اشتهيت حوش بيتنا..

في الراكوبة في معلاق فيه كورية روب..
امي (رحمها الله) خاتة ليها صاج في لدايات بتعوس في الفطير وجنبها كانون فيه حلة وطالعة منها مفراكة ومرة مرة تفرك في البامية..
وفي الحوش في عنقريب فيه عدة مغسلة وجنبه بنبر وطشت فيه موية وســـــخانة..
واختي طالعي في بنبر بتتونس مع محاسن بالحيطة..
وجردل تحت الحنفية منتظرنه يتملي فشان نسقي الغنم..
واختي التانية خاتالا طشت في لستك وجنبها كوم غسيل وحلة قديمة فيها صابون سايح...
غوووغ غوووغ دة صوت ضكر الحمام البني ينادي في الانتايي حقتو...
مممم مييييع ممم مييع دة صوت العتوت يرضع من أمه..
كاااك كت كت كاااك.. الجدادي دايري ترمي البيض هي تكورك والديك يكورك وراها..
في ركن التُكل في جردل الوســـخ وطالعة منه مقشاشة..
الكـــلبي راقدي في ضُل الضحى ومتنيي وفيها تلاتة قُرادايات في ضهرها..
كيف قيلتو، قنبوا طولا، دبايوا دة الرادي معلق في الشعبة حقت الراكوبة...
في البرندة عشة خليل قاعدة في مخدتين في نص العنقريب تمشط في حبوبتي وجنبهن كوز نيدو فيه موية وقشر ليمون..
وقاعدين يقطعوا: بت التومة قالوا جاها عريس.. وحسنة بت ود حضري قالوا طلقوها..
أنا شايل لي «فريد» و«ضراب» ماشي ألعب مع جمال هجو ويدي التانية فيها «طرقة فطير» بقرض فيها....
بت الجريف داخلي من الباب وشايلال بستلي فيها تركين وصاقعي لي أمي: أماني ما لقيتلي تركين السرور عند ناس فاطني..
صوت من الشارع: المعا قزاز.. المعا قزاز..
صوت تاني: الجردقة الحرجل.. النبق النبق..






تليشة:
خلونا نطلع من الألم دة
انا غايتو فترتة منه
تعالوا أحكوا عن حيشان بيتكم

ياسلام عليك دائما
ممتع و دائمابتجترحالفرح

Quote: ياسلام عليك دائما ممتع و دائمابتجترحالفرح

ود المكي يا حبيب
الله يجبر بي خاطرك ياخي








تليشة:
صحبك داك ما لقيتوا ليه عروس

الساعة 9 صباحا ومحمد في السرير والشمس جات عليه .. امي في ضل الشاتي قاعدة تورق في الخدرة حقت ناس عفاف جابتها ليها كلتوم
يا ولد قوم الشمس جاتك ... وتحت الملاية محمد يكورك (اممممممممممم قايم قايم) .. يا ولد الشمس بتهرد الملايات ديل قوم ادخل لي جوه
يا حنان حنان؟ نعم - تعالي شيلي المرتبة دي الرسول الحكاية شنو انادي فيكم من قبيل مافي زول يجيني - ارخي الرادي ده اريتو راديا طاير البحمي الزول يمعكم
... اهلا اهلا يا حجة شامة ادخلي لي جوه
لالا والله ماشة قلت اشوف بتكم جات؟ باقي بنتنا ما جات
يا حنان حنان؟ اي حبوبة ؟؟؟ وينها الليلة نادية
نادية جنى بتاعو عيان وده المستشفى

الساعة 10 صباحا
هنا امدرمان اذاعة جمهورية السودان - نشره الاخبار
يا حنان جيبي الرادي ده النسمع الوفيات
بعد شوية ... الليلة وووب يا يمة الحي الله ... احي على الدنيا يا يمة تعالو اضربو لي لي اسماء ما تفوتني النمشي البكا سوا
اريتو يا يمه حال الخلا ... كر كر

اساعة 2 ظهر
اجري الحقو ادوني موية النبل ريقيده اريتو حر الكافر الما بختم محمد
محمد مرق؟
اي يمة
فطر؟
قال بفطر معاصحابو في الدكان
هي نان مشى وين اسة عالم الرياضة ببدا وبنقطع السلطة
سلام
اهلا حبابك يا امنة ادخلي لي جوة
الرسول سمعتي بالبكاء
كر على وجعني سمعتو في رادي السجم ده غير خبر الشوم ما بجيب
اجي سجمي نعلك فتيني
والله فتك شان قلت اجي احصل الغداء هنا باقي قالو ناس علوية وولادها جايننا العصر قلت ما بقدر اخلي البكا لي بكرة ناس محاسن ديل يوم بكاء ابوي والله بي الحافلة جو قبال الجنازة ما تمرق
(لقيتني كيف؟)

هيجت علينا الزكريات يا طارق

الله ارحم امى وامك يا طارق

وكل الامهات الى رحلوا عن دنيانا

ويطول فى عمر الاحياء يا رب

الساعة تسعة صباحا امي اول مرة تصحي متاخرة وتلقى البهمان رضعن وفااااااااااااتن مع امهاتن للغابة القريبة من طرف الحلة

لبست توبا حق الزراق وانعدلت متلهمي الغابة فيشان تجيب السخلان من امهن

ماشي في طريقا سفنجتا انقطعت

دنقرت خمشت المقطوعة وترست بنعال واحدي

الدنيا كانت درت والضريسة كانت نجيييييييييضة ويابسة اتلهمت ليك راحات امي والمسكينة جارييييييي وتعتب من طعنات الضريسى تمشي وتدنقر تتوحوح من طعنات الضريسا وكلوووو عشان تضمن ليها كباية لبن لينا ناكل بيها الرغيف وقت المغربية

نواصل جاني ضيف هسع وانا بكتب في كلامي دا

الضيوف كرهونا ياخ

ملعون يا بكري الخليتنا ندمن صقيعتك دي وصرنا وقت نكون نكتب ويجينا ضيف زى الجاء .................... ام اهلنا

Quote: هيجت علينا الزكريات يا طارق الله ارحم امى وامك يا طارق وكل الامهات الى رحلوا عن دنيانا ويطول فى عمر الاحياء يا رب

الله يرحم الفاتو يا حبيب
ويخلي لينا العقاب
الدنيي كانت سمحي وزيني يعلم الله

Quote: الساعة تسعة صباحا امي اول مرة تصحي متاخرة وتلقى البهمان رضعن وفااااااااااااتن مع امهاتن للغابة القريبة من طرف الحلة لبست توبا حق الزراق وانعدلت متلهمي الغابة فيشان تجيب السخلان من امهن ماشي في طريقا سفنجتا انقطعت دنقرت خمشت المقطوعة وترست بنعال واحدي الدنيا كانت درت والضريسة كانت نجيييييييييضة ويابسة اتلهمت ليك راحات امي والمسكينة جارييييييي وتعتب من طعنات الضريسى تمشي وتدنقر تتوحوح من طعنات الضريسا وكلوووو عشان تضمن ليها كباية لبن لينا ناكل بيها الرغيف وقت المغربية نواصل جاني ضيف هسع وانا بكتب في كلامي دا الضيوف كرهونا ياخ ملعون يا بكري الخليتنا ندمن صقيعتك دي وصرنا وقت نكون نكتب ويجينا ضيف زى الجاء .................... ام اهلنا

الضيف بالمغسة التغمتو
تعال تم نضميك دة يا مسنوح

Quote: الساعة 9 صباحا ومحمد في السرير والشمس جات عليه .. امي في ضل الشاتي قاعدة تورق في الخدرة حقت ناس عفاف جابتها ليها كلتوم يا ولد قوم الشمس جاتك ... وتحت الملاية محمد يكورك (اممممممممممم قايم قايم) .. يا ولد الشمس بتهرد الملايات ديل قوم ادخل لي جوه يا حنان حنان؟ نعم - تعالي شيلي المرتبة دي الرسول الحكاية شنو انادي فيكم من قبيل مافي زول يجيني - ارخي الرادي ده اريتو راديا طاير البحمي الزول يمعكم ... اهلا اهلا يا حجة شامة ادخلي لي جوه لالا والله ماشة قلت اشوف بتكم جات؟ باقي بنتنا ما جات يا حنان حنان؟ اي حبوبة ؟؟؟ وينها الليلة نادية نادية جنى بتاعو عيان وده المستشفى الساعة 10 صباحا هنا امدرمان اذاعة جمهورية السودان - نشره الاخبار يا حنان جيبي الرادي ده النسمع الوفيات بعد شوية ... الليلة وووب يا يمة الحي الله ... احي على الدنيا يا يمة تعالو اضربو لي لي اسماء ما تفوتني النمشي البكا سوا اريتو يا يمه حال الخلا ... كر كر اساعة 2 ظهر اجري الحقو ادوني موية النبل ريقيده اريتو حر الكافر الما بختم محمد محمد مرق؟ اي يمة فطر؟ قال بفطر معاصحابو في الدكان هي نان مشى وين اسة عالم الرياضة ببدا وبنقطع السلطة سلام اهلا حبابك يا امنة ادخلي لي جوة الرسول سمعتي بالبكاء كر على وجعني سمعتو في رادي السجم ده غير خبر الشوم ما بجيب اجي سجمي نعلك فتيني والله فتك شان قلت اجي احصل الغداء هنا باقي قالو ناس علوية وولادها جايننا العصر قلت ما بقدر اخلي البكا لي بكرة ناس محاسن ديل يوم بكاء ابوي والله بي الحافلة جو قبال الجنازة ما تمرق (لقيتني كيف؟)

يا الله يا ام سهى ياخي
النبي فيك يضريك تواصلي ياخي
ياخي داك زمن عجيب وسمح بالحيل

اشتهيت اشوف ابوي راقد في عنقريبو و خاتي الرادي في صدره ورافع الأريل ويجيك صوت نوال المدفعجي: هنا لندن..
اشتهيت اشوف صحن «السخينة» في نص الصينية وكلنا خاتين البنابر وقاعدين حولينو..
شجرة اللبلاب ماشة في الحيطة المن تالا ناس ام النصر وطالعي لااااعند راس الصالون...
شوال الفحم متكول في حيطة خالتي الزهرة وانا اطلع اتاوق في شجرة التمرهندي..
الجداد يتحاوم جنب الراكوبة القدام التُكل وواحد فيهو يغتس في الرملة ويكتح في جسمو
وجدادي سايقي سواسيوها قدامها وتكسرلهن في الفتريتة كت كت كت كت..
امي تولد في الغنمايي السودة وتدخل يدها وتمرق العتوت من رجلينو الشمال ووكتين تنتهي تمشي تسلقلها فتريتي وتجيبها للغنمايي
والمغربيي تحلبها وتسويلنا «اللبى» ونقعد نتجاغمو بالكواري..
يجوا ناس عمي مكندكين من قطر كريمة وشايلين طرود المنقة ولا المشرق ولا البركاوي وجوضومنا يبقن صُفور من كد المنقة..
اشوف في اخواتي ساواتلهن مربعت مربعات في الحوش ويلعبن في «بوربورة» «حجلة»

أخي العزيز طارق
تحياتي
رد الله غربتك ومتعك بالصحة والله أنت زول حنين وماك زول غربه ألله يصبرك لكين لغتك فنانه ياصديقي

يا أقرع بالله كيفك مشتاقون يا جمكسين شديد والحله في أنتظارك والبنيات اللي بتريدن برضو بسألوا عليك

أنا صاحي لكين مخي نيام ما تزعل مني كان غلتا

Quote: أخي العزيز طارق تحياتي رد الله غربتك ومتعك بالصحة والله أنت زول حنين وماك زول غربه ألله يصبرك لكين لغتك فنانه ياصديقي يا أقرع بالله كيفك مشتاقون يا جمكسين شديد والحله في أنتظارك والبنيات اللي بتريدن برضو بسألوا عليك أنا صاحي لكين مخي نيام ما تزعل مني كان غلتا

انت حا تصحى متين يا شقي الحال

السادسة والنصف صباحاً ، ينطلق صوت المنبه بموسيقى السيمفونية الخامسة لبيتهوفن ، تمتد يدي ، أعلى رأسي أضيء سماء الغرفة بنورها الخافت ، ممسكاً بريموت التكييف ، أوقفه ، يتزايد الضوء في الغرفة مع إزاحة الستائر المخملية للنافذة المطلة على الحديقة ،،
أشعة الشمس تتسلل رويداً رويداً من خلال أغصان الرويال بالم مخلفة ظلالاً متناشرة على زجاج النافذة ، يتواصل صوت المنبه بخفوت مثير،،

صباح الخير ،،

بونجورنو ،،

كماستاكا ،،

هاي سير،،

مسيكاقمي ،، (في وش كدا ماعرفت اجيبه)


تحايا الإستاف بالمنزل أتلقاها في رحلتي وأنا أنزل عتبات الدرج الأنيقة متجهاً نحو البهو العريض ثم إلى الحديقة،،

كراسي الخيزران الداكنة تبعث في النفس الإحساس بالعطلات والترحال إلى مرافيء بعيدة مع وجود الرويال بالم فتحاكي صباحات فلوريدا أو رمال هوااي،،

ترولي يحمل شيئاً من فطائر خفيفة وعصير البرتقال وقهوتي ،،

طارق : أرجوك غير رشاش الحديقة من أتجاه السيارة فأني أرى عليها ذرات الماء خصوصاً هذا اللون اللؤلؤي شديد التأثر، كما أرجو أن تغير التايمر ليبدأ في الخامسة صباحا فالجو أصبح يميل للبرودة هنا،،

ذهب في حاله وقد ضغط على ريموت السيارة لتسخينها،،

أشعلت غليوني بعد الإفطار ، تصفحت عناوين الصحيفة على عجل


ثم فجأة،، (موسيقى رعب)!!!

صحوت من نومي مذعورا على صوت الغلوبية تمسك بالطائر الذي دوخني وأنا اطارده إلى أن غفوت في نومتي تحت ظلٍ صغير لشجرة كرسان تعبانة في رمال كردفان،،
=
ذلك الحلم : أفسد علي ما تلاه من حياتي ، فقد عشت إلى هذا اليوم أبحث عن السعفات الذهبية المتدلية والستائر المخملية وروعة الإستاف العامل ، ثم بالتحديد : طارق الجنائني : الذي يقال بأنه غادر من يومها إلى فاس الماوراها ناس،،




مافي ناس برجوازيين (إن شاء الله جدد)يجوا يحكو لينا ذكرياتهم يفكونا من المشلعيب والكـلبي الملاني قراد ؟؟ ذبحتنا ياخ ،، ههههه

Quote: غوووغ غوووغ دة صوت ضكر الحمام البني ينادي في الانتايي حقتو... مممم مييييع ممم مييع دة صوت العتوت يرضع من أمه.. كاااك كت كت كاااك.. الجدادي دايري ترمي البيض هي تكورك والديك يكورك وراها.. الكـــلبي راقدي في ضُل الضحى ومتنيي وفيها تلاتة قُرادايات في ضهرها..

أصلو بيتكم دا كان قدر شنو ؟؟؟؟

Quote: في الراكوبة في معلاق فيه كورية روب.. امي (رحمها الله) خاتة ليها صاج في لدايات بتعوس في الفطير وجنبها كانون فيه حلة وطالعة منها مفراكة ومرة مرة تفرك في البامية.. وفي الحوش في عنقريب فيه عدة مغسلة وجنبه بنبر وطشت فيه موية وســـــخانة.. واختي طالعي في بنبر بتتونس مع محاسن بالحيطة.. وجردل تحت الحنفية منتظرنه يتملي فشان نسقي الغنم.. واختي التانية خاتالا طشت في لستك وجنبها كوم غسيل وحلة قديمة فيها صابون سايح... غوووغ غوووغ دة صوت ضكر الحمام البني ينادي في الانتايي حقتو... مممم مييييع ممم مييع دة صوت العتوت يرضع من أمه.. كاااك كت كت كاااك.. الجدادي دايري ترمي البيض هي تكورك والديك يكورك وراها.. في ركن التُكل في جردل الوســـخ وطالعة منه مقشاشة.. الكـــلبي راقدي في ضُل الضحى ومتنيي وفيها تلاتة قُرادايات في ضهرها.. كيف قيلتو، قنبوا طولا، دبايوا دة الرادي معلق في الشعبة حقت الراكوبة... في البرندة عشة خليل قاعدة في مخدتين في نص العنقريب تمشط في حبوبتي وجنبهن كوز نيدو فيه موية وقشر ليمون.. وقاعدين يقطعوا: بت التومة قالوا جاها عريس.. وحسنة بت ود حضري قالوا طلقوها.. أنا شايل لي «فريد» و«ضراب» ماشي ألعب مع جمال هجو ويدي التانية فيها «طرقة فطير» بقرض فيها.... بت الجريف داخلي من الباب وشايلال بستلي فيها تركين وصاقعي لي أمي: أماني ما لقيتلي تركين السرور عند ناس فاطني.. صوت من الشارع: المعا قزاز.. المعا قزاز.. صوت تاني: الجردقة الحرجل.. النبق النبق..

الله يجازيك يا ود جبرين كان بكيتني من الصباح كده ... شن سويت لك أنا بس قولي !!!!

وينك آلمطرطش أخوي تجي تحضر المحنه دي ....

ياخ .. صباحاتك أدفأ حب واندياح .....

مع خالص حبي وتقديري ؛؛؛؛

Quote: الله يجازيك يا ود جبرين كان بكيتني من الصباح كده ... شن سويت لك أنا بس قولي !!!! وينك آلمطرطش أخوي تجي تحضر المحنه دي .... ياخ .. صباحاتك أدفأ حب واندياح ..... مع خالص حبي وتقديري ؛؛؛؛

يعني يا حبيب انا اقعد اعوعي براي

Quote: أصلو بيتكم دا كان قدر شنو ؟؟؟؟

النفوس كانت طيبة يا حبيب
الحمام فوق في الصفايح وتحت الغنم والجداد
وال###### مطلوق في الحوش

Quote: طارق جبريل النفوس كانت طيبة يا حبيب الحمام فوق في الصفايح وتحت الغنم والجداد وال###### مطلوق في الحوش

الله يا ود جبريل

انتوا عايشين فى الريف عندكم مزرعة شكلكم

جميل جدا عندنا اصحبنا بنمشى ليهم كنا فى الوكيند لما كنت فى لندن الريف فى لندن ابداع عدييييل

Quote: السادسة والنصف صباحاً ، ينطلق صوت المنبه بموسيقى السيمفونية الخامسة لبيتهوفن ، تمتد يدي ، أعلى رأسي أضيء سماء الغرفة بنورها الخافت ، ممسكاً بريموت التكييف ، أوقفه ، يتزايد الضوء في الغرفة مع إزاحة الستائر المخملية للنافذة المطلة على الحديقة ،، أشعة الشمس تتسلل رويداً رويداً من خلال أغصان الرويال بالم مخلفة ظلالاً متناشرة على زجاج النافذة ، يتواصل صوت المنبه بخفوت مثير،، صباح الخير ،، بونجورنو ،، كماستاكا ،، هاي سير،، مسيكاقمي ،، (في وش كدا ماعرفت اجيبه) تحايا الإستاف بالمنزل أتلقاها في رحلتي وأنا أنزل عتبات الدرج الأنيقة متجهاً نحو البهو العريض ثم إلى الحديقة،، كراسي الخيزران الداكنة تبعث في النفس الإحساس بالعطلات والترحال إلى مرافيء بعيدة مع وجود الرويال بالم فتحاكي صباحات فلوريدا أو رمال هوااي،، ترولي يحمل شيئاً من فطائر خفيفة وعصير البرتقال وقهوتي ،، طارق : أرجوك غير رشاش الحديقة من أتجاه السيارة فأني أرى عليها ذرات الماء خصوصاً هذا اللون اللؤلؤي شديد التأثر، كما أرجو أن تغير التايمر ليبدأ في الخامسة صباحا فالجو أصبح يميل للبرودة هنا،، ذهب في حاله وقد ضغط على ريموت السيارة لتسخينها،، أشعلت غليوني بعد الإفطار ، تصفحت عناوين الصحيفة على عجل ثم فجأة،، (موسيقى رعب)!!! صحوت من نومي مذعورا على صوت الغلوبية تمسك بالطائر الذي دوخني وأنا اطارده إلى أن غفوت في نومتي تحت ظلٍ صغير لشجرة كرسان تعبانة في رمال كردفان،، = ذلك الحلم : أفسد علي ما تلاه من حياتي ، فقد عشت إلى هذا اليوم أبحث عن السعفات الذهبية المتدلية والستائر المخملية وروعة الإستاف العامل ، ثم بالتحديد : طارق الجنائني : الذي يقال بأنه غادر من يومها إلى فاس الماوراها ناس،، مافي ناس برجوازيين (إن شاء الله جدد)يجوا يحكو لينا ذكرياتهم يفكونا من المشلعيب والكـلبي الملاني قراد ؟؟ ذبحتنا ياخ ،، ههههه

والله يا ود خالتي قربت تسقط من نظري
اول مرة اعرف انه عندك ميول برجوازية متعفنة
هسي النبي فيك القاعد يهرمج فينا منو
كدي أسأل المدام

Quote: مافي ناس برجوازيين (إن شاء الله جدد)يجوا يحكو لينا ذكرياتهم يفكونا من المشلعيب والكـلبي الملاني قراد ؟؟ ذبحتنا ياخ ،، ههههه

هههه
Like

ازيك يا طُلبه
الطريف اني دخلت البوست على اساس العنوان وقريتو هكذا
(اشتهيت حوش بانقا..)
دخلت عشان اشوف الشهاك شنو في حوش بانقا

القى ليك السالفة كلها مشالعيب وجداد وكلاب مقردة
وودشيقوق المسنوح كمان جاب ليها ضريسا وفردة سفنجة مقطوعة وبهمات رضعن امهاتهن !!
(ما عارف المشكلة وين الخلت الحاجة تتجشم كل ذلك العناء)

انتو جيتو من وين؟؟!!
بالجد ذبحتونا

الجدير بالذكر انو
عبداللطيف عبر تمام عما يدور في حوشنا لمن كنت صغير بلعب بـ(الرمال) الممضى بماء البحر - تقرأ بـ(التراب) بالنسبة للبروليتاريا الفوق ديل.

Quote: هههه Like ازيك يا طُلبه الطريف اني دخلت البوست على اساس العنوان وقريتو هكذا (اشتهيت حوش بانقا..) دخلت عشان اشوف الشهاك شنو في حوش بانقا القى ليك السالفة كلها مشالعيب وجداد وكلاب مقردة وودشيقوق المسنوح كمان جاب ليها ضريسا وفردة سفنجة مقطوعة وبهمات رضعن امهاتهن !! (ما عارف المشكلة وين الخلت الحاجة تتجشم كل ذلك العناء) انتو جيتو من وين؟؟!! بالجد ذبحتونا الجدير بالذكر انو عبداللطيف عبر تمام عما يدور في حوشنا لمن كنت صغير بلعب بـ(الرمال) الممضى بماء البحر - تقرأ بـ(التراب) بالنسبة للبروليتاريا الفوق ديل.

يا جماعة البوست دة ما عنده علاقة بي حلاوة لكوم



والله يا الحبيب تلقاك لبست اللباس ابو استك داك ومشروط في النص

Quote: وينك آلمطرطش أخوي تجي تحضر المحنه دي ....

المطرطش قااعد هِني وهناكات لي جنا جبرين، النفث فيهو الطيب صالح بعضاً، سُماً وترياقا..
ليك علي،
خل طارق يقولي عوك*
وخرمجاتو، الأقلهن نتاج الطلح، ينطبعن في كتاب

*الماسجنر يبقالي لا هسع حي

Quote: المطرطش قااعد هِني وهناكات لي جنا جبرين، النفث فيهو الطيب صالح بعضاً، سُماً وترياقا..

قاموا علينا الشوايقة يتعولقوا ويتخولقوا ..... ونحن نسكت نسمع (نقرا)

Quote: في الراكوبة في معلاق فيه كورية روب..

دحين ده ياهو (المشلعيب) الليلنا والا عندكم نصيبي تانية؟

_____
ياخ الراديو ساعة الناس قاعدين في ضل الضحا دا، بيكون فيهو الكاشف يغني (أطير بي فوق بي غرب السوق) أو عثمان حسين في (ناس لالا)
.
.
.
غالتني

Quote: المطرطش قااعد هِني وهناكات لي جنا جبرين، النفث فيهو الطيب صالح بعضاً، سُماً وترياقا.. ليك علي، خل طارق يقولي عوك* وخرمجاتو، الأقلهن نتاج الطلح، ينطبعن في كتاب *الماسجنر يبقالي لا هسع حي

تعرف آلمطرطش أخوي كان سويتها ... تقدر تحلف يمين إنك سويتلك شيتاً سمح في دنيتك ... وصدقني سيدعو لك كل من سيقرأ هذا السفر المدهش الممزوج بترياق الطيب صالح ، والمرتوي من نبع أصالتنا التريان بالحنيّة الصادقة ......

أقدر أقول لك آلمطرطش كان سويتها يمكن تخش الجنه ... عليك الله ما تنسانا بس يا صاحب ...

ياخ الشوق ليكم مطر عدييييل كدي ....

مع كل الحب الذي تعرف ؛؛؛؛

Quote: تعرف آلمطرطش أخوي كان سويتها ... تقدر تحلف يمين إنك سويتلك شيتاً سمح في دنيتك ... وصدقني سيدعو لك كل من سيقرأ هذا السفر المدهش الممزوج بترياق الطيب صالح ، والمرتوي من نبع أصالتنا التريان بالحنيّة الصادقة ...... أقدر أقول لك آلمطرطش كان سويتها يمكن تخش الجنه ... عليك الله ما تنسانا بس يا صاحب ... ياخ الشوق ليكم مطر عدييييل كدي .... مع كل الحب الذي تعرف ؛؛؛؛

يا حبيب المطرطش دي كدي بيقوم يتلحني ضومة ضومة

Quote: في الراكوبة في معلاق فيه كورية روب..

Quote: دحين ده ياهو (المشلعيب) الليلنا والا عندكم نصيبي تانية؟

ياهو يا مقطوع الطاري

Quote: غالتني

انا قدرك عاد عشان اغالطك






شقي الحال ياخي كيفنك ونعلك طيب في عضامك ديل

Quote: المطرطش قااعد هِني وهناكات لي جنا جبرين، النفث فيهو الطيب صالح بعضاً، سُماً وترياقا.. ليك علي، خل طارق يقولي عوك* وخرمجاتو، الأقلهن نتاج الطلح، ينطبعن في كتاب *الماسجنر يبقالي لا هسع حي

كتاب شنو يا مطرطش

Quote: الجدير بالذكر انو عبداللطيف عبر تمام عما يدور في حوشنا لمن كنت صغير بلعب بـ(الرمال) الممضى بماء البحر - تقرأ بـ(التراب) بالنسبة للبروليتاريا الفوق ديل.

ههههههههههههههههههههههههههههههههههههه
أثلج الله صدرك وأضحك سني عمرك كلها يا أبا حريرة،،،

مصداقاً لما تقول ، فقد كان قولي من وحيٍ ليس ببعيد من مستوحاة لأستاذنا خالد المحرب
وهو يحدثني عن تلكم الأيام كنتم في وهجٍ من البحبوحة ومشعات الرمال والخيل المسومة ،،
قالها ونحن نزايد في مزاد بكوبنهاجن وكان وقتها قد دخل في منافسة شرسة مع ثرية نروجية
لترسية سعر لسلالة نادرة من كـلاب الصيد أشتهرت بالثمامة،،

أدام الله عليكم عزكم وأدامنا فرحين بوجود أمثالكم يحفظون توازننا وتعايشنا
مع هذا العالم المليء ببغبغات الحمام وحمحمة ذكور النعيز ،،

ههههه ،،

ياخ والله الواد دا ماعارف لو ماكان قاعد في المغرب ليه 20 سنة كان نضمو يكون شكلو كيف!!!

Quote: ههههههههههههههههههههههههههههههههههههه أثلج الله صدرك وأضحك سني عمرك كلها يا أبا حريرة،،، مصداقاً لما تقول ، فقد كان قولي من وحيٍ ليس ببعيد من مستوحاة لأستاذنا خالد المحرب وهو يحدثني عن تلكم الأيام كنتم في وهجٍ من البحبوحة ومشعات الرمال والخيل المسومة ،، قالها ونحن نزايد في مزاد بكوبنهاجن وكان وقتها قد دخل في منافسة شرسة مع ثرية نروجية لترسية سعر لسلالة نادرة من كـلاب الصيد أشتهرت بالثمامة،، أدام الله عليكم عزكم وأدامنا فرحين بوجود أمثالكم يحفظون توازننا وتعايشنا مع هذا العالم المليء ببغبغات الحمام وحمحمة ذكور النعيز ،، ههههه ،، ياخ والله الواد دا ماعارف لو ماكان قاعد في المغرب ليه 20 سنة كان نضمو يكون شكلو كيف!!!

شوفوا جنس الخرمجة دي
انت بعد دة مفروض يرسلوك غصبا عنك لي شبا ومروي لاعادة التأهيل من البرجوازية التي نخرت جسمك

اشتهيت اسمع «عالم الرياضة» الساعة 3 مع صينية الغداء وانا باكل في الجرجير من صحن السلطة..
اشتهيت اطلع في راس الحمام وادلدل رجليني في الشارع واشوف في بنات المدرسة ماشات جايات..
اشتهيت اقبضلي «دُنان» من شدرة الحنة الجنب المزيرة حقتنا واربطه في خيط واجري وراهو في الحوش..
اشتهيت اقطعلي «سِرحي» من خرطوش الموية حقنا واشوفلي لستك من لباسا قديم وعود أليل نيم واسويلي
في راسو دباس عشان اطلع اقبض الجراد في الفسحة القدامنا خصوصا «علي كرار»..

يا ود جبرين ياخ والله رجعتني البلد
وشهيتني الكتابة عن بيتنا في رهيد البردي

Quote: يا ود جبرين ياخ والله رجعتني البلد وشهيتني الكتابة عن بيتنا في رهيد البردي

تعال يا انقابو امتب ياخي
ورينا جمال رهيد البردي

Quote: مصداقاً لما تقول ، فقد كان قولي من وحيٍ ليس ببعيد من مستوحاة لأستاذنا خالد المحرب وهو يحدثني عن تلكم الأيام كنتم في وهجٍ من البحبوحة ومشعات الرمال والخيل المسومة ،، قالها ونحن نزايد في مزاد بكوبنهاجن وكان وقتها قد دخل في منافسة شرسة مع ثرية نروجية لترسية سعر لسلالة نادرة من كـلاب الصيد أشتهرت بالثمامة،، أدام الله عليكم عزكم وأدامنا فرحين بوجود أمثالكم يحفظون توازننا وتعايشنا مع هذا العالم المليء ببغبغات الحمام وحمحمة ذكور النعيز ،،

أها يا طُلبة
الما عندو شهود كضاب

شكرا يا عبداللطيف على قول الحق
قال ابو لستك قال

Quote: أها يا طُلبة الما عندو شهود كضاب شكرا يا عبداللطيف على قول الحق قال ابو لستك قال

الاتنين مفروض يودوكم بعشر
قال برجوازية قال
والله تلقاهو الصماح حكم يقفل النخرين

Quote: اشتهيت اقبضلي «دُنان» من شدرة الحنة الجنب المزيرة حقتنا واربطه في خيط واجري وراهو في الحوش

دنان بتاع مين عليك الله ؟
الحمدلله الذي أنعم علينا بنعمه (اللقشري) والرفاهيه اللامتناهيه , وأبعد عنا داء أدمان النوستالجيا ليل نهار !
اللهم ارحم طارق جبريل برحمتك , وأزل عنه (اللساتك القديمه) و( الدنانات) و( حلاوة حربه) وما تلاها من الكرورات !
اللهم نقي معدته من (الملاح اللخدر واللحمر والكاورهات) وما تلاها من اللغاويس , وارزقه (كروسان) و(تراميسو) و(سوشي) لا يظمأ بعدها ابدا!

اللهم ابدله بدل (العراقي) بدله (مارك اند سبنسر) وبدل (السروال) (جينز Next) .. انك على ذلك قدير !


----------
ذبحتنا ذبح ياخ (كلاكيت تالت مرة)

Quote: تعالوا أحكوا عن حيشان بيتكم

والمولودين فى شقق زينا ما يحكو يعنى؟
Primitive Society
كان ماحوش بكرى ده هسه ناس ود شيقوق وود المحرب وود جبرين ديل كان يلاقونا وين؟؟
عب اللطيف بكرى تعال نعمل لينا تنظيم برانا...
لووووووووووووووووووووول،،،

ازيك يا طُلبه
الطريف اني دخلت البوست على اساس العنوان وقريتو هكذا
(اشتهيت حوش بانقا..)


أنا خايف أدخل البوست لي زمن عشان قرايتي كانت زي
قراية ابو حريرة....

(والله صحي)...

لكن طالما ما فيه نقا بنجيه راجعين...لكن خايفكم
ما تفهموا البكتبوا زاتو...

برج حمام شنو؟...وعواسة شنو....

أنا حا أبدأ ليكم مما انتهي أجدادنا القدماء
في سنة تانية ابتدائي...(الفركوا وطلعوا النار ديك)

salam ya 7abib, mutab3een

Quote: salam ya 7abib, mutab3een

ديشااااااااااااااااااك
يا حبيب دة ما حوش بيتنا عدييييييييييييييييييييييييييييل

Quote: أنا خايف أدخل البوست لي زمن عشان قرايتي كانت زي قراية ابو حريرة.... (والله صحي)... لكن طالما ما فيه نقا بنجيه راجعين...لكن خايفكم ما تفهموا البكتبوا زاتو... برج حمام شنو؟...وعواسة شنو.... أنا حا أبدأ ليكم مما انتهي أجدادنا القدماء في سنة تانية ابتدائي...(الفركوا وطلعوا النار ديك)

تعال بالله يا نزار لقن الحناكيش ديل درس في عيشة «كفاية الجداد»

Quote: والمولودين فى شقق زينا ما يحكو يعنى؟ Primitive Society كان ماحوش بكرى ده هسه ناس ود شيقوق وود المحرب وود جبرين ديل كان يلاقونا وين؟؟ عب اللطيف بكرى تعال نعمل لينا تنظيم برانا... لووووووووووووووووووووول،،،

والله تلقاك مولود في حوش المُستراح حقو باب ما فيه

Quote: دنان بتاع مين عليك الله ؟ الحمدلله الذي أنعم علينا بنعمه (اللقشري) والرفاهيه اللامتناهيه , وأبعد عنا داء أدمان النوستالجيا ليل نهار ! اللهم ارحم طارق جبريل برحمتك , وأزل عنه (اللساتك القديمه) و( الدنانات) و( حلاوة حربه) وما تلاها من الكرورات ! اللهم نقي معدته من (الملاح اللخدر واللحمر والكاورهات) وما تلاها من اللغاويس , وارزقه (كروسان) و(تراميسو) و(سوشي) لا يظمأ بعدها ابدا! اللهم ابدله بدل (العراقي) بدله (مارك اند سبنسر) وبدل (السروال) (جينز Next) .. انك على ذلك قدير ! ---------- ذبحتنا ذبح ياخ (كلاكيت تالت مرة)

دي شنو دعوات الحناكيش دي
اللهم باعد بيني وبين حناكيش مروي والضواحي
اللهم اجعلهم يتذوقون حيوات المساكين
اللهم افسد عليهم همبرقراتهم وبيتزاتهم
اللهم اجعل القراريص طعامهم
اللهم اجعل «كريب دمور» لباسهم

ذبحتونا بحنكشتكم

B]انا حاانضم لاخوانى صديق وعبداللطيف فى حزبهم البراجوزى
لانى من عمرى 8 سنوات انا برة البلد يعنى حيشانكم دى ماشفتاها ولا بعرفها والعجب المشلعيب حق ودجبريل
ملعون ابوكى غربة


تخريمة

ياود جبريل اى كلمة تكتبها معاها الترجمة طوالى للزى كدة

كسرة

قبيل كتبت رد لكن ماشايفاهو اكون مشا ويييييييييييين

Quote: انا حاانضم لاخوانى صديق وعبداللطيف فى حزبهم البراجوزى لانى من عمرى 8 سنوات انا برة البلد يعنى حيشانكم دى ماشفتاها ولا بعرفها والعجب المشلعيب حق ودجبريل ملعون ابوكى غربة تخريمة ياود جبريل اى كلمة تكتبها معاها الترجمة طوالى للزى كدة كسرة قبيل كتبت رد لكن ماشايفاهو اكون مشا ويييييييييييين

ما دام اتلميتي مع ود الموج وعبد اللطيف بكري الواطة في خشمك

ود ابوي جبريل يا سلام عليك ياخ وأنا أشتهيت عيشة اهلي الغبش جت عليهم
والله صحي
أهديك وزوار بوستك ( إشتهيت عيشة الغبش )
إهداء خاص لي الأعمام ود اب حريرة وود الموج وعبد اللطيف بكري , كلكم أعمام وجدود كمان ,,, والله صحي
وبرضو تقولوا شقق وفلل وما شابه ذلك
غايتو ود أب حريرة ده عندي ليهو شهود
نجيب عفاف وود المحرب هسعتية ويجيبوا لينا التصاوير وسط البطانة الخدرا ورويانة
أما إنت يا جدو ود الموج بقلع ليك بتصاوير من زمن الإذاعة مافي
ويا عبد اللطيف اخوي تلقاك إت الجبت لي الجهال كورة الشراب ,, والله صحي
000000
إشتهيت عيشة الغبش
إشتهيت طُقطُق مطيراتنا الدُغش
من غير سلام فوق البرش
والشوق يتاوق من بعيد
غالبو الصبر
كرْوَشْ ترابنا على الجروف
دربا حنين خاتي الخدش
اشتهيت ريحة الفريق
ملخوخة بي شيتا كُتر
دوكة وملاح
مع فكة الريق الصباح
قهوة وعرق
والقلوة بتناغم البكر
اشتهيت مرقة بهيماتنا الفجر
لاحقه المراح
ديك الصباح
كبر وصاح
خابر الذكر
اشتهيت لمة عيال
عند الكنار جنب الترع
زفة مطامير المطر
اشتهيت مرقة بناتنا على البحر
سايقات نسيمات العصر
لافحات طرح
طمح الصدر
اشتهيت لمة كبارنا بلا وعد
والشورة فال عند الخدر
اشتهيت يا يمة ريحة هدمك الملتوق
ودهنك المعتوق
كركارو حر
كورتك ممسحة بالودك
بتناغم الديس البجر
قرضك معتق زى بخور
فصين لبان تيمان ضكر
ريحة مسيرتك جرْتَقَة
معجونه بى طين الصبر
غُرة جبينك يمة باقيالي ضي
في غربة الخوف والكدر
اشتهيت عيشةَ الناس الغبش
شاي الدغش
لبن الزريبة بلا عرش
زادى الحنين الفي الحكر
اشتهيت طبْعاً عدم في كل بلود
عدمانه يالزايلة ام قدود
حارياها عند اهلي الغبش
خاتية البطر
........................
اسماء الجنيد

يا سوما وحاتك الكلام كمل

ويا سيف اليزل ....

لخصت لي ود جبرين بوستيهو كلو في تصويرتك دي (عن إذنك حفظتها في الكمبيوتر)

Quote: يا سوما وحاتك الكلام كمل ويا سيف اليزل .... لخصت لي ود جبرين بوستيهو كلو في تصويرتك دي (عن إذنك حفظتها في الكمبيوتر)

مقطوع الطاري
ياخي كيفنك ،نعلك طيب

هووووووووووووووووي يا ود جبريل ...نحن ما مولودين فى زقاق .. ولدونا فى الدايات و قرينا فى الراهبات ربّونا فى الإمتداد و حبينا فى البلاط أولاد عوااااااااايل و عندنا فايل .... أولادنا لابسين الجِنز وحالقين مارِنز..اولاد راستا ..وعشانا باسطة..وشٌغلنا واسطة .. ما بنتردّى , ونلبس الشدّة ... لا بنركب الركشات , ولا بندخل غُرف الشَات.. بنعرف الذوق ,ومستوانا فوق .... بناكل المنقة و ما بنعرف الزنقة .. بنعرف الجكس , وما بنركب التكس ..اسكيلنا عالي ,ومهرنا غالي.. و مناسبين ناس أمدرمان , العصيرهم رٌمّان , و شارعهم شيكان , و محطّتهم شقلبان !!.. و مصاحبين ناس بحرى البيخلطوا فى الكوبرى ..كوبرى شمبات المكسّر بالجمبات ,بى تحت موية و بى فوق عربات !!!.. عصيرهم أناناس و ما بيضايقوا الناس!!

هاك دي يا ودجبرين






وكمان دي

Quote: هاك دي يا ودجبرين

الله يا ود الشيخ
الله علي نومة في السراير ديل وخاتي راديك تحت العنقريب
ويجيك صوت ود كرم الله ولا النعام: الزول الوسيم في طبعه دايما هادي
الله ياخي

Quote: هووووووووووووووووي يا ود جبريل ...نحن ما مولودين فى زقاق .. ولدونا فى الدايات و قرينا فى الراهبات ربّونا فى الإمتداد و حبينا فى البلاط أولاد عوااااااااايل و عندنا فايل .... أولادنا لابسين الجِنز وحالقين مارِنز..اولاد راستا ..وعشانا باسطة..وشٌغلنا واسطة .. ما بنتردّى , ونلبس الشدّة ... لا بنركب الركشات , ولا بندخل غُرف الشَات.. بنعرف الذوق ,ومستوانا فوق .... بناكل المنقة و ما بنعرف الزنقة .. بنعرف الجكس , وما بنركب التكس ..اسكيلنا عالي ,ومهرنا غالي.. و مناسبين ناس أمدرمان , العصيرهم رٌمّان , و شارعهم شيكان , و محطّتهم شقلبان !!.. و مصاحبين ناس بحرى البيخلطوا فى الكوبرى ..كوبرى شمبات المكسّر بالجمبات ,بى تحت موية و بى فوق عربات !!!.. عصيرهم أناناس و ما بيضايقوا الناس!!

وحات نضري رجلينك كانن غبش
وكنت لابس اللباس ابو استك بي قرش داك وكتين ترفع رجلك ينشرط
ومخاخيتك سايلي والضُبان ينوني فيك

Quote: ود ابوي جبريل يا سلام عليك ياخ وأنا أشتهيت عيشة اهلي الغبش جت عليهم والله صحي أهديك وزوار بوستك ( إشتهيت عيشة الغبش ) إهداء خاص لي الأعمام ود اب حريرة وود الموج وعبد اللطيف بكري , كلكم أعمام وجدود كمان ,,, والله صحي وبرضو تقولوا شقق وفلل وما شابه ذلك غايتو ود أب حريرة ده عندي ليهو شهود نجيب عفاف وود المحرب هسعتية ويجيبوا لينا التصاوير وسط البطانة الخدرا ورويانة أما إنت يا جدو ود الموج بقلع ليك بتصاوير من زمن الإذاعة مافي ويا عبد اللطيف اخوي تلقاك إت الجبت لي الجهال كورة الشراب ,, والله صحي 000000 إشتهيت عيشة الغبش إشتهيت طُقطُق مطيراتنا الدُغش من غير سلام فوق البرش والشوق يتاوق من بعيد غالبو الصبر كرْوَشْ ترابنا على الجروف دربا حنين خاتي الخدش اشتهيت ريحة الفريق ملخوخة بي شيتا كُتر دوكة وملاح مع فكة الريق الصباح قهوة وعرق والقلوة بتناغم البكر اشتهيت مرقة بهيماتنا الفجر لاحقه المراح ديك الصباح كبر وصاح خابر الذكر اشتهيت لمة عيال عند الكنار جنب الترع زفة مطامير المطر اشتهيت مرقة بناتنا على البحر سايقات نسيمات العصر لافحات طرح طمح الصدر اشتهيت لمة كبارنا بلا وعد والشورة فال عند الخدر اشتهيت يا يمة ريحة هدمك الملتوق ودهنك المعتوق كركارو حر كورتك ممسحة بالودك بتناغم الديس البجر قرضك معتق زى بخور فصين لبان تيمان ضكر ريحة مسيرتك جرْتَقَة معجونه بى طين الصبر غُرة جبينك يمة باقيالي ضي في غربة الخوف والكدر اشتهيت عيشةَ الناس الغبش شاي الدغش لبن الزريبة بلا عرش زادى الحنين الفي الحكر اشتهيت طبْعاً عدم في كل بلود عدمانه يالزايلة ام قدود حارياها عند اهلي الغبش خاتية البطر ........................ اسماء الجنيد

الله عليك يا بت ابوي
اماني ما مشتهي عيشة الغبش دي
مشتهي اللمبة ام ضنيب
والحلة المكرتبي ألت اللبن المقنن
الله ياخي

هذه حكايات تاريخية ، لا يمكن أن يعود بها الزمن فلم تعد الجردقة ترياقاً ولم يعد الحرجل بديلاً للجرين تي ولا النبق تسلية ولا صاحب النبق يمتلك القدرة على أن يعلف بعيراً في مقابل تسويق بضاعته وسط مجتمع يلحس الإيسكريم بنكهاته المختلفة ويحتسي البيبسي والفينو ويقزقز بالجيبس.
وفي شأن المعا قزاز فالأمر بات مستحيلا بعد أن بسطتم الأمن وفعلتم تشريعات كان محورها أم الكبائر دون غيرها. فكل قوارير وقناني الشراب الأخري هي من مادة بلاستيكية لا تحتمل زيت القلي بعد إستخدامه يعني سماحة جمل الطين. وأسأل البيبسي العائلي وموية سوبا.
يقال والعهدة على الراوي في هذا الموضوع أن مادبو ذات مره والممرات كثيرة وجد ناس من شمال ووسط السودان يفترشون طرقات أحد الأسواق يبيعون أشياء أقل ما يمكن أن توصف به أنها هامشية من أمشاط ودبابيس وأمواس حلاقه وما شابه. المهم خاطب الباعه قائلا : هاي جلابه شيتكم دا فيهو ليكم فايده ولا فازين من عوينكم ؟
فيا ود جبريل ما فات لا يمكن أن يعود وإن عاد لابد أن يكون باهظ الثمن فلم تعد الأحواش إلا في الفيلات يعني بيوتنا الزمان ديك من الكثافة السكانية وضيق ذات النطاقات كلها أدي إلى تكدس وإمتداد الأسرة وتمددها الأمر الذي جعل من الراكوبة شقة بعد أن تم سقف الحوش ولم تعد السماء كما قال جماع عليه رحمة الله بدت لنا بل لا تبدو لنا إلا من الشارع.

تليشه على شاكلة تليشتك:
الناس يا صديقي تعولمت ولم تعد داقسه وإن كان عولمتها في الإتجاه المعاكس تبقى عولمه إملتها ضرورات ، فقد رأيت الناس في قريتنا الكائنة ثلة يتابعون مسلسل تركي يسمى وادي الذئاب والغنماية سارحه في شوال الدقيق دون أن يقول ليك واحد تك

عليك الله يا ودخالتى فى خضم ذكرياتك دى ما تنسى ..
سموم نصت نهار وكتمة المغربية ومعاها عضت نملة فى ضهرك المبلول بالعرق ولامن تلحق تمرق العراقى فى شان تنفضوا تكون دبلت ليك الحنة وتلم فيها فى آخر لحظة وتعصرها جوة العراقى لمن ريحتا تمرق فى إيدك ..
يمين بالله تلاتة يوم تحك فيها ما تبرد !!!
ـــ
كيفنك ومشتاقين.

Quote: عليك الله يا ودخالتى فى خضم ذكرياتك دى ما تنسى .. سموم نصت نهار وكتمة المغربية ومعاها عضت نملة فى ضهرك المبلول بالعرق ولامن تلحق تمرق العراقى فى شان تنفضوا تكون دبلت ليك الحنة وتلم فيها فى آخر لحظة وتعصرها جوة العراقى لمن ريحتا تمرق فى إيدك .. يمين بالله تلاتة يوم تحك فيها ما تبرد !!! ـــ كيفنك ومشتاقين

ود خالتي طيبة الطيبة
ياخي نملة ام ريش دي كانت عندها عضة يمين تتنوس بس


يا حبيب كيفنك ووليداتك

Quote: تعال بالله يا نزار لقن الحناكيش ديل درس في عيشة «كفاية الجداد»

...نحن جدادنا بتلقاه حايم نص النهار
في الكدمبس (تنطق هكذا (كودومبس)...بنواحي شدر عويشة...أب حطبا
أغبش...وهي الفترة الوحيدة للترفيه...بالطاب...عند أهلنا بتلك
النواحي الغميسة...

والجداد بطلقوه من الحيشان عشان ما يخرب الميس...ولو جيت
الضهر ماري...بتسمع (لامن عرب وقرب وتلي ) وأستي...
وحلوة لي...وأديني غورة...

أما السعية...ديك بكون باريها شافع جدع خرتاية مدرستو في نص
الحوش...لا يألو علي شي الا أن يجمع بهمو بي كشكوش صلصة...ويسدر
البحر...ليس رغبة في الرعي...وإنما لتلبية طموح شخصي بالعوم قفا قفا
في النيل ولقيط الدفيق بعيدا عن أعين لاعبي الطاب...

هناك الحيشان من كبرن...بتشيل هم من الرمض...ما بين خشم
الباب أب مفتاحا ######...وأقرب راكوبة...(تلقاها هناااااااك)

والزمن داك طبعا النعلات عزيزة...حيث تموت تخلي في حد ذاتها
كنعلات كارس الزمن دا....وأوعك من يخلوك تسدر البحر بي نعلات
المدرسة...واللي هي كانت (حاجة كافرة)...(يا زول والله نحن ضقنا مرة)

أنا هسي مخفف اللغة خالص خالص عشان ما تفتكروني سحّار...

وبجيكم صادي بي تفاصيل الليل...والبهمات رضعن.

ود جبرين سلام ان شاء الله دايم حوشكم عامر يارب
الفوق في الصوره دي الطويل ده احمد يوسف ابوحريره والواقف جنبه خالد المحرب
طبعا احمد ده اكبر من خالد
وبفتش ليك صوره لي ولد خالتك عبداللطيف ده وبنزلها ليك
قال برجوازيه قال

عبد اللطيف ونجاة تعالوا شوفو سطح المريخ فيه ناس
ياااااااااااااااااااى ،،،

حبوبة عفاف وديل بتزرعوهم فى الارض مخصوص عشان يجيبو ليكم قلل صغار؟؟
لوووووووووووووووووووووووووووووووووووووووووول

بت أبو حريرة
لا بارك الله في الغوغل إيرث هي دا ما بيت ناس المبارك ود البلوله ود محكر زاتو يعني بقينا قاعدين في السهله

Quote: ود جبرين سلام ان شاء الله دايم حوشكم عامر يارب الفوق في الصوره دي الطويل ده احمد يوسف ابوحريره والواقف جنبه خالد المحرب طبعا احمد ده اكبر من خالد وبفتش ليك صوره لي ولد خالتك عبداللطيف ده وبنزلها ليك قال برجوازيه قال

الله يا بت ابو حريرة
رشيهم ياخي
وريهم الحياة الجد جد
موش الهوت دوق

Quote: ...نحن جدادنا بتلقاه حايم نص النهار في الكدمبس (تنطق هكذا (كودومبس)...بنواحي شدر عويشة...أب حطبا أغبش...وهي الفترة الوحيدة للترفيه...بالطاب...عند أهلنا بتلك النواحي الغميسة... والجداد بطلقوه من الحيشان عشان ما يخرب الميس...ولو جيت الضهر ماري...بتسمع (لامن عرب وقرب وتلي ) وأستي... وحلوة لي...وأديني غورة... أما السعية...ديك بكون باريها شافع جدع خرتاية مدرستو في نص الحوش...لا يألو علي شي الا أن يجمع بهمو بي كشكوش صلصة...ويسدر البحر...ليس رغبة في الرعي...وإنما لتلبية طموح شخصي بالعوم قفا قفا في النيل ولقيط الدفيق بعيدا عن أعين لاعبي الطاب... هناك الحيشان من كبرن...بتشيل هم من الرمض...ما بين خشم الباب أب مفتاحا ######...وأقرب راكوبة...(تلقاها هناااااااك) والزمن داك طبعا النعلات عزيزة...حيث تموت تخلي في حد ذاتها كنعلات كارس الزمن دا....وأوعك من يخلوك تسدر البحر بي نعلات المدرسة...واللي هي كانت (حاجة كافرة)...(يا زول والله نحن ضقنا مرة) أنا هسي مخفف اللغة خالص خالص عشان ما تفتكروني سحّار... وبجيكم صادي بي تفاصيل الليل...والبهمات رضعن.

ايوة يا ابو النز رش الحناكيش
رشتهم الجات طاوية حبالا
تعال ياخي متعنا الله عليك ياخي

Quote: هذه حكايات تاريخية ، لا يمكن أن يعود بها الزمن فلم تعد الجردقة ترياقاً ولم يعد الحرجل بديلاً للجرين تي ولا النبق تسلية ولا صاحب النبق يمتلك القدرة على أن يعلف بعيراً في مقابل تسويق بضاعته وسط مجتمع يلحس الإيسكريم بنكهاته المختلفة ويحتسي البيبسي والفينو ويقزقز بالجيبس. وفي شأن المعا قزاز فالأمر بات مستحيلا بعد أن بسطتم الأمن وفعلتم تشريعات كان محورها أم الكبائر دون غيرها. فكل قوارير وقناني الشراب الأخري هي من مادة بلاستيكية لا تحتمل زيت القلي بعد إستخدامه يعني سماحة جمل الطين. وأسأل البيبسي العائلي وموية سوبا. يقال والعهدة على الراوي في هذا الموضوع أن مادبو ذات مره والممرات كثيرة وجد ناس من شمال ووسط السودان يفترشون طرقات أحد الأسواق يبيعون أشياء أقل ما يمكن أن توصف به أنها هامشية من أمشاط ودبابيس وأمواس حلاقه وما شابه. المهم خاطب الباعه قائلا : هاي جلابه شيتكم دا فيهو ليكم فايده ولا فازين من عوينكم ؟ فيا ود جبريل ما فات لا يمكن أن يعود وإن عاد لابد أن يكون باهظ الثمن فلم تعد الأحواش إلا في الفيلات يعني بيوتنا الزمان ديك من الكثافة السكانية وضيق ذات النطاقات كلها أدي إلى تكدس وإمتداد الأسرة وتمددها الأمر الذي جعل من الراكوبة شقة بعد أن تم سقف الحوش ولم تعد السماء كما قال جماع عليه رحمة الله بدت لنا بل لا تبدو لنا إلا من الشارع. تليشه على شاكلة تليشتك: الناس يا صديقي تعولمت ولم تعد داقسه وإن كان عولمتها في الإتجاه المعاكس تبقى عولمه إملتها ضرورات ، فقد رأيت الناس في قريتنا الكائنة ثلة يتابعون مسلسل تركي يسمى وادي الذئاب والغنماية سارحه في شوال الدقيق دون أن يقول ليك واحد تك

عيييييييييك البهجة عمر شخصيا
ياخي والله الحوش الجابك دة ما هين تب
حليل زمن الجردقة يا حبيب
حليل سكج بكج

Quote: حليل زمن الجردقة يا حبيب حليل سكج بكج

أنت يا ود جبرين مسعول من الخير
امتدادك وينو؟

قبل يومين بلغني أن ابن أختي بعد ان انسلخ من تلك النواحي
الغميسة ونفد بي جلدو قبال القهابين ما تأكل قنقرة ضنبو..

قالوا ليه في لحظة مزاح:

إنت أتاريك كاتل الجدادة وخامي بيضا:

ضحك ضحكة زول نقش الموضوع ومشي جاب شنطتو...وقال
دا بسموه هسي بلي استيشن...الاتاري داك كان زمان
وما فيه جداد ولا بيض!!!!!!(جداد دي الكلمة الوحيدة الانتصرنا عليهم
فيها....بي أتاريهم وبلي ستيشناتهم دي ما فيهم واحد بقول(دجاج)

ولسة في حواراتنا ...هنالك كلاش بين ما جاء معنا من كلمات
من تلك النواحي الغميسة...وبين شفعنا النفدو بي جلدهم

فمثلا والدتي الله يطراها بالخير...

تقول لي بنت بتها...وهي في الجامعة...

يا بت انتي يوم واحد بتقعي تكسري رقبتك...ما تشبي ..

والبت تسوي في البتسوي فيه باعتبار ان يوم واحد لسة ما جاء
بل وتبرر ذلك بأن اليوم هو يوم 24 يا حبوبة

طارق حبريل كيف حالك
ده مشهد من الحوش في زمن جميل وأنيق ويشيه الطمأنينة والفرح والجمال :
أمي فاطنة قريبتي من تال أمي عندها قهوة عصرية وساعة انس بعشرة سنين مما نعد الآن ونحسب .
وكنت في ذلك الوقت أتأهب للسفر كحالي دائماً مما مرقت من الجامعة ولقيت الإنقاذ في وشي قعدت مسافر لليوم كانت لي معها جلسات
وونسات جمة الله يرحمها ياخ كانت معجبة وقتها بثلاثة أشخاص لا تربط بينهم رابطة مطلقاً محمد وردي والشيخ الطيب ود المرين وبيل كلنتون
أي والله مع بعد المسافات بين الجماعة ديل لكنها لا تخفي إعجابها الشديد بيهم كانت عصريتها موزعة بتناسق عجيب أول شي بتعلق للبهائم
وتكضكض الجداد وتحمم للحمام بشوية فترتية وجنى شطة وبتجهز عد ة القهوة وتفتح الرادي وكل أمانيها في الدنيا يجيبوا ليها وردي يغني
في الطير المهاجر بعد داك تعال شوف جنس مزاج واكان قلت ليها يا يمة فاطنة ما أحسن أجيب ليك وردي في المسجل تسمعيهوا على كيفك
تقوليك أنا غير الرادي ما بليق لي وبشوفوا كضب كضب أظنو كان انتظارها وشوقها لسماع الغنا من الرادي متعة أكثر من سماع الأغنية ذاتها .
يوم قاعد منتظر جبنتها وبقرأ في جريدة وهي بتقلى في البن والريحة معبقة الدنيا والبن يسافر كما نسافر نحن الآن
والحوش يمور بالدجاج والغنم والحمام والكـ لاب اسمعها بتناجي بنها وتقول
شوف البنت وامورها الله لا كسبك ولا قوم ليك قايمة بركة الله والشيخ دفع الله
راجل مثل حالتو دي مالك مبشتناهو يبشتنك الله .وابواتي والشيخ الطيب العاتي.
شوف المسخرة وحركات البنات
راجل رئيس طويل وعريض مالك عليهو
منغساها عليهو ينغسك عليك الله . وابوي الفكي الامين
اسى الناس يقولوا شنو غلطانة انت . ماك غلطانة كيفن الموديك ليهو في محلو شنو
وتستغفر / استفغر الله العظيم
قلت ليها شنو يايمة فاطنة مالك بتدعي في منو
قالت لي مو في البنت البقولوا ليها مونيكا دي .
لا ابو يحلف ولا أم تخلف الناس ديل جنوا آ ولدي
استغفر الله يا ولدي ،،،،

وتقبل التحية وزوارك ،،،،،

يا طارق
ياخ ناس المناجم ما عارفين مكان الدهب وين .
يازول حوش ناس صاحبك ود الشيخ ده بس محتاج كاشف 4500 .
..
صدقني يا طارق جماعة كلفورنيا كان شافو حوش عمك ده . القصة حتفوت
العشرة مليون دولار .
عمك ساكت فوق فهم .

Quote: يا طارق ياخ ناس المناجم ما عارفين مكان الدهب وين . يازول حوش ناس صاحبك ود الشيخ ده بس محتاج كاشف 4500 . .. صدقني يا طارق جماعة كلفورنيا كان شافو حوش عمك ده . القصة حتفوت العشرة مليون دولار . عمك ساكت فوق فهم .

عثمان موسى
ماك طالبني حليفة
يمين من الحوش دا طلعنا البتاعة دي حيث احرزت أكثر من 10 جرامات استلمها الزول اب راسن ابيض في الصورة الفوق ديك:




يعني زي ماتقول ياطارق بدل تمر الهبوب والكمريق بقينا نلقط في دهب شيبون( وشيبون دا برضو الزول اب راسن أبيض داك)

Quote: يا طارق ياخ ناس المناجم ما عارفين مكان الدهب وين . يازول حوش ناس صاحبك ود الشيخ ده بس محتاج كاشف 4500 . .. صدقني يا طارق جماعة كلفورنيا كان شافو حوش عمك ده . القصة حتفوت العشرة مليون دولار . عمك ساكت فوق فهم .

انت يا عثمان باقيلي «طَلَقْ» في درب الدهب

Quote: طارق حبريل كيف حالك ده مشهد من الحوش في زمن جميل وأنيق ويشيه الطمأنينة والفرح والجمال : أمي فاطنة قريبتي من تال أمي عندها قهوة عصرية وساعة انس بعشرة سنين مما نعد الآن ونحسب . وكنت في ذلك الوقت أتأهب للسفر كحالي دائماً مما مرقت من الجامعة ولقيت الإنقاذ في وشي قعدت مسافر لليوم كانت لي معها جلسات وونسات جمة الله يرحمها ياخ كانت معجبة وقتها بثلاثة أشخاص لا تربط بينهم رابطة مطلقاً محمد وردي والشيخ الطيب ود المرين وبيل كلنتون أي والله مع بعد المسافات بين الجماعة ديل لكنها لا تخفي إعجابها الشديد بيهم كانت عصريتها موزعة بتناسق عجيب أول شي بتعلق للبهائم وتكضكض الجداد وتحمم للحمام بشوية فترتية وجنى شطة وبتجهز عد ة القهوة وتفتح الرادي وكل أمانيها في الدنيا يجيبوا ليها وردي يغني في الطير المهاجر بعد داك تعال شوف جنس مزاج واكان قلت ليها يا يمة فاطنة ما أحسن أجيب ليك وردي في المسجل تسمعيهوا على كيفك تقوليك أنا غير الرادي ما بليق لي وبشوفوا كضب كضب أظنو كان انتظارها وشوقها لسماع الغنا من الرادي متعة أكثر من سماع الأغنية ذاتها . يوم قاعد منتظر جبنتها وبقرأ في جريدة وهي بتقلى في البن والريحة معبقة الدنيا والبن يسافر كما نسافر نحن الآن والحوش يمور بالدجاج والغنم والحمام والكـ لاب اسمعها بتناجي بنها وتقول شوف البنت وامورها الله لا كسبك ولا قوم ليك قايمة بركة الله والشيخ دفع الله راجل مثل حالتو دي مالك مبشتناهو يبشتنك الله .وابواتي والشيخ الطيب العاتي. شوف المسخرة وحركات البنات راجل رئيس طويل وعريض مالك عليهو منغساها عليهو ينغسك عليك الله . وابوي الفكي الامين اسى الناس يقولوا شنو غلطانة انت . ماك غلطانة كيفن الموديك ليهو في محلو شنو وتستغفر / استفغر الله العظيم قلت ليها شنو يايمة فاطنة مالك بتدعي في منو قالت لي مو في البنت البقولوا ليها مونيكا دي . لا ابو يحلف ولا أم تخلف الناس ديل جنوا آ ولدي استغفر الله يا ولدي ،،،، وتقبل التحية وزوارك ،،،،،

لكن يا عمر مونيكا لوينسكي بالغت مع الحاجة

عليك الله كتر لينا من النوع دة

Quote: أنت يا ود جبرين مسعول من الخير امتدادك وينو؟ قبل يومين بلغني أن ابن أختي بعد ان انسلخ من تلك النواحي الغميسة ونفد بي جلدو قبال القهابين ما تأكل قنقرة ضنبو.. قالوا ليه في لحظة مزاح: إنت أتاريك كاتل الجدادة وخامي بيضا: ضحك ضحكة زول نقش الموضوع ومشي جاب شنطتو...وقال دا بسموه هسي بلي استيشن...الاتاري داك كان زمان وما فيه جداد ولا بيض!!!!!!(جداد دي الكلمة الوحيدة الانتصرنا عليهم فيها....بي أتاريهم وبلي ستيشناتهم دي ما فيهم واحد بقول(دجاج) ولسة في حواراتنا ...هنالك كلاش بين ما جاء معنا من كلمات من تلك النواحي الغميسة...وبين شفعنا النفدو بي جلدهم فمثلا والدتي الله يطراها بالخير... تقول لي بنت بتها...وهي في الجامعة... يا بت انتي يوم واحد بتقعي تكسري رقبتك...ما تشبي .. والبت تسوي في البتسوي فيه باعتبار ان يوم واحد لسة ما جاء بل وتبرر ذلك بأن اليوم هو يوم 24 يا حبوبة

لكن ما رشيتهم رش يا حبيب

غايتو بت اختك دي لو قعدت وسطنا حا تطلع برة الشبكات كلها

واصل يا حبيب رش الحناكيش

Quote: واصل يا حبيب رش الحناكيش

نعلهم ناس ود الموج...والله ديل كيش من الحناكيش ما لامين فيها
بلا أم درمان...بلا مدرسة محمد حسين بلا جدودنا زمان وصونا علي الوطن

الحناكيش الجد مولدين نواحي مانشستر ونيويورك وفينا...(هسي دينق
دا ما مواليد العمارات...الكنت فيها طلبة يا ود جبرين...باقي ليك
الكيش لامي فيها؟

أها يوم الجمعة دا بالذات وجمعتكم مباركة..جت عليكم ربطة في خيت
بصحونا مع كوريكة الديك الاولاني...واحد يمشي الجزارة...والتاني يمشي
يدقق...والتالت يمشي يحلب الغنم...والمهمات التلاتة ديل بنترامي فيهن
العود...لأنهن مهمات غير متساويات في الجهد ولا المسافة...واحدة فيهن
فيها طلقة حمار نكور من وتد...والتانية فيها تحدي عبور كلاب الجزارة
والتالتة فيها بهمات وحملان كان رضعن وجيت كوريتك فاضية والله رافساك نعجة
أو دافق لبنك...الله قال بي قولك...وحا تاكل حارة ما تضوق باردة...
وحا يخلوك وشيك يلعن قفاك...والعجب كان جيت راجع شايل شوال عيشك ما مدقق
والحمار عار منك!!! لا حولا....(أها هنا ممكن يقربوا يقولوا عليك حنكوش
بالوصف ساكت لأن الكلمة دي في الزمن داك ما كانت موجودة في القواميس...)
أو لو جيت راجع والكلاب مأكلات لحمك....ما مهم يعضنك او يأكلنك انت ذاتك في
روحك دي...اللحم وينو؟؟ يلحمك الضريب وشقاق العناقريب...والكلاب ال ان شاء
الله يلعبن بي عضامك شليل...انت فاتش اللحم لي الكلاب لي شنو؟

ما في مبررات خالص...وانت تأكل كل هذا السيل من اللعن...وتنحرق علي
الكلاب بي صحك...وتاني مرة كان بقن اسود ما بياكلن لحمك...

كان عندهم قدرة عجيبة الي تحويلنا الي كائنات متحدية حتي الوحوش..

بجيكم صادي.