Post: #1
Title: د. طراوة / د. القرشي .. عندي ليكم كنز .
Author: Emad Abdulla
Date: 10-01-2009, 06:33 AM
أساطين الفن و الشعر و الغناء ..
عرفت فيهم من عرفت .. و هم بعض الجالسين في الصف الأول :
- في الوسط - كخير الأمور - تبوأه الإمبراطور شيخنا الحاج محمد أحمد سرور ..
أنيقٌ كغناءه .. مشنقاً طربوشه مائلاً في أبهة و خيلاء .. و الموضة حينها في " الفول سوت ؛ و العصا المعقوفة شارة الوجاهة .
- عن يساره شيخ شيوخ شعراء البادية المحضرين : محمد عمر البنا .. البدوي الجميل في قفطان " شيخ العرب " .
- عن يسار شيخ البنا يجلس سيدي الخليل . حيياً نحيلاً نبيلاً هاديء السمت .. وقورا . بين جوانحه طير الشعر الأخضر يرف، يرف اللواء الوطني و أعشاقه الكبيرات التي شفه رهقها فطار بها سيداً .
- عن يمين سيدي الحاج سرور جلس عبدالرحمن الريح .. العاشق الجميل ، و الفاتح لكنوز الحداثة في ليركس الجملة الشعرية .
- عن يمين الريح جلس اللورد كرومة .. خجولاً يبدو .. تعتمل بينه و بينه اللحون المكنوزة ، تلك التي طار بها كون الغناء .. و بها تجنح و سما .
.....
أساتذتي الدكاترة طراوة و ود القرشي ..
دلوني على الشهب المذنبات الذين وقفوا في الصف الخلفي ..
و صححوني إن أخطأت فيمن ادعيت معرفة بهم من الأساطين الذين ما أزال على كنوزهم أتوكأ حين ترهقني المرهقات ..
فأسمع لهم و بها أشفي .
|
Post: #2
Title: Re: د. طراوة / د. القرشي .. عندي ليكم كنز .
Author: Ahmed al Qurashi
Date: 10-01-2009, 06:57 AM
Parent: #1
الرائع / عماد عبدالله
اشكرك كثيرا على هذه الصورة الوثيقة
انها كنز فعلا لا يقدر بثمن
تعرف الواقفين ديل بيكونوا الكورس
بس لو عرفنا الصورة دى اخدوها فى مصر ولا السودان
لو كانت فى مصر بنقدر بنعرف اسماء الكورس الرافقهم فى هذه الرحلة.
مودتى
|
Post: #3
Title: Re: د. طراوة / د. القرشي .. عندي ليكم كنز .
Author: haroon diyab
Date: 10-01-2009, 07:05 AM
Parent: #2
يمين يومك سلطنة عدييييييييييل ياعمدة
سلاطين الطرب مرة واحدة.......؟
ياخي براحة علينا .
ويااصحاب الشأن امسكوا في الصورة دي قوي .
عمدة
مشتاقين
|
Post: #22
Title: Re: د. طراوة / د. القرشي .. عندي ليكم كنز .
Author: Emad Abdulla
Date: 10-02-2009, 09:12 PM
Parent: #3
يا قريبي ..
في الطريق إلى دنقلا .. و البصات رحلاتها زمانئذٍ ضربٌ من العنت الجميل ..
كان أحدهم يغني , و كان " مساعداً " مهمته أن يرفع العفش و أن " يرمي الصاجات " .. و لم يكن الغناء من مهامه ..
كان يشجن غناءا في أعلى البص . انتهزت سانحة التوقف للزوادة من الماء و صعدت إلى أعلى البص فجاورته .. و لزمته .
ظل الرجل يغني .. و يغني . و يغني . و الله يا هارون ياخي تمنيت على المنى أن لا يكف .. و أن لا نصل أبدا .
هو الغناء يا ابن خالتي .. الغناء . يبل العروق و يذهب الظمأ سئيلي الله .. و إلا فما هذا :
( مسوا نوركم و شوفوا المن جبنيا صباح
و الصباح إن لاح لافائدة في المصباح
هل أتاك حديث الكوكب النضاح
قمره تمطر خمره وحارسها الفضاح
أو تحيجنا محاسن الشمس للإيضاح
مابتحيجنا محاسن محيها الوضاح
نور جمالها دهشنا معشر الفصاح
بين ناطق صامت وبين صامت صاح
غانية غانية محاسن فيها شوف ياصاح
الجمال الفيها كل معناه صاح
تنظر الآيات من نور على ألواح
المعاني الخرد ومنية الأرواح
في العيون المرضن الشحر لاواح
يجذب الألباب و يفرح النواح
القوام اللادن و الأريج الفاح
من جسيمها الناعم الأثمر التفاح
خلى عقلي وخلى في حشايَ كفاح
جيش هواها أحتل قلعة الأصفاح
روضة غنا جمالها يجلب الأفراح
وحورها من الجنة فيها تسقيك راح
كل هذا تراه مابيزيل أتراح
من بحبو تهالك أستراح وراح
يسألوني أحبابي ماشفيتي جراح
بل شقيتي فؤادي بمدية الجراح
صرت أتلو حديثك في الوجود بصراح
لوتليتبو كتابي سُميت بالشراح
فيك نظرنا مناظر يعلما الفتاح
لوقفلنا قلوبنا كان لهن مفتاح
أدرى أو لم أدري صرت كالملتاح
لورضاك هلاكي أنا للهلاك أرتاح
ماجنيت في هواكَ وماعلي جُناح
أشتكيت للقمري ولم يعيرني جناح
يكفيك لساني الغنى ليك وليك كم ناح
لورثيتبو حياتي ماإحتجت لي مناح )
......
في ذمتك يا هارون ..
ده كلام ده ؟؟!!!!
|
Post: #6
Title: Re: د. طراوة / د. القرشي .. عندي ليكم كنز .
Author: Ahmed al Qurashi
Date: 10-01-2009, 07:31 AM
Parent: #2
تعرف يا عماد الجالسين ديل ركائز الفن في السودان وكلهم ملحنين ومغنيين فعمر البنا قبل أن يكون شاعرا كان مغنيا ولقد صدح بأول أغنية لأبى صلاح وهى
طال سهادي وكان نومي هادى....ادعيه ولا تسرفي
كما سجل عدة اغانى لأبى صلاح بصوته مثل
ما الحواري الظهرت جديدة ....حافله بين القمر المنير
ولقد سجلها عمر البنا لشركة اوديون بمصر سنة 1929ولقد رافقه في الكورس محمد الأمين بادي وعلى الشايقى والتوم عبدالجليل ... كما سجل أيضا لأبى صلاح أغنية وصف الخنتيلة ومن قليبو الجافي والنسيم المار بالخميلة واغانى كثيرة أخرى ،
ولقد تغنى أيضا في بداية الستينات بأغنية في الليل الهاجع في برنامج حقيبة الفن والذي كان يقدمه في ذلك الوقت المبارك إبراهيم وكان معه في الكورس الفنان احمد يوسف.
و تغنى عمر البنا بأغنية في الطيف أو في الصحيان في برنامج دنيا دنبقا والذي كان يقدمه الأستاذ محمد سليمان في نهاية السبعينات .
ولقد قام بتلحين بعض الاغانى لشعراء آخرين مثل مرضان باكي فاقد لمحمد عثمان بدري والتي سجلها الفنان الأمين برهان .
|
Post: #4
Title: Re: د. طراوة / د. القرشي .. عندي ليكم كنز .
Author: Emad Abdulla
Date: 10-01-2009, 07:06 AM
Parent: #1
لم يسبق أن رأيت صورة توثق لاجتماع هذه الكوكبة كلها ..
فوجئت بالصورة ..
أظنها في إحدي رحلاتهم الفنية لمصر ..
قلت شارداً : لو أن شيئا شيناً حدث ذلك اليوم و تلك الساعة .. في ذاك المكان و بهذا الجمع ..
لو أن حادثة من الحادثات ألمت بهؤلاء الجبال .. ماذا كنا صنعين الآن ؟
كنا ح نكون طرزانات لو حصل بس و هم طالعين خمشهم ترماي مثلاً .. !!!
ماذا كان متبقي للفن الغنائي السوداني لو أن المبنى الذي أخذت فيه هذه الصورة تعرض - مثلاً - للإنهيار !!
.....
الحمد لله .
|
Post: #5
Title: Re: د. طراوة / د. القرشي .. عندي ليكم كنز .
Author: هواري نمر
Date: 10-01-2009, 07:19 AM
Parent: #4
الحمد لله يا عمــــــــاد, انك زاتك لميت في الصورة دي..
ياخي التوثيق ده مهم خلاص...
ازيك ياخي و عيدك سعيد
|
Post: #7
Title: Re: د. طراوة / د. القرشي .. عندي ليكم كنز .
Author: Ahmed al Qurashi
Date: 10-01-2009, 07:46 AM
Parent: #5
أما عبدالرحمن الريح فهو مدرسة قائمة بذاتها ، وله تسجيلات بصوته في بعض البرامج الإذاعية ، وأول أغنية له هي أغنية ما رأيت في الكون يا حبيبي أجمل منك والتي سجلها على الاسطوانات الفنان الفاضل احمد وأيضا من أوائل الاغانى التي صدح بها أولاد المأمون .
عبدالرحمن الريح لحن لكرومه أغنية في رونق الصبح البديع وهى من كلمات الشاعر محمد بشير عتيق وأيضا لحن أغنية من بعيد لبعيد لعتيق أيضا والتي تغنى بها الفنان عوض الجاك ، بالإضافة إلى أغانيه والتي لحنها بنفسه عدا بعض الاغانى للفنان التاج مصطفى والتي لحنها التاج بنفسه .
|
Post: #8
Title: Re: د. طراوة / د. القرشي .. عندي ليكم كنز .
Author: سارة علي
Date: 10-01-2009, 08:11 AM
Parent: #7
جلوس من اليمين: الفنان خليل فرح- الشاعر ابراهيم العبادى -الفنان محمد احمد سرور - الفنان الامين برهان - الفنان كرومة.
وقوف من اليمين: داؤود (متعهد اسطوانات سرور) - سيد فرح - سامى و شريف على نصرى - الدرديرى احمد اسماعيل - ادريس عبد الحى
ـــــــــــــــــــــ
عمدة..الحساب يوم الحساب..
وربنا يخلي لي عمك قوقل
|
Post: #10
Title: Re: د. طراوة / د. القرشي .. عندي ليكم كنز .
Author: صديق الموج
Date: 10-01-2009, 09:18 AM
Parent: #9
عماد يافقر ..سلام
بس كلام سارة على ده الصاح
تكون عاصرتهم ياربى البت دى؟؟
لانو اليمين سرور برهان والبى شماله العبادى
عبد الرحمن الريح صغير شوية،،
لكن ياعماد بالله لوعشنا زمنهم واتوكلنا ما كان اخير
من الادقاع الغنائى ده
قال اشتقت ليك يامنقه اشتقت لى صفقك ياباغة العسل ال الله فينى دفقك
وراوراوراوراوراوراوراوراورا
فعلا ورا لما نصل كـ........... اماتنا زاتو،،،
|
Post: #11
Title: Re: د. طراوة / د. القرشي .. عندي ليكم كنز .
Author: سارة علي
Date: 10-01-2009, 09:26 AM
Parent: #10
| Quote: تكون عاصرتهم ياربى البت دى؟؟ |
طيب اوزن جملتك..
الصحيح
تكون عاصرتهم(الحجة) دي..
وللاجابة علي هذا السؤال اقول..
اااااي بالامارة اني من كنتا من بنات امدرمان الالفوا فيهم قصيدة..
اقصد قصائد
|
Post: #12
Title: Re: د. طراوة / د. القرشي .. عندي ليكم كنز .
Author: محمد مكى محمد
Date: 10-01-2009, 10:07 AM
Parent: #11
ياسلام على الجمال ياعمده..شكرا للجميع
..........
أدو ماضى أبوالعزائم لكزه..الصورة دى بكون عاوزها للبوست بتاعو..
|
Post: #25
Title: Re: د. طراوة / د. القرشي .. عندي ليكم كنز .
Author: Emad Abdulla
Date: 10-02-2009, 09:27 PM
Parent: #12
الله عليك إنت يا سعادتك ..
عارفك بيجهجهك السمح ..
دحين أدخل معانا في زمرة المجهجهين القابضين على بقية سماحة في هذه الأمة .. خلوها لينا الناس الجميلين ديل .
.....
مودتي يا ود المكي
|
Post: #24
Title: Re: د. طراوة / د. القرشي .. عندي ليكم كنز .
Author: Emad Abdulla
Date: 10-02-2009, 09:24 PM
Parent: #8
سارة علي !!
ما خاتي عليك صديق الموج ..
هسه ده كلام ده ؟ راجل كبير زيي أفتى و اشتحل و بستش و قال ديل فلان و فلان ..
تقومي تطلعيني بيش ؟
......
شكرا ياخي على معلومتك الملطوشة و صاح .
بالله في الليل ده برااااااااااك كده أقعدي اسمعي ليك غنا ماكن من صنيعة واحد من الناس الفوق ديل ..
ثم بعد داك أرجي الراجيك ..
شجن كده و حنين حنين و إمتلاء بشنو ما مفهوم , و بتعرفي الله واحد .
تسلمي يا سارة .
|
Post: #23
Title: Re: د. طراوة / د. القرشي .. عندي ليكم كنز .
Author: Emad Abdulla
Date: 10-02-2009, 09:14 PM
Parent: #5
يسعد مساك يا هواري ..
نشوة يا صاحبي ..
و كأنني ملكت المجد .
يديك العافية يا هواري .. و يسعدك .
|
Post: #20
Title: Re: د. طراوة / د. القرشي .. عندي ليكم كنز .
Author: Emad Abdulla
Date: 10-02-2009, 08:52 PM
Parent: #4
الجميل أخانا و أستاذنا ود القرشي ..
يديك العافية .
ما يزال بي الطرب , منذ تحصلي على الصورة الكنز و أنا أباري سيرة هؤلاء السحرة ..
ما نهلت من معين بديع انتاجهم إلا و استزدت فطرت طربا .
محبتي يا سيدي ود القرشي .
|
Post: #13
Title: Re: د. طراوة / د. القرشي .. عندي ليكم كنز .
Author: Emad Abdulla
Date: 10-01-2009, 07:57 PM
Parent: #1
|
Post: #14
Title: Re: د. طراوة / د. القرشي .. عندي ليكم كنز .
Author: سارة علي
Date: 10-02-2009, 07:22 AM
Parent: #13
|
Post: #15
Title: Re: د. طراوة / د. القرشي .. عندي ليكم كنز .
Author: عبدالحليم حامد النعيم
Date: 10-02-2009, 08:41 AM
Parent: #14
شــي بديع والله .. الله يديك العافية يا عماد ..
بالمناسبة بفتش للبوست حقك النزلت فيهو اغنية للفنان احمد الجابري بصوت عاصم البنا .. يا ريت لو بس نزلت لي الرابط اكون شاكر ليك يا عمدة
أكيد المودة
|
Post: #16
Title: Re: د. طراوة / د. القرشي .. عندي ليكم كنز .
Author: soma
Date: 10-02-2009, 08:58 AM
Parent: #15
الاخ الجميل عماد عبد الله
صباحاتك ندية ولمة جبنة بكرية فى ضل الضحى
اكثر ما عجبنى فى صورتك العتيقة المعتقة بى روح مبدعننا الزمان لهم الرحمه جميعا
هو الهندام والدقة والنظام
فى زمن بعيد جدا
والناس ماشةالى الامام ونحن فى النظام متدحرجين بسرعة الصاروخ للخلف( للاسف)
يا ريتنا بس لو قلدنا زى ناس ديل
قمة فى الاناقة والهندمة المرتبة
تسلم يا ود القبائل
اهديك ندى الحقول
متاوقة**
الصورة دى وزيها كتير كان تكون نموذج فى بوست اخونا الجميل ابو بكر
بوست المظهر العام .. عشان جيل اليوم يرى بام عينه جيل ما قبل الامس
ويتأمل فى جدودنا زمان الوصونا على الوطن
لكم التحية جميعا
وجمعة مباركة ان شاء الله
اسماء الجنيد/ مسقط
|
Post: #17
Title: Re: د. طراوة / د. القرشي .. عندي ليكم كنز .
Author: محمد سنى دفع الله
Date: 10-02-2009, 09:13 AM
Parent: #16
عماد
يديك العافية
يخيل لي كرومة واقف في السف الخلفي او مافي خالص
|
Post: #18
Title: Re: د. طراوة / د. القرشي .. عندي ليكم كنز .
Author: Abdul Monim Khaleefa
Date: 10-02-2009, 02:29 PM
Parent: #17
الأخ الأستاذ عماد
لك التحية والمودة والتقدير .. الشكر الجزيل على هذا الكنز الحقيقي.. كما أشكر الابنة سارة بتكملة التوثيق بإيراد أسماء من ضمتهم الصورة.. | Quote: وقوف من اليمين: داؤود (متعهد اسطوانات سرور) - سيد فرح - سامى و شريف على نصرى - الدرديرى احمد اسماعيل - ادريس عبد الحى |
أرجو أن تسمح لي الابنة سارة بتصحيح بسيط فيما يتعلق بمن حسبته(للشبه) الأستاذ الدرديري أحمد إسماعيل..فقد تأكدت من مصادر أسرية أنه ليس الأستاذ الدرديري ..فيما يلي صورة الأستاذ(عام 1934م)
url=http://www.imagehosting.com/] [/url]
مقارنة بمن هو في الصورة (الكنز!)
محبتي
عبد المنعم خليفة
|
Post: #27
Title: Re: د. طراوة / د. القرشي .. عندي ليكم كنز .
Author: Emad Abdulla
Date: 10-02-2009, 09:38 PM
Parent: #17
كبيرنا الذي علمنا السحر .. يا السني .
كيفنك ياخي .. يعلم الله مشتاقك .
دي صورة لكرومة برضو .. قارن الشبه .
بعدين ياخي كيفن سيد سادة اللحن و عبقريه يقيف ورا ؟؟؟
لو في مقام قدام القدام مفروض ما يكون إلا للورد كرومة ..
السلطان و الإمبراطور و الفاتح لمغاليق النغم و المجدد فيه و الرائد و سيد الشي .
......
تجي الخرطوم و تمشي يا سني و لا نعرف و لا تقول بغم ؟
سمح .. كتر خيرك .
|
Post: #26
Title: Re: د. طراوة / د. القرشي .. عندي ليكم كنز .
Author: Emad Abdulla
Date: 10-02-2009, 09:30 PM
Parent: #15
يعافيك يا حليم ياخي ..
و يمسيك بالخير يارب .
بفتش ليك النصيبة السمحة حقت الجابري ..
اها كمان الجابري داك كوم براهو .. !!!
ياخي قدر ما تتزاوغ من تشة الروح حقت الناس ديل تلقاهم ساكنك ساكنك .
شاكر ليك يا زول يا سمح .
مودتي
|
Post: #19
Title: Re: د. طراوة / د. القرشي .. عندي ليكم كنز .
Author: Azhari Nurelhuda
Date: 10-02-2009, 05:21 PM
Parent: #1
Quote:
- عن يمين الريح جلس اللورد كرومة .. خجولاً يبدو .. تعتمل بينه و بينه اللحون المكنوزة ، تلك التي طار بها كون الغناء .. و بها تجنح و سما .
|
لله درك يا فتى
و الله في هذه صدقت حتى بانت أنيابك بيضاء صافية و لامعة...
ياعمدة....
|
Post: #21
Title: Re: د. طراوة / د. القرشي .. عندي ليكم كنز .
Author: haroon diyab
Date: 10-02-2009, 09:04 PM
Parent: #19
ياعمده....
قلنا نصغر الصورة
عشان البوست خستك
|
Post: #28
Title: Re: د. طراوة / د. القرشي .. عندي ليكم كنز .
Author: محمد أبوالعزائم أبوالريش
Date: 10-02-2009, 10:24 PM
Parent: #21
يمين الله الصورة دي يا تديني الإذن ... يا لاطشها ...
في بوست بي هناك (أعلام وصور نادرة) .. معني بالتوثيق ... حتلقى صورتك دي (ملطوشة) بي هناك.
ياخ دي صورة تجيب الوحي.
حولاااااااا
|
Post: #29
Title: Re: د. طراوة / د. القرشي .. عندي ليكم كنز .
Author: أحمد طراوه
Date: 10-03-2009, 03:07 AM
Parent: #28
.. با عماد :
اخوك يا سرور القالوا عُذر .. و اقبلوا (رُجيزة) تشيق و تسُر
لم ارى هذا البوست الأثير إلا الحين .. فجئتك متاخرا .. جية ود الرضى لسرور يوم عودته من الحج
الصورة جرت احداثها بمصر .. واكيد قبل وفاة الخليل (غالبا اخذت في 1930)
الواقفين :
عمر البنا بوسط الصورة خاتي ايدو في كتف سرور ، البنا بخياله الواسع المستمد من حقيقة ان البطانة قشها بلاقى
حيث يقول حين هجد الآنام وضربته لواعج الوحدة و جفاء المحبوب :
إنت نايم وانا ألم البعاد صحاني .. حِن علي جفاك و الله كاد يمحاني ( Total Abolishment )
مثلت اغنية (زيدني في هجراني) ذلك اللقاء الرسمي الاول للبنا مع كرومة .. لحظة إنتقال الشعر و نهضة أيقاع النقرزان الخفيف الجديد
و جنين (إستنزات مزيكا السودان) و كسرة ليالي الطرب الامدرماني التى مهدت لاحقا لكسرة الكاشف .. او قل، كما تحولت الكسرة لاغنية كاملة
علي يد الذري /ابراهيم عوض عبد المجيد(جنني و غير حالي)
الواقفين:
جناح الصورة شمال القارىء : هو عبد المنعم عبد الحي ( الضابط السوداني بجيش دولة الكوندمنيوم - المصري) عبقري الليرك الجديد فيما بعد
مدرسة كرومة : أنيس حسن عطية .. و نديم ابو داؤد .. بالله يا اهل الهوى .. وصولا" الى خمريات سفآي توتي المعانق ليالي القمر .. نهدي الحبايب
كاس كاسين .. ونسقي حورا .. رملتنا بيضا بين نيلين يلاك نزورا
او كما قال في فلسفة الغناء و الوجود : حبيبي الدنيا يوم بتروح .. لا بدوم لا فرح لانوح .. خلاص ما تنسى و انا انسى (بالله شغلوها يا محسنين لتمنح
بوست عماد هذا رونقا و جمالا و بعدا ثالثا بل قل خامسا و عاشرا .. إذ يغني الشفيع وكل يبكي ليلاه )
بعض من الواقفين فيما بعد الشخص الاول يمين اقارىء هم : شريف ود علي ود نصر و اخوانه .. وهم من اهل
السودان ممن عرفوا مصر و خبروها مبكرا" ، و إمتهنوا صياغة الذهب
و تجارته و إهتموا بحركة الفن و الغنا و تركوا اثر العُشرة و المودة بينا" في دواخل الخليل فقال عنهم في إحدى أراجيزه واصفا حسناء سودانية فارعة زارت مصر:
يا جنا .. يا جميل يا عود القنا
يا جدية وادي النصر .. مين هداك و جابك مصر
زي دهب داقينوا صُر .. دق شريف ود على ود نصُر
يضرب سرور مزيكا .. يا الامين الله يجزيكا (كما جاء في سفر التكوين الغنائي الاول .. ببكي وانوح و أصيّح )
كان سرور و الامين برهان و كرومة بمثابة مثلث برامودا السوداني عند مدخل تلك الثلاثينات
وذلك بعد تراجع نجم عبد العزيز المأمون لاسباب غير واضحة حتى الآن ! (وهو الشقيق الاكبر لميرغني المامون)
مودتي للجميع .. وتقديري الجم للأخت الكريمة التي نقشت برهان و وضعت شيخنا العبادي بين سرور و الخليل
|
Post: #30
Title: Re: د. طراوة / د. القرشي .. عندي ليكم كنز .
Author: Hamid Elsawi
Date: 10-03-2009, 05:35 AM
Parent: #29
شكراً يا عماد علي هذه الصورة الكنز
Quote: يا جنا .. يا جميل يا عود القنا
يا جدية وادي النصر .. مين هداك و جابك مصر
زي دهب داقينوا صُر .. دق شريف ود على ود نصُر |
هذه الابيات سمعتها من عزيزنا معاوية الوكيل عندما كنت
طالباً بالاسكندرية و ارددها احياناً و كل ما اعرفه انها الخليل
كتبها في شابة قابلها في مصر و ما زالت بعض مفرداتها عصية الفهم
و تحتاج الي شرح
يا جدية وادي الكراد
كدي ابسمي و ضاحكي البراد
في لِماك الوارد ورد ... الخ.
لم اكن اتخيل في حياتي انني سوف اشاهد صورة شريف ود علي ود نصر
ما أروع أن نبحث و ندرس تراثنا و نناقشه و نحلله بوعي و ادراك
شكراً مرة اخري لعماد و ضيوفه الكرام في هذا البوست الرائع
|
|
