الاحلام مسموح بها....دعوه للجميع

الاحلام احلام اليقظه تلك الاحلام التى تتقافز الى مخيلتنا عندما نضع راسنا
المثقل من عناء يوم عنيد , على وسادة مريحه وضوء خافت يتغلغل ويسرى ناعما
الى اقاصي الوجدان نغمض اعينا لبرهة ثم نحلم .... نعم نحلم فالاحلام مسموح بها
والاحلام هو الشئ الوحيد الذى لايستطيع احد ان يصادرها
دعونا نحلم عندما يكون الحلم جميلا يستحيل عبوثك الى ابتسامة ساحره
ربما تغسل منا همومنا ولو لثواني فنستدعي جزء من قوتنا
ربما تستفزنا احلامنا الجميله الى المضي لبناء واقع مشابه
اذا لنحلم احلموا لا تخافوا الاحلام ملك لنا هى في دواخلنا
ولكن :احذروا ان يرونكم وانتم تبتسون فلابتسام يعني السعاده والسعاده تعنى انك شارب وماكل وقادر تتعالج وقادر تتعلم اوه ده كلام بجيب الهوا وجع الراس تاني
لنعود الى الاحلام الحلم الاول
احلم الكبير لامرض لا الام لاجوع لا دموع ولا احزان لاحرب ولا دمار ولا شتات لاحقد ولا بقضاء لا تمييز لاولا احلموا معي هل يمكن ان تحق هذه الاحلام

!!!هل في استطاعتنا ان نحق احلامنا???????????

Quote: !!!هل في استطاعتنا ان نحق احلامنا???????????

لا ..
يحلم فقط من يملك و مقوماته أدوات الحلم ..
( مدخلاته ) .. خلينا نسميها .

إن كان ذلك كذلك , فليس من سوداني على وجه هذه البسيطة يستطيع إلى الحلم سبيلا ..
الكوابيس فقط هي ما يمكن لعقلنا الباطن ان يلوك و يجتر .
ثم .. حتى الكوابيس تحتاج إلى " التخمة " !!!
نحمد الله أننا متخمين بالهم و الجوع و المرض و الجهل ..
لذلك .. ما بطال " نكوبس " ..
و برضو ما بمزاجنا بنكوبس .

بنكوبس بمزاج السلطان .
و السلطان عايز عروس
و العرس عايزه المنديل
و المنديل عند الجهال
و الجهال عايزين لبن
و اللبن تحت البقر
و البقر عايز حشيش
و الحشيش تحت الجبل
و الجبل عايز مطر
ياااا ربي تصب المطر ..

يا ربي تصب .

قولي آمين .

اخ عماد شكرا على مداخلتك الثره

ولي هناك بعض الاسئله

لماذا خلق الله الارض ??هل للدمار

لماذا خلق الله الانسان ??هل ليموت ويتعذب

ربما قادتااجابة هذه الاسئله لنعود ونحلم

????? نستسلم ????

Quote: ولكن :احذروا ان يرونكم وانتم تبتسون فلابتسام يعني السعاده والسعاده تعنى انك شارب وماكل وقادر تتعالج وقادر تتعلم اوه ده كلام بجيب الهوا وجع الراس تاني

إن كانت قد انعدمت في اليقظـة..
أليـس من حقهم الإبتسام حتى في المنـام؟؟

[ إن كانت قد انعدمت في اليقظـة..
أليـس من حقهم الإبتسام حتى في المنـام؟؟]




العزيز Alsa7afa لانو احلامنا في انوم كوابيس وخزاز

ربما تصحوا موجوعا مهموما وانت تتمنم في السري ياربي اجعلوا خير وزين

اما احلامنا في اليقظه نحلم بما ينقصنا وانا واحده من الناس حلمي الثاني

عبرت عنه هذه الاغنيه الرائعه مشكور عليها شديد ليل الغربه هدانا هد

لقد هزمتني هذه الاغنيه هزمت صيري

لك كل الود

تحياتى ..سمية ولحضورك الكريم
اطلالة من باب هضاريب مفرحة..
الحلم حالة مرتبطة بقابلية الفرح الجوانى الحاضر او القادم..
والفرح الجوانى ارهاص سعد وعلامة لمقومات سعادة..
والسعادة بذرتها الاستعداد لحب الحياة....
وحب الحياة ارادة تتنمى ب بيئة مناسبة...معرفة مناسبة..
لا اريد ان اعقد المعادلة ...الملخص ...
ارادة حب الحياة هى المفتاح......
ومن يكافح فى الحياة بحب ..ينجح اكثر ممن يكافح بيأس ومغاضبة
ومن يحب الحياة امتلك مفتاح سعادته...
..
ومن كان حلمه سببا فى تعاسته فذلك حلم بغير شروط حب الحياة....
تعديل لتكرار غير لازم

.

الاخ الفحل

مليون سلام وتحيه ..

اتفق معك ولابد لنا جميعا ان نحب الحياة فالعمر مرة واحده

ادري تماما ان السودن يتشظى ولاول مره ف تاريخ السودن نعيش ازمه كهذه

ا لتي نعيشها الان مرت بالبلاد دكتاتوريات كثيره لكن حصادهالم يكن بمثل هذه الفظاعه

فنحن نعيش في دوار رهيب اخل بتوازننا فمن حرب الى حرب من جوع الى دمار تفجيرات مرض

جوع تشرد بيوت اشبا ح سجون عذاب عذاب عذاب لا بد لنا ان نستعيد توازننا حت نحدد لاى

اتجاه نحن نريد المسير فلابد لنا من هذه الغفوه او ان نغمض اعيننا ولو لثوانى لنواجه

هذاالتيار العنيف حتى لا يجرفنا

بها أحلم..
ولا أدري بمن تحلم
احفها بإهتماماتي
فلا تأبه ولا تهتم
تضي ببسمة كوني..
فمن في كونها يبسم؟؟
ومن في خيالها يسرح؟
ومن في قلبها يرسم؟
فتاتي بسرها تحيا..
تداري قلبها المبهم
وتدري انها أملي
ولا أملا لهاأعلم.

ده حلم من زمااااان ايام الثانوي الخوالي ..ترى ماذا فعل بها الزمن الان ؟؟؟

محمد حسن /مونتري

ده حلم عنيد

وشديد

من ايام الثانوى??? ياه !!!!



[ ولا أدري بمن تحلم ]ربك اعلم


لك التحيه والشكر

العزيزة سمية /

أيااام الثانوي دي يمكن تكون قبل أيام او شهور على قولك ( من يعلم )

ولكي شلالات مودة وليتواصل الحلم بلا انقطاع

محمد حسن

حب الحياة...ايضا ان لا تسمح لاى قوة مهما كانت ان تنتزع او تشوه حقك تحلم او ان تحب الحياة .
ينطبق ذلك تماما على المواقف السياسية وقضايا الوطن كما ينطبق على على الحياة الشخصية..
وما بين الاثنين صلة لا تقبل الانفصام..

وما الوطن الا سلسلة مترابطة من الانتماء الشخصى للام ولللاب وللاسرة والاصدقاء وتمددات هذه العلاقة
وهنا لا مجال حتى لتصنيف قضية الوطن بانها خارج الشخصى...

تحياتى

احلم بضمان اجتماعي لكل اطفال السودان
لا يتوقف علاجهم وتعليمهم على قدرات اهاليهم..
حيث يتحول العلم الى تجارة والعلاج الى تجارة..

ما ذنب الطفل لو كان ولد في اسرة فقيرة..
فلا يجد التعليم والعلاج
خاصة ان الفقر هذا مصطنع..وان الاموال مكدسة في ايادي
معينة لا تخاف الله...حولت الدين الى تجارة...

احلم ان استطيع تجميع توقيعات كافية لادخال ديباجة في البرلمان
لمناقشة الضمان الاجتماعي للاطفال..

وشكرا ليك على الحلم المجاني..

احلم بضمان اجتماعي لكل اطفال السودان
لا يتوقف علاجهم وتعليمهم على قدرات اهاليهم..
حيث يتحول العلم الى تجارة والعلاج الى تجارة..

ما ذنب الطفل لو كان ولد في اسرة فقيرة..
فلا يجد التعليم والعلاج
خاصة ان الفقر هذا مصطنع..وان الاموال مكدسة في ايادي
معينة لا تخاف الله...حولت الدين الى تجارة...

احلم ان استطيع تجميع توقيعات كافية لادخال ديباجة في البرلمان
لمناقشة الضمان الاجتماعي للاطفال..

وشكرا ليك على الحلم المجاني..
د; بيان سلامات وازيك تجمعنا مؤسسه واحد ه مع اختلاف الزمن فانا تخرجت من قسم الاخراج كلية الموسيقى واادراما

ودعونا نحلم جميعا بسودان معافى من الامراض
وبضمان اجتماعي يغطي كل المحتاجين
بسكن مريح ونضيف
وتعليم مجانى
وتتحل قضية الاطفال اامشردين
ونحلم ونحلم...............................................................................

ما بنخلبهم يشوهونا وما بنتنازل


عن حفنا ابدا

والسياسه يا اخى تدخل حتى في حلة ا لملاح

لو شهور وايام ابقى في امل

وكلنا نحلم معك تحياتي

معاك بحلم
كأني علي فرس طاير
أغني علي وتر مشدود
واطير عبر السما الممدود
سما الوطن اللي مالو حدود
حمامة جناها لا خايف
ولا مفقود


وافر الغيمة خيمة علي النجم وارتاح
أصادف أجمل الغابات
واصادق غصنك الفواح
واشرد من زوايا القلب جنبك آخر الأشباح
وتفتح كلمة من عينيك لي
مجري الغنا المسدود



واخت اسمك علي باب الزمان أكليل
وردة صبية تلمع فوق صدير النيل
وباسمك أغني لي عالم بسيط وجميل

وانادي عليك
ملاذا في شتا الأيام
وبردا في الحياة وسلام
وفي شدة هجير وزحام
جزيرة حنينة
بين نهرين حنان ألقاك عليك اتلم
وهودج في صحاري الهم
وعالي نخيل
عليك اتلم

وفي السكة اللي ما بتعود
معاك لآخر المشوار
أغني علي وتر مشدود


أحلام عمر الدوش
برؤية وردية( محمد وردي)

تحلموا ساكت
وحال الواقع
ضد أحلامكم..

برغم ان محتوى
الاحلام الواردة
في هذا البوست
من ابجد الضروريات
واسهلها تحقيقا
في وطن زي
السودان خيراتو كنوز
معقول???

انا بحلم بي بيئة خالية
من التلوث.

Quote: فانا تخرجت من قسم الاخراج كلية الموسيقى واادراما

يا مرحب بيك الا جيال الجديدة المشرقة..

يشرفني جدا ان ننتمي لذات المؤسسة...

وخلينا نحلم بيوم اجمل لبلادنا...
التى تحتاج لاديبوس معاصر بدون همارشيا
ليخلصها من الهولة والطاعون..

محبة عميقة

شكرا ليك د; bayan

ويشرفنى ايضا

ونتمنى ان ينتهى هذا الليل الطويل

ونعود جميعا لوطن حدادى مدادى

وطن ديمقراطى

عبد المنعم ابراهيم الحاج

ما هو عشان الحلم ساكت في زمن الجيب فيه فاض

وبعدين ما في بيئه اوسخ من الرصاص المالي البلد

نتمنى انو يزول وللابد

والتمنى برضو حلم

ونرجع نحلم

ومشكور كثير على المرور

تحياتى

وكم نحلم نعود ومن التعب ننجم

نخت الايد فوق الايد وما بنندم

نجمل سور ونكسر قيد ونرفع زول ونترنم

نغنى غنى البلد اشجان نشيل الاهه يله بعيد وما في مساحه للاحزان

وخطوه وخطوه خطوه وخطوه نهزم عسكر السلطان

بس بحبة صبر وشوية ايمان

ليك التحيه الاخ ALGARADABI


والمرحوم عمر الدوش هو استاذى فى كلية الموسيقى والدراما

شاعر قامه في وطن قامه وظل نظام قصير القامه

رحمه الله

الحلم شئ جميل ، لكين ما بالضرورة يكون على وساده وثيرة ونور خافت ، لأنو النور عندنا يا ميتين وعشرين فولت بق يا ما في باببح ، الأحلام زاتها خشم بيوت ، في منها القابل للتحقق وده حاجة لا تذكر وفي النوع الآخر الغير قابل للتحقق وهو كل أحلامنا وآملانا وواقعنا ، أها الحلم ما بالضرورة يجيك وإنت راقد ، يعني ممكن تكون ماشي وهايم على وشك تفكر والتفكير جزء أساسي من الحلم أى حلم في موضوع معين وما أكثر مواضيعنا التي نفكر فيها بدء من دفتر الجرورة في الدكان ، أها وفي أثناء سرحانك أو سرحاني لا مشكلة تنفرج بي جمبه عشان تنمكش بالجمبه التانيه ويتواصل الحلم وطرااخ أدقش ليك حافله واقفه في أمان الله ، أو حتى كشك ليمون أو عمود كهرباء أو جمم بلوغ تقع في بلاعه وتقوم تتنفض وتتحوقل وتتعوذ وتستعدل وتجري ساكي الحافلة.
الأحلام لا يمكن أن تتصادر لكين يمكن أن تتخنق لمن تتشحط عروقها
والأحلام ألوان وأشكال في النوع الوردي والضبابي والمظلل ، والأحلام بينها وبين الكسل والتواكل شعرة صغيرة يعني إنت بتكون عاوز وعايز وداير وقاعد ما شلت خطوة واحده أها أحلامك دي تتحقق كيف ، وفي أحلام صعبة شديد بل مستحيل تحقيقيها ودي حتى لو جاتنا حقو نطردها بي أى حاجة نهشها مثلا بي جرية زيها وزي الضبانه نتغتي منها بي ملاية زي ما بنعمل مع الباعوضه بس المشكلة تقوم تجر الملايا منننا أو تقعد حارسنا لغاية ما نرفع الغطاء تقول لينا هرشك لحم كرشك قايلني مشيت.

سمية سلامات وشتاقين يااااااااخي أو يا أخت

أنا غايتو ما لي في قصة الأحلام دي، لإنو الواقع بفرض رقبتو شديد علي وبياكلني أكل، عموما الخشة دي ذاتها ما خشة حلم معاي، ده مقام ترحيب وسلام كتير واشواق أكتر. ربما أكون متأخر في الترحيب، لكن دي براها قصة تانية، عارفا كان داخل علي شبه حليفة كده من سودانيز آونلاين، لكن الضرورات شكلها بتبيح المحظورات...باين.

يا ستي ألف مرحب بيك هنا، وتزودي فإن خير الزاد في هذا المكان الجوع. لكن المتأكد منو إنتي إضافة لكل ما يكون في مرمى إهتمامك. أها سامية شكلها برضو ح تفك الحظر وتخش بي هنا لإن أديتا الخبر وقعدت تصرخ في التلفون.. دحين أرجي الراجيك. سلام منعم وكل من شارك سمية أحلامها. سلام من هنا لاعن عندك

SPLA OYEE ده عنوان الصورة العلي يمينك دي.

مرتضى جعفر

مرتضى جعفر الخليفه

اخيرا

انا حققت جزء من احلامى ان التقيك هنا

وانت حقت ولاعلى كيفك جزء من احلامك ان يكون بيننا هذا التواصل

كم انا سعيده الان وتكتمل سعادتى بوجود الجميله ساميه

ولحدى ما ربنا يحقق الحلم الكبير ويجمعنا من تانى ....

والله ما بتتمنى تلاقينا ???? ها ها ها

انا متاكده من الاجابه

كل الحب

الاخ العزيز almulaomar


الاهل بقولوا هما يبكي وهما يضحك

كثير مرت بينا مواقف ذي دى تكون ماشى في الشارع

وانت بتحسب وان ما دقشك عمود بتنتبه لانوا في زول

بعاين ليك وفي وشو علامات استفهام كثيره

لانو بكون شافك وانت بتتكلم براك وعموما

لو اصرينا على الشئ بيتعمل الياس مصير النفسو قصير

وما بالضروره ذي ما قلت نحلم ونحن راقدين وفي وساده وثيره

ولكن فقط استدعاء للخيال

وفعلا الاحلام بينها وبين الكسل شعره

وده بذكرني المثل السوداني البقول[ حشاش بي دقنو ]

اها ذي ده نحن ما عايزينو يكفينا ما بنا من احباط

وعايزين كل ما هو محفز للمشي لي قدام

ولي قدام

بت قسم
يازوله ياراقيه
اها الاحلام دي كيفنها
وكان عندك حلم اجمل قولي
مودتي للجميع

احمد العربي سلامات والله الاحلام حققتها لينا انت ده.. تعرف
دي عشرة سنوات ما شفت فيها الزول العجز الفي الصورة والله
يا مرتضى لكن زمن... تتخيل انا قلت دا منو ال مع طالع..لكن
بكون شالع..

شفتي الحلم لمن يتواصل
تتجاوزوا الثريا
ونقاء الهواء
اها بدون رقرقة عيون
شفتي تواصل الاحلام
ده.........
العزيزعبد المنعم
تحياتي
لكن هو ذلك العملاق
في ثبات يزمجر
وهاهي وردته وكمال السماء
وبينهم برزخ يذيدهم حيوية ونقاء

العربي

هي الأحلام التي يسرقها ليل الكوابيس
الملونة من ضفر ميكانيكي متربي ..
خدش الافق في محل تغرب الشمس..
فشخصت عيوننا في الغربة..وموسيقى
الوطن ساكنه في الأوتار..
من يصحي نبضها ليكون اللحن الجميل
الاخير ..وهذه الغارقة في ليمون
الروح " سامية" احبها احبها
لاشعل غيرة ذاك العملاق..
لك التحية وشكرا جميلا وكتر من
من انغام البورتريهات
فقد اسعدتنا.

احمد العربي سلامات والله الاحلام حققتها لينا انت ده.. تعرف
دي عشرة سنوات ما شفت فيها الزول العجز الفي الصورة والله
يا مرتضى لكن زمن... تتخيل انا قلت دا منو ال مع طالع..لكن
بكون شالع






احمد العربى

والله كلام عبد المنعم الفوق ده غيره ساى منو

عشان ما لاقي الوجاهه

دى وشعرو بقى ابيض وحالوا اتبشتن

يا سلام يا عربى مرتضى ده لى منو سنين كثيره

وانا سعيده لانو احلامى دى جابت لى ناس انا احبهم واشتاقهم

وعرفتنى برضو بى ناس ايضا احبهم مهما اختلفنا هم اضافه

وشوف طالع ده مش بالدنيا ... نواصل الاحلام

ولى فدام

وكمان يا احمد البورتريه ده غالى عندى


وزى ما قال منعم كثرلينا منها

بت قسم العزيزة تحياتى
كتر خيرك انك لفتى نظرى للبوست ده وانا لا اروض البورد الا لماما وخطفا منذ اسبوع
وانا عندى حلمه طايرة لى فى راسى من زمان..والحمد لله لقيت متنفس
سبقنى صديقى الوغد عماد عبد الله وقال :انى لنا ان نحلم
نحن اسم سودانى وقد صدق الرجل فيما قال..
انا من زمن بحلم نرجع اهلنا بعد هذه الغربه التى طالت
واستطالت وتمددت فى امعاءنا الدقيقة والغليظه
فنحن عشرة اخوان اولاد وبنات من صلب رجل واحد
وام واحده رحم الله والدى وامد الله فى عمر الحاجه ومنذ
ثلاثون عاما لم نلتقى فى المنزل سويا
امى ادعوا لها بطول العمر قالت لى يا ولدى بقينا زى الطير
نلد وتفروا..ما اصدقها وما اغبانى
صحيح امى لا تعرف عن الحيكومات الجائرة كثيرا
وكل ما يعنيها فى علم الاقتصاد ومدخلات الانتاج وفائض
القيمه وما يتشدق به وزراء ماليتنا..هو القفه
وكيف ان الماهية تقضى الى اخر الشهر ،فيما عدا ذلك فكل
حديث عن مزقنا فاتورة شنو،وحققنا معدلات انتاج شنو لايهمها.
احلم ان نعود الى بيتنا كما كنا نتشاكل فى منو البغرف البلاعة
ومنو البدخل المراتب فى حوش كبير مبهول فيه همبريب
بكميات تجاريه وهنالك قله صغيرة غطاءها صحن.. وبها
ماء كم احن اليه يا سميه..(على فكرة اختى التى تصغرنى مباشرة اسمها سميه)
وهى من تبقى فى البيت من البنات اما الاخريات فطارن مع ازواجهن.
احلم بتلك الصبية التى تحيك كوابيسى كل ليله
واحلالى بيها تلك التى تسكن الاصقاع هناك
وتسكن منى العصب ،كم اودها اجلها واشتاق كثيرا
لصوتها ،وغضبها وحلمها...
تلك حلمة اخرى..فكلنا رواد احلام ......
نحلم ببناتنا عرائس يرفلن فى ثياب بيض
وبابناءنا فى المراتب العلا وكما ذكرتى صديقتى فالاحلام
حقوق مشروعة..وهى ما تبقى لنا
اتمنى لك ولهم احلام سعيده والحقى البوست ده مايروح فى حلمة
مع الارشفة...دمتى حالمه،،،،

الاخ صديق الموج

اولا شكرا لانك قبلت العيزومه

وثانيا ما انت براك.. نحن برضو كل زول في بلد

وامي مشلهته معانا بشكل ما عادى ناس في مسقط ناس فى امريكا

ناس فى القاهره ناس فى السودان ويعنى من ما جات حكومة السجم دى

ذى ا للغم السودان كلو اتفتت حته حته وكل زول وقع فى بلد

والحرقو والغرقو والاتشوهت ملامحهم واللقو روحهم في العراء لابيت ولا ذاد

وحريق في كل مكان وغايتو الله يعينك يا السودان

المفروض بقدر ما بنكره الغربه بقدر ما نعمل لاسقاط هذا النظام الفاسد

نحن شعب فعلا صبور 18 سنه جربو فينا كل انواع الدمار ولسه ولسه في نفس نهجها

دى حكومه بطاله

حكومه ما بنصلح حالها

لابد من نقاو يها ونقلعها من ارضنا

وكل هدف هو حلم لابد من نصلو

انا بحلم بوطن شامخ معافا

فيهو إحتياجات كل الغلابا

فيهو صحة فيهو تعليم فيهو ساحات للثقافة

فيهو نرتاح من تعبنا ومن غربة طالت وعزبتنا

بحلم انا بوطن موحد لا فوارق لا قرابا


شكراً كتير يا سمية ومعليش كلمات مرتجلة خرجت دون إذن مني .

عربيسك يااااااااااااااخ، يا أخانا الذي في شاطئ الراحة

قادر تتخيل طولنا منك كيف، عارف الصورة دي وأخواتها أخدناها لمان كنا ماشين أنا وإنتا وسامية وطالع ونزار عواض لحضور عرس في الحارثي كومبليكس، هسة العرسان بقوا تلاتة، ربنا يزيدم ويحفظم، بعدين لمان جيتو إنت وخنساء الكارب إختطفتوا أمي ووديتوها الشارقة، ياااااااااااه لـ"مصيفك ذاك الذي في الشارقة" وباركودا ورأس الخيمة ومحمد الوسيلة يقول العربية دي ماشة بالراحة وإنتا السايقا حبا في الغلات ساكت وخالد كسلا وتلك الايام وتلك الرائحة من الأسمالك المشوية. ياخ إنت بتجي متين تاني؟

هي يا منعم أنكلمك ضحى "الحقوق لحسن موسى نقلا عن إبراهيم الجريفاوي"

ياهن عشرة سنين وإنصرمن، وأنا كبرت جد لمان الناس يلاقوني مع طه يقولوا ليهو ده أخوك الأكبر منك، طه يقوم يقول ليهم ايوة..شوف الزمن ده، عندي مرايا قدر ما أتقلب على صفحة ألقاها قدامي والسؤال طوالي في لساني Is it me أها الشيب لا بصبغ ولا بصبغ بحلق صلعة موضة كده، ياخ الزمن علمنا ياما.. لكن اصلو ما شال الإبتسامة، وعلي قول قولك المع طالع أكيييييييييد بيكون شالع.

سمسم دي محجوزة، عشان كده أنقول ليك يا سمية.. بالصح زمن بالجد بالجد، هن عشرة سنين ساي، ديل عشرة سنين سجن وغرامة كمان، بس البركة في البوست ده الخلانا نتونس لمن ناقصانا السخينة، وهسة السخينة أمانا بقت سخاين.

بالنسبة لحلمي جسدو أخونا محمود درويش-نفعنا الله بعلمه آمين- في مقال، مقال موش قصيدة، بعنوان يوميات في الحياة اللندنية بتأريخ 16 يونيو 2007، أبحتوا أقروهو، منشور هنا بواسطة الصديق باقر موسى.

سلام تعظيم يا شباب، وبنجيكم صادين، إن بقى فينا نفس "بفتح النون والفاء"

مرتضى جعفر (عارف الناس ديل سموني شنو: مرتظى جعفر، وفي ناس بيقولوا لي مرتزا جعفر" أتقول ما إسمي أنا، القصة يا مان كبيييرة وعربي ده ناقشا).

مرتضى جعفر

يا مرتزا جعفر

منتظرنك بس المره الجايه جيب السمسم معاك

لو نشيل مشرط دكاتره

نستاصل الجبهه وكلابها

يصبح وطنا كثير معافى

وينصلح حال الغلابه

ترجع لوطن ابتسامتو وتفتح الحريه بابها

وبكره ياما نحت نسرح فىرحابها

لك التحيه اخى هاشم خلف الله

ولابد من حلمنا نخليه هدف قدامنا


وكل من اجل سودان ديمقراطى وموحد

الحلم الثاني

ويخص هذاالمنبر

رغم اختلافاتنا

العقائديه

والسياسيه

والقبليه

هناك ارضية تجمعنا جميعا

وهى الارض السودان

اتمنى واحلم ان كل فرد منا

ان يعشق هذا الشاسع

وان يعمل

اولا لمصلحته

واخيرا لمصلحته

عندها سنجد انفسنا غصبا عنا نحب بعضنا بعضا

سلامات استاذة سمية

بوست هادف واكتر من جميل والاجمل فيه المشاركة من قبل الاعضاء الاخرين ..

وللصدف لى بوست يلخص بعض آحلامى قمت بانزاله من فترة قبل التحاقك بالمنتدى ..

أشارك به هنا معكم ..مودتى واعجابى تسلمى ..

جوايا أكتر من حلم ..

هذه آحلامى ..

جواي اكتر من حلم

الاحلام

العزيزة بت قسم


ترى أي أحلامٍ تنتظره؟؟؟