حسن المثقفاتي وعبده الميكانيكي..

حسن المثقفاتي وعبده الميكانيكي..
اصحاب فِرَد للطيش..
لكن ما بيتلاقوا الا يوم الخميس بالليل..
حسن موظف في وزارة الثقافة وعضو في حزب يساري..
يوميا بيرجع الحلة معاهو كمية جرايد وكتب..
بيقعد قدام البيت يقرأ أو يمشي للمنتديات والايام الثقافية..
عبده حياته كلها في المنطقة الصناعية.. حتى مفرداته ذاتها من نفس البيئة
حتى لو شاف ليه بت سمحة وشغالة «شل، أجيب، موبيل، توتال» بيقول ليها:
أحي أنا يا الرفارف..
أها يوم الخميس قريب المغربية عبدة بيجي لي حسن ويناديه:
يا مثقفاتي ارحكا ياخ.. «سليلة» الليلة بتقفل بدري وما بنلقى لينا «موية مقطرة»
وكدة «كربريترنا» بينفس يا ابو الثقافة وبيكون خميسنا «مبوش» ياخ..
عبدة بيرد عليه: ياخي انت جاهل ومحاولة انه الزول يرفع من قيمة الانسان جواك كلها فشلت
- يا مثقفاتي خلينا من الحنك العاضي دة ياخ «السِنَة» دي زي الاسبير الاصلي
بيلفحوها سريع سريع بعدين «حفصة» الليلة حا تكتل فراملنا ياخ..
- أرحكا ياخ.. انت ميؤس منك على مستوى رفع الوعي
- يا مثقفاتي أن عايز ارفع موية دماغي المقطرة ياخ عشان اعيش الجو
أول ما يصلوا عند «سليلة» في العشش عندهم ركن كدة براهم
و«سليلة» بتكون فارزة ليهم عيشتهم براهم و«أم فتفت مع الشطوط والأقاشي»
مسمياهم: بتاع الحيكومة وبتاع «أبيض ضميرك» وبتخلي حفصة تكون معاهم
وهي مقابلة باقي الزباين في الاوضة والراكوبة التانية..
أها أول ما «يتصلحوا» عبدة الميكانيكي بيقعد يديها بكية كدة:
حفصها يا حناني ياخ و«يغمزها» في نصها ويقول ليها: أحي أنا من دينمو النيسان دة..
- يا مغفل ياخي اتعامل مع حفصة دي ككيان.. كبني آدم.. أرقى بي مستواك شوية
- يا مثقفاتي بتذكرني بي حنان حبي الابدي زي مكنة البوكسي 78 ياخ
جاء ختفها مني واحد مثقف زيك ووداها السعودية... احييييي انا يا قلبي
ويقعد يبكي ويحضن حفصة.. بعد يتم جوعيرتو..
ولمن يسمع أحمد احساس بيغني في الراكوبة: على النجيلة جلسنا بيقول لي حسن:
كنت بوديها حديقة القرشي..

- انت يا عبده ما حصلت اطلعت علي كتب وقراية يعني..
- مطالعة قصدك
- ايوة
- يعني المطالعة دي بتخلي الزول مثقف
- ايوة بتوسع مداركك
- طيب انت قايم بينا ومثقفاتي واسبير ياباني اصلي اتاريني انا زيك واحد
- كيف
- ياخي انا قاري خمسة كتب «مُطالعة» في الابتدائي.. بالله هو ناس: طه القرشي
ديلاك ياهم الثقافة يا فَردة..
في صحتك يا زميل الثقافة..

طارق جبريل ... شخصيا,

إذن ... فهذا يوم مجيد,

بديت أقرا, لكن غالبتني نزعة الرد

فمرحب بقلمك الجميل والذي إفتقدناه وطويلا,


المثقافتي والميكانيكي سيكونا إستراحتى الفعلية,

المأذونه بالحكي الجميل والتوقيع الإجتماعي لأحوال

قوم عاديين, فقط قهرتهم الظروف وساءهم البخت.

... فلي قدام


أها ... آدي قعدة وجنس فرجيخة ...

ود جبرين: يجازي محنك يا اخ


ودي فرجيخة مع حيدر, ونشوف ,



___________________

فرجيخة: مصطلح رندوكي معتق , يقصد به الجلوس ارضا, وضم الرجلين تربيعا. ولا صح يا حيدر

ذكرتني يا ود جبرين قصة المثقفاتي الصاحبو ميكانيكي زى جماعتك ديل ...

كل يوم يسكرو سوا ... و سكرهم ياهو الأبيض ضميرك ...

واليوم المثقفاتي يكون عندو قعده مع اصحابو المثقفاتيه ...

بتحاشي يسوق معاهو صاحبو الميكانيكي عشان كلامو كلو رفارف و جلب ... وما شاكل ذلك ...

لغاية ما في يوم ماشين يقعدو في محله اتصلوا عليهو جماعه مثقفاتيه ( سكيلهم ) عالي جداً ... واصروا يجو يساهرو معاهم ...

فقال ليهو اسمعني انا مضطر اسوقك معاي ... لكن ديل جماعه ( سوفستيكيتد ) جدا ...

او تعملها لي عوادم ... ولمبات وكلامك الفارغ ده ... تسكت ... وترتفع لمستوي القعده ...

مشوا القعده ... والشراب ويسكي بس ...

كبوا الكاس الاول ... وصاحبو ساااكت حسب الاتفاق ...

والجماعه مدورين سياسه ... وده افراز طبيعي وده ما بعرف شنو ...

اها صاحبنا ساكت لغاية الكاس الخامس ...

الجماعه دايرين يعملو معاهو الواجب و يخلوهو يشارك بالكلام و ما لقو مدخل الا واحد قام سألو ...

ياخي معليش ... شبكناك ويسكي من ما جيت ... و ما سألناك تشرب شنو ...

انشالله الوسكي نافع معاك ؟

قال ليهم والله كويس ... لكن مشكلتو ( بياكل ) تلج كتير ...
_____________________________________
كن بخير يا حبيبنا ...

ود جبريل وصحبه
هههههه
تعرف المثقفين لامن يولعو بنظرو تنظير خطير , وبتفك الجدار المكبل لفكرهم وبتسقط التابوهات
ولامن ينكسر جد آخر الليل بتحولو لبشر عاديين , بنضمو عن هزايمهم العاطفية وأناهم السفلي وببقي المثقف والمثقفاتي والميكنيكي كلهم واحد يبحثون ويتحدثون عن حاجة واحدة
السكر زغاريد الاسمو ايه داك

Quote: ود جبريل وصحبه هههههه تعرف المثقفين لامن يولعو بنظرو تنظير خطير , وبتفك الجدار المكبل لفكرهم وبتسقط التابوهات ولامن ينكسر جد آخر الليل بتحولو لبشر عاديين , بنضمو عن هزايمهم العاطفية وأناهم السفلي وببقي المثقف والمثقفاتي والميكنيكي كلهم واحد يبحثون ويتحدثون عن حاجة واحدة السكر زغاريد الاسمو ايه داك

يعني يا حبيب عند «سليلة» يتساوى الناس

Quote: ذكرتني يا ود جبرين قصة المثقفاتي الصاحبو ميكانيكي زى جماعتك ديل ... كل يوم يسكرو سوا ... و سكرهم ياهو الأبيض ضميرك ... واليوم المثقفاتي يكون عندو قعده مع اصحابو المثقفاتيه ... بتحاشي يسوق معاهو صاحبو الميكانيكي عشان كلامو كلو رفارف و جلب ... وما شاكل ذلك ... لغاية ما في يوم ماشين يقعدو في محله اتصلوا عليهو جماعه مثقفاتيه ( سكيلهم ) عالي جداً ... واصروا يجو يساهرو معاهم ... فقال ليهو اسمعني انا مضطر اسوقك معاي ... لكن ديل جماعه ( سوفستيكيتد ) جدا ... او تعملها لي عوادم ... ولمبات وكلامك الفارغ ده ... تسكت ... وترتفع لمستوي القعده ... مشوا القعده ... والشراب ويسكي بس ... كبوا الكاس الاول ... وصاحبو ساااكت حسب الاتفاق ... والجماعه مدورين سياسه ... وده افراز طبيعي وده ما بعرف شنو ... اها صاحبنا ساكت لغاية الكاس الخامس ... الجماعه دايرين يعملو معاهو الواجب و يخلوهو يشارك بالكلام و ما لقو مدخل الا واحد قام سألو ... ياخي معليش ... شبكناك ويسكي من ما جيت ... و ما سألناك تشرب شنو ... انشالله الوسكي نافع معاك ؟ قال ليهم والله كويس ... لكن مشكلتو ( بياكل ) تلج كتير ... _____________________________________ كن بخير يا حبيبنا ...

يا حبيبنا
الوسكي بالغ ياخ

Quote: ود جبرين: يجازي محنك يا اخ ودي فرجيخة مع حيدر, ونشوف , ___________________ فرجيخة: مصطلح رندوكي معتق , يقصد به الجلوس ارضا, وضم الرجلين تربيعا. ولا صح يا حيدر

صحبك الورطة يا دوب وصل من السودان ولابد

Quote: طارق جبريل ... شخصيا, إذن ... فهذا يوم مجيد, بديت أقرا, لكن غالبتني نزعة الرد فمرحب بقلمك الجميل والذي إفتقدناه وطويلا, المثقافتي والميكانيكي سيكونا إستراحتى الفعلية, المأذونه بالحكي الجميل والتوقيع الإجتماعي لأحوال قوم عاديين, فقط قهرتهم الظروف وساءهم البخت. ... فلي قدام أها ... آدي قعدة وجنس فرجيخة ...

حيدر هول ناس قاسم
ياخي كيفنك ونعلك طيب في عضامك ديل

Quote: Abd El Rahman Tawfig اخوي ود جبرين والله الاقولو غلبني ضمة لكن عليك الله بي كم كرت اصلو ما تفول كرتين .... تلاتة يمكن اصدقك و الكتبتو ده فعلا حاصل و طوالي الخلاف بين الاتنين ديل هو السرد الملهم والمعبر عن الحالة الدفينة و المغيبة زمن الوعي و التي لا تخرج للعلن الا في ازمان الصفاء ........ ياخ اكتب و اكتب لتشبع و تملاء الجوف الأفرغ بفعل هؤلاء الأوباش Thursday at 11:32

هههههههههههههههههههههه
ود توفيق الله يجبر بي خاطرك ياخ