زيارة للوطن الحبيب ...Pictures

ازيكم

سلامات

ان شاء الله طيبين

وكل الأعياد سعيدة, وبخيتة عليكم.

يابلد

كان .. قالوا ليك اوصف جمالك

تفتكر تقدر تقول كل الحقيقة

حمد الله على السلامه


فى انتظار الصور
التى اتمنى ان يكون للحجير منها نصيب الاسد

حمداً لله علي السلامة يا عمر
المنبر إفتقد إسهاماتك الرائعة
_____
ومبروك الحجة للوطن

وقولى كدى يالطيارة ..قومى وركى فى لندن

ومحجوب شريف ..جميل ومفرهد كالعادة

وياالمرض شوف ليك حتة امشى عليها ...معاهو شباب زى الضو

منعمشوف..وحافظ , ومجدى الجزولى

واستعداد ونشاط للمشاركة فى حفل تابين الراحل المقيم مجدى النور

وصلنامطار "الخرتوم" فجرا كان الوقت

مدخلين للجوازات

ياللمفارقة

لا احد فى فى صف المواطنين...جميعنا أجانب !! تمانيه وعشرين نسمة مابين قتيل وجريح سابق من أكلى الويكة وبيننا اطفال جميعنا اجانب !؟

اجانب يا اولاد الكلب ؟

ودخلنا البلد

سلمنا على النيل , وعين الشمس وهى طالعة واستقبلتنا الوجوه الحبيبه

وسلام ياوطن

Quote: سلمنا على النيل , وعين الشمس وهى طالعة واستقبلتنا الوجوه الحبيبه وسلام ياوطن

الأخ - عمر إدريس تحياتي ليكم وللنيل وعين شمش الله وكتين تكون قوية في البرد
ده ..وللوجوه الحبيبة وللوطن .. كل عام وأنتم بألف خير ..

قلت لي .. محجوب شريف .. تمام .. يعني حانشوفو قريبا يقدل في السوق الكبير
إن شاء الله ..

أبوي بشير وصاني قبال ما يموت
لا تمدح الحكام مصيرم تنحرف بيهم
غشاوات البيوت
والمنافقين حولهم
ياكلو راسن بالكلام الهبهاني
مقطع من قصيدة د. مبارك بشير للشاعر محجوب شريف

تحياتي

فى اليوم التانى من وصولنا
ونحن ملمومين ومعيدين كبار وصغار ماشاء الله فى بيت شقيقى الاكبر عبد المحسن ادريس ..جانا مس كول
من السلمة جنوب الحزام الاخضر ..واه ياسلمة
راكوبة فاطنة ادريس حرقت
حرقت ؟
عدمت دى
شنو الحكايى
دورو بابور الكهرباء واظنو فى سلك عريان ...وولعت
الجاتك فى مالك سامحتك
الحطيبات..والقنايات..وشوالات الفحم القديمة والعويش
مال ؟
يمين الله عين
قالت بت عمنا
ولما وصلنا هناك اتفق الجميع انها عين ووقعت فوق الراكوبة
عين ..عين
الله غالب

ساعود للسلمة لاحقا

Quote: راكوبة فاطنة ادريس حرقت حرقت ؟

الخال عمر الشايقي

حمد الله على سلامة البلد الشافتك

كفارة لي خالتي ( فاطمة)

ولا ماياها ( فاطمة ) صاحبة أمي

بجيك راجع


كمال ودبدرية

فى اليوم التالت
ياعزيزى اوسلى
الصباح بدرى والبرد شديد مشيت السوق الشعبى ام درمان متوجه على "الحجير" بصحبة شقيقى العزيز
محمود ادريس

ونحن راجين الحافلةضربنا الشاى ابو لبن عند ست شاى تقطع نفس خيل القصائد..او كما قال لسان حال كمسارى قديم كان ينتظر الرزق .. المهم ركزنا على الشاى

والشاى ابو لبن يابنيتى اريتو حالى
ان ختانى ان شاء الله اريتو مايختا جارى

*
ياريت لو عندى الحق ياست الشاى
كنت انشر صورتك

تمهلت قليلا وانا اركب الحافلة, اذهب الى "الحجير" هذه المرة وفى القلب نقطة دم سوداء
على فراق اخى وابن عمتى الصديق عبد الحى الفنجرى.. له الرحمة والمغفرة
قلت يمكن تروح, تتلاشى لما اشيل الفاتحة على روحة الطاهرة امام قبرة,واقابل الأهل..بس أه ثم أه
الله حى
فى نفس المكان الماشى عليهو استقلبنى السنة قبل الفاتت البسمة تضوى, وبكينا من الاشواق
والأن..يا ألهى
فتنا امبدة "ياياسيكو" ومسكنا درب الشمال ثعبان ازرق فى نص الصحراء كما قال احدهم.. صديق احمد يصدح يازمان بالله اشهد-يازامووون- وانافى ومانى فى.. رايح فعلا ومحزون . انقذنى من نفسى زميل دراسةقديم ومعه الاسرة, تقول سيرتة وسط الاحباب انه كوز من النوع ابو كديس, مدرس ابتدائى وامير الجماعة بالمنطقة..بدا لى فقير ومنهك ومشلهت ...
حق الله بق الله
والله زمن يازول
وين ليلى علواك ياصاحب ؟ وين العمارات يامسكين
اى دا كلام معارضة ساكت
تعرض عريان ..والناس ديل دمهم مشى وين؟ كدى عاين لعيونهم ؟
هم ديل ناس ..عليك الله دا شعب دا
لاحولا انتو لسة فى الكلام الممجوج دا مالو يااخى دا شعب عظيم وكادح؟
شعب شنو.. ماهو عارف داير شنو..وحد من تسوى يقولوا لك كعب
انت السلطك عليهو شنو؟ من وين جبت حق تحكموا بالسلاح ؟
نحن جبنا الشريعة
ان شاء الله ياعباس انت وشريعتك تغطسوا بكرة فى البحر..جماعتك لصوص وحرامية وكضابين؟
والله ان كان مو نحن البلد دى كان راحت فى ستين داهيه
اكتر من كدا ؟
أىىى
يلوى نخرتك يااخى ؟
وزهجنى الكوز ..رفع بنكرياسى
ووصلنا بطون تنقاسى

ياسلالالالالام

ياتنقاسى

رغم كل شى شوفتك ترد الروح ,ريحتك, منظر تمرك, وناسك وجروفك

تنقاسى من الجهه الغربية من النيل .. هدية ليك ياعزيزى الجميل محمد عبد الجليل ...وشكرا لو يتكفى سوها دوبيت

دى ليك وللاسرة ياعزيزى ياسيكو مع الشكر الجزيل.. تذكر فى نفس الحتة شربنا القهوه قبل سنتين؟

اما انت يابتاع "اوسلى" عزيزى كمال ..لك البنطون فى النيل عله يشفى القليل مع التحايا والتقدير

وكيف ياعمر ادريس.تجي من بلدك البعيد ماشي تنقاسي..تمر بلندن وماتقول عوووك نقابلك
في لندن?

بركة زيارتك للسودان وشوفتك للأهل.. والله يعوض خيتك فاطمة ويعوض السودانيين كلهم..



مني

عمر أزيك يا قريبي

وانا اقول الزول دهـ غطس وين ،، اتاريك كاتل العيد هناك في الحجير مع الناس الطيبين صديق الدون وحمزة ميرغني ناس امي وابوي وعبد المجيد وعوض طمبل ، ناس النور ودبتول

على قولة زيدان ابراهيم

ياخاااااائن

حمدا لله ألف على السلامة ،، وانا ماعايز نضم معاك غير تجيب صور الحجير شخصيا وياريت كلي قيلي.

تحياتي

وانشاء الله يا عمر تكون شربت شاى عند ست الشاى الفوق المشرع من الشرق وانت ماشى وتمشى شوى بعدينزلك البنطون تدخل على الكرو وكمان الحافله تتهادى بيك الى الزومه وكان مشيت بالدرب التحت تلاقيك دكاكين وورشه مقابله البحر وكان دخلت بنص الزومه تمشى من تل الى تل ومن خور الى خور وتخرج بعد ذلك الى مقاشى ثم كبرى المحفور وبعد ذلك حلة البخيت وانت داخل على المقل تمر بالمصطفاب والهادياب والسكينجاب وكان جيت بالدرب التحت عينك للمدرسه الاتكسرت والشفخانه الضاعت ونقطة البوليس وتشوف من هناك النادى ولو نزلت فى الحجير تمشى لى دكان خالد تشرب من عنده حاجه بارده اذا بابوره مدور ، وناس الحجير يكونوا حكوا ليك قصة الحاج عطا المنان معاهم شال عمدان الكهرباء ووصل لاهله وفطاهم ، فطى المقل والحجير والاراك ووصل الكهرباء لاهله واهل على عثمان ولو مشيت الكرفاب ، كنت شفت بيت على عثمان المبنى جديد واضح ومميز بالنسبه لبقية البيوت ، انشاء الله تكون اتدليت لا تحت ومشيت بدرب الترك ، وكان مريت كمان لا عند موره كان شفت التهميش الجد بلده كامله مهجوره وبيوت من الطين خاويه وبائسه .. غايتو خليها على الله

المهم اكيد حا تكون استمتعت بالبلد وده المهم

اذيك يا فجراوي
وحمدلالك بالسلامة
في ونسة مع صديقي معاوية كرفس أخبرني بوصولك للسودان ولاذال البحث جارياً علي قدم وساق
عن تلفون يلمنا بيك عموما ده تلفوني 0915399515 وياريتك ترن ياريت .

شروووم

ليك وحشة وحياتك ماذا عن اسامة معاوية الطيب ؟ وكل الطيبين افتقدهم جداً


خضر

وصلتى الحجير ... اتفتح البكاء من جديد
جو حزين
ما قدرت اصور, او اتونس وغلبتنى القعدة
ومشيت حزنان اكتر مما جيت ....
فى ضلام دامس ووجع روح خرافى ركبت الحافلة من جديد,صاد على الخرطوم. جارى فى المقعد كان الاخ الاكبر الاستاذ عوض المقيم فى السعودية منذ زمن طويل,كنت على علم انه يجتهد فى اخراج كتاب عن الشايقيه وكانت فرصة لاتعوض .. قلت اشوف الموضوع ماشى كيف. حكى بتفصيل عن نظرتة وحيثياتة, واستعدادتة لمعالجة سؤوال الهوية المعقد, وقد ادهشنى انه يعرف بدقه متناهية تاريخ المنطقة, ويتابع بحرص الباحث نسب العوائل وارتباطاتها الاسرية,ولكن بدا لى اثناء الحوار انه مهتم اكثر بالتركيز على نقاء الشايقية العرقى ودمهم العربى اكثر من اهتمامة بالحقيقة الموضوعية التى تعبر عن نفسها بوضوح فى اشكال الناس واختلافاتهم البينه وقد قالها اكثر من مرة
ثم ازعجنى فعلا كقارئ متابع انه يتناول التاريخ من فترة قريبة جدا حتى لا يدخل فى متاهة يتفاداها الجميع
واختلفنا....
كانت الحافلة قد وصلت ميناء تنقاسى الدولى -دى عشانك يامنى خوجلى- مع شروق الشمس وكان علينا ان ننتطر دورنا لنعدى النيل بالبنطون ..شربنا الشاى بالنعناع ,واتقهوجنا وواصلنا حوارنا
قال الاستاذ عوض ان كتابة ومساهمات اخوة واخوات اخرين اصبحت ضرورة فى ظل الهجمة الحالية على قبيلة الشايقية, لتوضيح اصلنا وفصلنا واسكات الاقلام الحاقدة كما قال بالنص
قلت له اها يا"ابو قصى" وأخرين -لهم التحية- ياعزيزى الشايقية حضارة وتاريخ وثقافة..الشايقية ماجنس و لاقبيلة من قريش , واهم مايميز هذه الحضارة والتاريخ والثقافة حسب معرفتى المتواضعة اختلاط اجناس مختلفة نوبة وعرب وزنوج واسهاماتهم المتنوعة الغنيه فى الحفاظ على استمرار حضارة الشايقية وثقافتهم
قال الاستاذ عوض انت بتتكلم عن شنو زنوج دى مافى
يازول استغفر واشتبكنافى غلاط ما انزل الله به من سلطان
قلت له المنهج الملولو دايما مايدخل الناس فى حيص وبيص ..قبل تمانيه اجيال تقريبا كانت هناك اسماء مثل الصبر,وتام زين واقوام افريقية متعددة ككيان اصيل من تاريخ هذه المنطقة صحيح فى البداية كانوا كيان خاص ولكن مع الزمن واستمرار حياتهم فى المنطقة تزاوجوا وولودا وانصهروا مع الاخرين وين بطانهم ؟ مشوا وين ؟ مؤكد ما شالتهم الحدية, انا ازعم انهم جزء منى ومنك ومن كل الناس ديل ,كدى شوف اللوان دى لماذا نحن مختلفين الى هذا الحد... يااستاذ التاريخ لايكتب بالمزاج وحسب الرغبة
ثار الاستاذ عوض وبحق كان غاضبا جداوهو يرد على نقاطى اعلاة لكنه للانصاف لم يتعدى حدود اللياقة فى الحديث قال ...الحقيقة ان الشايقية لم يختلطوا باى جنس اخر وحافظوا على انسابهم وعييييييك
فى هذه اللحظة اكتشفنا ان حافلتنا عدت بى غادى ليها زمن, وفيها عفشنا,وقراصة التمر فطورنا..والبنطون بالغرب فى الجهة التانيه .. وياسلام سلم
اتفقنا بسرعة على ايجار رفاص للحاق بهم, وفعلا كان صاحب الرفاص رجل كريم اسعفنا بسرعة ولم نسلم من غضب الركاب
واوقفنا الحديث فى مكانة على ان نتراسل لاحقا
ووصلت الخرتوم.

بخخخخختك ياعمر ادريس وصلت الشمالية..

عاين حـديث ود الزين ده كيفنو...تقول بس جاي يكاويني!

Quote: وانشاء الله يا عمر تكون شربت شاى عند ست الشاى الفوق المشرع من الشرق وانت ماشى وتمشى شوى بعدينزلك البنطون تدخل على الكرو وكمان الحافله تتهادى بيك الى الزومه وكان مشيت بالدرب التحت تلاقيك دكاكين وورشه مقابله البحر وكان دخلت بنص الزومه تمشى من تل الى تل ومن خور الى خور وتخرج بعد ذلك الى مقاشى ثم كبرى المحفور وبعد ذلك حلة البخيت وانت داخل على المقل تمر بالمصطفاب والهادياب والسكينجاب وكان جيت بالدرب التحت عينك للمدرسه الاتكسرت والشفخانه الضاعت ونقطة البوليس وتشوف من هناك النادى ولو نزلت فى الحجير تمشى لى دكان خالد تشرب من عنده حاجه بارده اذا بابوره مدور ، وناس الحجير يكونوا حكوا ليك قصة الحاج عطا المنان معاهم شال عمدان الكهرباء ووصل لاهله وفطاهم ، فطى المقل والحجير والاراك ووصل الكهرباء لاهله واهل على عثمان ولو مشيت الكرفاب ، كنت شفت بيت على عثمان المبنى جديد واضح ومميز بالنسبه لبقية البيوت ، انشاء الله تكون اتدليت لا تحت ومشيت بدرب الترك ، وكان مريت كمان لا عند موره كان شفت التهميش الجد بلده كامله مهجوره وبيوت من الطين خاويه وبائسه .. غايتو خليها على الله المهم اكيد حا تكون استمتعت بالبلد وده المهم

Quote: ومبروك الحجة للوطن

شكرا ياعزيزى الجميل الراقى

ياسر طيفور

ياريت ياحبيب لو كانت حجة ومعاها زوغة

مره واحده تنضم للناس الشايله الهم

ويامتعتها

بدون رصيد لا فى البنك ولا التلفون

الله يعلم بلد مابتنفات

ودى وكل التحايا

وفى الخرطوم راسا الى المركز العام للحزب الشيوعى السودانى ناحية الخرطوم اتنين
ياسـلام
ياطفلتى القالوه لى عينيكى ما بتوصفى
ياريتنى ما اتوصى فيك
النخلة فوق النيل تلاوى
وتنكفى
الشعب فى
والحزب فى

Quote: تمهلت قليلا وانا اركب الحافلة, اذهب الى "الحجير" هذه المرة وفى القلب نقطة دم سوداء على فراق اخى وابن عمتى الصديق عبد الحى الفنجرى.. له الرحمة والمغفرة قلت يمكن تروح, تتلاشى لما اشيل الفاتحة على روحة الطاهرة امام قبرة,واقابل الأهل..بس أه ثم أه الله حى فى نفس المكان الماشى عليهو استقلبنى السنة قبل الفاتت البسمة تضوى, وبكينا من الاشواق والأن..يا ألهىفتنا امبدة "ياياسيكو" ومسكنا درب الشمال ثعبان ازرق فى نص الصحراء كما قال احدهم.. صديق احمد يصدح يازمان بالله اشهد-يازامووون- وانافى ومانى فى.. رايح فعلا ومحزون

Quote: وصلتى الحجير ... اتفتح البكاء من جديد جو حزين ما قدرت اصور, او اتونس وغلبتنى القعدة ومشيت حزنان اكتر مما جيت ....

عزيزي عمر
حمد لله على السلامة
من شفت البوست دا أمس أنا كنت خايف اقرأ الكلام أعلاه
لا حول ولا قوة إلا بالله
أذكر تلك اللحظات وهي كل ما بقى لي من ذاك الإنسان
له الرحمة
البكان نفس البكان الشربنا فيهو القهوة المرة الفاتت
لكن شنو الخيانة المرة دي كما قال لك شروم
تحياتي للأسرة

وفى المركز العام

سلاااااااااااااااااام يا عمر إدريس وليك وحشه والله ..... بختك يا رفيق الدرب الطويل

Quote: قلت له اها يا"ابو قصى" وأخرين -لهم التحية- ياعزيزى الشايقية حضارة وتاريخ وثقافة..الشايقية ماجنس و لاقبيلة من قريش , واهم مايميز هذه الحضارة والتاريخ والثقافة حسب معرفتى المتواضعة اختلاط اجناس مختلفة نوبة وعرب وزنوج واسهاماتهم المتنوعة الغنيه فى الحفاظ على استمرار حضارة الشايقية وثقافتهم

والله يا عمر الكلام التحته خط دا ضحكني ضحك ، قاعد براي في المكتب زي المجنون وأقرقر ، بس تصدق أنا متفق معاك في كل الكلام القلته عن الشايقية دا وأضيف ليك بالمناسبة أنا مقتنع بنسبة كبيرة جدا بأن الشايقية آخر القبائل النوبية التي استعربت والدليل على ذلك علاقات الزراعة وأدواتها وكان لميت في عوض بقول ليهو الكلام دا عشان يمشي يبحث عنه .

لكن يا أخي نطيت القرير ليه ، تنقاسي دي وصلتها كيف من أم درمان أم أن الحافلة مرت بالظلط على طول بي فوق ولم تدخل سوق القرير ..

فاطمة إدريس الله يعوضها وأخوك وصاحبك الله يرحمه ويغفر له ويجعل البركة فيكم ..

وبختك يا صاحبي وتحياتي لمنى عبيد والعيال

أبو قصي

السوداني الاصيل عمر ادريس
افتقدناك كثيرا.
حمد على سلامتك وان شاء الله لقيت اهلك بخير.
امتعتنا بوصف الرحله واصل متابعين معاك.
تراجي.

الزول الجميل ود إدريس

كيفك يازول بركة بشوفت البلد والاهل
على الجميع بخير وصحة الهنا( أمبده)
والهناك ( البلد )
نتمنى ان تكون استمتعت بالبلد والضان
الاصلي لكن العيد ما عندك عديل كده

تحية للاسرة الكريمة

النبي فوقك يا عمر وانت ماشي على الحجير
ما مريت من البركل وشبا
ما مريت من دكان ود تميم وقلتلي ولدكم في بلد الترك
الغربي كاتلاهو

الأخ النبيل عمر
حمد الله علي السلامة وآن شاء الله جبت لينا معاك بلح وجرم وشوية سمن بلدي

طارق ود جبرين

ماني شايقي ولاني عنصري.. لكن الشايقية ديل أصحابي من بدري.. وبعرف فيهم ناسا عزاز...
دحين بدور أسعلك ..ود تميم صاحب الدكان ده جد ناس سعد وعبد الهادي وعبد القادر محمدعمر تميم..
لأنو الجماعة ديل ناس طيبين خلاس.. طيبة الشايقية الراضعة من ندى الجروف.. وكمان شبا الذكرتها هي موطن أحد أصدقاء العمر (عبدالعظيم) أبودية.. وهو خال أولاد تميم.. ولا شنو؟
حصل لينا الشرف أن أضفنا شايقي آخر لذخيرة معارفي العرقية..
وسلامتكم

Salam Omar
welcome back "home" ...down down barkal
you had a great time there
some one here said:when you go to Sudan you always have great time
as long as you know that you are going to leave it soon

thanks for the nice photo our nice and lovely "Haj" Tijani

waiting for more pics and writings
salam

سلام
ياكمال على الزين
كيف ياولدى الحبيب وتشكر كتير

فى الثورة ال 11 جات سيرتك الشباب متابعين كتاباتك وفخورين بيك
شد حيلك
نعم خالتك "فاطنة" راكوبتها إتلحست ولا عزاء للعمارات

تحياتى للوالدة والجميع

وفى المركز العام قابلت لاول مرة الزول الذوق العزيز ابو ساندرا
جميل وبشوش .. ولما يسخن يديك احساس انو الثورة
حاتقوم بعد شوية...والدكتورة امال جبر الله بعد زمن طويل, والريس د. عبيد الحسين ..وياسلام

حمداً لله علي السلامة يا عمر
المنبر إفتقد إسهاماتك الرائعة

i really missed you very much

welcome back

dr mustafa amhmoud

حمداً لله علي السلامة يا عمر
المنبر إفتقد إسهاماتك الرائعة

i really missed you very much

welcome back

dr mustafa amhmoud

والى كوستى المدينة التى احببت .. الحال افضل شوية , الناس اناناس كالعادة ,مظلومين ظلم الحسن والحسين اى نعم, لكنهم بتحدى واقفين ألف احمر ..شى جبايات , وشى باعوض , والغلاء الفاحش جدا سيد الموقف ..أجمل تلاتة ايام مرت ليلة ليلة يا دكتور خالد وشكرا على الحوت البولطى الفاخر .. احلى مافى فى الموضوع التقينا تلاتة "عدلاء" فى وقت واحد وبعد الكرم الفياض والاهتمام البالغ من نسابتنا قررنا تكوين لجنة ضدهم سميناها -رد المظالم والبحث عن الحرية- وشرقنا من الضحك والونسة ...شكرا يا امال ومنال والحجاج شكرا لخط السكة حديد والنقل النهرى شكرا للاسواق .....

الحلة الجديدة كوستى ...شارع بيتكم ياكوستاوى

وبيوت الطين ..ياكوستى

العزيز عمر ادريس

انشا لقيت الاهل طيبين.

حمدا لله على سلامة العودة.

شكرا جزيلا العزيزة

منى خوجلى

معزرة جيت لندن مستعجل والاجازة قصيرة جدا

وتريمة ملاح سبروق بى قراصة راجانى قدام خفتها تبرد


لك الود والتحايا

وسلامى للعروسة وزوجهاوالجميع

كنت بتمنى أشوفك تاني يا عمر ،
لكن تقول شنو في الحظ العجيب ده ؟

ما تتخيل فرحت بي شوفتك قدر شنو ..
زي ما إتلاقينا مره ، فأنا كلي عشم
ألقاك تاني وتالت ..

الزول السمح عمر ادريس

وحاسدك وحاسدك وحاسدك وحاسدك وحاسدك وحاسدك كان ليل كان دغش
والحسد شيمة زول مغنجر بعيد وما في زولا بفشو فش!!
احسد الناس في عفطة في جو البلد وهو المسيكين سادر طفش!
وبحسد القال ماشي البلد و الليلة قام ستف عفش
حظك يا عمر جايينا مليان محنة وتريان ولونك رقش
وحاسدك وحاسدك وحاسدك كان ليل كان دغش!!

حمد لله علي السلامة

حمد لله على السلامه ياعمر ...والعقاب ان شاء الله طيبين..

افتقدنا كتاباتك وطلتك الجميلة ...

الف مرحب والمنبر نور ..

شرووم

الزول الزين

كيفك ياحبيب

زى ماقلت لك المشية المرة دى للحجير ما كانت معدله...لكن يازول الناس طيبين, وقعر التمر يحرس ويرجى
من الاخبار
خت الاسماء من عندك...اخدلو نعجى منها بالشى الفلانى, قالتو الشى دى حامل..بعد يومين اكتشف العكس وجاها راجع والقيامى دى قامت ..
صديق ود الدون شايل حسى قال عمر دا يناهد لامن يصل الحجير يجى يصور الحمير ويمشى ..شفت الزول الجبان دا عليك الله هو شخصياانا عامل ليهو فلم فيديو..والبوم كامل من الصور

وياشروم
الدوام لله
توفى يوم سفرى "سيف الدين احمد سكوتى" بمرض الكلى اللعين
ربنا يرحمه ويعوض شبابة الجنة


تحياتى

ياسلام

ياود الزين

والله العظيم دا كلو شفتو ثانية بثانية كانك كنت معاى ...وشاى المشرع شربتو بي تفلو ذاتو, وقعدت فوق العنقريب ابو كرابا مرخى, وصلينا فى البرش القديم.فى جيتنا الحاجة ست البكان كانت غايبه وماسك المحل شايقى مسيخ اظنو زوجها...قلتلو وين الحاجه الظريفه دى الليله.. قال لى اى سب فوقها "الكبى" دى ساعل منها لشنو؟
على عثمان وعطا المنان الناس يدعوا فيهم وده براهو كفايه عليهم

لك الود

حمد الله على السلامه

حمد لله علي السلامة يا عمر

مشيت البلد كمان
وعرجت لحدي الحلة الجديدة?


دي الإجازة الصاح
وحاسدنكككك عديل كده
حمداً لله علي

ازيك ياعمر ياحبيب

Quote: زى ماقلت لك المشية المرة دى للحجير ما كانت معدله...لكن يازول الناس طيبين, وقعر التمر يحرس ويرجى من الاخبار خت الاسماء من عندك...اخدلو نعجى منها بالشى الفلانى, قالتو الشى دى حامل..بعد يومين اكتشف العكس وجاها راجع والقيامى دى قامت .. صديق ود الدون شايل حسى قال عمر دا يناهد لامن يصل الحجير يجى يصور الحمير ويمشى ..شفت الزول الجبان دا عليك الله هو شخصياانا عامل ليهو فلم فيديو..والبوم كامل من الصور

قعر التمر سيطول انتظارهـ في انتظار جقمة الموية وحبة التيراب لكن متى يعود الغائبون وحتى متى سيظل قعر التمر يحرس ويرجى؟؟
ضحكتني (ومن زمن ماضحكت زي دا) بي صديق الدون وتعليقه ورغم الزمن لازال صديق يرسم الضحكة على شفاهـ الحجارة .

رحم الله الفقيد سيف الدين رحمة واسعة وألهمكم وآله وذويه الصبر وحسن العزاء وأدخل الفقيد جناته مع الشهداء والصديقين وحسن اولئك رفيقا.
عرفنا طبعا بوفاة الفقيد سيف الدين بسبب الفشل الكلوي وربنا يعوضه الجنه عن شبابه واصله يا عمر يا اخوي الموت بقى ماسك في الشباب في الفترة الاخيرة دي.
رحمه الله.

تحياتي

ومن كوستى الى خشم القربة.. ياه ياشرق اه ياوطن, حد من تقبل.. زولك فقير تعبان تعب ...

والناس تلاطع فى المؤتمر الوطنى(اللصوص) حضرنا ندوة سياسية كاربة لجبهة الشرق فى القربة.ميدان محلية "سيتيت" ملان عن بكرة ابية..الناس عرضوا بالسيوف , وغنوا, وتحدث المتحدثون ومن الضمن خاطب الندوة من اسمرا رئيس جبهة الشرق قالوا عن اتفاقية سلام الشرق انها تمام لو نفذت, واعلن الجميع تخوفهم من ثعلبية جماعة المؤتمر الوطنى ونقضهم للعهود..و و و الخ

this is for you
my dear friend

أحمد مطر >> الممكن والمستحيل

الممكن والمستحيل

لو سقط الثقب من الإبرة!

لو هوت الحفرة في حفرة!

لو سكِرت قنينة خـمره!

لو مات الضِّحك من الحسرة!

لو قص الغيم أظافره

لو أنجبت النسمة صخرة!

فسأؤمن في صحة هذا

وأُقِرُّ وأبصِم بالعشرة.

لكنْ.. لن أؤمن بالمرة

أن بأوطاني أوطانا

وأن بحاكمها أملاً

أن يصبح، يوماً، إنسانا

أو أن بها أدنى فرق

ما بين الكلمة والعورة

أو أن الشعب بها حر

أو أن الحرية.. حرة !
i hope you like it
as you just visited the sudan

dr mustafa mahmoud

وفى الخاص ... رافقنا هذا "الفقيد" فى رحلة اسرية فى حدائق الرميلة على ضفاف نهر عطبرة جوار خزان خشم القربة ..ياحليلك ياجميل

قاتل الله مستر بوش واخرين ....اسع دا جمال بنفات كان ماساكت !

دره الحنينه بت محمود اخوى -اسمها دار النعيم على اسم امنا- ...مافارقتنى دقيقة طيلة ايام وجودى فى القربة اكلتنى بى ايدها الصغيره, نامت معاى ..قشت دموعى...ماتدحك تانى عسان ماتبكى .. واه يابتى

دره ..العسل

العزيز
خضر حسين خضر
لك الود ياحبيب
فى موقف مواصلات مدنى وانا ماشى على القربة سالت واحد كموسنجى شاب ..ياخى اعمل شنو عندى تذكرة لكسلا وقالوا الباص فات ..قال لى تاكل "قشك" ياحاج, وضحكت كما لم اضحك من قبل, وشعرت فعلا انى حمار ..قلت اشوفكم واعرف منكم النيم مشى وين؟ والحاصل شنو بالضبط,وطينك وصل وين..بس الزمن عاندنى واغلب البرامج طرشقت
معزرة ياصاحب والجايات كتار
تقول لى كرفس ..مفصول للصالح العام الى حين إخطار أخر
التحايا بلا حدود

العزيز
ابوقصى
كيفك ياصديق
فى امبدة مريت على "الكتريقه" بتاعت ديك ..تذكر ؟واشتهيت الموز والبرتكان, وضبتك فى الذاكره تلقط السمح سمح تودى السوق والباقى تتفضبلو علينا.. قلت للاب المعلم العظيم على عبد الحميد "موحمد" بقى مابيختا,وقرب يبقى قومى شايقى ..قال لى اصلو الشوقياديل لخبطوا الدنيادى كلو كلو.. والهويات الصغيرة دى مابتبقى موضوع إلا فى زمن الازمات الشديده والوكس وقال لى ناس القرير ديل بالذات عندهم اعتداد قديم بالانتماء ,ويمكن الحكاية دى عندها علاقة بالحروب القديمة, والصراعات القبيلة فى منطقة الشايقية ..غايتو جاى جاى طرطش على الموضوع ومرقك براءه

سلامى للشباب وامهم

شكرا جزيلا العزيزة
تراجى
اول حاجة بركة بالعودة مجددا...سافرت خليتك معتقلة .. وطبعا تابعت إسرائيلياتك من بعيد
كدى لغاية مانتوهط شوية ونشوف الحكاية شنو..ونقول ليك
لك الود والتحايا وسلامى للعيال

يازمن وقف شويه ,واهدى لى لحظات هنية ! وبعدها...رجعنا من الرحلة عصرا متأخر ..واستعداد من جديد للمغادره

لكن ياياسيكو القصيدة ماموت احمر يااخى


لك الغمام لك السلام

الشيخ ابراهيم الشيخ
ياشيخ ياجميل
ومن القربة الى ميدان الرخا بمدينة امبدة العريقة..مهرجان رياضى ضخم ومباراة نهائية بين فريق الحارة 18 ,وفريق النيل فى نهائى دورة تخليد ذكرى مراحيم امبدة ..ومن الضمن تكريم بعض الشخصيات كنت من بينهم .....تكرمونا فى شنو يا الزينين نحن وقت ضاقت عليكم, والدنيا ادتكم قفاها فتنا خليناكم .. بالجد فاتتك ربة لاتتكرر بالساهل ياحبيب ...جات سيرتك ولاقيت كل الدنصورات عدلان,عمر مالك,وعوض الكريم, وفيصل شبو وعييييك, وكمان شباب زى الورد واجمل .. كانت لحظات ماتتخيل كيف كانت ..وهاك الصور علها تفى ....

وهنا....الشيخ عوض الكريم

وبين الشوطين .... حاجة عجيبة .. اها اتملى اشواق ..براك جبت سيرة البحر

Quote: ياعزيزى الشايقية حضارة وتاريخ وثقافة..الشايقية ماجنس و لاقبيلة من قريش , واهم مايميز هذه الحضارة والتاريخ والثقافة حسب معرفتى المتواضعة اختلاط اجناس مختلفة نوبة وعرب وزنوج واسهاماتهم المتنوعة الغنيه فى الحفاظ على استمرار حضارة الشايقية وثقافتهم

يا سلاااام يا عمر على الفهم المتقدم

العم على عبد الحميد
اخبارو شنو

الاستاذ عمر مالك .. واهتمام شديد

الاخ عمر ادريس حمدللة علي السلامة يبدوا انها اجازة ممتعة بس انشاء اللة الملاريا ربنا سترك منها
سلام ابو زاهر

وفاز فريق نجوم الحارة 18 امبدة بكاس المهرجان بهدفين مقابل واحد ..ولولا اللون الازرق الذى يرتدون لصفقت لهم .. بالجد لعبوا كورة سمحة وتفوقوا على النيل باللعب الجماعى

Quote: رحم الله الفقيد سيف الدين رحمة واسعة وألهمكم وآله وذويه الصبر وحسن العزاء وأدخل الفقيد جناته مع الشهداء والصديقين وحسن اولئك رفيقا.

Quote: فى موقف مواصلات مدنى وانا ماشى على القربة سالت واحد كموسنجى شاب ..ياخى اعمل شنو عندى تذكرة لكسلا وقالوا الباص فات ..قال لى Quote: تاكل "قشك" ياحاج , وضحكت كما لم اضحك من قبل, Quote: وشعرت فعلا انى حمار

الراجل دا بليييييييييييييييييييغ والله
هو طبعاً كان قاصد التاني الانت قلتها دي بدل يا"حاج"لكن اختشى وخاف من أن
يُوصف بالارهاب ، ماك أمريكي وايدك لاحقي واللعوج تسوي عديل
لكن بالغ الزول دا
قالو لا يلدغ مسافر من حافلة مرتين
مرة في الكرو والتانية هنا
الحاصل شنو
لك الود

Quote: فى موقف مواصلات مدنى وانا ماشى على القربة سالت واحد كموسنجى شاب ..ياخى اعمل شنو عندى تذكرة لكسلا وقالوا الباص فات .. قال لى تاكل "قشك" ياحاج

العزيز
ود جبريل

ياحليل البركل وقطر كريمى ..يازول الشى بقت زلط تغمض تفتح تلقى رقبتك فى تنقاسى وشويتين الكرو
وعيك تخلى البركل ونورى والجماعة ديل كلهم وراك وعلى الحجير اصل الدنيا زى ماقال جدى الخدر

لك الود والتحايا
وكثير السلام

العزيز الراقى
الحجيرابى قريبى الجميل
د.صلاح موسى
ياخينا البلح والجرم وشوية السمن البلدي هينات .. عشان خاطرك وانت مطول من البلد كدى النحكيلك حكاية صديق ود الدون وخيالو العجيب ....
صديق ود الدون الشايفنوا دا كان مكاجرلو واحده من ناس الحجير ديل, ومن شدة مانى ومظلوم ..بوش خلى مشاغله كلها وقال لى جماعتو وقفوا القنابل دى انا ماشى الحجير انقذ صديق ود الدون واجيكم راجع .. وركبلو مركب كبيرى تطير فى السماء زى الجن , وحدث بتاع مصر قالوا ارجانى على القيفة الت اسوان..وقالوا حدث معاك البوم زولنا عشان يدلنا على درب الحجير-الله يسالنى يكون ماهو عارفوا وين , لكن بس نسوى شنو هواب ساكت ولازم نسوقه معانا-المهم الجماعه ركبوا مع بوش واحد باليمين والتانى بالشمال .. اسع عليك النبى الخواجه دا ماهو مسطول؟ .. مايجبلو ناس زى الناس ..سب فوقه . جماعتك راحوا فى الخلا دا زيين- وانا قاعد هينى راجيهم- لامن لاقاهم عريبى فى الخلا وصف لهم الحجير, اها بوش عفيت منه قال لهم اها اول شى نزلونا فى جبل "كلوقيلى" دا عندى امر هام, وجماعتك نزلوا..طبعا يقولهم شمال يمشوا شمال, يقولهم يمين يمشوا يمين امانى ماهم بطلا ..اهاقالهم ارفعولكم درابة كبيرى ختوها معانا فى المركب دى, ويلاكم على الشقية دى عشان نقطع دابرها..امانى ياصديق بعد دا مابترتاحلك راحة .. الكبى الليلنا اظنوا نام علا لكزوه ياخينا وين ساقة ود اريس ؟ قالهم على الطلاق مانى عارفها, لكن حرم كان تمشوا لا قدام ..ربك رب الخير شيخنا شايلو بطاريى وكان ماشى على الخلوه , والايام دى جابو بكى فى الصلاة ,اظنو كان مدمع وماشى لامن الجماعة شافوة ...اها بوش قالهم شوفوا لى المسنوحة دى وين, طبعابتاع مصر مابشوف من الكبر, وزولنا مابفهم ...لكن بوش شافها ليك زى السلام عليكم ..اها قالهم بشيش امشوا لاتحت .وزولتى ماها جايبى خبر, تحش فى القش من حيضانى .. اها رجوها لامن حشت تب ,وختت قشى الموخمج فوق راسها وجات طالعى لا فوق ,والقيامى من فوق ليها. بوش زى الصقر يدور فى الدركسون ومباريها لامن جات عند درب الترك ,وقال كدى شال الدرابه وهبدها بيها, وقال لى الجماعه انتهينا.. اظنو جدعهم بعد داك ,والا ان كان ساقهم معاهو دفرهم لا قدام مانى عارف , وقال كدى شمر وفوو طار على بنادقوا وشيتو , وبناتو السمحات ....وبعد دا واحلالك ياصديق ود الدون

واستغفرتك يامالك روحى

لك التحية

العزيز
عصام جبرالله

وينك ياحبيب ....انت اقعد لوص كدا لامن الكمونيه تكمل عليك ...دعوة خاصة من العزيزه ناهد جبر الله
على حلة كمونية تدى ربك العجب ..ختوها كيف كيف فى التربيزه العجيبه وقولى كدا ياسهى كشرى,ونادر قال I'm really sorry!وحتى صاحبى عمل فيها جاى من الرياض نقد شوية ووقف ..داقرتنى فيها ضيفة اسمها قمر عليك امان الله معاى الحجل بالرجل حتى قضينا على الامر ...وبعد ايام دعوة رسمية على العشاء حضرها اجمل الاصدقاء ..وفاتتك برضوا .
ياسلام شكرا ياعزيز وشكرا لهم جميعا ..وشكرا ياياسر شرفتنا رغم المشاغل وبرضك ياصاحب حكومة والناس مظلومة.

تحياتى

يا سلام ياعمر ياسلام
شفته الناس ديل كيف تعرف الجماعة ديل بكرمو الزول
من الشوق لانهم عمرهم ما حسبو أداهم شنو ولا عمل ليهم
شنو بحسبو فقط لمن كان وسطهم كان معاهم كيف وانت يكفيك
انك عمر ادريس

الله يسامحك يا عمر هيجت علينا الاشجان بس الله يجازي الكان السبب

بعدين ياخي صورك ده ما واضحة حاول ختها تاني بالذات عمر مالك

زمان كانو مرفعينين (ضبلان وهازل) بس الآن بقو ثلاثة بعد اضافة و(حرامي)
متعدد الصفات كالحرباء .... الله يكون في العون

تحياتي للاسرة الكريمة

الأخ عمر

سلامً من الله عليك

اولاً حمدالله على السلامة والشافك الليلة بالصور شاف البلد والله ياسلاااااام يا عمر وصلت بلدنا الحنينة وكمان بالصور ما عارف أقول ليك شنو يااخي العزيز لكن اول خليني أتغزل في الصورة أعلاه بالوصف واستحضر الجمال الذي أرضعتنا له هذه المدينة ،الصورة أعلاه مأخوذة من الجانب الجنوب الغربي لإستاد كوستي وخلفك مباشرة مطاعم السيرويز ويتوسطهم كل من افران اولاد المحسي وعمنا اللذيذ محمد الحسن مكاوي وأنت بتصور وعلى يمنيك موقف التاكسي الصغير والذي يعتني بزوار المطاعم والمغالق وفي ألأمام منهم محل البطاطير لجدنا ابراهيم حسن النور ،ياسلام ياعمر ،ونشوف القدامك في التصوير والكل متجه نحو الكوبري الصغير القابع أعلى الخور ويظهر ايضاً مصنع الأحذية(تموت تخلي) لعم جمعة وودأدم وما عارف الأن من الذي يحيك تلك الأحذية وما نعرفه أنعم محتلين هذه الكشافة الجنوبية الغربية وحائط الإستاد كان يعرف بسوق ابوزلعة بعد ترحيله من أرض أولاد عبد الكريم أحمد جوار كشك عمنا هجو القديم وهاشم العجلاتي ،ياسلام ياعمر ،وما زال تجار القش والبرسيم وقصب السكر بكامل مفروشاتهم وهو سوق يعرف بكل موسمي ينتج في تلك المنطقة ،ياسلام ياعمر ،وأنت تصور هنالك بعض المعالم الهامة على يسارك من الكاميرا ومنها لوكاندة المدينة لمحمدعمر الحلواني وبعض المحال التجارية ومنها قديماً محل السلاح لعمنا المرحوم مهدي حسن عمر والمحل الكبير قديماً في الناصية لاولاد المرحوم عبدالرحمن عبدالمجيد وفي مقابل الحائط الغربي للإستاد محل عمنا المهندس إسماعيل سيقان مرشح الحزب القومي السوداني ورجل تصليح الإكترونيات الأكثر شهرة في كوستي وتتلمذ على يديه الكثير من أصحاب المحلات اليوم وبجانبه أيضاً محلات وسوق الأسمنت القديم ويعتليهم عمنا الحبوب ،ياسلام ياعمر ...
أعرف أن الذاكرة ربما خانتني بعض الشيئ لكن هذه الصورة بالذات أثارت الكثير وجزيل شكري عليها وإنشاء الله تكون أنبسطت في بلدنا الجميلة ويكونوا زوروك رواكيب السمك وفول الزين وتبوري وأنشاءالله تكون حضرت حفلة وشوفت جميل كوستي اللذيذ ،ياسلام ياعمر..
كل شكري لهذه الصورة الجميلة ياجميل ولمن نشوف تعليق أخونا كوستاوي حول الصورة وما داير افسد عليهو بالوصف ...
خالص الود..

يا سلام يا عمر ادريس


انت دائمآ رائع

عزيزى الجميل د. مصطفى محمود
بين عربة طفيلى مكندشة تحمل شحم ولحم وعقل فارغ -اعرفه- ..وامراة من دمى ودمك تقتاق مما تبقى من روحهابغسل الملابس تذكرتك تماما..ورايتك تجلس على حافة النهر وبيدك مقطع درويش ...
ايها المارون بين الكلمات العابرة
منكم السيف - ومنا دمنا
منكم الفولاذ والنار- ومنا لحمنا
منكم دبابة اخرى- ومنا حجر
منكم قنبلة الغاز - ومنا المطر
وعلينا ما عليكم من سماء وهواء
فخذوا حصتكم من دمنا وانصرفوا
وادخلوا حفل عشاء راقص..و انصرفوا
وعلينا ،نحن، ان نحرس ورد الشهداء
و علينا ،نحن، ان نحيا كما نحن نشاء

لك حبى وسلامى وكثير الاشواق
وهذه اللقطه للذكرى

عمر ود ادريس ودار النعيم

يا لهذا الشجن، وسيل دموع لا تداريه الصنقيعة، فرحيل الفنجري، وتبعته الوالدة قسيمة الحاج، وسبقتهما الخالة علوية، بعد أن وسدوا الوطن بي ذاتو الباردة، وفي كل رحيل كان اليتم يتطاول، طابق فوق طابق، والمحنة سوانا ساس.

أبكتني حروفك، دمع، حرف، دمعة، كلمة، بكيت أطلال الذي كان، ولعلك سمعت وصية لي لم أصرح بها، وأي قانون صدفة هذا الذي يمدد اجازتك بين الحجير وام بدة وكوستي، وذادني مجاهد عبدالله، نحيبا، دروب ساسقنا فيها وحائط اعتليناه، لننعم بالحسنيين، فرجة على كورة وغبش يعتلون ظهر قطار يناهد أو لعله يشكو طول المشور والحمولة، وسمعت أنه أخيرا قد حرن، أو أسلم روحه لبارئها، بعد أن نحرته يد الخصخصة، أو في طريقه للنحر.

كما أحبك أيها ألجميل، وكم أحسدك، ونفسي في جلسة تلمني بيك وب ياسيكو، وأوبو عثمان.


هنيئا لك بدار عزة (عبلة)، فقد غادر متردمها كل عشاقها، من شعراء وتبعهم الغاوون (نحن).

فى امبدة دعانى الاعزاء اصدقاء الزمن الجميل اعضاء المنبر ود العجمى سيد الاسم,وعمر محجوب "اللورد" على وليمة فى سوق الناقة,ومن قال قندهار فقد كفر ..قررنا ان نلتقى عصرا ...وبما انى دايش كما قالوا فقد تولى اللورد الجميل عملية الوصف ويالة وصف هو لايرى جيدا, وانا لا اسمع جيدا فتخيل ..كان قبلها قد صادفتنا صلاة المغرب معا فى منزل فاطنة ادريس .. ولاسباب كثيرة مقنعة قدمنا ود العجمى ليكون الامام..ونحن بحالتى السمع والشوف اعلاة اصحبنا المصلين خلفة, وبعد الصلاة التفت الينا جادا ومستغربا
أنتو مابتقولوا ياميين مالكم ؟ ...وفقعناها ضحكة .
حضرت الى سوق الناقة متاخر اكثر من ساعة بسبب الاعطال الفنية التى واجهتنا انا واللورد فى التفاهم
يقول لى ياخى وانت ماشى فى كوم بتيخ كبير فى الدرب على ايدك الشمال...وانا اقول ليهو أ..أ ..أ ولما انجح فى سماعوا اقول ليهو انت كوم البتيخ دا شفتوا كيف ذاتك ؟ ونضحك ونبدا من جديد.. حسم الموضوع بكرى العجمى بالحضورالى المنطقة التى يتحدث عنها صديقى الاعمش ..وذهبنا الى المكان .
منى امراة جميلة تتولى ادارة الراكوبة وحركة اللحم, والبطيخ باقتدار وفن عظيمين
وليه اخترتوا الحتة دى بالذات
اللورد ..نحن زباين هنا
العجمى ..الهواء ياخواجه
وبعد شويتين صينيه كاربة من اللحم يتوسطها صحن ابن كلب من كبدة الابل النيه, والشطوط , والبصل
ياجماعه نحن سحاحير الشى دا كتير
هو فى زول جاب خبرى
ولخبتنا جد .. وتانى يوم كان الله فى العون
لكم الحب ياعزاز

Quote: فى امبدة دعانى الاعزاء اصدقاء الزمن الجميل اعضاء المنبر ود العجمى سيد الاسم,وعمر محجوب "اللورد" على وليمة فى سوق الناقة,ومن قال قندهار فقد كفر

يا سلام ياعمر ادريس اتمنيت لو كنت معاكم

Quote: ولاسباب كثيرة مقنعة قدمنا ود العجمى ليكون الامام..ونحن بحالتى السمع والشوف اعلاة اصحبنا المصلين خلفة, وبعد الصلاة التفت الينا جادا ومستغربا أنتو مابتقولوا ياميين مالكم ؟ ...وفقعناها ضحكة .

يعني كان صلى بيكم بقصيدة كان مشت... لكن في زول بباري عمر محجوب وكمان بالوصف بالغت
يا عمر زمان كنت اعقل من كده ياخي عمر محجوب ده على فكرة ( سمع وشوف ) يعني انت بالنسبة ليه
ماردونا عديل بسمعك ده .. البركة في ود العجمي الاصلي سيد الاسم اللماكم الاثنين بس قصة سيد الاسم ده بعدين ما تبررة لمن تزرة فيها انا بوصلها..

والله يا وريف دفقت شوقنا وجننتنا جن رسمي

بعدين فاطمة ده آخر عهدي بيهاكانت في قندهار الجابها سوق الناقة شنو ولا السمع

ياخي احكي واحكي للصباح انا ما قايم من البوست بتاعك ده ويا سلام لوكانت في جلسة
مع الصرب ( اولاد مالك) بس ما تحكيها بحزفيرها عشان البوست وما تخاف حنفهم كل حاجة

مودتي

المديره ....وادوات العمل

صديقى الجميل عمر محجوب "اللورد"

عمنا احمد ...رفيقنافى سوق الناقة...ضرب اللحم ضرب غرائب الابل. طلبنامنه صورة قال هييييييييع خلونى اللقش ايدى ديل, وفعلا فعل..مسح ايدية لاعند الكوع , وشنبو, واتلفت جاب العصاية وقال اها سوى يازول, الفارغة يملاها الله..يالك من رجل عظيم

dear Omar
this post is wonderful
believe me i read it so many times
but people like you has to produce gems
thank you
mustafa
this for both of us

أحمد مطر >> هذه الأرض لنا

هذه الأرض لنا

قـُوتُ عِيالنا هنا

يهدرهُ جلا لهُ الحمار

في صالة القمار

وكلُ حقهِ بهِ

أنّ بعيرَ جدهِ

قد مرَ قبلَ غيرهِ

بهذهِ ا لأبار

****

يا شُرفاءُ

هذهِ الأرضُ لنا

الزرعُ فوقها لنا

والنفط ُ تحتها لنا

وكلُ ما فيها بماضيها وآتيها لنا

فما لنا

في البرد لا نلبسُ إِلا عُرينا ؟

وما لنا

في الجوع ِ لا نأكُلُ إلا جوعنا ؟

وما لنا نغرقُ وسط القار

في هذه ا لأبار

لكي نصوغَ فقرنا

دفئاً وزاداً وغِـنى

من أجل ِ أولاد ِ ا لزّنى ؟

اخي عمر


حمدا لله على السلامة واقامة طيبة
تلفون كمال كرار 923215276
الرجاء الاتصال

جمال

Quote: ويا سلام لوكانت في جلسة مع الصرب ( اولاد مالك)

الشيخ ياجبان ...داير تورطنى مع الصرب ..عمر مالك عامل فيها رئيسنا فى امبده...ومبارك مالك يتمتم وساوى ليهو تحالف مشبوه مع الحسانية ..وصاحبى ود مالك الاصلى لابس ليهو سديرى وسكين فى الضراع ويحدر فى الناس يمين وشمال. عدلان اللاطش قلت ليهو الصرب مسكوا البلد بى ورانا..غاب ابو شنب ولعب ابو ضنب ..قال لى هه يمين ديل سخيل مايمسكيهو .. وسيف المصرى قلت ليهو تعال المهرجان .... قال يا اخخخخخخخى ديل ناس زبل ساكت ,ودقى يادلوكه ...اظرف حاجة فى التكريم نحن قاعدين فى المنصة الرئيسية وهاك ياعمم و نفخه,وتصريحات لقناة النيل الازرق جانى عدلان بى وراء قال لى بالله بعد ما تخلص عندنا دينمو دايرين نصلحو

وكانت ايام

لك الود

اخي عـمر ادريــس الف حمدلله عـلي الســلامة
يبدو لي ان الاجـازة كانت جـميلة وممتعـة بين الاهـل والاحـباب والمهم زيارتك للرميلة زكـرتني بايام جـميلة زمن السودان الجميل وسـردك وتوثيقك للرحلة كان الاجمل ووالله حاسـدين وبقـرانيين الاثنين الف حمدلله علي
السلامة

ودمت اخوك عادل خميس

الاخ عمر ادريس محمد

حمد الله على سلامتك. عدت الى وطنك الثانى بعد زيارة وطنك الاول. وبينهما اوطان ومظان محبة. وشقاء. ياهو ده حال الدنيا.

تأملت فى صورتكم التاريخية فى قلب الخرطوم وعلى هامش الحريات!
عرفتك وابو ساندرا والزعيم التجانى الطيب والطبيبة امال جبر الله.
ولكننى لم اتعرف على الرجلين بالجلاليب والنضارات.
ممكن نعرف اسماءهم لو ما فى مانع؟

Quote: ...اظرف حاجة فى التكريم نحن قاعدين فى المنصة الرئيسية وهاك ياعمم و نفخه,وتصريحات لقناة النيل الازرق جانى عدلان بى وراء قال لى بالله بعد ما تخلص عندنا دينمو دايرين نصلحو

الحبيب عمر
سلام
أول مرة أعرف إنك "قسم مسود أو حسن محمد"

Quote: كما أحبك أيها ألجميل، وكم أحسدك، ونفسي في جلسة تلمني بيك وب ياسيكو، وأوبو عثمان. هنيئا لك بدار عزة (عبلة)، فقد غادر متردمها كل عشاقها، من شعراء وتبعهم الغاوون (نحن).

الأخ الحبيب الأستاذ نادوس
سلام والله اشتاق ليك شوق الغفاري الجافة لنفس المطر
يا حليل المتردم كلنا أصحبنا"غاوين"
عندي مشكلة في الاتصال برقمك فارجو تصحيحه

Quote: ..ولولا اللون الازرق الذى يرتدون لصفقت لهم

ياعمر طلعت صهيوني .... الف حمدلله علي سلامتك .... وبعدين اهل الثورات غائبين في سردك ... انت تكريمك كان مفروض يكون من فريق المجد

صحيفة الميدان لسان الشعب على وشك الصدور
افضل اللحظات قضيناها فى دار صحيفة الميدان ,شابات وشباب واستعدادات جادة, وعمل دوؤب, ونشاط لايفتر من الصباح وحتى المساء لإصدار صحيفة الميدان... وأجمل من رائحة النضال لم اشم رائحة

حول عدم صدور الميدان حتى الآن
Feb 2, 2007, 01:38

سودانيزاونلاين.كوم Sudaneseonline.com

تنفيذاً لقرار اللجنة المركزية في دورة يناير 2005م بإصدار الميدان .

· جاء قرار سلم في مارس 2006م بتكوين لجنة لإعادة إصدار الميدان علنياً .

· في 1/4/2006م عقدت اللجنة أول اجتماعاتها وحددت خطة عملها .

توفير الاحتياجات اللازمة لإصدار صحيفة

· في 1/6 تم استئجار المقر .

· في 25/6 تم شراء كل الأثاثات المطلوبة واستلام تبرع من الداخل طابعة + ماسحة ضوئية .

· في الأسبوع الأول من أغسطس استلمنا عدد (2) جهاز (I B M) من الزملاء بأمريكا + 2 مسجل صغير من الزميلة ( أ) من بريطانيا .

· حتى 5/9 تم توفير كل الأجهزة الفنية المطلوبة .

· في آخر ديسمبر 2006م استلمنا تبرع من الزملاء بالخارج جهاز سيرفر + جهاز ماكنتوش للتصميم مع السوفت وير اللازم وإعادة توصيل الشبكة + طابعة + تصميم ( 16) صفحة (ماكيت ) .

· تم تأسيس مركز معلومات متكامل ورقي ورقمي .

الترشيح لهيئة التحرير والوظائف الأخرى والمتعاونين والمراسلين

· حتى يوم ( 15/9) تم توقيع ثمانية عقود موثقة مع هيئة التحرير وبقية العاملين بالصحيفة بالإضافة لترشيح اكثر من 15 كاتب متعاون واستلام حوالي السبعة ترشيحات لمراسلين من الداخل والخارج.

· كما تم تعيين المدير الإداري والمالي للصحيفة وموظفة الأرشيف إضافة لطاقم القسم الفنى .

قانون الصحافة المتعسف وتعقيدات الحصول علي التصديق النهائي :

· في9/8 حصلنا على موافقة مبدئية من مجلس الصحافة بعد استثناء الحزب من شرط التسجيل .

· في 23/9 تقدمنا بطلب للحصول علي التصديق النهائي .

· لم يردوا علينا إلا في 5/11 برفض الطلب بدعوى أن الحزب غير مسجل متراجعين عن قرار الاستثناء .

· بناء علي توصية اللجنة قرر الحزب تكوين شركة لتصدر عبرها الصحيفة كخيار مناسب في ظل وجود القوانين المقيدة لحرية النشاط الحزبي وحرية التعبير .

· في 23/12 تم تسجيل الشركة لدى المسجل التجاري بإسم ( دار التنوير للطباعة والنشر المحدودة).

· في 11/1/2007م حصلنا على الموافقة المبدئية من قبل مجلس الصحافة بالسماح للشركة بإصدار صحيفة.

· في 22/1 تم تسجيل الميدان كإصدارة صحفية مملوكة لشركة دار التنوير لدى مسجل أسماء الأعمال .

الموقف الراهن :

· الموافقة المبدئية الأخيرة اشترطت التعاقد مع 12 صحافياً بدلاً عن 8 نتوقع استكمال العدد المطلوب حتى 1/ 2 ... وبتحقيق هذا الشرط نكون قد أنجزنا كل المطلوبات اللازمة حسب ما حددته الموافقة المبدئية لمجلس الصحافة والمطبوعات .

· نهاية الأسبوع القادم 8/2 سيكون السقف الزمنى النهائي للتقدم بطلب التصديق النهائي لإصدار الميدان .

· واللجنة على استعداد تام للإجابة على أي استفسار .



اللجنة المكلفة بإصدار الميدان

30/1/2007

شكرا جزيلا

العزيز

معروف سند

الناس طيبين وبخير

علا الحال مايل وتعبان..وقطع شك الجاى أجمل

لك التحية والسلام

ياسلام

ياطلال

وانا اسعد والله ...قابلتك فى تابين المرحوم "مجدى النور" وسعيت نتقابل مرة ومرات بس الزمن ماسمح , قابلت برضو الفنان عصام عبد الحفيظ ,واتمنيت اقابل الزول الراقى الانسان طارق الامين , بس كان معاى صديق متوتر, جاى من الغابة حمانى القعدة .


معليش ياراقى
والجايات كتار

لك الود وتحياتى للشابة الظريفة

حمد الله ألف ......... ألف ..............الف ............ على سلامتك.

العزيز

هشام هبانى

مشتاقين

الشمولية تحتضر ياحبيب ,كلص معدوم الأبوين ,وجماعتك لا أثر لهم فى الشارع العام,وعزة فى انتظارك

لك ودى

عزيزي الأخ عمر،

حمدالله على السلامة،

إستمتعنا معاك في رحلتك الى ربوع الوطن وبوصفك الدقيق الرائع المدعوم بالصور
التي تعبر عن حال أهلنا في السودان.

أعجبنتي التعابير التالية:

Quote: تاكل "قشك" ياحاج

المرة الجاية لما تعدي على مدني أعمل حسابك ما يفوتك البص علشان
ما تأكل قشك.

Quote: عمنا احمد ...رفيقنافى سوق الناقة...ضرب اللحم ضرب غرائب الابل. طلبنامنه صورة قال هييييييييع خلونى اللقش ايدى ديل, وفعلا فعل..مسح ايدية لاعند الكوع , وشنبو, واتلفت جاب العصاية وقال اها سوى يازول, الفارغة يملاها الله..يالك من رجل .

أفتقد لمثل هذا الكلام كثيرا.. والفارغة يملاها الله.

ورجعنا "السلمة" بلد الناس الطيبين ... اكتر حتة بتشعر فيها انك حى , وموجود ..الفقر هنا ليس حبيبا غائب , ليس قصائد .. يتمدد فى كل خلايا اللحظة,يتجسد كعدوا لايرحم. الطفلة طفله, والجوع الكافر يكذب كل الاقوال ..الجرائد ,واخبار السادة ذبابة تطن فى اسماع الناس . تهرب من قصة الى اخرى . الكهرباء تاتى من التاسعة وتذهب منتصف الليل ,ينتجها فى قلب الخرطوم موتور يستنذف كل الدخل -تلاتة الالاف فى الليله الواحده- وبمقاييس السلمة يستمتع بالنور الميسورين من السكان ! الموية حلم
مصاريف المدارس
يدونى خمسمية جنية للفطور امشى المدرسة
ما ادفع حق الدرس يدقونى ..ادفع اجى راجعة جعانة
ونحن وين يا اعتدال يابتى ؟
........
وانتى المدرسة كيف ياعسل
اسمى مودة وخليت المدرسة
ليه
ماعارفة
وانتى , وديك , ونحن... وهم

اطفال فى السلمة ..وما أحلاكم

سيد الموية يئن...وحماروا يجن .. والأزيار مشتاقة

عمر ادريس ...طفل اصيل من السلمة سماه ابوه وامه على ..فى عناية روحى والجاى من الايام ياولدى

المواصلات من,والى السلمة ..تقول لى نيسان ياجيم

شكرا جزيلا

العزيز

محمد عبد الرحمن

رخيت اضانى قلت تحصل حاجة فى دار حزب الامة ...أحضرها واجى اتبختر عليك

بس بكل اسف ماحصل

نوم العافية ياحبيب

لك الود والتحايا

شكرا جزيلا

الريس

العزيز

محمدين محمد اسحق

اللقطة عملت منها شغل جميل

يارائع

لك الود والسلام

الله يسلمك
وشكرا جزيلا
العزيز
بكرى ابوبكر
سيد الحوش

خالص الود والتحايا

حمد لله على السلامة

وبركة الجيت

الأخ عمر
سلام
أعتقد أن كلمات الأغنية دي هي لسان حالك وأنت متجه على المطار
"يا حبيبي جيت لي فد شهر... كالثانية مرَّ بلا خبر"
"يا ناس علي جنس "قدر" "كدر"
سفري أربعا وعقاب شهر
لكن العزاء في الحكي دا

ابداع يا اننقا و حمد الله علي السلامة

الحكى كده يا بلاش

هذه المرة ولسبب اجهلة قررت زيارة مكان عملى القديم "خط انابيب البترول" الذى اصبح يحتل عمارة فخمةفى شارع المطار, بعكس المبنى "المكعكع" القديم فى المقرن ..كانت واحدة من النوايا مقابلة خصم سياسى قديم.. فى الحقيقة ,احد اسوأ من قابلت من الكيزان, كان قد لعب دورا اساسيا فى فصلنا من العمل فى بداية عهد الإنقاذ, وليست هذه هى القضية...القضية انه فعل ذلك بروح شاذة من التشفى واللؤم,واستهدف كل من حاول التعاطف معنا من الزملاء والزميلات فى ذلك الوقت .
كنت اعتقد ان لا احد سيتعرف على فقد طال الزمن , بالضبط سبعة عشر عاما, وكانت المفأجاة ان عرفنى الجميع. وسلام واشواق وذكريات, بعضهم يتابع الاخبار من الاصدقاء وبعضهم يتصفح المنبر العام .كنت متوترا بعض الشى فى انتظار ايصال رسالتى الى الشخص المعنى (رسالة الى هابيل) وهى كلمات قصيرة تخصنى شخصيا ولاعلاقة لها بالمحاسبة والعقاب والحقوق القانونية التى لا تستقيم الامور بدونها ....
لست عاتبا عليك , ولست غاضبا ولا اشعر على الاطلاق بحقد شخصى نحوك ..كل ما فى الامر ان الحياة والتجربة قد اثبتتا انكم كنتم ولا زلتم على خطأ, وقد دفع الوطن ثمنا غاليا لهذا الخطأ وارجو ان تكونوا قد تعلمتم شيئامن هذه التجربة .وعندما سالت عنه تجمع حولى الجميع من جديد ..الفاتحة .. الدوام لله , بعضهم حضننى وبكى, والبعض الاخر اكتفى بالتعزيه ونظرات الأسى فى عينية ....

شكرا ياكستاوى

اخد ليك طلة

واستمتع بالمطايب دى فى كوستى

ياسلام شكرا الوليد ...المرة الجاية ان شاء الله ... صاحبى زاهر الصغير معاى الحجل بالرجل

السوق العربى الخرطوم

ولقطة للأخت الصديقة عفاف ابو كشوه ..الصحفية اللامعة ..وعضوة المنبر..قابلتنى فى المطار وساعدتنى فى انجاز كثير من الامور ...شكرا جزيلا يا ام قاسم وللعيال خالص التحية والسلام

ولقطة اخرى فى المركز العام ..تضم الاستاذ التجانى الطيب ود.ماجده محمد على , ودالعبيد,والاستاذ راشد سيد احمد, والاستاذ ابو ساندرا.

الاخ عمر ادريس الف حمـدلله علي سـلامة العودة



فوق عـادل خميس

وندة محضورة فى مركز عبد الكريم مرغنى بامدرمان,اقامها اتحاد الكتاب السودانيين بالتعاون مع المركز فى ذكرى استشهاد الاستاذ محمود محمد طة ..وكم كان مؤثرا فى بداية الندوة عرض شريط المحاكمة واقوال الاستاذ الناصعات فى وجه الطغاه .

وقابلت صديقى حماد ادم حماد بعد سنين ودنين ..لعن الله الحرب يا إنسان لم يتغير فى الروح سوى انها اصبحت اكثر قلقا على الناس ,واكثر حنية على الاطفال ..تحدثنا طويلا جدا, وسكتنا فى بعض المرات, وحماد لم يتغير ابدا... نفس الجمال,نفس الألق ..و.نكران الذات .
لك الود ياصديق ..لك السلام وعليك السلام

وزيارة وجلسة حميمة مع إنسان نادر فذ, يتعايش مع مرض نادر وغريب ..الدكتور فتح الرحمن الشاطر
يالهذا القلب الكبير,والإرادة التى تتحدى كل الظروف ..وكل شويتين ضحكة تهز الكون ..لك المجد لك العافية يادكتور .

العزيز عمر إدريس
ألف حمدا لله علي السلامة
.
.

ياسلام

ياعزيزى

مجاهد عبدالله

اديت الصور معناها, وكوستى حقها

كوستى بجمالها وخضرتها وطيبة اهلها.تستاهل ووصفك فيه روعة وطعم خاص ..وصف البعرف دقيق تفاصيلها, وما انسى اقول ليك حضرت حفلة جميلة بمحمد النصرى , وكان وقتها جميل كوستى النجم الساطع و معاهو طفلة جميلة بترقص , جات فى الفاصل وقالت فستانها فصلوا ليها حسن كيريا, واشترت جزمتها من دكان الثريا,واريتو حالك تانى يوم اكلنا السمك فى الرواكيب, وصلينا العصر فى جامع الديك ابحبل, واتعشينا بفول تبورى .

لك الود وكل التقدير

شكرا جزيلا

العزيز

فيصل محمد خليل

وبعزم كل زول يرتاح
على ضحكة عيون فيها

لك الود ياصديق

صديق الايام الجميلة يس

كيفك، رقم الهاتف +9745871245
وهو نفسه.

درافور مأساة الإنسان ..اطفال النزوح والوجع الانسانى الكبير, غائبة فى شوارع الخرطوم..او على الاقل هذا مابدا لى , وحتى الحوارات التى اشتركت فيها, او سمعتها دون ان اشارك ..تختزل القضية فى شكليات مثل دخول القوات الاممية ,ووضع الحركات المسلحة موقعة وغير موقعة فى سلة واحدة مع الإنقاذ , وتعين منى اركو مناوى مساعد لرئيس الجمهورية, والتندر على طلاقات رئيس النظام المجانية .ياجماعة الخير هناك أرواح عزيزة فقدت ظلما, وهناك بشر من لحم ودم يلتحفون السماء فى مخيمات النازحين طالت لتصبح سنوات حتى الان, وهناك إعتداءات يومية تتم على مواطنين عزل ...ولا حياة لمن تنادى .اشراقة وحيدة صادفتنى ندوة حاشدة بدار الحزب الشيوعى بامدرمان تحدث فيها الاستاذة صالح محمود,وطارق الشيخ بمشاركة واسعة من الحضور تحت عنوان دارفور الماضى , الحاضر, والمستقبل, اعطتنى الثقة فى ان الشعب السودانى ان انتزع حرياتة كاملة يعرف جيدا اولوياتة , ويستطيع ان يضع حدا لكارثة وطنية , تطاولت لجرح عميق تجب مداواتة باسرع مايمكن ,ومحاكمة المسؤولين عن فتقة, واستمراره نازفا حتى اليوم .

ندوة دارفور الماضى, الحاضر المستقبل .... بدار الحزب الشيوعى بامدرمان .

Quote: هنيئا لك بدار عزة (عبلة)، فقد غادر متردمها كل عشاقها، من شعراء وتبعهم الغاوون (نحن).

قريبى النبيل
نادوس
وانا أسالم فى خالة لى فى الحجير , قالت ... اريدك يالله .. الوداكم وجابكم طيبين, وكما ترى فقد لخصت الأمر وليتها تدرى ياصديق اننا نود
( ياسوداننا الحبيب)
ان نقبل الرمال
نلثم الجهات فيك
نحضن الرضيع
نمسح الدموع من عيونك الحمراء
نرفع اليتم عن مواقع الألم
سودان ....
يا انت ياديوان شعر غاص فى اللهب
كما قال احد الشعراء... وقدجرت عبارتك البليغة "الشجن"مجرى الدم فى العروق. يقول الناس بعفوية -الناس كلهم بره -إنها الحقيقة المرعبة.فقد غادر متردمها كل عشاقها تأتى مشحون باللوعة وألم الفراق, والحنين لكل شى , وانت تعلم ويعلمون انك مفارق غدا, ومع ذلك تحيا ايامك معهم وكأنك ولدت من جديد وستبقى ..ولكن؟ وياله من وضع غريب !!!.

لك الود والمودة

والرحمة والمغفرة للموتى نصفنا الذى ذهب ...وسنلتقى ان شاء الله جميعا

صديقى الجميل مجدى الجزولى ...التقيته وانا فى الطريق الى السودان ..زول وناس, تحادثنا عن البعد ومتاعب الاطفال,وكترتهم فى الخارج , والتربية, قال لى غايتو ربك يسهل الحالة بقت ...السودان يلد والعالم يربى .

واصر شقيقى محمود ادريس على نشر صورة ست الشاى فى السوق الشعبى امدرمان ..على ان يتحمل الذنب..أغفر له يارب ...أمين

العمارات السوامق فى الخرتوم ...توم

الصديق الصدوق عمر ادريس


تحية واحترام

شكراعلي التواصل الجميل وسعدنا بزيارتك للسودان التي كانت خاطفه

وسريعه كالبرق وحمدلله علي السلامه انك وصلت بخير لاولادك

وساعود مجددا للتعليق علي الصور

مع خالص تحياتي للعزيزه مني عبيد والاولاد وكل الاصدقاء

وتحيه خاصه للصديق العزيز مسعود علي مسعود

Welcome back and thank you for those nice images
Regards
Fatah

حق لنا ولصديقنا العزيز حافظ الامين ان نفخر "بحافظ للأثاثات" بحى العمدة بامدرمان. معرض مدهش, يعبر عن ذوق رفيع فى التصميم والألوان, ويؤكد مهارة اليد العاملة السودانية, وإبداعها الأصيل.

العزيز عادل خميس .. دى هدية ليك من الرميلة خشم القربة, والذكرى للحبان اجمل إشارة ..شكرا جزيلا ياحبوب ..وسيب "جيرسى" قوم,قوم,قوم راوحها ..

ولقطة تالتة للمركز العام ...هدية للاخ عادل عثمان .. شكرا جزيلا يافنان

عمـر إدريس تحيه
مزيدا من صور المركز العـام وحـوله ولو كان بالإمكان تصوير بالكلمات.
-----يبدو ان منظر الشباب اثار فى النفس أشياءو اشياء----

واخبار دكتور شاطر شنو..? هل مازال متمسكا برأيه فى الدستور المقترح فهو
رجـل اعتد برأيه فقد تعلمنا منه الكثير

.. بوستك بديع يا عمر في عصرو نادر .. و حكم صفاو مولاي بجمال الوطن و جمال ناسو , و شكرا خليتنا نشوف د. فتح الرحمن الشاطر في صمودو الاسطورى .. وهو كاحمد الزعتر : نازلا من نحلة الجرح القديم الي تفاصيل البلاد .. عشرون عاما ظل يسأل .. عشرون عاما ظل يرحل .. عشرون عاما لم تلده امه الا دقائق في إناء الموز و ارتحلت .. و واضح انو الحزب الشيوعي السودانى دا قد جاء ليبقى .. لانو لازال داقى عودو و رافع يافطتو في نفس الدائرة اللي كانوا بتنافسوا فيها ناس ابراهيم جبريل و الشفيع احمد الشيخ و شيخ المرضى .. قبل 45 سنة تقريبا ، و مرة قال لى رجل كريم مخضرم قوى الذاكرة و منصف و كان بعاين بتامل لنشأة الحزب و جهود عبد الخالق واخوانه : تعرف يا ابني العملية السووها ناس ود الرقيق (وهذا لقب والد عبد الخالق) اسهل منها انك تشيل جبل كررى حجر حجر و توديه للازيرقاب في الناحية الثانية من البحر ّ! .. كان صديقنا الجميل الشيخ قريب الله منسوب مسقط ( و جميل هذه و جدت ناس المنبر يستخدمونها فاستخدمتها انا ايضا) ، كان كلما امسك عوده و بدا الغناء قال محاكيا فضل المولى زنقار : اعز شى عندى من برقو للهندى ، ثم عقب برائعة حسن عطية .. يا الحرموني منك .. انا يا حبيب قلبي سائل دوام عنك ، و يخيل لي انه في الحالتين ظل يقصد السودان !

Quote: ياعمر طلعت صهيوني

وماذنبى ان لم يسعى البعض الى المجد

يابهاء

انت ماسمعت وعشقت اللون الأحمر من بين جميع الالوان . عمنا على السكين كان يقول "الهلهله" دى فى زول نصيح بدروها. ناس الثورة ما اشتغلوا بى شغلة, عشان كدا وصلوا الحاره ميه واتنين ...عجبنى للمرقوت ..وتصدق صادفت شفع بلعبوا فى ميدان النجمة القديم فى الحاره السابعه شوق ساكت, نزلت إتهبلت معاهم شويه وضحكوا على ..والذكريات وراء ظهرى ياحبيب

لك الود

وعندى مشروع لشراء عجلة مستعجله, للرجل الانسان الراقى فاكهة سوق الرابعه المقعد "سكر" تذكروا ؟ فقد عجلتو وحالتو بالجد صعبه جدا . المشروع , مطروح للجميع وخاصة ناس الثوره .... شن قولك .

كيتا ليك يانبتة عمر ادريس ...اللقيمات كانت فى وداعى ...أحبك ياخاتفة اللونين يا ام سكر و زيت ...

شكرا جزيلا

العزيز

peace builder

حاولت الاتصال ..ولكن

هذا المشترك لايمكن الوصول اليه حاليا, نرجو الاتصال لاحقا


تحياتى

شكرا جزيلا

العزيز

peace builder

حاولت الاتصال ..ولكن

هذا المشترك لايمكن الوصول اليه حاليا, نرجو الاتصال لاحقا


تحياتى

عزيزي عمر... لك الود كله،
سألت نفسي أكثر من مرة عن سر غيابك من البورد خلال الفترة السابقة، رغم إنني أيضاً لم أعد أدخل إلا لماما، وكلما أتساءل تقفز الى ذهني الإجابة المعهودة: المعايش جبارة. انقطع الاتصال ولم يخطر ببالي إنك "مرقتها" في السودان. يازول بركة الشُفت الأهل والحبان طيبين ورجعت بالسلامة.
لكن مسألة مرورك بلندن في الطريق الى الخرطوم بدون حتى "إزيكم"، فسيكون لي فيها "حساب عسير" معك. وشيل شيلتك.
مودتي،

ع ع

ايمن الهادى .. نجم صغير

.