ما احنا فاضين بعد ده - ما يلي ردي ليك يا خضر حسين

ما احنا فاضين بعد ده - ما يلي ردي ليك يا خضر حسين


12-12-2008, 11:05 PM


  » http://sudaneseonline.com/cgi-bin/sdb/2bb.cgi?seq=msg&board=139&msg=1252091437&rn=8


Post: #1
Title: ما احنا فاضين بعد ده - ما يلي ردي ليك يا خضر حسين
Author: عزاز شامي
Date: 12-12-2008, 11:05 PM
Parent: #0

كفارة شالو بوستيك بمويتو و شروهو ليك في حبل النسيان ...

هنا ردي ليك كان ما لحق ما ابتدرته و اتزاملوا في الحبل
____________________________________________________


كل سنة و انت طيب يا خضر و القابلة امنياتك طوع يمينك ..


كدي خلينا يا قريبي من لغة يارا لانها زي ما قلت بتتقال هنا بالمغتت و المكشوف
انحنا ما جايين نربى من أول و جديد والفاقد التربوي مالي الأفق العريض ..
اها ..
السيرة هنا ما سيرة مفصولين ولا سيرة مسجلين ... السيرة يا كبيرة شديد يا هينة شديد

في كلا الحالتين في داتا كبيرة قاعدة تضيع وبرانا متأخرين في التدوين و لو شالنا طوفان ما تلاقي وراك أثر
وياهو قدر الفي ضاع لا ايدنا لا كراعنا ...

الحل؟

قفل المنبر بيعطل الوصول للداتا و بيمسح تاريخ كامل بكل الجلبطة الكانت فيهو ...
اها ... نقعد كده في منبر متداعي الاطراف و تبقى ملفاتنا و خصوصياتنا في مهب ريح؟ برضو ما جاية..

الحل؟

ننقل الداتا الأول لمكان آمن و بعدين نرجع نشوف حال المنبر بشكله التفاعلي ..
طيب وما يترتب عليه ده على منو؟
على بكري برضو؟

بكري خلفنا و نسانا ولا شنو؟

الهكر ده لو علمنا شيء يعملنا انو مافي شيء (فور قرانتتد) وانو الضامن جاحد ما شاكر ...
ما هاماني لغة يارا و لا لغة الجايين من بعده، ما يقولوا الدايرنه هو الكلام بيلزق في الهدوم؟ ما كلام طاير في السايبر

البيهمني (الداتا)

أمنو لي الداتا بقضها و قضييضها بخرمجتها و هلوستها و باقي ما تبقى هين ان شاء الله نتشرد و يتلقانا الشتات
لانو باكر وبعد باكر حنلاقي نفسنا في الصقيعة
جرايدنا متصادرة و مقالاتها منخولة ناعم
و التلفزيون ايدك و الأرض
و الغربة حارة و اللي اتكتب هنا ما قليل و لا هين ..

و نحاور ياتو يارا ونخلي ياتو يارا؟
يا خيّ الحاصل ما لازمو حوار، لازمو مراجعة نفس من أول و جديد ...

الثبات .. الثبات
____________

ال في العروق دا مُو دمِّهُن ..
دمَّك .. يا أخيِّي ..
ودمِّي أنا ...
الَنَار تَقِيْد فِى الَكَان سَبَب
يَا الَضّو بِيُوتَنَا يَوقِعُو
اللّه يَجَازِى الَكَان سَبَب .. يَا الَضّو بِيُوْتَنَا يَوَقِعُو
نَهَجِر بَلَدَنَا نَزِح هِنا
كان سُلْطَة ينْسلّط عَلِيها .. أكَّان لِجانَّا يلجِّنا .

(حميد)

Post: #2
Title: Re: ما احنا فاضين بعد ده - ما يلي ردي ليك يا خضر حسين
Author: الوليد محمد الامين
Date: 12-12-2008, 11:22 PM
Parent: #1

Quote:


الَنَار تَقِيْد فِى الَكَان سَبَب





آمييين يا عزاز

Post: #3
Title: Re: ما احنا فاضين بعد ده - ما يلي ردي ليك يا خضر حسين
Author: showgi idriss
Date: 12-12-2008, 11:45 PM
Parent: #1

عزاز كيفك
مشتاقيين ياخخخخخخخخخ

كان ما كتابتك البعرفها كنت قلت انتى الهكر زاتو

يا برادعي..

اخوي خدر كتب بوستيه الفي حبل الغسيل داكا


مضى ينوم عشان يلبسو الصباح جاهز ومبلول

لكن ما عارف انو شهرذاد سكتت عن الكلام المباح

والله ما بقينا فاهمين الحاصل زاتو

من غير هكر مودرين السيجه

انا زاتي خايف اكون هكر

ابوالشوش

Post: #4
Title: Re: ما احنا فاضين بعد ده - ما يلي ردي ليك يا خضر حسين
Author: saadeldin abdelrahman
Date: 12-12-2008, 11:59 PM
Parent: #1

لووول من الكلام الما بلزق في الهدوم..كل سنة و انتن/وا طيبات/ين.

Post: #5
Title: Re: ما احنا فاضين بعد ده - ما يلي ردي ليك يا خضر حسين
Author: Adil Osman
Date: 12-13-2008, 00:00 AM
Parent: #1

Quote: البيهمني (الداتا)

أمنو لي الداتا بقضها و قضييضها بخرمجتها و هلوستها و باقي ما تبقى هين ان شاء الله نتشرد و يتلقانا الشتات
لانو باكر وبعد باكر حنلاقي نفسنا في الصقيعة
جرايدنا متصادرة و مقالاتها منخولة ناعم
و التلفزيون ايدك و الأرض
و الغربة حارة و اللي اتكتب هنا ما قليل و لا هين ..


شبكة الهكر شطبت بوستات كتيرة سياسية وثقافية وكتابات نساء جسورات وذكيات.
شبكة الهكر تتكون من عناصر امنية وسلفية ومعادية للمرأة. الشبكة فيها نساء ورجال واشباه.

شكرآ يا عزاز على كتابتك الدغرية

Post: #6
Title: Re: ما احنا فاضين بعد ده - ما يلي ردي ليك يا خضر حسين
Author: عبداللطيف حسن علي
Date: 12-13-2008, 00:16 AM
Parent: #5

Quote: الثبات .. الثبات


القول شنو؟

Post: #7
Title: Re: ما احنا فاضين بعد ده - ما يلي ردي ليك يا خضر حسين
Author: خضر حسين خليل
Date: 12-13-2008, 06:16 AM
Parent: #1

Quote: كفارة شالو بوستيك بمويتو و شروهو ليك في حبل النسيان


عزوز إزيك

صباح الخير

الكلام دة كان متين بالمناسبة !!؟
يعني ما ننوم ولا الحاصل شنو
عموماً عندي نسخة مطورة من البوست
بجيبو ليكي بعدين هنا
لكن بي صراحة الشغال يغتس في حجار البوستات مفترض يفهم
إنو نحنا بنتناقش لي مصلحة الحاجة الإسمها سودانيز سجم رماد دي !!

تسلمي مع إنك خلعتينا

Post: #8
Title: Re: ما احنا فاضين بعد ده - ما يلي ردي ليك يا خضر حسين
Author: عزاز شامي
Date: 12-13-2008, 10:05 AM
Parent: #1

الوليد محمد الأمين

بالله ثني الدعاء ده علشان يصل اكسبريس) ...

......

ابو الشوش،

وين يا ابن العم؟ لعلك طيب و بالك رايق؟

الحكاية انو اخوك خضر لسه بيعاني من براح حسن الأمل و عشمان انو الهكر يتوهط واطة و يتكلم معانا .. وكعادتي الكريمة جيت شايلة دبوس افرقع بيهو أي فقاعة وردية حايمة هنا ... بس يا وووب بقول يا رحمن يا رحيم لقيت البوست الليلك يا خضر لحق أجله فكان (لزاما) علي اكتب الكلمتين دي هنا تأبينا للمساعي الحميدة و علشان ما اموت بيهم و يقولوا ماتت صغيرة و جاهلة (وما قالت رايها) ...

......

سعد الدين ابن البلاد البعيدة المشقلبة .. كيفك؟ عيد مبارك و القابلة على امنياتك و هدومك (شتيمة بروف) علشان الهكر البقى علينا ده

......

عادل عثمان،
حبابك و القابلة زي ما تحب ..

انا المضايقني شنو؟ ما ياهو ده !

افرض مثلا أي عالم لغوي فكر يدرس مفردات السايبر السودانية و يربطها بمفرزاتها الاجتماعية و الخ الخ ، يمشي وين؟ موش المنتديات برضو؟ طيب لما الهكر يقعد ينقي لينا البوستات و الأرشيف زي تنقية العدس كده البيفضل لينا شنو غير بوستات (هكرونا بليل) و بوستات (تقبل العزاء) و (هلال مريخ) ؟؟ ناس الاجتماع لو ما واعين للحالة هنا يكون الضحك شرطهم لانو حال سودانيس اون لاين في الازمات موضوع بحث جاهز بس من قراءة الصفحة الأولى وقت أحداث ام درمان في مايو (مثالا) ...

الضاع كتير و بلاش يضيع اكتر

.....

عبداللطيف حسن علي وحاتك ما عارفة ... اتفاكروا و انحنا معاكم

....

سيد السماية ..خضر حسين .. اعذرنا على خلعتكم ما كنا قاصدين بس اختك الأيامات دي ماشة تفزع قلوب خلق الله ساي ...

هات بوسطك المأسوف على شبابه و خزنه هنا إلا ان تسنح سانحة و يقدر يقيف على حيله .. و لو اتشال البتاع ده برضو تاني حاتكون في وشي انا المرة دي لانو البوسط باسمي و انا زولة ما ليش سوابق من هذا القبيل و انت مسجل خطر لووووووول

...

نقوم لأكل المعايش بعد ده ... ابقوا عشرة على آي بي ياتكم و احذرو التروجون


***التعديل علشان يبقى الكلام مفهوم لاني ما فهمت شي من اللي انا كاتباهو

Post: #9
Title: Re: ما احنا فاضين بعد ده - ما يلي ردي ليك يا خضر حسين
Author: خضر حسين خليل
Date: 12-13-2008, 10:08 AM

البلد دي يا عمتنا عزاز بقت ما مضمونة
قلنا ليكم يارا ما براه اليارات كتاراااات
محل قبلت تلقاهم
معاي معاي زي ضلي

والحكمة تقول لو قايضوك سيفاً برأي فرأيك أبقي
حتام نحتمل السيوف

لمتين يا عزاز

Post: #10
Title: Re: ما احنا فاضين بعد ده - ما يلي ردي ليك يا خضر حسين
Author: mayada kamal
Date: 12-13-2008, 10:46 AM
Parent: #9

خضر حسين خليل
صباحاتك زينة
انا عملت فيه اول مداخلة
واقتبس جزء منه وقلت ليك ما فاهماهو
جيت حضرتك رديت رد مقتضب
ومازلت لم افهمه
فياريات عشان فهمي على قدري
تعيد لي المعنى
وعلى ما اذكر كان في ما معناه حصلي السوق ولا شنو كدا ما عارفة
اقعدوا عافية
وما تحرق روحك ساي......


*** قريبتي عزاز
مسكاقمي كوريقن آآآنج نلي

Post: #11
Title: Re: ما احنا فاضين بعد ده - ما يلي ردي ليك يا خضر حسين
Author: خضر حسين خليل
Date: 12-13-2008, 11:02 AM
Parent: #10

ميادة

ازيك وصباحك وسيم أريتو

أولاً أنا ما (حضرتك) أنا خضر حاف كدة يا ميادة
بعدين أنا ماقلت ليكي حصلي السوق أنا قلت ليكي
السوق ملحوق أما بخصوص الكلام المافهمتيهو فقلت ليكي بالحرف
الواحد (تمسكي بما فهمتيه) . ودي كانت واضحة
للغاية وما محتاجة لي شرح ولا كيف !!!؟


سلمت

Post: #12
Title: Re: ما احنا فاضين بعد ده - ما يلي ردي ليك يا خضر حسين
Author: Ishraga Mustafa
Date: 12-13-2008, 11:19 AM
Parent: #11

Quote: ما هاماني لغة يارا و لا لغة الجايين من بعده، ما يقولوا الدايرنه هو الكلام بيلزق في الهدوم؟ ما كلام طاير في السايبر

البيهمني (الداتا)




عزوز نهارك طيب يا اخية


الكلام الطاير ده ذاتو بينتمى للداتا
وده ذاتو اللى ممكن نقوم بتحليلو كافراز طبيعى لمعطيات واقعنا ولاشنو؟


بمعنى اى حرف بيتكتب هنا
{فاضى} ولا{مليان} ينتموا لبعض ولحياتنا بكل مافيها من غث ومفيد






======

جاك رد من عندينا؟

Post: #13
Title: Re: ما احنا فاضين بعد ده - ما يلي ردي ليك يا خضر حسين
Author: mayada kamal
Date: 12-13-2008, 11:27 AM
Parent: #11

Quote: المافهمتيهو فقلت ليكي بالحرف
الواحد (تمسكي بما فهمتيه) .

استاذ خضر !!!!!!
معقولة تقول تمسكي بما فهمتيه
ليه نحن الهدف شنو من تواجدنا في المنبر
مووش نقرا ونفهم ونسال المافهمناه ونتعلم من الاخرين.....
ولا اقول ليك
مافي داعي اكمل زاتو
اعتبرني ما سالت
ولو البوست ما كان اتمسح انا كنت حامسح سؤالي


وكن بخير

Post: #14
Title: Re: ما احنا فاضين بعد ده - ما يلي ردي ليك يا خضر حسين
Author: خضر حسين خليل
Date: 12-13-2008, 11:40 AM
Parent: #13

Quote: استاذ خضر !!!!!!
معقولة تقول تمسكي بما فهمتيه
ليه نحن الهدف شنو من تواجدنا في المنبر
مووش نقرا ونفهم ونسال المافهمناه ونتعلم من الاخرين.....
ولا اقول ليك
مافي داعي اكمل زاتو
اعتبرني ما سالت
ولو البوست ما كان اتمسح انا كنت حامسح سؤالي


وكن بخير


عارفة ياميادة أنا ما بحب الألفاظ ناس أستاذ وحضرتك
وما تعرف شنو خليكي من درجة أستاذية كارة وراها ستين علامة تعجب
هو براهو برضو ما لازمني يا بت الناس الصالحين .
يمكن نكون ما إتقابلنا في سودانيز أونلاين دي كتير
لكن تصدقي وتآمني بالله في الفترة البسيطة دي كونت لي رأي ما بطال
عن الحاجات والمغايس البتحصل هنا ولي دة إستعنت بطيب الذكر(حميد)
وكتبت (الانقليز أذنابها في) وكم وأربعين موياتها جات !!
والكلام دة شعر ... شعر الله والرسول كتبو حميد في قصيدة(إسمها الضو
وجهجهة التساب) حيث كان الضو يعيش جهجهة قريبة من جهجهتنا دي في
المخروبة الاسمها سودانيز أون نكد دي .
أما بخصوص تمسكي بما فهمتيه فالقصد كان واضح وهو أنو أفهمي بس الغرض
من البوست اللي راح في حق الله بق الله ولم يكن القصد علي الاطلاق ما تبادر
الي ذهنك ! أنا بحترم أي زول قاعد هنا بإعتبار إنو دة المفروض يحصل
ولاعتبار آخر إننا في منبر للحوار وليس لسبب آخر .
أها أتمني إنو الفكرة تكون وصلتك جملةً وتفصيلاً .

ولا حول ولاقوة الا بالله

خضر


ـــــــــ

Post: #15
Title: Re: ما احنا فاضين بعد ده - ما يلي ردي ليك يا خضر حسين
Author: عزاز شامي
Date: 12-13-2008, 11:53 AM
Parent: #1

كدي النتحسس البوست نشوفو فيه ولا مشى البحر ..



Quote: الكلام الطاير ده ذاتو بينتمى للداتا
وده ذاتو اللى ممكن نقوم بتحليلو كافراز طبيعى لمعطيات واقعنا ولاشنو؟

بمعنى اى حرف بيتكتب هنا
{فاضى} ولا{مليان} ينتموا لبعض ولحياتنا بكل مافيها من غث ومفيد


اشراقة صباح الخير،

وصلني رد يا ستي و طلبوا مني دشلومية ورقة وتقرير و انا و كت عندي علام قدر ده الجايبني اطلب العلم في الصين شنو؟ بارسل ليهم المعلومات في نهاية اليوم و ما قصرتي يا ستي ...


اها نجي لكلام يارا، باقي لي ما قريتيهو يا شروق، كلام يشرّد الداتا و يمرقها من طورها
الكلام ده ما محتاج سايبر تيست، اي حوار حول عمود أو لستك في حلة ممكن يثري النقاش و يفيض ...

صحيح في اساءات من نوع آخر في سياق آخر مفضية لرآي آخر، دي ايوه باخدها في عين لاعتبار و (السياق)
بس كلام الهكر القبيل في حقنا يمرق اسمعو بيجاي أمروقو بيجاي و احمد الله و انام ...

Post: #16
Title: Re: ما احنا فاضين بعد ده - ما يلي ردي ليك يا خضر حسين
Author: Ishraga Mustafa
Date: 12-13-2008, 12:32 PM
Parent: #15

Quote: صحيح في اساءات من نوع آخر في سياق آخر مفضية لرآي آخر، دي ايوه باخدها في عين لاعتبار و (السياق)
بس كلام الهكر القبيل في حقنا يمرق اسمعو بيجاي أمروقو بيجاي و احمد الله و انام ...




ملاحظتى انطلقت من فحوى كلام خدر { حلوة فحوى دى تشبه كلام المثقفات}

بمعنى انو يارا فى زيها عشرات فى البورد
نوع بيسم روحك بنقرة كيبورد
نوع يلاحقك بالكلام المر والغير مفيد
ويكون امتحان صعب لروحك عن مدى قبولنا للآخر بكل غثه!!






-----------
Quote: وصلني رد يا ستي و طلبوا مني دشلومية ورقة وتقرير و انا و كت عندي كلام قدر ده الجايبني اطلب العلم في الصين شنو؟ بارسل ليهم المعلومات في نهاية اليوم و ما قصرتي يا ستي ...



شنو ماقصرتى دى؟!!
كل شىء وليهو تمنو والتمن هنا اسألى منو ليلى صلاح
التمن تخمى لىّ معاك فرح من جواك وتدينا منو؟ دى كتيرة

اوعى يكونوا طلبوا كرت الحمى الصفراء؟

Post: #17
Title: Re: ما احنا فاضين بعد ده - ما يلي ردي ليك يا خضر حسين
Author: showgi idriss
Date: 12-13-2008, 05:30 PM
Parent: #16

التمن تخمى لىّ معاك فرح من جواك وتدينا منو؟ دى كتيرة

إشراقة اختي

ما كتيرة
لو قل الناس خمت وادت من السمح الجواها

كل الناس عندها السمح البتديهو

بس في ناس مصاقرة الكعب...تخم وتوزع يا كافي البلا


كوني دايماً شمعة فرح


عزاز اختى السغنتوتة

التوضيح وصل

صدقيني اخوك فهمو قلا وسودانيز دي كملت على الباقي

لما اجيها بحس بي "لخمة" ودوشة راس

بس خدر اخوي دا عشمو كبير خالس فالهكر