يا سلمى ..

تصحى من الصباح ، تشوف حاجه جميلة وكأنو ربك
رش على قلبك رشة عبير ..

الحكاية :
لقيت مجموعة من الصور قامت بتصويرها سلمى داوود ،
إتمليت باحاسيس غريبة وكتيره ، وسافرت سفر في الملامح
والتكوينات ، وأشكال الدنيا لمن ننظر ليها بعين الرضا؛

يا سلام عليكي يا سلمى ، جبتي الفن ده كلو من وين ،
وليه خافيه عننا هذا السر الجميل ؟

أقول ليكي شنو بس يا بت الناس الطيبين ؟
انا كنت في حال عليم بيها رب العباد ، موجوع من الأجناب
الأربعة للقلب ، وصدري فيه بقعة الزيت الكبيره الإسمها
الغمة .. لكنك بعيونك وشوفك وقلبك الصاحي البيعرف يلمس
عرفتي تطلعيني من حيث لا تدرين من عالم وتدخليني في عالم .

صورك يا سلمى بديعة ، فيها روح ، وحكاوي وأحلام .
تكوينات غير مكرره ومدهشة وإختيارات بديعة ..

يا سابل الستر يارب ،
مش كان تقولي من الأول ؟

صور بتفتح باب ، وتمد في العمر ؛

فنانة يا سلمى

بالجد فنانة

وصورك مبالغة في الجمال

______

وسررت بالتعرف عليك




سلامات يا طلال

شفتي يا نهال سلمى دي بتعمل في شنو ؟؟
حسيتي بالصور دي ؟؟

انت بتذاكري من ورانا يا سلمى و للا ايه

التصوير ده لو مذاكره يا حسين
ما كان في زول إحتار ..
التصوير ده كيف تعرف تظبط موجتك
النفسية مع المشهد البصري عشان
الخطوط والدوائر والملامح والإضاءة
تديك أحلى ما عندها ..
ولا شنو ؟؟




_______________
تصوير : سلمى

ياسلام عليك سلمى !
في كل صورة حكاية وإحساس..

شكراً يا تماضر ..
وفرصة سعيدة وكمان شرفتينا كتير

حسه الساعه حداشر بليل ، يعني مرت قرابة
الإتناشر ساعة على رؤيتي الأولى للصور دي ،
وقضيت اليوم بالطاقة الأخدتها من الفرجة دي .

مش سلمى دي تستحق الشكر يا تماضر ؟
شكراً يا سلمى ..

طلال الجميل .. ابارييك وكت القاك برجع مخلايتي ملاينة... سلمي دي اكيد من عقدكم الفريد شبابنا الاخضر الواعد.. التصوير هوايتي .. بشان كدة بتابع .. وبيني وبينك سلمي حولت الشعر تصوير .. بشان كدة لقيت بتي تماضر هنا .. ولقيت حسين باصم بالعشرة ...
تحية لسلمي المبدعة
ولكم جميعا مودتي
ابوبكر

الحمدالله المرقت من الغمة
باريتك في حتات كده
لقيته بتجيب الغمة
طلعت وتاني ماتاوقت
لقيتك مرقت لي بره
وقلبك مشروح
وبصيرتك فرحانه
جينا نهني ونبارك
ليك ولي سلمى
الفنانة
مودتي

محمد السني ، سلام ..
الصور تبرز جماليات الأبيض وأسود وقدرته على متميزة في التعبير ..
كنت طوال الوقت أميل إليه وأعتقد أن صوت الأبيض وأسود أوضح من
الملونات .. لا أعرف السر تحديداً ، لكن مرات بفكر إن إحتمال بيلم
الطاقة البتتوزع على الألوان ويعيد توزيعها وتركيزها على التفاصيل ؛
مش ممكن ؟

أبوبكر أستاذنا وصديقنا..
سلمى دي من أعضاء هذا المنبر ، وصديقة من هذه الخرطوم
العجيبة التي حيرتنا في امرها سنيناً عددا ..

أنا عارف إنها بتحب التصوير ، لكن أخوك كان بيتعامل معاها
بإعتبارو معلم كبير ( إنت عارف إبن آدم مشاكلو كتير) ،
إلى أن فاجاتني ذاك النهار بالصور دي ، مش كان مفروض أشعر
بالخجل ؟ أبدأً وحياتك ، فإحساسي بالإندهاش والفرح غطى على
كل شيء ، بل أصبح لدي رغبة أكبر في مراقبة الناس والأشياء .
وإنتبهت إنو الصورة عايزة صبر أكتروزمن أطول في المعايشة
قبل الإلتقاط ..

سلام يا أبوبكر .. ومحبة شديدة



_____________
أشرعة : سلمى

صور جميلة. موهبة فارعة وشاعرية. الصور دى تشترك فى النعومة.
فيها متقابلات جميلة. البياض والسواد. الضآلة والضخامة. وكل الصور فيها بشر بصورة ! او باخرى.
كمان فى ثيمة theme هو ضآلة الانسان مقارنة بالطبيعة (الشجر) فى الحديقة العامة. وبالنسبة للمبانى (مجلس العموم البريطانى).
وضآلة الانسان مقارنة بالانفاق والبصات.
وفيها تركيز غريب على الخطوط المستقيمة والابعاد الهندسية. هل سلمى مهندسة او رياضية mathematician?

وبها معالجة بديعة لعلاقات الضوء والظل. العتمة والشفافية.
شكرآ يا سلمى على تجميل عيوننا. وشكرآ يا طلال على اشراكنا فى الرؤيا والرؤية..



البنت الراستا الجميلة تعزف ضوءآ/ظلا على الفلوت اللامع.
يشتبك بياض بلوزتها مع سواد رموشها فى حوار الثنائيات.
ونقطة ضوء فضية تنبثق من اذنها اليسرى لتتعامد مع فضة الفلوت اللامع.
هل ترى ام تسمع الموسيقى المنفوخة بالفم الطفولى البرئ؟
بوركت رئتاك يا بنية.. وبوركت اصابعك النورانية. اصابع الملاك الاسود فى لندن القزحية.

...
...



الصلاة والسلام علي كامل النور ....

UP....
.
.
..
..
..
..
..

Quote: الصور تبرز جماليات الأبيض وأسود وقدرته على متميزة في التعبير .. كنت طوال الوقت أميل إليه وأعتقد أن صوت الأبيض وأسود أوضح من الملونات ..

.

( بنجو) يا طلال ، أصبت كبد الحقيقة ، لأن الصورة أو اللوحة لا تكتمل إلآ بإسقاط الداخل عليها ، ما أسميته أنت بالّلحظة و الموافقة النفسية ، و حيث أن مخيلة الداخل تذخر بدرجات ألوان ليست هى من الطبيعة ، و لا هى من التراكيب الصناعية فى شئ ، يمنح الأسود و الأبيض خيول خلايا قراءة اللوحة و الصور ...مضماراً أوسع للركض .... ويمنح الصورة ذلك البعد الصوفى .
يا لسلمى ، عين ثالثة تسكن جسدها ، عضو أصيل فيها و منها ...تلك هى عدسة كاميرتها ، من أين ينبثق عندها هذا الحس بالموجودات ، و بظلال الموجودات و تراتبيتها/تراكبيتها البصرية الموغلة فى الوضوح و النطق ، حتى لتركض الأشياء فى (كادر) الصورة من زاوية إفتراضية إلى أخرى ، حتى ليستحيل فضاء الصورة وجوداً قائماً بذاته.... لا مغايراً للكون ، بل موازياً له ، و يحلّق معه فى تناغم ، كما فعل الهدهدة . الطفلتان فى بحر الإسفلت ... بضآلتهما ، و مدى الدنيا الشاسع من حولهما ، تبدوان كملكين يحطان على الأرض ، فى إستراحة ... أو سمّها تمرّداً من مشاوير ربانية ، ما كدت أرى الصورة... حتى تذكرت فيلم المخرج Brad Silberling الرائع City of Angels من بطولة النجمان Meg Ryan و Nicolas Cage و مشهد الملكان و هما يجلسان فى أعلى دعاية مضيئة ، يطلآن على أسفلت الطريق السريع ، و على الفردوس الأرضى .

رائع يا طلال ، كعهدك دوماً ، و رآئعة يا سلمى قرآءتكما تلك لـــ ( هذه الدنيا )

عوافى يا حلوين
شمــس

Quote: سلام يا أبوبكر .. ومحبة شديدة

ياطلال يا جميل ..
في الزمن الاغبر دة . خايف مواهب وابداعات الشباب زييكم بتنوعاتا وتنوعاتكم يغطيها ركام الخراب الشائع ... انشاو جمعية سموها مثلا " التبر " " ابدعات الشباب " ...الخ ولمو اعمالكم ونظموها .. هسع صور سلمي دي وصورك وعبدالحفيظ مش ممكن تروحو بيها اعظم مسابقة عالمية وتكسبو .. انا بتابع انتاجات المصوريين واجد عندكم عمل بديع ...وفيكم البيكتب القصة والشعر شوف تماضر الخنساء وشاهين وشذي وووو... انتو شباب اليوم عندكم حاجات اكتر مما كان لشباب ايامنا وعندكم وسائل الاعلان في الانترنيت .. اكيد مافي اهتمام ولا رعاية مؤسسية لكن ان تجمعتو ممكن ترعو انفسكم وابداعكم ونحن المستمتعيين بابداعكم نكون سنيدة .....انتو بابداعاتكم اقوة من اي قنبلة ذرية ....
مودتي
ابوبكر

Quote: بالفم الطفولى البرئ؟

.

ترى أى آلهة تنثال من هذا الفم ، و هذا الجمال الرزين .


ما شاء الله عليها ، و على العين التى إلتقطت بريقها و بهائها ، و عبقرية قلبها الأبيض.

دمت يا عادل يا..... جميل

عوافى يا حلوين

ليه ياسلمى ليه


وشكرا طلال


دخلت هذا البوست مرات عدة
وكل ما خرجت منه
وجدت نفسى مليئا
باحساس عال
سمه نشوة
ان ترى صوت بصرى خارق
وياتيك بكل الهدوء
ويختال
بينى وبين روحى


انه الجمال


وواضح ان ما خفى اعظم



ورينا يا سلمى
عندك الكثير

يا ســــــــــــــــــــــــــــــــلام

تسلم العيون الشافت وصورت
وتسلم العيون الشافت وشوفتنا