Post: #1
Title: نفيسي دسترت في الحج
Author: طارق جبريل
Date: 01-19-2010, 11:15 PM
Parent: #0
- الرسول آآآآحبوبتي الحج سمح
- والله يا حبيب قساي سمحا لامن يخلي الزول يدستر ضُمة ضُمة
- حبوبتي انت باقيلي جنيتي كمان الحج فيهو دستير انت قايلاهو زار كمان
- وحات الله الراجل الفي بلدنا أليل الزار ذاتو يا ولدي ان بقى وديناهو هناك علي يدستر
- هههههههه الله يقلعك بتبوظي حجتك
- والله يا ولدي انا من جنب شدرة ود جبارة بديت اسوي في لُوبيك اللهم لُوبيك
- الله لا تكسبك يا حبوبتي اسمها لبيك اللهم لبيك.. نان الشي اصلو عند الشدرة..
انت اصلو ما قالولك متين تبدي الاحرام ومتين تبدي تهللي وتدعي..
- يا ولدي انا شن عرفني اخوك ابراهيم قالي السنة دي تحجي ان شاء الله يمة
- عاد دة الوحيد البيقولك يمة
- نان ما ياني الربيتو انا.. قايل رباهو ابوك
- اها واصلك من بير وشدرة ود جبارة دي بقيتي تهللي
- يا ولدي والله ماني فارزالي شي
- اها وسافرتي كيفن
- والله يا ولدي ابراهيم جاء ساقني من البلد بالطيارة
ولامن وصلت المطار أليل مروي اصلي بقيت ازغرد ضُمة ضُمة
واقولهم نادولي بت عريبي وبت بلولة اليشوفني راكبي الطيارة
- باقيلي فضحتينا فيها
- والله يا طارق ولدي ابراهيم اخوك دة بقى يزح ضُمة ضُمة من الضحك
- باقيلي سويتيلك نصايب
- شالني يا ولدي وطلعبي سلالم كدي علي حُجار برج ود درقي
- اي ديل سلالم الطيارة يا حبوبتي
- ايي يا ولدي وهطني في كرسي جنبه وجابلو حُبالا كدي فيهن حدايد
وهجرني بيهن في حجري وقالي فشان ما تتهوززي وانا صاقعالو:
هوزيز شنو كمان في الطيارة يا ابراهيم اصلها هي حمارة ود تميم دايما عايري
- هههههههههه والله ماك نصيحي.. نان طيارة الجن دي ان بقت اتكت كدي ولا كدي
ما لازم تكوني مربوطي فشان ما تقعي يا خرابة
- والله يا ولدي اخوك غمتني بالحبال ديل شويتين جات ويحيدتا كدي
ليها (شطور) مبنقرات علي المنقايي قلب التور وكتين يلولح فيها الهبوب
- انت قايلاهن زي ألاتك العلي السعن ديل.. انت الوداك تشوفي فيها شنو ههههههههههه
- نان يا ولدي جات براها تشوف في حبال الجن ديل وسالتني بي شي كدي
ما فرزتو علي اخوك نجدني واتكلم معاهاوانا بقيت احمرلها خفتها تشبك فيهو
- نان انت هسي ما قلت سميحة و(شطورها) يتهوززن
- يا ولدي كبيري عليهو ومجلبطالا شيتا احمر في شلاليفها
وعيونها فيها شيتن ناطي منهن كدي علي شوك الكتر بس اسود
- يا خرابة كتلتيها ديل الرموش
- يا ولدي رموش شنو القدر ديل وعلي شرا القناديل كدي
- اها ووصلتوو الخرتوم
- ايي يا ولدي لكن الخوفي الدخلت فيني اصلها ما مرقت مني لليلي
- كيفن
- يا ولدي انا ما قايلي الخرابة اليقولولا الطيارة دي قاعدي
توجوج كدي وتتراجف علي الجريد وكتين تكون شايلاهو زيفي
- هههههههه نان انت اصلك قايلاها شنو
- انا قلت تبقى اسرع شوووييي من عربية رابح عمك
- هههههههههه اها
- الساعة القالت كدي جرت وبقت توجوج علي المرة الدايري تلد
- ههههههه اها الله يفضحك
- والله يا ولدي عضعضت لسناتي وبقيت ابيبي واسكلب:
وووووووب علي يا ابراهيم الحج طاير داير تكتلني في النصيبي دي
وبقيت اتبن في جلابيتي وسروالي والتوب
- لي شنو تتبني فيهن
- قايلي نفسي يا ولدي بُول ضُمة ضُمة
- جملة الايمان ماك نصيحي تب
- غايتو يا ولدي الطياري كلها تضحك فيني لامن وصلت الحج
- وهناك شن سويتي
- ترانا وصلنا ولقيت امة محمد دي كلها هناك
انا باقيلي مافي زولا قاعد في بيتو والخلايق دي كلها
جات تحج بس ما شفتلي زولا شايلو كُشر أليل باب
- ههههههههههه بت بغداد انت باقيلي خرفتي
كُشر الباب يشيلوه لي شنو كمان في الحج
- نان يا ولدي امة محمد دي كلها جات وخلت بيوتها
- كلهم زيك كدي.. انت موش خليتي عمي الطيب في البيت
اها كلهم برضو مخلين اولادهم ولا اخوانهم في البيت
- والله يا ولد الحج اماني ماهو سمح.. والعجب وكتين تسمع في الخلايق
كلها صاقعي: لُوبيك اللهم لُوبيك.. وواحدين يتباكو وواحدين يدعوا لي
وليداتهم وواحد نضميهم كُتور ضُمة ضُمة
- المسلمين ماهن كتار
- ايي.. علي يا ولدي في واحدين حجهم كعب
- كيفن
- واحدين كدي من بُكان يقولوا انجيريا(نيجيريا).. ديل يا ولدي
بس يدافروا في الناس ويرطنوا ووكتين يصلوا الحرم دة
ينبطحوا في الواطة وتسمع فيهم يعوعوا
- لا تبقي اتشكالتيلك مع واحدا فيهم
- واحدا فيهم دفر عمك حسن قمت انا شلت برطوشي ومشيت عليه
وقلتلو يا ود الغلفاء تاني تجي علي ولدي دة علي ألتخك بي برطوشي دة
عمك حسن وود عمك علي جوا ينجاروا حصلوني
- والله يا حبوتي باقيلي حجتك دي ماها قايمي من شبا دي
- نان يا ولدي اخليهو يكتل عمك الخرابة غليد علي شوال الكاويق
- دعيتيلنا معاك يا حبوبتي
- والله كلكم دعيتلكم... لكن النصيحي لي الله دعيت لي ابراهيم كتير خلاص
وابوك دعيتلو باقي انا بريدو فشان قاعد يغمتلي القروش العُراض
ويرسلي السُكر والشاي من الخرتوم في لواري اولاد البركل.. ودعيت لي الطيب عمك
الله يتوب عليه من الجغمي أليل العرقي... وأصلي وكتين مشينا نفلع في شيطان الجن داك
قدر ما فتشتلي دُرابي فشان اكفتو بيها ما لقيتها
- لي شنو دُرابي حصايايي ما كفاية
- يا ولدي كل يوم يجي يوسوس لي عمك الطيب ويوديهو مكان الجغمي أليل العرقي
- ههههههههه باقيلي تعبتوا شديد
- والله يا ولدي تعبنالنا جنس تعب.. واصلو عمك حسن دة لسناتو بقن مدلدلات
علي الكون شبر.. وشايلو شيتا اصفر كدي يشرب فيهو علي شيط الشُفع (عصير منقة)
واصلي وكتين مشيت علي عرفة دي.. جاتين خمة نفس وبقيت ادعي الله دة يرجعني لي اهلي
والدنيي يا ولدي سموما كافري.. واصلي بقيت ادعي واضرب في اوراكي.. زي دستور الزار
وكل دقيقة اسأل في عمك حسن: انت يا الحسن عرفة الجن دي ما انتهت نرجع لي بلدنا
- ههههههههه اندردرتوا.. لكن بختك المهم حجيتي
- أيي احمد ربي والله يدي ابراهيم اخوك العافي التخصه في المصارين
- اها ان بقى قالك السنة الجاي داير تاني يوديك الحج تمشي
- والله يا ولدي ان بقى جنب الكرقة ألت عمك الطيب دي ماني ماشي
- هههههههههههه الله لا كسبك
رحمها الله نفيسي بت بغداد
|
Post: #2
Title: Re: نفيسي دسترت في الحج
Author: سلمى الشيخ سلامة
Date: 01-20-2010, 00:31 AM
Parent: #1
| Quote: - والله يا ولدي ان بقى جنب الكرقة ألت عمك الطيب دي ماني ماشي |
طارق
الله يجازى محنك
|
Post: #3
Title: Re: نفيسي دسترت في الحج
Author: omar arbab
Date: 01-20-2010, 00:52 AM
Parent: #2
| Quote: انت يا الحسن عرفة الجن دي ما انتهت نرجع لي بلدنا |
هههههههههههههه
ههههههههه
رحمها الله ويحسن ختامنا
|
Post: #4
Title: Re: نفيسي دسترت في الحج
Author: خالد العبيد
Date: 01-20-2010, 01:02 AM
طارق
تحياتي يا جميل
عمل ممتع تقرأ بي نفس واحد لمن نفسك ينقطع
بعض الكلمات عايزه شرح بالعربي!
يا سلمى الكرقة يعني شنو!!
الشايقية طرفنا لسه في اوسلي
|
Post: #7
Title: Re: نفيسي دسترت في الحج
Author: طارق جبريل
Date: 01-20-2010, 09:22 AM
Parent: #4
Quote: طارق
تحياتي يا جميل
عمل ممتع تقرأ بي نفس واحد لمن نفسك ينقطع
بعض الكلمات عايزه شرح بالعربي!
يا سلمى الكرقة يعني شنو!!
الشايقية طرفنا لسه في اوسلي |
ود العبيد كيفنك ياخي
الله يجبر بي خاطرك
الكرقة يا الحبيب يعني الراكوبة
انا باقيلي قبل ما انزلي بوست مفروض اسويلي شرح هني للكلام
|
Post: #6
Title: Re: نفيسي دسترت في الحج
Author: طارق جبريل
Date: 01-20-2010, 09:20 AM
| Quote: رحمها الله ويحسن ختامنا |
ود ارباب كيفنك ابوي
ياخي نفيسي كانت مرتا ماها ساهلي كله كله
الله يعلم كانت نفسها طيبيب بالحيل
رحمها الله
|
Post: #5
Title: Re: نفيسي دسترت في الحج
Author: طارق جبريل
Date: 01-20-2010, 09:19 AM
Parent: #2
Quote: طارق
الله يجازى محنك
|
اووووووه بت الشيخ كيفنك
ومبروك حلو البنيي
والله يديكي حجي بس ماها متل آلت بت بغداد دي
|
Post: #8
Title: Re: نفيسي دسترت في الحج
Author: omer osman
Date: 01-20-2010, 09:30 AM
Parent: #5
القصة جاتني بالايميل (بتاعة الشركة) من زميل شايقي .............. براي في سري قلت اكيد دي كتابة الوليد المطروش ودجبرين ودي عمتي نفيسي الرقدت خل الما بتغباني
|
Post: #11
Title: Re: نفيسي دسترت في الحج
Author: طارق جبريل
Date: 01-20-2010, 10:02 AM
Parent: #8
Quote: القصة جاتني بالايميل (بتاعة الشركة) من زميل شايقي .............. براي في سري قلت اكيد دي كتابة الوليد المطروش ودجبرين ودي عمتي نفيسي الرقدت خل الما بتغباني
|
نان يا عمر دة منو دة المباريني كدي
الشي دي يا دوبي نزلتها بالليل
اصلها متين لحقت تصلك
|
Post: #9
Title: Re: نفيسي دسترت في الحج
Author: اميمة مصطفى سند
Date: 01-20-2010, 09:33 AM
Parent: #5
مشتا(غ)وووووووووووووووون يعلم الله
|
Post: #12
Title: Re: نفيسي دسترت في الحج
Author: طارق جبريل
Date: 01-20-2010, 10:03 AM
Parent: #9
| Quote: مشتا(غ)وووووووووووووووون يعلم الله |
اووووه بت اختي الزيني
يعلم الله مشتهي ونستك
بالله شفتي عمايل حبوبتي دي
|
Post: #10
Title: Re: نفيسي دسترت في الحج
Author: هاشم محمد الحسن عبدالله
Date: 01-20-2010, 09:41 AM
Parent: #5
حبيبناولد أهلى الشايقية السمحين الزينين ، بارك الله فيك فهذه الابداعات تغوص فى أعماقنا وترجعنى عشرات السنين لدفْ أهلى فى السقاى والباسا مركز مروى لتعيد ذكريات الطفولة صدقنى أعيش ماتكتبه من تراث عظيم بحذافيره وأتذكر شاى الصباح بلبن الغنم بعد حلبها من زريبة الحوش الفوقانى ونشربه مقننا بكل الخيرالفيه وكمان معه قرصات صغيرة حامضة معمولة بالتمر حق العام الفائت وبعده نتهيأ لفطور الصباح الماهو خمج قراصة غليظة بملاح ويكة ، لما امى تخض القراصة فى الصاج الساخن ويحدث صوتا عاليا يمتعنا ويداعب الجوع فى الاحشاء ومعه بصلات حارات مع الليمون والشطة، صدقنى أكلات لم أذق مثل حلاوتها رغم تجوالى فى قارات الدنيا المختلفة بمختلف مطابخها الفرنسية والايطالية ةوالمكسيكية، وتذوقها ، لكن ياود جبرين تب مافى زى حلاوة قراصة أمى ، وحلاوة شايهاالمقنن بلبن الغنم ورائحته مازالت فى خياشيمى ، ربنا يردنا ودجبرين لبلدنا السمحة، وعماتى وخالاتى ومابقى منهم يكلمونى بالتلفون ويقولوا لى انت قايلة بلدنا زى زمان السد عمل عمائلو والخير على الاعتاب، قاللوا لى تعالى عمر بيوت وحيشان أهلك واجدادك الايجارات بقت عندنا بالدولار، أحسن من غربتك الطولت ديه، لكن ياليت الله يعطينا القوى للقرار الزين فالعمر قد مضى جزء كبير منه فى دار الغربة والعجم أشتقت للجروف والنيل وحش التمر والفول المصرى الطازج والشمار والبصل الأبيض وكل الأكل الطبيعى من جروف نيلنا الخالد، اللهم ردنا سالمين، مع خالص مودتى وحبى لك فلقد أيقظت فى النفوس شجون جميلة لايطفئها سوى العودة للسقاى وديوم ود حاج ، يارب رجعنا سالمين غانمين.
|
Post: #13
Title: Re: نفيسي دسترت في الحج
Author: سجيمان
Date: 01-20-2010, 10:06 AM
Parent: #10
ازيا يا دكتور
سيناريو في قمة الروعة.....
خلاني اطرا حبوابتي الرقدن .. وعويناتي رقرقن
|
Post: #14
Title: Re: نفيسي دسترت في الحج
Author: عفاف الصادق بابكر
Date: 01-20-2010, 10:23 AM
Parent: #13
غايتو يا طارق .. اصلي ما بسألك نهائي ..
ده شنو البتعمل فيهو ده .. والله مته من الضحك ..
فضحتني يا طارق بالضحك الله يخوذق شيطانك ..
ياخ حبوبه نفيسه .. فاتت حد المبالغه.. الله يرحمها ..
| Quote: رحمها الله نفيسي بت بغداد |
ربنا يفرحها ويضحكها مع ملائكة الرحمن ..
|
Post: #15
Title: Re: نفيسي دسترت في الحج
Author: صلاح أبودية
Date: 01-20-2010, 10:43 AM
Parent: #14
ود خالتى !
كيف حالك ؟ كتلتنا كتلى بى ريحة شبا والحبوبات !
علي باليمن من قريت كلامك ده طق طارت لى ريحة حبوبتى الشيخيى فى نخرينى
وإتذكرت لامن تقلدنى وتسلم على فى خشيمى واحلاتى واحلاتى ياوليد محمد
تعال نشمك ِِِشففففففف تشفطنى لامن تقرب تشرق !
رحم الله حبوباتنا الشيخيى ونفيسى بت بغداد !
تانى الريحى دى نلقاها وين ؟؟
|
Post: #20
Title: Re: نفيسي دسترت في الحج
Author: طارق جبريل
Date: 01-20-2010, 05:48 PM
Parent: #15
Quote: ود خالتى !
كيف حالك ؟ كتلتنا كتلى بى ريحة شبا والحبوبات !
علي باليمن من قريت كلامك ده طق طارت لى ريحة حبوبتى الشيخيى فى نخرينى
وإتذكرت لامن تقلدنى وتسلم على فى خشيمى واحلاتى واحلاتى ياوليد محمد
تعال نشمك ِِِشففففففف تشفطنى لامن تقرب تشرق !
رحم الله حبوباتنا الشيخيى ونفيسى بت بغداد !
تانى الريحى دى نلقاها وين ؟؟
|
صلاح ود خالتي
الله يعلم انا في دربهن داير اموت
آآآآلرسول آآآآصلاح خالتي طيبي ونصيحي في عضمها دة
والله مشتهيلي ونسي معاها
|
Post: #18
Title: Re: نفيسي دسترت في الحج
Author: طارق جبريل
Date: 01-20-2010, 01:14 PM
Parent: #14
Quote: غايتو يا طارق .. اصلي ما بسألك نهائي ..
ده شنو البتعمل فيهو ده .. والله مته من الضحك ..
فضحتني يا طارق بالضحك الله يخوذق شيطانك ..
ياخ حبوبه نفيسه .. فاتت حد المبالغه.. الله يرحمها .. |
والله يا بت الصادق نفيسي دي عندها جنس محن تحير الواحد في عضمه دة
الله يرحمها كانت مرتا ماها ساهلي تب
|
Post: #17
Title: Re: نفيسي دسترت في الحج
Author: طارق جبريل
Date: 01-20-2010, 01:12 PM
Parent: #13
Quote: ازيا يا دكتور
سيناريو في قمة الروعة.....
خلاني اطرا حبوابتي الرقدن .. وعويناتي رقرقن
|
حليل حبوباتنا يا دكتور عادل
كانن حنينات ياخي
|
Post: #16
Title: Re: نفيسي دسترت في الحج
Author: طارق جبريل
Date: 01-20-2010, 01:11 PM
Parent: #10
Quote: حبيبناولد أهلى الشايقية السمحين الزينين ، بارك الله فيك فهذه الابداعات تغوص فى أعماقنا وترجعنى عشرات السنين لدفْ أهلى فى السقاى والباسا مركز مروى لتعيد ذكريات الطفولة صدقنى أعيش ماتكتبه من تراث عظيم بحذافيره وأتذكر شاى الصباح بلبن الغنم بعد حلبها من زريبة الحوش الفوقانى ونشربه مقننا بكل الخيرالفيه وكمان معه قرصات صغيرة حامضة معمولة بالتمر حق العام الفائت وبعده نتهيأ لفطور الصباح الماهو خمج قراصة غليظة بملاح ويكة ، لما امى تخض القراصة فى الصاج الساخن ويحدث صوتا عاليا يمتعنا ويداعب الجوع فى الاحشاء ومعه بصلات حارات مع الليمون والشطة، صدقنى أكلات لم أذق مثل حلاوتها رغم تجوالى فى قارات الدنيا المختلفة بمختلف مطابخها الفرنسية والايطالية ةوالمكسيكية، وتذوقها ، لكن ياود جبرين تب مافى زى حلاوة قراصة أمى ، وحلاوة شايهاالمقنن بلبن الغنم ورائحته مازالت فى خياشيمى ، ربنا يردنا ودجبرين لبلدنا السمحة، وعماتى وخالاتى ومابقى منهم يكلمونى بالتلفون ويقولوا لى انت قايلة بلدنا زى زمان السد عمل عمائلو والخير على الاعتاب، قاللوا لى تعالى عمر بيوت وحيشان أهلك واجدادك الايجارات بقت عندنا بالدولار، أحسن من غربتك الطولت ديه، لكن ياليت الله يعطينا القوى للقرار الزين فالعمر قد مضى جزء كبير منه فى دار الغربة والعجم أشتقت للجروف والنيل وحش التمر والفول المصرى الطازج والشمار والبصل الأبيض وكل الأكل الطبيعى من جروف نيلنا الخالد، اللهم ردنا سالمين، مع خالص مودتى وحبى لك فلقد أيقظت فى النفوس شجون جميلة لايطفئها سوى العودة للسقاى وديوم ود حاج ، يارب رجعنا سالمين غانمين.
|
هاشم كيفنك ياخي
ياخي مالك علي متور علي الشوق
يا حليل شبا وحليل دويم ود حاج وحليل الطريف
انا اصلي المغسي دايري تشقني
|
Post: #19
Title: Re: نفيسي دسترت في الحج
Author: noon
Date: 01-20-2010, 01:56 PM
Parent: #16
غايتو مبالغه, زكرتني حبوبه جيرانا
مشت الحج , قالوا ليها لحج كيف
قالت بري يا يمه اديتو للعدو
يا حليل الحبوبات
شكرا طارق you made my day
Noon
|
Post: #21
Title: Re: نفيسي دسترت في الحج
Author: طارق جبريل
Date: 01-20-2010, 09:29 PM
Parent: #19
Quote: غايتو مبالغه, زكرتني حبوبه جيرانا
مشت الحج , قالوا ليها لحج كيف
قالت بري يا يمه اديتو للعدو
يا حليل الحبوبات
شكرا طارق you made my day
Noon |
نون كيفنك
ياخي الحبوبات ديل بالغوا عدييييييييييييل
الله يرحمن ويغفرلهن
|
Post: #22
Title: Re: نفيسي دسترت في الحج
Author: خالد درق
Date: 01-20-2010, 09:46 PM
Parent: #21
| Quote: والله يا حبيب قساي سمحا لامن يخلي الزول يدستر ضُمة ضُمة |
ود جبريل يارائع
اديك العافية زكرتنى باحبوباتى
والله يرحم نفيسي بت البغداد
مودتى
|
Post: #23
Title: Re: نفيسي دسترت في الحج
Author: حبيب نورة
Date: 01-21-2010, 03:17 AM
Parent: #22
ههههههههههههههههاااااااااااااااااي
|
Post: #24
Title: Re: نفيسي دسترت في الحج
Author: كمال الشادي
Date: 01-21-2010, 07:33 AM
Parent: #23
راجع ليك
يا مطموس
|
Post: #30
Title: Re: نفيسي دسترت في الحج
Author: طارق جبريل
Date: 01-21-2010, 11:16 AM
Parent: #24
راجيك يا الحبيب
|
Post: #29
Title: Re: نفيسي دسترت في الحج
Author: طارق جبريل
Date: 01-21-2010, 11:15 AM
Parent: #23
حبيب نورة
اضحك يا الحبيب
اصلها ماها جايبي تمنها
|
Post: #26
Title: Re: نفيسي دسترت في الحج
Author: طارق جبريل
Date: 01-21-2010, 09:58 AM
Parent: #22
Quote: ود جبريل يارائع
اديك العافية زكرتنى باحبوباتى
والله يرحم نفيسي بت البغداد
مودتى
|
ود درق كيفنك
الله يرحمن ياخي كانن ماهن ساهلات ضُمة ضُمة
|
Post: #25
Title: Re: نفيسي دسترت في الحج
Author: عبدالمجيد الكونت
Date: 01-21-2010, 09:15 AM
Parent: #1
Quote: واصلو عمك حسن دة لسناتو بقن مدلدلات
علي الكون شبر |
رحمة الله على حبوبتنا بت بغداد
|
Post: #27
Title: Re: نفيسي دسترت في الحج
Author: شول اشوانق دينق
Date: 01-21-2010, 10:50 AM
Parent: #25
رجعت لحركاتك القديمة يا مغربى
الله يرحم الحبوبة بت بغداد.
|
Post: #32
Title: Re: نفيسي دسترت في الحج
Author: طارق جبريل
Date: 01-21-2010, 11:17 AM
Parent: #27
| Quote: رجعت لحركاتك القديمة يا مغربى |
اووووووووه الرئيس المخلوع
هههههههههههههه
وين يا فردة
لسة مشوكش
|
Post: #28
Title: Re: نفيسي دسترت في الحج
Author: محمد ابراهيم قرض
Date: 01-21-2010, 11:00 AM
Parent: #25
طارق ..
نحن من شوايقة لندن ..
وإن كان أصلنا من البركل
الجنب البحر مش الجنب الجبل !!!!
عشان كده (حاسدنك) على
النضمي الحنين البتكتبو ده ...
قدر ما حاولنا نعوج خشمنا
ماقدرنا نجود (الآكسنت) وانفضحنا
امام الاصليين الزيك ...
دحين الرسول تدينا دروس خصوصية
في متل نضميك ده عشان نرجع
لأصلنا .. ما تخاف بندفع ليك
بالدولار ..
ذكرتنا حبوبتنا آمنة بت باشاب
ربنا يرحمها ويحسن اليها
|
Post: #37
Title: Re: نفيسي دسترت في الحج
Author: طارق جبريل
Date: 01-22-2010, 05:37 PM
Parent: #28
Quote: طارق ..
نحن من شوايقة لندن ..
وإن كان أصلنا من البركل
الجنب البحر مش الجنب الجبل !!!!
عشان كده (حاسدنك) على
النضمي الحنين البتكتبو ده ...
قدر ما حاولنا نعوج خشمنا
ماقدرنا نجود (الآكسنت) وانفضحنا
امام الاصليين الزيك ...
دحين الرسول تدينا دروس خصوصية
في متل نضميك ده عشان نرجع
لأصلنا .. ما تخاف بندفع ليك
بالدولار ..
ذكرتنا حبوبتنا آمنة بت باشاب
ربنا يرحمها ويحسن اليها
|
ود قرض كيفنك ابوي
ياخي من زمااااااان انا ناوي افتح لي فصل محو امية في الشايقي
|
Post: #31
Title: Re: نفيسي دسترت في الحج
Author: طارق جبريل
Date: 01-21-2010, 11:17 AM
Parent: #25
Quote: رحمة الله على حبوبتنا بت بغداد
|
يا كونت كيفنك ابوي
|
Post: #33
Title: Re: نفيسي دسترت في الحج
Author: معاوية المدير
Date: 01-21-2010, 12:46 PM
Parent: #31
إنت يا يابا تتجازى،
وحات ستي نفيسة
ماك براكـ...
|
Post: #35
Title: Re: نفيسي دسترت في الحج
Author: Tabaldina
Date: 01-21-2010, 07:55 PM
Parent: #34
..
.
| Quote: والله يا ولدي انا من جنب شدرة ود جبارة بديت اسوي في لُوبيك اللهم لُوبيك |
والله ابداع ..
فى ذمتك دى حبوبتك صدق ولا قطعتها من مخك المطموس دا ؟؟
ربنا يرحمها ويحسن مثواها
________
بالله اشرح لينا وصف المضيفة
الواحد ما داير يجيب الاقتباس فى الحج
|
Post: #36
Title: Re: نفيسي دسترت في الحج
Author: عزيز عيسى
Date: 01-21-2010, 09:07 PM
Parent: #35
طارق ود جبرين..
ياسلام عليك ياخي إنت زول غير عادي..
إبداع.. وربنا يرحم حبوبتك نفيسي بت بغداد.
ناس كانوا جميلين وتجد العفوية التلقائية في
كلامهم وتصرفاتهم.. يعبرون عن شعورهم بكل
أريحية وبدون أي رتوش أو تكلفة.
هنا نفيسي بت بغداد ما بوظت حجتها..
Quote: - وحات الله الراجل الفي بلدنا أليل الزار ذاتو يا ولدي ان بقى وديناهو هناك علي يدستر
- هههههههه الله يقلعك بتبوظي حجتك.
|
ههههه.. لكن بيني وبينك حبوبتك قنعت من الدنيا وما فيها
وبوظتها خالص هنا:
Quote: - اها ان بقى قالك السنة الجاي داير تاني يوديك الحج تمشي
- والله يا ولدي ان بقى جنب الكرقة ألت عمك الطيب دي ماني ماشي
|
زيدنا من مثل هذه الحكاوي الله يديك العافية.
|
Post: #41
Title: Re: نفيسي دسترت في الحج
Author: طارق جبريل
Date: 01-22-2010, 05:56 PM
Parent: #36
Quote: ناس كانوا جميلين وتجد العفوية التلقائية في
كلامهم وتصرفاتهم.. يعبرون عن شعورهم بكل
أريحية وبدون أي رتوش أو تكلفة.
|
يا عزيز كيفنك
ياخي داك زمننا ما بيتعاد تاني
الله يرحمن
محبتي الاكيدة
|
Post: #40
Title: Re: نفيسي دسترت في الحج
Author: طارق جبريل
Date: 01-22-2010, 05:46 PM
Parent: #35
Quote: بالله اشرح لينا وصف المضيفة
الواحد ما داير يجيب الاقتباس فى الحج |
يا شقي الحال ان بقينا وصفنا النصايب ديك بيرفدوني من منبر بكري دة
|
Post: #39
Title: Re: نفيسي دسترت في الحج
Author: طارق جبريل
Date: 01-22-2010, 05:42 PM
Parent: #34
والله يا سيف اليزل عمك دة ريحين في حناني
|
Post: #38
Title: Re: نفيسي دسترت في الحج
Author: طارق جبريل
Date: 01-22-2010, 05:40 PM
Parent: #33
Quote: إنت يا يابا تتجازى،
وحات ستي نفيسة
ماك براكـ...
|
راقد كاويق يا الحبيب
مكوفر ضُمة ضُمة
|
Post: #42
Title: Re: نفيسي دسترت في الحج
Author: باسط المكي
Date: 01-23-2010, 05:02 AM
Parent: #38
Quote: واصلي بقيت ادعي واضرب في اوراكي.. زي دستور الزار
وكل دقيقة اسأل في عمك حسن: انت يا الحسن عرفة الجن دي ما انتهت نرجع لي بلدنا |
طارق
تحياتي ..كاني متخيل نفيسة دي تمااااام
وما اروع كباريتنا ...وما احلي عفويتهن
نوع نادر مابتكرر
.
كل الود
|
Post: #43
Title: Re: نفيسي دسترت في الحج
Author: طارق جبريل
Date: 01-23-2010, 02:36 PM
Parent: #42
Quote:
طارق
تحياتي ..كاني متخيل نفيسة دي تمااااام
وما اروع كباريتنا ...وما احلي عفويتهن
نوع نادر مابتكرر
.
كل الود |
ود المكي يا حبيبنا كيفنك
ياخي دة جيل ما بيتعوض
متسامح في كل شي حتى العبادات
محبتي الاكيدة
|
Post: #44
Title: Re: نفيسي دسترت في الحج
Author: طارق جبريل
Date: 01-27-2010, 11:47 PM
Parent: #43
كدي اطلعيلي لاااااااااافوق لامن اجيكي
|
|