اللهجة العامية في السودان

اللهجة العامية في السودان

الكتاب للدكتور عون الشريف قاسم
لعلمي بصعوبة امتلاك الكثير لهذا العمل فكرت في نقل ما أستطيع منه إليكم ، ولتعم الفائدة أرجو أن استأذن الدكتور في النقل وساكون بأذن الله ناقلا ما جاء حرفيا في كتابه كما أرجو منكم عدم التردد في السؤال عن أي معنى تبحثون عنه وطبعا اصلوا أنا ما جايب حاجة من راسي كلو في كراسي حق الدكتور

أرجو أن تستفيدوا منه ....

النحت

ما عليك شئ : معليش
على شأن: عشان وعلشان
لأي شئ هو : ليشنو
هذه الساعة : هسع
بلا شئ : بلاش
هي وهو لك : هيلك وهولك
أي شئ هو : شنو
الزيادة
تشبط : تشعبط
سلطّ : تسلبط
سمّر : سمكر
عنق : عنقرة
لوح : لولح
طوح : طوطح
القلب
ضج : جضّ
زواج : جواز
نضج : نجض
ملعقة : معلقة
الحذف
ولد : ود
بنت : بت
امرأة : مرة
نصف : نص
انت : ات
قلت : قتّ
كنت : كتّ
فرد :فد
إبدال الحروف
جعيص : جعيس
كظم : كضم
جأر : جعر
سأل : سعل
فقأ : فقع
انفقأ : انفقع
أين : وين
أديته : وديته
آمين : يامين
حبلت المرأة : حملت
منبر : بنبر
بهته : بهطه
ثلاثة : تلاته
حديث : حديس
تلعثم : تلعسم
جحش: دحش
جيش : ديش
حمزة : همزة
وجه : وش
خديجة : خجيجة
دجاجة : جدادة
حطّ : خت
زغرد : زغرت
انشدح : انشتح
ذنب : ضنب
زهري : ظهري
سرّة : صرّة
ذكر : زكر
ذمّه : زمه
شمس : شمش
رخيص : رخيس
سبق : صبق
رفض : رفد
ظل : ضل
ظهر : ضهر
بقر : بغر
وقت : وكت
قتل : كتل
إسماعيل : سماعين
فاطمة: فاطنة
جنب : جمب
والأمثال كثيرة مثل :
الأسد : اللسد
كتابه : كتابو
وقت : وكت
لعن : نعل
ارتمى : اترمى
غطس : غتس
نأتى للمعاني الدارجية :
اجي لفظ تستعمله النساء تعبيرا عن الدهشة
أوكشه : اصلها تركي وتعنى كعب الحذاء وأيضا الشيء المبتذل والأمر القذر
أ’مبو : لفظ يخاطب به الأطفال يعنون به الشرب والماء وهى من الكلمة القبطية أممبو بمعنى اشرب
أ’مبوح : صوت البقر
اندراوه : انجذاب واضطراب
أهيف : الجنيه وفى الأصل الدينار
أها : لفظ قبطي بمعنى نعم ( حرف جواب )
همبريب : نسمة من الريح منعشة
هلس : الدنيء الحقير
جاط : ازعج واحدث فوضى والجوطة بمعنى الازعاج ولعلها من جاظ ( اختال وتكبر في مشيه فهو جوّاظ )
خجّ : هزّه وحركه من جنب إلى جنب
خشلعة : اصلها شخلعة وتعنى تبذّل وتثنّي وخلاعة
خمج : بمعنى فسد
فرندقس : فوضى وخروج على المألوف
شعشع : الشارب – ألم به سكر خفيف
شطح : جاوز الحد
شفته : لصوص العصابات
شقيش : اصلها شق وتعنى صدعه وفرقه
شوبار : الفروع والشوائب الأكثر التفافا التي تتفرع من سيقان الزرع
دزّ : ساق امامه
دنقر : انحنى وطأطأ راسه ( يقولون في العراق دنكر بنفس المعنى ) ويا حليل العراق وان شاءالله ما يدنكر ( دى من عندى )
زتت : تباهى وتكبر

شكرا طارق

لكن (زهري : ظهري) السودانيين قلبوا حتى اللون، فاللون الزهري هو الوردي، البنبي (البمبي)، لكن السودانيين يطلقون الظهري على الأزرق أو الأزرق الغامق

مشكور وواصل

"امبو" ده انا ما سمعتها الا عند المصريين... احنا عندنا مصطلح الموية بلغة الاطفال عبارة عن حركة غريبة بضم الشفايف و فتحها بحركة سريعة ينتج عنها صوت مميز- ما بينكتب-.. اكيد عارفنها

واذا كانت معليش تعني ما عليك شئ..و لشنو اصلها لاي شئ هو .اذا
لفظة التعجب "اجي" اصلها " أأجئ بمثل هذا" كما سمعتها من زول ما

Mandingoo
على ما اعتقد
ظهري جاية من "ظهرة" البغسلو بيها الهدوم..ما جاية من زهرة.

فى البداية الحمدلله الفى زول ردّ ، انا والله قايل نفسى بكتب بالحبر السري ومافى زول شايفة

المهم

الاخ Mandingoo
انت الله يديك العافية طوالى طالينا ومقرينا خطك ، ان شاءالله ما ننحرم منك
بخصوص الظهري
manj
ماقصر معاك

الاخ
manj

شكرا فى البداية على المشاركة والاضافه ، وكلام الدكتور ما هو منزل عندنا حاجات كتيرة ما بتتكتب ، زى معنى كلمة ااى لم تتضغطى اللسان وتتطلعى الصوت الما بنكتب

اما بخصوص اجي ، فأنا والله قايل نفسى نقلتها وما ذكرت هو ما جاء تماما فى الكتاب

فما عليكم شئ فى عدم نقل الجزء الاخير من المعنى

ولنال عودة

الاخ طارق
تحيه طيبه
والله انا كانت عندى نفس الكلام
واسعى بديت بالامثال تلقها فى بوست اسمو الممعوط ما بطير
وان شاء الى الامام
ودعقاب

برقية

بسم الله الرحمن الرحيم

الاخ ود عقاب
شكرا على الزيارة التى اثلجت صدرنا ، وان شاءالله نردها ليك قريب في بوستيكم

ونسأل الله التوفيق للجميع
اخوكم طارق

الظاهر حأكمل الكتاب براى

شره : الميل الشديد إلى الطعام
أُورو : اسم علم ومنها ود اورو حى بأم درمان التى تنطق ودّدرو
أوضه : غرفة وهى تركية
أوهاج : الحاج
إير : عضو التذكير من الرجل
بابح : لفظة تقال للطفل قبل ان يحسن الكلام عند نفاذ الشئ
بارجُغُل : السمين المنفوخ في ترهّل
بال : القلب والخاطر
بانت : حى في ام درمان وهو اختصار للرجال بانت اى ظهرت
بتاع وبتاعة : جمع باتع وهو ما يخص الانسان ، وهى في الاصل متاع وقلبت الميم باء
بجو بجو : طائر البقر المسمى البليبلى
بدنة : النسب والحسب ( الفرع القبلى )

تسلم يا طارق


علييييييك الله واصل

عشان نستفيد


تحياتي

حاضرين يا نها انتى بس اتدللّى

نواصل يا شباب

برجل : تبرجل برجله اضطرب
برجُوبة : الطين اللّين الملكوك تغوص فيه الأرجل
برسيمة : ضاحكة ودودة
برشم : قطع أو شلخ في الخد
برضو : كلمة تركية برده وبردو وتعنى مرة أخرى
لرطع : جرى
برطم : انتفخ من الغضب
برطوش : نوع خفيف من الاحذية
برع : برعت المرأة شعرها – بدأت تنقض شعرها الممشط لتمشطه من جديد
برقوق : جمل مشهور بالبطانة تنسب إليه الابل الجيدة
بريّة : لفظة تستعملها النساء لارادة البرء لمريض أو تقال لدرء الشر عن إنسان مهدد بالخطر وتستعمل مع المذكر والمؤنث
بزبز : بسبس – الماء سال وتسرب
بس : بمعنى حسب
بِس : لفظة تقال لطرد القط
بشّة : مجموعة من النساء في فرح او كره
بشتن : افسد الامر وبهدله
بشق : وسع على نفسه وعياله
بشويش : بالتدريج - تصغير بشوية والشوية شئ واضيفت اليه الشين
بضنجان : باذنجان


ولنا عودة

119
اطلعوا على الموضوع ومافى و لا واحد يعلق!!! و لا حتى سؤال

العزيز طارق لك التحية علي هذا العمل القيم
واسمحوا لي احكها وارجع لموضوع الزهري والظهري
الزهري من زهرة وهو اللون الوردي والظهري هوالازرق الغامق من ظهرة (بتاعة الغسيل)عشان لا ماندينجو لا مانج مافي واحد فيهم يزعل
جدو

الاخ جدو

اولا التحية لك وانت تطرق بابنا
ثانيا ، ان شاءالله تدخل وما تقول عندنا البغم
كفاية انك جيت

بالمناسبة البغم دى جايا فى الحلقة الجاية


فترقبوها

الاخ طارق تحية طيبة وشكرا علي المجهود
قريت اليوم موضوعك وشفت تعليق لكن بعد كملت الموضوع لقيت ما دنقو معلق عليهو
لكن برضو ما ح اخليك ساكت
بانت يمكن ان يكون بمعنى اختفت كما قال الشاعر
بانت سعاد فقلبي اليوم
ولا تكون دي بانت شرق ياربي هههههههههههه يكه

لك التحية

زاتوووووووووو

الاخوة الاحباء ، شكرا لكم جميعا على المداخلات
ولكن على قلتها الشئ الملاحظ كلكم مخلين لى قاموس الدكتور عون ده ومركزين لى على الظهرة
ما ملاحظين

والله انا زاتى معاكم اول مرة لمن قريت الكتاب لفتت نظرى برضو قصة الظهرة دى ، لكن كانو معاها كم حاجة تانية

المهم ارجو ان يستفيد الجميع من هذا العمل

حبيبنا طارق – سلام وتقدير

جربت معك مرة نقل بعض المواد المهمة ، وهي شاقة ، أنا توقفت لحالة من الملل تلازمنى ، وها أنت تواصل افادة الناس بهذا العمل الذي سمعنا عنها كثيراً ، وكم تمنيت أن أحظى به ، ولم ألاحظه سوى اليوم فقط ، وكدت أن أخسر هذه الفرصة القيمة فلك الشكر والتقدير ..

أبدأ بهذا الفتح ، معلومة جديدة بالنسبة لي وهي برشم:

برشم : قطع أو شلخ في الخد

يعني دي قريبة جداً من تلك الحركة ( تقويسة الأصبع على الخد ) وأعتقد تفسيرها – شرط – أي التدليل على الإعجاب بالجمال ولا أنا قاعد أخرمج ساكت يا طارق .

التعليق الثاني كلمة بشتن وهي معروفة :

بشتن : افسد الامر وبهدله

لكن أذكرها هنا لموقف وقع لي مع ود شاموق ، كان معجب لدرجة الإفراط ، بأغنية - يا مريا - لصلاح أحمد ابراهيم وأنزلها في بوست ، تداخلت معه وابديت بعض الملاحظات – طبعاً الشلاقة – وكانت مداخلتي طويلة وفيها بعض التحليل ، لكنها لم تقع له موقعا حسنا ، فقال لي بكل عفوية وصدق وطيب خاطر :

والله يالرحمابي بشتنتها بشتنة .. فقعني بالضحك ، وشعرت انو مجهودي داك كلو اختزلته هذه الكلمة البليغة ، وخير الكلام ما قل ودل .. وأظنني أقع للمرة الثانية في نفس الورطة ، فأرجو السماح يا طارق

وتسلم

تحياتي طارق،،، طرح جميل وراقي والفائدة منه كبيرة،، بس بطلب منك توضيح لي معنى كلمة (زول) البنقول فيها من ما قمنا ومالاقيين ليها توضيح ولا جاتنا من وين ولا أصلها شنو؟

شكرا لكل هذا الجمال

اخى
AlRa7mabi

شرّط للارض

تقصد هذا المعنى ؟
لا اعتقد بأنه هو نفسة المقصود ، وانت قاعد تخرمج
اما عن تخرمج دى فهى الصحيحة : اى تفسد- (خرمج : افسد ) وفى النهاية شكرا للمداخلة

الاخ ازهرى تحياتى
ازكر مرة فى ندوة للعالم البروف عبدالله الطيب ( شفاه الله ) زكر معنى كلمة زول وهى تعنى الشخص خفيف الظل المحبوب وفى قاموس الدكتور عون الشريف يعّرفها كالتالى : الشخص ولها معانى اخرى فى الفصحى والزول فى صحراء ليبيا الشرقية رجل معتبر له شأن

ولنا عودة

بطّط : فرطح
بطُن : العندو ظهر ما بنضرب على بطنو اى سند : عندو بطن – اصابه اسهال
بعزق : بدّد واصلا سريانية ارامية
بُعُلُّو : ود ام بعلو – مخلوق خرافى يخيفون به الاطفال وفى المصرية بعبع واللفظ قبطى من بوبو وهو اسم عفريت مصري قديم
بعُو : الحجر الذى ينشق عنه الدوم وتصغيره البعيو ويطلق على الرجل القصير ( القزم )
بغُم : يقولون مافى زول يقول بغم : يعنى يفتح فمه بكلمة
بق : النور اضاء فجأة
بُق : ملء الفم ، البقّة مقدار ملء الفم بالماء
بلس فهو بلاّس : الجاسوس والمجبر الاجير
بلش : الامر تركه
بلع : انزله من حلقومه إلى بطنه
بلعوم : الموضع المعروف في الحلق ، قال مجانين: ما أم كوما قبيح نا الباير ام بلعوم اى مشاغبة عالية الصوت
بلغم : بصاق لزج
بلقعة : بخترة ودلع وعبث
بُلُوبُلُو : طير ابيض اللون
بلوة : مصيبة
بلية : البلاء والمصيبة

الأخ طارق
شكراً على المعلومات القيمة
لدي بعض الملاحظات الرجاء تصحيحي إذا كنت مخطئاً

أعتقد بأن كلمة لرطع التي وردت تنطق عندنا برطع وليس لرطع لا أدري هل هي خطاء إملاءي أم هي هكذا في أصل الكتاب

السودانيون يقولون عن الزواج زواج وليس جواز فهذه عند المصريين

أديته تختلف عن وديته ، أديته تعني أعطيته و وديته تعني أوصلته

كما أعتقد بأن السودانين يقولون إسماعين وليس سماعين

كلمة أهيف أعتقد بأنها مصرية

ولك كل التقدير والإحترام

العزيز طارق
لك التحية
معذرة لهذا الغياب ,كان عندي مشاكل في الساين ان والظاهر انه البورد معتبرني لسه جديد,ما علينا المهم انه المشكلة انحلت .
بالمناسبة انا لسه في انتظار (البغم)واتا اعتقد انها صوت لي حاجة بتقول بغم
ودمتم مع رجاء المواصلة فيهذا العمل المتفرد والجميل
جدو

المبدع طارق
اود المداخله وعليك التصيحيح
بعض الفاظ الاماكن عندنا
التكل وهو المبطبخ
الزقاق الشارع الصغير
التبانه محل الزباله
الدانقه غرفه كبيره
ولنا عوده

الاخ الشايقى
شكرا للمشاركة ، واليك تعليقى
اولا انت اصبت وانا اخفقت فى لرطع والصحيحة برطع : وتقال للجمل ولعلها من سرطع اى عدا عدواٍ شديداٍ من فزع او هى من رتع زيدت فيها الباء وابدلت التاء طاء وقد ورد فى الصحاح : خرجنا نرتع ونلعب اى ننعم ونلهو
جواز: ذكرت فى باب القلب حيث يكثر القلب فى عامية السودان

اديته : جاء زكرها فى ابدال الحروف اما عن المعنى
ادّى : اعطى
اديّنى الشئ : ادّى لى الشئ
اما
ودّى : اوصل

اسماعيل : سماعين ( جاءت تحت باب ابدال الحروف )واخيرا
اهيف هى كما جاءت فى القاموس واضيف بانها سودانية عامية وعربية عامية

اخى ودعقاب
التكل ،التبانه والدانقه لم اجدهم وبفتش ليك معناهم
اما الزقاق : فهو الطريق الضيق ، والزّقاق فى البادية مقدّمة بيت الشعر وتسمى ايضا الحجيل

بكش : كذّب اصلها بشك
بُكس : لكمة بجماع اليد
بلّية : كرة من الزجاج صغيرة يلعب بها الصبية وهى من ball الانجليزية
بُمبار : مصران محاط بالشحم يحشى ويشوى واصلها تركى
بنبر : اصلها منبر وهو مقعد من الخشب
بنّت : نسّق ونظم

بنجُوس : الطفل الصغير ولعلها جنوبية
بنقر : زاع صيته واشتهر
بنقو : الحشيش وهى من بنك الفارسية
بُنية : الضرب بجمع اليد واصلها فرنسية poignee
بهل : تدفق
بوبح : ظهر واكتمل
بُوبار : التظاهر والمبالغة في الكلام رياء
بوجن : الهدوم وخلافها – خلط النظيف بالقذر
بُور : الارض التى لم تزرع
بُورة : الهياج والتفاف الناس

اها يا طارق شايفك ما رديت علي حكاية (البغم) دي مع انك وصلت حرف الباء وكمان مل اظنك مطنشني ولا انا بكتب بالحبر السري وانت ما شايف ردي؟؟
ودمتم
جــــــــــــدو

الحبيب جدو

ان شاءالله الله يرفع معنوياتك ويجيب ليك ناس البورد ديل كلهم يقروا ليك فى بوستاتك زى ما انت بتقراء لى وكمان بترد على
تعرف والله انا مرات بفتكر البورد ده ما فيه ناس بتقراء بس بكتبو ( زى كده ) لكن كل مرة انت تكضب لى الشينة
المهم

يا اخوى انت وقت بتقراء مالك بتفط سطر؟

انا بغم دى ما قلتها ليك زماااااااان
واسع بعيدا ليك تانى

بغُم : يقولون مافى زول يقول بغم : يعنى يفتح فمه بكلمة

وان شاءالله تانى ما تغم ( فى الموضوع ده بس ، لكن غم فى الباقى ) ودمت

العزيز طارق
لك التحية
والله انا البغم دي فتشتها عدييييل كدة وما لقيته الكلام دة قبل ما ارسل البوست لكن تقول شنو بشوف القلب والفلب اتغتى فلك العتبى حتى ترضى..وفي انتظار الجديد
بالمناسبة انا بعد ما عملت ساين اوت وخلاص ماشي تاوقت كدة قبل ما اطلع لقيتك رديت قلت الا اقرا الرد بعدين امشي.
وبرضو في انتظار الجديدة
ودمتم جــــــــتدو

الاخ جدو العزيز

مافى مشكلة يا حبيب بس غير عدسات النضارة

وعليك الله ارفع معاى البوست ده لانو البيقروه شكلهم كتار اما البيرودو ......خليهم ساى

العزيز طارق
ابشر بالخير وما عندك عوجة تب بالنسبة لي رفع البوست.
اما بالنسبة للنضارة فدي بعد ما نصرف الماهية (والماهية اف) لاكين بتجيب العدسات الجديدة .بالمناسبة انت عرفت كيف انو عندي نضارة؟؟؟

ياخى معقول ياجدو!!! هى دى عايز ليها مفهومية؟

ما هو باين انك بتلبس نضارة ، بس زى ما وصيتك التبديل او التعديل واجب وطنى

ودمت

والله يا طارق تراك نبيه ..اسم على مسمى

بوار : الكساد والفتاة البايرة التى بارت سوقها ولم تجد سوقها قالت : يايُمّة كيف الشُّورا ..طالت علينا البورا .. شدُّو وقاموا ناس احمد البلُولة
بُوز : مقدمة الفم وهى فارسية الاصل بمعنى الشفة أو الفم وما حولهما
بُوزة : المريسة وغيرها من المشروبات المخمرة
بوس : قبّل وهى فارسية معربة
بوّش : تدهور لعلها من التركية بوش الذى لا خير فيه

كيف يا شباب
الاخ طارق
ماعندك فكره عن لغه الرندوق ودى لغه الشماسه فى السودان ودى امثله لبعض كلاماتها
شتت: تعنى اذهب
شد سلك:تعنى اتصال تلفونى
بى جازك:تعنى اتحمل السؤليه
ودالبلد ديك:تعنى ابنا الخرطوم
ولنا عوده
ودعقاب

ودعقاب الحبيب سلام
لقد خرجت بالفعل منذ زمن طويل من السودان ولكنى مازلت اذكر هذه اللغة البسيطة الجميلة والتى فيما بعد اصبحت تتداول فى اوساط اغلبية الشباب ولم تكن حكرا على الشماسة
ومنها على سبيل الذكر

البايركس - اى الفتاة البايرة
عباس : الشرطة
شرحبيل احمد : الشره

ساحاول ان اتذكر الباقى

التحية لك وانت تشاركنى

بوّظ : افسد لعلها من بوزمق التركية وتعنى الافساد
بوّع : قطع المسافة وطوى الطريق

عوافي عليك يا طارق والله زكرتني ولدنا دكتور صادق كان برضو برسل بوستات سهله الهضم متل بوستك دا. اها بدور اسعلك من كلمة برشم دي طبعا الزول حتي كان ما عارف المعني بالضبط وقع الكلمه بقرب معناها وكلمة برشم دي بتديني احساس انها مصطلح قراشات حديد وتصليح عربات حاجه من النوع دا . والرشم هو الوشم الفي الخد ولا مو كدي؟؟؟؟
اها شوفوا كلماتي دي والله مااظن وردت في امثلتك دي منها طرقع مطرقع , قرطع ,كرع اظن معانيها واضحه للجميع ,قرد ولا تعني انه مصاب بالقراد بل تقال لتوريق الخضار كالملوخيه والورق ,والسبروق لاحظت ان الوالد كان يستعملها يقول قردن الخدره دي والوالده من منطقه اخري تقول ورقن الخدره دي ويقول الوالد فسخن اللوبيا
to open the pods and collect the seeds.

فدر اي حركه حتي يهبط ويقال للعجين الفاير من شده التخمير او للروب الشديد الحموضه ويفدر باضافه لبن حليب . ودر اي اضاع
بدر اي جاء مبكرا

الاخ دوما ، سلام

اعتذر اولا عن التاخير فى الرد لك والانقطاع للسادة القراء وذلك لظروف خاصة
نرجع لموضوعنا الاساسى

راجعت بعض الكلمات التى زكرتها واليك تعريفها كما جاء بالقاموس

قُراد : دويبة تتعلق بالبعير ونحوه وهى كالقمل للانسان
قرطع : ضرب من سيل الابل
طرقع : الاناء ضربه فتناثر مايعلو من مادة (الطلس )
كرطع : جرى جريا خاصا يسمى الكرضعة
كرع : (فى الماء) مّد عنقه وتناول الماء بفيه من موضعه - كرع - شرب الماء بصوت يتردد فى الحلق

ارجو ان اكون قد افدت

ولنا عودة

تاتا : الطفل وتأتأ مشى
تاخ : طاخ يقولون ضربو تاخ وطاخ من طخّ شرس في معاملته
تار : من ثأر قتل القاتل
تامبيرة : ضرب من السمك صغير كقربة الماء يمتلئ ماء وهواء ويلعب به الصبية منشدين : التامبيرة بت عم الحوت/ لا بتحيا لا بتموت
تاية : حيث يضع المسافرون أو المزارعون امتعتهم واثقالهم يأوون إليه مدة اقامتهم للعمل
تبّ : نهض مسرعا – وتبّ نشأء
تُب : عليك – تبّا لك

تِبر : الذهب أو فتاته قبل ان يصاغا
تبروقة : حصير مستدير
تِبش : خيار أو فقوس
تبلدى : شجر ضخم ينمو بكثرة في الغرب تستعمل جذوعه لحفظ مياه المطر وثمره القنقليس
تح : كلمة صوتية تدل على وقع الضرب وغيره
تتاحت : تنازل وتراجع
التّخّة : البليد الفهم

تخم : ثقل عليه الاكل
تربّ : صوت النهوض والقيام
تربل : الشاب الحديث السن
ترع : (الطفل ) اذا خرج الماء من بطنه وهى منزلة دون القئ
تركش الشئ : ازاحة من موضعه إلى جانب
ترلّة : مقطورة (trailer)
تش : بالنار ، احرق بها ولعل اللفظة من الصوت الذى تحدثه النار عندما تلامس جسدا طريا
تعس المتعوس : التعس الشقى المنحوس

الاخ طارق
لك التحايا العواطر وانت تواصل في هذا العمل الجميل ..
انت ترب دي ياها فنترب(بضم الفاء والتاء) ولا واحدة غيرها لانو فنترب دي برضو بمعنى نط او نهض فجأة
مع الود
جــــــدو

الأخ طروقه


الســـــــــلام أولا


و الله يا خوي موضوعك شيق جدا و مفيد جدا


و بيني و بينك أنا مازول مناقشة و مشاركة إلا قليلا لكن في المتابعة شاطر شديد


الله إديك العافية

الاخ جدو التحية لك وانت تساهم معى فى نشر هذا القاموس والذى وجدت انه من الصعب الالتزام به ، وسوف اسعى جاهدا كلما سمح لى وقتى بذلك

اخى ABUHUSSEIN
السلام

المتابعة فى جد زاتا مشاركة وارجو ان تجد فى القاموس ما يفيدك

عذرا عن الوقفة


تِعِل : السحاب الثقيل
تفّ : بصق وهى تف وتفو كلمة تركية وفارسية بمعنى لعاب أو ريق
تُفُو : اى أف تعبير عن الاحتقار
تقليّة : ضرب من الملاح سمى كذلك لكثافته وثقله
تُلُّب : صوت القفز
تمبر : ملا حتى فاض الاناء

تنتن : زخرف في الاطراف
ِتنقة : كناية عن المرأة غير المتزنة
ِتيّاب : الذين تعاهدوا على عدم الهروب ساعة المعركة الثابتون
جرتق : عادة من عادات الزواج أو هى زينة للعريس أو ولد الطهور والفعل جرتق وهى من جرت – زينة تلبس عند الختان أو الزواج

تنتن : زخرف في الاطراف
ِتنقة : كناية عن المرأة غير المتزنة
ِتيّاب : الذين تعاهدوا على عدم الهروب ساعة المعركة الثابتون
جرتق : عادة من عادات الزواج أو هى زينة للعريس أو ولد الطهور والفعل جرتق وهى من جرت – زينة تلبس عند الختان أو الزواج

تنتن : زخرف في الاطراف
ِتنقة : كناية عن المرأة غير المتزنة
ِتيّاب : الذين تعاهدوا على عدم الهروب ساعة المعركة الثابتون
جرتق : عادة من عادات الزواج أو هى زينة للعريس أو ولد الطهور والفعل جرتق وهى من جرت – زينة تلبس عند الختان أو الزواج