ممنوع ال... يا حمار

Post: #1
Title: ممنوع ال... يا حمار
Author: صباح احمد
Date: 03-08-2005, 00:06 AM

الساعة كم ؟
نظرت في ساعة الموبايل_حلوة مش_لقيتها خمسة ونص_مالو ما جاء_ اوووب علي اتأخرت عديييييل كدة
لملمت حاجاتي بسرعة وطلعت من الجريدة
كانت درجة الحرارة مليون_مبالغة مش_ سخانة في الجو وسخانة في الراس وسخانة اكتر منها في الجيب
الوقت فات.. وانا لسة جنب الجريدة البعيدة من محل المواصلات دي الواحد كان ما عمل ليهو عربية تريحوا اصلو ما يرتاح .. لكن ما في داعي لازم الواحد يحس بمعاناة الغلابة شوية ويأجل الكماليات دي مؤقتا ويكتفي بال11 خ دي مالكم ياجماعةبتعاينوا لي باستغراب كدة..
بتونس مع روحي ما اتونس؟
مريت بزقاق مهجور كدة اختصارا للوقت وبعد ما وصلت النص جاء من الناحية التانية واحد يبدو من شكله انو ما عااااادي
محمد معانا ما تغشانا
وهاك يا سورة يسن
الواحد دة ما اشتغل بي كتير وطوالي قام اتكل علي الحيطةو baal
واصلت مشيي كأنو ما حصل حاجة لكن كنت عارفة انو مكتوب في الحيطة دي بخط كبيير ممنوع ال... يا حمار.. انا مالي ..حمار.. حمار
* اسمعي يا قالها بصوت اجش
سجمي..
يا ساتر الزول دة مالو كمان
العاقلين ما قادرة عليهم لمن يجي كمان دور المجانين
قربت اطير من الخوف..يا ربي ارجع؟
فكرت بسرعة لقيت الرجعة صعبة ياخي حياة حياة موت موت علي الاقل الواحد يرتاح.لكن ما حاموت فطيسة
اتلفت شمال يمين ما لقيت حجر حتي الحجارة عدمت يا كافي البلا
ما في حل والزول دة جنبي عدييل كدة الا انا ذاتي اعمل مجنونة
قلت ببصوت حاولت جعله عادي
ايوة في شنو؟؟
يبدو انو ما كان متخيل موقفي دة
*رايك شنو؟
قلت: في شنو في الحركة العملتها دي_بدون اديهو فرصة للرد_ حركة عادية شديد انا ذاتي كنت بفكر اعملها لكن سبقتني عليها
عاين لي بصورة غريبة كدة ما اشتغلت بيهو كتير وقلت ليهو وانا ماشة في طريقي
لكن ما كان تعمل عملتك دي في ا########## كان تعملا في الحيطة هنا واشرت ليهو علي الحتة المكتوب فيها بخط كبير ممنوع ال... ياحمار عشان يقتنعوا

*الموقف بتاع المواصلات فيهو مليون زول _بالغت تاني مش_ولا عربية مافي تجي عربية عينك ما تشوف الا النور
بصراحة المسألة محتاجة ليها زول يكون عنده خبرة بالمصارعة والاكروبات والجري جري شنو الطيران عدييل كدة
تجي حافلة مية نفر دايرين يركبوا في وكت واحد
كان وااقف جنبي شاب مجنصص كدةقدر ما تجي عربية يسن كرعينو للجري واستغربت لانوبعد المكابسة دي ما بركب ويجي تاني يقيف وهكذا
يا ربي الزول دة مالو؟
سجمي صاحبنا نشال قلتها وان اري صاحبنا مدخل ايدو في جيب بنطلون واحد وبعديها جيب بنطلون اقصد شنطة واحدة
بقيت مشغولة بصاحبنا دة اكتر من انشغالي بالوصول للبيت
ويبدو انو لاحظ اني متابعاهو لانو بطل البسوي فيهو وبقي يعاين لي
بقيت في الطريقة التخارجني منو لمن جاء عديل علي ما اغشكم يا جماعة شعرت برجفة من راسي لي كرعي _مع الاعتزار للفنان_
وقف جنبي..عملت فيها مشغولة بتفتيش شنطتي
ضحك وقال لي شنو يا فردة ماتخلينا نشوف شغلنا
ضحكت بدوري وانا اقول له هسة انا سألتك؟
بتصدقوا صاحبنا حجز لي في الحافلة لكن رفضت لمن جاء يدفع لي حق المواصلات
طبعا ما بشيل مال حرام

*دي مجرد ونسة عن حاجات بتمر بالواحد_احيان_وغالبا ما يتصرف معها بصورة _غايتو_تقدروا تقولوا جنونية
*عندي اجتماع ماشة عليهو ..اها نتلاقي بعدين

Post: #2
Title: Re: ممنوع ال... يا حمار
Author: saif massad ali
Date: 03-08-2005, 00:09 AM
Parent: #1

ههههههه والله قصة غريبة

Post: #3
Title: Re: ممنوع ال... يا حمار
Author: Unabomber
Date: 03-08-2005, 00:20 AM
Parent: #2

شمشارة كبيرة يا صباح، لكن عجبتنى كلمة "متجنصص" دى شديد، زكرتنى أيام الثانوى العالى، طبعآ أولاد الأقاليم ما بيعرفوا الكلمات دى، واصلى بلاى
ياريت لو كتبتى لينا الأمثال البكتبوها بتاعين الرقشات

Post: #4
Title: Re: ممنوع ال... يا حمار
Author: اساسي
Date: 03-08-2005, 00:25 AM
Parent: #2

Quote: حركة عادية شديد انا ذاتي كنت بفكر اعملهافي الحيطة

كيف بس ..!!

Post: #5
Title: Re: ممنوع ال... يا حمار
Author: samwal ebrahiem
Date: 03-08-2005, 00:55 AM
Parent: #4

[QUOTE]*رايك شنو؟

كلام مليان

Post: #6
Title: Re: ممنوع ال... يا حمار
Author: samwal ebrahiem
Date: 03-08-2005, 00:56 AM
Parent: #4

[QUOTE]*رايك شنو؟

كــلام مــلــيــان

Post: #7
Title: Re: ممنوع ال... يا حمار
Author: abuguta
Date: 03-08-2005, 01:05 AM
Parent: #4

اساسى مالك زانق بتنا كدا
ما حاجة عادية

تعرف ياساسى فى الهند المرة والراجل...بعملوها..واغرب من كدا مرات الهندى يوقف موترو فى نصف الشارع...وكل اسرته على ظهر الدباب...من زوجته وبنته الكبيرة...عادى يافردة
وكمان معاها ونسة..عادى يافردة.....واسال خبراء الهند..حينما يدخلون حى الجباته
الطبقة التعبانة...وطبعا الحركات دى هى من سياسة غاندى التى طرد بها
المستعمر...بدون حرب..اسمهاnon-valonce ما عارف ياناس السياسة الكلمة صحيحة ام لا
وهى سياسسة عدم العنف...وهى التى اتخذتها اختنا فى كبمة ممكن اعملها

*ولكن سؤالى لاختنا هل كل المجنصصين نشالين...ولا حركات وبس
* وسؤالى لمصمم الموقع ليه كلمة ( حمار ) بتظهر (####### ) الا نكتبها بين قوسين
الحكاية شنو....
ونسة

Post: #8
Title: Re: ممنوع ال... يا حمار
Author: samwal ebrahiem
Date: 03-08-2005, 01:15 AM
Parent: #4

Quote: *رايك شنو؟

كــلام مــلــيــان

* ناسف للخطاء والتكرار

Post: #9
Title: Re: ممنوع ال... يا حمار
Author: سامى عبد الوهاب مكى
Date: 03-08-2005, 01:24 AM
Parent: #1

non- violence

Post: #11
Title: Re: ممنوع ال... يا حمار
Author: فيصل عثمان الحسن
Date: 03-08-2005, 02:33 AM
Parent: #9

سلامات ياحلوين/ خليك من ناس الهند ياابو قوتة وتعال نسودن العملية , لو الواحدة قالت بسم الله وقلعت توبها واتشعبطت فى راس الحيطة وعملتها دحين ماكنا طردنا المستعمرين الجدد ديل

Post: #10
Title: Re: ممنوع ال... يا حمار
Author: صباح احمد
Date: 03-08-2005, 02:25 AM
Parent: #1

سيف
unabomber
اساسي
السمؤل
ابوقوتة
سامي
شكرا علي المرور
انا قلت النشال متجنصص لانو فعلا كان متجنصص وما كان ظاهر عليهو نشال
لكن هذا لا يعني ان كل النشالين متجنصصين

Post: #12
Title: Re: ممنوع ال... يا حمار
Author: صباح احمد
Date: 03-08-2005, 02:50 AM
Parent: #1

فيصل طبعا الكلام لابو قوتة مالي عشان كدة انا بعيد

Post: #13
Title: Re: ممنوع ال... يا حمار
Author: saif massad ali
Date: 03-08-2005, 04:12 AM
Parent: #12

اها هنا الجنجص لزومها شنو

Post: #14
Title: Re: ممنوع ال... يا حمار
Author: ابوحراز
Date: 03-08-2005, 04:14 AM
Parent: #12

بوست جميل لأنه يحكي صوراً واقعية جداً
وهي ظاهرة تستحق الدراسة والتوقف عندها كثيراً
والمشكلة أنها تنتشر كثيراً في المدن
يعني أهل العوض بصراحة في الحتة دي ظريفين جدا
يعني الواحد ممكن يشيل الابريق ويمشي 10 كيلو عشان عملية لاتستغرق 10 دقائق
أكره الذهاب للسينما لأنني أجد مثل هذه المناظر
والذين يتبولون في هذه الأماكن العامة إما أنهم حمير فعلاً
أو لايقراوون هذه العبارة المكتوبة 00
ممنوع التبول هنا 00 على غرار ممنوع التصوير
ومن طرائف النشالين التي لا انساها عند ذهابي بالحافلة الى كوبر
بكى أحد الركاب بحرارة قائلاً ان محفظته التي تحوي 140 الف قد سرقت
وأن المبلغ الذي معه ادخره لعلاج والدته التي تصارع المرض بالمستشفى
وما هي لحظات حتى بكى الحرامي بحرارة لدرجة أن كل الناس تأثروا لموقفه
وقال في شهامة السودانيين العويرة جداً
والله طالما أن القروش لإجراء عملية فلا بد أن ارجعها لصحابها
بل أنه تبرع باكثر من 20 الف من دخله اليومي في النشل
وقد اضحكنا كثيراً بان قال للرجل المنشول 00
والله لو ما كفتك بكرة انشل ليك قدرها اربعة مرات
ولأول مرة ارى السودانيين يصفقون لنشال !!!
قال جنصصة قال !!

Post: #42
Title: Re: ممنوع ال... يا حمار
Author: Mohamed A. Salih
Date: 03-10-2005, 11:00 AM
Parent: #14

Quote: والذين يتبولون في هذه الأماكن العامة إما أنهم حمير فعلاً
أو لايقراوون هذه العبارة المكتوبة

يا جماعه نحن حقو نلوم حكوماتنا الما بتوفر مرافق عامه.. مش المتبولين... يعني لو مزنوق بوله تعمل شنو?

Post: #15
Title: Re: ممنوع ال... يا حمار
Author: صباح احمد
Date: 03-08-2005, 04:16 AM
Parent: #1

صحي
سمحة الجنصصة في خشم سيدها

Post: #16
Title: Re: ممنوع ال... يا حمار
Author: abuguta
Date: 03-08-2005, 04:55 AM
Parent: #15

سامى
شكرا على التصحيح ..وان شاء الله ما نعدمك ..والله عاجبانى نجمتك دى بس لو عملت معها
هلال صغير بتكزن احلى...وتاج السر بنبسط..ولا رايك شنو

فيصل ..والله نسواناديل يطردن الراجل وينومنو خلاء خلى المستعمر...بس مستعمرنا دا غير راقى ... الانجليز كانو راقين ما برضو العفن....لكن ديل لو قالو ليهم فى فلوس فى حمامات
الجامع بمشو يسبحو فيها...عشان يطلعوها...

صباح
ياذات الوشاح
كلام صاح
صباحك لاح
وعطرك فاح
وشكرا
على موضوعك
الزى التفاح...

موضوع جميل لانه قلع ابحراز
والنشال الكلس...
ولقدام

Post: #17
Title: Re: ممنوع ال... يا حمار
Author: صباح احمد
Date: 03-08-2005, 05:01 AM
Parent: #1

تسلم يا قوتة
ياغالي ذي ياقوتة
رايك شنو في الشعر دة؟

Post: #18
Title: Re: ممنوع ال... يا حمار
Author: zola123
Date: 03-08-2005, 05:41 AM
Parent: #1

صباح ازيك
عليك الله عمل القصة دي وانت واقفة؟
بالجد؟
Oh No !!!

Post: #19
Title: Re: ممنوع ال... يا حمار
Author: Tumadir
Date: 03-08-2005, 05:47 AM
Parent: #18

كيف الناس دى بتتكلم عن البول عاااادى ومافى حملات توقيع ولا شايفة حياء انخدش
ولا ذوق امتعض..

ده بول سارتر ولا شنو؟؟

Post: #20
Title: Re: ممنوع ال... يا حمار
Author: صباح احمد
Date: 03-08-2005, 05:56 AM
Parent: #1

يا جماعة استهدوا بالله
وشنو ياتماضر بتحرشي علينا الجماعة يعملوا توقيعات ويطلعوا مظاهرات
شايفة البوست دة مااااااااااااشي بهدؤ الظاهر الجماعة عاملين نايمين بمناسبة اليوم العالمي للمرأة
كل سنو وانت طيبين

Post: #21
Title: Re: ممنوع ال... يا حمار
Author: Tumadir
Date: 03-08-2005, 06:01 AM
Parent: #20

check your messanger, saba7

Post: #22
Title: Re: ممنوع ال... يا حمار
Author: saif massad ali
Date: 03-08-2005, 06:03 AM
Parent: #20

تماضر تاني رجعنا لي وراء
ده بول ما في وقت الصلاة , ده زول امي لايعرف الكتابة والفراْْية , بول امي ما سياسي ما دارس فنون جميلة عشان يعرف الجمال والكمال والجلال , رايك شنو مكتوب ممنوع البول يا حمار وبرضو عمل , ابقي حمار

Post: #23
Title: Re: ممنوع ال... يا حمار
Author: Tumadir
Date: 03-08-2005, 06:21 AM
Parent: #22

Quote: تماضر تاني رجعنا لي وراء

ونحن كان مشينا لى قدام...؟؟

البول ياهو البول...مايخرج من السبيلين...لو من امى او دارس فنون جميلة

نفس البولينا...

بعدين تعال يا سيف مساعد ...انتو اوقات الصلاة دى ما فيها بول؟؟؟

من ما قمنا بنشوف الاباريق دى طالعة ونازلة مع الاذانات...وفى الجوامع.اول حاجة .بشتروها البروش والاباريق...وقبل ما نوعى ونكبر نسمع ونفهم كلمة قطع الجمار سمعناها فى حصة الدين...والدين والفقه الدينى لم يستح من توضيح كل هذه الاشياء...بقصد شرح فرض الطهارة قبل اقامة الصلاة...

لكن

المواضيع هنا بتتخذ شكل درامى وانفعالات الناس بتنقاد -مرات - بحسن نية ظاهرى لكن يستبطن كتير من سوء النية المبيت...وتفويت الحقيقة تحت سطح الانفعالات المزيفة...

اهوه موضوع عن بول...ومافى صراخ......يعنى الموضوع ما مستحيل...ده كل الدايراه يصل

العالم دى متحسسة ساى ودايرين ليهم سبب...ولقوهو...وكسبوا ...رودا طلعت من البورد والقضايا السخنة همدت وعبير خيرى ادوها تلاتة كفوف والمرأة فى دارفور بتغتصب...والبشير وعلى عثمان محمد طه فى سلطتهم وبعد الضجة ديك...قتلو خيرة شباب بورتسودان...واهم معتقلى الحماداب صورهم بتتنشر...وكل يوم بتظهر عورة...تستحق اقل ما تستحق...ما هو اكثر...من ثورة قلم...

المهم موضوع ما وصلنا فيه لاتفاق "على الاقل" ما تتكلم عنه كأنه بديهى...الكتب عن البول ما دارس فن تشكيلى...ودى حقيقة انا بعرفها...لكن ما عندى رغبة فى الخوض فيها...بس استغربت من عدم "التقزز" ...

Post: #24
Title: Re: ممنوع ال... يا حمار
Author: صباح احمد
Date: 03-08-2005, 06:26 AM
Parent: #1

تماضر
شكرا عملت جك علي المسنجر ولقيتك هناك
*سيف ياود امي مالك علينا داير تجيب لينا الهوي

Post: #25
Title: Re: ممنوع ال... يا حمار
Author: saif massad ali
Date: 03-08-2005, 06:37 AM
Parent: #24

صباح ما تخافي مافي هواء بجي هنا

انا بسمع كلام تماضر وعندها كلام سمح كتير عشان كده دي فرصة ما بضيعها

تماضر منو الطرد رودا , انا واحد من الناس طيلة الوقت لم اداخلها ولم امر باي موضوع كتبته او كتبه رودا, وكتبت الكلام ده والحركة اصبحت جزء من النظام جون قرنها نائب للبشير , والحركةالان داخل الخرطوم والنظام يعتقل في الطلاب , اليوم عشرات من الطلاب الاتحاديين داخل سجون النظام, وبعد ايام يصل الي السودان وفد الحركة الكبير , وتهمة الطلاب انهم ضد السلام .

Post: #26
Title: Re: ممنوع ال... يا حمار
Author: Tumadir
Date: 03-08-2005, 06:43 AM
Parent: #25

ما تخافى يا صباح...

مافى هوى...

بعدين يا سيف انا ما قلت سيف طرد رودا...

رودا ما انطردت..رودا سابت البورد...

القلتو انه الحملة الانفعالية الاتعملت ضدها ...سببها تعبير "غاضب" ضد ظرف ما زال مستمر ويمكن ماشى لاسوأ...يعنى انكسر القلم..البثور على الطاغية.لكن ما انكسرت البندقية البتقتل فى "الانسان"... بسبب تعبير..

انا لازم اطلع من البورد يا سيف مساعد...

وصباح عارفة السبب شنو؟؟ زارانى فى تحقيق صحفى ...وبعدها بمشى الشغل

كل عام وانتم بخير ...لى قدام

Post: #27
Title: Re: ممنوع ال... يا حمار
Author: HOPEFUL
Date: 03-08-2005, 06:47 AM
Parent: #25

احم

احم

Post: #28
Title: Re: ممنوع البول يا حمار
Author: Balla Musa
Date: 03-08-2005, 11:13 AM
Parent: #27

صباح ليك تحية كالصباح

يا اخوانا حرام عليكم

الراجل البال مظلوم والحمار مظلوم والكتب الإعلان ظالم وغلطان
أولا الراجل قرا الإعلان صح فبال مطمئنا
ثانيا الحمار أساسا مابال والمسكين بهتوهو وكمان ظلموهو مرة تانية بوصفو بالبلادة
الإعلان المفروض يكون (ممنوع البول يارجل)[/B]

Post: #29
Title: Re: ممنوع ال... يا حمار
Author: فجراوى
Date: 03-08-2005, 11:36 AM
Parent: #1

صباح

كل سنه وانت طيبه

Post: #30
Title: Re: ممنوع ال... يا حمار
Author: Tumadir
Date: 03-08-2005, 06:15 PM
Parent: #29

راحة البال...وهجعة زول بعد ترحال

Post: #31
Title: Re: ممنوع ال... يا حمار
Author: نادية عثمان
Date: 03-08-2005, 07:17 PM
Parent: #30

صباح ياصحبتى ..ويازميلة الكفاح المسلح

ياااااااااااااااااخ والله انتى عسل

اقول ليك حاجة ؟

انتى متأكدة انى ماشفتك فى امجاد ماشة جهة الشعبية بحرى لمن كنتى طالعة من الجريدة اليوم داك ومعاك اسمهان فاروق؟

اسمعى الموضوع ده حلو شديد لكن انتى ماتغيبى عن ضيوفك كتير ردى اول باول عشان

آنشوف اخرتا على رأى استاذى سعد الدين ابراهيم الشاعر الرائع..

سلمى عليهو ياصباح كتيييييييير

بالمناسبة هو درسنى فى الثانوى والعالى فى الانجيلية بحرى ..

Post: #33
Title: فى هذا المقام.. لازمن قصة أزقة للمرة الرابعة
Author: bayan
Date: 03-08-2005, 10:04 PM
Parent: #31

أزقــــــــــة

عبدالمنعم الجزولى
(1)زقاق ملتوى

عندما خرج ليتبول فى الزقاق كعادته، لم يجد مكانا خاليا، فقد كانت كل الأماكن الصالحة للتبول مشغولة بجماهير المتبولين.
قطع الزقاق جيئة وذهابا مرتين، عسى ان يخلى احدهم مكانا له. ولكن التبول كان ابديا، والمتبولون لاينقطع سيل بولهم، ولايخفت خريره عند نقطة التقاءه بالارض.
تجنب دعوة (عمر البطل) له ليتبول فى المساحة الضيقة جدا بين موقع تبول (البطل) وباب الحديد فى حائط منزل الحاجة (لبودة شندقاوى) او (لبودة الداية) كما يسمونها. ورغما عن ان (لبودة) ليست داية قانونية، الا ان زبوناتها كن اكثر من جملة زبائن دار الرياضة، وقد تخصصت (حاجة لبودة) فى اعادة ما انهتك من أغشية البنات قبل الزواج وتضييق ما اتسع من فروجهن بعده!!
كان يعلم ان (البطل) لن يكتف بالتفرج على قضيبه الملتوى الى اعلى ، بل سيمسك به محاولا اعادته قسراالى استواء القضبان. اعتذر له برفق مستقيم حيث ان (البطل) لايحب الكلام الملتوى. كان بطبعه يكره الالتواء فى اى شئ.
(عمر البطل) كان يشكل فى اوائل الستينات فريقا غنائيا مع (دفع الله ودبتول) وكان الناس يعرفونهما باسم (ثنائى العوجة) حيث قدما الى المدينة من قرية (ود العوجة) ريفى (صندقة). وظلا يمارسان الغناء فى الافراح والنواح فى الاتراح حتى مات ( ود بتول ) نتيجة تسمم كحولى.
اعتذر مبتعدا عن دعوة (بخيتة) المكشوفة. كعادتها كانت( بخيتة) تتبول واقفة عند طرف برميل الزبالة. (بخيتة) كانت تنافس الرجال فى القاء بولها مباشرة على بعد متر ونصف امامها. ومن فجورها فقد افتت بان زواج (عشة اللبوة) من (قسم البارى) التفشكى حلال، رغم ان (عشة) كانت و لاتزال فى عصمة ( بانقا) النجار!! بل وافتت بامكانية زواج (ويصا عبد المسيح) من (فاطمة) الفلاتية مدعية ان الله قال فى محكم تنزيله" الرجل مايعيبه سوى جيبه ".
مع ارتفاع رائحة النشادر النفاذة، وكل تلك الظهور ذات الالوان والاحجام المتنوعة، تذكر مشهدا قديما لفيلم هندى سخيف.
دخل احدهم من طرف الزقاق فوق دراجة سوداء تتقدمه عينان زائغتان وحركة ارجل مترددة على بدال الدراجة, وظل يرمق ظهور المتبولين ظهرا فظهرا، حتى توقف شبه متردد خلف (صالح بابتوت) عند باب الزنك القديم والذى كان كعادته عند التبول يجلس فاردا جلبابه الفاقع الصفرة خلفه ودالقا عمامته باسترخاء خلفه كاشفا عن طاقية خضراء تغطى بعضا من رأسه الاصلع. دار حديث قصير بينهما.. الغريب فوق دراجته مستعدا للهروب فى اية لحظة، و(بابتوت) لاينقطع خرير بوله، ثم تبادلا شيئا.. لفافة بنقود او العكس، لتنطلق الدراجة وتختفى عند التواء الزقاق.
حدثـت المعجزة، هكذا فجأة ، وبدو، مقدمات. حيث ترجل (تور الفجة) من جواد بوله، فشغر مكان. أسرع ليحتله ويفك ضائقته، ولكن حضرة المدير خرج من الباب المجاور مباشرة ولم يتردد لحظة فى الاستيلاء على المكان الخالى واطلق لبوله العنان.
لعن المدير والمديرين والوزراء وكافة المسؤلين . أى مدير هذا الذى يقف بسرواله الازرق وقميصه الناصع البياض، ليتبول هكذا علنا؟ ربما لم يكن مديرا حقيقيا فى السكة الحديد..ظن لوهلة انه قد يكون مديرا لبقالة او لمخبز او اى شئ آخر ولكنه بالقطع ليس مديرا فى الحكومة.
(ست ابوها)، ابنة خالة ابناء عمه، خطف حياتها قطار شارد جهات السافل، كان هذا منذ زمن بعيد، ولايذكر ان كان ذلك فى المحمية ام فى الدامر. لعن القطارات المتوقفة والمتحركة فى كافة ارجاء المعمورة.
تحرك(عثمان ابنعوف) اثناء تبوله جهة اليمين قليلا، فظنه سيغادر المكان، وتأهب لاغتنام الفرصة، متحفزا حتى ان بعضا من قطرات البول قد بدأت بالفعل فى الخروج من مكمنها. امسك نفسه بقوة، فقد أحس بان سرواله قد تبلل قليلا. ولكن (ابنعوف) لم يزد على تلك الحركة. لعنة الله عليك.. أجئت لتتبول ام لترقص.
يقولون ان (ابنعوف) يتاجر فى الزئبق الاحمر.لابد انه قد جمع ثروة كبيرة. لعنة الله عليك. لماذا لاتبنى لنفسك مبولة خاصة وتترك لنا مجالا فى زقاقنا هذا؟
عندما تحرك (زكريا الاشول) من مكانه وراح يعيد هندمة نفسه معلنا انتهاءه من عملية التبول، هرول نحو المكان لايلوى على شئ، وقد بلغ البول الذبى. ولكن (زكريا)، ولسبب لا يعلمه احد، قرر العودة لمواصلة تبوله فى نفس المكان. وعندها لم يستطع (قسم السيد) التحمل اكثر من ذلك . لقد تبول فى ملابسه الرسمية!! كان ( قسم السيد) شرطيا سريا، والجلباب الابيض مكون اساسى لزيه الرسمى.

Post: #32
Title: Re: ممنوع ال... يا حمار
Author: abookyassarra
Date: 03-08-2005, 10:00 PM
Parent: #1

الأستاذة / صباح
بدون مجاملة .. عندك ملكة سرد عالية أتوقع أن تؤتى أكلها لو وظفتيها فى كتاباتك الصحفية .. وبالمناسبة الموضوع ( مادة ثرة ) فى عديد من أوجهها كمادة صحفية بعد المعالجات اللازمة ..
طبعا ً .. فى غياب لأحد عشر عاما من السودان ذهبت قبل سنتين .. فوجدت الناس بتعيش - رغم تباين ظروفهم- بتعيش حالة من ازدهار فن الطرفة بينهم - ان جاز التعبير..
ود خالنا فى أركويت شافع عمرو 18 سنة عندو ركشة بشتغل بيها عكس التيار .. الناس ماشه الشغل هو يرجع البيت والعكس صحيح .. المهم .. من الطرائف اللى كان بيحكيها لى ..إنو فى واحد زميل ( بتاع ركشة ) كتب على الركشة ( السعودية حلالة المشاكل = لمو فيهو الجماعة اياهم وقاموا باللازم = قام مسحها وكتب - السودان ظريف لكن داير مصاريف )
أعتقد ياصباح عالم الصحافة والاعلام والفنون الدرامية المختلفة قمة نجاحها فى نقل صور المجتمع وعكسها كثقافة مجتمعية بمعالجاتها كل بما يتناسب مع الوسيلة الاعلامية او البرنامج المنفذ عبره ..
*
نادية عثمان : رقم بوستاتك حلو ( 999 ) طوارىء

Post: #34
Title: Re: ممنوع ال... يا حمار
Author: نادية عثمان
Date: 03-08-2005, 10:34 PM
Parent: #32

ابو السارة

مشيت وييييييييييييييين يازول مسجل غياب؟

Quote: نادية عثمان : رقم بوستاتك حلو ( 999 ) طوارىء

وتيب؟

الغياب فى شنى ؟

Post: #35
Title: Re: ممنوع ال... يا حمار
Author: saif massad ali
Date: 03-08-2005, 11:14 PM
Parent: #34

اها جيتي يا السمحة ياملكة بنات ضنقل

ستو مشت وين البوست ده

Post: #46
Title: Re: ممنوع ال... يا حمار
Author: نادية عثمان
Date: 03-10-2005, 03:44 PM
Parent: #35

سيف مساعد

ازيك اخوى

Quote: اها جيتي يا السمحة ياملكة بنات ضنقل

انت بتقصد منو بس لانو فى اكتر من دنقلاوية هنا !!

وكل الهنا دنقلاوية ، شايقية، جعلية، نوباوية، بجاوية ، محسية، جنوبية، ومن اى مدينة واى منطقة سودانية هى ملكة وملكة متوجة كمان!!

Post: #36
Title: ممنوع ال...... ياحمار
Author: ahmed shaaeldin
Date: 03-08-2005, 11:29 PM
Parent: #1

تعرفي يا استاذة صباح والله الراجل ماغلطان ولاحاجه حمار اللي كتب الكلام فى الحيطة
لأنو الكلام موجه لحمار . الراجل قرأ الكلام وعرف انه موجه لحمار وليس له لذلك عملها
ولارايك شنو؟

Post: #38
Title: Re: ممنوع ال...... ياحمار
Author: ابوحراز
Date: 03-09-2005, 02:32 AM
Parent: #36

أذكر من الطرائف ان احد أصدقاء الوالد كان لديه دكان في جوار بيته مباشرة بالسوق وكان في العصر ياتي اصدقاء هذا التاجر للعب " المنقلة " في ضل الدكان 00 وربما الحناكيش الذين يقراوون البورد لايعرفون هذه اللعبة " المهم هي شطرنج أهل العوض " طبعاً أكره هذه اللعبة كراهية شديدة جداً لأن كل الذين يلعبونها عراريقهم مقدودة من وراء !! لاتسألوني عن السبب 00 لنعود للتاجر 00 طبعاً اصحابه كانوا يجلسون عصراً في ضل الدكان ويلعبون حتى صلاة المغرب 00 الحكاية كتروها شوية وصاحبنا التاجر تضجر من ذلك ولكنه كان لايريد أن يخسر اصحابه فكان يحكي لزوجته كل يوم عن معاناته مع أصحابه وانه احتار في الوسيلة التي يمكن ان يطردهم بها دون ان يخسرهم 0 كانت للتاجر بنت وحيدة شيطانة جداً وكانت تسمع كل يوم الحوار الذي يدور بين والديها وكذلك المأساة التي يعيشها والدها 0
قومي يا بت اللذين اطلعي من جوة الحوش بالحيطة الى أن طلعت فوق راس الدكان وبقصاد " السباليق " التي تصب مباشرة في الضل الذي يجلس فيه اصحاب والدها 0 وعملتها بت اللذين حيث بالت في السبلوقة 0 وبدورها بالت السبلوقة في الجماعة 0 ويومياً كانت تكرر هذا المقلب والناس لايدرون من الذي يقوم بذلك 0 لكن صاحب الدكان شطح شطحات كبيرة جداً حيث اعتقد ان زوجته الليئمة ربما قامت بهذا الدور الجبان الى أن إنكشف أمر الصغيرة لاحقاً بعد أن تمكنت من طرد كل هؤلاء العطالة 00
لن تصدقوا إن قلت لكم أن هذه الصغيرة الآن محاضرة بالجامعة وعندما نقول لها ذلك تحلف انها بريئة لكنها لاتنكر أنها كثيراً ماشاهدت السبلوقة وهي تتبول !!!

Post: #37
Title: Re: ممنوع ال... يا حمار
Author: domdom
Date: 03-08-2005, 11:40 PM
Parent: #1

تعرفوا انا بعد ما وصلت ال الاربعينات
و طبعا رغم انو المدام قالت ما دخلتها
و هي زميلتي
بتمني مرتي تجيب لي بنت
اسميها تماضر
كية في التخلف
وكية في الامية الثقافية
وكية في كل شي يؤدي الي ؤد المرأة و هي حية
و الله يا تماضر
اجيبها بنت اسميها تماضر
و باسمك اشتري ليها هديتك
وهي ان تتربي علي ان تكون
شخص متفرد و حر

Post: #39
Title: Re: ممنوع ال... يا حمار
Author: saif massad ali
Date: 03-09-2005, 03:31 AM
Parent: #37

افرد ليك بوست براك, واكتب فيهو تماضر كي التخلف المستنير

Post: #40
Title: Re: ممنوع ال... يا حمار
Author: صباح احمد
Date: 03-09-2005, 11:22 PM
Parent: #1

صباح الخير
ظروف قاهرة حالت دون تواصلي معكم
وظروف قاهرة هذي يعرفها الاخوة الصحفيين جيدا
فعذرا

Post: #41
Title: Re: ممنوع ال... يا حمار
Author: Sawsan Ahmed
Date: 03-10-2005, 10:35 AM
Parent: #40

Quote: العالم دى متحسسة ساى ودايرين ليهم سبب...ولقوهو...وكسبوا ...رودا طلعت من البورد والقضايا السخنة همدت وعبير خيرى ادوها تلاتة كفوف والمرأة فى دارفور بتغتصب...والبشير وعلى عثمان محمد طه فى سلطتهم وبعد الضجة ديك...قتلو خيرة شباب بورتسودان...واهم معتقلى الحماداب صورهم بتتنشر...وكل يوم بتظهر عورة...تستحق اقل ما تستحق...ما هو اكثر...من ثورة قلم...
المهم موضوع ما وصلنا فيه لاتفاق "على الاقل" ما تتكلم عنه كأنه بديهى...الكتب عن البول ما دارس فن تشكيلى...ودى حقيقة انا بعرفها...لكن ما عندى رغبة فى الخوض فيها...بس استغربت من عدم "التقزز" ...

شكرا تماضر

Post: #43
Title: Re: ممنوع ال... يا حمار
Author: Tumadir
Date: 03-10-2005, 03:03 PM
Parent: #41

Quote: و الله يا تماضر
اجيبها بنت اسميها تماضر
و باسمك اشتري ليها هديتك
وهي ان تتربي علي ان تكون
شخص متفرد و حر

اها يا دمدوم:

بركة الله ورسول الله

بركة من قال يالله

بركة المغارب وعلى ابن ابى طالب
بركة الجمعة الجامعه والدعوة السامعة
بركة مية واربعطاشر صورة ومكة المعمورة
بركة تسعه وتسعين نبى اولهم محمد واخرهم على "!"

يديك ديك يا لبنية

فنجرية وتبقى لى حسادها كية

تبقى شمسا للشموشه وتبقى حنضل لوحوشا

تبقى نسمة... للمساكين تبقى رحمة

تبقى فى النسوان جميلة تبقى تعريشة وخميلة

ياتماضر...وشايلة اسمك "هههههه" لا مرض يغشاه جسمك ..

...وقبح الله الفقر، والعمى اليعمى عيون الشر

Post: #44
Title: Re: ممنوع ال... يا حمار
Author: Tumadir
Date: 03-10-2005, 03:08 PM
Parent: #43

سوسن احمد

I love u tooooooooooo

again

صباح دى يا جماعة مشغولة باللقاء الصحفى العملتو معاى فى الصحافة ....خلوها بتجى

Post: #45
Title: Re: ممنوع ال... يا حمار
Author: nour tawir
Date: 03-10-2005, 03:10 PM
Parent: #1

قدرة غير عادية على التصوير وتفاصيل التفاصيل.

سرد درامى/كوميديان يشد القارئ/ة دون أن يشعر.

بذرة واعدة فى المسرح والقصة وحاجات كتيرة.

تحياتى

والى الامام(يا شباب السودان).

سلام...

Post: #47
Title: Re: ممنوع ال... يا حمار
Author: صباح احمد
Date: 03-11-2005, 06:40 AM
Parent: #1

ما شايفة زول شغال بس ست البورد
الحاصل شنو ياشباب
احم احم
نحن هنا

Post: #48
Title: Re: ممنوع ال... يا حمار
Author: saif massad ali
Date: 03-11-2005, 07:36 AM
Parent: #47

مشينا قلنا ما نجيب ليك هبوب الجزيرة السوداء