Post: #1
Title: ياخي .. ده مقلب كبير خلاص
Author: Emad Abdulla
Date: 06-07-2008, 00:53 AM
Parent: #0
( محمد وشك ) لم يكن درويشا أو معتوه ..
كان به مسٌ من الرب عظيم ..
تسكنه عاليات الأطياف من هناك ..
من لدن الكُنه البعيد للعوالم الغامضات .
و ( يقوم ) مع البحر ..
ما أن ترعد في مرتفعات الحبشة و ينتصب عِرقُ النيل هناك , و يُنذر قذفاً , حتى يمس محمد وشك ما يمسه من ذات حال الدميرة , و يعوده الطيف الغريب الآسر .
( ما للمدو الجزر بأحوال القمر ؟؟ و ما للنيل و طمي محمد وشك الخصيب ؟ ) .
....
ذات شتاء , و كلية الفنون تعج و تمور كبحر , و العام الأكاديمي على أواخره , و قد سرقتني ما يسرق البني آدم منا في عشرينيات عمره . فما رسمت إلا بالمزاج الذي هو في تلتلة و كرٍ و فرّ ..
و ما كنت لونتُ إلا ما لا يتجاوز القطع الثلاث زيتية .. و مثلها بألوان الماء و بعض الشخبطات بالباستيل و القواش ..
ذاك ما كان من أمر الرسم و الإستيفاءات الأكاديمية .. و قد انقضى العام الدراسي و ما زلت أكابد البحث في مادة الدراسات العامة ..
أطارد الطيب محمد الطيب و دكتور عبدالله الطيب و المكتبات المحشورة في لفائف الخرطوم بكتبها الصفراء القديمة , ثم حبوبة ناس فلان و جد ناس علان ..
علني أظفر بما يعينني على رصد مفهوم البطولة في الحكاية الشعبية .
ثم ما يزيد استعصاءً على عصيه .. هو أمر الداخليات و " قعداتها " الصبّاحية بالعود و الغناء متين الوجع و نقرشات الونسة و كواريك السياسة و ذكريات القبلات الاولى و الثانية ..
و الحبيب الذي هو أخا البدر سناءً و سنا و الذي - في النهايةِ - قد غدر , و الآخر الذي ما يزال في رحم المنى , و ذاك الجميل الذي ماسألناه ..
و كثير لغطٍ حول الركوكو و قيم فينوس الجمالية .. و القيامة الكنيسة و غوغان الذي شاخ ليرسم و غويا و الشمس التي تطلع لعيون الحبيبات ليلاً .. و .. و ..
داخلية المقرن لطلاب الفنون ( الكنيسة ) و صرير جنادب الليلة يعلو و يتحد في الشملة الكبيرة لأشجار الحديقة النباتية خلف الداخلية .
الكون في الحديقة النباتية عجيبٌ أمره في الليل , و قد كانت تقلقني " الكشكشات " تمرق من بين يوابس الأغصان و الشجيرات هناك و تنسرب صخّابة إلى أذني ..
و الدنيا ليلٌ هُسٌ أصمَتُ من قبر .
من عجبٍ أن تلك الكائنات تصن لأيّما صوتٍ لا ينتمي لها بوشيجة الدبيب الصامت و الظلمة !!
فتتوقف الجنادب حين يكشكش شيءٌ ما .. بغتة تكفّ عن الصرير .. و الضفادع تقطع الحركة , تماريها الأشجار و أغصانها عن الهفيف ..
و طيور الليل و الخفافيش تربض في الهواء مترقبة .. حتى الأسد في حديقة الحيوان القريبة يكف عن الزئير و القَنَتي ..
لا يتبقى من صوتٍ ضالٌ غريب .. إلا تلك الكشكشة المريبة ..
فأعرف أن ثمة ود ابن آدم يأتي بشيء تأباه الدنيا و ناموس الكائنات الآمنة تلك ( كشخصٌ يقضي حاجته الدنيئة .. حرامي يتحامى بشجرة .. عاشقان يذوبان قبلا .. شرطيٌ يتلبد ) .
طاحونة رأسي لا تكف عن الرحي , و رائحة التربنتاين و الألوان و تماويه الظلال النعسَىَ , و عبق ( الحلو مر ) تنبعث من درفة الدولاب مكسورة المفاصل .. ثم لاشيء .
غادرني ليلتها سيف اللعوتة .. تحدثنا و دخنّا , حاضرني – كعادته – عن الرفق بالقوارير و محمود محمد طه و صلاح محمد عيسى و السمندل و ما هو باين في العيون .. و .. و .. و
ما توقفنا كلاماً حتى كسر الليل صندلَهُ .. و سكن .
كنت ألون بمسام جنوني .. قطعة من طبيعةٍ صامتة ( ستيل لايف ) .
و قد أغوتني لوحتي من بعد كل ذاك الحديث مع " سيف " و الذي ندبني حضاً على فتح بوابات الروح على قصوى مشارعها .. فنويتها فتحاً لليلتي تلك ..
ارتميتُ أرسم .. وعلى الجدار القديم و بلونٍ أزرق لفرشاةٍ عجفاء , بقى وشمٌ قديم خطه أحدهم ( مِنْ أين .. يا امرأةً بُحّتْ لها حَنجُرة الغناءِ الجميلْ ) .. فانتصب شيطاني .. و النوايا ..
و آليتُ الليلة غزوةً ترقص على حمى إيقاعها بنات دمي .
رأيتُ برتقالتي تتدحرج - و الغرفة الزنزانة تخذت شكل الدماغ الكبير - ما كان دماغي .. لكنه كونٌ من أدمغةٍ ذواكرَ عبرنني .. و هواجس و مُنىٍ من ضبابٍ و إحَنْ .
وحدي كنت أمام لوحةٍ يتوجبُ الخلاص منها .. و ملزمٌ على محاحاتها لساعة متأخرة من ليلتي الجن تلك .
بابكر دينق كان يلح في أن أكمل مجموعتي لامتحان التخرج في قسم التلوين .
بابكر دينق هذا له مزاجه الذي يميل به - إن مال - إلى أن يقول لك و عن يقين : شُغُل ده سوي ليهو شوية أحمر هني , و هو العامل الجميل بقسم التلوين .
فتنتابك وساوس اللون , لتعيد قراءتها توجساً بصرياً - و الشوف شوف دينق - ..
لتعرف حينها كم أن هنري روسو كان مدهشاً , و أنك فقط فأرٌ أكاديمي مشروط بالتنظير العنكبوت و أطلاله .
تلك اللوحة في بهمة ليلتي تلك , و الشباك خلفي بحديقته و هوامه و أصوات مساءه .. يوسوس فاتحاً كوة في مؤخر رأسي ..
الشباك الحديدي أب سيخ , يطل على الحديقة النباتية في حي المقرن , و الدنيا شتاء .
....
( محمد وشك ) لم يكُ مجنونا ..
كنت و إياه نرتاد الخلاء ( فوق ) , عند أطراف البلد : حفير مشو ..
أو نلوذ بمقابرها و السور القديم للقبة هناك .. مستغرقٌ يكون هو في تأمل المقابر أو الصحراء العميقة تنسحب إلى جوف الأفق , و يغمغم :
ياخي ده مقلب كبير خلاص . ثم .. لا يزيد .
ظللتُ أصحو لأجده قابعا طرف فراشي في الديوان الكبير , ساهما في ملكوت الله بوجهٍ خلوٍ من التعبير , هو وجهٌ فقط ( و انا مفتونٌ بالأوجه الإنسان ) .
ينظر في عيني مباشرة دو ن أن يطرف - و ما لحظتُ عيناه تطرفان مُذ عرفته , أبدا - يقول بعدها : الشاي كيف ؟؟
نخرج أنا و إياه مصطحبين الأعشاب الخضراء اليابسة ملفوفة بعنايته .. و نقصد إلى النيل ..
يسبح ( محمد وشك ) إلى الجزيرة البعيدة ببطء .. و كأن لا حواس في جلده تتلمس يرودة ماء النهر اللازوردي الساكن في صفوه المرآة .. و غبشة الصباح الشمالي شديد القرس .
أتامل جسده الجذع العظيم لشجرةٍ عملاقة .. و هو يمعن سباحةً في قهر النهر و يبتعد في أناةٍ و بطء , فكأنما النهر منه و هو له ..
و أنا أمج اللفافات , و يأكلني قلقٌ لذيذ .
يعود صاحبي بودعاتٍ صغيراتٍ بيض , لا يكف عن تقليبها في يده .. و يردد :
ياخي ده مقلب كبير خلاص .
ثم يكوم ( طين البحر ) عندي .. تحت القيفة المبتلة قبالة النيل الشمالي , طميٌ متماسك طيب الرائحة , لزجٌ و نقي , يقول : كده بالله يا معلم أعمل لي دبتشي بيتشن .
ذلك فقط ما يتذكره من أسماء علقت بذاكرته بعد زياراته للخرطوم , و سينما كلوزيوم .. هذا الكاوبوي الـ ( دبتشي بيتشن ) و كان يعني روبرت ميتشوم .
فأظل أخلق له من الطين ما شاء من الدبتشي بتشنات , و نسوة عارياتٍ و خيل و لواري و تماسيح .. هو يقلبها و يبتسم لها و للدميرة الكبيرة داخل دماغه :
سبحان الله .. ياخي ده مقلب كبير خلاص .
....
أتراجع كنت إلى أبعد نقطة من تلك اللوحة , أسحب أنفاسا ثقيلة من أعقاب البرنجي المتناثرة على أرضية الغرفة العارية , و أعود إليها لوحتي .. تلك المتاهة .
يطن ويلسون .. و غارودي و كانط و إليوت , و موسيقى ترتكبني فأرتكب فيها شبقاً يتواطأ و اللون البرتقالي الفاحش الحار على اللوحة و حامل اللون .. مندغماً فيما لا كنه له .
تطن دنيا الحديقة النباتية , يفغر الشباك مزيدا من الكوى في مؤخر رأسي .. تتصاعد وتيرة حُمايَ .. فأوقن أكثر فأكثر بقدرية غوصي الآتية .
برتقالتان كانتا , و زجاجة خضراء ( بيرة ) .. تتماسكان على قطعة دلقان لا لون لها , ذاك كان كل الفخ اللازم .. و أنا الطريدة .
كنت أرسم بسكين اللون .. و طيّعةً كانت كأنني ما كنت من يحركها .. لطعاتٍ لونية سميكة تتراكم فوق بعضٍ مع كل نصل يقعي على سطح اللوحة .. و الحياة تدب في الشرك الذي أهيئ حباله لي .
رائحة زيت التربنتاين تزكم خيالاتي , و كهربية دماغي في أطيب أعالي مدها الكيلواطي , و الإستدعاءات في الذاكرة تطلق صافراتها . ضجيجٌ متجانس من كل ذاك ..
فلا الإنسان حواس خمس ورطتئذٍ .. بل كنتٌ ملايين الحواس الكونية مكتملة العدة للطفرة القادمة قفزاً في الزمان الطليق .
متحدٌ كنت و هذا الطوفان الراعف بيني و الوجود الذي فتح مغارة سِرّهُ القُدس لي .
ثم .. تدحرجَت - البرتقالة الشيطان اللون - أقسم أني رأيتها تتدحرج , البرتقالة تدحرجت أماماً و التمع تكور كتلتها و هي تفعل ..
ساحبة معها ألوانها المبتلة بطيئاً .. تزمع سقوطاً من اللوحة , ارتعشت عضلة يدي بلا إرادة كمن يهم بمحاولةٍ لالتقاط برتقالتي و ألوانها المندلقات من السقوط .
في الثانية التي أخذتني فيها شهقة الرعب و الدهشة و محاولة تحديد المعادلة الحيرى بين التوهم و الحقيقة , بين ميتافيزيقا الوجود و اليقين فيه ..
في تلك الطرفة من الزمان تماما .. توقفت البرتقالة الشرك / اللون عن الحراك ..
فاجَأتْها ( عقلنتيَ ) الخرقاء و هي تتخلق في عُري هويتها الطـازجة .. و هي مضغةٌ تقطع المسافة بين الفكرة المحضة و اليقين الوجودي ..
فاستحَتْ و غضِبَتْ .. وأمسَكَتْ , فسَكَنَتْ .
من يومها .. ساكنةٌ هي الأشياء عندي , من بعد أن أضِعتُ روحها في غيبوبة الظل المنعكس ..
و شرخ مرايايَ الغبشاء .. وعتمة روحي المتهالكة .
....
( محمد وشك ) لم يكن مجنونا ..
كان فقط .. بصيراً .
|
Post: #2
Title: Re: ياخي .. ده مقلب كبير خلاص
Author: كمال سالم
Date: 06-07-2008, 00:57 AM
Parent: #1
والبصاره تفوتك إنت وين ياعماد ,, مساك زين ,, وفى روايه صباحك زين ,,
|
Post: #3
Title: Re: ياخي .. ده مقلب كبير خلاص
Author: Emad Abdulla
Date: 06-07-2008, 01:02 AM
Parent: #2
يسعد صباحك يا كمال ..
ما سمعت بالبصيرة ام حمد ؟؟
بس ياها حالنا ..
نحمدو .
.......
تحيات للجميل عادل
|
Post: #4
Title: Re: ياخي .. ده مقلب كبير خلاص
Author: سلمى الشيخ سلامة
Date: 06-07-2008, 02:22 AM
Parent: #3
فعلا هو مقلب كبير
لكن اكبر منه انت
انت اكبر مقلب عرفته فى حياتى
تعرف ليه ؟
لانك تستبيح اللغة
تجعلها ميدانا لمقاتلة الكلمات
تجعل الكلمات تبحث عن مخرج لها منك
هو مقلب يا صديقى
وكلنا (تمقلبنا )
فاى الجهات نروم ؟
ان كنت انت سيد الحرف تقول انه مقلب فماذا نحن قائلون ؟
او قائلين ؟
لا يهم احيانا لايهم
قال صديقى المجنون كليا
جنونا يجعله اعقل الناس ابدا
هل سنموت يوما ؟
جميعنا ؟
اذن لماذا خلقنا ؟
كان ذلك طفل فى الخامسة من عمره يسال والده حين مات خاله
لذا ياصديقى انه مقلب
وكذا قال قاسم نصر جمل الكائنات ابدا
انه مقلب يا بت الشيخ لو كانوا خيرونا لاخترنا ان لاناتى قط
كنا اتينا يا صديقى الى متن هذا المقلب
فهل سنتركه كما تدعى انت ؟
لن ولم ولن ولن هو لنا
علينا ان نرص حاجاتنا فى داخله ونمضى الى حيث يشاء
او نشاء فى لحظة اخرى
يا عماد مالك على ؟ لخبت كيانى الله يلخبت غزلك
وبعد دا كله تطلع من الحفير ؟
ياخ (روه ) ربنا يجعل لك فى كل خطوة سلامة
وابقى زور ناس جدك شميلة واغريهم السلام
محبتى
|
Post: #16
Title: Re: ياخي .. ده مقلب كبير خلاص
Author: Emad Abdulla
Date: 06-07-2008, 10:42 AM
Parent: #4
[]
| Quote: علينا ان نرص حاجاتنا فى داخله ونمضى الى حيث يشاء |
يللا .. نرصها يا سلمى التي أحب ..
عارفة ..
هو الرصصان ده زاتو المشكلة ..
ترص شنو وللا شنو ؟؟ .. و شنو فوق شنو عشان شنو التاني داك ما يتكسر أو يتخدش ؟؟
الرصصان زاتو مقلب يا سلمى ..
نعمل شنو ؟؟
كلماتك على القلب .. بلسم ..
يا بت يا فلتة .
..........
عثمان حسين مات ..
|
Post: #5
Title: Re: ياخي .. ده مقلب كبير خلاص
Author: khatab
Date: 06-07-2008, 02:25 AM
Parent: #3
..
. .. تعرف ياعمده انت دخلت الكتابه فى محك صعب او .. مقلب كبير زيما شخصك النيلى
.. ما اروعها كتابه
لقد اخذتنى عنوه فى جوله فوق العاده .. سحت هناك ملئ انفاسى وعدت محتشداعطايا ..
لك انيق الورد
...
. ولصديقى سيف اللعوته
.
.غادرني ليلتها سيف اللعوتة .. تحدثنا و دخنّا , حاضرني – كعادته – عن الرفق بالقوارير و محمود محمد طه و صلاح محمد عيسى و السمندل و ما هو باين في العيون .. و .. و .. و
ما توقفنا كلاماً حتى كسر الليل صندلَهُ .. و سكن
...
.
|
Post: #18
Title: Re: ياخي .. ده مقلب كبير خلاص
Author: Emad Abdulla
Date: 06-07-2008, 12:32 PM
Parent: #5
سيف اللعوتة نصيبة من نصايب الله ..
و رسام مخيف ..
و إنت أصلو ما بتعرف غير الناس الفيها بسم الله الرحمن الرحيم ..
يا المحاولين ما تشربو المقلب ..
و مرازين مرازين مرازين .
ليك في القلب ما ليك يا صاحب ..
و شاكر شوفك , و الكلمات ..
.......
( مافي الجبة .. غير الله )
|
Post: #27
Title: Re: ياخي .. ده مقلب كبير خلاص
Author: GamarBoBa
Date: 06-08-2008, 06:24 PM
Parent: #5
يا أرلون
ياخي بحسدك لي كتاباتك
وبحسدك في زوارك الجمليين...مع انو ما بفتح بوست جديد اصلا الا نادرا
Quote: ..
. .. تعرف ياعمده انت دخلت الكتابه فى محك صعب او .. مقلب كبير زيما شخصك النيلى
.. ما اروعها كتابه
لقد اخذتنى عنوه فى جوله فوق العاده .. سحت هناك ملئ انفاسى وعدت محتشداعطايا ..
لك انيق الورد
...
. ولصديقى سيف اللعوته
.
.غادرني ليلتها سيف اللعوتة .. تحدثنا و دخنّا , حاضرني – كعادته – عن الرفق بالقوارير و محمود محمد طه و صلاح محمد عيسى و السمندل و ما هو باين في العيون .. و .. و .. و
ما توقفنا كلاماً حتى كسر الليل صندلَهُ .. و سكن
...
. |
خطاب تأسره الكلمة فيحررها كما يريد
صدق ممكن اجي الديم اطقطقك حسادة بس .....
الرحمة يا مسلم
|
Post: #6
Title: Re: ياخي .. ده مقلب كبير خلاص
Author: Nasr
Date: 06-07-2008, 03:40 AM
Parent: #1
أنا ذاتي قربت أندفق مع الألوان والبرتقالة من اللوحة
أكتب
أكتب دوما يا عماد
|
Post: #7
Title: Re: ياخي .. ده مقلب كبير خلاص
Author: Baha Elhadi
Date: 06-07-2008, 04:28 AM
Parent: #6
الأخ عماد:
انت زول جميل وسمح
وورطة كبيرة جدا للبباري كتاباتك السمحة دي
يقعد يزازي متين تنهمر
جنب النيل أو في حواري الديم
وكذلك أيضا انت مقلب
تعرف ليه؟
عشان بتخلي الزول يدمنك
والادمان دا مقلب
دخلت انت فيهو ناس كتار
ذكرتني صديقي من ( مجانين الفنون) كما كنا نطلق عليهم
والدنيا امتحانات وعليه أن ينجز عملا فنيا
وهو كان يقضي كل الوقت فيما هو معروف عند أولاد الفنون
المهم :
الورطة حصلت
أحضر كمية من الألوان ومزجها كيفما اتفق
وبسط لوحته
وتمجلس كما ولدته أمه على الورقة
وكانت لوحة
كل من رآها يجزم أنها شنو وشنو
وصديقي يضحك لفجاجة القوم
واصل ما تقيف
بهاء
|
Post: #8
Title: Re: ياخي .. ده مقلب كبير خلاص
Author: Ishraga Mustafa
Date: 06-07-2008, 06:04 AM
Parent: #7
Quote: أكتب
أكتب دوما يا عماد |
اذن انت بخير ياصديقنا فى دروب {المقالب} العظيمة
|
Post: #9
Title: Re: ياخي .. ده مقلب كبير خلاص
Author: ibrahim kojan
Date: 06-07-2008, 07:36 AM
Parent: #8
ترفع رجلك اليمني لا ... إلاّ لانّ اليسري كانت أكثر إنخفاضاً .. هكذا فاجأتني سيوف العقلنه وقتها....
وتدور بك طواحينك مجدداً ثم تهمد فجأةً... ثم تزدريك عندما تموت (حركات السكون فيك).. للسكون حركه لا يعرفها إلاّ من سكن دميرة النهر أوانها ...
وللسكون حركه لا يعرفها إلاّ من أتي أطراف الصّحاري .. وتبرّك علي مسام الصمت متأمِّلاً صمتا ...
ولدوائر اللون.......
ذلك الصّمت المهيب, بجنون قٌسوته عليك.
إمتدّ صمته لزهاء ثلاث سنين صفراء ... رسم فيها كلِّ حقول التبن وصرير( الهيي) وتراتيل عباّد الشمس ولم ينفجر صمته!
غنّي بقيثارته( لكاتيا) .. لم تسمعه كاتيا ..
سمعته كلِّ الحقول المتراميه صمتاً حول خاصرته.. التي يخرج منها ما يخرج من بين الصلب والتّرائب..
توّقف من الرّسم لبرهةٍ إمتدت لعام وأكثر.. وضع مرسمه كٌّله علي حافة حقلٍ صامت وما برح مكانه يعزف موسيقاه في صمت.. يشبه الأكنائس أنيناً .. لم يسمعه أحد .. لم يطرب له أحد... فقط توّرقت أزهار عبّاد الشمس ونمت حتّي فاقت حدّها.. ونمت حتي بلغت إحداهن أطراف الكهوله.. ونمت أُخري حتي تيبّست أطرافها وزفّت جسدها للريح.....(ف.ج)
قال ما قال من (دينك!)....... وتنحّي
تاركاً السِّكون يصدمك بلطعةً بٌرتقاليةً ..
تقول ... هأ... وتزفر ما بداخلك من هواء وتموت واقفاً...
هأ…. متُّ واقفاً
وتمّوجت كلمة
علي وجهي!!!SQUISH!
لك صباحاتك والله يدينا ويديكم... ( لا أعرف كيف يكون لهذا اليوم نهايه)....
|
Post: #21
Title: Re: ياخي .. ده مقلب كبير خلاص
Author: Emad Abdulla
Date: 06-07-2008, 09:33 PM
Parent: #7
تعرف يا بهاء ..
الرد على كلامك ده هو عين الورطة .
ليس أسمح من أن تربت عليك يد صاحبة ..
و الأسمح أن تلقى من يستمع لجنك ..
و لا يرزع في وجهك الباب .
يا صاحبي ..
بتديني كتير ..
و هذا كرم منك ..
فلك الود .. و كثير امتنان .
|
Post: #31
Title: Re: ياخي .. ده مقلب كبير خلاص
Author: Baha Elhadi
Date: 06-09-2008, 07:14 AM
Parent: #21
الأستاذ عماد:
ولا يحق لي إلا مناداتك بهذا اللقب
فأنت تستحقه
لاأعرفك من قبل
ولكن قيل : تكلم حتى أراك
وانا أراك بعين من يلتقط جياد الكلم المعبر الشفيف
أول ما أدخل المنبر أبحث عنك في كتاباتك
وأغوص فيها
دوما لي ولع وعشق خاص بأهل الفنون
ويقيني أنهم مبدعون حقا ليس في الامساك بالريشة
بل بناصية اللغة والتمكن منها
لذا احبك واحب كتاباتك الموغلة في الجمال
لك مودتي وعربون ود مقيم لك ولما تكتب
بهاء/طوكيو
|
Post: #20
Title: Re: ياخي .. ده مقلب كبير خلاص
Author: Emad Abdulla
Date: 06-07-2008, 09:13 PM
Parent: #6
مساء الحزن يا نصر ..
ياريتني لو كنت إندفقت ..
أما الكتابة فهي عندي فعل تفريج ..
حين تنسد المسام .. و تتورم روحك ..
فتقوم تفكها و تفرجها بالكتابة ..
شاكر كلماتك يا نصر .
|
Post: #10
Title: Re: ياخي .. ده مقلب كبير خلاص
Author: ibrahim kojan
Date: 06-07-2008, 09:22 AM
Parent: #1
أقسم أنني رأيتها تتدحرج!!!!!!!!!!!
لا حوله .. منك يا دماغ الجن
|
Post: #11
Title: Re: ياخي .. ده مقلب كبير خلاص
Author: Emad Abdulla
Date: 06-07-2008, 10:15 AM
Parent: #10
محمد وِشْك wishk
( بورتريه ) رسمته في عامٍ أخضر ..
حبر على ورق .. !!!
..........
و هل نحن إلا حبر على ورق ؟؟
|
Post: #12
Title: Re: ياخي .. ده مقلب كبير خلاص
Author: ابو جهينة
Date: 06-07-2008, 10:15 AM
Parent: #10
العماد ( عماد )
سلام كبير خلاص
هذه كتابة معجونة بطين الجروف التي سكنها ( محمد وشك )
ثم :
Quote: محمد وشك ) لم يكُ مجنونا ..
كنت و إياه نرتاد الخلاء ( فوق ) , عند أطراف البلد : حفير مشو ..
أو نلوذ بمقابرها و السور القديم للقبة هناك .. مستغرقٌ يكون هو في تأمل المقابر أو الصحراء العميقة تنسحب إلى جوف الأفق , و يغمغم :
ياخي ده مقلب كبير خلاص . ثم .. لا يزيد . |
دة ما مجنون .. فجملته ( دة مقلب كبير خاص ) .... تلخص ورطة بني البشر منذ أن طمع أبونا في الخلود ثم أوْرث ذريته هذ ( المقلب الكبير خلاص ) ...
و الله يا عماد لو وضعت هذه الجملة في أي ملف من ملفات الحياة .. ستجد أنها بادئة لكل منحى من مناحي الحياة و نهايته ... بل هي جملة Default
تحياتي
تخريمة : أرجو قراءة بوست الوغد دكين FAO
|
Post: #14
Title: Re: ياخي .. ده مقلب كبير خلاص
Author: محمد سنى دفع الله
Date: 06-07-2008, 10:30 AM
Parent: #12
مقلبك ده ذكرني مقلب
كــــــــشو
بتعرف كــشــو
كشو ده جنرال مليان نياشين وعندو كاب كاكي مهترئ
وبلبس ردى كاكي ومرات بووت ومرات حفيان
بنظف الشوارع من الورق
خاصة شارع الأربعين من اولو لي اخرو
اها يوم رمى التمام لي امدرمان
ووتعظيم سلام لي شارع الأربعين
وقال ننطف الشارع
عيونو نطت لي برة
وجنو اتوازن
لقى الشارع نضيف وفي عربات نظافة بتنضف وفيها اجانب
بيض
طوالي رجع لي ورا وقال خواجات
امك مـــقـــــلـــــب
وتاني ما ظهر لي الليلة
مقلب ....
|
Post: #13
Title: Re: ياخي .. ده مقلب كبير خلاص
Author: محمد حامد جمعه
Date: 06-07-2008, 10:19 AM
Parent: #1
عماد
عارف انا عندى اراء ايجابية فى شلتين الديامة والشيوعيين لمن يختو الكورة على الارض ، وبستمتع جدا بكتابتك نص ولون وشخوص وزقاقات ... بالجد والله
|
Post: #15
Title: Re: ياخي .. ده مقلب كبير خلاص
Author: sanaa gaffer
Date: 06-07-2008, 10:32 AM
Parent: #1
ياخي دة مقلب كبير خلاص !!!! ...
جملة متعددة الاستعمالات .. مرهونة بالاحوال ... معجونة بحيرة البني آدم المسكين المخذول في حاجات كتيرة وناس كتار ...
اتخيل لمن ولادتك تبقى مقلب !!
دراستك وتعبك وشهاداتك تبقى مقلب !!
انسانيتك تبقى مقلب !!
صداقاتك تبقى مقلب !!
لو قلنا الحياة زاتا مقلب دة بيدخلنا في متاهات اكبر مننا .. يبقى حنخلي الحياة برة الوصفة .. ونكتفي بمكوناتها الداخلية ...
عماد ...
شكرا ياخي ...
|
Post: #17
Title: Re: ياخي .. ده مقلب كبير خلاص
Author: مجاهد عبدالله
Date: 06-07-2008, 11:06 AM
Parent: #1
Quote: مستغرقٌ يكون هو في تأمل المقابر أو الصحراء العميقة تنسحب إلى جوف الأفق , و يغمغم :
ياخي ده مقلب كبير خلاص . ثم .. لا يزيد |
يا سلام يا وشك ..
فالتأمل لم يكن في المقبورون المصفوفون ..
ولم يكن في الأفق الذي يأكل مد البصر من النظر ..
وحتى الغمغمة لم ترشد على أنها من خارج القلب ..
بل كانت من سويدائه ..
غمغمة كانت ترجمة ..
فإشارة البصر توافقت مع البصيرة ..
عند وشك ..
وليته كتم غمغمته ..
وما ألجم ألسنتنى..
فالحياة مقلب كبير ..
لمن لايعقلها..
ويدرك أنه سوف يُصف يوماً ما..
في القبور .
وفعلاً محمد وشك لم يكن سوى بصيراً ..
وبصيراً بسر الحياة..
عماد المحترم حياك المطر الذي يرعف في تلك القيفة فيعطر طينها..
وشكري الجزيل لسماحك لي بمخاطبة محمد وشك ..
خالص الود ..
|
Post: #19
Title: Re: ياخي .. ده مقلب كبير خلاص
Author: الجندرية
Date: 06-07-2008, 05:22 PM
Parent: #1
امممممممك
سعادتو شخصياً؟؟
والله اكبر مقلب ياعماد
قرقرقرقر
|
Post: #22
Title: Re: ياخي .. ده مقلب كبير خلاص
Author: emad altaib
Date: 06-07-2008, 09:50 PM
Parent: #1
ــــــــــــ
Quote: فلا الإنسان حواس خمس ورطتئذٍ .. بل كنتٌ ملايين الحواس الكونية مكتملة العدة للطفرة القادمة قفزاً في الزمان الطليق .
متحدٌ كنت و هذا الطوفان الراعف بيني و الوجود الذي فتح مغارة سِرّهُ القُدس لي .
ثم .. تدحرجَت - البرتقالة الشيطان اللون - أقسم أني رأيتها تتدحرج , البرتقالة تدحرجت أماماً و التمع تكور كتلتها و هي تفعل ..
ساحبة معها ألوانها المبتلة بطيئاً .. تزمع سقوطاً من اللوحة , ارتعشت عضلة يدي بلا إرادة كمن يهم بمحاولةٍ لالتقاط برتقالتي و ألوانها المندلقات من السقوط |
الأستاذ:الفنان جداً عماد عبد الله
يا إلهي ...؟!
الزول ده قال ليكم (أقسم) ملاء جوفه بعظمة العظيم.. وقال شافها تتدحرجت؟!
والله لوقال طاحت وأكلها لصدقته..!
عارفين ليه؟!
لانو الفنان المخلوق هذا أسقط (روحه) كاملةً في نص اللوحة فتشبثت بالحياة وتنقله الذهني
وتغيره للامكنة وعشقها ,وحرية السفر من خلال الذاكرة والإحساسات بمواطن الوجود من خلال الإنفعالات
الوجدانية "الشجر,والاصحاب والقبل والنيل والسياسه ...و...و كلها كانت حاضره
ويبدو لي أن المقلب الحقيقي جاء (تمرد) داخلي ,فاللوحة تخرج بدفء محتجة بأنها لم تكن ألوان
صارخة وصريحة وقويه فقط ,بل بها حياة إكتسبتها من وحي الفنان,...!
الظروف الزمانية في الليل بين الحياة والسكون , والرجل ده خلق من الطين مجسمات كثيره لكن
لم تكن تتجلي فيها الروح ,وإكتملت في اللوحة من خلال الريشة السكين وكانت فيها ايضاً حياه
وذكر إنها طائعة؟!
فقد نطقت اللوحة .. بالحركة؟!
وهذا هو المقلب ...واللي ما بيصدقه أخذالمقلب
وشكراً لك فقد إستمتعت حتي المني
|
Post: #23
Title: Re: ياخي .. ده مقلب كبير خلاص
Author: أبو ساندرا
Date: 06-08-2008, 09:22 AM
Parent: #1
Quote: في الثانية التي أخذتني فيها شهقة الرعب و الدهشة و محاولة تحديد المعادلة الحيرى بين التوهم و الحقيقة , بين ميتافيزيقا الوجود و اليقين فيه ..
في تلك الطرفة من الزمان تماما .. توقفت البرتقالة الشرك / اللون عن الحراك ..
فاجَأتْها ( عقلنتيَ ) الخرقاء و هي تتخلق في عُري هويتها الطـازجة .. و هي مضغةٌ تقطع المسافة بين الفكرة المحضة و اليقين الوجودي ..
فاستحَتْ و غضِبَتْ .. وأمسَكَتْ , فسَكَنَتْ .
من يومها .. ساكنةٌ هي الأشياء عندي , من بعد أن أضِعتُ روحها في غيبوبة الظل المنعكس ..
و شرخ مرايايَ الغبشاء .. وعتمة روحي المتهالكة .
....
( محمد وشك ) لم يكن مجنونا ..
كان فقط .. بصيراً .
|
لو صبرت
وما لاويت
يا عماد
في تلك اللحظة بين التوهان والحقيقة
وتدحرجت أو سموت في أعالي التوهان
لماسكنت الأشياء عندك
لتحركت الأشياء
وتدرج البرتقال
وتراقصت الخلفيات وترجرجت
وتبرجت الروح ، روحك
ولقلنا نحن :
{ عماد عبدالله} لم يكن مجنونآ..
كان فقط .. بصيرآ
وعارفآ بالأشياء
ونافذآ بالبصر
والبصيرة
ولرأيناه يطقع مع قعر بابور
ويبرطم مع كجامة
|
Post: #24
Title: Re: ياخي .. ده مقلب كبير خلاص
Author: tayseer alnworani
Date: 06-08-2008, 11:27 AM
Parent: #23
Quote: في تلك الطرفة من الزمان تماما .. توقفت البرتقالة الشرك / اللون عن الحراك ..
فاجَأتْها ( عقلنتيَ ) الخرقاء و هي تتخلق في عُري هويتها الطـازجة .. و هي مضغةٌ تقطع المسافة بين الفكرة المحضة و اليقين الوجودي ..
فاستحَتْ و غضِبَتْ .. وأمسَكَتْ , فسَكَنَتْ .
من يومها .. ساكنةٌ هي الأشياء عندي , من بعد أن أضِعتُ روحها في غيبوبة الظل المنعكس ..
و شرخ مرايايَ الغبشاء .. وعتمة روحي المتهالكة .
.... |
عماد الفنان
اكتب فانت تفتح فينا مسارب للضى و كوة للضو تنيرفينا لحظات الذكريات و الصدق
وصية
امانة فى ذمتك يا عماد ما تقول الكلام ده تانى ففى دواخلك ابداع نحن ننتظره بلهفة .
|
Post: #25
Title: Re: ياخي .. ده مقلب كبير خلاص
Author: emad altaib
Date: 06-08-2008, 04:14 PM
Parent: #1
]ده... ما البوست البيحتل ...ابداً...!
فووووق من أجل الفن الراقي
|
Post: #26
Title: Re: ياخي .. ده مقلب كبير خلاص
Author: Salah Abdulla
Date: 06-08-2008, 05:32 PM
Parent: #25
المقلب الكبير هو ما نحن فيه الآن ..
سيرة الموت تسوق الى سماع حِكم من كان بهم مسٌ عظيم
ووشك أحدهم ..
كان يذهب الى المقابر مساء وبعد أن يملأ رأسه بالأبخرة والسوائل ،
ويجلس بالقرب من قبر صديقه (أونقي) الذي قُُتل ، ولم يُعرف قاتله
ويبدأ في البكاء الخفيض ، ثم يصيح باعلى صوته طالباً
من صديقه أن يبطل الحركات البيعمل فيها دي ويقوم !!
هي سيرة الموت يا صديقي ، ومقلب الحياة ..
ما مضى قد مضى ، ولن نستطيع وقف القادم ..
رحم الله عثمان حسين ..
|
Post: #28
Title: Re: ياخي .. ده مقلب كبير خلاص
Author: عثمان دغيس
Date: 06-08-2008, 06:59 PM
Parent: #1
الله يرحمك يا عثمان حسين ..
ويرحمك يا عماد عبد الله ..
أينما وكيفما حللت ..
|
Post: #29
Title: Re: ياخي .. ده مقلب كبير خلاص
Author: دينا خالد
Date: 06-08-2008, 09:33 PM
Parent: #28
| Quote: ( محمد وشك ) لم يكن مجنونا .. |
هو من ناحية مجنون ,,, مجنون والله ,,, بس ، تقدر تقول جنو ما كلكى !!
ــــــــــــــــ
عماد ؟؟ مااا بتلقى لينا كدا ( نص) نفهموا ؟؟
بعدين لازم تراعى انو معانا اعاجم ومكسربن وعجزة وارامل وكدا !!
ممكن بعد كدا الواحد يتدحرج ؟؟
عثمان كان راجل جمييل ومنعش ,,, متاكده انا انو سعيد !
|
Post: #30
Title: Re: ياخي .. ده مقلب كبير خلاص
Author: يوسف الولى
Date: 06-09-2008, 05:14 AM
Parent: #1
ولا زلت اتجول بين السطور
|
Post: #32
Title: Re: ياخي .. ده مقلب كبير خلاص
Author: tmbis
Date: 06-09-2008, 08:30 AM
Parent: #30
Quote: طالباً
من صديقه أن يبطل الحركات البيعمل فيها دي ويقوم !! |
لا حول الله ..
والله يا اصليين ادبتو الاحساس .. واللغـة ..
يا غــرجي ..
غايتو الشئ البعرفو .. طالبك ونسة راس .. رجل لـرجل.
كنت عايز اقول ليك امشي لي ابوي والله يطير ليك الكتابة دي من راسك ..
لكن لقيتنا مافيشين والعالم اصبح قرية صغيرة ..
تعرف يا اصلي:
لما اكةون بقرا ليك في كتابة .. قاعد احس انون الشخصيات الجوه دي بتتحرك .. ومرات بسمع صوته عديل كدا ..
دا كلام جد والله ..
بعدين كتير جدا بتعمل لي (ابديتن) لكل تفاصيلي العشتها ..
مرات بشك انك جاسوس الواحد ..
اكتب يا جاسوس .. والله العظيم لو الناس الدخلت هنا دي استمتعت .. ما اظنها تكون وصلت حد المتعة المعاي دي ..
اللذ حاجة شنـو إنت قايل ..؟
قمت طبعت الحاجة دي كالعادة .. قلت امشي البيت اقزقز بيها واختها تحت المخدة .. لانو لو ما قعدت تحت المخدة .. وطلعتها تاني المسالة ما بتظبط معاي
اهـا
لما مشيت البيت وبفتش في الورق .. لقيت اني خمشت لي جواب مكتوب لي منو كدا ما عارف كان قدامي بس ولفحتو ..
قلت هيي ياربي عماد دا جنه واللا شنــو..؟ 
جيت الصباح وقبال ما بخاري يجيني لقيت الحاجات دي قاعده في درج المكتب ..
شفت المقلب دا كبير كيفن..؟
|
Post: #33
Title: Re: ياخي .. ده مقلب كبير خلاص
Author: عمران حسن صالح
Date: 06-09-2008, 08:45 AM
Parent: #32
|
Post: #34
Title: Re: ياخي .. ده مقلب كبير خلاص
Author: Emad Abdulla
Date: 06-13-2008, 08:22 AM
Parent: #33
حال ما حال يا وشك يا صاحبي ..
و .. جحا قال : ( بعد أنا امرق , إن شا الله رِحم أمي الينسدّ ) ..
.....
يا وشك :
( دنياد فايدة كومون ) ..
Donyad fayida comun
|
Post: #35
Title: Re: ياخي .. ده مقلب كبير خلاص
Author: rosemen osman
Date: 06-13-2008, 10:25 AM
Parent: #34
محمد وشك وعماد مقلب كبير
وأحنا مقلب كبير , والحياة مقلب أكبر
النيل زير نساء
لم تشبعه كل عرائس النيل
ومازال مجنونا يفيض كل عام معلنا عن ثوراته
ويسأل هل من مزيد؟
الكشكشة خلف الشجر ممنوعة بأمر القانون
ونحن نخاف القانون
لذا كففنا عن فعل الكشكشة
تصلبت البرتقالة لأكتشافها أنك مقلب كبير
وربما قرأت فى عينيك نظرات نهمة
فخافت على عذريتها
ترفق ... ترفق ...ترفق
ويا ليهم ويا ليتها تترفق بنا
|
Post: #36
Title: Re: ياخي .. ده مقلب كبير خلاص
Author: محمد البشرى الخضر
Date: 06-13-2008, 01:45 PM
Parent: #1
| Quote: ياخي .. ده مقلب كبير خلاص |
آمنت بيك ياعمدة
دي شفافية وقراءة رهيبة للمستقبل
يادوب وقع لي عنوانك
اتمنى يكون وقع ليك برضو
|
|