Post: #2 Title: Re: قايمي الصباح متكفلتي.. Author: سليمان الرفاعي Date: 10-10-2009, 01:11 AM Parent: #1
يا طارق جبريل
هذه مادة خالية من الشوائب ... تنتقي الغدد الدمعية دون سائر عضيات الجسد..
هذه مادة تقف علي نوافذ الذاكرة المستدامة وتتسلل رويدا رويدا لتعبر مسام الروح فتدقدقها في الدغش النسايمي بهبهبن ..وساعة الهجير.. وقت الخلوق ترقد تنوم..إنها من سلالة عباد الشمس
رسل لي عفوك يا و جبريل
Post: #3 Title: Re: قايمي الصباح متكفلتي.. Author: طارق جبريل Date: 10-10-2009, 09:28 AM
ود الرفاعي كيفنك يا حبيب محمد جبارة دة والله بيكتل ليه زول عدييييييييييييل حليل الزمن داك وحليل ناسه
محبتي الاكيدة
Post: #4 Title: Re: قايمي الصباح متكفلتي.. Author: Fadl Karrar Date: 10-10-2009, 09:49 AM Parent: #3
ود جبرين مالك علينا ؟؟؟؟ ومالك علي أنا بالذات عارف ليه ؟؟؟ عشان أمي إسمها ( زينوبة ) يعني يا ود جبرين خلفت لي الكي
وهاك يا ود جبرين
بحر المودة كلمات الشاعر المبدع /السر عثمان الطيب أداء / محمد جبارة
شوفي الزمن يا يمه ساقني بعيد خلاص در درني واتغربت واتبهدلت وريني الخلاص ساقني القدر منك بعيد لآذيا كاس جرعني كاس يا يمه يا فيض الحنان الما كمل يا يمه يا بدري البشع دايماً يهل يا يمه يا نور الصباح وكتين يطل وآشري يا زينوبة ولدك في بحور الشوق كتل محروم من الحب والمحنة وراك همل يا يمة يا بحر المودة وكتين يفيض يا يمة يا شعلة أمل زادت وميض يا يمة يا عنقود كلام منظوم قصيد يا يمه يا نغماً حنين بالشوق يرن وأفكاري فيهو بيرتعن … دمعاتي شانو بينزلن واتذكر يا يمه في الدغش النسايمو يهبهبن قايمي الصباح متكفلتي شايلي الحليلي علي المراح والساعة ديك يا دوب ديكنا بدأ الصياح والطير صغاروا يغردن جبتي اللبن بي انشراح واتذكر يا يمه في وكت الهجير صالياك نار الدوكي عستيلنا الفطير رشيتي قلتي أكلوهو خير واتذكر يا يمه يا بسمة الطفل الغرير وكت الخلوق ترقد تنوم وأسهر براي أرعي النجوم والشوق يرف جنحيهو بي فوق لي يحوم وأهتف باسمك في الخيال طيفك كمان بي فوقي جال وأتمني لو لحظات يدوم لكني فجأة ألقاهو زال واتذكر يا يمه ساعة الناس يجونا من البلد ناعم ترابه علي جسيماتن رقد ريحة التمر فوق الهدوم ولون الخضار خانس لبد والشوق أوارو بيشتعل كان ظني فيهو يكون خمد واتذكر يا يمة والناس قالوا راجعين البلد رصوا الهديمات عدلوا ركبوا اللواري وقبلوا خلونى وحيدى بلا انيس كيف إنفرادى إتحملوا شالوا السلام من عندى ليك وإن شاءالله عندك يوصلو يايمه ساعت يوصلوا ويقولو ليك شفناه فى بلد فى بلد الأمان انبسطى يا نبع الحنان وانا حالى يشهدبوا الزمان يايمه رسلى لى عفوك ينجينى من جور الزمان
Quote: اللهم يا واسع المغفرة أرحم عشة بت أبو دية رحمة واسعة وأغفر لها إنك أنت الغفور الرحيم
آآآآآآآآآآآآآمين يا حبيب ربنا يرحم جميع موتانا
Post: #11 Title: Re: قايمي الصباح متكفلتي.. Author: خالد احمد محمد Date: 10-10-2009, 03:18 PM Parent: #9
واتذكرك يا يمه في الدغش النسايمو يهبهبن قايمي الصباح متكفلتي شايلي الحليلي علي المراح والساعة ديك يا دوب ديكنا بدأ الصياح والطير صغاروا يغردن
يديك الف عافية ياطارق على الخيط النبيل ده .... وبالجد القصيدة دى كانت من اجمل الصور اللى وصفت الامهات الرائعات ديل واللى كافحن وربن بالفى والمافى وختن للاجيال الجديدة دى رصيد كبير من الحب والحنية المابيوصفها قلم .... ومحمد جبارة كالعادة اضاف للقصيدة روح والق نادر وجميل ...
Quote: يديك الف عافية ياطارق على الخيط النبيل ده .... وبالجد القصيدة دى كانت من اجمل الصور اللى وصفت الامهات الرائعات ديل واللى كافحن وربن بالفى والمافى وختن للاجيال الجديدة دى رصيد كبير من الحب والحنية المابيوصفها قلم .... ومحمد جبارة كالعادة اضاف للقصيدة روح والق نادر وجميل ...
حبيبنا خالد كيفنك السر عثمان شاعر ضخم جدا عنده مقدرة عجيبة في تطويع الكلمات مقدرة لا تضاهى في توصيل الشجن وانات الشوق لابعد مداراتها ومحمد جبارة عنده صوت قادر يصحي ذرات الشجن الميتة ويعيدها الى الحياة
Post: #17 Title: Re: قايمي الصباح متكفلتي.. Author: كمال عباس Date: 10-10-2009, 10:18 PM Parent: #15
Post: #12 Title: Re: قايمي الصباح متكفلتي.. Author: Adam D.El-Asha Date: 10-10-2009, 03:19 PM Parent: #9
ياطارق ودجبريل
أنا لله وإنا اليه راجعون
يازول اللقولو غلبني !!!!
ربنا يرد غربتنا.
آدم العشا
Post: #13 Title: Re: قايمي الصباح متكفلتي.. Author: الفاتح عبد الله طه Date: 10-10-2009, 08:48 PM Parent: #12
اخونا (طارق جبريل)..لك التحية وكامل الاحترام..
الاستاذ الشاعر ( السر عثمان الطيب ) وفي سهرة (حديثة).. مع قناة الشروق (خيمة الشروق)..ذكر بأنه (كتب ) كلمات هذه القصيدة قبل (ثلاثون) عامااثناء فترة الدراسة (بمعهد المعلمين العالي )..لكنها ( ظلّت) ...وتظل .. خالدة ( خلود) البركل ..بين ثنايا وجدان كل السودانيين..لانها تعبّر بصدق واريحية عن ( الام )...السودانية..التي ( تقوم الصباح متكفلتي)...وشايلي الحليلة على المراح..لتسكب المودة والحنان..في جوف صغارها... عبرك ( اخونا) طارق ...نرسل تحياتنا للسر عثمان الطيب ..والفنان محمد جبارة ...
Quote: ممـكن طلب ياطارق? تراب بلدي بصوت محمد جبارة..........
ابشر يا حبيب جاييك تب
Post: #21 Title: Re: قايمي الصباح متكفلتي.. Author: ناصر البهدير Date: 10-10-2009, 10:32 PM Parent: #19
سلامات طارق ... ربنا يديك العافية وما يرجعك السودان البقى ورطان في الفساد المقق .. كلمة ضمةضمة الغريبة قبل شوية كنا بنعلق عليها وبنقارنا بكلمة تدي نفس المعنى هنا بالبحرين وهى كلش كلش .. جد فقدنا كل شئ وبقينا يتامى البلد الطارد.. ونسكت نلعن في المطاميس المسكو البلد ودخلوها الجحر الغريب دا ... لا زلت اتذكر محطة كريمة والدعفسة فيها ونحن جايين البلد ومليانين تراب وريحةقراصة التمر وحاجات كتيرة .................. اه من ها الغربة الزى اضنين المرفعين
Quote: سلامات طارق ... ربنا يديك العافية وما يرجعك السودان البقى ورطان في الفساد المقق .. كلمة ضمةضمة الغريبة قبل شوية كنا بنعلق عليها وبنقارنا بكلمة تدي نفس المعنى هنا بالبحرين وهى كلش كلش .. جد فقدنا كل شئ وبقينا يتامى البلد الطارد.. ونسكت نلعن في المطاميس المسكو البلد ودخلوها الجحر الغريب دا ... لا زلت اتذكر محطة كريمة والدعفسة فيها ونحن جايين البلد ومليانين تراب وريحةقراصة التمر وحاجات كتيرة .................. اه من ها الغربة الزى اضنين المرفعين
تعرف يا ناصر قطر كريمة دة يمين ان جيت احكي النصايب الفيهو علي املالكم المنبر دة بالعجايب يا الله علي الدغفلي وابو حمد والكاب اسكت خلني ياخي انا موجع وصابر
Quote: نان عاد هي دروب شوق يا ود جبرين.. أطال الله أعمار أمهاتنا والرحمة والمغفرة والجنات لمن أخذها الكريم
سلامات يا قوم
ود الطيب كيفنك النغم الاصيل يلمع كما الذهب رحم الله من ذهبن واطال الله عمر من يعشن بيننا
Post: #31 Title: Re: قايمي الصباح متكفلتي.. Author: منصور عبد الرازق Date: 10-11-2009, 10:33 PM Parent: #30
يا رب لا تجعل ارسال عفو امى الى مشروطا بشرط او مرتبطا بامر لا يقولوا ليك شفناهو ولا ما شفناهو لا قاعد ولا واقف لا فى بلد امان ولا بلد ما امان فنحن بدون هذا الدعاء غير المشروط اوراق صغيرة ودقيقة وخفيفة فى مهبات رياح مزمجرة عاتية يا يمة رسلى لى عفوك ينجينى من جور الزمان آآآآآآآآمين يا طارق
Post: #32 Title: Re: قايمي الصباح متكفلتي.. Author: ناصر البهدير Date: 10-11-2009, 11:38 PM Parent: #31
مشينا بعيد شديد ووين الخلاص !!! دردرة وتلتلة وحراق روح وسهر ووجع ... في ان تكون في حلم الرجعة وواقع البلد المر .. بين بين .. شهقة وتموت ... سمك برة الموية .. اكيد بموت لما يفارق حضن امو .. اه من بهيماتن كايسة حن اماته ترضع ... ولمتين ... احسن نمشي يا طارق نشوف قطر كريمة.. ونسوق محمد جبارة والسر معانا...
Quote: مشينا بعيد شديد ووين الخلاص !!! دردرة وتلتلة وحراق روح وسهر ووجع ... في ان تكون في حلم الرجعة وواقع البلد المر .. بين بين .. شهقة وتموت ... سمك برة الموية .. اكيد بموت لما يفارق حضن امو .. اه من بهيماتن كايسة حن اماته ترضع ... ولمتين ... احسن نمشي يا طارق نشوف قطر كريمة.. ونسوق محمد جبارة والسر معانا...
Post: #37 Title: Re: قايمي الصباح متكفلتي.. Author: Magdi Ahmed Elsheikh Date: 10-12-2009, 09:14 PM Parent: #36
Post: #38 Title: Re: قايمي الصباح متكفلتي.. Author: ناصر البهدير Date: 10-12-2009, 09:23 PM Parent: #37
الشوق بحر يا طارق وسلامات وتسلم للامات الطيبات لكن يا طارق بي وصف السر وغناء محمد جبارة باقيلك تاني فضلت ام .. تعوس وتكوس وتقش وترش وتحلب وتقلب .. مع الراسمالية الطفيلية العكرت لينا وساطت صوت الطنبور مع مباديء اقتصاد الاسلام السياسي زى ما بقول الفطقة مدشن البلى الاقتصادي الافقر امي وامك من حتة حنية وخلاها واقعة لا حيلة تناهد ... كان حيينا بنتلاقى في قطر كريمةالجاي يوم الاربعاء ان شاء الله ما تكون اربعاء وعقاب شهر ..
Quote: كان حيينا بنتلاقى في قطر كريمةالجاي يوم الاربعاء ان شاء الله ما تكون اربعاء وعقاب شهر ..
تعرف يا ناصر انا لليلي قاعد يعجبني قطر الاحد لانه النتائج بتكون بالخميس والجمعة والسبت عواسة الزوادة والاحد بنكون في درجة تالتة قبل ابراهيم اخوي ما يتخرج من هندسة الخرطوم وبعد اتخرج كانن تساريحنا نووووووووووووووووووووووم
انت يا دتور مجدي باقيلي ظهر علاج جديد بي سكات الدكتور وصيامه عن الكلام
Post: #44 Title: Re: قايمي الصباح متكفلتي.. Author: ناصر البهدير Date: 10-12-2009, 09:50 PM Parent: #42
تساب عديل يوجع القلب ..القلب الراح في المدن الاسمنتية ام حجارا حارة تسخن الكرعين زمان صحي كنانن بحلبن ويروبن اللبن الا اسع بقن بقن ماسكات اضنين المعزة والجماعة يحلبو .. عارف يا طارق مواعيد الحليب .. وقت الدغش والناس جاية من صلاة الصبح .. زمن توقيتو غريب وعجيب ويبدو انو فيهو حكمة بالغة .. واماتنا ما كانن ساهلات الا ترا الدنيا جارت
Post: #46 Title: Re: قايمي الصباح متكفلتي.. Author: Magdi Ahmed Elsheikh Date: 10-12-2009, 10:01 PM Parent: #44
Quote: تساب عديل يوجع القلب .. القلب الراح في المدن الاسمنتية ام حجارا حارة تسخن الكرعين زمان صحي كنانن بحلبن ويروبن اللبن الا اسع بقن بقن ماسكات اضنين المعزة والجماعة يحلبو .. عارف يا طارق مواعيد الحليب .. وقت الدغش والناس جاية من صلاة الصبح .. زمن توقيتو غريب وعجيب ويبدو انو فيهو حكمة بالغة .. واماتنا ما كانن ساهلات الا ترا الدنيا جارت
عارف يا ناصر انا اول مرة حضرت ولادة نعاج حبوبتي فردوس الريح الله يرحمها قامت قالتلي خلاص الجنى الصغير دة أليلك وكانت نعجي بقيت كل سنة اجي القاها والدي يمين لامن وصلت العالي كان عندي مراح عديييييييييييل
Post: #48 Title: Re: قايمي الصباح متكفلتي.. Author: الامين موسى البشاري Date: 10-12-2009, 10:13 PM Parent: #47
Post: #50 Title: Re: قايمي الصباح متكفلتي.. Author: ناصر البهدير Date: 10-12-2009, 10:59 PM Parent: #48
الغريبة يا طارق كل مرة اجي راجع للبوست واتكرف من غناء محمد جبارة .. باقي الرجل عندي معاهو قرابة بتعرفه حبوبتي حيدوبة (زينب بت محجوب ود رحمة) ما قادر افارق بكانك دا يا جنا .. طبعا حبوبتي كانت اكتر واحدة في العائلة بدخل معاها حوش البهائم وكان عالم مبسوط من الدنيا وبتكيف وقت المغارب والناس جاية مارقة من تحت شايلة القش والبهائم تكورك بصورة فيها ترتيب وترتيل عديل يقربن يقولن نحن هنا... وقش البهائم دا بذكرن جنا من عرب العليقات ساكن في حلفا الجديدة الا اسه الولد كبر وبقى مهندس وماسك وحدة الحاسوب بسكر حلفا .. مرة حبوبتو وكنا بنسميها تاتشر في الزمن داك قامت رسلت اخوهو ابوبكر ودا كنا بنسميهو ابكور .. المهم الجنا ابكور مشى يجيب القش وطبعا قش المدن بجلبو للبيع ما زى كدادنا البلقطو من طرف التقنت وتسرقو من عضم ناس سيداحمد ود حمد ولا من واطة السورجاب .. المهم الولد اتاخر شديد وما جا.. مرقت حبوبتي تكوس .. لقت بطان فريق العليقات قاعدين يلعبو .. قالت ليهم هوياي عيال ما شفتو ابكور .. قالوا ليها لا .. طوالي قالت ليهم ما شفتو طيب: لا القش ولا القفة ولا ابكور ولا القروش طبعا لما يحكيها ليك ياسر الطاهر المهنديس حفيدها تموت بالضحك لانو بحاكيها ليك بصورة جميلة خلاص .. ابكور الان اصبح عالم في الزراعة وكمل الدكتوارة في المانيا.. معليش سرحت بيك برة الشبكة..
يا حليلك يا جنا جبرين طريتني حبوبتي بت ميدوب. عارف، كنت أقول لى ود خالتي: الغنيوة دي بتطريني حبوبتي بت ميدوب أكتر من أمي. كان: يقول لي أيّ والله يا معاوية. قدر يا طارق ما أسمع الغنيوة دي، أشوفها قدامى لابسة قُربأبها الأزرق وشايلى الحِليلة على مراح بهايمها تحت الحرازة. الله يرحمن، هي وبنيتها السيدة بت همزة...
الله يخدر ضراعك يا طارق إخوي...
Post: #52 Title: Re: قايمي الصباح متكفلتي.. Author: سلمى الشيخ سلامة Date: 10-13-2009, 02:03 AM Parent: #51
الصباح يوم الجمعة فى الداخلية "كلية المعلمات الدنيا برد الشجر حاتى ورقو فى الواطة الواطة بين اخضر واصفر الرادى مزروع فى الشباك وباعلى صوت شفتى الزمن يايمة ساقنى بعيد خلاس وتسمع وااااااااااااى ونخجى ما نخجى نصاح البنيات متل التقول مات لهن زول وكنت متلن رغم انه امى عليها كل الرحمة على بعد تلاته خطوات لكنى وحات الله كنت بشتاقلها ويومى الامرق من الداخلية ما متل الحمامة اها الغنية دى بقت متل النشيد والوكت داك يا داب بقينا نعرف المسجل يا عشاى بنات دارفور اول من جاب المسجل فى المدرسة ونشيل ونسجل فى الاغنية دى ونسمع فيها ونبكى مرت نسمعها هى زاتها ومرات نسجلا بصوت احسان الله على صوت احسان لمن تتفنجر وتغنى ولا منى عثمان انى امنت بالله ويوم الخميس ان بقى مافى مروق من الداخلية الاغنية دى ياها ست السهرة المسرح يدور من العصر ،نمرق الكراسى من الفصول قدام المسرح والعميد نجيب ليهومع المدرسين الكراسى الماكنات من مكتب العميد ونحنا ورا المسرح ندخل ونمرق متل محروقات الحشا ونغنى اول اغنية شفتى الزمن يايمة ساقنى بعيد خلاس وتسمع كليمة يا عشاى واحلالى يا طارق من ديك الايام وامغستى رحل تلوت الليل الله فى
Post: #53 Title: Re: قايمي الصباح متكفلتي.. Author: ناصر البهدير Date: 10-13-2009, 10:21 PM Parent: #52
سلامات طارق ومساء جميل .. انت عارف غنأ محمد جبارة دا زى المنقة الكانت مغمولة في قاطوع ولا تكل ..حلوي حلا عجيبة .. وخاصة غناهو القديم .. طبعا اخيرا ما قدر يغني زى زمان .. رغم انو ما ساهل في الغنأ حتى السر طشا من الشبكة .. دايما حاجات اولي سمحة زى قلية البن في العصير عنداهلنا الهدندوة ... قبل شوية دخلت لى مركز تجاري القى ليك منقة صغارة زى الحسكنيت لونه من الدعفسة والعفسة .. ما لاقية تلم في لون يتديها شكل .. اتحسرت على المنقة القام اهلنا كبروها كبر عشان يزرعو التمر .. وتجي حيكومة الفقر الدمار تفتح استيراد للتمر من ايران والعراق وبلاد الله الكتيرة وتنسى ترابلة البلد الروحن ونفسن في التمر وحصادو ... عليك الله ديل ناس عندهم ذمة يعني ديل يمشو وين
طارق والضيوف عوافى انتو كلكم مسكتوا فى السرير وخليتو الجنا اب صوتا زى رنين سلاسل الذهب اب اصابعا زى البركاوى الحلو محمد ودجبارة الجنا الرقيق زى خيط الشلة ...كيفن تنسوه بالله فى غمرة سكرتكم بالغنوة الحلوى دى بالله شوفوا محمد دا لمن يدق السليكات الخمسى ديل كيف يهز الاحاسيس و القلب والراس وكل االاعضاء اجمالى ... طمبوره زاتو نوعه براه تقول مصنوع له وحده شىء لا يعقل .. الاغنية دى لو غناها اى واحد غير محمد جبارة ما كان طلعت بكل هذه الروعة والجمال ... مرة كنت قاعد مع واحد جاهل بالغناء وبالشمال وبالتراث ويدعى انه من ابناء امدرمان وبدا يتهكم على على كلمات هذه الاغنية والطريقة التى يتغنى بها محمد جبارة ويردد بتهكم الحليلى وبعد ان انتهى وانا مغبوظ فى جنا الصعيد البوم دا قلت له الحليلى معناها شنو يا مصيوب فقال لى انها الفريق اى الحلة بكسر الحاء ...ضحكت وغضبى راح طوالى وقلت فى نفس الوقت ليك حق كان كدى
غنانا قاسى عليك... وسهل علينا نحمد الله على فهمك وفهمنا... وتركته فى جهله يعمه لا يوم الليلى ..
الكيك كيفنك ابوي محمد جبارة يا حبيبنا فنان ضخم لا شك حتى كلمات السر عثمان ان بقى ما صوت الطنباري دة يمين ما كانت تصلنا ياخي الزول دة بيلعب بالاوتار جنس لعب وصوته دة فيه كمية حنية ما عادية اكنك امشي اليو تيوب واسمع اغنية يا نسمة وحات الله تتمحن رسمي
Quote: قدر يا طارق ما أسمع الغنيوة دي، أشوفها قدامى لابسة قُربأبها الأزرق وشايلى الحِليلة على مراح بهايمها تحت الحرازة. الله يرحمن، هي وبنيتها السيدة بت همزة...
مقطوع الطاري كيفنك رحمة الله على الجميع كانن نسوان ماهن ساهلات كله كله
Post: #56 Title: Re: قايمي الصباح متكفلتي.. Author: طارق جبريل Date: 10-14-2009, 08:29 AM Parent: #50
يا ناصر والله ابكور بالغ هههههههههههههههههههههههه
Post: #55 Title: Re: قايمي الصباح متكفلتي.. Author: طارق جبريل Date: 10-14-2009, 08:28 AM Parent: #48
حباب ود البشاري حباب الزين اتكي زي ماك عايز
Post: #57 Title: Re: قايمي الصباح متكفلتي.. Author: سارة كرودى Date: 10-14-2009, 08:59 AM Parent: #55
.. .. ..
سعة اصلك متجرس لوزوم الغربة شنو يا وليدى .. ..
عافي منك ... وراضي عنك... سو رضاياعافي منك وراضي عنك سو رضايا .. ما بيخيب الرضى والدك يا جنايا .. أنت من يا دوب صغير من زمان دائماً معايا .. أنت ديمة أمامي ساير ما بخليك بي قفايا .. ما بتغيب من عيني لحظة ولا حصل سبتك وراي .. لامن الله يشيل أمانتو أنا ببقى خصاك بالرعايا .. يرعاك البيرعى وليا بيل يبرد حشايا ..
أنت لما خلاص كبرت دار تسيبني أعيش براي.. ا دار تفارقني تهاجر والحزن يصبح جزايا .. كيف يهون لك تحزن أمك عشان تحقق ليك غاية .. كان مهاجر عشان علاجي بلقى في شوفتك دوايا .. لو كان عشان تسقينا مالك نحن بي حنك روايا .. لو عشان كرعينا راحل نحن بي بعدك حفايا .. لو كان مهاجر عشان تعرس خير أبوك مالي التكايا .. خيرو وافر أبوك يحمدو مراحو مليان بالسعايا .. وبالقروش الجيب مجكن و لسه برضو الجايه جايا ..
أصلي منك ما بقصر بحفر أديك المعايا .. إن كان دا كلو كمان شوية بتلقى في دهبي الكفاية .. أصلي من سويتها ناذراها تبقى لي أيام قسايا .. داخرها للزمن البعاكس لسعادتك يا حشايا .. إنت من شبيت صغير راسي ما بتحتاج وصايا .. ما حصل خيبت ظني وما فشل بين غنايا .. لا تسيب أمك تهاجر يمه محتاجة الحماية ...
لا تسيبني وراك ترحل انت ياهو ضلي ضرايا .. انت فوق الحوبة مقنع أنت للمكشوف غطايا .. دايرك تبقى جنبي في فرحي وبلايا .. إن كان كحيت اتبنك وأقسم لك غطايا .. داير أقضي عميري جنبك أصلو قارب للنهاية .. خايفه كان سافرته ترجع تلقى فاضي البيت بلايا .. حينها ما تنفع قروشك وما تجيب لك أم سوايا .. ماني عارفه سبب رحيل يا وليدي شنو الحكايا .. إلا تبقى براك شايف في فراق الوالدة غاية .. ما بعاتبك ما بلومك ولو رحلت بلقى في قساك عزايا .. عافي منك راضي عنك ســـــو رضـايا .. .. ..
مودتى الاكيدة
Post: #59 Title: Re: قايمي الصباح متكفلتي.. Author: عبدالله كع Date: 10-14-2009, 09:14 AM Parent: #57
يا دكتور -
والله العظيم انا بسمع في الاغنيه دي من امبارح الصباح ... لحدي اليوم وانا ماشي علي المكتب تنتهي اقوم ارجعه تاني - وابكي .. .. .... تنتهي اقوم ارجعه تااااني - وابكي .. .. .... اعمل شنو يا خ ؟ ؟
والله العظيم انا بسمع في الاغنيه دي من امبارح الصباح ... لحدي اليوم وانا ماشي علي المكتب تنتهي اقوم ارجعه تاني - وابكي .. .. .... تنتهي اقوم ارجعه تااااني - وابكي .. .. .... اعمل شنو يا خ ؟ ؟
كعاكيعو كيفنك استغفر ساكت يا الحبيب ولا اقولك شي شيل تليفونك واصل عليهم وسالمهم وحاننهم يمكن تتفشى شوية
بت اهلي الحنان بالحيل سارة لا تقسي علينا شي وحاتك مانا دايرين الغربة دي ضُمة ضُمة علي مجبورين عليها قدر ما قلنا نجي راجعين فشان نبقى وسط الحنان نجي نلقى الدنيي بهناك مابانا كله كله دحين ما فضلنا شي غير نسمع في غنا السر وصوت ود جبارة سلميلي على الحجاج الهناك والصغار وابوهم والمسنوح اخوك
كل الود
Post: #58 Title: Re: قايمي الصباح متكفلتي.. Author: ناصر البهدير Date: 10-14-2009, 09:10 AM Parent: #55
نحن من فارقنا الفطير باللبن حكايتنا جاطت وجاتنا البواسير ام بوذا ينتح ... تعرف اكل الرغيف دا سبب طبيعي في اصابة الناس بالبواسير زى ما قال البروفسير يحي العربي .. وطبعا العربي لو دخلت عليه عيان بتبقى نصيح بس بى كلامو فقط .. يطمنك ويوريك اسباب المرض والعلاج ... يحكي بطريقة لطيفة تخيليك تبقى كويس ... العربي قال انو قشرة القمح مهمة جدا لانزال الفضلات وعدم وجودها يصيب الانسان عسر الاخراج ومنها تجي حكاية الدوالي وتجمع الدم في الاوردة المخيطة بالمستقيم. عشان كدا لازم نرجع البلد لى فطيرنا السمح .. لكن باقيلي ما بنلقى واحدة تاني تعوس لينا الفطير .. زى فطير حبوباتناواماتنا ... بالمناسبة دي كان زمان في القرير عندنا واحد اسمو مبلول بحب الاكل شديد وقال لما يموت يكفنو بالفطير ويكبو ليهو لبن معاهو في ود اللحد وبعد داك يديهو فطير ويردمو لحم ويرشو بالسليقة .. شوف الراجل دا كان بحب الفطير كيف .. الله يرحمو ... يا ريت القى مداخلة من واحد من القرير عارف تاريخ الرجل دا يمدنا بيها .. الله يرحمو ويغفر له ويسكنه في فسيح جناته ..
Post: #60 Title: Re: قايمي الصباح متكفلتي.. Author: naeem ali Date: 10-14-2009, 09:38 AM Parent: #58
الحبيب الصديق طارق جبريل الاغنيه ما اشتغلت (لعلة في جهاز الكمبيوتر ده).. لكني استمعت اليها عبر (الزاكرة السمعيه)..
وانشاء الله تجرسك الاغنيه وتبكيك لامن تجري تفتش (المناديل).. او كما قيل
Post: #61 Title: Re: قايمي الصباح متكفلتي.. Author: ناصر البهدير Date: 10-14-2009, 09:49 AM Parent: #60
هاكم دي هدية ... الغربة وين بكانه أماني حاري حرِّي ذهللنا من بكانا وصبرنا جاتو ذرِّي تشوفه برتكانة نجيضي علِّي مرِّي ترا الجبر تكانا بلا إرادي حرِّي فيا ربوع بلدنا ويا ضروعنا دُرِّي يموع عرق جلدنا ودموعنا فوقو خرِّي تقول بنيتي سارَّة كتبتَ ليكَ بدري رسالة من مِي حارّة بقت دموعي تجري ... شنو الحماك ترُد وبالحالة يابا تدري لو ماك بعيد بُعُد جدي الغزال مو قدري " عجيبة يا بنيَّة متين بقيتي تقري كبرنا كُر عليَّ وعلى بحرنا كُرِّي مع السلامة ماشي بلد دا ماهو قبري محل يكون فراشي في قبلي ولاّ بحري عفيتو ليك معاشي عليك يا الله أجري تعب معا غباشي ولا ذهب بعمري صبرت قطَّ صبري صَبَر حفتَّ صدري لقيت غلابة تشري من السحابة كِسري
Post: #73 Title: Re: قايمي الصباح متكفلتي.. Author: جعفر خضر Date: 10-14-2009, 09:16 PM Parent: #72
يا يمة رسلي لي عفوك ينجيني من جور الزمان
الأخ طارق جبريل والجميع هنا
الكلمات بسيطة عميقة معبرة الصوت معجون من الحنية لكن منبع الروعة في اللحن ورنة الطمبور
Post: #74 Title: Re: قايمي الصباح متكفلتي.. Author: ناصر البهدير Date: 10-14-2009, 11:23 PM Parent: #73
كبفنك طارق واحوالك في الغربة اللعينة الزى شوكة دخلت الرجل وقدر ما سوولا .. شيء وسخ اضان وشيء لبن عشر من الحلفافي قوز الرماد.. الا ابت تطلع .. وصاحبي لا قدر ينساه الا مشغول بالحيل .. دا خازوق كبير .. بالمناسبة القصيدة بتاعت الغربة كاتبه راجل الشعر المرق النصيحة (حميد) اصبري لي شوية تاني بديك واحدة اسمح منهاواحلى .. الليلة طريتني ولدا الله يرحمو من ولاد البركل تحت اسمو راشد عبد العظيم عوض الله .. وذكرتني ناصر محمد عمر ..واولاد على جحاوكتير من ناس البركل الزينين..وناس ود بلي... البركل تحت دا كان عندي معاهو غرام عجيب امشي من الامتداد فوق بى كرعى ولما ارجع انصاص الليلي .. مرة والدنيا ليل شديد داخل على الصباح من بين فجات التمر يطلع لى ويسد الدرب ويقول لى ماشي وين ؟ لاول مرة ما اخاف وجاوبتو وسلمت عليهو القاهو ليك سكران وكمان ما بغباني كل يوم القى ليك واقع جنب بيوت الامتداد ومرات تلقى في حور شجرة ولا تحت كيواى واقف معطل وحالتو بالبلى ... اول حاجة وانت نازل البركل العصير منظر الجبل ومنو تدخل على حيضان البرسيم وريحتو القاجة مالية البلد .. الفطير باللبن ليهو طعم خاص وجد ما بتلحق ودا احسن وجبة لاقتني في حياتي .. اللذيذ يجيك من الدوكة حار واللبن مليان جمادة وتدي سكر ما يكون مسهج على قولة خالتي بخيتة الله يديها العافية .. لمن امشي ناس جدي على ودرو بقوز هندي دايما القى الفطير منتظرني وعندي خالات حنان خلاص .. امنة وبخيتة ومنى ..الله يديهن العافية
Post: #75 Title: Re: قايمي الصباح متكفلتي.. Author: ناصر البهدير Date: 10-15-2009, 10:37 PM Parent: #74
سلامات طارق .. قبل شوية اتصلت السودان ولقيت خالتي وسالتها عندك فطير .. قالت لى والله بعد شوية بعوسو للعشاء .. تصدق مسكتني العبرة .. الله يجازي الكان سبب ..
Quote: الكلمات بسيطة عميقة معبرة الصوت معجون من الحنية لكن منبع الروعة في اللحن ورنة الطمبور
حباب ود خصر في حوش السر عثمان ومحمد جبارة
Post: #78 Title: Re: قايمي الصباح متكفلتي.. Author: ناصر البهدير Date: 10-18-2009, 06:03 AM Parent: #76
اه من هادا الصوت والكلام الزى العجوة المشكن جوه سبيط صعب تمد ايدك ليهو ..
شوفي الزمن يا يمه ساقني بعيد خلاص در درني واتغربت واتبهدلت وريني الخلاص ساقني القدر منك بعيد لآذيا كاس جرعني كاس يا يمه يا فيض الحنان الما كمل يا يمه يا بدري البشع دايماً يهل يا يمه يا نور الصباح وكتين يطل وآشري يا زينوبة ولدك في بحور الشوق كتل
خليك معاى شوية في الصباح الكلو طراوة وشوق مبهول ومشرور زى الكاويق يطاير ..
شوف حميد هنا قال شنو!!!
صبر الغربة دايري صبر ويا ربّي وين بلدو لا يبقى شالو قبر وراقد مع الرقدوا *** *** بنحِب بلدنا قدُر ما الزول يحب ولدو لابدَّ تبقى خدُر أيامو بي جَلَدو *** *** الطير بيصحى فجر كان ما لقى النقدو يقطع بحار وجزر غير رزقو شِن بَعَدو *** *** زيّو الغلابة سمر من حر شموش وقدوا تعب السنين المر يتحالى لو حصدوا *** *** يا كم ليالي تمر وفد وقفة كيف صمدوا بحراً جناحيه جمر يا الشالن إن غمدوا *** *** أقدارنا ماله كُتر نيرانه ما بردوا كل النصدّو يتر حالاُّ يجي البعدو *** *** للقال بلدنا فقر قول خيره بي رعدو لكين عوارض الضر إنقنقتوا وقعدوا *** *** صقرين تعاقبوا كُر عاقِّين وماب يلِدوا حد ما ضروعه تدر بي خيره ينفرِدوا *** *** صاح الحمام يا غُر يا قمري .. قانقردو يا طيرو فرَّ صقر فاضِل لنا البعدو *** *** ذرُّوا الحِديْ لا يذر سوسيونا والأخدوا من طينّا مافي عذر يحراهو بي لسدو *** *** لابد يرش أم در غيماً فرج بردو تحتو اليرارو خدر إنبردوا وبردوا *** *** الأرضِ دايري صبر ويا ربَّي وين بلدو يي دا الحفرلو قبر للغربة بي جَلَدو
