بارانويا ..

و .. أنزِلُه البحرَ .
( هذا الإله الغريق ) .
قال :
: في شُرفة الموج منزلة ..
فتعال .
قلت : قِفْ .
كنت أقرأُه البحرَ سراً ..
و يُقرِأني ساكنيهِ السلامْ .

تجاسرتُُ .. قلتُُ :
: أنا العاشقيك .
تراكض في الرمل لمعانه منذ ذاك ..
و تبّّت يدا أمنا الأرض ..
ثم .. ارتضتها الإقامة من ذلة ..
( فهانحنُ ذا .. و إلى يُبعثون ) ..
: فقف .

لا استطابت يوافعها السلطعونات قزقزة الحلم في نزهة العصر .
لا , ولا البحر غرغر دخان فردوس مرجانه المعدْني ..
على عتهه مستدام البهاء , و لذته العبثية .
( و أيضاً إلى يُُبعَثونْ ) .

نادمته - البحر – حين أعاد إليّ المحاجر .
كنا سُكارى كيوم خُلقنا ..
فأسررتُه ( و أنا منه ميمنةٌ ) بخبايا اليوابسْ ..
قرّظني بالنشيد ..
و ضرضرني بقليل يقينٍ مُمَلحْ .
ثم ..
همّ إليّ فأجلسني في المقام ..
و برقشني بالنوارسْ ..
حوطني بالرُقى و التمائم ..
و القوقعات النوايا .. - على كثرها الطحلبي -
و .. بالكلمات العتيقة .
( و كنت أراود عن نفسها ذات تلك الأماني .. تماما كيوم خُلِقتُ ) .
قال : تأمل ..
تأملتُ :
يا ربُّ ..
يا قمراً لؤلؤياً مقشّر .

: يا أبتي - قلتُ للبحر - كم علّنا باخعين !!
أشاح ..
فإذ ..
يتلقفني الموجُ .. من لجة الموج ..
في لجة الموج ..
في مكمن الزرقة الفارغة ..
(و أيضا تماما كيوم خُلِقتُ ) .

عـــمــاد
من يتلقفك من لجة الموج
ويدفع بمركب هواك
الى شيمة المفازة الماء
وصدى الغناء لايراوح مكانه
اتسمعني
انا هنا
من يسمعني
من يصغ لهواجسي
أهذه الأشجار الصاخبة بالحياة
أم هي السهول
إنها غافية في ملكوت سحرها
تتأمل بإجلال صخب
جنونها وجنوني
ا ن ا ه ن ا

Quote: نادمته - البحر – حين أعاد إليّ المحاجر . كنا سُكارى كيوم خُلقنا .. فأسررتُه ( و أنا منه ميمنةٌ ) بخبايا اليوابسْ .. قرّظني بالنشيد .. و ضرضرني بقليل يقينٍ مُمَلحْ . ثم .. همّ إليّ فأجلسني في المقام .. و برقشني بالنوارسْ .. حوطني بالرُقى و التمائم .. و القوقعات النوايا .. - على كثرها الطحلبي - و .. بالكلمات العتيقة . ( و كنت أراود عن نفسها ذات تلك الأماني .. تماما كيوم خُلِقتُ ) . قال : تأمل .. تأملتُ : يا ربُّ .. يا قمراً لؤلؤياً مقشّر

أيا عماد العماد ! وينك ياخى ما طولنا شديد ..

أتتركنا لمن ؟! , وهذا هو السنى الوديع يسألك ذات السؤال ,

من يتلقفك من لجة الموج
ويدفع بمركب هواك
إلى شيمة المفازه الماء
وصدى الغناء لا يراوح مكانه !

اذن انه شيخي وصديقي عماد يناجي البحر ويعاقر الصهيل ويعيدنا الي البوح الجميل,,
فتت يا عماد مسام الغناء السكن الجوف
شتت رؤاك البتشبه غناوي الطابور
اصدح
غني
اعزف
اعد الينا وتر الوجدان والقوس
ابني
شيد
عمر
جوفنا يا عماد بالدهشة وصهيلنا الذي انت صداه...
كل الاحترام والتحايا في حضرة الفنان عماد عبدالله..وحضور تام وقرفصاء دائم..

صاحب الحكايا ..
مساء الخير يا كريم ..


لا أجد لكلماتك إلا الإنحناء لها ..
و إعزاز قدر محبتي لك ..


مودتي و احترامي .

Quote: شيمة المفازه الماء

و شيمة الماء أن يغنينا ..
فننسى .. ( إن كان ثمة مقدرة ) .

تحياتي يا مامون ..
لكنه الهم الذي هبش العضُم ..
و الكلام دخل الحوش ..

مودتي و إعزازي .

Quote: غافية في ملكوت سحرها تتأمل بإجلال صخب جنونها وجنوني

و هو ذاك يا سني ..
التأمل في هذا الجنون الصاخب في سكونه الكبير ..


مودتي و احترامي يا صاحب .

Quote: و ضرضرني

الله لا ضراك يا عمدة .. واصل كلامك النشيد ...

Quote: الله لا ضراك يا عمدة .. واصل كلامك النشيد ...

هبشك الما ضراك يا منعم .

ده لا نشيد ولا يحزنون .
نسميه في الديم ( جلبغة ) ..

مودتي و الإحترام .

قبل أن اعود لاحقا او محلقا فى
طقوس الجرتق قبل الضريرة
وانا الضرير فى محرابك ياصديقى0


أهديك من كلام عاطف خيرى وغنا مصطفى من قصيدة: سيناريو البحث عن يابسة
( انزل مسافة تهبشك غنوة
واناولك كأس)

أخى أستاذ عماد سلام
ألحب ألجميل ألذى يتلغفك من (كونيات) ألبحرالطامح
قد حرك فيك أحلى صبوات ألفنانين ألشباب ألكبار
يا عماد لك عندى أحترام كبير
وتجدنى( أساسق)حافى للحرف المريح المفيد وألباقى ,,,,,
سلام عليك . و سلام على نيل بلادى سلام
عثمان

أخي عثمان ..

تحياتي القلبية ..
و عميق شكري لكلماتك ..
أسعدني كثيرا مرورك الجميل ..
كن قريبا .

مودتي و احترامي .

مساءك خير يا بدر ..
( أو صباح .. فهي تقترب من الرابعة فجرا ) .

و مافي نوم يا بدر ..
( جدي العزاز الجيدو قزاز ..
يا عُزاز أنا نومي غزاز ) .
حاولت ما حاولت ..
القراية أبت ..
الرسم ..
الأكل ..
السجاير ..
التلفزيون ..
تصليح أكرة الباب المكسورة ..
غسيل العربية ..
ورنشت كل الجزم ..
فكيت الكمبيوتر .. نضفتو ..
الغنا .. سمعتو ..
قريت .. حتى مجلة زهرة الخليج ..

ما في فايدة .. مافي نوم .
( ما بيدورلو شهود ظلمك باين ..
جافيت النوم , زمني الخاين ) .



عندك دوا ؟؟

اهـ ياعماد ثم ضاع الامس منك
وواحسرتى انا المالميت فيك بالامس
وانت فى تلك الحالة كان ادخلتك
جنتى بعد ان استعصى على ترويضك
يالك من جامح عسير المنال ولن تنال العشق حتى تنفق ممافى دواخلك





تنهدات : من كلام مظفر النواب وغناء مصطفى
نقطة فى العشق تكفى
فلا تكثر عليك الحبر
والاوراق

وكلمامال البحر وانثنى احاول لالتقاطه وهكذا افعل معك ايها الذى كان من خير الذين استمعوا لماكنت اكتب كنت اقرا لك عبر سماعة التلفون فى الدوحة ما اكتبه وتصغى وتحكى واحكى وابكى الحال المائل لدنى وتشد من ازرى وتواسينى انت وصلاح عبد الله وعبد الكريم والسنى وبدرالدين الامير وعصاموياسر وهاشم كرار وكل من كان فى الدوحة يدخلنى الى عباءة زمن جميل ، لا استطيع الى نسيانها ، كنت اذا ما تكلمنا فى التلفون كثيرا ما يشدنى الحديث الى رياض لا يعرفها احد سواك رياض من البهج الاليف نغدو معها كصافير تغرد ضاحكة تجلجل كما موج البحر الذى يغطى الكورنيش فى الدوحة ، يا دوحة اسمها عماد تسلم

الله ..

البنية أم زين ..
البنية الفوقا الملايكة , و فوقا بسم الله ..
البنية قريبة الدمعة , و مشروقة دايما بقلبها ..
البنية الفنانة ..

يا صاحبة يا سلمى ..
مشتاقينك .
ما غنينا إلا و كنتي حضور , يا بت يا نكهة .
ما قرينا إلا وصوتك موجود ( مجرورة نهايات حروفو ) و تريانة .
نكتب و نمسح و نرسم .. لسه ..
و إنتي معانا تتمي السطر , و تفكي الخط .. و تلمي اللون الشارد .

لسه بتقابلي الأصحاب و تسلمي و .. دمعتك كابه ؟؟
لسه بتغسلي في الليل ذاكرتك من طنطنة الشارع و الفارغات و النقة الماسخة , و تتعطري بعميري و فيروز و مصطفى و ....

يا حليلك يا سلمى ..
لسه حنينة و موجوعة ؟؟ ..
لسه ؟؟

مشتاقك يا سلمى .

Quote: عندك دوا ؟؟

اندهاش بعد مرور سابق.. وحجز بنبر قدام لمرور آخر ..

تساؤلك يدفعني الي التساؤل ايضا..عندك دوا ؟؟

رغم علمي ان دواء من سالت لا يشفي ولا يناسب مسبقا

فلسفة الحياة وتخلفي عن الانتهاء ببداية الاخرون

يجعلني ذات يقين في ان الدواء لدي السائل

وبالتالي نرجعلك السؤال :

Quote: عندك دوا ؟؟

Quote: وحجز بنبر قدام

و آخر لي ..
و قهوة ما ..
تخفف اللسع عليَّ .


مساء الخير يا صديقة ..

بدايات الآخرين لا تليق إلا بهم ..
نتخلف عنها أو نتجاوزها .. فذاك خيارنا .

أنا مثلك ..
فأرٌ في متاهة الأسئلة .
يسعد مساك يا سودانية .

موجوعة على الوطن المانامت فيهو العين لمن تشبع، موجوعة على اطفال فى الشارع كان ترياقاالجوع موجوعة على الزول العندو بنك فى البيت وما بقسم الحبه للمحتاج ، هجيت ، مرقت فجيت السحاب عشان ما لقيت السفنجة التكسى كراع جاهل فى ود البشير يا عماد ، وبكيت يوم داك مع صوصل ومجدى النور فى الحلة الماقامت الا بوجع اللحظة الكان فيها مجدى النور بجيب ستات العرقى يشاهدن مستورة ، موجوعة على الناس الحلم النابت وما تم ، وما ظنيت فى يوم انو يكمل ، حلم موجوع زى مجدى النور ، زى مجدى النور لمن قال لا ، وما داير ومشى ، زى عميرى لمن قال ما داير ومشى ، حسى يا عمدة القلب انتفخ متضخم من الشافو فى البلد السمح ، بكيت يوم يا عماد لمن كنت ماشة الروصيرص، القرى الجمب الخزان عدمانه اللمبة التوقد لشافع بكرة امتحانو ، ولا الشافع الرفعت ليهو ايدى فشان السلام رفع ايدو ناحية خشيمو داير اللقمة بكيت لمن قلت كفى ، ويوم مشيت مع ناس (صفر يا قطر )المسرحية ، وشفت اولاد ود البشير (المعسكرحق اللاجئين) لا مدرسة لا موية حفيانين ووسخانين وبشوفو مسرح ، قلت للشباب من العندنا ندى الجهال زول سمع كلامى مافى ، مشيت معسكر تانى فى نيالا ، التعب نفس التعب ، والوجع نفس الوجع كان فى نيالا ولا فى امدرمان ، المدارس مافى يا عمدة ، وزول عندو بنك فى الببت ما بدى زول محتاج !!! بدى الناس العندهن ملايين وما بدى زول محتاج ، وااااااى يا عمدة بكيت لمن شفقت على من البكا وصديت ، رجعت بلدا بعيد ، لكين الصورة فى القلب مرسومة زى نقش المروى القديم ولا بتنفك طلاسمو الا بالناس السمحين يجوا صادين ، اااااخ يا عماد وبكيت ولا هامانى شى ، كان البكا بشيل البنك من الزول المنتن دا ويديهيوللناس البستاهلو ، والناس البركبو الهامر فى شوارع الخرطوم تفيت عليهم وقلت ليهم دى بتبنى كم مدرسة وكم مستشفى للاطفال؟ وبكيت ومشيت لانو القلب ما راضى بالبتشوفو العين لمن تقوم من الصباح فى بلد خيرو يغرق العالم ، وتشوف الناس الواقفة بتشحد حق اليستر لون الوش الشاحب ، لما تقوم كل يوم تتمشى فى شارع النيل وتشوف الشفع الببيعو فى الجبنه جايين من الشرق ، ولمن تقرا فى عيون الناس الاسى المامنطوق ، لمن تسمع انة زولة بتسال الله انو عمرها يقصر لانو ما لاقية البستر روح الشفع جوه البيت ، لما ولما ، اخ ياعمدة ، هربت ، حقيقى هربت قبل ما اكتل لى زول ، حقيقى كنت حاكتل لى زول ، من الغبن الشفتو ، يا عمدة ، وبعد دا فى ناس ما شفتهن ، يا حلاتن ، شبان بجوا داخلين المستشفى بالليل ، اى زول ما عندو حق الدوا بختفو منو الروشته وبجيبوها من العدم ، وما بتعرف ديل منو ولا هن بقولو ليك ، ناس سمحين الله يغتيهم ،وفى ناس تانيين بقلعو نوم عينك منك ، ومازلت الزول الببكى من نمة حكامة فى نيالا او نمة من بنات الهوسا فى القضارف ، مشيت من نيالا الى الدمازين والروصيرص كسلا،مدنى ، الابيض وشفت الناس كيف بتموت بالايدز يوميا بالعشرات ، وناس بتموت من التخمة فى الخرطوم ؟؟؟ناس بتموت من السرطان من دنقلا الى امدرمان حتى صارت حالة دايرة دراسة ومافى زول مهتم،دا كلو ما حال ببكى

Quote: حوطني ..

حوّطني..بالإحساس الصادق بالأشياءِ من حولي..
فعندما تسوء النوايا..
أبحث عن المعنى الإنساني..
وعندما ..تضيق الحنايا..
أستنفر مساحات الأماني..


شكراً عماد على هذه المساحة..

كنت أقرأُه البحرَ سراً ..
و يُقرِأني ساكنيهِ السلامْ .
وقد سمعتك
كيف تتنزل من منطادك وقت المد هكذا والسماء دخان!!

جيت بيجاي محلق في فضاءات البارانويا

وصدقني محتاج لي مظلة هبوط!!
حاسس بأني معلق بين السماء و البارانويا



الصلاة في مصلاية كمنجة .. عقلانية جن الحروف الكلكــي !