Post: #1
Title: براااااي .. الله و رقبتي
Author: Emad Abdulla
Date: 01-28-2009, 05:29 PM
Parent: #0
الحجة قالوا مزارعية من حلاّل الضهاري , " من الصباح " إتلبّست ماشه الإستبالية حقت أبعُشر زيارة , يخربها ما عندها غير ( أب خمسة ) رابطاهو في طرف " توب الجيران " , و اتوكلت ركبت " باص اللبن " داك المن زمن الصحابة , و " بابو وااااحد و فاتح ورا " . شغال بالجاز و الزوايا الفيهو " قديمة و سعرانة و مصدية " .
الكمساري كشكش ليها .. الحجة فكت " أب خمسة " بي أسنانها من طرف توبها و ناولتو . الولد هاج : يا حاجة " التعريفة إتغيرت " ياخ , أب خمسة بتاع شنو ؟ . قالت ليهو : " معلمة الله " يا وليدي بلاهو يخربني خراب الصِح داك الما كِضِب . حدر ليها كددددددددده و قال ليها : خلاص ياخ .. " المرة دي خليناك " .. ما مشكلة .
مشت الحجة زارت زيارتها ديك للإستبالة و " قيلت " اليوم كللللو في " حوش " الإستبالية تحت الشدرات : النقة و النقة و النقة مع النقناقات الهناك .
المغربية صدت راجعة . للتعتر ليها تركب في ذات نفس الباص أبو زوايا سعرانة و مصدية و قديمة و كمساريهو " الولد اللميض " . جاها كشكش ليها , طوااااالي دخلت سنونها في طرف توبها فكتو و مرقت " أب خمسة حق قبيل داك " ناولتو ليهو : الولد هاج تاني : يا حجة ياخ دقييييييقة .. كده ما صاح .. قلنا ليك قبيل ما أب خمسة ياخ .. ما أب خمسة , التعريفة اتغيرت ياخي , تاني تمرقيهو لي هو زاااااتو ؟
عاينت ليهو سممممممح , و بمسكنة فيها مساخة كده قالتلو :
( عاد ما ياهو أب خمسة يا ولدي .. مشيت زرعت وللا حشيت ؟ )
.....
هسه يا السني في جنس الصي ده .. نزرع وين وللا نحش شنو ؟
و أب خمسة حقنا ده ياهو أب خمسة من يومنا - مخير الله - .
ياخي ما بلقى عندك ( فريني ) نختو على أب خمسة يقومن يبقن سبعة قروش حقت التصكرة نديهن للولد ده ؟
بندور نوصل يا أخواننا ..
الكلام ده أعوج منكم !!!!
|
Post: #2
Title: Re: براااااي .. الله و رقبتي
Author: elsawi
Date: 01-28-2009, 05:41 PM
Parent: #1
Quote:
هسه يا السني في جنس الصي ده .. نزرع وين وللا نحش شنو ؟
|
الحاميك تزرع ولا تحش شنو؟
مش اخير من تقعد برااااااك الله ورقبتك؟
|
Post: #6
Title: Re: براااااي .. الله و رقبتي
Author: Emad Abdulla
Date: 01-28-2009, 05:53 PM
Parent: #2
| Quote: الحاميك تزرع ولا تحش شنو؟ |
حاميني الصي .
الصي بيزرعوه كيف يا الصاوي ؟ | Quote: مش اخير من تقعد برااااااك الله ورقبتك؟ |
ما أخير ..
قالوا : ( الخلا و لا الرفيق الفَسِل ) .
|
Post: #3
Title: Re: براااااي .. الله و رقبتي
Author: Rawia
Date: 01-28-2009, 05:41 PM
Parent: #1
عماد عبدالله ياسمح
البركة في النقة التحت الشدرة
|
Post: #7
Title: Re: براااااي .. الله و رقبتي
Author: Emad Abdulla
Date: 01-28-2009, 06:00 PM
Parent: #3
راوية بت العباسي ..
يسعد مساك ياخ | Quote: البركة في النقة التحت الشدرة |
نقة الإسبتالية إسمها ( عدّي من وشك ) .
في حكوة في الإبتدائي فيها جملة شهيرة : ( الإمام تحت الشجرة ) .
ما عارف الطراني ليها شنو !!!
تشكرات يا بت يا رايقة .
|
Post: #4
Title: Re: براااااي .. الله و رقبتي
Author: ALGARADABI
Date: 01-28-2009, 05:44 PM
Parent: #1
| Quote: براااااي .. الله و رقبتي |
ما براك
أب خمسة والفريني ذكرني القولة المأثورة: نخت الخمسة في الاتنين (كناية عن نديها صنة)
والخمسة و الاتنين هم الاصابع و الشفاه
يعني الفريني وأب خمسة=هسسسسسسس
لك الحب القديم يا عمدة يا فنان
|
Post: #8
Title: Re: براااااي .. الله و رقبتي
Author: Emad Abdulla
Date: 01-28-2009, 06:06 PM
Parent: #4
Quote: أب خمسة والفريني ذكرني القولة المأثورة: نخت الخمسة في الاتنين (كناية عن نديها صنة)
والخمسة و الاتنين هم الاصابع و الشفاه
يعني الفريني وأب خمسة=هسسسسسسس |
يا صاحب ..
مساك حلو يا رب .
و الله ما قلت إلا النصيحة ..
حالنا بس يا هو : هسسسسسسسسس ..
ترانا هاسين .. كان قهمة كان إحباط ..
الخمسة فوق الإتنين .
يديك العافية يا قردابي يا جميل .
|
Post: #5
Title: Re: براااااي .. الله و رقبتي
Author: عبدالوهاب علي الحاج
Date: 01-28-2009, 05:50 PM
Parent: #1
___
اها
|
Post: #9
Title: Re: براااااي .. الله و رقبتي
Author: Emad Abdulla
Date: 01-28-2009, 06:10 PM
Parent: #5
فريني !!!
فريني يا وهبة ؟؟
في الصقط ده ؟
|
Post: #11
Title: Re: براااااي .. الله و رقبتي
Author: خضر حسين خليل
Date: 01-28-2009, 06:21 PM
Parent: #9
كويس
انك براك
انا ذاتي هسي قاعد راس مع روحي !
ياخ شكراً
ولو ليلي دة سمح لي ياني البركت معاك هنا
كان ما سمح
عفوك ورضاك ياصاح
|
Post: #14
Title: Re: براااااي .. الله و رقبتي
Author: khatab
Date: 01-28-2009, 08:00 PM
Parent: #11
Quote:
الحجة قالوا مزارعية من حلاّل الضهاري ,
|
الحاجه براها يا عمده !
!
سلامات
كتيرات
!
|
Post: #24
Title: Re: براااااي .. الله و رقبتي
Author: عثمان دغيس
Date: 02-01-2009, 11:09 AM
Parent: #11
| Quote: نا ذاتي هسي قاعد راس مع روحي ! |
يا خدر يا أخوي
الزول ده قال ليك برااااااااااهو ..
روحو ما معاهو ..
يعني بيكون روحو ( طالعة ) !!!
تقول ليهو أنا زاتي ؟؟؟!
|
Post: #10
Title: Re: براااااي .. الله و رقبتي
Author: SHIBKA
Date: 01-28-2009, 06:17 PM
Parent: #5
مباااااااااااالغة
دا لقيتو وين دا؟؟؟؟
|
Post: #12
Title: Re: براااااي .. الله و رقبتي
Author: ابراهيم عدلان
Date: 01-28-2009, 06:41 PM
Parent: #10
باص اللبن ما ياهو ابكنبة خشب طولية بي الجنبة داك و اللا واحدا تاني؟
يا الله و يامين عمتك دي لقت ليها فرقة بين كوليقة العنكوليب و تمنة اللبن
ياخ ابخمسة زاتو كتير
------------------------
و الله يا عمدة الصي حصل امريكا ذاتا هسة
|
Post: #13
Title: Re: براااااي .. الله و رقبتي
Author: ياسر الامير ابوجكة
Date: 01-28-2009, 07:17 PM
Parent: #12
حكي جميل وناس قدام(انت والقردابي ) ناقصنكم عادل جبارة والكيك
أنتوا من الزمن الجميل زمن
الريال،،،، والشلن،،، وأب قرشين،،،،، التعريفة
تسلم يادراج المحن
|
Post: #15
Title: Re: براااااي .. الله و رقبتي
Author: ibrahim kojan
Date: 01-28-2009, 10:23 PM
Parent: #13
يا عماد مساء الخير .... دي بأيام زمان؟؟
في بلاد الإنجليز الشلن= ابخمسه
FIVE PENNY
لزوم الدلع وكده!
في بداية الستينات في جماعه بعتوهم لبعثه في برطانيه وطبعا الايام ديك الشلن او ابخمسه عندو شنه ورنه وبيعمل عزومه.
المهم كل اخر شهر الجماعه ومنهم خالي صلاح (خريج مطبعه).. يمشو السفاره لصرف البيرسري او مصاريف الطلاب وقتذاك..
في شهر كده المصاريف ما وصلت, والجماعه فلّسو فلس شديد وماعندهم حق الميز ولا بتاع الكبّه, وكان بيشترو اللحمه من جزار
بيبيع لحم حلال أو هكذا يدّعِي؟؟...
والجزار بيعرفهم من أشكالهم أصلو مافي سودانيين كتار الزمن داك HALAL MEAT
واللحم بيتباع مكعبات بدون عضم .. المهم واحد تفتيحه قال ليهم نشتري عدس وعيش وعضام ونعمل شوربه وكوارع لحدي ماربك يهون... ونقول للجزار العضام للكلب عشان ما يقول الناس المتوحشين ديل بيكلو عضام وكرعين بقر!!!!
المهم مشو للجزار وقالو ليهو عايزين عدس وبصل, وعضام بشلن للكلب بتاعنا ؟؟
بس العضام لازم تكون حلال!؟
الجزار ردّ لبهم أّتقول جدو رباطابي!
إنتو كلبكم برضو مسلم ولا شنو ؟؟؟
IS YOUR DOG ALSO A MUSLIM ??
|
Post: #16
Title: Re: براااااي .. الله و رقبتي
Author: كمال سالم
Date: 01-28-2009, 10:27 PM
Parent: #13
يعلم الله مشتهنك ,, تجى ولا نجى ؟؟
|
Post: #17
Title: Re: براااااي .. الله و رقبتي
Author: HAYDER GASIM
Date: 01-29-2009, 01:22 PM
Parent: #16
| Quote: براااااي .. الله و رقبتي |
يا عمدة كيف ... مرقتها في أبوعشر, الله ورقبتك
كمان, حالة أخير منها الفريني بتاع عبدالوهاب
ده, التقول كان صاريهو فى طرف توبو . عالم دقة
قديييمة خلاص, بس وحاتك عندي سعال, فهل كانت هذه
المرأة شايلة معاها عامود؟ لكون الونسة تحت ضل
شجر الإستبالية تفقد نكهتها بدون ملحات وكسرة
وبصل وهاك يا عجن ولحيس أصابعين ودشوة غليدة
وكده.
عماد ... برآآآك ... برضك رائع, قصة حلوة
مع عاطر الود
|
Post: #18
Title: Re: براااااي .. الله و رقبتي
Author: العوض المسلمي
Date: 01-29-2009, 01:34 PM
Parent: #1
سلام عماد
| Quote: الحجة قالوا مزارعية من حلاّل الضهاري , " من الصباح " إتلبّست ماشه الإستبالية حقت أبعُشر زيارة , يخربها ما عندها غير ( أب خمسة ) رابطاهو في طرف " توب الجيران " |
والتوب توب الجيران !!!!!!
| Quote: و اتوكلت ركبت " باص اللبن " داك المن زمن الصحابة , و " بابو وااااحد و فاتح ورا |
لسه هذا الباص موجود في قري الشماليه حتي اليوم ,,,,
كلام كل فقره فيه تحكي واقع لحالها ,,,,
|
Post: #19
Title: Re: براااااي .. الله و رقبتي
Author: محمد الباقر
Date: 01-29-2009, 05:00 PM
Parent: #18
| Quote: براااااي .. الله و رقبتي |
ازيك ياشاب ياجذاب ...
اوعى تكون بس براك سويتها في نفسك
|
Post: #20
Title: Re: براااااي .. الله و رقبتي
Author: دينا خالد
Date: 01-29-2009, 08:46 PM
Parent: #19
عماد يا مصيبة .. الحكوة دى بمناسبة الخامس ؟؟؟
افصح يا رجل ،، افصح ما تخاف من ابو ساندرا ..
ــــــــــــــــ
السادة المتداخلين اعدو قراءة الحكوة وبدل الفرينى
خلو ( ملين ) ... ما ادهاك من عماد .. يا النبى نوح
|
Post: #21
Title: Re: براااااي .. الله و رقبتي
Author: Emad Abdulla
Date: 01-29-2009, 10:04 PM
Parent: #20
مش بالله بقينا برانا الله و رقبتنا ؟
العالم دي كلها كشفت مواعينها من عشرين سنة .. و ا حيلتها غير أكل بايت و مسيخ و هفتان و مكرر .
قلنا العمود المغطى ده و أسيادو يضايروه ( يمين / يسار ) .
بسس .. ياهو الفيهو العضة الأصلية زااااتا ..
الجوع كافر ياخي ..
إتلمينا مقهيين فاتحين خشمنا راجين الري .. لمة ناس أشتات من أشتات ..
سمح وكت الله أداكم كوم ناس قدر ده زهجو من ملاح ام دقوقة و لواييق الشيوخ و عصايد أصحاب الفضايل و جراية العساكر .. مالكم ما قلتو ليهم إتفضلو و ضبحتو ياخي التيران البقت عالة دي , ( لا بتزرع لا بتحش لا تسوق الساقية ) ؟
( المسغفاتية سمونا فاقد تنظيمي ) !!
حكاية عجيبة , سمح وكت فقدنا الوالي اليرشد و خرجنا عليهو و خلينا ليهو الجمل بما حمل و دقشنا الخلا مبارين ريحة نعايم العضة و الشبع و العافية و و و و و ..
فاقدين الذاكرة جينا .. و قابضين على الجاي و بس - بلا أمبارح بلا فقر - ..
ما دايرين غير القدامنا ده و بس . ورا داك خليناهو ورا ..
قمنا إتلمينا على حلم العمود الملان شنو شنو و ح يشبعنا و يشد حيلنا من كترة الجوع السوا لينا استسقاء و سؤ تغذية و هلكنا ياخ .
طلع الصبر فشوش ..
( حمد ضرب شجر النبق فسقط الورق و ما سقط النبق ) .
إنا لله .
نجي للحجة و أب خمسة ..
أب خمسة المضبوب جوه التوب من سنة غاغ ( و بعد ده كلوووووو هو توب جيران , او نحو ذلك ) .. أريتو كان حقها ..
و مقرضة عليهو لامن داب و بقى دلقان من كترة استعمالها ليهو براهو ( مع إنه عندها تياب تانية جديييييييدة ) .
القعدة من ( صباحات ) ربك جوه حوش الإسبتالية .. و النقة المقدودة و الخبارات و الشمارات مافيها التكتح .. يا سهكت هدومك يا حجة .. يا سوت ليك تيبس المفاصل و تدرن الغدد .. يا جابت ليك طرش أب لمبة .. يا إمتاً لخبطت راسك بالوساوس .. أو كمان أكلت مؤخرتك و بقتك جلوطة .
أب خمسة زااااتو يا الحجة ؟؟ ..
تتغير تعريفة الترحيل .. يتغير الظلط .. الجاز يبقى بنزين , ما شغلتها ..
الزمن عندها واقف هي و النساوين المعاها ..
ياهو أب خمسة العاضين عليهو ده ..
أها , أب خمسة طلع ما بوصل .. و لا بتركبي بيهو مع العالمين .
دقي الكداري ياحجة ..
أركبي كرعيك زي ما ركبتي راسك و مكدبة في أب خمستك ده ..
إنتي و دفعتك .. نديداتك ..
هسه فرقتي منهم في شنو ؟
أصلاً زاتو صاراهو ليه أب خمسة الجن ده ؟ .. ختيهو في المفحضة كان , أو دقيهو خاتم ( الملك جورج أب خمسة ) .
أو ياخي جيبي آخرتها و قولي يخربك ما عندك شي .
كنا وين ؟
أيوة .. حكاية جوعنا الدايم ده ..
( كنا حلمانين بي ضلع .. أبو اهل الفتة زاتا ياخ ) .
أها عليك أمان الله بقينا في الصي .. و بطننا طبقت ضهرنا .
المواعين كلها ( انكشفن و بان ) .. و اندفست إتملت تراب و فرناغة ..
و الضل زح مشى .. و الدنيا صنت من بعد هوجة الكواريك أم فريحانة : فتحو العمود ؟ السلطة في ؟ الضلع كيفنو ؟ الملحات خبارن ؟
هووووي يا الهُمّل هووووي .. مافي شي .
العمود كللللللو طلع ( ملاح قاورمة ) ..
صمنا و فطرنا على بصلة .. !!!
إن شا الله يا الحجة من هنا و لي قدام : تدقي الكداري ده و البيهِل ..
حتى الباص المُصدي و سعران ما تلمي فيهو .. يا القديمة أم شَلَن .
نحنا بنقدر علي روحنا دي .. بنمسك في الولد الكمساري ..
أخلاقو ضيقة نعم , لكن ما بيرضى الحقارة .. و لا بيرضى زول ياكل حقو ..
بنبقى عليهو الولد اللميض ده ..
غايتو يا شالنا فوق ضهرو و خلانا دفعنا ليهو حق شيلتنا دي .. ..
يا كمان إتصرفنا ليهو في لوري يسوقو لينا .
أو - لا قدر الله - زهج مننا و خلانا شتت .
دايرين نصل ياخواننا ..
الناس دي كلها مشت خلتنا في حر اللهُ و اكبر ده , علي الأيمان فضلنا الله و رقبتنا .
حتى ( الحريم القديمات ) الكُهن أمات أعمدة و تياب جيران و نقق فارغة .. زاتن خمخمن كرورن القديم و لمن حجباتن و محافضن و بخراتن و مصمصن خشومن شماتة : ياهو أب خمسة يا الحاجة ؟ نان من قبيل ما تقولي !!
تراكي زينا و جاي . ساااكت قلنا القبة تحتها فكي .
و مشن ركبن ( حميرهن ) المجلكنة هن كمان , و بي عافيتن روووحن ..
ياخي إنفض الجوعى و المساكين و المعدمين و أولاد الكلب و الراجين الله و الحالمين و الحلمانين و ضاربي البخت و رافعي البيارق . الحريم المسكينات و الشفع اليتامى و المغبونين و ناس قريعتي راحت و العيانين و المأزومين و الفاكه منهم . ياخي أم رخم الله و أبوها و الطير الخداري و المكشكشين و أهل الميت و الفطايس و الأناشيد و العوة و النهنهة و الكلام البشخت كبريتة الروح و الرجال البيملوا العين , و النسوان امات قلب , و الشهدا الراحو شمار في مرقة .. لغاية عند القعدو ترس .
الأمة كلها مشت !!
ملاح قاورمة بتاع مين ياخي ؟ بلاش كلام فاضي ..
نموت في بكاننا - الغير ذي زرع - ده يعني وللا كيف ؟
الكلام ده اعوج .
- في زول معاهو طرادة ؟ -
مين عارف .. يمكن يمر في وقفتنا دي - البدون عيد - يمر حلم جديد إبن كلب بي جاي ..
يقوم كمان ما يلقى عندنا حق عليقة الشماعة ؟
|
Post: #22
Title: Re: براااااي .. الله و رقبتي
Author: محمد سنى دفع الله
Date: 01-30-2009, 10:11 AM
Parent: #21
في زول معاهو طرادة ؟ -
يازول بي جدك
طرادة ؟؟!!
الطرادة الفيها الديش واقف طابور
وغنماية وبقرة وكم سنبلة مجدوعات بالجهة التانية
الطرادة البتشيلها زمن بلد الباخاته تركب منها الطراحه وتتعشى وتدخل السينما
وترجع معاك شلن
ابو خمسة
انت قاصد الطرادة دي ؟؟
الطراده الفيها الديش
واقف انتباه
هدومهم منشية
وزراير النحاس ملمعة
والتعلمجي واقف في راسهم
صفا انتباه
عارفيت لازم الردا بتاعك يكون واقف قدامك
عارفين ولالا؟؟
طبعا الدياشة واقفين انتباه مافي واحد بقول بغيم ..
فرحانين بللطابور النهايه شهرو ابخمسة ..!
اها نحن واقفين قدامك ما بنقول بيغم
واقف براك
والجوع كافر
هو جوع الجن ده الكفرو منو ؟
لمن كنا في بلد البخاته
الرغيف كان قدر القمر
وجوز الحمام بتستلفو من الجيران تعمل بيهو الشوربة وترجعو ليهم احمروه
هسي الواحد لوعيان ماتلقى ليك فردة حمامة تطلق فيك العافية
الجمام طار والناس الزينه طارت قام ليها ريش وطاروا
وانت واقف براك
والدياشة واقفة في الطرادة براها
انت مالاقي ليك ضلع ولا جدادة
ولاسمبرية تنهشه بي سنون الجوع الكافر
السمبرية ام قدوم
عيش ابوي متين بقوم
بقوم باكر
مع العساكر
العسكري اب شنب
والطيارة ام ضنب
التعلمجي : منو القال ضنب
الدياشة الفي الطرادة مافي واجد فيهم قال بيغم
منو قال ضنب شوفو العسكرية ظبط وربط
منو قال ضنب ؟؟
انا سكت والدياشة سكتو
انت ..اعمل صفا ،منوالقال ضنب
الدياشي : واحد منهم لكنو ما بيقر
التعلمجي :ليه
الدياشي : لانو العسكرية تصرف وهو اتصرف عبر عن رايو وسكت
كلام تمام صفا انتباه الدياشةالعسكرية تصرف
اها انت براك
اتصرف
ورجع الدياشة وقفوا في الطرادة
كما كنت ..
|
Post: #23
Title: Re: براااااي .. الله و رقبتي
Author: Emad Abdulla
Date: 01-31-2009, 11:56 PM
Parent: #1
|
Post: #25
Title: Re: براااااي .. الله و رقبتي
Author: tayseer alnworani
Date: 02-12-2009, 10:32 AM
Parent: #23
واقف براااك تحب تفكر فى القدر البجيك يا ربى القروش بتم للفطور والغداء
هسع خليك من ده الكهرباء ما كملت قروش الترحيل المدرسة حق الفطور
ولا انت ما سمعت ناس فلان ما عندهم بكا! لازم نمشى بس حق البنزين وين
خلينا كدى ننتبه للنشرة موت هنا وهنا وكضب جد وتفتش فى لحظة عشان تقعد
براااااااااااااااك .
عماد ازيك
بختك قعدت براك اظنك محظوظ
بنتمنى نقعد برانا ورينا سويته كيف؟؟؟؟؟؟؟؟؟؟؟؟؟؟؟؟؟؟؟؟؟
قاعد براااك والهم عصف وحاجات تانية حاميانى !!!!!!!!!!!!!
|
Post: #26
Title: Re: براااااي .. الله و رقبتي
Author: Emad Abdulla
Date: 03-23-2009, 09:10 AM
Parent: #25
و بعدين ؟
|
|