حواء بت الخضر ود كنيش نازلي الخرطوم

حواء بت الخضر ود كنيش نازلي الخرطوم


06-19-2009, 10:00 PM


  » http://sudaneseonline.com/cgi-bin/sdb/2bb.cgi?seq=msg&board=134&msg=1254459175&rn=57


Post: #1
Title: حواء بت الخضر ود كنيش نازلي الخرطوم
Author: طارق جبريل
Date: 06-19-2009, 10:00 PM
Parent: #0

(السفر للخرطوم)
- اقولك شنو يا طارق ولدي
- ياخي احكيلي جيتك انت وعمي مكاوي للخرطوم.. قالوا سويتيلك فضائح
- هههههههههههه والله يا ولدي سوطلي جنس سواطي أصلها ما ليها حد
- النبي فيك يا عمتي تحكيلي
- خلني النبدالك بالقطر
- من محل ما عاجبك
- جاء عمك مكاوي يا ولدي قالي يلا نمشي الخرطوم عند عمك الامين الله يرحمه
المهم يا ولدي ناديت عمتك فاطني وقعدنالنا يومين نسومي في قراصة التمر ونجهز في الشرموط والطعمية وسلقنالنا جردل أليل بيض
- دة كله للقطر
- أييي يا ولدي نان هو كان قطر نصاح كل شبرين يخسر
- هههه اها
- المهم يا ولدي جهزنا تصاريحنا وعمك حجزلنا في درجة تالتة المنتازة
- الشي اسمها الممتازة
- انا شن عرفني تراني اسمع فيهم يقولوا المنتازة
- ههههههه اها
- المهم يا ولدي اتحرك القطر من كريمة وكان يوما حاااار اتفسخنا فسخ لامن اتحرك... يا دوبو فات كحيلة بي شوييي كدي وقام اتكسر ووقف
- في الحر داك
- نان يا ولدي هو جنس حر وسموم... وتعال شوف امة الله دي ماها ماكلي البيض المسلوق ونص الجرادل لليلي ملياني...
والله يا ولدي انا نخريني من العفني باقيلي بقن حُمُر...
باقي الناس دفستها بيض وبقت تتنفس من لاااا تحت وفوق
- الله يقلعك يا عمتي
- عاد يا ولدي اكذب عليك... يمين درجة تالتة بقت علي المستراح...
وامة الله دي تقول عمرها ما ضاقت الزاد قبل دة.. بالله مع حركة القطر كدي والناس كبست علي زوادتها وجرادلها...
وشي واحدين حتى البقنية شايلنها
- مولد يعني
- اسكت ساكت... اللذيذي يا ولدي قاعدي جنبي ويحيدتا من الاراك...
عندها شافعين... الكبير صاقعلها: يمة محمد باقيلي سوالو شي في سرواله... هههههههههههههههه
وهي تقرص فيهو يا ولدي لامن جضومه حمرن...
وهو شابكها: نان يمة العفني من وين...
والله يا طارق ولدي انا ضحكت لامن بكيت وقلتلا: ايي خليه مسكين ماهو عارف درجة تالتة كلها ملياني بيض مسلوق...
قامت يا ولدي لقتو للشباك فشان يسكت...
- اها
- المهم يا ولدي من هني لاااا هني القطر اتحرك وصل عطبرة دغشا بدري كدي... نزلنا انا وعمك مكاوي...
لقينالنا واحدا يكورك علي الباسطي: زي السمنة وكدة... قلتلو عليك الله يا مكاوي اشتريلنا شوي من الشي الزي السمنة وكدة دة...
خليتو واقف معاهو ومشيت غسلت رجليني في مواسير عطبرة المقلعات عيونن لاااافووق ديك.. ومع رفعة عيني يا ولدي أكان اشوفلك في القطر يتحرك وبقيت ابييييبي...
- كيفن
- اتاريهو القطر يا ولدي اتحرك بس عشان يغيروا الراس...
وانا ضربت السكلي وبقيت امنح:
وووب علي.... وااامغستي علي الزوادي البعوس فيها يومين...
انا تاني اجيبلي توب زرواق من وين....
وقزازتي ألت الخومري داساها من انا فتاة...
وامة محمد دي اتكبست فيني... وانا اوجوج
ربك رب الخير جاب عمك مكاوي... اصلو ما قرب يدقني... ودعاني جنس دعايا
- هههههههههههه انت نان اللفحي العليك شنو
- تقول شنو يا ولدي... المهم اصبحت الدنيي... والقطر اتحرك تالت يوم وصلنا الخرطوم نصت نهار...
واصلو يا ولدي ناس الخرطوم دي بس مع وقفة القطر ينجارو هني وهني.. علي السواسيو وكتين تكون ساديهن في صفيحي وتفكهن...
- اها... غايتو ماك نصيحي
- بس يا ولدي نزلنا طرودنا وشنطنا وعمك مكاوي قالي عمك الامين ولا ابوك جبيرين ولا عمك حسن عندهم تكاسي صفر وبيجي واحد فيهم يسوقنا...
قمت قعدت في كرتونة ألت تمود وبقيت اتفرج في خلق الله دي
وانا ماني غبياني قايلي التكسي دة فِرِد واحد في الخرطوم...
اشوف فيهن يجن ويشيلن خلق الله ويمشِن... ،عمك واقف في بكانو...
قمت قلتلو: انت الخرابة التكسي العلي مُحاية البيض دة ما تراهو يحوقص ويرجع تاني.. اصلو ما فيهو واحد من اخوانك ديل يجي يودينا...
يا ولدي حمرلي.. وباقيلي ان كنا مانا في المحطة كان ضبحني شخخخخخخ

Post: #2
Title: Re: حواء بت الخضر ود كنيش نازلي الخرطوم
Author: عبد الدائم سيد أحمد
Date: 06-20-2009, 07:12 AM
Parent: #1

يا اخوى الزمن ده المسافرين بشربوا شاى الصباح فى كريمة بالجاتوه
ويفطروا فى الخرطوم بالهمبرغر ..

الزلط ما خلى شى وقرب ( المسافى ) ومعاها كندشة كمان

يعنى تانى غنا ناس رصو الهديمات عدلن وركبو اللوارى وقبلن
يبقى من وحى الخيال ...

حمد الله على ( السلامى ) قالو كان عندك وجع باطن ما تكون اكلت ليك جردل بيض

Post: #3
Title: Re: حواء بت الخضر ود كنيش نازلي الخرطوم
Author: هواري نمر
Date: 06-20-2009, 07:20 AM
Parent: #2

اهلا يا طارق..
و سلامة العودة غنيناها في موااااال

Post: #4
Title: Re: حواء بت الخضر ود كنيش نازلي الخرطوم
Author: عبدالله كع
Date: 06-20-2009, 07:55 AM
Parent: #3

يا دكتور ..

بقولو في القطارات دي كان فيها المحن يا قريبك

Quote: - اسكت ساكت... اللذيذي يا ولدي قاعدي جنبي ويحيدتا من الاراك...


بس عمتك دي بالغة مع ناس الاراك ..



Post: #16
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-20-2009, 11:05 PM
Parent: #4

Quote: بس عمتك دي بالغة مع ناس الاراك ..

هههههههههههههههههههههههههههه

Post: #5
Title: Re: حواء بت الخضر ود كنيش نازلي الخرطوم
Author: Emad Abdulla
Date: 06-20-2009, 08:40 AM
Parent: #3


حجة المهلي و عمك عصمان ود ازرق قالوا كدي اندلوا الخرتوم فيشان العلاج . قالوا الحاجي الله يكرم السامعين محسنا فكّ .. بقت دالقي طواااالي .
أها إتي يا حاجة السجم بعد ما شميتي العافيي .. تقومي من خفتك و لفتك تحلفي بي جملة الشيوخ علا تشوفي جنينة النزهة . عصمان قدر ما طنطن و حرن .. و انتي يا المهلي راسك و الف سيف علّي تمشي الجنيني .
قام حبيبي فوق نفسو وداها ، قالولك الحجي من قفص لي قفص تقيف و تتطهم : واحلاتي يا يمه واحلاتي .. أماني ما سميحي النصيبي دي .. إت آآ عصمان .. الشي دي شني ؟ يقوللها و خلاااااااااص الرويحي محرقاهو : دي الغزالي يا البهيمي .. وديل جنياتا ..
الرسول ؟ هيي كِضِب .. واحيتي ياخوانني ، أماني ما سميحي .. ما بيدوني ياها ؟ اشيلا البلد . و عصمان ينهر فيها ..
إنتي يا الحاجي بكان ما لقتلها قفص فيهو حيوان و جنياتو ، علا تقيف فييو و ياهو الكلام زاتو : واحلاتي يا يمه واحلاتي .. أماني ما سميحي النصيبي دي .. إت آآ عصمان .. الشي دي شني ؟ ما بيدوني ياها ؟ اشيلا البلد .
أها آخر ما آخر .. وقفوا قدام القفص الليل الزرافي . و الزرافي طويلي و رقبتا خلاقي ، و شافعا جنبها و الرقبي تتلولح .
قالولك بلا الحاجي قطعت النضم . تسكت تعاين للنصيبي امر رقبتاً طويلي دي .
عصمان نهرها : هووووي يا مخ الرقبي . مالك انطميتي و غلبك النضم ؟ ماك دايرا تشيليها معاكي البلد ؟
صننننننننننننت و عاينتلو ، قالت : بري يايابا ماني دايراها ، منافضاها .. ، تخرتلي التميرات .

.....
طارق !!!
إتّ آيابا يطق عدوك فوق صنقورو أكان كيفتني بالكلام السمح ده .
تتبارك ما تتشارك .


Post: #6
Title: Re: حواء بت الخضر ود كنيش نازلي الخرطوم
Author: omer osman
Date: 06-20-2009, 09:08 AM
Parent: #5

والله ياطارق وعماد ........ ضحكت كما لم اضحك من قبل ..... ضحك بي دموعه.


التوقيع : شايقي (امو بت اعم ابوهو)

Post: #7
Title: Re: حواء بت الخضر ود كنيش نازلي الخرطوم
Author: haroon diyab
Date: 06-20-2009, 09:16 AM
Parent: #6

طارق جبرين
سلامات

وها انت تعيد للمنبر رونقه
ويأتي العمدة عماد ليزيده رونقا
يوم جميل اخر من ايام المنبر
التي نبحث عنها كلما احسسنا بجفاف الحواس
كل الود يارائع.
عمدة ياقريبي
الفك محسنة
يفك محنتنا....!!!
التحايا

Post: #8
Title: Re: حواء بت الخضر ود كنيش نازلي الخرطوم
Author: معاوية المدير
Date: 06-20-2009, 10:05 AM
Parent: #7

Quote: أييي يا ولدي نان هو كان قطر نصاح كل شبرين يخسر


ده مياهو قطر كريمي
الملان لخشمو ديمي...
إن جا التمر مكمود كمد
والمنقة وكتين تستوي
تلقآهو للوكاي درب
كترت كلف قايل شنو
أبا لايشيلنا ود منو...

شيخنا ود جبرين, قراصة التمر دي شحتفت رويحتي عديييل...

أما إن سألتم عن أحوالنا, قااااعد في الباوقة أم زهور...

عودا حميدا مستطاب...

Post: #9
Title: Re: حواء بت الخضر ود كنيش نازلي الخرطوم
Author: سيف اليزل برعي البدوي
Date: 06-20-2009, 02:09 PM
Parent: #8

Mawia said

شيخنا ود جبرين, قراصة التمر دي شحتفت رويحتي عديييل...


me tooooooooooo



seif

Post: #21
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-20-2009, 11:19 PM
Parent: #9

Quote: Mawia said



شيخنا ود جبرين, قراصة التمر دي شحتفت رويحتي عديييل...


me tooooooooooo



seif





سيف الله يديك الفي مرادك

Post: #10
Title: Re: حواء بت الخضر ود كنيش نازلي الخرطوم
Author: حيدر حسن ميرغني
Date: 06-20-2009, 02:24 PM
Parent: #8

Quote: نان يا ولدي هو جنس حر وسموم... وتعال شوف امة الله دي ماها ماكلي البيض المسلوق ونص الجرادل لليلي ملياني...
والله يا ولدي انا نخريني من العفني باقيلي بقن حُمُر...
باقي الناس دفستها بيض وبقت تتنفس من لاااا تحت وفوق


يسألني الله ياطارق القطر ده كان لما يدخل عطبرة بيغسلوه بخرطوش المطافي
عفنة صح .. قشر منقة وموز .. باقي قراصة تمر .. شيط شفَع .. صاعوت .. باقي ملاح
.....
جارنا عبد العظيم كان يركب القطر ده من بربر لحدي الدامر بس
يملأ كفتيرتو شاي ويخت الجمر في صحن مربوط تحت الكفتيرة عشان يظل ساخن
مرة دخل في عربية تخص ناس سايرين لعرس وقعد يلعلع .. بالنعناع وكده ..
نحن رجعنا البيت بعد بعنا سجايرنا
صاحبنا جانا بعد فترة مبشتن بشتنة شديدة وجلابيتو مشرَطة من وراء
قال اثناء ما كان بيناول في واحد كباية الشاي صحن الجمر انفكا ووقع في ركاب كانوا نايمين في الممر
يازول مسكوه وكسروه ليك كسر صح وحلفو يسلموه بوليس الدامر
قبل ما القطر يقيف بدقائق زولنا ده لقى فرصة وتلب بي شباك القطر وركب المواصلات ورجع
تصدق واحد غضاهو في رقبتو وهو ماكان عارف العضة دي الا بعد وريناها ليهو
ياخي ده الله مرقو ساااكت
....
طرَيتني قريبك صديقي هشام الفحل

Post: #11
Title: Re: حواء بت الخضر ود كنيش نازلي الخرطوم
Author: منصور عبد الرازق
Date: 06-20-2009, 02:44 PM
Parent: #10

طارق ود جبرين
سلامات من وجع البطن
هسى انت متأكد انك بقيت كويس !!!؟؟؟
انا شخصيا بقول انك لسه
لأنو (اسهال الأبداع ده )
اكيد بيفك وجع بطنك
لكنه بيدخلنا نحن فى كومة (قراصة التمر )
تعرفها ؟؟
انا مستمتع لدرجة (انى شامى ) بالميم المشددة
وقاعد جنب المستراح
والحمد لله الموية (راااااقدى )
سنحاسبك اشد الحساب
ازا ما توقفت عن هزا الأبداع
قاعدين جنب البتاع
وحارسين الهناى
يلا بسرعة منتظرين تاكسى (عمك )الأصفر

Post: #12
Title: Re: حواء بت الخضر ود كنيش نازلي الخرطوم
Author: Emad Abdulla
Date: 06-20-2009, 09:20 PM
Parent: #11

Quote: شيط شفَع

الله يقرفك يا حيدر ..
قديم ياخ .



Post: #14
Title: Re: حواء بت الخضر ود كنيش نازلي الخرطوم
Author: haroon diyab
Date: 06-20-2009, 10:37 PM
Parent: #12

عمده ياقريبي

Quote: شيط شفَع


الله يقرفك يا حيدر

طيب دي

Quote: محسنا فكّ .. بقت دالقي طواااالي .

دالقي صندلية....؟

Post: #24
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-20-2009, 11:26 PM
Parent: #12

Quote:
الله يقرفك يا حيدر ..
قديم ياخ .


هههههههههههههههههههه
يا عماد حيدر دة قديييييييييييم
اسألني منه بعرفه زي جوع بطني

Post: #23
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-20-2009, 11:24 PM
Parent: #11

Quote:
طارق ود جبرين
سلامات من وجع البطن
هسى انت متأكد انك بقيت كويس !!!؟؟؟
انا شخصيا بقول انك لسه
لأنو (اسهال الأبداع ده )
اكيد بيفك وجع بطنك
لكنه بيدخلنا نحن فى كومة (قراصة التمر )
تعرفها ؟؟
انا مستمتع لدرجة (انى شامى ) بالميم المشددة
وقاعد جنب المستراح
والحمد لله الموية (راااااقدى )
سنحاسبك اشد الحساب
ازا ما توقفت عن هزا الأبداع
قاعدين جنب البتاع
وحارسين الهناى
يلا بسرعة منتظرين تاكسى (عمك )الأصفر

اوووووووووووووووه سنيرنا الجميل منص
والله يا حبيب كلام النس الكبار دة
قاعد يعجبني بالحيل
ياخي ونستهم طاعمة وكلامهم حلو مقطر عسل
واصلو ان كان لي بت الخضر دي
حكاويها آآآبيكلمن
وبجبك راجع اوريك سواتها كلها

Post: #22
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-20-2009, 11:22 PM
Parent: #10

Quote: قال اثناء ما كان بيناول في واحد كباية الشاي صحن الجمر انفكا ووقع في ركاب كانوا نايمين في الممر

هههههههههههههههههههههههههههه
لكن دة ما اذاهم اذية مع حر القطر داك والبيض المسلوق
ههههههههههههههههههه



Quote: طرَيتني قريبك صديقي هشام الفحل


والله في اجازتي الفاتت جاني سلم علي
ابوهو الله يرحمه كان عطشقي

Post: #20
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-20-2009, 11:17 PM
Parent: #8

Quote: شيخنا ود جبرين, قراصة التمر دي شحتفت رويحتي عديييل...

أما إن سألتم عن أحوالنا, قااااعد في الباوقة أم زهور...

عودا حميدا مستطاب...

والله يا ود المدير نفسي اقابلك في البلد
تحت منقاي ألت كوشتنير

Post: #19
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-20-2009, 11:14 PM
Parent: #7

Quote: طارق جبرين
سلامات

وها انت تعيد للمنبر رونقه
ويأتي العمدة عماد ليزيده رونقا
يوم جميل اخر من ايام المنبر
التي نبحث عنها كلما احسسنا بجفاف الحواس
كل الود يارائع.
عمدة ياقريبي
الفك محسنة
يفك محنتنا....!!!
التحايا


ود دياب المريخابي الزين
كيفنك يا الحبيب
ياخي حكاوي الناس الزينين ديل ياها ملح السودان
واصلو اكلا ماهو فيهو ملح مسييييييييييييييخ


الله يجبر بي خاطرك يا الحبيب

Post: #93
Title: Re: حواء بت الخضر ود كنيش نازلي الخرطوم
Author: Dr. Ahmed Amin
Date: 08-19-2009, 07:54 PM
Parent: #7

Quote: وها انت تعيد للمنبر رونقه
ويأتي العمدة عماد ليزيده رونقا
يوم جميل اخر من ايام المنبر
التي نبحث عنها كلما احسسنا بجفاف الحواس


حكاااااااي ...

يلا نحن في إنتظار روايات سودانية جديدة ...

ومشروع روائي ناجح 100%


مودتي

Post: #18
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-20-2009, 11:11 PM
Parent: #6

Quote: والله ياطارق وعماد ........ ضحكت كما لم اضحك من قبل ..... ضحك بي دموعه.


التوقيع : شايقي (امو بت اعم ابوهو)

اله يبسطك يا عمر كمان وكمان
اصلو زي سماحة حكاوي العجايز ديل مها في

Post: #17
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-20-2009, 11:09 PM
Parent: #5

Quote:

حجة المهلي و عمك عصمان ود ازرق قالوا كدي اندلوا الخرتوم فيشان العلاج . قالوا الحاجي الله يكرم السامعين محسنا فكّ ..


غايتو يا عماد دي ما بسألك فيها

Quote:

.....
طارق !!!
إتّ آيابا يطق عدوك فوق صنقورو أكان كيفتني بالكلام السمح ده .
تتبارك ما تتشارك


والله يا عماد حكاوي الجلاكين ديل ما بتخلص
ياخي ديل ملح الارض
بساطتهم ياخي تجيب الخير مندلق

عمدة
الله يعدلها عليك شقيش تقبل ان كان بسطتني شديد
وبجيك اتملك محاين بت الخضر دي

Post: #44
Title: Re: حواء بت الخضر ود كنيش نازلي الخرطوم
Author: amar adam
Date: 06-21-2009, 10:46 PM
Parent: #5

بالله شوفوا الكلام دا كيفن حلو وآمقستى انا الماكنت معاكم كت آكل الجنى جداد واسكت ..

Post: #15
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-20-2009, 11:04 PM
Parent: #3

Quote:
اهلا يا طارق..
و سلامة العودة غنيناها في موااااال

ود نمر كيفنكآآآيابا نصيح
الله يرجعلنا الكودات
ههههههه

Post: #13
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-20-2009, 10:32 PM
Parent: #2

Quote:
يا اخوى الزمن ده المسافرين بشربوا شاى الصباح فى كريمة بالجاتوه
ويفطروا فى الخرطوم بالهمبرغر ..

الزلط ما خلى شى وقرب ( المسافى ) ومعاها كندشة كمان

يعنى تانى غنا ناس رصو الهديمات عدلن وركبو اللوارى وقبلن
يبقى من وحى الخيال ...

حمد الله على ( السلامى ) قالو كان عندك وجع باطن ما تكون اكلت ليك جردل بيض



الزمن اتغير تب يا ديدا
لكن والله القطر كان سمح بالحيل

Post: #25
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-20-2009, 11:29 PM
Parent: #13


مواسير المحطات



قطر كريمة



نوم التسطيح



يا عمد عبد الله الصور دي عشان خاطرك

Post: #26
Title: Re: حواء بت الخضر ود كنيش نازلي الخرطوم
Author: محمد أبوالعزائم أبوالريش
Date: 06-21-2009, 05:23 AM
Parent: #25

Quote: تخرتلي التميرات


الشايقي المسخوت .. لقيتلك "دنقلاوي" أسخت.

لكن يا طارق بت الخدر دي يسهّل عليها شقّيش ما تقبّل. أماني ما انبسطنا من حكاويها.

Post: #27
Title: Re: حواء بت الخضر ود كنيش نازلي الخرطوم
Author: منى على الحسن
Date: 06-21-2009, 05:49 AM
Parent: #26

مشتاق للبلد بي حالا
والشوق للترابلا اهلي
شقاوتي خالص مغستي رحلت
ساكت ما قعد غبلي


طارق اهل بيك واهلا بي بت العمدة كنيش

وكلاما الرويان

والله ضحكت وكني في القطر ده

قبل شهر في اجازتي زرت الشمالية بعد

غياب طويل .....

بي ( السيارة ) على قولة الخليجين وصلت في ساعتين

فطرت في بيت عمي ...

سلام عليك يا طارق وسلام علي بت العمدة كنيش وقراصة تمرا مع الدقا

Post: #28
Title: Re: حواء بت الخضر ود كنيش نازلي الخرطوم
Author: ALazhary2
Date: 06-21-2009, 06:27 AM
Parent: #27

.
.

طارق ياود اهلي : الف شكر على البوست الجميل ، وذكرتنا الناس الطيبين ، ربنا يطول أعمارهم ويرحم امواتهم .

شوف صورة الحبوبة الليلتنا المشلخة لا وراء دي لقيتا في النت قبل فترة :















ربنا يملاك عافية وضيوفك الكرام

خالص التحية والتقدير


.
.

Post: #29
Title: Re: حواء بت الخضر ود كنيش نازلي الخرطوم
Author: bent awad el kareem
Date: 06-21-2009, 08:59 AM
Parent: #28

مبااااااااااااااالغه
يا ود جبريل
الله يطول عمرك ويديك العافية يا أصيل

اها التاكسي جاءهم ولا لسه ؟؟؟

Post: #33
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-21-2009, 10:14 AM
Parent: #29

Quote: مبااااااااااااااالغه
يا ود جبريل
الله يطول عمرك ويديك العافية يا أصيل

اها التاكسي جاءهم ولا لسه ؟؟؟



بت عوض الكريم جاييك
بس افضى واحكيلك نصايب بت الخضر في الخرطوم

Post: #36
Title: Re: حواء بت الخضر ود كنيش نازلي الخرطوم
Author: عبدالله داش
Date: 06-21-2009, 10:41 AM
Parent: #29

Quote:

- نان يا ولدي هو جنس حر وسموم... وتعال شوف امة الله دي ماها ماكلي البيض المسلوق ونص الجرادل لليلي ملياني...
والله يا ولدي انا نخريني من العفني باقيلي بقن حُمُر...
باقي الناس دفستها بيض وبقت تتنفس من لاااا تحت وفوق


يا ود جبريل ....


دا مسرح يسرح فينا ونحنا ما نقدر نقول كلمه
يااااا خ انا مت من الضحك ...

تصاوير مدهشه ...

لا حولااااااا

Post: #50
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-21-2009, 11:01 PM
Parent: #36

Quote: يا ود جبريل ....


دا مسرح يسرح فينا ونحنا ما نقدر نقول كلمه
يااااا خ انا مت من الضحك ...

تصاوير مدهشه ...

لا حولااااااا


اووووه شاعرنا الجميل عبد الله داش
ياخي زارتنا البركة
ويمين بت الخضر دي انا عارفاك حا تجي عندها كانت خلتني كتبت من زمااااااااااااان
كل الود

Post: #32
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-21-2009, 10:13 AM
Parent: #28

Quote: طارق ياود اهلي : الف شكر على البوست الجميل ، وذكرتنا الناس الطيبين ، ربنا يطول أعمارهم ويرحم امواتهم .

شوف صورة الحبوبة الليلتنا المشلخة لا وراء دي لقيتا في النت قبل فترة :



ربنا يملاك عافية وضيوفك الكرام

خالص التحية والتقدير



الازهري انتهيت مني كله كله
ذكرتني حبوبتي نفيسي بت بغداد ونحن متلملمين حولينا في البركل
وحات الله العنقريب ياهو نفس العنقريب
والبُطان ياهم ذاتهم
الله يعدلها عليك

Post: #31
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-21-2009, 10:11 AM
Parent: #27

Quote: مشتاق للبلد بي حالا
والشوق للترابلا اهلي
شقاوتي خالص مغستي رحلت
ساكت ما قعد غبلي

طارق اهل بيك واهلا بي بت العمدة كنيش

وكلاما الرويان

والله ضحكت وكني في القطر ده

قبل شهر في اجازتي زرت الشمالية بعد

غياب طويل .....

بي ( السيارة ) على قولة الخليجين وصلت في ساعتين

فطرت في بيت عمي ...

سلام عليك يا طارق وسلام علي بت العمدة كنيش وقراصة تمرا مع الدقا


منى بت اهلي الزيني كيفنك
الله يعلم حاسدك علي مشيتك للبلد دي
ياخي انا طول خلاص
واصلها بت الخضر دي حكاويها آآآبيخلصن
اماني مو عندها المحن

كل الود

Post: #30
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-21-2009, 10:08 AM
Parent: #26

Quote: الشايقي المسخوت .. لقيتلك "دنقلاوي" أسخت.

لكن يا طارق بت الخدر دي يسهّل عليها شقّيش ما تقبّل. أماني ما انبسطنا من حكاويها.


والله يا ود ابو العزائم ان بقيت مشيت الخرطوم وما شفتها
اصلو اجازتي دي تبقى قاطعي اللهجي
ياخي بت الخضر دي موسوعة حكاوي
بس كيفن القالها الزمن واحكي نصايبها هني

Post: #34
Title: Re: حواء بت الخضر ود كنيش نازلي الخرطوم
Author: SHIBKA
Date: 06-21-2009, 10:21 AM
Parent: #30

يادكتور




صابرة وممكونة




بسبب حكاويك الما بتم دي

اها كمل

Post: #42
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-21-2009, 10:45 PM
Parent: #34

Quote: يادكتور




صابرة وممكونة




بسبب حكاويك الما بتم دي

اها كمل


يا شبكة ياخي لا تضيقي كل شي بالمهلي
ههههههههههههههههههههههههههههههه

Post: #35
Title: Re: حواء بت الخضر ود كنيش نازلي الخرطوم
Author: حيدر حسن ميرغني
Date: 06-21-2009, 10:23 AM
Parent: #30

Quote: الله يقرفك يا حيدر ..
قديم ياخ .


عمدتنا

لو ماخايف الفضيحة كنت قلت انا ذاتي غسلت القطر ده

ده قطر الجدود ... نغسلو بالديتول حتين يفوت ...

حررررم كرم ضيافة بس عشان مايشيلو حسَهم في الخرتوم

Post: #37
Title: Re: حواء بت الخضر ود كنيش نازلي الخرطوم
Author: سارة كرودى
Date: 06-21-2009, 12:37 PM
Parent: #35

دوما كتاباتك تنم عن روعة اصيلة .. .. ..

لك التحية طارق اين ما كنت وانت تبحر بنا عكس تيار هذا الزمن الاجوف لزمن كتير حنييييين .. ..

تحياتى لعمتك .. ..

Post: #38
Title: Re: حواء بت الخضر ود كنيش نازلي الخرطوم
Author: السمؤال بدرالدين
Date: 06-21-2009, 01:27 PM
Parent: #37

المنبر نور
شنو التقلة العليك ياخي
مشتاقين كميات

Post: #39
Title: Re: حواء بت الخضر ود كنيش نازلي الخرطوم
Author: سيف الدولة كامل
Date: 06-21-2009, 06:03 PM
Parent: #38

حبيبنا وشيخنا \ ود جبرين,,, حبابك عشرة


عدتم والعود احمد,,, والله فرحتا بالعودة


خصوصا وانت راكب قطر كريمي, وكمان عمدة ماقصر.


ربنا يمتعك بالصحة والعافية يا امير


معزتي

Post: #41
Title: Re: حواء بت الخضر ود كنيش نازلي الخرطوم
Author: معاوية المدير
Date: 06-21-2009, 07:23 PM
Parent: #39



راجيك يا ود جبرين
بتيجي ولا كلام سااااكت؟؟؟؟

Post: #48
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-21-2009, 10:55 PM
Parent: #41

Quote: راجيك يا ود جبرين
بتيجي ولا كلام سااااكت؟؟؟؟

اذيتني ياخي شديد يا ود المدير
بالله شفت الصفار اليل المنقي دي كيفنه
ولا الكاويق المغتنو بيه
انا عاد واااااااامغستي

Post: #47
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-21-2009, 10:53 PM
Parent: #39

Quote: حبيبنا وشيخنا \ ود جبرين,,, حبابك عشرة


عدتم والعود احمد,,, والله فرحتا بالعودة


خصوصا وانت راكب قطر كريمي, وكمان عمدة ماقصر.


ربنا يمتعك بالصحة والعافية يا امير


معزتي

استاذي العزيز ود كامل
ياخي كيفنك والوليدات
نعلكم طيبين وتامين وسالمين

Post: #46
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-21-2009, 10:51 PM
Parent: #38

Quote: المنبر نور
شنو التقلة العليك ياخي
مشتاقين كميات

الله الله الله
ود بدر الدين كله
نصيح آآآيابا في عضامك
والرسول الحاجي كيفنها ان شاء الله طيبي
ومعاكم ولا في البلد الله يديها العافي
والله يا حبيب جري جد
والوقت ممحوق محقتا شديدي خلاص

Post: #45
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-21-2009, 10:49 PM
Parent: #37

Quote: دوما كتاباتك تنم عن روعة اصيلة .. .. ..

لك التحية طارق اين ما كنت وانت تبحر بنا عكس تيار هذا الزمن الاجوف لزمن كتير حنييييين .. ..

تحياتى لعمتك .. ..

اووووه سارة بت اهلي الحنان بالحيل
ناس نوري السمحين
ياخي نورتي المنبر من جديد
والله افتقدناك الايام الفاتت
لا تنقطعي مننا ياخي الله يرضى عليك

Post: #43
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-21-2009, 10:46 PM
Parent: #35

Quote: ده قطر الجدود ... نغسلو بالديتول حتين يفوت ...

حررررم كرم ضيافة بس عشان مايشيلو حسَهم في الخرتوم

ههههههههههههههههههههههههههههههههههههه
ما بسألك

Post: #40
Title: Re: حواء بت الخضر ود كنيش نازلي الخرطوم
Author: عمر صديق
Date: 06-21-2009, 07:16 PM
Parent: #25

Quote: نوم التسطيح



يا عمد عبد الله الصور دي عشان خاطرك



دكتور طارق

تحياتي

يارائع


وها انت مرة اخري تتحفنا وتمتعنا بالسهل الممتنع الذي يبين لنا ان الحكاوي بنكهةالشوايقة مثل غناهم وتمرهم ووجدهم وحنينهم لريحة التراب والسواقي

Post: #49
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-21-2009, 10:58 PM
Parent: #40

Quote: دكتور طارق

تحياتي

يارائع


وها انت مرة اخري تتحفنا وتمتعنا بالسهل الممتنع الذي يبين لنا ان الحكاوي بنكهةالشوايقة مثل غناهم وتمرهم ووجدهم وحنينهم لريحة التراب والسواقي

وحات الخوة يا عمر ان بقى ما شلتنا الانت عارفه ديك
انا كان مليتلكم المنبر دة كلام شوايقة
كنت شلخته لاااااااوراا عديييييييل
ههههههههههههههههههه

Post: #51
Title: Re: حواء بت الخضر ود كنيش نازلي الخرطوم
Author: صديق عبد الجبار
Date: 06-21-2009, 11:15 PM
Parent: #49

Quote: Re: حواء بت الخضر ود كنيش نازلي الخرطوم


كيفنك يا طارق جتى جبريل .. !!!
والله أمتعتنا ورجعتنا للزمن الجميل .. زمن الجريف واللوبيا .. وقعاد الرملة تحت القمرة .. وريحة قنانة اللبن مع المغيرب ....
الله يديك العافية إنشالله التخصك في المصارين .. قول آمين !!
عندي ملاحظة بسيطة إن أذنت لي .. ؟؟
هل قصدت " نازلي الخرتوم " .. فإن فعلت ذلك فلعمري هذا إبداع ما بعده إبداع .. فلقد صارت فعلاً الخرتوم أدنى درجة من كل أرياف السودان إلا من بعض غابات الأسمنت التي صارت كما الزنازين !!!
وذلك لأن أهلنا الغبش بذكائهم الفطري ومعرفتهم العفوية كانوا يقولون (مندلي البلد) و (وماشي فوق) للخرتوم .. وهذا يستقيم تماماً مع الخاطة الكونتورية لأرض السودان ومجرى النيل عموماً حيث يتدلى النيل من أعالي منابعه إلى أسفل مصبه في الشمال ...!!!
متي عرف أهلنا الذين لم يقرأوا ولم يكتبوا هذه الحقيقة الجغرافية التي اكتشفها الرحالة بعد عناء ومشقة ؟؟
لك تحياتي ومعزتي
" أبوفواز "
(والخرتوم ماها محلتي نفسي أرجع حلتي )

Post: #52
Title: Re: حواء بت الخضر ود كنيش نازلي الخرطوم
Author: محمد أبوالعزائم أبوالريش
Date: 06-21-2009, 11:34 PM
Parent: #51

Quote: وهذا يستقيم تماماً مع الخاطة الكونتورية لأرض السودان ومجرى النيل عموماً حيث يتدلى النيل من أعالي منابعه إلى أسفل مصبه في الشمال ...!!!


يا زول الناس ديل عرفوا الكلام ده من الجدود، وسمّوا البلاد بمجرى النيل (صعيد وسافل)

___________
واصل يا طارق ياخ

Post: #54
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-22-2009, 11:04 AM
Parent: #52

Quote: واصل يا طارق ياخ


سمح

Post: #55
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-22-2009, 11:05 AM
Parent: #54

- اها يا عمتي... وصلتوا كيفن
- شويتين جانا عمك الامين وصلنا لي بُكان ساكن في مكانا يقولولوا الحلي الجديدي
- ايي هو ما كان ساكن هناك
- المهم يا ولدي دخلنا ... سلام مرحب سلام مرحب.. قالولي قومي تستحمي
- اها
- فتحت شنطتي وشلتلي هدمايي وسروالا كنت مخيطاهو دابي قبل اجي
- الله يقلعك وسروالك دة شلتيهو قدام الناس كدي
- كيفن آآبشيلو وحاتك جديد من الدموريي واشتريتلي ليه لستك سمح من دكان العوضابي
- اها انا عارفك ماك نصيحي
- مشيت يا ولدي دخلت علي الحمام... اريتو حمام السرور مبلط بالاسمنت... وفيهو شيتا مدلدل نازل من السقف أليلو مقدقد كدي علي الكُمشة البيلقطوبا الزلابييي من الطوة
- ههههه اي اسمه الدُش
- المهم يا ولدي علقت هديماتي وبقيت افتش علي المويي... يا ربي اكوركلهم يجيبولي المويي من لااابرة.. وقعدت متمحني ماني عارفي الاسوي..
- نان اصلهم هم ما قالولك الحمام دة فيهو كدي وكدي وتفتحي الدش من هني وهني
- ما قالولي وانا ما سعلتهم يا ولدي... المهم لقيتلي شي علي الصُرة ألت الشافع مبنقر من الحيطي كدي.. وبقيت ابعبص فيهو... أكان يا ولدي المويي تجي نازلي فوقي شووووووووووو... وبقيت اسكلب..
- الله لا تكسبك مالك
- الشي... المويي جات منكبي فيني وفي راسي وانا ممشطاهو قبل اقوم والمساير عاجباتني وممسحاهن بالكركار
- نان انت اصلك ما اتكندكتي في القطر
- نان هو كنديك نصاح... بس يا ولدي راسي كنت رابطاهو زين فشان يبقالي ناير قدام ناس الخرتوم ديل.. المهم يا ولدي اتمشكت زين... وعندهم صابوني سمحي ريحتها علي الريفدور.. ومدِني ليفايي جديدي يمين بالحب أليلا..
- اها شن سويتي تاني
- جيت يا ولدي من الحمام... وقعدنا في الحوش في سراير سمحات كدي والملايات ألاتن يهبهِبن
وجابولنا قزايز ألات بستي كولا
- الشي اسمه الببسي
- انا شن عرفني يا ولدي... اها اشوف في الناس يشيلو في القزازي ويرجعوها تجي ناقصي... وانا يا ولدي دخلتها في خشمي ودخل لساني فيها.. ولامن طلعتو قال بووووو.. لامن خِجِل...
- نان شن سويتي
- يا ولدي اتمغستلي جنس مغسي... اشوف في الناس قزازتهم ماشي ناقصي وأنا ألتي في بُكانها.. اتاريني من غباي انا قاعدي ادخل فيها لساني يسدها وما يخلي النصيبي الفيها تنزل في حلقي...
- هههههههههههه اها
- يا ولدي مالك علي تذكرني النصايب دي
- عليك الله كملي
- غلبني يا ولدي اشرب النصيبي دي وقلتلم ساقطي ما قدِر عليها... وانا نفيستي فيها...ودة كله كوم ويوم خلوني براي في البيت كوم...

Post: #53
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-22-2009, 11:01 AM
Parent: #51

صديق كيفنك
يا سيدي شكرا على الاطراء والكلمات الطيبات
حقيقي انا قصدت اكتب (نازلي) بدل (طالعي)
بس يمكن ما كان في راسي الشي الذكرته
يمكن لانه الخرطوم حاليا اصبحت طاردة ودة كان قصدي

كل الود

Post: #56
Title: Re: حواء بت الخضر ود كنيش نازلي الخرطوم
Author: سارة كرودى
Date: 06-22-2009, 01:32 PM
Parent: #53

ود جبريل مافى داعى لى الشحتفه تمها .. ..

ما تبقه زى قصة اى بت شديدة ..

تحياتى .. ..

Post: #57
Title: Re: حواء بت الخضر ود كنيش نازلي الخرطوم
Author: ALazhary2
Date: 06-22-2009, 02:00 PM
Parent: #56

.
.

ياطارق حبوبتنا دي أول مادخلت الحمام وفتحت الدش والموية كبت مافي زول سمع صوت الموية برة وقال ليها : وا شريري إتي مزنوقي :)

.
.

Post: #58
Title: Re: حواء بت الخضر ود كنيش نازلي الخرطوم
Author: SHIBKA
Date: 06-22-2009, 05:11 PM

في الانتظار واحنا في ذكري الاخ عوض

Post: #62
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-23-2009, 09:25 AM
Parent: #58

Quote: في الانتظار واحنا في ذكري الاخ عوض


عوض طاير ان شاء الله ان كان بهدلني معاهو
ههههههههههههههههههههه

Post: #61
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-22-2009, 11:53 PM

Quote: ياطارق حبوبتنا دي أول مادخلت الحمام وفتحت الدش والموية كبت مافي زول سمع صوت الموية برة وقال ليها : وا شريري إتي مزنوقي :)

بااااااااااااااالغتة
هههههههههههههههههه

Post: #59
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-22-2009, 11:51 PM
Parent: #56

Quote:
ود جبريل مافى داعى لى الشحتفه تمها .. ..

ما تبقه زى قصة اى بت شديدة ..

تحياتى .. ..


سارة بت اهلي كيفنك
ياخي والله قصة البت الشديدة دي بقت نبز عدييييييييييل
هههههههههههههههههههههههه

Post: #60
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-22-2009, 11:51 PM
Parent: #56

Quote:
ود جبريل مافى داعى لى الشحتفه تمها .. ..

ما تبقه زى قصة اى بت شديدة ..

تحياتى .. ..


سارة بت اهلي كيفنك
ياخي والله قصة البت الشديدة دي بقت نبز عدييييييييييل
هههههههههههههههههههههههه

Post: #63
Title: Re: حواء بت الخضر ود كنيش نازلي الخرطوم
Author: صلاح أبودية
Date: 06-23-2009, 09:50 AM
Parent: #60

ود خالتى !
كيف حالك والله ليك وحشى !
والله الماسافر بى قطر كريمى ما سافر !
والما أكل قراصة التمر ما أكل !
أحب الزوادى وجوز الحمام وقراصة التمر !
وشراب الشاى فى المحطات والما محطات !
والشطيف فى مواسير عطبرة المصنقعى !
واا حلاة القطر لمن يفوتك فى أدبرا !!
أمانى ما تتنقنق عند ناس فاطنة خالتك زى الأمير !
والملاقاة دى خلها ساى !
الملاقاة دى ياجماعة لمن قطر يجى فى نفس سكة قطركم يقوموا الإتنين يقيفوا يتونسوا !
بتاخد ليها مرات يوم كامل !
وكمان الراس لمن يبوظ عيييييك تلاتة يوم لمن يجيبولوا راس من عطبرة !
زمن والله !

ــــ
يمين ريحة البيض المسلوق فى نخرينى !
الله يقطع البيض ومروحة القطر الما بتلف !

Post: #65
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-23-2009, 04:02 PM
Parent: #63

Quote: يمين ريحة البيض المسلوق فى نخرينى !
الله يقطع البيض ومروحة القطر الما بتلف !




بالغتة ياخ

النبي خالتي كيفنها.. طيبي

Post: #64
Title: Re: حواء بت الخضر ود كنيش نازلي الخرطوم
Author: عثمان دغيس
Date: 06-23-2009, 09:55 AM
Parent: #60

Quote: Re: حواء بت الخضر ود كنيش نازلي الخرطوم


الحبيب طارق...
بتد كنيش عمتكن دي نعلها بتد كنيش الليلنا الفي نوري ...؟..
واللا كنيشاً كتر (بضم الكاف والتاء ) ....؟؟؟؟

والله بوستك ده بسطني إنبساطةً ضمممممممة فايتي على الغوانين ( أيييييييييييييييييييي بالغين !!)

واصل يا الغالي ...

Post: #66
Title: Re: حواء بت الخضر ود كنيش نازلي الخرطوم
Author: amar adam
Date: 06-23-2009, 05:31 PM
Parent: #64

انهض ود كنيش مليان جلال ومهابة
انهض ود كنيش خلى الخلق تتشابى
الناس الحنان وحفايا جات يا يابا
فى نورى بتضوى الشعر والربابه
ما باقى القرير لى نورى يبفو نسابا

×××××

حييت ود كنيش ونورك شلع يا نورى
تاريخ ود كنيش سجلت فبهو حضورى
العمدة العظيم شكرك عليا ضرورى
فى كل المحافل يا مكارموا لفى ودورى
شرفت البلد للشايقى والمنصورى من قصيدتى نشرت بجريدة اخر لحظة

Post: #68
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-24-2009, 02:44 PM
Parent: #66

Quote: انهض ود كنيش مليان جلال ومهابة
انهض ود كنيش خلى الخلق تتشابى
الناس الحنان وحفايا جات يا يابا
فى نورى بتضوى الشعر والربابه
ما باقى القرير لى نورى يبفو نسابا

×××××

حييت ود كنيش ونورك شلع يا نورى
تاريخ ود كنيش سجلت فبهو حضورى
العمدة العظيم شكرك عليا ضرورى
فى كل المحافل يا مكارموا لفى ودورى
شرفت البلد للشايقى والمنصورى من قصيدتى نشرت بجريدة اخر لحظة


تسلم يا سيدي

Post: #67
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-24-2009, 10:34 AM
Parent: #64

Quote: الحبيب طارق...
بتد كنيش عمتكن دي نعلها بتد كنيش الليلنا الفي نوري ...؟..
واللا كنيشاً كتر (بضم الكاف والتاء ) ....؟؟؟؟

والله بوستك ده بسطني إنبساطةً ضمممممممة فايتي على الغوانين ( أيييييييييييييييييييي بالغين !!)

واصل يا الغالي ...


عثمان كيفنك
بت الخضر ود كنيش دي من البركل (شبا تحديدا)
عمتي بت خال ابوي

انبسط يا الحبيب اصلو الدنيي دي شن فيها

Post: #69
Title: Re: حواء بت الخضر ود كنيش نازلي الخرطوم
Author: خدر
Date: 06-24-2009, 05:31 PM
Parent: #67

Quote: ما قالولي وانا ما سعلتهم يا ولدي... المهم لقيتلي شي علي الصُرة ألت الشافع مبنقر من الحيطي كدي.. وبقيت ابعبص فيهو... أكان يا ولدي المويي تجي نازلي فوقي شووووووووووو... وبقيت اسكلب..

كااااااااااااااااكـ








الله يضحككـ يا طارق
صلحت مزاجي بي حكيكـ الليلة

Post: #70
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-25-2009, 09:13 AM
Parent: #69

Quote: الله يضحككـ يا طارق
صلحت مزاجي بي حكيكـ الليلة


ابو اطروق كيفنك
اضحك يا الحبيب
الدنيا دي مانا حاريلنا فيها شي

Post: #71
Title: Re: حواء بت الخضر ود كنيش نازلي الخرطوم
Author: هويدا شرف الدين
Date: 06-25-2009, 09:49 AM
Parent: #70

طارق والله خليتني اضحك ضحك مبالغه لغاية ما دموعي جرت قلت الليله طارق دا شكيتو علي الله برفدوني بي سببو

واحده ما شايقيه بس مكسره موت في الشوايقه


واصل مزيدا من الأبداع

Post: #72
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-25-2009, 10:11 PM
Parent: #71

Quote: طارق والله خليتني اضحك ضحك مبالغه لغاية ما دموعي جرت قلت الليله طارق دا شكيتو علي الله برفدوني بي سببو

يا زولة انبسطي
آخرها كوم تراب

واصلها بت الخضر دي سوتلها جنس مصايب بس كيفن افضالا

Post: #73
Title: Re: حواء بت الخضر ود كنيش نازلي الخرطوم
Author: ياسر عبدالكريم محمد
Date: 06-27-2009, 03:19 AM
Parent: #72

الحاجة حوا بت الخضر ود كنيش

الله يديك الصحة و العافية

فرقتى علينا

وشكرا يا طارق دائما باسطنا

إديك العافية

Post: #74
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-27-2009, 04:42 PM
Parent: #73

Quote: الحاجة حوا بت الخضر ود كنيش

الله يديك الصحة و العافية

فرقتى علينا

وشكرا يا طارق دائما باسطنا

إديك العافية

ياسر كيفنك ياخي
لقيتني شغال اكتب في باقي نصايب بت الخضر
شوية واجي اتملكم محنها

Post: #75
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-28-2009, 04:21 PM
Parent: #74

- اها تاني شن سويتي
- ههههههههههه يوم يا ولدي البيت كله فضى وكانوا مدننا اوضي مطرفي كدي انا وعمك مكاوي رحمه الله.
- اها
- اها يا ولدي لقيتلي طلحا سمح كدي وشملي قديمي مهلهلي كدي قلت الادخل اجيبلي هدماي من الشنط وآخدلي كبي ألت طلح قبل البيت ما يتملي علينا..
- قادري آبتفويتيلك شي
- دخلت يا ولدي واغني... إن كان القالك ضلفة الدولاب مفتوحي... واشوفلي في مرتا تشبهني ولابسالها هدوما زي ألاتي وحتى المساير ألاتها بس حقاتي في ضلفة الجن دي... بقيت يا ولدي استغفر في ربي.. وريقي نشف وأصلي يبست في مكاني ضُمة ضُمة... ودايري أكوريك لي عمك مكاوي وغلبني... ورجليني حلفن ما يشيلني... وباقيلي لُباسي بليتو والوضوء خسر علي... دة إن بقيت ما حتربتلي شيتا تاني من تحت...
- الله يقلعك.. اها شن سويتي
- الله ويامين شالتني رجلي علي الحوش وفقعها كواريكا تجيب الطاشي في الخلا...
- ههههههه غايتو ماكي مرة اها
- يا وليدي جاء عمك مكاوي ينجارا... وصاقعلي... يا خرابة مالك النصيبي اللدغتك شنو... الله لا كسبك...
- اها شن قولتيلو
- قلتلو: كيفن تدوني اوضة فيها مرتا تاني... هسي ان بقيت دايري اتقولع ضُمة ضُمة.. اتقولع قدام النصيبي الجوة دي... وكمان حلات مشاطها ومسايرها مسوياهن زي ألاتي...
- وشن قالك هو
- قعد يدعي فيني... ويقولي: اي مرتا شنو يا خرابة البيت فاضي انا وانت بس الفيهو
- لا والله فيهو وحيدتا جوة في الأوضة أرحكا اللوريك ليها...
مشينا يا ولدي على الأوضة وضلفة الدولاب مفتوحي: إن كان أشوفلك المرة بي راجلها وعراقيهو سروالو ويشبه عمك مكاوي الخالق الناطق...
- اها شن سويتي...
- تاني فقعتها كواريكا في نص الحوش وقلتلو: النصيبي كمان بي راجلها وانا كنت دايري اتقولع وآخدلي كَبِي ألت دخان... واااافضيحتك يا بت الخضر في الخرتوم...
- وشن سوا عمي
- بقى يمسك في خشمي يا ولدي... ويضحك لامن دموعه جرن...
- انا قلتلك ماك نصيحي من يومك... اها
- قعد يقولي النصيبي مراييي في الدولاب الناس يشوفوا فيها نفسهم ولبسهم وشعرهم كيفنهو ما يكون جايط... وبقى يدعي فيني... وانا شابكاهو ارجعاكا لي بلدنا في عفنة المنتازة ديك.. اخيرلنا من الجن دة...
- ههههههههه ماك مرة انت
- يا ولدي اليوم كله يقفسرلي ويشرحلي في مراية الجن دي لامن اولاد عمك جو من شغلهم وبقيت اسوق واحد واحد فيهم ونشوف المراييي... واهبش فيها بي شوووي كدي لامن عرفتها... مرايي الله يقلعها... واصلو الحلي الجديدة كلها عرفت قصة المرايي مع بت الخضر ود كنيش.

Post: #76
Title: Re: حواء بت الخضر ود كنيش نازلي الخرطوم
Author: طارق جبريل
Date: 06-29-2009, 09:37 AM
Parent: #75

كدي اطلعيلي لاااافوق لامن اجيك

Post: #77
Title: Re: حواء بت الخضر ود كنيش نازلي الخرطوم
Author: SHIBKA
Date: 06-29-2009, 10:47 AM
Parent: #76

طارق وعمتو ما تتاخروا

Post: #78
Title: Re: حواء بت الخضر ود كنيش نازلي الخرطوم
Author: طارق جبريل
Date: 07-01-2009, 12:51 PM
Parent: #77

Quote: طارق وعمتو ما تتاخروا


سمح يا بت جيرانا

Post: #79
Title: Re: حواء بت الخضر ود كنيش نازلي الخرطوم
Author: طارق جبريل
Date: 07-14-2009, 05:57 PM
Parent: #78

- اها تاني شن سويتي
- يوم يا ولدي كنا انا وعمتك محبوبة الله يرحمها
- اها
- جاء يا ولدي عمك عامر ومعاهو اصحابو وختولم قزايز كدي تحت الزير
- عرقي باقيلي
- والله يا ولدي آآآبعرفه شيتا اصفر كدي علي بول النعاج ومختوت في فتايل معوجات كدي علي عرجون التمُر...
- سجمك لا يبقى وسكي
- انا شن عرفني بيهو
- اها شن سويتي يا خرابة
- قلت لي محبوبة علي نضوق الشي العلي المحلبية دة
- قاهرات انت وعمتي محبوبة اها
- مسكنا الفتايل يا ولدي وفتحناهن... وجغمة وراء جغمة...
- اها رقدتن خل باقيلي
- يا ولدي شيتا زي عمري ما شفتو.. العرقي ضقناهو... المريسي هبشناها... البقنيي... علي زي دة من خلقوني ما شفناهو
- الله لا تكسبكن... نان الشي اصلكن ما زدتنوا موييي
- اي موية شنو.. اقلك فتحنا القزايز وبقينا نجغم... والشي ينزل في الحلق علي موية النار
- ههههههه ماكن حريم اها
- يا ولدي والدنيي عصر والسموم يلفحك زي المقابلك فرن ولا صاج آبري
- وانتن تجغمن في القلايي دي
- اي... وطبعا عمتك محبوبة ما جدها القروني ود قرن اصلها بقت تزغرد وتنط لاااافوق وتقول أنا قرن.... هههههه ومرة مرة تشيل فيصل ولدها كان يا دوب ليه سنة فشان ترضعه مرة تقلبو بي صلبو ومرة بي نخرينو... انا حمدت الله ما شِرِق الشافع كان عمك حسن نجضها نجاض..
- هههههه باقيلي اتوزنت ضُمة ضُمة
- نان هو جنس وزن آآآولدي..
- اها
- انا اصلي بقيت ادردق في الحوش واضحك زي الماسكاني ام فيرحانة...
- ههههههههه بالله انتن نسوان
- نان دحين مصطفى ما كان شافع الوقت داك
- اي في صفحتي وان ما كضبتة باقيلي سقيتو جُغمي ولا اتنين
- نان عمي عامر ما جاء يقفُر شيتو الختاهو
- اييي جاء ولقاني مدلقني وسألني: انت حواء القزايز الكانن هني وينن
- نان قلتيلو شنو
- قلتلو انا اصلي غير الترانرستور الفي صدري دة (مصطفى ولدها) ماني عارفالي شي
- ههههههههه وقال شنو
- نقنق وفات يا ولدي... كنا نصايب وعندنا المحن يعلم الله

Post: #80
Title: Re: حواء بت الخضر ود كنيش نازلي الخرطوم
Author: SHIBKA
Date: 07-14-2009, 08:14 PM
Parent: #79

Quote: كنا نصايب وعندنا المحن يعلم الله


وبس

Post: #81
Title: Re: حواء بت الخضر ود كنيش نازلي الخرطوم
Author: طارق جبريل
Date: 07-14-2009, 10:06 PM
Parent: #80

Quote: وبس


نان يا شبكة باقيلك فضلها شي
هههههههههههههههههههه

Post: #82
Title: Re: حواء بت الخضر ود كنيش نازلي الخرطوم
Author: محمد عثمان
Date: 07-14-2009, 10:11 PM
Parent: #81

طارق يا اخوى...

الاتو كملان
قاعدين سلاّقين بيض...نبوّش سااكت...

Post: #83
Title: Re: حواء بت الخضر ود كنيش نازلي الخرطوم
Author: طارق جبريل
Date: 07-14-2009, 10:23 PM
Parent: #82

Quote:
طارق يا اخوى...

الاتو كملان
قاعدين سلاّقين بيض...نبوّش سااكت...


خليها علي الله يا الحبيب
والله تقول قاعدين في محطة الكاب منتظرين الراس يجي من ابو حمد
ههههههههههههههههه

Post: #84
Title: Re: حواء بت الخضر ود كنيش نازلي الخرطوم
Author: طارق جبريل
Date: 07-15-2009, 10:43 AM
Parent: #83

بت الخضر اطلعيلي لاااافوق لامن اجيك

Post: #85
Title: Re: حواء بت الخضر ود كنيش نازلي الخرطوم
Author: Magdi Ahmed Elsheikh
Date: 07-27-2009, 00:10 AM
Parent: #84


Post: #86
Title: Re: حواء بت الخضر ود كنيش نازلي الخرطوم
Author: محمد أبوالعزائم أبوالريش
Date: 07-27-2009, 06:04 AM
Parent: #85

إت يا طارق عمّتك دي تكبِّر في كوما وتمشي تخلي الخلق منتظرين؟

يلاّك ياخ.

Post: #87
Title: Re: حواء بت الخضر ود كنيش نازلي الخرطوم
Author: SHIBKA
Date: 07-27-2009, 06:09 AM
Parent: #86

محمد

Quote: إت يا طارق عمّتك دي تكبِّر في كوما وتمشي تخلي الخلق منتظرين؟


انت ما عارفو تخصص حراق روح

هسة عوض عرفت البقى عليهو شنو عشان تجي لعمتو ....

Post: #88
Title: Re: حواء بت الخضر ود كنيش نازلي الخرطوم
Author: Magdi Ahmed Elsheikh
Date: 07-28-2009, 10:43 PM
Parent: #87

Quote: انت ما عارفو تخصص حراق روح

هسة عوض عرفت البقى عليهو شنو عشان تجي لعمتو ...


ده تخصص جديد ياود جبرين !!!






اها كمل ياخي ..!!

Post: #89
Title: Re: حواء بت الخضر ود كنيش نازلي الخرطوم
Author: Magdi Ahmed Elsheikh
Date: 07-29-2009, 08:57 PM
Parent: #88

Quote: انت ما عارفو تخصص حراق روح

هسة عوض عرفت البقى عليهو شنو عشان تجي لعمتو ...




وينك ياوليد جبرين ؟؟


Post: #90
Title: Re: حواء بت الخضر ود كنيش نازلي الخرطوم
Author: طارق جبريل
Date: 07-29-2009, 09:01 PM
Parent: #89

يا جماعة والله عمتي دي انا زايغ منها
الحكاوي الفضلن عندي ان بقيت دشيتن هني
بيطردوني من المنبر دة والمنابر المجاورة


الدايرني احكيلو عنها ممكن بالماسنجر
وعليه تحمل التبعات
المرة دي قاهري بالحيل الله يديها الصحة
حتى اسألوا ود ابو العزايم دة
هههههههههههههههههههههه

Post: #91
Title: Re: حواء بت الخضر ود كنيش نازلي الخرطوم
Author: Magdi Ahmed Elsheikh
Date: 07-29-2009, 09:07 PM
Parent: #90

Quote: المرة دي قاهري بالحيل الله يديها الصحة
حتى اسألوا ود ابو العزايم دة


ياوليد جبرين مستننك لانصناص الليالى ,,

وتجي ترميها بب كده,,

قول واكان كرشوك اليكرشوك !!!

Post: #92
Title: Re: حواء بت الخضر ود كنيش نازلي الخرطوم
Author: rosemen osman
Date: 08-13-2009, 04:57 PM
Parent: #91

+