قناة هارموني، مبالغة في الهباب.

قناة هارموني تقوم بدعاية لبرامجها الرمضاني لأكثر من عشرين دقيقة. طيب برامجكم الرمضانية دي ح تعرضوها متين؟

برامج القنوات السودانية في رمضان كشف لنا فشل القنوات السودانية في عرض أي برامج محترمة أو ناجحة.

الابداع في السودان في خطر. هل هذا هو المستوى الحقيقي لللأبداع في السودان أم أن الذين يتحكمون في تلك القنوات لا علاقة لهم بالفن والابداع؟

شئ مؤسف الذي أراه اليومين ديل في القنوات السودانية خصوصا قناة هارموني.

هلا يا دينق
وتصدق الريموت زااتو كورك من الدوس علي مفاتيحيه
برنامج ضعيفة وجائعة وركيكة...
وهارموني ده قناة بالجد تفتقر لاشياء عديدة مذيعات سطحيات وغايتو الله في

دينق ..

خليك في CNN

وما تسوي لينا صداع

نحن عاجبانا والله ...

نحن ذاتو CNN ما واقعة لينا
بالذات البرنامج المهبب INSIDE AFRICA

دينق هنا في نورث كارولاينا ما بنشوف هارموني دي: انتو بتشوفوها كيف في واشنطن? كيبل ولا dish ياتو تردد ?
شركة الcable هنا تايم ورنر time worner

متوكل التوم. أنا اليومين ديل في الخليج، ومفروض علي أتفرج في برامج مهببة زي دي.
بعنب أفتح قناة سودانية أقوم ألقى فيها فيلم أو مسلسل مصري. طيب الفايدة شنوا أصلا؟
حالة صعبة جدا. أخبار ال NFL شنو اليومين ديل؟

دينق سلامات...

ويا سيدي أتاريك مرطب لامن نسيت تهنيء كوستاوي الهجام برمضان...!


__________________________


والله عندي ليك طلبا كبير من هناك
كان لقيت في طريقك سجنال 2 أصلي بالله إشتريهو ليا
تعرف نقطة ضعفه السجنال والبنسون أند هدجنز
أخوك التقول رويـال...

دينق تحياتى

يقال ان قناة هارمونى تعانى من مشاكل مالية

الناس شغالين ملح

يعنى المذيعة ما بيدوها قروش
يقول ليها نحنا ظهرناك فى الشاشة كمان نديك قروش


فى حكاوى كتيرة عن التعثر فى دفع استحقاقات للعاملين

Quote: يقال ان قناة هارمونى تعانى من مشاكل مالية الناس شغالين ملح يعنى المذيعة ما بيدوها قروش يقول ليها نحنا ظهرناك فى الشاشة كمان نديك قروش

لا حول ولا قوة إلا بالله ..
لا تسمع كل ما يقال ولا تقل كل ما يسمع ..
طيب إذا كان دا الحال الجابر المسكينات ديل يشتغلن شنو ..
كل يوم نسمع قصص وحكايات ولا واحد فينا شاف بي عينه مافي ..
ولا واحد عايز ينصح مافي ..
الكل يهاجم ..
الكل عايز يستمتع هو فقط ..
لكن بي ياتو طريقة لا يعرف ..


شي مؤسف حقاً ..

Quote: هلا يا دينق وتصدق الريموت زااتو كورك من الدوس علي مفاتيحيه برنامج ضعيفة وجائعة وركيكة... وهارموني ده قناة بالجد تفتقر لاشياء عديدة مذيعات سطحيات وغايتو الله في

كيكي.

ياخ أنا ما قادر أفرز بين دعاية الحلقة أو الحلقة نفسها.
الناس ديل مصرين يعملوا دعاية لبرامج العيد كلها في نفس اللحظة.
يعني رمضان ده كلوا ح تقضوه دعايات في حلقات لن يتم بثها.

حتى قناة النيل الأزرق يا دينق دعايات كميات
الله يكون في عوننا غايتو.
إنت وين في الخليج بالله ؟؟؟

دينق سلام ..
وكل سنة وأنت طيب ..

Quote: قناة هارموني تقوم بدعاية لبرامجها الرمضاني لأكثر من عشرين دقيقة. طيب برامجكم الرمضانية دي ح تعرضوها متين؟

طيب الأكل والشراب دا يبيعوهو للناس المساكين ديل كيف ..
يا دينق القنوات الفضائية مصدر دخلها من الدعايات والإعلانات الرمضانية يعني حق السنة كله بحصلوهو في رمضان ..
على فكرة هنالك نصف ساعة كاملة من الدعايات قبل برنامج أغاني وأغاني في النيل الأزرق ..

Quote: برامج القنوات السودانية في رمضان كشف لنا فشل القنوات السودانية في عرض أي برامج محترمة أو ناجحة.

يا ريت لو إكتفيت بهذا الكلام ولم يكن عنوانك لهارموني فقط ..

Quote: الابداع في السودان في خطر. هل هذا هو المستوى الحقيقي لللأبداع في السودان أم أن الذين يتحكمون في تلك القنوات لا علاقة لهم بالفن والابداع؟

وهل يستقيم الظل والعود أعوج ..
دي مشكلة بلد كاملة وليست قناة فضائية واحدة ..
للأسف هارموني كانت الضحية وهي محل الرهيفة عشان كده يكثر الهجوم عليها ..
أنا طبعاً عندي مشكلة مع القنوات الفضائية السودانية قاعد أجي عليها في أوقات معينة ولأشياء محددة ..
عندي غرام مع قنوات الرياضة وخصوصاً الأي آر تي والجزيرة والشوتايم أنا حارسهم عديل كده ومرات كده قاعد أعرج على قنوات الشوتايم أفلام والإم بي سي أفلام برضو يعني الوقت البقضيهو بكون في القنوات دي ..
طيب طالما في المئات من القنوات أنا البجبرني أعيش في الهم والغم دا شنو ؟
دا السؤال المفروض ينطرح يا دينق ..
قد تقول دي قنواتنا عشان ثقافتنا وتراثنا والذي منه ..
طيب لماذا هارموني وعندك النيل الأزرق والتلفزيون القومي وزول وهلمجرا ..
أتمنى دائماً أن يكون نقدنا للفائدة وأن يصب لمصحلة الجهة المنتقدة لتطويرها وليس الهجوم عليها فقط ..

Quote: شئ مؤسف الذي أراه اليومين ديل في القنوات السودانية خصوصا قناة هارموني.

أتمنى أن لا يدوم أسفك وأن نرى قنوات فضائية متميزة تبرز ثقافاتنا السودانية وإبداع سوداني حقيقي ..

يامعصتم
لو لقيت ليك برنامج سمح يعني ممتع ومنسق وحديث مفيد اخير من مئات القنوات التانية
لكن القنوات السودانية تجبرك على ان تشاهد المئات غيرها

قناة هارموني بها مشكلة تقنية بالصوت ، أما برامجها فهي كسائر برامج المعدين السودانيين
فكرة واحدة متكررة : محاورة وفنان قاعد جنبهم بعد شوية يغني !!

الإعلانات التجارية ترتفع قيمتها في ساعات البث المحببة وبذلك تضخ أموال للقنوات ولمنتجي
الأفلام والمسلسلات ،، يعني لا بد منها،،

حلقة جميلة ضاعت برداءة الصوت والتسجيل : اولاد البنا وأجمل إختيار لاغنيات خالدات،،

يجب إيقاف بث هذه الحقات إن كانت رداءة الصوت شملت كل الحلقات المسجلة،،

==

Quote: لو لقيت ليك برنامج سمح يعني ممتع ومنسق وحديث مفيد اخير من مئات القنوات التانية

رمضان كريم يا شبكة ..
بالتأكيد الواحد عايز يشوف ليهو حاجة كويسه يستمتع بيها ويستفيد منها ..
المشكلة عامة وليست قناة واحدة ينالها الهجوم ..
دي مشكلة بلد بحاله في سياسته وثقافاته وموروثاته ..

Quote: لكن القنوات السودانية تجبرك على ان تشاهد المئات غيرها

يمكن يكون وقتنا لا يسمح بمشاهدة التلفزيون لفترات طويلة لذلك نشاهد ما نستفيد منه فقط ..
ويمكن أكثر القنوات التي تشدني هي الرياضية لذلك أحرص على متابعتها ولا يمنع أن نعرج لقنواتنا السودانية ومشاهدتها ..
هناك برامج فعلاً جميلة ومفيدة لكننا نحتاج للمزيد منها ..
لذلك أتمنى أن نيكون نقدنا في هذا الإتجاه وليس خصماً عليه ..

تحياتي ..

يا اخوانا

ازيكم ورمضان كريم

انا ما عارف الناس دي مفتكرة انه قناة هارموني دي بتبث برامجها من هوليوود واللا شنو

واللا من اوروبا او دبي

يا اخوانا هارموني دي قناة سودانية ومكاتبها في بحري شمال سوق سعد قشرة

يعني باختصار كده قناة الغلابة وهم الغالبية العظمى في السودان

يعني فيها كل حاجات السودان المعروفة

قناة ادروب

ومحمد صالح

وشول

والكردفاني

والفوراوي

وسيد احمد

يعني قناتنا نحن الغبش

يعني هارموني ما حتجيب مذيعات عراقيات زي الشروق او من اوروبا

ياهن اخواتنا وبناتنا

بتكلمن زينا وبيضحكن زينا ومننا وفينا

وبشبهونا

عشان كده بيقدمن البرامج قدر امكاينات البلد المتوفرة

من استوديوهات وكاميرات وديكورات

وشوية شوية ممكن يتطورن بتطور البلد

وزي ما الدنيا بتطور

كل شيء بيتطور

هارموني حتتطور

بس الناس يفيدوها بالنقد الهادف

وبي صراحة كدة الما عاجباهو هارموني

يعمل عمل صديقي العزيز معتصم دفع الله

يمشي يشوف قنوات تانية

لانه بي صراحة كده

قناة هارموني ليست مقرر إجباري للسودانيين كي يشاهدوها

كل زول ويشوف القناة البتعجبو

ولو عايز ينتقد ينتقد بهدف التطوير وليس للتقليل من عمل ومجهود فريق كامل من السودانيين المبدعين

استطاع ان يقف بالقناة ويقتطع لها من زمن المشاهدة لعدد كبير جدا من السودانيين وغير السودانيين

Quote: قناة هارموني ليست مقرر إجباري للسودانيين كي يشاهدوها كل زول ويشوف القناة البتعجبو ولو عايز ينتقد ينتقد بهدف التطوير وليس للتقليل من عمل ومجهود فريق كامل من السودانيين المبدعين استطاع ان يقف بالقناة ويقتطع لها من زمن المشاهدة لعدد كبير جدا من السودانيين وغير السودانيين

والله يا جمال ريحتني في حناني ..
دا كلام مظبوط وسليم ..
نحن لسه قاعدين ندافر ونتشاكل في خط المواصلات والواحد كان فطر ما بتغدى ..
عايزين بالقنوات الفضائية شنو ..
ياخي دا ترف ساي منكم والله في ناس لغاية الآن ما عندهم تلفزيونات يتفرجوا عليها ..


البوست الجايي مني أطالب فيهو الجعيلي بقفل القناة ولم قروشه عليه ..

دينق

ازيكـ

Quote: الابداع في السودان في خطر. هل هذا هو المستوى الحقيقي لللأبداع في السودان أم أن الذين يتحكمون في تلك القنوات لا علاقة لهم بالفن والابداع؟

السؤال دا موضوع بوست كااارب

انا في تقديري المشكلة في من يتحكمون في هذه القنوات ، فتقريبا كل الذين يديرون تلك القنوات هم في الاساس يطمعون في المال قبل المادة المقدمة ، فبالتالي المادة الاعلامية ما بتكون هدف اساسي

- الاعلاميون انفسهم مليانين علل لما مدفقين ، والشاشة اصبحت عبارة عن وجوه مليحة تنضح بالميك آب ، وعقول خاوية على عروشها، ظنا منهم ان المشاهد التافه العبيط دا كفاه هذا الوجه وياتي هذا على حساب المضمون

اما هارموني دي عايزة اعادة نظر بالجد يا الجعيلي (احيانا احس ان مذيعات هارموني حملة شهادة سودانية وقادة عربي)

نجي للافكار بتاعة البرامج ، الحمدلله الفكرة وااااااااااحدة ومكررة في كل قناة ، وهي في الاساس مقتبسة من فكرة اتتنا من خارج السودان

البرامج عبارة عن واحد من 2

حوار ممل ومميت
او
سهرة خارجية ، غنا وشفع يتراقصوا في الترابيز..............آآآآآآآآآآآآآآآآآآآآآآخ

دينق يا صاحبي!
كدي حاوِل صوم ليك يوم، ومن ثمّ أفتح هارموني، حتى تراها من منظور صائم..

Quote: البوست الجايي مني أطالب فيهو الجعيلي بقفل القناة ولم قروشه عليه ..

يا معتصم

انا ما بوافقك

معتصم ده واحد من 40 مليون سوداني

دخل المجال ده عن قناعة

وسوف يتطور بعمله الى الافضل

مثله كمثل اي زول عنده مشروع استثماري

لان الجعيلي يعرف جيدا

ان البقاء للافضل في كل المجالات

لذا لابد انه يعمل كثيرا

من اجلنا نحن الغبش

وخلي الناس الما غبش

يشوفو القنوات الما غبشة

Quote: نحن ذاتو CNN ما واقعة لينا بالذات البرنامج المهبب INSIDE AFRICA

ود الباوقة.

في برامج مماثلة زي البرنامج ده مختصة بقارة أسيا والشرق ، أنت البخليك تكره البرنامج الافريقي شنوا يا الاسود؟

Quote: الاسود؟

دينق اكمل ( الدؤولي )

Quote: ويا سيدي أتاريك مرطب لامن نسيت تهنيء كوستاوي الهجام برمضان...! والله عندي ليك طلبا كبير من هناك كان لقيت في طريقك سجنال 2 أصلي بالله إشتريهو ليا تعرف نقطة ضعفه السجنال والبنسون أند هدجنز أخوك التقول رويـال...

الاخ محمد ياسين خليفة.

مرطب وين في نار جهنم دي.
السيجنال تو ده أحسن تبعد منو. مرة أشتريتو لقيتوا قديم وما نافع. لكن مرة أشتريتوا في مطار هامبورج قبل سنة كده طلع عندهم نوع ممتاز جدا. الظاهر هم أصحاب الشئ ذاتها. أما البنسون ده أنا ما شفتوا لسه.

مشكلةقناة هارمونى مثل كل ا لفضائيات السودانية

ضعف المذيعين
تواضع القدرات فى ادارة الحوار

مذيع مبتدى مباشرة توكل ليهو مهمة ادارة حواروالظهور فى مواجهة الجمهور

ضعف الاعداد والعمل من خلف الشاشة
سوء اختيارللضيوف والوقوع فى خطا تكرار الاسماء المستضافة

التقليد وعدم القدرة على الاتيان بالافكار الجديدة

الانحيازات السياسية الواضحة

الملاحظة البرامج الناجحة تقدم من اعلاميين من خارج اجهزة التلفزيون
مثال السرقدور
حسين خوجلى
عمر خالد

النيل الازرق
اهم حاجة فى المذيعة انها تكون صفرا

حتى لو كان صوتا يضرس

كتب دينق

Quote: في برامج مماثلة زي البرنامج ده مختصة بقارة أسيا والشرق ، أنت البخليك تكره البرنامج الافريقي شنوا يا الاسود؟

يا دينق الراجل ود الباوقه دا عامل فيها عربي و حكومة كمان و عامل بكره أفريقا..

ود الباوقة يقد يهبش كيدا لمن ينزنق يقول انت متزمق وبوست متزمق وما عارف شنوا..
يعني بيرد بي ألفاظ خاصة بيهوا.

هههه

هارمونكي دي الحمد لله سبحانه وتعالي لسع ما شفتها ولا داير اشوفها بي كلامك دا يا دينق.
وبعدين من الاسم الشين "هارمونك" و القبيح واضح انها قناه متزمقة يا ود الباوقة.

Quote: أما البنسون ده أنا ما شفتوا لسه

إنتا فاضي من البحاري

Quote: أما البنسون ده أنا ما شفتوا لسه

إنتا فاضي من البحاري

Quote: أما البنسون ده أنا ما شفتوا لسه

إنتا فاضي من البحاري

دينق يا صاحبى
لسه انت قاعد هناك
بعدين دى قناة جلابه
قاعدين ننتقد ابونى نحن؟؟
بعدين زى ماقال كوستاوى حقارتك دى خليها
ما بتهنينا بى رمضان ليه؟؟
اها من هسه انت شخصيا ما ميرى كريسماس
تفطر وتتغدى على خير...
تخريمه:
ود الباوقه ما تجاهد لينا فى دينق باقى الشهر ده،،،

Quote: يقال ان قناة هارمونى تعانى من مشاكل مالية الناس شغالين ملح يعنى المذيعة ما بيدوها قروش يقول ليها نحنا ظهرناك فى الشاشة كمان نديك قروش فى حكاوى كتيرة عن التعثر فى دفع استحقاقات للعاملين

الاخ محمد سيد أحمد.


أتمنى أن لا يكون ذلك صحيحا.

ود الباوقه ما تجاهد لينا فى دينق باقى الشهر ده،،،

وكمان يا ود عمي ما تقول جانا قريب ...

Quote: حتى قناة النيل الأزرق يا دينق دعايات كميات الله يكون في عوننا غايتو.

الاخ الصادق.

كل الفضائيات السودانية يكشفون حقيقة ما يحدث في السودان من دمار وخراب.
والعجب لو أتفرجت في القناة الحكومية (السودان) دي كمان فيلم تاني.

توقف البث تماما لصلاة التراويح.

Quote: طيب الأكل والشراب دا يبيعوهو للناس المساكين ديل كيف .. يا دينق القنوات الفضائية مصدر دخلها من الدعايات والإعلانات الرمضانية يعني حق السنة كله بحصلوهو في رمضان .. على فكرة هنالك نصف ساعة كاملة من الدعايات قبل برنامج أغاني وأغاني في النيل الأزرق ..

الاخ معتصم دفع الله.

أنا لم أكن أتحدث عن الاعلانات المدفوعة الاجر ولكني كنت أتحدث عن الاعلانات بتاعت برامج هارموني في رمضان ، لأنها كانت بتاخد وقت طويل جدا من الوقت الحقيقي للبث. يمكن نفس الشئ ينطبق على الشروق والنيل الازرق ولكني أنا مهتم بقناة هارموني أكثر من بقية القنوات لأنها أحسن الاسواء .

Quote: وهل يستقيم الظل والعود أعوج .. دي مشكلة بلد كاملة وليست قناة فضائية واحدة .. للأسف هارموني كانت الضحية وهي محل الرهيفة عشان كده يكثر الهجوم عليها .. أنا طبعاً عندي مشكلة مع القنوات الفضائية السودانية قاعد أجي عليها في أوقات معينة ولأشياء محددة .. عندي غرام مع قنوات الرياضة وخصوصاً الأي آر تي والجزيرة والشوتايم أنا حارسهم عديل كده ومرات كده قاعد أعرج على قنوات الشوتايم أفلام والإم بي سي أفلام برضو يعني الوقت البقضيهو بكون في القنوات دي .. طيب طالما في المئات من القنوات أنا البجبرني أعيش في الهم والغم دا شنو ؟ دا السؤال المفروض ينطرح يا دينق .. قد تقول دي قنواتنا عشان ثقافتنا وتراثنا والذي منه .. طيب لماذا هارموني وعندك النيل الأزرق والتلفزيون القومي وزول وهلمجرا .. أتمنى دائماً أن يكون نقدنا للفائدة وأن يصب لمصحلة الجهة المنتقدة لتطويرها وليس الهجوم عليها فقط ..

أنا كنت حريص جدا أن أتفرج وأطلع على جميع القنوات السودانية خلال فترة وجودي في الخليج ، لأن مثل هذه القنوات لا نشاهدها في أمريكا . كما قلت أنت أن المشلكة هي مشكلة بلد بحالها، ولكن يا عزيزي معتصم حجم الدمار والخراب الذي أصاب عقول السودانين حجمه كبير ، وطريقة تقليد بعض الثقافات والقنوات الاخرى لدي القنوات السودانية شئ يدعوا للخجل.

آى والله .. صدقت يا دينق
هارمونى (هباب) مصفى ...
أما تلفزيون السودان ونسخته الأخرى (الشروق)
فديل إعتبرهم (مافيش نهائى) ...

الناس ديل جادين ... فى مسألة القنوات دى؟؟؟؟؟

الاخ دينق
تحيه طيبه
عهدتك موضوعيا ولكن اعتقد انه جانبك الصواب؟اعتقاد
اولا لماذا هارمونى وهل تعرف عنها كثيرا كيف قامت وكيف تعمل
وماهى هارمونى ومن اين اتت؟
حتى تفتح الباب لكل ما هو غير موضوعى وغير حقيقى فى الكلام عن هارمونى؟
اطرح اسئلتك بشكل طبيعى وسوف تجد الاجابه؟
وعينك لى الفيل تطعن فى ضلوا؟؟
ولى عوده
انور عبد الرحمن

Quote: قناة هارموني بها مشكلة تقنية بالصوت ، أما برامجها فهي كسائر برامج المعدين السودانيين فكرة واحدة متكررة : محاورة وفنان قاعد جنبهم بعد شوية يغني !! الإعلانات التجارية ترتفع قيمتها في ساعات البث المحببة وبذلك تضخ أموال للقنوات ولمنتجي الأفلام والمسلسلات ،، يعني لا بد منها،، حلقة جميلة ضاعت برداءة الصوت والتسجيل : اولاد البنا وأجمل إختيار لاغنيات خالدات،، يجب إيقاف بث هذه الحقات إن كانت رداءة الصوت شملت كل الحلقات المسجلة،،

الاخ عبد اللطيف بكري .

كل القنوات السودانية توجد بهم مشاكل فنية كبيرة . نوع عدسات التصوير ، نوع الاضائة ، مكياج المذيعات ، تقنيات الصوت والصورة . طبعا ملاحظاتي دي تعتبرملاحظات شخص متفرج فقط ولكن إذا تحدث شخص خبير فمن المؤكد بأنه قد يكشف الكثير . قبل يومين عرض تلفزيون السودان فيديو مسجل عن رمضان في أمريكا ، مدة الفيديو كانت أقل من خمسة دقائق ولكن كان نوع التسجيل ردئ جدا جدا .

الاخ جمال السنوسي .

قناة هارموني وبقية الفضائيات السودانية في نهاية الامر يخدمون خط المؤتمر الوطني .

يا دينق ما تخليك موضوعى؟؟
مؤتمر شنو وهلوسه شنو؟
وين الشركاء؟؟ ما ثروه وسلطه؟
عشان كده يا دينق العب ارضى وقبل ما تقول هباب وتعابير غير مقبوله حتى على المستوى الذوقى
انت ليس من الداعمين لهارمونى حتى الدفع المعنوى عندك هو جفاء
ولكن تظل هارمونى عروس الفضائيات السودانيه
تعترف بكل صور والوان السودان اعترافا ولي ديكورا
هارمونى ليست قناه تقضى بها اجازتك وانما برنامج كبير
فى وقت وجيز لم يتجاوز السنتان ونيف حجزت مقعد المنافسه مع اعرق الفضائيات
ادعموا الاعلام الجاد والاستراتيجى مالا وفكرا ورايا تجدوا السودان متقدما
قولوا كما تقولوا الان انطباعا وعدم معرفه نذهب الى درك اسفل؟
لكم الود

أبوغيداء رمضان كريم.. من زماااان شديد بفتش لي واحد من ناس هارموني.. بعد غياب نادية عن المنبر.. ياخي شنو سر اللون الأسود في كل خلفيات البرامج في هارموني.. لون أسود مزعج جدا جدا.. ويعكس عتمة شديدة وضيق شديد بالنسبة للمشاهدين.. بالجد عايزك تنبه المخرجين والمعدين والمقدمين.. لإنو يتفرجوا على البرامج ويلاحظوا أكتر حاجة للخلفية السودااااااااء جدا.. وياريت لو يتم التغيير لألوان فرايحية شوية.. زرقة السماء مثلاً..
الكلام ده تقريباً في كل البرامج اللي شاهدتها في هارموني: بالدليل القاطع، مواجهة، وسهرات دكتور مين كده ما بعرفو.. حتى الدعايات والاعلان برضو فيها خلفيات سوداء مزعجة جدا..

Quote: السؤال دا موضوع بوست كااارب انا في تقديري المشكلة في من يتحكمون في هذه القنوات ، فتقريبا كل الذين يديرون تلك القنوات هم في الاساس يطمعون في المال قبل المادة المقدمة ، فبالتالي المادة الاعلامية ما بتكون هدف اساسي - الاعلاميون انفسهم مليانين علل لما مدفقين ، والشاشة اصبحت عبارة عن وجوه مليحة تنضح بالميك آب ، وعقول خاوية على عروشها، ظنا منهم ان المشاهد التافه العبيط دا كفاه هذا الوجه وياتي هذا على حساب المضمون اما هارموني دي عايزة اعادة نظر بالجد يا الجعيلي (احيانا احس ان مذيعات هارموني حملة شهادة سودانية وقادة عربي) نجي للافكار بتاعة البرامج ، الحمدلله الفكرة وااااااااااحدة ومكررة في كل قناة ، وهي في الاساس مقتبسة من فكرة اتتنا من خارج السودان البرامج عبارة عن واحد من 2 حوار ممل ومميت او سهرة خارجية ، غنا وشفع يتراقصوا في الترابيز..............آآآآآآآآآآآآآآآآآآآآآآخ

شمائل .

كلامك ده طبعا أنا أتفقك معك في جزء منه . أتفق معك في غاية القناة التجارية وهذا ليس بعيب طبعا ، ولكن العيب هو أن يتم تقديم مادة بطريقة ممسوخة ومشوهة وبواسطة تقنيات عفى عنها الزمن . أما مقدمي البرامج أنا أعتقد بأنهم لا بأس بهم/هن . وحتى لو كانوا أفضل مذيعين أو مذيعات في العالم ويعملون في هذه القناة وبهذه الطريقة فلن نستطيع أن نرى إمكانياتهم الحقيقية .

قناة هارموني وبقية الفضائيات السودانية في نهاية الامر يخدمون خط المؤتمر الوطني
طيب يا دينق ما كان تبدأ بالشروق اللي عندها سهرة واقفين فيها ناس المؤتمر بالصف.
ما حقتم نحن الدخلنا شنو

Quote: دينق يا صاحبي! كدي حاوِل صوم ليك يوم، ومن ثمّ أفتح هارموني، حتى تراها من منظور صائم..

ياسر طيفور

سلامات

يعني أنت دايرني أصوم وأفطر على بصلة (هارموني) ؟

بالمناسبة يا جماعة .

علشان ما تسرحوا بعيد .

هارموني دي بي هبابة ده فهي أحسن من بقية القنوات السودانية التي شاهدتها . السودان ، الشروق والنيل الازرق . والتقيم ده من حيث المواد التي تقدم .

..
.

Quote: قناة هارموني، مبالغة في الهباب.

Quote: الابداع في السودان في خطر. هل هذا هو المستوى الحقيقي لللأبداع في السودان أم أن الذين يتحكمون في تلك القنوات لا علاقة لهم بالفن والابداع؟

Quote: هارموني دي بي هبابة ده فهي أحسن من قية القنوات السودانية التي شاهدتها . السودان ، الشروق والنيل الازرق . والتقيم ده من حيث المواد التي تقدم .

دينق
ازيك
ورمضان كريم علينا
الواحد غاب اسبوعين جا لقاك بتتكلم عن الابداع
والتقييم والمتابعة والبرامج ..!!
والله انت ماك هين .. بتتقدم بسرعة الصاروخ


_______

الغريبة امبارح وفى جلسة سحور ضمت الاستاذ معتصم الجعيلى
وشقيقة محمد والمخرج مهند دبورا ..
قدر معتصم ارائك لكن ما عارف على اساس هجومك على هارمونى
ولا توضيحك بأنها افضل السيئين ..

Quote: توقف البث تماما لصلاة التراويح

لا تعليق ..!!

Quote: من زماااان شديد بفتش لي واحد من ناس هارموني.. بعد غياب نادية عن المنبر.. ياخي شنو سر اللون الأسود في كل خلفيات البرامج في هارموني.. لون أسود مزعج جدا جدا.. ويعكس عتمة شديدة وضيق شديد بالنسبة للمشاهدين.. بالجد عايزك تنبه المخرجين والمعدين والمقدمين.. لإنو يتفرجوا على البرامج ويلاحظوا أكتر حاجة للخلفية السودااااااااء جدا.. وياريت لو يتم التغيير لألوان فرايحية شوية.. زرقة السماء مثلاً.. الكلام ده تقريباً في كل البرامج اللي شاهدتها في هارموني: بالدليل القاطع، مواجهة، وسهرات دكتور مين كده ما بعرفو.. حتى الدعايات والاعلان برضو فيها خلفيات سوداء مزعجة جدا..

يا تبلدينا خلي الجعيلي برضو يدينا رأي في آرائي الفوق دي..

Quote: يا دينق الراجل ود الباوقه دا عامل فيها عربي و حكومة كمان و عامل بكره أفريقا.. ود الباوقة يقد يهبش كيدا لمن ينزنق يقول انت متزمق وبوست متزمق وما عارف شنوا.. يعني بيرد بي ألفاظ خاصة بيهوا.

الاخ أحمد محمد بشير .

عروبة ناس ود الباوقة دي عروبة محلية ساكت . أما خارج السودان فيتم تصنيفهم كأفارقة ، وطبعا هنالك من يصاب بصدمة .

إنتا فاضي من البحاري

لا اليومين ديل شيشة

Quote: دينق يا صاحبى لسه انت قاعد هناك بعدين دى قناة جلابه قاعدين ننتقد ابونى نحن؟؟ بعدين زى ماقال كوستاوى حقارتك دى خليها ما بتهنينا بى رمضان ليه؟؟ اها من هسه انت شخصيا ما ميرى كريسماس تفطر وتتغدى على خير... تخريمه: ود الباوقه ما تجاهد لينا فى دينق باقى الشهر ده،،،

ود الموج .

طيب البوست الليأنت فاتحوا في قناة الشروق ده كان بوست تهنئة لأدائهم الجيد ؟
يا خوي القصة كلها جايطة سلطة ساكت . بعدين القنوات الجنوبية دي أنا لسه ما أتفرجت فيها ، هي وقناة زول .


بعدين أنت زعلان من ود الباوقة ده ولا شنوا ؟
خلي الراجل ياكل عيشوا ساكت في السعودية وما تجيب له الهوا .

الاخ دينق....

الرجاء التحدث عن الاستثناءات.......هو شنو الما مهبب يازول؟

صديق

Quote: ود الباوقه ما تجاهد لينا فى دينق باقى الشهر ده،،، وكمان يا ود عمي ما تقول جانا قريب ...

ود الباوقة .

أنت مؤتمر وطني وود الموج حركة شعبية . أوعك تسمع كلاموا . لأنوا خلاص داير يتخلص منك .
أوعك ترمي نفسك في التهلكة .

Quote: الاخ دينق تحيه طيبه عهدتك موضوعيا ولكن اعتقد انه جانبك الصواب؟اعتقاد اولا لماذا هارمونى وهل تعرف عنها كثيرا كيف قامت وكيف تعمل وماهى هارمونى ومن اين اتت؟ حتى تفتح الباب لكل ما هو غير موضوعى وغير حقيقى فى الكلام عن هارمونى؟ اطرح اسئلتك بشكل طبيعى وسوف تجد الاجابه؟ وعينك لى الفيل تطعن فى ضلوا؟؟ ولى عوده انور عبد الرحمن

الاخ أنور .

كنت أتوقع منك أن تدلني عن النقاط والملاحظات التي زكرتها أنا عن قناة هارموني وهي غير "موضوعية" كما تفضلت أنت وزكرت ذلك . ثم أنا متفرج عادي في للقنوات السودانية وعند تقيمها لا أعتقد أن تمويل القنوات أو الجهات التي تقف من خلفها قد تغير تقيمنا للفضائيات السودانية .

Quote: يا دينق ما تخليك موضوعى؟؟ مؤتمر شنو وهلوسه شنو؟ وين الشركاء؟؟ ما ثروه وسلطه؟ عشان كده يا دينق العب ارضى وقبل ما تقول هباب وتعابير غير مقبوله حتى على المستوى الذوقى انت ليس من الداعمين لهارمونى حتى الدفع المعنوى عندك هو جفاء ولكن تظل هارمونى عروس الفضائيات السودانيه تعترف بكل صور والوان السودان اعترافا ولي ديكورا هارمونى ليست قناه تقضى بها اجازتك وانما برنامج كبير فى وقت وجيز لم يتجاوز السنتان ونيف حجزت مقعد المنافسه مع اعرق الفضائيات ادعموا الاعلام الجاد والاستراتيجى مالا وفكرا ورايا تجدوا السودان متقدما قولوا كما تقولوا الان انطباعا وعدم معرفه نذهب الى درك اسفل؟ لكم الود

أنور .

لا أعتقد بأن هنالك شخصان يختلفان في تبعية كل الفضائيات السودانية في نهاية الامر للمؤتمر الوطني . أما التعابير التي أستعملتها فهي مناسبة تماما لم يتم تقديمه وبالطريقة التي يقدم بها .
أنا شخص متفرج مثلي مثل غيري أما "داعما" كما تقول فهذا كلام غريب جدا . هل أي قناة أعجب ببرامجها يجب دعمها ؟ أما منافسات بقية الفضائيات وما شابه ذلك هذا حديث للأستهلاك فقط لا غير .