خيــيمة الحــردلو - العمارات

هذه الخيمة بشكلها الحالي كانت منصوبة في الموقع الآخر .. وحيث أنها تجمع نفرا كريما من الموهوبين وددنا أن نعيد نصبها هنا لمزيد من المتعة والفائدة . ولعلها مواصلة لما كان قد بدأه الأستاذ حمزة سليمان في بوسته المتفرد دعوة للدوبيت :

هذه بداية ومشاركة متواضعة من العبد الفقير

الليلة الخيمة اصبح ليها ضل وفروع
يجوك جنياتا في الحين نمهم مسموع
يسووا القوق يطبقو النمة ستين نوع
يزيدو الشوق عليه الحزمو المبروع

الكلام ليك يا المنطط عينيك

الليلة النسيم جاب لى خبر دغشية
قالو الخيمة نقلت فى جهات منشية
بجوها شباب ظراف سندوتشاتهم محشية
ياكلوا فى الحمام والضلعة بعد الشية


مرحب بالحردلو فى العمارات

عووووووووووووووك اناس والله ده ياهو النضم العديل ..حرم الواحد دابه لقاله بكانا يرتاح فيه ..دحين آناس خلوني الننجم وبعدين النضم ملحوق ..المويه آناس

تحيات طيبة للاستاذ يازول
شكرا على النضمم المعسول
وخلينا نشوف المزيد من هذا العسل

طه الضرس .. حبابك
استريح الموية والقهوة في رجاك
ونحن في رجاك
ولي حد ما تجي
قال:
أبعدنا الزمان من اللهيجو بشيقنا
عاودنا السهر والنوم بقى مو رفيقنا
يامتين نلاقيهو المنشف ريقنا
ناخد بيعة من كف إيدو نحيي طريقنا

يا أهل العوض مشكور نداك لا نعدموا
بس وديتنا لي بلدا ملولوا رطموا
جاكسون دوبى ناس مقريت يترجموا نضموا
و عقب أقين بليس هاردلو شقن عضموا

الاستاذ ياسر
لك الشكر والتحية
والقطع اللخدر البتسوي فيه دا ما بنقدر عليه
ياكين نديك من المدخور من حق الناس
الليلة البرق من عصرو عمت الفجة
مافي مضارى غير قرة وصقيعة ولجة
في شان الزنازين والسجون والحجة
ما بنتخلى يالصديق مرابيت قجة

الخبر البجي الصديق مقفل جوه
حالف ما بقيف دونو إن بقيت في هوه
ساعة الحاره تب ما بنسى شرط الخوه
كباس للدهم عند البقول يا مروه

ابشر يا ياسر
والله لو كنت في البالتوك
كت ختفت المايك
وزغرته

ياناس الخيم انا تب معاكم اصلو
البورد الهناك والبي هنا اصلو مابتفصلو
مدو السلوك والناس وراك يتصلو
والزول البجدع للناس الما بتحصلو
اها دايرين اب لسان ولا طوالي اقوم انصلو

ههههههههه يكه والله اول مره اكتب حاجه في خمس دقايق
زاتوووووووووو

خيمة الحار حبابـك زينة في المنشية
بيـك اتشرفـت دار بكري صافي النية
سائـل ربـي يحميكي وتكوني هنيـة
ويكيفيك شر هناي ما نلقى فيكي عشية

أهل العوض
لك الود

قالولنا الرحول للدارو في المنشيه
اهل البلد اهل المراح والجيه
ان بقت الديار دار بكري هي المعنيه
ضابحين السمينه ام جنيات متكيه
ناكل شيه حد من صباح لي عشيه

يا رب العباد عبدك تصلح أمورو
و عيشنا يا من عايش الوطواط علي صنقورو
ألكان جانا يا سنجاوي سوى أمورو
نرحل في الصقيعه البوردي ما بندورو

يارب العبـاد عـبـدك تنــور دربـو
ومن قاموسو تحـذف شـرو ما يبادربو
إلا ان جانـا يا خـلانـي واعلن حربـو
نندهـ شيخنا يا ابو يوسف تمسكو تكربو

الأخ ياسر
لك ودي

الاستاذ ياسر محجوب
لك التحية على هذا الابداع
نحن في انتظار المزيد

الاخ الزول زاتووو
انت ولسانك مرحبابك
طرق اللسان
وهات من آخر الجراب

الاخ سنجاوي
حمدلة على الشوفة
ومشتاقين
أرجو أن نرى بقية المبدعين

جرحا فى عالجتو وابى ما يبرا
جاب لى الطشاش والتانى عدم الخبرة
اضوق الصحة لمتين والمنوسر يبرا
من الخلا عندى الواسعة زي فم ابرة

مو نمر الشجر حاشاة كل و حاشا
فرتاق للهمايل الفي العتامير طاشة
ذو عفة و ثبات كرما معاه بشاشة
و تشهد دار جعل يوم حريقة الباشا

سلام يا اهلنا .. كيب حالكم كلكم .. إت وينك يا اهل العوض

اهل العوض لك التحية ومشتاقين والله

سلام ناس الخيمة ام غناياً حافل
سلام يا اولاد بلدنا من الصعيد للسافل
لمة رجال تلم الكبير والجاهل
ان شاء الله معاكم نلقى لينا مداخل

الاخ الخواض
صح لسانك
والله انا بيني وبينك في البداية كنت مفكر افتح الفرع في المنشية
لي بعدين اتذكرت البوليس
قلنا اخير العمارات بلدا ناعمة وهواها بارد

الاخ شنتير مالك بتزازي بي غادي
قول اطربنا خلينا نسمع نمك

الاخ المسافة ، لك التحية وهاك من القديم

أبو كفة العلي الحركة البقوم متسرع
واب حاجباً متل شوك الكتر متزرع
الفارس الصميم الـ بالنصر متدرع
وحوض الكوثر الفوقو البخات بتكرع

الاستاذ قرشو ، نحن المشتاقين بالجد وسعداء بمشاركتك وفي رجاك

شدولو الاغر انا منايا ليه
ما تور البقر انا منايا ليه
يا ود النقر انا منايا لية
الدود النتر انا منايا ليه

انا بزازي يا اهل العوض .. افو افو .. اها جيتك

ترعى و ناسي شوشيتك طوالة و عامرة
تارك حجة الكاجرالها خيشة و دامرة
يومنا الننوي لي التحت النهيدات ضامرة
هبابة و لقت نار الصنوبر جامرة

جاعن بنات العز
شبعا بنات الجوع
اتقلع المؤتد
وأتؤتد المقلوع
ورجع المقدم
واتقدم المرجوع

الزينين جميع بلا فرز ..كيف حالكم نعلكم طيبين وهاكم دي
********************


كيفن أهنا واعيش وانا صبري أمسى مودع
سببي الرُخرُخ المن قام صغير متفدِع
جنيت وجِني جنَّ وحالي أصلو مبدِع
أهج شقيش شن فاضلي تاني اجدِع


**************

طه اخوى الكلام عندك والله

يا سلام يا اهل العوض

غايتو انا مستمع درجة اولى ودائما تلقانى ازازى اشوق اخر المشاركات
تسلموا كلكم

قادر ربنا و جنبنا شر و مصايب
و من ناس الإداره صدر قرارا صايب
وكتين رقنا يا سنجاوي دلي الرايب
ندرج الشوح علي القول الجميل الطايب

يا ياسر حبابك من الإدارة سلام
ما شفت المشاكل جابو لينا كلام
بكرى يجهز المنبر ويزيدو نظام
وناسن تخربو الوطواط بدورلو ظلام

عقبان الشمس جات الوطاويط طشن
جات الهامله و السعيات عموم إتمشن
من صب الطريف الفي البوادي إترشن
تعظيم يالإداره سلام نفوسنا أتفشن

ود محجوب يمين جبت الكلام موزون
ودى المحرية فيك يا البى الضهب موزون
ومن لبن السعية حرم تجيب ماعون
تشرب انت والجنيات وتروى بطون
ما أصلوا الإدارة القالوا زى شمشون
تناصر الحق تقاوم ابليسهم الملعون

الحبيب أهل العوض
لك الود
مشكور على خيمة المنشية
تبارك الله عامرة ونايرة والجديد شديد
وهاك بليلة مباشر

يعجبني الكريم من جلدو يكرم ضيفـو
ويعجبني الحليم يطـول حبالو بكيفـو
ويعجبني الحكيم بحـراً ممهد قيـفـو
وللفايت الحـدود أحمر مسلط سيفـو

ود محجوب أخوي الدنيا ما دار راحـة
يوم تديـك نسيـم ويوماً عجاج كتاحة
ويوم توريك رجال أصلاً كريم وفصاحة
ويوم أشباه رجال جهلاً سياجو بجاحـة

يازول الحبـيب الليلـة جـبـت كـلام
أنعـش فكري خلى خيالي حـوم وهـام
بكري يجهـز المنبـر ويزيـدو نظـام
وناساً تخربـو الوطواط بدورلو ضـلام

سنجاوي اخوي نضمك سمح بالحيل
كلامك في الورق زي سباق الخيل
قول وكـتر في النم الجميل
ياها المحريه فيك يازول بلاد النيل

أهل العوض .. اين أنت يا عزيزي المزازي؟ لماذا هذه المزازاة بالطوالة؟ ما تبقى داخل آعشاي

السودان وطنا و تب شبر ما بندي
الا مراكب العدو فوق دمانا تعدي
حافظين للجميل و قلوبنا ما بتصدي
ابشر يا هشام قراركم مريح و مندي

الأخ هناي
اعتذر عن تلميحاتي الواضحة
فما كنت أعلم شهد الله انك عاجز عن الرد
وااااا أسفااااااااي

وينك يا سنجاوي .. كيف حالك ياخي؟ هناي ده اوعى أكون أنا بس؟ إن شاء الله ما اكون

يا ريح الصبا الجيتينا من ابو سالف
و كيف سبيل فراق زولا عابد و خالف
الخلاني فوق نيران جهنم تالف
بالحيل فراق الزول بعد ما يوالف

سلام اهلنا سلام من ديكن المجنون

زولا كلامو كتير ولسانو تب مسنون

بس زول الله ساكت طيبا شديد وحنون

دايرلو فرقه معاكم فى داركم المامون


ديكو

ديك الجن حبابك الليلة جاتنا بشارة
وبى رغم الزعل من شيتن اسمو إدارة
بنحييك ونفرح بى طلتك فى الحارة
وعارفنك سمح نية واخو الأخوان وزول حارة

مرحب ديكنا جيت لينا آلبخات أقدامك
نختك تاج على راسنا و نقيف خدامك
نفرش ليك حريرنا و ننستر في طعامك
و أكان داير تجكس ده الجداد قدامك

أها قصرنا معاك؟ ابقى داخل آبوي .. و اعزل ليك جدادة كان عندك رغبة

يا شانتير أخوى الديك بدورلو جدادة
حت لو كان منتف ريشا باقية جرادة
أصلو الديك زعل لا حولا ليه لا ارادة
قال فاصلين صحابو الدنيا يوت سدادة

الزول يازول سيد الفهم والقول
خجلتونا تب وياهو الفبكم مامول
كرمكم الفياض غرقنا لى ها الحول
شانتير حبابك وتجكسك مقبول
جدادتك المطلقه وليداتها ماله الهول
ده طرفى منها واتنازلت ليك يازول

ديكو

يا ديكنا الحبيب سيب الجداده حداك
وأنا عندى الأرانب والحقة والتمباك
واعزل ليك جدادة سمينة نقتا كاك كاك
أحسن من عزوبيتك ونفوسنا ديمة فداك

انا مازعلت يازول ولا اتغيرته
ولاهم صحابى ولا اتلاقينا فى حته
الا قلت حق عشان ابرى الجته
وخايف على رقيبتى تجزوها بالكسكته


ديكو

تسلم رقبتك وانا رقبتى ديمة فداك
كترت الكلام والكورة فى مرماك
رفدناهم عشان تنظف ملاعبنا ونهز لى شباك
دخل قونك القون فاضى وانا الهامباك

الحبان رواد الخيمة جميع كيف حالكم..نعلكم طيبين

اهل العوض عووك آزول بقى عليك المثل البقول البيت محروس وستو تكوس ورينا بكان نجعت آزول الله يجازي محنك.

ياسر محجوب
السنجاوي
قرشو
يازول يازول

والله زي مابيقول اهل العوض انتو شغلكم ختري خلاس ..والله تب ما بتجادعوا..والله شغلكم نضيف ليكم التحيه..وهاكم دي من عمكم ود شوراني

************************


ياتمرة كريمه القاد سبيط عرجونك
ديسك كابي خمره وصندليه دهــونك
يقلق ويفقد الحيا والعقل مسـجــونك
مهووس بيك وذنبي عليك بقيت مرهونك

*****************

يازول زز يازول

ضحكتني ياخي .. الله يجازي محنك .. الديك ملينا ليه سدرو جداد .. خليه يكرب تكتو و يتحزم

أخوكم شنتير .. و ليس شانتير

قتلك من زمان يازول كلامى كتير
سن القوانين ده كلاما كبير وخطير
قلبنا الصفحه عشان الرقاب ماتطير
والجنيات ان شاء الله يلحقو حمام شنتير
تسلم لينا زولا دايمن حكيم وقدير

يا ديكنا الظريف كرب تكتك واتحزم
من شنتير جداد بى سدرو ليك متلزم
وأرقد عافية عوعى وصحى كل متأزم
ومنى هدية ليك من مكة موية زمزم

آخوانا .. سلام عليكم

والله أوضعتم تخاجلنا .. الشي البتسووا فيهو دا شي يفرح .. أنا طبعا ما بقدر على القطع اللخدر دا .. ياكين بجيب ليكم من الحافظو من الناس ..

طه وشنتير .. البيت محروس حرسة مجيهة .. كتر خيركم وكتر خير الاخوان سنجاوي ، الخواض ، يازول ، المسافة وحبيب الكل .. والخيمة للجميع،مشاركة الجميع .. أشكر الاعزاء يا زول وشنتير والخواض الذين ملأوا الخيمة لامن قالت بس وأصبحت مفتوحة أربعة وعشرين ساعة بهذا الادب الراقي وفوق ذاك كله رحبوا بالضيوف الذين أصبحوا شركاء أصليين .. كالاستاذ ديك الجن والاستاذ قرشو والشاعر الصنديد ياسر محجوب .

الله يديكم العافية ونسمع ونستمتع بفنكم الرائع ..

في الخيمة القديمة كنا نركز على المحفوظ من الدوبيت في أغراضه المتنوعة ، ألبل ، البنات ، الكرم والشجاعة وغيرها .. لاكين انتو أضفتوا شيء جديد وهو انتاجكم الشخصي من القطع اللخدر . الله يزيدكم من نعيمو .. أما أنا فهاكم في الابل :

رفاعة الربة قافاها البليب متدلي
زي الفاقد الاطفال بقيت متبلي
المربوعة قامتو وبالردف متعلي
ذكروا غيابو من غيرو الانس ما بسلي

أهلا العوض حبابك حباب الزين

علا أخونا سنجاوى الظاهر عليه مغبون بالحيل

عليك الله أسعلو شوفو لينا مالو عشان يفش غبينتو وغبينتنا كمان

يازول ياخوى وقت الدوام شتت
بكلامى معاك والله غبينتى اتفشت
طلعت الكلام واضح ماهو مغتغت
صفيت النفوس من الشوايب نضفت
قوم امرق خلاس .. جهز عشاك امفتفت
ناس ابحراز واساسى مابخلوك اكان الناس دى الليله ما اتعشت

عشا ام فتفت بدرور كمان معاها كوارع
كمونية ساخنة والشطة فيها تضارع
ناكل بى هناك فعل حاضر ماهو مضارع
ياريتك تشاطرنا العشا وبعد الأكل نتصارع

الاخ يازول
هذا السنجاوي أب نضما يداوي
مو زعلان ، لاكيين .. غالبة عليه الحنية ، باقي بريد البنات

خلني أديك ليهو شوية من البنات

يامن خلقتني وخلقت الصيدة في مرعاها
حلحل روحي من حبل الشقاوة كفاها
قدر ما اتذكر من خدود اطرها
اتب من نومي واتلافى الهبوب أختاها

ديك الجن

كيف حالك آعشاي
ياخ ما تعزمونا معاكم .. جدادكم دا تضربوهو براااكم ، أكلو ان شاالله ينفعكم
لاكين ياخوي الجداد اليومين دي مطلعين فيه اشاعة قوية
خاصة بالنسبة للناس الماشين يعرسوا
انا شختيا مكجنو
خاصة الجداد الميت بتاع كنتاكي

اهل العوض خبر شنو آزول الجبتو في الجداد ..والله دا كلاما بجيبلو مشاكل...دحين ناس ديك الجن ويازول ديل يمشو وين...انت سمعت نكتة الديك البلع الداهية الاسمة الفياقرا..عاد يا اخوي دي مابتتقال هنا باقي الادارة اليومين دي قالوا سمها فاير يمرقنا منهم ودحسونه..وهاك دي


*************



مانـــــــي الفاسد ال بي الكِضبْ بِتنبّــــىّ

ســــــــارح بى العــــُروض لي جارتي ما بدبّى

ياستــــــار من نضم الخشوم والسِبـــــــــــّة

انا اخــــــــو الزينة عند حل الرفيق والضّبـــّة

******************

طه ،، وينك آ عيسي ،، ماك طيب

الديك البلغ الفايغرا ما سمعت بيه لاكين سمعت بالديك الشجدو صاحب مزرعة الدواجن .. في النهاية رجعو لي سيدو وقال ليه .. باقي نومي تقيل شوية .

اها قال ليك :

ماني ربيب بيوت بعقب بحل الصرة
وماني الخاين الـ بتبدك آ حرة
بختر ديمة في وسط الهجايم برة
داخرو ضراعي لي يوما حديدو مشرة

ناس قدر الله قاعدين في البيوت ما بخترو
ومن كبيها وكشف الحريم ما بفترو
اخير اختر براي اسد الرضيمة بنترو
صاحبي ان زل ما بفشابو سرو بسترو

الأخوان عموم من أهل النم و الغنا نرجع للمحفوظ و
المدخور من كلام أهلنا السمح بالحيل

بينك وبين بلود العندو فوقنا حقوق
جاك صياً فسيح واطاتو فيها شقوق
علي سكر نبات الفي العلب مدقوق
قماري الجالسه خليتن يسون قوق

ود محجوب ..هلا هلا والله ياهو ده النضم.....وامسك دي


***************

الليلــــــة الغول بــــــــــــدا لو جفيــــــــــــــل

نقــــــرة قيد والله خوفــــــــــــاً من دمـــــــاس الليل

الزول البراطمــــــو محبّكــــــــــات بالنـــــــــــــيل

خلّا جــــــــــرايده واحدة تدوبـــــــــي واحدة تكيــــل


****************

هلا هلا يا طه تميت كيفنا بغول ود ضحويه و هاك من العاقب ود موسى

بسم الله يا عالم سراير العامه
شديت كوري فوق تيسي أبحجامةً جامه
من هفت لي ست ريدي أم نفايلاً تامه
بقيت نفسي من كل اللذايذ طامه

يا سلام ياود محجوب نضما سمح بالحيل...وهاك المسدار ده من عمك عبدالله ود شوراني


***************

غاب نجـــــــم النَطِح والحر علينا إشتدَ
ضَيـقـْنـا وقِصــــر لَيلُو ونهـــارُوْ إمتدَّ
نَظِرة المنـــــُّو للقانون بِقيـــت إتحدَّى
فتحـــت عنــدي منطقـــة الغُنا الإنســَدَّ

*****************

الخواض أخـوي إت من زمان عاجبني
درشك مو خمج زينـة وغناك بطربني
أجـر النمة يا قمـري الفروع جاوبني
وين القاهو سيد عمري البيهدم ويبني

وين القاهو حاكم بي عذابي غرامـو
وين القاهو طاعم زي وجيهو كلامو
وين ألقاهو ناعم صافي دافي سلامو
شاغل بالي سهران والعـوازل نامو

ما مابين علي زولا عمل ارباحو
و ما بننكر علي ذي همة عالي نجاحة
لكن نحن ضد يبلع وطن تمساحة
و الجاهل الصغير يصبح لحم في ملاحة

السنجاوي
المسافه
الحبان جميع
*****

المسافة نضمك حق مابدورلو دليل
كان سمعوه ناس عمر كان بلدنا ذيه مافي مثيل
وما كان جاتنا المشاكل والشفا انضرب بالليل
ولا الناس اتشتت ذي بيوتا كسحه السيل
يا رب العباد تنجينا من شر ذي ديل
يضحك النيل ويرقص التوتيل

*********

أح واغلبي يا الخواض و رقة حالي
ببكي و أدوبي يا سنجاوي فوق الخالي
من جرع البنوني الطعمو رايق و حالي
وادعني و رجع لاهي بشبابو و خالي

العزيز شنتير

حشاك من حال هناي
درشك دقاقة وناعم
عقب يا جنى .. عقب

العزيز طـه
حبابك أخوي
شغلك كتر .. اتوصى وكتر من ود شوراني
إلا خطك صغرو شوية .. بساعدنا في الطباعة والتوثيق للخيمة

الحبيب يازول
الغبينة اتفشت
اصلي ما بحمل الهبشة بدون سبب
وبحاول اتعلم الصبر إلا الطبع بيغلب التطبع
عشان كدا مرة مرة الفي القلب بيظهر على اللسان
وبظهوره على اللسان بتفشى ويسلم الصدر

أهل العوض
يازول روق المنقة وخت الكورة في الأرض
ودردقها بشيييييييش
مالك عايز تجيب لينا الهبوب والكتاحة
أصلو الانجليز حوالينا والإيد بقت ملوية
قال بريد البنات قال
ما الغنا دا .. دا ما كلام شعراء سااااااااااي
البنوت لا بريدن ولا مكسر فيهن
ولا بعجبني كلامن الطاعم وناعم
وجمالن البرمي في الشوك دا لا شفتو ولا بعرفو
إلا جميل قال:

يقولون جاهد ياجميل بغزوة .... وأي جهاد غيرهن أريـد
لكل حديـث بينهن بشاشـة .... وكل قتيـل بينهن شهيـد

الله يدينا الشهادة والعمل الصالح
دي فيها حاجة دي

والسنجاوي قال

مولاي يا كريـم ارحمني غيـر حالي
نسيني الأسرني عبيـر نغيمو الحالي
النشف دموعي ودمعـو ما سحـالي
ريدو ربيع حياتي وسر شقاي الحالي

عمار الخيمة سلام
دام عزكم .. والله مالين السمع والشوف
الله يكتر من أمثالكم
سنجاوي .. ياسر محجوب - طه - المسافة الخواض وبقية الجنيات

أها .. كنا في درب المعايش

طبعا انا ماعندي قدرة زي نضمكم البتسووا فيه دا
لاكين الشاعر القديم قال

صغيران نرعى البهم يا ليت أننا
إلى اليوم لم نكبر ولم يكبر البهم

أها

دايرين كل واحد يسويلنا شيتن يجاري بيه كلام الشاعر دا ..
دوبيت سوداني
قطع أخدر

الليلة العديل و الزين اليلة العديلة صافية ليك بياضاء

الحبان جميع ...سلام بلا فرز

السنجاوي
ود محجوب
المسافه
اهل العوض
الخواض
يازول يازول
ديك الجن
وبقية زوار الخيمة الكرام



************

السنجاوي آخوي كيفنك ..ومشتاقين كتير والله ..قلت لي شغلك كتر ..كتر خيرك آزول هو شن جاب لي جاب ..والله نحن حيران في شياختكم وزي غناك ونضمك حرم حبه منو مابنقدر عليها ..علا ترانا بنداقش مره نصيب وميه نخيب ..الجنيات ناس المسافه وود محجوب النضم عندهم وود محجوب ده بالخصوص ما بتجادع تب .. يديك الصحة والعافية يا جنى الزينين.
**********
اهل العوض ..انت بتغطس وين يا مقطوع الطاري ..والله محنتنا تب ..الله من خلقني ما شفتلي زولا ينجع ويخلي الناس في بيته ..اظهر آزول والله نسويلنا فيك غنوة تلحقك اماتي القبيل...اها رايك شنو
***********

طه الضرس
آزول أكبر ها
شن قدرني على زعلك
أنا قت لك قفاي أعوج
الحكاية فيها أكل عيش وقطع رزق
باقي علينا حكم الانجليز والليد بقت ملوية
ترا كل ما نلقى ليها هبرة بنظهر

أها ما قلت لي .. رايك شنو في البيت الفوق دا .. بتاع البهم؟

أهل العوض

الشي الجبتو دا بيت واحد ولكنه مليان معاني عجيبة خلاص
وهموم الدنيا الفي رويسي دا اليومين ديل سدت علي باب الغنا الواسع
لكن عجبتني الفكرة .. عشان كدي هاك دي على علاتها

من قومـة الجهل أنـا والحمامة نقوقـي
أكرف في الدعاش هاني ومعاي معشوقي
كبـرت فارقتنـي وحلقـت بـي فوقـي
ياريت لا كبـرنا ولا انكويـت بي شوقي

آناس سلام والله كلامكن حلو بلحيل
أهل العوض والله آجنا الخيمة الفاهمه عندك والجنوى ديل والله ماخلولن شيتا ناقص علا نحن والله إلا نساهم بحق الرجال ويا قولك جنس القطع اللخدر دا ما بنقدر عليهو ياكين كمان ما بنقدر نفوت ساكت

أخوك يا ريّة أخوك وقت الخيول يدبكن

اخوك يا ريّة أخوك وقت الرماح يشبكن

أخوك جبل الثبات وقت القواسى يتحبكن

كم بكيت وكــم قشيت دمـوع الببكن

يا سنجاوي نشهدلك نضم و براعه
فصلت الحرير الماهو بوبلين باعه
في الظبي أب رشيرشا زي ثواني الساعه
سام روحي و نفر ضيع تلات أرباعه

يا حليل الصبى و تومتي المسك فواحه
في عشيب الأرض سايقين بهمنا مراحه
كبرت فارقتني و أعدمتني الراحه
و ربعنن البهم عاد لحقن أمات طه

الأساتذة الكرام
أشهد الله أنكم رائعون مبدعون

سسسسسسسسسسسسسسسسسسسسسسسلام يا قبيلة هوووووى البقول راسو موجعوا بربطولو كراعو

سسسسسسسلام ياخونا نحنا ناس رواكيب وانديات ودوبيت دحين وروني كان بنفع معاكوم وهاكم دي ياقمر طولتا ماعاديت علي سكتنا ماجاتك سحابت صيف قالتلك بلد ناس ريا اصبح كيف حفايا عريا لاشايفين ولاسامعين خاتين النخيل العالي في الضلمة سلام بكري سلام جمال الشيل فوق الدبر ماتميل ديماها تسيل تضوي الليل دحين شفتو في درب البلد كايسني ولون عينهولونالنيل وشايل الطين محنن بيهو في ايدهو دحين شفتهوا في ديرب البلد كايسني

اخــــوى أهـــل العـوض

ناس الخيمة الليلة كيفن حالكم
انا لى سبوع بفتش تالكم
اليوم لقيتكم لقيت السعد المزين داركم

ياللأخوان عموم و خسوسا أهل العوض

مالكم هملتوا الخيمه لامن شالته السفايه لا ورا
أها النرفعها ليكم بي قول ود ضحويه السمح

قمنا مشرقين ديك البقيت بتوايق
لجت بت عمر سرفن دموع المايق
قام بينا الضرير ما بروق ملقلق ضايق
دارج الشوح علي الكسب الوراهو طبايق

سيدك وارك الغلبه و مشي الكرعين
نبت فد مره يا ساحر الغروب من وين
يا الغول بت عمر ننظر جبينها متين
مالك يالضرير فارق صباح أم زين

الاخ ياسر محجوب
يسلم فمك
والله نضمك شي يخوف .. دا نجر مختلف وشغل معلمين
الله يحفظك
أنا أخشى أن بقية عمار الخيمة خافوا من هذا المستوى الرفيع الذي ظهر به شعرك ، وبالفعل أعرف واحد شاعر صنديد ومبدع حقيقي قال إنه من شدة اعجابه بشعرك تردد في المشاركة إلى جانبك
فلك التحية

أما عني فقد حصلت حاجة غريبة أمس .. طول اليوم كنت أحاول الدخول ولسبب ما كنت لا أستطيع الدخول إلى المنتدى إلا عن طريق المسنجر . واليوم انحلت بحمد الله وجهود الاخوان في الادارة

وسأعود إن شاء الله

أبيض ما انتر مسك الدرب واتناحى
تقول مكتوب لو آيات النجيع في الراحة
يجدع باع ويسرق نفسو بي بالراحة
مخلفوفتو بتجض مثل الكمنجة صياحا

نحن اللي عروضنا لئام و جبارين
و يغلبنا الصبر يا الملكة صبارين
سودانية نحن و ميسنا ماها قريبة
قول لعزولنا حاذر ما بتلقي فينا طريقة

سمح الخبر جابوا هوي الليلة
ديل اخواني ما اتلوموا

اهل العوض نور ديارو الليله
انفك ساجورو وكرامتو بليله
اهلا بيك حبابك والدار عمار بى سيده
ود محجوب تب ماقصر اتحزم وشال الشيله
يازول يازول ..تعاليا النقولك قوله


ديكو

اهل العوض وكل الحبان آ ناس نضمكم ده ختري خلاص

سنجاوي وود المحجوب كلامكم ما بنزاد كلو كلو لكن نحاول غايتو نسوي شنو


البهم القبيل كنا بنسوقو ونسرح
ونفرح بي وراهو نغني شوقنا ونشرح
نبني بويتنا طين وللواطة نملا ونمسح
يا ريت قرنو لا قام لا رسمنا اتكتح

كم مثلت تاجوج وانا ود محلق مسرح
وكم تاتينا زي مفطوم يقوم ويترنح
وقت ما فرهد العود والبهم بقي يطرح
تفيت للزمان ما اتعلم يجمع ويطرح

يا اهل ا لعوض .. قطع شك كلامك القلتو عن الزول المعحب بي ياسر محجوب قاصدني بيه انا .. و كلامك صاح انا الزول هذا الاسمو ياسر ود محجوب غايتو ختيتلو الصحة .. بقيت بجي بتاوق بس اشوفو كتب شنو .. و عيك بكب الزوغة لي مراحي


البارح بالحيل اتظكرتك يا اهل العوض .. لانك بتسعل مني .. إن شاء الله ما سعلت منك شينة

هنا في الفرقة دي انا داير اهديلك مسدار اسمو اهل العوض .. عربون صداقة و خوة في الله و في ام زور الصاديدت ماسكة الخلا المتقفر .. و خلي اي زول يرمي عوده

بسم الله

يا اهل العوض من قلبي ليك سلامي
عارفك كان كبس همي بتقيف قدامي
سعالك مني جدد لي جرحاً دامي
جرح الابعدوا و ريدهن سكن في عضامي

أكان الدنيا يا اهل العوض بتطاوع
شن نزلني من ضهر البزيم و بباوع
فارقت البطانة و قشها المتناوع
نفسي اتقفّلت غير قوت بقنّب اتاوع

يا اهل العوض بعد المسافة الفارق
خلا لقانا مستعصي و بدور له خوارق
طريتني البطانة و حر سمومها الحارق
و طريتني الحنين و كتين يشيل لها بارق

حباب الذكرو حاضر ديمة ماهو مغيب
حباب شيخ العرب شنتير نعلك طيب
البعد الحصل بيناتنا وسمو كعيب
بدور اسمع غناك ان شا الله تبقى قريب

بعد حصل القرب والفنقة ديك اتدانت
والحاسوب نضم هرجي الحروف يتقانت
وفد سلقة بتجيب خبر الحروف إن بانت
نسو نضمي الترك في الحين يجيك في بكانك

آزول ها .. بحرك بعيد أنا ما بباريك ، تودرنا ساكت

لاكين هاك دي من جقلة فيها وسمكم :

جقلة كناجها فرسانها السمان درقكن
في بحر الهلاك طايعين غصب غرقكن
ود شنتير كتير فوق نارا كفى درقكن
علب نار كدوسو وفي الرضيمة حرقكن

ويوما بي لقيط حنتوت معاه شري
يوم عانية البروق مجموعة شاقة الصي
جقلة معزة ام جمراً مولع حي
الموت فوقكا لا اقول ليك ولا تقول لي

الاخ سنجاوي .. ونضمك صح يداوي

المعذرة الشديدة لسببين
أولاً أمس كما يعمل الكثيرون كان عندي مشكلة في الوصول إلى المنتدى
ثانيا
أنا فعلا شفت قطعك الاخدر في بيت البنية والبهم
ولم أشا أن أرد لأني ليس لي المقدرة على مجاراة هذا الابداع
وفعلا لم يكن لدي شي للمجادعة ولكن عجبي البيت وأردت أن تشتركوا في المجاراة

أعتذر مرة أخرى
وأطلب من عمار الخيمة أن يدخلو أجاويد حتى نصلح ما حصل من خراب إن وجد

ورغم عجزي عن النظم المجيه أهديك هذه

سنجاوي العزيز نرجوك تسامح ترضى
ما بنحمل عتابك ندمنا ليك صار فرضا
نفسك عالية معروف العفو فيك فرضا
قرضك للشعر قرض المنافسين قرضا

شرد مطر الدغش من شقةمقفولة
باراها النعاس لامن قعد بى طولا
حباسة النفس اتكرفت من قولا
طار عصفور برق ينقر عيون مغسولة
يابت الشدر ليلك قصب، مشغولة
زحى ضرا الحديث خلي لى كلمة أقولا


تحياتى
ودعزة

الاخ العزيز نزار

أولا مرحب بيك في هذه الخيمة الوهيطة
شكرا على الاستجابة لمجاراة البيت
وكما أسلفت للأخ سنجاوي
لم أستطع أن أجاري هذا البيت
لكني اكتفيت بعرضه عليكم واستمتع بردودكم
بهذا النظم العجيب
تحية لك وشكرا

العزيز ود عزة

هذه نمة مجروحة .. في شي من علقم الغربة
الله يلمنا .. ويلم كل غريب

الحبيب أهل العوض

يازول دا من كرمك وطيب نفسك واحساسك المرهف
الله لا جاب الزعل
نحن أخوان سماح المابتخبر زعل
هترشتي ديك كانت لأني ظنيت انك ما شفت مساهمتي
وقصدت الفت نظرك ليها
دي كل الحكاية
وانت يازول ما عندك عوجة تب
وغناي بالحيل .. ما تتردد وارمي لي قدام

الحبيب نذار
حبابك ألف
نورت خيمة العمارات
ما تبخل علينا
والي التطريب
غرد أنا منك قريب
ياحمـام

الشيوخ سنجاوي واهل العوض

حبابكم الوف وشكرا لترحيبكم

اهل العوض المره الجاية اختارلك بيتا ساهل
يا ود ابوي

الكلام الجبتو ده ملان خلاس خللنا فرقة النشارك

مسعولين من الخير شيخ العرب الخيمة مو خابرها

غايتو مريت بي زولا لافح توبو ومن بعيد النضم ياهو
بيقولولو طه يبقا لي ياهو زاتو عل مالو غير اسمو
دحين انبقيت مو في افزعو

الخيمة دي هنا همبريبها يضارب

الأحباب من أهل الخيمه ناس الكلام السمح و الله الخيمه عامره بكل جميل ولطيف من المساهمات من أهل العوض و يا زول وطه و الزول زاتو و الخواض و
سنجاوي و قرشو و المسافه وشنتير و حبيب الكل و ديك الجن و ود الجعلي و نزار حسين و ود عزه

يعني ما شاء الله فيهم الحافظ الجميل من الكلام و فيهم الشعراء الصناديد و فيهم البقطع الكلام الظريف و الطريف

أما سنجاوي و أهل العوض و شنتير و الخواض و نزار فهم أسياد الكلام و زايدين معاهو في التواضع و اللطف..... كلامكم سمح بالحيل و الواحد و الله يتشرف يكون جليسكم في هذه الخيمه الجامعه و ينهل من جمال كلامكم الصافي الأصيل و دمدتم و دام هناكم و صفاكم يا أهل النم و الغنا..... و هاكم من القطع و كلام ود محجوب في بنوتنا السمحات

طبق القيد علي في جلدي علَّم وحزَّ
و شال قلبي و قفل سوالو طبله ورزّه
وكت بالشوف أبيت كان في غميضة الهزه
يكفيني النسيم جاب من دعاشك رذَّه

أرُقصي و سوي فوق الداره قوم العايمه
و ما شبهك عوينات أم نفور الحايمه
سدرك جوز طبنجي و بي رصاصك قايمه
هنضب يا قلب خش الحراسه الدايمه

يا الظابطيه سجلي للبلاغ الآتي
في شويفع الظبا المن دابو قام بيتاتي
شال نومي و هجم بي جيش خيولو عواتي
عسكر في الضمير، قال لي براك الخاتي

يا خلاني شيشكم من شفاك المولى
ما جنيت حكم في أمري حاكم الدوله
بي سطوة جمالو و لحظوا صاحب الصوله
صاب قلبي و صبيب دماعي حاكى الشوله

أها أبقوا عافيه و أدونا الإذن في غياب كم يوم في شان المعايش علا كان لقيت فرقه بجيكم و أبقى عشره يا أهل العوض على الخيمه

ود محجوب عجبني قطعك بلحيل وانا مستعجل خلاس

نحاول معاك كلمتين تلاتة اكان نحرضك زود


ود محجوب اخوي فحل الشعر والقافية
اجدع زيدنا نم اسرع قوافيك شافية
اب قيدا متني وتسفي فوقو السافية
مطعون جوه قلبو وسلبو منو العافية

أهل العوض .. الكلام ده جبتو من وين

جقلة كناجها فرسانها السمان درقكن
في بحر الهلاك طايعين غصب غرقكن
ود شنتير كتير فوق نارا كفى درقكن
علب نار كدوسو وفي الرضيمة حرقكن

بالحيل الكلام فوقو وسمنا .. لكين بس القالو منو ياربي الكلام ده .. اصلو بكون يوسف البنا قطعاً شك

لكين عمي الفرجوني قال لو واحدة آخرا

رون سهم ام كنيش لفن البقير في سراع
و نوق شنتير على الشدر اب سياقة رتاع
سجع قمري الرشاش في لجة الفراع
و اتنفض الغنيم جافل من التراع


نزار حســــــين !!!! إت نعل ماك

نزار ود دار جعل دعت الرضيمة الوح
بتقووا بو فرسان النحاس القح
في القانون ضليع و العز تيابو لفحا
من هنولولو صيحة المستجير بسمحا

أكان اياك زولي ده .. اها انا اياني صاحبك شيخ العرب .. و الخيمة البيهناك يدك جيرانها ما بعجبوا

اها سووا سووا آناس

حبيبنا سنجاوي .. ياخ قومت نفسنا ، عليك أمان الله حسبتك زعلت تب .. كتر خيرك ودا أصلك الكريم ، يا كريم النفس والقول .

نزار .. آزول إت كان كدي ما نزار الجعلي!! هللا هللا .. وشيخنا شيخ العرب ما إياهو شنتير .. إت ماك سامع نضمو المجيه دا ..

الاخ ياسر محجوب ،، آزول ها الله يزيدك في نعيمو ويديم عليك العافية .. لاكين .. أنا واحد من الناس ما بنلعب معاك .. البتسوي فيه دا .. الزينا نحن كان هبشو بيزيدو موية .. لاكين بقابلك بي شيخي شيخ العرب ، شنتير والجعلي نزار .. ديل قدرك .

شيخي وشيخ العرب شنتير .. إياها جقلة ذاااتها بتاعة يوسف .. ياخ عمك الفرجوني دا أنا طالب منو كلمات قالن في واحد صاحبن لي حساس (د. محمد عبد الله الريح) ما جاب لي طاريهن لي درب الساعة .

أها هاك من جقلة تاني :

يا جقلة العقيدك بكّر
قارسك ديمة في بلد العدو بيتوكّر
ناس بقرة وغنم انا عندي مابتتشكّر
لبنك في طب للماسكو مرض السكر

يا جقلة التمونك غالية
ناس منك غنوا وصبحت جيوب ناس خالية
ديمة عليك في الروح العزيزة مبالية
يا الشنقا الغرابية ام سراة عالية

معليش على الغلتة في البيت الفوقاني ، عدلناها وبقت شنتير

أسمع .. ياسر محجوب دا لو ماهو شايقي أنا شايف فيه نفس ود شوراني ، وللا النظر ضعف يا ربي

شيخنا وشيخ العربان لا حدها ياني زاتي

ويسعل منك الخير

ووالله حقيقة مشتاقين لي زمن بفتش عليك اتاريك ضارب الكنادش
بي جاي في خيمة العمارات

ومغير اسمك لي شنتير
لكن تب بلا شيخ العرب ما عندنا ليك نديهة

وفي الظانو شنتير ده جدا ليك لكن ما حا نقوليك غير شيخ العرب
عشان ما تتلخبت الكيمان ولانك فعلا شيخ عرب

اهل العوض يا زول ودمحجوب ده نحن ماني ندادتو الزول كلامو قارح بلحيل وقطعو مطارق غايتو نحن بنحرضو ليك

هسع غاتس وبقلعلكم قريب في الحجره بي نضما كتر

اها يا اهل العوض

تهليييييييييييل >لا اله الا الله

تجدني عاشق حتي الثمالة لكلام التجاني
لذلك تحريضي سيكون


وانت يا من ذقت طعم الهوي من سحر عينيه ومن خده
عيناك هاتان وقد صبغتا من كبرياء الحسن او مجده
عيناك هاتان وما فيهما من هادىء السحر ومحتده
كمضمر سرا ومن بينه مغالق الكون ولم يبده

يا صحو دنياي واحلامها ورقة العابد في زهده
مثالية الحسن وآلاءه وبر ما سلف من وعده
تعال يا لوعة قلبي وما تحرجت كفاك من وأده

نستقبل الروحي من حبنا
ونبعث الموؤود من لحده

الليل نحن جدودنا أظهر من علم بينين
و نحن قلوبنا في الفولاذ حديد ما بلين
الليلة نحن الفي الكرم نيرانا تب ما خبت
و نحن في الخيانة رياحنا تب ما هبت

كلام مجيقن .. و بدور منك الأمان يا عزيزنا ياسر بن محجوب .. و عليك من جعل محمد نبي ما تزعل مني

يا اهل العوض .. كان زمان معانا واحد دفعتنا في الجامعة .. و هو زول غليد و مفتل و دشن .. و بعد ده اسمو حاتم (إن شاء الله ما يكون في زول بعرفو هنا) .. بعدين أنا قدر ما اشوفو و اقارن بينو و بين اسمو بتخيلو زي التكنو مدخلنو في علبة صلصة .. شتان ما بين الاسم و الجسم

هسع دي لقيت ياسر محجوب .. محجوب دي حسب معرفتي بديها الشوايقة عديل و الشوايقة شعرهن مختلف عن الشعر اللتم ده .. و ياسر دي سوف تتشظى بفعل الكلام الغلاد البقول فيه ده .. يعني و الله احترت مرة واحدة .. و قلت الزول ده علا يكون متضاري بالاسم ده .. لكين تب غناه و اسمو مابيات يمشن لي سوا

إت بتقول لي فيه نفس ود شوراني .. أنا بقول فيه نفس كل شي .. و نبرة كل زولاً قاصع
==================
أهل العوض .. قلت لي النضم ده نضم يوسف؟ شكيتو على ود أب ناجمة .. الزول جاب ود شنتير ذاتو .. يا سلام يا سلام .. ده كلام تاني و بدور لو روقة و تبهلة
==========
نزار .. اها شوف أنا ما قبضتك؟ إت تاريك تتلبد متغتي لك باسماً آخر؟ و تتسحب متل قط الهويد و الصي ..
أنا و الله غيرت اسمي داك .. و لزمت عقابي .. ود شنتير ارحم لي لاني اياني ذاتو .. ترب سيد الدبساء الراسها خلال

الدبساء الراسها خلال
شايلابي الليل لا الشهلال
تترز مابية المقبال
بتسو قدلة بت رحّال

و بت رحّال هذه امرأة من بني أسد .. و في رواية أخرى .. وهكذا

شيخ العرب وليد ود شنتير سيد\ الدبساء حبابك

هل هل هل بتقدل زي بت رحال


اها ده فوق الدبساء

الدبسا الكاسره لجامها
بتقدل متل الحمامة
ما بسرجوها العجامه
وتربها لا يوم القيامه

الاخ نزار .. لك تحياتي وشكري على أبيات التجاني . فشعر التجاني شعر مميز .. قرأت مرة لكاتب مصري هو رجاء النقاش قال إنه يعرف شاعراً مصريا كان صديقا للشاعر التجاني خلاصة القصة أن التجاني حين قدم لمصر في آخر زيارة له أعطى ذلك الصديق المصري مخطوطة ديوان للتجاني فما كان من الشاعر (الصديق) المصري بعد أن علم بوفاة التجاني إلا أن طبع الديوان بإسمه !! هذا كلام مصري عن مصري ، إلا أنه لم يذكر اسم ذلك الشاعر .

شيخي ود شنتير .. عندي النص الكامل لجقلة كما سمعتها من يوسف عبد الله البنا ، كان داير قول لي ايميلك بي وين وتصلك في الحزة والحين .. اتذكرت قصة ايميلك الفقايتو مرقت مع الرسالة الرسلها ليك الهمباتي ، الله يجازي محنك .. اليوم داك أنا قلت والله أنا لو في محل أهل الحلة ديك إلا أخت شخت احمر تحت كلمة فقاية دي وأقول ليك حسن ملافضك . معانا عوايل

ATT: Ahal Al-Awad

صغيران نرعى البهم يا ليت أننا
إلى اليوم لم نكبر ولم يكبر البهم

ح أرد إن شاء الله بكره .. ما عرفت ان هناك تحد لمجاراة هذا البيت



Wad Shinteer

البارح سجع ساجع القماري النوح

اتذكر زمن جهلي وشبابي الروح

بقين دورا ستاتي العطارهن فوح
وايامهن مطرهن شوح

البارح سجع ساجع القماري النوح

اتذكر زمن جهلي وشبابي الروح

بقين دورا ستاتي العطارهن فوح
وايامهن مطرهن شوح

Up .. surface

شيخنا وشيخ العرب لا حدها ود شنتير المو تاجر حمير
كيفنك آ الدخري

قريت كلامك البي الرطانة وقلت القلوب شواهد
لكن عليك الله كان الهمباتي اتحول معانا بي جاي
الخيمة دي ما بتكون تكنها منصوبة في الجنة

خيمة الحاردلو البي غادي دي انا لي منها الليلة دورين
وناوي ازورها لما ارجع السودان قريب

هسع داير اضرب الكنادش دي اكان جلدنا ينطلق شوية

الصديق ودشنتير


انا شخصيا معجب جدا بكتاباتك ونمك وجابوديك
وبعتبرك قائد رسن الخيمة والتواصل معاك شرف رسمي
بس الدنيا الساقية دي نسويلها شنو قدر ما تقول نتفرغ شوية
للناس الاصيلين الزيك وزي كل رواد الخيمة العرفتهم هنا
واصبحت كاني اعرفهم من سنين

هسي اهل العوض ده ان لاقاني ونضم بغباني
واللا الهمباتي واللا ود محجوب واللا سنجاوي

الناس ديل كلهم ان لاقيتم من كلمتين بفرزم من رفاقتم مع اني
ما شفتهم


شوف الساقية ساقية وتورها ارقو يقودا
نتدفابا نار الشاي دوام موقوده
آمال الترابلة البيك بقت معقودة
تظهر زي عروس في الداره لابسة عقوده

من الارض قام فرهد شمارك وشب
بالمحصول جميع الناس بقت تتنبأ
البنضورة شالت فوق فريعا الحبة
من الموية عيشك لا عطش لا غب

واكيد بنتواصل

It will not be a hit and run relationship
it is more deep and it has to be.

بس اعذرني جدا هذه الايام دي مشغول مشغولية شديده جدا
وماشي السودان
وحالتي بالبلاء

UP

الاهل الكرام في الباديه والحضريه
جاكم دافي شادي خيل قصايدو طويه
ادروب الولوف خاتي الغلط والنيه
ويقول سلام عروب بالفصحي والعاميه


البورد اللطيف آخر جمال ولذاذه
من طيب ناسو يسكر لا طشم لا قزازه
خلي ابو العيال في الشاشه برطع وزازا
والحاجه السارحه يحرق في الحلل بوتاجازا


البورد اللطيف فايض نضار ولطافه
حمام من كل نوع قاريات فهم وثقافه
الا الحظ مكاجر دافي الوجيه وقيافه
متين يا ربي تجمع بي ناس غدي وسلافه

الله عليك يا نزار .. و الله كلامك طيب خلاس .. يمرق الفلايت ... غايتو الهمباتي ده لازم نجرو بيجاي .. لكين كبوش قال ولوف و ما بقدر افارق الخيمة القديمة

مش السودان ملك آبوي؟ نعل عافية؟

شوف الغبا ده عليك النبي .. كتابتي كلها غلط

يا نزار
ماش السودان مالك آبوي؟ نعل عافية؟

شيخ العرب

كيف حالك يا اخوي

والله ماشي السودان اجازه بس ما في عوجة تب

ماشي
اشم لي هوايا نضيف واشبع كسره وارجع

باقي مطولين من الاهل بلحيل
وبيني وبينك ماشي اشوف الطرطشة البقولو فيها الناس في البوردات دي

بجيبلك خبرها تب

والقط لي غنايا كتير

المره دي شاقي البطانة من تالا الابيار والدوانكي
وشايلا لا القضارف بي الخلا ساكت

حبيبنا نزار
وهدناك العديلة قدامك ووراك
إن شاالله نشوفك وانت طيب بعد عودتك
وأن تلقى الأهل كلهم تامين ولامين
أها - أنا كنت داير أقول ليك أنا أفضل زيارة السودان
للناس اللي زيك
بين شهر اكتوبر وفبراير
الدنيا بتكون رايقة
ومافي شيتن يضايقك
لا زحمة مغتربين ولا قرارات جديدة
تتبختر في المليون ميل دي عليييي كيفك
والجو زاتو ظريف
والأرايل ولوفة

لاكين .. بي عافيتك كان نويت

تسلم يا اهل العوض

طبعا في السودان جهاتنا ديك ما اظنو الكمبيوترات ديل وصلنها
واكان وصلنها الا يكونو بشغلوهن بالبطارية
غايتو ده وكت خليتم هسع ما بعرفم البقي عليهم شنو

لكن المتاكد منها بجيكم راجع بي نضما كتير بلحيل

ها زول الناس ناجعة في الخليات دي بي كترة نضم ما لاقي
تدوين كاغلب حاجاتنا السمحة في السودان

ابقو عشره علي شيخنا شيخ العرب ود شنتير واصلوه
الزول ده فيه فايده عظيمة خلاس
ما تخلوه للوحده وجري في الليل

والهمباتي ده جروه لي الخيمة دي بعد يكمل عسلو

اهل العوض!!!!!
شايفكم ما اشتغلتو خالس خالس
باقي الشغله ..اعجمي فافتح له..ولا خيمتكم خاصه!!!؟
مافي مشكله
انا بكره بعزم ..البجاوي ..ودقنه..وباكاش..نفتح لينا ..قطيه بي غادي..وبكلم باقي الرطانه ..كل واحد يفتح خيمه..لي اهلو...رطانه ساااااااااااااااااااي
اصلها الشغله ماشه علي كدي..
كل قرد يطلع جبلو..زي ما قال المرحوم صلاح
مرحب بيك ..ساي مافي!!!!!!!!؟؟؟؟؟؟؟؟؟

بهظر يا اخوانا
والله بهظر

مرحب بيك يا دافي نيابة عن الجميع إتفضل يا زول و نهديك كلام جميل من الشاعر المبدع حسن سالم عشان تروق و تنجم

قال لي السويجع الغرام ألزمني
حملاً لا أطيقو من التقل زممني
بي سيم العاشقين السابقين أوسمني
لا خلاني عشت و لا كتلني عدمني

الأخ الفاضل شنتير…… و الله نحن نتشرف بي معرفتك و كلامك يدل على كرمك و أخلاقك السودانيه الأصيله…… و جايينك بي درب أب نقيب السموهو الإيميل يا شيخ العرب

أولاً بالتبادي .. يا عزيزنا الدافي .. إن شاء الله طيب

ترحيب مغربل و صافي
من الخيمة لي اخونا المسمّى الدافي
دي دارك ملك في شنو الزعل يا كافي
أياك سيدها ماك زولاً بدور عوافي


الشكر موصول للأخ العزيز اهل العوض الذي لبعني بايميل ظريف و معاه هدية تفتح النفس .. شكراً عقب يا اهل العوض

ود محجوب .. ماك طيب آعيسي .. يعني بتبشرني بالايميل و تنقرع؟ ما ترسل مالك .. يعني بتاكل لك في بيتزا .. ايديك الاتنين مشغولات؟

نزار .. و الله انا برضي طولت من السودان . و كل ما اتذكره بديها جكة لا غادي .. غايتو كان مشيت جيهة السباغ اقع الخلا .. في ناس بيغادي علي الطلاق كان لاقيتهن اياك الماك راجع تاني

شنتير الصديق حالي العلي ما خافي
ضيق فوق ضيق وغم غربه وعذابا كافي
ايه يسند قفاي غير ايد صديقا وافي
تبرد نار حشاي قولة حبابو الدافي



ود محجوب حبابك طيب صلات ومحنه
فوق ادبك حويت علما يزيدك رنه
شاحد الحي دوام بي قربكم اتهني
في الدنيا ام قدود وعقب رياض الجنه

بسم الله الرحمن الرحيم ... ده شغل شنو ده؟ إت كت وين الزمن ده كلو؟ اها من هنا و غادي أوعى نشوف تزازي بيغادي .. دايرن نسلمك راية الخيمة

Above the Crown .. and Her Majesty ... go up

مرحب حباب دافي
أب كلاماً دافي
أب ضميرا صافي
يازول انت سيد بيت تب
سلامك سلامنا
وكلامك كلامنا

أبقى لي جوة .. واخلف رجل فوق رجل وورينا بضاعتك

الحبيب شنتير

من يوم نشرت عنوانك وانا مشرك ليك في المسنجر في دار الهوت ميل .. صحيح ما قدمت ليك طلب إضافة .. كنت بدور أجيك غاير واشوفك بتعرفني أم لا
تاني شيء الخيمة دي غالية بالحيل وعفريتك دي ما عاجباني .. تاني كان حبيت تعفرت الخيمة ما تكتب عفريتة أو ابقي لا فوق .. لكن شوف لينا حاجة كدي من بيت الكلاوي وارسلها كان منك ولا من عمك الفرجوني وبالمناسبة عمك انا رسلت ليهو رسالة عبر المنسجر ادعوهو لتشريفنا في الخمية .. عليك الله مجهودك معانا .. الخيمة دي كلنا أخوان فيها لكن بندورلنا كبير .. يبقى شيخنا ويمسكنا الدرب

تحياتي

شنتير ود ابوي صاحب المعالي وقامه
في حالي ومقالي..الدنيا ماشي كلاما
الغربه اليباس سكة عذاب وندامه
ضاع في سراب سنينها عشم الوصول بسلامه

يا سنجاوي .. و الله انا ياخي مرات بجي بلقى الخيمة حتلت في اخر البورد و بقول اديها دفرة .. لكين وصيتك سمحة .. تاني بسندها بي شعباً غلاد

و بعدين لي شنو ما بتلمني على ناسك الفي المسنجر ده؟ و الله انا كتبت عنواني الالكتروني ده هنا عشانكم .. و لا هسع ما جاتني رسالة الا من اهل العوض .. اها إن شاء يوم نتلاقى في سرج المسنجر

العم الفرجوني قال الكمبيوتر بتاعه لكزو ولدو بوظ فيه حاجة .. و اللاخ بكري ابوبكر حيصلحو ليه قريب ان شاء الله و بعد داك ببقالنا راس قايدة


الاخ الظريف الدافي .. و الله بارك الله فيك ياخي على كلامك السمح ده .. كتر منه

بسم الله .. يا سنجاوي الايام دي ما بعرف الحاصل علي شنو .. اصلو ما حصل كتبت لي حاجة و ما طلع فيها خطأ مطبعي

تصليح

اها إن شاء يوم نتلاقى فوق سرج المسنجر

أها يا سنجاوي .. سماعاً لوصيتك


زاكية مسكة اللبع الدمير بي هوبتو
قبلي مفككة العاقب صلاتو و توبتو
هجيني عليها حاكى الـ بالكواتل لوبتو
ولا اوبو لبة عناف الجبد منهوبتو

الفرجوني

متلوم كتير يا دافي باطن وظاهر
ما مقصودة يا الصنديد وأدبك ظاهر
دهج الدنيا والردحي الدوام متظاهر
دا السلب الصبر مني وبقيت ما ظاهر

الاستاذ ياسر محجوب .. أولا حمدلة على السلامة ونرجو أن تسمح لنا فقد قطعنا فيك أنا وأخوي شنتير .. وطبعا نطمع في كرمك والمزيد من الأدب الرفيع الذي تتحفنا به وهو شرف لهذه الخيمة وروادها .

ود شنتير .. شكيت محنك على الله .. برد عليك في الايميل .. طبعا نحن ما عندنا خدمة يوم الخميس والجمعة .. لكن برضو كتبت ليك الايميل يوم الخميس . شنو ليك . طبعا في البيت الجماعة ما بدونا طريقة نطربق بي راحتنا .

سنجاوي أب نضما يداوي .. حبابك آ بوي .. وأثني على اقتراحك ونطالب شيخ العرب باستجلاب أوتاد جديدة . (أنا باخد المقاولة) من هسع

نحن في شوق شديد لسماع الاستاذ الفرجوني .. ولو في طريق نتشرك لو كمبيوتر انا من عندي خمسطاشر قرش في الحزة دي .

كنا قد طرحنا بيت الشعر المشهور لجميل الذي يقول فيه

صغيران نرعى البهم يا ليت أننا إلي اليوم لم نكبر ولم يكبر البهم

وطلبنا من الشباب مجاراته بالقطع اللخدر .. فتجاوب مشكورين الاستاذ ياسر محجوب والاستاذ سنجاوب .. الرجل الذي زعل .

نعيد طرحه الآن كطلب شيخي وشيخ العرب شنتير

يا أهل العوض وشيوخ العرب والرطانة سلام

يا هلا بخيمة الحادلو في ديار البكرييين
طبعا أنا في الغالب في الخيم دي بكون زي الأطرش في الزفة بس حبيت برضو أقوي قلبي وأشارك معاكم بكلام من كراس غيري ..قال ايه...قال الشايقية زمن المهدية كانو بقولوا كده
وأنا طبعا زي سطحت في بعض الكلام

الليل أب سدر ابكنه يا اخواته ولدا في قدير مابشوف ذاته
ود محمود حليل نقل القديم فاته سيد سرج الدهب والفضه قهواته
يا حليله اب سدر قمر العشا الموهلال للضيفان يكفي والبواطي اشكال
درفون خالك انت الما معاك مثال عمه اب راي صبير وجده الملك كمبال
جنيات الكنابلة البردو في ام دعكاب بتدخلو الصفوف اليوم قمركم غاب

أهلا بالاستاذة رمانة .. هذا تشريف عظيم ، نشكرك على المشاركة ، ورغم إنك لم تحددي الحتة اللي زي مسطحة فيها ، فأنا أقول (وبالله التوفيق) أغلب الظن أنها مناحة قالتها قريبة لهذا البطل ود محمود . نفل طبعا معروفة وهي تفيد الزيادة ، والدرفون هو الطفل اليافع وهي كلمة اختصت بها جهة معينة في السودان الغربي ، ويقول المثل هناك (ماتاخد ام الدرفون لو كان مدفون) . البواطي لا أعرفها لعها آنية ، والله أعلم لذلك أجدني أقرأها كما يلي مع الاعتذار مقدما :

الليلة(بدل الليل) أب سدر ابكنه يا اخواته ولدا في قدير مابشوف ذاته
ود محمود حليل نفل (بدل نقل) القديم فاته سيد سرج الدهب والفضه قهواته
يا حليله اب سدر قمر العشا الموهلال للضيفان يكفي والبواطي اشكال
درفون خالك انت الما معاك مثال عمه اب راي صبير وجده الملك كمبال
جنيات الكنابلة البردو في ام دعكاب بتدخلو الصفوف اليوم قمركم غاب

الاخت الزينة رمانة .. كلامك جميل و الله و يبدو أنك تختزنين الكثير من مثله

عزيزي اهل العوض .. البواطي جمع باطية .. و هي إناء .. اما شكله فممكن أن يخبرك به اخونا سنجاوي .. أما أنا فساعطيك بيان بالشعر المحفوظ

أديتو العيش بالباطية
كان تقوى جريدتو العاتية
على الما نضمت خاتية
بتجدع متل الفاتية



تاني الاخ أهل العوض .. نرجع لي بيتك الضيق ده و دايرنا نحشر فيه اربعة بيوت من الشعر الدرشي

صغيران نرعى البهم يا ليت أننا إلي اليوم لم نكبر ولم يكبر البهم

بسم الله يا مهون القواسي

جهالاً كنا أنا و تومتي و سغار في عمرنا
سارحين بي بهمنا و ما في من حاجرنا
نلعب مانا قايلين الزمن بغدرنا
اريت يا تومتي لا كبر البهم لا كبرنا

شنو ليك .. لاكين وحاتك إت تعبني تعب .. تعب عدوك

الاخ شنتير
شكيتك على النجرك
ات سايب بتجيب النضم الحلو دا من ياتو دلو
والله فعلا حالي وطعمو حادق
وبالنسبة للوسم
فالجنس رفاعة والعمودية مسلمية
ونتلاقى في ضهورن كان الله هون
ومرواحنا قرب
وبعدين الباطية دي أنا غتست مني وين في الساعة ديك؟

الله .. رفاعة جيهة المناقل؟ الوداكن هناك شنو؟ .. و الله انا كت قايل رفاعة كلهن ضاربين الدنادر .. و الخريف بنشغوا مصبحين .. خسوساً ناس ود أب جن و عرب الليم و الحمدة و عرباناً جيهة الطلحة المشرمة

بالمناسبة دي في مسدار أب قلب ناجرو الفرجوني فوق اهلك رفاعة و ترحالهم الى اعماق البطانة في زمان ما .. والمسدار ده أنا عندي من زمااان حفضتو و نسيتو لكين كان نحت مخي و بحت في كوم الشرطان المباريني محل ما امش ده .. بلقاه ليك تب

هسع بتظكرو طشاش طشاش لكين في واحدات كدي النرمتيهن ليك

سدر الديش قلع جدعن جمالو الباع
و ناس اب شترة قطرانهن سرف نباع
حور الليم عقيدتن ختّ فوق نجاع
و دوّر مرنع البلد اب سحاباً ماع


جرس العطفة ببكي بطبّق النقرات
و ايدي الفايقة بتنسّف سيورها شتات
منّاك للطبق يا رفاعة ضعنك فات
و الجاب الخبر نازيلن ابو دميعات

غايتو كان قعدت ليه بتظكرو
و الله اعلم

تصحيح يا اهل العوض في الغنوة التانية .. في غلطة مطبعية

جرس العطفة ببكي بطبّق النقرات
و ايدي الفايقة بتنسّف سيورها شتات
منّاك للطبق يا رفاعة ضعنك فات
و الجاب الخبر نازلين ابو دميعات

الحبان جميع .. تحيات

الاخ العزيز شنتير .. امس كان عندنا بطالة . دحين عاين في المربع دا .. أنا شايف فيه فزرة لاكين برضو عاجبني .

مزروع في الشتا وساقينو بالبابور
ممورق صندلية وبالخمر ممطور
ضي العين أذاه في الفواد مسطور
وخيط البسمة يشلع زي شعاع النور

ويا ودشنتير هاك في رفاعة

رفاعة الربة قافا البليب متدلي
زي الفاقد الاطفال بقيت متبلي
المربوعة قامتو وبالردف متعلي
ذكرو غيابو من غيرو الانس مابسلي

الحبان عموم... و الخيمه دي تاني غتست...أها ختيت فوقك هام مرده أب شراياً كوم.. نرفعه بي
قول سيدها زاتو الحار

يا سخلة عشيب الأرض قِمح قناصك
و يا ثمرة حدايق يانْ شِرِق مصّاصِك
محيّاك جّزع الكبِد و الفؤاد رصاصك
بليتي بغيّْ جديد يا نفسِ كيفَ خلاصِك

يا شيخ العرب ود شنتير و الله غلبتنا تب في بيت أهل العوض... و كمان إنتا و أهل العوض أديتونا من علمكم ماشاء الله بحركم واسع صعيد و سافل.. و كمان نرحب بالضيفه رمانه و كلامه السمح..

يا نزار.... دحين آ خوي كلامك الختيتو هول التجاني ده ما بنقدر و لا بنهابش فوقو.... غايتو زي ده إلا يدقو شيخ العرب شنتير ولا يجيبلنا سيد القول و الفراسه الفرجوني

الاستاذ ياسر مجحوب .. سعداء بمشاركاتك المتفردة
شيخ العرب ود شنتير وعد بتبديل أوتاد الخيمة ونحن في رجاه
هذه من قديم الهمباتة:
الليل أمسى والنعسان جرايدو يدحن
كبس الهم علي السلّط قلوبن وحن
كضم الجرة سحار الغروب اتمحن
نعود سلمانة يا عمر الظروف إن صحن

الأخ نزار في آخر مشاركة قال إنه مسافر إجازة . نتمنى له سفرا سعيدا وعودا حميدا . ولك التحية

العزيزة الغالية رمانة

حبابك عشرة
بزيارتك بيتنا نور
ما تنقطعي

أهل الدار
بشوف خيمتنا غطست وبتدورلها عفريتة

هاكم العفريتة السنجاوية دي

الليلة الحـروف لاوتنـي هـدت حيلي
عاصية عديل أبت ترسم تعاستي وويلي
قالـت ما بتـروح للحسنو جنن جيـلي
شان جافي وبخيل في دربو ضـلّ دليلي

الليلة القصيد فـي صدري عالي هديرو
شن صحاهو غيـر جدياً شديـد نفيرو
بعد ظنيت نسيت جرحي الغريق عويرو
غافلني ونـزف سيلاً يـدوي شخيـرو

بعد ظنيـت نسيت الليلة شـن ذكرني
وشن طراني لي جرحي الزمان عورني
كل ما أقـول شفيت من السنين كدرني
ينـزف من جديـد لا طبت لا ودرنـي

ما شفت الجروح زادت على يا أسامة
طرانى الشليخ فى خدو باقى علامة
تمشى على مهل وكل العسل فى كلامه
شايلة البرتكان وبالعين تصيب بسهاما
كتلتنى الشويفعونة والروح بقت تتسامى
فى حب المكبرتة واللون تقول شمامه

looooooooooooooooooool

يازول الفظيع للنجر السريع

مبدع يا هش

والله حللك البتعملها القطر قام دي
كان قلت بسم الله وسبكتها على نار هادئة
البجري وراك مايلحقك

تحياتي

يا الفي الجحر الصلوتية جاتك

يا ودشنتير وسنجاوي والهمباتي واهل العوض وودمحجوب

يا ناس الحاصل عليكم شنو ضربكم الصقط والزيف
ارفعو بطاطينكم دي وامرقو لا برة


تعاليلو عديل يا امدرعة ليش راراية
وما بقدر احاحيك واسيلي جناية

الحبيب نزار
لك الود
الحبان مهملين الخيمة في طلب المعاش
أها بعد ما يجونا صادين سالمين غانمين
بندور منهم الفيها النصيب
وهاك بليلة مباشر

الليلة الغـرام حكـم علي سلطانـو
ذكرني الحبيـب وشواني بـي نيرانو
وين الشال قليبي وساقني في حيرانو
واشوقي الشديد لي ضمتو وهمسانو
مجبور المعاش حتـم علي هجرانـو

الليل الطويـل زاد الفـراق تعذيـبـو
وجمـر الشوق يحرق في حشاي ليهبو
وين الشال قليبي وخلى عنـدي قليبو
ما بنسى ان نسيـت ليلة فراقنا نحيبو
معليش يا ام أخوك الحر بيرضى نصيبو

يا سنجاوي

خليه الغرام ساكن قليبي وباني
وراكز شعبتو في كبتي داير يهراني
قدر ما اقول ازورو طبيبي شان يحجاني
القي مسافتي بيني وبينو بعدت تاني

انا في الغرام غاتس يمين بي هدومي
افج الموية واتنفس اخاف من يومي

واكاتل الموجة دافرة وقابضة في حلقومي
دحين سنجاوي باقيلك بفز بي عومي؟؟؟؟


كبدتي كتبت هكذا لداعي الوزن وهي تنطق بالعامية هكذا
طبعا الشرح ده ما ليك يا سنجاوي ولا لشيخ العرب ولا لاهل العوض

up

الاخوة الكرام في الخيمة :

الاستاذ ياسر محجوب ، سنجاوي ، نزار الجعلي ، يازول يازول ، دباش والغائب ودشنتير المو تاجر حمير . تحياتي وشكرا على الأوتاد التي تثبتون بها الخيمة كل ما صفى فوقها موج . كنت بعيدا عن الكمبيوتر في الأيام الماضية . لكم التحية وهاكم من سيد الخيمة (الحردلو) زاتو كما قال الاستاذ ياسر محجوب ، دا يا سنجاوي لعجزنا عن مجاراة نظمك النضيد:

في يوم الجمع بالحيل رطببها عوالي
ماخدة النورة فوق الصفصفو الغربالي
إن ثبتت سيادتك للشباب إجمالي
تحكيبهاالدول لاعن سراية الوالي

ود شنتير لديه بعض الظروف حكاها لي تبعده عن المشاركة في هذه الأيام نتمنى أن تزول تلك الظروف سريعا ويعود لإمتاعنا بالدرر التي يختزنها وينثرها بعفوية ، دون تكلف

إن تلق يوما على علاته هرم
تلقى السماحة والندى خلقا

وسلامتكم

الليييييييييييل

الناس في العروض ما تقيسه بي تيبانه

ما يغرك لباسهم والعروض عريانه

ديل حراس رزق ذي التكنو امانه
زي ابل الرحيل شايله السقي وعطشانه



ابشرو بي الخير

شكرا يا عباس ، أبشر بالخير

الما بانيك ولا صارف عليك موجود
حربو معاك زي خنق الحبل في العود
الأرزاق مقسمة والعمر معدود
والهوا عند كريما بابو مو مسدود

أنا المجنون وسـر جني البجنن شوقو
أنا الكاتلني شـوق ليماً معسل ضوقو
كل منـاي أشوفو وأطفي ناري بريقو
حلالـو يعيقني يامولاي يـوم ماتعيقو

سافر شال منامي وشـن بلاهو منامي
وكان صادتني غفوة بشوفو في أحلامي
قربو سبب سعادتي وبعدو سر آلامـي
يا مولاي سألتـك زيـدو مـن أيامي

سألتك ربـي تجمع كل حبيب بي حبيبو
وتحفظ عُشو من عين الحسود ما تصيبو
وترحـم قلبو من شوقاً يـدوي لهيبـو
وتجمـع شملي بالشايـل قليبي تجيـبو

up

طازج شيخ العرب - الفرجوني
الحقوق محفوظة للصديق

أب قنفة العني الضل الملانة مماهلو
فقرك دير و دومك فوق قلايدك باهلو
على الما قالوا حظك في المجالس جاهلو
الصي سادرو كلو و دوسو وكرو و ساهلو

و الله يا أهلي فرحني و سر بالي شوفة خيمتكم بيجاي
هواكم بارد و نضمكم موزون الله يديكم العافية

سيد الخيمة اهل العوض

وين الباقين ودالمحجوب وسنجاوي وودالحافظ والهمباتي ودافي انشاء الله قلعة الخيمة تجيبهم لينا راجعين سالمين وغانمين بركة سيدي الحسن جد المرغنية

اما شيخ العرب برمي ليها غنية من زمن الخيمة القديمة


يا شيخ العرب نمك عقولنا فتحها
للصوت والنحاس ليلة الخلوق تتنحي

راكزين في جزيرة والبطان فد صفحة

وعينا علي العبيليجة البترمي طرحها


نزار

نزار الفنان : كتر خيرك وحمدلة على السلامة .. وهاك على لسان شيخ العرب

أدرع َنفّـر الغنم المـراحهـن ليلة
عقب أب دوم والوادي الزَرَاعتو قليلة
علي السمحة الغلب توصيف سماحّا خليلا
درويشا سمع نوبات وشال تهليلة

اهل العوض حبابك

طالما قلت علي لسان شيخ العرب اها انا كمان بديك واحدة سمعتها منو
وانت عارف انا كل يوم بلاقيه في الماسنجر لاكن الزول ما برمش تب
اليوم كلو موجود بس ما بيرد,


عين الفرقة دمعك وشلي واسخيلو
حاكي الوابل اللاقا النهار بي ليلو
بعد رحل العشاري وقلبي حاربو دليلو
سهرك لازمك نايح السقد آنسيلو


الزول بيكون غاتسلو في سحابتن زرقها زي ناقة الكنانه ام ريش
تقرجن وتبكي ويبكو عليها ناس العيش
طعنها البرد وقالت ها العذاب فوق ايش
رمت مقدافهاقلست

وترعت واحمتو المرقة

ده الظانو في بالي

نزار

والله بندور تاني نسمع نمة شيخ العرب الخاتية القول

نزار .. البارح كان معاي وكنا في سيرتك (قطعنا فيك) وهاك منو كذالكا :

يا قلع الهماييب ليك ألف سلامنا
حليل وكتن قبيل أيام سكون ناس آمنة
زمان توتال فريقن وقبلت متيامنة
كان بتخلى ضاقت حلقت أقدامنا

ياخ الزول دا ختري خلاس والله التقول مراضعلوا ديوان

نحن في انتظار شيخ العرب

اهل العوض هاك دي من شيخ العرب

غردتو تجول لا صرتو
شال بهم ام خدود في فرتو
بعدل عوجة الدرب بي ترتو
وينقض مسيرة الراس بي حرتو

الزول سكو جيبو هنا ما تخليه ينطلق

والجنيات
صباحكم زين
والله الزول ان فلت منكم
تبقى عوجة

نزار
في واحدة من الغنوات ديل غايتو بتور عليه وجع الضرس

وبرضو نديه من هذا الجراب

أمرار في الكدوس وأمرار سجارة أعلب
أمرار في خلا وأمرار بهيمة أسلّب
كم رابع جنين فوق الدرق بتلب
ولي الجاييني راسي ومنو ماني مجلب

الجندرية
إيدك معانا
كان وقع في عينك دودريه علينا جاي

كـومر وانضروب قبطي وستايرو مشمع

بعد الاذن

اهل العوض والجنادرية حبابكم آلاف

ات ماك خابر البتور ضرس شيخ العرب
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

يا ابعرج القبايل كلهن زهدنك
وما بياخدك بشر في المولي كبر ظنك
بي نقع البطانة مفنك =====
يبقي الليلة نايرات الخدود طرينك


ود ارباب عليوك نيلو زرقن
اقلب الشد علي الدوماتو عرقن
جناك الزاع مفاقر وطش شرقا
براهو ينوح علي الميع المترقن


وبرضو غيرت الكلمة الاولي في البيت الاخير
كان شيخ العرب يجي ناطي ويقول شي

up up

سميناها رضينا ، وبرضو حمدلة على السلامة

بعيدة بلودك آ المتل المزرقن فمك
وأحلى من الروايح ومن عبيرهن شمك
قت لي قلبي ها المجروح بمتر دمك
وابشر بي نظرة الشوفتو بتفرج همك

أحمد عبدالله البنا

ود الحوري شاف قلع النواصل جرّف
السوط منّو زي عادي المحيرة اتغرّف
يا ود العنانيف أب قفاياً سرّف
وا سهرك على الـ لفسلنا ما بتحرّف

يوسف ود عب شبيش

و شكراً على المدودرا دي

من نفس النبع الصافي

ها الظبي العلي قفر البطانة مردك
ذكرك بالعفاف في قلوبنا عمّ ودّك
ديسك قولّو كرّ في المتاني مهدّك
طرفك قولّو آذيت القلوب بي حدّك

تقيل الختوة تاتاي المشيهو توحَّل
أدعج طرفو رمّاشو الطبيعتو مكحّل
البسماه براق العشا الـ اترحّل
يا دريس جسمي من ازمات غرامو اتنحّل

من نفس المغترف

شتلاً ضير سواقيهو وهباب ما فرّك
ريدو سلب يقيني وعمري منو مدرّك
يا ظبياً تبع نيل المهاوي مجرّك
الله براهو يتلافى القلوب من شرّك

ها البرق البتلعب صح و رايق درك
اسقي الريدو في صفحة ضميري اتمرك
دامن رف بي سهم البطاين فرك
قول لي قلبي عاد ليك التقربن و حرك

شكيتك على الله
قومت نفسنا

صغى لي قولي سمّاعو الرقيق اتحرًك
نفى شنشولو وانفقل المعز ومعرّك
قال لي ونفّ جنحيو الرقد واتعرك
كفي صميم وعندي هميم فعالاً يسرك

صغى لي قولي سمّاعو الرقيق اتحرًك
نفى شنشولو وانفقل المعز ومعرّك
قال لي ونفّ جنحيو الرقد واتعرك
كفي صميم وعندي هميم فعالاً يسرك

تصحيح .. من وحيح صوت المديح .. الله حي دايم نصيح

انصقل المعز و معرك
جنحيو الربد

انتهى

شوف داك السباغ العدّو زاكي شرابو
ما بنغشاهو يا اب سرجاً نبح كرابو
رد السنة لي اب صرة و عزاز نورابو
اهل المرجلة البتزابوا فوق اغرابو

شيخ العرب ودشنتير واهل العوض

جيبونا كم شخلوب علي الوسم ده
الاتنين ما بتتصاقعو تب

شيخ العرب الناس امس ضايرتهم ليك من فراشهم لا مديرهم
وحرم لامن سوولي لجنة عشان يعرفو الشغل دا راح وين
وهسع جابو لي خبر قالو اصلن

دوبو دوبو آ عرب واملو كدوسكم بالدوبيت الكلام ده
حرم يتور شعرة الجلد

ما هو دا المقصود زاااتو يا حبيب
نحن بنغليك كدي عشان نستفزك عشان تنثر من تلك الدرر
ونعتذر لك وللفرجوني

الجنيات
الله يصبحكم بالخير
كان غيرتو ريقى ولون صباحي
زيدونا يزيدكم الله من فضله

نزار والله ات تركة صلاح
غايتو ، منكن جفلة إت وصاحبك

مرق مخلوفتو مما شافا حيلو اتشمك
قت لو سلمت يا المتل المناظر دمك
طايع وراسي مو كبوري هاش واتزمك
قت لو ادنيلي شبال درعتي مزمّك

وووووو نزار .. ها زول الناس ضايرتهن؟ كابسهن يكابسهن شريف اهلو في الريف .. انا و الله فقري وقعت من الخرمة


عقب الدندر الغيبة و منوّي شروق
و ركز العقبو حر فوق جد ابو البرقوق
خليت الوراك ساف الوطا و محروق
كب آخر ايدك آآلحوري الجلب مشروق

تصحيييييييح
دستوووووووور يا حاج نزار

عقب الدندر الغيبة و منوّي شروق
و ركز العقبو حر فوق جد ابو البرقوق
خليت الوراك ساف الوطا و محروق
كب آخر ايدك آآلحوري الجلب مسروق

الجندرية صباحك خير
عليك بشنتير فهو شاية هذه التاية

الملا عمر
سويت لينا وجع فقرة لحدي ما لقيت مشاركتك
ألف مرحب بيك - مكانك صدر الخيمة

هاهاهاها

أهل العوض

الملا عمر جننك ، يا خي دا مدوخ العالم كلو ات تكوسلك في بوست وست النضمي دا كلو

ما عايز اقول ليك الخيمة دي مظللاني قدر شنو

سووا .. سووا

ما تقيفوا طب

الشي دي خيمة ولا متاهة
قدرت مالستَ ما لقيت مشاركة الملا عمر
دحين هي في ياتو جناح
عليكم الله عينو ليكم دليل في الخمية دي

يا اهل العوض و الرحمابي .. اوعى تقولوا لي انتو شايفين مشاركة الملا عمر؟ و الله العظيم انا لسع بزازي ليها و مالاقيها. وين ياخواننا كلام الملا عمر ده؟ انا عيني طششن وللا شنو؟

فرشوت غبّر السبعات و طلق الفوف
و جاب لي قلبي وحّاحة و زلازل خوف
عيني يا العوض حرمني من الشوف
و انقطع الوداد من القناها أب روف

شنتير والجندرية
مشاركة الملا في الصفحة التانية يعني يكون ملا كيف

وهنا لابد من الاذن

ريد الردتو يا حسن الفكي وجافاني
فيه هلاكي وأسباب الدوا العافاني
ما دام زولي بالطبع السمح صافاني
مالي تاني في الواددني والجافاني

الحمد لله يا الجندرية انك ما قادرة تلقى مشاركة الملا عمر .. عشان ما اكون انا بس الما شايفها. انتي عارفة انو الملا عمر ده يكون اصلاً غير موجود .. يكون في تورا بورا ياربي؟
الناس دي طفشت وين؟ يا اهل العوض و نزار .. و الجندرية لميتوا فيني جريتوني جر .. و انا انفتحت كل مسامات راسي .. و مطاميره العتيقة .. فاين انتم؟ الله

البارح و اول البارح في المنام تخربنا
واقفين ديدبان جناً كبيــــــر راكبنا
لا في من قريب لا من بجي يطايبنا
اصبع ضوّة في عين الفكي البحجبنا

اصبع ضوة ده شنو يا سيدي الحسن؟

هاجنى هه
ات العشق
حماك تشوف التاني والتالي
نحن قاعدين في باب الخيمة ومطرطقين اطنينا
كدي ادنا من مطاميرك

شنتير
بالراحة علي الفكي
ضريتو ضرر شديد

من إذنك في النمة الفاتت دي ، يكون السماح

البارح صبيب برق السواري قبلهن
صقطو الجابو موجات القلب حولهن
الإتسربقن قبل السبية قبلهن
سفكن دمنا وجرًح ضميرنا شللهن

يا سلام يا اهل العوض .. والله انت الكلام الكبار ده بتجيبو من مين ماني عارف .. ياخي و الله اريت اكان الزول ما عرفك زاتو .. زي ما قال شاعرنا المتهرب محمد سعيد العباسي

الوادي الغزير شقلو و غديرو مسرّف
يا ريت كان قبيل بيهو الزمان ما عرّف
الضيب الـ على راس القلوع بتكرّف

البيت الرابع بجيبوا ليكم بعد ما اشوف حلة العدس دي ما تكون حرقت

فسراع آ شانتير
تمها موية وتعال
بندور ناخد الزوادة قبال ما نقوم

شنتير
اتو أظنكن لسة واقفين ديدبان
ياخ بتاعة قلع المهاييب وين ما قلت بتمها لينا

بعدين ياخ عندي بيتين من طرفة داير تترجمن لينا دوبيت

يا قلع الهماييب ليك الف سلامنا
حليل وكتاً قبيل ايام سكون ناس آمنة
زمان توتال فريقا و نزلتا المتيامنة
كان بتضل لي ضاقت حلّقت اقدامنا


و الشغلانة الفووووق دييك
ريد الردتو يا حسن الفكي و كافاني

يا اهل العوض .. و ليس جافاني

أها اللله يبارك فيك .. بس تم أجرك وجيب المربع الباقي ،

يا قلع المهاييب البدت متيامنة
كم غنالها كان شيخ العرب قدامنا

أنا غايتو ، التقول أنشق

وبيتين طرفة : هوم ويرك

كأن حدوج المالكية غدوة ** خلايا سفين بالنواصف من دد
عدولية أو من سفين ابن يامن ** يجور بها الملاح طورا ويهتدي
يشق حباب الماء حيزومها بها ** كما قسم الترب المفايل باليد

خل البيتين الأولين دا للشرح بس ، أنجر لينا في التالت .. الله يخدر ضراعك

ياخوي طرفة بن العبد . و خاله المتلمس صاحب الصحيفة .. ديل ناس يعز علي المساس بما نسجوا . و ما تخلينا نبوظ كلام زي ده

شيخ العرب ودشنتير

الناس عليك امان الله ضايرتهم مضاير حجازي ابليس بس
والطرد بيصلك قريب ما ضاع تب
ورقمو تراهو ده
4329
شرحو لي شرح طويل
فيه اجازة وماركة ووزن وجمارك
وفحص
وكتبوني ورق مالو حد

المهم في الموضوع عندي الورق البككهم بيه اكان اتلخلخو وما جابو ليك في بطن بابك


اهل العوض ما تقيف من الدوبيت لامن افضي بالي ده شوية واجيكم

الورق البككهم بيه اكان اتلخلخو وما جابو ليك في بطن بابك

هاهاهاااااا و الله يا نزار المفردات الاوردتها دي قدر ما حاولت اقاوم الضحك بعد قراءتها .. عجزت عجزت .. و مازلت اضحك .. ياخي و الله الطرد ده انا اتمنى ما يصل زاتو عشان يخليك تهترش كدي

ياخي و الله اديك واحدة من عمي عبدالله ود أرباب .. قالها عن سنة ستين التي كسدت فيها المواسم و ساد الجفاف كل مراتع الاهل في البطانة العزاها الله .. اها قال في وصف تلك السنة القوية

ستين مثلت ستة الزمان بحكوبا
ستين شالت العيش و الغباش و اللوبا
ستين جاتنا عريانة و نست مركوبا
ستين حر سمومها يحرّق الراكوبة

و في واحدة تانية و الله اسمح من دي .. بس عاجبني جزء منها بقول

ستين رافعة ايدها و راكبة ليها حصان

رحم الله ود ارباب و الحقني به

آناس أنا ما سعيد عديييل كدي ..نزار .. لا حول .. طردك دا في لبا الرقطا وللا شنو .

شنتير .. جننت ستين جن ..

ونحن بنغلط وات عليك التصليح :

ها المتقدر الفي الضرعة زايد مدّك
في النفارة خالك وفيها عمك وجدك
قول لي قلبنا المتهلك ألزم حدك
أرماحو بتصيبك وسيف عيونو بحدك

زي ما سيدها نجرها يا عمي أهل العوض هاهاهاهاااااااا ... و يا ابو الشيخ عقب عادن ليالي سهرنا

يا الفي سبعة زايد في السماح فوق ندك
لا عبدلة يسطع ضاوي نايـر خـدك
ذوقك عالي ، حالي مع البخاطبك ردك
وجسمـاً ليك رطيباً مـنو فوح ندك

يا زول انت مريض يا اهل العوض .. شوف ليك حكيم ياخي!! الله .. انت شغال شنو؟ نسعل الله السلامة

اديك واحدة من اب قدم الله يرحمه .. شيخ الهواوير .. ياخي الناس السمحة كلها ماتت .. و انا طاش

أكان حنيتي ما بتنلامي
ضايقة النشغي في النعم البقوم قدامي
القش الربيعك فيه صيد و نعامي
ما قام اصلو .. بخلن بو المحول آم شامي

و المعني واضح وضوح الشخلوب فوق الشدق

بخلن بو المحول ...
المحول البخيلات ديل ما جابن الصديق

محول شنو البجيبن الصديق؟ الصدسق بجينو سنين الرخا

ياخوي إت الجنى نزار وين ختر؟

نزار يمكن يكون مكرمس
إت في نزار ، التانيين وين
سنجاوي
ياسر محجوب
طه
الباقيين كلهن

سنجاوي ده معتكف

أنا غايتو و لا زعلانة ..البزعلني شنو؟؟
ياها الرماضة السيحت ودكي و لا أبو الفرار الشق راسي
وقفت في الباب لامن نشفت
قولة يا السارة أتناولي ليك موية من القربة ديك مافي ؟؟

و و الله ما زعلانة... طنشوتي و تاني جيت
ما ميتة قلب و الله .. الا عاجبني نضميكم

تسلموا كلكم من كل شر
علقوا ليكم بخور تيمان في باب خيمتكم
لا يطقوكم عين

مسئولين من الخير ..وين الزول النضام ود محجوب
سنجاوي أب كلاما يداوي ترا عرفنا قصته البركة في شيخ العرب
قت لي معتكف؟؟

سلام جاكم آناااااس هوي
عوفي وماكم طيبين
الزول مطول منك بالحيل ولي نضمكم ده

اها هاكم اسمعو الحديث سمح كيف
من عمنا ود الرضي

السبب البخليني اكتب وامحـــــــي
فوسيب التري القامت في طينه قمحيه
معلوم يانديم لو شفت خياله بلمحــــه
زال حزنك طرب سافر خطوتك سمحـــه

بسم الله وشيلو معاي صــــــلا وتسليم
علي اللوصافو في القرآن رؤوف ورحيم
وامابعـــدو ـ مني سـلام دعاش ونسيم
على الفي الخيمة جملتهم رجال وحريم


ود محجوب وناس شنتير وزول يازول
وناس ود عازه والزول زاتو سمح القول
وديك الجن وطه العاقل المعقول
وسنجاوي الرصين دوبيتو دوم معدول

وود الجيلي ما اتحكر على لاب توبو
والخواض اذا الماوس لعب في عبو
ناس قرشو ودباش ونزار ويات مين هبو
والملا وحبيب الكل وكل من حبو
وحت هل العوض سلامي يردو مصبو

وناس الجندرية ـ السـارة والرمانة
رجحن في الفهم ـ زادنو زوق ورزانة
ضــون خيمة الحاردلو لى فرســانه
في شنو القعدة غيرهن والخيم شن شانه؟

شيخي الكتيابي بي نضمو فات القول
ان نقعد جميع من يومنا لي دا الحول
مابنقدر نجبادو ونزيد في القول
ده ماهولو الكلام ان بالعرض والطول

سلام ود الشيوخ أهل النحاس أب شنة
ناظم للقصيد خلانا أتمحنا
يكرم في الضيوف من غير رياء أو منة
يحفظك الله يا كتيابي دوم تتهنى


أستاذ يا أستاذ

يسأل منكم خيـر الزمـان وسرورو
ويغفل عنكم غـدرو ومكامـن جورو
سائل المولى يبسط في طريقكم نورو
ويعتق عبده من سجناً غشوم مأمورو

سجناً خالي من شبك الحديد شباكو
من السور المعلى مكهربات أسلاكو
تحتو الدابي فاير سمو حارس أملاكو
لزومو الخنقة والبهرب بلاقي هلاكو


تحياتـي

سنجاوي أب كلاما يداوي
الخواض أبوي
أزيكم

حباب قدورة سيـد القول وفارس خيلو
حباب دخرينا زار خيمتنا شاعـر جيلو
مكانـك صهـوة القمـر البنـور ليلو
وصـدر الخيمة من رؤياك يضج تهليلو

تحياتي

سلامك بت أبوي يا السارة أثلج صدري
اريتك طيبة يا ام سيرين نديدتي وقدري
كيفها خطيبتي لـو بكاية بسرع أجـري
اجلب ليها دومًا كـدو يسـري ويمـري

يا جماعة الخيمة والله فشيتوني وفي نفس الوكت
رجعتو لي الم الذكري النبيل
سلام يارايعين


يا البورد العجيب يا للتلوب حواي
ناس اهل العوض اللنميم سواي
فتحتو الجروح والحسرة من تالاي
والجمرة البتحرق بكتويبا براي

حباب سنجاوي ات نسبك بشرف قدري
عله البت خواجيتن مسننة بدري
قت ليها الهميم ود سنجة زولا دغري
جاييك بالعديل و الزين في شان تنستري

أنقر قالت لي شنو؟

دكتورة سـرورة
أظنها قالت

صحيح زول دغري إلا ملولوات سيقانو
مالي بعاشـر اللـوري الحليلو زمـانو
مكينتو مبوشـة وعادمو انتشر دخانـو
لساتكو مرقعة ومساعدو حاضن أحزانو

يمة المتلي تركب في الحديـد ألمانـي
شبحاً ود شبح ناعـم مكنـدش هانـي
ولو جلت خـلاص لكزس أصيل ياباني
والهكـر القـديـم خليتـو للتابـانـي

اللوم القاسي .. نعتذر للدكتور السارة وللأخ العزيز بحر .. والشكر الجزيل للأهل الفن الراقي الشاعر الكبير عبد القادر الكتيابي والخواض وسنجاوي . كلم جميعاً كل الود ونرجو المعذرة ، لم ننس لكن التقصير حاصل . وتحية لكل من فاتنا ذكرهم ونتعشم طلتهم :

هجين سرجو الطويل غاربو وجناحو انفـجّ
جبتو حناسة ، بركتً الضمـر وانقـجّ
عقلتو الشافي نفـاي القفـاري اللجـة
دربو شيـوم علي السمحـة ام عشوقاً عـجّ

اهل العوض والصديق

ها ناس والله فاتني جنس نضم سنجاوي والكتيابي زاتو سيد اللسم
كدي خلوني اللقرا الفاتني ده كلو وارجعلكم

اهل العوض والله يا اخوي ماني مكرمس تب لكن متكرفس من نزلة شديده

وقبل ما الزم عنقريبي اقول انشاء الله النزلة عن عدوكم

والف مرحب بكل الناس الراقين الدخلو الخيمة
وانشاء الله تكون دار عامره بيهم

سنجاوي وينك انت تغتس وتقلع

يا الصديييييييييييييييييييييييييييييييييييييييييييييييييييييق

حرم خات الككه في بالي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ناس الخيمة ..السلام جاكم جت

وبرضو معاكم أنا

دخلتا الخيمة ..عاينتا جاي وجاي
صنقعتا دنقرتا..
قريت الكلامات كلها

ما شاء الله عامرين ..

اها من هنا وجاي انا زولكم تب

كان مشاغل الدنيا تدينا طريقة


تقعدوا عافية
قيسان

نزار الفنان
إت برية من الحمى والنيران
وات برية من المرض البجو الجيران
ياموسى واخوك ويا هجو اب قران
تشيلو الحمى غااادي وتبعدا النيران


قيسان ، مكنة نيسان
حبابك
ونعتذر - العتب على النظر
لكنك ملء المسع والبصر

نزار

حبابك ألف بلا بلف
ياناس انتو والله البتغطسو وتلبدو بالشهور
الخيمة دي بعد كدي أنا بطويها وأخليكم في الصقيعة

قيسـان

حبابك يا الحيبيب
نورت الخيمـة
الجابك يجيب الهمباتي وكبوش والعقد الفريد
في انتظار مشاركاتك

أهل العوض

شوف ياسيد الخيمة
أنا مزازاتك بالحلال دي ما عاجباني
الخيمة دي يا كافي البلاء وحايد المحن
لا شامين فيها ريحة بن ولا قربة لبن ولا كفتيرة شاي
ولا تقابة تهدي الساري والضهبان
الشي دا بخل – حاشاك – ولا عشان خيمة عمارات
طيب الآيس كريم ويييييييينو

شيخ العرب ود شنتير

انت آضراعي بتختر لما أظهر أنا
حساسية يعني ولا الحاصل شنو

ود محجـووووووووووووب

الشوق بحر
اريتك تبقى طيب انت
أنا البي كله هيـن


وهاكم السنجاوية دي

لون المنقة لونـك إلا ريقك أحلـى
وخد القمرة خـدك إلا عينـك كحلى
جيدالريم ولكن في مشيتك وحلـى
نارك في الضلوع حراقة لكن تحلـى

غايتو يا السنجاوي ، ما بسألك .. ونبدا بأبياتك السنجاوية وفي الحتة دي زي داير أقول ليك نشفت ريق البنية .

أما عن الآيسكريم فرسلنا الولد يجيبوا بس انت أبقى داخل ، وما في داعي تخلي نعلاتك برة . إنت ونعالك في حدق العينين مشالك والعز يتبختر مشالك ، توبك وغطاك وشالك .

وهاك دي من طرف شيخ العرب شنتير :

تيسو البجـر رسن المـريد ويمغاهو
بالغ قلبـو والمغسول عقب طغاهـو
ربـو الخالقو من سود العيون وقاهو
حـنّ وقـجّ فـرّق وبعدو وشـغاهو

تحية للرحمابي
تحية للذين لم تكتحل أعيننا برؤيتهم ويشنف آذاننا نمهم : الهمباتي و كبوش وبقية العقد النضيد

up

سنجاوي اب كلاماً ايدوي
على راي دكتوره السارة
والله عاد نمك طاعم بالحليل
بس نحن بانقدر على جنس دا
بنسوى الجبنة والشاي
وات دوبي
وهادي القعدة

من الخيمة القديمة

كزيم عكة النحل الفراقو جرحني
وين ما اطراه يعمل واضحا يفضحني
الدمر كتابي ومن صلاتى سنحني
لا فكاني طبت ولا كتل ريحني

سلام جاكم
أهل العوض .. زي ما سنجاوي سعلك..قلتا لي الخيمة دي يعني في ضل العمارات ؟؟ يعني ضل الضحى جاييها
وضل الضهر جاييها..والله حكايتا كيف؟؟؟ نحنا ناساً بندور نعرف مشهادنا وين ..ومشهاد
رواحلنا .. وهاك قول خير:

مرق طالب الدروس متدرّج
أوقد فيا نيراناً جوة القلوب بتسرج
يا الله الكريم بالحالة العلي تفرّج
حظي أصبح جارّي الجوكرين ومعرّج
*****

قطع شك ..سنواصل

تقعدوا عافية

حبابكم وحباب كل الجنيات والبنيات
الوردو الخيمة وكل سنة وانتو بخير وصحة وعافية
وربنا يحقق جميع الاماني

يا قيسان

حظك جاري الجوكرين ومعرج

هو يا اخي الحظ مسكك الجوكرين في ايدك
يبقي التعريجة دي كياشة ساكت

نزار السلام جاك

علي الطلاق الواو من الواو الضكر في الكشتينة مابعرفو
لاكين دي الغنوة زي ما وقعت في اضاني ..

بعدين ياخي انتا ماسك في حظي مالك ؟؟ ما تمسك في الطالب الدروس ده؟؟ ما ياهو الخلا الغناي كيشة



خالص تحياتي

وتقعدوا عافية
قيسان

كل عام وأنتم بخير جميعا
ان شاالله تكون بقيت طيب عشان تبدا السنة وانت في قمة الصحة والنشاط
قيسان ، ما تزعل - قبل كدا في واحد قال

بيجينا الـدرت ، وكلنا بتساوى
كعبة الانقطاعة بعد العرق ما ناوى
البحـرق مسرتو نقـول عليه براوة
والجيب خاااالي والدقلاشة دايرة حلاوة

اهل العوض ودشنتير يا الصدييييييييييييييييق,
وضاح الرحمابي الخواض السارة بحر قيسان الجندرية الكتيابي

كل سنة وانتم جميعا بالف خير وعافية مجتمعين بكل الود والصفاء
ونقاء السراير

طيبين ومبسوطين بسطا ان دنقرتو يتدفق منكم فايض البسط


قيسان اخوي

خلاص قشيناها في طالب الدروس

شيخ العرب وين يا المشيك توحًًل

تقيل الخطوة تاتاي المشيه توحل والله الكلام دا عاجبني عجب شديد
وخاسة مسعلة الشدة والفتح علي الحاء في كلمة توحل بدل الضم


كبيرنا الكتيابي

نشكرك علي تحيتك واطلالتك العزيزة التي نامل ان تتواصل

ود الجيلي ما اتحكر علي لاب توبو
والخواض اذا الماوس لعب في عبو

حصل يا كتيابي سمعت بي مجاراة بين شاعرينا عتيق ومحمود حسين
ببخت الرضا
فالابيات الفوق دي ذكرتني بيها

وكل سنة والجميع بخير وعافية

نزار
كل سنة وانت والجميع بخير
هاك من الخيمة القديمة

الكمساري صفر والتـرام اتحـرك
طار بيهن تركني على القضيب اتعرك
بهواهن هواهن جوة قلبي اتحرك
غابن مـنـي يالكمساري الله يضرك

اهل العوض

خلينا ننجر علي بيوتك الفوق

بسم الله يا معين


بعد ما ساقن التومات وراهن حرك

اطش ملبوش واغرف من عجاجو اتبرك

بين جنى وغبارك يا الترام تتحرك

عندك قلبي شيلو مع طويك وفرك

sentimental
والأعزاء أهل الخيمة ـ تأملوا معي روعة هذه الصورة التي التقطتها شاعرية ود شوراني عن قرب لمشهد فيه من الوجدانيات و التذوق ما فيه ـ فقد كان الانجليز يفرضون حظر التجول في مناطق الهنباتة ابتداء من الساعة الواحدة بعد منتصف الليل وهذا ما كان يعرف قديما في الدامر وأبودليق بـ ( غفر الساعه واحد ) وقد حكى لنا عبد الله ود شوراني رحمه الله أنه كانت له حبيبة تستضيف التجار العابرين في ما يشبه المطاعم الشعبية والمقاهي داخل البيوت وهي عادة لا تزال قائمة في بعض الطرق السفرية ومراكز التسوق النائية ـ قال إنه أناخ بعيره بعيدا وأكمل الطريق إليها مشيا ـ وهذا من تحوطاتهم المتبعة عادة ـ وكعادتها شرعت في تهيئة المجلس بالبخور والطعام والقهوة ومن يخدمونه احتفالا بمقدم الرجل الكريم ـ فانسجم الشاعر في مزاج القهوة ولم ينتبه إلا بعد الساعة الواحدة ـ فهم بالخروج لولا أنها تضرعت له أن لا يخرج خوفا عليه ـ فقضى ليلته هناك وأصبح يدندن بهذا المقطع :ـ


غفر الساعة واحد حام وانا لقيت هوِّي
فوق الرمشــو يجرح ونار خديده تكوي
الخــــلاني ما بنـلام قـدر ما اسـوي
خمـد النور فضـل براق بســيمو يضوي

طبعا القافية واو مشددة مكسورة والياء
وبعض المفردات القليلة تم تناقلها بين رواة مختلفين كما أن التسجيلات الصوتية لود شوراني قام هو في بعضها بتبديل كلمتين أو ثلاث ربما بسبب النسيان أو التنقيح ـ فما أرق وأحلى وأعذب هذا الشعر ! ـ

كتيابي

أهل الخيمة سلام

والله قلت ألحق ، السنجاوي دا مالو نفسو حار كدا ، الزول أحلقوهو قبل ما يطوى الخيمة ويخلينا في الصقيعة.

بعدين اشوف قصة أخوى أهل العوض دا ، شوف بيتك التاني دا شن فيهو

من نفس المغترف

شتلاً ضير سواقيهو وهباب ما فرّك
ريدو سلب يقيني وعمري منو مدرّك
يا ظبياً تبع نيل المهاوي مجرّك
الله براهو يتلافى القلوب من شرّك

أهل العوض

ريدو سلب – يقيني – وعمري منو مدرك

الزول دا ما قرب إمرق من ملة محمد

بس لحق رقبتو وقال : الله براهو يتلافى القلوب من شرك



عندى والله كلاما عجبني زمان لكن نسيتو ، وبدوركن تجيبهوا لي هنا تاني ، لابد معاكم واحداً حافظوا
…..
….
من كُتر الدلا تنشاف عويرة عويرة ..

الكلام دا تماتو كيفين ؟

رحمابي

وكت الليل برد جاني البفوح نسامو
لاقرب الدغش متغطي في هدامو
نحنا الخمسة ديل ولمحنا عيل أقدامو
اتنين فوّضو وتلاتة سجدو وقامو

نزار..وأهل العوض ..قطع شك مافي زعل ..الزعل يجي وين للنم السمح ده..وللجميع التحية..وهاكم تاني

مشتول القرير السيدو فارق زرعو
غفرو الحارسو قال يا عاشقين إنقرعو
العينو كحلة وعودو منصوب فرعو
رباع اللخ وتاتاي القدل بي درعو

وتقعدوا عااافية

قيسان

الجنيات
الله يديكم الفي مرادكم
والله اتكرفت شميم البطانة لمن زكمتي راحت
زيدونا يزيدكم الله من فضلوا
قيسان
ما قت لي ات ولدنا ولا واحدن تاني
حبابك في كل الاحوال

حر عنافي نسل اماتو قاطع الشك
جدو الابيض السابق خيول المك
الرمي الحجيل من النزيلة انفك
بعيد يا اربد الشرق المجارب السك

الاحباب جميعاً ، تحياتي وشكري بلا حدود .

نزار ... لا حول ... دا نجر دا و لا قطع مصنع .. عندك قلبي شيلو مع طويك وفرك .. صح لسانك

الاستاذ الكبير الكتيابي .. أولا نحن سعداء بمشاركتك وتواضعك للجلوس معنا في هذه الخيمة ، التي وصفها السنجاوي بخلوها من القهوة والزنجبيل والهيل . كما قال أحدهم

ياريت كان بقيت تحت الصويل ضليل
أو عنبر عزيز او هبهان او هيل

فعلا الهمباتة كما هي قوية وشاقة طبيعة كسبهم تماما كانت أشعارهم ، فلك من ذلك هذا المربع :

آه واغلبي من زولا جمالو ملوكي
والحاس بيهو من تالاك يضوقو عدوكي
أمن (إما أن) أرضى بي الذلة واتركو لهوكي
وامن نطلع القلعة وجبال السوكي

أديبنا الرحمابي ، تحية لك . بالنسبة للمربع الذي ذكرت فأرجو أن أجده لك فهو لأحد شعراء الحقيبة وفي أغلب الظن لود الرضي .

الاستاذة الجندرية .. نحن في حرج شديد من هذا الكرم بترددك على خيمتنا .. لك التحية .. وان شا الله الشباب يجيبوا ما يرقى لذوقك الرفيع .

قيسان ، الآن مكنة هينو ونيسان : لك التحية وابشر بالخير .

تحية مرة تانية لنزار الفنان

أخوي اهل العوض مشكوور وماني مقاطع
ان رديت على ردك قبــل لا تـَّـــَـــــابع
لي شرف الدخول للخيــــمة ـ مان متواضع
خيمتــكم شرف ـ لي كل عيـن بتَّـَّـــــابع

كتيابي

الجندرية
يعجبك السمح والزين
وياسلام عليك .. الجبنة والشاي ديل ما بنزين النم يعدلن الرأس ومخمخن الكيف
شرفتي الخيمة

الرحمابي
القومة ليك .. شغلك نضيف بالحيل

وهاكم السنجاوية دي

ما ظنيت أعيش بعد الفـراق يا بنيـة
وما ظنيت أعيش بعـدك دقيقة هنيـة
وكتين العـذاب صار لي حياتي سجية
شن بعملبو عمـراً كـل سنينه شكية

الليلة الجمل من حيسو جابلي هدير
تل جريدو وجاب خبو الطوال وعديل
بت البجرد السبحة وبقيم الليل
من تالاها يا الحبان منامي قليل

الجندرية ..سلامين .."ولدنا"دي فهمتك قاصدة منو..لكن في الحالتين ياني ولدكم ..وهاك دي من نسام البطانة

سمحت ومن شنات الصيفة لونا اندسا
وجبّالك لبس من الخدار واتكسى
يا المردا التليني مع الجمال في الرسا
فوقك زرقن الرزمي السحابو اتمسى
****
اتخلفلها البطحاني والعبادي
ونفضنو المتل جبب أم صريمة يدادي
نحنا ترانا للشابورة ديمة نحادي
عنز الشاي مراقبة من غرامة القاضي

قالوا ده الصادق اب آمنة بعد ما بقى زول حواشات في حلفا..كان بالو هنااااك في البطانة..والسربة البلا حدود ..ولا غرامة


تحياتي للجميع

تقعدوا عافية

قيسان

الاحباب جميعا ، تحية لكم . تحية للاستاذ الكتيابي وأكرر سعداء بمشاركاتك .

السنجاوي ، وأنا أيضا أتساءل : شن تعمل بو عمراً باقي كله شكية؟ الله يخفف عليك .

نزار : أرجو أن تواصل في هذه الأبيات : أظنها هي الأبيات التي سألت عنها الصديق في الخيمة القديمة .... نايبك كك .. وهكذا .

قيسان : تحية لك على هذا الغزير الهاطل .

جمالاُ غير كلف حكمه رحيم وجليل
وجيهك دارة القمر البضوي الليل
ياريت كان بقيت تحت الصويل ضليّل
أو عنبر عزيز أو زعفران او هيل

جنيات الخيمة
سلام
كان لدي اعتقاد ان العرب
يتعاملون مع النساء بنظرية "شاوروهن وخالفوهن "
ولكن فاجأني موسى ود جلي
عند اعتمد على شمة اخته لاكمال المشاورات حول قرار الحرب مع الشكرية واعتمد ذلك الراي ولم يتجاهله
عليكم الله العندو الكلام دي انزلوا كامل

"هديك شمة كان تتم الشورى "

مع تحياتي

الجندرية الرائعة


مسرحية المك نمر للعبادي فيها كمان كم شورة زي دي

فبعد ان دار الحوار بين شيخ العرب /
الشكري وطه
البطحاني

ما تجو يلا نشوف علي طريقة زكيا زكريا

شيخ العرب
يمين بالله غير الغاية مالي مبيت

طه
يا شيخ العرب امرك بشوفو حقارة
وما جابتك مره الجابتك بس غارة
وقرناك كتير نفسك ابيتو وقارة
خبرك هذا ما بدورلو دق نقارة

واحد مع شيخ العرب قال لي طه واسمو علي

قبلك في اللجج يا طه راحو انهدو
بتتجاسر علي شيخ العرب بتهدو
زولكم مو عاقل آ كبار اخير تهدو
بي عنادو الفريق خايف يسبب هدو

طبعا شيخ العلرب في القصة جائي طالب ايد ريا الهي خطيبة وبنت عم طه وشيخ العرب عارف الحقيقة دي


طه لي علي زول شيخ العرب القال الكلام الفوق

انا المالح الكارب خريفي وصيفي
والمتلك تبيع ما اظن يطول فوق قيفي
كان ما الليلة في بيتي وبعدك ضيفي
في الشى السمعتو برد عليك بي سيفي

شيخ العرب قال ليهم

كفا يا بطاحين فيكم اتغشينا
كرمكم جانا طامح رخسة واتعشينا
بعد الشي السمعتو تاني كان ما مشينا
خايف في اجتماعنا تقع وقايعا شينة

اها طيب في وداعة الله عقب بيناتنا ما في علاقة
وات يا طه اتشفيت شبعت شلاقة
امرت الشر سعيت دليتو بي معلاقة
اها نحن وانت بعد الليلة يوم نتلاقا

الخ الحوار وبدوا البطاحين يحنسو في ضيفن شيخ العرب
ويقترحولو في الحلول غير ريا

واحد من البطاحين واسمو عبدالله قال لي شيخ العرب

سمح ارجانا يمكن طه نحن نجبرو
شيخ العرب
الزول في الرقاد شقو البريحو بخبرو
والزول البليد بي ايدو بحفر قبرو
اها عاد بنسوي عوسنا وطه يلزم صبرو

طه

سوي الدايرو وكتر الكلام خليه
والشر القصدتو معاي ابقي عليه
طير اصل السما حتي القمر دليه
يوم نتلاقي كل واحد بعرف الليه

هنا طه قام مارق من الجماعة

لحقو واحد من جماعتو اسمو احمد بدا ينصح فيه عشان يتراجع ويتنازل من ريا ابنة عمو لي شيخ العرب

الي ان قال

انا عندي العرب بي ريا اخير نفداها

وجاهو عبدالله بنفس الراي

وديل

هم كبارو وقت غلب فيه حيلة قالو

نشاور ريا امكن ريا مي دايرك

طه
صدقوا القالو خربانه البلد بي كباره
اهديك ريا سئلوها واعرفو اخباره
من غير السفر ما عندي تاني دباره
نحن وانتو بي دي الحاله ما بنتبارى

وفعلا شاوروا ريا ورفضت وسافرت مع ابن عمها الي المتمة الي المك نمر
سيد النحاس الجض
جيتو علي حملة غيرو ما بتنفض

معليش بديت من بعيد عشان الصورة توضح
هذه المشورة الصعبة
بين قبائل وحقن دماء وكفتين غير متوازنتين ومصير مجهول وخذلان وحب وجاه
وبرضو شاوروا ريا

صدقو القالو

وسمعوا شورتها

نزار
اشكرك
يمكن مشاروة ريا هنا جاية لأنه الموضوع اصلاً
عرس وخطوبة ويخصها
ودي موجودة
لكن الغريب في امر ود جلي ان الأمر لم يكن له علاقة بالاجتماعيات
الموضوع كان حرب في حرب
واصل في نفس الاتجاه لوسمحت
ارغب في معرفة المزيد وهدم افكاري القديمة
تشكر مرة ثانية

نزار
حتى في هذه المسرحية ، في نهايتها تقوم شمة زوجة المك نمر وابن أخ القتيل حمد بلم الشمل وذلك بمبادرتها بإرسال ود النعيسان إلى والدها لمعالجة الأمر

الأبيات كتيرة وطويلة

ها ناس سلام عليكم جميع. مسكنا منكم الشديد القوي

يا اهل العووووووض .. ماك طيب؟ و الله جيت داخل صدفة بس و لقيتك كاتب الكلام الفوق ده و شميت فيه ريحة استفزاز .. اها و انا استجيب لاستفزازك ده

الكلام المجيقن

تيسو البجـر رسن المـريد ويمغاهو
بالغ قلبـو والمغسول عقب طغاهـو
ربـو الخالقو من سود العيون وقاهو
حـنّ وقـجّ فـرّق وبعدو وشـغاهو

الكلام المنضوم

التيس البجر عاصي المريد و يمغاه
دالع قلبو و المغسول عقب تغاه
ربو الخالقو من سود العيون وقاه
حنّا و قجّا فرّقو قعّدو و شغّاه

يا سنجاوي .. و الله حكايتك حكاية .. أنا قانص ليك ليل و نهار .. و أنت تقوم تغفلنا و تجي طوفة كدي و ترمي فوقنا اللوم؟ الله .. و ين المسنجر و الهترشة؟ و الله مشتهي لي هترشة معاك

شنتير - شيخنا وشيخ العرب
أولا حمدلة بالشوفة ومليح الشفناك طيب
وإن شاالله تكون لسة موجود عشان تتم لينا دي

الكلام المجيقن

رفع سرجو ولشغ سوطو وجبد مخلوفتو
إنّب وانحقص جملي الرقاق ضرعاتو
شبه الفي العقد شتي ومرية وطاطو
الباقي عليك امان الله ان قريب في الفاتو
الباقي عليك يا الماك تاجر حمير

اهاهاهاها و الله يا اهل العوض .. بقيت لي زي الصهيب .. قدر ما اقول ابرد اضاني تقوم تزن لي فيها. اها آبوي إت فلّخ و انا ببربح ليك .. يعني نظام شقيق و كتل

رفع(رفعت) سرجو و لشغ طوُفو و جبدلو قشاطو
و اللب و الحقب جملي الوشاك ضرعاتو
شبه الفي العقد شتّى و مرية وطاتو
قصدي هجومو بالمتل السفينة وهاطو

ابقى غافية

إت بتعرف الشقيق والكتل؟
أكيد بتعرف كذلك عمل الآرساية

أها كتر خيرك .. أفدتنا أفادك الله

صيدح سرجي ها المهلة الوسادة مشـدّك
بينك وبينو عتموراً خلاهـو بهـدك
سرجـك لاعبو غاليلي دواير وقـدّك
آ القنجر من الحركة ام زوايل ردك

تقيل الختوة تاتاي المشيهو اتوحل
والله شي طاعم خلاس
ختري عدييل