Post: #1
Title: Eau De Cologne
Author: Emad Abdulla
Date: 07-21-2009, 08:10 AM
( C )
في عيادة الأسنان ..
جلستُ قربها ، ففاح عطرها و فاح .. فاح .. فاح ..
و كان ضرسي يوجعني .. يوجع .. يوجع
تعبتُ إنتظارا ، فطنطنتُ من ألم الضرس .. و من ضوع عطرها تعبتُ ، فتشهدتُ مؤمناً موحداً " تعباناً " : لا إله إلا الله ..
همست هي : ( تِم الشهادة يا كافر .. يا اب ضُرُس ) .
....
( O )
دقت الساعة الثانية من فجرٍ أترَم ..
( في البلاد النائمة .. دقت الساعة )
قال صوت في الإذاعة : هنا أم درمان ..
كنتُ وحدي في فراشٍ باخرةْ .
وحدي في أم درمان البحر .
....
( I )
الأول كان في الإبتدائية ..
و أول البلاد في الثانوية ..
و أصغر معيدٍٍ في الجامعة .
قالت الطالبة المِغناج المتخرجة حديثاً حين التقته وحيداً في مكتبه الجديد :
( كل كلامك حلو يا دكتور .. بالجد حلو ) و أسبلت عيناها فغرودت ، و انثنت ، فدنت .
ارتعش هو ، و حنجرته تحشرجت فأخرجت : يا بت ، إنتي سفيهة وللا شنو ؟
....
( O )
في صالة المغادرة عصرا .. في المطار .
إنتهره رجل الأمن في الثياب المدنية : بطاقة الخدمة الوطنية يا سيد !!
أخرج جيوبه كلها أمام نظرات رجل الأمن المدني ..
و ما في حقائبه أخرج .. و مافي وسعه من تماسك أخرج ..
ظل يخرجُ و يخرجُ و يخرج ..
و ما مِن أثرٍ للبطاقة الشرك .
: ده إستهبال منك وللا شنو ؟ قال الأمني المدني .
إبتلع ريقه فخرجت كرامته عملةً : خمسون جنيهاً ..
عملة من فئة الخمسون جنيهاً سودانياً منحته مقعداً في الطائرة ..
مقعداً بلا عودة .
....
( G )
: لله .. !!
قالها المتسول الأول ، فمنحه جنيهاً و عبر إلي الإشارة الضوئية التالية .
قال المتسول في التالية : لله ..!!
منحه جنيهاً و عبر إلي الثالثة ..
قالت المتسولة في الثالثة : لله ..!!
منحها أيضاً و أيضاً .. و عبر إلي الإشارة المرورية الرابعة في الشارع الخرطومي الليلي ..
: برضو لله ؟ قالها متأففاً للمتسول في الإشارة الضوئية الرابعة حين سدّ عليه - بوجهه الجَهِم - زجاج السيارة .
قال المتسول في يقين : لأ .. لي أنا ده .
....
( N )
: هي يا يُمّه حليل أبوي ..
قالت أمي للمرأة الرسمية مسؤولة النفايات في الحي .
: يا حجة ما دايرا ليها حليل .. أدفعي العليكم و خلاص . بهكذا أجابت الرسمية ذات الوجه الإبطي .
أخرجت أمي " مساختها " كلها دفعة واحدة :
- خلي الفصاحة يا بت هوووي ، إنتو العليكم .. دفعتوهو ؟
- الله يا يُمه " الدفاع " اليلحقك الشهدا ، و ما تلقي في الجنة غير عبدو ود الحور .
( عبدو ود الحور .. هو ابن جيراننا الصعلوك الجميل المنفلت الشهواني .. الأمهق ) .
....
( E )
في مكتب المسؤول الكبير بدوت صغيرا ..
تكلمتُ كلاماً صغيرا ، و أشرتُ إشاراتٍ صغيرة ، و طلبتُ فكتبتُ صغير الطلبات علي كثير ورقٍ رسمي .
ثم تسللتُ فخرجتُ حامداً تماسكي و الصبر الجميل .
تطاولتُ و أنا في الشارع بين الأناس المواطنين السودانيين في الخرطوم السّبية الشعثاء ..
تطاولتُ تطاولتُ تطاولتْ ..
بقيت متطاولاً حتى ارتطمت جبهتي باللوحة الإعلانية الزاهية تسد مدخل نفق شارع الجامعة :
( المؤتمر الوطني : لبناء أمة .. و صناعة مستقبل ) .
|
Post: #2
Title: Re: Eau De Cologne
Author: عمران حسن صالح
Date: 07-21-2009, 09:18 AM
Parent: #1
عماد عبد الله ..
الزول الكلامو حلو ..
سلام يا صاحب .. ومبروكـ الإضافات وربنا "" يجيبه "" بي خيره ويكفيكـ شرها ..
Quote: في مكتب المسؤول الكبير بدوت صغيرا ..
تكلمتُ كلاماً صغيرا ، و أشرتُ إشاراتٍ صغيرة ، و طلبتُ صغير الطلبات علي كثير ورق .
ثم خرجتُ .
تطاولتُ و أنا في الشارع بين الأناس المواطنين ..
تطاولتُ تطاولتُ تطاولتْ ..
بقيت متطاولاً حتى ارتطمت جبهتي باللوحة الإعلانية الزاهية تسد مدخل نفق شارع الجامعة :
( المؤتمر الوطني : لبناء أمة .. و صناعة مستقبل ) . |
..
( ولكم باااااااااااااكـ ) ...
|
Post: #3
Title: Re: Eau De Cologne
Author: Emad Abdulla
Date: 07-21-2009, 09:34 AM
Parent: #2
عمران يا صاحبي ..
صباحك حلو يا رب ..
البلد ( خرفانة ) .. قامت السخانة مع الخريف بتّقت ..
و البتيق مااااا كويس ، بيجيب الكلام .
شاكر كلامك يا زول يا حلو ..
نبارك ليك السمح .
محبتي .
|
Post: #4
Title: Re: Eau De Cologne
Author: خالد عبد الله محمود
Date: 07-21-2009, 09:49 AM
Parent: #3
Quote: : لله .. !!
قالها المتسول الأول ، فمنحه جنيهاً و عبر إلي الإشارة الضوئية التالية .
قال المتسول في التالية : لله ..!!
منحه جنيهاً و عبر إلي الثالثة ..
قالت المتسولة في الثالثة : لله ..!!
منحها أيضاً و أيضاً .. و عبر ..
: برضو لله ؟ قالها متأففاً للمتسول في الرابعة .. حين سدّ عليه - بوجهه الجَهِم - زجاج السيارة .
قال المتسول : لأ .. لي أنا ده . |
يديكـ العافية يا عمدة ياخ ويفتحها عليكـ محل ما تقبل ..
|
Post: #10
Title: Re: Eau De Cologne
Author: Emad Abdulla
Date: 07-21-2009, 09:00 PM
Parent: #4
خالد عبدالله ..
مساء الخير يا رجل .
و شاكر لك المشاعر الحلوة دي ياخي .. و الدعوة السمحة السمحة .
يديك العافية يا خالد و يديمك .
مودتي .
|
Post: #32
Title: Re: Eau De Cologne
Author: ود الخليفه
Date: 08-07-2009, 04:42 PM
Parent: #10
up
|
Post: #5
Title: Re: Eau De Cologne
Author: ودالعباسية
Date: 07-21-2009, 09:49 AM
Parent: #3
يا عمده ،،،
سلامات واشواقات كتيرة ،،
ومذيد من هذه اللوحات يا فنان ،،
|
Post: #6
Title: Re: Eau De Cologne
Author: ريهان الريح الشاذلي
Date: 07-21-2009, 10:07 AM
Parent: #5
إبتلع ريقه و أخرج مافي راسه : بخة cologne منحتنا كتابة متعة ..
شكرا يا اب ضرس ...
|
Post: #7
Title: Re: Eau De Cologne
Author: طارق جبريل
Date: 07-21-2009, 10:11 AM
Parent: #6
يا ريت الاضراس يطلعن لينا متل الدرر دي
عمدة كيفنك ابوي
|
Post: #8
Title: Re: Eau De Cologne
Author: ibrahim kojan
Date: 07-21-2009, 01:31 PM
Parent: #7
يا عماد
وإن صبرتم لأزيدنكم من الوجع والألم الذي يتوّرم، ثّم يتمدد دماملاً في يومٍ مقداره ألف عام .. هكذا قالوا له، فترّجل من مركبته، وتمدد علي خاصرة اليوم وهو في كامل بهائه منتشياً ألقاً وجمال وبقايا فحوله لايعرف مكاناً لإفراغها سوي علي قٌسوة الوجع الذي شق حياته لشهقتين:
الأولي... عندما راّها قال أعوذ بالله من هذا الجمال فشهقها كٌلّها نفساً قويماً وكساها بأنفاسه التي أطبقت عليها وهي لا تستطع حراكاً إلاّ إليه، فشرب يوما من أنفاسها وسحبت هي من شهيقه حتي مطلع الفجر... الثانيه كانت زفير الأولي .....
عماد صباح الخير واوع يكون (الضرس تاور كما يقول أبوساندرا)..
قول إنالله
|
Post: #9
Title: Re: Eau De Cologne
Author: Osman Musa
Date: 07-21-2009, 03:01 PM
Parent: #8
عماد ياضرس الكتابة
سلامات
أنشاءالله تكون شديد يازول
كنت هناك .
6 شهور أفتش ليك فى الخرتوم
أرجو أن تكون ألاحوال على ما يرام
تحياتى
|
Post: #15
Title: Re: Eau De Cologne
Author: Emad Abdulla
Date: 07-21-2009, 09:52 PM
Parent: #9
لأنه حظي ضكر يا عثمان .. عشان كده ما لاقيتك .
و هو حظٌ ضكرٌ من قولة تيت .
شكرا لسؤالك يا صاحبي ..
و شكرا لمرورك هنا .
و .. كان حيين بنتلاقى .
أبقى طيب يا عثمان ..
مودتي .
|
Post: #14
Title: Re: Eau De Cologne
Author: Emad Abdulla
Date: 07-21-2009, 09:39 PM
Parent: #8
كوجان ..
أبت يا صاحب .. بت اللزينا معصلجة واقفة دُتْ ..
حريف تدودر معاي ؟ مع إنو الدنيا خريف ياخي و البني آدم مفروض يبتّق في المطر ..
المطر عجيب يا صاحب , البلد دي عجيبة برضو ..
ناس عجيبة و حكومة عجيبة و محن أعجب .
المهم ..
معلقة معاي مدحة من صباحات ربك .. مدحة زي الزيفة حقت المطرة ..
أولاد حاج الماحي كمان عجيبين .
( أب جاهاً حوانا ) ..http://www.sudanradio.info/arabic/modules/debaser/player.php?id=491
هسه ده شنو ؟؟
يا زول الشغلة ملخبطة و جايطة جوطة عدوك ..
....
الله كريم يا صاحب .
|
Post: #13
Title: Re: Eau De Cologne
Author: Emad Abdulla
Date: 07-21-2009, 09:25 PM
Parent: #7
أماني ماهو حار آآطارق ..
الشي ده لامن ينتح .. إنا لله .
هسه ده كلوووو كوم و جيتي لاعندك كوماً تاني ..
قول خير .
|
Post: #12
Title: Re: Eau De Cologne
Author: Emad Abdulla
Date: 07-21-2009, 09:10 PM
Parent: #6
يا بت يا جدعة ..
طيب و بعدين ؟
القصص الميتة كترت ياخ ..
حبة كلونيا تفج النخاشيش .. عندكم ؟
....
ريهان يا جدعة ..
كتر خيرك .
|
Post: #11
Title: Re: Eau De Cologne
Author: Emad Abdulla
Date: 07-21-2009, 09:04 PM
Parent: #5
صاحبي اللابد ..
ود العباسية ياخي كتر خيرك كتير ..
الأشواق كتيرة , ليك و الأيام الحلوة البيننا .
و ح نتلاقي يا صاحب ..
مودتي .
|
Post: #16
Title: Re: Eau De Cologne
Author: كمال سالم
Date: 07-22-2009, 00:27 AM
Parent: #11
عماد عبدالله ,, سلام ياصاح ,,
بالله قدر ماتقدر وقدر ما الله يديك وقت كتر
لينا من تصاويرك البتكشف لينا حال البلد
البقت عجيبه دى !
ياخى والله إتخيلت حال الشوارع المليانه فى
كل ركن أرتال من القمامه وبعد ده يجيك واحد
ولا واحده يدق الباب زى سيد اللبن وبدون خجل
يقول ليك دايرين قروش النفايات !!
صور ,, صور ياعماد لحدى ماأصحاب اللافته ديل
يبنوا لينا أمه ويصنعوا لينا مستقبل .
يأخ ماقلت ليك أجدع لى التلفون ,,
|
Post: #17
Title: Re: Eau De Cologne
Author: Emad Abdulla
Date: 08-01-2009, 08:53 AM
Parent: #16
كيمو الجميل ..
تعال الخرطوم كدي ..
و عينك ما تشوف إلا البطاطس .
.....
يسعد صباحك يا صاحب .
|
Post: #18
Title: Re: Eau De Cologne
Author: مؤيد شريف
Date: 08-01-2009, 09:07 AM
Parent: #17
L´eau est un moyen d´être
Tes mots sont aussi des moyens d´être !
الماء وسيلتنا لكي (نكون)
وكلماتك كما الماء تمنح (كون)
مذهل!
Formidable!
|
Post: #19
Title: Re: Eau De Cologne
Author: bushra suleiman
Date: 08-01-2009, 09:53 AM
Parent: #18
عماد يا جميل
امشى اخد ليك جغمة من محل (ايسكريم ابى محجن الثقفى) بالحاج يوسف .. عشان تطلع زيتك
مؤتمر وطنى .. للثقافة والتأليم.
|
Post: #20
Title: Re: Eau De Cologne
Author: هواري نمر
Date: 08-01-2009, 10:27 AM
Parent: #19
Quote:
في عيادة الأسنان ..
جلستُ قربها ، ففاح عطرها و فاح .. فاح .. فاح ..
و كان ضرسي يوجعني .. يوجع .. يوجع
تعبتُ إنتظارا ، فطنطنتُ من ألم الضرس .. و من ضوع عطرها تعبتُ ، فتشهدتُ مؤمناً موحداً " تعباناً " : لا إله إلا الله ..
همست هي : ( تِم الشهادة يا كافر .. يا اب ضُرُس ) . |
وات شن بتدور..
بي عيادة الاسنان,ضرسك ما تحشرو قرنفلاية ولاشيتا
يهمد ليك الوجع..
بس تكـــــــــــــوس لي (فاح عطرها..وفاح وفاح..)
يا اب ضرس....تفزعنا و تلحقنا..........من جنس كتابة عماد..دي!!
لك الود
هواري
|
Post: #21
Title: Re: Eau De Cologne
Author: Adil Isaac
Date: 08-01-2009, 11:45 AM
Parent: #20
Quote: ( كل كلامك حلو يا دكتور .. بالجد حلو ) و أسبلت عيناها فغرودت ، و انثنت ، فدنت .
ارتعش هو ، و حنجرته تحشرجت فأخرجت : يا بت ، إنتي سفيهة وللا شنو ؟ |
والله ياصاحب الكلام الحلو كلامك دة, و البنية بتمارس في حقوقها الإنسانية و ...كدة و لكن السفاهة في الحشرجة الغير مبررة دي..ياخ و الله البني كجة فقعوا مرارتنا بعد رتقها عدة مرات...
كيفك، كدت ألقاك يمها بس منعتني أنفلونزا الخنازير...أو كما ظننت..
أبقى جميلاً كان أنت..
عادل
|
Post: #24
Title: Re: Eau De Cologne
Author: Emad Abdulla
Date: 08-01-2009, 08:18 PM
Parent: #20
الضرس كعب يا هواري لما يقوم ..
بيتاورك كل شوية .. كل شوية ..
مشيت أحشيهو .. الله قال حرام ؟؟
قمت انحشيت عطر لأبو خاشي ياخي .. و لم " يبنجني " الطبيب .. جيتو جاهز .
ياخي أمانة هذا البلد لئيم .. أمانة جميل ..
أمانة مسكين و مظلوم ظلم الحسن و الحسين .
ربك سبحانه وضع فيه من كل المتناقضات .. فأبدع .
و هكذا يا هواري يا صاحبي .. بقينا لافين ( حُمّنْديرَه ) ..
- و الكلمة من تخريجات جدك مكاوي محمد علي .. رحمة الله عليهو ..
يقولها حين الحاجات و الكلام و الناس تلف و تدور في الفاضي -
.....
ما بلقى عندك شوية ضرس ناتح زايد ؟؟؟
|
Post: #34
Title: Re: Eau De Cologne
Author: Emad Abdulla
Date: 08-28-2009, 03:20 PM
Parent: #20
جنوب المياه يا هواري ..
تماماً جنوبها .
....
كنت بألمٍ عظيمٍ .. جنوب المياه .
|
Post: #23
Title: Re: Eau De Cologne
Author: Emad Abdulla
Date: 08-01-2009, 08:09 PM
Parent: #19
أيها الزول المندسي .. يا بشرى .
يا أيها الزول السمح .
أبي محجن الثقفي ما بناباهو .. لاكين الفيك إنعرفت يا بشرى ..
آيس كريم ؟ و الله خِرِبتَ يا صاحبي ..
حليل أيام عربية الباسطة و انتخبوا رمز القطية .. و البلد بِكر .
ياخي مشتاق ليك .
|
Post: #22
Title: Re: Eau De Cologne
Author: Emad Abdulla
Date: 08-01-2009, 08:03 PM
Parent: #18
مؤيد يا صاحبي ..
كتر خيرك كتير .
كلماتك دفعة للواحد عشان يحسن شوفو للدنيا دي ..
يمكن يمرق منها بي شيتاً فيهو رَقَشَه يحمد عليهو سيدو .
شاكر ليك يا مؤيد ..
محبتي
|
Post: #25
Title: Re: Eau De Cologne
Author: ابو جهينة
Date: 08-01-2009, 08:31 PM
Parent: #22
ممتع جدا هذا الحكي يا قريبي
|
Post: #26
Title: Re: Eau De Cologne
Author: Emad Abdulla
Date: 08-02-2009, 07:52 AM
Parent: #25
سيد الحكي هو أنت يا أبا جهينة ..
إن أعجبك هذا فهو بعضٌ مما تعلمته من آيات سردك البديع ..
يا سيدي يا جلال .. أنت مِنّا في مقام العارفين ..
لك الحب الذي تعرف .
أشكرك أشكرك .
|
Post: #27
Title: Re: Eau De Cologne
Author: محمد عبد الماجد الصايم
Date: 08-02-2009, 11:06 AM
Parent: #26
تعرف يا عمدة
ما قاعد أقدر أخش بوستاتكـ نوهائي
ما بتتحمل خرمجة ياخ!
هسي الكلام دا يخرمجو فيهو شنو
ما يا هو دا مخرمج جاهز!
|
Post: #38
Title: Re: Eau De Cologne
Author: Emad Abdulla
Date: 08-29-2009, 02:44 PM
Parent: #27
( أنا أخرمج .. إذن انا موجود ) ..
رمضان كريم يا زول يا حلو .
....
لك ان تخرمج ما طاب لك : مثنىً و ثلاث و رباع .
محمد يا ولدي , ما تبقى قطر بقضيبين حديد مرسومات ليهو سكة ..
أبقى جن أحمر مسلط , سوطها و جوطها .. و أمرق من حق نفسك ..
ألم يقال ( إن لنفسك عليك حق ) ؟
فوق في شنو غير السما و تحت غير الواطـة ؟ .. البيناتهم ده حقنا .. ما حق القطر .
....
ليه بحبك قدر ده يا أيها الفالت عيارو ؟؟
|
Post: #28
Title: Re: Eau De Cologne
Author: إيمان أحمد
Date: 08-02-2009, 01:43 PM
Parent: #22
*
|
Post: #29
Title: Re: Eau De Cologne
Author: خدر
Date: 08-02-2009, 03:26 PM
Parent: #28
| Quote: تِم الشهادة يا كافر .. يا اب ضُرُس |
يا كافر
بقيت تنشر لمن نغيب من المنبر
حلو كالعادة يا حكمدار
|
Post: #30
Title: Re: Eau De Cologne
Author: محمد سنى دفع الله
Date: 08-03-2009, 12:33 PM
Parent: #29
كممثل غير متمكن على خشبة المسرح ،،
وقد أنساه الخوف دوره ،
أو اي كائن قوي وقد امتلأ غضبا
وزاد هياجه بحيث أضعف عزمه ..
**
فإن ضعف ثقتي في نفسي
تنسيني أن أفوه
بما ينبغي للحب من مراسم
وأبدو وكأنني أذوي تحت سطوة حبي ؟؟؟
**
فلتكن كتابتي إليك
رسالة فصيحة صامتة عما يقوله قلبي
تسأل الحب وتنشد جزاء أكبر
مما بلقاه لسان يكثر الكلام عن حبه ...
**
أه فلتتعلم أن تقرأ ما كتبه حبي الصامت !
فأن تسمع بعينيك هو حب رائع ذو بصيرة .....
**
سونيت 23
شيكسبيير
|
Post: #45
Title: Re: Eau De Cologne
Author: Emad Abdulla
Date: 09-03-2009, 08:03 AM
Parent: #29
ود التوم ..
صباح الخير يا أخانا .
ما زلت أنتظرك ، ما زلت أنتظر .
......
خالد خليهو .. جيب لقاء معاك .
ثم إنه عندي ليك شوق ياخ .
|
Post: #39
Title: Re: Eau De Cologne
Author: Emad Abdulla
Date: 08-29-2009, 02:48 PM
Parent: #28
لأ ..
نجمتك ما كفاية .
أكتبي يا إيمان أحمد ..
أو .. لأنُزلن بعض كتاباتك هنا .
....
ده ما تهديد .. ده وعد .
|
Post: #31
Title: Re: Eau De Cologne
Author: عزاز شامي
Date: 08-07-2009, 02:45 PM
Parent: #1
***
|
Post: #33
Title: Re: Eau De Cologne
Author: الوليد محمد الامين
Date: 08-07-2009, 05:19 PM
Parent: #31
Eau De Cologne يا عماد ...
|
Post: #35
Title: Re: Eau De Cologne
Author: fadlabi
Date: 08-28-2009, 03:56 PM
Parent: #33
الأول
for real..
ya salaaaaaaaaam
|
Post: #36
Title: Re: Eau De Cologne
Author: salah ismail
Date: 08-28-2009, 04:31 PM
Parent: #35
المعمد بماء الجمال
من الملايين التي نسيت في زخم الحياة ونسيت ونسيت حتي اصبح النسيان اعلان في الافتة الكبيرة نساه صاحب الاعلان ...
من تلك الذاكرة (البور) كان لابد ان ياتي احد.... فقط زول واحد.. يا عماد..انشاء الله المطرة تصب لغاية اي زول في السودان يبقي زيك..
ومحبتي
صلاح خليفه
|
Post: #44
Title: Re: Eau De Cologne
Author: Emad Abdulla
Date: 09-03-2009, 07:28 AM
Parent: #36
صلاح خليفة ..
يسعد صباحك يا صاحبي .
أهو .. ما زلنا نتنسم شيئا ، فله الحمد أن ما نزال بخياشيم صالحة للإستخدام .
ثم أن هذه البلاد على العليها ما تزال بمسحة جمال يرفّ على الأوجه التعبة على رهقها ..
جمال مكندك بطبقات من الغبشة و الغبرة و القترة ..
جذوة هي ما تزال تعتمل في أناةٍ هناك .
......
( يوم يُنفَخُ في الصورِ فتأتون أفواجا ) .
صباح الخير يا صاحبي .
|
Post: #37
Title: Re: Eau De Cologne
Author: Dalal Ezzaldin
Date: 08-28-2009, 04:58 PM
Parent: #35
Quote: في عيادة الأسنان ..
جلستُ قربها ، ففاح عطرها و فاح .. فاح .. فاح ..
و كان ضرسي يوجعني .. يوجع .. يوجع
تعبتُ إنتظارا ، فطنطنتُ من ألم الضرس .. و من ضوع عطرها تعبتُ ، فتشهدتُ مؤمناً موحداً " تعباناً " : لا إله إلا الله ..
همست هي : ( تِم الشهادة يا كافر .. يا اب ضُرُس ) .
|
يا عمدة النكته الراقيه
ان شاء الله طيب .. دايره الليله اعترف ليك اني كل ما اخش ليك بوست وادور اعلق يغلبني واحس بنفسي صغيييره قدر السمسمه
واقوم مارقه
جد بتحيرني مخيلتك وذكرياتك الحيه وكيف بتعيشنا فيها.
كل الاحترام والتقدير لشخصك الكريم ودمت بالف عافيه
|
Post: #43
Title: Re: Eau De Cologne
Author: Emad Abdulla
Date: 08-29-2009, 04:12 PM
Parent: #35
الـ REAL هو أنت يا محمد يا فاضلابي .
....
لذلك فأنت جميلٌ جميل . .
|
Post: #41
Title: Re: Eau De Cologne
Author: Emad Abdulla
Date: 08-29-2009, 03:47 PM
Parent: #33
وطنُ كـ ( درب النواقيس ) في " كولون "
كمثل " بيت مولنز " ..!!
يضوع شذىً ..
يعبق .. و يخرج للدنيا فوح القرنفل من أحضان فسقِيّه ..
يخرج ( من بطونها شرابٌ مختلفٌ ألوانه , فيه شفاءٌ للناس ) ..
الناس التي انتاشتها الشناة و القباحة و العفونة .. فتفسخوا في بت أم روحهم .. فمرضوا .
يا وليد .. بهكذا أحلم ..
I have a dream
أعرف .. ليس عندي معطيات الحلم !! جردوني منها - إنتبهت الآن لفداحة الخاطرة -
لكني أجتريْ على مصفاة الأحلام , و على سُدان منابعها " أتشدع " .. و أقول : بسم الله ( نويت حُلُما ) .
( أنما الأعمال بالنيات ) لوحة قديمة جنباً إلى جنب معلقة - مثلنا - في الديوان الكبير عن يمين و يسار لوحات و لوحات ..
جدارٌ من اللوحات , فيهن : ( الصبر طيب ) .. و فيهن ( كهيعص ) , و ( يا كريم ) فيهن .. و كذا ( الرئيس القائد ) و ( سيدي الإمام ) .. و أجدادٌ و أقارب , و غبرةٌ و بسرةٌ و آياتٍ كريمات و تمائم و طلاسم و تصاريف حكمٍ و مواعظ أقدم من " سَنسَنة الكِسره " .
يحب جدي ذلك معلقٌ في ديوانه الكبير , و انا أحب جدي .. لا مشكلة .
لا مشكلة أيضاً و أيضاً في حلمٍ لي .. حلمي أنا ( المتفلت من حراس النية ) ..
ألوليه بشويش , و عليه أربت و أطعمه و أسقي .. و انتخبه جداراً في محاذاة جدار جدي !!
حلمٌ عِطر ..
كولون !! 4711 !! ماءٌ مِعطار ..
( قيل أن الملكة فيكتورياأمرت برش باحات بلدة ريفية و طرقاتها بماء الكولونيا .. و إلا فما هي بزائرتها !! ) ..
who knows ربما استشرت العفونة في البلدة تلك فآذت جلالتها !! العفونة تؤذي .. أليس ؟؟
وجيهة الرأي هي صاحبة الجلالة .. ألا ترى .. Long live the Queen, Long live the Queen
طيب يا وليد ..
أريده وطناً كـ ( درب النواقيس ) في " كولون " ..
كمثل " بيت مولنز " .. !!
كفوح بَلَل الدنيا في صباحات الخريف ..!!
كعبير طرحة جدتي ..!!!
كرائحة فم الرُضّع ..!!
هو حلمي و انا " حُرٌ " فيه !!!!
هو وطني , أأنا حرٌ فيه ؟؟؟!!!!
....
يا صاحبي ..
العفونة تؤذي .. أليس ؟؟
|
Post: #40
Title: Re: Eau De Cologne
Author: Emad Abdulla
Date: 08-29-2009, 02:50 PM
Parent: #31
يا باشا ..
أنورت الأشراق .
تلاتة نجمات ؟؟
يجبر خاطرك يا عزاز .
|
Post: #42
Title: Re: Eau De Cologne
Author: Amjed
Date: 08-29-2009, 04:06 PM
Parent: #40
طيب ما دا الكلام الحي يا عماد
دا الكلام الجد
كيف يجهلوك
|
Post: #46
Title: Re: Eau De Cologne
Author: هشام المجمر
Date: 09-03-2009, 10:50 AM
Parent: #42
واحد
يا عماد
سلام
مافى افضل من كتابتك وانت هناك
اكتب ياعماد
اتنين
اخرمج خرمجة.......
......مخرمج خرمجة
بلدا للخرمجة و المخرمجين
|
|