Post: #1
Title: يسكانها الاغنياء فى امريكيا و الفقراء فى السودان و يعيروهم بالسكن فيها .....صور؟؟؟؟؟؟؟؟؟؟؟؟؟؟
Author: بكرى ابوبكر
Date: 10-26-2006, 08:12 PM
Parent: #0
الاخوات و الاخوة
عيد سعيد و كل عام و انتم بخير
تعتبر اريزونا من اشد الولايات الامريكية سخونة اذ تصل درجة الحرارة فيها فى الصيف مرات الى 120 درجة...اى جوها اسخن من السودان شوية .....و فيها كتاحة و هبوب كمان....
هل تعلم اخى/تى ان بيوت الطين و الجالوص -Adobe home يسكنها فى اريزونا الاغنياء لتكلفتها العالية و قلة المهندسين المهرة لبناءها.....اتمنى ان يقوم المهندسين السودانيين بتطوير هذا النوع من البيوت حتى يحلوا واحدة من اكثر مشاكل المغتربين السودانيين فى المهجر و على ما اظن انها سوف تكون اقل تكلفة و لوجود العمالة المهرة ..
بيت جالوص مشيد بصورة هندسية جميلة
|
Post: #4
Title: Re: يسكانها الاغنياء فى امريكيا و الفقراء فى السودان و يعيروهم بالسكن فيها .....صور؟؟؟؟؟؟؟؟؟؟
Author: عصام أحمد
Date: 10-26-2006, 08:22 PM
Parent: #2
الغالي بكري..كل سنة وإنت والأسرة الكريمة بألف خير..
والله دي معلومة قيمة جدا..وبالصورة كمان..!
أعجبني جدا المنزل في الصورة الأولي..عبارة عن لوحة فنية
من طراز راقي ..ولو مهندسينا الموجودين في أريزونا إكتسبوا خبرة
كيفية تطويع الطين لكي يصبح بهذا الجمال ونفذوها لنا علي مستوي الواقع
أظن أن الجميع سيتحول لهذه المساكن الجميلة.
شكرا
|
Post: #5
Title: Re: يسكانها الاغنياء فى امريكيا و الفقراء فى السودان و يعيروهم بالسكن فيها .....صور؟؟؟؟؟؟؟؟؟؟
Author: النذير حجازي
Date: 10-26-2006, 08:31 PM
Parent: #2
والله يابكري شوقتني أجيء أزور أرزونا، طبعاً أخوك بموت فى السخانة والكتاحة وبيوت الطين والدردرة، كدي عليك الله يابكري أعمل لينا أبحاث ماكوكية كدا وشوف لينا عندهم دفارات للمواصلات؟! طبعاً أخوك برضو بموت فى الشعلقة بتاعت الدفارات وياحبذا لو كانت شماعة ضب (دي نظاما بتكون كلك بي برة الدفار وملصق بالجمبة  ) وألا ليت شعري هل أشعلقن شعلقةً بدفاراتِ أمبدة إني إذن جد لسعيدٌ
|
Post: #6
Title: Re: يسكانها الاغنياء فى امريكيا و الفقراء فى السودان و يعيروهم بالسكن فيها .....صور؟؟؟؟؟؟؟؟؟؟
Author: HAYDER GASIM
Date: 10-26-2006, 08:47 PM
Parent: #2
الأخ بكري ... وكل المساهمين فى هذا البوست ... سلام
كل سنة وإنتو طيبين ... فلسع الدنيا عيد ... تصدقوا.
يخيل لى أن حضارتهم فى الغرب تقوم على الخشب بشكل أساسي ,
بينما تخلفنا ينهض فى الشرق { الأفريقي } على بيوت الطين ,
وهذه جزئية حياتية من صراع الحضارات ... ولكل عيوبه , فخشبهم
قابل للإشتعال السريع ... ومقابل ألا يحدث هذا ... يتكلفون مال
الدنيا والعالمين ... فرق مطافئ ... جنود لمكافحة الحريق ,
أجهزة للتصنت والإنذار ... عربات مخصصة لهذا الغرض ... حتى
إحتلت مهمة مكافحة الحريق عندهم ... القوى النظامية الثالثة,
بجدارة وبكلفة البلايين , وفى مقابل توفير مياه الإطفاء , فهناك
شبكة موازية لشبكة المياه المنزلية , تنتصب فى كل شارع , وتختبر
من وقت لآخر ... وترعاها عين القانون ... بحيث لا ينبغي لأي عربة
كانت أن تتوقف حزاء نافورة الإطفاء ... فهذه مساحة شاغرة وعلى الدوام
لأجل عربات الإطفاء فقط ... وإن لم يكن هناك حريق .
بينما طيننا { يموص } فى الماء وعلى أثر الأمطار ... ولا تجدي { الزبالة }
إلا قليلا ... ما لم يتم تجديدها سنويا ... ونعرف الآلام الإجتماعية والزكامية
الناجمة عن صناعة الزبالة ... بمناسبة هل ما تزال فى السودان { رقيطة } ؟
فهذه الخامة الأرضية المثلى لهذه الصناعة ... وهل ما يزال هناك من { يخفج }
حوض الزبالة بكراعية كل يوم ... ليؤكد تلاحم عناصرها وتمازج مكوناتها...
يا ربي قاعدين إضيفوا ليها بهارات ... ول شنو ,,, ف{ تلك الرائحة } غير
عادية ... لا تضاهيها إلا رائحة المدابغ وأنت تعبر { متوكلا } من أبو حمامة
قاصدا بحر أبيض فى معناه العريض ... ولا يهم من بعد أن تتدلى فى الرميلة أو
اللاماب أو الشجرة أو العزوزاب أو الكلاكلات ... متقبقبها أم متصنقعها ... لا يهم .
فالظراوة على فوح المدابغ ... علامة فاصلة فى جغرافية العاصمة ... وكانت هناك
شركة أبو رجيلة لو تذكرون ... وكانوا يقيمون على أنفاس الجلود { التخينة }
ليس عبورا هذه المرة ... وإنما بشكل دائم تقضيه المهنة والأرزاق ... وله فى خلقه
شئون .
سأعود للأدوبي بشكل أكثر جدية ... فقد كانت لنا فى التخطيط نظرة فى هذا المشروع .
وشكرا أخ بكري ... وكل السلالة الطينية .
|
Post: #3
Title: Re: يسكانها الاغنياء فى امريكيا و الفقراء فى السودان و يعيروهم بالسكن فيها .....صور؟؟؟؟؟؟؟؟؟؟
Author: Sabah Hussein
Date: 10-26-2006, 08:21 PM
Parent: #1
يابكرى بيوت الجالوص دى فـى اريزونا.
حا اعمل بزنس بهنك كان كدا. اصلى اوسطه نضيف وارثها من الوالد ربنا يديهو
الصحه والعافيه.
|
Post: #7
Title: Re: يسكانها الاغنياء فى امريكيا و الفقراء فى السودان و يعيروهم بالسكن فيها .....صور؟؟؟؟؟؟؟؟؟؟
Author: Ibrahim Adlan
Date: 10-26-2006, 11:16 PM
Parent: #1
الناس ديل بيلقوا الرقيطا الحمراء دي وين
|
Post: #8
Title: Re: يسكانها الاغنياء فى امريكيا و الفقراء فى السودان و يعيروهم بالسكن فيها .....صور؟؟؟؟؟؟؟؟؟؟
Author: بكرى ابوبكر
Date: 10-26-2006, 11:56 PM
Parent: #7
المحارة
|
Post: #9
Title: Re: يسكانها الاغنياء فى امريكيا و الفقراء فى السودان و يعيروهم بالسكن فيها .....صور؟؟؟؟؟؟؟؟؟؟
Author: بكرى ابوبكر
Date: 10-26-2006, 11:59 PM
Parent: #8
|
Post: #10
Title: Re: يسكانها الاغنياء فى امريكيا و الفقراء فى السودان و يعيروهم بالسكن فيها .....صور؟؟؟؟؟؟؟؟؟؟
Author: saif khalil
Date: 10-27-2006, 06:01 AM
Parent: #9
يعني اسع يا بكري..داير تقول لي..الخواجات ديل..بعرفوا حاجاتنا..دي ..ناس
مناول الطين
الملطم
القدح والمحارة
السريقة..العتب ..وكتفة الباب..وشق الساس..الكمرة ،الامينة ،الشعبة..الوزرة..
يا ربي يكون عندهم عرش بلدي ابو مطارق،شرقانية او حصير داك؟
علا ..الناس ديل بلفو الدليب وين؟
اوعاك تقول لي عندهم زبالة؟
وكان عندهم بجيبو البعر من وين؟
كل عام وانت بخير ..ولك كل ودي
|
Post: #11
Title: Re: يسكانها الاغنياء فى امريكيا و الفقراء فى السودان و يعيروهم بالسكن فيها .....صور؟؟؟؟؟؟؟؟؟؟
Author: Abu Eltayeb
Date: 10-27-2006, 06:17 AM
Parent: #10
عزيزى بكرى , معناتو المشكله ما فى الطين !!!
ولكنها فى الأطر والمنظومات , وفى الإنسان الذى
يتعامل مع هذا الطين !!! المشكله فى تحجرنا!!
مامون
|
Post: #12
Title: Re: يسكانها الاغنياء فى امريكيا و الفقراء فى السودان و يعيروهم بالسكن فيها .....صور؟؟؟؟؟؟؟؟؟؟
Author: فاروق حامد محمد
Date: 10-27-2006, 07:22 AM
Parent: #11
أرجو أن يتداخل المهندس ابوبكر سيد احمد للاستفادة من
رأيه في بيوت الجالوص في السودان وخاصة ان بعض بيوت
الجالوص لا زالت قائمة وبأكثر من طابق منذ المهدية !!
|
Post: #13
Title: Re: يسكانها الاغنياء فى امريكيا و الفقراء فى السودان و يعيروهم بالسكن فيها .....صور؟؟؟؟؟؟؟؟؟؟
Author: wesamm
Date: 10-27-2006, 07:31 PM
Parent: #12
كان كدي يابكري حق تعمل ليك مكتب عمالة لتهجير الطيانة والزبالة دا لو لسه بمارسوا المهن دي بعد ان اصبحت الخرصانة المسلحة سيدة الموقف.
|
Post: #14
Title: Re: يسكانها الاغنياء فى امريكيا و الفقراء فى السودان و يعيروهم بالسكن فيها .....صور؟؟؟؟؟؟؟؟؟؟
Author: شهاب الفاتح عثمان
Date: 10-27-2006, 11:56 PM
Parent: #13
الابداع في تحديث مكونات بيئتك.
اجمل و اقل تكلفة.
و مواكب.
لكن الامر يحتاج لمبدعين ملهمين فالامور الهندسية الصغيرة
تحتاج الحماس و كل الاخلاص.
وشكرا على البيت الدف الطين.
د.شهاب الفاتح - كوالالمبور.
|
Post: #15
Title: Re: يسكانها الاغنياء فى امريكيا و الفقراء فى السودان و يعيروهم بالسكن فيها .....صور؟؟؟؟؟؟؟؟؟؟
Author: abubakr
Date: 10-28-2006, 00:02 AM
Parent: #1
عزيزي بكري والجمع الكريم
التحية
البناء بالطين ليس سودانيا فقط فهو في اماكن كثيرة من العالم وفي بلاد كاليمن تبني طوابق متعددة ولليوم من الطين وفي افريقيا كثير في مالي وشمال افريقيا وفي المكسيك والولايات المجاورة من الولايات الامريكية وفي مصر كذلك والهند واستراليا وبنفس المعالم الهندسية وطريقة البناء..ولذا فالبناء بالطين طراز معماري معترف به وفي امريكا يشار اليه بسانتا في لكثرة انتشاره في تلك المنطقة ..وهو طراز يلقي احسانا عند كثيرين من المقتدريين .. ويؤخذ من الطراز معالمه الخارجية والوانه وفتحاته اما الداخل فيشكل مثلما تشكل الطرازات الاخري معماريا والصورة التي في اعلي مداخلتي هذه لفلل عالية التكلفة اقوم الان بتشطيبهاللشركة العقارية التي اعمل لديها مديرا لمشاريعها لتسليمها لاصحابها في غضون اسابيع وكما ترون فالتصميم هو الذي يشار اليه الان بادوبي او سانتا في ...في مصر المعمار النوبي والقبطي هو ادوبي ولقد استعار المهندسون المعماريون المصريون من زمن رائد العمارة المصرية المهندس حسن فتحي تلك العمارة وطرازها وبنو بيوتا للمقتدريين واليوم كل منتجعات وبعض فنادق الساحل الشرقي المصري وسيناء من هذا الطراز .. في استراليا استنبطوا اساليب للبناء بالطين كما هو وفي السودان كانت محاولات في السبيعينات لاستنباط اساليب قام بها المهندس عبد الرحمن العاقب ومركز بحوث البناء وحاولت انا وكنت مهندسا مستجدا خلط الطين بالزيت الراجع وفق ما اتت به شركة سويدية وسمته اسف ادوبي وبنيت بعض بيوت لمشروع اسكان الشرطة الذي كنت مهندسه المصمم والمنفذ في ذاك الزمن البعيد ..
الطرازات المعمارية ماخوذه مما بني قديما فالاسباني والانلوسي ما خوذ من خليط موري افريقي وما كان في اسبانيا في زمن الدولة الاندلوسية وهنالك طراز فرنسي ومغربي وووووو..الخ ...
ما يهم في الطراز الادوبي هو جعل المادة الطينية صالحة لاستعمال للانتاج في اشكال يسهل استعمالها في مجموعات من المباني ماس برودكشن ولا مشكلة في استعمال الطوب الاخضر ومعالجته بحيث يقبل المستحدث من الاصباغ .. الخ ... السقوف ولندرة الاخشاب واثر قطع الاشجار بكميات كبيرة علي البئة صارت غير متوفرة وبالتالي ايجاد سقوف خفيفة بديلة "ملائمة" ولاستعمال كبير امر مازال شاقا ..
حاليا الطراز الادوبي كما ذكرت يؤخذ منه الشكل العام الخارجي في مباني تشيد من المواد الحديثة كما هو في الصورة ...
ما زال العالم يبحث عن طريقة الاستفادة من الادوبي حيث انه هو اكثر المعمار المحلي التقليدي في العالم تواجدا ولكن خاصيته وطريقة البناء به ومستحداثات العصر من معينات و زيادة اعداد البشر بما يستوجب مادة سهلة التناول والاستعمال تجعل البناء من الطين في شكله الاساسي والتقليدي 0مثلما هو) امر غير اقتصادي تماما ...
وللمهتميين من معماريين اشير الي كتاب اراه مهما في هذا الصدد:
ADOBE
Building and Living with Earth
by Orlando Romero and David Larkin
isbn 0-395-56693-2
مودتي
ابوبكر
|
Post: #16
Title: Re: يسكانها الاغنياء فى امريكيا و الفقراء فى السودان و يعيروهم بالسكن فيها .....صور؟؟؟؟؟؟؟؟؟؟
Author: Gaafar Ismail
Date: 10-28-2006, 00:23 AM
Parent: #1
العــزيز/ بكــري أبوبكــر
ســـلام.
عندي صديق ظريف ، رغم أنه ميسور الحال ، يسكن بيت طين جميل جدا في الحاج يوســف... عندما يسأله أصحابه الخواجات عن مكان سكنه في الخرطوم يجاوب :
I live in Khartoum in St. Joseph Ward
تحــياتي .
|
Post: #17
Title: Re: يسكانها الاغنياء فى امريكيا و الفقراء فى السودان و يعيروهم بالسكن فيها .....صور؟؟؟؟؟؟؟؟؟؟
Author: صديق عبد الهادي
Date: 10-30-2006, 06:35 PM
Parent: #1
الاخ بكري
تحية وسلام
الشكر علي البوست المختلف.
طبعاً بيت طين لبيت طين آخر يفرق...و طبعاً يا عزيزي نحن بناخد المسالة "ون بكدج"، عشان كدا عاوز اسألك قبل ما ندخل في المقارنة مع لنا من بيوت طين، هل لهولاء الامريكان "رواكيب" و "كشاشات" مقرونة مع البيوت دى و لا ما عندهم؟؟؟ لانو لو ماعندهم يبقى "عصيدتهم" دي ما "مملحة"!!!
ولكن يا صديقي جد جد ، يبقى راى الاخوة المهندسين المدنيين و المعماريين مهم في تناول هذا الموضوع.
مودتي
صديق.
|
|