نانسي !

وصلت الخرطوم المغنية البديعة نانسي ،
شارعة في عدد من الأنشطة من بينها إحياء
حفل رأس السنة بالنادي الدبلوماسي والبدء
في الإعداد لألبومها الثاني الذي يتضمن
مجموعة من الأغنيات من بينها أغنية من
كلمات الشاعر والقاص يحيي فضل الله ..

أتمنى لنانسي إقامة طيبة وموفقة ، فهي
فنانة تتعامل بإحترام مع عالمها ولها
شخصية مميزة في الأداء .

طلال عفيفي .. الراجل الجميل جداً
ولونك الأزرق الباهي زايدك عسل

نانسي دي كلام براااااااااهو .. أنا غايتو قاعد أتناولها بدل العلاج
طـــــــــلال .. حلفتك تهبش هنــــــــــــــــا

والله يا ثابت نانسي دي حالة فنية جميله بشكل ؛
بتغني كلمه كلمه .. وبتفتح في الأغاني القديمة
دروب غير مستعملة من قبل ..
قدرتها على الإبتكار عالية ..

بروفه !

أسجل حضوري ... أو ... قل ... سعدي,
بك ونناسي وكل إحتمالات الفرح المؤجل,
والذي تكفينا منه { العينة } وربماوات
الجلاء النفسي والعبور إلى ضفة أخرى من
من تواقيتنا الجهيضة.

... ومحبتي

... طلال

انت عارف
ياطلال
مرات
ولا مافي داعي

عارف يا طلال
يا جماعة مالي بفيت
في حالة تانية
كده سيبك من الحالة النحن فيها
ودور لينا البروفة
وربنا اسامحك
في الصور

شكرا يا طلال
والرجاء أن تبلغ سلامي
للاخت نانسي التي فاجأتني بإحتراف الغناء
كما تحياتي لصديقنا بدرالين الذي اتصلت به
في هولندا وعرفت بوصوله إلي الخرطوم.

شنو يا السني ، مالك ما بتجمعش ؟
بيني وبينك ، موقفك سليم ..

مرات الإحساس بالحلاوة بيحير !

عزيزي حيدر
انا كمان سعيد بسعدك ،
ونانسي فعلاً عينة وصورة
ناصعة لجانب من الجيل
الذي إنحاز لإختياراته .

لك ولها أجمل التحايا
والود .

الرفيق طلال عفيفي
كل وانتا طيب
زمن ما اتلاقينا من عام 97 بالقاهره
لك التحية ولي الرائعه دومانانسي

إحنا أكيد إتلاقينا يا بيكو ،
لكن بس لو تديني أماره !
(شكلك كده جبهة ديمقراطية ، إتحاد
شباب ، مدرسة الكادر .. ولا شنو ؟)

لك التحايا يا عزيزي والشكر..

بت عجاج
الانسانة الرائعة دي واحدة من قلائل يجبروني علي الخروج من قوقعتي ..
بتخلي دموعكـ تجري .. و تخلي البسمة تطفو .. و الرعشة تسري في الجسد النحيل ..
بإختصار بتجبر حواسكـ تعمل حاجات دون إستئذانكـ ..
حفظها الله ...



طلال
كل صوركـ كوم .. و صوركـ لنانسي دي كوم تاني ..
بالله ما تدينا بالقطارة .. و أبهل القصة شوية إن أمكن
و نستميحكـ عذراً في السماح لشخصنا الضعيف في نقلها مع حفظ حقوقكـ.

_________
ثابت ممكن تكمل المجموعة من هنا

فيصل نوبي ،
كل سنه وإنت طيب ..
وكل سنه وإنت خارج القوقعة ..

طبعاً ما عندي مانع من إستخدام
الصور ، لكن لو أشرتوا للمصدر
بيكون كويس ..

انا كمان زيك كده بشعر إنو مجموعة
الصور الصورتها لنانسي في زيارتها
الماضية ، والحالية من أحب الصور
إلي ..

في صور كده لمن بكون بتصور فيها
بتكون مشاعرك كلها في عيونك ..

مره لو إتلاقينا ممكن أحكي ليك
بالظبط أنا بشعر بشنو ، لكن هنا
ما هينفع ..

إنت ذاتك فنان يا طلال .. الصورة دي بالغت فيها

Quote: إنت ذاتك فنان يا طلال ..

فنان شنو بس يا سليمان ، إنت قايلني
بجيب حاجة من عندي ..

على رأي عبد الرحمن أبو زهرة في فيلم
" أرض الخوف " : أنا مجرد الرسول

كل التوفيق لنانسي ..

شكراً يا ناذر
كل سنة وإنت طيب .

يا سلاااام
علي نانسي و عليكم يا طلال و ثابت

طلال كيفك ؟؟

عارف ، سمعت نانسى ... لكنى لم "أستمع" لها بعد ،
طبعاً عارف براك كيف أنّ الإستماع يلزمه شروط وإستعداد
نفسى ، يعنى تهيئة بيئة معملية للإصتنات "حلوة الإصتنات دى" ؟ ،
وبصراحة الواحد ليه زمن طويل لم يركن لـ "جلسة إستماع" ،
وفيما خلا ما يصيب الأذن من "رايش" الأصوات والغناء ، يظل
الغناء ، والأصوات الحقيقية للمغنيين قارة مفقودة .

بالجنب كده :-
الصور صوتها حلو يا طلال ،
خصوصاً إنها أسود وابيض ،
يعنى تسجيلات إذاعة قديمة .

دمت بعافية .

وقد كان!

Quote: والصورة عاملة تشويش

لا عليك ياصديقي !

شكرا يا ابوبكر ..
وكل سنه وإنت طيب[/lue]

وإنت طيب

الله يعيدك سالم للقارة المفقودة يا عبدالله ،
ويتم عليك نعماه ..

أتمنى لو يوم نقدر نستمع إليها في جلسة
إستماع ..

شكرا على التعليق اللطيف وكل سنه وإنت طيب ..

هلا نانسى عجاج
مع التمنيات باقامة طيبة فى الوطن
بس المشكلة يا طلال حفل راس السنة بالنادى الدبلوماسى مناط به طبقة معينة
اتمنى ان تقيم حفل يستطيع الكثيرون حضوره
تحياتى

الصديق الرائع بود عفيفي

عيد سعيد والتحية والتقدير

للفنانة المبدعة نانسي

وكل التوفيق

بلدي يا حبوب ..
ستكون هناك أنشطة متعددة في أمكنة مختلفة
تحييها نانسي ...
أتمنى أن تجد الوقت والفرصة للإستمتاع بإحداهن .

أحلى التحايا .

طلال !!
والله نانسى دى نفسى اشوفها واسمعها
وبالمره نشوفك ياخ (وجه ما بشبه بتاع نانسى )
رغم انو راس السنه دا عندنا عرس ما فيهو طريقة زوغة !!
كلمنا بشروط حضور الحفل دا هنا،،،، وبسرعة !
مايكون فيهم ،، على ان لاتكون قد ارتكبت حماقة من قبل *

نوبى يا عمكــ

Quote: بإختصار بتجبر حواسكـ تعمل حاجات دون إستئذانكـ ..

ذى شنو كدا ؟؟؟؟ قول .. قول ( وجه مغطى باليدين الاتنين)
هسه ذى دا ما اخير منو القوقعه ؟؟؟؟

دينا العزيزة ..
دايماً متلوم معاكي وما برد والبوست بيروح فيها !
غايتو إنتي دمك خفيف شديد ..

المهم ، حفلة نانسي بكره في النادي الدبلوماسي
المطل على شارع المطار ؛ ما في شروط دخول غير
شراء التذكرة ، وبتلقيها متوفرة في النادي ..
لو جيتي هتكون حاجة ظريفة ، ولو ما قدرتي في الأيام
الجاية بيكون في أنشطة لنانسي ..

في إنتظارك

قيل
(كترة الطلة بتمسخ خلق الله)
لكن مع نانسي دي لازم نبقي مساخ ..

طلال
لكـ كل الشكر ..
بكل تأكيد المصدر محفوظ و إسمكـ يزيل الصور.
بس إنت خليكـ كريم معانا.. و إيميلي في البروفايل*.


دينا

Quote: ذى شنو كدا ؟؟؟؟ قول .. قول ( وجه مغطى باليدين الاتنين) هسه ذى دا ما اخير منو القوقعه ؟؟؟؟

ياخ في حاجات ما بتِنقّال
بتتحس بس ... ولا مو هيكـ
__
*" دينا ما تتعولقي بخصوص الايميل "

يا سلام يا طلال
نانسي كانت هنا في إستوكهولم و بالتحديد يوم 15 الفات
بالجد الحفل كان أجمل عيدية واكبت جميع المناسبات
كريسماس - عيد الأضحية - الإستقلال جعلتنا نتعرف عليها من قرب
و كان تجمع الكثير من السودانيين هو اللافت
شكرا نانسي .....
شكرا طلال......

نان سي


نان خليتي شنو للباقين

طلال
شكرا كثير

طلال ياصديقي

دوما بلقاك جاي ومعاك الفرح في اي مكان (ترك) فيهو يانورس انت

عاين

قول لننوسة نادية قالت ليك طالعي الحوار في مجلة حضارة السودان العدد الفات ..

وقول ليها قالت ليك

عليييييييك الله البسي الفستان الأزرق في واحدة من حفلاتك دي ..وكمان قول ليها نادية قالت ليك ياريتها كانت في الخرطوم كنا مشينا السوق سوة زي في القاهرة !!

وقول ليها

نادية قالت ليك انتي فنانة حلووووووة شديد وهي بتحبك جدا سمح؟

ننوسه ؟؟!!
والله دي فاتت علينا !


لكن يوصل سلامك طبعاً يا نادية ..
لو بتقدري ترسلي لي نسخة إلكترونية من الحوار ،
ولا حضارة السودان ما عندهم الأوبشن ده ؟؟

والله كا بيكون جميل لو كنتي في الخرطوم

نشوفك قريب

العزيز فيصل ..
مشكور على المتابعة والتعليق ..

سلامات

شكراً يا غباشي ..
وأتمنى أيامكم تكون كلها أفراح ..

لك تحياتي يا صديقي

كتبت ناديه

Quote: عليييييييك الله البسي الفستان الأزرق في واحدة من حفلاتك دي

أبشرى .. ظهر الحق .. فاضل ود عمتك !!
غنت (نانسى) فى القاهرة:-

Quote: يا مسافر وناسى هواك

فردد الجميع خلفها:-
يا (مسافر ونانسى هواك .. ارواحنا وقلوبنا معاك).

طلاااااال
مساك زي صوت البت دي .. قول آمين
يا طلال أخوك زائر فجر .. عشان البت دي من الملايكة
عليك الله أسمع يا طلال .. أسمع وإنت مغمض
عندها حاجة حقتها براها ( فواصل كده ) ( أآآآأ )
بتلقاها بعد كل مقطع في كوبلي أسمعها بعد الكلمات ديل ( وجّن .. سجّن .. )
دي أنا متاكد مش بفمها .. ديل بتغنيهم بروحها
بعد داك بجيك الموت الأحمر بتاع ( ده دلاااااااااااااااااااليييك )
أفففففف بس يالطيف .. الزول محل يودي روحو تغلبو .. من المتعة

هـنا بتلقى الشوق والريد .. ونانسي في حال قيام وجلوس

والله العظيم يا طلال .. وماك طالبني حليفة
الـ نانسي دي لمن أسمع منها في الضواحي أو فلق الصباح أو ولى المساء
بحقّب يديني بوراي وأضرع الغرفة ماشي وجاي
بحس بي روحي خفيييييييف .. آآي والله
بعدين مع المشية والجية .. حاسر الراس .. مرة أبكي ومرة أضحك
ويمين بالله البكاء والضحك يا طلال ماليهم علاقة بشيء شخصي
كلو من صوت نانسي وحلاوتو وتغلغلو جوووة
عارف لما أشوف فديو .. كنت قاعد أتابع حركة إيديها والله
كنت بحس إنو الشغل كلو في صوابعها
تباريهن تدخل الجنة تووووش .. بتناولك بيهن غناها كلو

لكن لقيت روحي غلطان تصدق ؟؟
نانسي دي لو تابعتها كويس أي حاجة فيها بتغني معاها ..
العيون .. الفم .. إيقاع الجسم .. المرجحة .. حتى الملابس
غايتو أنا ما عارف .. لكن لو في ناس خلقوها للغناء ..
نانسي دي أول واحدة إتخلقت

ياخ دي .. نااانسي دي .. نانسي عجاج دي
الحمد لله بس .. ربنا يحفظها

تشوفنا قريب ما تتعالى
تسالنا و نسأل عن حالا

سلامات يا طلال
انت مصور عالمى
محترف بالجد تستحق
تكون معروف على نطاق
كبير والله ده شفل مو ساهل
وداير كلام كتير بلحيل يا طلال .
___
اها ألنجيك لى نانسي دى
نانسى ترعرعت فى بيت فن ( بيت عجاج الكبير )
شافت الاكورديون فى راس الدولاب .
والنوتات والكتاب .
وتعلمت المطلوب والمحبوب بذكا شديد
تعلمت كيف تلبس
تعلمت كيف تاكل
تعلمت كيف تشرب
شافت كيف يغنى العالم
فعرفت كيف تغنى للعالم
__
يازول دى بتعوضكم العيد الراح فى النزفيه والله بختكم.

زمااااان لما السكر اتعدم ،الناس كانوا بشربوا الشاي بالبلح
تشرب بقة شاي، ما تقدر تقرم البلحة..تقرم البلحة الشاي يبقى ليك قاسي
اها يا طلال نانسي دي يشوفوها وللا يسمعوها... القصة دايرة زول حريف غايتو
انسانية مرضية حد الترف للعين والسمع علي السواء.


ودي

الخير سلامات ..
بعيداً عن حكاية الصور ، أتمنى الناس يسمعوها ،
وكما أتمنى هي تسمع الناس ..
بالتبادل ده هيكون عندنا فنانة ومغنية من أجمل
ما يكون ..

عثمان العزيز ..
فنان عالمي دي ممكن تخليني ما أنوم ،
فلا تزد من سهادي ..

نانسي فنانة مطبوعة ، بتمنى تواصل إحتكاك
وتصقل تجربتها بالتواصل مع الثقافات وزيادة
التجريب .

اسغ نمشى لى نانسى ولا شروق


الاتنين فى راس السنة؟

طلال المحترف


وكأنك تقتادنا لدخول عالم جميل صورة وصوت .. إختيار الأغنيات بحرفية عالية وإنسياب في الصوت بخليهو يدخلك من بين مسامك ويتحشر ويتكرفس جواك


_-_-_-_-_-_-_-_


لفت انتباهي أنك لم تكن تحمل الكاميرا في مراسم تشييع الراحل فاروق كدودة ... أهي حالة من الحضور أم أن الحدث فاق التوثيق ....

طلال
والرفاق.....

حالة (سعبة) شديد لكن !!!!!!


والله المستعان يا صاحبى


لك الود


عبد الرحمن

صديقنا الجميل يا سامر
سلامات ..

بقدر ما كان مهماً توثيق وداع فاروق كدودة ، كان القلب واهناً
وليس في الروح روح ..

غايتو ، زول عزيز وإتفقد ..

من بروفة حفل راس السنه

الصديق عبدالرحمن قوي ،
يبدو إن الله المستعان فعلاً !

الله يهدينا

كدى يا طلال


نعاين للموضوع من نواحى فنية بحتة رغم عدم التخصص

لكن الواحد ممكن يدعى انو سمعو نضيف شويتين


مع احترامى لتاريخ اسرتها الفنى ومع احترامى لطلتها السمحة والاحساس البتدينا ليهو بأننا بنعرفها منذ سنوات


لكن لمن نجى فى حتة الصوت والنفس و المسافات الممكن تقطها بإرتياح


أقول ليك انها عادية جدا


ومعليش على الصراحة الفادحة دى

لكن بكل أمانة امانياتها عادية جدا


ولا شنو ؟؟

شكراً لك أخي الجميل طلال

نتمنى للمبدعة نانسي إقامة طيبة في بلدها

وصدقني هذه أجمل عيدية لناس الخرطوم

كل الشكر يالعوض الطيب ، بس كمان نانسي
تشد حيلا وتعمل حفلات جماهيرية أوسع ..

كل عام وأنت بخير ..

Quote: لكن لمن نجى فى حتة الصوت والنفس و المسافات الممكن تقطها بإرتياح أقول ليك انها عادية جدا ومعليش على الصراحة الفادحة دى لكن بكل أمانة امانياتها عادية جدا

والله يا ود العجمي يا خوي انا موضوع المسافات والنفس ديل ما بقدر أنظر فيهم
بشكل علمي ، لكن لو إتفقت معاك في كلامك البيقنع الديك وناس ثابت منو ؟؟
نوع الناس بيقول ليك صوت سماوي ، والبيقول ليك علاج للغدة !
الفن ده تذوق على ما اعتقد ، والكلام الباقي كلو محترم ، لكن بيفضل مجرد
كلام محترم ..

على العموم صوت نانسي من الأصوات العرفت تثير جدل .. وهو صوت لغاية اللحظة
دي قادر يستقطب جمهور من فئات مختلفة .. أكيد هو صوت ما فاخر .. لكن عنده
طريقته البيستلطف بيها أفئدة البعض ..
وأكيد إنو صوت مختلف ..

كل سنه وإنت طيب يا ود العجمي

طلاااااااااااااااال
مساء الجمال .. ومساء نانسي عجاج
كل سنة وأنت وكل من يعز عليك قد بلغتم ما تشتهون

علييك الله يا طلااال تقول لي نانسي
في زول غناك ببقالو روووح .. وسلم عليها شديد
سلام من سوداني بعتز بأخت سودانية
وقول ليها .. واااااااصلي خليك نسمة كده على طول
وقدر ما تسعفك اللغة والإحساس إتمنى ليها التوفيق نيابة عني

طبعاً أكيييييييييييد منتظرين أخبار الحفلة
واخبار الجديد الذي تنوي نانسي تسجيله
واي اخبار جميلة عن نانسي بتخلينا نحس أننا بخير
حفظها الله وسدد خطاها
حفظك الله وسدد خطاك
حفظنا الله جميعاً وسدد خطانا

العزيز ثابت ، ونحن في الغرام سيان ،
كل ما أقرا كلامك أعرف أن فوق كل ذي
علمٍ عليم وأن فوق كل معجب ممكون ..

يعني إنت مفروض كنت تكون حاضر كل
التفاصيل دي لولا أنه يعطي الحلق
للبلا آذان ..

بشكرك على الإهتمام الهميم بالبوست ،
وربنا يخفف من غلواء المحبة على قلبك ..

انا كنت مفكر أنزل الصور حقت راس السنه
والبروفات في بوست منفصل ، لكن خلينا
نتفرج عليها هنا مع بعض أحسن ..

والله المستعان

طلاااال
وطلّ العام الجديد
ها انت ذا تحتضن صوت نانسي البارحة .. أليس كذلك

علييييك الله أول ما تصحى من النوم تعال كلمنا
البارح نانسي حلقت بيكم لحدي كم قدم من الروعة ؟؟

غايتو حظكم
منتظرين .. أووعك تشحتف روحنا
تعال وصف لينا بس
يعني لا نموت ولا نسمع الوصف ؟؟


محبتي لك ولصوت السماء

ولي المساء ...

تعرف يا طلال عفيفي انا زمان ما كان عضوية في المنبر دا
و كنتا متابع جيد من الخارج و من متابعاتى البرانية انا
بقت مكسر في بوستاتك البديعة و المزدانة بصور فنان بارع

بس البوست دا حيرنى!! و الله معرفتا اتكسر وين و لا وين

الله قادر
الله قادر شديد

الله في و عيشة السوق لينا انحنا

والله يا فيصل ولي المساء ، لكن غداً يعود
كما نود ..

قول يا باسط
(بعدين ، ليه لمن بتجي ما في زول بيشوفك ،
مش عيب كده ؟)

طلال .. ياطلال

الجمال سمح بالحيل ومابناباهو لكن فضلا راعى حال اعمامك وانت بتلتقط

وكان كمان عندك علاقة مع ناس نشرة الساعة 8 فى الاذاعة كلمنا عشان نعمل حسابنا


ود العجمى ياحبيب

فى حاجة موكرة جوة شديد فى مكان عجيب البقدر يلمسها زى نانسى دى خلاص يكون الكلام كمل

كل الود

Quote: ود العجمى ياحبيب فى حاجة موكرة جوة شديد فى مكان عجيب البقدر يلمسها زى نانسى دى خلاص يكون الكلام كمل

تعرف يا عمر ، الكلام ما بيكمل بطبيعة الحال ، وربما ، والأكيد
إنو ود العجمي عندو وجهة نظر ..
والله لا يحرمنا من وجهات النظر ..

لكن عجبني في كلامك إنو عندها حاجة موكره شديد ، يمكن دي الحاجة
البحس بيها ، والحسيتا من أول مره ، وما عرفت أعبر عنها .

عزيزى طلال

كل عام وانت بخير صديقى

سعدنا جدا بليله رأس السنه مع المبدعه نانسى عجاج

واحده من مبدعات بلادنا

لكن ويييييييييييين يا طلال الصور ؟؟

معتز الامين
سلامات ..
مشبه عليكـ .. ياكا ولا ما ياكا

الله يغفر لينا و ليك يا طلال ..
ربّنا على الظالم .



و آخر دعوانا أن الحمد لله رب العالمين .

العزيز معتز ..
خليني أول حاجة أقول ليك مشكور على الجهد
الذي قمتم به لإنجاح الحفل ..
وإن شاء الله نردها ليكم في الأفراح ..

أفتكر صور الحفلة ما بتعبر عن الروح الحسيتا ،
التصوير بليل صعب ، والخواجة كمان عارف كده ،
ورغم إختراعو للفلاش إلا أن المشكلة لا تزال قائمة ..

سيداتي ، آنساتي .. سادتي ..
ونحن نستمتع بهذا البوست ، ونتداخل
ونسمع نانسي ، ونتفرج على صور وجهها ،
لابد لنا أن نلقي بتحية على الزول الظريف
الجميل طارق الأمين ..

كان طارق هو القائم على أمر الحفل والواقف
السهران على نجاحه ، ومن خلفه كتيبة من ناسه ..

شهدت جهده العجيب وبوظان أعصابه الهاديء أثناء
توثيقي لرحلة نانسي ..

شاب مهموم بالتجويد ، ومهتم بالتفاصيل ..

أنا هنا بشكره - لو تسمحوا لي - بالنيابة عنكم ،
وبالأصالة عن نفسي (طبعاً) ..

وفي وسط إنشغالته ، بذكرو إنو عضو في البورد ،
وإنو حيدر قاسم فتح بوست بيسأل عنو ..
وإنو كتابتو خفيفة الظل ، ولازم يلقى وقت عشان
يكتب لينا ..

سلامات يا طارق ..








___________________
الصورتين ديل لطارق
قبل بداية الحفل بساعات .

Quote: والله يا ود العجمي يا خوي انا موضوع المسافات والنفس ديل ما بقدر أنظر فيهم بشكل علمي ، لكن لو إتفقت معاك في كلامك البيقنع الديك وناس ثابت منو ؟؟ نوع الناس بيقول ليك صوت سماوي ، والبيقول ليك علاج للغدة ! الفن ده تذوق على ما اعتقد ، والكلام الباقي كلو محترم ، لكن بيفضل مجرد كلام محترم ..

العزيز طلال

أهو أنت لخصت الحكاية . لكن الشىء البيحير إنه فى شبه اجماع على قوة امكانياتها وأظن أنه أمكانياتها دى داخله فيها حكاية الصوت والصورة والطلة وإحساسك بأنها بت أختك ولا بت جيرانكم الكبرت وانت برة البلد . المهم يا سيدى هى مألوفة جدا . وبرضو ارجع وأكرر كلامك بأنه كلامى دا ممكن يكون نابع من حتة لسع ما وصلتها فى صوت نانسى

Quote: فى حاجة موكرة جوة شديد فى مكان عجيب البقدر يلمسها زى نانسى دى خلاص يكون الكلام كمل

عمر ادريس ياخينا سلامات

الحاجة الموكرة دى لو البنية دى قدرت تلمسها والله ليها البراوة . لكن برضو يا عمر نتفق على انو الموكر دا داير معطيات كثيرة عشان تتفك طلاسمو

يا ناس استمتعوا . وكل سنة وانتوا احلى

على الطريق إلى المسرح .


سلامات تاني يا ود العجمي ،
وكمان تاني كل سنه وإنت طيب .

Quote: نتفق على انو الموكر دا داير معطيات كثيرة عشان تتفك طلاسمو

كلامك ده سليم ، ويا ريت نانسي تطلع عليهو ،
وتفهم معانيو .
هي محتاجة تغوص أكتر في روحا ، وتكون شجاعة
أكتر في إنها تنقل لينا وللناس (ولنفسها)
عما يعتمل فيها ؛
أنا مثلاً ، كإنسان ، محتاج لتعبير يشبه روح
العصر ، بموسيقاه ، وكلماته ..
يعني أنا سعيد كوني بتعرف من خلال نانسي على
الأغاني السودانية التليدة ، وسيد خليفة ،
والكاشف ، والمعماري الكبير عثمان حسين ،
بكل هذا الأداء الروحي البتقوم بيهو نانسي ؛

لكني كمان عشمان في تجربة موسيقية متكاملة ،
فيها روح العالم ، وفيها تضافر تجارب من هنا
وهناك ..

ما بتمنى إنو نانسي تفضل تراهن على كونها
أفضل الموجودين ، بل أرنو لأن تفتح باباً جديداً
في المذهب الموسيقي .. وده ممكن .

انا مستمتع بما تقدمه الآن ، وصابر على عشمي ،
لأني عارفو ممكن يتحقق ..

فيصل نوبى
كل سنه وانت طيب
يانى يانى زاااااتو

طلال يا فنان..

كل يوم وأنت زي ما أنت..
حاملا للمسك.. ناثرا للجمال


بلًغ الفنانة الجميلة نانسي تحياتي وتمنياتي الصادقة بالمزيد من التألق











مشتاقووووون بجد جد

سلامات يا رجاء وإنتي بتجوبي في أنحاء الأرض
في متعةٍِ أحسدك عليها يا بنت الأكرمين ..

كل سنة وإنتي طيبه ..

تسلم يا طلال
الصوت الحنون والدفء و...............
هو نانسى

عن إذنك يا طلاال

يا أبو بكر ممكن ترفع الصورة دي بدل بروفايلك ؟
عشان البروفايل كبير جداً .. مع كامل محبتي وإحترامي



كامل المودة لك ولطلال عفيفي ونانسي عجاج

طلال
كل عام وانت بخير، وربنا يحقق امانيك
كنت حضورا ليلة راس السنة
حقيقة كانت ليلة متميزة في كل شي
الحضور
الفرق الكوميدية
الفرقة الموسيقية
ونانسي
ثم انت
لمحتك تتهادي في الممرات تبحث عن زاوية التقاط
ما حبيت اشوش عليك
اكيد ح نتلاقي في مقبل الايام
بس ياريت لو تورينا الانشطة الجاية لنانسي ح تكون وين ومتين؟
----
احيك واحساسك في التصوير



نانسي
انشالله السنة دي ح تكون سنة سعيدة وراقية بقدر رقي الليلة

كتلتنا بس يا طلال عفيفى

الله يسامحك

الحبيب طلال ,


كل سنه وانت طيب , اها ماوريتنا اخبار الحفله شنو ,,

اوعى يكون الجماعه لغوها ,,,

سبحانك يا خالق!

اللهم صلى على كامل النور

يعني هسي الواحد يعيد الوضوء !!!
لا اله الا الله ...















_____
قومو الي صلاتكم يرحمكم الله ..
الجمعة 04 يناير 2008 الساعة 12 بالضبط.

أعٍد !

30-12-2007, 00:33 ص

طلال عفيفي


.

تاريخ التسجيل: 20-06-2004
مجموع المشاركات: 3036
نانسي !

Quote: وصلت الخرطوم المغنية البديعة نانسي ، شارعة في عدد من الأنشطة من بينها إحياء حفل رأس السنة بالنادي الدبلوماسي والبدء في الإعداد لألبومها الثاني الذي يتضمن مجموعة من الأغنيات من بينها أغنية من كلمات الشاعر والقاص يحيي فضل الله .. أتمنى لنانسي إقامة طيبة وموفقة ، فهي فنانة تتعامل بإحترام مع عالمها ولها شخصية مميزة في الأداء .

الشفيف طلال عفيفى
تحياتى يا مبدع وكل عام وانت بخير
فقط سؤال واحد : هل مصدر معلوماتك هى الفنانة نانسى
ام مجرد تقرير صغته من عندك ؟
واتمنى ان يكون الحفل قد خرج بكامل بهائه ورونقه
منتظر الاجابة
مودتى
ضياء ميرغنى

حقيقة اول مرة ادخل فى البوست ده و اتفاجئت بكمية الجمال الفيهو

الواحد لمن ما عارف يقول شنو

شكرا طلال و الى الامام نانسى الرائعة المتألقة

نانسي فوق كل المحن