عليك يا دنيا السلام

شعر/ عزمى أحمد خليل
يا سلام على السلام .............. لما يصبح جد سلام
وما مجرد بس كلام ..............ولا صلح بعد الخصام
ويا سلام على السلام
السلام يوم يبقى شامل .............. وبيهو الكل ارتضى
وفى الحكم الكل يشارك .............. وتبقى حرية قضا
وكل شروط جايره ومهينه.............. بى اراتو يرفضها
والتسامح هو البيسود .............. ويملأ ساحات الفضا
نبقى نفتح صفحه بيضا .............. واللى كان يصبح مضى
ويبقى ده ياهو السلام .............. ويا سلام على السلام

السلام للشعب كلو .............. العانى ويلات الحرب
ما اتفاق كرسى ومصالح .............. وما سلام فئه أو حزب
وله تهميش للتجمع .............. وله تبخيس للغرب
السلام لى كل واحد .............. للقريب والمغترب
والسلام يوم يبقى صفقه .............. دابو عاد ما بس خرب
والسلام ما انقسام .............. وما هو تثبيت للنظام
ويا سلام على السلام
السلام بالجد يكون .............. لما يصبح قول وحق
ما سلام تشويش ومظهر .............. أو كلام بس فى الورق
السلام لى كل مناضل .............. للظلم قاسى ومرق
والسلام لى كل مواطن .............. أصلو لا خان لا سرق
والسلام حق للجميع .............. ما سلام جبهه وقرنق
السلام ما غصن أخضر .............. بيهو بيطير الحمام
ويا سلام على السلام

السلام عزه وكرامه .............. وما سلام بترول وسلطه
بى قلب مفتوح وجامد .............. وما سلام فار بيخشى قطه
السلام ده طريقو بين .............. وأصلو ما دايرلو خرطه
الا بس الهسه حاصل .............. هو حيله ولا خطه
كل شريك يأخد نصيبو .............. وفى دماغ الشعب خبطه
وديه يا ناس عاد كلام .............. ويا سلام على السلام

السلام بى صورتو ديه .............. حل هزيل وبالجد خيانه
حلفا ترحل لى مريدى .............. وتبقى واو أرض البطانه
والشرق رامينو غادى .............. وفى السلام ما ليهو خانه
والجنوب وين باقى ناسو .............. وقولو دارفور وين مكانه
مين يقول بس الحقيقه .............. والله جد عالم جبانه
والمهم قصر الكلام .............. سلطه بى اسم السلام
ويا سلام على السلام
السلام البيحكو عنو .............. فيهو بس اسم السلام
فوقو يا ناس واصحو يلا .............. وخلو بس كتر الكلام
ما البيخاصم هو النظام .............. والبيصالح هو النظام
ينكتم صوت الحقيقه .............. وليهو بس حق الكلام
وما مهم الشعب يقبل .............. وله ينعم بالسلام
المهم السلطه تبقى .............. ويندفن رأس النعام
عدوها يصبح هو الشريك .............. وللثروه يحصل اقتسام
والرئاسه والوزاره .............. هم يا ناس الكلام
وعليك يا دنيا السلام .............. ويا سلام على السلام
وعليك يا بلدى السلام .............. وعليك يا وطنى السلام
ويا سلام على السلام

واشنطن /28 اكتوبر 2003

مرحبابالاستاذ والاديب ـ الشاعر عزمي أحمد خليل بيننا في البورد
و شكرا له علي هذا النص
الشعري الرائع المعبر والذي يعكس انحياز الشاعر الوطني
لقضايا شعبه وهمومه المتمثله في الحريةو السلام الشامل
الحقيقي وليس هو فقط ايقاف الحرب في بعض الانحاء
واقتسام السلطه بين حمله السلاح ـ خصوم الامس ـ وتجاهل
الجماهيروالقوي السياسية الاخري
لك الشكر مع أمل اتحافنا بالمزيد
كمال عباس

مرحب بيك يا استاذنا و اديبنا عزمى احمد خليل و اشكرك على الاتصال بى و نيل سودانيزاونلاين ثقتكم لنشر اعمالكم بها و لا يفوتنى ان اشكر الاستاذ بشير اسحاق لما قام به من اجل ايصال هذه القصيدة لاعضاء و زوار سودانيزاونلاين

Quote: · عزمى أحمد خليل · من مواطنى وادى حلفا – دغيم · ترعرع في الشرق فامتزجت عراقة النوبة بعنفوان أهل بورتسودان وكسلا واروما. · درس الأبتدائي والمتوسط في اروما وبورتسودان والثانوي في حلفا الجديدة. · درس الفلسفة والمنطق وعلم النفس بجامعة القاهرة فرع الخرطوم. · عمل معلماً بمديرية كسلا. · عمل ضابطاً بالخطوط الجوية السودانية بمطار الخرطوم · عمل صحفياً بجريدتي الخليج والوحدة بدولة الامارات العربية المتحدة. · عمل مشرفاً إجتماعيا بجامعة الملك سعود بالرياض · سكرتير رابطة شعراء الغناء بالمهجر. غنى له معظم المطربين السودانيين منهم العاقب محمد حسن – العطبراوي – عثمات مصطفى –هاشم ميرغني- حمد الريح –عبد العزيز المبارك –خوجلي عثمان-يوسف الموصلي-محمود علي الحاج –الهادي حامد-ابوعبيدة حسن-عبدالله البعيو-سيف الجامعه –مجذوب اونسة –محمد سلام- الرشيد كسلا-بشير عبد العال وآخرون

http://www.sudanpoem.8k.com/000z.html

اهلا بشاعرنا الكبير عزمي
وبرؤيته الصائبة للسلام الذي نريد.
مرحبا بك في البورد

سلام على شاعرنا ومبدعنا الاستاذ عزمي
ووالله نورت البورد
وزادنا كل الشرف
التحية لك
على دعوة السلام
والف سلام وتحية

حقيقة اخوتي وبكل احترام وتقدير لعزمي شعرت وربما لخلل في مستقبلاتي أن هذا شعر ضعيف جدا ومرصوص رص وليس ابداعا بالمرة فهو مثلا مسافته الاف السنين الضوئية من جمال نص اسماعيل حسن المسجل معه، فهل من يشاركني هذا الرأي؟

مرحب بالاستاذ الشاعر عزمي احمد خليل
وشرف عظيم لنا ان يكون عضو معنا بالمنبر الحر

وشكرا بكري

مع احترامي الخالص جدا لشعر الاغاني المنسوب لعزمي احمد خليل لم اتوقع ان تنشر له مثل هذه الاعمال ... فهل هي حقيقة من شعر عزمي احمد خليل؟؟؟؟؟؟؟؟؟

مرحب بيك شاعرناالرقيق

بلادي حنان ..... بلادي امان....لكم التحيه جميعا.....

بلادي امان بلادي حنان.....

شكرا الاخ بكري والتحية للاخ المبدع عزمي حقيقة ترجمت كل تساؤلاتنا وشكوكنا حول الطبخة التي لم تستوي بعد ولن تستوي في غياب ماصغته لك الود والى الامام

اخي الغالي بكري
يا اخي والله نحن ممتنون لك جمعتنا في هذا البورد الجميل والذي نتطلع يوما الي ان نجد كتاب البورد مطبوعا به ابداعات مساهميه من مقالات وبحوث ودراسات واراء متميزة لانك حريص هعلي الجودةز
.

لكن اخي بكري لماذا هذا التهليل المثير وبالبونت العريض لهذه القصيدة الميكانيكية الضعيفةان جاز لنا أن نسميها قصيدة. دعونا ننمي معايير الجودة والفن لهذا البورد وعليه حتي لا يختفي مفهوم الجودة والمجيدين وراء زفة ساقها الاعلام ذات مرة لهذا او ذاك فاصبح نجما بلا سماء وصرنا بعد ذلك نسلم تسليما ونسبح بحمد من ساقته صناعة صديق في الاعلام الي رحابه فأصبح في نظر الكل مبدعا، اقول بذلك وفي البال صحفي عائد من المهجر يكتب الان عن المبدع الملحن علي احمدالذي ظهر مؤخرا فساواه في ابداعه ببشير عباس ومحمديه والفاتح الطاهر لا لشيء الا لأن ذلك الملحن لديه المال والجاه ان كان اصلا ملحنا ولو انه كتب عن عبد الفتاح الله جابو واخيه علي او رابح الموردابي او المرحوم علي ميرغني لصدقناه.
المهم يا بكري خلونا نحرر مجتمعنا من مصيبة الانقياد علي حساب الجودة فلا نقول لمبدع انك مبدع الا اذا كانن كذلك