي الفوق جابت فائدة
ايمان
|
Post: #37
Title: Re: صورة بروفايل إيمان صالح ....!!!!!!!!
Author: Salwa Seyam
Date: 06-21-2007, 09:27 AM
Parent: #1
اها هاك يا ايمان .. كمان ولا انتظرنا الموصلى يجى ..
|
Post: #39
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-21-2007, 09:43 AM
Parent: #37
تسلمي يا سلوى
الموصلي ما هببه لينا
يكون بيتشاكل مع عمر الفاروق هسه
ايمان
|
Post: #59
Title: Re: صورة بروفايل إيمان صالح ....!!!!!!!!
Author: Elmosley
Date: 06-21-2007, 08:24 PM
Parent: #39
والله يا ايمان ماكنت حاضر طلبكم وطبعا انا وسلوي حالتنا واحده بس ما اظنك خليتي
بالك للقصيده الرهيبه الانا نزلتها لدكتور عبد الرحيم كدي امشي اقريها وشيلي معاك كراتين من المناديل
|
Post: #67
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-22-2007, 07:03 AM
Parent: #59
مشكور يا الموصلي
ومشكورة سلوى
والقصيدة شفتها
وده الخلاني اطلب الاغنية
ايمان
|
Post: #40
Title: Re: صورة بروفايل إيمان صالح ....!!!!!!!!
Author: شادية الطيب
Date: 06-21-2007, 09:57 AM
Parent: #1
ايمان وعمران
انتو بصراحة بتاعين مشاكل هسع نحنا ناقصين بكا وشجون
انا بمجرد ما شفت الصورة دي قبل يومين دموعي ملت عيوني لأنها ذكرتني حبوبتي وذكرتني كل الحبوبات الطيبات الحنينات اللي اتحرمت من حنيتهم وحنانهم وبالمناسبة هي فعلا بتشبه واحدة قريبتنا شبه خيالي لدرجة اني شبه متأكدة انها هي عشان كدة يا ايمان عليك الله رسلي لي اسم المرة دي في المسنجر
|
Post: #68
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-22-2007, 07:10 AM
Parent: #40
شادية
هسه عليك النبي انا سويت شنو؟
قاعدة في صمة خشمي
جاء عمران جرسنا وبهدلنا
الله يخلي لينا الامهات والحبوبات
ايمان
|
Post: #41
Title: Re: صورة بروفايل إيمان صالح ....!!!!!!!!
Author: essam&amal
Date: 06-21-2007, 10:00 AM
Parent: #1
هيجتم اشجاننا وجعلتمونا نذرف دمعا هتونا واعدتمونا لى زمن المحنة والاحضان البتنبض بالمحنة والمحبة الصادقة وزمن ينتظروك لامن تجى اخر الليل و(يغتغتو ليك فى عشاك) او يغطوك وانت نايم والعجيب كمان كان جاتك حمى ولا لمت فيك ملاريا تلقى ست الحبايب تعسكر جنبك عديييييييييل..
والله دى امى عديييييل كدة
وبقالع فيها كمان
انا فى السودان حالتى هسى ما يعلم بيها الا الله
دموعى غرقتنى
وانتوا كيف فى الغربة
قبلكم وحدكم
ايمان انت عندك اروع بروفايل شفتوا
ومن الليلة ما عندى شغلة غير فتيش البروفايلات اتاريها فيها
كل الجمال ده؟؟؟
الله يسامحكم اصبحنا من صلاة الصبح فى جنس الدموع ديل
الله يغفر لينا ويسامحنا
ويغفر لنا ولموتانا اجمعين
تحياتى للرائعين كلهم الدخلوا هنا
واخص عمران وايمان
القومة ليهم
ام وضاح
|
Post: #42
Title: Re: صورة بروفايل إيمان صالح ....!!!!!!!!
Author: ضحيه ابراهيم
Date: 06-21-2007, 10:09 AM
Parent: #41
الاخت /ايمان.. شكرى الجميل
سلوى صيام ..ينصر دينك وعافى منك تب ..بس لو وريتنينا طريقة للحفظ نعجز عن شكرك..
الاخت/ امال اصعب شىء انك تفقدك احد والديك وانت فى الغربة؟ الله يخلى ليك والدينك ويديهم الصحة والعافية..
|
Post: #44
Title: Re: صورة بروفايل إيمان صالح ....!!!!!!!!
Author: Sidig Rahama Elnour
Date: 06-21-2007, 10:35 AM
Parent: #42
الاخ ضحية إبراهيم
أتفضل أضغط هنا للحفظ انا وأنت وعبدالغني نحضر المناديل ساكت
|
Post: #70
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-22-2007, 07:16 AM
Parent: #44
قادر الله
صديق ود السارة الكان بيشحد الغنا
بقى يجيب لينكات الحفظ
الاداك بالمعلقة يديني بالكوريك
ايمان
|
Post: #43
Title: Re: صورة بروفايل إيمان صالح ....!!!!!!!!
Author: saadeldin abdelrahman
Date: 06-21-2007, 10:22 AM
Parent: #41
Quote: والله دى امى عديييييل كدة
وبقالع فيها كمان |
أم وضاح اختي عليكي الله سيبي السلبطة.. آي نحن اخوان
لكن دي امي (زينب) برااااي 
الله يديها العافية و يعافي عيونا
ايمان النصيبة ازيك!
.. كارثة زيك ما لاقتني.. الله يدينا خيرك
عيونا المتحجرات و مجحرات ديل ما ناقصنك انتي و حبيبنا
عمران ده!
و يا عمران أخوي..
انا شفت الصورة دي امس لكن يومي كان
زي خميسك و يدي اليومين ديل تقيلة من البورد ده
* امي زينب ام أمي
|
Post: #45
Title: Re: صورة بروفايل إيمان صالح ....!!!!!!!!
Author: يسرى معتصم
Date: 06-21-2007, 11:27 AM
Parent: #43
أخوى عمران
سلامى للجميع وخاصة الوالدة الحنونه زهراء والوالد حسن صالح
جايييك بالتلفون
فتك بعافيه
أضغط للتشغيل
|
Post: #64
Title: Re: صورة بروفايل إيمان صالح ....!!!!!!!!
Author: عمران حسن صالح
Date: 06-22-2007, 01:42 AM
Parent: #45
يسري معتصم
ود علوية
....
يا زول إنت حا تحرمني صوتك ده لمتين
بالمناسبة ...
الصورة تذكرني أيضاً
الحاجة فطين
والحاجة الشول ....
...
تصدق يا يسري محفورين جواي .....رغم السنين
|
Post: #72
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-22-2007, 07:21 AM
Parent: #45
يسري
مشكور
واقرا كلام سعاد تاج السر التحت داك
ايمان
|
Post: #71
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-22-2007, 07:18 AM
Parent: #43
سعد الدين
وين كنت غاطس انت؟
عليك النبي في ذمتك انا هسه كارثة؟
انا وحاة النبي اتخت في الجرح يبرا
الله يخلي ليك زينب
ويخليك ليها ان شاء الله
ايمان
|
Post: #69
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-22-2007, 07:14 AM
Parent: #41
ام وضاح الحبيبة
ان شاء الله يخلي ليك العندك
وما يحرمك منهم ولا يحرمهم منك
عاد انا من بعد الاتنين
ما قاعدة دقيقة
جاياكم جري
ايمان
|
Post: #46
Title: Re: صورة بروفايل إيمان صالح ....!!!!!!!!
Author: انعام عبد الحفيظ
Date: 06-21-2007, 11:38 AM
Parent: #1
صورة تطل منها كل الحنية
بتذكرني بحبوبة زينب أم أمي تشبهها شديد
|
Post: #47
Title: Re: صورة بروفايل إيمان صالح ....!!!!!!!!
Author: bayan
Date: 06-21-2007, 11:48 AM
Parent: #46
كفاية اقيف وانقش في جناح الريح كلامي الدايرو يوصل ليك
الله يخليك لينا يا فاطنة...
عمران وايمان مالكم علينا..
|
Post: #48
Title: Re: صورة بروفايل إيمان صالح ....!!!!!!!!
Author: عمران حسن صالح
Date: 06-21-2007, 01:31 PM
Parent: #47
أِشهدك ربي بمحبتي لكل زوار هذا البوست
والمتداخلين فيه ...
وأشهدك ربي بمحبتي لكل أم سودانية ..
تحمل كل هذا الحب والحنان ...
وأسألك ربي المغفرة والإحسان
لكل حبوباتنا....
.....
ولسه فوق .............
|
Post: #52
Title: Re: صورة بروفايل إيمان صالح ....!!!!!!!!
Author: هاشم أحمد خلف الله
Date: 06-21-2007, 06:04 PM
Parent: #48
عمران والله بوستك ده يظهر علي حااسكن فيهو عديل كده , تخيل كل ساعة افتحو واتفرج علي اوماتي الجوه ديل واطلع , ياخي ربنا يجعل البوست ده في ميزان حسناتك , تخيل قبل ستة سنوات عملت لي امي زيارة ولما مشينا مطار الملك خالد الدولي بالرياض لاستقبالها كنت ببكي زي ولد صغير والناس دي كلها تتفرج
علي واول ما وصلنا الشقة كتبت الابيات دي
لما شوفتك إنتي يمة
شعرت فعلاً بالمحنة
شعرت إني كنت تائه
وفاقد امل واحنة كلمة
وانتي يمة ما حياتنا
وبسمتك ما زاد عمرنا
والله يمة ما نسيتك
ولو ظروفي بقت مزمة
الكلام القلتي ليا
حاشا مابنساهو
والوصايا والمحنة
ادعي لينا في صلاتك
ادعي لينا في صباحك
ربنا يجمع شملنا
ونرجع نعيد ذكرياتنا
واحلي ايام عمرنا
ونحكي لاولادنا الصغار
عن زمانا وعن اصلنا
والزمان يا ريتو يخضع
ويبقي ساهل وطوع امرنا
بيهو نحقق أمنياتنا
والحباة تصبح كجنة
لا مشاكل تعترضنا
لا هموم لا مظنة
والامل يصبح شعارنا
والقمر يضؤي في عمرنا
والفرح ماليهو اخر
لما الله يرضي عنا
|
Post: #76
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-22-2007, 07:30 AM
Parent: #52
تسلم يا هاشم
يا حنبن
ايمان
|
Post: #53
Title: Re: صورة بروفايل إيمان صالح ....!!!!!!!!
Author: tmbis
Date: 06-21-2007, 06:15 PM
Parent: #48
| Quote: وهي امراه جممممميله جدا جمال ما اعتيادي اعني انها من الجميلات الغنوا ليهن بدور القلعه وجوهرا . |
:
ياعمران وايمان:
دي صورة من زمن الناس الحنـان .. زمن بتنادي وبتقول .. يا ( يمــه ) وتملى خشمك منهــا وتحس بي كل حتة جواك بتطقطق..
أربعة سنوات افقتد حضــن أمي .. شلوخ أمي ونفس دقة الشلوفــه..
هذى الصورة اعادت لي الطمأنينة وبعض اليقين .. وردت لي روحي..
|
Post: #77
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-22-2007, 07:32 AM
Parent: #53
ان شاء الله يا تمبس الله يطمنك ويطمنها
ويرد غربتك وغربتنا
ايمان
|
Post: #75
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-22-2007, 07:26 AM
Parent: #48
الاخ عمران
مشكور لزيارة هذا البوست
ايمان
|
Post: #74
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-22-2007, 07:24 AM
Parent: #47
بيان
الله يخلي ليك فاطنة
وحاة النبي انا من زمن بقرا المنبر ده من زمان
وشفت دومة خاتة صورة امك دي
وانا حاباها ومحتفظة بيها
الله يخليكم لي بعضكم ان شاء الله
ايمان
|
Post: #73
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-22-2007, 07:23 AM
Parent: #46
انعام
ان شاء الله الله يخلي ليك زينب والزي زينب
ايمان
|
Post: #54
Title: Re: صورة بروفايل إيمان صالح ....!!!!!!!!
Author: Salwa Seyam
Date: 06-21-2007, 07:27 PM
Parent: #1
| Quote: سلوى صيام ..ينصر دينك وعافى منك تب ..بس لو وريتنينا طريقة للحفظ نعجز عن شكرك.. |
انا لسه تحت التمرين دى ما وصلتا ليها.. لكن جاك تمبس الحريف .. يلا يا تمبس .
|
Post: #56
Title: Re: صورة بروفايل إيمان صالح ....!!!!!!!!
Author: tmbis
Date: 06-21-2007, 07:52 PM
Parent: #54
| Quote: انا لسه تحت التمرين دى ما وصلتا ليها |
.. حالتك يا سلــوى تحت التمرين؟؟ طيب كدا خلاص إنت قايله فضل شنـو ..؟
Save@Pc
كان ما طالع وعندي مشــوار كان وريتك الحاصل ..
|
Post: #55
Title: Re: صورة بروفايل إيمان صالح ....!!!!!!!!
Author: نهال كرار
Date: 06-21-2007, 07:45 PM
Parent: #1
( صورة بروفايل ايمان صالح )
ياااااه
دي أجمل صورة شفتها منذ فترة طويلة
|
Post: #78
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-22-2007, 07:34 AM
Parent: #55
نهال
اريتك طيبة
وتسلمي يا الحبيبة
ايمان
|
Post: #57
Title: Re: صورة بروفايل إيمان صالح ....!!!!!!!!
Author: Salwa Seyam
Date: 06-21-2007, 08:11 PM
Parent: #1
| Quote: كان ما طالع وعندي مشــوار كان وريتك الحاصل .. |
شكرا ليك يا تمبس ..وفى الانتظار..
|
Post: #60
Title: Re: صورة بروفايل إيمان صالح ....!!!!!!!!
Author: khaleel
Date: 06-21-2007, 08:29 PM
Parent: #57
الشلوخ
مطارق يا قمر دورين
بين وبينك مائة والف فارق
سلمت ايها العمران
|
Post: #61
Title: Re: صورة بروفايل إيمان صالح ....!!!!!!!!
Author: Souad Taj-Elsir
Date: 06-21-2007, 08:34 PM
Parent: #57
سلام عمران، إيمان وضيوفهم الكرام،
والله بوست من أجمل البوستات شكراً عمران.
ويا أستاذة إيمان، والله الحاجة في الصورة دي بتشبه حبوبتي
خالة أبوي، نفيسة بت مصطفى الخالق الناطق. والله ممكن أحلف
أقول دي حاجة نفيسة الله يرحمها التي رحلت عنا قبل سنتين.
سبحان الله، يبدو أن هذه المرأة الجميلة تحمل ملامح كل النساء
لما في وجهها من حِنيّة طاغية وطيبة رائعة.
شكراً جزيلاً ليكم جميعاً على هذا الجمال.
شكراً سلوى صيام أيضاً على الأُغنية الجميلة، تمبس على رابط الحفظ.
ولا يفوتني أن أشكر أستاذنا الموصلي وأن أسجّل بأن هذه من أجمل
أُغنياتك. أضم صوتي لصوت الأخت إيمان وأرجو أن تتحفنا بكلماتها.
جلاب يرسل إليك تحياته العطرة يا أستاذ موصلي.
شكراً جزيلاً لكم جميعاً للسماح بالمرور وهدوء هذه الإتّكاءة.
تحياتي وصادق مودتي.
سعاد
|
Post: #81
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-22-2007, 10:34 AM
Parent: #61
سعاد
كيفنك؟
والله الحاجة دي طلعت حبوبة وام وخالة وعمة كل الناس
الله يرحم حاجة نفيسة والزيها
ايمان
|
Post: #62
Title: Re: صورة بروفايل إيمان صالح ....!!!!!!!!
Author: حافظ العشا
Date: 06-21-2007, 11:07 PM
Parent: #1
عمران /ايمان
اغالب دمعي واتصبر واقول يالله صبرني
اجمل بوست مر علي منذ متايعتي
لسودانيز اون لاينز والى ان صرت
عضو بهذا المنبر
جواي كلام كتير ولكن من الدموع والعبرة
ماقادر اعبر عنهبس كل البقدر اقوله
اني باقترح على الريس بكري تثبيت
هذا البوست على الصفحة الاولى
وربنا يرد غربة جميع السودابيين
والعودة الى احضان الاهل والبلد
شكرا عمران وايمان
لكم كل المعزة والمودة
|
Post: #63
Title: Re: صورة بروفايل إيمان صالح ....!!!!!!!!
Author: عمران حسن صالح
Date: 06-22-2007, 01:25 AM
Parent: #62
يااااااااااااااااااه يا ناس ...
فينا كل الحاجات دي ..
لسة راقدة جوة الجوة ...
منتظرة بس تطلع وتمرق كل الجوانا ده ...
والله ده كتير على قلوب كتيرة
إلا على قلوبنا ,,,,
لخصت حبوبتي الفوق دي كل حاجات دنيتنا ...
شوية محنة ... وقلدة ريدة صادقة ...
منو الغيرنا ممكن إحساسو بس بي صورة (تلخص جمال المحنة عندنا )
يوصل للدرجة دي ... ؟؟؟؟؟؟؟؟؟
Salwa Seyam
نهال كرار
khaleel
Souad Taj-Elsir
حافظ العشا
الله يديكم العافية ...
ولو ما كنت منكم التراب دي في خشمي ...
|
Post: #65
Title: Re: صورة بروفايل إيمان صالح ....!!!!!!!!
Author: يسرى معتصم
Date: 06-22-2007, 04:40 AM
Parent: #63
عمران أخوى وأخوانى الكرام
هاكم دى
 
ياريت لو أختنا سلوى غيرت اللنك من true إلى false
مع الشكر والتقدير
|
Post: #66
Title: Re: صورة بروفايل إيمان صالح ....!!!!!!!!
Author: Souad Taj-Elsir
Date: 06-22-2007, 05:23 AM
Parent: #65
يا سلام من كلمات الأُم، الحنية للأُم، والشوق الجارف للأُم.
يا ريت كما تتحفونا برائعة تيجاني حاج موسى، "أُمي الله يسلّمك" بصوت المُبدِع كمال ترباس، والتي تتواتر كلماتها العذبة:
ُأُمي الله يسلّمك، يا يمّة الله يسلمك
ويديكِ لي طول العُمُر وفي الدنيا يوم ما يألّمك
يا أًمّي يا دار السلام، يا حصني لو جار الزمان
ختيتي في قلبي اليقين، يا مطمناني بطمنّك
خيرك علي بالجد كتير
يا مرضعاني الطيبة بالصبر الجميل
يا سعد أيامي وهناي لو دُرتي قلبي اسلّمك
أُمي الله يسلمك ... يا يُمّة الله يسلّمك
أنا مهما أفصح عن مشاعري
برضو بيخوني الكلام
قولة بحبك ما بتكفّي وكل كلمات الغرام
يا منتهى الريد ومبتداه
يا منتهى الريد ومبتداه
ويا الليا الله يسلّمك
أُمي الله يسلّمك، يا يمّة الله يسلمك
ويديكِ لي طول العُمُر وفي الدينا يوم ما يألّمك
آمين، اللهم احفظهم يا أرحم الراحمين.
|
Post: #79
Title: Re: صورة بروفايل إيمان صالح ....!!!!!!!!
Author: عمران حسن صالح
Date: 06-22-2007, 08:34 AM
Parent: #66
Quote: الاخ عمران
مشكور لزيارة هذا البوست
ايمان |
يا ستي الشكر ليك انت لتحملك غيابي بالأمس ...
ولتحملك فيضان مشاعري الخلاني أستخدم الصورة أعلاه دون إحم أو دستور ...
ولزيارتك البوست أيضاً وقيامك بالرد لكثير من الأخوة هنا ...
....
تسلمي وتسلم ست الصورة ....
|
Post: #80
Title: Re: صورة بروفايل إيمان صالح ....!!!!!!!!
Author: نهال الطيب
Date: 06-22-2007, 10:06 AM
Parent: #79
بقيف عندك كتير يا ذكرى الحبان الحنان
بتشيلني الوحشة لريحة زمانكن الجميل
بس بقول جايكم أرجني في خشم الباب
لأني شاية جواي شوق عمر ليكن يا حبيبات
عمران إيمان شكرا جميلا
|
Post: #84
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-22-2007, 10:46 AM
Parent: #80
نهال الحبيبة
سلام ومعزة
وشكرا ليك انتي يا طيبة الخصال
وكريمة الاخلاق
اريتك طيبة
والحداك كلهم طيبين
ايمان
|
Post: #85
Title: Re: صورة بروفايل إيمان صالح ....!!!!!!!!
Author: ابو جهينة
Date: 06-22-2007, 10:51 AM
Parent: #80
عزيزي أبو محمد العمران
لا يتحدث عن مثل هذه الأشياء إلا رجل وضع الله في قلبه الرحمة .. فهو إذن سعيد دنيا و آخرة.
مثل هذا الوجه المعفَّر بغبار السنين .. هو نيل آخر يجري مع أزرقنا و أبيضنا إلى يوم يبعثون.
لا أتخيل أسرة تواصل مسيرتها دون أن تكون قد عانقتْ مثل هذا الوجه في سفرها و إيابها .. دافنين الوجوه في حناياها يستنشقون عطراً مميزاً لا نجده إلا فيهن و هو أمر غريب.. فحتى لو تعطرن بزجاجات آخر صيحات العطور فإن تلك الرائحة المحببة تكون راقدة فيهن تعطينا إحساسا بالطمأنينة و الإنتماء إلى طين هذه الأرض المعطاءة.
هذه النظرات المستكينة و لكنها تخفي صرامة و حنية في آن واحد... في هدوء تقوم بمقارنة سريعة .. بين حياتها الماضية .. تقارن بين شتى الممارسات الإجتماعية التي عاشتها أيام زمان .. وبين ما تشاهده الآن .. فتسدي النصح في لهجة محببة مغلفة بوعيد رقيق و نُصْح تراكم على مر السنين تنثره بين صلواتها و بين طقطقات مسبحتها و دعوات ما قبل النوم.
لله درك يا عمران .. فقد أثرت شجوني ..
نهاية قولي .. الـ ما عندو كبير يشتري كبير .. و رغم علمي التام بأنه لا يمكن شراء كبير بمواصفات تحمل نفس جينات من تجري دماءهم في دماءنا .. إلا أنني أؤمن بأن من كانت على شاكلة أم إيمان .. أو أمك أو كل أمهاتنا ( مشلخات أو مرهات .. بشلاليف مدقوقة أو سادة ) .. فإنهن ذوات نكهة واحدة و جذور واحدة ...
اللهم أعطي الأحياء منهن العافية و حسن الخاتمة
و الرحمة و المغفرة لمن أدتْ رسالتها و رجعتْ إلى ربها راضية مرضية
دمتم
|
Post: #102
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-23-2007, 08:47 AM
Parent: #85
أنني أؤمن بأن من كانت على شاكلة أم إيمان .. أو أمك أو كل أمهاتنا ( مشلخات أو مرهات .. بشلاليف مدقوقة أو سادة ) .. فإنهن ذوات نكهة واحدة و جذور واحدة ...
ابو جهينة
حبابك
وحاة النبي كلامك محاضرة
الله يخليك ويخلي ليك الزيها يا رب
ايمان
|
Post: #118
Title: Re: صورة بروفايل إيمان صالح ....!!!!!!!!
Author: عمران حسن صالح
Date: 06-23-2007, 01:23 PM
Parent: #85
| Quote: لا يتحدث عن مثل هذه الأشياء إلا رجل وضع الله في قلبه الرحمة .. فهو إذن سعيد دنيا و آخرة. |
| Quote: مثل هذا الوجه المعفَّر بغبار السنين .. هو نيل آخر يجري مع أزرقنا و أبيضنا إلى يوم يبعثون. |
| Quote: لا أتخيل أسرة تواصل مسيرتها دون أن تكون قد عانقتْ مثل هذا الوجه في سفرها و إيابها .. دافنين الوجوه في حناياها يستنشقون عطراً مميزاً لا نجده إلا فيهن و هو أمر غريب |
Quote: هذه النظرات المستكينة و لكنها تخفي صرامة و حنية في آن واحد... في هدوء تقوم بمقارنة سريعة .. بين حياتها الماضية .. تقارن بين شتى الممارسات الإجتماعية التي عاشتها أيام زمان .. وبين ما تشاهده الآن .. فتسدي النصح في لهجة محببة مغلفة بوعيد رقيق و نُصْح تراكم على مر السنين تنثره بين صلواتها و بين طقطقات مسبحتها و دعوات ما قبل النوم.
|
| Quote: نهاية قولي .. الـ ما عندو كبير يشتري كبير .. و رغم علمي التام بأنه لا يمكن شراء كبير بمواصفات تحمل نفس جينات من تجري دماءهم في دماءنا .. إلا أنني أؤمن بأن من كانت على شاكلة أم إيمان .. أو أمك أو كل أمهاتنا ( مشلخات أو مرهات .. بشلاليف مدقوقة أو سادة ) .. فإنهن ذوات نكهة واحدة و جذور واحدة ... |
العزيز جلال أبو جهينة
دائماً ما أعاني في سرعة ردي لأي مداخلة هنا تهبش دواخلي وتعطيني أبعاد أكبر لأشياء لم تستطيع عباراتي المتواضعة وصفها ..
وحين يكون الحديث لأديب يقف حماري هناوأتردد في الرد ...
قد يكون حنيني وعواطفي صادقةً ولكن هل أفلحت الحروف في نقلها كما هي ...
وذلك بيت القصيد
فالنظرة المستكينة مع الصرامة والحنين هي صفات هذا الجيل ...
هي لأمهات :
لم ينالوا تعليماً .. ولم يعاشروا شعوباً أخرى ... وخبراتهم هي بيوتهم فقط
فأنظر ماذا يمكن أن تفعل نظراتهم فينا ؟؟؟؟؟
ومثل هذا الوجه المعفر يجري فينا موازياً لنيلنا ... ( وإن كنت أخاف من شكل حبوباتنا بعد خمسين سنة)
وأعيد عباراتك مرة وإثنين وأردد بأن للأديب أيضاً نكهة مختلفة لوصف الأشياء
ويظل قولك عن حبوباتنا :
(ذوات نكهة واحدة و جذور واحدة ...) ...
ولهذا فاض بي كل هذا وإشتقت لريحة أمهاتي
|
Post: #83
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-22-2007, 10:45 AM
Parent: #79
تسلم يا عمران
وحاة النبي كنت بهزر
عشان استلمت البوست رسمي وشعبي
لكن كان دفعت بخليه ليك
ايمان
|
Post: #86
Title: Re: صورة بروفايل إيمان صالح ....!!!!!!!!
Author: Elmosley
Date: 06-22-2007, 10:54 AM
Parent: #65
وليه يايسري يعني اغنيتي رساله الي امي ماعاجباك؟؟؟
|
Post: #82
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-22-2007, 10:39 AM
Parent: #62
حافظ
اريتك طيب
امشي تم بكاك
وتعال قول كلامك الكتير
ما بنعفيك
كلنا بكينا وجينا
مشكور يا الحنين
ايمان
|
Post: #87
Title: Re: صورة بروفايل إيمان صالح ....!!!!!!!!
Author: نهال الطيب
Date: 06-22-2007, 11:22 AM
Parent: #82
أستاذ الموصلي
أنا من جمال الغنية عايزة أعلق ليك سرحت معاها ونسيت
تسلم يا سيد الروعة
|
Post: #88
Title: Re: صورة بروفايل إيمان صالح ....!!!!!!!!
Author: يسرى معتصم
Date: 06-22-2007, 12:23 PM
Parent: #87
| Quote: وليه يايسري يعني اغنيتي رساله الي امي ماعاجباك؟؟؟ |
الأستاذ الكبير الموصلى
سلامات
تصدق دى الأغنيه الأولى فى الCD المكون من جميع الأغانى للأم من أرقى لمحمد جباره لترباس لسميه حسن والكتير.... بس عليك الله لو عندك أغنية الفنان حمد البابلى ياوالدة ياأمى ألحقنى بيها وأى أغنية للأم.
طلبت من الأخت سلوى تغيير الكود لتسهيل سرعة فتح البوست
تقديرى............
|
Post: #89
Title: Re: صورة بروفايل إيمان صالح ....!!!!!!!!
Author: Elmosley
Date: 06-22-2007, 12:54 PM
Parent: #88
ياريت يايسري
بالمناسبه لو السي دي فيهو امي انا لمني الخير اتكون حاجه ظريفه
وكذلك امي من الحان فزاري وبغنوها الاطفال زمان بقيادة احنان طبعا رهسع كبيره وشابه زي الفل
=============
بالنسبة للاغنيه الطلبتها والله ماعندي
اسمع كلم تمبس ولا الصحافه ديل ينكتوها ليك من مافي
|
Post: #91
Title: Re: صورة بروفايل إيمان صالح ....!!!!!!!!
Author: صديق الموج
Date: 06-22-2007, 04:31 PM
Parent: #1
عمران العزيز ....ايمان الاعز والذ... تحياتى
اول مرة من ما دخلت المنبر ده قريب اربعة سنوات اشم لى بوست.
هذا بوست به نكهة ولذاذة غريبه!!
بالله عمران شوف تقاطع هذه الخطوط، وكأن الزمن حفر على وجهها بمعول.
كل خط يوصلك الى خط ينقلك القلب طوالى...
هولاء امات وليس مامات...
كلمة ماسخه (ماما) شكلها مسلسل مصرى،مش؟؟
تداعت لدى صورة متماوجه وانسجه مختلفه وخيوط متشابكه وانا بين حنينى وخيالاتى لا اعى..
لا ادرى بايتها امسك ؟وعلى ايتها اتكى؟ وانا اطالع هذا الوجه الرحيم....
ماعارف ليه شميت لى كسرة عاسوها بى حطب نصف لين بعد ليله ممطرة..
واتذكرت راكوبه ماهله فيها قله تهتف او تنقط..
وريحة شاى ساموطى مقنن بى لقيمات..
قطعا الوصفه ليست من كتاب ابله نظيرة..فن الطبخ..
وانما لقيمات ملخوخة بايدى غاية فى الطهر بعد وضوء مغرب..
سبحة معلقه فى كراع عنقريب ملخلخة مربوطه بى سلك..والكراع متمردة تتجه الى الداخل.
زيرين موهطات فى واطه،ومعبيات بمكيال ثلثه حنيه وثلثاه بركة..
كمون محزوق بعنايه فى دلقان معلق فى امينة البيت خوف العين..
علبة حلاوة قديمة فيها خاتم نص جنيه مسهوك وتيلة وحريرة حمراء وخرزة وسوميته وحجل.
مطمورات ومدخورات لى فرح الجنيات او طهور الوليدات..
توب مصرور فى طرفه سته قروش ونص..
كانت تقيم صلب وتشبع اود..
ياخذ منها كل من وجد جيبه عبوس او محفظته قمطريرا...
مفحضة غشاها زيت فاحال رائحة دبغ القرض الى عبق وفى نصها ورقة من الحسن اب جلابيه..
يلحق ويفزع عند الكروب..ويقى المفحضة من شر سارق اذا سرق..
جالون مقطوع من الاعلى ومحلول فيه صابون لغسيل جلابية لصلاة جمعة..
تبروقة صلاة مدروعه فى خشم الراكوبه تهفهف بالحسنات كلما تجاذب الهواء اطرافها..
نص وقيه شاى وربع رطل سكر ومرمى فوقن كراس جرورة قريب الكراب..
عدة فى طشت تنز بدهن برو بيها ناسات ضيوف ..
فانوس اعياه التنقل بين التكل والديوان وما بينهما.
وعييييييييييييييك ترو من جنبى،هسه انا لا بشوف لا بسمع....
عمران وايمان ياسمحين،براها الغربة دى زاتها خففت قلوبنا
وبقينا على الهبشه مالكم دايرين تخربوا علينا
احب المرة دى واحب العلق صورتها هنا واحب الكتب البوست ده..
واحب اى حاجه زى دى ..فى اى حته.. وتسلموا كلكم،،،
|
Post: #92
Title: Re: صورة بروفايل إيمان صالح ....!!!!!!!!
Author: عمران حسن صالح
Date: 06-22-2007, 04:58 PM
Parent: #91
Quote: ماعارف ليه شميت لى كسرة عاسوها بى حطب نصف لين بعد ليله ممطرة..
واتذكرت راكوبه ماهله فيها قله تهتف او تنقط..
وريحة شاى ساموطى مقنن بى لقيمات..
وانما لقيمات ملخوخة بايدى غاية فى الطهر بعد وضوء مغرب..
سبحة معلقه فى كراع عنقريب ملخلخة مربوطه بى سلك..والكراع متمردة تتجه الى الداخل.
زيرين موهطات فى واطه،ومعبيات بمكيال ثلثه حنيه وثلثاه بركة..
كمون محزوق بعنايه فى دلقان معلق فى امينة البيت خوف العين..
علبة حلاوة قديمة فيها خاتم نص جنيه مسهوك وتيلة وحريرة حمراء وخرزة وسوميته وحجل.
مطمورات ومدخورات لى فرح الجنيات او طهور الوليدات..
توب مصرور فى طرفه سته قروش ونص..
مفحضة غشاها زيت فاحال رائحة دبغ القرض الى عبق وفى نصها ورقة من الحسن اب جلابيه..
جالون مقطوع من الاعلى ومحلول فيه صابون لغسيل جلابية لصلاة جمعة..
تبروقة صلاة مدروعه فى خشم الراكوبه تهفهف بالحسنات كلما تجاذب الهواء اطرافها..
نص وقيه شاى وربع رطل سكر ومرمى فوقن كراس جرورة قريب الكراب..
عدة فى طشت تنز بدهن برو بيها ناسات ضيوف ..
فانوس اعياه التنقل بين التكل والديوان وما بينهما.
|
كل ده موجود هنــــــــا ....
فوق تقاطيع الصورة دي ...
|
Post: #93
Title: Re: صورة بروفايل إيمان صالح ....!!!!!!!!
Author: Ahmed Yousif Abu Harira
Date: 06-22-2007, 06:34 PM
Parent: #92
عمران البوست
وايمان الصورة
ده تفتيش راسو عديل
هاااادي مرقه
|
Post: #94
Title: Re:
Author: عمران حسن صالح
Date: 06-23-2007, 05:57 AM
Parent: #93
|
Post: #95
Title: Re:
Author: Tragie Mustafa
Date: 06-23-2007, 06:25 AM
Parent: #94
تحيه لكل الاوفياء لامهاتهم/ن
وربنا يجيزهم عننا خير الجزاء
ولاني اعرف معزة الام جيدا
لذا كتبت لكم عمن ضرب السفير السوداني بفلادلفيا
لان الحكومه اعتقلت امه التي كانت امرأه مثل هذه السيده
التي تبدو الطيبه في عينها و الكبرياء معا.
وتم تزين شعرها لها صلعه امعانا في المهانه لان ابنها
أدلى بشهادته عن ما حدث لهم بدرافور في الاعلام الامريكي.
ليآتي سفير منافق ويقول له انه كاذب وان درافور بخير....
وبكل وفائه لامه كان لابد ان يلقنه درسا.
ويآتي من يكتب لنا عن رفض العنف وكأن ما حدث لامهات بعضنا كان ليس عنفا؟؟
شكرا سلوى لاغنية الموصلي فاني احبها كثيرا
وكنت استمع لها بصوت سميه حسن فقط.
شكرا ايمان للصوره الجميله
شكرا عمران للبوست الجميل.
ومعا من اجل كرامة كل الامهات
ففي امهات غيرنا نكرم امهاتنا.
|
Post: #96
Title: Re:
Author: Dr. Abdalla Siddig
Date: 06-23-2007, 06:51 AM
Parent: #95
يأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأه
|
Post: #99
Title: Re: د. عبد الله
Author: عمران حسن صالح
Date: 06-23-2007, 07:58 AM
Parent: #96
| Quote: يأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأه |
أنين !!!!!!!!!
أم
حنين ؟؟؟؟؟؟؟؟؟
|
Post: #111
Title: Re:
Author: إيمان صالح
Date: 06-23-2007, 11:43 AM
Parent: #96
يأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأه
وااااااااااااااااااااه
ايمان
|
Post: #98
Title: Re:
Author: عمران حسن صالح
Date: 06-23-2007, 07:53 AM
Parent: #95
Quote: ولاني اعرف معزة الام جيدا
لذا كتبت لكم عمن ضرب السفير السوداني بفلادلفيا
لان الحكومه اعتقلت امه التي كانت امرأه مثل هذه السيده
التي تبدو الطيبه في عينها و الكبرياء معا.
وتم تزين شعرها لها صلعه امعانا في المهانه لان ابنها
أدلى بشهادته عن ما حدث لهم بدرافور في الاعلام الامريكي.
ليآتي سفير منافق ويقول له انه كاذب وان درافور بخير....
وبكل وفائه لامه كان لابد ان يلقنه درسا.
|
العزيزة تراجي
أولاً أحترم خياراتك فيما تفعلين ..
ودائماً أجاهر بكرهي للساسة والسياسة
وعدم إيماني بأن في الأمر خير أياً من كان على رأس دولتنا ...
أما ردود أفعالنا فإن كان مرجعيتنا فيها الأخلاق
فالسن بالسن إلا من عفا
وإن كانت دينية
فالسن بالسن إلا من عفا
وإن وصل الأمر إلى حلاقة رأس أمي ...
فسأحلق رقبة من يفعل ذلك ...
ما نراه على وجه حبوبتنا صاحبة الصورة
هي تقاطيع أي أم هناك ..
في دارفور أو أروما
في مروي أو الديم
عانت ما عانت في التربية والحياة
واكتسى وجهها الحزن والرأفة والفرح والإبتسامة والحنان ... الخ
والموضوع أعمق وليست الصورة إلا عنوان له
فمن سمح لنفسه ولزبانيته أن يفعل ما يدخل الجوع والقلق والألم لأي أم
أولى به أن يذهب إلى الجحيم .
وكلهم فعلوا ذلك ... منذ تاريخ دولتنا
وبالتالي فلا احترام لهم لدينا ... سواءً كانوا يحملون لافتات دين أو دنيا
والأمر هنا لا يحتاج لتسجيل موقف كما تطلبين دائماً
فالشينة مرفوضة ....
وأردد معك سيدتي :
Quote: ومعا من اجل كرامة كل الامهات
ففي امهات غيرنا نكرم امهاتنا. |
|
Post: #100
Title: Re:
Author: Tragie Mustafa
Date: 06-23-2007, 08:06 AM
Parent: #98
التحيه لك اخي عمران
Quote: وإن وصل الأمر إلى حلاقة رأس أمي ...
فسأحلق رقبة من يفعل ذلك ... |
والله يا عمران حكى لي هذا الشاب ان امه عندما اخبرته بذا لم يقوى على النوم
لمدة تسعه ايام تخيل...وهو يبكي ويفكر اي هوان ادخل فيه امه؟؟؟
وبعدها هجر امه واخته مدينة الفاشر ليحيوا في المخيمات بالحدود التشاديه
لانها قالت له عيشة المخيمات اكرم لي مما رايته بزنازين الآمن.
Quote: ومعا من اجل كرامة كل الامهات
ففي امهات غيرنا نكرم امهاتنا. |
|
Post: #112
Title: Re:
Author: إيمان صالح
Date: 06-23-2007, 11:43 AM
Parent: #95
ومعا من اجل كرامة كل الامهات
ففي امهات غيرنا نكرم امهاتنا.
تراجي
ديل شاحدة ربي يعذبهم زي ما عذبوا الناس
وينفي من قلوبهم الامان زي ما نفوا الناس وطردوهم
الله ينتقم منهم
ديل قلوبهم من حجر ديل كان عندهم قلوب
الله يستر الحال ويرد غربتنا
ايمان
|
Post: #108
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-23-2007, 11:36 AM
Parent: #93
ابو حريرة
اها كان انت مرقت
بيمرق الحنين من قلبك؟
وحاة الله ديل محنتهن ومحبتهن مزروعة فينا من يوم السماية ومن قبل الفطام
ايمان
|
Post: #104
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-23-2007, 08:57 AM
Parent: #91
احب المرة دى واحب العلق صورتها هنا واحب الكتب البوست ده..
ووووووب علي
صديق الموج
انت جيت؟
من متين؟
وانا اقول البوست منور
وحاة النبي يادوب الحاجة بتكون انبسطت
وكت جاها زول من دفعتها ودورها
ايمان
|
Post: #133
Title: Re: صورة بروفايل إيمان صالح ....!!!!!!!!
Author: محمد الطيب حسن
Date: 06-24-2007, 03:51 PM
Parent: #91
فوووووق
عشان الريحه الحلوه الطالعه من البوست ده
والله ياجماعه انا للان بتزكر ريحه توب حبوبتي ربنا يرحمه
ربنا يخلي لينا امهاتنا ويديهن لينا طولة العمر
|
Post: #134
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-24-2007, 04:30 PM
Parent: #133
تسلم يا محمد الطيب
وربنا يرحمهم جميعا
وربنا يخلي العايشين منهم
امين يا رب العالمين
ايمان
|
Post: #97
Title: Re: صورة بروفايل إيمان صالح ....!!!!!!!!
Author: عمر الفاروق
Date: 06-23-2007, 07:47 AM
Parent: #1
غايتو يا الشوايقة حركاتكم " الأرعة " دي أصلو ما بتخلّوها ..
الواحد منكم يسافر يخلّي أمّو طفشطاشر سنة يضرب هوا المكيفات ورغد العيش وفي النهاية يكتب ليها :
ياااااااااا يمة رسلي لي عفوك ينجيني من جور الزمان
|
Post: #101
Title: Re: صورة بروفايل إيمان صالح ....!!!!!!!!
Author: عمران حسن صالح
Date: 06-23-2007, 08:43 AM
Parent: #97
Quote: غايتو يا الشوايقة حركاتكم " الأرعة " دي أصلو ما بتخلّوها ..
الواحد منكم يسافر يخلّي أمّو طفشطاشر سنة يضرب هوا المكيفات ورغد العيش وفي النهاية يكتب ليها :
ياااااااااا يمة رسلي لي عفوك ينجيني من جور الزمان
|
والله يا عمر حاولت أضحك معاك ...
واعتبرها مزحة ..
بس غلبني ...
وخايف تكون بس رديت على العنوان ..
|
Post: #103
Title: Re: صورة بروفايل إيمان صالح ....!!!!!!!!
Author: عمران حسن صالح
Date: 06-23-2007, 08:50 AM
Parent: #101
|
Post: #109
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-23-2007, 11:37 AM
Parent: #97
عمر الفاروق
رغم اني ما شايقية
لكن عليك النبي
هسه انت ده يعني
خلاص قاعد في السودان؟
ومتمسح ونايم في حضن امهاتك وخالاتك وحبوباتك؟
الله يجازي الكان السبب بس
ويجازي الغربة
ايمان
|
Post: #105
Title: Re: صورة بروفايل إيمان صالح ....!!!!!!!!
Author: Amir Omer
Date: 06-23-2007, 09:26 AM
Parent: #1
جينا نصبح على كل الجمال والوفاء ....
صباحاتك ندية يا أمي
صباحاتكم ندية يا عمران وإيمان ...
|
Post: #106
Title: Re: صورة بروفايل إيمان صالح ....!!!!!!!!
Author: Ahmed Yousif Abu Harira
Date: 06-23-2007, 11:03 AM
Parent: #105
صباح الخير/عمران
كلامي البهناك ده شايفو حيرك !!
مع اني قلت أمرق من البوست وقررت ما أرجع ليهو تاني لأنو بفتش الناس الكبار الزينا كدي ، لكنني لم استطع.
(الصورة) دي ياعمران (صورة أم كل واحد مننا) عشان كدي قدرتها على الجذب لا تقاوم وانتو زدتوها بالمداخلات (المشجونة) دي.
اللهم احفظ امهاتنا
وأدينا رضائهن دنيا وآخرى
|
Post: #107
Title: Re: Ahmed Yousif Abu Harira
Author: عمران حسن صالح
Date: 06-23-2007, 11:20 AM
Parent: #106
| Quote: (الصورة) دي ياعمران (صورة أم كل واحد مننا) عشان كدي قدرتها على الجذب لا تقاوم |
أستاذنا / أبو حريرة
ربما مشاعر الكلمات أحياناً لا توصف حقيقة المشاعر
ولكن صدقني أنا في أزمة عاطفية حقيقة قصاد ما مثلته لي هذه الصورة
هي ليست حيرة بل تضامن معاك في هروبك
خاصةً أنني تمنيت لو لم أفتح هذا البوست
للحالة النفسية المضطربة التي أمر بها ألان ..
ولما فعلته بكل هؤلاء الأحباب ...
ياخي صدقني
كمية المحبة التي نحملها لهؤلاء
هم نفسهم لن يطيقوها إن وصلناها كما هي ....!!!!!!
أكيد فاهمني ...!!!
|
Post: #110
Title: Re: Ahmed Yousif Abu Harira
Author: سوسن عبد الله
Date: 06-23-2007, 11:43 AM
Parent: #107
كلنا فاهمنك أخ عمران ...
عشان كدة حتلنا في البوست دة
ويا ريت البوست يفضل بعد الأرشفة
|
Post: #115
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-23-2007, 11:57 AM
Parent: #110
تسلمي يا سوسن
والله صحي
انا ناسية موضوع الارشفة ده
يلا يا عمران اتصرف
ايمان
|
Post: #114
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-23-2007, 11:55 AM
Parent: #107
هي ليست حيرة بل تضامن معاك في هروبك
خاصةً أنني تمنيت لو لم أفتح هذا البوست
خلاص كلمتك انا
قلت ليك تبيع البوست؟
ايمان
|
Post: #116
Title: Re: إيمان صالح
Author: عمران حسن صالح
Date: 06-23-2007, 12:21 PM
Parent: #114
Quote: خلاص كلمتك انا
قلت ليك تبيع البوست؟
|
خليني من أبيع البوست
حبوبتي دي كلمينا عنها شوية ..
ومني هدية (توب الكرب) .. في أقرب إجازة .... لا تسألي متى !!!!
بس أديني عنوانه وين !!!!!!!!
...
قومي أمشي شوفي بصلتك ديك حرقت
أبيعو في عينك !!!!!!!!
|
Post: #117
Title: Re: إيمان صالح
Author: إيمان صالح
Date: 06-23-2007, 01:06 PM
Parent: #116
وحاة النبي
بتصدقني؟
لما شفتك رافع البوست
قلت بيكون رد على كلام البيع
وكان لقيته سائلني من ادفع كم
بقول ليه برسل ليك توب الحاجة
خلعتني يا ود الناس
اها قلت لي اقرب اجازة متين؟
بصلة في عينك
انا في الجامعة
الاجازة من بعد بكرة
باكر اخر يوم
ربنا عفانا
ايمان
|
Post: #113
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-23-2007, 11:48 AM
Parent: #105
امير
صباحاتك اندى
تسلم
ايمان
|
Post: #119
Title: Re: صورة بروفايل إيمان صالح ....!!!!!!!!
Author: عمر الفاروق
Date: 06-23-2007, 05:37 PM
Parent: #1
الاخت ايمان صالح :
يا زولة مداخلتك دي انا ما فهمتها لكن للضمان كده وعشان كل قرد فينا يركب شجرتو انا كنت بداعب في عمران بحكم إنو شايقي وموضوعكم ده عن شنو لي شنو وفي شنو وبي كم انا ما فارزو ولا جايب خبروا وما قريت فيهو سطر ....
بالمناسبة والله الصورة حقت منو انا ما عارفها ..
تخريمة :
يا ابو محمد قول بسم الله وطول بالك الطريق قدامك طويل جهز جواباتك والعجلة والريالات عشان انا ماشي قريب كان ربنا هوون ..
|
Post: #120
Title: Re: عمر الفاروق
Author: عمران حسن صالح
Date: 06-23-2007, 06:52 PM
Parent: #119
ود الفاروق ..........
| Quote: يا ابو محمد قول بسم الله وطول بالك الطريق قدامك طويل جهز جواباتك والعجلة والريالات عشان انا ماشي قريب كان ربنا هوون .. |
ريالات في عينك ...
لو فيك فايدة أمشي ود نوباوي (ش الدومة ) جيب لي الود ده معاك ..
أمو خليها (تريِح) شوية ....
|
Post: #121
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-23-2007, 07:39 PM
Parent: #119
عمر الفاروق
الموضوع ما داير ليه فهم
الموضوع بسيط
انت قلت ما معناه الناس قاعدة ضاربة المكيفات
وتجي تكتب مشتاقة لأهلها
فانا سالتك
بحكم معرفتي انك في السعودية
سالتك اذا انت برضو ما بعيد من الاهل
واتمنيت الله يرد غربتنا جميعنا
بس
يلا اطلع شجرتك
ايمان
|
Post: #122
Title: Re: صورة بروفايل إيمان صالح ....!!!!!!!!
Author: عمران حسن صالح
Date: 06-23-2007, 09:39 PM
Parent: #121
يا يمه يا نور الصباح وكتين يطل
يا يمة
يا بدري البشع دائماً يكل
يا يمة يا فيض الحنان الما كمل
http://alnsri.com/vb/showthread.php?t=83
وأحسن تسمعوها في محلها
...
وفوق لآخر مرة قبل الأرشفة .........
|
Post: #123
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-24-2007, 06:22 AM
Parent: #122
عمران صباح الخير
انت يعني ما كلمت بكري يخلي البوست ده
انت مالك ما فوقك فايدة كدي؟
اها فووووووووووووووق كان كدي
ايمان
|
Post: #124
Title: Re: صورة بروفايل إيمان صالح ....!!!!!!!!
Author: نادر
Date: 06-24-2007, 06:26 AM
Parent: #1
Quote: عارف ياعمران ؟؟
التوب ده فيو ريحة حميمة شديد
الغريبة إنها مابتروح خالس
أنا معاي واحد ليهو سبعة سنين
لو تصدقني مازلتا أشم فيهو ريحتها الطيبة
الله إخلي أمهاتنا وحبوباتنا
ديل الغوالي |
سلام يا عمران وكل الرائعين المعاك هنا سلام... بوست ملهم وفنان وبشبهك.
|
Post: #125
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-24-2007, 07:33 AM
Parent: #124
الاخ نادر
نشكرك بحرارة
كان ما خليت ليكم عمران ده يديني البوست ده بدون بيع حتى ما اكون بت صالح
ايمان
|
Post: #126
Title: Re: صورة بروفايل إيمان صالح ....!!!!!!!!
Author: عمر الفاروق
Date: 06-24-2007, 08:12 AM
Parent: #1
ايمان صالح :
Quote: عمر الفاروق
الموضوع ما داير ليه فهم
الموضوع بسيط
انت قلت ما معناه الناس قاعدة ضاربة المكيفات
وتجي تكتب مشتاقة لأهلها |
أول شي انا ما قلت الناس انا حددت الشوايقة تحديداً لأنهم اكتر ناس مشهورين بي الكتابة عن الأم خصوصاً المتغربين منهم ..
وبما إنك قلتي ما شايقية فالكلام لا يخصك والتعليق لم يشملك ..
اعملي حسابك الموزة ما تزلقك ..
|
Post: #127
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-24-2007, 09:14 AM
Parent: #126
عمر الفاروق
انت عنصري
وعندك مشكلة مع الشوايقة
وانا حاشتكيك للادارة
ههههههههههه
يا ود الناس روق
وابتسم تبتسم الدنيا لك
الليلة نحن لاعبين ما توترني
خليني النقعد في المصلاية اليوم كله
ايمان
|
Post: #128
Title: Re: صورة بروفايل إيمان صالح ....!!!!!!!!
Author: عمر الفاروق
Date: 06-24-2007, 10:49 AM
Parent: #1
Quote: الليلة نحن لاعبين ما توترني
خليني النقعد في المصلاية اليوم كله |
يا زولة بعد ده قولي العايزة تقوليهو
الحبببببببببببة ما بتجيك ..
|
Post: #129
Title: Re: صورة بروفايل إيمان صالح ....!!!!!!!!
Author: Khalid Saeed
Date: 06-24-2007, 12:46 PM
Parent: #128
حبيبنا عمــــران والصورة
وأختنـــــا إيمان والبروفايل
نحنا السودانيين عيبنا إننا بنحاول نظهر أننا متجهمين .. ولكن تفضحنا مثل تلك الصور .. فتظهر مابنا من رقة وحنان .. كثيراً مانسمع كلمة يازول سيب الجرسة .. لكين الجرســة ضرورة من ضرورات الحياة .. خصوصاً في غربتنا ...
تعرفوا أنا لمن أمشي إجازة .. أصعب حاجة بواجهة لحظة الوداع وأنا راجع عشان كده مابكلم الناس أقول ليهم مسافر متين .. والبسألني بقول ليهو يومين تلاتة .. وقبل السفر بي يوم بجهز شنطتي والصباح بحلف مافي زول يمشي معاي .. بخرج وحدي .. في محاولة لكي لايتحول الوداع إلى مظاهرة وجدانية .. وتسيل فيها الدموع دون بمبـــــــــان ... ولكن دون جدوى .. فالدموع لابد منهــــــــــا .. والعـــــودة لابـد منها طالما السودان ينحدر بقوة.
التحية لكل الأمهات الصابرات ..
التحية لكل الأمات في المناطق المنكوبة .. وأخص أماتنا بدارفور ...
العار والخزي لكل من يتعدى على أم ولايراعــى لضعفهــا وكبر سنها ...
فقد قال صلى الله عليه وسلم ( ليس منا من لم يرحم صغيرنا ويوقر كبيرنا ) ....
عمران ياصديقي .. دم بخير ،
خالد الأرباب
_________
حبيبنا عمر الفاروق المداخل معاها دي إيمان محمد صالح.. ماشروق أبو الناس .. :D
|
Post: #138
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-25-2007, 05:15 AM
Parent: #129
حبيبنا عمر الفاروق المداخل معاها دي إيمان محمد صالح.. ماشروق أبو الناس
وووووب علي
محمد صالح منو يا خالد سعيد ؟
|
Post: #130
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-24-2007, 03:01 PM
Parent: #128
يا زولة بعد ده قولي العايزة تقوليهو
الحبببببببببببة ما بتجيك ..
احب الهلال ذاته
هسه عليكم الله ده براه ما درس هلالي؟
ايمان
|
Post: #131
Title: Re: صورة بروفايل إيمان صالح ....!!!!!!!!
Author: Amir Omer
Date: 06-24-2007, 03:05 PM
Parent: #130
إيمان إنتي لسة ما سافرتي؟؟
والله بختك عدييييييييييييل كدا
|
Post: #132
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-24-2007, 03:38 PM
Parent: #131
امير
خلصنا شغل الليلة
لكن حجوزات ما في ليوم 11 شهر 7
هسه دايرة اشوف لي حمار من الحمير الكتيرين الفي البلد دي
ايمان
|
Post: #135
Title: Re: صورة بروفايل إيمان صالح ....!!!!!!!!
Author: شادية الطيب
Date: 06-24-2007, 06:58 PM
Parent: #1
ايمان انا بصراحةغرت من الصورة الجميلة دي وقمت نزلت صورة ابوي في البروفايل بتاعي - يعني الآباء الجميلين برضو بنحييهم عبر بوستك الرائع ده
|
Post: #136
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-24-2007, 07:39 PM
Parent: #135
شادية
كيفنك؟
الله يخليه ليك ان شاء الله
وهاك الوجوه الطيبة دي
ايمان
|
Post: #137
Title: Re: صورة بروفايل إيمان صالح ....!!!!!!!!
Author: عمران حسن صالح
Date: 06-24-2007, 09:11 PM
Parent: #135
Quote: ايمان انا بصراحةغرت من الصورة الجميلة دي وقمت نزلت صورة ابوي في البروفايل بتاعي
يعني الآباء الجميلين برضو بنحييهم عبر بوستك الرائع ده |
.
شادية ...
ظااااااااااااااااااهرة كدة شغل جندر وبس !!!!!!!!!
أنا بعت البوست ده يا إيمان وما حاسي ...؟؟؟؟
ما عندي نفس لأية شي كفاية (بشتنة) الحكام الأفارقة دي كمان جاية شادية تزيده بله ....!!!
|
Post: #139
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-25-2007, 05:23 AM
Parent: #137
أنا بعت البوست ده يا إيمان وما حاسي ...؟؟؟؟
اجي يا ولدي
ما حاسي كيفن عاد؟
انت ما قبضت
عمران ياخوي قدم النية البيضاء
عارف انا قريت كلام شادية ده كيفن؟
شادية كتبت
ايمان انا بصراحةغرت من الصورة الجميلة دي وقمت نزلت صورة ابوي في البروفايل بتاعي - يعني الآباء الجميلين برضو بنحييهم عبر بوستك الرائع ده
اها انا قريت كلامها القبل العلامة دي (-) موجه لي انا
ايمان انا بصراحة غرت من الصورة الجميلة دي وقمت نزلت صورة ابوي في البروفايل بتاعي
والبعدالعلامة دي (-) موجه ليك انت
يعني الآباء الجميلين برضو بنحييهم عبر بوستك الرائع ده (يا عمران)
الحكام اريتهم بالفي خلفتهم
ولسه الدورة في اولها
ما تقلق
انا متفائلة
ايمان
|
Post: #140
Title: Re: صورة بروفايل إيمان صالح ....!!!!!!!!
Author: شادية الطيب
Date: 06-25-2007, 05:42 AM
Parent: #139
عمران انا والله ما قصدي شيء بس البوست كله ايمان ايمان ايمان اها قايلاه بوست ايمان
يا زول ما تزعل ولك العتبى حتى ترضى
بس بيني وبينك مش صحي انت بعته لإيمان ؟؟
|
Post: #141
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-25-2007, 09:51 AM
Parent: #140
عاد يا شادية
انا اصلح وانتي تسوطي
بري منك
ايمان
|
Post: #142
Title: Re: صورة بروفايل إيمان صالح ....!!!!!!!!
Author: عمران حسن صالح
Date: 06-25-2007, 11:12 AM
Parent: #1
إنت يا إيمان الحنان ده مواصل ؟؟؟
يعني ما إتأرشف ؟؟؟؟؟؟
|
Post: #143
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-25-2007, 11:19 AM
Parent: #142
إنت يا إيمان الحنان ده مواصل ؟؟؟
يعني ما إتأرشف ؟؟؟؟؟؟
يتارشف كيفن؟
ما لقيتك خنت القضية
فبقيت لي بكري في حلقه
وكتبت ليه طلب قدر الليلة وبكرة
وما خذلني
ان شاء الله ما يخذله
تعال شوف النسوان ديل
نسوان خرمانات ومزاجهن عالي وسجارتهن قصبة
ايمان
|
Post: #144
Title: Re: صورة بروفايل إيمان صالح ....!!!!!!!!
Author: عمران حسن صالح
Date: 06-26-2007, 08:11 PM
Parent: #143
فوق عشان الناس الحُنان ...........
|
Post: #145
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-27-2007, 07:00 AM
Parent: #144
فوق عشان الناس الحُنان ...........
الناس الحنان السفرتهم حي العمدة وقعدت تقول خلوهم يريحوا شوية
اصبر لي انت عاد
ايمان
|
Post: #146
Title: Re: صورة بروفايل إيمان صالح ....!!!!!!!!
Author: طارق الأمين
Date: 06-27-2007, 07:28 AM
Parent: #145
معليش جيت متاخر
كت قعد ابكي ليكم جوه
اها
اسي شنو؟؟
امات بكره كيفنهن؟؟
حبوبات سنه الفين وخمسين
كيف؟؟
العارف يقول
انا ماعارف
مودتي
طارق صالح
|
Post: #147
Title: Re: صورة بروفايل إيمان صالح ....!!!!!!!!
Author: إيمان صالح
Date: 06-27-2007, 09:12 AM
Parent: #146
كيفنك يا طارق
عاد انت كان ما عارف
العارف منو؟
وماشي لسنة الفين وخمسين مالك؟
انت ما شفت حبوبات اليومين ديل؟
ايمان
|
|