المواطنون الأعزاء ...

الخامس والعشرون من مارس ..
يوم مجيد في حياة أهلنا الأغاريق في اليونان والدول المجاوره ..
في هذا اليوم تحل الذكرى السنوية لإستقلال بلادهم الجميلة عن الإحتلال
الألماني ، بعد كفاح أهلي ونضال مسلح شرس دام لسنوات قاده الثوار
الشيوعيون ..

ساهم الجماعه اليونانيون عندنا في البلاد السودانيه في هندسة الرصه
الإجتماعية والإقتصادية للوطن ، الذي كانوا هم ، ضمن مجاميع كبرى أخرى ،
من دعاماته الأساسية ..
كانت البلاد مليانه بالناس : يونانيون ، أرمن ، يهود ، شوام ، طليان ،
وآخرين منهم من غادر بعد العنت وسوء الكيل ومنهم من ينتظر ..



معظم أهلنا الأغاريق ( اليونانيون ) ، كانوا يسكنون المنطقةالتي يحيط بها
شارعا القصر والمك نمر ؛ وكان إسمها الحي الأفرنجي ..



شارع المك نمر كان إسمه شارع الدفتردار ، والقصر كان إسمه فيكتوريا ..
حلت بالأسماء تصاريف الزمان وهبت على البلاد الثورات الإسميه ، فتغيرت
الأسماء ، وبقيت بعض المعالم تئن ..

من المعالم الباقية في خرطوم اليوم ، مجمع الجالية اليونانية المطل على تقاطع
المك نمر مع الجمهوريه (أو : الدفتردار مع ونجت) ، إذ كان إسم شارع الجمهورية
على الـ سير ونجت باشا حاكم السودان العام حتى 1916 .. والذي بعد كده راح
يحكم مصر !

يقع مجمع الجاليه اليونانية إلى اليوم هناك ، بأبوابه الزرقاء ، وطوبه الأحمر ،
وتبرز من منتصفه ، من خلف الجدران العالية صلبان كنيستهم ذات القبة الرمادية ..





المجمع عباره عن بناء يحتل مربوعاً ضخماً من الأرض ، يشكل ما هو بمثابة حي سكني صغير ،
تتوسطه كنيسه وحولها بيوت من طابق واحد متلاصقة أمام كل من هذه البيوت حويش صغير
وكم كرسي وحبل غسيل !!




ومن الناحية الأخرى هناك المدرسة ، التي تبرع ببناءها أحد أثرياء بلادنا أيامها :
( كونت ميخاليوس ) .. فسُميت بإسمه .. يرتادها ما تبقى من العطر اليوناني الذي أصبح
خفيفاً على جلد العاصمة .



وفي المجمع أقدم مسرح بالسودان ، أصابته يد الإهمال ( الدولي ) بالساحق والماحق
والبلاء المتلاحق ..
وعجبت لأمر دولتنا كيف لم تلتفت إله بعين الحنان ويد الترميم وهي التي قبضت شيئاً
وشويات لتأهيل وإعادة تأهيل البنية الثقافية إبان مشروع عاصمة الثقافة العربية ؛
هذا المسرح يقف شاهداً عظيماً على قبر السؤال : من لفح المال العام يا ناس ؟

المهم ، المسرح والكنيسه والمدرسه : ثلاث مبان من أقدم التجاعيد على وجه المعمار
العاصمي ، تراث عرف أبناء الجاليه كيفية الحفاظ على شويه منه للدنيا والزمان ..

وهذا المبنى الكبير الجميل ، هو آخر ما تبقى من الحي الأفرنجي الذي كان يسكنه
الأرمن والأغاريق والطليان سقى الله أيامهم ..
















بالأمس كان عيد جماعتنا وأهلنا من شمال البحر ، الذين جاءونا وساكنونا وإقتسموا
معنا همنا وغمنا الوطني ، فعاشوا هنا ونبتت حياتهم هنا ، على هذه الأرض ..
فتحوا الورش ، وعلمونا أكثر من سبع صنايع ، فردوا الأفق أمامنا أوسع في كيفية
تجارة المحاصيل ، فجاءت اللواري البدفورد محملة بالحبوب والسمسم والكركدي تنهب
الأرض صوب الشرق حيث المراكب ذات البوابير في الإنتظار .. لتحملها إلى شمال العالم
لتعود على البلاد وخزائنها بالخير والرخاء ، وليدور رأس المال دورته الحنونة ،
والكل يأكل عيش : السقائون ، المزارعون ، مهندسو المساحة ، الحصادون ، الحمالون ،
سائقي اللواري ، الدوله وضرائبها ، أراضي الميناء ، البحارة ، الكباتن ، وأصحاب
العمل ..
رزق وفير ورحمة بين العالمين ..
وكان الوطن جميلاً ..





بالأمس 25 مارس ، إحتفلوا بخروج الألمان وحلولهم عن سماهم ، بعد كفاحهم الشعبي ..
إحتفلوا ، هنا ، في وطنهم الممتد ، وطنهم الأول ، الثاني والأخير السودان ..

لملموا ما تبقى من أطرافهم ، وجاءوا : حلوين زي نسيم العصاري ، أذكياء زي أطفال ،
ومحبين للعمر والحياة ..



رقصوا وغنوا ، صلو صلاتهم ، ووضعوا ورداً على نصب شهدائم من أجل الحرية ..












أما أنا فأعدت الدعاء لله بجاه النبي محمد وكافة المرسلين ، أن يتحفني بصبية
من تلك البلاد ، أحدق في زيتونها ، وأمسح عن جلدها ملح البحر ..
آللهم إنك قريب سميع ، فاجب دعائي يا رب العالمين ..



...
طلال





______________________
لحكايا أوفى ، ممكن مراجعة :
لياليها ....

يا طلال ده كلام سمح شديد بجيك راجع تاني بتأني

مع المحبة

عبدالله الطاهر العزيز ..

كان عدد هؤلاء الناس ذات يوم مشرق يناهز السبعون ألف نسمة
في الخرطوم وعطبره ومدني وبورتسودان والأبيض وجوبا ، اليوم
يبلغون الـ 700 بالكاد ..
كانواإنيقين ومواعيدهم مضبوطه ، وكانوا في الملمات أخواناً للطيش ؛

كان يفوح في الخرطوم صوتهم العالي الرنان ، وكانت بناتهم تجهج
الأفئدة في برندات السوق الأفرنجي ..

أين ذهب هؤلاء الناس ؟

ومتى يعودون ؟


...
طلال

وبهذا الكلام
الفاضح
و واضح
لين
ناشف
ناعم
و جارح
هايج و سايح

حسيتني بعيدة بُعد،،

اعياد إستقلال لا محدودة البهجة لهم،،




ولأمانيك،،



آمين،،

Quote: حسيتني بعيدة بُعد،،

ومن يا عزه لا يشعر بالبعاد ،
زمان عمك محي الدين بن عربي قدس الله ضريحه قال شنو ؟
قال المحب مشتاق ، ولو كان موصول .

وياهو ده الحال ..


أما أنا فبرضو والله يا بت الناس ، في هذه البلاد نهيم ،
لا أعرف من أين ولا إلى أين ..
أنظر للناس بإستغراب ، وهم كذلك: ينظرون لي بإستغراب ..
وحين أمشي في الخرطوم أشعر دايماً إنو في حاجه غلط ، هي شنو ؟
العلم عند علام الغيوب يا عزه ..


...
طلال

المبدع الجميل

طلال

انت دحين ....الزول مش قال ... يوصف فى الجمال

قريتو فى سعف النخيل

ولمحتو فى طوق الحمام


شكرا جزيلا

You made my day

عمر ...

الخرطوم كانت في يوم من الأيام مدينة ( كوزمو بوليتان ) ،
يعني مدينة فيها ثقافات وأبعاد إنسانية مختلفة ومتعددة ..
وهذا نادراً ما يحدث للمدن الداخلية الغميسه ، إذ هو في الأغلب
يحدث في المدن المطلة على البحر ، زي الإسكندرية وبورت سودان ..

أما الواحد فينا فحين يتجول في الخرطوم اليوم فهو يزعل ، ويصيب
القلب نكد ..إذ أضحت الخرطوم مدينة غير متحضرة السلوك ولا المسالك ؛


...
طلال

الاخ الرائع والمبدع
طلال
لك التحية

والف شكر وتقدير لكل هذه المعلومات التى اجهلها والله ...

تعلم تماما اننا جيل اليوم نفتقر لمعلومات كهذه ...

تشكر اخى واتمنى ان تمدنا بالمزيد ...

تسلم اخى

طــــــلال عـــــــفـيفي
صحيت فيناذكريات الطفولة التي نامت زمنا في قمقم الماضي
دكتور متروبوليس الذي كان ان يعالج الناس في بيوتهم
ابوشمس الدكان الفاخر المليان بضائع دكان الارمن والاغاريق
الخبز الشمسي والافرنجي والحلويات البتذكرنا العيد
هيلانه ربما يكون اسمها هيلين ولكن السودانيين بطريقتهم العجيبة ينطقون الاسماء
هيلانه كانت مثل نساء مدني كانت جاره رؤفة بجارتهاوأذكر عزاء كان في بيتهم
اجتمع فيه كل الناس الحمر والبيض الزرق والخضرمافي زول بصدق انو ديل اغاريق وافارقة
كان الزمن جميل وفنجري والناس يملكون الحكمة والبرأة
لك المودة ونتواصل

عزيزنا عاصم ،
كلنا نجهل الكثير عن تاريخ هذه البلاد ،
وهذا هو مركب البلاء ..
لكن التاريخ حولنا نسمع هسهسته لو أنصتنا إليه ،
والحكايا منثورة فى أفواه الأهل والناس ، وعلى الأبواب
وحزن الطرقات ..
علينا المشي برفق على رمل الشارع ، حتى لا نجرح شارده
أو تفوتنا وارده ..

لك كل الحب والشكر الجزيل على المحبة والكلام الطيب ..


...
طلال

ياهو الفضل

جايب لينا النصارى
عاريات كاسيات كمان
ما تقول لى وزعوا ليكم المنكر اللذييييييذ داك
يسمونوه دم المسيح .... دم السرور

تبت يداك

و بدلا ان تشتهى اخوات نسيبة تتشهى فى النصرانية
تبت يداك
لما تلقى تلك الصبية
شوف لى اختها

عليك و على حديثك اللعنة ان لم تفعلها

طلال
غازار فانيان شركة الكهرباء يعرف لغات الدنيا كلها ويقال درس في جامعة اثينا
ارمني من اولاد مدني ومعه دمتري مهندس المولدات كانو سودانيين مثلنا اولاد بلد وفنجرية
غبر البنات الحلوات القالوا فيهن الغناء الجميل
ربنا اسمع دعاك وابواب السماء تكون مفتوحةلدعوتك
واديك اجمل بنات الدنيا
جميلة الدواخل والعيون
آمــين

شكراً طلال...
ترى، ماذا كنت ستشتري لو خُيّرت ان تشتري حاجة واحدة من محل الجودة (ما عندهم كاميرات)؟
(أغسطس 1953)

مع الود،

ع ع

لاحولا

ياعادل على

دى نكتها من وين ؟

ص ب 66

تلفون المحل

2150

الاداره

2600


اقلام باركر

شركة رولكس للساعات الفاخره



ابداع والله

Quote: طلال... ترى، ماذا كنت ستشتري لو خُيّرت ان تشتري حاجة واحدة من محل الجودة (ما عندهم كاميرات)؟

كنت يا عادل هشتري أوني فضية جميلة ، وروائح عطرية
من مختلف الماركات العالمية ..
وأخرج من هناك ، أعبر الرصيف ، واشرب بيره باااارده
من " كوبا كبانا " ..
ثم أرجع البيت ، بتاكسي طلب ، أستحم وأتبخبخ برائحة
عطرية من ماركة عالمية وأعزم حبيبتي على سهرة غرام
في سينما " ليكوس " ..


وإنت ياخوي ، برنامجك شنو ؟


...
طلال

طلال.... تعال في آخر البوست

أخونا حاتم ..

Quote: جايب لينا النصارى عاريات كاسيات كمان

أنا بجيب ليكم ، بعد داك يطلعوا نصارى ،
عاريات ، ما عاريات .. كاسيات ، ماكاسيات ،
فالرزق على الله ..

المهم نرمي الشبك في البحر ، وربك ، زي ما إنت عارف :
كريم !

أما دم المسيح ، فيا حليلنا منو ، ويا حليلو مننا ، زمن طويل .
بقينا نشرب الشفاف ..


ويجعلو عامر يا فرده .


...
طلال

Quote: المواطنون الأعزاء ...

مواطنون!!
وأعزاء كمان!!
إنت بتجيب الكلام دا منين؟
يابني أنا خايف على عقلياتك من الكلام دا

يا طلال والله بوست فى السلك

تمام التمام


اسمع يا طلال ادينى فرقه فى ود السر ده سمح؟؟؟

يا محمد ود السر عايز تعرف بيجيب النضم من وين؟؟؟

امشى البرزخ وتعال راجع بتكون وصلته تب.

سفيان ، مرحباً بك يا فرده هنا ، بين أهلك وناسك ..
نسأل الله ، ضمن ما نسأل ، أن يجبر خاطر هذه المدينة ..
وأن يعيد لها ألوانها وأوانيه الفضية ورائحها الجميلة ..


...
طلال

يا محمد السر ..
يا صديقي القريب في البلاد البعيدة ..
أبعث إليك بالأشواق القديمة المستدامة :
أشواقي لأن نكون مع بعض في مكان واحد ،
أشواقي لأن نجلس ونحكي ،
أشواقي لأن تدخن أنت سجائرك وتترك الثرثرة لي ،
أشواقي لسودان أحلى ، أطيب ولأئق بك وبالناس ..
أشواقي لزمن طويل كنت أعتقد فيه إنك شيوعي وطلعت
في آخره زول ليبرالي ساكت ( !! )
أشواقي لطولك النحيف ، وضحكتك السمحة ، وللشطرنج ،
والكتب الجميلة ..

محمد ،
يا صديقي القريب :
أما زلت ، وأنت بعيد ، تخاف على عقلياتي ؟
ألا تعلم أن أمر الله قد نفذ ؟!



...
طلال

بوست بطعم الزيتون...

Quote: فجاءت اللواري البدفورد محملة بالحبوب والسمسم والكركدي تنهب الأرض صوب الشرق حيث المراكب ذات البوابير في الإنتظار

(يا بكري، عشان ما تجي تقول أنا قاعد أعمل إعلانات تجارية على صفحات سودانيزاونلاين، الإعلان التجاري الفوق دا من سنة 1953، يعني عمره أكثر من نصف قرن.... وشركة خيرلوس ميلياس للنقل في السودان لا وجود لها سوى في "التاريخ")

شكراً يا ممكونه ! وأعتذر بشدة عن كل هذا التأخير
في الرد عليك .. فارجو أن تتفهمي لي كل هذا البطء ؛

لكن صدقيني وأنا بكتب الموضوع ده كنت فعلاً شايف ريحة
الزيتون في الجو ..

آللهم أجعلنا من أصحاب الزيتون يا ممكونه !!

شكراً لك ولرقتك ..


...
طلال

طلال أخوي :

الجمـــاعة ديل ما بعرسوا لينا ؟
...
...
نحن في أُمدرمان كمان كان حظنا من الحلوين ديل ضكري ، فطفولتنا متعلقة باسم خواجة كرياكوس "كوستي كرياكوس" صاحب المخبز الشهير والخبز الشمسي الفاخر ، وحكي لنا ابانا عن بار "خوان ليمنفرس" وهو ذات البار الذي كان يعمل فيه "موسي ودنفاش" صاحب النكات الشهيرة القصيرة والذي حولته الذائقة الشعبية الي راوي الحكايات المضحكة والغريبة ، حكو لنا عن "أرنوت" البقالة واليوناني والبار ...
ديمترو ،يا سلام ياخ ،الجماعلة ديل بالدنيا ، هُم العملو الغناء وسجلوه في اسطوانات سرور وكرومة وابراهيم عبدالجليل ،هم التعليم والتجارة النظيفة والبارات والمدينة المبكرة عن مواعيدها ،متروبوليس الطبيب العجيب الذي يدخل بيوت الناس وينزع عنها المرض ، لا قرش لاتعريفة...

طلال والله انت زول كويس شديد
تعرف يابن من احبهم انا لا أملك سوي ان جزل الشكر لك علي كل شئ
علي انسانيتك الذاهية ، علي حدبك ويساريتك المفعمة بالجمال ، وعلي انك دعمتني وملأتني محبةً للحياة ورفعت حصتي فيها ...

...
...

هامش :

الي عادل :

أنا ملاحظ ليك لي شهر كدة

فـوق.... لجمـال الأقـاريق ....وعلشـان خـاطـر صـديقي العزيـز جـون جـريليس..
والزيتـون.... والفسـتق المحمـص... وأطـباق الـدولما والأكـروبـول..
وكمـان علشـانك يا طـلة... وعلشـان البحـر المتوسـط وجماله...

ألـوذ بالجمـال هنـا...حـتي يرجـع الصـفاء...

مـني

Quote: وأهلنا من شمال البحر ، الذين جاءونا وساكنونا وإقتسموا معنا همنا وغمنا الوطني ، فعاشوا هنا ونبتت حياتهم هنا ، على هذه الأرض .. فتحوا الورش ، وعلمونا أكثر من سبع صنايع ، فردوا الأفق أمامنا أوسع في كيفية تجارة المحاصيل ، فجاءت اللواري البدفورد محملة بالحبوب والسمسم والكركدي تنهب الأرض صوب الشرق حيث المراكب ذات البوابير في الإنتظار .. لتحملها إلى شمال العالم لتعود على البلاد وخزائنها بالخير والرخاء ، وليدور رأس المال دورته الحنونة ، والكل يأكل عيش : السقائون ، المزارعون ، مهندسو المساحة ، الحصادون ، الحمالون ، سائقي اللواري ، الدوله وضرائبها ، أراضي الميناء ، البحارة ، الكباتن ، وأصحاب العمل .. رزق وفير ورحمة بين العالمين .. وكان الوطن جميلاً ..

ما أجملك..

يا عفيفى




الشين .

آمنه ،
شكراً لمرورك من هنا ..
أتمنى لو طفتي يوماً في الخرطوم أن تتفرجي
على هذه المشاهد ..

إلى أن نلتقي ..


...
طلال




_______________________
صورة الشباك لـ Tomas Dempsey

سلامات عزيزتنا منى ، شكراً للإطلاله البهية والكلام الحلو ..
وتحياتنا للأعزاء في كل مكان ..

وفي إنتظارك دائماً ..


...
طلال

ياسلام... طبعا الكلام قديم وفيهو حقائق غير معروفه لمعظم شباب البورد يعني من سنة 1983 وانت ماشي.. عموما يا اخوي ياطلال صورتك يالحبيب بتشبه بعد الزمن داك محبتي ودمت انت والحلوين بالف خير

Quote: أين ذهب هؤلاء الناس ؟

يا له من سؤال بحجم كل هذا الأسى.. يا طلال!!!.

اللهم امنح عبدك طلالا من بض اللحم الابيض المتوسط المحكر ذي عنبه في رملة البحر الابيض المتوسط,وارنبة الانف تلك,رغم انف النحر الابيض المتوسط.امين


pc: تحت تحت..وانا كمان

Quote: : أين ذهب هؤلاء الناس ؟ يا له من سؤال بحجم كل هذا الأسى.. يا طلال!!!.

الأسى يا عبد الحميد !!
وتسألني كيف أحوال الناس ؟؟
ناسنايا برنس بين الأسى والتأسي يترنحون ، لا وجيع لبلادهم
ولا لذكرياتهم ..
الأشياء هنا ، تمر : هكذا .

لو تحركت الليلة يا صديقي في مدينتنا ، ستكون كمن يستمع
لذكريات البحر في صدفة خاويه ..
هواء !
هواء ليس فيه نسيم ..
هواء ليلي عابر ومخيف ..
المباني الجميلة إهترأت ثيابها ..
والناس الطيبون رحلوا ..
بعضهم هاجر ..
بعضهم مات ..
وبعضهم ينتظر ( في غفلة عن الحاضرين ) ..

ليت الذي حدث ، لم يكن .



( يبدو إننا كنا نحلم )

...
طلال

وليم يا عزيزي ، سلامات .. يبدو أن ذلك الزمان كان جميلاً بحق ،
أسمع رنة هذا الجمال في جرس الحكاوي ، حين يجلس أهالينا يستعيدون
ذكريات تلك الأزمنة ..
يحكون عن مدينة صغيرة وحميمة يعرف الناس فيها وجوه بعضهم ويأنسون
لشوارعها ، ويتسلقون لياليها سهراً في الجناين والسينمات والبارات
والزيارات العائلية ، والندوات ..
ليل عادي وحنون يا وليم ، ليل ليس كليل هذه الأيام مقطوعة الطاري :
بهيم ومدلهم وسخيف ومليان عساكر وحجج ..
ليل مريح ، يشبه الناس وإحتياجاتهم وأمزجتهم ..
ليل عادي ، لا قهر فيه ولا إعتداء ..
ليل للمغنين والعاشقين ..


وربنا يعمر لياليك ..


...
طلال

Quote: الي عادل : أنا ملاحظ ليك لي شهر كدة

قرمبوز... تحياتي
ياخي طيب ما تجي خاشّي بدل تتاوق ساكت وتمشي
لك الود..

Quote: طلال أخوي : الجمـــاعة ديل ما بعرسوا لينا ؟

عليك الله المحسي ده

لكن حاول غايتو ، الأرضه جربت الحجر ..


...
طلال

طلال الجميل
ياسمح يازين

حول سؤالك الكارثة

الناس ديل مشو وين ؟ وهل في الخرطوم مايستحق ذاك الجمال ياصاحبي حتي الشوارع لم تعد تحمل تلك الاسماء الرنانة والوجوه ياصاح لم تعد ذات الوجوه كل شئ إتغير في إطار حملة (كل شئ لله ) منهم لله ياطلال منهم لله .

خضر

خضر يا صاحبنا الذي يغيب ويجيء ..
سلامات ..

إعذر لي دنياي على مشاغلي وظروفي التي في وسطها أذكرك بالخير ..
وإعذر لي ردي المتأخر على مداخلتك ..
كنت قد قلت لي :

Quote: حول سؤالك الكارثة الناس ديل مشو وين ؟ وهل في الخرطوم مايستحق ذاك الجمال ياصاحبي حتي الشوارع لم تعد تحمل تلك الاسماء الرنانة والوجوه ياصاح لم تعد ذات الوجوه كل شئ إتغير في إطار حملة (كل شئ لله ) منهم لله ياطلال منهم لله .

فمنهم لله بحق يا خضر ، شوهوا وسم المدينة وأخلوا بتوازنها الإنساني ..
طردوا المحبين ، وداقرونا ودافرونا في حياتنا العادية ..

منهم لله !!

































________________________
أعلاه : قصر السيد عبد الرحمن بالخرطوم ،
الذي آل لدار للوثائق ، ثم تحول إلى مزبلة .
فتأمل !

اشتم رائحة رغيف بابا كوستا و سجك العم خريستو

بوست

بزيانوس

شفت يا طلال القصة مشت لقايت البزيانوس



* وبعد شوية حا تجيب فـــــــــلاش وبعد تسعة
وما تسألنى يا طلال

هى حاجة مشهورة زى الريحة انذاك !!!

طلال عصام
انتوا
واديننا وين ؟؟؟؟؟؟
نركب الطائرة


نرجع
نطير وين ؟؟؟؟؟

Quote: هيلانه ربما يكون اسمها هيلين ولكن السودانيين بطريقتهم العجيبة ينطقون الاسماءهيلانه كانت مثل نساء مدني كانت جاره رؤفة بجارتهاوأذكر عزاء كان في بيتهم اجتمع فيه كل الناس (...)

كان في وحده من عماتك اليونانيات ديل عندها دكان وبتقيف عليهو ،
الكلام ده في شارع ونجت ( الجمهورية الآن ) ؛
بتعمل سندوتشات ، مربى ، تونه ، جبنه ، قشطه وغيرو ، الناس كان
بيجو يقيفو وياكلوا عندها جوا الدكان ويتكلموا في السياسه والكوره
هي كانت بتحب الكوره ، وكان عندها تلفزيون الزمن داك في الدكان
الصغير حقها ، والناس تاكل وتتونس وتتفرج وهم واقفين ..

شاءت الأيام إنها تسيب المكان وترحل وتمشي تعمل دكان في نمره 3 ،
وبعد سنوات رحلت عن الدنيا ..
كان إسمها مدام catherine ، ولكن السودانيين بطريقتهم كانوا
ينادونها : كاتارينا ..

الشارع اليوم على إسمها يا محمد :
شارع كاتارينا !



...
طلال

Quote: وبعد شوية حا تجيب فـــــــــلاش وبعد تسعة وما تسألنى يا طلال هى حاجة مشهورة زى الريحة انذاك !!!

عصام إزيك.... ياخي طلال دا ما حضر زمن الفلاش.... وهو بالتأكيد في حاجة إلى بعض الشرح لأنه لم ير أرفف الفلاش وأبو مفتاح والسايبراس.
بعدين، "تسعة" دي تقصد بيها تسعة بتاعة زمن الفلاش أم تسعة "البكور"؟
لكما الود،

ع ع

يا عصام ،
صباح الخير هذه مدينتكم، وهل مدائنكم كثر ؟؟

معاذ الله أن نكون قد أجرمنا في حق هذه المدينة ، لقد ورثناها هكذا ، يا عصام ..
ورثناها بظلمها وفجورها والقائمين عليها..

لا أعرف لم ورثنا هذا الفقد ..
مش كان ممكن نكون مستورين بمدينة أحلى من كده ؟؟



...
طلال

Quote: عصام إزيك.... ياخي طلال دا ما حضر زمن الفلاش.... وهو بالتأكيد في حاجة إلى بعض الشرح لأنه لم ير أرفف الفلاش وأبو مفتاح والسايبراس. بعدين، "تسعة" دي تقصد بيها تسعة بتاعة زمن الفلاش أم تسعة "البكور"؟

شوف الجلاكين ديل

يتسع قيودك يا عادل على

الود طلال يحكى ليكم عن الجمال ده كلو وانتو تكرو فيهو لى ورا

ياخى الراجل من جونى المشاى و انت طالع

بعد شوية تجيبو سيرة ابو حمار و بتاع العيش

شعوب متخلفة

امسحا لينا فى وشنا يا طلال, اصلو نوع عادل ده من التانى ببدا يلخبط

Quote: شوف الجلاكين ديل يتسع قيودك يا عادل على الود طلال يحكى ليكم عن الجمال ده كلو وانتو تكرو فيهو لى ورا ياخى الراجل من جونى المشاى و انت طالع بعد شوية تجيبو سيرة ابو حمار و بتاع العيش شعوب متخلفة امسحا لينا فى وشنا يا طلال, اصلو نوع عادل ده من التانى ببدا يلخبط

حاتم!!!.... جلاكين منو؟؟؟"
وبعدين، تجيبو" دي بتقصدنا أنا وعصام عبد الحفيظ؟؟

شكرآ يا طلال على نشر الجمال والطمأنينة العامة!
بعض افراد عائلتنا شعرهم بنى. يكون فينا عرق يونانى؟!!


كنيسة سان ماثيو، شارع النيل، الخرطوم 1959

قبل يومين كنت بسمع في شريط لقصيده(مريا) لاشعر شعراءالزمان( صلاح احمد ابراهيم) وتلقى القصيده الجميله(ليلى المغربى) بصوتها( الباخوسى)المعتق
وغناء ابن (توتى) الفنان ( حمد الريح) نقر كل ذلك على احساسى بخفه
قالت(ليلى)(صارت مريا البيضاء سودانيه حلوه سمراء)
ليت لى ازميل( فدياس ) وروح عبقريه
وامامى تل مرمر منحته الفتنه الهوجاء نفس مقاييسك تمثالا مكبر
وجعلت الشعر كالشلال
بعض يلزم الكتف وبعض يتبعثر
وعلى الاجفان ليل

قبل يومين كنت بسمع في شريط لقصيده(مريا) لاشعر شعراءالزمان( صلاح احمد ابراهيم) وتلقى القصيده الجميله(ليلى المغربى) بصوتها( الباخوسى)المعتق
وغناء ابن (توتى) الفنان ( حمد الريح) نقر كل ذلك على احساسى بخفه
قالت(ليلى)(صارت مريا البيضاء سودانيه حلوه سمراء)
ليت لى ازميل( فدياس ) وروح عبقريه
وامامى تل مرمر منحته الفتنه الهوجاء نفس مقاييسك تمثالا مكبر
وجعلت الشعر كالشلال
بعض يلزم الكتف وبعض يتبعثر
وعلى الاجفان ليل يتعثر

وعلى الاهداب لغز لايفسر
شكرا(طلال) كانك صعدت بنا( قمه الاولمب)
او كما يقول صديقى النوبى(دى هيه الناس اللى خالقها ربنا)

Quote: وأهلنا من شمال البحر ، الذين جاءونا وساكنونا وإقتسموا معنا همنا وغمنا الوطني ، فعاشوا هنا ونبتت حياتهم هنا ، على هذه الأرض .. فتحوا الورش ، وعلمونا أكثر من سبع صنايع ، فردوا الأفق أمامنا أوسع في كيفية تجارة المحاصيل

كانوا أذكياء
لا هم إنخرطوا في مجتمعنا ولا هم إنعزلوا عنه و إبتعدوا
تكاملــوا معنا إن شــئت
تجدهم وســـــطنا في الأســــواق البرندة بالبرندة
ولكنهم في الســـــكن كانت لهم أحياؤهم و حاراتهم،
فهمــوا عاداتنا و تقاليدنــا و إحترموهــا
فتجدهم في مناســباتنا حضــوراً إيجابياً و أولاد بلد ، شـــاركونا في ســــرائنا و ضــرائنا

شـــالوا معنا الفاتحــة ودفعــوا في كشــوفاتنا مثلنـــا و أكثر ... فجيوبهم في معظم الأحيان أكبر
و تجــارتهم في معظم الأحيــان أربح
لأنهم كانوا في معظم الأحيان لها أخلص و أحرص و أصدق ، و حين يحلفــون مثلنا بالطلاق و الحــرام
كانوا يفعلون ذلك و هم صـــادقين

الفنان الجميل / طلال
في ذاكرة كل منا جرجس و ميخاييل و عند جيل آبـــائنا الذكــري أجمل و أحلي كمان


أعجبني جدا هذا البوست و أعجبني أكثر إختيارك الذكي لعنوانه ... المواطنون الأعزاء

يا طلال يا إبن عفيفى

البوست نثر الجمال والمعرفة
و ملأ مكانا شاغرا بالبورد
نثر الجمال والمعرفة أهم اسلحتنا فى حربنا مع الغول

كتر خيرك

صديقنا القاص المبدع عثمان حامد هو الذى نبهنى لهذا البوست المتفرد.
طلبت منه ان يساهم بما له فى معرفة واسعة فوجدته قد خط مساهمته وجهزها وهذا يبين مدى انفعاله وتفاعله مع هذا البوست الجميل.

العنوان : " مواطنون إعزاء بأم درمان يا طلال...."

- كوستى كريانى (مخابز)

- أخوان ليمنيوس(كلوب-بار)

- أرونت (يرفانت مرقوسيان)(بقالة و بار)

- أبو ستولس حاتزغلو ( بقالة وبار)

- بانيوتى أنطون ( بقالة و آيس كريم و مرطبات) . شقيق أراكلى أنطون برمثاس المصرفى المخضرم الذى عمل ببنك باركليز(بنك الخرطوم فيما بعد) بأم درمان وبحرى لسنوات طويلة.

- ديمترى البازار ( وكيل الصحف والمجلات الأجنبية و موزع أجهزة الجرامافون ومسجل وموزع الاسطوانات ومنظم الرحلات و البعثات الفنية إلى القاهرة لتسجيل أغانى الحقيبة للرواد وأحد أهم رواد هذا المجال)

- كربيت ( محلات الزيوت و التشحيم و ملء البطاريات مقابل نادى الخريجين بأم درمان)

ياطلال






والفرحه فى اخر مزاج



انا افتكر كدا

هندسة الرصه
الإجتماعية والإقتصادية للوطن

تطير عيشتهافى الوقت الراهن

الحبيب طلال
عساك طيب ...

Quote: أين ذهب هؤلاء الناس ؟

وأين ذهب إسماعيل التاج ... ومحسن خالد .... وخالد عويس ... وووووووو
وكثيرون ....
تتعدد الأسباب والخروج واحد سيدي ....

Quote: وكانت بناتهم تجهج الأفئدة في برندات السوق الأفرنجي ..

هنا مربط فرس سيدي
لهم جمال خاص ...
دعني سيدي مع القمة العربية ...

مع المحبة

Quote: ياخى الراجل من جونى المشاى و انت طالع

كدي نساعد شويه في الترجمه جوني = حنا والباقي في محله يالحبيب عصام

طلال وضيوفه ...

تحية طيبة ،،

طبعاً الاغاريق وجنسيات كتيرة تانية خلاص استقروا وعاشوا
وبقت دى بلدهم ، انا لقيت الموضوع ده وعايزكم تشوفوهو
انتو كمان:-

Quote: عبد المنعم ابو ادريس صــور على جدار الزمن ... قال لنا المهندس يوسف سليمان مؤلف كتاب «اوراق من ام سويقو» والذي يتناول جزءا من التاريخ الاجتماعي للمدينة: بأن هذه المنطقة وفقا لما ورد في مخطوطة علي يوسف شدو عن تاريخ مدينة ود مدني والتي لم تتم طباعتها حتى الآن بأن هذه المنطقة قبل ان يأتي اليها الشيخ محمد مدني السني كانت تسمى النسيم ويسكن فيها مجموعة من العرب الرحل. وجاء اليها ود مدني في حوالي عام 1430م واسس الخلوة والمسيد وهاجر اليها الناس وبدأ اسمه يطغى على النسيم حتى جاء العهد التركي وصارت المنطقة مجموعة من القرى والفرقان فاخذت اسم مدني. وتأسس فيها سوق وصارت مركزا لصناعة المراكب. وازدادت اهميتها عندما ولي الامر الامير احمد السني حفيد ود مدني والذي لقب بأمير البحرين لانه كان عامل المهدية على النيلين الازرق والابيض. وعندما سألنا يوسف سليمان عن سعدابي الذي يشرف على النيل الازرق قال انه ابن خالة ود مدني السني كما روى له شفاهة الراحل سعيد الطيب شايب وهو من المهتمين بتاريخ المدينتين وفي العهد التركي جعل منها خورشيد باشا عاصمة للسودان ولكن هذا الامر لم يستمر كثيرا. ويمضي يوسف سليمان قائلا بأن هذه الفترة القصيرة تركت اثرا على المدينة فما زلنا نذكر عمنا عبد النبي كلاشه رحمه الله والذي كان يقول بأنه حفيد خورشيد باشا. ومن الاسر ذات الاصل التركي اسرة لاظغلي ومنها موسى لاظوغي احد ثوار 1924م اما اسر البوشي والليثي وشدو فقد جاءت من مصر واسهمت في المدينة والحياة السودانية بكل ضروبها . ويضيف الاستاذ احمد الفضل بأنك اذا مررت بمقابر مدينة ود مدني تجد شاهدا مكتوب عليه عيسى الارناؤوطي. اما الدكتور عبد الماجد خليفة فيقول ان مدني عرفت بعض الشخصيات اليهودية امثال الياس البني والذي يقول عنه يوسف سليمان بأنه كان يعمل تاجرا للخيوط والزراير ولكنه اتهم بالعمالة لاسرائيل ويوسف سليمان يستبعد عنه هذه التهمة.. كما كان هناك بشير الخياط والذي ظل يعمل في تجارة الاحذية والملبوسات حتى غادر عقب نكسة 1967م بالاضافة الى صالح باروخ وشكيب مشاطه. ثم يضع يوسف سليمان امامنا حقيقة اخرى بقوله هل تدري ان عربة الملك فؤاد كانت موجودة في شوارع هذه المدينة فسألناه وما الذي جاء بها فقال انه عمدة الاغاريق.. وهل للاغاريق عمدة ؟ ، يتدخل الدكتور عبد الماجد خليفة الموسيقار المعروف ويؤكد نعم انه عمدة الاغاريق في كل السودان كان يسكن هذه المدينة واسمه كوسيبو ودكانه في المكان الحالي لصيدلية النيل الازرق. نعود لقصة العربة والتي يمضي فيها يوسف سليمان بأنها كانت ذات ثلاثة ابواب وسقفها من القماش وكوسيبو كان يعيش حياة افرنجية. ويستمر يوسف سليمان في تقديم لمحات عن الذين مروا من هنا وعلى رأسهم زعيم حزب الاحرار اليمني يحيى حسين الشرفي والذي كان معارضا للامام في اليمن. ومعه سعد سعيد انور والذي ما زالت اسرته موجودة في السودان، فهو جد الصحفية لبنى احمد حسين وهو من ارسل برقية للامام احمد بسبب حريق مدينة الحديد. تربى فيها السيد عبد الرحمن بعد معركة كرري ذهب السيد عبد الرحمن الى قرية الشكابة الواقعة جنو ب مدني، ومن بعد اخذه الشيخ علي شقدي وجاء به الى منزله في جزيرة الفيل وهناك تربى السيد عبد الرحمن ودرس، ويؤكد يوسف سليمان ان السيد عبد الرحمن حتى وفاته كان محافظا على هذه الصلة وحافظا لصنيع اسرة شقدي. ويقول الدكتور عبد الماجد خليفة ان السيد عبد الرحمن عندما جاء في زيارة الى ود مدني ورست مركبه الطاهرة في مواجهة السراي الخاص به والذي الآن هو دار حزب الامة فرشت له سجادة حمراء من داخل المركب الى مدخل السراي. ويوسف سليمان يضيء جانبا آخر من تاريخ المدينة الذي لم تسجله الكتب وهو علاقة الحزب الوطني الاتحادي بفتوات ود مدني. فقد قال لنا التوم النمر اصغر هؤلاء الفتوات بأن القطب في الحزب الوطني الاتحادي محمد زين وصاحب قهوة الاستقلال والصحفي بجريدة الزمان كان راعيا لهؤلاء الفتوات ، والتوم يقول بأن هذه القهوة كانت للجدعان والذين كانوا يقومون بحماية مظاهرات الحزب الوطني الاتحادي. ويضيف يوسف سليمان بأن هؤلاء الفتوات كانوا يقومون بحراسة الشخصيات القيادية في الحزب الوطني الاتحادي عند زيارتهم للمدينة وفي الليالي السياسية. ويروي لنا يوسف قصتهم مع حامد الفيل كمندان بوليس مدني بقوله بأنه في مرة من المرات ذهب احد هؤلاء الفتوات وهو عوض حلاوة الى قهوة الزئبق في الخرطوم ليلعب «الكوتشينة» مع فتوات الخرطوم، وبعد ان كسب منهم اموالا كثيرة اعتدوا عليه بالضرب فعاد الى مدني وآثار الضرب بادية عليه فعقد الفتوات اجتماعا وجاء حامد الفيل وقال لهم اذا لم تأخذوا بثأر رفيفكم فعليكم ان تبحثوا عن بلد آخر لانني لن اسمح لكم بالاقامة في مدني. فذهبوا الى الخرطوم وعادوا غانمين وكانوا في الطريق يهتفون عاش الازهري عاش الوطني الاتحادي. شيخ العرب ملاذ الضعفاء والمدينة تحكي قصة الراحل احمد الطيب والذي كان تاجرا في سوق المدينة ويحسن الى الفقراء والمساكين ولكن بعد وفاة الابن الوحيد تفرغ تماما الى التكفل بتجهيز الموتى مجهولي الهوية ومواراة الثرى للغرباء الذين يموتون في مستشفى المدينة ويتكفل بكل نفقات تجهيزهم وتكريما لهم اطلقت ادارة المستشفى اسمه على احد عنابر الباطنية بها. ويضيف يوسف سليمان بأن من الذين اشتهروا بحفر القبور في المدينة. بخيت والد الفنان ابوعركي البخيت ويونس العركي والمدينة تحفظ لهم هذا الفضل العظيم.

((منقول من جريدة الصحافة عدد قديمالعدد رقم: 4597)).

Quote: والمدينة تحكي قصة الراحل احمد الطيب والذي كان تاجرا في سوق المدينة ويحسن الى الفقراء والمساكين ولكن بعد وفاة الابن الوحيد تفرغ تماما الى التكفل بتجهيز الموتى مجهولي الهوية ومواراة الثرى للغرباء الذين يموتون في مستشفى المدينة ويتكفل بكل نفقات تجهيزهم وتكريما لهم اطلقت ادارة المستشفى اسمه على احد عنابر الباطنية بها.

تُرى هل المقصود هنا شيخ العرب ؟؟؟

إن كان كذلك فالمعومة تحتاج للتصحيح ...

Quote: اشتم رائحة رغيف بابا كوستا و سجك العم خريستو

الصراحة انا زمن الجماعة ديل ماحضرتو

لكن حضرت زمن






البزيانوس !!


مشوا وين صحى ياطلال وانت زاااااتك مشيت وين ؟!!

Quote: كنت يا عادل هشتري أوني فضية جميلة ، وروائح عطرية من مختلف الماركات العالمية .. وأخرج من هناك ، أعبر الرصيف ، واشرب بيره باااارده من " كوبا كبانا " .. وإنت ياخوي ، برنامجك شنو ؟

طلال يا أخوي قلت ليك إشتري "حاجة واحدة" ما قلت ليك خُم محلات الجودة كلها.
وبعدين نفترض إنك عاوز تشتري روائح عطرية من مختلف الماركات عشان لقاء الحبيبة وبرنامج سهرة الغرام، الأواني الفضية دي داير بيها شنو؟
طبعاً جاري على البيرة....والبيرة الباردة!! وكمان من كوبا كبانا!!

الجعة ما بتنفع معاي لأنها دايره روح طويلة على بال ما تصل الراس، وبيني وبينك ما في صبُر، وكمان الجيب لا يسمح بشراء المشروبات التي تُعبأ في المصانع وتُغلق بالفريد والفلّين (الفُلّة) وتُباع في البارات باردة وتُلف بورق الجرايد الإنجليزية القديمة، لأن كل هذه الأشياء تدخل في سعر التكلفة.... فـ"الشـفّـّاف هو الحل"، طبعاً مع الفول المدمّس (المررو).
ياخي.... لعن الله الفقر، زي "محلات الجودة " و"كوبا كبانا" دي إلا الواحد يتفرج فيها ساكت أو يجي ماشي بي جنبها ساكت، فعندما تصبح الكسوة أمر لا بد منه نشتري من ناس "محمد أحمد" التحت ديل (شوف الشعار بتاعهم أسفل الإعلان).... وعندما الريق يصبح دقيق نكتفي بزجاجة "كيتي كولا" بااااااردة....

(الدائرة السوداء المظلمة في الإعلان أعلاه هي الفريدة بتاعة كيتي كولا)

Quote: ثم أرجع البيت ، بتاكسي طلب ، أستحم وأتبخبخ برائحة عطرية من ماركة عالمية وأعزم حبيبتي على سهرة غرام في سينما " ليكوس " ..

ما قلت لي..... حا ترجع البيت بي تاكسي لأنك حا تقعد في كوبا كبانا كتير، أم إنك على عجلة من أمرك بسبب اللقاء مع الحبيبة.... عموماً تذكر دائماً "العجلة من الشيطان".
وأتمنى لك سهرة غرام ممتعة مع الحبيبة.

بجيك راجع تاني لي سينما برمبل وكاترينا.
بكرة برنامجك شنو؟
لك الود،

ع ع

مواطني الأعزاء ، وناسي الأحباء ..
أنا مشغول شويه وعاتل هم اليومين ديل ،
فنرجو المعذرة على التأخير ، وإنتظاري
قليلاً ..


...
طلال

ياطلال

سلام ياخينا...

انت الكلام ده حضرتو ولا حكوهو ليك ؟
والله لو حكى بس ..تكون (بدعت وشذيت ) ..
يازول على الايمان بوستك ده مفروض يخلوهو فوق ...
يعنى افضل الناس تقرا شكر بكرى لمحمد جمعه
ولا تقرا الحكى الطاعم ده .. (دا بكرى ودا حكمو)...
ويعدين ياخى انا ذاتى الدخلنى شنو فى القصة بتاعت
جمعه وبكرى دى ..

فى الحقيقة انا دخلت هنا لاثبت متابعتى لهذا الكرنفال الانيق
وبس...



ودى لك

طلال يا طلال

وما زال كريكور سفريان يتمدد خمسة الف متر

من شارع عبد المنعم محمد جنوبا حتى شارع الجامعة شمالا

قبالة المجلس التشريعى لولاية الخرطزم يسترق السمع حزينا

لمناقشات دستور الولاية الطالبانى ... ويستعد لاخلاء المنطقة

انا والله لقراره لمحزونون .......

جارتنا طنط لوريس (عرفت القصة من بدري) هاجرت بعد قوانين سبتمبر

باعت بيتها الجميل كان فيه شبه وملامح كتيره من الجنه فى اذهاننا

ونحن صغار ... ما زلت ازكر تعليق ابى فى ذلك اليوم .. قال بلد

هجروها الناس ديل تانى ما تقوم ليها قابمة ليوم الدين .....

طلال !!!!!

شفت ناس بيتكم يوم محمود درويش ... انت الناس ديل ببقو ليكم شنو؟؟

Quote: أين ذهب هؤلاء الناس ؟ ومتى يعودون ؟

من حيث اتى هؤلاء ...............


اما متى .. فالباب مقفول ح يدخلو من وين ؟؟ مش لما تفتحوا اول ؟!!!!

طلال إزيك....
عساك طيب... وأتمنى أن تكون قد قضيت اُمسية جميلة ليل أول من أمس مع الحبيبة واستمتعتما بفيلم رائع في سينما النيل الأزرق. بكل أسف لا أستطيع أن نتلقي أمسيه الإثنين المقبل لأنني أنوي دخول حفل ساهر تقيمه الجبهة المعادية للإستعمار (ج. م. إ.) فرع بحري، وجدت إعلانه في إحدى الصحف الصادرة اليوم. وكما تعلم، فإن ج. م. إ. تشارك هذه الأيام مع الهيئة الدائمة للدفاع عن الحريات في حملة للمطالبة بإلغاء "قانون النشاط الهدام". وعلى العموم سنتحدث حول هذه المسائل في وقت لاحق.

وبما انك شخص تعشق السينما، أود ان ألفت انتباهك إلى فيلم جميل سيعرض مساء اليوم على شاشة سينما برامبل بامدرمان وهو فيلم "الأمر الأخير" ... بطولة كاي ميدسون، سكوب وألوان، لكن ما متأكد من الترجمة. وبالمناسبة، سينما برامبل تعرض أفلاماً متميزة، وهي من أعرق دور السينما في اُمدرمان والعاصمة المثلثة، وسأحدثك فيما بعد عن مؤسسها قدّيس عبد السيد.

قدّيس عبد السيد - مؤسس سينما برامبل

بجيك راجع لأهلنا الأغاريق وموضوع كاترينا.
لك الود،

ع ع

فوق للنطر

فى

فئات الدخول

20 قرش سيدات


الكترابه

ياعادل على

شفت كيف يا عفيفى الأسئلة التى لا تطرحها تأتى هكذا وهكذا يأتى السؤال التالى:الى أين هذا الغياب على المستويين الرسمى والشعبى وانك يا رجل دخلت الى المرصد المدنى للحضارة التى يجب أن نصونها خارج أى تعنت وعصبية دينية مهوووووووووسة. لك السلام وعلى الناس الأعزاء المواطنين البررة الحفاظ على هذا المدخر التاريخ الثروة,

Quote: أما أنا فأعدت الدعاء لله بجاه النبي محمد وكافة المرسلين ، أن يتحفني بصبية من تلك البلاد ، أحدق في زيتونها ، وأمسح عن جلدها ملح البحر .. آللهم إنك قريب سميع ، فاجب دعائي يا رب العالمين

طلال
ياجمعة عندي كتاب عن السينما في السودان
منخلال ذكرياتي عن والدي ومدينة مدني اسمه ســـــينما اسكوب


الرجاء مدي بالصور النادرة

طلال...
منذ بضعة سنوات... و ذات مساء خرطومي بهيج، قادتني دعوة أنيقة كنت قد تلقيتها لحضور حفل خطوبة بفيلا أحد أثرياء الخرطوم ذوي الأصول المتوسطية، مطلة أيما طلة على النيل الأزرق...
كانت أناقة الحفل تفوق الوصف و الجو العام يحمل لمحة من زيتون اليونان و رمال المتوسط ناصعة البياض، تحاكي للحضور عيون و بشرات أهل العريس اللذين جاءوا من بلاد زوربا الإغريقي دون ان يخلعوا عنهم ثقافتهم الإحتفالية... فكان أن شهدت لأول مرة "تكسير الأطباق"
و هي لمن لا يعلم عادة تتمثل في رمي أطباق البورسلين أثناء الرقص و مع خطوات أيقاعية على الأرض فتتكسر و تتطاير الشظايا.
درج اليونانيون على ممارسة هذا التقليد كطريقة لمساعدتهم على التعاطي مع موت من يحبون، و هو فقد لا سيطرة لهم عليه.. و كانت هذه العادة تمارس في الإحتفالات التذكارية للموتى و من ثم صارت جزء من أي إحتفال و بخاصة في المقاهي "التافيرناس"... بل صارت من الأشياء التي تجذب السياح...
الاَن قد منعت هذه الممارسة بموجب القانون وذلك لتسببها في جرح الكثيرين من جراء الشظايا المتطايره...

سامحني لو طلعت بره الموضوع...

م
ح
ب
ت
ي

سلمى

شكرا على المعلومات القيمة

والتحية للاصدقاء في اليونان

-=-=-=-=-=-=-

هل توجد معلومات عن صفقة الفضلات اليونانية للسوادن؟

الأستاذ هاني العربي ..

هذه الكتابة والإشارات مفرودة للمواطنين السودانيين
من أصل يوناني ( زي السودانيين من أصل مصري ومن أصل
حجازي ومن أصل مغربي ، إلخ .. )

وهي كتابة وإشارة لا علاقة لها بالصفقة التي أشرت إليها .



لكن لا بأس :
ندعو الحكومة السودانية ، أن تكون أكثر حرصاً
على البيئة السودانية ، بالحفاظ على الشجر والبشر ،
وعدم إستيراد أي حاجه ما كويسه أو تضير ..


...
طلال




_________________
فيما يخص المعلومات عن الصفقة التي تهمك ،
فنرجو مراجعة الأرشيف ومحركات البحث ، ففيها
ستجد ضالتك لدرجة مملة ، ووفقكم الله وهداكم
لسواء السبيل ؛

أصدقائي المقربون ، يا صحابي ،
با من سمعتم صيحتي وفقهتم معناي ..
أشكركم ، لتواجدكم ومشاركتم هذا المعنى البسيط ..

ها هي ذا : بلادنا واسعة ..
تحتمل الذين واللائي ، وتحتمل القول ؛
إنها البلاد : عريضة زي شكوة المظلوم ..
وضيقة ، تماماً مثلما تضيق المفاهيم ..

نسأل الله السلامة ، في الحل والترحال ، وكذا ، نسأل الله :
أن يعيد لنا بلادنا ..
وأماكننا ،
ومواطنينا ..

نسأل الله أن يعوضنا :
عن الترحال بالصبر ،

وينسينا مآخذنا ..

ويرفع عنا ذنوبنا ( لو عصينا ) ..
ويرحمنا : ( لو مافي مشاكل ) !


يارب العالمين : آمين !





...
طلال

العزيز طلال

يا ســـلام على هذا البوست الرائع

أتذكر دائما الخواجة كرياكو ، متعهد مواد غذاء لمدرسة خورطقت الثانوية في أيامنا. كان ينقل المواد بسيارته ويشرف عليها بنفسه وكان مشهود له بالحزم والأمانة .

أتذكر أيضا عائلة صديقي فيكتور حنا روفائيل من زوجته اليونانية الطيبة وإبنيهما.

مع تحياتي واحترامي

My big fat Greek wedding

اسم فلم لذيذ حاضر بالنكته وكمان من خلاله بنفهم الشخصيه اليونانيه... وجد ما بعيد من طباع الشرقين والعادات والاجتماعيات وصدقوني الناس ده ما بعيده مننا ابدا بالاضافه انهم لذاذ وحلوين ومرتبين

اما اذا سالنا هم وين موجودين بس ما في شارع كترينا هم في الرياض والمنشيه والطائف والعمارات الخ الخ

طلال
ايها الفتىالذي بسكنك الحزن
وتتناوشك الاحلام ويعشعش في فــؤادك
الوطن الجــمــيل
ياخوي الماسنجر بتاعي ضارب ارسلت لك اكثر من رسالة
سوف احاول من جديد

صديقى العزيز جدا طلال


اتابع بأستمتاع