Post: #1
Title: توب دبيتك بي الله يا العزوبيي
Author: طارق جبريل
Date: 07-23-2011, 07:39 PM
Parent: #0
الحبيبين كيفنكم
نان انا وكرتلي جنس وكري يفكني منها الله..
علي الشلاقة العلي قمت رسلت وليداتي اجازي وبقيت قاعد في البيت ملوص..
قلت النجرب ياخي الحريي شويي..
جيت يومي اللول من الشغل مهوي والجو فيهو زيفي وجعااان..
وبطني تسووويي في الغرررررررررر غرررررررر علي البومة
الشايفالا فار وتغرغر ماها دايراهو يطير منها..
واللسان يقع ويقوم علي هبابة الكانون..
واصلي وكتين اكون جعان كرعيني ديل يتكلوجن
وتشوفني ماشي علي مفرمة الخدرة الزمان ديك.. اتكل فيهن..
اتمولصت يا الحبان وقمت اتهويت ولبست العراقي والسروال..
وقمت كدي دخلت علي المطبخ.. قلت الجوعة دي آآبتنتظر لامن
اطبخلي شيتا آكلو.. دحين اللسويلي جنى جداد عيون فسراع فسراع
من هني لا هني لقيتلي طوة صغووويري كدي ختيتها في البتجاز
وزي العجب كبيت فيها الزيت ولامن سخن قمت كدي جبتلي
جنى جدادتين قلت أفقشن فشان يطلعن بيض عيون..
ومع الفقشة يا الحبان ان كان الزيت يطير في يدي وبس بقيت ابيبي
ووووب ووووب وانطط لااااافوق بي يدي..
اليشفوني يقول جعلي منهرد في حفلة ألت حسين شندي..
جريت علي الحمام لتختلي فيها معجون سجنل.. وكتين رجعت
لقيت البيض علي القنقروشة النسوها في الصاج.. مسود ومعضم
والصفار علي ملطم الزبالة قبل ما يفتحوهوا ويبلطوهو في الجالوص..
شلتها رميتها في جردل الزبالة.. وفتحت التلاجة وشلتلي زبادي
اكلتو وتميتها كوز موية واتخمدت نمت..
تالت يوم جاء السبت يا الحبان يوم اجازتي.. قلت النسويلي حرف
بي ويكتا كاربي لامن امصمص اصابعيني وافقشلي معاها
بصلا أخدر واسكت الوغد وامطق...
زييين قطعت بصلتي وخليتها تتحمر مع الكفتة.. وقلت كدي
خلطهن بالمولينكس والريحي دقشتني في نخرتي..
ورجعتهن لايقتهن مع الويكي والصلصة.. وكل مرة ادي المقصوصة
دقة مع الحلة واضوق واسكت اشكر في روحي:عفيت منك يا ود بت ابو دية...
هييييييييع انا ولدك يا نفيسي بت بغداد.. الحروم طايرات
اتاريهو مع دقة المقصوصة الويكي كانت تنقط في البتجاز
اصلي وكتين رفعت الحلة لقيت بتجاز الجن دة كله مليان ويكي
علي الشافع الصايدو اسهال وفاكنو من غير لباس...
وقلت كدي لخيتلي كمشتين ألات دقيق وسويتلهن الملح..
وجبت الطوة وجبتلي تشوز وكبيتلي زيت في فنجان ومسحت الطوة
وقلت كدي رميت الحرف اللول.. والساعة الجيت اقلبو يا الحبان
يقوم يتقلب في السروال.. وضربت الكواريك والشعر المن تالا
الاضنين بقى واقف علي الحديد الكابس المغنطيس
وبقيت ماشي مفشق علي الحمام بس الشافع الطهروه
كبييييير وماسك العراقي قدامو..
وكتين قلعت السروال حمدت الله ما تشتشني..
وبقيت اناضم في روحي:
نان الله ما سترك يا ود بت ابو دية.. الخرابة دي ان بقت
انقلبت فيك ما اظن تاني كان جبتلك شافع.. واحمد الله علي
الشافعين الاداك ليهم الله.. الحمد آلاف.. الحمد آلاف..
رجعت اكلت الويكي بالعيش وحمدت الله..
قلت كدي لميت الغسيل ومشيت علي الغسالة..
لقيتلي جنبها كميين باغة.. شي مسحوق ابيض
وواحدا احمر وواحدة فيها سائل كدي ما فرزتو أليل شنو
قلت الندخل الفنايل والسراويل في اللول.. حتى ان بقيت كوجنتلي
شي يقع فيهن وحالن ساهل.. فتحت محل الصابون ومن كل
باغة شلتلي شويي ودخلت الهدوم.. ان كان القالكم الخرابة
فيها يبقى 12 زر.. يا ربي هسي اطبز ياتو فيهن
سكت وطبزتلي واحد علي الله.. اها وبقت تجقلب..
خليتها ومشيت اشوف في ناس النيل اللزرق..
شويتين سمعتها تصفر.. فتحت الباب يا الحبان ان كان القالكم
السراويل مقدقدات علي غربال الحصاص.. ووحدات انعجنن
في اخواتن وبقن علي عجين البسكويت أليل العيد
وكتين يدخلوه في المفرمة..
رجعت مسحت ويكة الجن ديك من البتجاز قبل تكرتب فيهو
ونزلت جبتلي دستتين زبادي والخرابة العلي الشافع المطهر داك
اليقولولوا "الهوت دوق" وشوية لغاويس كدي..
وكتين جاء اليوم الخامس مسكت التليفون:
هووووي بكرة ترجعوا
توب دبيتك بي الله يا العزوبيي
الرسول فيكم ان ما حبيتوا نسوانكم
|
Post: #2
Title: Re: توب دبيتك بي الله يا العزوبيي
Author: معاوية المدير
Date: 07-23-2011, 07:52 PM
Parent: #1
| Quote: الرسول فيكم ان ما حبيتوا نسوانكم |
ضبيتك بالله يا ود جبرين، الحبة التقوم لك في...
زمان المرا بتقوا لي راجلآ دا عشان ما تجيب إسمو
إنت تقول حبو... بتدور تخرب الرجال يا ود جبرين؟؟؟
والله مشتاقين يا قول الغناي...
|
Post: #3
Title: Re: توب دبيتك بي الله يا العزوبيي
Author: طارق جبريل
Date: 07-23-2011, 11:24 PM
Parent: #2
Quote: ضبيتك بالله يا ود جبرين، الحبة التقوم لك في...
زمان المرا بتقوا لي راجلآ دا عشان ما تجيب إسمو
إنت تقول حبو... بتدور تخرب الرجال يا ود جبرين؟؟؟
والله مشتاقين يا قول الغناي... |
يا حبيب يعلم الله مشتهي نضميك
ياخي خلهن اليحبوهن ياخي
انت الحسادي التولد البنات دي ما تخلها
|
Post: #4
Title: Re: توب دبيتك بي الله يا العزوبيي
Author: محمد عبد الماجد الصايم
Date: 07-24-2011, 08:25 AM
Parent: #3
يا زول .. استغفر الله ياخ!!
دي فرصة عظيمة جدا .. ويكة شنو وبيض عيون شنو!
أمرق القرش القاعد تكاوش فيهو دا وأقع المطاعم!
|
Post: #5
Title: Re: توب دبيتك بي الله يا العزوبيي
Author: فايزودالقاضي
Date: 07-24-2011, 08:42 AM
Parent: #4
40 سنة مابين مصر والمغرب ولساك في البركل ...
الوالدة - الله يديها العافية - الاجازة دي معاى هدت حيلنا بالويكة والقراصة ...مالقينا منكم غير عدم الغذا ..
|
Post: #9
Title: Re: توب دبيتك بي الله يا العزوبيي
Author: طارق جبريل
Date: 07-24-2011, 10:45 AM
Quote: 40 سنة مابين مصر والمغرب ولساك في البركل ...
الوالدة - الله يديها العافية - الاجازة دي معاى هدت حيلنا بالويكة والقراصة ...مالقينا منكم غير عدم الغذا ..
|
والله عفيت منها
انا لو لاقي زول يهريني قراريص كدة كان سلمتو الماهية
ربنا يخليها ليك يا حبيب
|
Post: #6
Title: Re: توب دبيتك بي الله يا العزوبيي
Author: امير عبدالدائم
Date: 07-24-2011, 08:44 AM
Parent: #4
| Quote: السراويل مقدقدات علي غربال الحصاص.. |
يا ولدنا الناس تفتش لل الطراوة وانت زعلان من التخرم ياخى دى ما هى زاته حلاوه الحلاوه نحن لو لقينا غساله تخلى التكه بس ده يكون يوم المنى
عالم ربنا مديها هواء تحتانى وهى تنقنق
|
Post: #7
Title: Re: توب دبيتك بي الله يا العزوبيي
Author: محمد عبد الماجد الصايم
Date: 07-24-2011, 08:56 AM
Parent: #6
| Quote: نحن لو لقينا غساله تخلى التكه بس ده يكون يوم المنى |
عالم قاعدة على الهبشة!!
|
Post: #11
Title: Re: توب دبيتك بي الله يا العزوبيي
Author: طارق جبريل
Date: 07-25-2011, 09:45 AM
Parent: #7
Quote: عالم قاعدة على الهبشة!!
|
|
Post: #10
Title: Re: توب دبيتك بي الله يا العزوبيي
Author: طارق جبريل
Date: 07-24-2011, 10:47 AM
Parent: #6
Quote: يا ولدنا الناس تفتش لل الطراوة وانت زعلان من التخرم ياخى دى ما هى زاته حلاوه الحلاوه نحن لو لقينا غساله تخلى التكه بس ده يكون يوم المنى
عالم ربنا مديها هواء تحتانى وهى تنقنق
|
يا كافي البلا ناس تفتش لي امفكو بالتيلة
|
Post: #8
Title: Re: توب دبيتك بي الله يا العزوبيي
Author: طارق جبريل
Date: 07-24-2011, 10:43 AM
Parent: #4
Quote: يا زول .. استغفر الله ياخ!!
دي فرصة عظيمة جدا .. ويكة شنو وبيض عيون شنو!
أمرق القرش القاعد تكاوش فيهو دا وأقع المطاعم!
|
اووووه ابو شنب
قرش شنو يا حبيب
هي كان فيها قرش ما كان هسي بنقز مع الرئيس في غناء قيقم
والله اخوك باكاتو بقت اكعب من الهلال
|
Post: #12
Title: Re: توب دبيتك بي الله يا العزوبيي
Author: ناصر فراج
Date: 07-26-2011, 00:18 AM
Parent: #8
ود جبرين سلام
| Quote: وكتين قلعت السروال حمدت الله ما تشتشني.. |
حالتك صعبة بالحيل
|
Post: #13
Title: Re: توب دبيتك بي الله يا العزوبيي
Author: عبد اللطيف بكري أحمد
Date: 07-26-2011, 00:44 AM
Parent: #12
قراصة شنو البتسويها ؟؟ انت كنت شغال في الدريسة؟؟؟
خليك صنديد زي أخوك : تسعة شهور ماولعت نار في البيت!!!
|
|