Post: #1
Title: شعبٌ بجلدٍ تخينٍ .. و عرباتٍ إنتحارية !!
Author: Emad Abdulla
Date: 09-01-2009, 08:42 PM
فتاح يا عليم رزاق يا كريم .
سقطت شاحنةٌ في النهر .. !!
قفزت من فوق حاجزٍ معدني أوهَى من خيط العنكبوت و .. إلي جُب النهر هَوَت . الله أعلم إن كان الحادث ذاك إنتحاراً بِحُر إرادة العربة أم أنه تدبير ربك العظيم . لكن الشاهد ان تقارير العالمين و العارفين و المدين ربهم العجب , قالت تلك التقارير النجيضة و الإستنتاجات الكاربة أن السيارات و عموم المركبات في البلاد بقت تسعى للإنتحار و ما فارقة معاها كلو كلو !!! هكذا .
ربما تكون المجني عليها قد ملت و زهجت و جضّت و كوركت بلا فايدة , فرمت طوبة الأناس المواطنون ذوي الجلود التخينة الذين قدر ما يدوهم في حنانهم قدر ما يتخن الحنان و يزيد طبقة من فوق طبقة زي الورد . على أن الامر ليس بفريدٍ و لا سابقة و لا أمثولة .. فقد سبقت مركباتكم مخلوقات أخرى آثرت قتل أنفسها انتحاراً على طريقة الهاركيري اليابانية , سبقت تلك المخلوقات شاحناتكم و مركباتكم الإنتحارية في أخذ المبادرة بإنهاء حيواتها بيدها لا بيد عمرو .. و دونك الحيتان و العصافير و الفئران و ... حتى طالبان !! .
.....
ما علينا ..
أغلقت السلطات الجسر .
و تجمهر العسكر بالأزياء البيضاء و آخرين بسلطاتٍ لا تعلمونها - الله يعلمها - . تجمهروا فعنفوا الناس لتبييتهم النية على استخدام الجسر المقفوز منه , ومِن ثم " إزعاج السلطات أثناء تأدية عملها !! " و هو عمل استغرق من تلك السلطات نهاراً كاملاً و ليلة حتى ضحى اليوم التالي .. رافعتين عملاقتين صفراوين – تذكرك باليعسوب الخلاقة ذاك الذي أسميتموه صغاراً " حبوبة المطر " . و احتشد الجسر بالسيارات فوق تِحِت ( منعوكم , و استخدموه هم ) سيارات بأضواء و أخرى معتمة , لأخرى عارية من علامات حكومية لكنها مريبة . هرولاتٍ و كواريك و و و .. لنهارٍ كاملٍ و ليلة حتى ضحى اليوم التالي .. أي و الله .
ذاك صباح ، صحوت - و للعجب فأنت تصحو كل يومٍ في هذا البلد - و ما كان في الحمام إلا حشرجة الحنفيات !! .. لعنتَ إلا قليلا كعادتك في كل صباح : تلعن منذ ملامسة قدميك لأرض الغرفة , تجرهن منسحبات للحمام . شويتين ثم تترى اللعنات و أنت تفرش أسنانك ، و تبقى اللعنات تكر جهيراتٍ شيئاً فشيئا و أنت في طور تخلّقك داخل طقوس المواطن الحتمية عند كل صباحٍ : مويه مافي .. كهربا مافي .. هوا مافي .. هدوم مكوية مافي .. قروش مافي .. منظر كويس مافي .. كلمة طيبة مافي صبراً يبل الآبريه مافي . المهم انه صباح يجيئكم غصباُ عنه , و لو كان عليهو ما كان جا .. لكنها المشيئة التي تأتي به مسميته صباحاً , فيجيئكم كل يومٍ مجرجراُ ذيول نوره و أضواءه من كافة بلاد الله الجميلات الرايقات الآمنات المستقرات على أمتداد الشروق و الغروب . فيلم فيكم و هو على آخر رمقه زهجاً و قرفاً ليعبركم في ساعة واحدة تووووووش : فقط من السابعة إلى الثامنة .. و بس , على نظام ( ليّس ليّس يبقى كويّس ) ليترككم من بعدها لنار الله الموقدة : شمساً وهاجةً تلحم راسكم على ياقاتكم لحاماً حتى السابعة مساء . و قد كنت تفوح بعرق الليلة الماضية و حرها و بعوضها و كرشيها و حكاكها و بلاويها, عرقٌ دبِغٌ لزجٌ طينيٌ تخين . فتذكرت أحد الأمثلة الغرائبية لوالدتك : ( قبل النُفاس الريحة نحاس ) !! . صاح .. قد كان نفاساً و مخاضا و تلتلة سلسلية دائرية متصلة تبدأ من عند الفراش الصباحي و إنت طالع يا ساقية جحا يا ساقية جحا يا ساقية جحا , حتى تنتهي بك إلى ذات الفراش و إنت راقد حُمبُك .
.....
طيب ..
سقطت الشاحنة فأغلقوا الجسر, فاضطررتم يا أيها الناس الجارين جري الوحوش لأن تحتالوا على كوميداكم المُسئِمة في بلد الجسور و السدود و اللافتات هذا ، فيممت أرتال سياراتكم المتهالكات صوب جسور أخرى أقامتها لكم الحكومة فوق نيليكم عشوائية و كيفما اتفق ، و الظن أنها فعلت ذلك إكراماً لشركة حسبويةٍ هلامية من عشرات شركات الطرق و الجسور التي انتفخت بها لافتات البلاد و جيوب بعض العباد .. فحلبت تلك الهلاميات القرادية ضرعاً إثر ضرع من أثداء المخاليق العواليق .. فهنيئاً مريئاً .أقول ذهبتم يمين شمال بحثاً عن نفاج يعبر فوق أي نيلٍ من " أنيالكم " , وجدتموها و في كلها سيارة للشرطة مستعرضة للطريق إليها فيما يشبه استعراض للقوة , يجلس داخلها الرجالُ البِيض حادرين لكم فتبتسمون على مضض : شنو يا جنابو . قفلتوها كلها لكن . نمشي وين طيب ؟ فلا يجيبك جنابو إلا بتقطيبة و نظرة طويلة تُقرأ : بالله شوف المواطن البيض ده .. أمشي ياخ , أمشي . فتمشي ناكصاُ على عقبي حديدتك .
الجسور علي النيلين عجيبة في هذا البلد .. نيلين ؟ .. مفارقة حرية بالضحك ، و شريرة هي تستوجب الاستغراق في القهقهة و الفنقلة على القفا ، و يجوز بعدها الحمد الرسالي إنفاذاً لمشروع التمكين الخطابي الماشي في البلد و الذي يبدأ بـ ( حقيقتن ) .. و لا ينتهي إلا بـ ( أحسب إنّو ) . فحسبنا الله .
.....
طيب كويس ..
قال جاركم الدكتور أبو الحسن لعواطف التي جاءته تشكو من " برومبوفيه " جاها فجأة : حالتك دي ما دايره غرغرة و لا أنتيبيوتك .. بطلي بس " تجبدي " الماسورة كل يوم . لا ماء في معظم أحياء الخرطوم ، و التي فيها ففيها كافة أحياء الله الدقيقة و الغليظة و روائح منظفات على عفانات على حرجل حرجل على جمكسين على جوافة قديمة , أحياء الخرطوم المرزوعة في قلب المركز الفي قلب الهامش الفي قلب المركز الفي قلب الهامش و البيضة قالوا من الجدادة المن البيضة المن الجدادة المن البيضة المن الجدادة .. المنكم لله . المهم انه يظل يعودك - و في كتابٍٍ موقوتٍ - أحد كائنات الحكومة العاملة و بدفترٍه الحكومي الغليدٍ في يدٍ ، و في الأخرى يتأبط إضبارة متورمة بحقوق الناس قُدّت من تشريع لجباية الضرائب عن ( حق المويه ) !!! . لا عليك . قال لك عم عبدالعزيز مصلوباً على كرسيه المدولب إثر أصابته و هو في رتبة العميد في إحدى العمليات في الجنوب أوائل الألفية الثالثة , قال لك ذات صباح و انت تجأر بالشكوى و تكيل السباب من فرط بجاحة موظف الجباية المائية : ( ما ترخي ليهم .. يدوكُم حقكم أدّوهم حقهم ) .
أمسك في الكلام ده قوي .
.....
المهم ..
بنهرين كبيرين فريدين و مقرن شهير غنى له المغنون و داعب أحلام العشاق , ثم شوية بهار من كلام تجهد وزارة السياحة الولائية - أهكذا يسمونها ؟؟ - .. جهدت المذكورة في بيع الوهم لأهلنا الخواجات و السائحون الطير : يا أيها المستثمرون ، دونكم عاصمة بين نهرين و مقرن فيها يجنن و خضرة و أشياء أخرى لا ترونها .. تعالوا ترونها . مارتن صديقكم الهولندي كان قد ذهب إلى برج الفاتح و عاد يقول : هذا البناء سقط من عالم آخر .. سفينة فضاء ربما خططت لها " ناسا " هبوطاً في صحراء نيفادا .. لكن ليس هنا بالقطع . مارتن هذا مسكين . لا يعلم أنكم أيضاً كائنات لا تنتمي للعالم الذي يعرف , نحن أناسٌ ALIENS . بُهِت مارتن و هو يرشف الكركديه عند التومة ست الشاي , قهمه آدم الغُنّي حين قال له : هوووي يا خواجة يا عمبلوق .. جرها شفطة طوييييييييلة زي ده : شييييييييطك .. امبح . آآآآ ؟ لقيتا كيف ؟ إسكورنايز فور نايز قوود يا حبه ؟ قوود ؟؟؟ . فرد مارتن : قووود قووود يا هابا .
ثم سافر بغير عودة لآدم الغُنّي أو برج الفاتح .. و لا لهذه الشعوب و الأراضين الإلينز ( أو كما قال ) .
.....
مِن الآخر ..
قفزت خمس سيارات إلى النهر في عامٍ واحد !! . كويس .. تقسم تضرب تجيب النسبة المئوية على الجزر التربيعي في ظطا نق تربيع باي .. تلقى عرباتكم النطت في البحر أكتر من عدد الأفيال الإنتحرت في محميات سهول كاتانغا . و النهر زاتو من ضيقه بكم و زهجه الكبير من تلامتكم قام يجري إلى الشمال , ليرمي بنفسه إلى البحر !!
الظاهر كل ما يجري في هذه البقعة من الأرض به ضيقٌ يدفعه للإلقاء بنفسه إلى جحيمٍ آخر بغية التخلص من الجحيم الأولاني البقى ليهو في رقبتو .
تُرى إلى أين سترمي الحيكومة بنفسها حين تضيق بكم و بتُقُل دمكم و سردبتكم لكل أم دلدوم تلبعكم بيها , لغاية ما " المسكينة " حيلها إتهدّ ؟ ..
ماذا تفعل حيكومة في شعب جلدو تِخِن و بقى بس " أزهري بعشوم " ؟؟
.....
هنا أم درمان .
|
Post: #2
Title: Re: شعبٌ بجلدٍ تخينٍ .. و عرباتٍ إنتحارية !!
Author: salah ismail
Date: 09-01-2009, 10:35 PM
Parent: #1
يا عماد عبد الله.. يا عبدالله...ياخي خلي لينا حاجه نقولها...
كمل الكلام واتقال
كل الكلام عنك
دهشة مداخل الخوف والسكة في ظنك..
ماعرفت غير نيلين
جيت اسالم منك..
راحلين سنين ومعاك
اتلمو في حضنك
شمس المدن تطلع
تتلاشي في حزنك
ويبقي الجمال اطفال
تجري وتدور حولك
الله يعينك ياعماد....قلبك عليهم ...
|
Post: #5
Title: Re: شعبٌ بجلدٍ تخينٍ .. و عرباتٍ إنتحارية !!
Author: Emad Abdulla
Date: 09-02-2009, 00:24 AM
Parent: #2
صلاح خليفة ..
يا جميل .. يا جميل .Quote: شمس المدن تطلع
تتلاشي في حزنك |
كم شموس يا صاحبي .. كم و كم ؟
و .. فايده دامون ( كما يقول أهلي الدناقلة ) ..
قبل قليل انتحر الهواء في الخرطوم .. فتمت الناقصة .
في شي قابض القلب يا قريبي ..
شنو هو ؟ الله أعلم .
....
أنتظر قدومك للخرطوم ..
كن جميلاً دائما .
محبتي .
|
Post: #3
Title: Re: شعبٌ بجلدٍ تخينٍ .. و عرباتٍ إنتحارية !!
Author: salah ismail
Date: 09-01-2009, 11:00 PM
Parent: #1
http://www.youtube.com/watch?v=fhiUxkm4PAo
عدي النهار
والمغربيه جايا
تتخفي وري ضهر الشجر
وعشان نتوه في السكة
شالت من ليالينا
القمر
وبلدنا علي
الترعه بتغسل شعرها
جانا نهار ماقدرش
يدفع مهرها
الابنودي
ماشبه الليلة بالبارحة يا عماد
|
Post: #4
Title: Re: شعبٌ بجلدٍ تخينٍ .. و عرباتٍ إنتحارية !!
Author: محمد على طه الملك
Date: 09-01-2009, 11:44 PM
Parent: #3
جلدو بس?
رأيته بسروال وعراقي وشعر راسطه ..
يتحرك جيئة وذهابا وسط السوق دون أن يرفع رأسه عن الأرض..
همس لى صديقي قائلا:
تعرف دا?
قالوا معاه دكتوراه هندسة رياضيات ..
كلما يحسب مساحة السودان الحفظوها له (مليون ميل مربع) ..
يلقى الحسبه فارقة معاه وماقادر يظبطها..
ومن ديك قالوا لى حسع بحسب!!
..
رمضان كريم.
|
Post: #6
Title: Re: شعبٌ بجلدٍ تخينٍ .. و عرباتٍ إنتحارية !!
Author: Emad Abdulla
Date: 09-02-2009, 07:13 AM
Parent: #4
| Quote: كلما يحسب مساحة السودان الحفظوها له (مليون ميل مربع) .. |
مربع ؟؟؟
يا ود الملك .. المربع الذي نعرفه هو مربع شَملة كنيز ..
قالت الناس في معرض سخريتها من عِظَم لداحة الحاجات و فرط فداحتها :
( يا شَملَة كنيز الأصلها تلاتية لاكين قَدّها رُباعي ) .
.........
مخير الله ..
آخر عُمُرنا بقينا " قَدْ " !!!
|
Post: #7
Title: Re: شعبٌ بجلدٍ تخينٍ .. و عرباتٍ إنتحارية !!
Author: هواري نمر
Date: 09-02-2009, 07:37 AM
Parent: #6
Quote: و يجوز بعدها الحمد الرسالي إنفاذاً لمشروع التمكين الخطابي الماشي في البلد و الذي يبدأ بـ ( حقيقتن ) .. و لا ينتهي إلا بـ ( أحسب إنّو ) . فحسبنا الله .
..... |
ايييييييييييه الدايم الله..
حغيغتن...
أحسب أنو...
من وهدة....
وعلي شرف.....
والمغصة كاتلانا....
###
وتقول لي الهولندي يرجع تاني!!
عليك أمـــــــــان الله ...لي هسع تلاقيه يمطق في شلاليفه من الكركدي..
وكل ما يلاقي الفرندز بتاعينه...يسوي ليهم.
شيييييييييط ...ابح.
وهم يقلدونه
ما الشغلانة عندهم فلكلور..
و لي زويلنا السوداني البشفط الشاهي التقول فاكيوم.. ليه (قريفة)
فتناك بي عافية..
الجاتك في الكبري...
سامحتك...
|
Post: #14
Title: Re: شعبٌ بجلدٍ تخينٍ .. و عرباتٍ إنتحارية !!
Author: Emad Abdulla
Date: 09-02-2009, 10:26 AM
Parent: #7
| Quote: الجاتك في الكبري... |
هي بقت علي الكبري ؟؟ ..
الجاتنا جاتنا و خلاص ..
يقول القدال : ( يجيك الجاني في الرصاص ) ، و الرصاص هنا هو رصاص الجالوص .. طوفة فوق طوفة .
هسه بقينا في اللسه ما جات !!
.....
حغيغتن الموضوع ده أحسب أنو ماااااااا يبشر بخير .
|
Post: #8
Title: Re: شعبٌ بجلدٍ تخينٍ .. و عرباتٍ إنتحارية !!
Author: doma
Date: 09-02-2009, 07:55 AM
Parent: #6
يا عمده الشئ دا ما نافع ندعوا الله ان يخسف به الارض بس انتظروني اجي عشان يخسف بي معاكم .
|
Post: #9
Title: Re: شعبٌ بجلدٍ تخينٍ .. و عرباتٍ إنتحارية !!
Author: صديق الموج
Date: 09-02-2009, 08:11 AM
Parent: #8
| Quote: كلما يحسب مساحة السودان الحفظوها له (مليون ميل مربع) .. |
عماد كان مليون ميل مربع زمان...
الزمن العلينا ده بقى مليون ميل مكعب
الشى مابقى حفرة كبيرة..
الله يجازى الكان السبب،،،،
|
Post: #13
Title: Re: شعبٌ بجلدٍ تخينٍ .. و عرباتٍ إنتحارية !!
Author: محمد يوسف الزين
Date: 09-02-2009, 10:08 AM
Parent: #9
المقال دا شكلو اتكتب قبل المطرتين الفاتو ديل!!
لانو تاريخ الخرطوم الحديث ببدا بعد المطرتين ديل ،
وكل الوقائع من سقوط شاحنات في النيل وقطوعات كهرباء الخ هو تاريخ قديم
اما "المطرتين"!....
حياك الله يا عمدة ، دايماً..دايماً..عماد عبدالله وما بتخذلنا
|
Post: #19
Title: Re: شعبٌ بجلدٍ تخينٍ .. و عرباتٍ إنتحارية !!
Author: Emad Abdulla
Date: 09-03-2009, 00:02 AM
Parent: #13
ود الزين ..
أمانة ماك نقّاش ..
بالجد إتكتب من كم شهر ورا , ق . م . ت ( قبل المطرة التقيلة ) ..
أما المطرتين .. اما المطرتين ..
....
الخبر الأكيد قالوا البطانة اترشّت .
( السؤال هو : أي بطانة قصد ابوي الحاردلو ؟ ) .
|
Post: #18
Title: Re: شعبٌ بجلدٍ تخينٍ .. و عرباتٍ إنتحارية !!
Author: Emad Abdulla
Date: 09-02-2009, 11:55 PM
Parent: #9
صديق يا اخوي ..
شن قالت المره للراجل أب سنينات نامه ؟ :
( شِن راجلنا فليجون , بنيتنا كبيرون , برمتنا كيسرون , بحرنا شيردون , بنات عِسّي بلا قرون , شدرنا حيتتون , شِنقِرِش بلا ريش , حمرة قرقدانة أم طمبرةً ملانه عقيرب سِلّي سِلّي , أحمد وقع مات ) .
....
مسكين أحمد يا ابن خالتي ..
الحفرة لحّقتو النعيمين .
|
Post: #10
Title: Re: شعبٌ بجلدٍ تخينٍ .. و عرباتٍ إنتحارية !!
Author: Hisham Osman
Date: 09-02-2009, 08:20 AM
Parent: #8
عماد ..سلامات
علي ايدي هؤلاءالمغول الجدد من هولاكوييي الاسلاموية السياسية يكون
السودان قد امتطي ( صهوة لا نجاة لراكبها)..فدعونا نتقبل العزاء
بهدوء, فالدوام لله
|
Post: #11
Title: Re: شعبٌ بجلدٍ تخينٍ .. و عرباتٍ إنتحارية !!
Author: doma
Date: 09-02-2009, 08:36 AM
Parent: #10
Quote: عماد كان مليون ميل مربع زمان...
..
|
يا ود المو ج انتوا متاكدين انو ما كشه؟؟؟؟
|
Post: #12
Title: Re: شعبٌ بجلدٍ تخينٍ .. و عرباتٍ إنتحارية !!
Author: هواري نمر
Date: 09-02-2009, 08:44 AM
Parent: #11
| Quote: يا ود المو ج انتوا متاكدين انو ما كشه؟؟؟؟ |
كشة و كمان بقي زي
بروة الصـــــــابونة
كل يوم ناقص..ناقص...ناقص..
بي وين الله اعلم..
كانت بلد حدادي مدادي..
هسع يا الله نلاقي شبر واحد في الدافنة..
أأأأأأأأأأأخ
|
Post: #15
Title: Re: شعبٌ بجلدٍ تخينٍ .. و عرباتٍ إنتحارية !!
Author: مهيرة
Date: 09-02-2009, 01:13 PM
Parent: #12
Quote: تُرى إلى أين سترمي الحيكومة بنفسها حين تضيق بكم و بتُقُل دمكم و سردبتكم لكل أم دلدوم تلبعكم بيها , لغاية ما " المسكينة " حيلها إتهدّ ؟ ..
ماذا تفعل حيكومة في شعب جلدو تِخِن و بقى بس " أزهري بعشوم " ؟؟
هنا امدرمان |
وهنا الوجع!
اعملوا حسابكم قالوا يوم الجمعة محمداكم مطرة مطيرة!!
الله يغتى عليكم ورمضان كريم ياعماد
تحياتى
|
Post: #16
Title: Re: شعبٌ بجلدٍ تخينٍ .. و عرباتٍ إنتحارية !!
Author: خدر
Date: 09-02-2009, 08:43 PM
Parent: #15
ود التوم
ازهري بعشوم ده منو ؟
|
Post: #17
Title: Re: شعبٌ بجلدٍ تخينٍ .. و عرباتٍ إنتحارية !!
Author: Emad Abdulla
Date: 09-02-2009, 11:50 PM
Parent: #8
جايه وين يا دومة ؟؟
نحنا ناوين نجدعو ( كبير أخوانو ) ده ..
و نقعد من غير بلد و لا مصران غليظ و لا أيما شي من مسببات الحياة .. ( أو منغصاتها )
.....
واحد فيكم يجُر النور الطويل بالله .
|
Post: #20
Title: Re: شعبٌ بجلدٍ تخينٍ .. و عرباتٍ إنتحارية !!
Author: عمران حسن صالح
Date: 09-03-2009, 00:16 AM
Parent: #17
قريت مرة ..
وقريت تاني ..
وحسيت بالطمام (زاد) .. هو أصلاً (سكن) جوانــا ..
قال كمان مرات بنشاكل بني (يعرب ) ونقول هاكم شوفوا الصور دي ..
دي الدنيا ( التانية ) .. مش دنيتكم الجافة .. أخير الجفاف حقهم !!
باقي شنو ؟؟
كلو كِمِل !!
ما فضل شي !!!!
راح كلامنا للقمرة ..
وشليل ..
وشدت ..
وغير رزقكـ ما بتحوش إتكوم هناااااااكـ ... وصار كلو جري حتى في الخيران ..
عشان نحصل ..
نحصل شنو ؟؟
ما خلاص كِمِل ..
|
Post: #21
Title: Re: شعبٌ بجلدٍ تخينٍ .. و عرباتٍ إنتحارية !!
Author: tayseer alnworani
Date: 09-03-2009, 01:53 AM
Parent: #20
Quote: الظاهر كل ما يجري في هذه البقعة من الأرض به ضيقٌ يدفعه للإلقاء بنفسه إلى جحيمٍ آخر بغية التخلص من الجحيم الأولاني البقى ليهو في رقبتو .
تُرى إلى أين سترمي الحيكومة بنفسها حين تضيق بكم و بتُقُل دمكم و سردبتكم لكل أم دلدوم تلبعكم بيها , لغاية ما " المسكينة " حيلها إتهدّ ؟ ..
ماذا تفعل حيكومة في شعب جلدو تِخِن و بقى بس " أزهري بعشوم " ؟؟
.....
|
الاجابة الاجابة يا عمدة ما اصلوا انت عارف مفروض تتعمل فى الحتة دى خارطة طريق
تحلل للازمةوتحل المشكلة ولا ما اتحلت تتفرع منها خارطة طريق برضو ( ما دى اصلوموضة اليومين دى )
لينا الله وعيشة السوق والوقوع فى البحر كان بحل اها انا من دربى ده ماشة عليه ؟؟؟؟؟؟؟؟؟؟؟؟؟؟؟
عماد ازيك ياخى ورمضان كريم
عساك طيب انت والاسرة تحياتى للجميع
|
Post: #22
Title: Re: شعبٌ بجلدٍ تخينٍ .. و عرباتٍ إنتحارية !!
Author: Emad Abdulla
Date: 09-15-2009, 06:45 AM
Parent: #20
Quote: عشان نحصل ..
نحصل شنو ؟؟ |
مافي تحصيل شي يا عمران ..
في تحصيل حاصل ... ساقية جحا ، تشيل من البحر و تديهو .
أمسك في الله قوي .. بس .
.....
إزيك يا صاحب ..
جاييك قريب .
|
Post: #23
Title: Re: شعبٌ بجلدٍ تخينٍ .. و عرباتٍ إنتحارية !!
Author: اسعد الريفى
Date: 09-15-2009, 08:32 AM
Parent: #22
Quote: قبل قليل انتحر الهواء في الخرطوم .. فتمت الناقصة .
في شي قابض القلب يا قريبي ..
شنو هو ؟ الله أعلم . |
|
Post: #24
Title: Re: شعبٌ بجلدٍ تخينٍ .. و عرباتٍ إنتحارية !!
Author: حافظ حسن ابراهيم
Date: 09-15-2009, 08:56 AM
Parent: #23
عماد عبدالله والله ما عافي ليك دنيا لا أخرة ...
يا خي ما ممكن الدنيا قبايل عيد و نحن ناس علي باب السلطان .... يا ود الناس ما عندك أي حاجة في اليومين دي عن الزهور, حدائق بابل المعلقه, عدالة عمر (المهم عمر دا شوف ليهو ابو لصقو ليهو), ما ممكن تكتب عن الصبايا و العاهرات علي شاكلة فقد اشعلت لفافتها و تلكم التي تضحكي لجسدها العاري ... يا عمده يا خي ما عندك اي كلام زي دا ... شنو شابكنا عربات انتحرت و موية مافي و كمان يجي خواجة يقول لينا برج الفاتح دا ما بكانوا .....
عمده اقول ليك حاجة و الله دببرست بي و طلعت .... و خبرت نهاري الاساساً رمضان ما مقصر معاهو ....
اكتب هذا الالم الساخر و طلع بيهو جلدنا التخين دا
كل سنة و إنت طيب
|
Post: #25
Title: Re: شعبٌ بجلدٍ تخينٍ .. و عرباتٍ إنتحارية !!
Author: bushra suleiman
Date: 09-15-2009, 02:46 PM
Parent: #24
عماد يا خوى ..
انتحرو يرحمكم الله
(او كما قال شيخنا الكبير ابراهيم العبادى)
يا سايق الفيات .. عج بى وخد سندة
بالدرب التحت.. تجاه ربوع هنده
|
Post: #26
Title: Re: شعبٌ بجلدٍ تخينٍ .. و عرباتٍ إنتحارية !!
Author: الصادق اسماعيل
Date: 09-17-2009, 08:34 PM
Parent: #25
|
Post: #27
Title: Re: شعبٌ بجلدٍ تخينٍ .. و عرباتٍ إنتحارية !!
Author: Emad Abdulla
Date: 09-25-2009, 00:40 AM
Parent: #23
أسعد الجميل ..
عيد سعيد يا صديقي .
شكراً عبورك .
|
Post: #28
Title: Re: شعبٌ بجلدٍ تخينٍ .. و عرباتٍ إنتحارية !!
Author: Rihab Khalifa
Date: 09-25-2009, 04:51 AM
Parent: #27
كدي خليني من البلد، الشاحنة دي وجعتني، تلقاها كانت معيشه ليها كوم لحم، ليهم الله
كل سنة و انت طيب ياعماد, عيدية :)
--------------
باص السرور
لقيت قصيده هيئة حلمنتيش العليا
محبونا يا باص السرور
قدامو نور ووراهو نور
شاسيهو مليان بالرقع فوق الكسور
جابو الحجاب من شيخ فلان
فوق بابو راسمين الزهور
دخانو زي قطر البخار
والريحة زي صندل بخور
سواقو ما ولداً حريف
عشقلو بالترس الخفيف
خلاهو يتخطا الطيور
عفص الابنص خلا الغبار عامل جسور
دكاها شارات المرور
ركابو يوصلو بي عجل
مرات يوصلن القبور
لو مرّ ناحية ام غمد
قالو ام غمد فيها الكجور
عامل مزار
البص ده في بطنو بالع ناس حرم
في ضهرو شال سوسو ونزار
البص ده قام نصت نهار
سواقو دردم سفتو وختاها بالجنب اليسار
نادا المساعد ونهرّو
قال ليهو خليهو الكجار
باص السرور مسك الدرب
عادمو الكبير دفق الشرار
لمح العوين الأشرّن
رفس الفرامل وكبّسا
حلت فراملو وسخنت
طاساتو ولعت السيجار
بانجوسو ما بعرف الهظار
شوفوهو تلب بي عجل
رمالو الكتلة سوالو الدقار
الهزة قللت الوقار
رجالة قالت يا لطيف
وقتو الوقع رحل الخدار
واتبهدلو الناس الكبار
وتطاقشو وحضنو الصغار
خايفين مصايب الدنيا
قايلين الحرص بحمي الودار
باص السرور قام انزلق
وشتت الراكبنو في شارع المطار
|
Post: #29
Title: Re: شعبٌ بجلدٍ تخينٍ .. و عرباتٍ إنتحارية !!
Author: abubakr
Date: 09-25-2009, 08:22 AM
Parent: #28
يا قريبي .. انا افكر (تاكيدا لوجودي ) بانه لو لم يكن هنالك نيل ولا تيلات وعليه مافي جسورات اها العربات كانت حتنتحر كيف؟؟ تفتكر تضرب عن البنزين والجازوليين وتموت كمد خردة ساااي ...؟؟ هو الناس يتقطع كوبري ليه ما تعوم مالو القرب ما الواحد ينفخ وينفخ القربة ويربط جلابيتو ومركوبو في جمجمتو وبرتلب يقع في الموية وهو ماسك القربة المنفوخة ويعمل سمرسولت وبعداك ينجرف وينجرف الي الجرف ... ياااخ انتو بتاعيين مشاكل سااااي
|
|