Post: #1
Title: (سجيمان) اخوي اركز يا جنا أبقى زولا فوق وليك طايوق؟
Author: هشام هباني
Date: 02-14-2005, 09:39 PM
سجيمان اخوي اركز يا جناابقى زولا فوق وليك طايوق
ما تبقى زولا فارغ وطبعك اللايوق
خليك عديل اركز فوق التراب واسوق
خلينا من (ود ابرق وعشوشة) وحكاوي السوق
خلينا النشوف هم البلد والرزق مسروق
وكيف ناس سافة التراب وناس في العلالي فوق
مالك ومال(كونداليزا) روق يا السجيمان روق
فد مرة قول الحق وما تبقى زولا بوق
خلي الفارغة وشيل سلاحك نرجع المسروق
وبعد داك سوي الدايرو وابقى زول مطلوق
وبعد داك سوي الدايرو وابقى زول مطلوق
|
Post: #2
Title: Re: (سجيمان) اخوي اركز يا جنا أبقى زولا فوق وليك طايوق؟
Author: سجيمان
Date: 02-15-2005, 02:46 AM
Parent: #1
هشام اخوي.....مالك يازول داير تتلوم...حسي ان شكيتك لي بكري بيحظرك.....
اول حاجة طلعتني ما عندي طايوق...... ودي براها بتحظرك من النت كلو
تاني حاجة دايريني انضم في السياسة واخلي الونسة... تلاتين مليون زول قاعدين ينضمو في السياسة.....لو نقصو واحد البلد ما بتجيها عوجه......
بعدين المسروق دا دايرني اشيل سلاحي وارجعو.....انت عارف انا ان رجعتو برجعو لي حرامي تاني غير السرقو...ويبقى لي انا اجر المناولة.....
حكاوي السوق وناس السوق دي ما ياهم انتو البي تكاتلو عشانهم...... ولاّ ما اياهو؟
اما بوق دي وحات الله بهتني.....في ناس هنا بوق لي قرنق...وفي ناس بوق للبشير..وفي ناس بوق للسادة.......وانا ان بقيت بوق انا بوق الشماشة واولهم انا.....وبوق ناس السوق....وبوق ناسن ما سمعو بالنت ولا عارفين الحاكمهم منو.....
|
Post: #3
Title: Re: (سجيمان) اخوي اركز يا جنا أبقى زولا فوق وليك طايوق؟
Author: سامى عبد الوهاب مكى
Date: 02-15-2005, 03:08 AM
Parent: #1
| Quote: اما بوق دي وحات الله بهتني.....في ناس هنا بوق لي قرنق...وفي ناس بوق للبشير..وفي ناس بوق للسادة.......وانا ان بقيت بوق انا بوق الشماشة واولهم انا |
سجيمان يابوقنا السمح وعادل كيفنا...
مايحرشك خليك معانا لمن نوصلو قيفنا...
ماك سمحنا وماك قمحناماياك سيفنا...
وحتماً يوم فى المجارى تنزل ضيفنا
عن جموع وعموم شماشه السوق الشعبى والملجه واستاد الهلال(كبير الشماشه)
|
Post: #4
Title: **
Author: هشام هباني
Date: 02-15-2005, 08:14 AM
Parent: #1
سجيمان اخوي شن جابك لشماشة السودان
ديل رجالا نايمة وعايشة في الخيران
شبعانين غلب والظلم اكلوه بالالوان
قاعدين في بلد منهوبة بالكيزان
وات قاعد تونس بالفارغة للحبان
وعشمك ( كونداليزا) السمحةام سيقان
ما تشوف لك شماشية وتستر عرض غلبان
والله سويلنا (بوست)نلقط قروش لشماشة السودان
ونديهم الريد الكتير ونديهم امان
شان ابقو زيك في راحة واطمئنان
ماهم رجال ابريل وشالوا النيم سلاح سيطان
واب عاج العوير طردوه وفزّّ بالبلدان
سجيمان اخوي خلي الكلام الني وابقى زول غيران
البلد داشر دم شهيدها في الشرق والغرب غرقان
ده ما هو وكت الفاقة شان يضحكو الاخوان
ده وكت الدعك شان نهزم الشيطان
ده صوت الضمير شان نرفع السودان
وجدودنا القبيل ماتوا في خدمة الاوطان
وفاقد المروة والكرامة ابقى زول سجمان
سجيمان اخوي دي نصيحةاخو وعدل الميزان
والعفو والعافية اخوي والعزة للسودان
|
Post: #5
Title: Re: (سجيمان) اخوي اركز يا جنا أبقى زولا فوق وليك طايوق؟
Author: ناذر محمد الخليفة
Date: 02-15-2005, 10:59 AM
Parent: #1
سجيمان أخوي ما تسمع نضم هباني
داير يضيعا فيك يالغالي ماك مجاني
مالك والسياسة الكترت أحزاني ؟!
الشماسة راجنك فيهمالبعيد والداني
|
Post: #6
Title: Re: (سجيمان) اخوي اركز يا جنا أبقى زولا فوق وليك طايوق؟
Author: Mohamed A. Salih
Date: 02-15-2005, 12:27 PM
Parent: #5
يا ود هباني اخوي كلامك تب زين
ناس خلقوهم للسياسه وناس في الفارغه بس فالحين
ناس سجيمان اخوي بالغلابه مهمومين
وبي ساقا سمح شوف عيني مفلوقين
|
Post: #8
Title: Re: (سجيمان) اخوي اركز يا جنا أبقى زولا فوق وليك طايوق؟
Author: هشام هباني
Date: 02-15-2005, 03:01 PM
Parent: #6
اخوي النقيح ام حمد وليد الصالح
اكتر نفاعك واخدر ضراعك ماك زولا طالح
سجيمان اخونا بندورلو السمح وابقى زولا فالح
بندورلو الكلام الزين للبلد بالواضح
ما ينسينا هم الناس الطاقيها الفقر وهو حال فادح
وكلاب الحكم شبعانة من عرق الغلابةوهو حال فاضح
سجيمان اخونا بندورلو عزة نفس ابقى زولا صالح
|
Post: #10
Title: Re: (سجيمان) اخوي اركز يا جنا أبقى زولا فوق وليك طايوق؟
Author: Mohamed A. Salih
Date: 02-15-2005, 06:44 PM
Parent: #8
نحن ولاد جعل ما فينا زولا طالح
من الدفيق اكلنا وشربنا موية المالح
سجيمان اخونا وانت حقو تصالح
مالو ان كان عشق والعشق فيهو مصالح
|
Post: #7
Title: Re: (سجيمان) اخوي اركز يا جنا أبقى زولا فوق وليك طايوق؟
Author: هشام هباني
Date: 02-15-2005, 01:12 PM
Parent: #5
ناذر اخوي ود الراجل الجدع الخليفة
اهلا بيك كتير ماك الهوين وعيفة
انا بدور كلام الجد والبلدالليلة صبحت جيفة
لحسوها الكلاب وخلوها زي النيفة
ناس شيخناالضلالي وكروشن الملهوفة
وبدور سجيمان اخوي ملافظو تبقى نضيفة
وبدور ليهو السمح وخيرو فوق القيفة
وايدي فوق ايدو والعشرة فينا اليفة
|
Post: #9
Title: Re: (سجيمان) متين خليت شغلة الواسوق
Author: shak
Date: 02-15-2005, 05:31 PM
Parent: #7
يا سجمان كمل الطايوق
واتفلهم تعال بى فوق
كوندليزاجالسة فوق طابوق
وانت ظنيتك حرامى السوق
خليت هديماتك وتركت شغلة الواسوق
وجريت وراء النسوان من ندوية لام شغلوب
يا تعبان كفاك بكا وكفاك ورروب
وارضى بالقسمة والمصير مكتوب
شاك
|
Post: #11
Title: Re: (سجيمان) اخوي اركز يا جنا أبقى زولا فوق وليك طايوق؟
Author: سامى عبد الوهاب مكى
Date: 02-16-2005, 00:44 AM
Parent: #1
ياخوانا هوى خلو السجيمان فى حالو..
الزول شايل همنا ويشهدنلو فعالو..
سجيمان اخير من البوليس ورزايل اعمالو...
بعد الجوع العلينا عايزنا نلحس نعالو!!
**********************************
يافرده هوى سجيمان اصلو زول تفتيحه
اصلى ومقرم ود مجارى وشايل مفاتيحه
ليه عايزين تحرشوه يبقى زولاً قيحه!!!!!!!
انتو اى زول يبارينا تتمنو ليه تفسيحه!!!!!!
|
Post: #12
Title: Re: (سجيمان) اخوي اركز يا جنا أبقى زولا فوق وليك طايوق؟
Author: Sidig Rahama Elnour
Date: 02-16-2005, 01:05 AM
Parent: #11
يا خوانا هوي كلام هشام منو ما تضارو
الراجل شن قال غير النصيحة لجارو
دائر يرفع لسجيمان مقدارو
سجيمان والشين أصلو ما يتبارو
***************************
سجيمان العزيز أنت النضم عبارو
شيالة التقيلة وياكا الكسر جبارو
ما تلوم هشام واسمع كلامو القالو
وواسي الحروف وسيب الحروم في حالو
******************************
هشام ياأخوي اياكا الكضب بتارو
صداد العدو يومو اليولع نارو
لزام الصفوف يوم الرجال يجارو
قوال الحقوق وأنت الفضل نجارو
|
Post: #13
Title: Re: (سجيمان) اخوي اركز يا جنا أبقى زولا فوق وليك طايوق؟
Author: سامى عبد الوهاب مكى
Date: 02-16-2005, 01:42 AM
Parent: #1
سجيمان زولاً فرده وقدرو اصلاً عالى
شايل هم وطن ردو فورى و حالى
تسلم يااصيل والشماشه فوق طوالى
****************************
كلامو تب موزون بس طبعو زولاً ساخر
ماقبلان بالحصل والشماشه حلهم ظاهر
اولاد حرام اولاد قِرف قولو بس ياساتر
******************************
حصل شفتو المجارى غير وقت المطر والمويه؟؟؟
فكرتو يوم فى الطفل الكيفو بالبنقويه؟؟؟
جربتو يوم السِلس جربتو نوم ككويه؟؟؟؟
|
Post: #14
Title: Re: (سجيمان) اخوي اركز يا جنا أبقى زولا فوق وليك طايوق؟
Author: عبد الحميد البرنس
Date: 02-16-2005, 05:08 AM
Parent: #13
شكرا هشام على هذه النافذة على أفق جميل.
|
Post: #15
Title: Re: (سجيمان) اخوي اركز يا جنا أبقى زولا فوق وليك طايوق؟
Author: ناذر محمد الخليفة
Date: 02-16-2005, 06:32 AM
Parent: #1
سجيمان بعيدلك ماتسمع نضم هباني
شن فادنا النضم في سياسة أخوي عاداني ؟
ماك فارغ وماك التليف الجاني
شن نفعك في نضم في بلدي ما نجاني ؟
|
Post: #16
Title: Re: (سجيمان) اخوي اركز يا جنا أبقى زولا فوق وليك طايوق؟
Author: هشام هباني
Date: 02-16-2005, 07:14 AM
Parent: #15
اخوي ود عبد الوهاب
بخبرك ماك في الدواس كضاب
وماك الراجل الهواب
سجيمان اخوناونوارة الاحباب
بدورلو الكلام الزين وابقى زول ارباب
|
Post: #17
Title: **
Author: هشام هباني
Date: 02-16-2005, 07:21 AM
Parent: #1
ود رحمة اخوي الراجل الصديق
عوج الدرب في المصايب بفرج الضيق
سجيمان اخونا وديمة والله رفيق
بندورلو السمح وابقي ليهو طريق
اسوي الكلام الزين وقلمو ابقي انيق
|
Post: #18
Title: Re: (سجيمان) اخوي اركز يا جنا أبقى زولا فوق وليك طايوق؟
Author: سامى عبد الوهاب مكى
Date: 02-16-2005, 10:32 PM
Parent: #1
يالمسجم انت وين طرته والحرب شغاله
ناس شايله الحراب وناس باقيه ذى نباله
ياخى عبرم ناضمم ماتحرجهم خلى الثقاله
***************************
والله ظنيتو ما كان خاتى فيك هبانى
لو جروك من اضانك انا تانى ماهمانى
كت قايلك معانا لقيتك فى بكاناً تانى
|
Post: #19
Title: ***
Author: هشام هباني
Date: 02-17-2005, 00:15 AM
Parent: #1
ود المكي اخوي ات زولا والله قدرك سامي
تحامي لسجيمان والاضينة الليلة ليك متغابي
فاتح لك شديد ومشغول في العسل متصابي
كان دي الرفاقة احسن لك ترافق الدابي
|
Post: #20
Title: Re: (سجيمان) اخوي اركز يا جنا أبقى زولا فوق وليك طايوق؟
Author: سامى عبد الوهاب مكى
Date: 02-17-2005, 01:13 AM
Parent: #1
سجيمان اخوى ندى القلعه والشماشه ما اظنهم بتلمو
كُت عشمان فى دفاعك عن الباتو القوى سطلو سكرو وشمو
قت لقيت ليكم واحداً ينسيكم الفقر ينسيكم مراره همو
لقيت المتلك كتير ناس حا وحا الخلو الناس كلهم يتلمو
يلونو فى الكلام ناسين الحساب فى القبر!! عصرو وضمو
|
Post: #21
Title: Re: (سجيمان) اخوي اركز يا جنا أبقى زولا فوق وليك طايوق؟
Author: bayan
Date: 02-17-2005, 07:18 AM
Parent: #20
والله ابداع لكن..
|
Post: #22
Title: Re: (سجيمان) اخوي اركز يا جنا أبقى زولا فوق وليك طايوق؟
Author: محمد حسن العمدة
Date: 02-17-2005, 08:17 AM
Parent: #21
هباني يا اخوي
دا شه/عرا سجيمان ما عندو ليهو النفقة
نضم السياسة بدورلو زولا عندو الفرقة
و هو مع ناس فلانة قلبو اتفلة ( اتفلةاذا عدم الحبة )
|
|