افرجوا عن الفنـــان زيـــدان ابراهــيم ايها الاوغاد؟؟

دي طازجة هسع دي من الخرطوم واكدوها ناس استراليا وكندا وهولندا

قالوا الفنان المبدع زيدان ابراهيم اثناء ما كان بغني اول امبارح في حفلة شقيق (كوز كبير) اغنية (في الليلة ديك) وبالتحديد المقطع البقول ( لاهـان علي ارضى واسامحك لاهان) قالوا ليك اخو العريس الكوز الكبير رفع مسدسو في السماء وضرب طلقتين في الهواء وهجم علي زيدان الغلبان ( وقالوا قبقبو من قميصو) وقال ليهو ( هسع دي اتا قاصد شنو يا زيدان يا طابور يا خامس بلاهــاي علي ارضى واسامحك بلاهــاي علي وما لقيت ليك غير الاغنية المهببة دي )وهنا تدخل العريس مهدئا اخوه الكوز وقال ليهو ( سمع اضاني يا اخوي زيدان ده قال لا هــان علي وما قال لاهـــاي علي وات يا خوي كان ما حافظ الغنا دي مشكلتك) اها والاشاعة بعد داك طلعت وحصلت الصحافات وجبرة والقماير وابو نيران وشنقلي طوباية وهيا وكبكابية وجاتنا هسع في امريكا وقالو ناس استراليا سمعوها واكدوا انو زيدان معتقل حتى هذه اللحظة بعد تلكم الحفلة المشئومة وناس كندا قالو كمان دقوه دقة تمام والان حسب الشائعة زيدان معتقل وانا من هنا اطالب باطلاق الفنان المبدع المناضل زيدان ابراهيم والله اكضب الشينة ووافونا ياجماعة بالاخبار والمستجدات اول باول وبعدين حافظو لينا على الاغنية دي وبالذات المقطع بتاع لاهــــــــــــــــــــاي داك.
هاكم لاهـــــــــــــــــــــــاي دي.

هبانى
دبايوا
الكلاب ديل يعملوها ويعتقلوا الراجل المسكين ماتحرض يازول

هاشم ود نوريت

دابايوا

والله نحن نؤازر الفنان المناضل زيدان ابراهيم في محنته وهو موقف شريف
ودي المواقف يا كدة واكرر افرجوا عن سراح المناضل زيدان ابراهيم؟؟

والله دى عين .هل لا يزال الأستاذ زيدان معتقلا؟

إعجابنا بالاستاذ زيدان وامنياتنا له بالصحة والسلامة والأمن سواء
كان الخبر صحيح او غير صحيح .. افيدونا بمدى صحة الخبر


قال ليك كان المتظاهرين بهتفوا داون داون يو اس ايه
والمسطول حسب سطلته بهتف معاهم داون داون يوسف بيه
وانا هسة بهتف داون داون ( لاهان ) بيه

هباني

الفنان محمود تاور برضو جابوهو في مكاتب الامن وقالو ليهو تاني اوعك تغني

ما بتسيبو حالك لاهـــــــــاااي

وقدر ما قال ليهم انا بقولا

ما بتسيبو حالك يا هــــــا

الجماعة ما قتنعوا

واحتمال كبير ان يقوم الفنان محمود تاور بارجاع الاغنية لشاعرها حتى يعمل ليها رقعة مناسبة وفي حالة فشل الشاعر في ذلك سيقوم تاور بمقاضاته لانو اداهو غنية ما تعجب الحيكومة.

الطاهر.. محمد..قرجة

مساكم الله بالخير

شكرا للمؤازرة والوقفة المشرفة مع فناننا المظلوم زيدان ونتمنى من الله افك اسرو واجبر كسرو عملوها فيهو المهووسين ولحد الليلة ما في اي مصدر نفي الكلام ده ونحن في انتظار اخونا عجـــــــــل بقر الجواميس الرقادن جخ بتاع المركز الاخباري في البلد ادينا اخر التفاصيل حول اعتقال الفنان المناضل زيدان؟؟

فوق

مساء الخير هشام

دى بقت حالة هوس متقدمة جدا

كان الفنان يقول لاهان

ويسمعوها لاهاى..

الله يورينا فيهم اكتر من كدا..

قول امين...

اللهم الطف بالمناضل الفنان زيدان ابراهيم

السلام عليكم ورحمة الله وبركاته

يا جماعة رفقا بعقولنا

بدايةأود أن أوضح انني من المعجبين بالفنان ذيدان ابراهيم كفنان سوداني مميز قدم الكثير للفن السوداني وأتمنى له كل صحة وعافية.
ولكنكم ياسادة يا كرام و بفعل السياسة اللعينة صرتم تخلطون بين الأشياء ولا أقول تختلقون الأشياء...فالمؤمن صديق وقد صدقت الخبر كما قرأته...
الخلط اللغوي استعمال الكلمات الغير مناسبة والأوصاف البراقة بشكل يفرغها من معناها و يفقدها معناها مستقبلا
والا فقولوا لي ما حيثيات اغداق لقب ( المناضل ) على الفنان المبدع ذيدان ؟؟؟ اهي غنائه لأغنية ( في الليلة ديك ) وللعلم لا اذكر أغنية وطنية واحدة للفنان المبدع ذيدان ابراهيم( ارجو من الأخوة تصحيحي اذا اخطأت)
أم بسبب تهديد الكوز الكبير له؟؟؟
وهل كل من يعتدي (بضم الياء) عليه أو يهدده أحد الجبهجية أو يستدعى (بضم الياء) للتحقيق في أمر ما يصير مناضلا؟؟؟
تخريمات حسب قول البورداب
1- الله يطول عمرك يا نلسون مانديلا
2- أحترامي لك الفنان العاطفي ذيدان أبراهيم
3- رفقا بعقولنا

الزول السمح فات الكبار والقدرو

تحياتي ومحبتي

يا اخوي الزمن ده مافي زول احسن من زول والكبير هو رب العباد ياخي كان مولانا بقى مناضل دايرنا نضن بيها على المبدع زيدان و( لاهان علي ارضى واسامحك) ولك معزتي ايها الزول السمح .

هباني