Post: #1 Title: رشا شيخ الدين وعقد الجلاد ... Author: طلال عفيفي Date: 03-19-2008, 01:41 AM Parent: #0
أعزائي ..
قدمت رشا شيخ الدين ومجموعة عقد الجلاد عرضاً إستثنائياً بالخرطوم ، على مسرح مدرسة مجتمع الخرطوم العالمية ..
هذه هي المرة الاولى التي تقدم فيها رشا - المقيمة في اسبانيا- اغانيها بالسودان .. بالإضافة إلى ذلك كان من مواضيع فرادة هذا الحفل إشتراك عقد الجلاد ورشا في أداء مشترك لمجموعة من الأغاني ، بمعاونة أساسية وطاعمة من عازف الساكس الكوبي " ناردي " و" الوافر شيخ الدين " الذي ساهم في تقديم خلفية موسيقية شديدة الطعامة مستخدماً مجموعة من الآلات التي عزف عليها بإقتدار شديد .
قبل بداية الحفل في 17 مارس الماضي ، عقدت رشا ومجموعة عقد الجلاد سلسلة من البروفات تشبه الورشة ، تم فيها تبادل نوع من الخبرة والتدريب على إيقاعات الأغاني الخاصة بالطرفين .
ناردي ، أو " ليوناردو كاستلو " .. من مواليد كوبا الشقيقة (يوليو 1966) مهتم بالبحث في مناخات الموسيقى النوبية ، إشترك مع العديد من فرق الموسيقى حول العالم في إخراج نغماتها إلى الناس .
__________
عود وناي ودف ... ثلاث آلات إشتغل عليها الوافر شيخ الدين بالإضافة للإكورديون
والوافر فنان أريب ، وكام يقولون ( ماسك الصنعه ) ، رافق شقيقته رشا في تجوالها الغنائي ، وهو مؤلف موسيقي وصاحب نظر جريء في التعامل مع الآلات التقليدية والنحو بها لمآلات خيالية ومعاصرة .
_________
برغم التباين في الخلفيات الموسيقية ولونية الأداء ، إلا أن رشا وعقد الجلاد والوافر وناردي إستطاعوا تقديم ليلة شديدة الإنسجام :
لقد شهد - من حالفهم حظ الحضور - أمسية بديعة ..
__________ (نواصل لو الله فتح علينا)
Post: #2 Title: Re: رشا شيخ الدين وعقد الجلاد ... Author: fadlabi Date: 03-19-2008, 01:48 AM Parent: #1
بختكم يا صاحبي
المغسة شقتني و الله
كيف تفوتني حفلة زي دي كيف؟
Post: #5 Title: Re: رشا شيخ الدين وعقد الجلاد ... Author: طلال عفيفي Date: 03-19-2008, 02:35 AM Parent: #2
فاضلابي العزيز .. يا صاحبنا يا بعيد .. فاتتك الليلة ، لكن إحنا ما فتناك ، إتذكرتك كتير ، في البروفات والحفلة ، وكمان غتذكرتك أكتر لمن المجموعة غنت الغنية الجميلة الألفتها بلحن خلاني أشعر كأني عايش في الستينيات ؛( أعادها الله علينا باليُمن واليُسر والبركات )
غنوا لنا :
Quote: كل ما نقول كملنا الليل يطلع بـاكر ليلاً أطول
كل ما نقول خلصنا الشيل تطلع شيلة باكر أتقل
Post: #3 Title: Re: رشا شيخ الدين وعقد الجلاد ... Author: خالد الطيب أحمد Date: 03-19-2008, 02:00 AM Parent: #1
طلال سلام.. وطولنا في إنتظارك ياخي..
و شكرا علي المعلومات القيمةعن (ناردي ) وكذا الإمتاع البصري ..وأنت دوما تنقلنا معك حيثما كنت وبصورة لا شعورية..
وللأستاذة رشا شيخ الدين وللعقد الفريد نزجي كل التحايا وهم يعطرون ليالي الخرطوم..
Post: #7 Title: Re: رشا شيخ الدين وعقد الجلاد ... Author: طلال عفيفي Date: 03-19-2008, 02:47 AM Parent: #3
سلامات يا خالد ، مشكور على تفقد الأحوال والكلمات الطيبة .
أما أخونا ناردي ففنان له العجب . رئة مليانه بنغمات العالمين ، وروح سارحة في الملكوت وهايمة ؛ موسيقي مقتدر ، وتدرك هذا لو تفرجت على أصابعه وهي تلعب ، وشهيقه وزفيره وهو يتعب ليطلع عليك بألوان من السحر ، تحمد عليها الله ، وتنام .
___________ الصورة دي تم إلتقاطها في القاهرة في يونيو 2007 ؛
Post: #4 Title: Re: رشا شيخ الدين وعقد الجلاد ... Author: طلال عفيفي Date: 03-19-2008, 02:18 AM Parent: #1
مشاهد من البروفة الأخيرة :
Post: #6 Title: Re: رشا شيخ الدين وعقد الجلاد ... Author: mohmed khalail Date: 03-19-2008, 02:39 AM Parent: #4
عييييييييييييييييييييييييييييك...
الجماعة عجّزو..
Post: #8 Title: Re: رشا شيخ الدين وعقد الجلاد ... Author: طلال عفيفي Date: 03-19-2008, 02:58 AM Parent: #6
Quote: عييييييييييييييييييييييييييييك... الجماعة عجّزو..
والله يا محمد خليل العمر بيجري ، والأعمار بيد الله زي ما إنت عارف ، وكلنا لها طبعاً .. لكن ناسك ديل لسه عارفين يخلوا في الباقي من عمرنا امل وحيوية .
إنت كيف ؟
_______________ في الصورة أخينا شمت وخستكة سريعة !
Post: #9 Title: Re: رشا شيخ الدين وعقد الجلاد ... Author: Hussein Mallasi Date: 03-19-2008, 07:48 AM Parent: #8
الخستكة ما مشكلة؛ المشكلة الشي البيخستك بيهو دا؛ قدر يدخلو مكان البروفة دي .. كيف!!
Post: #10 Title: Re: رشا شيخ الدين وعقد الجلاد ... Author: Amira Elsheikh Date: 03-19-2008, 08:01 AM Parent: #9
طلال ..
كيفنك..
سبحان الله بقيت اتفرج فى الصور وبس..
شفت الدنيا دى عاملة كيف...
تحياتى عبرك لعقد الجمال ورشا شيخ الدين..
Post: #11 Title: Re: رشا شيخ الدين وعقد الجلاد ... Author: tmbis Date: 03-19-2008, 08:29 AM Parent: #10
والله يا طلال دا كـلام غريب خلاص.. غايتو الله في بس ..
Post: #30 Title: Re: رشا شيخ الدين وعقد الجلاد ... Author: طلال عفيفي Date: 03-19-2008, 12:45 PM Parent: #11
مشتاقين يا تمبس يا ظريف إنت وين ؟
والله كانت مستاهلاك وناقصاك ..
__________ رأيك شنو في التصوير ، ما إتصلح شويه ؟؟
Post: #28 Title: Re: رشا شيخ الدين وعقد الجلاد ... Author: طلال عفيفي Date: 03-19-2008, 12:13 PM Parent: #10
سلامات يا أميرة ومشتاقين ..
Quote: سبحان الله بقيت اتفرج فى الصور وبس..
شفت الدنيا دى عاملة كيف...
معليش ، بس إتذكري برضو إنو في السفر سبع فوايد ..
Post: #27 Title: Re: رشا شيخ الدين وعقد الجلاد ... Author: طلال عفيفي Date: 03-19-2008, 11:54 AM Parent: #9
Quote: الخستكة ما مشكلة؛ المشكلة الشي البيخستك بيهو دا؛ قدر يدخلو مكان البروفة دي .. كيف!!
والله يا حسين ، انا ذاتي محتار !!
Post: #12 Title: Re: رشا شيخ الدين وعقد الجلاد ... Author: sami Alzubair Date: 03-19-2008, 08:41 AM Parent: #1
والله يا طلال زعلتة منك انت يا خوي ما نحنا قاعدين في الخرطومدي معاكم وقاعدين في البورد ده معاكم وبنحب عقد الجلاد معاكم ليه ما بتسوقونا معاكم الحتات السمحة دي
Post: #35 Title: Re: رشا شيخ الدين وعقد الجلاد ... Author: طلال عفيفي Date: 03-19-2008, 01:32 PM Parent: #12
سامي ، سلامات عارف ، بقدر جمال الحفلة دي وحلاوتا وندرتا ، بقدر ما الواحد كان بيتمنى يحضرا أكبر عدد من الناس .
Post: #13 Title: Re: رشا شيخ الدين وعقد الجلاد ... Author: Dia eldin khalil Date: 03-19-2008, 08:45 AM Parent: #1
Rusha Rusha Wafir
Post: #14 Title: Re: رشا شيخ الدين وعقد الجلاد ... Author: Dia eldin khalil Date: 03-19-2008, 08:48 AM Parent: #1
The Amazing Sax Player
Stand Alone
Post: #15 Title: Re: رشا شيخ الدين وعقد الجلاد ... Author: اساسي Date: 03-19-2008, 08:53 AM Parent: #14
شغل جميل وتصوير ابداع نقلنا الي مواطن الجمال
شكرا يا طلال للمتاع البصري والسردي
وشكرا ضياء الدين للصور
لكن مالو الاخ دا زي الفايتاهو ركعة؟
Post: #16 Title: Re: رشا شيخ الدين وعقد الجلاد ... Author: يازولyazoalيازول Date: 03-19-2008, 09:27 AM Parent: #15
لا يا أساسى
ده إسمو التأدب فى محراب الفن
Post: #17 Title: Re: رشا شيخ الدين وعقد الجلاد ... Author: يازولyazoalيازول Date: 03-19-2008, 09:28 AM Parent: #16
وأهو برضو صلاة
Post: #46 Title: Re: رشا شيخ الدين وعقد الجلاد ... Author: طلال عفيفي Date: 03-20-2008, 01:52 AM Parent: #17
Quote: وأهو برضو صلاة
يازول .. يا زول ، والله كلامك صح ، زمان سمعت كلام عن إنو التواصل الروحي مع العالم والتجول الروحي فيه يمكن أن يتم بالتأمل ، والإنصات الرهيف وبالموسيقى برضو .. انا شفت عازفي الدف في النوبه كيف بيكونوا غرقانين ، وشفت ناردي ده وهو بيعزف ، كانوا بيسافر .. إظنها صلاة وحالة روحية عميقة وصادقة ..
Post: #19 Title: Re: رشا شيخ الدين وعقد الجلاد ... Author: Bannaga ELias Date: 03-19-2008, 10:11 AM Parent: #15
شكرا لك يا أستاذ طلال فالموسيقى ما تلتقط كاميرتك الشاعرة ليتنا نتملك فرصة أن نسمع لنوثق.
Post: #47 Title: Re: رشا شيخ الدين وعقد الجلاد ... Author: طلال عفيفي Date: 03-20-2008, 02:07 AM Parent: #19
العزيز بانقا .. سلامات وأشواق والذي منو ..
طبعاً كلمة أستاذ دي ، تقض مضجعي عديل كده .. ما عارف ليه ؟
يمكن لأني منذ ريعان الصبا ما كنت بحب الأساتذة (والغريبة هم كمان ) ؛ غايتو ربنا يغفر لي لو كنت مخطئاً في حقهم ..
تشجيعك دافع قوي لي ، وعرفتي بك القليلة تشير لي بان الدنيا ما زالت بخير ..
حبي الشديد
Post: #37 Title: Re: رشا شيخ الدين وعقد الجلاد ... Author: طلال عفيفي Date: 03-19-2008, 04:23 PM Parent: #15
شكراً يا أساسي على الكلام الظريف .. ضياء فعلاً إلتقط لحظة حلوة .. وإنت ما أديتا تعليقك العجيب ..
طبعاً زولك الفايتاهو ركعة ده ، فاجأنا بإنو طلع على المسرح بالجلابية .. ما قلت ليكم كوبي !
Post: #36 Title: Re: رشا شيخ الدين وعقد الجلاد ... Author: طلال عفيفي Date: 03-19-2008, 01:50 PM Parent: #14
ضياء في سودانيز أون لاين ؟؟!! انا والله كنت قايلك إتجاوزت المرحلة دي !
منورنا يا فرده
Post: #18 Title: Re: رشا شيخ الدين وعقد الجلاد ... Author: فيصل نوبي Date: 03-19-2008, 09:58 AM Parent: #1
طلال ياخ انت واقع لي في جرح عديل كده .. و حـــــــــــاسدكـ رسمي و شعبي .. يا طلال ياخ الصباح وصلت المكتب متأخر بسبب البوست ده .. يعني أشرب لي عصير و أقراء البوست ده .. ده ما سُكري جاهز !!
_ ياخ الزولة دي انا بريدها عديـــــــل كده .. عندها صوت قوي و جهور بطريقة مميزة .. بتغني غربي إبداع .. و شرقي من النخاع .. وسوداني من بيت الكلاوي .. عدم مزجها بين الغربي و الشرقي دي في حد ذاتها طفرة .. بس مُقلة جداً و بشوف انها مظلومة شرقياً لانه الاعلام ما اداها حقها .. أحاسيسها ممزوجة بين : بنت البلد الاصيلة .. الافريقية ذات الدم الحّـــــــار .. حُبها لي مجتمعها برغم بُعدها منو .. حنينة برغم قوة الصوت ..
بإختصار فاتت كُتار جداً في المكسات دي و ما بيقدر عليهم زول بالهين ..
Post: #120 Title: Re: رشا شيخ الدين وعقد الجلاد ... Author: سعد الطيب Date: 03-27-2008, 09:54 PM Parent: #21
كلنا فى شوق ليك يا ابو الزهور تحياتى وعثمان النو وعقد الجلاد كلها
Post: #128 Title: Re: رشا شيخ الدين وعقد الجلاد ... Author: Magdi Ahmed Elsheikh Date: 03-30-2008, 05:00 PM Parent: #120
ياحليلكم
ود النو بتتذكر المطره النقناقه.....
القطن حصادو قرب...
سلام للجميع واشتقنا ليكم ....
دي 25سنه ياود النو............................
Post: #49 Title: Re: رشا شيخ الدين وعقد الجلاد ... Author: طلال عفيفي Date: 03-20-2008, 03:28 AM Parent: #18
رشا يا فيصل عجيبة .. عرفت كيف تتحرك بمخزونها الداخلي وتجوب العالم ، حملت أغني أمدرمان والبنات وضفرتها بمزازيك الغجر والفلامنكو وإيقاعات غرب إفريقيا .. في أغانيها ، ترمح النايات ، وتدق الطبول ، ويتحرك صوتها في مناخات مختلفة ، لكنها كلها ، قريبة للقلب ..
جاءت ، يا فيصل ، رشا إلى السودان ، وغنت لأول مره ، وبينما أتفرج عليها من خلال الFainder حق الكاميرا ، لمحتها تبكي ، وعيناها تدمع ..
نسايم عطبرة الحلوة من قطار الشوق أبكتها ، والتواجد وسط الناس .
كم كان هذا البلد ولا زال قاسياً على بناته وأبنائه .. لماذا تركهم يرحلون ؟
Post: #20 Title: Re: رشا شيخ الدين وعقد الجلاد ... Author: Ibrahim Algrefwi Date: 03-19-2008, 10:19 AM Parent: #1
طلال ، لقد كان الحفل بديعاً رائعاً بنفسجياً، شُكراً ياوريف يارائع لأنك جعلت هذا ممكناً
الليلة كيف الدبارة ؟
Post: #22 Title: Re: رشا شيخ الدين وعقد الجلاد ... Author: فيصل نوبي Date: 03-19-2008, 10:26 AM Parent: #20
معقول بس !! قرمبوز شخصياً !! ياخ البركة في رشا المرقتكم من جحوركم !! ما مشتاقين و لا اي شيء .. شايفكـ متجدع في الفيس بوكـ هناكـ و كده
__
Quote: الليلة كيف الدبارة ؟
ما تنفعكم
Post: #23 Title: Re: رشا شيخ الدين وعقد الجلاد ... Author: Hussein Mallasi Date: 03-19-2008, 10:29 AM Parent: #20
هو شنو .. شبع!!
Post: #24 Title: Re: رشا شيخ الدين وعقد الجلاد ... Author: فيصل نوبي Date: 03-19-2008, 10:31 AM Parent: #23
بيني و بينكـ يا ملاسي !!
_ وجع
Post: #50 Title: Re: رشا شيخ الدين وعقد الجلاد ... Author: طلال عفيفي Date: 03-20-2008, 03:44 AM Parent: #20
Quote: طلال ، لقد كان الحفل بديعاً رائعاً بنفسجياً، شُكراً ياوريف يارائع لأنك جعلت هذا ممكناً
أخينا في الله والسماوات والأرض ، إبراهيم قرمبوز الجريفاوي : والله عجبتني اللغة البوردابية دي ، والريمكس الفيها ..
أتمنى تكون إنكيفت بالمزيكة والغنا .. شوربة ترم البدن وتحيي العظام وهي رميم (مش كده؟)..
وكل عام وأنتم بخير بمناسبة مولد حبيبنا النبي ، طه ..
Post: #25 Title: Re: رشا شيخ الدين وعقد الجلاد ... Author: منى على الحسن Date: 03-19-2008, 10:52 AM Parent: #1
الاخ طلال سلامات
رشا وعقد الجلاد دي حاجة فوق احتمال عصب السمع والحس
يسمعوهم ديل كييييف ......ودي فيها دهشة تودي لي الصفة
التانية .....
شكرا ليك طلال على هذه النفحات الروحية الرائعة
وعلى التصاوير التحير ...نقول ما شاء الله
ونمسك الخشب .....
Post: #26 Title: Re: رشا شيخ الدين وعقد الجلاد ... Author: عمرو كمال ابراهيم Date: 03-19-2008, 11:00 AM Parent: #25
قرمبوز... متجدعين !!!
اها.. شيلو شيلتكم.. انحنا الليلة فاضييييين
ومن الساعة 7
شوف برنامج تانى
*** للضمان كده، طارق ما جاى
Post: #53 Title: Re: رشا شيخ الدين وعقد الجلاد ... Author: طلال عفيفي Date: 03-20-2008, 04:46 AM Parent: #26
Quote: اها.. شيلو شيلتكم.. انحنا الليلة فاضييييين ومن الساعة 7
وينك يا عمرو ؟ ما شايفنك !
جيت وعملت off line ، ولا الحصل شنو ؟
مشتاقين يا حلبي ..
ولو ما كنت موجود ، خليني أقول ليك إنو من أجمل الحاجات الحصلت إشتراك الفنان مصطفى السني مع رشا في أداء أغنية لعمنا الكبير أبو داوود ..
فسبحان العاطي الوهاب !
Post: #54 Title: Re: رشا شيخ الدين وعقد الجلاد ... Author: طلال عفيفي Date: 03-20-2008, 04:46 AM Parent: #26
معليش ، مكرر !
Post: #52 Title: Re: رشا شيخ الدين وعقد الجلاد ... Author: طلال عفيفي Date: 03-20-2008, 04:27 AM Parent: #25
سلامات يا منى ، وأحلى التحايا ...
بنشكر رشا وعقد الجلاد وناردي والوافر على الجو الحاني الذي توفر لنا من غير ميعاد ..
________________ عثمان النو يرهف السمع لعود الوافر شيخ الدين ؛ (أثناء البروفة)
Post: #29 Title: Re: رشا شيخ الدين وعقد الجلاد ... Author: Suad I. Ahmed Date: 03-19-2008, 12:40 PM Parent: #1
طلال العزيز شكرا على التقريلا المصور عن رشا وعقد الجلاد وقد إهدتني نماضر عدد من تسجيرتها لأنني سألتها عن الشابة التي تغني بلغتنا النوبية كأهلها تماما وسمت فرقتها في اسبانيا نولب نيجري وما كنت عارفه انها شقيقتها يا ريت يا طلال لو لو تنظم لهم جاسة استماع في النادي النوبي او نادي المحس للتتضامن معنا في مآسي الغرق الفات والقادم!! مامل سعاد الخرطوم19 مارس 2008
Post: #31 Title: Re: رشا شيخ الدين وعقد الجلاد ... Author: Hussein Mallasi Date: 03-19-2008, 12:51 PM Parent: #29
Quote: معليش ، بس إتذكري برضو إنو في السفر سبع فوايد ..
و جاكت أبيض أنيق جداً
Post: #56 Title: Re: رشا شيخ الدين وعقد الجلاد ... Author: طلال عفيفي Date: 03-20-2008, 05:21 AM Parent: #29
ماما سعاد .. يا قمر الحلوين ..
أول مره أسمع " رشا " ، كان عندك في البيت ، الكلام ده قبل سنين ... كنت راجع من القاهرة مفطور الفؤاد ، مخدوش الحنين ، وقلتي لي : أسمع البت دي ! من صوتا وطريقة غناها إفتكرت إنها ممكن تكون من عندينا و " فديكيه " ، لكن طلعت " ماتوكيه " ! لكن كلو واحد ..
بعد ما سمعتها معاكي أول مره ، مشيت أفتش عن أغانيها ، لغاية ما إتقابلت معاها ، وشفتها في النمسا ، وبعد كده في القاهرة ، وأخيراً في البلد المحبوب : سوداننا الشقيق !
ليه البنات ديل بيسافروا ؟ وليه يا سعاد ما عرفنا نجعل من هذا الوطن مكاناً كويس وآمن ؟
في اللحظة دي إنتي باقية لي أمل من ضمن الآمال الخفيفة .. بضحكتك وشجاعتك وصبرك وأمومتك وحسن الرأي
وبحبك شديد
Post: #93 Title: Re: رشا شيخ الدين وعقد الجلاد ... Author: sami Alzubair Date: 03-21-2008, 05:33 PM Parent: #56
يا طلال الكلام ده هزاني من جوة شديد والله العبرة خنقتني.. كل حرف بقراهوا ليك بخليني احبك اكتر لاحظ الكلام ده انا لا شفتك ولسه ما بعرفك اتخيل معاي لو عرفتك السيل ده حيصل وين
احترام كبير ليك يا سوداني يا جميل
Post: #92 Title: Re: رشا شيخ الدين وعقد الجلاد ... Author: sami Alzubair Date: 03-21-2008, 05:30 PM Parent: #29
Quote: يا ريت يا طلال لو لو تنظم لهم جاسة استماع في النادي النوبي او نادي المحس للتتضامن معنا في مآسي الغرق الفات والقادم!!
يا ريت يا ماما سعاد ..ياريت
سامع يا طلال...ياريت
Post: #32 Title: Re: رشا شيخ الدين وعقد الجلاد ... Author: mamkouna Date: 03-19-2008, 12:57 PM Parent: #1
تكلمنا بالحفلة بعد إنتهت..؟؟!! مالك بقيت كعب كدا يا طلال..؟؟!! --- * اللي ياكل لوحدو..يزوٌر..!!
Post: #69 Title: Re: رشا شيخ الدين وعقد الجلاد ... Author: طلال عفيفي Date: 03-20-2008, 05:22 PM Parent: #32
سلامات يا ممكونه ، انا بس إفتكرت ، والعهدة على الراوي ، إنو ما بتفوت عليكي حاجه ..
وبعدين شكراً على الأغاني ..
Post: #33 Title: Re: رشا شيخ الدين وعقد الجلاد ... Author: sanaa gaffer Date: 03-19-2008, 01:05 PM Parent: #1
Post: #34 Title: Re: رشا شيخ الدين وعقد الجلاد ... Author: mamkouna Date: 03-19-2008, 01:16 PM Parent: #33
------------------ بالجنبة التانية: بالأكتررررررررر يا سناء.
Post: #38 Title: Re: رشا شيخ الدين وعقد الجلاد ... Author: Mohamed Ahmaed Olyesh Date: 03-19-2008, 04:32 PM Parent: #34
كم احب هؤلاء ياطلا في هذا الزمن الوجيع كم ادخلتني في هيام وشجن في هذا البوست الانيق تمنيت اسمع جزء من الحفل...لو قدرت تنزل عمل واحد عمل واحد لايكفي .. ولكن.. احسن من صمة الخشم... قنوع اخوك ...ولا شنو؟
حبي واحترامي عليش
Post: #78 Title: Re: رشا شيخ الدين وعقد الجلاد ... Author: طلال عفيفي Date: 03-21-2008, 00:48 AM Parent: #38
شكراً يا عليش على المتابعة ، عقد الجلاد فعلاً ساهموا في تكوين وجدان ناس كتير .. لهم التحية والأمنيات بالتطور والتماسك والنجاح المستمر ..
بالنسبة للأغاني فما عارف لو ده هيكون مسموح ولا لأ ، خليني أسأل ، ولو كان ممكن أكيد هجيب أغاني حلوة من الحفل ..
Post: #77 Title: Re: رشا شيخ الدين وعقد الجلاد ... Author: طلال عفيفي Date: 03-21-2008, 00:35 AM Parent: #33
سلامات يا ثناء .. فعلاً إستمتعنا بالحفل المذدوج ده ( مذدوج دي صح يا حسين ؟) ، والواحد بيكون عايز يشكر الأستاذ فتحي محمد عثمان مهندس الرحلة والإحتفال ، والذي كان يشرف على كل التفاصيل حتى النهاية ، لنجلس في حفل شديد الأناقة ودقيق الإعداد .. له التحية والمحبة والتقدير ..
Post: #39 Title: Re: رشا شيخ الدين وعقد الجلاد ... Author: الجندرية Date: 03-19-2008, 05:01 PM Parent: #1
يا طلال الكميرا الشاعرة دي على قول زول هنا ما متذكرةمنو ما الهما وجه اميمة شيخ الدين ياخ انا مشتاقة اشوفها بعيونك
Post: #41 Title: Re: رشا شيخ الدين وعقد الجلاد ... Author: طلال عفيفي Date: 03-19-2008, 05:11 PM Parent: #39
سلامات يا أماني .. مشتاقة لأميمة ؟؟
والله اميمة دي أحلى حاجة في الدنيا .. خفة الدم والذكاء والمحبة الشديدة للناس ..
Post: #42 Title: Re: رشا شيخ الدين وعقد الجلاد ... Author: الجندرية Date: 03-19-2008, 05:22 PM Parent: #41
يا سلااااام يا طلال يا سلام تاني في ؟
Post: #79 Title: Re: رشا شيخ الدين وعقد الجلاد ... Author: طلال عفيفي Date: 03-21-2008, 01:12 AM Parent: #42
سلامات من جديد يا أماني
Quote: تاني في ؟
جيب السبع ما يخلاش ، زي ما إنتي عارفة ..
تدفعي كم ؟
Post: #40 Title: Re: رشا شيخ الدين وعقد الجلاد ... Author: شهاب الفاتح عثمان Date: 03-19-2008, 05:03 PM Parent: #1
ليتهم يعلمون ان عمر اللحظـه في بعـدك يا خـرطـوم سنين طـوال . د شهـاب الفاتح ـ كوالالمبـور
Post: #80 Title: Re: رشا شيخ الدين وعقد الجلاد ... Author: طلال عفيفي Date: 03-21-2008, 01:50 AM Parent: #40
عزيزي يا شهاب ، الحكاية كلها كانت فعلاً نسيج متكامل ، نسيج مليان بالألوان وأريحية الإنسان لمن يعرف كيف يمد الجسور بين ثقافة والتانية ..
" ناردي " كان جوهرة الخاتم في الحفل ، شاب مليان بالإحساس ، وغرقان في المزيكا ؛ كما إنو الناس الحضور إتجاوبوا معاهو شديد .. وإنتبهوا ليهوا جداً ..
Post: #43 Title: Re: رشا شيخ الدين وعقد الجلاد ... Author: تيسير عووضة Date: 03-19-2008, 06:47 PM Parent: #1
وبعدين معاك يا طلال !
ــــــــــ عقد الجلاد - بحساباتي - أكثر فرقة غنائية في العالم إستطاعت أن تصمد لأكثر من 22 سنة ! غنا بس مع بعض 22 سنة, تقولوا لي كبروا؟ ما يكبروا ..
أريتو كُبري
Post: #45 Title: Re: رشا شيخ الدين وعقد الجلاد ... Author: Tragie Mustafa Date: 03-19-2008, 06:57 PM Parent: #43
شكرا يا طلال تعيش وتصور وتبهجنا بالمشاركة من على البعد. والله ده شغل مميز جدنا يا ريت نلقى نسمعه بس.
تخريمه: عايزك تجينا بهناك في بوست نانسي واوع تعمل خايف عليها من بعاشيم البورد شجعها تجينا هنا.
Post: #91 Title: Re: رشا شيخ الدين وعقد الجلاد ... Author: طلال عفيفي Date: 03-21-2008, 02:04 PM Parent: #45
سلامات يا تراجي ..
" تعيش وتصور " دي دعوة جميلة .. آمين ...
شكراً ليكي كتير ..
Post: #81 Title: Re: رشا شيخ الدين وعقد الجلاد ... Author: طلال عفيفي Date: 03-21-2008, 02:06 AM Parent: #43
سلامات يا تيسير ..
عقد الجلاد فرقة متميزة ، إذ إستطاعت البقاء والمواصلة في بلد زي السودان وطننا اللئيم المحبوب ..
وعرفوا كيف يكونوا صِلة وصل بين الثقافات الموسيقية السودانية المختلفة والجمهور ؛
ده بالإضافة إلى الطرب وإسعاد الناس ..
____________ صورة خلفية " محمد ، شريف ، أنور " حفل عقد الجلاد على مسرح " عبود " ، ببحري / 14 فبراير .
Post: #44 Title: Re: رشا شيخ الدين وعقد الجلاد ... Author: تيسير عووضة Date: 03-19-2008, 06:54 PM Parent: #1
لا أعتقد أنني في حوجة لكي أثني على عدسة طلال المحترفة ولا على أجواء الحفل ولا على الحفل نفسو ولا على حضور رشا ووافر والكوبي (الشقيق)
في سلوك متعمد من جانبي يعرف شعبياً بـ الحسادة ..
Post: #48 Title: Re: رشا شيخ الدين وعقد الجلاد ... Author: معتصم ود الجمام Date: 03-20-2008, 02:10 AM Parent: #44
احبـــــــكـ يا طلال بكل صدق
قول لشمت المخستكــ وفي زاويه بعيده معتصم قال ليك غني لي اغنيتكـ بتاعت المعهد ... والله يا طلال تموت بالضحك ... ولكم جميعا عقد الجلاد وطلال ورشا والوافر والكوبي وسودانيز وماما سعاد لكم حبي معتصم
Post: #51 Title: Re: رشا شيخ الدين وعقد الجلاد ... Author: bakri abdalla Date: 03-20-2008, 03:51 AM Parent: #48
طلال الإنسان تمتلك فن الكتابة ولكن فوجئت بموهبتك فى فن التصوير... لك مقدرات عالية سأفرد بوست خاص عن المبدع الوافر شيخ الدين...أرجو أن تسمح لى بإستعارة بعض هذه اللقطات وشكرا لكم سلام.
Post: #131 Title: Re: رشا شيخ الدين وعقد الجلاد ... Author: طلال عفيفي Date: 03-30-2008, 11:48 PM Parent: #51
في إنتظارك يا بكري مشكور على التواصل ..
أيام سعيده ..
Post: #117 Title: Re: رشا شيخ الدين وعقد الجلاد ... Author: طلال عفيفي Date: 03-26-2008, 01:12 PM Parent: #48
سلامات يا معتصم ، معليش عالغياب .. إنت عارف الدنيا !
تحياتك توصل ..
نتلاقى قريب
Post: #55 Title: Re: رشا شيخ الدين وعقد الجلاد ... Author: نها محسن أبورأس Date: 03-20-2008, 04:55 AM Parent: #1
أستاذي الفاضل طلال عفيفي الشكر كل الشكر لك وأنت تنقلنا إلي حيث كان مرتعنا وموطن بهجتنا.... أحلي الأوقات تلك التي كنت أقضيها في حفلات عقد الجلاد حيث كانت عواطفنا وأحاسيسنا تمور مع أغنياتهم الرائعة... وهاهي الرائعة رشا شيخ الدين تنضم لذاك السرب الشامخ الذي يتنقل بين مواطن الجمال والحب ولا يستقر علي حال... كامل مودتي وخالص تقجيري
Post: #132 Title: Re: رشا شيخ الدين وعقد الجلاد ... Author: طلال عفيفي Date: 03-31-2008, 00:14 AM Parent: #55
أستاذ ؟؟ تاني ؟؟
حاضر يا نها .. وشكراً على التقدير ..
بس كنت عايز أسأل ، إسمك ده بيتكتب : نها ، ولا نهى ؟
حاجه أخيرة .. انا كمان بشكرك شديد على بوستاتك الجميلة ، والقيمة بجد ..
تحياتي وتقديري ..
Post: #57 Title: Re: رشا شيخ الدين وعقد الجلاد ... Author: Abir Abdulla Date: 03-20-2008, 05:34 AM Parent: #1
المناضل الفنان طلال عفيفي .. شكرا ليك يا رائع
Post: #58 Title: Re: رشا شيخ الدين وعقد الجلاد ... Author: Hussein Mallasi Date: 03-20-2008, 10:02 AM Parent: #57
Quote: المناضل الفنان طلال عفيفي
Post: #59 Title: Re: رشا شيخ الدين وعقد الجلاد ... Author: mamkouna Date: 03-20-2008, 10:33 AM Parent: #58
ملاسي.. بطٌل السغالة...!!!
Post: #60 Title: Re: رشا شيخ الدين وعقد الجلاد ... Author: تيسير عووضة Date: 03-20-2008, 10:39 AM Parent: #59
ممكونة ..
Quote: ملاسي.. بطٌل السغالة...!!!
طلبتي غالي
Post: #83 Title: Re: رشا شيخ الدين وعقد الجلاد ... Author: suliman ibrahim Date: 03-21-2008, 06:03 AM Parent: #57
الدكتورة/ الجيوكاندا = عبير =
كتب مره غسان كنفاني الى غادة السمان (( اذا كان علي ان اناضل من اجل ان
استرد الارض فقولي لي انت ايتها الجنية التي تحيك كل ليلة كوابيسي التي لا تحتمل
..كيف استردك ? ))
مثل ما اصابني من دهشة وانبهار وانا اراك اول مره فى تلك البلاد البعيده
ها هي عيوني تمارس ذلك التحديق والسفر الطويل .....اكان صيف ام خريف
ام شتاء لا اذكر على وجه التحديد لكن الذى اعرف هو ان تلك اللحظه حوت
كل المواسم والفصول .....هذا الذي تلبسين (الفستان) اعني جميل مثلك ويشبهك
الى درجة التطابق ....الابتسامة الحزينه الخجوله كالمونليزا تماما تارة تحس
انها تبتسم لك وتارة تحس انها تسخر منك ...الم اقل لك انها تشبهك..
بهذا ارجو ان لا اكون قد فتحت علبة الالوان التي تلاشت الوانها امام الماره
وعابرين السبيل ....لكن كان لابد لي من ذلك لتعبير عن ان الحرب قد تقف بوضع
السلاح والاستسلام من اي طرف لكن لن يعني هذا ان الحرب قد توقفت........
انا اعلم انك تفكرين في الهروب ايتها العصفورة نعم اعلم ان اسوار القلاع
لا تناسبك ولا اي اسوار بل تعشقين التحليق بعيدا ....نعم تزكرت شئ فات
علي ان اقوله لك قبل فترة قررت ان اصحب نفسي عبر القوقل الارض الى تلك البلاد
Post: #141 Title: Re: رشا شيخ الدين وعقد الجلاد ... Author: طلال عفيفي Date: 04-09-2008, 02:09 PM Parent: #64
ممكونه .. سلامات تاني ..
شفتى الزول ده !! عجيب مش ؟
Post: #65 Title: Re: رشا شيخ الدين وعقد الجلاد ... Author: Alsa7afa_30 Date: 03-20-2008, 11:28 AM Parent: #1
سلامات يا طلال ..
و تشكر على اللوحات الفنية البديعة ..
. . مافي حاجة تتسمع ؟؟
ولا هي شحتفة و بس
Post: #67 Title: Re: رشا شيخ الدين وعقد الجلاد ... Author: عمرو كمال ابراهيم Date: 03-20-2008, 11:49 AM Parent: #65
طلال
حضرت الحفل
ولكنى إنتحيت ركنا قصياً.. كى اتوجع وحيدا واحتفظ بقليل من الصور.. فى الذاكرة الخربة
ورمقتك.. تعارك بين العدسة وخطوات المارة
Post: #68 Title: Re: رشا شيخ الدين وعقد الجلاد ... Author: محمد سنى دفع الله Date: 03-20-2008, 01:49 PM Parent: #67
ماعارف يا تيتو العنوان بتاعك فيهو حاجة ما ياها كان ممكن اكون كوبا مدريد الخرطوم ـ وبالعكس او رشا ورنالدبنبي الوافر الجلاد يعني ليه الوافر صاحبي ده ظالمو كده بدون عنوان افتح قلبي للتجارب الجديدة ولي رشا والجلاد وريالدي وللوافر اشواقي ودام صفانا
Post: #70 Title: Re: رشا شيخ الدين وعقد الجلاد ... Author: Hussein Mallasi Date: 03-20-2008, 09:10 PM Parent: #68
مساء الأربعاء؛ و في نهاية الحفل و بعد انتهاء مراسم تكريم رشا؛ الوافر و الكوبي؛ و بينما الجميع يهم بالمغادرة؛ تحدث أحدهم في مايكروفون الحفل مردداً اكلشيهات شبيه بالذكرى ناقوس يدق في عالم النسيان و نحوها؛ فنقلنا من مسرح مدرسة مجتمع الخرطوم العالمية لمنتدى الخرطوم جنوب دون المرور بوسط الخرطوم!!
Post: #71 Title: Re: رشا شيخ الدين وعقد الجلاد ... Author: Raja Date: 03-20-2008, 10:55 PM Parent: #70
طلال يا عزيز..
رشا وعقد الجلاد وكمان مصطفى السني..
إن شا الله.................... ينفعوكم
ناس كوبا الشقيقة.. بسم الله ماشا الله
ملاسي أوعك تعلًق بالله ..
Post: #72 Title: Re: رشا شيخ الدين وعقد الجلاد ... Author: Tagelsir Elmelik Date: 03-20-2008, 11:05 PM Parent: #71
Iam having fun watching you painting with your camers Elmelik
Post: #126 Title: Re: رشا شيخ الدين وعقد الجلاد ... Author: طلال عفيفي Date: 03-30-2008, 10:57 AM Parent: #65
سلامات يا Alsa7afa_30 .. وشكراً ليك عالمتابعه طوالي ؛
Post: #73 Title: Re: رشا شيخ الدين وعقد الجلاد ... Author: معتز جعفر الحسن Date: 03-20-2008, 11:26 PM Parent: #1
Post: #75 Title: Re: رشا شيخ الدين وعقد الجلاد ... Author: Mohamed Elgadi Date: 03-21-2008, 00:00 AM Parent: #73
Tallal wrote:
Quote: رشا يا فيصل عجيبة .. عرفت كيف تتحرك بمخزونها الداخلي وتجوب العالم ، حملت أغني أمدرمان والبنات وضفرتها بمزازيك الغجر والفلامنكو وإيقاعات غرب إفريقيا .. في أغانيها ، ترمح النايات ، وتدق الطبول ، ويتحرك صوتها في مناخات مختلفة ، لكنها كلها ، قريبة للقلب ..
جاءت ، يا فيصل ، رشا إلى السودان ، وغنت لأول مره ، وبينما أتفرج عليها من خلال الFainder حق الكاميرا ، لمحتها تبكي ، وعيناها تدمع ..
نسايم عطبرة الحلوة من قطار الشوق أبكتها ، والتواجد وسط الناس .
كم كان هذا البلد ولا زال قاسياً على بناته وأبنائه .. لماذا تركهم يرحلون ؟
What a great poetic words that expressed our feelings, at least mine... Thanks Ya Tallal for becoming our voice and our eye that monitor these beautiful people...
mohamed elgadi
Post: #74 Title: Re: رشا شيخ الدين وعقد الجلاد ... Author: esam gabralla Date: 03-20-2008, 11:40 PM Parent: #1
يا طلال يا بن ام طلال اقعد اعمل فينا عمايلك دى...
الواحد كان مرتاح في كآبتو متيقن و راكز انو مافي حاجة لذيذة و سمحة قاعد تحصل...
تجى انت نابل بي اخبارك و كلامك الكيف كيف ده (وتوجد صور .. كمان) تلخبط لينا حساباتنا و تجهجه يقينا و نبدا تااااانى نقول: القصة دى لسه فيها باقي نفس ...
غايتو .... كتر خيرك يا صاحب، بتعرف شنو البستحق يتصور و شنو البستحق يتكتب ....
اميمة دى حكاية براها .... و معاها لئامة كمان ( غايتو يا السودانيين في الغنا البالاسبانى كلو ما عارفين الا كوانتاناميرا ... والقمتنى حجرا في نص الرويال فيستفال هول وانا جاى "اتراشق" زى صاحبي خدر)
الله يديك انت و كاميرتك و اصابعينك و عيونك اللقاطات ديل العافية و يبعد منك الحساد و ابناء السبيل و العاملين عليها يا طلال يا بن ام طلال
اميييين
Post: #76 Title: Re: رشا شيخ الدين وعقد الجلاد ... Author: Ashraf el-Halabi Date: 03-21-2008, 00:29 AM Parent: #1
عيك، ألحقوا الزولة دي غرقت!
الشغلانة شكلها جينية وأولاد شيخ الدين ديل فيهم حاجة من أهل الله حيث قال ليك الصادق شيخ الدين لو لحق غرق تاني الكشافة البحرية كلها ما تقدر تطلعوا
يا طلال إعجابي بذكاء عدستك زاد بالشوت دا حبتين حيث المرة دي عدستك كبشرت أحاسيس ما خطوط وملامح
Post: #82 Title: Re: رشا شيخ الدين وعقد الجلاد ... Author: وليد محمد المبارك Date: 03-21-2008, 02:17 AM Parent: #76
ما عزمتونا يا جبنا
Post: #84 Title: Re: رشا شيخ الدين وعقد الجلاد ... Author: zuhair zenaty Date: 03-21-2008, 06:53 AM Parent: #1
Post: #88 Title: Re: رشا شيخ الدين وعقد الجلاد ... Author: Hussein Mallasi Date: 03-21-2008, 12:21 PM Parent: #87
الوافر قطع شك عازف ماهر؛ إلا أن مبالغته في إظهار ملكاته؛ و بتماديه في الزخارف الإيقاعية؛ أفسد إيقاع أغنية أبو داوود التي أدتها رشا - بمصاحبة مصطفى السني على العود - ففسدت الأغنية و فسد الأداء.
Post: #89 Title: Re: رشا شيخ الدين وعقد الجلاد ... Author: Hussein Mallasi Date: 03-21-2008, 12:44 PM Parent: #88
لفت نظري .. و على الرغم من هيلمانة رشا العالمية إلا أن جميع الأغنيات التي أدتها أغنيات مسموعة!!
Post: #90 Title: Re: رشا شيخ الدين وعقد الجلاد ... Author: Hussein Mallasi Date: 03-21-2008, 01:00 PM Parent: #89
إلا أن ذلك لم يقلل من أن حضورها المسرحي كان حضوراً طاغياً.
Post: #97 Title: Re: رشا شيخ الدين وعقد الجلاد ... Author: mamkouna Date: 03-21-2008, 09:58 PM Parent: #90
Quote: إلا أن ذلك لم يقلل من أن حضورها المسرحي كان حضوراً طاغياً.
حضورها المسرحي كان طاغي ما قلنا حاجة.. لكن إصرارها على التحدث بلغة عربية مكسٌرة أثار إستغرابي.. خاصةً إني عرفت إنها إتولدت و إتربت في أم درمان.. و لم تغادر السودان إلا في أوائل التسعينات...!!!!
---
* حقو أنا زاتي أبطٌِل السغالة..!!!!
Post: #96 Title: Re: رشا شيخ الدين وعقد الجلاد ... Author: mamkouna Date: 03-21-2008, 09:49 PM Parent: #89
Quote: لفت نظري .. و على الرغم من هيلمانة رشا العالمية إلا أن جميع الأغنيات التي أدتها أغنيات مسموعة!!
في ذمتك يا ملاسي.. أغنية الخُزعبلات الأسبانية...الغنتها بمُصاحبة الدِنقِر.. سمعتها وين قبل كدا...؟؟!!!
---
* ما قلنا ليك سيب الحركات بتاعتك دي..!!!
Post: #94 Title: Re: رشا شيخ الدين وعقد الجلاد ... Author: sami Alzubair Date: 03-21-2008, 05:42 PM Parent: #1
ده اجمل بوست في المنبر تسلم يا عفيفي يا فنان
تحياتي
سامي
Post: #95 Title: Re: رشا شيخ الدين وعقد الجلاد ... Author: نادية عثمان Date: 03-21-2008, 06:37 PM Parent: #94
حلو شديد ياطلال يافنان
Post: #99 Title: Re: رشا شيخ الدين وعقد الجلاد ... Author: khatab Date: 03-21-2008, 11:48 PM Parent: #95
.. .طلال .سل..ام .تعرف يا صاحب ,كان قلت ليك .عمك .حاضر البروvه..دى ,من خلال ما اوردت هنا.!! .لاكين الحفله .. .ما قدرت بى صراحه.. واتمنيت لو كنت هناك .. .نتلاقى فى حفله .جايه .. .
Post: #98 Title: Re: رشا شيخ الدين وعقد الجلاد ... Author: AnwarKing Date: 03-21-2008, 10:21 PM Parent: #1
طلال
كل الجمال تجمع في بوستك ده!
مني ومن هشام هباني، أرجع السودان أسع دي...
Post: #100 Title: Re: رشا شيخ الدين وعقد الجلاد ... Author: Hussein Mallasi Date: 03-22-2008, 00:10 AM Parent: #98
Quote: فعلاً إستمتعنا بالحفل المذدوج ده ( مذدوج دي صح يا حسين ؟)
شكراً يا عمو حسين كنت عارف إنك ستقيل لي عثرتي : باااارك الله فيك
Post: #102 Title: Re: رشا شيخ الدين وعقد الجلاد ... Author: طلال عفيفي Date: 03-22-2008, 01:34 AM Parent: #101
حاجة غريبة !! ما بحب " بوست " يوصل الصفحة التانية ، لأنو بشعر بالإنقطاع ..
عايز الجة تكون متسلسلة وما منقطعة ، لكن نقول شنو في حُكم المنابر ..
__________ نواصل ؟
Post: #103 Title: Re: رشا شيخ الدين وعقد الجلاد ... Author: sama7 Date: 03-22-2008, 06:40 AM Parent: #102
سلام طلال الجميل
من اللقطات الأولى ألهمتنى لأكابس حتى أن اتمكن من حضور الحفلة التانية
وقد حصل... فشكرا ليك كتييييييييييير
عندك علاقة غريبة مع الكاميرا,,, بتخلى الواحد مرات يسيب الحفل ويركز مع اللقطات البتصور فيها
تخريمة: _________________________________ ناردى ما عجييييييييييب لكن
Post: #124 Title: Re: رشا شيخ الدين وعقد الجلاد ... Author: Seif Elyazal Burae Date: 03-29-2008, 02:13 AM Parent: #102
الاخ طلال
موضوع موفق فرشا صوت جميل
مودتي
سيف اليزل
Post: #116 Title: Re: رشا شيخ الدين وعقد الجلاد ... Author: shaheed gadora Date: 03-25-2008, 02:19 AM Parent: #98
الرائع طلا عفيفي
رشا شيخ الدين وعقد الجلاد ... وكاميرا طلال عفيفي ... "بغلبني الكلام"
Post: #104 Title: Re: رشا شيخ الدين وعقد الجلاد ... Author: تبارك شيخ الدين جبريل Date: 03-22-2008, 07:45 AM Parent: #1
Quote: مساء الأربعاء؛ و في نهاية الحفل و بعد انتهاء مراسم تكريم رشا؛ الوافر و الكوبي؛ و بينما الجميع يهم بالمغادرة؛ تحدث أحدهم في مايكروفون الحفل مردداً اكلشيهات شبيه بالذكرى ناقوس يدق في عالم النسيان و نحوها؛ فنقلنا من مسرح مدرسة مجتمع الخرطوم العالمية لمنتدى الخرطوم جنوب دون المرور بوسط الخرطوم!!
منتدى الخرطوم جنوب؟
____________________________________________
بليت شوقنا يا طلال فى احباب غاليين! (بما فيهم انت) لا كين وين "جانب من الحضور" - ولا مؤاخذة؟
المهم ..
Post: #105 Title: Re: رشا شيخ الدين وعقد الجلاد ... Author: soma Date: 03-22-2008, 10:01 AM Parent: #104
مراحب بالجميع شكرا لكل الجمال الحضور.. الالق ..التصوير.. رشا حنينة وحنونه .. وتملك مقدرات صوتية تفوق حد الوصف حفظها الله الوافر رائع كما عهدناه موكر فى الابداع حد السقف.. لك التحية يا نيلو عقد الجلاد منظومة بديعه.. عتيقة ومعتقة بكل المقاييس لهم الانحناءة مصطفى السنى حنيــــــــــــــــــن يحلق بنا دوما فى عوالم نرجسية.. تسلم يا درش شكرا الاخ طلال شكرا محنة تخريمة على فكره عندى نص حنين لرشا .. لو وافق الوافر بنزلوا ليكم هنا تحياتى .. اسماء الجنيد/ مسقط
Post: #106 Title: Re: رشا شيخ الدين وعقد الجلاد ... Author: Hussein Mallasi Date: 03-22-2008, 01:02 PM Parent: #105
Quote:
والواحد بيكون عايز يشكر الأستاذ فتحي محمد عثمان مهندس الرحلة والإحتفال ، والذي كان يشرف على كل التفاصيل حتى النهاية ، لنجلس في حفل شديد الأناقة ودقيق الإعداد .. له التحية والمحبة والتقدير ..
اتخيل يا طلال لو كان أمين الخرطوم عاصمة الثقافة؛ المهم .. له - فعلاً – التحية و التقدير.
Post: #107 Title: Re: رشا شيخ الدين وعقد الجلاد ... Author: Hussein Mallasi Date: 03-22-2008, 01:11 PM Parent: #106
Quote:
Quote: لفت نظري .. و على الرغم من هيلمانة رشا العالمية إلا أن جميع الأغنيات التي أدتها أغنيات مسموعة!!
في ذمتك يا ملاسي .. أغنية الخُزعبلات الأسبانية... الغنتها بمُصاحبة الدِنقِر.. سمعتها وين قبل كدا...؟؟!!!
أنا لم اسمعها يا ممكونة .. إلا أن رشا قد ذكرت في مقدمتها أنها من مسموعات الشمال الاسباني.
Post: #108 Title: Re: رشا شيخ الدين وعقد الجلاد ... Author: Abu Mariam Date: 03-22-2008, 01:23 PM Parent: #1
سلام ملاسي
رشا عندها سي دي كامل من اعمالها الخاصة وهو بالعربي والانجليزي والاسباني.. هذا المشروع في السودان كان عبارة ورشة عمل لمدة قصيرة جدا مع عقد الجلاد وتقديم النتيجة في هذا الحفل، لا اظن ان الوقت يتسع لتقديم اعمال خاصة.. ولكن رشا تكتب الشعر وتلحن وبالطبع تغني اعمالها لوحدها، وتقديم القديم مش مسالة ساهلة بالمناسبة دي.. الهيلامانة ما جات من عدم
مع احترامي صادق
Post: #109 Title: Re: رشا شيخ الدين وعقد الجلاد ... Author: Hussein Mallasi Date: 03-22-2008, 01:28 PM Parent: #108
Quote: وتقديم القديم مش مسالة ساهلة بالمناسبة دي..
ساهلة .. ساهلة جداً يالصادق .. و أسهل ما فيها ضمان تقبل الجمهور لها.
_____ تحياتي.
Post: #110 Title: Re: رشا شيخ الدين وعقد الجلاد ... Author: Hussein Mallasi Date: 03-22-2008, 01:41 PM Parent: #109
Quote: هذا المشروع في السودان كان عبارة ورشة عمل لمدة قصيرة جدا مع عقد الجلاد وتقديم النتيجة في هذا الحفل،
و ما يفوتك يا الصادق انو الأغاني المسموعة التي قامت بغنائها كانت بصحبة الوافر و الكوبي.
_____ الأداء مع عقد الجلاد كان خاص بأغنيات عقد الجلاد.
Post: #111 Title: Re: رشا شيخ الدين وعقد الجلاد ... Author: Abu Mariam Date: 03-22-2008, 05:08 PM Parent: #110
Post: #113 Title: Re: رشا شيخ الدين وعقد الجلاد ... Author: randa suliman Date: 03-24-2008, 01:01 PM Parent: #1
طلال العزيز .. كيفنك يا اخوي هووووي و النصيحة ليك يا الله انا حسدااااناك عديل على استمتاعك سمع وشوف بالحفل الروعة ده .. لكن حقيقي يا طلال شكرا ليك على امتاعنا بالصور اللي خلتنا نعيش اجواءه .. دائمةسؤال أ. احمد طه ـ متى ما الاقيه ـ عنك و عن احوالك ..
Post: #114 Title: Re: رشا شيخ الدين وعقد الجلاد ... Author: Dia eldin khalil Date: 03-24-2008, 11:54 PM Parent: #1
ana ga3eed ya talal bas ba3ain min ba3eeed
Dia
Post: #115 Title: Re: رشا شيخ الدين وعقد الجلاد ... Author: Dia eldin khalil Date: 03-24-2008, 11:59 PM Parent: #1
Post: #118 Title: Re: رشا شيخ الدين وعقد الجلاد ... Author: Hussein Mallasi Date: 03-27-2008, 02:01 PM Parent: #115
مصاحبة سعد الدين الطيب لعقد الجلاد بالعزف جعل لوجود عقد الجلاد ليلة ذاك معنى.
Post: #119 Title: Re: رشا شيخ الدين وعقد الجلاد ... Author: Isam Widaa Date: 03-27-2008, 07:12 PM Parent: #118
الصور في غايةالجمال و الحكي نقل جو الحفل و البروفات الاجمل.. سؤال برئ : انتو الوداكم الحفلة دي شنو ؟ قالواالمدرسة دي لما اتبنت استخدموا فقط التراب و الماء من السودان.. و الطالب فيها بيدفع سبعة الف دولار في السنة .. ما عارف الكلام دا صحي ام حقد ناس مفلسين
Post: #122 Title: Re: رشا شيخ الدين وعقد الجلاد ... Author: تبارك شيخ الدين جبريل Date: 03-29-2008, 01:00 AM Parent: #1
ملاسى انا افتكر انو كلامك معقول بخصوص قابلية الجمهور للقديم. والقابلية دى بتسهل على فنانين كتار انهم يركبوا موجة شهرة اكبر مما بستحقوا. لكن الصادق فى اعتقادى كان بيتكلم من منطلق معالجة القديم بى مدخل حديث ومحسوب من نواحى متعددة - بما فيها قابلية الجمهور المتوقعة! - زى معالجات الثيمة اللحنية والإيقاعات والهارمونى وتكنيكات الفوكال والحزمة الوجدانية المختزلة فى القديم كلها! (ربما لأنى حضرت ابومريم وهو بيعالج موسيقى تراثية حتة حتة)
عموماً انا ما بيحق لى اتكلم بى اسمو؛ لاكين البيختاروا الإعتماد على قابلية الجمهور للقديم، بيختفوا من الذاكرة بعد فترة وبيفضل القديم متاح لى لوّاك آخر!
وطعم ابوداوود ما بيضييع طعم كرومة ولا بتجى رشا تضييعم. أهم شى المحافظة على الـ Authenticity والـ Copyright فى نفس الوقت (معليش ماعرفت اقولا كيف بالعربى)
المهم ...
Post: #123 Title: Re: رشا شيخ الدين وعقد الجلاد ... Author: تبارك شيخ الدين جبريل Date: 03-29-2008, 02:09 AM Parent: #1
Quote: الوافر قطع شك عازف ماهر؛ إلا أن مبالغته في إظهار ملكاته؛ و بتماديه في الزخارف الإيقاعية؛ أفسد إيقاع أغنية أبو داوود التي أدتها رشا - بمصاحبة مصطفى السني على العود - ففسدت الأغنية و فسد الأداء.
عشان كدة قالوا ليك تقديم القديم ما ساهل!
أهو الوافر بعد المبالغة (وربما كما تقول بسبب المبالغة) فشل فى كسر حوصلة وجدانك الخاص وأخذك فى معيته إلى "الوافر" وليس "أبوداوود".
المهم ...
Post: #125 Title: Re: رشا شيخ الدين وعقد الجلاد ... Author: طلال عفيفي Date: 03-29-2008, 02:21 AM Parent: #1
نسيت أن أذكر أن حفلتي رشا وعقد الجلاد ، كانتا بإستضافة من مجموعة شركات دال ، التي أحترم جداً إهتمامها بالنشاط الثقافي ، إذ أحضرت قبل ذلك الأستاذ نصير شمه إلى الخرطوم وقبلها قامت بطباعة كتاب قيم عن السودان قام بتصوير مادته المصوور الألماني " مايكل فريمان " .. وتطرق أذني أخبار عن سلسلة من الأنشطة القادمة وطباعة كتاب توثيقي عن النوبة ..
أتمنى أن يتواصل هذا الجهد ، وتتسع دائرة المستفيدين منه والمستمتعين به ؛
Post: #127 Title: Re: رشا شيخ الدين وعقد الجلاد ... Author: تبارك شيخ الدين جبريل Date: 03-30-2008, 04:47 PM Parent: #1
"مجموعة شركات دال" DAL GROUP لصاحبها "أسامة داوود" وكيل الإمبريالية الأمريكية شبه الحصرى فى سودان الإنقاذ!
لا أدرى كيف ينجو من ألسنة المعارضين اليساريين؟
ربما بسبب عمالة اليسار السودانى للإمبريالية؟
وربما هى مجرد رقوة نوبية يستخدمها!
أو شراء للألسن والذمم من أرباح "الكوكاكولا"!
أو نزعة طفيلية فى أصل الإنسان السودانى، تجعلنا لا ننتبه "ليمينى أو يسارى" ونصبر "على ذلى وانكسارى" إلى الأبد !
المهم ....
Post: #129 Title: Re: رشا شيخ الدين وعقد الجلاد ... Author: طلال عفيفي Date: 03-30-2008, 05:54 PM Parent: #127
Quote: "أسامة داوود" وكيل الإمبريالية الأمريكية شبه الحصرى فى سودان الإنقاذ! لا أدرى كيف ينجو من ألسنة المعارضين اليساريين؟
Quote: ربما بسبب عمالة اليسار السودانى للإمبريالية؟
Quote: وربما هى مجرد رقوة نوبية يستخدمها!
Quote: أو شراء للألسن والذمم من أرباح "الكوكاكولا"!
Quote: أو نزعة طفيلية فى أصل الإنسان السودانى، تجعلنا لا ننتبه "ليمينى أو يسارى" ونصبر "على ذلى وانكسارى" إلى الأبد !
كل الإجابات خطأ؛ أعِد
Post: #130 Title: Re: رشا شيخ الدين وعقد الجلاد ... Author: تبارك شيخ الدين جبريل Date: 03-30-2008, 06:03 PM Parent: #1
Quote: كل الإجابات خطأ؛ أعِد
ربما لو حاولت القراءة من أسفل إلى أعلى تتعثر فوق الإجابة
________________________________________ بالمناسبة أضم صوتى إلى صوتك فى تقدير النشاط الثقافى لمجموعة "دال" ....ولكن
يبقى اليسار السودانى لا ندرى ما نفعل به!
المهم ...
Post: #133 Title: Re: رشا شيخ الدين وعقد الجلاد ... Author: Hussein Mallasi Date: 03-31-2008, 10:22 AM Parent: #130
Quote:
Quote: الوافر قطع شك عازف ماهر؛ إلا أن مبالغته في إظهار ملكاته؛ و بتماديه في الزخارف الإيقاعية؛ أفسد إيقاع أغنية أبو داوود التي أدتها رشا - بمصاحبة مصطفى السني على العود - ففسدت الأغنية و فسد الأداء.
عشان كدة قالوا ليك تقديم القديم ما ساهل!
أهو الوافر بعد المبالغة (وربما كما تقول بسبب المبالغة) فشل فى كسر حوصلة وجدانك الخاص وأخذك فى معيته إلى "الوافر" وليس "أبوداوود".
أنا في الأول كنت فاكر – برضو – إنو الحكاية حوصلة وجدان خاص؛ أو على أحسن الفروض عدم مواكبة لآخر صيحات العزف العالمي؛ بس محاولات رشا – غير الناجحة - و إشاراتها المستمرة للوافر ليقوم باستعدال الإيقاع كانت أوضح و أكتر من اللازم.
Post: #136 Title: Re: رشا شيخ الدين وعقد الجلاد ... Author: تاج السر محمد حامد Date: 03-31-2008, 12:29 PM Parent: #133
أخى .. الرائع .. والرائع جدا طلال عفيفى .. لك منى ومن الجميع التحيات وأنت تتحفنا بهذا الجمال الرائع كروعة أهلنا الطيبون فى سوداننا الحبيب .. فهذه اللوحات لاتصدر إلا من إنسان مثلك مرة أخرى لك التحيات والتبريكات على هذا العمل .
أما الشئ والذى أحزننى هنالك الكثير من البشر لايعرفون من هى رشا أو بنت من هذه الشخصية والتى وصفوها بأن لغتها العربية مكسره .. وهم لايعلمون بأنها ابنة ذاك الموسوعة الاستاذ المربى والموسوعه والذى تخرج على يدية فطاحلة اجيال السودان الا وهو المرحوم الرجل القامة( شيخ الدين جبريل ) وسأوافيكم قريبا بالسيرة الذاتية لهذا القامة .. علما بيننا وفى هذا المنبر أبناء من صلبه ( زول يازول .. وتبارك .. ومن ثم الاخ ابوعبيده ورشا .. وجميعهم ولله الحمد ابناء لهذا الاسطورة الرائعة ( شيخ الدين جبريل) فقط أنتظروننا وستعرفون من هو شيخ الدين جبريل ..
Post: #137 Title: Re: رشا شيخ الدين وعقد الجلاد ... Author: Hussein Mallasi Date: 03-31-2008, 12:41 PM Parent: #135
Quote: لا يعلمون بأنها ابنة ذاك الموسوعة الاستاذ المربى والموسوعه والذى تخرج على يدية فطاحلة اجيال السودان الا وهو المرحوم الرجل القامة( شيخ الدين جبريل )
يعلمون ياخوي .. يعلمون .. ما تتعب نفسك ساي!
Post: #138 Title: Re: رشا شيخ الدين وعقد الجلاد ... Author: Elmuez Date: 03-31-2008, 12:58 PM Parent: #1
( مصاحبة سعد الدين الطيب لعقد الجلاد بالعزف جعل لوجود عقد الجلاد ليلة ذاك معنى.) ------ آآآآآآآح .. حمدا لله! إنتظرت طويلا و ما كنت متوقع إطلاقا أن يعلق أحدهم , و بالضرورة إحداهن, عل الجانب الهام ده من الحفل! و حكمة الله يجيني الفرج عن طريق ملاسي , حكمتو بالغة!! سلام على سعد الطيب, كنت متوقع كده.
Post: #139 Title: Re: رشا شيخ الدين وعقد الجلاد ... Author: حسن سنوسى Date: 03-31-2008, 03:01 PM Parent: #138
الاخ/ طلال عفيفى لك الود والتحايا كان ذلك عام 2000 على ما اذكر.. المكان: فندق القصر.. مكتب المدير المالى الزمان: يوم خريفى من ايام السودان الجميلة.. ونحن فى مكتب سكرتارية المدير.. كان هنالك من بعيد صوت ينساب مموسقاً ليندلق فى مسامعنا دافئاً.. والاغنية كانت (نارى ونارى.. نارى انا).. قطعاً كان الصوت مختلفاً ومتفرداً.. كانت سكرتيرة السيد/ المدير اجمل من ان تسألها عن ماهية ذاك الصوت.. فتجرأت وقلت لها مفتوناً بالصوت فتنة طغت على فتنتها هى.. لمن كل تلك العذوبة؟؟ فقالت: دى رشا شيخ الدين.. هكذا كأنها كانت علم.. قلت ليها دى اخت تماضر شيخ الدين.. ودى شغلت الناس بادوارها التمثيلية.. فقد مثلت هى والرشيد احمد عيسى، يحيى فضل الله‘ كارلوس و محمد السنى مسرحنا الراقى.. فقالت واخت المقداد كمان والوافر.. سألتها بالله من وين جابت الاسطوانة دى.. قالت جابتها من لندن.. كدا مرة واحدة... قلت لها والبعزف ليها دا منو.. قالت لى دى بعزفوا ليها اسبان كمان.. فعرفت رشا بقامتها السامقة منذ ذلك الوقت.. فقط لم اكن ادر انها احيت حفل هنا فى الخرطوم.. وانا الذى تمنيت ان التقيها مهما كانت الاسباب.. اتمنى ان التقيها فى قعدة فى حوش بانقا..... شكراً... عفيفى
Post: #140 Title: Re: رشا شيخ الدين وعقد الجلاد ... Author: شهاب الفاتح عثمان Date: 04-04-2008, 01:39 PM Parent: #1
Quote: عندك علاقة غريبة مع الكاميرا,,, بتخلى الواحد مرات يسيب الحفل ويركز مع اللقطات البتصور فيها
) ؛
