لقد جئتكم من الفرجونى بنبأ..الى عبد القادر محمد عبد القادر واميمة الفرجونى.البقية يمكن التصنت

اخيرا فارقنى صوت بنية موباتيل التى تقول :
هذا المشترك لا يمكن الوصول اليه حاليا...اجابنى هذه المرة الفرجونى شخصيا .جاءنى صوته نديا
كما غنائه عذبا كنفسه حلوا كروحه..حبابك الف مرحب الزول منو؟؟فاجيته وبعد السؤال عن الحال والاحوال والوليدات.بادلنى السؤال عن حالى وعن الغربة فاخبرته باننا فى مدن سلبتها التكنولوجيا كل مباهجها ولم يترك الاسمنت والزجاج للطبيعة متسعا تمد حتى احد رجليها مأكلها مشربها فرحتها كله مصنوعة... وسالته عن احواله فاجابنى قائلا:
بلغ الاخوان والاهل..نحن فى السرحة فى مضارب البطانة وقاعدين فوق( دكة مجدى)حمارنا (يفتح الحاء والميم)اتفقش وعشانا دخل...لحمنا مشدود فوق النار والجنيات غادى بعشوا فى الكلوب..قاعدين انا
وسيف الطيار ،الرشيد ،هاشم عباس ،قراض ،كمال كردمان،مجدى عبد الرازق،اللمين البنا،عثمان استيف
عبد الرحمن جلو،عصام عباس(مالما)وحداشرنا كلوبنا..
(تمساح )حقى انا، (حريقة) كليبة اللمين، (الميز) هولة مجدى ،(معيوف) حقى،(ضمران) حق اللمين(ام بدع) كلبة اسماعين بس هو ما معانا (تمشو وين) وده كلب سلوقى جده (بارم ايدو)....البل معقولة قدامنا شيعانة وتريانا..غنومنا يقصعن فى الجرة قصع دلع شبعانات يحمدن سيدن..ريحة البرم والعليف ماليه البكان..والدنيا حتراب شتاء..نسايم فوقنا يتحاتتن..يظهر جايباتلهن صقيط ..مافى عفرتا يقولو على الا بتوارن لى تخايات من بعيد..والنجم مدووش بيناتن يغطس ويقلع...والله يا الصدبق ان جيت البطانة
الايام دى حال مو حال..اقولك شنو ..بس تسكت تملا رياك عطر واطياب وتشبع فى النوم...والله الواحد هنا ختت راسو بشخر تقول تحته الحصن الحصين....اقول لكم تذكرت نوم الغربة اب راسا قوى وقومة المنبه
الثقيلة...لا اكتمكم سر دمعت لنا!!!

كأن الحردلو وقبل اكثر من مائتى عام وضع تساولا مازال يأزمنا:
الخبر الاكيد الليله احمد جابو
قال الوادى سال واتقرنن تقابو
ان سألونا قعادنا شن اسبابو
لا مصروف ولا زولا بنتسلابو

نعم وايم الحق لا مصروف ورزولا بنتسلابو!!
وهل فى هذه الدنيا غير شريك يتسلى بيك وتتسلابو دافعا عنك مئونة التحفظ!!

او لعل مترف الذهن بدر شاكر السياب كان لسان حال الديسابور السودانية اذ يقول

ليت السفائن لا تقاضى راكبيها عن سفار
او ليت الارض كالافق العريض بلا بحار
مازلت احسب يا نقود،اعدكن واستزيد
مازلت انقص يا نقود، بكن من مدد اغترابى
مازلت اوقد بالتماعكن نافذتى وبابى
فى الضفة الاخرى هنالك حديثى يا نقود
متى اعود؟؟متى اعود؟؟

الاعزاء حملنى اليكم الفرجونى التساليم فتقبلوها،،،،

ياله من مسكون بالجمال

العم العزيز صديق الموج

جلاب الفرح..

شكرا ليك علي البوست والسلام والجمال.



تسلم يا أصيل...


لي عودة باذن المولى

حتى لقاء

لك خالص مودة وتقدير



أميمة الفرجوني

NOSTALGIA!!!!!!!

الرائع / صديق

الف تحية

منسجميييييييييييييييين وساكتييييييييييييين , بس لازم تواصل



التحية للفرجوني

ود الموج

إزيك يا خال
التحية لعمنا الفرجوني ولكافة آل البنا
والله إنت بقت عليك:

Quote: الخبر الاكيد الليله صديق جابو قال الوادى سال واتقرنن تقابو ان سألونا قعادنا شن اسبابو لا مصروف ولا زولا بنتسلابو

المقعدكم شنو؟؟؟؟؟؟؟

ود الموج سلام

يا زول انت كان ياهو داصدفك يا إمتن رجعتنا باكر دي وعقب الرهيفة التنقد ويا إمتن دفنتنا في جليد اليومين ديل

تحياتنا ليك وللأستاذ الفرجوني وربنا يديكم العافية

عمنا صديق الموج يديكك الصحة والعافية

ولى عوده مطولة معك ونتمنى ان تدوم جلسات السمر والانس بهذه الاريحية

واتمنى من الفرجونى ان يعاود الطله من جديد بكتاباته الرائعة التى لاتغيب عنها

المفرده اطلاقا

وها هو الباب ينفتح من جديد فى حوار معه نتمنى ان يتواصل واتمنى ان يكون قد وضع عصاه

الترحال واذكره واذكركم*** بهذا المقطع فى مسدار البطانة

__________________________________________________________________________________
مسدار البطانة
___________
طلعت حرب ( الشريفين)1991
_________________________

1 إتْ يا قـَلـْبي كان بـِتـْرُوقْ ؤكان بِتـْجـَنْ

بِـرُوقْ القـِبْـلة سـَـوَّنْ في البَـطَايـِنْ فـَن (*) برق القبلة: العبادي

ضَرَبْ عَقـَّادُو دورْوَحَشْ الشَّوَاقيـِرْ قـَنْ(*) عقاد:جمع عقدة-غويبة- يَقنَِْ: يمشي بنشاط

لِقـَالُوعْـقـيْـدَة قـُمْــرِيـها وْدَبَاسْـهَـا يْغـَنْ(*) عقيدة: تصغير عقدة،يغن: يغني
******

2 تـَلاتـَة سْنيِنْ مَـضـَنْ أدَّنْ قـِلُوبْـنـَاالحَرْقْ

بِـقـَنْ لَنـَا كـُلـَّهِـنْ نـَجـْعَـة وْشـَـقَـَاوَة وْفـَرْقْ

ولاخـَبَّـبْـنـَا بالقِـبـلة ام بِـرُوقـََاً شَـرْقْ(*) الخبب: مشية للجمل

وَلا اتـَّرْقـَنـَّا في المَـلَـقـَة الْ مَلاهَا البَرْقْ(*) إترقن: شرب، الملقة: إصغر من
الحفير
******

3
تـَلاتـَة سْـنِيِـنْ نـَجِـيِعْ ؤشَقـَاوَة فـَدْ مُتـْوَارْ(*) فد متوار: مشوار واحد مستمر

بُعَـادْ مِـنْ الاهَـلْ جُمْـلَة وْنـَوَاحِي الدَّارْ

إبْـقـَي قـَفـَانـَا يا الصِّـدِّيـقْ سِـحَابَـاً طَـارْ(*) طار السحاب: ظهر

رَدَع ْالعَـالِـي سـيْلُـو وْجَـفْ ؤجَـابْلُو خَـدَارْ(*) ردع المطر المكان: صب عليه بغزارة

******
ونواصل
عبدالقادر

صديق الموج
لك التحايا و التهاني بهذه
الخبطة البوردية.. و يا له
من حديث، حديث الفرجوني العذب،
العميق الشاعري، الدقيق، و يا لها
من فرحة فرحته حين "يعفر" أنفه
برائحة البطانة، و كائنها..
تحياتي لأميمة الفرجوني
و لأخي عبد القادر محمد عبد القادر..
سأقوم برفد هذا البوست بمقتطفات
من مسدار البطانة،
تلك اللوحة الشعرية المدهشة،
التي أبدعها الفرجوني في أولى أيامه في مصر و الإغتراب
يضع خدوشه الأولى في نفس الشاعر، شديد الإلتصاق
بوطنه داخل الوطن.

فائق إحترامي
السموأل

Quote: ياله من مسكون بالجمال

الموصلى ،الاستاذ، العزيز،الجميل’الفنان، بل قل:الجمال مسكون به.... هوانت زاتك مقصر؟؟؟ تسلم يا حبيب،،،

Quote: العم العزيز صديق الموج جلاب الفرح.. شكرا ليك علي البوست والسلام والجمال. تسلم يا أصيل... لي عودة باذن المولى حتى لقاء لك خالص مودة وتقدير أميمة الفرجوني

اميمة بت شيخى احمد...يلحقنا ويفزعنا

والله يا بت القبائل وكتين التلفون رد والشيخ قالى منو معاى؟ شعرة جلدى كلبت ...المهم احمد مازال احمد صوته تريان
وخفة دمه من البسط زادت جبتين ،تكلمنا زهاء الساعة وعرفت منه ان احواله وصحته تمام، وربنا يديم عليه نعمة الصحة والعافية
سوف اعود لكم فى هذا البوست طويلا وكثيرا مش ناس روتانا بقولوا كونوا معنا ،انا زيهم..تسلمى،،،

Quote: NOSTALGIA!!!!!!!

اخ يا مسعود ونحن اكثر اهل الارض نصيبا من تلك الكان..كل جميل عندنا اضحى فى خبر كان ..شكرا للمرور،،

Quote: الرائع / صديق الف تحية منسجميييييييييييييييين وساكتييييييييييييين , بس لازم تواصل التحية للفرجوني

علاء حيمورة العزيز...محاولا انا الامساك بخيط للمواصلة ...اعدك بالعودة ان شاء الله،،،تسلم

Quote: ود الموج إزيك يا خال التحية لعمنا الفرجوني ولكافة آل البنا والله إنت بقت عليك: Quote: الخبر الاكيد الليله صديق جابو قال الوادى سال واتقرنن تقابو ان سألونا قعادنا شن اسبابو لا مصروف ولا زولا بنتسلابو المقعدكم شنو؟؟؟؟؟؟؟

ذلكم هو السؤال الذى يرتد من دوامة الحيرة؟؟؟؟؟ خايفين نرجع على كراسى ان لم تكن عكاكيز ...شكرا يا سمحة،،،

صديق الموج!!!!!!!!
دة شنو الجفـاء دة يا حبيب
والله الشوق لهيب يا مان
جاييك خاضع لي أمر الهوي
زي ما بعمل السقيد في غناهو
ايي زول ما خاضع لأمر الهوي ( الله معاهو)!!
والله وحشتين يا موج
أجيك مركــــب؟؟؟!!!

لا بتسالم ولا بتجامل ولا بتزور

إذا جاءت الملائكة ذهبت الشواطين ولا شنو ؟ يعني من يوم ماجيت انا إختفيت انت

يا نور العين انت وينك وين ؟؟ أظهر وبان عليك الأمان يأخـــال 0

كتبت شعر 00000 و لا مداخلة كتبنا عن إدمان الحب برضو 0000 ولا إنت هنا

وانا كنت بفكر ننقل منتدياتنا الأدبية عبر الفضاء الفسفوري 00000؟؟؟؟؟

Quote: ود الموج سلام يا زول انت كان ياهو داصدفك يا إمتن رجعتنا باكر دي وعقب الرهيفة التنقد ويا إمتن دفنتنا في جليد اليومين ديل تحياتنا ليك وللأستاذ الفرجوني وربنا يديكم العافية

سيف مصطفى العزيز...

والله غلبنا البنصدفو زاتو...واتخيل زول يشكى بعد 30 سنة غربة وشلهته،اظن ان الشكوى صارت

شىء يسخر من معناها...والله يا جنا الايام دى عندى عرمة والا شبق ماعارف لعودة نهائية بس

قول الله يوفقنا...تسلم يا سمح:،،،،

Quote: ونواصل عبدالقادر

عبد القادر اللذيذ .....واصل ان شاء الله ما مرقنا منها،،،،

Quote: صديق الموج لك التحايا و التهاني بهذه الخبطة البوردية.. و يا له من حديث، حديث الفرجوني العذب، العميق الشاعري، الدقيق، و يا لها من فرحة فرحته حين "يعفر" أنفه برائحة البطانة، و كائنها.. تحياتي لأميمة الفرجوني و لأخي عبد القادر محمد عبد القادر.. سأقوم برفد هذا البوست بمقتطفات من مسدار البطانة،

سمؤال ايو سن...ازيك
ياخى ارفد ماشاء لك الرفد..حتو ولو من البورد..شكرا يا شفيف لكن متل ماك عارف
كتلوك ولا جوك جوك دى..دحين نحن اسماعنا ابصارنا افئدتنا كلنا انتظار رفدك فهلا فعلت،،،

يا صديق يا ظريف يا ود القبايل. انت وينك وين؟اخر لقاء كان منتدى رابطة ابناء الصحافه. حقيقه مشتاقين . ...........زتحياتى أخوك اسماعيل عباس

حبيب نورة وحبيبى انا....انا لاقيك وين لامن اباك والله لم تقطعنى عنك الا المشاغل الكتيرة
والاحزان الاكتر..يوم الطيب محمد الطيب ويوم بادى محمد الطيب وماعارفين بكرة منو
ونحن قاعدين وماعارفين القاعدين ليها شنو،،،

Quote: لا بتسالم ولا بتجامل ولا بتزور إذا جاءت الملائكة ذهبت الشواطين ولا شنو ؟

هاشم الملاك
فعلا اذا حضرت الملائكة ذهبت الشياطين....بدليل انت حضرت وانا ذهبت...ياخى فى املك منك
بطل التواضع يا ولد...والله يا هشوم مشغول وحزن يملاء نفسى ولم يغادرنى كذبابة اطبق
عليها صدرى وانت بمكة وادرى بالحزن..دحين خلينى اتفكفك شوية وجايلك،،،

Quote: يا صديق يا ظريف يا ود القبايل. انت وينك وين؟اخر لقاء كان منتدى رابطة ابناء الصحافه. حقيقه مشتاقين . ...........زتحياتى أخوك اسماعيل عباس

اسماعيل شكرا للثناء الما بنستاهلوا واثمن لك ذلك المرور البهىء...نشوفك،،،

الرائع دوما صديق الموج
اليك والى كل عشاق فن الفرجونى اهديكم مقطعا من مسدار (الفرجونى )
وبمناسبة ما اشرت اليه من عذابات الغربة رايك شنو تمشى للفرجونى وتقعد معاه فى الخلا وتسوى ليك كلاب وغنم وزراعة وتنوم مرتاح البال هادئ النفس الخ.....؟
(ات ماك براك المغلوب من الغربة )
____________________________________
غُرْبَة عَنْ الوَطَنْ فينكس 2001

1 بَعَدِّي نـْهَارِي مِتـْلْ النـَّاسْ ؤجَيْة اللّيْل

بِفـَازْعَنـِّي الشَّقـَاوَاتْ وَالعَذَابْ وَ الويلْ(*) فازعه: لاحقه

حِليْلْ اوْطَانِي وَاخْوَانِي الْ بِِشِدُّواالحيلْ

حِليلْ(وَدْطَهَ) وَالغـُنـَا وَالشِّيَاهْ وَالخيْلْ(*) الشياه: الأرايل( الشياه والخيل) كنايةعن الحسان

2 حِليلْ يَا الحَاجْ صِفـَيَّتـْنـَا وْحِليلْهَا كَتِيِرْ(*) الصفية: مكان في البطانة

حِليلْ سُكَّانـْهَا ياحْليلْهُنْ حِليلْ نـَاسْ خيرْ

حَنِينْ البِلْ عَلي المَطَرْ الْ بِجِيِبْ الخيْرْ(*) ألبل: ألإبل

مِلَوِّعْ قَلبِي للوَادِي الْ نـَبَاتـُو حَرِيِرْ

3 بَعَدَّيِ نـْهَارِي مِتـْل النـَّاسْ ؤليْلِي لَجِيجْ(*) لجَّ عن الشيْ: حاد عنه

كَارِسْ فـَمِّي لكِنْ قـَلْبِي كُـلـُُّهْ عَجِيِجْ(*) كرس: سكت،عجَّ، ألحَّ في التحنان

ويْنْ ما اتـْخَيَّلْ البَرْقْ الْ بَدَالُو فـَجِيِجْ(*) فجَّ البرق الظلام:كشفه

تَخُجْ العَبْرَةْ فِي وِرْدَانْ ضَمِيِرِي خَجِيِجْ(*) الوردان:عروق الرقبة0خجت العبرة: علت وتسفلت

4 عَايَنـْتْ في النـِّجُومْ لاحَتْ لِيِ نـَارْ(التـَّايَة)

غـَمَّضْتْ العِيُوُنْ شُفـْتَ الرِّشُومْ ضَوَّايَة

يا(عِتـْمَانْ)اخُوُكْ في شوقـُو بَالْغ الغـَايَةْ

وَاسْألْ مِنّـِّي هَا اللّيلْ الْ مَعَاكْ ؤمْعَايَا(*) ها الليل: هذا الليل

_________________________________________________________________
وسنواصل فى هذا المسدار فى اجزاء
ولكم خاص مودتى
عبدالقادر

Quote: 3 بَعَدَّيِ نـْهَارِي مِتـْل النـَّاسْ ؤليْلِي لَجِيجْ(*) لجَّ عن الشيْ: حاد عنه كَارِسْ فـَمِّي لكِنْ قـَلْبِي كُـلـُُّهْ عَجِيِجْ(*) كرس: سكت،عجَّ، ألحَّ في التحنان ويْنْ ما اتـْخَيَّلْ البَرْقْ الْ بَدَالُو فـَجِيِجْ(*) فجَّ البرق الظلام:كشفه تَخُجْ العَبْرَةْ فِي وِرْدَانْ ضَمِيِرِي خَجِيِجْ

عبد القادر الشقى....حالف تكتل ليك زول بى مداخلة والا شنو؟؟
الله يرطب فمك...شوقى وشكرى وبطحانى زاتو......

Quote: البل معقولة قدامنا شيعانة وتريانا..غنومنا يقصعن فى الجرة قصع دلع شبعانات يحمدن سيدن..ريحة البرم والعليف ماليه البكان..والدنيا حتراب شتاء..نسايم فوقنا يتحاتتن..يظهر جايباتلهن صقيط ..مافى عفرتا يقولو على الا بتوارن لى تخايات من بعيد..والنجم مدووش بيناتن يغطس ويقلع...

!!!!!!

Quote: ..بس تسكت تملا رياك عطر واطياب وتشبع فى النوم...والله الواحد هنا ختت راسو بشخر تقول تحته الحصن الحصين....اقول لكم تذكرت نوم الغربة اب راسا قوى وقومة المنبه الثقيلة...

و الله صدق !!

ما أجملك يا ود الموج .... مشتاقين ياخ .

الاصيل ابو حيدر سلام عندما تعود يعود للبورد القه الجميل
اتمنى ان تواصل هذا الابداع كما ارجو ان تمدنابموبايل المبدع الفرجونى
للتواصل تحياتى للجميع

الاصيل ابو حيدر سلام عندما تعود يعود للبورد القه الجميل
اتمنى ان تواصل هذا الابداع كما ارجو ان تمدنابموبايل المبدع الفرجونى
للتواصل تحياتى للجميع

مصدق السمح
الله يجمل ابو الجاب اهلك

صديق الموج..



فارقتنى.كما كان فراق الطريفى ..لجمله...وترملت زمانات الشوق فى مسارات الصبا فى تبعثر اللحظه..ولقد نسيت بادية الكبابيش ..والصناجه منصور..ويحى عبد الكريم ..وتهتك اللحظه.وكل اعتلاج اخيلة الحلم وشيطان الخيال...

كيف لى.ان اراك..
وانت..فى مدى ذلك الموج التموج..
اخرج.افصح.
وتحدث..
واسال الفرجونى..
عن صدق الرواه..والروايه..
عن حقيقة ..
من هو الذى كتب انا امدرمان انا السودان..\هل كتبها الفرجونى..
ام عبد الله محمد زين..
فى مقابله له فى القناه السودانيه.هو قد حدد..وصرح وابان...
نريد الحقيقه..
ولنا تعليق..
الفرجونى..زول باديه..وشاعر..ومن هيكل البطانه..وهو صادق..
نحن.نريد التاكيد...

الموج..
وانت فى تلك المرابيع بينى.وبين.منصور.يحيى..وتلك الحسان.فى بيداء الكبابيش..
استكن.واصفو..

العزيز صديق الموج جيت تانى راجع
كما اسلفت انت واشرت بان الفرجونى رجل مسكون بالابداع حتى النخاع (بل هو الابداع ذاته يمشى بين الناس بقدمين وساق )
اريد ان اضيف لك بما اخبرى به( الفرجونى) حين سالته عن الغربة وفراق الاحبه والوطن
فقال والروايه على لسانه-
بان الغربة اضافت اليه الكثير من المعرفة والمفردة وزادته تعلقا وشوقا بالسودان واهل السودان وكتب فيها كثيرا من اوجاعه وتذكر فيها كل لحظاته الجميلة فى السودان واول مسدار كتبه حينما كان فى مصر هو مسدار البطانة (وتحديا فى طلعت حرب -الشريفين _وله قصه طويلة )وكل كتابته لها مناسبات اذا فهى صادقة معبرة مربوطة بعبق الوطن الممتد فيه الذى لم تفصله عنه غربة ولا حدودفهو دوما متفرد
واذا بحثت عن كتاباته الاخيرة ابتداء من العام 1990 تجدها مربوطة بالحنين مليئة بالمعانى ...لها علاقة مباشرة بالغربة...
فانت وهو الان على سرج واحد انت متغرب وهو ايضا كان متغرب فالحنين واحد والشوق واحد والغربه انواع منها القريب والبعيد فى اقاصى الدنيا ومهما تنوعت اسماؤها فهى غربة _(ان سميت هجرة او اغتراب )
لا عليك فالموضوع طويل متشعب ....؟
ساواصل اليك فى مسدار الغربه الذى وعدت بان انزله جزء جزء
_______________________________________________
4 عَايَنـْتْ في النـِّجُومْ لاحَتْ لِيِ نـَارْ(التـَّايَة)

غـَمَّضْتْ العِيُوُنْ شُفـْتَ الرِّشُومْ ضَوَّايَة

يا(عِتـْمَانْ)اخُوُكْ في شوقـُو بَالْغ الغـَايَةْ

وَاسْألْ مِنّـِّي هَا اللّيلْ الْ مَعَاكْ ؤمْعَايَا(*) ها الليل: هذا الليل

5 غـَمَّضْتْ العِيُونْ لاحَتْ لِي نـَارْ نـَاسْ خيْرْ

وَالنـَّاسْ والبِيُوتْ حَتـَّي الشَّدَرْ وَالطّيرْ

قـَلْبْ الزّوْلْ بَلا مَعَشُوقـُو مَا بْشُوفْ غيـْرْ

وَالايَّامْ تـَرَاهِنْ بالعَبِدْ في سيـرْ

6 قـُلْتْ لـ نـَفـْسِيِ مَالِكْ نـَفـْسِي مَابْيَة تـْرُوقِي

قـَالِتْ لِيِ البِرُوقْ يَاهِنْ سَبَايِبْ شـوْقِـِي(*) سبايب: أسباب

بَمْسِي مَعَ الخِلُوقْ سَاتـْرْ العـَلَيْ بـ طـوْقـِي(*) بـ طوقي: علي قدر إمكاني

نـُصْ اللّيلْ تـَبـُقْ نيْـرَانْ جَهَنـَّمْ فوقِـِي

7 نـَادَانِـِي الجَبَلْ ها(وَدْ قـِديْرْ) صَايَحْ لِيِ(*) ود قدير: جبل في البطانة

حِسُّو سْمِعْتـُو في اللّيلْ وَالبَرِقْ لايِحْ لِيِ(*) حسو: صوته

جِيِتـُو قـَلَدْتـُّو حَنـَّالِي وْرَزَمْ رَايَحْ لِيِ(*) حنالي: الحنين صوت الإبل العطشانة

ؤشَدَرْ (الخَاسَة) مِنـُّوالْ فـَضَّلْ إتـْمَايَحْ لِيِ(*) الخاسة مكان، تمايح الغصن: تمايل

8 وَادِي (الخَاسَة) يا سَمْحَة البِِرُوقْ وَالَنـُّو(*) الموالاة: المداومة

وَالفـَيْ كـُلـُّهْ بـ فـَضْلْ العَزِِيِزْ كَالَنـُّو(*) الفي: البراح، كالنو: كال الشيء ملأه

مِنِْ سَجْعْ القـَمَارِي وْقـوْلْهِـن قـَالَنـُّو(*) السجع: الغناء

قـَلْبِيِ ال مو نَصِيحْ مِنـِّي الطِّيُورْ شالنو
______________________________________________________________________________
ولى عودة اخرى مع البقية وفى انتظار التعليق
فالمسدار طويل ملى بالشوق
عبدالقادر
[email protected]
_________________

الأخ الكريم/ صديق الموج
أشكرك على زيارنك الكريمة وتشريفك لدارنا( والداين يخلس )
وأخوان فاطنة إلا مايشوفونى دخلت عليكم بجوك مطرزين هسع متل
الإسود .
تحياتى لزوارك الكرام والشكر مردوف لك على فتح باب
الحديث عن هذا الرجل الشفيف الذى زادته الغربة شفافية....
حيث بدأ مشوارها من دبى وكانت خيمته مقجوجة تستهوى كل عاشق
وطنى رهيف المشاعر صلد العرى... وكان أبناء البطاحين الذين
أدمنو محبة آل البنا من الرواد الدائمين حيث العلاقة الوطيدة
التى تربط هذه الأسرة العتيقة بكبارنا وماقصيدة والده عبدالله
محمد عمر البنا التى نظمها فى حوالى 1930م فى زياته لصديقه
الشيخ الصديق محمد طلحة إلا دليل على هذا الرباط الوثيق الذى
سار الفرجونى على نهجه حيث كان آخر لقاء له مع الناظر /الشيخ
محمد صديق طلحة فى القاهرة فى العام1991م حيث رحل الناظر بعد
ذلك بقليل عن دنيانا فى 1992/2/13م فأتت مرثية الفرجونى له
مفعمة بلواعج الغربة والفرقة والغياب عن الوطن وغياب الأحباب
وقد سررت كثيرا عندما شاهدت حلقة تلفزيونية للفرجونى وهو
يجلس فوق عنقريب تحت ضل شدرة ضارب الهمبريب وعلى يمينه الجقر
وعلى يساره يوسف البنا وأمامه كلابه فحمدت الله على عودته وقلت
فى نفسى ( العقبى لينا )
أتمنى أن يعود كل أبناء البطانة لتدشين تراثها الثرى بعد أن
صقلتهم الغربة وجعلتهم ينتبهون لعظم ما يملكون.
لكم شكرى وبطحانى وكل سودانى
سمية الحسن طلحة

مرثية الفرجونى فى الناظر محمد صديق طلحة

برق الخريف ما رف
وأنكتح السحاب شايلو الهواء البنزف
يا حليلو الكريم اللينا باسط الكف


يوم جاني الخبر ود عيني قطر تف
زي وابل المطور فوق الصدر هتف
كان حازم القبيلة وحبلو ما أتنتف
كان حافظ كيانو وما مرق ختف
كم حلحل دريك من بعد ما تكتف

الماهو داب روحو
من فقدوا القلب متشبكة جروحو
يا حليلو البعيش الدايحة في سوحو
والموت من بدا الخربانة دي سروحو
البقاء لله يا بطاحينو لا تنوحوا

أزرق ود عظام ناس طلحة يا حليلو
يبكيهو الهواد يوم أنقرن سيلو
يا حليلو الكريم الحقو ساخليو
الليلة القلب بلحيل مشاشيلو
زرف يا دمع بل الجفن كيلو

صاهبابي ورحل حزنا بالفرقة
خلا العين تقطر والقلوب حرقة
دفاع الطويلة الزيمتو ما سرقة
كم قدر ضيوف بالشقراء والبرقاء
فهاق للردوف أم كبدةً زرقاء

الأخ الحبوب صديق الموج

عظيم حبى و بالله عليك ودي امانه في عنقك تبلغ حبى و تقدير للشاعر الفحل ابن الفحل الفرجوني وقول ليه الصادق ود خليفة ودادم ود قوي الدويحي من بحر ابيض بسلم عليك وبقول ليك ترا مكانة محفورة في الجوف و القلب يا اخو الاخوان و مرثيتك في اخوه محمد خليفة الدويحي بتدمع القلب وبتحرق الجوف .

يا صديق الموج بعد ما تبلغو تحياتي بجيك صادي بالكثير من مسادير الفرجوني و غناه.

حبي لانك فتحت فينا الوجع يا صديق وتورت علينا المواجع .

اخوي عبد القادر عن اذنك خليني اردد معاك مسدار الغربة .

Quote: عَايَنـْتْ في النـِّجُومْ لاحَتْ لِيِ نـَارْ(التـَّايَة) غـَمَّضْتْ العِيُوُنْ شُفـْتَ الرِّشُومْ ضَوَّايَة يا(عِتـْمَانْ)اخُوُكْ في شوقـُو بَالْغ الغـَايَةْ وَاسْألْ مِنّـِّي هَا اللّيلْ الْ مَعَاكْ ؤمْعَايَا(*) ها الليل: هذا الليل 5 غـَمَّضْتْ العِيُونْ لاحَتْ لِي نـَارْ نـَاسْ خيْرْ وَالنـَّاسْ والبِيُوتْ حَتـَّي الشَّدَرْ وَالطّيرْ قـَلْبْ الزّوْلْ بَلا مَعَشُوقـُو مَا بْشُوفْ غيـْرْ وَالايَّامْ تـَرَاهِنْ بالعَبِدْ في سيـرْ 6 قـُلْتْ لـ نـَفـْسِيِ مَالِكْ نـَفـْسِي مَابْيَة تـْرُوقِي قـَالِتْ لِيِ البِرُوقْ يَاهِنْ سَبَايِبْ شـوْقِـِي(*) سبايب: أسباب بَمْسِي مَعَ الخِلُوقْ سَاتـْرْ العـَلَيْ بـ طـوْقـِي(*) بـ طوقي: علي قدر إمكاني نـُصْ اللّيلْ تـَبـُقْ نيْـرَانْ جَهَنـَّمْ فوقِـِي 7 نـَادَانِـِي الجَبَلْ ها(وَدْ قـِديْرْ) صَايَحْ لِيِ(*) ود قدير: جبل في البطانة حِسُّو سْمِعْتـُو في اللّيلْ وَالبَرِقْ لايِحْ لِيِ(*) حسو: صوته جِيِتـُو قـَلَدْتـُّو حَنـَّالِي وْرَزَمْ رَايَحْ لِيِ(*) حنالي: الحنين صوت الإبل العطشانة ؤشَدَرْ (الخَاسَة) مِنـُّوالْ فـَضَّلْ إتـْمَايَحْ لِيِ(*) الخاسة مكان، تمايح الغصن: تمايل 8 وَادِي (الخَاسَة) يا سَمْحَة البِِرُوقْ وَالَنـُّو(*) الموالاة: المداومة وَالفـَيْ كـُلـُّهْ بـ فـَضْلْ العَزِِيِزْ كَالَنـُّو(*) الفي: البراح، كالنو: كال الشيء ملأه مِنِْ سَجْعْ القـَمَارِي وْقـوْلْهِـن قـَالَنـُّو(*) السجع: الغناء قـَلْبِيِ ال مو نَصِيحْ مِنـِّي الطِّيُورْ شالنو

فوووووووووووووووووووووووووووووووووووووووووووووووووووووووق
لامن ايجيكم بى رواقة
وعندى الكتيييييييير
؟؟؟؟؟؟؟؟؟؟؟؟؟؟؟

Quote: الاصيل ابو حيدر سلام عندما تعود يعود للبورد القه الجميل اتمنى ان تواصل هذا الابداع كما ارجو ان تمدنابموبايل المبدع الفرجونى للتواصل تحياتى للجميع

مهدى العزيز كتر خيرك وانت شخصيا الرجل سال منك وبلغته تحياتك،،،

عصمت العالم ببواطن و ظواهر الابداع.....شكرا للمرور المفرح

تحياتى الباسقات...والله لم انقطع غير انى مشغول مشغول يا ولدى

كيف حال الارباب على عبدالرحيم ..بالله بلغوا تحياتنا الشداد ونسال الله له تمام الصحة،،،

سمية بت الرجال الماهم خمج
شكرا على الطلة..وقد اسعدنى جدا ان ارى المرثية منشورة هنا....فقد قيلت فى رجل من نوع
الرجال الذين لا يصدون..التحية للفرجونى فهذا من انبل الناس واوفاهم ولك الشكر،،،

Quote: الأخ الحبوب صديق الموج عظيم حبى و بالله عليك ودي امانه في عنقك تبلغ حبى و تقدير للشاعر الفحل ابن الفحل الفرجوني وقول ليه الصادق ود خليفة ودادم ود قوي الدويحي من بحر ابيض بسلم عليك وبقول ليك ترا مكانة محفورة في الجوف و القلب يا اخو الاخوان و مرثيتك في اخوه محمد خليفة الدويحي بتدمع القلب وبتحرق الجوف

الحبيب الصادق خليفة....تحياتى
ان فارقتنى بنية موباتيل لبلغته تحياتك...الرحمة تتغشى محمد وطاب حيا وميتا..وربنا يطول فى عمر الفرجونى العزيز،،،

معاوية الحبيب...الفى مليون شكرا...وبرضوا بنشوفن شوية...لك التحايا يا جميل،،،،

عمنا صديق الموج الرجل الرائع كما وعدتك بان نتواصل فى مسدار (غربة وشوق للوطن ) للفرجونى ونسبة لطول المسدار سانزل لك منه فى كل مرة جزء
فالى الجزء الثالث
_______________
انَا يَاخَالْقِيِ كـُتـْرْ الشوْقْ مِيَبِّسْ مُقـْدِي(*) المقد: من نباتات الذرة

سُقـْدْ الْ غيْرِي نـَامْ خـَلـَّي السَّهَرْ لـ سُقـْدِي(*) السقد: طائر مشهور بقلة النوم

الظـَّنْ فِيِكْ سَمِحْ ياخَالـْقِي تـَجْمَعْ فـَقـْدِيِ

شوفـْة اوْطَانِـي وَاخْوَانِي الْ مَعَاهُمْ عَقـْدِي

12 قـُلْتْ لـ عيْنِي مِنْ هَاالحَالَةْ ما تِسْتـَهْدِي(*) ماتستهدي: لاتتصبري

وَانـَا فِي وَحـَّة المَغـُلـُوُبْ بَكَمـِّلْ جُهْدِي(*) وحة المغلوب: زفرة المظلوم

دَابِيِنْ فـَقـْـدِكْ اخْوَانـَاً مَعَاهُمْ عَهْدِي(*) دابين: مادام

أطْبُقِيِ في السَّهَرْ طَاقيْنْ عُقـُبْ وَاجْتـَهْدِي(*) طاقين: مقداران

13 مُشْتـَاقْ للمِلُوكْ الْ في (الصِّفـَيـَّة) جْلُوسْهُنْ(*) جلوسهن: جلسات أنسهم

أخْوانِي الْ بِلاقـُوا الحَارَّة شُمَّخْ رُوسْهُنْ(*) الحارة: الصعاب، شامخ الرأس: مرفوع الرأس

فوقْ لَقـَا فوقْ عَدَمْ توْبْ العَفـَافَ مَلَبُوسْهُنْ(*) لقا: غني

ؤلـ فـَزَعْ المِضِيِقْ مِتـْوَهِّبِيِنْ بـ نـْفـُوُسْْهُنْ(*) توهب: وهب نفسه

_____________________
ونواصل
تحياتى لك ولكل زوار البوست

انا يا خَالـْقِـي كـُتـْرْ الشّوْقْ مِيبِّسْ كَبْدِي

صَابِرْ صَبْرِي مِتـْرَجـِّي اللَّيَالِي تـْعَدِّي

قـُوُلْ لـ فـْلانـَة خـَـدِّكْ بُرْتـُكَانـُو مْنـَدِّي

ؤقـَلْبِي تـَرَاهُ بِجْمَعْ في الهِمُومْ ؤبْسَدِّي(*) سدي: مد الخيوط لينسجها

ونوصل

عبد القادر...سالتك بالذى خلقك ما تقيف!!!

ان شاء الله ما مرقنا منها،،،

أخى صديق .. سيد ألمسادير
سلام شديد
ألاديب ألجميل ألفرجونى خلع أوتاد بيت ألشعر من نيويورك وفلادلفيا
كش ألكلا ب أليانكى وعبر ألمحيط ألاطلسى. ألى البطانة
ألتقيته فى نيويورك قلبه يخفق بحب ألسودان.حتى ظهر فى التلفزيون السودانى
ردنا ألله جميعا ياأخى موج
سلام, عثمان عبدالرحيم موس

صديق الموج يارائع
اتمنى ان تكون شاهدت الحلقة الرائعة على الفضائية السودانية وكنت امنى النفس فيها بان يكون اللقاء اطول مع الفرجونى ولكن الاخ طارق جويلى لم يحقق الامنية ...؟
ام ان شوقنا لاحمد جعلنا نراها قصيرة لاتفى لهذا المبدع اتمنى ان نراه فى الفضائية السودانية مرة اخرى ...؟
وترانا بنواصل
_______________
16 أنـَا يَا سَمْحَة فـَاقـْدْ الجَلْسَة فِي(صَفـَيـَّتـْنـَا)

بالْحَيَا وَالعَفـَافْ مَعَرُوُفـَة فِيِكْ غـَيـَّتـْنـَا(*) غوي الشيء: أحبه واشتاق إليه

وَاعَدْنـَا(ابْ حَرِيِرَة) وْوَفـَّي عِنْدْ جَيـَّتـْنـَا

بَحَرْ الجُوُدْ ؤلـ عيْنْ الحَسُـوُدْ كـَيـَّتـْنـَا

17 بَسْهَرْ مَا بَنـُوُمْ لا بَسْهَي لا بَتـْهَنـَّا(*) سها: غفل

فَاقـْدْ الحوْمَة بـ ارْدَادْ (الصِّفـَيَّة) الجَنـَّةْ(*) ارداد: نواحي

شُوُفْ (وَدْ طَهَ) كيْفْ جَدَّعْ نـَمِيِمُو وْطَنَِّ(*) جدع النميم: غنَّي الدوبيت

وَالقـُمْرِيَّة قوْقـَتْ فوْقْ رَبَابْهَا الْ غـَنـَّي(*) قوقت القمرية: غنت

18 آخْر ايَّامِي يَا عًمَرْ الزَّمَانْ اشْقـَاهِنْ

ؤعَـذبْنِي وْمَخَارْزُو عَلي القَلِبْ دَقَّاهِن(*) مخارزو: جمع مخرز- آلة كالمسمار

شوْقْ أخْوَانِي وَاوْطَانِي الجِسُوُمْ رَقـَّاهِن

ؤصَادْ عَضَّامِي مِنْ سِيِرْةَ اللَّحَمْ نـَقـَّاهِن(*) صاد بمعني :تملك، عضامي:عظامي

19 مَايْق ابْصَارِي في حَاْلْةَ السَّهَرْ مِتـْدَّلِهْ(*) متدله: مولع

ؤقـَلْبِي تـَرَاهُ زَيْ حَالْ البَهِيِتْ مِتـْبَلِهْ(*) صار: كألأبله

جُقـْريْنْ الفَدُوُرْ الْ فِي الدِّيَارْ بِتـْوَلـِّهْ(*) جقرن: مد الصوت بالبكاْ0 ولَّه: ألح في البكاْ

مِنـُّو شْبِعْت دَارِيِبِي العَلِي المِتـْألِّهْ(*) العلي المتأله: هو اللَه سبحانه وتعالي
____________________________________________________________________________
والجاية اجمل واجمل
مع خالص مودتى
عبدالقادر

الاخ الموج...يالهذا الزمان فقد خطفنا من لب الحياة بين العشيرة وسرق اجمل لحظاتنا وهذه الغربة اللعينة
ما فتئت هى الاخرى تجرنا نحو اروتين واللهث وراء السراب ولكنا نمنى النفس بان تقصر ولا تطول ...وحتى لقاءتنا
فى هذا البورد صارت على تباعد ...أعدنا بهذا البوست الرائع الى ليالى البادية وايامنا العامرة فى دار الكبابيش
وهاهو أخى العالم يبكى تلك الايام واين المنصور والتاية العامرة..
أحى فى هذا البوست الاديب الفرجونى وابن اخيه الفنان عاصم البنا الذى احتفنا الصيف الماضى بلحظات كن من زمان
اخر بهيج ومخضر وزاهر ..هل تصدق بانه شرفنا فى ابوظبى ووعد بالرجوع بعد ان حملناه الشوق كله والاعزاز للشامخ
الفرجونى الذى يحلو لعاصم منادته ب " ابوى أحمد" ..
واصل ايها الجميل انت والاخ المرهف عبدالقادر..ونحن هنا وقوف حتى تاذن لنا بالجلوس وترضى ..

ود الموج
تحياتي .. وشكرا علي هذا البوست الرائع المشحون برائحة الدعاش ونسمات البوادي وأريج البلد
يبدو جليا أن.......
الخبر الاكيد قالوا البطانه اترشت
وسارية تبقبق للصباح ما اتفشت
هاج فحل ام صريصر والمنايح بشت
وبت ام ساق علي عتب البيوت اتعشت
الفرجوني ظهر مساء الخميس علي القنة السودانية وكان رائعا ومسكونا بحب الغناء كعادته

فوق

صديق الموج الجميل

والله نضمك درر
ونقلك لحال البادية و الله شوف عين عديل
و نقلا عن زولا شواف
و الله إتكرفنا و إتعشينا مع الجماعة ضب......

وإنشاء الله تكون سمعته زولك ده اليوم داك... في سهرة ود أخو
تنتن يارشا يا كحيل دي كيف.....
و الله شيتا شين و طرب عديل لينا منه زمن..
أطرح صداقتي و مودتي
و شنو ليك.............

يحى عبد الكريم العزيز...تحياتى
انا فتحت هذا البوست ونذرته سبيل لوجه الجميلين الزيك بالله رابط هنا
وانا متاكد ان البوست هذا سوف ينقط عسل من الثراء تسلم،،،

Quote: أخى صديق .. سيد ألمسادير سلام شديد ألاديب ألجميل ألفرجونى خلع أوتاد بيت ألشعر من نيويورك وفلادلفيا كش ألكلا ب أليانكى وعبر ألمحيط ألاطلسى. ألى البطانة ألتقيته فى نيويورك قلبه يخفق بحب ألسودان.حتى ظهر فى التلفزيون السودانى ردنا ألله جميعا ياأخى موج سلام, عثمان عبدالرحيم موس

شكرا لمرورك البهى..وفعلا ردنا الله الى مضارب اهلنا،،

Quote: واصل ايها الجميل انت والاخ المرهف عبدالقادر..ونحن هنا وقوف حتى تاذن لنا بالجلوس وترضى ..

يحى عبد الكريم صديقى الجميل تحياتى

ومتى كان المعلم يقف فى حضرة التلميذ....
انا اقف اجلالا لك واحنى هامتى واحس اننى ازداد طولا كلما احنيتها لك.
المطرح مطرحك ونحن سماع،،،،

Quote: ود الموج تحياتي .. وشكرا علي هذا البوست الرائع المشحون برائحة الدعاش ونسمات البوادي وأريج البلد يبدو جليا أن....... الخبر الاكيد قالوا البطانه اترشت وسارية تبقبق للصباح ما اتفشت هاج فحل ام صريصر والمنايح بشت وبت ام ساق علي عتب البيوت اتعشت الفرجوني ظهر مساء الخميس علي القنة السودانية وكان رائعا ومسكونا بحب الغناء كعادته

على الكرار ود عمى الضو
شكرا للمرور