الخرطوم زمان

الخرطوم زمان
الناس القدام و البحبو القديم!!!!!!!
مين فاكر الخرطوم ايام زمان.
اقصد زمان..... زمان...... قبل الشكل الجديد يعني في السبعينات كده...
ياريت لو يكون في واحد موثق يعني عنده صور او اي وثائق عن المرحلة ديك.....
كانت المحطة الوسطى هي المركز واظنها لازالت بس كانت هي فعلا المركز كل الناس تصل هنا وبعدين يشوفوا وجهتهم الحقيقة. البصات نهايتها هناك والتكس كمان هناك موقفه.
كانت هناك في قهوة فخمة كل الناس تتلما فيها شاي وقهوة وكما ناس بتلعب كتشينة ومن حولك بتاعين الورنيش بصناديقهم وعليها الفريد (اغطية زجاج الببسي) يكشكسوا عليها للفت الانظار...
قريب من الموقع بنك باركليز وبعدين الموقع اصبح مكاتب التذاكر للخطوط الجوية السودانية ...
الناس كانوا مجموعات كل مجموعة عندها موقع محدد في القهوة . الجرسونات يعرفوا طلبات الناس حتى من غير طلب مجرد وصولهم هو يحضر الطلبات شوية لقدام سودان بك شوب . ومن الخلف بقالة الخرطوم دي كانت حاجة فريدة ما ليها شبيه في الخرطوم صاحبها رايق وزوقه تمام ...
مشوار كداري لغاية سينما كلوزيوم وافلام الكاوبوي والناس الرايقة كانت تفضل سينما غرب (دي كانت جنب استاد الخرطوم) شوية راقية افلام هادية وبعيدة عن الرصاص الضرب المجرمين.

شارع النيل بكل عظمته كان فاضي الا من شوية ناس بتاعين حب في عدد محصور من الكنبات على ضفاف النيل العظيم ... حديقة الحيوانات....
دا طبعا قبل متحف السودان وقبل الحدائق وحتى قبل فندق الهلتون.
بابا كوستا وسانت جيمس واكروبولس..
فول ابو العباس والعشرة الكرام...
فندق الواحة وحوض السباحة الجلسة الجميلة حولة

كانت الخرطوم من بدري يعمها الظلام وكل المحلات تقفل...
السوق تقريبا من حوالي الساعة 8 كده يكون خلاص بدأ يظلم وشوية وكل شئ يعمه الظلام وما تلقى فيه الا الحرس وشوية بوليس ....
وتبقى السنمات كلزيوم وغرب الىالدور الثاني تقريبا الي الساعة 11 يكون خلاص شطبوا ..
بعد كدة لو عايزة تكس. الله اعلم ممكن تلقى واحد و غالبا تضرب الكداري.

ليه مش عارف عالق بذهني ان الخرطوم كانت من بعد الظهر الي المساء حوالي الساعة 6 بتكون مقفلة تماما لا سوق ولا محلات كله قافل تبدأ تصحى بعد المغرب الي حوالي الساعة عشرة كده كل يقفل تاني تبقى سينما كلزيوم الي نهاية الدور الثاني حوالي 11 كدة ويعم السكون كل الخرطوم....
نكته:
يوم بعد الدور الثاني في سينما غرب راجعين بحري طبعا كداري للمحطة الوسطى ووين ووين لما لقينا تكسي. طبعا المنطقة كلها خلاء.. المهم التكس تحرك من المحطة الوسطي ناقص يعني ما مكمل 5 ركاب. (اكيد صاحب التكس من ناس بحري) لما وصلنا قريب كبري بحري العتيق لقى اتنين واقفين على الطريق طبعا فرح راح قريب منهم ضرب بوري اشروا ليه ما طالعين بحري طبعا غضب الراجل وراح سابي ليهم وقال دير منتظر القطر ولا شنو؟؟؟

ليه مش عارف عالق بذهني ان الخرطوم كانت من بعد الظهر الي المساء حوالي الساعة 6 بتكون مقفلة تماما لا سوق ولا محلات كله قافل تبدأ تصحى بعد المغرب الي حوالي الساعة عشرة كده كل يقفل تاني تبقى سينما كلزيوم الي نهاية الدور الثاني حوالي 11 كدة ويعم السكون كل الخرطوم....
نكته:
يوم بعد الدور الثاني في سينما غرب راجعين بحري طبعا كداري للمحطة الوسطى ووين ووين لما لقينا تكسي. طبعا المنطقة كلها خلاء.. المهم التكس تحرك من المحطة الوسطي ناقص يعني ما مكمل 5 ركاب. (اكيد صاحب التكس من ناس بحري) لما وصلنا قريب كبري بحري العتيق لقى اتنين واقفين على الطريق طبعا فرح راح قريب منهم ضرب بوري اشروا ليه ما طالعين بحري طبعا غضب الراجل وراح سابي ليهم وقال دير منتظر القطر ولا شنو؟؟؟

سوق الخضار كان في الجهة الجنوبية الغربية وجنوبه على طول موقف الباصات. والغريبة ان فيه موقع معروف باسم سوق الحرامية والاسم ينطبق حقيقةعليه اي انه فعلا سوق حرامية. وكان عينك عينك تقدر تمشي هناك تشتري الحاجات المسروقة. وكان بكل بساطة تسأل من اي حاجة اي واحد يقول ليك تلقاها في سوق الحرامية. وكان في قلب السوق مكان خاص للقفف المصنوعة من السعف يعني تقدر تدخل السوق من غير اي حاجة وتطلع شايل قفة مليانه وطلبعا كان في ناس بيعيشوا من حمل القفة ويمشوا وراك لما تشتري كل حاجاتك وكمال لم تخرج من السوق وهم وراك

Quote: ليه مش عارف عالق بذهني ان الخرطوم كانت من بعد الظهر الي المساء حوالي الساعة 6 بتكون مقفلة تماما لا سوق ولا محلات كله قافل تبدأ تصحى بعد المغرب الي حوالي الساعة عشرة كده كل يقفل تاني تبقى سينما كلزيوم الي نهاية الدور الثاني حوالي 11 كدة ويعم السكون كل الخرطوم.... نكته: يوم بعد الدور الثاني في سينما غرب راجعين بحري طبعا كداري للمحطة الوسطى ووين ووين لما لقينا تكسي. طبعا المنطقة كلها خلاء.. المهم التكس تحرك من المحطة الوسطي ناقص يعني ما مكمل 5 ركاب. (اكيد صاحب التكس من ناس بحري) لما وصلنا قريب كبري بحري العتيق لقى اتنين واقفين على الطريق طبعا فرح راح قريب منهم ضرب بوري اشروا ليه ما طالعين بحري طبعا غضب الراجل وراح سابي ليهم وقال دير منتظر القطر ولا شنو؟؟؟

التكاسي بالعدد كان اسمها طراحه..موش؟؟

بوست جميل وسأرجع ببعص الحديت عن السينمات واشياء أخري..

الخرطوم الجميله من يستطيع أن يقاوم رغبة الحديث عنها؟؟

رمضان كريم..

مكتبة بانوراما كانت فاتحة

على القصر الجمهوري

المعروضات المصريية

البنك العثماني

ميرزا في المحطة الوسطى

مقابل ليهو مطعم الاستقلال

سلوى بوتيك

مجلس الشعب وراء سوق الخضار

مكتبة كابرال في ركن ميدان الامم المتحدة

وفاتح على باتا.

مطعم الفوال في الركن الجنوبي لسوق الخضار

مدرسة الكمبوني خرطوم

سينما كلزيوم

مشعال

االزقاق .......ابوصليب

وراء السوق العربي

نادي العمال

دكان ابو العباس و العشرة الكرام

مطعم سلوى

سانت جيمس..........مرقص

وانت ماشي على جهة جامعة القاهرة

مدرسة ابتدائية كدا جنب الجامع الكبير

شركة النضارات الاهلية

تامينات النيل الازرق في شارع الجمهورية

نادي الخريجين جنب سينما كلزيوم

متحف كدا هناك جنب مستشفى العيون على شارع النيل قبل

كبري بحري و انت جاي من جهة القصر


حلاق المقص الذهبي جنب نجيلة نمرة اتنين

دار الحزب الشيوعي في الشارع القبل سوق نمرة 2

مدرسة الراعي الصالح في نمرة 2 جنب شارع 1

مقابر فاروق جنبها كوريا



حديقة عبود موخرآ حديقة القرشي

محطة الغالي

محطة الزهرة

كوافير برادايس

فندق باريس بتاع كيشو

الساحة الشعبية

محطة التعاون

محطة حجازي

نواصل

السبعينيات الميلادية في الخرطوم هل تذكرون هذه الاماكن(((توجد صور))))


اتمنى ان يكون بوستك تكملة لما بدأ به الزميل ALazhary2

الله يسعدك اخي فيصل زكرتني المكتبات
المكتبة البريطانية شارع الجامعة كانت عامرة ومطلوب منك فقط صورة يعملوا ليك بطاقة وتقدر يستلف الى 5 كتب لمدة اسبوعين.
كانت الجلسة فيها حاجة متعة حديقة بالخارج وبوفيه.. كان فيها امين مكتبه اسمة صديق.
المكتبه الروسية في شارع الجمهورية. ناس كانت رايقة وكل شي متوفر.

Quote: مطعم سلوى

احسن فول بالسمنة من يد عمك خالد

بابو الصغير في الممر الضيق

والله ايام يا فيصل و حسن

خلف سوق الخضار كان سوق العناقريب. وطبعاما ننسى النسوان بتاعين الدكوه والكسرة.
بس السوق العربي ما قادر اتخيله. بس فاكر كان في واحد بتاع ليمون كارب واعتقد جنبه كان واحد بتاع عماري (صعود) رقم واحد الغريبة الواحد رغم انه مابتاع صعود لكن متذكر المحل دا....
وطبعا مدارس كمبوني ولا زالت موجودة بل اصبحت المدارس الوحيدة في كل المنطقة دي من كبري بحري الى كبري امدرمان وجنوبا الي السكة حديد التي كانت....خلف

عزيزي عمرو عبدون لكم التحية والاجلال
انا لما بديت البوست دا كنت عارف انو في ناس زيك كدة ممكن القي عندهم وثائق. اكيد في شباب كثير ما شافوا التاريخ دا.
خصوصا السفارة الامريكية في نص البلد اعتقد اصبحت البنك الاسلامي.
والبارات ذكرتني الانادي خلف السوق العربي وبالقرب من كلية الطب والصيدلة وطلب الداخلية كان يروح للجامعة ويرجعوا عبر بيت الدعارة. وطبعا زقاق ابو صليب مجاور لمستشفي الخرطوم والاغرب من كدة ان القصر الجمهوري على بعد 2 كيلو تقريبا.....
لك التحية على هذه الصور.....
أخوك حسن

عزيزي عبدو لك التحية مجددا فقد اثرت فينا شواجن الايام الجميلة. بس بحق ابلغ الشواجن هنا هي الزعيم الازهري. ليه؟؟؟؟؟؟
أولا الاستقلال كيف فجاء كده يعلن الازهري الاستقلال الكامل وليس الوحدة مع مصر. رغم ان حزبه كان قائم على الاتحاد ؟؟؟؟؟
والعظمة (بفتح العين) مؤتمر اللالات الثلاث وكيف استطاع جمع الزعيم جمال عبدالناصر و الملك فيصل يرحمهم الله جميعا.
علما ان نجاح القمة كان مربوط بمشاركتهما معا وقد حصل ولم يكن ذلك ليتم لغير الازهري...
قطار الغرب (دا موضوع مختلف) بس واحد جاب السيرة في الرابط. وعندما اتذكرة رائعة ود المكي اتذكر البيت البقول :
هذي ليست احدى مدن السودان
من اين لها هذا الطول التياه.
علماان الطول عند وصول قطار الغرب للخرطوم كان يتمثل في مبنى كلية الطب ومستشفي الخرطوم (طابقين فقط في ذلك الوقت)...
فعلا كان طولا يتاها بالمقارنة بالغرب ومحطات القطار خلال الرحلة التحية للجميع فردا فردا....

الأخ الـحـبيب الـحـبوب،
حسن عبدالله،

تـحـية الود والأعـزاز،
والتـحـية لـموضـوعـك الشـيق.

عاوز اقول لك ياحـسـن،... لو انت الخـرطوم بتاعت سـنوات السبعينيات بتقول علـيها (خـرطوم زمان)... امال خـرطومنا بتاعـت سـنوات الاربعينيات تقول عـليها شـنو!!? ... خـرطوم سـيـدنا أدم!!!

جاييـك رواقـة، واوريك خـرطوم (الـحاكم العام ) مـش خـرطوم الـمشـيـر نـميـري ولا خـلفه الـمشـيـر 2!!!

لك مودتي.

أخي بكري
هو اصلا الهدف اننا نطلع المخفي. كثيرين مثلك نايمين على كنوز تهم كل السودان ونحنا هدفنا نطلعها للتاريخ وعشان شباب اليوم يروا كيف كان الامس.
رجاء شوقتنا نشوف ونسمع منك الدرر....
ولك الود

زمـان كنا بنقول اما ركـب (التـرام ) ولا اتشـبعـط فيه، ده ماخـرطـومـي!!!

* - والـماشاف تـمثال كتشـنـر ولاغـردون،
* - ولاالسـواقي جـنـب الـمقرن،
* - ولاركـب الـحـنطور،
* - ولاطـلع مع ناس السـيـرة ( مرقت عـصـر ياعـديلة ...عريسـنا قطع جـرائـد النـخـل الليلة زينة )،
* - ولاشـرب من خـمارة ( خـريسـتو ) الاغـريقي،

.... ده اقليـمي ساكت!!!

جـاييـك.....

يا بكري شحتفت روحنا...
طلعت روحنا...
عذبتنا ...
والانتظار مهلك عطفك لا تهلكنا.....
رجاء اسرع وانثر الدرر. ورينا المابنعرفه....
اكيد انت فعلا من ناس سيدنا نوح وامكن قبل كده..
هيا اسمعنا وشجينا...

لك الود حتى ترضى

بالله يا حسن امسك لينا قوي في استاذ بكري الصايغ .. وخلونا نقرا ونستمتع

اماكن لها ايقاع

فندق اكروبول .

الغار ,

اتيني .

فندق الواحة .

فندق الشرق .

فندق دولي .

الكتكات .

رمونا .

فندق الزهراء .

اكسليسيور .

ايه الحكاية يا أخ قرشي ما خليت جحر بتاع شربه الا وزرته....
بس الاروع هو فندق الواحد...
واكربول اذا كان معاك حنان .
والجي بي بعد نص الليل.
ولو مع اصحابك يبقى احسن مكان هو المقرن او خليها على بلاطة وريح نفسك على كنبة خشب على شارع النيل..

اخواني في واحد ذكرني قهوة الزيبق دي كان كانت في السوق العربي وليست بعيدة من مسجد الخرطوم. كانت دائما مليانة ناس وفيها طبعا غير الشاي والقهوة كان فيها شيشة والغريبة كان الناس تلعب فيها قمار ....
اعتقد محطة السكة حديد برضة كان فيها بار بس البار الاشهر كان في مطار الخرطوم الدولي ودا لو كل المحلات قفلت هو فاتح للصباح.

خوفي اخونا الضاغ يطلع اشاعة ....
نحنا انتظرنا وروحنا طلعت وهو لسة لا ورانا الخرطوم في الاربعينات ولا الخمسينات..
بس نعمل ايه لازم ننتظرا وال..... انتظره للاخر.
بس طبعا ممكن نلقي واحد تاني يكلمنا عن الانجليز مثلا او على الاقل عن تمثالي غردون وكتشنر في قلب الخرطوم. انا بس فاكر يوم سفرهم انتظرناهم في محطة السكة حديد بحري.. عشان ما حد يقول ان من قوم نوح.

كان في صالة بتاعت رقص في الخرطوم بعد مسجد فاروق.. اكيد الان صارت سوق او محل خردة .
اكيد اخون القرشي ممكن يجيب خبرها...
مكتبة الشيوعين ما فاكر اسمها شنو كانت مقابلة القصر الجمهوري وكانت صغير جدا بس مليانة وكانت اسعارة مغرية جدا...
وليس بعيد منها المعرض المصري دا كان تحفة كل شي متوفر فيه وبارخص الاسعار

Quote: المكتبه الروسية في شارع الجمهورية

الأخ حسن ..

أكيد قصدك المركز الثقافي السوفيتي .....

Quote: كان في صالة بتاعت رقص في الخرطوم بعد مسجد فاروق

دي يا حبيب صالة غردون، ومعروفة إختصاراً ال G.M.H

عزيزي ابو العزائم
شكرا للمداخلة
المكتب الروسية او المكتب الثقافي الروسي كان في بداية شارع الجمهورية او البلديةوانت جاي من بحري يكون في شمالك . وكان حاجة ضحمة كبيرة ومليان كتب ليه حديثة كبير جدا بالمساء يكون الزوار عالمين جو فيها.
بس المكتب المقابلة القصر الجمهوري كانت مكتبة خاصة(بتاعت واحد) بس أغلب كتبها عن الاشتراكية. وللمعلومية كانت رخيصة جدا. ومليان لدرجة بعض الكتب تكون على الارض .....
ايو اقصد صالة غردون واعتقد كانت موجودة لوقت قريب بس اصبحت شنو ما عارف؟؟؟؟؟؟

بعيد من الموضوع دا...
كان في واحد مخبول كان الناس بسموه الجنرال.. راجل كبير في السن لابس ملابس عسكرية برتبة عالية وكان غالبا متواجد في الصينة المقابلة سانت جميس (الان تقاطع من غير صينية) وكان دائما يصيح باسم الرئيس عبود بطريقة فيها استفزاز فاكر من هتافاته حاجة زي صلحت الدنيا ياعبود، جبت المنقه ياعبود

Quote: كان في صالة بتاعت رقص في الخرطوم بعد مسجد فاروق.. اكيد الان صارت سوق او محل خردة . اكيد اخون القرشي ممكن يجيب خبرها...

طيب يا حسن... واحد مواليد السبعينات ممكن يجيب خبرها برضو
(:"


دى صالة الجى أم أتش
G M H

صالة غوردون للموسيقى

وهى مرقص وبار
ترتادها الجماعات والأفراد

ويمكن قضاء ليلة ساهرة على أنغام الموسيقى الغربية والشرقية



يقولون عنها... تزورها الفرق العالمية فى برنامج تبادل متواصل طيلة العام



ونذكرها حتى أواخر الثمانينيات

تقع فى تقاطع الحرية مع الجمهورية وشارع سنكات( المؤدى من صينية جامع فاروق إلأى ميدان الأمم المتحدة وأظنه عباس سابقاً)

أزيلت وحل محلها عمارة من أربعة طوابق تسمى برج الحرية

بها العديد من الشركات الكبرى مثل توكيل سونى اليابانية وتعرف كذلك بين الناس بعمارة شركة سونى

بها مكاتب هندسية ومحاماة ومحلات أدوات كهربائية والتى يشتهر بها شارع الحرية هذا الزمان، حين هجرته الأسر المستوطنة كالشوام والأغريق والأرمن ونحوهم ممن أسسوا الخرطوم الحديثة وبرعوا فى تطويرها ثقافيا وإقتصاديا وشكلوا جزء كبيراً من تاريخها الحديث





أها.. أولاد السبعينات بعرفوا ولا لأ..؟؟


تحية لكل من يعيد بعضا مما فقدته الذاكرة




وعيد سعيد والجاى أحلى وسدوانا فوووووق





____
الغريب ده كان برنامجى فى العيد... مخطط أكتب عن الخرطوم،، يمكن عشان كده عينى وقعت على البوست لأول مرة

عذرا للتأخير












***
على هامش الحديث، عمنا بكرى كيفنك..؟

تسجيل حضور ومتابعة لهذا البوست الجميل والحديث عن روعة الخرطوم زمان

واصلوا هذا الابداع

أهلا بكل الناس الحلوين ....
بس عايزين نسمع منكم اهو الصائغ بر بوعده واكيد ارسل حاجة سمينة وحتفرحنا وتعيد الماضي الجميل.. لوما عندكم صور كلام بيسد بس اكتبوا حاجة اي خاجة حتى لو استفسرات امكن نلقى واحد يرد....
لكم التحية

صـورة نادرة:
----------
الأمـبـرطور هـيلاسـيلاسـي فـي الـخـرطوم 1940 - للتنسـيق مع الـحاكم البـريطاني فـي الخـرطوم ترتيبات الـهـجـوم عـلي الـجـيش الايـطالـي الـمحـتل اثيـوبيا.

http://www.sudaneseonline.com/ar/printer_20786.shtml

Copyright by sudaneseonline.com

صورة من بقايا بيوت الاشلاك بالخرطوم التى اذالتها معتمدية الخرطوم لاقامة ابراج تصوير (بكرى اببكر ).

http://www.sudaneseonline.com/ar/article_17343.shtml

لقـد قـصـدت من انزال هـذه الـصـورة لاقـول ان الـحكومة الـحالية تسـعي لازالة كل الـمعالـم القـديـمة للـخرطوم القـديـم... وايـضآ مـحـو اي معـمار تاريـخـي أثري لتقيـم علي انقاضـه الـمشاريع الاسـتثـمارية.

هـذه الصـور توضـح ازالة (القشـلاق ) وهـي كـلمة تركية تعـنـي الـمعسكر ولايبـقي من تاريـخ الـمكان الاهـذه الصـورة!!

عمنا بكرى


صورة الإشلاك
او القشلاق كما يسمونه

تجسيد لما ذكرت عن محو معالم الخرطوم القديمة

بل نقول أـيضا لعلها جزء من حملة إبعاد الثكنات والالنزل ومساكن القوات النظامية عن وسط الخرطوم


وتكملها فكرة الإستثمار الرخيص الذى يقتلع من أفواهننا لإطعام المشبوهين وغاسلى الأموال




انا إتربيت فى إشلاق البوليس
دبيتنا فى شارع البلدية تقاطع على عبد اللطيف



اتنبى الاشلاق عشان يكون مسكن لصف الضباط فى كل وحدات البوليس

وشماله بيت الكومندان ونائبه( وهو يعادل مرتبة مدير شرطة ولاية الخرطوم ونائبه فى زماننا هذا)


وهو المنزل الذى يسمى حاتليا بيت الضيافة( الشرطة) ويقع فى شارع على عبد اللطيف شمال مبنى جريدة الصحافة سابقا وشمال غرب دار التوزيع والتى تشغلها شركة خاصة حاليا تسمى شركة الشراع ، كما أنه يقابل ( بيت العمدة كرم الله تقريبا)
وجنوبا من مبانى الحركة(قسم الكمبيوتر )



الأشلاق..بيوت متراصة من الطوب الاحمر بها غرفتين ومنافعهم وحوش وبرندة وضيفة الزوار
تربن فيه مئات الأسر من رجال البوليس

تواترت الاسر على إبقاء هذا المنزل لهم، فكانوا يدخلون أحد ابناهم للشرطة ليبقى المنزل إمتدادا كما تمتد الأسرة


منه خرجت نوابغ فى العلوم .. والتخصصات.. والمهن



بيوت الاشلاق
رفدت للسودان ابناء بررة


لم يتنكروا يوما .... لبيت الاشلاق





ولكن تنكر لهم الزمن

صورة لجامعة الخرطوم (المكتبة).
----------------------------

http://www.sudaneseonline.com/ar/article_17405.shtml

الـمصـدر: سودانيزاونلاين.كوم Sudaneseonline.com
بتاريـخ: Feb 18, 2008, 09:33

هـذه الـمكتبة تـضـم مـجـموعة كبيـرة من الكتبالنادرة التـي جـلبـها الـحاكم العام السـيـر سـتيوارت سـيـمس الذي حـكم السـودان في الفتـرة من عام 1934 الـي عام 1940.

مكتبة جامعة الخرطوم:
--------------------------

إسم المؤسسة جامعة الخرطوم
إسم المكتبة مكتبة جامعة الخرطوم
نوع المكتبة مكتبات اكاديمية
العنوان الخرطوم; جامعة الخرطوم; ص.ب 321; رمز بريدى 1115; هاتف 770022
تاريخ الإنشاء 1945
أمين المكتبة مني محجوب محمد احمد
عدد العاملين 30 اختصاصي؛; 70 غير اختصاصين
مجموعات المكتبة 500000 كتاب; 3340دوريات; أخرى
التخصص الموضوعى كل التخصصات
ساعات العمل 8:30 - 8:30
عدد المقاعد 2000

تـعرضـت هـذه الـمكتبة سـتة مرات لـحـرائق مـتعـمدة من طـلاب مـتظاهرين ينتـمون لـجـامعة الـخرطوم!!!

ياخوانا معقول تتكلموا عن كل تلك المعالم وما تذكروا (أتينيه) ونادي الخريجين وفندق الليدو .... المكتب الثقافي البريطاني و.. و.. و

__
عندي ملاحظة حارقاني من زمن: وهي نحن زمان لما نجي ماشين منطقة وسط الخرطوم بما فيها منطقة الأسواق (وأنا من أبناء بري)، بنقول ماشين الخرطوم، طبعا الأسواق هي السوق العربي والسوق الأفرنجي. ما لاحظته إنو هسة الناس بيركبوا المواصلات ويقولوا (عربي)، سواء كان الكلام عن المحطة الوسطى أو أبو جنزير أو ميدان الأمم المتحدة أو السوق الأفرنجي أو السوق العربي .... كلها أصبح إسمها (عربي)

ابو العزائم
لك التحية عزيزي وشكرا للمداخلة التي آمل ان تكون عامرة بالمعلومات القديمة وحتى الجديدة مطلوبة خصوصا الواحد بقي في السودان زي الاجنبي محل يروح ما يلقى حاجة يعرفها والاسواء من كدة يدور الخرطوم كلها ما يلقى واحد يعرفه كانه في بلد اجنبي...
تصور اتيني ما قادة اجمع واعرفها وين كانت . بس نادي الخريجين اعتقد انه كان في شارع القصر وامكن جنب المكتبة القبطية ارجو التصحيح

تغيير أسماء شوارع الخرطوم بعد استقلال السودان.
---------------------------------------------

- كوِّنت لجنة برئاسة بروفيسور يوسف فضل وآخرين من الشخصيات الضالعة في تاريخ السودان والتوثيق لأن يقوموا بإعادة النظر في أسماء الشوارع ومسمياتها والإحتفاظ بالأسماء ذات الصلة التاريخية والوطنية والثقافية والأدبية أسماء تكون بديلة وأخرى جديدة تعرف بها الشوارع والحدائق والميادين العامة تطلق اسماؤهم عليها.

وانعقدت اللجنة وتوصّلت إلى كثير من الأسماء تطلق على الميادين والشوارع ما تعرف به ولم تغفل الشوارع الفرعية والجانبية، وكان اختيارها في الأسماء يستند على معلومات دقيقة وخلفية تاريخية لكل إسم يختار لتصبح له دلالته وفق معايير التقديم والتذكير والتخليد يكون أسماء في حياتنا.

كانت الخرطوم تحد بعدد تسعة شوارع طولية تبدأ من الشرق إلى الغرب أي من تحت كوبري النيل الأزرق حتى شارع علي عبداللطيف أو ما بعده وبعضها تسده بعض الحواجز كجامع الخرطوم الكبير وميدان الأمم المتحدة الذي كان يُسمى بميدان عباس ثم ميدان عبدالمنعم محمد وسُميّ الآن بالقبة الخضراء.

1/ الشوارع الطولية هي:
-----------------------
1- شارع كتشنر ويبدأ من تحت كوبري النيل الأزرق ماراً إلى كوبري النيل الأبيض حيث كان نصب كتشنر وهو على صهوة جواد شمال وزارة المالية وسمّته اللجنة شارع النيل.

2- شارع غردون ويبدأ من نفق بري القديم متجهاً غرباً حتى شارع الغابة في حي المقرن عند جامع الشهيد حالياً وكان نصب غردون باشا متوسطاً ميدان الشهداء حالياً وأمام بوابة القصر الجنوبية وهو على ظهر جمل سمّته اللجنة شارع الجامعة.
3
- شارع ونجت ما بين شارع الجامعة حالياً وشارع الجمهورية من الشرق إلى الغرب حتى مبنى البرلمان القديم «مجلس تشريعي الخرطوم حالياً» سمّته اللجنة شارع البرلمان.

4- شارع السردار ويبدأ من نفق بري الجديد شرقاً ومتجه غرباً حتى شارع علي عبداللطيف سمّته اللجنة شارع الجمهورية.
5
- شارع الزبير باشا من شارع الطابية شرقاً متجهاً غرباً حتى شارع الطيار مراد حيث سوق الخضار القديم مسمّى شارع الزبير باشا من زمن الإستعمار أبقته اللجنة على إسمه القديم.

6- شارع الطابية كان يبدأ من نفق بري القديم محازياً خط السكة الحديد والقيادة العامة متجهاً غرباً حتى شارع نيوبولد حيث يعكسه من الغرب شارع الغابة، اطلقت اللجنة إسم شارع الجيش على شارع الطابية الذي سُمي الآن بشارع الإمام المهدي شرق.. أما شارع الغابة الذي يعكس شارع الجيش فيبدأ من حيث الآن جامع الشهيد بالمقرن وشرقه إدارة البساتين أي المشتل وشرقه أيضاً بنك السودان الجديد والمباني التي شُيّدت هناك، ويمر أيضاً بحي المقرن والمعهد الفني سابقاً واستاد الخرطوم حتى صينية كوبري الحرية.
7
- شارع البلدية سمّته اللجنة وهو يتجه من شمال بوابة القيادة العامة الشمالية القديمة متجهاً غرباً حتى ميدان أبوجنزير ويعكسه جامع الخرطوم الكبير بالناحية الغربية.

8- شارع السيّد عبدالرحمن المهدي ويبدأ من أمام بوابة القيادة العامة الغربية الحالية وجنوب بنك أم درمان الوطني فرع القوات المسلحة متجهاً غرباً ماراً بفندق المريديان وإلى حي المقرن.

9- شارع الاسبتالية وكان يبدأ من المصرف العربي حيث شيّدت العمارات التي كانت خصصت كميز للأطباء وتم تحويلها إلى رئاسة مجلس الوزراء ووزارة التعليم العالي، كان شارع الاسبتالية يمر من هناك حتى شارع الطيار زلفو من الناحية الغربية على ما أظن وأبقته اللجنة على إسمه القديم.

2/ الشوارع العرضية تبدأ من الشمال إلى الجنوب وهي:
--------------------------------------------------
1- شارع عبيد حاج الأمين يبدأ من شارع الجامعة شمالاً متجهاً جنوباً حتى شارع الجيش.

2- الشارع من النيل شمالاً ماراً شرق وزارة الصحة متجهاً جنوباً حتى شارع الجيش ماراً بالسفارة السوفيتية ومنزل السفير البريطاني والمحكمة الدستورية وشركة أرياب ما كان مسمى هذا الشارع وسمي الآن بشارع عثمان دقنة يصحح الاسم إلى عبد الفضيل ألماظ إذا رأت اللجنة الجديدة ذلك.

3- شارع من شارع النيل ما بين وزارة الطاقة ونادي الضباط القديم ماراً جنوباً حتى شارع الجيش سُمي بشارع عبد الله النور الآن.

4- شارع من شارع البلدية إلى شارع الجيش سُمي بشارع المؤتمر.
5
- شارع من شارع الجامعة ماراً جنوباً إلى شارع الجيش ماراً غرب دار الوثائق ووزارة العمل سُمي بشارع علي دينار حالياً.
6
- شارع من شارع النيل ماراً جنوباً إلى ما بعد خط السكة الحديد كان يسمى بشارع فندق البرت زمن الاستعمار وترماي الدوران سمّته اللجنة بشارع المك نمر.

7- شارع عطبرة ويبدأ من تقاطع المك نمر مع شارع الجامعة ماراً جنوباً إلى شارع البلدية عند البنك العقاري السوداني.

8- شارع فيكتوريا ويبدأ من أمام بوابة القصر الجنوبية متجهاً جنوباً حتى شارع الجيش سمّته اللجنة بشارع القصر.

9- شارع كرومر ويبدأ من شارع النيل ماراً غرب المالية والبوستة إلى الجامع الكبير سمّته اللجنة شارع الطيّار مراد.
10
- شارع من شارع النيل ماراً غرب الداخلية متجهاً جنوباً حتى ميدان الأمم المتحدة سمّته اللجنة شارع الطيّار جميل.
11- شارع من شارع النيل شمالاً وحتى شارع الجيش جنوباً ماراً بوزارة العدل وغرب البرلمان القديم والبنك التجاري فرع الجمهورية وغرب ميدان الأمم المتحدة سمّته اللجنة شارع الطيّار زلفو.

12- شارع من شارع النيل كان يُسمّى بشارع نيوبولد سُميّ بشارع الحرية.

13- شارع من شارع النيل ماراً جنوباً حتى شارع الغابة ماراً برئاسة المرور وجامعة النيلين والسفارة الأمريكية وعمارة الفيحاء إلى شارع الطابية سُميّ الشارع بإسم علي عبداللطيف.

14- هناك شارع من الجنوب إلى الشمال حتى شارع البلدية ماراً بمستشفى فيلاجلدا أو الراهبات كان يُسمّى بشارع مطبعة ماركو كوديل وهي المطبعة التي كانت تقوم بطباعة مستندات الحكومة والمستندات الرسمية زمن الاستعمار وسميت بمطبعة التمدن بعد خروج الإستعمار وحوِّل الشارع إلى إسم شارع مطبعة التمدن.

هذه هي كل الشوارع التي كانت مسماة من قبل الاستقلال وأُعيدت تسميتها في عهد حكومة الفريق عبود..أما إعادة التسمية الحالية فحدّث ولا حرج فتوزيع الشوارع وتسميتها أشبه بسكن عشوائي في أطراف العاصمة ولابدّ من إعادة النظر في كل التسميات الحالية.ما نرجوه أن تكون اللجنة الجديدة والمكلّفة تجمع رموزاً يكونون ملمين بالخرطوم العاصمة سابقاً وليست الخرطوم الولاية حالياً ليختاروا الرموز الوطنية الأصلية التي قامت الخرطوم أو السودان على اسمائهم في الحرب أو السلم أو الحياة العامة وكانوا أسماء في حياتنا وهم معروفون تاريخياً وارتبطت اسماؤهم ببطولات أو أعمال بارزة تطلق أسماؤهم على شوارع الخرطوم وميادينها وحدائقها ولا مجال لمن استشهدوا في الجنوب أو خلافه، وليس ذلك عدم تقدير لدورهم لأن عددهم كبير «ولا حد أحسن من حد» وإذا وزعناهم على الأحياء لا تكفيهم ونكتفي أن نطلق اسماؤهم على أماكن عامة كجامع الشهيد وميدان الشهداء وحديقة الشهداء أو أي شيء يضم إسم كل الشهداء.

------------------------------------------------------------

( هـذا الـموضـوع لـيس من عـنـدي وانـما نشـر بـجـريدة سـودانية وفقـدت الاسـم وتاريـخ النشـر)

عزيزي الصائغ
شكرا للمعلومات القيمة دي وشكلك ما لقيتها في جريدة ولا حاجة انت اكيد كنت من ضمن اللجنة العملت الاسماء دي وهي على كل حالة تحفة ومهمة للتوثيق. بس دا ما بحلك من خرطوم الاربعينات .. كل الناس وانا أولهم في انتظار تحقيق وعدك او لنقل تلميحك بنشر وثائق عن خرطوم الاربعينات ونحنا ما عندنا مانع حتى لو صور عن خرطوم الستينات او حتي السبعينان بس انت ارسل حاجة تعيدالذكريات الحلوة...
لك الود

عزيزي الصائغ
لك التحية والشكر والتقدير على الصور بس لسه عندك احسن كده.
في انتظار المزيد وكل الناس متوقعة مداخلاتك.
ولك التحية

الاخ حسن عبدالله
شكرا لهذا البوست النوستالجيك



التعديل لإنزال صورة بالخطأ

مكتبة الشيوعين ما فاكر اسمها شنو كانت مقابلة القصر الجمهوري وكانت صغير جدا بس مليانة وكانت اسعارة مغرية جدا...
وليس بعيد منها المعرض المصري دا كان تحفة كل شي متوفر فيه وبارخص الاسعار


مكتبة بانوراما


بتاعت ناس عمر عبدالعزيز





مطعم مرحبا في سوق العمارات

وكان في بار بتاع واحد اغريقي وراء مستشفى الخرطوم

وبارتاني وراء هناك في السوق العربي ما عارف وين كدا

جنب فندق مروي


عيادة كمال يني مقار فيالغالي

بابا كوستا

عبدو تادرس

المولد في ميدان عبدالمنعم حاليآ نادي الاسرة لو ما اتغير

محطة كترينا

ابوحمامة

محطة علي جمعة

محمد سكينة

اسماعيل دوانة

السينما المتجولة

الدباغة

سوق السجانة و دكاكين اليمنين

حريان و سكج بكج

الرمة و الحراس

عمل اثاثات من البلي فريت

ابو كجمجم

سبع حجار

درداق الحفر

الفات الفات

الشليل وينو

شبير شد

بلي قزاز

بلي فريت

الطبالي . طبلية

شخطك بختك

بخت الطوخي

منك و من البلية

تكس ماراجع

جوز ما يخسر

راقد

الضراب

غوريلا

جله

نظر

و منقو زمبيري

أخي فيصل
انت تحفة
بس الواحد يجلس معاك ساعة المغرب قعدت جبنه في منقدوجبنه جديدة قاعدة عليها واحده من النسوان الفاهمات وتنزل الحكاوي بتاعت زمان... دي قصة ما تخلص واكيد متعه للطيش.
ذكرتني في القولد التقيت بالصديق عشان نصل لناس منقو زمبيري. هل ذكرت البلي ان فاكره كويس وفاكر انو ناس كانوا بيكسبوا منه اكل عيشهم وبعضهم الان عاملين مطوعين الله يسبتهم .
لك الود والذكريات الجميلة ما تخلص والسودان جميل جميل جميل ونحن نحبه
نعم اسمها بانوراما بس كانت شيوعية ولا انا مفوت؟؟؟؟؟...

فندق الأكروبول

الفندق الكبير ( سابقا )
القراند هوليدي فيلا ( حاليا )

معاوية لك التحية
سعيد بالمداخلات والصور. بس قول لي بتارع الكمرة دا منعوه يدخل حديقة الحيوانات ولا تكون دي حركات اصاحب القطع الاثرية... عايزة تصبح ثروة وبعدين تعرضها للبيع؟؟؟؟؟ نحن مشترين ارسل الصور الباقية ولك التحية.
أغرب حاجة لسة ما في واحد جاب سيرة كرة القدم؟؟؟؟ مش حاج عجيبة؟؟؟؟ بس طبعا السبب ان الخرطوم كانت ولازالت فقيرة في الكورة.
كان في الخرطوم نادي النيل وكان نادية في شمال السوق العربي مش بعيد من نادي العمال. اشهر لعيبته يوسف مرحوم (المايسترو) وابراهيم كبير ودا لعب في مصر وكان خير ممثل للكرة السودانية. وفاكر انه كان في احدى المباراة احسن لاعب رغم انه دخل هدف في مرماه.
الاهلي اعتقد نادية كان في الخرطوم 2 وابرز لاعبية نجم الدين دقل وحبو من اولا بحري أكيد في غلط في الاسماء دي واحد ينقذنا يا شباب.
بس كانت كرة السلة حكر على الخرطوم النوادي الكبرى كانت المكتبة القبطية نادي الارمن والنادي الكاثوليكو وديل كان فيهم بعض الاخوة من الاقليم الجنوني اولاد فوثديو ومنيان. والنادي السوداني الوحيد كان نادي العمال وكان في قلب الخرطوم والاشهر كان المرحوم عباس خوجلي ومصطفى المصري و.... واحد يلحقني العقل خلاص وقف..

(الاهلي اعتقد نادية كان في الخرطوم 2 وابرز لاعبية نجم الدين دقل وحبو من اولا بحري أكيد في غلط في الاسماء دي واحد ينقذنا يا شباب).
-----------------------------------------

النادي الأهـلي بالـخرطوم طوال سـنوات الخمسينيات والستينيات كان عـبارة بيـت عادي به 3 غـرف كبيـرة وحـوش واسـع وحـمام مـتواضـع للاعبييـن وتواليت سـيفون ( حـفرة ) والنادي ده كان مـوجـود فـي شاع الأسـتباليـة.

النادي كان مـوجـود وسـط حـي الـبغاء، كـل البيوت جـيـران النادي كانت بيوت عاهـرات من اليـميـن والشـمال وقـدام النادي. والنادي ظـل بوضـعه الـماساوي ده زمـن طويل انتقل بـعـده الـي الخـرطوم جـنوب. اشـهر الاسـماء فـي النادي ده:
1 - سـميـر مـحـمد علي - حارس الـمرمي، ترك النادي الأهـلي واشـتـرك مع النادي الـمصـري الزمالك ،
2 - اللاعـب ابراهـيـم كبيـر،
3 - اللاعـب دقلولة،
4 - اللاعـب صـفيـحـة.

ظل النادي وطـوال مـدة طويلة الصـديق الصـدوق لنادي الـهلال الامـدرماني،... ونادي النيل الخـرطومي التؤام لفريق الـمريـخ الامـدرماني.

حـصـل مرة فـي عام 1962 وقام فريق الـهلال الامـدرماني و (فتـح) للاهـلي عشان الاهـلي ماينـزل للدرجـة التانية.... وبالفعل نزل فريق التـحـرير للتانية وبقي الاهـلي في الاولـي.

عاوز اشـرح لك مـعنـي كلمة (فتـح) في لغة كرة القـدم وتعـنـي ان ينـهزم الهلال امام الاهـلي ويفتـح له شـباكه ويـخرج الاهـلي وحاصـل علي نقطتيـن تؤهـله البقاء بالاولـي!!!

لك مودتي.

شكرا عزيزي الصايغ على المعلومات الاكيدة.
انا عارف نفسي كيشه في حكاية اخبار الرياضة رغم ان كنت رياضي غير معروف.
شكرا للمعلومات وطبعاباخدها صحيحة الي ان يصلني خلاف ذلك بس واضح انها من مصدر اكيد.
وفى الرياضة وكرة السلة نسيت اقول في بحري كان نادي الكوكب هو الرائد واسم الكابتن الرشيد معروف في بحري وطلبعا المكتبة القبطية كان قمة في كرة السلة بحري وفاروق رحمي كان تقريبا هو المسلم الوحيد بينهم ومثل السودان ولعلب للمريخ لما دخولت اندية كرة القدم في هذا المجال...
وهنا لابد من ذكر رائدة كرة السلة النسائية.. مريم النجومي وابوها جعلي محمد النجومي واعتقدانه كان عضو في البرلمان. لاذكر لها في الحياة العامة للاسف.

الخرطوم زمان
غابة الصنت اشتهرت في الايام الاخيرة كموقع سياحي. مش عارف الحصل فيها شنو مرة يقولوا اشتراها امير ومرة استثمراها عبدالمتعافي او باعها وبلعها.
هي تقع في مكان فعلا ممكن يصبح سياحي. بس كانت ملتقى للعشقين بالنهار وبالليل ماوي للمجرمين والحرامية.
تجي يوم الجمعة او ايام الاعياد بالصباح تلقاها مليانه عوائل ومحبين اشكال واللوان. وهي عبارة عن غابة اكثر اشجارة النيم.
لو حد عارف عنها اخبار ينورنا خصوصا انو عندنانية نعيد الايام الجميلة طبعا قصد الغراميات النهارية وليست الاجرامية الليلية.
من الذكريات الجميلة كان طلبة المعهد الفني (جامعة السودان حاليا) الذين يسكنون الداخليات يعانوا من الحرامية الذي يهاجموهم ليلا ويقال ان الطلبه كانوا لما يعرفوا حامية دخلوا عليهم يهاجموهم ويطردهم ويتابعوهم الي الغابة فاذا بالحرامية يكروا عليهم ويعيدهم للداخليات مرة اخرى.

دا مافي زمنا

الصورة دي بتكون في زمن قريبي بكري الصايغ

أهلا اخونا وليم
أكيد انت بتاع كرة السلة.. مش ممكن يكون منك في اتنين...
نحنا تجرأنا ودخلنا في تخصصك (كرة السلة في ذلك الزمن الجميل) . رجاء اتحفنا بإنارة عن السلة ايام زمان. وطبعا كان السودان قمة فيها وامكن العربي الثانين كانوا لسة ما عرفوا حاجة اسمهاكرة سلة..
عايزين مسح عام عنها وخصوصا الروائع. الفرق، المنافسات الابطال والمشاركات العربية والعالمية ووين هم الان الكبار في هذا المجال .

عزيزي وليم
اسف جدا انا اعتقد انك وليم اندرية بتاع الباسكت وكان عنده فرقة بتاعت جاز .. وبس واحد اخونا ذكرني ان وليم دا مات..
اهلا بيك في البوست ونتوقع نسمع منك عن الخرطوم الجميلة على نسق حنتوب الجميلة.

أهـم الـمعالـم فـي الـخـرطوم بعـد
انتـهاء الحـرب العالـمية الثانيـة 1945:
-------------------------------------

1 - مـنتـزة الـمقرن،
2 - الفنـدق الكبيـر،
3 - حـديقـة الـحـيوانات،
4 - اللاسـكا،
5 - شـارع النيل،
6 - تـمثال كتشـنـر،
7 - تـمثال غـردون،
8 - مـعـمل إسـتاك،
9 - النـصـب التـذكاري،
10 - مـسـتشـفي الـخرطوم،
11 - مسـتشفي العيون،
12 - نادي العـمال،
13 - نادي الخـرجـييـن،
14 - النادي الـمصـري،
15 - غـوردون مـيوزيك هـول،
16 - البـرتـش كـلوب،
17 - عـماة جـلاتلي هـانكي وشـركاه،
18 - عـمارة كـونـوميـخالـوس،
19 - قـهوة اتـنـي،
20 - قـهوة الفوال،
21 - قـهوة الزئـبق،
22 - قـهوة قـهـوتـي،
23 - بنك باركليـز دي سـي او،
24 - بنك الكـريدي ليونيـه،
25 - البنك الـمصـري،
26 - مـرهـج،
27 - سـينما النيل الأزرق،
28 - سـينما الوطنية الخـرطوم غـرب،
29 - سـينما كـوليـزيوم،
30 - ميـدان عـبـدالـمنعـم،
31 - قـهوة عـبـده دهـب،
32 - مـدرسـة كـمبوني،
33 - مـدرسـة سـستـر سـكول،
34 - مـدرسـة اليـونتـي،
35 - مـدرسـة الراهـبات،
36 - بيـوت الـحـرس،
37 - قشـلاق البوليـس،
38 - بيـوت القـطاطـي،
39 - السكـة حـديـد،
40 - الـمديرية،
41 - الجامع الكبيـر ،
42 - الـجامع العتيـق،
43 - الكنيسـة الانـجـيلية،
44 - الكنيسـة القبطيـة،
45 - الكاتـدرائيـة،
46 - كنيسـة القصـر،
47 - الـمكتبة البـريطانية،
48 - عـمارة ابو العـلاء،
49 - مـصـلحـة البـريد والبـرق،
50 - الـماسـونية،
51 - مـصـلحـة الأحـصـاء،
52 - القيادة العامـة،
53 - سـراي الـمهـدي،
54 - مبنـي وزارة الـمالية،
55 - مـبنـي وزارة الزراعـة،
56 - مبنـي وزارة التـربية والتعليـم،
57 - مبنـي وزارة العـدل،
58 - كليـة غـدون التـذكارية،
59 - سـوق الزنك،
60 - سوق الـخضـار،
60 - سـوق الدواجـن،
61 - سـوق القـفف والعناقريب،
62 - السـوق العـربي،
63 - السـوق الافـرنـجي،
64 - فنـدق فكتوريا،
65 - شـركة سـنـجـر،
66 - مـقابر فاروق،
67 - ميـدان ابوجـنـزير،
68 - ميـدان الـمحطة الـوسـطي،
69 - مـيدان الـمولـد،
70 - مـدرسـة الدايات،
71 - مبنـي وزارة الداخلية،
72 - سـوق الصـاغـة،
73 - سـوق العـطور،
74 - طاحـونة مـقار،
75 - كـوبري النيل الابيـض،
76 - كـوبري النيل الأزرق،
77 - القصـر.

عزيزي الصائغ
ياصائغ انت عايز تجننا ولا شنو الصور مش عايز تنزلها والاسماء تخلخبطنا فيها وتحيرنا معاك شنو الجاب طاحونة مقار للخرطوم دي في بحري و سرايا المهدي دي في امدرمان يعنى عشان انت صائغ وقروشك كتيرة تكتب اي كلام وما حد يكلمك؟؟؟؟؟
انا عايز صورة تمثال غردون على البعير وكتشنر على الحصان. واكيد واحد صور عملية ترحيلهم من السودان. لو ممكن صور مطار الخرطوم ومطعمة الفنان الكان فتح طول الليل والنهار وحديقة لمقرن ايام عصام ساكس....

العـملات التـي كانت سـائـدة فـي سـنوات الاربـعينيات:
:----------------------------------------------------

العـملات الـمعـدنيـة:
-------------------
1 - الـمليـم الأحـمر،
2 - التـعريفة،
3 - القـرش،
4 - الفـريـنـي،
5 - الـخـمسة قروش ،
6 - العشـرة قروش،
7 - العشـرين قرش،

العملات الـورقية:
-----------------
8 - الـخـمسـة وعشـرين قرش ( عـملة ورقيـة )
9 - الـخـمسـين قرش ( عـملة ورقيـة )،
10 - الـجـنيه الـمصـري ( عـملة ورقيـة )،
11 - الخـمسة جـنيهات، ( عـملة ورقية )،
12 - العشـرة جـنيهات، ( عـملة ورقية).

كل هـذه العـملات الـمعدنية والورقية هـي عـملات مـصـرية عليـها صـورة الـملك فاروق (ملك مـصـر والسـودان). كانت هناك ايضـآ الـي جانب العملة الـمصـرية الجـنيـه الاسـتـرلينـي.

الأخ حسن عبدالله

Quote: تصور اتيني ما قادة اجمع واعرفها وين كانت . بس نادي الخريجين اعتقد انه كان في شارع القصر وامكن جنب المكتبة القبطية ارجو التصحيح

أتيني يا سيدي إذا أخدت تقاطع شارعي القصر والجمهورية، وفي الجانب الشمالي الشرقي سواء من شارع القصر أو شارع الجمهورية، ودخلت بأي من المداخل، تلاقي ساحة كبيرة وفي ركنها كافتريا أتينيه، والساحة دي زمان كان عليها طاولات وكراسي لرواد المقهي في منظر بديع. وإذا نظرت في الجهة الشرقية للساحة حتلاقي مدخل يودي تحت الأرض (underground)، عبارة عن موقف للسيارات. لحدي وقت قريب الكافتريا كانت موجودة (مع الفارق)، وموقف السيارات تحت الأرض على ما أظن لا زال موجود، وأذكر إنو في خريف 1988 غرق عدد من العربيات داخل الموقف.

أما نادي الخريجين، فهو فعلاً على شارع القصر في الجهة الشمالية لسينما كلوزيوم، وحالياً قام مكانه بنك ما أذكر اسمه. بس يا حبيب الموقع ده ما ليهو أي علاقة بالمكتبة القبطية، ودي أقرب لصالة غردون.

تحياتي

شكرا ابو العزائم
الواحد كبر والعقل بقى ما بجمع. كيف بس الواحد ينسى موقع اتيني دا اول مكان الواحد يشرب قهوة بالحليب كان فيها. دي طبعا هسة بسموها كبتشيينو. اذا ما كنت كمان في دي مفوت. اظن في الجهة الشرقية جلسة بتاعت ناس الشري ابو بت وابو كديس وخلافة.... في الكونر على شارع الجمهورية كانت اجزخانة ابو نخلة ولا انا غلطان؟؟؟؟؟

الايام الجميلة في الخرطوم الجميلة
ترليلي اللي ياعبود
جبت المنقة ياعبود
ياعبود
ياعبود
مين يفكرنا بالجنرال دا

كتب الاخ حسن عبدالله

الايام الجميلة في الخرطوم الجميلة
ترليلي اللي ياعبود
جبت المنقة ياعبود
ياعبود
ياعبود
مين يفكرنا بالجنرال دا


















الزول بتذكرو رهاب رهاب

كان مخيط هدومو من علم السودان

و بيلف في الاحياء مرددآ

ترليلي اللي ياعبود

نحن وراءك يا عبود

و الذي منه

في زمن الوفرة، ولما كانت كل الشركات العالمية ممثلة في الخرطوم، كان في مقولة شهيرة، يقولوا الحاجة دي (المعدوم في سوق الخرطوم) كناية عن الشئ النادر الوجود، ولأن سوق الخرطوم كان به كل ما تحتاجه

أستاذنا بكري الصايغ ..

Quote: اللاسـكا

قد تكون هذه هفوة كيبورد، وأظن المقصود (الأسكلا)، وهي مكان مرسى السفن، ومنها جاءت أغنية (من الأسكلا وحلاّ .. قام من البلد ولاّ .. دمعي لي التياب بلَّ)

{http://farm3.static.flickr.com/2107/2140923099_62bbf944ab.jpg?v=0}



http://www.flickr.com/photos/podcinema/tags/1976/

قبل الكلام عـن الخـرطوم زمان، اسـمحوا لي اولآ ان أسأل هـل كلمة خرطوم والتـي اختـرناها اسـمآ لعاصـمتنا تعـنـي وماتعـودنا علي سـماعه ان من يراها من العلو يـجـدها منطقة تشـبه ( خـرطوم الفيل ) وعلي هـذا الاساس اصـبـحت عاصـمتنا وبناء علي هـذه الـمقولة تسـمي بالخـرطوم!!?

لـماذا صـدقنا هـذه الـمقولة وأمنا بـها ورفضـنا الاربع نظـريات الاخـري التـي هـي ايـضآ تؤكـد صـحـة ادعاءتـها!!?

هـناك نـظرية تقول ان كلمة خـرطوم مشـتقة من مقـطعيـن ( خـور )و(تـوم).

واصـل الـحكاية كـما تقول الرواية: ان سـكان جـزيرة (تـوتي) كانوا يعبـرون النيل بـمراكبـهم للجـهة الاخـري من الـجـزيرة ( الخـرطوم حاليآ )
ويقومون بزراعـة التوم بـمزارعـهم الواسـعة التـي كانت مـمتدة من (الـمقرن) شـمالآ وحـتـي منـطقة (الشـجـرة) فـي ذلك الزمان. كان هـناك (خـور) مائي كبيـر يشـق مزارع التـوم، ولـما كانت الخـرطوم فـي ذاك الوقت بلا اسـم مـحـدد فقـد اطلق سـكان توتي عليهـا اسـم ( خـور التوم ) وتـحـولت فيـما بعـد بالتدريـج الي (خورتوم) واخـيـرآ (خـرطوم)!!!

هـذا الكلام اعـلاه ليـس من عـنـدي ولامن بنات افكاري. ولكن مـثبت ومكتوب بالـكتاب الثـميـن والقيـم الذي ألفـه البـروفسـيـر الراحـل ابوسـليـم والذي شـغل لفتـرة طويلة منصـب مـدير دار الوثائقلاالـمركزية بالخـرطوم وجاء كتابه القيـم والفريـد تـحـت أسـم ( تاريـخ الخـرطوم ) .

وكنت عـلي عـلاقة بالراحـل بـحكم عـملي بوزارة الاعـلام في سـنوات السبعبنيات وكانت دار الوثائق الـمركزية تابعـة لوزارة الاعـلام وقـد قال لـي وقتـها ان رسالة الدكتوراة الـخاصـة به كانت بعنوان (تاريخ الخـلاطوم).

ونـواصـل باقي النـظريات....

الأخ حسن ..
لك التحايا القلبية الحارة.. الخرطوم هي من أمل المدن الراقية آنذاك. تعرف كانت الخرطوم رغم صغر حجمها آنذاك..الا أنها تعتبر مدينة كبيرة .. كنا نري البلدية تقوم بغسل الشاررع كل ليلة.. وكنا نري الشوارع نظيفة... وكنا نري الخدمات من توصيل الحليب للمنازل وكرة التنس الأرضي في وقت كانت الدول العربية أو التى حولنا .. لا تعرف معنى الحياة الراقية الا من خلال الأفلام.. كانت لدينا مفاهيم جميلة للحياة..
ذكرتم لعبة كرة السلة..ونسيتم أعظم لاعبيها.. خميس جلدقون..أحد خميس..وليم أندريا أعظ لاعب ومغنى في نفس الوقت ..والذي قتل في حوادث المرتزقة عام 1976م.. برصاص جندي أحمق كان بامكانه التفتيش بطريقة كريمة.. ولكنه تصدي للغزال الأسمر .. وضربه بمجموعة من الرشاش الذي في يده..
كانت الساحة الشعبية .. وميدان الليق.. وكانت هناك أسرة هاشم حسن أحمد.. لاعب النيل وأخوته الكرام .. الذي اتحفوا الخرطوم والكرة السودانية.. وكان شرف أحمد موسي.. وحودة الخطير..
ولي عودة

عزيزي صلاح مرحب بيك حللت اهلا ونزلت سهلا.
صحيح تكلمنا عن كرة السلة ولم نذكر اندريا وكثيرين غيره.
بس كانت المفاجئة واحد اسمة وليم اندريا عمل مداخلة ولم يتحدث عن السلة.. راجعت عقلي شوية وتذكرة ان وليم مات مقتولا. اسفي علية كان كفر ووتر رغم ان الكفر والوتر في القول المشهور مقصود بيه كرة القدم والعود...
يبدو انك من عشاق السلة أخبرنا عن الايام الحلوة وقمة كرة السلة ونادي لارمن والاغريق والاقباط و اخيرا العمال والبحرية والكوكب. ثم موخر الهلال والمريخ لما بقت لعبة بتجيب فلوس...
اهلا بيك وبكل الاحباب من الخرطوم وغيرها سوى كان الاسم من خرطوم الفيل او توم نوس توتي حسب قول اخر. وأهل توتي الطف واظرف ناس واحسن من كتب شعر وعزف وتر وغني للحب ...
ولكم الحب كلة

اعمامنا وعماتنا
ناس الخرطوم زمان
انشاء الله طيبين
..
قبل فترة الزميل ALazhary2 عمل بوست مشابه بتاع صور للخرطوم في السبعينات
وفيه تفاصيل وقصص جميلة ارجو ان يسلعدكم علي التذكر
علي اللينك ده السبعينيات الميلادية في الخرطوم هل تذكرون هذه الاماكن(((توجد صور))))

..
عمنا حسن
مستمتعين بالسرد الجميل ده وخاصة اننا ما حضرنا اي حاجة من الكلام البتقول فيهو

يا سلام عليك..يا وليم اندريا.. وكمان من الحلة الجديدة.. يا خي الحلة الجديدة شهدت طفولتى وصباي وشبابي الجميل جدا الذي استمتعت به أيما استمتاع.. حتى قمت بدفنه في الرياض.. فمنذ أن هاجرت عام 1983م وأنا قد فقدت الجمال في كل شيء..
كرة السلة كانت أروع عندما كان يلعب بها هؤلاء العمالقة.. واذكر أول دورة عربية في االكويت فاز بها السودان .. وكان النجم الذي سطع في سماء الكويت ..هو..وليم أندريا .. ذلك الفنان الذي شهدته يلعب ويغنى..وقد برز في كلا الجانبين.. وكان أشهر لاعب كرة سلة في السودان.. نسأل الله له الرحمة والمغفرة..بقدر ما قدم من عمل..
أحمد خميس أعرفه شخصيا وهو رجل مهذب جدا.. ويحمل في طياته قلب رجل كبير.. وجدته في السعودية قبل أكثر من عشر سنين ولا أعرف مكانه الآن..
من أماكن الخرطوم الجميلة .. نادي التنس الأرضي وبه ..ابناء طلعت فريد.. والمدرب القدير الأخ العزيز محمد عوض فرج..
في الخرطوم مدرسة هاشم عابدون أقدم وأشهر مدرسة ابتدائية.. وفي الخرطوم القوز ونادي القوز العريق.ز والقوز وناديها .. شهدت هوان أهلها بالنادي فسقط ووقع من الدرجة الأولي الي مصاف الفرق المنسية.. وأصبح لا يقوى علي المنافسة..
وفي الخرطوم منزل الفنان حسن سليمان الهاوي.. وعذبة أنت كالطفولة ..ولا ننسي محمد عبدالصادق سانتو الخرطوم.. ولا أنسي كذلك الأخوة الأعزاء.. ابوطالب.. سليمان.. عبدالمنعم.. محمد حامد.. وتلك القلعة .. نادي الدفاع..وكيف ننسي من الخرطوم أشهر لاعب وسط في المريخ ..الأخ جعفر رمضان..
من لاعبي الادي الأهلي أيام الستينيات..الأخ العزيز والكبير.. عبدالله سنكيت.. وهناك أكبر لاعب مشهور في الحلة الجديدة.. عمنا ابواسكندر..ولم لا نذهب شمالا لنجد منزل أخونا هاشم اسحاق وأخوه الكبير..مهداوي..
من ذكريات تلك الفترة الجميلة .. الديم وبيوت (الهناي داك).. الديم من أشهر أحياء الخرطوم.. وفيه ظهرت قمم كروية وفنية . ومجالات أخري..
سانت جيمس ذلك الديسكو الذي كان يعمل حتى الفجر.. وسينما النيلين..وهي التى تلم كل من أراد تقضية وقت ن(هوادة).. فبعض داخليه لهم مآب أخري غير المشاهدة..
سينما الخرطوم غرب كانت نوعا ما هادئة ولكن أكثر منها هدوءا.. النيل الأزرق.. فقد عرفت بينما أعل الفن والمزاج الراقي..
الذكريات صادقة وجميلة..
تحياتي..

جميع الاعزاء
نأسف للغياب بسبب مشاغل ما كان ممكن الواحد يتحاشاها....
ما عارف اكتب عن ايه ولا ايه.
بس خطر ببالي زيارة الزعيم عبدالناصر بعد النكسة للخرطوم واللقاء العظيم مع الملك فيصل الله يرحم الجميع.
قال جمال عن اللقاء الحاشد (لم ارى قائد مهزم يستقبل بمثل هذه الحفاوة).

بعد كده ولمحبي الشعر والحبيبين زيارة نزار قباني للخرطوم وفي لقاء في نادي طلاب جامعة الخرطوم قال القول المشهور :
لم أكن اعتقد انو في ناس في الدنيا تحب الشعر بالشكل دا.
نعم كان لقاء عجيب الناس كانت طالعة في الشجر علي سطح مبنى النادي..

محمد خليل اسماعيل
كنت عايز اقول اهلا بيك بس خجلت من نفسي دا انت السودان (فاكر الغنية المشهور انا السودان) من وين جبت الصور دي؟؟؟؟؟ لازم الواحد يدخل الموقع دا اكيد فيه درر ودرر ... نرجو المزيد...
لكم جميع كل الحب....
سامي الازهري:
لك التحية والمودة بس كما فكرتني بالازهري 2 (دا اذا ماكانت الشخصية واحدة) وين الانسان دا ازهري2اكيد عنده الكثير. وانا جبت حكاية مؤتمر الخرطوم عشان استفز مشاعر الناس واطلع المتخبي ....
التحية للجميع.....

وليم اندرية
لك التحية
دا انا قلت وليم دا طلع لينا من وين (اقصد صاحب الاسم) الله يرحمه. ياخ والله ذركرتنا اسماء عظيمة...
اكيد موجود منهم كثير... تعال نفتش عليهم عشان يذكرونا الايام الجميلة...
بس عقدنا بحكاية باك يمين ويسار ولاعب وسط ... كأنك لخبطه السلة بالقدم وشب بيجيب اليد للرجل...
فاروق رحمي زميل دراسة ولعبنا سوا في الاملاك كرة قدم وفي المكتبة بحري سلة بس من زمن ما عارف هو وين... اخر مرة كان في السعودية. بس وين هو الان ؟؟؟؟؟

كرة القدم:
كاس افريقيا في السودان
مين يكلمنا عن الحدث المهم دا.
كاس افريقيا بين الخرطوم ومدني - المواقع الصعبه. والكاس.......
واسماء ابطال السودان .
واسماء الافارقة المميزين في القمة الافريقية الكروية.....

أهل الخرطوم أهل السودان الحبيب
لكم جميعا التحية
الخرطوم الثانوية. جامعة الخرطوم . المعهد الفني (جامعة السودان حاليا) الكلية التقنية. دا كان التعليم في قلب الخرطوم كيف صار الان. ومين المبرزين في المرافق أعلاه. ماذا قال العالم عن التعليم العالي في السودان وماذا فعل علماء السودان من اجل رفع اسم السودان...
لكم التحية

صباحكم خير
لسه ما سمعنا واحد يكلمنا عن الغابة اقصد غابة الصنت ليه سموها الصنت وهي كلها نيم. مين فاكر جلسات الشباب في الغابة.
ناس عاملين رحلة فيها غناء ورقيص.
وناس عاملين حنان. جلسات اتنين اتنين. واحد خشن والثاني ناعم وما تسمع ليهم صوت وبس همس وبعيدين من الناس ما عايزين حد يسمع صوتهم ولا حد يشوفهم خوفا من الحسد...

مقهى في الخرطوم 1951

فيصل الفنان
انا عارف انك عندك كنوز داسيها مننا... ياخ افتح السحارة دي وارسلينا (حلوة السحارةدي مش كده) للمعلومية اغلب القهاوي كانت كدة. هي مكان الناس بتقضي فيه الوقت. منها ونسة وشاي وقهوة وحلبه. كتشينة و.... والصغار يلعبوا طاب ،ام القحف والبلي وبالليل حرينا. شليل وينو.
وطبعا في ناس جلسة القهاوي دي بعملوها شغل يدخلوا من وراه قروشايو اقاصد قمار. او يكفي انهم لو سبب للخروج من البيت. . وكنا ذكرنا قهوة الزيبق وقهوة سمارة في بحري... تاني شنو يا فيصل؟؟؟؟؟

أخي وليم
صادفتني صورة لوليم اندرية في مكان في المنبر دا أعتقد انت واضعها....
اذا دا صاح ياخ ما تشوف لينا صورة العمالقة الاخرين اولاد بوث ديو وكامل المجموعة سودانين وخواجات...
ولا تنسى المكتبة القبطية بحري.
ونادي العمال الخرطوم
والكوكب بحري
البحرية بحري.
اكيد عندك حاجات تفرح او ممكن تتحصل عليها.
بمناسبة الفن انا فاكر اني حضرت حفلة في فندق مريديان بالنجم العالمي جيمي كليف الكلام دا صحيح ولا انا تحلم؟؟؟؟؟؟

لسه ما سمعنا صوت ناس الخرطوم الثانوية القديمة والا الخرطوم الثانوية بنات.
وين ناس جامعة الخرطوم
وين ناس كرة القدم الخضروا كاس افريقيا وبطولة الخرطوم.
وقمة الخرطوم الشهير والات الثلاثة
ابطال السلة
وصور الخرطوم الجميلة
صورة للمقرن او حديقة الحيوانات
مطار الخرطوم
حديقة القرشي
نادي الاسرة

حديقة الحيوانات:
كان اهم برنامج في العيد (اي عيد) هو زيارة حديقة الحيوانات بالخرطوم. وطبعا كان ما تخلو في الاعياد من الحفلات اشكال واللوان.
وطبعا كل واحد لابس الجديد جزمة باتا وجلابية بيضاء وممكن عمة او حاف حالق زي ما قالوا شعراء الحقيبة.
كانت متعة ما بعدها متعة وطبعا بعد كدة تخلص باقي اليوم في حديقة المقرن وهاك يا غزل وشقاوة ممكن تصل الواحد يتجلى ويعمل فيها كيجاب وينزل البحر (اقصد النيل) ومن ضمن البرنامج ممكن تركب البنطول وتصل توتي وترجع..
مرة تانية توتي يجى اسمها وما نسمع صوت ناس توتي اكيد لانهم عايزين يكونوا لوحدهم ما ليهم دخل بالخرطوم.

نرجع بيكم لحتة سوق الخضار وموقف البصات فى شارع اتجاه واحد وانت جاى من الجامع تلقى موقف بصات بحرى وبعدها موقف برى ثم فى نهاية الشارع موقف امدرمان ومابين موقف برى وامدرمان مكاتب ناظر الموقف وتجمع السوافين والكماسره وكشك تجديد الابونيه واخر يوم للتجديد الخامس من كل شهر , تقطع ميدان الامم المتحده بالممر الضيق وتجد الباعه والفراشه على طول الممر لتلاقى يمينك دكان جسن صالح حاج خضر بتاع العجلات الرالى ثم ودملاح والشارع المؤدى الى موقف الشجره والقوز شمال الشارع مكتبة النهضه ومحلات حمدتو الحلوانى وده كله قصاد الجامع, نرجع للشارع الماشى فى التقاطع اليمينه تجد مطعم خيرات سلوى ولو مشيت طوالى يوديك لمواقف الشجره وبه محلات الاقمشه والعطور وعلى شمالك مكتبة سماره وقصادها ليمون عمك الواثق ليمون وشعير كارب كباية قزاز شوب شدة مابارده لمن يجيك صداع وبالمناسبه عمنا الواثق هو والد الفنان الجيلانى الواثق وبعده الشارع يمينك يوديك لقهوة الكوبانى وشمالك محلات الدهب وقصادها مدرسة الخرطوم الاهليه (الشيخ مصطفى الامين) الحسع بقت مافى وده عندى فيها كلام كتير بالصور, نهاية الشارع موقف بصات مدنى وبص الخواجه(المؤسسه) لمن الحجز كان بالتلفون قبل اسبوع من سفرك ثم تعبر لكمبونى
تعال تانى من سوق الخضار فى اتجاه الغرب وقبل تقاطع البرلمان مع الجمهوريه تلقى صينية غودرون ميوزيك هول وعلى يمينها من الجانب الاخر مخبز مونديال لصاحبه طلحة الياس وامامه مكتب تنظيم الخرطوم والكان منه تصدق الخرط والمبانى وكل شى ماشى بنظام ,ارجع لميدان ابو جنزيرشرقه شارع القصر تقاطع البلديه وقبب الاتراك و شماله المدرسة الابتدائيه الخرطوم شرق وقصادها لجهة الغرب مكاتب جريدة الايام وتدخل شويه وقبل ما تصل سوق الحراميه يلاقيك اشهر مغلق وهو مخازن بورسودان وجوار بار من الساعه خمسه تلاقيهم برشوا الواطه ويرصوا الكراسى امشى مع الشارع لجهة الشمال وعدى شارع الجمهوريه يلاقوك بنات البريد الساعة السادسه مارقين من الورديه محلات اسندكو واشهر ماركات القمصان سودان بوك شوب تطلع منها شرق تلقى يمينك مخازن الخرطوم العموميه ال KGS وقصادها وكالة جامبو للسفر والسياحه ثم مرطبات زكى وبعدها فى الناصية سلوى بوتيك وقصادها فى البرنده الخطوط البريطانية, والفرنسيه , وقصادهم من الشرق مبنى الخطوط السودانية الذى اصبح فيما بعد بنك فيصل هنا بقينا فى بداية شارع الجمهورية بعد المحطة الوسطى واجزخانة كمبال ثم الزقاق الفيه استديو محمدين وفى الجانب الاخر شركة سنجر.

وطبعا ناس بحرى وبرى بالذات لمن يطلعوا من الدور الثانى فى كلوزيوم ومواصلات مافى بدقوا الكدر بعد اشارات الاتحاد الاشتراكى بشارع الجمهورية وطبعا لا كان اشارات ولا حاجه تلقى شنالك دكان ناصيه لو ماعندو فول امشى قدان يلاثيك بالشمال فندق الشرق وبعده دكان ببتعشى عنده .

عزيزي حيدر
القومة ليك يا قمة التوثيق.
ياخي انت كنت وين لو كنا عارفنك كنا ضربنا لك اكباد الابل...
بأمانه خجلتنا لاننا كنا فاكرينا نفسنا متذكرين الخرطوم شبر شير وطلعنا اي كلام.
بس طبعا المشكلة هي الذاكرة ولما الواحد يلقى واحد زيك يقدر نفض الغبار وترجع الذاكرة. بس انت عرفت صورتها ما شاء الله تصوير فتغرافي.
بس دا ما بحلك من الصور الاتكلمت عنها. وانا مما بديت البوست دا وابحث عن الصور وبس نعمل شنو ما ناس ما بتعرف توثق اي شئ.

عارف يا حيدر انت ذكرتنا الخرطوم كاننا نراها...
واكيد الما كان عارفها يقدر يعرفها من وصفك دا.
نضرب ليك تعظيم سلام ونتوقع نشوف الصور....

Quote: بعد كده ولمحبي الشعر والحبيبين زيارة نزار قباني للخرطوم وفي لقاء في نادي طلاب جامعة الخرطوم قال القول المشهور : لم أكن اعتقد انو في ناس في الدنيا تحب الشعر بالشكل دا.

صراحة ما بتذكر زيارة نزار قباني كانت سنة كم بالضبط، لكن في الفترة ديك، وتحديداً سنة 67 و68 (ورغم صغر سني وقتها)، أذكر جيدا إنو كانت هناك زيارات تاريخية، منها زيارة الفنانة العظيمة ميريام ماكيبا، وأم كلثوم، وصباح، والفنانة فيكي بلين، بعدها "ويمكن في بداية السبعينات" كان في مجموعة منهم الفنان فهد بلاّن ...... كان في حركة فنية حقيقية.

ابوالعزائم....
لك التحية ...
يا حبيبي الذاكرة ليها احكام والعقل بتذكر الحاجات البحبها...
لو راجعت رسالتك تجد انك متذكر الفنانات وبس ذكرتك ضد كل ما هو ذكوري...
انا ما فاكر السنةبتاعت زيارة نزار (امكن 74-75) بس فاكر تمام الاحتفاء به كان ولا اروع. وحكاية الليلة الشعرية في نادي جامعة الخرطوم دي كاني شايفها الان (وانا برضة صغير زيك كدةبس كنت مشغول بقصائد الحب مش الحب نفسة.
للعلم نزار نفسة كان يفتخر بزيارة للسوادن ويذكر المنظر بتاع الناس (الشباب) طالعين على الشجر وعلى سقف نادي جامعة الخرطوم.....
كدي دور عن اصحابك ولو لقيت خبر او صور نحنا في الانتظار...
لكم الود

شنو يعني يا حيدر امين طلعتنا كياشا

اقول ليك حاجة تعال انت راكب البص

من حلتك حتى الخرطوم جوا و وصف لينا

البتشوفو او بالاحرى الشوفتو بطرفي الطريق

حتى تصل الخرطوم و انا بعمل نفس الفيلم وانا

جاي من حلتي و نتلاقى في الخرطوم ونمشي مع بعض

شارع شارع

عزيزي فيصل
أكيد انت ممكن تعملها وممكن كمان توصف الناس الفي الطريق واحد واحد. وشكل الشارع طبعا الشوارع في ذلك الزمن كانت نظيفة. اصحاب المحلات معروفين بالاسم واسماء الشغالين معاهم . حتى العربات المارة الواحد ممكن يعرف صاحبها ولو سائق واحد تاني ممكن تقبضة لانه بالتاكيد سارقها دا طبعا لو طلع واحد من اهل او اقارب صحبها...
والخرطوم جميلة بناسها وحتى من غيرهم....

Quote: شنو يعني يا حيدر امين طلعتنا كياشا

الاخوان فيصل وحسن والله ما كيشه ولا حاجه بس انا زول التاريخ وقف عندى مما يوم بديت الغربه وحسع الخرطوم ما بعرف فيها حاجه وامكن اروح فيها والشى البحير بناتى المولدات فى الغربه الان استقروا فى الخرطوم بدلونى على الشوارع والاماكن , والبوست ده بصراحه كنت مفكر اعمل حاجه مماثله وامس والحقيقه صباح اليوم الساعه 2 تقريبا بتوقيت مسقط عملت المداخله وعلى عجل ومن غير ترتيب بس يا فيصل والله فكره اوعدك اليوم اخدك فى رحله من البرارى الى ان تصل السوق بس اعمل حسابك ببص الشركه المخطط بالازرق( وبعطس كل شويه),,,, مش بص ابورجيله الاصفر

Quote: أغرب حاجة لسة ما في واحد جاب سيرة كرة القدم؟؟؟؟ مش حاج عجيبة؟؟؟؟ بس طبعا السبب ان الخرطوم كانت ولازالت فقيرة في الكورة. كان في الخرطوم نادي النيل وكان نادية في شمال السوق العربي مش بعيد من نادي العمال. اشهر لعيبته يوسف مرحوم (المايسترو) وابراهيم كبير ودا لعب في مصر وكان خير ممثل للكرة السودانية. وفاكر انه كان في احدى المباراة احسن لاعب رغم انه دخل هدف في مرماه.

ابراهيم كبير لعب لفريق الاهلى الخرطوم بعد فريق برى ومنها مشى لمصر ولعب لفريق الاهلى المصرى المباراه هى مبارة الاهلى المصرى واحد فرق غانا والاهلى مغلوب 1 صفر احرزه كبير فى مرماه مع انه كان احسن لاعب فى المباراه .

الاخ الصايغ اذا كنت بتقصد عبدالوهاب صفيحه فهو حارس مرمى المورده ,, ولا شنو

عزيزي حيدر
سعيدين نسمع منك مرة ثانية انت باين عليك موثق لكل شي وخصوصا الخرطوم.
اخونا فيصل عمل تحدي عايزك تقابلة وانت قبلت التحدي ونحن حانكون متفرجين ونصفق للفائز.

هدف ابراهيم كبير دا حقيقة فعلا كان احسن لاعب في المباراة وسجل هدف بالغلط في مرمى فريقة.طبعا مش مرماه زي ذكر سابقا..
وهنا اود ان اذكر قول لسيمان فارس قال(دا المصريين سموني السد العالي قبل ما يكون عندهم سد عالي)
ياهو دا السودان.

اها اخوكم جاء من حلفا جديد لنج

وسكنا جنب محطة كوريا جنب بيوت الحجر

(المنازل الشعبية) انا كنت صغير الوكت داك

بتذكر الناس كان بتترحل بالبرمالات حاجة ذي الحافلة

كدا لكن ما بذكر منها كتير فجاة كدا جيت لقيت نفسي

في مرحلة البصات و الفترة القبليها اتمحت

المهم بتركب البرمل دا من ساحة كدا وسط بيوت جنب محطة الغالي

يطلع بيك على الزلط و يروح لافي يمين لعند محطة الغالي

اها في محطة الغالي في دكان عمنا الغالي و في الفسحة الجنبو

مدرسة اولية و في الجانب التاني من الزلط على بعد 200 متر فندق

كيشو و امام الفندق نهاية ترب فاروق و بالمناسبة فندق كيشو دا

كانو بيعسكروا فيهو ناس الفريق القومي و كدا

نرجع تاني لبرملنا و نتحرك طبعآ الحركة شمال يعني الدركسون

في يمين السيارة . في محطة الغالي و انت ماشي على الخرطوم في يمينك

في حلاوني و تمشي شوية تلقى على يمينك جوا المدرسة الاميرية و شمالك

الدكتور كمال يني مقار و تمشي طويل حتى حديقة عبود او الدومات

هنا في الناصية كان في جزار و في التحتات كان ساكن ابراهومة لاعب المريخ

اها البص بلف يمين عند الدومات و تاني شمال يعني شمالك فى حديقة عبود

و حديقة عبود كان فيها تلفزيون عام. بعد داك البرمل بيمشي عديل في شمالك

بيوت الناس الطيبين محل ما بتفك الحيرة و دكان عمك الفكيو تمشي قدام

تلقى محطة كترينا وبيوت نمر 2 و بالجانب التاني البيىوت البتوديك ميدان

عبد المنعم. وانت ماشي بتلقى يمينك المطافي و مصلحة الغابات و لا حاجة

ما متذكرة و شمالك بيوت السكة حديد و تقوم تطلع كبري المسلمية وش كدا

لمن تنزل من الكبري يلاقيك مستشفى الخرطوم تروح لاف شمال شمالك ممطة السكة

حديد و يمينك المستشفى و قدامك الجندي المجهول اها بجنب الجندي المجهول

تلف يمين عشان تدخل شارع القصر جنوب. دخلت شارع القصر جنوب يميك المستشفى وشمالك معمل استاك وانت ماشى بتشو ف على يمينك معبد اليهود

و كلزيوم و نادي الخريجين و شمالك شويا لجوا نادي العمال وكمبوني

تاني م متذكر المحطة النهاية للبرملات

ونواصل

وانا صاحب البطل

عزيزي وليم
دا انت ركبت الترماج؟؟؟؟؟
وشفت ناس جلقون وفريق الارمن الكاثوليك؟؟؟
عايز اسأل دا قبل الاستقلال ولا بعده؟؟؟؟
انا غايتو اتذكر الترماج كنا تختلية غطاء الببسي عشان يسطحة ونقده ونعمل لية خيط ويصبح لعبة ...
سيبنا من الكلام دا وارسل صور الباسكت...
وخلي فيصل يونسنى ذي الحبوبات دا طبعا لو قدر يواصل وصف الرحلة لما يقابل حيدر.
الله يسعدكم والله اسعدتونا...

كتب صديقي وليم

Quote: فلكسواجن) يعني زي الهاي اس بس 12 راكب ويمكن اقله شويات في المواصفات والمقاعد ... ياخي ده ما بعرفه

ما بتعرفه يا كبير



صراحة كدا الترماج دا ما حضرتو

نادي دار الثقافة جوار وزارة التجارة من الناحية الجنوبية
مكتبة ابو الريش مقابل المسجد الكبير

بسم الله وانت بادى
اول حاجه اول ما نطلع من المدرسة ( الخرطوم الاهليه الوسطى ) او كما تعرف بمدرسة الشيخ مصطفى الامين وناظرها محمد حمزه عليهم رحمة الله , فى الغالب تكون مهمتنا الوحيده ان نجيب العيش ونحن راجعين والعبش عدة خيارات اما تلاقيه فى محطة البصات العيش الابيض المدور 5 بشلن وواحد زياده او عيش سيحه بالسمسم وتلاقى ود الجبل رابط المنديل فى راسو والطاولة فى العجله او تمشى مخبز مونديال للعيش التوست زى ما بقولوا ,وده كله فى اكياس انيقه من الورق المقوى كاكى اللون معمول خصيصا للعيش , وبعد كده البص اول ما اتحرك من الموقف بسوق الخضار متجه غربا الى تقاطع شارع السوق مع شارع البرلمان يلف شمال ليكون فى اتجاه الجنوب ال ان يصل الى تقاطع مبنى البنك الصناعى وشماله برندة ابوالعلا يلف مع البنك شمال وفى اتجاه الشرق ليكون ميدان الامم المتحده يساره وناس الودع وحلاقين تحت الشجر والفراشه وبتاعين المويه والكركدى اما فى اليمين بكون محلات المراكيب والاحذية برندة محلات اولاد المغربى ولى جوه شويه محلات عبد ه تادرس , البص ماشى وصلنا يمينك مرطبات الملتقى وبعدها دكان حسن صالح حاج خضر واخوه لبيع العجلات ثم دكان ود ملاح وبعد شارع ثم مكتبة النهضه لصاحبها المرحوم محمد ابوالريش , ثم بعده حلويات حمدتو صاحب احسن باسطه فى الزمن داك , وفى الصف بعد شوسة مقاهى ولجوه شويه كانت قهوة الزيبق الشهيره , وصل البص نهاية مربوع الجامع وميدان ابو جنزير قدامك يلف شمال مع الجامع متجه الى ان يصل قصاد باب الجامع الشرقى ويتجه شرقا الى تقاطع القصر مع البلديه وكانت الاشاره شغاله , يطلع بشارع البلديه وقبب الاتراك شمالك وبيوت الاغاريق والاقباط على اليمين والشمال وعلى بعد مسافة كيلو او كيلو ونصف يلف شمال حتى يصل تقاطع الجمهوريه وعندها يكون المركز الثقافى السوفيتى يمينك (وياما قضينا فيه اوقات مذاكره لا تنسى ايام الامتحانات ) , يستمر الى ان يصل تقاطع الجامعة وقبله مباشرة على يمينك داخلية البنات وشمالك كانت منازل اساتذة الجامعة وهناك محطة جوار منزل د. علام حسن علام , ياخذ البص اتجاه الشرق مع شارع الجامعه والذى كان مظلل بشجر اللبخ من اليمين والشمال وفروعه تتلاقى فى نص الشارع لدرجة ان الانوار كانت معموله بطريقه فريده ومعلقه فى نص الشارع , وصل البص نفق برى هنالك ايضا محطة بعد النفق مباشرة لناس الخرطوم القديمه , البركس , التربيه والتعليم , مستشفى العيون والماشين سينما النيل الازرق , بعد كده يتجه البص الى الجنوب الى ان يصل لفة سلاح الاسلحه ويلف شمال باتجاه الشرق ويكون يمينك منازل الضباط وسلاح الصيانه وشمالك رئاسة سلاح الاسلحه الزمن داك ماكان فكروا فى نفق شارع الجمهورية , زيستمر البص فى مسيره الى ان يصل المكان الحسع فيه صينية كبرى كوبر ولم تكن او يكون الكبرى نفسه بل كان هناك خط سكة حديد يعبر الشارع الى بابور مويه ( محطة برى الحرارية الان) لتوزيدها بالديزل وياما راحة ارواح بفعل هذا القطار الذى كان اسود اللون من غير انوار او تنبيه ولا يوجد مزلقان وما يحب يجى الا بالليل , بعدها يمينك خلاء نهايته سور المطار وشمالك مقابر برى وبيوت مهندسى الادارة المركزيه ثم مكاتب التربيه والتعليم وشارع النيل , اول محطه كانت محطة دكان عبد الملك بعد تقاطع شارع النص وكان لسه جديد , وشمالك الشارع المؤدى الى كلية الشرطة وجوارها مبانى الكلاب البوليسية , ثم ارض فضاء بها ملاعب الكرة ( فريق برى والروابط) والان بقت جاردن سيتى , المحطه الثانية محطة شيخ الهادى وعندها بنكون فى انتظار البص الجاى من الخرطوم فى الصباح الباكر لانو لو انتظرنا الماشى الخرطوم ما بقيف وطبعا الابونيه موفر علينا كثير , وصلنا اخر محطة فى برى المحس واول محطة فى الدرايسه بعد محطة البزين وهى محطة الشفخانه وهى قصاد الشارع الرئيسى المؤدى الى جاردن سيتى الان شمالا و شارع النص المتجه الى امتداد ناصر جنوبا مرورا بالجزر والذى كان عباره عن شارع ترابى لونه احمر ( الجزر ده سوق الخضار واللحمه لسكان البرارى وزى ما قال اخى محمد ابو العزائم لو عايز تعرف الزول اصلا من برى ولا دخيل شوفو بقول الجزر ولا سوق اربعة (اشارة لمحطة اربعه) ) . يستمر البص فى المسيره ومحطة اخرى قصاد معرض الخرطوم الدولى وبعدها محطة فى برى ابوحشيش جوار نادى برى الرياضى قبل تحويله الى الموقع الحالى , وهى ايضا قصاد غابة ود النور والتى كانت قبلة الكثيرين من الخرطوم والضواحى ورحلات ايام الاجازات والاعياد وحسع راحت فى الفلل الرئاسية , بالمناسبة البص من هنا يمكن يرجع لو كان مليان او يواصل لبرى اللاماب وبها محطتين قبل الاخيرة الاولى امام منزل مبارك امان والد اللواء مامون مبارك امان رئيس اتحاد الكره والثانيه بتكون قصاد قبة الشريف , البص وصل المحطة الاخيرة و 99% بلف لفه سريعه لدرجة مافى واحد يقدر يركب والمحظوظ بتشعلق ويمسكوه , يرجع البص بنفس خط السير بدزن توقف ( وعشان كده نحن بناخد الاتجاه المعاكس ويمكن منها تتنازل من مقعدك لبنيه حليوه ايام كان الجمال جميل ) , لمن البص يصل نفق شارع الجامعه ياخذ طريق غير الطريق الاول فيتجه عند اشارة النفق فى التقاطع الجاى من بحرى جنوبا الى شارع القياده حتى يصل تقاطع شارع البلديه ويدخل به غربا الى ان يصل تقاطع القصر وقد كان شارع البلديه من اجمل الشوارع فى النظافة والتشجير ,, وبعد تقاطع القصر ياخذ طريقه باتجاه الجامع ثم يلف يمين وبعدها يسار ليكون باتجاه الغرب وعلى يمينه محلات منصفون ومحمد خير والطيب سرور و جروبى ويساره الجامع والكتب القديمه للبيع الى ان يصل اخر الموقف .

اها شنو ليك يا ود عبدالله جننت ليك فيصل ولالا

حيدر
في مدحة بتقول حيدر جزب عقول الادباء ....
ولله ابدعت وانا منبهر فعلا والصلاة (العشاء) جات ولازم ارجع بعد شوية اكمل القراية بتمعن اولا وبعدين اكتب ليك..
انت روعة والله

رهيب والله ياحيدر
الواحد يشعر انك مسجل الكلام دا يعني ما من الذاكرة رغم ان الواحد بتذكر بعض الحاجات خصوصا داخل الخرطوم لاني ليس من أهل بري. رغم اني سكنت فيها مؤخرا لفترة بسيطة وبالمناسبة هي حاجة حلوة ولو الواحد بعد اذنكم يلقي يسكن فيها علي طول يكون محظوظ.
السرد رائع وشكلة بتاع واحد خبير بالتوثيق. دا انت ماتركت حاجة كانك بتقرأ من كتاب. عجبني توقفك مع تفاصيل شارع البلدية والجمهورية وخصوصا المكتب الثقافي الروسي لاني كنت من روادة. ياترى نقدر نلقى صور للمرحلة دي اكيد حتكون حاجة جميلة بس منو الكان عنده كمرة في ذلك الوقت؟؟؟؟؟
اخونا فيصل شيل شيلتك وانا حأكون الحكم وسوف نسعى لتقديم هدية معتبرة للفائز واظن اخونا بكري بشجع الاتجاه دا. وممكن نفكر في عمل توثيق على الاصول.
لكم التحية

با حسن ياخوى الكلام ده اكتر مما استهاله وشكرا لثقتك لكنى شايف فيصل بجهز للضربه القاضيه وانا منتظره نتجول فى شوارع الخرطوم والسوق الافرنجى , وبعدين ياخى الاخوان بكرى الصايغ وصلاح الفكى ديل عندهم ذخيره تقيله احسن امسك فيهم لمن يفكوها, ومنتظرين منك جوله فى بحرى وميدان عقرب

Building - Khartoum 1882

Quote: مكتبة ابو الريش مقابل المسجد الكبير

ياااه يا جعفر اسماعيل ... إنت أثرت المواجع ... ووصلتنا عديل

طبعاً المكتبة إسمها (مكتبة النهضة)، وزي ما مكتوب في يافطتها الخضراء زي لون قلمي ده "لصاحبها محمد عباس أبوالريش". وصاحبها ده هو شقيق الوالد الذي أسس المكتبة وأسس برضو "مجلة النهضة". ودي رغم إنها كانت مجلة أدبية إلا أنو خطها كان مناهض للإستعمار.

أذكر إنو بعد ما جات رياح التغيير، كنت ماري جنب المكتبة بعد ما اتقفلت، ولقيت في صيانة في المحل (شكلهم كانوا بيجهزوا لمحل مرطبات)، وفي لحظة كانت كأنها لقطة سينمائية، كانت اللافتة القديمة نازلة واللافتة بتاعة المحل الجديد طالعة. إتسمرت في مكاني وانا بعاين، جاء طالع واحد من المحل يبدو عليه صاحب المحل، وقال لي (الإفتتاح قريباً). إبتسمت وقلت ليهو لأ .... أنا بعاين (للنازلة) إبتسم كمان وقال لي (الدوام لله).

المكتبة زي ما ذكرت كانت مقابلة الجامع الكبير من جهة الجنوب، وغربها دكان أولاد ملاح. وعلى ما أظن كل المنطقة دي بقت سوق الدهب الجديد

أولا السلام عليكم
حقيقى يادوب اشوف البوست ده و انا باقرا فيه صدمتنى العبرة التالية و خفف عنى آخرها لصاحب البوست

Quote: بس نادي الخريجين اعتقد انه كان في شارع القصر وامكن جنب المكتبة القبطية ارجو التصحيح

ياخى نادى الخريجين ده من المعالم البكينا عليهو بالدموع لما ازالوهو و موقعة بنك كبير على شارع القصر اعتقد الفرنسى السودانى و معلم آخر تمت إزالته وهو مدرسة الخرطوم شرق الابتدائية و دى أول مدرسة اولاد فى السودان يكفى ان اقول لك ان رفاعة رافع الطهطاوى درس فى هذه المدرسة و موقعها فى الجانب الشمالى مباشرة لميدان ابو جنزير.و ده بقودنا لشكل الخرطوم بعد الفتح الثنائى مباشرة بس بكون بعيد عن موضوع البوست

اخونا بكرى الصايغ كتب

Quote: قبل الكلام عـن الخـرطوم زمان، اسـمحوا لي اولآ ان أسأل هـل كلمة خرطوم والتـي اختـرناها اسـمآ لعاصـمتنا تعـنـي وماتعـودنا علي سـماعه ان من يراها من العلو يـجـدها منطقة تشـبه ( خـرطوم الفيل ) وعلي هـذا الاساس اصـبـحت عاصـمتنا وبناء علي هـذه الـمقولة تسـمي بالخـرطوم!!?

وزكرتنى ببوست قديم كتبته و كان لاخونا شول أشوانق مساهمة مقدره فى هذا الصدد
معاني و اسباب اسماء هذه المدن

أخي ماضي
لك التحية وأهلا بيك...
رغم انك اسم ماضي وماضي غير انها تعني قاطع هي برضها معناها زمان. ونحن بنتكلم عن زمان فيجب ان يكون الكلام الفصل عندك يس عايز اقول لما قلنا نادي الخريجين كان جنب المكتبة القبطية ما اظننا مشينا بعيد انت ليه زعلت علينا كدة.
على كال حال اهلا بيك ونرجو ان نسمع منك وممكن برضة تراجع البوست من اوله وتعلق على الفاتك وتسمعنا الجديد..
نستقبلك بالورد والذكريات الجميلة...

الأخ العزيز محمد أبو العزائم أبوالريش

نعم إسمها مكتبة النهضة ولكن أسم العم ابو الريش ظل عالقا بذهني ولن أنساه فقد كان بشوشا هميما صبورا يساعد زبائنه في الحصول على طلباتهم دون ملل أو ضجر . كنت أمر عليه أول كل شهر أسأله من وصول أي إصدارات جديدة .
كنت أبحث عن ديوان د. إبراهيم ناجي (ليالي القاهرة) ولم أجده في كل مكتبات الخرطوم. وفي أحد الأيام وأنا عائد من مكان عملي توقفت عند مكتبة النهضة وسألت العم أبو الريش إن كان لديه ديوان إبراهيم ناجي .. وكم كان سروري عظيما عندما قال " نعم عندي".
كانت أيام زي الأحلام.

تحياتي ومودتي

جعفر اسماعيل
رغم انو الواحد عامل فيه متذكر الخرطوم كويس ورغم اني مهوس بالكتب ودخلت مكتبة النهضة دي عدة مرات لكن للأسف ما فاكر مكانها. العمر ليه احكام وله ايه؟؟؟؟؟؟
الغربية اني فاكر انها كانت كبيرة جدا والاسم كانه مكتوب باللون الازرق بس هي وين؟؟؟؟؟ ما قادر والله اتذكر... فكروني فكروني فكروني.
انا متأكد انها ما اقدم من سودان بك شوب ودي فاكر انها كانت مقابلة محمد حسين بتاع احذية كرة القدم (الكدارات) بس النهضة وين ياناس؟؟؟؟؟؟

كتب الباذخ حيدر امين

شايف فيصل بجهز للضربه القاضيه

الضربة القاضية وين يا حيدر و ان واقع

في الواطه والله لو عديتو ل 100 ماني القايم.




لكن بعد سويدي كدا و معسكر تقوية بجي راجع

قواسيب مودتي ذي ما بقول ابوالحسين

عزيزي فيصل
ضربة قاضية بتاع مين دا انا رغم اني الحكم لك برضو انا معاك بش شد حيلك شوية واعمل حتى ولو تهويشة كدة الزول دا من خارج الخرطوم وما بكون حريف زيك بس شايلاه الهاشمية.
ونحن وراك يا فيصل
ترليلي اللي يافيصل...

أخي جعفر
لك التحية للاسف فاتني ان ارحب بيك عند مداخلتك عن مكتبة النهضة. كنت علقت على مداخله قبلها وفيها تذكرت واحد كان شغال في مكتبت النهضة اسمة محمد شزراوان. راجل طيب جدا وعنده مشكلة في النطق افتكر بعض الحروف لا نطقة او امكن كلامة كان اقرب للطرش.
فاكر الراجل دا...
وهلا بيك

والله بوست روعة ما بشبه اي حاجة قريتا قبل كدا ... حاولت اعمل مداخلة بالكلام اللي بحكوهو امي وابوي لكن لقيت المذكور هنا اكبر

واكتر توثيق من كلامى ......كل المعلومات تحفة تاريخية تستحق الذكر ,عشان ناس ام درمان ما يجننونا بتاريخهم وقصصهم.

الـخـرطوم زمـان:
-----------------------

http://clips.abusora.com/Clip.php?item_id=27773

الفنان الراحـل أحـمـد الـمـصـطـفي والفنانة الكبيـرة صـباح مـعآ فـي أغـنية " رحـمـاك يامـلاك "

رابـط فيـلـم فيـديـو 1960.

http://clips.abusora.com/Clip.php?item_id=277

الـخـرطوم زمـان:
-----------------------

http://clips.abusora.com/Clip.php?item_id=27773

الفنان الراحـل أحـمـد الـمـصـطـفي والفنانة الكبيـرة صـباح مـعآ فـي أغـنية " رحـمـاك يامـلاك "

رابـط فيـلـم فيـديـو 1960 اعـلاه

عزيزي بكري
قبل ما ارد على شريط أحمد المصطفى وصباح.
مريت على بوست بتاعك عن جامعة مأمون حميدة وبما اني مغترب عايز اسأل. التعليم معروف تدهور بل ضرب الواطة من زمان. ودي طبعا ما غريبة مع الانبطاح العام في الجمهورية الحبيبة. واذا كان المدرسين والدكاترة فروا زي باقي الناس كيف التعليم حيتصلح؟؟؟؟
والقروش الكتيرة دي مقابل شنو؟؟؟؟؟
هل التعليم فوق البكالوريوس برضة بنفس المستوى اقصد التعليم الادارة ناس ماجستير MBA?
ودي احكي ليك عن مأساة مدرس سوداني في السعودية. الراجل مدرس قديم ومش اي كلام دا استاذ فيزياء قديم مرة ثانية. والله يابكري لقيته بشحت نعم والله لو كان حد ثاني قال لي ما كنت صدقت. افتكرت الراجل امكن مخة ضرب. لاقيتة في مكان تاني ووقفتة وبالحديث معه طلع الراجل كويس وبس طبعا عمل نفسة ما متذكرني....
وتمر الايام يجيني في الشغل لابس تمام وشايل شنطة سمسونيت وكروت بتاعت شركة قال انو اشتغل بتاع مبيعات. وطبعا افتكر اللعبة مشت على وصادفته تاني بيشحت.. اسفي على السودان الحبيب...

شريط احمد المصطفى مع صباح رائع رائع جدا.
حتى شكله مختلف وصوته وروحه كمان دا بيذكرني تعليق واحد صاحبنا عن شعراء الحقيبة قال : ديل كانوا ما بشوف البنات ورغم كدة كتبوا كل الشعر دا. وبناتهم ما سمحات ولا حاجة. أكيد لو شافوا بنات الزمن دا كانو ما ماتوا وكانوا يغنوا لليوم....

العزيز جعفر اسماعيل ..

Quote: كنت أمر عليه أول كل شهر أسأله من وصول أي إصدارات جديدة .

لعلك تقصد العم (خليفة عطية)، والذي ظل يدير المكتبة من بداية الستينات وحتى جار عليها الزمان، ففتح مكتبة خاصة به في السجانة أظن سماها باسمه. أما محمد عباس أبوالريش، فقد توفي في ثلاثينات القرن الماضي، وأدار المكتبة بعده العم مزمل عباس أبوالريش حتى سلمها للعم خليفة بوفاته.

حسن عبدالله

Quote: بس النهضة وين ياناس؟؟؟؟؟؟

يا زول كان الوصف الوصفتو ده ما وصلك .. ما أظنك تصل:-

Quote: المكتبة زي ما ذكرت كانت مقابلة الجامع الكبير من جهة الجنوب، وغربها دكان أولاد ملاح. وعلى ما أظن كل المنطقة دي بقت سوق الدهب الجديد

Quote: عزيزي فيصل ضربة قاضية بتاع مين دا انا رغم اني الحكم لك برضو انا معاك بش شد حيلك شوية واعمل حتى ولو تهويشة كدة الزول دا من خارج الخرطوم وما بكون حريف زيك بس شايلاه الهاشمية.

بالله شوف ده قال برى خارج الخرطوم قال , التحكيم فاشل ,,, التحكيم فاشل
انتظرونى شويه وانا جايكم بكل التكنولوجيا ومعاها دعم لوجستى كمان , وبالمناسبه يا حسن , محمد و ماضى ابوالعزائم برضو اولاد برى المحس , وانت اخد ليك طله على البوست بتاع برى وادينى رايك,,, اما فيصل فانا فى انتظاره جوار وكالة اطلس للسفر والسياحه,, ما عارفها وين؟؟ طيب دى فى الساحة بتاعة اتينى جهة وزارة الخارجيه الان والكانت جلاتلى هانكى زمان ووراها وزارة التجارة على شارع الجامعه ولا اقول ليك تعال عند مطعم الغار تحت الارض قبل ان تصل الالكسيسسيور وصحارى

الموثق حيدر
ما عندي مانع اسمع كل التقوله لتثبت اني جاهل بالخرطوم بس عايز وثائق والصور اكثر اقناعا من الكلام. واعتقد انك في مداخلتي سمعتني اثني على بري وافكر ان استقر بها بعد اذنك طبعا...
ولك ولكل مواقع الخرطوم كل الحب. كله الا الزعل وطبعا ممكن الواحد يقصد يزعلك عشان يطلع الوثائق زي ما عملنا مع اخونا الضايغ
ولكم جميعا الود..

ابو العزائم لك التحية
شكرا والله افتكرتها وكان في واحد اسمة(محمد شز اوان) كان عنده لسعة في الصوت كانه لا ينطق بعض الحروف او الصوت كانه فيه بحه او حاجة زي كدة. ما قلت ليكم العقل يجيب ويضيع

يا جماعة منو البتذكر الراجل بتاع السندوتشات في ميدان الأمم المتحدة، وعندو جملة واحدة ما بيغيرها وهو بينادي على السندوتشات، يقول: "البادراب سندة .... أبو حمامة وصل"، والغريبة سندوتشاتو كل يوم فاصوليا ومافي غيرها، لكن تمر بي هناك تجوع غصباً عنك من المنظر والريحة

Khatoum and twistin' the Night Away


http://www.youtube.com/watch?v=jLGQfZ7eV8U

يا سلام عليك يا وليم، ويا سلام على سام كوك

Quote: اخواني في واحد ذكرني قهوة الزيبق دي كان كانت في السوق العربي وليست بعيدة من مسجد الخرطوم. كانت دائما مليانة ناس وفيها طبعا غير الشاي والقهوة كان فيها شيشة والغريبة كان الناس تلعب فيها قمار ....

قهوة الزيبق و نادى الخريجين و نادى العمال كانوا من منابر و نقاط تجمع الوطنين و المثقفاتية قبل الاستقلال و بالمناسبة مكتبة النهضة و منذ تأسيسها و إلى منتصف الستينات كانت مجاوره قهوة الزيبق و حلوانى حمتو الشهير الى ان انتقلت لموقعها الاخير فى ركن بناية الاوقاف مقابل اولاد ملاح من الغرب و الجامع من الشمال

أخي ماضي
لك الشكر
تذكرنا مكتبة النهضة وحتى اسم الاخ محمد شزراوان الكان شغال فيها.
ولو طلعت بالشارع شوية قدام تلقى صاحب احسن ليمون في الخرطوم وكذلك احسن عماري (تمباك) رغم اني لم استخدمة اطلاقا بس عارفوا.
مين يدور بينا حول المنطقة دي شوية بس ما يصل المنطقة المحرمة اقصد بيت المواخير التي اصبحت الان عمارات اشكال واللوان.
خرطوم خرطوم السرور...
ولجميع التحية

مواصلين. مين يقول عن الخرطوم كمان...
القومة ليك ياوطني

ترقبوا
المرحوم عبدالرحمن مختار الصحفي المشهور له كتاب اسمة خريف الفرح (دا غير خريف الغضب) كاتب حاجات جميلة عن أحدان سودانية كثيرة سوف انقل منه ما كتبه عن مؤتمر الخرطوم...
قريبا قريبا

الاعزاء
لسه ما في واحد قال حصر حفلة الفنان جيمي كليف في مريديان.
امكن اكون كنت بحلم؟؟؟؟؟

ياحليل خـرطوم الاربعيينيات....

لـما كان عـدد (الـتكاسـي ) فيه اتنيـن بـس:
واحـد صـاحـبو الـمرحوم ابراهيـم سعيـد وماكان بقيف بعربتو الاقدام الفندق الكبيـر GRAND HOTEL ويركب الخـواجات بس، والتانـي صـاحـبو الـمرحوم شـريف التـهامي.

ياحلييييل لـما كنا نسافر لود مـدني بالقطر والمسافة 4 ساعات!!

ياحليييل زمن ( الـحناطـيـر ) الـمركبة الشعبية ووسيلة الـمواصـلات العامة. كل يوم خـميس كانت كل (حناطـيـر) الـخرطوم مـحجـوزة للاعـراس. جـرت العادة في الوقت داك ( زمنا الحلو الجمـيل ) انو اي عريس لازم يطلع بسـيـرتو لشارع النيل باهله واصـحابو ومعاه العروسة واهـلها، لذلك بقوم العريس بـحجـز مـجـموعة من (الـحناطيـر) لنقل الاقارب والضيوف، وفي فتـرة الـظهيـرة تبـدأ الـمسـيـرة (والـحناطـيـر) مزينة بالزهور والورود وقماشات الزينة،وتطلع السـيـرة تـختـرق شـوارع الخـرطوم والبنات يغـنن
( عـريسـنا مرق البـحـر ياعـديلة قطع جـرائـد النـخل الليلة زينة ) وعنـد الوصول لشارع النيل ينـزل العريس وعـروسو للضـفة بسـلالـم اصـلآ موجـودة هناك، وهناك عـنـد النيل يقوم العريس ويـبـخ عـروسو بالمـوية وهـي كـمان تبخـووهـي عادة قـديييـمة تعـنـي ( ان شاءالله حياتنا معا تـدوم كـدوام وعـمر هـذا النيل ).

عـنـد انتهاء هـذه المراسـم تبـدأ رحـلة العودة لبيـت العرس ، وتبـدأ السـيـرة في شـق شـوارع الخـرطوم. جـرت العادة انه واثناء سـيـر الحناطـيـر بالشوارع وسماع الناس لاصـوات غناء البنات ان تـخـرج الاسـر من منازلها لتهنـئه العريسييـن واحيانا يقومن نساء الـمنطقة بتقـديم الشربات (عصـير ليمون) لناس السـيـرة.

بعـض الشبان كانوا يـهتمـون واثناء السـيـرة بال( الـجـكس )الـموجود داخل (الحناطـير)، ولو في شاب عـجـبتو بنيـة طوالـي يطلع مع السـيـرة لـحـد محل العرس. وهناك نلقي الشاب ده يـخـدم في الكل وكان العريس اخـوه، لـحـد مايلقي ليه طـريقه يشـوف فيـها مـحـبوتو من طرف واحـد ولسان حالو يقول
( نـظرة ياسـمـحـة ام عـجـن لو كان قليل يبـري الشـجـن ). الـمهم لو هـو مـحـظوظ وحـصـل ( نـظرة، فسـلام، فكلام، فـموعـد، فلقاء ) نسـمع ليك بعـد شـهر انو في سـيـرة ( مـرقت البـحـر ياعـديلة ...

...اغـنية الفنان الراحـل ابراهـيـم الكاشـف الـمعروفه ( يوم الزيارة)
غناها لاول مرة فـي الاربعييـنيات ( الزمن الـجـميل داك ). والأغنيـة اصـلآ عنـدها قـصـة مـعروفة يعـرفـها القليليـن جـدآ.

مسـتشـفي الـخرطوم كان كل يوم خـميـس بكون مـليان ملئ شـديـد بالزوار لـمواصـلة مرضـاهم من الأهـل والاقارب. وطـبعآ يوم الـخمـيس ده كان احـسن يوم للزيارات والانتـهاء من واجـب مواصـلة الـمرضـي علي اعتبار انو اليوم التانـي اجازة الـجـمعة يتفرغ فيـها الواحـد لبعض اموره الخاصـة.

الـمستشفي في اليوم ده بكون مليان بالاسـر والعوائل والرجال والنساء والشابات جـاءوا كلهم للزيارة.

فـي شـاعـر مرهـف حـساس شـاف ليـهو بنيـة جات لـزيارة اخـوها الراقـد بالمـسـتشفي. عـجـبتو شـديـد وقعـد يعاين ليـها ونسـي مريـضـو!!!

الـخـميـس البعـدو برضـو جاء مـخـصـوص للـمستشـفي ولكن ماعشان مريضـو ولكن للبنية . وجـات وشـافـها وهـي جاية للزيارة وطوالـي شـاعرنا جـادت قـريـحته بالشـعر فكتب القصـيـدة الـمعروفة ( حـبيـبـي أهـ، وقلبـي تاه فـي يوم الزيارة )!!

تعـتبـر هـذه الأغنيـة واحـدة من أجـمل سـنوات الاربعينيات ومـعاها اغنيـة الفنا الراحـل حـسـن عـطـية ( انا حـالـي ظـاهـر ).

اهـو ده الغـناء ... تقول لـي أدب الـمـدائـح!!!

Quote: أخي ماضي لك الشكر تذكرنا مكتبة النهضة وحتى اسم الاخ محمد شزراوان الكان شغال فيها. ولو طلعت بالشارع شوية قدام تلقى صاحب احسن ليمون في الخرطوم وكذلك احسن عماري (تمباك) رغم اني لم استخدمة اطلاقا بس عارفوا. مين يدور بينا حول المنطقة دي شوية بس ما يصل المنطقة المحرمة اقصد بيت المواخير التي اصبحت الان عمارات اشكال واللوان. خرطوم خرطوم السرور... ولجميع التحية

اخى حسن عبد الله

لو رجعت لمداخلتى الاولى بتلقى صاحب احسن ليمون وشعير عمك الواثق الجيلانى وهو اول من ابتدع قصة الماركه عند الدفع

Quote: تقطع ميدان الامم المتحده بالممر الضيق وتجد الباعه والفراشه على طول الممر لتلاقى يمينك دكان جسن صالح حاج خضر بتاع العجلات الرالى ثم ودملاح والشارع المؤدى الى موقف الشجره والقوز شمال الشارع مكتبة النهضه ومحلات حمدتو الحلوانى وده كله قصاد الجامع, نرجع للشارع الماشى فى التقاطع اليمينه تجد مطعم خيرات سلوى ولو مشيت طوالى يوديك لمواقف الشجره وبه محلات الاقمشه والعطور وعلى شمالك مكتبة سماره وقصادها ليمون عمك الواثق ليمون وشعير كارب كباية قزاز شوب شدة مابارده لمن يجيك صداع وبالمناسبه عمنا الواثق هو والد الفنان الجيلانى الواثق وبعده الشارع يمينك يوديك لقهوة الكوبانى وشمالك محلات الدهب وقصادها مدرسة الخرطوم الاهليه (الشيخ مصطفى الامين) الحسع بقت مافى وده عندى فيها كلام كتير بالصور, نهاية الشارع موقف بصات مدنى وبص الخواجه(المؤسسه) لمن الحجز كان بالتلفون قبل اسبوع من سفرك ثم تعبر لكمبونى

Quote: حيدر امين ..... وكالة اطلس... ياخي زمان دي كانت في الركن المعاكس لصيدلية منو المشهوره ديك وشويه شويه تصل معرض العربات الفولجا والموسكفتش ...... اها ياربي مقابل الوكاله القهوه ديك والناس الصناعيه بتاعين الكهرباء والسباكه... وكان فيها زول جميل سليمان غندرو ياربي انا صاح والا ......... يالله والله زمن قديم بالحيل

اندريه
والله كان ما اخاف الكضب اقول انت قاصد وكالة السر لصاحبها السر عباس والكان بغنوا ليه البنات , وهى فى الكورنر بتاع محلات اسندكو ومحل الدراى كليين وبتكون مواجهه لشارع الجمهوريه وامامه صف بتاع مغالق وفى الجهة الاخرى صيدلية كمبال وبعدها زى ما قلت محلات ميكانيكيه ومعرض الفولجا والمسكوفتش وفى الصف مطعموهم فى موجهة المحطه الوسطى ومحلات ميرزا وشركة النظارات الاهليه Bold Text

انته صاح يا حيدر والله يحفظ لينا ذاكرتك النضره.......مودتي

يا جماعه وين فيصل ماليه حس انشاالله المانع خير
منتظرين منك حاجه عن بحرى حسن عبدالله

عزيزي حيدر
تعظيم سلام ليك ولكل الحبايب.
كنت عايز اتلقف واقول ليك انا حاضر لكل شئ عن بحري بس الواحد خايف يبقى متفرج ويصفق ليك ولذاكرتك المفعمة بالعجيب والغريب عن الخرطوم واكيد تكون كدة كمان بحري.
ماعايز اقول ليك فيصل زاغ لانه هو كمان ما ساهل وعنده الكثير لسه ما قالوا. بس اصبر ليه شوية شايف حايم في المنبر ما خلي بوست الا وقال فيه قول.
للمعلوية اخونا كمال كرار عنده بوست عن بحري تقدر تقتحمة وتنشر وثائق بحري كما اتحفتنا عن الخرطوم.
لك الاحترام والاعتراف بانك موثق نمرة واحد وامكن كمان قبل واحد.
ولازال هناك الكثير عن الخرطوم نتوقع الساكنين والوافدين الجدد ياتي بما لم يذكر بعد عن خرطوم السوان الحبيب.
التحية للجميع

ياخى وين نحن مع ناس الصايغ ديل والله خلونا بيش ساكت ده التاريخ ولا بلاش ,,, هل من مزيد

عزيزي حيدر
والله اتحفتناوخليتنا نتفرج ونصفق للذكرة الجميلة ونعجب بذاكرتك القوية. وانا اعتقد انك من النوع البسجل المواقف ويصور المواقع في الذاكرة او بالكميرة وطبعا اصلا في ذاكرة تصويرية زي ما بقول ناس علم الادارة.
دي مامكن تكون ذاكرة بس. اكيد داعمها بتوثيق.
يعني الواحد بتذكر بس مش بكل التفاصيل العندك.
اضافة لدي اسلوبك في الوصف راق جدا.
الله يحفظك ويزيدك كمان وكمان.....
لكم جميعا التحية

أخونا بكري سلام

Quote: لـما كان عـدد (الـتكاسـي ) فيه اتنيـن بـس: واحـد صـاحـبو الـمرحوم ابراهيـم سعيـد وماكان بقيف بعربتو الاقدام الفندق الكبيـر GRAND HOTEL ويركب الخـواجات بس، والتانـي صـاحـبو الـمرحوم شـريف التـهامي.

بل كانوا ثلاثة نسيت خير السيد(بنقو)الكان بقيف فى السكة حديد؟؟؟

الاخ الـحـبيب الـحـبوب،
ماضي ابو العزائم،

تـحياتي ومودتـي،

"بل كانوا ثلاثة نسيت خير السيد(بنقو)الكان بقيف فى السكة حديد؟؟؟".


شــكري علي مساعـداتك وتنشـيـط ذاكرتي الـخـربة. ومادام جات سـيـرة السكة حـديـد والـمحطة لازم نتـذكر كـمان النـصـب التذكاري جـنوب شارع القـصـر بـجـانب مـعمل ( اسـتاك ) وعـيادة عـبده دهـب اخـصائي الأشـعة!!!

ولشـخـصك الكريـم اهـدي اليك هـذا الرابـط:

عربات زمااااااان في السودان ( توجد صور )

لك مودتـي.

إزيك يا بكرى
باين علينا حا نودى البوست ده لزمن اكثر قدما,
تذكر مقابر المسيحين الازيلت و اتبنت مكانا كلية طب الاسنان.اولاد عمى عندهم بيت هناك و لسة مسمينو(بيت الكنيسة) فى منطقة سوق الخيش الحالية.
أها قولك شنو ما صفحة قديمة؟؟؟

عزيزي بكري
العربات دي بالحق تحفة تذكارية...
وفكرتني قصة حلوة عن العربات القديمة دي...
كان عندنا في الحلة واحد كبير عنده عربية من النوع دا اظن اسمها بي بي. المهم كان كل يوم وهو طالع ينادينا (طبعا بالاسماء) تعالوا ادوني لزة. طبعا ما ممكن نتاخر.. والشغلة مستمرة يوميااو في كل مرة هو خارج بالعربية دي ياولد تعال ادينا لزة.
واحد اخونا اسمة فيصل (الله يرحمة) يظهر زهج من كل يوم لزة. يوم قال لولده يامحمد ياخ كلم ابوك دا يبيع العربية بتاعتة دي ويتم عليها يشتري عجلة ويريحنا....

عزيزي بكري
العربات دي بالحق تحفة تذكارية...
وفكرتني قصة حلوة عن العربات القديمة دي...
كان عندنا في الحلة واحد كبير عنده عربية من النوع دا اظن اسمها بي بي. المهم كان كل يوم وهو طالع ينادينا (طبعا بالاسماء) تعالوا ادوني لزة. طبعا ما ممكن نتاخر.. والشغلة مستمرة يوميااو في كل مرة هو خارج بالعربية دي ياولد تعال ادينا لزة.
واحد اخونا اسمة فيصل (الله يرحمة) يظهر زهج من كل يوم لزة. يوم قال لولده يامحمد ياخ كلم ابوك دا يبيع العربية بتاعتة دي ويتم عليها يشتري عجلة ويريحنا....

(... تذكر مقابر المسيحين الازيلت و اتبنت مكانا كلية طب الاسنان.اولاد عمى عندهم بيت هناك و لسة مسمينو(بيت الكنيسة) فى منطقة سوق الخيش الحالية ).
( ماضي ابو العزائم ).


الاخ الـحـبيب الـحـبوب،
ماضي ابو العزائم،

تـحياتي ومـودتي،

مـقابر الـمسيـحييـن:
لـحـد سـنة 1985 كانت موجـودة قبال مستشفي الـخرطوم وخلف منـزل الـمرحوم الشيخ مـصـطفي الآميـن.

مقابر (الكـمونولث):
اقصـد مقابر الجـنود البـريطانييـن اثناء الـحرب العالـمية الثانية مـوجـودة بجـوار بيوت الـحـي الغربي.

مـقابر اليـهود:
موجـودة بـالـمنطقة الصـناعـية - الـخـرطوم.

مـقابر فاروق:
كانت مـقابر فاروق عام 1941 تعتبـر نـهاية الخـرطوم من جـهة الغـرب، وماكانت هناك مدينة العمارات ولاالصـحافـة ولااركويت والرياض. الـمنطقة كان اسـمها كيلو خـمسـة.

جـامع النيليـن بامـدرمان:
فكـرة انشـاء الـجـامع الـموجـود بامـدرمان وسـمي بـجامع النيليـن انـها تكون مـقبـرة لنـميـري بـعـد وفاته. بالطبع انا عاصـرت قصـة وفكرة
بناء الجامع في اوائل الثمانينيات وايام هـوس نـميـري بتطبيق شـرائعه وبلغ به الهـوس الدينـي وان تكون عنـده ( قبـة ) احـسن من قبة حـمـد النيل ومكيـفة وفيـها سـجـاد مخـملي. الفكرة جات اصـلآ من مقبـرة انور السادات علي شـكل الهـرم ... يعـنـي هـرم فرعـوني، ونـميـري قال انا كـمان اعمـل زيو!!!

لك مودتـي.

عزيزي الصايغ
التحية ليكم جميعا.
شنو حكات المقابر دي انت بتخوفوا فينا وله شنو؟؟؟؟
مقابر فاروق والانجليز معروفة لكن حكاية مقبرة او اهرام نميري دي جديدة علينا.
دا طبعا رغم ان كل شئ من نميري ممكن اصله ايامة الاخيرة راسة ضرب. اصلة الريس تلقى ضربات كثيرة والضرب في الراس اكيد يؤثر في يوم من الايام.
لكم طول العمر في طاعت المولي

1976

يا فيصل وين انت ياخ حرمتنا زمن من مداخلات القبل التاريخ انشاء الله السبب خير.
كويس انك جبت الصورة بتاعت حديقة الحيوانات المزعلني دي. سبب الزعل ان صاحب الكميرا دا شنو المنعو يدخل الحديقة ويرسل لينا صور من جوة. اوعى تقول السبب ان الحديقة كانت قافلة...
يافيصل بعد سور حديقة الحيوانات كان في شنو؟؟؟؟
ايو اقصد مكان قاعة الصداقة كان في شنو؟؟؟؟
وكمان المتحف القومي كان شنو؟؟؟ دا اظن ان كان شوية شجر وحاجة اقرب للغابة
المهم لو جاوبت صاح ح تاخد نقطة وتتقدم درجة ولو غلط ح نقول ليك (ياراجل ) زي ما قال أحمد سليمان للراجل لما سالو عن مفكر وشاعر وقائدافريقي والراجل جاوب وقال جعفر نميري.
ما تحرمنا منك يا فيصل ياتحفة...

الأخ الحـبيب الحـبوب،
حـسـن عـبداللـه،

تـحياتي ومودتـي،
واكرر اعتـذاري في اني دخلت كذا مرة في البوست وماأديتك السـلام، القي نفسي اندمجت في الكتابة ونسيت سـنه الأسلام السلام.

وبمناسبة حكاية مسجـد النيلين ياأخي دي قصـة بيعرفـها كل زول خصـوصآ الاعضـاء القدامي بتاعيـن الاتـحاد الأشتـراكي ووزارة الاعلام والـحكاية دي ليـها اكتـر من 25 سـنة. واصـل القصـة تقول: في احـدي المرات نميـري سأل عن بعض زملاته واين هم ولماذا لايحضرون اجتماعات امانات الاتحاد الاشتـراكي فرد عليه واحـد وقال: " سـعادتك الـجماعة ديل في حـمدالنيل". نـميري زعل وقال يعنـي ( كبة ) حـمد النيل اهـم من الاتـحاد الاشتـراكي، انا كمان حاعـمل لي (كـبة) احـسن من (كبة) الزول ده وبالمـراوح ومكنـدشة كـمان. طـوالي في ناس اتبنوا الـموضـوع بـجـدية والمهنـدسيـن المعمارييـن رسـموا 27 خريطة للجامع
( الـضـريـح ) وفي كل مرة نمـيري يـرجع الخـريطة ويقول وين الـمقبـرة!! لـحـد مارسـي علي الشكل الموجـود حاليآ.

بـمناسبة الخـرطوم زمااااان، ماتنـسي مقابر السلاطيـن الاتراك ( القـبب ) في شارع القصـر شـمال نادي الخـرجـييـن، وهـي حاليآ من الأثار القديـمة التابعة لوزارة الاعـلام ( مـصـلحـة الأثار ).

لك، وللـجـميع مودتي.

ومـن مـعالـم الخـرطوم الـهامة، قـبة الشـيـخ مـحـمـد عـثمان (البـرهاني)
... من ( انـدينا )!!!

بالمناسبة لما جابو السلم التعليمي الجديد

بتاع محي الدين صابر انا كنت في سنة اولى وسطى

رجعونا بقونا سنة سادسة

واللة زعلت زعل

الواحد كان قاشر انو في الوسطى و خاتي كتاب man and pan

قدام عشان الجكس

يقوموا يرجعوك سنة سادسة

هذه صورة تعود الي ثلاث عقود مضت لتلاميذ امام باب مدرستهمفي الخرطوم علق عليها مصورها "امل الامة " The nation's hope وهل وجدت امتنا املا في جيل هؤلاء :

أهلا أخي أبوبكر
يا حبيبي ابوبكر نحن بندور للحاجات الزي دي من ثلاثة او حتى خمسة قرون.
أكيد أمتنا وجدت أملا وكمان أكثر مما تتصور خصوصا الولد الفي الوسط لانه اذا ماهو انت يكون تومك...
بالله لو عند تاني حاجة حلوة كدة اقطع لينا منها حته..

شارع البرلمان زماان "باتا وساتا"

Quote: بـمناسبة الخـرطوم زمااااان، ماتنـسي مقابر السلاطيـن الاتراك ( القـبب ) في شارع القصـر شـمال نادي الخـرجـييـن، وهـي حاليآ من الأثار القديـمة التابعة لوزارة الاعـلام ( مـصـلحـة الأثار ).

Quote: بالمناسبة لما جابو السلم التعليمي الجديد بتاع محي الدين صابر انا كنت في سنة اولى وسطى رجعونا بقونا سنة سادسة واللة زعلت زعل الواحد كان قاشر انو في الوسطى و خاتي كتاب man and pan قدام عشان الجكس يقوموا يرجعوك سنة سادسة

فيصل وينك يا دفعه

Quote: شارع البرلمان زماان "باتا وساتا"

والله كان ظنيتو ده شارع الجمهوريه وانت ماشى الى المحطه الوسطى , اللافته الحمراء الثانيه هناك ده بتاعة فندق صحارى و العماره القبليها بتاعة بيطار الهندسيه المكاتب فوق وتحت صالة عرض المواتير الفيسبا ماركة بياجو الايطاليه وطلمبات المياه , والطواحين وفى نهاية العماره باتجاه الجنوب وانت ماشى الى طلمبة احمد المصطفى كان فى الكورنر الاكروبول.وفى نهاية الشارع الى الشرق مطعم البربرى واطعم سمك.

ولا انا غلطان

1975 النادي الامريكي

عزيزي فيصل التحفة
ايو كدة ياخ اهي بدت تطلع الدرر.. هو انت داسيها لمتدين.
بس الصور بتاعت حوض السباحة دي اكيد فيها خطأ....
يا الراجل العامل ديف دا غلطان او الحوض غلط؟؟؟
أو الإلتقط الصور غلط يكون كان ماسك الكميرا غلط...
كيف الواحد يكون قافز في الحوض وعيونه لفوق... وكمان اقدامة لفوق؟؟؟؟؟
انت معاي؟؟؟
ولا امكن دا هو الصاح ونحن الخطأ؟؟؟؟
أمكن الفن كان في ذلك الزمن بالطريقة دي!!!
بس تصور لو هو طائر كده واحد حرك الحوض من مكانه شنو حاتكون حالة اخونا دا؟؟؟؟؟
افيدونا يا أهل السباحة
ما فيكم كيجاب او حتى سارة جاد الله؟؟؟؟؟؟
أخي فيصل:
لسة انا منتظر تذكرني شنو كان في موقع قاعة الصداقة والمتحف القومي؟؟؟؟؟؟؟؟
دي حاجة جديدة بس الواحد بخر كيف كان شكل الحتة دي
لكم كل الحب

Quote: ولا انا غلطان

ما غلطان ابدا بس الاخد الصورة وجعلها من حقوق الملكية الفكرية بتاعنو كتب البرلمان كما تنطق بالعربية وبحروف انكليزية وكمان بالاتكليزية..

كاتدرائيه الرومان كاثوليك سنة 1936... صورة يبدو انها مطبوعة من اسلايد وشديدة الوضوح

كتب الاخ بكرى الصايغ

Quote: بـمناسبة الخـرطوم زمااااان، ماتنـسي مقابر السلاطيـن الاتراك ( القـبب ) في شارع القصـر شـمال نادي الخـرجـييـن، وهـي حاليآ من الأثار القديـمة التابعة لوزارة الاعـلام ( مـصـلحـة الأثار ).

أعتقد انها مقابر جدود القبانية(عائلة قبانى) ولا انا غلطان؟؟
عند تخطيط مدينة الخرطوم كانت هذه المنطقة مقابر الاهل توتى و الجتانب الشمالى الشرقى لكبار الحكام من الاتراك فازالها الانجليز الا هذه القباب و قبور الصالحين خوفا من نقمة الاهالى و كانت المشكلة فى قبر الشيخ محمد بن امام لان قبرة كان وسط شارع القصر فحول الى طرف الشارع ووضع حول القبر (جنازير)كحماية له و كإبداء للاحترام فاطلق عليه (ابو جنزير)و لهذا السبب توجد مقبرة فى مستشفى الشعب و مقبرة فى مكتب البريد الواقع جنوب موقف البصات و غرب مدرسة الخرطوم الاهلية و آخر داخل سور احد المصالح الحكومية فى شارع الجامعة وهو ماكتب فيه المقالة الشهيرة(هذا الوالى مسموح بزيارتة) بس ما تسألونى منو الكتبها
شايف المسالة بقت قبور و مقابر

Quote: الواحد كان قاشر انو في الوسطى و خاتي كتاب man and pan

انا غايتو بتذكر انو انا وسيداحمد الخطيب (هسع دكتور وعجز زي كدة) يوم الخميس شلنا معانا الديكشنري ونحن راكبين البص الي ح دغيم ..بعدين الانجليز لانو كانو بحبونا نحن الرطانة سمو الكتاب "الرجل وحلته"(الحلة البيطبخو فيها ياجماعة) يعني مخصوص عشانا واهو باقي خلق الله الما رطانة استفادو علي حسابنا ساااي

بنطون توتي والحمار ماخد موقعه التاريخي امام اللوري

الكتاحة في الخرطوم

زماااانك ما كانت في كتاحة في الخرطوم .. اول مرة نتشرف بالكتاحة كان بعد ما هجرونا الي خشم القربة.. اصلو بعد الهجرة دة نحن عرفنا انو يوم القيامة ياتي من ناحية الشرق .. شي سما مقدودة والموية الكانت افقية عندنا في النيل بقيت راسيا وشفنا عجب ...

ست الشاي ..كما ظلمت ست الشاي فاسماء الشوارع واللغات مظلومة كذلك في زمن السودان الردئ ... كونتاميخالوص اسم لسوداني من اصل اغريقي انشاء تجاره التخليص والشحن البحري فصار اسم علم وسمي شارع باسمه الا انا سلطات محافظة او ولاية الخرطوم الفاشلة دوما اتت بما لم يكن علي خاطر السيد كونتاميخالوص فصار اسمه بالانجليزية "كنت" ولهذا معني اخر وبالعربية صار "مخلصا" ربما لانه انشاء تجارة التخليص ....!!

سينما النيل الازرق كانت للمثقفاتية و العوائل بقط و ما فيهاشعب (أقل فئة دخول للسينما )عشان كده تلقى العوائل و المجكساتية قاعدين قدام و متاكدين مافى شماسة اصلو ما بتعرض افلام عربية و لا كاوبوى

أخي ماضي
الله يفرحك والله سينما النيل الازرق كانت فعلا راقية.
ورمنسية واجمل ما فيها انا ما كانت تجيب افلام عربية
خواجات ساكت وكمان مش كابويات
والله ذكرتنا الايام الجميلة فعلا
لك التحية

الجامع الكبير 1936

Blue Nile Sailing Club

(..سينما النيل الازرق كانت للمثقفاتية و العوائل بقط و ما فيهاشعب (أقل فئة دخول للسينما )عشان كده تلقى العوائل و المجكساتية قاعدين قدام و متاكدين مافى شماسة اصلو ما بتعرض افلام عربية و لا كاوبوى).

انشـئت هـذه السـينما خـصيـصآ للضباط الانـجـليـز وعوائلـهم. تأسـست عام 1941 ابان فتـرة الـحـرب العالـمية الثانية.

وكانت تعـرض افلامـها ثلاثة مرات فـي الاسبوع بسـبب الـحـرب. بعـد عام 1945 اصـبحـت دار عـرض يومية ولكن للضباط والـجنود الانجليـز فقط. كانت الافلام انـجـليزية واميـريكية تـصل من القاهـرة. كانت سـينما ( BLUE NILE ) تقع ضـمن الـمناطق الـممنوع للمـدنييـن دخـولـها ويـحـظر من الاقتـراب مـنها.

كان بـجـوار دار العرض صـالـحة للرقص وتناول الكـحوليات وخـصيـصآ للعسكر الانـجـليـز. ابطال افـلامـها في ذلك الوقت من الاربعينيات ( فرانك سيناترا، ايرول فلين،زازاجابور، جاري كوبر، هـمفري بوجارت،ريتا هـيوارث، كلارك جـيبل،شارلي شابلن، جاك بلانس).

لـم يسـمح بدخول الـمدنييـن بـدخول هـذه السـينما الاعام 1955.

كانت هـذه السينـما تقـدم اجـمل الافلام العالـمية حـتي عام 1970 عنـدما قام الرئيـس نـميـري بتامـيمها والت الـي وزارة الثقافة الاعـلام وتـحـت اشـراف ( مؤسـسة الدولة للسـينما ).

ولـم يكن في يكن في استطاعة الـحكومة ان تسـتورد افلام جـيـدة بعـد التاميـم فـجـلبت بعض الافلام القـديمة من شـركة ( مـتـروجـولدين ماير ) بالقاهـرة. وعنـدما طـبق نـميـري شـريعته عام 1983 جاءت القوانيـن بان كل الافلام التـي تعـرض بالسـينمات يـجـب ان تكون افلام خالية من مناظـر القبلات والاحـضان والنساء بالمايوهات ومناظر الرجال والنساء وهم يرقصـون او بالفراش.

في عام 1979 وقعت مشادة حادة بيـن الاخوان المسلمين بجامعة الخرطوم والشرطة بسـبب اصـرار التنظـيم علي تـخريب السـينما لانـها مفسـدة ووجـودها حـرام داخـل منطـقة الحـرم الـجامعي!!!

لك مودتي.

لياليها ....
---------------

المنتدى العام ل(سودانيز أون لاين ) دوت كوم.
مكتبة طلال عفيفي (طلال عفيفي):

لياليها ....

29-08-2004.
طلال عفيفي.


الوطن كان جميلاً ...
مدروزاً بالناس ...
وكانت المدينة العاصمية مشغولة بالشوام والأرمن والأغاريق واليهود
يفتحون أفواه الدكاكين على شهية الرزق اليومي ..
أتذكرون ؟
" كونت موخلص " و أبناء " فانيان " و " عبد الله أزرق " و " سركسيان "و " شاوول " ..؟
أيام كان للمدينة شنه و رنه ..
لياليها كان التعدد حقيقياً و صاحياً في شوارع الجمهورية و السوق الأفرنجي .
لياليها , كان يتجول أولاد البلد في الخرطوم على مهلٍ مهيل ..
الحلب في بحري يرسمون خارطة شرق النيل بموده ..
يساكنون الأقباط في حي المسالمه ويستيقظون على جرس الكنيسة أيام الأحد في الأملاك ..
لياليها .. كان للمخمورين مراتعهم , عند " البستان " و " أتني " و " كوبا كابانا" , وللمتدينين مواقعهم في المورده عند المسجد الإدريسي و فضاء جامع بحري الكبير .
كان موسى بدينه وعيسى بدينه , وكل نفس بما إكتسبت رهينه .
كان حسن عطيه في جهة و الشيخ صديق أحمد حمدون في جهة .. والقلوب , كلها ,أنضر ما يكون ..
( وكان للشيخ صديق أحمد حمدون مسارات صوتيه تصعد بالجمال القرآني إلي حده الأقصى ) ..
...........................................
كان هناك السوق العربي والسوق الأفرنجي .
الأول تتجول فيه البهارات والخضروات ويعتليه الزنك ( فسُميَ بسوق الزنك مجازاً ) .
الثاني , الأفرنجي , كان مرتعاً للسلع وارد بلاد الآخرين : مراوح توشيبا , أقمشه من مفتخر القطن الإنجليزي , و راديوهات ناشيونال التي ساهمت بضراوه في تضخيم الوعي السياسي ببثها لأخبار إذاعة لندن ...
...........................................
لياليها كانت الأحزان هي الأحزان ( سوى كونها كانت شفيفة ) تلبس ثوباً أبيضاً وكان الناس
يقرأون الفاتحة على مهل .
..........................................
كان أثرياء المينة معدودين ..
نعرفهم واحد .. واحد :
السرعباس . عبد المنعم محمد . مأمون البرير . قارو فانيان . الشيخ مصطفى . كونت مخلص .سعد أبو العلا . والشنقيطي , و طه الروبي .

كان ذلك قبل أن يأتينا رجل من آخر المدينة يسعى ويشتري البلاد بما عليها من إنس وجان ,و تؤول إليه ملكية مؤسسات قامت على أكتاف شعب كامل .
...........................................
...........................................
لياليها .... كان لنا أب و أم و عمة وخال .
ولنا أصدقاء , نعرفهم من أيام الدراسه في خور طقت والقديمه والأهلية والمؤتمر ومريدي وحنتوب وكمبوني ومدرسة فاروق .. (وذلك قبل أن تداهمنا الدنيا بالقبس والفاروق والخنساء والعربيةالدبلوماسية الإبتدائية .. ) , هذه الأسماء العجيبه وكأننا في مكه , عدم المؤآخذه .
..............................................
..............................................
حتى الخمر كانت طيبه .
ليست كخمر هذه الأيام الرديئه الحاقده .
خمر الأيام القديمه كانت وريفه , حنينه ذات سعرات كحوليه كافيه لجبر الخاطر دون التسبب
في ما يعرف جنائياً بالأذى المباشر الذي يسببه العرقي .
كان القوم يشربون الويسكي في علياء أرستقراطيتهم البائده , على درجه أقل كان الشيري أكثر إنتشاراً و إلتصاقاً بالجيوب الرقيقة الحال , سوى ان بيره أبو جمل كانت قاسماً مشتركاً للأمزجه العاصميه يأدون بها سطوة الحر ويعالجون بها إلتهابات الكلى بإعتبار البيره من مدررات البول المعروفه . ( فيما بعد , وعلى إثر تطبيق قوانين الشريعة السمحاء , تحول مصنع البيره العظيم الى مصنع تافه لمياه غازيه أكثر تفاهه لا تعالج المزاج ولا تدر البول ) ...
ومن شمالات البحر الأبيض , جاءت تلك الخمر القبرصيه محمولة على تجارة الساحل لتدلي بدلوهافي شأن المزاج العاصمي ..
كانت خمراً رخيصه يتكيء عليها وعي الطلاب فيغيب . ويشتكي لها تعب العمال فيتلاشى .
إسمها كان " دموع المسيح " ..
إختفت أيضاً في ذات الملابسات التي إختفى فيها كل شيء .
................................................
................................................

وكان هناك :
كازينو النيل الأزرق .
على تخوم النيل .
عند بحري .
فيه يلتقي العشاق .
طيبين كما الندى .
يُقدم لهم مشروب الجنجر و ال " دبُل كولا " , على يد جرسونات لا يعملون في النظام العام .
وكانت يد الحبيبه متاحه ( دون إخلال بالأمن الوطني ) .
...............................
الخرطوم :
أين أنت ..
يا تلك المدينه الزاحفة للسراب .
سبحانك .
كنا نحبِك ..
فلم هذا العذاب ؟
...............................
...............................

لمن تكون ماشي في الخرطوم وترهف السمع للصدى الليلي
سيساورك شك حزين بأن ليلا ما هنا كان في حياة ما .. ستحدثك بذلك
اليافطات القديمه والمباني ذات النوافذ العاليه .. فندق أكروبول
الذي لسه ما زال يحتضن زبائنه برفق , وممرات عمارة صحاري .صورة
الخواجه " كرياكو" بزيه البحري معلقه على جدران كافتريا كوكي بيرجر
التي تديرها ابنته "ماريا" بصوتها العالي الفيهو جرس يوناني جميل .
سيحدثك المعمار الشاهد .. الحجر السميك .. العناوين المنحوته ..
وعيون الناس الذين تسرب من أيديهم ذلك العصر مثلما تسربت منهم بلاد بأكملها ...
..................................
..................................

ثم تأتيني اليوم بذلك الLink العجيب والذي فيه صور كمبوني زمان
في خرطوم زمان , وكمبوني مدرستي , فيها تعلمت الانحراف والتدخين
وكراهة السلطه وانتظار الحافلة التي تقل البنات من ٍsister school
لأسلم حبيبتي خطاباُعاطفيا يدا بيد .. كان البنات أيامها يا عادل
يرتدين تلك المرايل السماوية اللون المسبعه عند الصدر .
لياليها يا عادل كانت العواطف على الهبشه .
لياليها كان قلبي يخفق بقوه حين أراها, ويداي تبردان وأحس بحاجه دافيه تحت الحجاب الحاجز , كان العشق عضوياياناس ..
.........................
.........................

للمدن وجه واحد في روحي , سوى أنها التجليات , كل مكان له ذبذباته
الخاصه ,موجات ارساله الخاصه , وهناك مدن مشفره , لا تهب سحرها الا
لمن تحب من البنات والرجال .
هناك مدينه زي الاسكندريه تشبه الحلم أكتر من أي حاجه تانيه .
هناك مدن يحبها ناسها وتحبهم زي بيروت .
هناك مدن مجروحه مثل جوبا وكابول .
ومدن كالأرامل : بغداد ..
ومدن ومدن ومدن
وبلاد وناس
ودنيا ...
ورب حليم ستار .
...................................
....................................

الخرطوم مدينة فقدت هويتها
مدينة اجليت عنها حيواناتها و منزلهم اعامر قرب النيل ليحل مكانه ذلك البرج الأسمنتي.
غابت الألفة في هذه المدينة فالكل غريب و لاأنيس
الخرطوم مدينة ضرب علها الحصار لفترات طويلة فانتقل الحصار الي داخل الأشخاص فصرنا حبيسي انفسنا
مازال متنفسي الوحيد في هذه المدينة كوكي بيرجر ، ادخل خفيفا متأبطا جرائدي فيناديني يحي و هاشم مرحبين .
الخرطوم مدينة الغرباء ، مدينة تنتابك فيها الحيرة حين تتسائل اين اذهب هذا المساء
لعجبي ان المساء قد اختفي من الخرطوم ،

يدهشني ان الخرطوم لا رائحة لها رغم ان كل المدن الي زرتها لها رائحتها المميزة.
الخرطوم مدينة مأزومة ، مكتومة ..... تقاتل كي تتنفس
ياليت لو يتركوا الخرطوم عاصمة الثقافة العربية و يعيدوا لنا مدينتا التي سمعنا عنها

لكل مدينة وجهان
وجه تتعامل به مع التجار و الباعة الصغار
و مسابح الكهان
ووجه ينتظر ان يعيد نفسه في الأنسان

يا مدينتنا ذات الوجه الواحد
ان كان ثمة ما يعيد الينا وجهنا
فذلك هو ان نعرفك
في وجهك الواحد
هذا الحد الأخير المتبقي لنا
اتمني ان التقيك مرة اخري في الخرطوم
......................................
.....................................

فهل ياتري قد تلاشت الكيرتوم ؟
أم فضلت الإختباء إلي حين ؟
كعروسة (محبوسة) تتجمل بإدمان وتنتظر يوم الدهشة ؟
أم غرقب في النهر قرباناً كرجاء .. إنهم سيأتون... ؟
إستقصيت أمرها وأنا منهار الخيال..
فقال لي خرطومي عتيد: أنسى بس.
من أين أتي هؤلاء؟
حتي رائحة المدينة
وسياراتها
وأغنيائها
تبدو غير حقيقية
إجتمع أهل السودان فيها وحولها يخافون الطوفان.
هل أصبحت سفينة نوح.
متى يرحل هؤلاء هؤلاء... ؟
ومتي ستشرق الخرطوم من غروبها وتأتينا من نقطة ما في الماضي فنعيد مامضى ؟

............................................
...........................................

من هم اول من سكن الخرطوم وماذا تعرف عن تاريخ الخرطوم انتظرونى

تعرف يا بكرى .... عرفت اللعبة .... ادوس ليك الزر و إنت تبهل المعلومات , لكن ماشاء الله مرجع ,اشهد ليك وأنا الخرتومى قبل ما اكتروا الناس.
رايك شنو فى المدخل (الزر)ده؟؟
الكبارى فى مدينة الخرطوم هى كبرى برى و كبرى المسلمية و كبرى الحرية و اقيمت على بوابات سور المدينة فى الفترة التركية فكبرى برى تجاه حلة برى و كبرى المسلمية تجاه مدينة المسلمية اما كبرى الحرية فالاسم ده استحدثة عبود لما شقوا شارع الحرية و الكبرى اقيم فى مكان بوابة الكلاكلة و و بعد نهاية المدينة وضع خط السكك الحديدية ثم قامت بعد ذلك الخرطوم2 و الخرطوم3 و الديوم.
أها كمل يا بكرى و أتحفنا

1975 khartoum sunset on the nile

khartoum north 1925

الخرطوم من الجو 1936

أبوبكر
يا مخزن الذكرى
اتحفتنا بالصور الجميلة دي ونأمل بالمزيد...
نأمل في صور من اماكن مختلفة خصوصا التي تبدلت تماما حتى نرى الفرق؟؟
فين صور المطار،السكة حديد ،المقرن والقصر الجمهوري وموقع المتعة الحدائق النوادي والفنادق...
لكم التحية...

Quote: بالمناسبة لما جابو السلم التعليمي الجديد بتاع محي الدين صابر انا كنت في سنة اولى وسطى رجعونا بقونا سنة سادسة واللة زعلت زعل الواحد كان قاشر انو في الوسطى و خاتي كتاب man and pan قدام عشان الجكس يقوموا يرجعوك سنة سادسة

يا فيصل إنتو أحسن مننا (الدفعة الوراكم) ...

لأنو كنا في سنة رابعة أولية، ولحدي نص السنة ماعارفين حنمتحن شهادة (إمتحانات اللجنة) والا لأ. لحدي ما ثبت القرار، واتأخرت قشرتنا بالوسطى، وقرينا خامسة وسادسة (أول دفعة تقرا بالنظام ده) وبعدها بدل الوسطى مشينا الثانوي العام.

Quote: في عام 1979 وقعت مشادة حادة بيـن الاخوان المسلمين بجامعة الخرطوم والشرطة بسـبب اصـرار التنظـيم علي تـخريب السـينما لانـها مفسـدة ووجـودها حـرام داخـل منطـقة الحـرم الـجامعي!!!

وحسع بقت حاجة كده تبع الدفاع الشعبى زى ما مدرسة الخرطوم الاهليه بقت مفوضيه ايه ماعارف

ولا تذكر ال BN والا يذكر لسان طلعت تلك القطعة الممتده الى داخل الجروف وتعاين النيل بشموخ , قبل مدخل وزارة التربة والتعليم زمان وزى ما عرفت ملكوها لصاحب كازينو , يعنى شوف من الزمن داك طلعت فريد عليه رحمة الله اطلق تعليقه الشهير اثناء خروجه من الوزارة بعد حضوره حفلا دعى له ووقع نظره على الارض المسطحه وممتده الى ناحية النيل قائلا الحته ده تنفع للقعدات والسمر واشار اليها بلسانه فصارت تعرف بلسان طلعت

شايف يا حسن عبدالله ,,,البوست ماشى تمام والجماعة بهلوا الذكريات بالقفف واظن فى واحدين دموعهم جرت من الكان زمان ,,, اولاد الزمن ده لمن يشوفوا صور الخرطوم زمان وكيف كانت نظيفه ومعروفه بانها انظف عاصمه فى الوطن العربى تفتكر بقولوا شنو ولا ممكن يصدقوا انو العاصمه يوميا الساعة 4 مساء عربات الرش يتغسل الشوارع ؟؟؟
ياخى شكرا ليك وللبوست ونتمنى المزيدمن المداخلات والذكريات ,,

عزيزي حيدر
والله اشتقت لمداخلاتك... من غير تحدي طبعا انا اعترفت انك موثق لا تضاهى.
كنت متوقعك تعلق على بيت البكى الانفتح علينا دا؟؟؟؟؟؟
ناس وليم اندريا وبكري الصايغ عملوها لينا مناحة بكاء على الاطلال. وكل الحنين كما يبدي هو للوسكي والبيرة ابو جمل....
وانا كنت دائما بعتقد ان لو كان في حسن واحدة عملها نميري هي انه انتهي من حكاية الخمرة دي!!!!! ناس كتير حيزعلوا مني لما يقروا الكلام دا.....
بس بالله تصور لو كان لليوم الناس من المغرب في الخمارات او الناس الرايقة في النوادي الليلية؟؟؟؟ دائما يخطر ببالي رائعة محمد المكي ابراهيم قطار الغرب وخصوص لما وصل القاطر مدينة الخرطوم وهي في المدينة التي يبكي عليها الاخوان بس من زاوية مختلقة/ قال ود المكي
ونزلنا هناك بلا استقبال
فتزكرت الحشد المتدافع في أحدى السندات
قد عاد افندينا ابن القرية

فهل نظر الاخوان بهذه العين وهل اعادوا النظرا للخرطوم ليروا الجمال الذي كان والذي لازال؟؟؟ الا يكفي انها عاصمتنا؟؟؟ الا يكفى انها فعلا تتقدم فقط لو تنظر الانسان تحت اقدامة سيرى الجمال في الناس فهو لم يذهب مع البيرة ابوجمل لا زال يسكن هنا في كل زاوية وفي عيون الناس الحلوين.....

(...ناس وليم اندريا وبكري الصايغ عملوها لينا مناحة بكاء على الاطلال. وكل الحنين كما يبدي هو للوسكي والبيرة ابو جمل....)!!!
(حسن عبداللـه).

**************************
حـسب اللـه ونـعـم الوكيل.

اخـي حـسـن،
لقـد دخـلت هـذا (البوسـت) الـجـميل بـكل أدب وأحـتـرام لاشارك فيـه بـما اعـرف وبـما رأيته فـي خـرطوم زمان...

فـما وجـدت مـنك مـع الأسـف الشـديد الا عـدم الاحـتـرام... عليـه وتـمامآ كـما دخـلت باحـتـرام.... اغـادره متـمنيآ لك التوفيق فيـه.

لك ولك الـمشاركيـن الـمودة والتقـدير.

حسن.... ياخي بالغته عديل...منوالعمله مناحه...الله يسامحك... ياخي فكرك راح لبعيد خلاص ...انا شخصيا لم اكن وفي يوم من انصار هذا الشي قبل ان اغترب وبعدان اغتربت... وحرم تظلم مساحات من الاحترام والتقدير

لا لا لا يا بكرى ,,, حسن ما يقصد كده بس الراجل قصدو تنوع المواضيع واهو نحن ماشيين كويس من الشوارع للمحلات والمحطات للعربات والاحياء السوق عربى وافرنجى ولسه راجيانا الميادين والكوره وشوية صور لاهداف جكسا ولقطات سبت دودو ( مجلة عالم الرياضه) والفنانين والغناء ( مجلة الاذاعة والمسرح وبعدين بقت الاذاعه والتلفزيون والمسرح ) الكلام ده كله جاى فى الطريق....بعدين باخى خلى الاجيال تستفيد والماعندو قديم ما عتدو جديد,, ولا شنو
يا خى ده ماضى ابوالعزائم كان بكتب من فرنسامع يعثة الفريق ويادوبك واصل الدوحه,, قول خير والعن ابليس وواصل معانا المشوار,,,
ما تتدخلوا يا ناس,, فيصل وبكرى , ماضى و وليم اندريا,,,,,

الأخوان الأجلاّء .... بكري الصائغ ووليم أندريه ...

ما أحسب أن الأخ حسن قد أراد التقليل من شأنكما .... وأحسب .. وأتمنى أن يكون قد خانه التعبير .. وميزان الكلام.

أقول هذا .. ولا ألومكما ... وأذهب لأبعد من هذا وأقول، إذا كان الأخ حسن يصر فعلاً على المعنى غير الجميل الذي وصلكما، فإني منضم إليكما ومغادر البوست.

أتمنى أن أسمع منكم جميعاً ما يهدئ النفوس ويصفيها....

شكرا لك عزيزي ابوالريش
صدقت والله لم اقصد ان ازعل احد اوحتى اقلل من مداخلة اي واحد...
ومتأسف للجميع اذا كنت جعلت احد يشعر بذلك ...
وفوق دا وداك البوست للجميع وليس انا الا وحد مثل الاخرين...
ونأسف للجميع وبقول كما كنا نقول في الايام الجميلة
ندمان وسافي التراب للاخواين وليم والصايغ بصور خاصة لكل رواد البوست...

الاحباب......انسحاب... ونشوفكم في بوستات تانيه فيها احترام وتقدير للغير في هذا الفضاء الاسفيري

جامعة الخرطوم لما كانت كلية غردون في الثلاثينات

اها سوق الخرتوم زماان

Quote: ناس وليم اندريا وبكري الصايغ عملوها لينا مناحة بكاء على الاطلال. وكل الحنين كما يبدي هو للوسكي والبيرة ابو جمل.... وانا كنت دائما بعتقد ان لو كان في حسن واحدة عملها نميري هي انه انتهي من حكاية الخمرة دي!!!!! ناس كتير حيزعلوا مني لما يقروا الكلام دا..... بس بالله تصور لو كان لليوم الناس من المغرب في الخمارات او الناس الرايقة في النوادي الليلية؟؟؟؟ دائما يخطر ببالي رائعة محمد المكي ابراهيم قطار الغرب وخصوص لما وصل القاطر مدينة الخرطوم وهي في المدينة التي يبكي عليها الاخوان بس من زاوية مختلقة/ قال ود المكي

يابوعلي .. ربما انا اكبركم عمرا هنا وزول دخل المدرسة مع الاستقلال وعشت في الخرطوم طفلا قبل الاستقلال وصبيا وشابا وخرجت ..يعني شاهدت الخرطوم في زمانها الذي يراه الكثيرون هو الاحسن وبسببه فتح هذا البوست ... كل ذاك الزمان استمر حتي السبعينات وجزئيا الثمانينات فلقد كانت نهاية السيعينات بداية مشاكل السودان الاقتصادية .. ما اقصده الخرطوم زمان والذي نراه جميلا كان بكل الذي ذكره بكري ووليم وطلال ..الخ كان جميلا بكل المفردات ولم تكن الخمارات ولا البارات هي العامل الرئيسي في ان تكون جميلة ولكن كانت من ملامح تلك الصورة .. فنحن هنا ناخد الصورة بمجملها بمساجدها وكنائيسها وخماراتها وباراتها واسواقها ومدارسها ...ليس كل اهل السودان يرتادون الخمارات والبارات ولم تكن تلك قضية وانما اخذها نميري كذلك ليصرف النظر عن سوء ما يفعل و ليحسن صورة له قبيحة مليئة بدماء وفساد وسوء ادارة ولكن رغم ذلك لم يقدر علي ان يحتال علي الشعب وفي اقل من عاميين من اغلاقه للخمارات والبارات انتفض الشعب عليه وطرده ليس لابقاء الخمارات والبارات ولكن لتعود للخرتوم بهجتها وبهاءها من خلال ادارة شعبية . ..كانت الخرتوم لكل اهل السودان بما فيهم مرتادو تلك الخمارات ..واليوم صارت الخرتوم وهي بدون خمارات وبارات هي التي نهرب منها كلناوفينا من لم يدخلها ولم يذقها مطلقاعندما كانت متاحة للجميع ..ها نحن الان نهرب منها من خلال استذكار صور زماان اذن فلا الخمارات ولا البارات هي التي جعلتها جميلة في الماضي ولا خلوها منها جعلتها جميلةالان ...
___________
حاشية : الاستاذ ابوبكر سيد احمد الصائغ (بكري الصائغ) موثق في بلاد ما زال تاريخها شفاهيا يحاول ان يجمع الاف بل ملايين القطع من احداث ووثائق وكتابات متفرقة اسفيريا ومطبوعة وهذه محمدة فيها كثير من ايمان وحب للوطن ...ولااظن ان وليم يبكي علي خمارات الخرتوم فهو في عالم اوسع ليس للخمارات والبارات فيه حيز معين بل في كل ناصية والا لكان ان اكتفي بها ولكنه ان بكي وناح فعلي عاصمة لبلاده كانت جميلة في نظره واجمل من تلك التي هو فيها الان بخماراتها وباراتها في كل ناصية وحدب ...

ولنواصل ان اردت في ذكري تلك العاصمة في صورتها دون ان نستقطع منها جزء فالصورة الكاملة هي الجميلة

مودتي

ابوبكر سيداحمد محمد

لكم العتبى حتى ترضوا....
لم اقصد اطلاقا التقليل من قيمةالمداخلات بل انا سعيد بهاكما الجميع وفق مسار البوست.
بس كما ما ممكن يكون جمال الخرطوم محصور في حاجة واحد او اتنين؟؟؟؟؟
انا مثل كل واحد منكم فخور بانني عشت ذلك الزمن الجميل، بكل ما فيه؟؟؟
بس دايما بشعر ان الخرطوم كانت وستعود درة كما كانت...
صحيح ان كل ذلك كان من جمال الخرطوم...
بس عايز نسمع كل شئ ونرى كل شئ ولا نحصر نفسنا في حاجة واحدة...
اسف اذا كنت تعديت على حرية اي منكم وكل المداخلات مسموح بها وكذلك التعليق عليها...
وادعو الجميع للعودة فلازال هناك الكثير يمكن ان يظهر من كنوز الذاكرة او من المخازن العهد الجميل...
ونأسف مرة ثانية وثالثة وللمرة الألف...
حسن

عزيزي بكري
تعظيم سلام لك وللباقات الجميلة وصور الخرطوم الجميلة.
دا اكيد انك عندك المزيد وشكلك كمان منوع ما تركت حاجة ما عملت ليها توثيق...
والله يكل رسالة منك تعيد عهد من الذكريات.
نرجو المزيد.....

ونواصل

المريديان ...زمان شوية

عزيزي ابوبكر
لك الود والشكر الجزيل على الصور الوثائقية دي والله حاجة تفرح..
سألت كم مرة شنو كان موجود في موقع قاعة الصداقة وفي موقع المتحف القومي قبل بناءهما؟؟؟؟
اكيد فاكر يا اخ ابوبكر وطبع الواحد ما يتوقع يشوف صور بس عايز اتذكر الموقعين فيهم شنو؟؟؟؟

يا جماعة خلاص باركوها ويلا نكمل المشوار

عزيزي الموثق حيدر
لك التحية
نحنا مباركنها وبيني وبينك الناس ديل بحبوا الخرطوم واكيد بيجيبهم الحنين...
بس قول انت عندك شنو؟؟؟؟
عايزين حاجة كدة من بيت الكلااوي زي ما كانوا بقولوا زمان..
فاكر مطار الخرطوم زمان قول واكيد اخونا ابوبكر عنده الصور بس انت احكي قول حاجة اي حاجة...

حيدر
الصايغ
ابوبكر
ماضي
ابو العزائم
اليكم ذكري مهمة في تاريخ الخرطوم


الله لي الطيارة جاتنا هجوم

الله لي كشفت على الخرطوم

الله لي كتلت حمار كلتوم ست اللبن

الله لي الطيارة جات بدري

الله لي كشفت على الكبري

الله لي المدفع الجبلي

الله لي خلى البحر يغلي

السادة رواد الخرطوم زمان
واحد يقول لينا ماذا كان في موقع قاعة الصداقة وماذا كان في موقع المتحف القومي حاجة ما قديم بس ناسي ايه كانت؟؟؟؟
فكرونا الله يديكم الخير..

Quote: واحد يقول لينا ماذا كان في موقع قاعة الصداقة وماذا كان في موقع المتحف القومي حاجة ما قديم بس ناسي ايه كانت؟؟؟؟

المتحف القومي في المقرن بني قبل اربع عقود تقريبا قبل ذلك لم اري مبني هناك وقد كانت محتويات المتحف موجودة باحد مباني جامعة الخرطوم التي تجاور قسم المعمار من كلية الهندسة والمعمار وهذا اذكره جيدا حيث درست هناك في نهايات الستينات وبدايات السبعينات..بعد فتح المتحف القومي الجديد حينئذاك كانت ادارة من ادارة وزارة المعارف قد انتقلت لذاك المبني ثم صار مكتبا لمدير الجامعة ..

شكرا ابوبكر
بس قاعة الصداقة احدث كثير ويجب ان يكون الواحد متذكرها. بس العقل بقى يودر.
لقيت صورة للزعيم ازهري وهو يرفع علم السودان للاستقلال لكن للاسف لم استطع ان احملها...
لو ممكن اعانه...

حيدر وين توثيق عن الاستقلال انت اكتب وبوبكر عندة الصور....

ذكري الاستقلال والتحية للنخبة التي اتت به.

محمد أحمد محجوب

محمد أحمد محجوب ولد عام 1908م بمدينة الدويم بولاية النيل الأبيض وتخرج في كلية الهندسة بكلية غردون التذكارية عام 1929م ،كما نال الاجازة في الحقوق عام 1938م، عمل في مجال القضاء حتى استقال عام 1946م ، ليعمل بالمحاماة عام 1947م ثم انتخب عضواً بالجمعية التشريعية واستقال منها عام 1948م .تولى منصب وزارة الخارجية عام 1957م وفي حكومة أكتوبر تولى منصب وزارة الخارجية في عام 1964 م،وفي فترة الديمقراطية الثانية تولى منصب رئيس الوزراء عام 1967م ،وتولى المنصب مرة أخرى عام 1968م إلى جانب مهام وزير الخارجية . من مؤلفاته مقالات في صحيفة النهضة وفي مجلة الفجر وكتاب (الحكومة المحلية) كما اشترك مع عبد الحليم محمد في كتاب (موت دنيا) ، له كتاب (الديمقراطية في الميزان) باللغة الإنجليزية Democracy on Trial وله أشعار كثيرة وديوان (الفردوس المفقود) . توفي عام 1976م .

أكتوبر 1964
في نحو الساعة التاسعة من ليل الأربعاء 24/ أكتوبر 1964 كان اتحاد طلبة جامعة الخرطوم يعقد اجتماعا في داخلية عطبرة لبحث مسألة الجنوب عندما أمرهم البوليس بفض الاجتماع فلم يفضوه ... اقتحم البوليس الندوة وطوف المكان بالسلك الشائك وألقى بعد ذلك القنابل المسيلة للدموع فهرع الطلبة إلي حجراتهم ثم عادوا ووقع بينهم وبين البوليس صدام استخدم فيه الطلبة الحجارة والزجاج الفارغ واستخدم البوليس القنابل المسيلة للدموع مرات ومرات.
استمر هذا الصدام نحوا من ساعة ثم انذر الضابط المرافق للبوليس الطلبة بانه سيستخدم الرصاص ان لم ينفذوا التعليمات بعدها أمر بإطلاق النار واستمر الضرب بعض الوقت ...قتل الطالب احمد قرشي وجرح أخرون جراحا متفاوتة وأعلن رسميا أن عدد المصابين من رجال البوليس كان ثمانية وثلاثون ولكن لم يحجزوا احد منهم بالمستشفى.
تأخر نقل الطلبة المصابين إلي المستشفى لان البوليس كان قد اقفل الأبواب ومنع دخول الإسعاف إلا بعد مضي بعض الوقت واعتقل أربعة أطباء كانوا في طريقهم لإنقاذ الطلبة.... أجرت سلطات المستشفى ليلة الحادث عمليات سريعة للمصابين وصفت حالة بعضهم ليلة الحادث بالخطورة. نقل لأحد المصابين كميات كبيرة من الدم اشترك في عمليا العلاج كل الأطباء بالمستشفيات الحكومية والأطباء الخصوصيين.
كانت سلطات الجامعة قد أغلقت نادي الطلبة تفاديا لعقد الندوات وعندما علم الناس ليلا بوقوع الإصطدمات خفت جموعهم إلى المستشفى ...
الطلبة الذين أصيبوا في الحادث هم:
بابكر حسن _ خالد نجم الدين – حسن الوديع السنوسي – عثمان البلك - خالد الحاج – علي ابراهيم - أحمد محمود - حمزه عبدالله كنه – أحمد البشرى – محمد الحسن محمد سعيد – جلال الدين عباس – النور عبدالخالق – حمد أحمد المهدي – عبدالعزيز محمد فرج – حسن أحمد عجبنا – سليمان عبدالواحد – والانسة سهام مصطفى الاصاوي....
نقلا من كتاب خريف الفرح للصحفي عبدالرحمن مختار

يواصل الصحفي عبدالرحمن مختار مذكراته عن اكتوبر....
أصدر وزير الداخلية في 24/10/1964 حظرا للتجوال في المدن الثلاث من الساعة السادسة مساء وحتى الخامسة من صباح اليوم التالي وكان الوزير فد اصدر امرا منذ صباح الامس بمنع التجمهر لاكثر من عشرة اشخص الا فيما يتعلق بالعبادات والافراح وما إليها.
في الخرطوم تظاهر القضاة والمحامون واساتذة الجامعة والمعهد الفني وبعض موظفي مكتب النائب العام وسيروا موكبا ليحمل عريضة منهم الي القصر الجمهوري حول الموقف وقد تجمهروا امام الهيئة القضائية لامر الذي دعى رجال البوليس لتطويق المكان فامره القاضي عبدالمجيد امام بالانصراف ثم جاءت قوات الجيش ومنعت الموكب من التحرك واطلقت بعض الطلقات النارية في الهواء.
جرت على اثر ذلك مشاورات شترك فيها رئيس القضاء وانتهت إلي ارسال مندوبين من السادة عبدالمجيد امام من الهيئة القضائية وعابدين اسماعيل من نقابة المحامين والدكتور طه محمد خير من اساتذة الجامعة والدكتور طه بعشر من الاطباء وممثلين لاساتذة المعهد الفني ومكتب النائب العام لتقديم العريضة.
اعلن هذا الحل عن مبدا الاضراب السياسي العام السيد عابدين اسماعيل.
وعلمت الصحافة ان مجلس الوزراء عقد اجتماعا ظهر الامس لاستعراض الموقف وانه سيجتمع اليو ايضا.. قامت مظاهرة على اثر انفضاض موكب الامس فرقها البوليس باستخدام الغازات.

هاتين الصورتين لتمثاليين احدهما لغوردون (راكبا الحصان) والثانية لكتشنر (راكبا الجمل) اصرت سلطات ما بعد الاستقلال لاعادتهما الي بريطانير ا!!!! وربما السودان من ضمن دول العالم التي استعمرت والكثيرة هي الدولة الوحيدة التي فعلت ذلك بحجة ان التمثاليين يستفزان مشاعر المواطنيين !!!ونسو ان بقائهما كان اجدي لتذكيير اجيال من اتت بعد الاستقلال ببعض من تاريخ بلادهم .

وشئ اخر اطاحت به سلطات ما بعد الاستقلال هو الترام الذي كان يربط الخرطوم بامدرمان!!!ولا اعرف ما هو السبب ..
بؤس القرارات التي تلت الاستقلال بواسطة سلطات سودانية هي التي جعلت بتكاثرها وتراكمها السودان في حالته البائسة اليوم ..الهرولة نحو كراسي الحكم وسوء ادارة البلاد هما التمثاليين الوحيدين اللذين اشادتهما سلطات ما بعد الاستقلال ...

عزيزي ابوبكر
لك كل الود
كم سعدت بالصورتين رغم انهما تعيدان ذكرى الاستعمار. وانا سألت عنهم كثير....
بس ما معاك في حكاية بقائهما بالسودان فرغم انهما مجرد تمثالين لكنهما كان يمثلان الاستعمار بكل ذكرياتة المؤسفة...
لا زلت اذكر يوم رحيلهما ونحن اطفال نودعمها بمحطة السكة حديد بحري صححني لو غلطان فالذاكرة اصبحت خربة.

لا زلنا ننتظر المزيد من مخزن الذكريات...
لك الف تحية

مداخلة عن أكتوبر يا محسنين!!!!

محمد المكي إبراهيم
[email protected]

في الحادي والعشرين من اكتوبر 1964 عقد طلاب جامعة الخرطوم ندوة سياسية داخل القرية الجامعية وبحكم توقيت ومكان انعقادها (الثامنة والنصف مساء في السكن الجامعي الشرقي البعيد عن الشارع العام) فقد اقتصر جمهورها على طلاب الجامعة وحدهم دون مشاركة من بقية قطاعات الجمهور. ورغم ذلك هوجمت الندوة من قبل قوات الشرطة التي واجهت مقاومة طلابية اضطرتها إلى إطلاق النار على الطلاب مما أسفر عنه سقوط عدد من القتلى على رأسهم الشهيد القرشي. وكان ذلك نقرا على وتر شديد الحساسية في العقل السياسي العام افرز خمسة ايام من العنف والتظاهر في كل المدن السودانية انتهت بسقوط حكومة الفريق ابراهيم عبود العسكرية وعودة الديموقراطية للبلاد.

منذ ذلك التاريخ مرت مياه كثيرة تحت الجسور وتعاقبت على حكم البلاد أنظمة عديدة وتقلبت حظوظ البلاد من الحرية الى الكبت ومن الغنى الى الفقر وتعرض ذلك الحدث التاريخي الى النظر وإعادة النظر ولا تكاد ذكرى اكتوبر تهل دون ان تتعرض تلك الاحداث البعيدة لتقييم جديد يرفع أو يحط من القيمة التاريخية للثورة التي اعتبرها الكثيرون ابلغ تعبير عن روح الشعب السوداني وتوقه للحرية واستعداده لتسديد ثمنها بالأرواح والدماء.

ماذا حدث إذن في السودان في 21 أكتوبر 1964 ؟ هل كان ذلك واحدة من معجزات العصور القديمة التي فقدت قابليتها للتكرار؟ هل هي خطأ تاريخي كبير هب فيه السودانيون مدفوعين بحرد صبياني ليطيحوا بالمستبد العادل الوحيد في تاريخ السودان قديمه وحديثه؟ أم هي هذيانات معاصرين للحدث دخلوا مراحل الكهولة والشيخوخة وراحوا يتعصبون للزمان الذي عاشوه وحسبوه أفضل الأزمنة واعتبروا ثورته أفضل الثورات؟ أم هو من الأساس أكذوبة افتراها تقدميون مزعومون ليسلطوا بها سيف الفوضى على كل حكم رشيد جاء في اعقاب ذلك الحدث التاريخي الفريد؟

قبل أن نتقدم في هذا الطريق دعنا نلاحظ ما ظلت تحظى به ثورة اكتوبر من الهجوم والتبخيس خلال السنوات الأربعين الماضية فقد تظاهر على الحط من شأنها يمينيون ودكتاتوريون وآخرون كانوا لردح من الزمن محسوبين على ما سمي في حينه باليسار الجديد. وتمسك شكلانيون بحرفية مصطلحات العلم السياسي لحرمان اكتوبر من وضعها كثورة والهبوط بها الى مستوى الهبات العابرة والانتفاضات ولكن اكتوبر برهنت على بقائية مذهلة فما زالت أفكارها تلهم الشعب وتملأ شرايينه بالطموح ولا زالت موجودة في ميزانيات أجهزة الأمن والقمع الجماهيري بوصفها الخطر الأكبرالذي ينبغي ان يتحسب له كل من يريد البقاء على كرسي الحكم . ومن عام لعام يقوم أعداؤها بدلق الحبر الأسود على الورق الابيض لهدم أسطورتها واقناع الجمهور بأنها وهم او خطأ او سراب.والآن مع تباشير ذكراها المتجددة دعونا نستعرض خلفية ما جرى وما قيل عنه وما يقال.

لنبدأ بالنظام الذي تصدت له الثورة وهو نظام جاء الى السلطة بانقلاب عسكري في 17 نوفمبر 1958 واضعا نهاية مفاجئة للديموقراطية التي أفرزها استقلال البلاد في مطلع عام 1956 ومهما قيل الآن عن ذلك النظام فانه لم يكن في زمانه افضل الأنظمة وأزهاها ولكنه بتغذية استرجاعية فاسدة أصبح فعلا أفضل ما مر على السودان.وليس ذلك من مسئولية الثورة مثلما أنه ليس من مسئولية الثورة الفرنسية ان الملكية عادت بعدها الى فرنسا وان افكار العدل والاخاء والمساواة التي جاءت بها لم تعمر طويلا وانتهت بقصف دمشق وقمع الجزائر.وبالمثل ليس من مسئولية الثورة الاكتوبرية ان الديموقراطيات التي تلتها كانت ضعيفة متهالكة وان الدكتاتوريات كانت شرسة وفاشلة.

كان نظام الفريق عبود امتدادا للدولة الكولونيالية المو######## حديثا عن الاستعمار البريطاني بكل قدراتها ونواحي ضعفها فقد تميزت الدولة التي ورثها الفريق برصانة ادارية ونواة اقتصاد حديث غير مترهل ويكاد يخلو من الفساد مع احتياطيات نقدية كانت تعتبر الغطاء الحقيقي للعملة الوطنية.ومع تلك المزايا ورث النظام طاقات أمنية وقمعية محدودة فلم يكن له جهاز أمن ومخابرات متقدم وكان جيشه صغيرالحجم وموجها بالأساس للأخطار الخارجية وحين حاول عبود استخدامه للقمع الداخلي تمرد شباب الضباط وانضموا عمليا الى الثوار.

لا جدال ان الرئيس عبود تميز بروح أبوي عصم نظامه من التجاوزات القاسية التي مارستها الدكتاتوريات اللاحقة ويروي ابطال حادثة تعذيب جرت في عهده ( ربما كانت الوحيدة) عمق الغضب الذي عبر عنه الرئيس والاجراءات المتشددة التي اتخذها ضد المخالفين. كما أقدم نظامه على عدة خطوات في مجال التصنيع كانت النواة الأولى لصناعة السكروالجلود في البلاد. وعلى عهده أقيم واحد من أهم السدود على النيل الأزرق للتوليد الكهرومائي. وكما كان للنظام حسناته فقد كانت له خطاياه وعلى رأسها استسلامه المتهافت امام السمعة الداوية للرئيس عبد الناصر وقبوله ثمنا قليلا للأراضي السودانية التي أغرقها السد العالي وأقيمت عليها بحيرة ناصر. ومنها اهتمامه الكبير بحركة التشييد التي استفرغت جهد ومدخرات السودانيين وجمدتها في هياكل اسمنتية بدلا من استغلالها في الزراعة والتصنيع. ويذكر للرئيس انه انتقى لنفسه قطعة ارض متواضعة اضطر للاقتراض من المصارف ليشيد عليها منزله الخاص.

كان ثوار اكتوبر يحلمون بديموقراطية عميقة الجذور تهيئ البلاد لتنمية أسرع وأقوى من تلك التي اقدم عليها النظام وكانوا يملكون حلا لحرب الجنوب أثبت فعاليته بعد سقوط عبود بسنوات ومنح البلاد أحد عشر عاما من السلام. وعلى أيامها كانت خطايا النظام مرئية بوضوح تام اذ لم يكن قد اكتسب بعد الأبعاد البيرونية (نسبة الى دكتاتور الارجنتين واسع الشعبية خوان بيرون) التي أسبغتها عليه المقارنة باخفاقات العسكريين الذين جاؤوا من بعده.

والواقع ان الرئيس شخصيا كان سوارا من ذهب الا أن اركان حكمه لم يكونوا جميعا على شاكلته.وبالغة ما بلغت فضائله الشخصية فانها لاتكفي لتبرير العقل المتحجر الذي حكم مسيرة التنمية والاقتصاد خلال سنوات حكمه الست فقد كان من الممكن ان ينجز أكثر وأسرع في ظروف دولية مؤاتية ساهم شخصيا في صنعها بالسياسة الخارجية البراغماتية التي انتهجها بمواجهة الاندفاعات الناصرية والصراعات والملاسنات التي عمت العالم العربي والبطوليات الشخصية وعبادة الفرد التي سار عليها قادة افريقيا الجدد من حوله.

كان رجلا عظيما ولكن الرجال العظماء لايملكون حصانة ضد السقوط.

ماذا حدث ايضا في تلك الايام العظيمة؟؟؟؟؟؟
تفاصيل الايام ومواقف القادة ؟؟؟؟

المظاهرات في كل السودان....

واستقرار الوضع والقيادة الجديدة

قدله يا مولاي حافي حالق بالطريق الشاقي الترام

عزيزي معاوية
لك تحية السودان الحبيب الان وفي الزمن الجميل...
أكيد ركب التراماج كما كنا نقول...
واكيد كنت بتلبت من الكمساري ...
واكيد كنت سعيد بالسفر من والخرطوم بحري للخرطوم وبالعكس..
هل كان يجب ان يستمر كما هو مستمر في اغلب بلاد العالم أم صاح انه اصبح موضة قديم...
الذكريات صادقة ونبيلة...

كتشنر

كتشنرهوراشيو هربرت كتشنر أو اللورد كتشنر (24 يونيو 1850 بأيرلندة - 5 يونيو 1916) كان القائد الأعظم (Field Marshal) للجيش البريطاني ورجل دولة. بدأ كضابط بسلاح المهندسين الملكي ثم عين حاكماً على المستعمرات البريطانية بمنطقة البحر الأحمر في عام 1886 م ومن ثم أصبح القائد الأعلى للقوات المسلحة بالجيش المصري في عام 1892 م.

فهرس [إخفاء]
1 في السودان
2 في الهند
3 وفاته
4 المصادر:



في السودان
قاد كتشنر حملة الغزو الثنائي (البريطاني – المصري) على السودان عام 1898م والتي تصدت لها قوات المهدية في موقعة كرري الشهيرة والتي أسفرت عن نهاية الدولة المهدية ومقتل 22.000 شهيداً من السودانيين و22.000 جريحاً و5.000 أسيراً. وقام بقصف قبة المهدي بأم درمان.

العزيز فيصل
فين انت يا زول؟؟؟؟؟
سمعت ولا جابوا ليك؟؟؟
حرمتنا زمن من مداخلاتك المؤنسة انشاء الله المانع خير..
ظهرت كثير من الصور التي كنا نتطلع لروءيتها منتظرين منك كمان الصور والكلام القديم الجميل...
لك التحية والاجلال

العزيز فيصل
فين انت يا زول؟؟؟؟؟
سمعت ولا جابوا ليك؟؟؟
حرمتنا زمن من مداخلاتك المؤنسة انشاء الله المانع خير..
ظهرت كثير من الصور التي كنا نتطلع لروءيتها منتظرين منك كمان الصور والكلام القديم الجميل...
لك التحية والاجلال

الاعزاء احباب الخرطوم زمان
حيدر وعدنا بالحديث عن الكورة زمان ....
مين بوعدنا بالحديث عن الفن زمان؟؟؟؟؟
لكم وللخرطوم كل الحب

من غير تعليق

الموثق حيدر
شوقتنا والله لمداخلاتك....
وادهشتنا بالصورة اذ لم يسبق لك الحديث عن الفن في هذا البوست. طبعا ليس جهلا به ولكن الاوليات قد تكون قد فرضت ذلك.
اظنك لاحظت ان الشخصيات في الصورة اربعة والاسماء تحتها ثلاثة، فقد اغفل صاحبها ادراج اسم المبدع أحمد المصطفي.
شباب وابداع لم ولن يتكرر . عسى الا يثور علينا المبدعون الجدد في الساحة!!! لا يهم فانا شخصيا لا اعرفهم وبالتأكيد لا يعرفوني!!!!!!
اسعدتنا حيدر

الاخ حسن احمد المصطفى فى السطر الثانى بس ما ظاهر ... وشوف ده كمان .,,,

الكابلى ومحمديه

المبدع حيدر
والله ايقظت في داخل عوالم من الطرب ودنيا من الذكريات.
ابو الامين، ابو عركي والبلابل كانه لحن لم يكتم.
محمدية والكابلي شباب الفن والابداع...
لك التحية

Quote: لو رجعت لمداخلتى الاولى بتلقى صاحب احسن ليمون وشعير عمك الواثق الجيلانى وهو اول من ابتدع قصة الماركه عند الدفع

الاخ حيدر

تماما هو ليمون عمك الواثق و العمارة اسمها عمارة الحلاب و يقابلها من الناحية الشرقية دكان العم سمير احمد قاسم للاقمشة و يوجد مطعم داخل العمارة و اول دكان لبابكر ود الجبل

نفس الشارع يقودك للميدان الغربي حيث مواقف الشجرة الامتداد و الحلة الجديدة

مطاعم ذلك الميدان مطعم الشمالية من ناحيته الشمالية يقابله مطعم الانطلاقة من الجنوب و مطعم الامير في الغرب حيث فرن سيحة الشهير و دكان الانصاري و العم الدابي

شارع هاشم بك ينصف الميدان الغربي يبدا بدكان العم عبدو تادرس و ينتهي ببنك باركليز دي سي او بنك الخرطوم لاحقا و يقودك الي السوق العربي للجملة حيث دكان العمين محمد صالح و بشير النفيدي و اولاد احمد سعد و محمد حسن اللبيب و فندق وادي حلفا لصاحبه عثمان صالح



طبالي و اكشاك الميدان الغربي تم نقلها في اثناء تولي ابوالقاسم محمد ابراهيم الي السوق المسمي حاليا بالسوق الشعبي

استديوهات الخرطوم القديمة للتصوير اشهرها فارتي احسن تصوير وورق مصقول

استديو غردون ( النيل حاليا) جوار محلات جنبرت وهو اول استديو للتصوير الملون بالسودان

استديو بابا و استديو مواهب بعمارة اراك تخصصا في صور الباسبورت و اظن بابا اول من استورد ماكينة التصوير الفوري ( خمس دقايق)

استديو هافانا بالسوق العربي اسود و ابيض

Quote: استديوهات الخرطوم القديمة للتصوير اشهرها فارتي احسن تصوير وورق مصقول استديو غردون ( النيل حاليا) جوار محلات جنبرت وهو اول استديو للتصوير الملون بالسودان استديو بابا و استديو مواهب بعمارة اراك تخصصا في صور الباسبورت و اظن بابا اول من استورد ماكينة التصوير الفوري ( خمس دقايق) استديو هافانا بالسوق العربي اسود و ابيض

الاخ ابراهيم عدلان ,,, اهو ده الكلام وماتنسى كمان من اهم استوديوهات التصوير استديو محمدين شارع الجمهورية

دكاكين الاقمشه فى صف دكان العم سمير احمد قاسم دكان عمنا محجوب احمد الشيخ واولاده , والد زميلنا بالخرطوم الاهليه السر محجوب ,,,, موقف الشجره , القوز المطاعم البلديه وفول القدره المغطيه بكفتيرة السمنه حتى تكون سخنه بالبخار شوف التكنولوجيا كيف زمن جميل شمس الصباح ديك وفول بالسمنه وانت جالس على كنبة خشب وماسك الطاره( العيش المدور ) فى ايدك وتشرب بكوز الصفيح مويه حاره وتغسل من البرميل المختوت فى شكل تربيزه وكمان عاملين ليه حنفيه,, شوفوا الزمن داك كان جميل كيف,,,وعمك جنبرت شارع الجمهوريه اشهر محل لبيع الاوانى المنزليه الحسع الناس بقت تجيبها من الخليج الزمن داك كانت موجوده عند جنبرت ,,, بالله واصل

الأخوة الأعزاء

يظل في هذه الأيام الوصول إلى موقع سودانيز أونلاين صعباً في الدوحة، ولم أستطع الدخول إليه طوال الأيام الماضية.

الباشمهندس أبوبكر ...... لا فض فوك .... فقد عبّرت عنّا كلنا.

الأخوة أبوبكر الصايغ وويليم أندريه ... أتمنى تجاوز هذه الغصّة. وكلنا يعلم أن الأستاذ أبو بكر الصايغ رقم لا يمكن تجاوزه من حيث التوثيق والدقة في ذكر التفاصيل، وقد أثرى الكثير من البوستات بمعلوماته الغزيرة. كما أفرد كم هائل من البوستات التوثيقية في كل المجالات (سياسة - فن - تراث - ثقافة ..إلخ).

تحياتي للجميع.

عزيزي محمد ابوالريش
لك التحية والتجلة والاكرام.
لا احد ينكر براعة الاخر الصايغ، وقد اعتذرنا له في البوست وسجلت زيارة له في احد بوستاته واعدت الاعتذار. نعلم مدى حرصه على نشر الوثائق وتمليك الحقائق للمتابعين. ونامل عودته ونحن في انتظاره ومدخلات الاخوة الاخرين....
ولكم التحية
ناسف للانقطاع الخارج عن ارادتنا....

بقالة الخرطوم
خلف قهوة المحطة الوسطي كان في بقالة صغيرة اسماها حسب ما اعتقد بقالة الخرطوم...
كانت بقالة صغيرة بس مليان لاغاويس (أغلبها هدايا)من الحاجات الكنا نحبها في ذلك الوقت بس كانت رايعة مين فاكرها...
شنو كان اسمها....

غرب البنك الزراعي شارع ماشي من النيل جنوبا الى السكة حديد..
على يمينك مطعم وبار اطلس وشوية جنوبا قهوة الخليج لو انا فاكر كويس كانت ملتقى الاخوة الحلفاوين خصوصا بعد المغرب... ناس تشرب شاي باللبن او حلبة بالحليب... مقابلة لقدام شوية مطعم البحر الاحمر... صاح يا حيدر؟؟؟؟؟

UP

Quote: بقالة الخرطوم خلف قهوة المحطة الوسطي كان في بقالة صغيرة اسماها حسب ما اعتقد بقالة الخرطوم... كانت بقالة صغيرة بس مليان لاغاويس (أغلبها هدايا)من الحاجات الكنا نحبها في ذلك الوقت بس كانت رايعة مين فاكرها... شنو كان اسمها....

مخازن الخرطوم العمومية

تخصصت في الخردوات مثلها مثل ميرزا

الاخ حسن عبدالله

تحية طيبة

انا في مدينة تانية غير مدينتي

لما ارجع نواصل

بناء كبري النيل الازرق 1910

عزيزي فيصل
القومة ليك يابطل...
نحن كنا نطمع في زيارة وانت بكرم اهلنا الاحباء لا تاتي الا ومعك طيبات سودننا الحبيب.
اخجلتناولله.... واسعدتنا ...
لك التحية والاجلال....
ولجميع أهل ومحبي هذه المدينة الناعمة...

Quote: وعدى شارع الجمهوريه يلاقوك بنات البريد الساعة السادسه مارقين من الورديه محلات اسندكو واشهر ماركات القمصان سودان بوك شوب تطلع منها شرق تلقى يمينك مخازن الخرطوم العموميه ال KGS وقصادها وكالة جامبو للسفر والسياحه ثم مرطبات زكى وبعدها فى الناصية سلوى بوتيك وقصادها فى البرنده الخطوط البريطانية, والفرنسيه , وقصادهم من الشرق مبنى الخطوط السودانية الذى اصبح فيما بعد بنك فيصل هنا بقينا فى بداية شارع الجمهورية بعد المحطة الوسطى واجزخانة كمبال ثم الزقاق الفيه استديو محمدين وفى الجانب الاخر شركة سنجر

Quote: يمينك دكان جسن صالح حاج خضر بتاع العجلات الرالى ثم ودملاح

طبعايا حيدر الصف دا بيبدأ بي دكان جميل كبابة و يليه نصف دكان للاحذية البلدية ( دكان عبدالرحيم) ثم الحاج علي المغربي ثم دكان عبدالله سيداحمد ثم حليم شفيق فمخازن العامل , زقاق يليه دكان سليمان و حسن صالح خضر ثم دكان باتا ففضل المولي محمد ملاح

اخى ابراهيم تعرف انه ذاكرتك قويه جدا ماشاء الله ياخوى انت قريت فى الخرطوم الاهليه (محمد حمزه) ولا شنو لانه كلامك ده كلام زول عاش فترة طويله فى الحته دى

ابدا و الله يا حيدر بس الوالد رحمة الله عليه كان مشاركا في دكان العم عبدالله سيداحمد و كنت شديد الالتصاق به يافعا و لم تمر اجازة مدرسية الا و انا هنالك

و طبعا بي شقاوة الطفولة جبت تلك الديار يمنة و يسرة

هرم خرطومي قديم

Quote: طبعايا حيدر الصف دا بيبدأ بي دكان جميل كبابة و يليه نصف دكان للاحذية البلدية ( دكان عبدالرحيم) ثم الحاج علي المغربي ثم دكان عبدالله سيداحمد ثم حليم شفيق فمخازن العامل , زقاق يليه دكان سليمان و حسن صالح خضر ثم دكان باتا ففضل المولي محمد ملاح

انا ما متأكد بس فى راسى انه دكان حسن صالح خضر وملاصق ليه خضر صالح خضر والمحلين لبيع العجلات وخصوصا الرالى فى ذاك الزمان ولا شنو , طيب بالله اعمل لينا جوله فى الحته المعقده ديك وانت طالع من محلات عبده تادرس متجه جنوبا الى ان تصل موقف البصات ثم تتجه غربا وكانك ماشى الوطنيه غرب او دار الرياضه ,,,, محلات ناس الكوبانى وسيحه والقهوة التى كان يستريح فيها جمهور الكوره ليشربو شاى المغرب وهم فى طريقهم من محطة الباصات فى ميدان الامم المتحده الى دار الرياضه او السينما

الشارع بتاع ناس عبدو تادرس دا اسمو شارع هاشم بك بيدأ من دكان عبدو تادرس يمينا و جميل كبابة شمالا و ينتهي في تقاطع شارع المريديان

الجهة اليمني بعد عبدو تادرس في ثلاثة دكاكين مع بعض مغلقة منذ ايام التأميم و اظنها تتبع لمجموعة مرهج يليها بعد التقاطع مكاتب شركة البلوبيرد البريطانية احد افرع سودان ميركنتايل تخصصت في عربات المورس بعد المكاتب يوجد دكان منجد عربات لا اذكر اسمه ثم محلات النعيم للساعات فدكانين لباتا ثم باركليز

الجهة اليسري دكاكين كبابة و و دكان عزت بسادة الناظر

في التقاطع متجها شرق توجد مخازن الصافي و مجموعات دكاكين اخري للاقمشة اشهرها ابراهيم عتيبة و احمد كمال


بتتذكر حاجة اسمها البيون هوتيل يا حيدر ؟

صورة للخرطوم قديمة جدا

وصورة اخري-بوست كارد- ربما شارع فيكتوريا وعربية واحدة ..شارع نظيف واشجار ظليلة

كلية غردون التذكارية(جامعة الخرطوم) من ناحية الشمالي الشرقي (من جهة كلية العلوم)

عزيزي ابوبكر
شوقتنا ليك ولطلتك المفرحة...
وطبعا للصور المثيرة للاشجان...
وبعد كل الشوف دا صورك الاخيرة لم تفتح عندي امكن لغلاوتها او حلاوتهاوامكن وامكن وامكن نجد لها العذر لشوقنا للخرطوم زمان...
لو ممكن شوف الحل واخبرنا ...
لك وللجميع المعزة

تسجيل حضور

تسجيل حضور
مين هناك؟؟؟؟؟
مستشفى الخرطوم زمان ؟؟؟؟؟؟؟؟

فينك بابوبكر
اشتقنا للصور الفريدة عن الخرطوم زمان..

للاحباب.... جايب ليك معاي ايس كريم لزوم حر اليومين ديل من محلات زكي ( زمان ) .... يمكن يكون اول محل ايس كريم في الخرطوم عموم..... والسودان ككل..... محبتي واحترامي .... وتسجيل حضور ومتابعه في بوستات الجمال

اهل بيك اندريا

غيب وتعال تلقانا نحن يا نحن

نعم مرطبات زكى الاول ,, وبعدين ظهروا ناس ويمبى ولا وبمبى وما عارف شنو فى عمارة الشيخ مصطفى

وين ود الصايغ؟؟

أهلا بوليم واهل بالموثق الاول حيدر...
زكي كان الاول ولم يكن له مثيل وكما قلت اخي حيدر والله ما عارف مين في السوق الان وما اظن الواحد يكون عايز يعرف.
بس بيني وبينكم ايس كريم وعصيرات الوقت الحالي اكيد أجمل حسب التقدم الحاصل في طرق تحضيرها....
بس نحنا ناس زمان وبنحب الخرطوم زمان وطبيعة زمان بكل ماكان فيها.....
ولن نقبل بالمنافسة المقارنة ابدا ابدا ابدا....
لكم وللخرطوم زمان كل الشوق....

نمرة قديمة

نمرة جديدة

نمرة كاملة عد


بوليس الخرطوم زمان

أهلا بيك ابراهيم
تعظيم سلام ليك والعساكر بتاعين الخرطوم زمان.....
تقدر يا ابراهيم تعدد الفروقات بين بوليس زمان وبوليس حسه؟؟؟؟؟
أكيد الفروقات كثيرة جدا جدا ....
لك التحية ،لبوليس الخرطوم زمان وكمان الان(لا يزعلوا علينا ونبقى في ورطة)

البطولة السابعة في السودان 1970:

]فاز السودان باللقب بقيادة المدرب التشيكي ييري شتاروشت.
احتلت غانا المركز الثاني ومصر الثالث.
الهداف: العاجي لوران بوكو (8 أهداف)

البطولة الأولى في السودان عام 1957:
فازت مصر باللقب بقيادة المدرب مراد فهمي.
احتل السودان المركز الثاني وإثيوبيا الثالث.
الهداف: المصري محمد دياب العطار "الديبة" (5 أهداف).

البطولة الثانية في مصر 1959:
فازت مصر باللقب بقيادة المدرب المجري تيتكوش.
احتل السودان المركز الثاني وإثيوبيا الثالث.
الهداف: المصري محمود الجوهري (3 أهداف).

البطولة الثالثة في إثيوبيا 1962:
فازت إثيوبيا باللقب بقيادة المدرب اليوغسلافي ميلوسيفيتش.
احتلت مصر المركز الثاني وتونس الثالث.
الهداف: المصري بدوي عبد الفتاح والإثيوبي ووركو منغيستو (3 أهداف).

البطولة الرابعة في غانا 1963:
فازت غانا باللقب بقيادة المدرب تشارلز غيامفي.
احتل السودان المركز الثاني ومصر الثالث.
الهداف: المصري حسن الشاذلي (6 أهداف).

البطولة الخامسة في تونس 1965:
فازت غانا باللقب بقيادة المدرب تشارلز غيامفي.
احتلت تونس المركز الثاني وساحل العاج الثالث.
الهداف: الغانيان بن أشيامبونغ وأوسي كوفي والعاجي أوستاش مينغل (3 أهداف).

البطولة السادسة في إثيوبيا 1968:
فازت الكونغو كينشاسا باللقب بقيادة المدرب المجري فيرنك شاناند.
احتلت غانا المركز الثاني وساحل العاج الثالث.
الهداف: العاجي لوران بوكو (6 أهداف).

البطولة السابعة في السودان 1970:
فاز السودان باللقب بقيادة المدرب التشيكي ييري شتاروشت.
احتلت غانا المركز الثاني ومصر الثالث.
الهداف: العاجي لوران بوكو (8 أهداف).

البطولة العربية أقيمت في الكويت أو العراق على ما أعتقد في عام 1970م. ولقد كان من ضمن الفريق اللاعبين الاتية أسمائهم:
1- ويندر بوث دي
2- مايكل بنجامين
3- وليام أندرية(الغزال الاسمر)
4- نيال دينق
5- حبيب إسطمبولية
6- دود ملوال
7- محمد على الاعيسر

1- ويندر بوث دي
2- مايكل بنجامين
3- وليام أندرية(الغزال الاسمر)
4- نيال دينق
5- حبيب إسطمبولية
6- دود ملوال
7- محمد على الاعيسر

نسيت فاروق رحمي

طيب والبطولات العربيه كرة قدم

الترماي و الحصان في كبري النيل الابيض -ثلاثينات القرن العشرين-

يا فيصل وبارائع
انت داسي التحف دي وين ومين علمك تدفع بالقطارة..
والله شحتفت روحنا...
نرجو ان تواصل واوعك من الزوقة
لك المودة والاعجاب

الموثق حيدر
نحن قلنا العندنا وواثقين ما حيظهر واحد ينتقدنا...
كرة القدم معشوقة السوانين والاولي والثانية ولن يتوغل في هذه العتمة غير من يجد في نفسة الثقة الكاملة ويكون لديه من الوثائق ما يدعم كل كلمة والا حرب هلال مريخ سوف تصبغ النيلين باللون الاحمر..
شنو رايك؟؟؟؟
انت لها وكلنا من خلفك اشد من ذاكرتك...

يا حسن شايف حيدر امين نخى

مابقدر معاي

اخوك حديد

عزيزي فيصل
لك التحية وسعيدين بطلتك التي لا تخلو من الاثارة...
بس حيدر ما نخى وهو متحفز وفي انتظارك من زمن ....
ما عايز اعاتب بس انت اختفيت مننا زمن كأن الخرطوم لم توحشك!!!
الكل في انتظار الجديدمن القديم المثير...
لك التحية

Quote: يا حسن شايف حيدر امين نخى مابقدر معاي اخوك حديد

زى ما قال ليك حسن مانخيت ولا حاجه
بس اليومين ديل مشغول بحفل النادى فى مسقط الخميس الجاى ,,
ما تجونا ولا اقول ليكم
تعالوا فى العيد معانا نانسى عجاج باذن الله,,,
وبعدين يا فيصل محضر ليك قنبلتين
واحده هنا فى الخرطوم زمان
والتانيه
فى عقر دارك ارفعوا ايديكم عن خليل فرح
وانتظر

والله بعد كده فضل ليك الطوابع بس يا فيصل