أماني ماها كانت ريدتا سمحي

09:57 PM Dec, 01 2015

سودانيز اون لاين
طارق جبريل-المغرب
مكتبتى
رابط مختصر

أنا عرفت ريدة الزمن دة ليه ماها لذيذي ضومة ضومة... ياخ إن بقت ما ردت في التليفون ظيييييييطك رسالة في الفيس... إن قالت كدي بلكتك ظيييييييييطك جلكسات في الواتس... إن حرنت شويي كدي ظيييييييييييطك تحانيس في الفايبر.. سوت اضان الحامل طرشة ضومة ضومة ... ظيييييييييييطك نحنحة صوت في الايمو.. إن بقت سوت روحها سلوى جني ظيييييييييييطك ترقد ارضي في الاسكايب.. ريدي ماها متعبة ياخ وفيها انين وتعب لذيذ ابو قنتي داك ورقاد واطة ضومة ضومة.. ريدة الكنكشة ديك.. الريدة ام متاوقة بالحيطة ديك... والمشاوير الكداري ديك.. وتسك غنمايتهم لحدي توصلها البيت من ناس المعونة وتظهر في عينها بطل حقيقي وحامي غنمايتهم ومصدر اللبن حق المغربية داك.. وحليل المحاحا في حلتهم علي كلـــــب الحر في حلتهم وكل مناك تدلق موية العدي في الشارع مع متاقة للباب كدي ونظرة تخليك ضومة ضومة تمشي تشُم الموية المدفقة ديك وعفنتها تبقالك ضومة ضومة متل ريحة الصندليي.. واصلها ان بقت ما ظهرت تتلصقلك في عمود أليل كهرباء وتقعد تدندن:
يا خلايق الله ابا ما يجى
قعدت فى الدكه ابا ما يجى
كتبت رسلت ابا مايجى
الحمام ركا ابا ما يجى
ورويحتك دي تتشحتف ومتل الدايري تمرق ضومة ضومة.. وان بقت تاوقت ساكت من شقشاق الباب تسويلا:
يا لبينة الصيف الحليب
يا المصفيه من السبيب
يا المعلقه فى المشلعيب
كان شربتها خاترى بيطيب
وإن كان لي جيوبك ديل قربن يقولن واااااضيقي.. تملاهن نبق وقنقليز ولالوب فشان تغمتوا ليها في يدينها إن بقى ربك رب الخير كتبلك تقيف قدامها وتقولها: نصيحي إنتي
واصلو ركبيك ديل يغلبن يشيلنك يتراقصن علي ضنب الضب وريقك دة ينشف متل الصايداك ملاريا.. ووكتين تقول كدي ايدك دي تطقش في ايدها اصلو صوف راسك يقيف افراق افراق متل الحديد الكابس المغنطيس..
والعجب إن المرسال جابلك جواب منها... عاد النار دي توقد فوقك.. لا تعرف تقعد تحت العنقريب ولا تصنقر فوقه ولا تتمغى وتدلي رويسك من الشناط (الكراب).. ومرات يبقالك تشيلو وتمشي في نص المنتزهة في الحرايي ديك تقراها... اصلو إن كان لي عوض كريمة كان يملالو كوريي بركاوي ويطلع في راس البيت ويدلدل كرعينو علي السباليق ويقعد يقرأ وتشوف في جضيماته يتنفخن ويتقلدمن علي الكركاسة في عجلة عم عبد الله..
وتقول كدي بعد تقرأ الجواب تشوف شرايط النخجي والجوعير وتجيب المسجل ابو باب مكسور علي الزول القاطعلو شلوفته وتسمع في «اشتقت ليك» وتتوحوح وترقد كاويق...
والعجب ان كان في حلتهم في عرس.. من صباحة الله تولع المكاوي وتقول كدي تدي القميص كوية وتعمل سيف للبنطلون وتلمع في الدبابة الماجروس الزرقا ديك تتفتف في الدِلِق وتلمع فيها ومرات تديها دعكة بي قشر الليمون.. وتقول كدي تنجعص فيهن وتمشي علي «اللعبة» وأول ما تشوفها لابسة فستان البردعي تقعد في اضان الكرسي وترفرفلها عويناتك واصلها ان ضحكت بي شوووووي كدي نار الله دي تنطلق فيك وتقوم كدي تديها «تويستي» وتنفرك زيييييييييييييييين...
ووكتين ترجع من اللعبة وبطاطيرك ملياني فلللل.. نان يا اللحاف والمخدة ما جاكن العذاب والموت يمين الواحد يتقلب فيهن وينفخ ويعضعض في لسانه لامن يقرب يقطعوا ويشيل ويتبسم وينطط في عيونه علي ضكر القعووي «القعونجة»: واجيدلي ضحكتلي واااااجيدلي..
أماني ماها كانت ريدتا سمحي ياخ..
إنا لله ياخ

الزول السمح طارق جبريل

نجضت الوصف نجاض

Quote: الزول السمح طارق جبريل نجضت الوصف نجاض

حبيبنا ياخ
داك زمنا براهو ياخي

طارق يا حبيب

ياخي ده حكي ممتع جدا

وقتين ترجع من الحفلي وبطاطيرك ملينة فلللل.
مبالغة

Quote: طارق يا حبيب ياخي ده حكي ممتع جدا وقتين ترجع من الحفلي وبطاطيرك ملينة فلللل. مبالغة

اماني ما كان الزمان زين يا الحبيب
ياخي كيفنك

وزي ما قال عزيزنا بلال زكريا في بوست مجاور ( توثيق (HD) تعجز عن مثله نيكون ، DX,FX، الله يخلي هذا الخيال المتمرد )

صدقت يا جمكسين، لم يعد للرسائل ذلك الألق القديم ، يمكن كلام حبوباتنا ( يا ولدي مافي حلاوه بدون نار) لازم نتعب ونغامر عشان الجواب يصل
والمظروف عليه ذلك الخط الشين البهيج ، والمعروف البنات كلللهن خطهن شين لدرجة السماحة ويضارع جماله ، في خاطر العاشقين ، أعتى لوحات
عصر النهضة غض النظر عن مآلات حالة العشق تلك. خط الحبيبه يفوق خط هيثرو في قيمته ويحمل بصمتها وأنفاسها ومستوى التحليق ويمكن
أن يوضح بكم ألف قدم فوق سطح البحر تطير معك ، لكن هسه يا جمكسين الإيميل والواتس هباب والحروف الإلكترونيه كلها واحده ، ما تعرف
الكاتباهو شيرين ولَ طارق ودجبرين ، عليه اللعنه.
حليل الورق المعطر والرجفه ال 9 درجات على مقياس ريختر.

Quote: وتدلي رويسك من الشناط (الكراب)..

هههه
واحد قال لي زمان عندهم كرَّاب شِدة ما واطي وحبالو مهروده كان رقدت فيهو نمل الأرض كله يقرصك


تسعدني شوفتك...

تحياتي للاصحاب هنا
وقالوا
من ما النسوان خلن دس القروش تحت السدر وسون المحافظ والشنط القريشات انعدمت بركتهن وطعمهن وريحتهن

Quote: تحياتي للاصحاب هنا وقالوا من ما النسوان خلن دس القروش تحت السدر وسون المحافظ والشنط القريشات انعدمت بركتهن وطعمهن وريحتهن

القريشات هينات يا حبيب الكلام علي الريدي ههههههههههههه

Quote: وزي ما قال عزيزنا بلال زكريا في بوست مجاور ( توثيق (HD) تعجز عن مثله نيكون ، DX,FX، الله يخلي هذا الخيال المتمرد ) صدقت يا جمكسين، لم يعد للرسائل ذلك الألق القديم ، يمكن كلام حبوباتنا ( يا ولدي مافي حلاوه بدون نار) لازم نتعب ونغامر عشان الجواب يصل والمظروف عليه ذلك الخط الشين البهيج ، والمعروف البنات كلللهن خطهن شين لدرجة السماحة ويضارع جماله ، في خاطر العاشقين ، أعتى لوحات عصر النهضة غض النظر عن مآلات حالة العشق تلك. خط الحبيبه يفوق خط هيثرو في قيمته ويحمل بصمتها وأنفاسها ومستوى التحليق ويمكن أن يوضح بكم ألف قدم فوق سطح البحر تطير معك ، لكن هسه يا جمكسين الإيميل والواتس هباب والحروف الإلكترونيه كلها واحده ، ما تعرف الكاتباهو شيرين ولَ طارق ودجبرين ، عليه اللعنه. حليل الورق المعطر والرجفه ال 9 درجات على مقياس ريختر. Quote: وتدلي رويسك من الشناط (الكراب).. هههه واحد قال لي زمان عندهم كرَّاب شِدة ما واطي وحبالو مهروده كان رقدت فيهو نمل الأرض كله يقرصك تسعدني شوفتك...

اوووووه حبيبنا الذي هناك ياخ
ياخ الجنيات ديل عندهم حب ممصرن كدة زي حلاوة قطن ياخ هههههههههههههههههههههههههه
وحات سيدي وسيدك مانعني منكم الشديد القوي

Quote: ريدي ماها متعبة ياخ وفيها انين وتعب لذيذ ابو قنتي داك ورقاد واطة ضومة ضومة.. ريدة الكنكشة ديك.. الريدة ام متاوقة بالحيطة ديك... والمشاوير الكداري ديك..

وظيييطتتك ...... يا ود جبرين يا فنان ...

عالم بطااله ...

ود جبرين سلام

***

والعجب ان كان في حلتهم في عرس.. من صباحة الله تولع المكاوي وتقول كدي تدي القميص كوية وتعمل سيف للبنطلون وتلمع في الدبابة الماجروس الزرقا ديك تتفتف في الدِلِق وتلمع فيها ومرات تديها دعكة

***

دة تصوير ديجيتالي
دمتم

..يا مسنوووح .. لو في زول .. صور الكلام دة .. تصوير .. ثلاثي الأبعاد .. يا ربي ح يطلع كيف ..؟؟..

طارق ود عمي جبرين ,

اماني ماك بكاييي!!

انت يبقالي بس حبيت البنوت كلهن زمان !

لكن عاد وصفك دا في ناس كتار بيقالون بس تنقيليسي عدييل !

يا زول انت غررقت في الوصف البطان ديل كولهون ماهن فاهمين دي !!

ملحوظي:
ان جيت للحق وصفك خاتي القول وكلام جايبو قطر كريمي اسع دا !!

شبه اتاريها كانت مدرسة !

عيللي انت اخرابا باقيلي ما كوت قعد تقرأ شي كوت مباري البنوت ,

لامن ودر حجباتك كلهن !

ست البنات.

طارق جبريل أيها الحكاي العجيب..
تنفرد بالقون ولا تزال..
عيني بارده ياخ.

يا سلام يا طارق انبساطى زايده على القوانبن

بس نان انت اخرابه وقت مشتاق قدر دا ما تاخدلك خفسة
تتمطى فوق درب السوق قدام الخلوة بعد العشاء
وتجيبلك برنجايه من عبدالسلام ولا العوضابى
تشوف نور السياره يجهر فيك من خور البغاديد
ولا يمكن تصادف لعبه بى صديق يغنى كبرت وما لقيتلى عزب نديدى
والسر يبشر .
تلك ايام ياسيدى نقشنا على الجبين

Quote: يا سلام يا طارق انبساطى زايده على القوانبن بس نان انت اخرابه وقت مشتاق قدر دا ما تاخدلك خفسة تتمطى فوق درب السوق قدام الخلوة بعد العشاء وتجيبلك برنجايه من عبدالسلام ولا العوضابى تشوف نور السياره يجهر فيك من خور البغاديد ولا يمكن تصادف لعبه بى صديق يغنى كبرت وما لقيتلى عزب نديدى والسر يبشر . تلك ايام ياسيدى نقشنا على الجبين

كتلتني يا الحبيب يعلم الله
اشتهيت اهلي ياخ والقرونة والبغاديد والكرسناب

Quote: طارق جبريل أيها الحكاي العجيب.. تنفرد بالقون ولا تزال.. عيني بارده ياخ.

يا حبيب الله يجبر بي خاطرك ياخ

Quote: طارق ود عمي جبرين , اماني ماك بكاييي!! انت يبقالي بس حبيت البنوت كلهن زمان ! لكن عاد وصفك دا في ناس كتار بيقالون بس تنقيليسي عدييل ! يا زول انت غررقت في الوصف البطان ديل كولهون ماهن فاهمين دي !! ملحوظي: ان جيت للحق وصفك خاتي القول وكلام جايبو قطر كريمي اسع دا !! شبه اتاريها كانت مدرسة ! عيللي انت اخرابا باقيلي ما كوت قعد تقرأ شي كوت مباري البنوت , لامن ودر حجباتك كلهن ! ست البنات.

اوووووووووه ستهن لي حدهن
النبي فيك ما تشيلي حالي هههههههههههههههههههههههههههههههههه

Quote: ..يا مسنوووح .. لو في زول .. صور الكلام دة .. تصوير .. ثلاثي الأبعاد .. يا ربي ح يطلع كيف ..؟؟..

حا يطلع قرقوش مغتش في كباية شاي ههههههههههههههه

Quote: ود جبرين سلام *** والعجب ان كان في حلتهم في عرس.. من صباحة الله تولع المكاوي وتقول كدي تدي القميص كوية وتعمل سيف للبنطلون وتلمع في الدبابة الماجروس الزرقا ديك تتفتف في الدِلِق وتلمع فيها ومرات تديها دعكة *** دة تصوير ديجيتالي دمتم

أبا جهينة أيها الجميل ياخ

Quote: وظيييطتتك ...... يا ود جبرين يا فنان ... عالم بطااله .

يا حبيب كيفنك ياخ

Quote: ان بقت ما ظهرت تتلصقلك في عمود أليل كهرباء

ياسلام ياطارق ياخى والله انك رائع
وصف واقعي جميل لزمن جميل
تفريبا ده ماحصل لمعظم ابناء جيلنا بعد التمرين جرى للعامود القدام بيتهم عشان نظرة
اثرت فينا المواجع ياخي على زمن المحبة النبيلة والمودة الصادقة
ﻛﺎﻧﺖ ﺍﻳﺎﻡ ﺳﻌﻴﺪﺓ ﺭﺑﻰ ﻣﻨﺎﻯ ﺗﻌﻴﺪة
مع تحياتي

Quote: أنا عرفت ريدة الزمن دة ليه ماها لذيذي ضومة ضومة

تأسرني لهجة الشاقية فهي مموسقة ومتخمة بالحنّية زي اللهجة الايرلندية!

Quote: وقالوا من ما النسوان خلن دس القروش تحت السدر وسون المحافظ والشنط القريشات انعدمت بركتهن وطعمهن وريحتهن

أوسكار يا عبد الحفيظ ابو سن.

محبتي

ود خالتي ...
مشتاقين ياخ !

Quote: ان بقت ما ظهرت تتلصقلك في عمود أليل كهرباء

والله أنا الكان بزعلني ..
تجي ويكون فى واحد متلصق فيها وتقول ليك ده ود عمتي جاي من قرن الضب إجازي !

تسلم أخى طارق إبداع إبداع...

Quote: تسلم أخى طارق إبداع إبداع...

استاذنا سمعة كيفنك ياخ

Quote: ود خالتي ... مشتاقين ياخ ! Quote: ان بقت ما ظهرت تتلصقلك في عمود أليل كهرباء والله أنا الكان بزعلني .. تجي ويكون فى واحد متلصق فيها وتقول ليك ده ود عمتي جاي من قرن الضب إجازي !

ههههههههههههههههههههههههههههههههههههه
ود الخالة اتخيلت شكلك ههههههههههههههههههههه

Quote: تأسرني لهجة الشاقية فهي مموسقة ومتخمة بالحنّية زي اللهجة الايرلندية!

حبيبنا الذي هنااااااك هناااااااااااااااااااااك

Quote: ياسلام ياطارق ياخى والله انك رائع وصف واقعي جميل لزمن جميل تفريبا ده ماحصل لمعظم ابناء جيلنا بعد التمرين جرى للعامود القدام بيتهم عشان نظرة اثرت فينا المواجع ياخي على زمن المحبة النبيلة والمودة الصادقة ﻛﺎﻧﺖ ﺍﻳﺎﻡ ﺳﻌﻴﺪﺓ ﺭﺑﻰ ﻣﻨﺎﻯ ﺗﻌﻴﺪة مع تحياتي

داك زمن عجيب ياخ ما بيتكرر
زمن كل شي كان فيه عنده نكهة وعنده طعم

جميل يا جميل

تعرف في أجازتي دي الآخيرة دي في عيد رمضان أول مرة أزور منطقة الشايقية وحضرت لي عرس أقارب هناك ..

كل ما أعاين في الجناين وبيوت الطين يتخيلي طارق جبريل يجي مارق من واحد من الحيشان دي .. ولا لغة الحوار .. أهلنا الشوايقة في المدن الثانية حتى في الغربة يتحدثوا بلهجة مختلفة يمكن مخففة عن لهجتهم المستخدمة في بطن الديار . وأنت بتكتب بها هي ذاتها ..
عشان كدة حروفك فيها ريحة الدفيق والمدين والصفوري والمريق وحرف القراصة ..

با لله كثر منها ومتعنا

الله يمتعك بعافية لاتنعدم ولا تنقطع

Quote: يا خلايق الله ابا ما يجى قعدت فى الدكه ابا ما يجى كتبت رسلت ابا مايجى الحمام ركا ابا ما يجى

عندنا في البلد في الشمال .. أذكر النعجة كان تحب الورق أكثر من القش
إذا لقت ورقة كراس على طول خطف ..
الزول شال ورق وكتب ( أحبك ) رمى الورقة قدام البيت الحبيبة ..
ولكن من حظه السيء الرسالة كانت من نصيب النعجة ..

يا سلام .. يا طارق عوضت فترة غيابك عن الوحوش ..

مودتي .. لأهلي الشايقية

حبكم داك يا طارق ياهو (الحب في زمن الكوليرا) ...

بعدين ياخ اتعلم دي مفروض تكون ايقونة البوست ...

تحياتي لك ولضيوفك يا طارق يا جميل ...

Quote: حبكم داك يا طارق ياهو (الحب في زمن الكوليرا) ... بعدين ياخ اتعلم دي مفروض تكون ايقونة البوست ... تحياتي لك ولضيوفك يا طارق يا جميل ...

يا حبيب انا كان بعرف اسوي كدة كان حكمت السودان

Quote: عندنا في البلد في الشمال .. أذكر النعجة كان تحب الورق أكثر من القش إذا لقت ورقة كراس على طول خطف .. الزول شال ورق وكتب ( أحبك ) رمى الورقة قدام البيت الحبيبة .. ولكن من حظه السيء الرسالة كانت من نصيب النعجة .. يا سلام .. يا طارق عوضت فترة غيابك عن الوحوش .. مودتي .. لأهلي الشايقية

ستاذنا الجميل علي
ياخي كيفنك يا حبيب

Quote: جميل يا جميل تعرف في أجازتي دي الآخيرة دي في عيد رمضان أول مرة أزور منطقة الشايقية وحضرت لي عرس أقارب هناك .. كل ما أعاين في الجناين وبيوت الطين يتخيلي طارق جبريل يجي مارق من واحد من الحيشان دي .. ولا لغة الحوار .. أهلنا الشوايقة في المدن الثانية حتى في الغربة يتحدثوا بلهجة مختلفة يمكن مخففة عن لهجتهم المستخدمة في بطن الديار . وأنت بتكتب بها هي ذاتها .. عشان كدة حروفك فيها ريحة الدفيق والمدين والصفوري والمريق وحرف القراصة .. با لله كثر منها ومتعنا الله يمتعك بعافية لاتنعدم ولا تنقطع

اوووووووووووووه حبيبنا ياخ
شرف لينا ياخ تمشي مناطقنا ديك
يا حبيب والله مشاغل الدنيا بس

Quote: Abu Eisa Sabar · يعمل لدى Abu Dhabi, UAE ود جبريل سلام ابداع والله... بس غيابك طال

مشاغل الدنيا يا حبيب