Post: #1 Title: إله فني .. يااااااا أحمد ربشة , ثم .. ( غفر الله لمحمد عثمان ) Author: Emad Abdulla Date: 07-06-2008, 10:29 PM Parent: #0
سألت : البغني ده منو ؟ البنت التي لم تستبن ملامح الملحمة ( أحمد ربشة ) سألت !!! البغني ده منو ؟
ما أرضخ سمعها " نقنقة " العود عنده و تنهداته . و كيف استباحت أنامله سطوة العود و جبروته .. فاستكانت له أوتاره و غنجت و ارتخت .. فتحكّر . لا و لا صوته السلطان يفرض أحكامه على الخلجات فتسكن و تطمئن فتهدأ و تسترخي .. ذاك ما بلغها و لا له التفتت .. البنت التي لم تستبن ملامح الملحمة ( أحمد ربشة ) سألت ببساطة .. : البغني ده منو ؟ لم أتفاجأ .. مستغرقٌ كنت في عالم الولد الذي هبش جيلاً و غادر .. فغفرتُ لها .. الولد الذي جاءنا فسراع .. و فسراع مضى .. هكذا . و كنتُ ما سمعت " ربشة " منذ سنين , و أعرفني في ذاك عاصيٍ أنا و عاق و مذنب .. فقد صاحب " ربشة " جيلنا كله واحداً واحدا , و شاركناه أحلامنا و فتوة صخبنا و بعض أسرار همسنا بها في أذن الزمان .
ما الذي يجعل ربشة يغني للمغنيين غناءهم فينسخه لجبروت صوته .. و عليه يرفع شارات الإستعمار ؟؟ أزعم أني أستصحب الغناء حلّما كنتُ و حالما صرت لحال .. و أنك يا أيها الغناء السوداني ملجأي و ملاذي و الترياق في الزمن السفيه .. و أن أساطينه سادتي .. من أول " علي الشايقي " عبورا بالطنبارة و المطاليق في البوادي و الحواضر و تحت إبلهم في بطانة كنانة و فوق شبرياتهم في السهل الكردفاني , لحتى حنين المادحين تحت البركل و فوق أفواف النخل , و إلى عند مناحات ألبل البجا و خوارات تيران البالينبو و أوركسترا الواظا . و بعد .. لحتى سادتي الكرام : أبوداوود و وردي و الشفيع و العاقب و صالح الضي و صلاح محمد عيسى و التاج مصطفى و عبدالحميد يوسف و سيد خليفة و الجابري و اولاد المامون و سرور و أولاد حاج الماحي و صديق أحمد حمدون و أحمد المصطفى و حامد العربي و حسن عطية و محمد الأمين و أولاد الموردة و كرومة و الحاج سرور و زنقار و رمضان حسن و ود المقرن و عبدالمنعم حسيب و عبد القادر سالم و موسى أبا و محمد كرم الله و عثمان حسين و عركي و زيدان و عثمان مصطفى و ود البنا و النعام و بلاص و الخليل و أحمد الطيب و خليل إسماعين و أم بلينه و عاشة و منى الخير و العبادية و فاطنة و عوض الجاك و بادي و إسحق كرم الله و صديق و الشيخ عوض عمر و و و و .. لكن " ربشة " غير .
( خذوا دنياكمو هذي .. فدنياواتنا كُثرُ ) .. يترقرق بها صوت ربشة مقصياً كابلي برفق .. و شاهراً صولجانه في وجهنا : نحنُ الرعية السميعة العطشى لشربة نظمأ بعدها - نظل - أبدا .. يفعل " ربشة " ذلك و كابلي هو كابلي الكبير الجميل .. ثم يزحف " ربشة " بجحافل حنجرته إلى حبيبي عثمان الشفيع .. - الشفيع الذي تعلمنا البكاء على أغنياته كلما خميسنا أوغل في الليل و أمرنا تهدل تماسكه و انفرط - ( إلا فيك إنت شفت كل جديد .. عجز الوحيُ أن يفيك و يشيد ) .. و لا يرحم أغنية يتبتبها بصوته إلا انقادت و سلُست و انعجنت له محلباً يدلك به خاطر ليالينا زمانئذٍ .. فنتجمل .
" ربشة " بصم على الغنا و .. مشى .. من أول " الهادي الجبل " لي عند " عامر الجوهري " و " محمود عبدالعزيز " .. تداعى مُعلماً و مدرسة و كون من نغم .. فتربع على زائقة المغنين و حنجراتهم .. و سطا على الآذان فضمها لملكوت مزامير صوته فاحش الجمال .
ثم تقول البنت الجميلة التي ما عرفت " ربشة " : البغني ده منو ؟؟ أعضيك يعني وللا أعمل شنو ؟؟
..... كنت و البنت الجميلة التي لم تستبن ملامح الملحمة ( أحمد ربشة ) .. كنا نقرأ , و نسمع و نشم و نلمس و نتذوق :
غفر الله لهند .. و شكر .. و يا ليت الله يغفر لأخونا محمد عثمان ما فعل بي صوت ربشة الذي شتله في ذاك البوست .. و إنّا له لشاكرون .
Post: #2 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: محمد عثمان Date: 07-06-2008, 10:37 PM Parent: #1
عماد..
خلااص ننقل الاغنية هنا ايضا...
يديك العاافية..
ــــــــــــــــــ
Post: #5 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: Emad Abdulla Date: 07-06-2008, 10:53 PM
يا محمد .. وكت ضبحتنا زي ده .. أحسن السلخ كمان .. و أدينا اللينك .. أصلها خربانة .. خلينا نقعد نصاقر الغنا و الكلام البيجيب زمة السدُر ده .. لامن صاحب الوداعة ياخد وداعتو ..
غايتو .. كان الله غفر ليك عمايلك دي .. ما نحن غافرون يا محمد .
...... ثم أمانة عليك قدر ما عندك غنا لربشة .. تدلقو لينا هنا .. سبيل و صدقة جارية لله و الرسول .
Post: #6 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: محمد سنى دفع الله Date: 07-06-2008, 10:56 PM
في بنسيون وسط الخرطوم كان يسكن ربشة جانا ربشة يحمل معه احلامه وعود حينما يعزف عليه يتناثر السحر من اوتاره .. ثلاثتنا نعبر الكبري الى امدرمان انا وموسى الأمير وربشة نرحل الى منزل عمر الشاعر علمنا كيف نعمل الرز على الطريقة الحضرمية ولونه أصفر وبعد الغدا الصومالي وسوداني نغني يتبادلوا وجداننا عمر الشاعر وربشة .. ونحلق في فضاء النغم كان عاشقا للعناء السوداني يعزف بيده اليسرى فيميل الكون على يمناه ويسترخي ويتمدد في مملكة الصحو والوعي الشفيف سافرنا الى مدني دخل بيتنا كأنه تربى بيننا كانه ولد هنا وعاد من رحلة طويلة كان لايعرف سوى الونسة والضحك والغناء الذي لايتوقف .. يغني فتزهر الأماني فينا . حينما غادرنا الى الخليج اسمعهم أجمل الألحان وترك بصمته هناك ورحل الى عالم الأطياف مالك علينا يا عماد اه واه لك الرحمة يا ربشة والخلود بين يدي ملك رحمن رجيم
Post: #12 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: Emad Abdulla Date: 07-06-2008, 11:22 PM Parent: #6
Quote: في بنسيون وسط الخرطوم كان يسكن ربشة جانا ربشة يحمل معه احلامه وعود حينما يعزف عليه يتناثر السحر من اوتاره .. ثلاثتنا نعبر الكبري الى امدرمان انا وموسى الأمير وربشة نرحل الى منزل عمر الشاعر علمنا كيف نعمل الرز على الطريقة الحضرمية ولونه أصفر وبعد الغدا الصومالي وسوداني نغني يتبادلوا وجداننا عمر الشاعر وربشة .. ونحلق في فضاء النغم كان عاشقا للعناء السوداني يعزف بيده اليسرى فيميل الكون على يمناه ويسترخي ويتمدد في مملكة الصحو والوعي الشفيف سافرنا الى مدني دخل بيتنا كأنه تربى بيننا كانه ولد هنا وعاد من رحلة طويلة كان لايعرف سوى الونسة والضحك والغناء الذي لايتوقف .. يغني فتزهر الأماني فينا . حينما غادرنا الى الخليج اسمعهم أجمل الألحان وترك بصمته هناك ورحل الى عالم الأطياف
كبيرنا و شيخنا و معلمنا .. يا السني ما تقيف .. احكي و احكي .. يمكن ربك يرد علينا نعمة العافية في الوفاء الجميل . زعلان يا السني على ربشة الإتنسى .
يا صاحبي يا خازن الجمال .. أحكي يا السني .. عن ربشة و الدوش و سعاد .. عن القبايل المجنونة من الناس الشالت هم أرواحنا و غطست في بحر النسيان الغبي . بلد مجحفة زي بلدنا دي .. مافي .. المبدع فيها لسه صعلوق و صايع و تمامة عدد ساكت .. حتى لو ثبت العكس . ( مهما قالوا غير كده في البيانات السخيفة و متون النعي و الإحتسابات الجوفاء ) . كل مبدع في البلد دي رايح شمار في مرقة .. خلينا ننادي الغابو يا السني .. و مرقو بي غبينتهم و الحلق المر .. و نطيب خاطرهم .. كان قدرنا .
Post: #3 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: عصام علي أحمد Date: 07-06-2008, 10:44 PM Parent: #1
ياعمده ربشه ده حكاية طويلة عندما يغني يأخذك الى عوالم بعيده تستمع اليه فيأخذك سلطانه ويأثرك هو ملك زمانه وحواء رفضت بعده ...........
له التجله اينما كان
Post: #8 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: Emad Abdulla Date: 07-06-2008, 11:05 PM Parent: #3
Quote: عندما يغني يأخذك الى عوالم بعيده تستمع اليه فيأخذك سلطانه ويأثرك هو ملك زمانه وحواء رفضت بعده ...........
الله عليك يا عصام .. أنا من أمبارح مؤدبني صوت هذا الربشة أدب المدايح .. ألف ألف .. و أرجع أسمع .. و ماسكاني أم هلا هلا .
..... محمد عثمان ده زول مُضِر .. فاجتنبوه .. و أحبوه .
Post: #4 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: هاشم أحمد خلف الله Date: 07-06-2008, 10:49 PM Parent: #1
عمدة الفنان الشامل الكامل تحايا من الأعماق يا زول يا رائع وتقبل سلام اخونا ( مزمل ود الصول ) من جماعتكم الزمان وقال لي عماد ده زول ما عادي وفعلاً يا عمدة انت ابو الفن والأدب لكن هو بقصد شنو انا ما عارف
Post: #7 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: نادر الفضلى Date: 07-06-2008, 11:03 PM Parent: #4
رحم الله عثمان الشفيع ومحمد عوض الكريم القرشى ورحم الله أحمد ربشى وهو ينتقى من عيون الغناء السودانى كلمات ولحنا وأداء لأبرع المطربين وإن كان من الصعب التفوق على الشفيع .. ولكن يكفى أدائه الجيد للأغنية .. فأطرب ولم يقلل من روعتها
لكم التحية والتقدير .. هند محمد وعماد عبد الله ومحمد عثمان لنثركم هذا الإبداع على مسامعنا
Post: #14 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: Emad Abdulla Date: 07-06-2008, 11:41 PM Parent: #7
مساك حلو يا نادر ..
ليس ثم من يتفوق على الشفيع إلا الشفيع نفسه .. " ربشة " يتسلطن حين يغني للشفيع و غيره .. و لا يقلد .. لكنه يطبع خاتم سلطانه بين عيني الغنوة .. فتنقاد له و تعطيه من كنوزها .. و الكسبانين نحنا ..
رحم الله ربشة .. و الشفيع و القرشي .. جملونا فأحسنوا .. و فاتوا خلوها .
شكراً لكلماتك يا نادر .. يدك العافية .
Post: #13 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: Emad Abdulla Date: 07-06-2008, 11:32 PM Parent: #4
يعني الليلة ما معدية على خير يا هاشم .
هاشم الزول الرقيق الجميل .. ياخي مالك علي ؟؟ مزمل ود الصول عديل كده ؟ إنا لله .. الكائن المنقرض من فرط الجمال ده جبتو من وين ؟؟ أكتر من كم و تلاتين سنة ما رأيت صاحب الطفولة و الصبا الجميل ده .. مزمل الدون جوان .. و الضحاك و اللذيذ ؟؟ ياخي ليك و ليهو و للصحاب البعاد كلهم محبة كبيرة .. و قول لي ود الصول ( اللقمة ) الختفتها من يدي ديك .. اللقمة السمحة بت اللزينا ديك .. ما تنفعك . و خليهو يسمع ربشة ده .. كان الله يغفر ليهو ..
شاكر ليك يا هاشم و لحضورك الحلو في حضرة ربشة .
مودتي .
Post: #9 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: Moawia Mohammed Date: 07-06-2008, 11:13 PM Parent: #1
بدري من عمرك انت لسه شباب
القيثار الراحل يشدو في نادي أبوللو ( الخرطوم )
Post: #16 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: Emad Abdulla Date: 07-06-2008, 11:48 PM Parent: #9
الله عليك يا معاوية ..
Quote: القيثار الراحل يشدو في نادي أبوللو ( الخرطوم )
ربشة كان القاسم المشترك و سيد ليالي الخرطوم .. و كانت الناس تسمعه متأدبة كأنها تصلي .. و قد كان عبقرياً في جعل الناس تستمع و تستغرق في الغناء حتى النشوة .. و ما كان يغني إلا ما يوجع و يهبش و ينقي و يسمو بسامعه .
رحم الله الزمان الذي أطلع ربشة .. و الرحمة على روحه في علياءها .
تحياتي يا معاوية
Post: #10 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: عصام علي أحمد Date: 07-06-2008, 11:15 PM Parent: #1
قاتلك الله يا محمد عثمان
Post: #11 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: ahmed babikir Date: 07-06-2008, 11:21 PM Parent: #10
والله يا جماعة لو عملتو ليهو مكتبه اغاني في سودانيز اون لاين ينوبكم ثواب فينا غفر الله لك يا محمد عثمان!
Post: #15 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: Osama Mohammed Date: 07-06-2008, 11:46 PM Parent: #1
عماد عبدالله .... كيف تناجي الكلمات هكذا وتجعلها تتطوع ..... وترسم لنا لوحة الأدب والفن .... كيف تتغلغل إلى الدواخل برسمك على الكيبورد .... تفجر كلماتك روعة وأناقة .........
لك الود...
أما محمد عثمان محمد عثمان ... الفنان يداوي الروح ...ويزيدها جنان .... بجميل الفن ... الكان... بلم الناس حول السودان .... و..........هنا أم درمان ....
محمد عثمان لن أقول إلا .... ربنا يوفقك ... ( والله دعوة من بيت الكلاوي )
اسامة - منتظرينك يا باشمهندس بي هناك لشوية جاز سوداني)
Post: #17 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: Rawia Date: 07-07-2008, 02:31 AM Parent: #15
Post: #18 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: ريهان الريح الشاذلي Date: 07-07-2008, 10:08 AM Parent: #17
Quote: سألت : البغني ده منو ؟ البنت التي لم تستبن ملامح الملحمة ( أحمد ربشة ) سألت !!! البغني ده منو ؟
بالغت والله...
في زول مابعرف ربشة؟؟؟
ياخي مبالغة .. جيل جاهل ......
Post: #20 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: Rihab Khalifa Date: 07-07-2008, 11:26 AM Parent: #18
Quote: جيل جاهل
ياخ ما تنبذي
Post: #19 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: عصام علي أحمد Date: 07-07-2008, 10:20 AM Parent: #1
Quote: والله يا جماعة لو عملتو ليهو مكتبه اغاني في سودانيز اون لاين ينوبكم ثواب فينا غفر الله لك يا محمد عثمان!
والله يا احمد بابكر لو اتعملت مكتبة لربشة انا شخصيا بأجر غرفة واسكن عديييييل
Post: #21 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: سلمى الشيخ سلامة Date: 07-07-2008, 11:37 AM Parent: #19
كان لحظة ان يميل ويميس يقول يا مقطعا حلوا بكل قصائدى يا روعة الالهام فى شعرى وطهر عقائدى انى تخيلت القصائد انتمو فضممت من شوق الى وسائدى وهكذا رحلا محتضنين احلامنا واشواقنا عميرى وربشة شكلا حضورا ابديا ومشيا كان ربشة حين يصدح والعود فى حضنه تحس ان العالم غدا مرحا والحياة اكثر من جميلة والحب الحب اعرفه رحيل فراشة وهكذا يا صديقى ترحل الفراشات وهى ندية حين بدانا نتلمس اغنياته كان عاصمنا من فجاجات الزمان وغصننا الذى نلوح به فى وجه الشحوب وغيمتنا التى نرتجى ان تبلل ساعات الحياة لكنه كما جاء رحل مسرعا رحل مثلما يرحل الغيم مع ذلك يبقى طلل الغناء منه عابقا كما (خمرالحياة ) تسكر بغير راح
Post: #22 Title: Re: إله فني .. يااااااا أحمد ربشة , ثم .. ( غفر الله لمحمد عثمان ) Author: عز الدين عثمان Date: 07-07-2008, 12:36 PM Parent: #21
