حزب بلاطه ...

كانت إجتماعاتنا الحزبيه السريه تعقد على ساحل البحر , قبالة مقام سيدي الشاطبي
قدس الله ضريحه ، وكانت يتم الاعلان عن هذه الاجتماعات في مقهى البوابين الذي
كنا زبائنه المسيطرين : يهيب الأستاذ بلبل ( اسم الزعيم نبيل الحركي ) بجماهير
الاسكندريه لحضور إجتماع الحزب السري على شاطيء البحر الأبيض لمناقشة ما
إستجد من أجنده ..

بعد المغرب يتحرك الموكب من المقهى بشارع النبي دانيال صوب البحرعند محطة الرمل ،
من هناك نسير بمحاذاة الشاطيء حتى نصل المكان الأجمل فيه .. تكون الدنيا قد أظلمت
وتلألأت في سماء البحر نجومه المليون ..

نفترش الرمل البارد ..

أعضاء الحزب ماهر ( محامي نوبي وقاص ) , إيهاب ( طبيب مفترض ) , خالد ( زير نساء
وشاعر في أوقات الفراغ ) ، أحمد ( ناقد ومثقف بنيوي ) ، أسامه ( فلسطيني يعزف العود)
جرجس شكري ( يعايره الزعيم بأنه مسيحي ابن كلب ، وحين نثني كلام الزعيم يصفنا الزعيم
بأننا مسلمين ولاد ستين كلب ! ) ، وهناك محمد البرعي شاعر العاميه العظيم بحق وسمير
عبد الغني الذي أصبح اليوم أجمل رسام كاركتير في عموم بر مصر .. ومحمد صالح الفتي
الوسيم والعاشق الحريف .. و أنا ..

خالد يخرج زجاجات الخمره من حقيبته وعينيه تنز شقاوه ، الزعيم بلبل يفتتح الاجتماع
السري :

يسأل : في حاجه جديده يا ولاد ؟؟
فنرد في صوت واحد تقريباً : لأ يا زعيم ..
فيسأل : متأكدين يا ولاد ؟؟
فنرد بصوت واحد تقريباً : طبعاً يا زعيم ...

وبذلك يرفع الزعيم الجلسه وينهي الإجتماع ..
وتكون زجاجة الخمر ركت بين يدي .
أسامه يدوزن العود ..
ماهر وإيهاب يبدأن في رفع أصواتهم بأغنية " البحر بيضحك ليه " :
البحر بيضحك ليه
وانا نازله أتدلع أملا القلل ؟؟


أيامها كنت أشرب المخضرات ، وقد تعلمون أثر هواء البحر على رأس مليان دخان أخضر .
أسرح قليلا ثم أميل على الزعيم و أسأله : إلا قل لي يا بلبل ، هو البحر بيضحك ليه ؟
فينظر إالى الزعيم شذرا ويقول لي وهو يواصل غناءه ( عشان رجليها بتزغزغه يا روح
أمك ) ، فيكركر ماهر ويبتسم خالد ويغمز لي ويقوم نبيل باحتضاني ويضحك السمك .
...................................
في يوم كنا ماشيين في جوله تفقديه في شوارع الاسكندريه .. وقفنا عند تمثال للأستاذ
سعد زغلول وقام الزعيم بلبل بالترحم عليه وعلى روحه ، وإقترح تكريمه .. يللا يا ولاد
عايزين نكرم الراجل ! ، نعمل إيه ؟
صرخ الزميل حمدي زيدان : نخلع عنه الباشويه يا زعيم !!
صفقنا وهللنا وصفرنا لكلام حمدي ، فوافق الزعيم وخلعنا عن سعد زغلول الباشويه ومنحناه
عضويه شرفيه في الحزب ( تجدد كل عام ) .

بعد قليل إستأذن بلبل في أنه محتاج أن يتبول ، وغاب في الظلام ( على رأي ماجده الرومي ) ..
وبينما نحن في حبور وفرح ونتقافز زي القرود تحت تمثال سعد باشا زغلول ونعد الحشيش والخمر
اللذان بحوزتنا وخالد يساوم على كتاب مع ماهر ليقرأه ، فإذا بالزميل حمدي يبدأ أول مؤامره
في تاريخ الحزب ..
صرخ بصوت عالي : إلحقوا يا ولاد ..
- إيه يا حمدي ؟!
- الزعيم بلبل مات ياولاد ، راح في الضلمه طرطر ( أي بال ) على سلك كهربا عريان ، بلبل
فلسع يا جدعان ...
ورشح حمدي نفسه لرئاسه الحزب وسط الفوضى العارمه وبدأ في تعديل الدستور ، سوى أن الزعيم
الراحل لقضاء حاجته ظهر فجأه ، وحكى له الناس على اللي جرى ، فأعلنها داويه :
أنا ما اتكهربتش .. أنا بينكم أهو .. وعشان نلحق الموقف بسرعه هتفنا :
فيفا بلاطه ... فيفا بلاطه ، يعيش الزعيم .. يعيش الزعيم .
وأعلن الزعيم العفو العام ، وانتهت أول محاوله إنقلابيه في تاريخ بلاطه ..

بعدها بساعات أعلن الزعيم عن قرار إستحداث حقيبه وزاريه جديده ، وتم بموجبه تعيين أحمد
عبد الجبار وزيرا للسياحه والإرشاد ومهمته كانت رصد الانقلابيين والارشاد عنهم ..








______________________________________
جميع أحداث هذه القصة والمواقف والاسماء : حقيقية !

أول يوم جيت فيهو الإسكندريه , سألني " ماهر شريف " :
إنت يا طلال يا خويا ، مُنَظم ؟

إفتكرتو بيتكلم عن ترتيب الدولاب والمذاكره وكده ..
فقلت له :
شويه كده ..

فضحك ..
وقال لي ، يعني شيوعي ؟
( أيامها لم أكن متأكداً من كوني شيوعياً ولا لأ .. ) .

بعدها .. وبعد أن عزمني على شاي باللبن في قهوة البوابين ، جاء
نبيل نور الدين .. " بُلبل " .. زعيم حزب بلاطه .. وتعرفت عليه ..

قال لي .. إحنا عاملين حزب .. وبعنا كل القضايا .. وقاعدين دلوقت
على البلاطه ...

ثم سألني :
تبيع ؟

قلت له : أبيع ..
( أيامها كان البحر السكندري عريضاً ، يبيح البيع ويُحرم الربا .. ) .

طلال ياجميل..
مدهش هذا الاستحضار القلق لذاكرة الماضي وانت ترسم بالكلمة والكاميرا في تداعي اكثر شاعرية فتدفق ايهاالمنساب أبدأ.

Quote: ( أيامها كان البحر السكندري عريضاً ، يبيح البيع ويُحرم الربا .. ) .

ينصر دينك يااااااااااااااااااااا...
ياااه ... انت بتمشي فين ....
واصل ....

اكيد حاقرء دة لحبيبي وصديقي حجاج ادول الاسكندراني ...وحاقول لو اهم العيال الجدعان بتاعيين الشاطبي جم ...

عم حجاج كان من المتابعين لحركة بلاطه الناهضة ،
ولمحبتنا لبعض ، وكان بيلمنا عندو في البيت مما
خلانا نشعر بحنان من طرفه وطرف زوجته " هدى "
التي كنا نسميها " أدوله " ؛

حجاج يا أستاذ أبوبكر ، من الناس الذين نبهوني باكراً
إني بعرف أكتب ، كان يقرأ الوصايا التي أتركها للشباب
على باب التلاجة أو على باب الشقة ، التي تكون غالباً
أشبه بالخطابات .
قال لي في مره يا واد إنت بتكتب حلو والله !
أذكر إلى الأن الشعور العجيب الذي غمرني ..
فقلت لحالي بعدها : ومالو ، ما أكتب !

والله يا أبوبكر أنا مشتاق لحجاج جداً ونفسي نقعد معاه
ونتكلم ونوريه ما إستجد في حياتنا ..

أما أنت ، فلك التحية والمحبة الشديدة التي لا أعرف
الآن موافاتها حقها ..

طلال يا حبيب..

جبت كرسي وتربيزة وشمسية كبيرة عشان أقعد أسمع واتفرج معاكم في البحر ونسمع ضحكاته..

أبو بكر صديقي.. سلامين و3 مراحب.. شايفاك قعدت.. خليني أخت حاجاتي جنبك..

..

واصل طلال..

شكراً والله يا رجاء ..
تعرفي .. تلك الأيام كانت من أجمل أيام عمري ،
تفتحت فيها على الحياة الكبرى ، الكتابة ، المسرح ،
القعدات ، القراءة ، التسكع ، ركوب الترام ، المشي ،
لعب الشطرنج ، والجلوس إلى ناس من كل الدنيا وعلى
أجسادهم حفيف كل الألوان العابرة للقارات ..

هاتي كرسي ، وتعالي ..

لك كل التحية يا طلال...
انت زول مدهش وممتلك لناصية كاميرا بيولوجية قادرة علي تصوير الزمان والمكان ونبض الاشياء
ورنينها...فلك الدهشة والاحترام...

صديق الانسانية

البحر والحكايات .

اشم رائحة البحر الان واسمع النورس بعيدا
وانتظرك يا غالي .....

وتمتد الرؤيا بعد الرؤيا الي الابد

هل تصدق يا عبد الكريم أن الواقع كان أجمل وأنبض من كده ،
وإنني ، الآن ، مهماً حاولت الكتابة عن تلك الأيام البديعة ،
المفرطة في طيبتها وجنونها ، فلن أوفق إلا في نقل اليسير
من تضاريس هذه الذاكرة ؛
ودي ، لو تعلم ، محنة الكتابة .. تخلي الواحد يدخل في إحتكاك
شديد مع نفسه وأعصابه عشان يلقط لقطة أو يجكي صورة ، ويا ريتو
نافع ..

مشكور يا سيدي على الإطراء .


____________________
الإسكندرية - شارع شريف باشا
1908

أخونا محمد أبو القاسم ،

والله الواحد فينامبسوط بمعرفتك ويعتز بذلك ،
إنت زول لطيف ، وبيعجبني حماسك المستمر للناس ..
خلينا نتلاقى أكتر ..

fabulous
continue and we are waiting for more

إزيك يا هشام ..
عايز أقول إنو الإيام نفسها كانت مدهشة وخيالية ،
وكنا فيها مليانين بحب الحياة والحركة ..
كان عندنا ليلة كل أسبوع إسمها الفاير نايت /Fire night ،
بنجيب قيها أقفاص الحمام الفاضية والخشب المنثور هنا وهناك
قبالة الساحل ونقعد على البحر ونولع النار في كوم الخشب ولا
أجعص هنود حمر !
على ضوء النار دي كنا بنتبادل الحكاوي ونتجاذب خيوط السهر ،
ونغني ، ومرات لمن ربنا يكرمنا وراسنا يلف نقوم نرقص ..

شكراً على الإهتمام والمتابعة ..

Quote: والله يا أبوبكر أنا مشتاق لحجاج جداً ونفسي نقعد معاه ونتكلم ونوريه ما إستجد في حياتنا ..

اتصلت به الاسبوع الماضي .. بيننا الكثير.. سا وصل اليه خطابك ... حجاج اسطورة صمود ...في ستينات عمره ما زال يناطح الصخر ... احاول جاهدا ان ابعد عنه احيانا بعض الغيلان وهم كثر ....
اكيد سيسعد كثيرا بلقاءك فان ابحرت شمالا يوما سازودك بعنوانه وتلفونه ..اما ان اردت عنوانه الاليكتروني فسوف ارسله اليك في بريد خاص
واصل ..

والله يا أبوبكر حجاج أدول ده فعلاً إنسان دؤوب ومثال حي
على المقاومة والصمود ( الإبداع طبعاً حدوته تانيه ) ..
السنه الفاتت مشيت مصر ، إتصلت به وتواعدنا على لقاء ،
وعدت للسودان ولم يحدث اللقاء ، فبعث برسالة قصيرة :
أطلال : يخص عليك ، تيجي مصر وما تزورش حجاج ؟

الراجل ده يا أبوبكر موضوع ! وسيرة كاملة ممكن تكون
حكاية ؛

حمد الله على السلامة يا طلال

طبعا أنا مبسوط شديد خلاص من صحبتك (لو مصاحبني لسع)

أجمل ما في كتابتك إنها زي كاميرتك بتخلينا نشوف معاك بالتفصيل

و الله إنت راجل فنان

أوعك تعرس

يا طلال الفاضلابي ده بحبك اقصي الحب ... شوف الوصية الصادقة دى

Quote: أوعك تعرس

تجى ناسس حركة احياء حزب بلاطة؟


واصل كلام القلب ده

عصام جبرالله ،

حركة إحياء حزب بلاطه : حا .. حب

والله فكرة ما بطالة ، ليه لأ ؟
العضوية في الحزب طبعاً تستلزم أن يكون عندك قضية
واحدة ( كحد أدنى ) قابلة للبيع ، بالإضافة لإبتكار
حقيبة وزارية .
بعد كده الإلتزام بسمع وطاعة الزعيم (نبيل نورالدين) ،
مع مع إنه لا يلاحظ لو خرجت عليه ، ولا يهتم ..

بس ..
وفيل هوم يا معلم ..

والله يا فاضلابي أنا مصاحبك ، وما عندي مانع
من مصاحبتك للأبد ، أنا لاقي ؟؟

قول لي ، أوعك تعرس دي ، حقيقة ولا مجاز ؟؟

طلال الجميل
تحياتي
ممكن اقعد معاك هنا ؟
لك محبتي

إنت يا خالد تتفضل ، تقعد .. ولو عُزت كمان
أي حاجه كده ولا كده ، تأمر

الاخ الـحـبيــب الـحـبـوب،
طــلال عـفـيـفـي،

تـحــيـةالـود والاعــزاز،

مـررت للـتـحـيـة والســلام،
اكـون شـاكـر لـو تكـرمت بافادتنـا بتـواريـخ وزمـان
هـذه الاحــداث التـاريخـــية ومـن تـوثيــق متكامـل.

لك وللـمـشـاركيـن مـودتي وتـحـياتـي.

أجمل ما فيك البحر
المتوشحك
والنيل المتوشحو
***
مشاعر حب من جلييم
الى سيدى المرسي ابو العباس
***
عايز تكون فنان كده على طول
أمسك في كلام فاضلابي شديد
***
بتقرى جريدة ميكي
إتأملها فيها حد
معرس .......
مودتي ..

أخونا وحبيبنا وصاحبنا الجميل
محمد السني

أها ، الأيام دي كانت بقى ناقصاك ،
عارف إنو ماليك في المنكر ، لكن كان
بالإمكان تشاركنا كل الهيصة دي وبيمينك
كوب مليان باليانسون المغلي ، يهدي
أعصابك ويفعل في بدنك مفعول السحر ..
تقعد معانا تسمع أغاني الشيخ سيد ،
ونطلع عتبات جبل كوم الدكه نفتش عن أحمد
عبد الجبار لزوم الكيف .
نمر على قهوة باسترودس ونشوف محمد منير
قاعد ، فنعمل زفة في الشارع ونتراقص :
الكبير كبير ، يا محمد يا منير ..

ولكنت قعدت مع محمد صالح وهو يقرأ علينا
قصيدة " وانجا ، البنت التي صوبت فاكهتها
نحو الفرح وأدهشت الفصول بموسمين " ..

أيام بديعة قضيناها في كنف تلك المدينة
المحبوبة .. أتذكرها الآن وكأن كل الأمر
كان مجرد حلم ..

صديقي بكري ..

قلت لي شنو ؟
عايز تواريخ وزمان هذه الأحداث !
ده بيكون بلاغ جاااهز



اللهم إجعل كلامنا ستر وغطا

حكى لى طلال..احس بان حديثه اليا.
فى حديثه او فى الحديث عن نفسه
او فى حزب بلاطه..والدى لا اشتاق لعضو فيه قدر
اشتياقى للمحمدالصالح ..الاسكندرانى زميلى فى المناوبه
فى العناية المفروضه لعثمان البشرى ..ياطلال .


ولكن اود ان انبه طلال واعتقد بان لطلال القدرة
فى البحث عن الحزب الجمالى السودانى والدى
انجز الكثير والكثير فى السودان ..من مصطلحات ومن لغة ومن ومن ادب الخ...
وهو حزب لا متخيل هو حزب واقعى
نشط فيه كثيرون وقاده الكثيرون وعلى راسهم
أستادنا السر السيد..
وقديكون اوقد يكون طلال بحزبه
البلاطى هدا فرع لداك الحزب..

طلال يشبههم فى انه..صادق
ويكتب بلا قيد وبلا رقيب..مؤكدا التزامه

سلامات يا علي عمر ..
الشوق لمحمد صالح ، شوق لحياة كاملة ولقصص وحكاوي
وأماسي رائقة تطيل من العمر ..

والحزب الجمالي يا علي ، حزب مجيد ، طرقت حكاياته
مسامعنا ، بل وشرعنا في إستنهاضه وإعادة بنائه في
خرطوم اليوم بإشراف السر السيد (ذاتو) ومحمد الأسباط
وآخرين ..
وقد تفتقت قريحة الجماعة عن إلحاقنا بالحزب عبر منبر
أصدقاء العائدين (والعائدون هم ناس الحزب الذين غادروا
السودان لسنوات ثم عادوا ) ؛ ومن مهامنا إعادة توطينهم
وتسهيل عملية إندغامهم في مجتمع العصاري بالخرطوم ..
وهي مهمة فيها الكثير مما قد يلقي بالواحد فينا إلى
التهلكة ، لكنها واجباتنا تجاه أصدقاءنا العائدين ،
وإنت عارف ..

ذكريات

مع دائرة ابو العز الحريرى

تخذلنى الذاكرة ان اتأكد من تفاصيل المحطات والمواقع
ولكن اجزم بانى احكى عن حالة

اسكندرية

تزاحم مواقف بين الخاص السودانى
والعام وداى النيل

اجتماع للتجمع (حزب التجمع المصرى)

احساس عارم لحضور
قررت ان احضر ذلك الاجتماع
الزمن 1979
بعد احداث انتفاضة 18 - 19 يناير

احساس غريب
عمرى 18 سنة
انتماء
لوطن وقضية
كنت اسكن فى حارة العطارين
وتعبت جدا لكى اجد طريقى لاجتماع التجمع

بين الحوارى والممرات الصعيبة
وجدت انى فى الزمن
والمكان اجد نفسى
فى بوابة
استاذن بالدخول

كنت يانع
صبى
بين
شخوص قامات
عرفت نفسى بالمدخل
انى سودانى
اريد ان احضر هذا الاجتماع

بين الريبة التى كانت تبدو على اوجهم

سمح لى مسئول التأمين النوبى
ان احضر

كان اجتماع سرى
للتحضير لانتخابات
ابو العز

بدا الاجتماع
الكل ينظر لى بنظرة الريبة
وكون انى اسمر
يقلل بعض

وقرر رئيس الاجتماع ان يمنحنى فرصة
لكى اقدم
نفسى

قلت لهم انى نوبى
من صلب الوادى
اعرف عبد الخالق
والشفيع

وسردت بعض من
معالم وعنوانين

سكت القوم

وكنت كالنجم

كانت لحظة

انى احمل رسالة

شرنوبي يا ساكن العطارين ،
سلامات على ريحة البهار المخلوطة في الجو بأصوات
البني آدمين ؛

عارف كلامك عن الذي حدث لك في مقر حزب التجمع بيشبه
حاجة حصلت لي وأنا واقف في ميدان طلعت حرب قريب من
ذات نفس مكانك ؛
منتظراً كنت أحد الأصدقاء أمام مكتبة مدبولي ، أتفرج
على العابرين ( والعابرات ، طبعاً) وإذا بي أرى الرجل
الحلو المحترم الذي يستاهل ألف بوسة على خدود عمره
المديد : عمنا وخالنا وأستاذنا محمود أمين العالم ..
تشوف بسمته وصحيانها ، تقول عمره لا دخل سجن ولا حاجة ..
تشوف محبته وأمله في هذه الحياة ، تقول عمره ما حد نكل
به ولا حاجة ..
راجل عجوز ومبتسم وعالم وراسه مليان بالأفكار الكبيرة
ونشيط لسه وبيكتب وبيحضر ندوات وبيقاوم دول ، سلمت عليه
وقلت له إزيك يا أستاذنا ، أنا طلال من السودان ، فأغمض
عينيه وابتسم بسمة زي الورد وقال لي : يا مرحب يا حبيبي
ده إنتو الندى بتاع العالم

فتأمل ..

شكراً ياطلال
للكتابة التسل الروح دي

مستمتع جداً

سلمت ياشفت

خضر

Quote: سلمت ياشفت

خلاص داير تطبزا يا خضر ؟؟
الناس شابكني يا حنين ويا عصفور ،
تجي تقول لي يا شِفِت



على العموم مشكور

طلال عفيفي ...

كل ما اقرا ليهو او اتفحص صورة صورها باحس بكمية من الصدق لمن تخليني اتحير ...

احنا في زمن الاقنعة المباعة على الارصفة برخص التراب ...

زمن التزييف بدعوى الستر ...

زمن استعمال المحسنات البلاغية من تورية وكناية للالتفاف حول حقيقة مؤلمة ...

يفاجئني طلال بعزوفه عن ارتداء الاقنعة واتباعه سياسة كشف المستور ...

يحدثنا عن نفسه كانه يتحدث عن شخص آخر .. بكل تجرد وحياد ..

بلا انقياد لرغبة في تحسين الصورة وتلميعها ...

قرات لحجاج ادول ( الكشر ) .. واشكر صديقي ابوبكر لانه اعارني هذه القصة الموحية ..

وما زالت شخصية ( سامو ) تعبث في خيالي من وقت لاخر ...

ابوبكر ورجاء .. احجزوا لي كرسي جنبكم ...

يعني يا سناء في الحقيقة كده أنا سعيد بهذا الكلام
الذي قلتيه في حق البعمل فيه ..

انا من البداية ما شعرت بأي ميل أو نزوع لمرواغة الناس ،
ووجدت فيني محبة شديدة وإعتزازاً لكل أحوالي التي كنت
عليها ، وأرى في حياتي قيمة لا تعادلها قيمة ..
عشان كده بأجد نفسي بحاول أعبر عن نفسي ببساطة متمنياً أن انقل
للناس تفاصيل ما حدث .. عسى ينبسطوا ويشوفوا الدنيا معاي من حته
مشتركة ..


محبتي يا سناء

Quote: انا من البداية ما شعرت بأي ميل أو نزوع لمرواغة الناس ، ووجدت فيني محبة شديدة وإعتزازاً لكل أحوالي التي كنت عليها ، وأرى في حياتي قيمة لا تعادلها قيمة .. عشان كده بأجد نفسي بحاول أعبر عن نفسي ببساطة متمنياً أن انقل للناس تفاصيل ما حدث .. عسى ينبسطوا ويشوفوا الدنيا معاي من حته مشتركة ..

تعرف يا طلال تعرية النفس امام العالم الخارجي بيتطلب شجاعة كبيرة ما كل الناس بيمتلكوها ...
غالبية البشر اتعودوا انهم يعكسوا صورة جميلة لانفسهم حتى لو كانت كاذبة ..
ودة من باب ( انا لا اكذب ولكن اتجمل ) ...
اجمل شئ اننا نقتنع بنفسنا زي ما هي .. ونؤمن بيها زي ما هي .. ونحبها زي ما هي ...
لما نوصل للنقطة دي .. ببقى التعبير عنها بدون تزييف شئ عادي ...

صدقني انا حاسداك على الشئ الانت وصلت ليهو...

ولنا لقاء قريب ...

Quote: اجمل شئ اننا نقتنع بنفسنا زي ما هي .. ونؤمن بيها زي ما هي .. ونحبها زي ما هي ...

الحمدلله على نعمة الإيمان يا سناء

سلامات يا طلال..

البارحة قرأت كثيرا من كتاباتك التي وضعها الأخ عادل عبد العاطي في بوست آخر فعرفت عنك المزيد وقلت أتاري الزول دا يوم داك ترجم أبيات من القصيدة ديك إلى العربي..

المهم يا زول برضو تذكرتك قبل أسابيع وأنا أشاهد فيلما عن الراحلة العظيمة السيدة سعاد حسني.. والآن سأعود إلى هنا إلى حزب بلاطة الذي يذكرني بمخيم بلاطة للاجئين.. [ملحوظة: أنا لم أقرأ هنا كثيرا وإنما استمعت فقط وسأعود.. حتما أعود]

عمك ياسر..

طلال عفيفي
إكتب وفقط أكتب ونحن في إنتظار حبيبة(إدريس جماع).. أو:-

أنت السماء بدت لنا

وإستعصمت بالبعد عنا

شكراً يا عبدالله على المتابعة الدائمة والإهتمام ؛
وسنواصل الكتابة يا صديقي

سلامات

Quote: المهم يا زول برضو تذكرتك قبل أسابيع وأنا أشاهد فيلما عن الراحلة العظيمة السيدة سعاد حسني

شكراً يا ياسر كونك تتذكرني في مثل هذا الموضع ،
أكيد ده موضع خير وجمال ..

سلامات

أنا أشكر عادل عبد العاطي

الذي أتى بي الى هنا..

كما أشكره أيضا لأنه جلب لنا كتابات طلال في بوسته( طلال عفيفي .. وحالة كونه شيوعيا !!)

طلال معروف بالنسبة لي ولكني أعدت أكتشافه.. لقد سعدت باعادة تعريفي بطلال عفيفي.

Quote: أنا أشكر عادل عبد العاطي الذي أتى بي الى هنا.. كما أشكره أيضا لأنه جلب لنا كتابات طلال في بوسته( طلال عفيفي .. وحالة كونه شيوعيا !!) طلال معروف بالنسبة لي ولكني أعدت أكتشافه.. لقد سعدت باعادة تعريفي بطلال عفيفي.

عذراً أبو مهيار... لم أجد إلا أن أقتبس كلامك


طلال عفيفي تحياتي

تحية طيبة يا إدريس ، لك ولأبي مهيار
وللك هنا ..
أتمنى نتلاقى كتير في هذا المنبر المليان
بالناس والحاجات ، ونلقى مناطق مشتركة ..

أبو مهيار !!

أنا كمان بشكر عاد كتير على إهتمامه ومثابرته على قراءة
ما أكتب بعد نكتِه نكتاً من أضابير أراشيف هذا المنبر الموَار ..

وأشكرك لصبرك على قراءتي طوال المدد المنصرمة جعلها الله
في ميزان حسناتك بأي شكلٍ كان ..

فكرة إعادة الإكتشاف دي لذيذة ، عجبتني ، فعلاً مرات بتكون
فكرتك عن الواحد بدت تكون نمطية .. مهمة مسألة إعادة
الإكتشاف دي ، هحاول أعملا مع حاجات كتيرة ، يمكن الحال
ينصلح ..

,,,
والبحر يضحك ليه????????????????????????????
!!!!!!!!!!!

صديقي الاديب النوبي العالمي حجاج حسن ادول كتب الي صباح اليوم يقول عن طلال عفيفي :

Quote: الصديق النوبي الطيب أبو بكر صباح الخير . بالنسبة لأطلال عفيفي - أنا بدلعه باسم أطلال- هو ابن لي ولهدى أدولة. هو أديب مدهش غاية في الجمال. أخاله من آله الأوليمب.. من كان يسرح في الحقول يعزف على الناي فتتفتح الأزهار ويغني الكون معه. لو امتلك القليل من التنظيم سيكون لا محالة من أرشق وألذ من أمسكوا بالقلم لك التحية والحب حجاج

.

تعرف يا طلال يا أخوي

انا عارف إنو أنا السبب

ولو أنا كنت عارف إنو كتابات

أخونا عادل عبد العاطي عنك ( و التي أنا المتسبب فيها )

لو كنت عارف إنها بتطلع منك زي الدرر دي كان زمان نزلت البروفايل بتاعك

في صدر البورد وناشدت بكري أبو بكر يعمل ليهو مانشت فوق كمان .

يا زول أنا زعلان منك تعرف ليه ؟

لأنك داسي مننا الحاجات الجميلة دي

يا خي عليك الله ما تكون بخيل ...............


ودي
م.كرفس

بعد ادن طلال
اتا داتك جميل
وياخى اقراء مايكتبو عادل عبد العاطى
وكانو كاتبو زول تانى غير عادل عبد العاطى
وكتها بتلقى انك مابكون عندك سبب للحرد
حتى لا تدخل فى زمرة عادل عبد العاطى
الحراد الأكبر
محبتى اليك كرفس

حسه يا معاوية الله يسألك ، دي كتابة زي الدرر دي ؟؟!!
غايتو أنا همشيها ليك على أساس المحبة وما إليه ..

كتر خيرك يا صديقي ، وخليك بخير ، وما تنفعل ، طيب ؟
لأنو أنا شخصياً إتعرفت عليك في مزاج رايق ووسيم ..

Quote: أبو بكر صديقي.. سلامين و3 مراحب.. شايفاك قعدت.. خليني أخت حاجاتي جنبك..

مرحب رجوية .مدام انتي بجاي ..اهي قعدة .. وسناء كمان جات تقعد معانا اهو راجيين طلال يطل ..المرة دي لازم يواصل وعشان كدة سناء مسافرة الخرطوم تشوف حكايتو شنو وايه حكاية "غيب وتعال" ولازم يكون هنا" علي طول" ..مش كدة يا سناء ..؟ الشايقية مني غششتك وقالت ليك شنو يعني "كشر" مش

طلال

مرحبا بتداعيات الذكري

و اناره سراديب الروح

بشي من عطر الصدق

و لحن النيل الدافق

فينا و المزروع

في حنايا القلب

و النفس النابض


بانتطار المزيد

من الشفافيه

بنت الأسيد ..
بتظهري وبتختفي ، والواحد بيشوفك في أمكنة
مختلفة في العالم : مؤتمر فيينا ، مقهى قاهري ،
شارع رملي يظلله النيم في جامعة الخرطوم ..
إذن العالم حمال أوجه .. وليه لأ مادام للأمكنة
تعددها الساحر الذي يشحذ العواطف جهة الحنين ..

عالم مفتوح على تاريخ من الألوان والحكايات والقصص ،
ليست له حدود إلا بقدر ما نصنع نحن ..

عالم مفاتيحه بين يدينا .. وغالباً ما لا ندري ، ونبحث
عن الحل عند الآخرين ؛

سلامات يا مي ..

الاخ طلال ابن عفيفى

لك التحية


لا استطيع ان اقول شئ

سوى

لك البحر ولنا الحمى


تسلم

أخونا عاصم ..
والله الحمى دي هتصيبنا كلنا من فرط الشوق لتلك الأيام
بلذاذتها وحريتها وعفويتها والذي منو ..

على قول سفيان بشير :
يا سلام .. يا سلام !

كانت الجو (مغربا) و كنا في حديقة
المركز الثقافي الالماني...(يومها) كنت احاول تلمس بعض الخطوات
في اللغة الالمانية..كنا و معي شله (الفصل)...في الاستراحة, ما بين المحاضرة
و زميلي الاستاذ د\كمال يوسف ....عازف الفلوت ..
كنا نتاول بعضا من (زقني) في البوفيه الخاص بالمركز..
عند تلك الامهرية الفاتنة..كنا و معيتنا نفر من الزملاء و الزميلات..
فجاءة , لمحته هناااااااااااااك..
شدني اليه شئ غريب...لا ادري كنهه؟؟
ربما لبسته الجميلة الغريبة؟؟؟ ربما وسامته..؟؟ رمبا الهدوء الذي يتلبسه ؟؟ام اشيئاء اخريات
ظللت اتابعه كلما اراه..
هادئ للحد البعيد,,و سيم,,مهذب,, له حضور قوي في المركز..
سالت عنه احدي الزميلات...فردت, الا تعرفه؟؟؟
انه طلال عفيفي..
تعمدت الجلوس قريبا من (شلته) حتي اسمعهم و لكن؟
لم تكن ايامي بالمركز الالماني كثيرة..كنت اغيب لسبب و دون سبب..
ندمت علي عدم معرفتي به..
لكني!! ادمنت اتابعه هنا برغم بخله في الكتابة..
الي ان جاء يوم ان اكتب له مباشرة هنامن علي البورد
تسلم ايها الفنان
يا طلال يا عفيفي
دوما
هواري نمر

Dear Tilal

Here to say hello, and stay!! X Adil

سلامات يا عادل إسحق ،
سمعت والعهدة على الراوي إنك في السودان ،
حاولت الإتصال بك ، دون جدوى عبر تلفون حصلت
بطرق ملتوية .

كنت بتمنى أشوفك ..

أشواقي

طلال الجميل

على شاكلة حزب بلاطة..شلة من اولاد قرية شكلو ليهم حزب دينى من بنات افكارهم..يكفرون الناس ولا يخالطونهم بحجة انهم كفار..تزوجو اخوات بعض..وشاركنهن فى البلاطية..وصل الى القرية شاب مغترب اسطادوه معاهم فى اول ايامه مع تلك البحبوحة..فتبلط مثلهم ..فلغبوه عبد الرمن بن عوف..على انه غنى وكريم ..فاصبح يذبح لهم ويسهرون معهم كل يوم الى ان تركوه على البلاطة..فترك حزبهم واصبح يندب حظه التعيس ..فطرق الغربة مرة اخرى فاشتغل سائق لمؤسسة سراميك تبيع البلاط..

شايف الناس قاعدة فى الشاطىء قلت ليهم الحاصل شنو..قالو لى طلال مارى بجاى وشايل كاميرا..قلنا ننتظرك..

أبو قوتا ..

ألذ حاجة تقعد على الشاطيء بليل ، الرمل بيكون بارد
برودة جميلة ، والهواء اليلي العليل يلفح مزاجك ليجعله
أحسن ما يكون ، بعد كده إنت وقسمتك لو عايز تساعدا
بحاجة تانية ، فأنت حر .

شط الإسكندرية له سحره النفسي الخاص ، بيغسل روحك
ويشطفها ويخليها جميلة ونايرة زي ملابس الأطفال ..

هواري نمر
ينفع كده ؟؟
تجي لغاية المركز الألماني وتاكل " زغني " ،
وتشوف الأمهرية الفاتنه ، وتدرس ألماني ..

يعني تعمل كل الإجراءات وما نتلاقى ، ليه كده
يا أخي ؟؟
لو جيت تاني بالله عليك خلينا أقله نسلم على بعض ..

أنا متشكر جداً على كلامك الظريف وعلى إهتمامك ،
وسلام خاص لكمال يوسف ..


محبتي

ممكن يا طلال اقعد اتفرج معاكم على البحر
لو قبلتوا ممكن اعزمكم كوارع زي الاكلناها في الحلة الجديدة ديك

يا طلال
لا تتوقف عن الكتابة..
تعجبني مذكراتك جدا..

شكراً أستاذة بيان ،
أجمل ما كان في هذه الحياة إنها فتحت أفقي على خيال
غير محدود ورغبات غير معدودة .. أصبحت سهل المنال
للأحلام ..
تغريني الحكايات التي أسمعها وأنا ماشي ليلاً أو غاشي
صباحاً، وأحلم بل أتمنى أن أعيش كل ما أسمعه ..

الزميل الوفي طلال


فعلا سنوات الدراسة تشكل ملامح الطالب وطريقة تفكيره في كثير من الامور ولعل اولها الشأن السياسي







تخيل شكل الصراع على نزل الطلبة الجدد في مصر _ وهو عادة ما يكون تابع للجهة المسؤلة من الاتحاد _ والمنافسة في الظفر بتجنيد كوادر

جديدة

فعلاً يا حيدر ، أسخف حاجة أول العام الدراسي
هو ذلك الحس الإستخباراتي الذي يلف قدامى الطلبة
تجه ال" نيو كومرس " أو الوافدين الجدد ..

انا عانيت من ده جداً كطالب مبتديء ، وعانيت منه
جداً حين كان مفروض علي ممارسته بشكل أو بآخر ..
لكن في النهاية ركنت لطبيعتي ولصداقاتي العفوية
وربك ستر ...

يا طارق حرام عليك يا أخي ، ماممكن على الملأ كده
تقول كوارع وبتاع ، أنا للمعلومية مشيت معاكم الحلة
الجديدة ، لكن ما أكلت كوارع ، ديل إنت ووديدي وما
عارف ناذر الخليفة ؛

أكرر لجماهير حزبنا : أنا بعمل كل حاجه ، إلا الكوارع !

يرفع لحين حضور طلاله العفيف
المقام يستحق
ولغة الحكي "شقية" و"مشاغبة"

Quote: القعدات،

ومافاتت حاجة معزوم هنا
أسف ، لكن البورد ده مرات بيذكرني قعدات السكر
يا زول أخوك بيحب الحكي و مستمتع
واصل

شكراً يا عبدالباقي على العزومة الكاربة ،
لكن في حياتي ما شفت قعدة جايطة زي قعدتكم
دي ، أنا بتذكر نوع زي ده من القعدات زمان ،
كان بيكون زحمة لدرجة إنو القعدة الوحده
بيكون فيها أربعة أغاني مدورة وصفق ورقيص
ومش عارف إيه ده طبعاً إلى جانب إنك تكون
فاتح نقاش وبتتكلم مع واحد مشى قبيييل !

غايتو الواحد في هذه الدنيا لا يملك إلا أن
يسأل الله الستر ..


ما تجي نقعد ؟

إزيك يا الطيب ،
دايماً كده .. نتلاقى خطف وعلى السريع ..
خلينا نجرب مرة نتآنس ..
ولا كيف ؟

طلال تصدق
انت و كامرتك و قلمك من اجمل مخلوقات الله

كتابة جميلة وحزب جميل وزول جميل ..

عادل تحياتى
ياطلال
امتعتنا

البحر .. طلال
واصل نبضك يا مدهش
هنا نجلس لتمنحنا الحكي المعتق حد الدهشة

لك العافية

سلامات يا شفيع ،
معليش على الرد المتأخر جداً وبتمنى إنت
وكل الناس الموجودين هنا يتقبلوا إعتذاري
...
أنا سعيد بيك جداً لأنو جميل إنك تشعر بواحد
متابعك (بس ما يكون بوليس طبعاً) .

كتر خير الدنيا اللمتنا في ناس حلوين نحكي
عنهم ونعيش معاهم ، أهو نتسلى وننبسط بدل
ما نطلع كيت من هذه الحياة ..

ولا شنو ؟

شكراً يا فرح ..
وأنا كمان سعيد لخلق حالة مشتركة مع الناس ..

تحياتي ..

طيب يا عادل ، مادام الحزب عجبك ما تجي تدخل معانا،
شوف ليك توليفة لحقيبة وزارية وقضية قابلة للبيع
وتعال ..

أمجد إزيك ،
Long time no see مش كده ؟؟

حسه بعد الكلام العجيب القلتو إنت ده ،
فأنا لا أملك حاجة أقولا !
شكراً شديد طبعاً ..

مساء الخير يابحرى ياانفوشى يا سياله

(اسكندريه ليه) وكمان وكمان

اجمل مدن الله
من امنياتى ان اعيش فيها ماتبقى من سنين

صباحتك فل

ناظم

والله يا ناظم لو تقدر تعيش فيها باقي عمرك ،
يكون ربنا فتح عليك ..
يا أخي دي مدينة ساحرة ، ملمسها أليف وطازج
في نفس اللحظة ..
وبحرها ياتي محملاً بالنسيم الذي يشفي الروح
ويزيد الرغبة في الحياة ..

آمين يا ناظم ،
وجمعاً ...

طلال

يا عفيف

هل الحزب مازال ام اطلال ؟

و هل ما زالت داره - أو ستكون - أطراف الماء

والله أنك لمدهش يا طلال!

لك التفرد المدهش يا عفيف..

والله يا معتصم السؤال عن وجود الحزب الآن
سؤال محرج ، خصوصاً بعد تفرق كادره بإيدي
سبأ ، فخالد حجازي رحل إلى أمريكا ، محمد
السر في كندا ، أسامه في الأردن ، طارق خوجلي
في الأمارات ، محمد صالح في السودان ،
الولد إيهاب في القاهرة ومشغول بالترجمة
والرواية والحياة ، ماهر وحمدي عملوا جسم
جديد سموه " إسكندريلا " يعني إسكندرية مع
سندريلا (سعاد حسني) .. وإلخ !
المهم إنو الروح موجودة وقابلة للبعث ..

وهمتك معانا

عبد الإله زمراوي ..
حضورك في هذا المنبر حضور رقيق ومحترم ؛
ربما ل أكاتبك من قبل ، لكن هذه مشاعري
تجاه ما تكتب ..

محبتي يا سيدي

....
..
.
حكاياك
برق
يوازي سرعة انخطافه...
سرعة الوصول

لمتعة القراءة كتاباتك
أيقنتنا
وأيقناك...


والبحر بيضحك...
من غير ليه

دايماً تجي يا ريل وتعملي لينا كلامك ده وتمشي ،
كلام جميل ومسايرته صعبه ..
أفرح جداً حين أقرأ إسمك بين القراء والمتداخلين .

الود "طل"

حين أقرأ كتاباتك ينتابني إحساس قوي بأنك تكتبها بالدم
رفقاً بقلبك يا صديقي

Quote: وزيرا للسياحه والإرشاد ومهمته كانت رصد الانقلابيين والارشاد عنهم

ووزير الصحة عندكم مهمته هي السهر على تحضير الكؤوس في صحة الوطن؟؟

والله يا إشراقة الكتابة بتطلع من منطقة عجيبة في النفس ،
وتسبقها مكابدة .. لكن في النهاية ربنا بيفتح علينا بكلمتين
نمشي بيهم الحال والأحوال ..

Quote: ووزير الصحة عندكم مهمته هي السهر على تحضير الكؤوس في صحة الوطن؟؟

وزير الصحة يا إشراقة كان إيهاب عبد الحميد ، ومهمته كانت
إصلاح ما أتلفه الهوى ! ، لكن والله الكلام القلتيو ده لازم يؤخذ
في عين الإعتبار ..

وأخونا جرجس شكري كان متولي حقيبة الشؤون الدينية والأوقاف ،
تحت شعار الدين لله يا محسنين .

سعداء جدا بكتاباتك الجميلة يا طلال.
كل الود.

تشكر يا أحمد الملك ، أنا كمان أعجبت بكتابتك
وأحببتها ( كده واحد / واحد )

أتمنى تواصلك المستمر

سلام

طلال يا طلة
ياجمال وذوق من الله

تعرف ، بمناسبة هذه

Quote: ومرات لمن ربنا يكرمنا وراسنا يلف نقوم نرقص

أحكي لك النكتة التالية التي وصلتني في الموبايل :

سكران قال لي صاحبو انا مرات 5 كاسات ماتسكرني ، ومرات 8 كاسات مابتسكرني
ومرات جالون كامل مايسكرني

ومرات نص كاس بس يسكرني

غايتو
السكر ده توفيق من رب العالمين

شفت كيف ؟

عليك الله سلم لي على أي حاجة تتعثر بها
أو تتشربك فيك

البحر بيضحك ليييه..

وأنا نازلة أدًلع أملأ القلل..

الزميل طلال
من اين خرجت من اين اتيت ؟
انا خرجتا من السودان ده لي خمسه سنوات لم تكن
هنـــــــــــــاك
لاني احس انك صاحبتا اصحابي من وراي
المهم انا يوم ما ساعود الى تلك الشوارع الحبيبه؟
تعرف انا مشتاق لشنو في السودان
ان اعود ليلا الي شوارع ابروف من الحفر
وانا ما قادر اميز بين الكلب النايم وبين حفرة
موية البلاعه في ذلك الشارع المضلم
معتصم سيد احمد

أبو ساندرا ،
وينك يا شيخنا

والله وجودك في الخرطوم غير طعمها كتير ..

مشتاقين بالجد ..

كيفك يا حسن ،
أول مره شفت الصوره العامله زي الرسم دي ما عرفتها ،
بعد كده بقوة الملاحظة وذكائي النادر الفريد ، عرفتها !!
دي في صالة عرض المركز الفرنسي ..


صح ؟

" صـحـيـت الـمـواجـع فــي "!!!
الفنانة الكبيرة " ام كلثوم".

اخـي الـحـبوب الـحـبوب،
طـلال،
1- اولـي زيارتـي للأسكـنـدرية كـانت فـي عـام 1962، اي قبل 47 عـامآ، وكـانت تـختلـف عـن "اسـكندريتك!!" كـما وصـفتهـاأخـيـرآ.

2ـ كانت مـدينة تعـيش اولـي سـنوات التـجـربة الاشـتراكـية بعـد التأميـمات الكـبيرة الـتي قـام بـها جـمال عـبدالناصـر و " تـمـصـيـر"
الشـركات والبنوك الاجـنيـة ودور النشــر والـمؤسـسات التـي إسـتنـزفـت
ومـصـت دمـاء الـمصـرييـن المـسـحـوقييـن.

3ـ كـانت الاسكـندرية تعـيـش زمانات الشعارات التـي تنادي ببـناء مـصرجـديـدة خـاليـة من الهـيـمنة والضـغوطات الرأسـماليـة والانفتـاح عـلي الـمـعسـكر الاشـتـراكـي وشــراءالســلاح مـن تشـكـوسلفاكيا كـبديل للغـرب الذي فـرض شـروط تعـجيـزية عـلي مـصـر.

4ـ كنـت تلـمـس وقتهـا كـم كـان الـمصــري سـعـيـد رغـم قلـة بعـض الضـروريات وشـح فـي بعـض السـلع التـموينيـة، وانه اخـيـرآ حـرآ فـي بلـده وحـكامـه من أهـل بلـده.

5ـ كانت الاغـاني وقتهـا:
" والله زمـن ياسـلاحـي"
" قول ياناصـر مابدالك، احـنا رجـالك ودراعـك اليميـن"،
نشـيد " الله اكــبـر"،
أغـاني الفنان عـبدالـحـليم حـافظ الثورية، وام كلثوم، واشـعارالابنـودي، وصـلاح جـاهيـن،وامـل دنقـل، وسـخـريات " الولـد الشـقي"
محـمودالسـعـدنـي، ومـقالات يوسـف ادريـس.

6ـ عـشـت ايام طـويلة بـمنطـقة " كـوم الـدكـة"!!، وماادراك ما"كـوم الـدكة!!!"، سـكانهـامـن ابسـط خـلق الله، يهـهـم فـي الـمقام الاول "الستـرة"
"والكلمه الطيبة" ويـكـرهـون " القـنـزحـة!!!"، بسـطاء في كـل شــي حـتي
احـلامهم بســيـطةمـتواضــعة.

7ـ كان عـدد السـودانييـن كـبيـرآ، ونـسـبةالـطلاب بيـنهـم عاليـة، عاشـوا فـي رغـد وعــز فقـد كان الـجـنيه السـوداني يسـاوي 9 جـنيهـات
مـصـرية،بـمعنـي اخـران الـطالب كان يكـفيـه للـحـياة في مـصـروقتــها نحـو 50جـنيـــه مـصـري اي مايعادل خـمـسـة جـنيهــات سـودانيـة!!!!.

8ـ كانـت الحـرية الشخـصـيـة مـقـدسـة ولايسـألك احـدآ فـي خـصـوصياتك وان كـنت تعاقرالـخـمر او يهـتمـون بنوع دينك وملتك!!!!.

اهـــ يازمـن!!!!!،
" صـحــيـت الـمـواجـــع فــي يا..... عــفيــفـي".

.... كـنـت كـلا مـسـاء اجـلس فـي قـهـوة الـمعـلم " حـنـفي " بـمنـطـقة
كـوم الـدكـه، حـنفـي مـن الذيـن حـاربـوا فـي بورسـعـيـد ايام التـدخـل والعـدوان الأسـرائيـلي الفـرنـسـي البريـطانـي علي منـطـقة قنـاة السـويـس عـام 1956، وفقـد قـدمه اليـسـري نتـجـة لغـم ، وبعـد الـمعارك رجـع الـي منـطقتـة بالاسـكـندرية وفـتـح القهـوة التي بهـا عشـرات الصـور وقصـاصات الصـحـف التـي تحـكي قـصـه نضـــالة وكتبـت عـنه صـحـف الاسـكنـدرية. هـناك وبالـمقهـي كـان شـرابي الـمـفضـل هـو الشـاي
" الســامـوطـي "!!، كـان بالمـقهـي ثلاثـة انواع من الشـاي، شـاي باللبـن وشـاي ســادة وشـاي ســاموطـي بالشـيـشـه!!!، وكـان رواد القهـوة لايـحـلو لهـم الاالكـلام عـن مباريات كـرة الـدوري ، وماتناولتة الاخبـار فـي الصـحـف، وماكـانوا يهـتـمون كـثيـرآ بآخبار الفـن والتجـارة، كـانت الاسـكـندرية تـذخـر وقتـها بشــباب يســاري تقـدمـي ينادي بعـدم الـمهادنـة مـع اميـريكا والـوقوف بـصـلابة ضـد تـحـركاتهـا فـي الـمنطقة العـربية وربطـها بـ " حـلـف بغـداد " الرامـي الي وقـوف الـدول العربية ضـد التوسـع السـوفيـتي في الـمنطـقة وبروز نـجـم الاتحـاد السـوفيتـي بعـد "انـذار بـولـجـانيـن " بضــرب الغـرب مالـم تنـسـحـب مـن مصــر سـريعـآ ومعها اســرائيـل فـي ظـرف 48 سـاعـة بعـد العـدوان الثلاثـي، كـان الشـباب متـحـمسون لبناء مـصـر الاشتراكية حـتي وان اضـطـروا الـي شـد الاحـزمـة عـلي بـطـونهـم وحـتي الثقـب الاخـيـر مـن الـحـزام!!!، كـانت صــور هـوشـي مـنه وكاسـترو وعبـدالناصـر تـمـلأ مـساحات كـبيـرة مـن الـجـدران داخـل الـمقاهـي والبقالات ودكـاكـين الـحـلاقة وبيـع اللحـوم، كـانوا شـبابآ يؤمنـون ان الشـباب روح الوطـن ويقع علـي عاتقهـم تنـوير باقي القطـاعات الشـعبيـة وان التغييـر لاياتـي الابالتـضـحيات الجـسام والكـبيـرة، كـانت الاغلبيـة تـؤمـن بان مصــر يـمكنهـا وان تلعـب دور قيـــادي وان تســاعـد الـجـزائـر واليـمـن والسـعودية فـي التحـرر مـن الـحـكـم القبلـي العـشـائري وتـبني دولآ عـلي نـمـط ديقـراطـي حـديـث.

كـانـت الاسـكـنـدرية وتـخـتلف تـمامـآ عـن اسـكـنـدرية عـام 1992"اخـرمــرة كـنت بـهـا"، تغـيـرت تـمـامآ الا مـن البـحـر وشـارع بـورسـعـيـد!!!!.

الـمصـريون يقـولـون : " مـاتـأخـد زمـنـك وزمـن غــيـرك ".

Quote: البحر بيضحك ليه؟ للشاعر نجيب سرور البحر بيضحك ليه وانا نازله ادلع املا القلل البحر غضبان ما بيضحكش أصل الحكاية ما تضحكش البحر جرحه ما بيدبلش وجرحنا ولا عمره دبل مساكين بنضحك من البلوة زي الديوك و الروح حلوة سارقاها من السكين حموة و لسة جوا القلب أمل قللنا فخارها إناوي بتقول حكاوي و غناوي يا قلة الذل أنا ناوي ما شرب و لو في المية عسل والبحر بيضحك ليه … ليه وانا نازلة ادلع املا القلل ياما ملينا وملينا لغيرنا وعطشنا ساقينا صابرين وبحر ما يروينا شايلين بدال العلة علل والبحر بيضحك ليه … ليه وانا نازلة ادلع املا القلل في بالي ياما وعلى بالي واللي بيعشق ما يبالي ما يهمنيش من عزالي يا حلوة لو مرسالي وصل والبحر بيضحك ليه ليه وانا نازلة ادلع املا القلل بيني وبينك سور ورا سور وانا لا مارد ولا عصفور في إيدي عود قوال وجسور وصبحت انا في العشق مثل والبحر بيضحك ليه وانا نازله ادلع املا القلل

Quote: اسكندرية يا اسكندريه بحرك عجايب ياريت ينوبني م الحب نايب تحدفني موجه على صدر موجه والبحرهوجه والصيد مطايب أغسل هدومي وأنشر همومي على شمسه طالعه وأنا فيها دايب كأني فلاح في جيش عرابي مات ع الطوابي وراح في بحرك كأني نسمه فوق الروابي م البحر جايه تغرق في سحرك كأني كلمه من عقل بيرم كأني غنوه من قلب سيد كأني جوا المظاهره طالب هتف باسمك ومات معيد كأني صوت النديم في ليلك بيصحي ناسك يشدوا حيلك كأني طوبه من بيت في حاره كأني دمعه في عيون سهارى كأني نجمه فوق الفناره تهدي الحيارى والبدر غايب يا اسكندريه يامصراويه على سن باسم على ضحكه هاله البحر شباك ومشربيه وانتي الاميره ع الدنيا طاله يا اسكندريه عاشق وبدوي ارتاح في حضنك والود ودي يكون كلامي عربون غرامي وبالمحبه ناخد وندي يا اسكندريه فيكي الغلابه ع الرزق يسعوا ولايناموش صبح صباحهم رجع مساهم وزاد شقاهم ومارتاحوش يا عيني ع اللي الزمان تعبهم وضاع تعبهم ومالتقوش نزل شبكهم في بحر طامي طلع شبكهم على فاشوش وفيكي بين البشر ديابه وفيكي فوق البشر وحوش وفيكي ناس مغرمين صبابه لو خان زمانهم مابيخونوش وفيكي خمري سلمت امري ما اقدرش اشوفه وما انيلوش سمك يا بني يا اسكندراني في العشق واحد مالكش تاني سمك يابني يا اسكندراني في الحسن ساحر ومعجباني سمك يابني والعشـق غيه تبدأ بنظره تبقى ملاغيه وكل عاشق وله بهيه وكل شاعر وله اغاني وأنا اللي عشق الصبايا كاري أعشق وأغني ما اقدرش اداري واي نظره بتجيب قراري وايشحال عيونك يا الاسمراني

..... فـي كـل مـساء كـانت الفنانة الكبيـرة " ام كلثـوم " تعـطـرسـمـاء البـلاد بأروع أغانيـهـا:
" حـب إيـه اللي انـت جـاي تقول عـليـه،
" شـمـس الأصـــيـل "،
"حـيـرت قلـبي مـعاك"،
ونســرح بخـيالـنا بعـيدآمـع روعــة الانغام والكلمـات، او مـع روائع
الفنـان القـديـر " ســيـد دريـش "، وفـريد الأطـرش، وأسـمهـان.

كانت أيام لاتنـســي ولـعن الله الزمـن الـذي جـلـب لـمـصـر " الانفتاح "
السـاداتـي!!!!.

Quote: جميع أحداث هذه القصة والمواقف والاسماء : حقيقية !

.
.
وهذا هو اجمل مافى الموضوع واصل فى لياليك فقد اعجبتنى جداً





يا صديقى الذى يشبه "عمر الشريف"

"شــوبـش طـرزان"
__________________

قصـيـدة كـتبهـا الشـاعـرالكـبيـر أحـمـد فـؤاد نــجــم يسخـر فيها مـن
حــزب الســادات " الوطـنـي الـديـمقراطـي "،الـذي يشـبهـه بـطرزان البـطل الوهـمي فـي الافـلام الاميريكـيـة الـمـعـروفـة.

زغـروطــه للحـزب الــجـديـــد
حيـدمـراللـي فات ( 1 )
ويـحـطـم السـكـه الـحـديـــد
ويكـســرالـمـسـتشــفيات
ويـقـرب الـمـستبعـديـــن
ويبـعــد الـمـســـتقربات
ويـركـب الـمـسـتبـسـطيــن
ويـبسـط الـمـستـركـبات
ويـحــلل الـمسـتـربطـيـن
ويــربط الـمـسـتـحــللات
ويـعـجـز الـمـستقـدريـن
ويقــدر الـمـسـتعــجـزات
ويـــرجـــع الايام سـنيــن
ويعــيـدزمــان الـمـعجـزات
مـع ان طـرزان الوليـــــد
ذات نـفــس
طــرزان اللــي مــات!!!!!
_________________________________

( 1 )_ الـحـزب اللي فات: هـو حـزب ممـدوح ســالـم،وكـان حـزب الاغلبيـة الـحاكـم حـتـي اعــلان حـزب السادات، فانتـقل اعضـــاء الـحـزب القديـم
الـي الـحـزب الـجـديـد!!!!.

Tilal, please check your messenger

Best wishes

Adil

شكراً يا رجاء يل صديقة الكتابة ،
إن شاء الله القعدة تكون عجبتك ..
ولا مشيتي ؟؟

عزيزي معتصم ، قبل السنوات الخمس التي ذكرتها
كنت في القاهرة أتنسم العبير ..
غادرت السودان في 1996 ، معتقداً أن الله سيفتحها
علي !

طلال ، لك الود

ح أبدأ من حيث أنهيت كلامك لمعتصم (غادرت السودان في 1996 ، معتقداً أن الله سيفتحها
علي !) ، يا سيدي إنت ربنا فتح عليك فتح كبير... صاح ؟، أعتقد أنك بلورت نفسك بتلك الرحلة ، الفتح..

محمد صالح في السودان ، دي معلومة مهمة جداً : وده مدخلي لبلاط حزب بلاطة العظيم... مثقف ذي محمد صالح عنده أهمية محورية ، أنه منظم ثقافي ، تتبلور حوله الافكار ، وتتحول لأفعال ..
إسكندرية : مدينة مذهلة ؛ قال لي عم عثمان ( عثمان محمود ) : أوعك تتورط في حبها ، لكن ( قد سبق السيف العذل ، وقد تورطت قبل أن أصلها ، تورطن منذ " السمان والخريف "..) ، لن أتكلم عنها الآن ، فأوان كلامي عنها لم يئن بعد ، أعتقها داخلي – يا طلال ، فقط أتمنى قدلة حافي حالق في شارع النبي دانيال وزيارة قصيرة "لبقالة المحبة "...

شبقتنا ، يا طلال للحياة ، مرة أخرى..
وشغفتنا للكتابة ، فأكتب هذا الجمال الشغوف، فشغفك معدي ...

- في بوست آخر شفت ليك صورة مع عم تجاني ، يا سلام ، الزول ده من خامة نادرة وجميلة ، الحب ليهو والميدان تتأهب للصدور ومعانقة الناس علنيا من جديد ؛ أها دي قضية أنا ما مستعد أتخلى عنها على بلاطة ..

( كان عندنا ليلة كل أسبوع إسمها الفاير نايت /Fire night ،
بنجيب قيها أقفاص الحمام الفاضية والخشب المنثور هنا وهناك
قبالة الساحل ونقعد على البحر ونولع النار في كوم الخشب ولا
أجعص هنود حمر !
على ضوء النار دي كنا بنتبادل الحكاوي ونتجاذب خيوط السهر ،
ونغني ، ومرات لمن ربنا يكرمنا وراسنا يلف نقوم نرقص .. )

يا طلال : لو حيين بنتلاقا .. ونعمل Fire night عظيمة ، ونحكي .. ويا ريت محمد صالح كمان .. وربنا ح يكرمنا ، بس سيسي سيسي..

على أي حال : ( هذي مش غنية .. هذي بس تحية )

ولك ودي
إيهاب إدريس

بتكتب زي ما بتصور ياعفيف: جميل وبديع ومدهش.. بتكتب جميل زيك.