الدقير وام الحسن رقدوا كاويق..

الدقير: انتي يا ام الحسن غاتسي في القاطوع دة قاعدي تسوي في شنو
ام الحسن: اكوسلي في دِلِق فشان اسويهو بزذيق فشان اعوسلك الفطير... يعوسوا عليك يا بركة جاه النبي
الدقير: نان واقود الجن ما كمل من النار.. انتي اصلك مالك ما سويتي القشرديق دة من قبيل
لا تقوليلي تاني قوم جيبلنا جريد وواقود انا ضهري انقصة بالقراعي..
ام الحسن: القشرديق اليكفنوك بيهو... انت اصلو لسانك دة آآآبيرتاح.. ليله ونهاره يلغلغ..
الدقير: يرتاح كيفن وهو الوكت كله ساكت ويسمع في صوت اللربل في القراعي
ام الحسن: هي كدي... انا اصلي ما لقيتلي زولا اعرسو غيرك في البلد الفقر دي
الدقير: نان كنتي دايري تلقي احسن مني وين عاملي تلاليشك كدي علي كعك العَقِد
ام الحسن: عاد فراغك.. وحات نضري انا كان دايرني ود العمدة علي ابوي قال ادة ابوك كلمي عاد
الله يرحمه ماهو قايلني دايري اوكر قدر دة..
الدقير: اي شن طعمك انت الدلكتك مصوفني و خومرتك مرميي جنب لدايات الصاج
ام الحسن: نان انا الدلكي متين اسويها انا.. مباريي كرشك دي.. شيتا فطير
وشيتا: يا ام الحسن جابتلها زيفي سويلنا تركين... الله الفطير اليلحقك ابوي
الدقير: ابوكي يانا كلنا اللاحقنو.. لا تكتري الحجي سويلنا تُرمي خلينا النشوف شغلنا..
ام الحسن: باقيلي بقيت باشكاتب.. مو ياهو فتل الحِبال دة وقرين حيضان البرسيم
الدقير: نان انت ابوكي كان اوسطى مو ياهو يقرع لامن غار...
ماني عارف امي الكان عاجبها فيكي شنو.. حلات تقولي مسايرها يرَارِنْ..
ايي مساير شنو العلي الكروق اليابس ديل.. والرجلين يابسات علي الكُنُش..
ام الحسن: الكروق اليُوقدوهوا تحت كرعيك المعوجات علي شِعبة الكَرِقي ديل..
الدقير: سمحات وعاجباتني وتراهن شايلاتني... شوفي ألاتك الريحتن تمباك تمباك ديل..
في مرتا نعيمي تربط حُقتها مع محفضتها والتمباك يتسايل لااااعند ركبيها.. اي كدي
ام الحسن: اكنك انت النعيم..شوف يدينك يابسات ومشققات كيفن علي طورية «الطيب ود موسي»..
الدقير: الرسول لا تكتري الحجي شي... عوسيلنا القشير دة انا بقيت سايف ضومة
ام الحسن: قبلك وحدك انت من متين ماك سايف.. وحات نضري ستنور قالتلي
وكتين ولدوك جيت مارق تزازي كايس للشطُر.. الجوع اليغمتك يلحقك «توِيرييي»
الدقير: ايي شطُر شنو... الجن اليزازيك.. انت ما تشوفي ألاتك ديل المتل تمر
الهبوب يتلولحن ليلن ونهارن...
ام الحسن: اقولك شي.. موش القشير دة ماني عايساهو.، اها شن قولك
الدقير: هو قشيرك شن طعمو انا ذاتي غبيان من لااا تحت كان طلَعْ علي
«الفردوس» في «السواعير» أكلت زين واخدتلي غمدي في الرحراح
ام الحسن: عاد فراغك.. شن طعم اكلها هي «الفردوس».. وحات نضري قاطع اللهجي..
الدقير: وكتين قاطع اللهجي مالك امبارح تاكلي وتنكرشي وتلوغدي في البصل
اللخدر عندها لامن بقيتي علي «الصَبرة» الماكلالا جدادي..
ام الحسن: انا صبرة يا الدقير..
شالتلها جريدي من تحت الدونكة وقامت تمَعِِط فيهو وهو يكورك:
واااامغستي جنها قام عليها... وقام جري رجلينو غاتسات في الرملي وينقنق:
الله لا كسبك ولا تاجرك يا ام القشر ان كان بولتة في سروالي..

القراء: 294
زولا كدي يجي يقول لي الدقير دة حمدلالك بالسلامي ماهو في

الله يجازي محنك يا ود جبريل

أضحكتني كثيرا

مبدع يا رائع

Quote: وشيتا: يا ام الحسن جابتلها زيفي سويلنا تركين...

يا ود جبريل دا فاول جهوي
أم الحسن شن عرّفها بالتركين كمان

Quote: يا ود جبريل دا فاول جهوي أم الحسن شن عرّفها بالتركين كمان

ابو حتحوت انت باقيلي جنيت
ام الحسن كيفن آآبتعرف التركين
ولا انت دايرني اقولك الملوحة

Quote: الله يجازي محنك يا ود جبريل أضحكتني كثيرا مبدع يا رائع

دكتورنا الجميل
ياخي كيفنك ونعلك طيب في عضامك ديل
اضحك يا الحبيب آخرها كوم تراب

توتو الشوق مطر

يوم بتكتلك زول

الدقير دا مالوا اتور لي كانوا هو صديق الموج

Quote: الدقير: اي شن طعمك انت الدلكتك مصوفني و خومرتك مرميي جنب لدايات الصاج

يمين يا طارق اليومين ديل ماك ياكا!

يا ود جبريل ام الحسن والدقيرديل مش شوايقة ؟

Quote: يا ود جبريل ام الحسن والدقيرديل مش شوايقة ؟

ابو حتحوت انت قايلو دة الهلال
باقي انا عارفك غالات وحجتك كتيري

يا الحبيب الشوايقة برضو بيسموه التركين والملوحة
ومافي داعي تهمشونا كمان حتى في التركين



الرطانة عندنا معاهم حاجات كتيرة مشتركة يا منقة
أسأل ابو جهينة

Quote: يمين يا طارق اليومين ديل ماك ياكا!

ايي راقد خل

Quote: توتو الشوق مطر يوم بتكتلك زول الدقير دا مالوا اتور لي كانوا هو صديق الموج

اووووو وضاحة كيفنك ياخي

ود الموج اصلو فرقه شنو من الدقير دة

أخوي طارق جبريل
انت كلام شايقيتكم مالو ما زي كلام شايقيتنا؟؟
عمك قوقل ذاتو ما حيعرف يترجم لينا الكلام كله..لازم ترفق معاني المفردات..
غايتو للضمان كده.. الدقير يستاهل.. النفسه هفتانة ولسانه طويل.. :)

Quote: انت كلام شايقيتكم مالو ما زي كلام شايقيتنا؟؟ عمك قوقل ذاتو ما حيعرف يترجم لينا الكلام كله..لازم ترفق معاني المفردات..

انا زاتي ياابوريم داير لي ترجمة
شايقيتكم دي { قاسحة بزاف } يعني اعمل لينا جدول : الكلمة ومعناها

Quote: انا زاتي ياابوريم داير لي ترجمة شايقيتكم دي { قاسحة بزاف } يعني اعمل لينا جدول : الكلمة ومعناها

اها شوف ناس شوايقة «ديور الجامع» ديل كمان

Quote: أخوي طارق جبريل انت كلام شايقيتكم مالو ما زي كلام شايقيتنا؟؟ عمك قوقل ذاتو ما حيعرف يترجم لينا الكلام كله..لازم ترفق معاني المفردات.. غايتو للضمان كده.. الدقير يستاهل.. النفسه هفتانة ولسانه طويل.. :)

لوووووووووول يا رمانة
طلعتي شايقية حنكوشة خلاص
وكمان بالغتي مع الدقير ياخي

Quote: لدقير: انتي يا ام الحسن غاتسي في القاطوع دة قاعدي تسوي في شنو ام الحسن: اكوسلي في دِلِق فشان اسويهو بزذيق فشان اعوسلك الفطير... يعوسوا عليك يا بركة جاه النبي

اضحكتنى يا طارق ياخ انت زول جميل
تحياتى لك

Quote: اضحكتنى يا طارق ياخ انت زول جميل تحياتى لك

اووووووه شيخ المحرب شخصيا في بيت الدقير
ياخي كيفنك يا الحبيب

غايتو يا ود جبريل الواحد كل مرة يدخل بوستاتك ويزوغ منها

بس المرة دي دي ما بفوتها

Quote: الدقير: سمحات وعاجباتني وتراهن شايلاتني... شوفي ألاتك الريحتن تمباك تمباك ديل.. في مرتا نعيمي تربط حُقتها مع محفضتها والتمباك يتسايل لااااعند ركبيها.. اي كدي

لا حولاااااااااا
جد ام الحسن بتبالغ بصراحة انا عكس رمانة اعلن تضامني التام مع الدقير

نظرا للضرر الكبير البلحقو من التمباك وريحتو العجيبة معقولة بس حقة ورابطاها كمان في رقبتها

الله يخليك لينا يا ود جبريل تضحكنا دايما وتبسطنا

صبحك الله بالخير يا جبريلا...
جيت أقول...
أقول...

تعظيم سلام....

ابداع يخليك واقف مندهش...
و محتار كمان...
داقوسك ده بجيب الكلام ده من وين...

مجنون ياطارق يااااخي

يااااخي الشوايقة ديل الذ واحلي ناس

Quote: مجنون ياطارق يااااخي يااااخي الشوايقة ديل الذ واحلي ناس

ياخي العجايز ديل احلي ناس


يا حبيب كيفنك والوليدات وبتنا المعاك

Quote: صبحك الله بالخير يا جبريلا... جيت أقول... أقول... تعظيم سلام.... ابداع يخليك واقف مندهش... و محتار كمان... داقوسك ده بجيب الكلام ده من وين...

رشا يا حبيبنا
ياخي الله يجعلها آخر الأحزان
يا زول انا لو باريت حاجاتنا في البركل يمين اخليكم تزحوا بالضحك هنا

Quote: غايتو يا ود جبريل الواحد كل مرة يدخل بوستاتك ويزوغ منها

يا قريبتي كدي قولي بسم الله

Quote: لا حولاااااااااا جد ام الحسن بتبالغ بصراحة انا عكس رمانة اعلن تضامني التام مع الدقير نظرا للضرر الكبير البلحقو من التمباك وريحتو العجيبة معقولة بس حقة ورابطاها كمان في رقبتها

ياخي ام الحسن بالغت اشد البوليغ



ياخي كيفنك وووليداتك

( وحات نضري ستنور قالتلي
وكتين ولدوك جيت مارق تزازي كايس للشطُر..)
!!!!!!!!!!!!!!!!!!!!!!!!!!!!!!!!!!!!!!!!

سلام يا ود عمّى جيبرين ،
عاد أماني جنس النضم دا ماب يقوّم الروح والنََفَس ، ويخلي الزول يدودي مِتل اتكنُّو موتّب وماهو موتّب !
ويسعلني الله بس قرّبْ أشوف نفسي في سوق تنقاسي إ
وإنتَ آطارق الجنا دا مالوا بس مسكلكْ في التِرْكين كدي ! أكنهون الشايقييِ مابيعرفوهو ؟
هو بس يا يابا التِرْكين شن طعموا ! عيلي الشيئ الكعب كدي !
دحين إن مُتْ بالجوع في خشمي بكجّو ؟
ووا شِيريري يا الدقير القييّلْ بيي جوعك !
الله يقلعك يا أُم الحسن الشيني ساوي كازومك عيللي أم قيردون .
ست البنات .

الدقير قاعد للمحن
لاب يباشر لاب يعرف يحنْ
بس مكشر وصاري الوشي
يبقي شايفلو شوفة شي
لاني عرجي ولاني عوّري
إنت يا الزهمول اختشي
ياالمسولل وشيين ماك سمح
يالعيونك حبات قمح
تدخل البيت خالي الوفاض
يالمزهلل ومابى القُعاد
للتمُر ماب تعرف تحٌش
يا اب شلاديم مِتْل الكبش

(شعر أُم الحسن)

ست البنات .

إنت آ طارق اكنّك يعني ماك عد تشوف في الغاغة المسويّنها الدقير وأُم الحسن من الصباح دي ؟!
بس خليتلنا الناس الشِبكي ديل ولا جيت صاد ولا انتاوقْ شي !؟
الناس كارات كارات في السهلي اللت دكان حومد يحمد ، الدقير مزْق لام الحسن طِرَْقَتَا ، وهي فقّشتْلو الرادي حِتي حِتي ! ودا كولو فيحال ما عاستْلو الفطيريي ! الفطيريي تطير !
وغايتو الناس جاي جاي لايمو الشئ ، وراجنْك تجي تبقى في الجوديي.

ست البنات .

يسعلْني الله راسي موجعْني ، ومودِّري حُقٍّتيْ ، وبهَمِي راضعات أُمهن ما خلّنلي ولا بُلاله ! ومرْيوقي !
وجيت قُتَ آخُدلي غِميدة في لقدابة طارق أخوي ويقوللي خبر القِصييف وأم الَقَشَر ، أجي القا البيت خلا ؟
من البارح أنا حارسالك اللقدابة !
دحين اسع اللمشي ، شارالي حبات قمح الزرازيير لا ياكلينهن شيئ .
ودعنكون الله .
ست البنات .

Quote: يسعلْني الله راسي موجعْني ، ومودِّري حُقٍّتيْ ، وبهَمِي راضعات أُمهن ما خلّنلي ولا بُلاله ! ومرْيوقي ! وجيت قُتَ آخُدلي غِميدة في لقدابة طارق أخوي ويقوللي خبر القِصييف وأم الَقَشَر ، أجي القا البيت خلا ؟ من البارح أنا حارسالك اللقدابة ! دحين اسع اللمشي ، شارالي حبات قمح الزرازيير لا ياكلينهن شيئ . ودعنكون الله . ست البنات .

وحاتك يا الزيني مدروشلي كترة شغل ونصايب
الله بس يفكني

ايي راقد خل

يرقدك بلاء ياخدك يا طارق
والله من الضحك قرّب يحصل لي الحصل للدقير لمن شحطوه بالجريد ...

(ام الحسن: قبلك وحدك انت من متين ماك سايف.. وحات نضري ستنور قالتلي
وكتين ولدوك جيت مارق تزازي كايس للشطُر.. الجوع اليغمتك يلحقك «توِيرييي»
الدقير: ايي شطُر شنو... الجن اليزازيك.. انت ما تشوفي ألاتك ديل المتل تمر
الهبوب يتلولحن ليلن ونهارن...)
هههها ...أمانة ماك وصااااف يا ود جبريل..
غايتو يوم بتكتل ليك زول في المنبر ده.

Quote: هههها ...أمانة ماك وصااااف يا ود جبريل.. غايتو يوم بتكتل ليك زول في المنبر ده.

قسومة يا حبيبنا
آخرها كوم تراب ياخي
اضحك يا الحبيب

Quote: ايي راقد خل يرقدك بلاء ياخدك يا طارق والله من الضحك قرّب يحصل لي الحصل للدقير لمن شحطوه بالجريد ...

ان بقت علي الشي الحصل للدقير هيني
المضيبة تجيبلها حُتراب من لااااتحت

Quote: إنت آ طارق اكنّك يعني ماك عد تشوف في الغاغة المسويّنها الدقير وأُم الحسن من الصباح دي ؟! بس خليتلنا الناس الشِبكي ديل ولا جيت صاد ولا انتاوقْ شي !؟ الناس كارات كارات في السهلي اللت دكان حومد يحمد ، الدقير مزْق لام الحسن طِرَْقَتَا ، وهي فقّشتْلو الرادي حِتي حِتي ! ودا كولو فيحال ما عاستْلو الفطيريي ! الفطيريي تطير ! وغايتو الناس جاي جاي لايمو الشئ ، وراجنْك تجي تبقى في الجوديي. ست البنات .

الدقير عاد حاله انشال
اريتو شيل حال العدو

Quote: الدقير قاعد للمحن لاب يباشر لاب يعرف يحنْ بس مكشر وصاري الوشي يبقي شايفلو شوفة شي لاني عرجي ولاني عوّري إنت يا الزهمول اختشي ياالمسولل وشيين ماك سمح يالعيونك حبات قمح تدخل البيت خالي الوفاض يالمزهلل ومابى القُعاد للتمُر ماب تعرف تحٌش يا اب شلاديم مِتْل الكبش (شعر أُم الحسن) ست البنات .

بالغتي يا سكينة ياخي مع الدقير
دي جندرة دي

Quote: ( وحات نضري ستنور قالتلي وكتين ولدوك جيت مارق تزازي كايس للشطُر..) !!!!!!!!!!!!!!!!!!!!!!!!!!!!!!!!!!!!!!!! سلام يا ود عمّى جيبرين ، عاد أماني جنس النضم دا ماب يقوّم الروح والنََفَس ، ويخلي الزول يدودي مِتل اتكنُّو موتّب وماهو موتّب ! ويسعلني الله بس قرّبْ أشوف نفسي في سوق تنقاسي إ وإنتَ آطارق الجنا دا مالوا بس مسكلكْ في التِرْكين كدي ! أكنهون الشايقييِ مابيعرفوهو ؟ هو بس يا يابا التِرْكين شن طعموا ! عيلي الشيئ الكعب كدي ! دحين إن مُتْ بالجوع في خشمي بكجّو ؟ ووا شِيريري يا الدقير القييّلْ بيي جوعك ! الله يقلعك يا أُم الحسن الشيني ساوي كازومك عيللي أم قيردون . ست البنات .

اها يا ود البشرى تعال غالت ست البنات «سكينة» كمان
وحاتك يا ست البنات الجنى دة حقربي علي التركين كمان
حليل تنقاسي وحليل سوقها

ود جبرين،
نعلّك طيّب.

يا الخزين جنا عبد السلآم ورُمانة ديل ما عصر عليهم بالحيل.
نضميك دا في ناس هنا كان كمرقوهوا ما يمرقوا منوا شي.
وحات خُوّة بنبرنا دا...

Quote: ود جبرين، نعلّك طيّب. يا الخزين جنا عبد السلآم ورُمانة ديل ما عصر عليهم بالحيل. نضميك دا في ناس هنا كان كمرقوهوا ما يمرقوا منوا شي. وحات خُوّة بنبرنا دا...

مقطوع الطاري كيفنك
يعني بعد دة الواحد لمن يكتب بوست يقوم يعمل تحذير:
ممنوع علي ناس الشهادة العربية

هو يا طارق اخوي ، ود البشرى دا مجارطكْ فى التركيين فيشان شينو؟
هو التركيين دا مو ياهو الحوت المعتتْ داكا ؟
نان شين طعمو ؟
عليك يا طارق تجيبلنا خبر أُم الحسن ، الدقير دا ساوي كيرعيْ عيلي مفرمة الخٌدْره كدي معذبا خلاس .الله يقلعو ساوي عيونو المِتِلْ قِدود الجِلِد كدي .
والله صَدَقْ ، يا حِليل تنقاسي وناسا الحٌنان !



ست البنات .

Quote: هو يا طارق اخوي ، ود البشرى دا مجارطكْ فى التركيين فيشان شينو؟ هو التركيين دا مو ياهو الحوت المعتتْ داكا ؟ نان شين طعمو ؟ عليك يا طارق تجيبلنا خبر أُم الحسن ، الدقير دا ساوي كيرعيْ عيلي مفرمة الخٌدْره كدي معذبا خلاس .الله يقلعو ساوي عيونو المِتِلْ قِدود الجِلِد كدي . والله صَدَقْ ، يا حِليل تنقاسي وناسا الحٌنان ! ست البنات .

تقولي شنو يا بتنا
كمان التركين سولوا جهوية وتوم وشمار

هجاء في ام الحسن
_____

يا القيصيري وخاتي الجمال
كل شيئ فيك شمال شمال
الطويل فيك صار قٌصار
والقُصار في الناس فيك طوال
يا السنونك مترين طوال
الشعر كدويي وقصار
والبعاشيم منك بس تخاف
(شعر الدقير)
ست البنات .

ود جيريل سلام يارائع
انا باانسبة لى يادوب الامور كدة بقيت لى واضحة
يعنى خوفا من حالة الدقير المسكين ,قسمتك ودتك لى اهل المغرب
يديك المولى الف عافية

Quote: ود جيريل سلام يارائع انا باانسبة لى يادوب الامور كدة بقيت لى واضحة يعنى خوفا من حالة الدقير المسكين ,قسمتك ودتك لى اهل المغرب يديك المولى الف عافية

يا ود فراج كيفنك
عاد لامتين انت خايف كدي

Quote: هجاء في ام الحسن _____ يا القيصيري وخاتي الجمال كل شيئ فيك شمال شمال الطويل فيك صار قٌصار والقُصار في الناس فيك طوال يا السنونك مترين طوال الشعر كدويي وقصار والبعاشيم منك بس تخاف (شعر الدقير) ست البنات .

طارق،
سكيني بت كمبال دي خلها علي!
بوريها الشنو شنو داك، بلا بَصَلْ0

Quote: طارق، سكيني بت كمبال دي خلها علي! بوريها الشنو شنو داك، بلا بَصَلْ

يا زول سلام ,

Quote: الدقير وام الحسن رقدوا كاويق..

بالطريقة دى ام الحسن ح تربط الدقير فى المراح او تمسكو الدونكا للعواسه.

تحياتى

اها شوفو الحجى القايمى هنا كمان



ياوليه أدينا كُباية الشاي دي خلينا نطير فاتحلنا مويه .
- يا راجل ما تصبُر هو متين اللكل ده رقد في كرشك دي لامن بقيت تنبح كايس الشاي .
- يا مرا أقولك مدور البابور وفاتحلي مويه مقرنه تقوليلي أصبر؟ أنا أكان بصبُر كان صبرته في بطن أمي .. أدينا الشاي ده المويه دي بتتكسر وتملأ الدنيي .
- أها ماشي أشدو ليك .. يشدوك إن شاء الله في عنبر العضام(قايلي مستغفري).. وبعدين تعال هني..سوووده علي الياباني .. كيف يعني ما صبرته في بطن أمك؟؟ ..كدي فهمني!!!
- خلق الله كووولها تمرق من بطن أمها بعد تتم تسعه وتسعه أنا مرقته في سبعه شهور.. فهمتي يا أم مُخاً كعب .
– نان ما تقول كدي... أتاري ديمه عليك عجلان.. حتي في بطن أمك ماك راضي تتم المُده القانونيي !!
- نان أنا كان تميت المُده القانونيي في بطن أمي كان عرستك إنتي آ الشوم.. كان عقلي بيبقي كبييير وآخدلي ويحتاً أخير منك ومن صباحك ده .
- مالو صباحي(تصبح قرد) .. والله بس رضينا بالهم والهم مو راضيبنا .. هي منو غيري الكانت بترضابك آ الفقران المقطع .. رفاقتي يا يُمه كووولهن عرسن رُجال السرور إلا أنا حظي المنحوس رماني فيك إنته .
- كُوتي جاي تاخدي منو يعني؟ ود النفيدي ولا ود الوالي .. أحمدي ربك وأحشيهو .
- كدي أسكت أسكت.. بتي سوسن ساوالي مسكول ... يا ربي مالا ؟؟
- والله حكايي ... مسكول!! .. إنتو مالكن ساكتين .. شوفو فطين البقت تعرف المسكول كمان.
- مالي مابعرفو.. أخير منك إنته المابتعرف الواو الضكر .
- الله لا عرفك .. جنس ده الله لا وراني ياهو .
- يا راجل كدي أقفل قدومك ده خلني اللضرُب للبت دي أشوفه مالا .
- حاتكون مالا يعني ؟ يا متشاكلين هي وراجله زي كل مره.. ولا كمان واحد في بُطانه كافت رفيقو مكببو الدم .
- ثُب دبيتك بالله .. أصلك مابتتفاول خير .
- يا مرا خليهو النضمي هسع ..أديني كُباية الشاي بعدين أمشي أنضمي مع بتك .
- أيوا يا سوسن ... مالك؟ الفي شنو ؟ ولدك؟ ياتو فيهُن ؟السغير ؟مااالو !!! فوقو وردي ؟ وكمان يسهل؟ وسويتيلو شنو؟
- دي شقاوة شنو الوقعته فيها يا الماحي .. وبعدين ..
- يا راجل أسكُت خلني اللسمع البت أم جناياً عيان دي .
- أها سكته .. إن شاء الله بس سُكاتي يوقف إسهال الولد .
- الشافع يا سوسن قاع يسنن ما تشفقي ..أسمعيني .. أمشي جيبيلو عود أبيض ومستكه وأدعكيلو لهاتو بيهن سممممح ... أسمعيني .. وفليل ولعي الطلح وأقعدي وأحشري معاكي في الشملي أكبُتيهو زيييين بعد تمسحيهو بيزيت السمسم .
- ده شافع ده أصلو ولا خبيز الجاي يحشرو في النيران دي.. الشافع ده بيفطس .
- يا راجل ما تسكت وتمسك خشمك ده عليك .
- السكته التلحقك أبوي...أبيت آ بسكُت .
- لا يا سوسن قاع أنضم مع أبوكي .. أسمعي .. دواء الحُكما مابينفع .. باكر بجيكي أشيلو أوديهو للصبُر بت هارون تكويهو وتمرقلو الهايفات .
- هي الصبُر براها هايفي وماعندها شغله البتباري خُشُمات الشُفّع..إنتي ماتخليها تطهرو فد مره ؟
- أصًبري يا بتي اللزح من جنب أبوكي أب خشماً متل الرادي ده ..حاميني النضم .
- يا وليه ماتخلي البت تودي الشافع للعياده يدوهو دوي يوقف الإسهال وينزل الوردي الفوقو .
-أحييي منك إنته ... لا لع أسمعي حديثي لا توديهو للحكيم .. الصبُر دي مرتاً كيف فالحي ومجربه وياها دي شغلته .
- قرته وين؟؟ في جامعة الخرتوم !!
- لاتبكي يا سوسن يا بتي .. الجنا ده بيبقي طيب .. ماتشفقي .. ولا أقولك أرجيني أنا جاياكي .
- يا وليه الشاي.. سويلي كُباية الشاي بعدين غُوري .
- ياراجل بلا شاي بلا جبنه.. البت تبكي وشافعه محموم ويسهل تقولي سويلي الشاي!!
-أها مو الشاي أب حجي ده .. أها أنا زاااتي خليتو .
- إنته ماتسويهو براك... مالك محنن !! ولا حب الشاي والسكر أنا صاراهو في طرفي !!..تراهو داك.. أدخل سو شايك .
- لا ماني محنن.. لكن هامل ... عشااان متل ده وأمثالو الراجل مااايبقي علي مرا وحدي.
- إنته قاعد تطنطن تقول في شنو ؟؟
- ما بقول في شي ...أمشي لبتك .. أمشي أنا شايي ماضروري .. وأخيرلي ألحق مويتي المقرنه دييك

موحومد ود عبدارحمان أخوي ، كيفنّك ؟ ماك طيب؟
انت باقيلى الدقير دا قريبن ليكا ! نان قالولك انا فاضي فيهو ؟
وحات ربي ، أحوش قشي واحلب نعجتي واقول كدي افور ليبينتي واقننّا ، وأكيب للجنات ديل كولهن الشاي عيللي انت آب أديكا !
عارف فيشان شينو ؟ فيشان انت اكنك سرن للدقير المعذب الميسيكيني دي !
ست البنات

يا طارق أخوي الحق الفريقي القايمي في حوش ود الزين دي !
والاسعلك آ عشاي : انت بس خليتني مع الدقير وأم الحسن المنفدقين ديل وححدي وبس تاني ضوممة لا جيت ولا قُتْ الانشدْ منها شيئ ؟ دحين دا كلام ؟
اسع شوف موحومد ود عمي عبد ارحمان بس قام يلسْ في الناس ويقولهون ست البنات هي السبب في فديقة ناس الدقير !
ست البنات .

يا طارق أخوي الحق الفريقي القايمي في حوش ود الزين دي !
والاسعلك آ عشاي : انت بس خليتني مع الدقير وأم الحسن المنفدقين ديل وححدي وبس تاني ضوممة لا جيت ولا قُتْ الانشدْ منها شيئ ؟ دحين دا كلام ؟
اسع شوف موحومد ود عمي عبد ارحمان بس قام يلسْ في الناس ويقولهون ست البنات هي السبب في فديقة ناس الدقير !
ست البنات .

Quote: تحياتى اها شوفو الحجى القايمى هنا كمان ياوليه أدينا كُباية الشاي دي خلينا نطير فاتحلنا مويه . - يا راجل ما تصبُر هو متين اللكل ده رقد في كرشك دي لامن بقيت تنبح كايس الشاي . - يا مرا أقولك مدور البابور وفاتحلي مويه مقرنه تقوليلي أصبر؟ أنا أكان بصبُر كان صبرته في بطن أمي .. أدينا الشاي ده المويه دي بتتكسر وتملأ الدنيي . - أها ماشي أشدو ليك .. يشدوك إن شاء الله في عنبر العضام(قايلي مستغفري).. وبعدين تعال هني..سوووده علي الياباني .. كيف يعني ما صبرته في بطن أمك؟؟ ..كدي فهمني!!! - خلق الله كووولها تمرق من بطن أمها بعد تتم تسعه وتسعه أنا مرقته في سبعه شهور.. فهمتي يا أم مُخاً كعب . – نان ما تقول كدي... أتاري ديمه عليك عجلان.. حتي في بطن أمك ماك راضي تتم المُده القانونيي !! - نان أنا كان تميت المُده القانونيي في بطن أمي كان عرستك إنتي آ الشوم.. كان عقلي بيبقي كبييير وآخدلي ويحتاً أخير منك ومن صباحك ده . - مالو صباحي(تصبح قرد) .. والله بس رضينا بالهم والهم مو راضيبنا .. هي منو غيري الكانت بترضابك آ الفقران المقطع .. رفاقتي يا يُمه كووولهن عرسن رُجال السرور إلا أنا حظي المنحوس رماني فيك إنته . - كُوتي جاي تاخدي منو يعني؟ ود النفيدي ولا ود الوالي .. أحمدي ربك وأحشيهو . - كدي أسكت أسكت.. بتي سوسن ساوالي مسكول ... يا ربي مالا ؟؟ - والله حكايي ... مسكول!! .. إنتو مالكن ساكتين .. شوفو فطين البقت تعرف المسكول كمان. - مالي مابعرفو.. أخير منك إنته المابتعرف الواو الضكر . - الله لا عرفك .. جنس ده الله لا وراني ياهو . - يا راجل كدي أقفل قدومك ده خلني اللضرُب للبت دي أشوفه مالا . - حاتكون مالا يعني ؟ يا متشاكلين هي وراجله زي كل مره.. ولا كمان واحد في بُطانه كافت رفيقو مكببو الدم . - ثُب دبيتك بالله .. أصلك مابتتفاول خير . - يا مرا خليهو النضمي هسع ..أديني كُباية الشاي بعدين أمشي أنضمي مع بتك . - أيوا يا سوسن ... مالك؟ الفي شنو ؟ ولدك؟ ياتو فيهُن ؟السغير ؟مااالو !!! فوقو وردي ؟ وكمان يسهل؟ وسويتيلو شنو؟ - دي شقاوة شنو الوقعته فيها يا الماحي .. وبعدين .. - يا راجل أسكُت خلني اللسمع البت أم جناياً عيان دي . - أها سكته .. إن شاء الله بس سُكاتي يوقف إسهال الولد . - الشافع يا سوسن قاع يسنن ما تشفقي ..أسمعيني .. أمشي جيبيلو عود أبيض ومستكه وأدعكيلو لهاتو بيهن سممممح ... أسمعيني .. وفليل ولعي الطلح وأقعدي وأحشري معاكي في الشملي أكبُتيهو زيييين بعد تمسحيهو بيزيت السمسم . - ده شافع ده أصلو ولا خبيز الجاي يحشرو في النيران دي.. الشافع ده بيفطس . - يا راجل ما تسكت وتمسك خشمك ده عليك . - السكته التلحقك أبوي...أبيت آ بسكُت . - لا يا سوسن قاع أنضم مع أبوكي .. أسمعي .. دواء الحُكما مابينفع .. باكر بجيكي أشيلو أوديهو للصبُر بت هارون تكويهو وتمرقلو الهايفات . - هي الصبُر براها هايفي وماعندها شغله البتباري خُشُمات الشُفّع..إنتي ماتخليها تطهرو فد مره ؟ - أصًبري يا بتي اللزح من جنب أبوكي أب خشماً متل الرادي ده ..حاميني النضم . - يا وليه ماتخلي البت تودي الشافع للعياده يدوهو دوي يوقف الإسهال وينزل الوردي الفوقو . -أحييي منك إنته ... لا لع أسمعي حديثي لا توديهو للحكيم .. الصبُر دي مرتاً كيف فالحي ومجربه وياها دي شغلته . - قرته وين؟؟ في جامعة الخرتوم !! - لاتبكي يا سوسن يا بتي .. الجنا ده بيبقي طيب .. ماتشفقي .. ولا أقولك أرجيني أنا جاياكي . - يا وليه الشاي.. سويلي كُباية الشاي بعدين غُوري . - ياراجل بلا شاي بلا جبنه.. البت تبكي وشافعه محموم ويسهل تقولي سويلي الشاي!! -أها مو الشاي أب حجي ده .. أها أنا زاااتي خليتو . - إنته ماتسويهو براك... مالك محنن !! ولا حب الشاي والسكر أنا صاراهو في طرفي !!..تراهو داك.. أدخل سو شايك . - لا ماني محنن.. لكن هامل ... عشااان متل ده وأمثالو الراجل مااايبقي علي مرا وحدي. - إنته قاعد تطنطن تقول في شنو ؟؟ - ما بقول في شي ...أمشي لبتك .. أمشي أنا شايي ماضروري .. وأخيرلي ألحق مويتي المقرنه دييك

ود الزين كيفنك ابوي
طبعا الحكاية دي كتبها ود خالتي زكريا بابكر عمر
زول مسلط ياخ

Quote: بالطريقة دى ام الحسن ح تربط الدقير فى المراح او تمسكو الدونكا للعواسه.

يا زول انت مالك مع الدقير دة

Quote: يا زول انت مالك مع الدقير دة

حاسدو على ام الحسن دى و الحياة البسيطة و الجميلة و المنافكات الصحية البيناتم.

انشاء الله انت طيب؟

اخى الجميل طارق....لك التحية.

باقى لى راقدلك فوق راى للبوست ده.

نضميكم حلو وبريدو ضمة.
إلا مناقرة الراجل مع المرأة عندكم بالحيل كتيرة....

ورونه شن سببه؟؟

تقديرى ومودتى.

الفصاحة كوم
والجمال كوم
والطيبة كوم
وريحتم كوم تاني
( كنت داير لي وكت اكملو معاكـ هنا )

Quote: وحات ربي ، أحوش قشي واحلب نعجتي واقول كدي افور ليبينتي واقننّا ، وأكيب للجنات ديل كولهن الشاي عيللي انت آب أديكا ! عارف فيشان شينو ؟ فيشان انت اكنك سرن للدقير المعذب الميسيكيني دي !

برييييييييئئ يا بيه!

-
يعلم الله ويشهد مشتاقلك يا سُكينه..

واا سيجيمتي يا طارق ود عمي جيبربن !
الدقير فلَقْ أُم الحسن بالفيلقي وشقّالا راسا واسع هي غمراني ويي دي البيكوسولا في شيتن يودوها ببهو لاسبيتالة صنب !
ويا موحومد ود عمي عبدارّحان تشتاقاك العافي التبتّقْ في عيضيماتك .
وعليك الرسول إ ما سلّمْ عليي أمي اّزهرا بت وديحمد.
واسّع انا كسرْ مُنْجَلي وماشي اروبطو بي شلتوت إ كان الْقا !
ست البنات .

سلام يا أهلنا السناجك .....

نضميكم كلو حلو ......

علاّ يمين الله ..... صورة خالتي الجابها عمران دي ضربتكم كلكم .....

ياخ دي لوحة ..... الدايرو كلو تلقاهو فيها.

,, ما بين حكى ود جبريين ,, ومساجلات ست البنات { كلهم }

قنطـــأر من الدهشـــــة و الإبداع ,,

لكم الود والمحبة لهذا الســـرد الإبداعى القشيب

العزائم أخيّي ،
الدايرو كولو تلقاهو عندها !
نان باقيلك خالتنا المبروكة دي بقت مًخْلايي !!
هى صِح سمحي وياها من العقاب الزيّن ، باقيلك بلْقاليي عندها محفاضي؟ ولا بشنْتيق ، ولا ان شا الله القالي بزدييق نحّلبو عوّْت ناس الدقير دي .
ست البنات .

ismeil abbas
تسلم يا حبيب على الكلمات الطيبات


قريبي عمران
لكن الصورة في السلك وفي الحنان ذاتو

سكينة والمطرطش
واصلوا حاجاتكم الحلوة دي




ود ابو العزائم
صورة عمران كملت القدام والورا


طه كروم
الله يجبر بي خاطرك يا حبيب



يا شباب ان غبنا القوا لينا العذر
الوالد يلزم السرير الأبيض والواحد حالته حالة

Quote: الوالد يلزم السرير الأبيض والواحد حالته حالة

آفو ..آفو ..... امانة ما متلومين !!!!!

ياخ قول لنا شي .....

ربنا يواليهو بالعافية.

إنتو ناس الدقير وام الحسن ساقوا طارق معاهون لي حش التمور ؟
ولا انكَرَم منهون ؟
بس حِسْو ضٌومة مافي !
ست البنات .