كانت القرية كعادتها ذلك المساء يلفها هدوء عميق، بدأ الظلام يتسرب إلى كتف «شبا» قاهرا خيوط النهار، لا شئ في الأفق سوى منظر النخيل يرتمي في أحضان النيل، ذلك «الإله الأفعى»، الأزقة مقفرة.. بعض ذكور اليمام لا زالت ترسل نغمات هديلها علها تفوز بأنثى لتنجب لها صغارا تكون امتدادا لوجودها.. «سكن» القرويون إلى «بيوتهم» بعد عناء طويل بين المعاول والأرض في انتظار أن تحبل وتجود بثمرها عليهم... جيئ بـ«اللبن المقنن» برائحته المميزة الشهية تلك وكان «القرقوش» حاضرا.. وكانت «المحنة» وحكاوي «حبوبتي نفيسي بت البغاديد» هي مسرحنا في بيت جدي «ود القرونة» في إحدى تلال شبا.. انتصف القمر في كبد السماء محفزا للغواية، نسائم من عبق الأرض تملأ المكان، لـ«الرملة» هنا طعم آخر في ليالي الصيف تلك، اليوم كان خميسا.. تناهت إلى أسماعنا ورفقائي مزمل الرحيمة ومجدي فاروق ومامون مكاوي ومبروك الطيب ونحن نقتعد الرمال «أنين» طمبور من نواحي «القلعة» و«الدوداب»، كان الصوت عذبا مليئا بالدفء.. «مشاويرك عديلة»، يا إلاهي إنه «صديق أحمد» صاح مزمل طربا، أينما كان صديق أحمد كانت صورة «عبد الله محمد محمد خير» حاضرة.. فالرجلين مثلا ثنائيا غنائيا أغنى وجداننا بالكثير من الطرب.. «أها ماشين ولا أمشي براي» صاح مامون متسائلا، فهو يعشق صديق أحمد حد الجنون.. «كيفن مانا ماشين»، رددت عليها بابتسامة خبيثة.. وكان أن «سرجنا حميرنا» في سبيل صديق أحمد ونغمات طمبوره الجميل.. كان صوت الطمبور يأتي إلى ونحن على «حميرنا» ثم يعبر إلى الضفة الأخرى ويعود مرة أخرى كأنما يحفزنا لحث «حميرنا» على إسراع الخطى حتى لا «تفوتنا اللعبة».. ما أنا وصلنا مكان «اللعبة» حتى جهرنا «نور الرتائن» المنصوبة أعلى «حوش» العرس، تركنا حميرنا لترتاح أسفل القرية عند النخيل وأسرعنا الخطى في طلب «النغم».. حين وصلنا كان «الدليب» يصدح حتى عنان السماء و«الصفاقون» يتبعون امرأة «تنقز» برشاقة كبيرة ويعطي «مُشاطها» «الشبال» يمنة ويسارا.. إنه فرح أحد أبنا القرية عاد من الاغتراب بعد خمس سنوات وجاء ليحتفي بالسعادة «عند منحنى النيل».. سرت فرحة المكان إلينا وأصابنا شئ من «النقزي» ونحن نقف خلف القوم... كان صديق أحمد مبدعا ونغمات طمبوره تأخذنا بعيدا إلى عوالم يصعب وصفها.. تغير إيقاع الطمبور إلى «الرتوتي» فدخل عبد الوهاب الحلبي وعلي عزاز «الدارة».. كانت مبارة في «النقزي» جائزتها «زغرودة» هنا و«أبشر» هناك... لم أر في حياتي شخصا يطوع عضلاته مع إيقاع الموسيقى كما فعل عبد الوهاب الحلبي.. تمايل الرجل هنا وهناك وملأ «الدارة» جيئا وذهابا وكان أصابع رجليه تنغرس في الرمل ثم تعلو من «نقرات الطمبور والرتوتي»... للفرح هنا طعم مختلف.. بساطة الناس ورحابة الأرض عند خاصرة النيل تصبغ الاحتفال بنكهتها.. طربنا وتمايلنا مع القوم وأفق السماء يصفر ويزرق حتى بدأ الليل ينهزم مع تباشير الفجر وآذان «جامع شبا».. عدنا محملين بالفرح وشاكرين لصديق أحمد أفاعيل تطريبه... إنا لله ياخ
عديلة عليك محل ماتمشي تمشي ياعديلة ارضيلو زي الغيمة رشي مشاويرك عديله عديله عليك عديله الكان قصيره الكان طويله عديله عليك اما انا الهماني راحتك اول الشي انت تامرني وعلي امرك بيمشي بس عليك توعدني ماتطول بيك غيبة وعد من انبل حبيب لي اجمل حبيبة فيك عرفتة الدنيا قاصيها وقريبه منك اتعلمت كيف اقدر اجيبا لامتين يانومي في رؤياي تصدق لامتين ياشوق مؤاني قليبي تحرق تاني جود بي لقياي زمني المفرق تاني يااجمل صباح في عمري اشرق ياحلات العشرة وكتين تبقى صح صح وياحلات الريدة وكتين تصفى تفرح وياحلات ليلا معاك مادرنا يصبح وياحلات صبحا تكون انت المصبح في الربيع قالو الزهور تنضر تفتح ياربيع في حضنو كم دفاني وارتح يايباب بستاني من غيرك مكردح والسموم في ام شير وغيرا ام شير تكتح حبك الخلاني لي زول مابجافي حبك العلمني انظم ليك قوافي حبك اكبر مهر لي طهري وعفافي اه بحبك دا اصلو حبك زيو مافي
Post: #2 Title: Re: صديق أحمد في شبا Author: سلمى الشيخ سلامة Date: 02-06-2015, 04:43 PM Parent: #1
طارق الزول الكتااااااااااااااااااااااااب تحية ومحبة صديق احمد ، احد ايقونات غناء الطمبور لم اكن استمع اليه رغم انى اعرفه بطريقة ما ، جاء يوما شقيقى الاصغرمحمد الشيخ وهو يدندن باغنية ما ، اغنية اسمعها لاول مرة ، من كلمات صديقى محمد الحسن سالم حميد رحمة الله عليه قلت لمحمد اعرف هذه القصيدة قال "وما بتعرفى المغنى مش ؟ " قلت : سمعت بيهو عند محمد صالح الشايقى السواق فى الاذاعة لكن ما بعرفه قال: ارحكى معاى نسمعك ياهو وقعدنا نسمع صديق احمد ، وجدت صوتا مغايرا ولحنا دافئا واداءا عجيبا ومن يومها بات احد الملازمين لى شكرا يا طارق شكرا حميما
Post: #3 Title: Re: صديق أحمد في شبا Author: طارق جبريل Date: 02-07-2015, 01:38 AM Parent: #2
Quote: طارق الزول الكتااااااااااااااااااااااااب تحية ومحبة صديق احمد ، احد ايقونات غناء الطمبور لم اكن استمع اليه رغم انى اعرفه بطريقة ما ، جاء يوما شقيقى الاصغرمحمد الشيخ وهو يدندن باغنية ما ، اغنية اسمعها لاول مرة ، من كلمات صديقى محمد الحسن سالم حميد رحمة الله عليه قلت لمحمد اعرف هذه القصيدة قال "وما بتعرفى المغنى مش ؟ " قلت : سمعت بيهو عند محمد صالح الشايقى السواق فى الاذاعة لكن ما بعرفه قال: ارحكى معاى نسمعك ياهو وقعدنا نسمع صديق احمد ، وجدت صوتا مغايرا ولحنا دافئا واداءا عجيبا ومن يومها بات احد الملازمين لى شكرا يا طارق شكرا حميما
اووووووووووووووووه سلوم ياخ صديق احمد يا سلمى عنده صوت ومقدرة على التطريب بتودي الزول لي حتات عجيبة عنده طاقة صوتية بتوصل الكلام بمقدرة عجيبة ياخ هو ومحمد كرم الله ومحمد جبارة الثلاثي دة صعب ذاتو تقول عنهم حاجة
ثم ازيك ياخ والله يجبر بي خاطرك شديد ياخ
Post: #4 Title: Re: صديق أحمد في شبا Author: طارق جبريل Date: 02-07-2015, 11:23 PM Parent: #3
الاخ طارق سلام اناضمك انا يا اخي صديق ده فنان فوق العادة ده فنان فنان انت بي صحك الزول ده انا عندي مافي مره جابت زيو لا اسع في فن الطمبور الجنا ده لما الاتنين القديم والحديث لونية متفردة وبصمة خاصة مميزة مافي زولا بيشبهو الصوت مو صوت نصاح ما شاء الله تبارك الله الكلام البيختارو بركاوي فرازة المرحوم عبدالله ما قصر معاهو وهو كمان اداهو حقو الله يديهو ويديك الصحة والعافية ارجو ان يمتد ويستمر هذا الخيط ليوثق لهذه القمة كتر من الغنا يا ود جبرين شكرا جزيلا
Post: #6 Title: Re: صديق أحمد في شبا Author: طارق جبريل Date: 02-09-2015, 00:19 AM Parent: #5
Quote: الاخ طارق سلام اناضمك انا يا اخي صديق ده فنان فوق العادة ده فنان فنان انت بي صحك الزول ده انا عندي مافي مره جابت زيو لا اسع في فن الطمبور الجنا ده لما الاتنين القديم والحديث لونية متفردة وبصمة خاصة مميزة مافي زولا بيشبهو الصوت مو صوت نصاح ما شاء الله تبارك الله الكلام البيختارو بركاوي فرازة المرحوم عبدالله ما قصر معاهو وهو كمان اداهو حقو الله يديهو ويديك الصحة والعافية ارجو ان يمتد ويستمر هذا الخيط ليوثق لهذه القمة كتر من الغنا يا ود جبرين شكرا جزيلا
فيك الخير يا ود العوض يا الحبيب صديق احمد اصله دربو براااااااااااهو زول عنده مواصفات متفردة ياخ
Post: #7 Title: Re: صديق أحمد في شبا Author: ghariba Date: 02-09-2015, 00:30 AM Parent: #1
اخ طارق طبعا شبا دي بلد اولاد خالاتي
ضمرة بغدادي د. التاج بغدادي المرحوم جلال بغدادي وجمال .................................. الخ
Post: #8 Title: Re: صديق أحمد في شبا Author: معاوية الزبير Date: 02-09-2015, 00:51 AM Parent: #7
داير الصُح، حناجركم كل فنان سانّيها بي مبرد بي مزاجو، وكلامكم كلام الجن، وحبكم زاتو مبالغات: شوف 51 حب دي في آخر القصيدة ما مبالغة !، الشئ كوشتينة!
Post: #10 Title: Re: صديق أحمد في شبا Author: طارق جبريل Date: 02-11-2015, 00:54 AM Parent: #8
Quote: داير الصُح، حناجركم كل فنان سانّيها بي مبرد بي مزاجو، وكلامكم كلام الجن، وحبكم زاتو مبالغات: شوف 51 حب دي في آخر القصيدة ما مبالغة !، الشئ كوشتينة!
يا عمك هسي دة ما شيل حال رسمي هههههههههههههههههههههههههههه
ثم ازيك ياخ
Post: #9 Title: Re: صديق أحمد في شبا Author: طارق جبريل Date: 02-09-2015, 11:18 AM Parent: #7
Quote: اخ طارق طبعا شبا دي بلد اولاد خالاتي
ضمرة بغدادي د. التاج بغدادي المرحوم جلال بغدادي وجمال .................................. الخ
