Post: #1 Title: وطن السدود .. نفديك بالأرواح .. و ظووووووووط Author: Emad Abdulla Date: 04-24-2009, 01:18 PM Parent: #0
قال الرجل صاحب " المصطبة " في سوق الخدار المركزي : - شيلو بتلاتة . - ما بشيلو .. الحكومة قالت ألفين بس . - الحكومة تقول التقولو .. مسعول منها أنا ؟ - خلاص تديني ليهو بسعر الحكومة القالتو في الراديو . - علي الطلاق كضاب .. إتّ زاتو الرادي لقيتلو كهربا وين ؟ - راديو العربية .. الله قال حرام ؟ - عربيتك عربية الحيكومة.. و راديكم حق الحيكومة , تسمعو فيهو الدايرنو و تصدقيهو .. وكت ماك داير تشتري أِمِش ساكت آآآآزول هوووي . - ما تقول لي أمِش .. إتكلم زي الناس . - زي الناس ؟ أتلَفّظ كويس آآ زول .. زي الناس دي شني ؟ أول قالولك هني أدبخانة ؟ - بني آدم غريب إنت .. شنو الألفاظ المعفنة دي . جيب الزفت الطماطم و بألفين بس و لا كتر خيرك . - يا زول هوووي .. النَضَمي الكتير خَلّو .. بتلاتة دايرو دايرو .. ما دايرو اتخارجلنا بالله . - ما بتخارج .. و الطماطم بشيلو بسعر الحكومة . و إنت تسد خشمك ده ولّلا بتتعب معاي . - خشمي ما بسدو .. إتّو قامت عليكم حكاية السد دي ولّلا شنو ؟ دايرين تسدوها فوق تحت ؟ - نسد شنو يا بني آدم إنت .. إحترم نفسك .. نحنا منو زاتو ؟ - إتّو الحيكومة .. عرفتك من عربيتك دي .. عليّ الطلاق سديتو الكهربا .. و علي الطلاق الهوا سديتوه .. و أيمان رحمان سديتو الموية .. و سديتو نفسنا .. هسه دايرني أسد خشمي ؟؟ بقيتو سدّادين , كمان رحمة الله دايرين تسدوها علينا ؟ ( ثم متجاهلاً لي و مكوركاً بأعلى حِسّو ) : الناجي هوووي .. كورك للطيب و ود الخزين معاك , تعال آآآ المامون بالله قول لي الطاهر و محمود و ود الفحل اليجو .. تعالوا فسراع .. آآآناس هوووي .. تعالوا جاي , الحيكومة جاية تسد لينا خشومنا كمان , ياهو الفَضَل . فطين بت بارا البارح غنت شنو ؟ فطين .. يا فطين , النعيم شوف البت دي وين بالله .. تعالوا أنغنيها لعمكم الحيكومة ده .. ( و إتلم عليّ السوق , الخدرجية و ستات الكسرة و الجزارين و بياعين الأكياس و ناس الموية و بتاع الصعوط و ستات الشاي و بتاعين البكاسي و و و و ) , دورانية كبيرة و أنا في نصها في نص سوق الخدار المركزي بحري , و الشمش تلحم و الكهربا قاطعة و غبار و ضُبّان .. و عملوني برنامج .. رجال و نسوان و شفع يغنوا : وطن السدود نفديكَ بالأرواح و ظوووووووووووووط وطني .
.... عليت الراديو في العربية و رفعت القزاز .. و ظووووووووووووط إنزغمتَ مارق من السوق قليل الأدب ده .
.. هنا أم درمان .
Post: #2 Title: Re: وطن السدود .. نفديك بالأرواح .. و ظووووووووط Author: محمد عبد الماجد الصايم Date: 04-24-2009, 01:27 PM Parent: #1
أنا تاني ياني المتغدي في ( أوزون ) .. يا كمان ( سوليتير ) .. ناس نضيفة و براااااااحه كده و انقليزي انقليزي ياخ .. و عندهم بوخ باااااارد ينزل عليهم و هم في أمانة الله بشوكهم و سكاكينهم و اللقمة سغمبتوووووتة .. مافيش خشوم مفتوحة للطيش و لواكة و أمبجغ أمبجغ أمبجغ ديك . كل شي بالمهلة و السماحة و الروقان و البرودة و الكهربة يا راوية ياخي .
أنا تاني الأكل بتاع ثوار بيافرا ده ما دايرو .. الأسكلوب بانيه مالو ؟ و حساء الماشروم بأكباد الدجاج مالو ؟ و شريحة فخذ الضأن بصلصة خليط الخضار بالدرّاق البري مالها ؟ و التحلية قطعة بلاك فوريست مع شريحة الأناناس المدخّن . ده مش أكل ؟ أنا داير ده .. نفسي في ده , و إن شا الله إن شالله سوف أسعي لتحقيق أهدافي النبيلة هذه .. و لا نامت أعين الناس أولاد المصارين البُيُض و ساكني البوارج و البواخر و نايرين و تمام التمام .
إنتو يا سهام أكلو السخينة .. أقعدوا أكلو سخينة كده لمن الله يسوي ليكم ضنب . أكلوها ياخ ..
الله ينعل ميتين أبو السخينة الجابت لينا الفهاق و البُرجُم و .. الكلام .
كامل تضامنى معك يا عماد دة بتاع الطماطم..... يعنى لو مشيت تشترى عجور كان جاطت...وكدة
Post: #29 Title: Re: وطن السدود .. نفديك بالأرواح .. و ظووووووووط Author: خضر حسين خليل Date: 04-24-2009, 07:41 PM Parent: #28
والله انا برضو زي حسن مكاوي كامل تضامني معاك في محنة السلطة دي جابت ليها شيل حال يا صاحب والله نهائي ماقادر اتخيل منظرك وكورال السوق المركزي بردد في غناوي القهر
الله المتستعان وتاني كان داير خدار طوال أقع سوق اللفة لفة لفة لفة أوووه يه
أريتا مظوَطة عدوك يا ثروت ياخي .. أنا و الله اللمة و الحفلة التافهة العملوها ما همتني .. همتني سمعتي ياخ .. غايتو ربك ربك كريم ما كان في زول بيعرفني الوكت داك .. بعد فت بعيييييييد منهم و اديتهم عجاج العربية نزلت و عاينت ليهم .. الله يسامحنا غايتو أديتهم كم شتيمة و إشارات عويرة كده باليد .. لو كانوا شافوني و لمو فيني .. إنا لله .
يا لطيف ... يا لطيف يا ربي لول هنا بناسبها كم واو كدا؟
Post: #39 Title: Re: وطن السدود .. نفديك بالأرواح .. و ظووووووووط Author: عمران حسن صالح Date: 04-24-2009, 10:08 PM Parent: #38
Quote: كلما أمشي خطوة مع الكراع العرقانة و السخانة و الغبار .. السفنجة التافهة تشبكني ليك : ظييييط .. ظاااااط .. نِجطِطططك .. نوجططططططوك .
هسه أنا حفيان .. أنشوف تاني البيظيييييط شنو كمان تاني في البلد الأم فكّو دي .
ضحكتني لامن طرشتني العشا يا عمدتنا .. ياخي تاني ما بقرب الحوش ده بعد العشا... وبعدين أنسى تاني ما تلقى ليكـ بيظيييييييييييييط ... التراب زاته بعد شوية حا تظييييييط ليكـ ...
(حاج مصطفى بتاع الليمون مالو ؟ .. بلاش مصطفى بتاع الليمون )
ليه بلاش منو بتاع الليمون ... اليس هو من الظووووووطيين
استغفر الله ..
Post: #44 Title: Re: وطن السدود .. نفديك بالأرواح .. و ظووووووووط Author: jini Date: 04-25-2009, 09:55 AM Parent: #40
Quote: زوووووط و ب بطيخة ؟
اوعك تكون كاملة وكبيرة ومدردمة
ما أضيق العبارة
ما أوسع
الترمة .
الكلام دا بدينك! الدنيا عجورة يوم فى ايدك ويوم فى ايدك التانية!! ما تحرجوناش بقى! والله يا عماد عبدالله بالغت خليت شنو للرشيد بدوى! واحد من مذيعينا الاشاوس صاح مهللا ظوووووووط عقب احراز احد لعيبة المنتخب السودانى هدف صاروخيا!! جنى
Post: #46 Title: Re: وطن السدود .. نفديك بالأرواح .. و ظووووووووط Author: خالد عبد الله محمود Date: 04-25-2009, 10:28 AM Parent: #44
تستاهل ... أنت أصلاً البركبكـ عربية الحكومة شنو ؟؟؟
Post: #47 Title: Re: وطن السدود .. نفديك بالأرواح .. و ظووووووووط Author: عبدالكريم الامين احمد Date: 04-25-2009, 10:47 AM Parent: #46
خا خا خاخا وضحك كما ضحك خان البتاني الشهير.... وانت زااااتك يامان البوديك سوق الخضار وناس عمك النزير بيرو ديل شنو سوق واقف بتاع الدوحة داااك كدي عيبو لي....
الكويس انك اتخارجت بظووووووط دي بس ودي كرامة مفروض تضبح خروف اسفيري القصة دي لو اتلملمو معاهم ناس كرجول كنت حتسمع حلو هههه
يا عمدة انت مشيت يا تو ظوط؟ الظوط الشعبي ولا الظوط المركزي ولا الظوط العربي ولا ظووط سعد قشرة ؟ لانو بي صراااحة كده كلو ظوط ظوووطو براها .. واحمد ربك ما مشيت ظوط الحرامية ..
يا عماد بناكل سخينتنا و نحفظ كرامتنا و ما بنحلم احلام اكبر من امكانياتنا وما بنمد كر عينا ابعد من لحافاتنا وانتو بالمقابل احضرو لينا ريتشل راى بس ما تجو تفكو عقدكم فينا ولما يظوووطوووكم تتباكو لينا
يا راوية يا عباسى سلام ليكم الله و الشوق للسخينة الاسبوع ده ضربتها ليك مرتين مبااااااااااااااااااااااااااالغه و جنبها صحن شطة برضوووووو بالدكوة وربطة جرجير ووووووووب كدى انقوم نظبطها تانى للعشا
ده زيادة فى شحتفتك و محاولة لاقناع عماد
____________________________ الظاهر بوست عماد ده فبهو البركة و لحس الصحن ومن بعده الاصابع
Quote: ليكم الله و الشوق للسخينة الاسبوع ده ضربتها ليك مرتين مبااااااااااااااااااااااااااالغه
غايتو أسألي الشوق عن عيوني فاطمة العقلي ومنذر أبو المعالي يقولوا ليك راوية العباسي أحسن من يعمل سخينة في الشرق الاوسط والريجونس المجاورة مرة كنا برة وجينا بيتنا متأخرين والمطرة صابة(طبعا اهم حاجة في السخينة الانفايرونمنت الحولها) المهم عملت ليهم سخينة لما رجعوا كلموا بيها أي زول لاقاهم في الشارع
__________________ حقو عشان حركاتك دي الواحد هسة يقوم يعمل سخينة مع إني قاعدة في أوتيل لكن سويت فيهو مطبخ وصالة لوووووول وعندي بخور عدني الله يرضى على الادتني ليهو دنيا وأخرة هاولعو بعد البصلة ماتفوح لكن جنة بلا ناس مابتنداس
سهام و راوية .. سخينتكن بالله تحت أباطكن و أركبن الشارع .
سخينة قال .. نقول ليكم الحكاية فيها ظووووووط تقولو لي سخينة و مديدة و ما بعرف شنو و تقلبوها لي طبق اليوم ؟ و اريتو كان طبقاً نعيم .. أنا السخينة دي كجنتها بي الله واحد .. من الله خلقني و إنتي يا سخينة الجن باقي لي في رقبتي .. متحمدانا فطور و عشا .. هسه سويتوها ( أوريجينال فاشيون ) و الرجوع للتراث و حركات الحناكيش دي ؟ مبروكة عليكم .. قوموا إليها ده و البِهِل .. و معاها كمان أم تكشو و القاورمة .
شوفي يا سهام .. سخينتك ما دايرنها .. و إنتي يا راوية فاطنة و منذر ذمتهم غريقة الجوز .. ما دايرين يجرحوا مشاعرك ساكت .. لكن من إنقليزيكي الكتير ده تلقيك ما ناقشة ابو النوم في المطبخ .
سمعت في بعض ما تناقله المتسكّعين في الدوحة بأن (بركوتة) قد استعان بفكي (كيكي) الإسفيري، وعمل ليك عمل (ما يخرّش المية) جراء مساعيكم لتبويظ خمايسه. والشفرة هي: أطلقوا سراح الخميس نسحب ظووط الجمعة.
Post: #69 Title: Re: وطن السدود .. نفديك بالأرواح .. و ظووووووووط Author: كمال سالم Date: 04-25-2009, 10:16 PM Parent: #67
Quote: خشمي ما بسدو .. إتّو قامت عليكم حكاية السد دي ولّلا شنو ؟ دايرين تسدوها فوق تحت ؟
منعول أبوه السد ألعايز يقفل كل المنافذ!! وحتسكتوا على ( السديد ) ده ياعماد ؟ يسدوها تحت مامشكله يسدوها بالجنبه ما مشكله يسدوها بالإضنين برضو ما مشكله لكن يسدوها فوق دى المشكله يعنى ما ( نشيش ) ؟
عمده ياقربي والله خربت طبع البنية.....!!! طول النهار ماشة وتغني وطن الجدود نفديك بالارواح وطوووووووووووووط حتي النقطة شالته....!!!
Post: #71 Title: Re: وطن السدود .. نفديك بالأرواح .. و ظووووووووط Author: abuguta Date: 04-26-2009, 06:47 AM Parent: #70
Quote: وطن الجدود نفديك بالارواح وطوووووووووووووط حتي النقطة شالته....!!!
[green] هارون دياب ,,الصغيرات مشكلة اسى انا بنتى شابكة فى بابا تلفون ومين كدا جاب قون طبعا عمدة ما بزعل لانه هلالابى جناح النقر,,,
نجى ل ظوووووووووط ومن بعدو شلوووووووت طين البيوت ولحم العتود متى الناس تجوط حكام قلوط ( شدد ياعمدة شدد) عاملين شفوت نارهم ما بتموت قصورهم عوالى ستايرهم خيوط
بالله كيف بحرى, وناس بحرى, انا بموت فى بحرى والنقل النهرى,,قوارب تجرى,,فى عهدنا البكرى زمان الفكرى,,ابوداود والوترى,,اصوات القمرى عقرب والدافورى,,سعد قشرة وكافورى,, العذبة هواها عذرى,,حلة كوكو مع الفجرى البنان تقرى,,دار السلام والمجرى,,مايقوما المترى ود دهاشة والذكرى,,كرتونا يا عصرى,,, وسوق ستة البدرى,,,اى حاجة بستة,,يارب دلالية الولد فى السعودية تشيل كل الطبلية وما تفضل شوية ,,وب ستة كل حاجة ب ستة واسى كل حاجة ب زوووووووط
دحين الكلام دا كله قبل الانقاذ بشوية لكن مسعول من الخير ياعمدة انت الوداع شنو لبلد الظووووظ عرس بنوت ولا سقف بيوت,,
أفتِن؟ أفتِن؟ ......... بركوتة ... كون تحشم الله يعطيك الوجع -------------------- عماد عبد الله ... سلامات
Post: #73 Title: Re: وطن السدود .. نفديك بالأرواح .. و ظووووووووط Author: Emad Abdulla Date: 04-26-2009, 07:19 AM Parent: #69
Quote: لكن يسدوها فوق دى المشكله يعنى ما ( نشيش ) ؟
مخير الله .. هي الشيشة خلاص بقت فوق يا كمال ؟؟؟
Post: #72 Title: Re: وطن السدود .. نفديك بالأرواح .. و ظووووووووط Author: عماد محمود علي Date: 04-26-2009, 07:13 AM Parent: #63
Quote: شئ سخينة وشئ سلطة اسود
وشئ عمل أســـود ....
عمدة العربية كانت مكيفة ؟
Post: #74 Title: Re: وطن السدود .. نفديك بالأرواح .. و ظووووووووط Author: Hala Hassan Date: 04-26-2009, 07:53 AM Parent: #72
يا عماد عبدالله،
Quote: الأسكلوب بانيه مالو ؟ و حساء الماشروم بأكباد الدجاج مالو ؟ و شريحة فخذ الضأن بصلصة خليط الخضار بالدرّاق البري مالها ؟ و التحلية قطعة بلاك فوريست مع شريحة الأناناس المدخّن .
حسه ما كان دفعت الألف أرحم؟؟؟؟؟
Post: #75 Title: Re: وطن السدود .. نفديك بالأرواح .. و ظووووووووط Author: ناصر احمد الامين Date: 04-26-2009, 07:56 AM Parent: #72
ظوووووووط تفوت ولا حد يموت ... يا عمدة
والجاتك في ظوووووووتك سامحتك
Post: #77 Title: Re: وطن السدود .. نفديك بالأرواح .. و ظووووووووط Author: Salah Abdulla Date: 04-26-2009, 08:20 AM Parent: #75
لاحولاااااااااااااااااا ده كلو يحصل ليك وانت لسه قاعد هناك ؟؟؟ قوم اتخارج سريع يا اصلي ، القصة بقت جد جد ، وجابت ليها ( ظططان ) ... الناس ديل كعبين والله ..
Post: #78 Title: Re: وطن السدود .. نفديك بالأرواح .. و ظووووووووط Author: خضر حسين خليل Date: 04-26-2009, 08:27 AM Parent: #77
Quote: وجابت ليها ( ظططان )
يا صلاح ازيك ياخ وتوحشات بالجملة والاشواق صفاً صفاً بعدين ياخ ظططان كيف يعني ؟
والله انت واخوك حتجيبوا للبورد دة السرطان عديل بي حركاتكم دي عماد
عليك بالتبش !
Post: #79 Title: Re: وطن السدود .. نفديك بالأرواح .. و ظووووووووط Author: Salah Abdulla Date: 04-26-2009, 10:02 AM Parent: #78
والله مشتاقين يا (أبوخدرة) وسألت منك صاحبك أبو (ظوطة) ده ..
بس بي أمانة كده صاحبك ده حالتو إتأخرت خالص في السودان .. تصدق (العضات) البيهاتي بيها في السودان ، والجلسات الكيف كيف دي ، الزول ده هنا كان بيطقطقها زي الما حصل شئ يقوم يمشي وين ما عارف والناس تتلم وتنشد وتهلل و ( تظطظت) ؟؟ ده كلام ده ..
Quote: [سهام و راوية .. سخينتكن بالله تحت أباطكن و أركبن الشارع .
والله والله والله ما طالبنى حليفه الليلة دى فطرت بيها نحن ناس ماشين تحت الحيط عشان كده ما فى زول بقدر يظوطنا اها انا ركبت الشارع ما راوية خليتها هى و ضميرها
_____________________________ يزوطووووطكم تطردونا بس الما بتقدر على مرة راجل تأدب حماتها او كما قالن ظوووووووووووط مرقنا
ابوصلاح وينك ياخ مختفي بأمانة كدا انا من جات سيرة عمك النذير و بطيخو نويت اتخارج من هنا لكن قلنا النسلم عليك و نسألك مالك ابوي عامل مهم ومثقف وكد ولاّ شنو القصة؟
Post: #102 Title: Re: وطن السدود .. نفديك بالأرواح .. و ظووووووووط Author: Salah Abdulla Date: 04-26-2009, 06:24 PM Parent: #101
تسأل منك العافية يا أبو حتوت وكتر خيرك والله إنت الفيهم
علي الله الفترة الفاتت دي زنقة عدوك الثقافة والأهمية دي ما بتخيل فينا ، نحن ناس فارات ساي النشتكي ليك ما دام الله جابك ، ياخ صحبانك إتغابوا فيني العرفة ، تصدق ، عشان معاهم جكس .. أنا أحنسهم وهم يقول البوست بقي بيت عزاّبة .. بالله الكلام ده صاح منهم ..
كمان جيت بي جاي لقيت صاحبي ده ناس السوق زافينو ، ودخلت في الزفة باقي ناس عمك النزير ديل ناس صعبين وما بنقدر عليهم يا خ ديل ما بيهزروا، وأسهل حاجة عندهم ( ظووووووط ) زي ديل الهزار معاهم خطر شوية ..
Post: #103 Title: Re: وطن السدود .. نفديك بالأرواح .. و ظووووووووط Author: أبو ساندرا Date: 04-27-2009, 08:54 AM Parent: #102
Quote: أفتِن؟ أفتِن؟
لا ياشيخ بيلو
Post: #104 Title: Re: وطن السدود .. نفديك بالأرواح .. و ظووووووووط Author: أبو ساندرا Date: 04-27-2009, 09:01 AM Parent: #103
Quote: وجابت ليها ( ظططان ) ...
أضحكك الله وفر أسنانك البرق
ظططان ، ظطظططت ،، إجتراحات زايطة يا ابوهن
Post: #105 Title: Re: وطن السدود .. نفديك بالأرواح .. و ظووووووووط Author: أبو ساندرا Date: 04-27-2009, 09:07 AM Parent: #104
Quote: بس أفضي ليكم يا فارات .
قوم لف
انت قادر تتنفس ؟
يا ود الصايم و ود البشرى
واحد منكم ينزل لينا هنا حكاية الأسد الماقادر يتلفت
من الطيب
سيخة
Post: #107 Title: Re: وطن السدود .. نفديك بالأرواح .. و ظووووووووط Author: محمد الجزولي Date: 04-27-2009, 09:22 AM Parent: #105
Quote: زوووووط و ب بطيخة ؟
اوعك تكون كاملة وكبيرة ومدردمة
ما أضيق العبارة
ما أوسع
الخال ابو ساندرا
شايف صحبك فات في قولك الفوق ده (ظوووووووووط) ..
ـــــــ
جبناهو للتذكير والصفحات توالت .. يعني مامقصود شئ ..
Post: #106 Title: Re: وطن السدود .. نفديك بالأرواح .. و ظووووووووط Author: قلقو Date: 04-27-2009, 09:19 AM Parent: #100
الأخ عمدة.. انتو بس فلوحيتكم دى بس تعملوها على الخدرجية والجزارين وناسى لى ناس اسامة ومكاوى,يعنى عينك فى الفيل وتطعن فى ضلو؟ وبعدين عليك الله خلقتك دى خلقة حساء مشروم بأكباد الدجاج ؟(مشروم دى نحن بنسميها اسم كدة مالطيف وخليها بينى وبينك). سمعت بالكجيك والكول ياعمدة؟ انصحك بيهم وقرط على كدة. مع تحياتى .
Post: #108 Title: Re: وطن السدود .. نفديك بالأرواح .. و ظووووووووط Author: ادريس خليفة علم الهدي Date: 04-27-2009, 08:47 PM Parent: #106
