رقيص العروس ..... مهزلة المرأه السودانية

تحية طيبة للجميع

رقيص العروس .... فقرة متواجدة فى كل عرس (تقريبا)

ترقيص العروس يمثل قمة الاستهتار بالمرأة !!

تجدها امرأة متعلمة و مثقفة ، و لكنها لا تزال

ترغب فى تلك الرقصة، او تجدها فى الصفوف الامامية من المصفقات!

طبعا ليس كل النساء و الحمدالله

تجدها فى كل المنابر و الاماكن تطالب باحترام المرأه لعقلها و فكرها

و لكن فى تلك الليلة.. اغانى البنات مدورة و الاحترام للجسد فقط!

و حسب ما سمعت ان هذة الرقصة قديما كان يحضرها الرجال ايضا !!

معقولة بس ؟؟؟؟

محمد
اشكال التعبير الايقاعي بالرقص المصاحب للغناء موجود عند كل شعوب العالم كتعبير عن الفرح الداخلي و انعكاس له و دا ما يتنافى مع القيمة الشخصية للانسان فهل لانها دكتورة او مهندسه مثلا معناهو انها ما تفرح و وينتج فرحها دا شكل ايقاعي خلقته الحضارة الهي عايشه فيها؟؟؟

مشكلتك وين بالضبط

تحية طيبة

السيد / امجد ، مرحب بيك

Quote: اشكال التعبير الايقاعي بالرقص المصاحب للغناء موجود عند كل شعوب العالم كتعبير عن الفرح الداخلي و انعكاس له و دا ما يتنافى مع القيمة الشخصية للانسان فهل لانها دكتورة او مهندسه مثلا معناهو انها ما تفرح و وينتج فرحها دا شكل ايقاعي خلقته الحضارة الهي عايشه فيها؟؟؟

فعلا هو موجود لدى كل الشعوب ن و لكن كما قلت هو نتاج حضارة تكونت من البيئة اللى احنا عايشين فيها، فما هو احتمال (خطأ) هذة البيئة، و ما هى احتمالية اننا مبسيطين الموضوع اكتر من اللازم، بالطبع هى كدكتورة او مهندسة من حقها تفرح اكيد، من الجق الجميع ان يفرح، هذة عادة متوارثة من بيئة كانت ترى المرأة كجسد فقط (معظم الاحيان).

و ايضا ما هى احتماليه استغلال هذا التراث فى غير ما وجده له، فضعاف النفوس كثار

و النفوس اليوم ليست كالماضى، لا يمكنك اليوم ان تنام و تترك باب البيت مفتوحا!

مش كده

Quote: مشكلتك وين بالضبط

مشكلتى انى خايف يجى يوم و يصبح التراث السودانى يسوق على هذة الشاكلة

جلسة عراقية

البرتقالة

التفاحة

فهذا ايضا تراث، كلمات من التراث، رقصات من التراث، الحان من تراث(مع بعض التعديل)

هذة هى مشكلتى، كيف نعرف الحد الفاصل بين (الاسفاف) و (الفن)??

الاخ محمد الأمين أحمد

السلام عليك ورحمة الله

آثم من رضي ببنته ترقص امام أعين الناس

وآثم من رضي بزوجته ترقص امام اعين الناس

وآثم من نظر الى إمرأة ترقص

وآثم من رأت إمرأة ترقص

والله أعلم
اللهم إني أعوز بك من التحدث بدون علم

تحية طيبة

الاخ / المكاشفى

شكرا على المداخلة

Quote: والله أعلم اللهم إني أعوز بك من التحدث بدون علم

آمين يا رب

و نريد ان نتعرف عن كيفية ربط الناس للتراث بالاديان

و كيفية التصرف حال وجود تعارض، فالمتعارف عليه ان يتم

تجاهل موضوع الخلاف و الاستمرار فى العمل.

عايزين نفهم عشان ما نغلط

و شكرا

يا محمد الأمين (عرفنا الهلال والمريخ) ، وطبعا فى الكورة طلعت ظلامى

مالك تااااااااااانى ذى ماقال (محمد الأمين) صاحب الأسم

فاتح ليك موضوع (فرق بين حبيب نادى شوقهم)!!!

وطلعت فيهو (سكاكين الحروف) مسلوله وأصحابها صوتهم مرتفع ينادى

من أرادت أن تثكله (عروسه) فليتبعنى خلف هذا الجبل!!!

السيد / تاج السر حسن

تحية طيبة

يسعدنا وجودك، اهه رأيك شنو فى أغنية (البرتقالة)؟

دى برضو تراث عراقى، هل تقبل ان تخرج الفتاة السودانية

فى (فديو كليب) كهذا تحت راية التراث، و هل تقبل بتلك الدعوى

التى قدمها (راغب علامة) حيث عرض (كتكفير) عن ذنبه فى مزحة

اطلقها على (فتيات السودان)، بانه على استعداد لان يصور كليب

تكون البطلة الراقصة فيه (سودانية) !!!!!


تخريمة:
و كيف يعقل ان يكون (المريخ) و (الظلام) فى جبهة واحدة ؟

المريخ (نجمة) مضئية كما الشمس، و لولاها لما اضاء ذلك

(العرجون القديم) ليصبح (هلالا) يتغنى به البعض.

تخريمة فى التخريمة:

رأيك شنو فى خليجى 17 ؟

و شكرا

يامحمد الأمين

أنا ما بحب البرتقال عشان طعمو حامض ولونه اقرب ( للأصفر ولأحمر)، وأنا منتظر ناس

التهجين كان عملو برتقان لونه (أزرق) وطعموا أحلى سوف أصبح من أنصارو.

Quote: آثم من رضي ببنته ترقص امام أعين الناس

الاخ المكاشفي الدخل الاثم شنويازول المسالة مسالة تعبير عن احاسيس داخلية زي ماقال احد الاخوان,ثم ثانيا اصبح الرقيص نسواني بحت غنايات ومصورات ومصفقات,وكله...ياعم خلي الناس تبتهج طالما ليس هناك خدش للحرمات

تحية طيبة للجميع

السيد ابو مهند

Quote: ثانيا اصبح الرقيص نسواني بحت غنايات ومصورات ومصفقات

نفهم من كده انك معترض على تواجد الرجال فى ساحة رقيص العروس ؟

و بعدين منو القال ليك حفل نسائى خاص؟ (المصورات) ديل لشنو ؟ ايه الضمان

انو الشريط ما يمشى كده او كده ؟؟؟ طيب و كان مشه المشكلة شنو ؟؟

Quote: ليس هناك خدش للحرمات

طيب خدش الحرمات ده زى شنو ؟؟ لاحظ انا بسأل عن الخدش ما الحرمات

و لك التحية على المرور و المشاركة

الرقيص والغناء وجميع اشكا لالفنون هى محاولة عن التعبير عن حالات الانسان سواء ان كانت فرح او كرهة .... الرقص هو عبارة عن تعبير عن الفرح بالجسد ...
الرقيص فى المجتمع النسانى قديم قدم المجتمعت الانسانية نفسها ..السودانيون عرفو الرقص من وقت مُبكر وتكاد لاتوجد مجموعة عرقيةاو اثنية بالسودان ليس لديها تراثها القائم بمافية الرقص المختلط ولم يخرج علينا يوم شخص ليُحرم للناس رقيصهم .. فعرفنا الجرارى والشبال والعرضة وايقاعات الدليب والتم تم وعرفنا الطمبور وام كيكى والدلوكة والنوبة والطار

طقوس العرس السودانى المميز هى طقوس جميلة فى اعتقادى بحنتها وسيرتها وصُفاحها وقيدومتها وهو شكل جميل للتعبير عن الفرح يتلائم وبيئة الناس مُستمد من عاداتهم الجميلةوتراثهم الثر
رقيص العروس كطقس احتفالى ارتبط بااستعراض الجسد ومفاتنة بااعتبار ان الزواج تم على اساس الافتتان فقط بالجسد وهو بهذا الشكل يُكرس لمفاهيم اقف ضدها ... ولكنى مع رقيص العروس اذا كان يعنى تعبير عن فرح لاعرض لجسد كما كان يحدث سابقاً
كُل الاسر السودانية تشارك فى حفلات الاعراس والتى تتضمن رقيص مُختلط ..ونرقص مع بنات لايقل احترامنا لهم لانهم فقط قد رقصوا معنا ...بى العكس تشارك كل الاسرة فى الرقيص وتجد الاب والأم والاخوان والعمات والخالات وبناتهم وبنات الجيران يشتركون فى رقص جميل
لابسين اجمل الملابس
اخيراً اكتشف البعض من يريدون ان يعيدونا كهوف التاريخ اننا كُنا فى جاهلية وضلالة وظلامويجب علينا ان نترك فرحنا واشيائنا الجميلة ونتبعهم مُغمضى العيون الى افراح عُليا لاننتمى اليها وجلافة نجد وتهامة هذا العالم المُتخيل
نقطة اخيرة ... حتى بعض الطقوس الدينية يتم خلالها رقص وموسيقى وايقاعات من نوبة وطار للمديح وغيرها ,, فقد ت امتزج عادات المُسلمين الاوائل بعادات السُكان الاصليين فشكلت اسلام متسامح ومميز لا اسلام يقول على الحلال والحرام .. وانتسير الدُنيا وفقاً لنصوص الافتاء
والله اعلم

حبيبي
شكرا كتير
الله يخليك و فعلاً كلهن زي بعض في النقطة دي
و صدقاً لي كلامك جابو لي شريط عرس وشريط
رقسص واحدة قريبتنا كانت مقيمة في سويسرا
من كم و عشرين سنة... ولمن رجعت السودان
انا كنت بعيد عنه.. المهم في شهرين بس
أتزوجت من واحد برضو قريبنا لكن من بعيد
لي بعيد... المهم الزولة والله رقصت بي فستان
زي ما بقولو جكسة في خط ستة... و احتمال يكون
دة رونالدو... هو والقون.... أجارك الله
وانا اسأل نفسي معقولة دي فلانة القدّتنا
افكار و معتقدات و فارغة و مقدودة؟؟؟؟؟

بسم الله الرحمن الرحيم

السلام عليكم ورحمة الله وبركاته

أخونا محمد الأمين انت البوديك المواقع الهايفة دى شنو - يعنى خليت لهايفين بتاعين البورد شنو - و سيبك من تاج السر دة زول رشاشــة ساكت

سلام

الأخ محمد الأمين
هاك النكته دى
قال ليك فى واحد مشى لى بيت العرقى فى قريه صغيره تاوقوا بى خرم الباب ما عرفوهوا رفضوا يفتحوا ليه الباب بعد تحانيس قالوا ليه إنت منو قال ليهم يا أخوانا أنا موظف نقلونى حلتكم دى لى سته شهور وأنا أنكرش ما عارف درب العرقى كان ما إمام الجامع كتر خيرو أمبارح فى الحطبه ينبذ فيكم ووصف بيتكم

فهسع كتر خيرك البرتقاله ما بتغبانى بعرفها لكن شكرآ على التفاحه أول مره تصادفنى

سلام محمد الامين
موضوعك دا اتناقش هنا فى بوست عملو ملاسى.. وكانت فيهو اراء متباينة
كم تم مناقشته ايضا فى بوستات فرقة عرائس النيل.. وهل رقص العروس ممكن يعرض
خارج سياق انه عرس.. ولع نيران كثيرة واختلفت الناس فيهو.. اتمنى تمشى الارشيف تجيبها
عشان تثرى النقاش اكثر .. ودا موضوع مهم جدا
ومعك حق هو مهزلة المرأة السودانية.. لانه اى امرأة متعلمة ترقص بيكون حققت مفهوم انه التعليم فى السودان للنساء فقط لمحو الامية الابجدية ولا يكون لهن اى وعى جديد..


انا بفتكر انه رقيص العروس سوق نخاسة ومحط للمرأة. ولن اسمح لبناتى بالرقص رقصة العروسة.. كما نحارب الخفاض يجب محاربة رقصة العروسة ..

الاخ راشد يحي مدلل

تحية طيبة

الرقيص والغناء وجميع اشكا لالفنون هى محاولة عن التعبير عن حالات الانسان سواء ان كانت فرح او كرهة .... الرقص هو عبارة عن تعبير عن الفرح بالجسد ...

كلام جميل

الرقيص فى المجتمع النسانى قديم قدم المجتمعت الانسانية نفسها ..السودانيون عرفو الرقص من وقت مُبكر وتكاد لاتوجد مجموعة عرقيةاو اثنية بالسودان ليس لديها تراثها القائم بمافية الرقص المختلط ولم يخرج علينا يوم شخص ليُحرم للناس رقيصهم .. فعرفنا الجرارى والشبال والعرضة وايقاعات الدليب والتم تم وعرفنا الطمبور وام كيكى والدلوكة والنوبة والطار

ارث عظيم و ما هين والله، و لكن كيف التصرف فى حال تعارض هذا الارث مع (الدين) او (المجتمع) ؟

طقوس العرس السودانى المميز هى طقوس جميلة فى اعتقادى بحنتها وسيرتها وصُفاحها وقيدومتها وهو شكل جميل للتعبير عن الفرح يتلائم وبيئة الناس مُستمد من عاداتهم الجميلةوتراثهم الثر

ربنا يوفق الجميع ، و نشوف العزابة كلهم عرسان، قولوا آمين

رقيص العروس كطقس احتفالى ارتبط بااستعراض الجسد ومفاتنة بااعتبار ان الزواج تم على اساس الافتتان فقط بالجسد وهو بهذا الشكل يُكرس لمفاهيم اقف ضدها ... ولكنى مع رقيص العروس اذا كان يعنى تعبير عن فرح لاعرض لجسد كما كان يحدث سابقاً

ايوااا، دى نقطة مهمة جدا، كيف نعرف اذا كان (استعرض للمفاتن) او (فرح) ؟؟؟

كُل الاسر السودانية تشارك فى حفلات الاعراس والتى تتضمن رقيص مُختلط ..ونرقص مع بنات لايقل احترامنا لهم لانهم فقط قد رقصوا معنا ...بى العكس تشارك كل الاسرة فى الرقيص وتجد الاب والأم والاخوان والعمات والخالات وبناتهم وبنات الجيران يشتركون فى رقص جميل

كلنا ساعة (الربه) جوه ، لكن اسه الكلام عن رقيص العروس

لابسين اجمل الملابس

لا تعليق، و احيلك الى اقرب حفله عرس ، لكن فعلا ناس السودان (ملابسهم) على الموضة اكثر من ناس (بره)

اخيراً اكتشف البعض من يريدون ان يعيدونا كهوف التاريخ اننا كُنا فى جاهلية وضلالة وظلامويجب علينا ان نترك فرحنا واشيائنا الجميلة ونتبعهم مُغمضى العيون الى افراح عُليا لاننتمى اليها وجلافة نجد وتهامة هذا العالم المُتخيل

طيب، فوق كده فى (لنك) لـفديو كليب (البرتقالة) و (التفاحة) و فى جلسة عراقية ، شوفهم و يا ريت نسمع رآيك .

نقطة اخيرة ... حتى بعض الطقوس الدينية يتم خلالها رقص وموسيقى وايقاعات من نوبة وطار للمديح وغيرها ,, فقد ت امتزج عادات المُسلمين الاوائل بعادات السُكان الاصليين فشكلت اسلام متسامح ومميز لا اسلام يقول على الحلال والحرام .. وانتسير الدُنيا وفقاً لنصوص الافتاء
والله اعلم

ما اختلفنا ، الحديث حاليا عن (رقيص العروس) فقط، و ليس الرقص بصفة عامة

و لك الشكر

حبيبنا حبيب نورة

تحيات وافرات كثيرات متجمعات

Quote: زي ما بقولو جكسة في خط ستة

و نحنا الجننا شنو،ما ناس خط سته ديل

و الحكم ما داير يحسب (فاول) ، يكون (مرتشى) يا ربى ؟؟؟؟

(فاول) شنو ، ده (بلنتى) عديل كده!

و تحياتى

zoul"ibn"zoul

و عليكم السلام و رحمة الله تعالى و بركاته

الخوف ان يأتى يوم و ننعت موقع الكترونى بالهايف
لانه يحتوى على رقصات تراثية بلمسات حديثة

و شكرا على المشاركة

الاخ منتصر

تحية طيبة

هو مين اللى ما يعرفش البرتقالة ، و بعدين انا زاتى خففت الجرعة
و جبنا ليكم (التفاحة) مــا (المشمشة )
Oooops
اهه دى الا تجيبها براك ، مش عرفت الدرب

لا نختلف في أهمية الرقص كشكل إبداعي يعبر و يعكس قيم إنسانية و القيم الإنسانية هي إفراز لواقع الإجتماعي و ثقافي محدد فالرقص الذي عن قيم سلبية لن يجد منا إلا الرفض. رقصة العروس تعكس مفهوم المرأة السلعةالمرأة الجسد. لذا كل من يرفض إبتذال المرأة الي قيمة جسدية سيجد نفسه رافضا لرقصة العروس.وجودها كسلوك مقبول لقطاعات عريضة من المجتمع لا يعني ضرورة التسليم بها بل يفرض علينا قراءة تراثنا بصورة نقدية نحتفظ بالايجابي و نتجاوز السلبي منها.ليس مستغربا أن تجد إنتشار رقصة العروس في مختلف الشرائح الإجتماعية فارتفاع مستوى التحصيل ألاكاديمي أو الوظيفي لا تعني بالضرورة إرتفاع مستوى الوعي.فالقضية أولا وأخيرا قضية الوعي و الإيمان بقيمة المرأة كأنسان و المسئولية لا تقع على العروس والعريس فقط بل على كل رجل و إمرأة شارك إعجابا بهذا فهو يساهم في تكريس ثقافة تقنن لدونية المرأة و إستلابها ولكم ودى

الاستاذة/ بيان

و عليكم السلام و رحمة الله تعالى و بركاته

Quote: كما نحارب الخفاض يجب محاربة رقصة العروسة

يا ترى ما هو المقياس الذى استند اليه البعض فى محاربة (الخفاض) و الابقاء على (رقيص العروس)

فالعادتين متوارثتين، فلقد غضوا الطرف عن (رقيص العروس) كعادة تحط من قدر المرأة اجتماعيا

و تحويلها الى (مخلوق جسدى) فقط، لتصبح (علكه) فى لسان من شاهدها تلك الليلة، او من شاهدها

عالميا فى عصر (الفيديو) و (الانترنت).

و لك الشكر

Muntasir

Quote: فهسع كتر خيرك البرتقاله ما بتغبانى بعرفها لكن شكرآ على التفاحه أول مره تصادفنى

السلام عليكم ورحمة الله وبركاته

لكـــن التفــاحة مــا تفــاحة

Quote: لا نختلف في أهمية الرقص كشكل إبداعي يعبر و يعكس قيم إنسانية و القيم الإنسانية هي إفراز لواقع الإجتماعي و ثقافي محدد فالرقص الذي عن قيم سلبية لن يجد منا إلا الرفض. رقصة العروس تعكس مفهوم المرأة السلعةالمرأة الجسد. لذا كل من يرفض إبتذال المرأة الي قيمة جسدية سيجد نفسه رافضا لرقصة العروس.وجودها كسلوك مقبول لقطاعات عريضة من المجتمع لا يعني ضرورة التسليم بها بل يفرض علينا قراءة تراثنا بصورة نقدية نحتفظ بالايجابي و نتجاوز السلبي منها.ليس مستغربا أن تجد إنتشار رقصة العروس في مختلف الشرائح الإجتماعية فارتفاع مستوى التحصيل ألاكاديمي أو الوظيفي لا تعني بالضرورة إرتفاع مستوى الوعي.فالقضية أولا وأخيرا قضية الوعي و الإيمان بقيمة المرأة كأنسان و المسئولية لا تقع على العروس والعريس فقط بل على كل رجل و إمرأة شارك إعجابا بهذا فهو يساهم في تكريس ثقافة تقنن لدونية المرأة و إستلابها ولكم ودى

تحية طيبة للجميع

السيد/ مجدى اسحق

اشهد لك انك صغت الفكرة بصورة رائعة ، فلك التحية على هذة الكلمات

فهل تتنازل النساء عن (كرامتهن) فى مقابل (لحظات فرح) ؟

و شكرا

قالت له : لماذا تهتم لشكلى ... و لا تهتم لعقلى ؟

قال لها : لانك تهتمين لشكلك ... و لا تهتمين لعقلك !

و لا زالت ترقص ...

و ترقص ...

ترتفع اصوات الغناء ...

و ترقص ..

يزداد الضرب على (الدلوكة)..

و ترقص ...

الزغاريد هنا و هناك تتعالى ...

و ترقص ...

لماذا لا يرقص العريس ...

و ترقص .. !

و لا زالت ترقص ...

و ترقص ...

ترتفع اصوات الغناء ...

و ترقص ..

يزداد الضرب على (الدلوكة)..

و ترقص ...

الزغاريد هنا و هناك تتعالى ...

و ترقص ...

لماذا لا يرقص العريس ...

و ترقص .. !

هذا الكلام موجه الى بنات السودان الجميلات

المقبلات على فرحة العرس والخصب


يابنات..

مكحلات انتن بالبراءة والوعى

مجملات انتن بالعفة والموهبة

من اختارت منكن ان ترقص لحبيبها

ومن تختار منكن ان تحتفى بجمالها

ومن ارادت منكن ان تفرح "ملائكة" زفافها

بالرقص الجميل

فالترقص

ولن ينقص منها شىء

ولن تخسر شىء

بل لن تزداد فى نفسها الا مقدرة على الاختيار ولن تزدان ذكرى عرسها الا ورودا وفرحا فى قلوب الصغيرات والشباب ونساء القبيلة ...وربما شيبها ايضا..


وليقل الغير ما يقولون...
م

Quote: وليقل الغير ما يقولون...

الاستاذة تماضر بنت الاستاذ شيخ الدين جبريل

احيكي من على البعد هنا من امدرمان

واقول لك غايتو الكلام الكتبتو انا دا ما كلامي ابدا ولا عندي يد فيهو الله الا النقر على الكيبورد

وانا اقبل التحية ..خاصة اذا اتت من ام درمان ...

وكل بلاد تنام على النيل واحببتها

تاني ياتماضر احييك من امدرمان ومن الثورة وبالاخص من الحارة العاشرة

و حسمت تماضر قول كل خطيب
من اختارت ان تحتفل بزواجها و تضمن الرقص ضمن عادات الصبحية فلتفعل
و من ابت فعلى كيفها
ومافي زول عندو شغلة بالموضوع غير البت و عريسها

Quote: ومافي زول عندو شغلة بالموضوع غير البت و عريسها

الله ما ضراك...

Quote: تاني ياتماضر احييك من امدرمان ومن الثورة وبالاخص من الحارة العاشرة

بالطريقة دى انت حتحيينى من "بيتنا " ياحليل بيتنا

تحياتى الى تراب الحارة ذرة ذرة...حيكانها طوبة طوبة وانفاس ساكنيها وعشرقات ضحكاتهم وانتحابهم فى الاحزان ...وقلوبهم العامرة بالمحبة خفقة خفقة ....

ولك ايضا

الاستاذة تماضر شيخ الدين

احي من سكن الحارة السابعة



1217







اها ياتماضر شنو ليك بعد شوية حا ادق عليك من داخل البيت

تحية طيبة للجميع

الاستاذة / تماضر شيخ الدين

اجدنى متفق معك فى نقطة مهمة جدا ، و هى سبب هذا البوست اصلا

التفكير - العقل - الاختيار

فعندما قلتى

Quote: من اختارت

Quote: ومن تختار

نعم ، من حقها ان تختار، لا نريد لها ان تفعل ذلك فقط لان والدتها قالت ذلك
او لان التقاليد تحتم ذلك، فتاة اليوم انت سيدة الموقف ، فتاة اليوم
انهضى و قررى و فكرى، و اختارى لا تجعليهم يختارون بدلا عنك.

و اود ان اتوجه اليك بسؤال كفنانة و مسرحية، لو سمحتى طبعا

كيف نفرق بين (الفن) و (الاسفاف) ؟

و هل يمكن ان نصنف (رقيص العروس) بانه رقص اغراء شعبى ؟

و اخيرا ، ما هو رأيك فى فديو كليب البرتقالة ؟

و لك من الشكر اجزله

تحية طيبة للجميع

الاخ المكاشفى

Quote: واقول لك غايتو الكلام الكتبتو انا دا ما كلامي ابدا ولا عندي يد فيهو الله الا النقر على الكيبورد

يعنى اسه نفهم شنو ؟ أثم ولا ما أثم ؟

شكرا على المرور

مرور شنو ، انت قلبت البوست خريطة

تحياتى

الاخ امجد

تحية طيبة

Quote: ومافي زول عندو شغلة بالموضوع غير البت و عريسها

ما دا ساس المشكلة ذاتو ! او بقت عليهم الاتنين ما مشكلة...

طيب رأيك شنو فى زول رسلو ليهو شريط صبحية و جاب اصحابو يتفرجوا معاهو ؟

و رآيك شنو فى زول رسلو ليهو شريط حفلة عرس و جاب اصحابو يتفرجوا معاهو؟

و رآيك شنو فى فديو كليب (التفاحة) ؟

و شكرا

محمد الامين سلام
طوالى كدة عارف رقيص العروس شى جميل وعادة من عاداتنا الجميلة وانا صراحة ما عندى مانع فية لكن المتابع للاحداث الزمن دة عارف انة شرايط رقيص العروسة السودانية بقت سلعة تناقلتها ايادى خفية لتجنى من وراءها الارباح دون اذن من اصحابها فصارت تشكل هاجس لا مثيل لة وفى رائى ان يكون الرقيص من الان وصاعدا غير مصور وغير مبتزل ومختصرا على الاسرتين فقط

الاخ / هاشم أمين

و عليكم السلام و رحمة الله تعالى و بركاته

Quote: طوالى كدة عارف رقيص العروس شى جميل وعادة من عاداتنا الجميلة وانا صراحة ما عندى مانع

ده حقك

Quote: فية لكن المتابع للاحداث الزمن دة عارف انة شرايط رقيص العروسة السودانية بقت سلعة تناقلتها ايادى خفية لتجنى من وراءها الارباح دون اذن من اصحابها فصارت تشكل هاجس لا مثيل له

دى اصبحت سلعة و تجارة رابحة كمان لضعاف النفوس، و نحنا المجننا شنو غير كده؟

Quote: وفى رائى ان يكون الرقيص من الان وصاعدا غير مصور وغير مبتزل ومختصرا على الاسرتين فقط

دى حل يرضى الطرفيين ، و انا مع الطرف المعارض لمثل هذة الرقصات التراثية، داخل منازلهم شأن خاص بهم هم فقط، و لكن ماذا نفعل بمن يصر على التصوير و النشر تحت مسمى التراث و الانبساط !!

و لك التحية

رقيص العروس منذ ظهور اقتصر على تواجد الأسرتين والصديقات
ولم يكن أمام الملأ وعلى أشرطة الفيديو كما يحدث اليوم

أنا لست ضد ( رقيص العروس ) فهو تقليد , وان كنت أرفض ان أمارسه في يوم من الأيام
ولكن لا أرى أنه يسئ لأحد طلما ظل في حدود الأسرة وأمام الصديقات ( أي الإناث)

ولكن ما يحدث اليوم
من رقص أما الرجال ,وعلى أشرطة الفيديو فأظن بأنه مهزلة بمعنى الكلمة
وانقاص لإحترام الفتاة السودانية وما تحملة من حياء

ولم يكن الرقص في يوم من الأيام مثالا للرقي او الحضارة
او الثقافة

ولن يكون السفور والإنحلال وقلة الحياء في يوم من الأيام مثالا للتحضر والوعي

الاخت/ نهال احمد كرار

تحية طيبة

Quote: رقيص العروس منذ ظهور اقتصر على تواجد الأسرتين والصديقات ولم يكن أمام الملأ وعلى أشرطة الفيديو كما يحدث اليوم

أشرطة الفيديو جديدة نعم، و لكن رقيص العروس عادة قديمة، لا تقتصر على

الصديقات فقط، بل الاصدقاء ايضا و حسب ما سمعت ان العروس فيما مضى كانت

ترقص بما يسمى (الرحط)، و عندما سألت عن (الرحط) ما هو ؟

قيل لى ممكن تقول انها بترقص من غير هدوم !!!

و هنا اتمنى التوضيح ممن عاصروا (الرحط) وصفه لنا حتى نتعرف عليه.

Quote: أنا لست ضد ( رقيص العروس ) فهو تقليد , وان كنت أرفض ان أمارسه في يوم من الأيام ولكن لا أرى أنه يسئ لأحد طلما ظل في حدود الأسرة وأمام الصديقات ( أي الإناث)

فتاة اليوم يجب ان لا تتبع التقاليد بصورة عمياء

و تصرفك هذا دليل على الوعى و التفكير بطريقة سليمة

Quote: ولكن ما يحدث اليوم من رقص أما الرجال ,وعلى أشرطة الفيديو فأظن بأنه مهزلة بمعنى الكلمة وانقاص لإحترام الفتاة السودانية وما تحملة من حياء

نحمدالله ان عادة الرقص امام الرجال (انقرضت) تقريبا، و لكن ظاهرة اشرطة الفيديو

مازالت تتفاقم، و هنالك بعض (الديوث) الذين لا يجدون حرجا فى ان يشاهد الغرباء

بناتهم او زوجاتهم (شبة عاريات)، بدعوى انها تقليد و بدعوى ان (الحبوبات) عملوها!

Quote: ولم يكن الرقص في يوم من الأيام مثالا للرقي او الحضارة او الثقافة

اختلف معك هنا، فبعض الرقصات، تعبر بصورة جميلة عن البلد و حضارتة و ثقافتة
و السودان ملئ بمثل هذة الرقصات الجميلة المعبرة، و لكن الامر لا يخلو من بعض
الشوائب مثل الرقصة (موضوع الحديث)، و لكن بالنقاش ربما تتضح الرؤيا

Quote: ولن يكون السفور والإنحلال وقلة الحياء في يوم من الأيام مثالا للتحضر والوعي

لفظ (السفور) غير متلائم مع الطرح العام.

و شكرا