.. إنت بتفرقي شنــو من عافية حســن .. ؟

Post: #1
Title: .. إنت بتفرقي شنــو من عافية حســن .. ؟
Author: tmbis
Date: 04-10-2007, 00:45 AM

Post: #2
Title: Re: .. إنت بتفرقي شنــو من عافية حســن .. ؟
Author: Ashraf el-Halabi
Date: 04-10-2007, 01:50 AM
Parent: #1

أهم فرق طبعاً يا تمبس
الإنتاج الخاص

الكورنر دا ما كان تجيبو كامل!!

Post: #3
Title: Re: .. إنت بتفرقي شنــو من عافية حســن .. ؟
Author: tmbis
Date: 04-10-2007, 05:40 AM
Parent: #2

Quote: أهم فرق طبعاً يا تمبس
الإنتاج الخاص
الكورنر دا ما كان تجيبو كامل!!

يا اشرف الكورنر بتاع الإنتاج الخاص ده اتعكس نتيجة دقسة عايزين نخت اللوغــو .. قامت اتعكست الصورة .. قلنا يلالا كلها كفــر ... ووتــر

Post: #4
Title: Re: .. إنت بتفرقي شنــو من عافية حســن .. ؟
Author: tmbis
Date: 04-10-2007, 05:44 AM
Parent: #3

أضغط للتشغيل

Post: #5
Title: Re: .. إنت بتفرقي شنــو من عافية حســن .. ؟
Author: تماضر الخنساء حمزه
Date: 04-10-2007, 05:45 AM
Parent: #1

بس عافية في الركن البعيد

Post: #6
Title: Re: .. إنت بتفرقي شنــو من عافية حســن .. ؟
Author: abuguta
Date: 04-10-2007, 06:16 AM
Parent: #5

تفرق

تفرق
تفرق...شعرها مهبهب..
لا رغيب لا كوز
بالليل يدبدب..

صدقنى ياتمبا انا كنت قايلها هى..

شكرا لك يا جالب الافراح..

انا خايف من جالب دى كمان
ودى لك

Post: #15
Title: Re: .. إنت بتفرقي شنــو من عافية حســن .. ؟
Author: tmbis
Date: 04-10-2007, 04:26 PM
Parent: #6

Quote: صدقنى ياتمبا انا كنت قايلها هى..

يا هندسة ..
تتخيل كتير جدا انا قاعد اتخيله هي .. إلا شوية ، طبعا بعيد عن الهبهبة ..
ياخي اتأمل زيي كدا وغوص في التفاصيل الصوت ، الملامح ، والتفاصيل الدقيقة جدا
صدقني ما بتفرق يا هندسة.

Post: #10
Title: Re: .. إنت بتفرقي شنــو من عافية حســن .. ؟
Author: tmbis
Date: 04-10-2007, 03:38 PM
Parent: #5

Quote: بس عافية في الركن البعيد

قولي في التمنيات عديل كدا يا تماضــر ..
بلاي ما تقول بنات خالات .. بنات خالات كدا .. في الصوت ، في جمال التعبير في حاجات تانية برضو

Post: #7
Title: Re: .. إنت بتفرقي شنــو من عافية حســن .. ؟
Author: abdulgafar mohd saeed
Date: 04-10-2007, 06:21 AM
Parent: #1

تمبس و الله مافي فرق غير الاعلام و الانتاج التجاري ,,, لكن صدقني عافية لاتقل عنها في شئ سوي انها ولدت في السودان ,, و بالناسبة ماتقوم تنزل لينا حاجة لعافية عشان نقارن علي الطبيعة,,,, تحياتي لك

Post: #16
Title: Re: .. إنت بتفرقي شنــو من عافية حســن .. ؟
Author: tmbis
Date: 04-10-2007, 05:05 PM
Parent: #7

Quote: لكن صدقني عافية لاتقل عنها في شئ سوي انها ولدت في السودان

فعلا يا عبد الغفــار ..
ده الفرق الشاسع جدا جدا .. وده البخلينا نراهن على حقنــا وننحاز ليهو .. وعايزين لينا بس فرصة صغيرة جدا .. ح ندهش البشرية دي كلهــا . لكن البدينا ليها منو ويخلونــا كيف ؟
Quote: و بالناسبة ماتقوم تنزل لينا حاجة لعافية عشان نقارن علي الطبيعة,,,, تحياتي لك
.. تعرف يا عبد الغفــار .. بفتش لي في ملف لي عافية عملت فيهو حاجة صغيرة شرقي .. كان كلمني بيها زميلنا الأستاذ عبد اللطيف بكري .. وطالب بيها بشدة .. قدمت فيهو عافية في سهرة تلفزونية مقطع من أغنية .. ( زوروني كل سنة مرة ) اتغنت بيها فيروز وبما إني ما سمعتها من عافية .. لكن متأكد تمام أنو ح تكون اجادته زي ما هي .. لاحظ الفرق هنا كيف .. عافية ممكن تجيده زي ما آمال النور اجادت الكثير لفيروز .. لكن هل بتقدر أنغام تجيد يا مدلل سيب عنادك ده .. أو عشة صغيرة .. أو يا حنين زي عش العصفور؟
ياريت واحد يكون عندو التسجيل ده علشان نشوف ونحكم على الهواء الطلق ..
وطلبك على العين والراس ده عمل من بوست سابق ..

..نجمــات .. نجــوم الغــد

Post: #25
Title: Re: .. إنت بتفرقي شنــو من عافية حســن .. ؟
Author: walid taha
Date: 04-11-2007, 02:50 PM
Parent: #16

Quote: .. إنت بتفرقي شنــو من عافية حســن .. ؟

الفرق (ود أبكر)

Post: #8
Title: Re: .. إنت بتفرقي شنــو من عافية حســن .. ؟
Author: عمر الفاروق
Date: 04-10-2007, 06:33 AM
Parent: #1

تعرف يا تمبس :
فرق السما والواطـــة ..
أي نعم عافية غناية و " أيّو شي " زي ما بيقولوا السودانيين لكن انغام دي خلقوها عشان تغني وبس ..
عافية دي ممكن تعمل ليها اي شي تاني إن شاء الله سكرتيرة لكن انغام دي غير تغني ما ممكن تكون اي شي..
دي صوت غريب وعجيب ..
ياخ شفت ليك صوت يذوبك في الفنجان قطعتين كما يقول نزار قباني؟
أها انغام تذوب ناظرك زاتو ..

بجيك ليها بي مزاج بعد ما تتحفنا بي كل الفي الجراب ..
انا شفت جراب انغام يا حاوي يلا طلع لينا كل الشغل ونحن نجي ننضم..

تخريمة :
الفرق بين انغام وعافية انغام عملا عملية تقويم للسنون وشالت ليها سن عارض كده كان مجهجه كيانا

Post: #20
Title: Re: .. إنت بتفرقي شنــو من عافية حســن .. ؟
Author: tmbis
Date: 04-11-2007, 07:37 AM
Parent: #8

Quote: دي صوت غريب وعجيب ..
ياخ شفت ليك صوت يذوبك في الفنجان قطعتين كما يقول نزار قباني؟
أها انغام تذوب ناظرك زاتو ..
.. تعرف يا عمر أنغام دي فنانة ناس بيتنا من هي صغيرة .. وقبل كدا كان عندنا سماية بتاعت بت خالتنا ، قربنا نجيبه في الصبحية.. وعلاقتي ممتده مع أنغام من أول البومين صدروا ليها ( أول جواب ) + ( ( في الركن البعيد الهادي ) وبما أنو الشريطين بالذا ت جوني من بره السودان ـ وعارف طبعا لما تجيك هدية مع ( ريحة الشنط ) بتاعت المسافرين بتعمل فيك شنو
فضلت متابع أنغام .. لحدي الألبوم ( رقم طلطاشر ).. مع تركيز متواصل ومتابعة لصيقة جدا .. طبعا الوكت داك فيها تقطيع صور وتلصيق في الدولاب
بعد عملية ( الاسنان ) الأسهم نزلت عندي لي نفس السبب الوجيه بتاعك ده واضف إلى ذلك المشكلة البايخه مع والده .. وكمان كم إلبوم كده كانت فيهو بعض الأغاني ما بستوى أنغام أو شكل الغناء القامت بيهو .. بعدما بعدت من ابوها .. اتعاملت مع كم ملحن كان شكلهم بتاعين سوق ساي .. المهم بعدما رجعت لي ابوهــا كفنانة بديت احس انها رجعت تغني كويس .. أو على الاقل رجعت لي الصورة الأولى ليها زي ما عرفتها بالاول..
ومن متابعة روتانا والجلسات في الـ MBC قدرت اتابعه بشكل جديد سمع وشوف .. وأرشيف كويس ..
طبعا الحاجات الفوق دي كلها ما بتنطبق على عافية لكن الانطباع الوصلني أنو عافية وأنغام ديل في شئ مشترك بيناتهم هو شنو ما عارف .. التعبير العميق جدا ـ التطريب العالي .. التزوييب في الفنجان بتاعك الفوق ده ؟ والا شد الجمهور للمتابعة .. والأ طريقة الكلمات القوية جدا وجادة .. لاحظ أنغام غنت كتير جدا لي أم كلثوم .. وطبعا الغناء لي ام كلثوم عملية صعبة وفي كل الأحوال كانت قمة وحازت على جوائز كتيرة جدا .. وخلاف كدا ابتدت تغني في عمر صغير جدا .. عافية نفس الطريقة بمعني انو اول مرة تغني يكون عندها أغنية لعملاق زي الحلنقي .. وتبدا تغني للبلابل التلاتة أصوات الخطيرة جدا وتكبسلهم في صوت واحد وتترجم احساس البلابل الاطربو الدنيا دي كلها .. فدي برضو حاجات ممكن تعيد وجه الشبه بينهم..
على العموم راجي عودتك .. كناقد كتخصص من الحلــة عاصر فترة الأشرطة البتجي للناس من بره ويكون الشريط لافي في الحلة .. وبيسمعوهو في العتبة بتاعت الدكان..

Post: #22
Title: Re: .. إنت بتفرقي شنــو من عافية حســن .. ؟
Author: tmbis
Date: 04-11-2007, 07:43 AM
Parent: #8

Quote: يعني قبل ما تتعلم المشي تعلمت دو ري مي.....
وقبل ما تتعلم الكلام تعلمت السيكا والنهواند والبياتي و....
.. والله يا اشرف كدا مغلوب خمسة صفر .. بالكلام الفوقاني ده .. طبعا زي ما قلت لي عمر فوق .. أنو انغام لما كانت بتغني من الحان ابوها خلقت ليها مكانه مميزة بين عمالقة في الوكت داك وسحبت البساط منهم .. وده طبعا بيوضح انها من بدري جدا رضعت المسالة بتاعت المزيكا دي بشكل مؤسس ومنهج علمي مدروس .. والاهتمام في البيئة الفنية بيكون عالي جدا وزي ما عارف المصريين لما يكتشفوا الموهبة من فترة مبكرة بيسعوا سعي شديد انهم يجودوهــا ويوظفوا ليها كل الامكانيات ..
ما عارف حقيقة عافية والنشأة الفنية ليها ومن وين قدرت تدخل الوسط ده ..
ودا برضو بحسبو ليك إنفراد تام ودقت في الماسورة .. كدي حاول شوف ليك حاجة تانية علشان الشوط الاول ما ينتهي عليك.

Post: #9
Title: Re: .. إنت بتفرقي شنــو من عافية حســن .. ؟
Author: Ashraf el-Halabi
Date: 04-10-2007, 07:03 AM
Parent: #1

Quote: بعد ما سدأت إني إدرت أنسى
الله يسامحك يا تمبس
الفرق التاني:
أنغام غير إنها دارسة موسيقى هي بنت الموسيقى محمد على سليمان (مدرس وملحن)، يعني قبل ما تتعلم المشي تعلمت دو ري مي.....
وقبل ما تتعلم الكلام تعلمت السيكا والنهواند والبياتي و....
لغاية دلوقت 2/0 لو جوك ناس موصلي عشرة ما تحلك

Post: #11
Title: Re: .. إنت بتفرقي شنــو من عافية حســن .. ؟
Author: عبد المنعم سليمان
Date: 04-10-2007, 03:45 PM
Parent: #1

الاخ تمبس سلامات

كنت خارج العاصمة لمدة يومين فلم يتسني لي الرد علي كتاباتك

خاصة في طرحك ورؤاك في اعضاء سودانيزاونلاين( مرهقي الباندوث)

ارجو ان اتمكن غدا علي الرد عليك فيما ظننتة انت ردا شافيا

منك في مسالة امن العاصمة ..

__

عذرا لخروجي عن موضوع البوست

منعم

Post: #12
Title: Re: .. إنت بتفرقي شنــو من عافية حســن .. ؟
Author: nazar hussien
Date: 04-10-2007, 03:54 PM
Parent: #11

يا تمبس زي الفرق بين حسام غالي : ومهند الطاهر

او ميدو: وهيثم طمبل...

وعليك الله ما تهمل كلام الفاروق دا...وبرضو ليس تقليلا من عافيه فانا معجب بها الي حد كبير

أما هذه البنية انغام...فاسمعها في لحظات الشدة...واتعالج بصوتها عديل كدي...

Post: #28
Title: Re: .. إنت بتفرقي شنــو من عافية حســن .. ؟
Author: tmbis
Date: 04-11-2007, 07:46 PM
Parent: #12

Quote: وعليك الله ما تهمل كلام الفاروق دا...وبرضو ليس تقليلا من عافيه فانا معجب بها الي حد كبير
.. نزار بن عمي كيفنك ؟
والله كلام عمر منطقي لحد بعيد .. لكن كمان انا عافية والله ما برضى فيها .. سودانوية ساكت مني نحن عايزين ليها السمح والله ما عايزين ليها الانتكاسة..
Quote: أما هذه البنية انغام...فاسمعها في لحظات الشدة...واتعالج بصوتها عديل كدي...
والله يا نزار ما خليت لي حاجة اقوله .. الزولة دي عاشت معاي أيام عصيبة جدا علشان كدا علاقتي معاها مميزة جدا وما بفرط فيها بالساهل .. إلا أنا كلاسيكي خالص .. حسسسع دي وأنا بكتب ليك في كلامي ده نكشت الدولاب .. وطلعت أول شريط ليها في الدنيا دي ( أول جــواب )
غايتو مليان جنس بلاوي .. كان ما سمعتو بنصحك كان ( غلب الموردة ) لسه ماكل فيك .. ما تسمعة باقي الليل ده

تم التعديل .. لانو عماد عبد الله لاعب لي استوبر .. والبوست ده وقع ليهو في عبــو ..

Post: #23
Title: Re: .. إنت بتفرقي شنــو من عافية حســن .. ؟
Author: tmbis
Date: 04-11-2007, 10:13 AM
Parent: #11

الأخ عبد المنعم حمد الله على السلامة ..
Quote: خاصة في طرحك ورؤاك في اعضاء سودانيزاونلاين( مرهقي الباندوث)
بس تصحيح بسيط .. قبلما تبدا ترد .. مسالة غرهاق الباندويدث دي خليها على جمب .. ما ليها علاقة بالشئ الذكرناهو وطريقة الرد .. إنما بتتعلق بي حاجة محددة كتابتي ليك .. المسالة التقنية دي اصبحت ما بتهمني كتير طالما صاحب الموقع راضي بالشئ الحاصل .. البهمني الموضوع الرديت عليه ووضحت فيهو وجهة نظري بشكل يعبر عني .. فليك حرية الرد إذا توفر ليك الزمن .. والمزاج يعني غير ملزم إلزام تام بي انك ترد لي .. ودي مسالة عادية بتحصل هنــا.. الزميل رأفت ميلاد تولي أمر الرد بشكل مربك وفيه من الإزدواجية .. وقمت بالرد عليه بالطريقة المناسبة ..
عموما
مرحب بيك هنا .. وفي المكان المعني أيضا ارحب بنفسي حال ما طرحت ما يتعلق بي ردا على مداخلتي وفي النهاية نحن هنا نعبر عن وجهات نظرنا.. لكن غير مطالبين بالتبريرات.

Post: #13
Title: Re: .. إنت بتفرقي شنــو من عافية حســن .. ؟
Author: يوسف الولى
Date: 04-10-2007, 03:56 PM
Parent: #1

تمبس

ازيك .......... يا لزيز

اولا كدى نصلح السؤال
عافيه بتفرق شنو من انغام؟

انا ممكن اقول كم ميه فرق ...........
لكن الوحيد الممكن اكتبو
عافيه لما تغنى بيكونو وراها بالكتير 3 عازفين
اما انغام فوراها زى 20 لى 30 نفر بيعزفو
باقى الفروقات خليهالانها ما مهمه زى القلتو ( حسب وجهه نظرى)
والله اعلم
و
تحياتى

Post: #30
Title: Re: .. إنت بتفرقي شنــو من عافية حســن .. ؟
Author: tmbis
Date: 04-11-2007, 08:08 PM
Parent: #13

يوسف يا ولــي ..
سلامات يازول ..
Quote: عافيه لما تغنى بيكونو وراها بالكتير 3 عازفين
اما انغام فوراها زى 20 لى 30 نفر بيعزفو
ياخي ما تنسى التفتيش ده يا ولي .. نحن عاملين نائمين من المسالة دي .. ياخي انا القدامك ده لو لقيت لي هيلمانة زي دي .. إحتمال احير ليك كاظم الساهر زاتو ..
تعرف:
كتير جدا بعاين لي شكل أي اوركسترا وبقارن طوالي بي اوركسترتنا.. متمني اشوف لي بس ( شيلــو ) حائم بالغلط مع ا،و بتذكر في تسجيل لي وردي .. من غير ميعاد .. في واحد شغال معاهو ( شيلو ) .. والله يرحم العاقب محمد الحسن عندو تسجيل مصاحبة معاهو آلة القانون الشهيرة في الشرقي .. والشغل شكلو بيكون ما طبيعي ..
ما بنحلم بي اوركسترا كاملة .. لكن على الاقل بس عايزين سبعة كمنجات والباقي بتتمو ( عافية ) حرارت قلب ساكت ..

Post: #14
Title: Re: .. إنت بتفرقي شنــو من عافية حســن .. ؟
Author: عاصم ابوبكر حامد
Date: 04-10-2007, 04:02 PM
Parent: #1

تمبس يا خطير

Post: #32
Title: Re: .. إنت بتفرقي شنــو من عافية حســن .. ؟
Author: tmbis
Date: 04-11-2007, 08:41 PM
Parent: #14

عاصم ابوبكر حامد

انت رجل عجيب وغريب

Post: #17
Title: Re: .. إنت بتفرقي شنــو من عافية حســن .. ؟
Author: ismeil abbas
Date: 04-10-2007, 07:15 PM
Parent: #1

ألأخ/الجميل تمبس

يا أخى ما حرام عليك تحرمنا حتى ألأبتسامة...والنغم الجميل

عودتك فرحتنا.........................................

بكل رقة وأدب ألله إديك العافية .........وتجى تغنى ليك يوم عرسك إنشا ء الله

........إسماعيل محمد أحمد عباس..........

Post: #18
Title: Re: .. إنت بتفرقي شنــو من عافية حســن .. ؟
Author: نهال الطيب
Date: 04-10-2007, 09:10 PM
Parent: #17

ماحارد علي السؤال يا تمبس
لاني دوما بقول أنو نحنا السودانين مميزين جدا وما بنشبه زول ولا بنتقارن بزول عافية عافية الغناء السوداني الجميلة امنياتي لها دوما بالتوفيق

لكن عايزة أعلق علي أنغام وعلى الركن البعيد الهادي رغم اني عندي رائي في غناء العروب لكن أنغام بتاسرني دوما بكلمات أغانيها الجميلة وإحساسهاالعميق وأنا بالجد بتدهشني الركن البعيد الهادي فيها دراما غريبة يعني زي بتسمع في قصة حبكتها القصصية بتصل منتهاها وبتتحلى لمن تصل حتة أنو معادنا الأحد والنهارده السبت وأنغام بتصورها بإحساس رائع بحق

شكرا تمبس

Post: #35
Title: Re: .. إنت بتفرقي شنــو من عافية حســن .. ؟
Author: tmbis
Date: 04-12-2007, 00:27 AM
Parent: #18

نهــال الطيب ..
كيفك ؟
تعرفي يانهــال نحن مميزين بي شنــو ؟ بي أننا ممكن نعمل حاجات الغير ونجيده ليهم .. بالذات في الشرقي وأنا عندي مثلين عالقات في الذاكره دائما بستعملهم في محكات زي دي .. أو في الغناء بالذات .. تجربة حنان النيل في الإمارات مع أوركسترا السمندل قدمت عمل من التراث البحريني على ما اعتقد بتغنى بيها على الجميري ( شويخ من أرض مكناس وسط الأسواق يغني ) غايتو ما عارف لكن مفترض تاني مافي حد يغنيها غيره .. والنموذج التاني .. الأستاذ محمد الأمين وتجربتو مع أغنية ( يا ناعم العود يا سيد الملاح يا ناعس الطرف أرحم حالتي ) وهي للراحل طلال مــداح .. فكانت قمة الجودة والتجويد ..
أمــا
عافية فأنا متأكد لو لمت ليها في اي حاجة من حاجات أصالة نصري يا اي زولة بتفتكر نفسها صعبة جدا .. اكيد ( عافيــة ) ح توريها نجوم الغد في عز الضهــر
ولذلك
متمسكين بي عافية وبنعتقد فيها شديد .. في أنو عندها زمن خاص بيها لسه جاي ..
Quote: لكن عايزة أعلق علي أنغام وعلى الركن البعيد الهادي رغم اني عندي رائي في غناء العروب لكن أنغام بتاسرني دوما بكلمات أغانيها الجميلة وإحساسهاالعميق وأنا بالجد بتدهشني الركن البعيد الهادي فيها دراما غريبة يعني زي بتسمع في قصة حبكتها القصصية بتصل منتهاها وبتتحلى لمن تصل حتة أنو معادنا الأحد والنهارده السبت وأنغام بتصورها بإحساس رائع بحق
.. ده طبعا نفس الإنطباع الجاني لما سمعت أنغام في أول عمل ليها لو وقع في يدك ألبوم ( أول جواب ) وراجعتي الستة أغاني الفيهو بتلقي نفس الدرامــا ونفس الوصف ونفس الواقع ربما الكانت عايشاهو في لحظته أو عايشو الشاعر بتلقيها وصلتو بي احساس عالي جدا ومنتهى الرقي وده احساس بيصل لي المستمع ليها في أول لحظة وبيتفاعل معاها طوالي وبيعيش القصة معاها .. وربما اتعاطف معاها كمان ..
بس كدي راجعي نفسك شوية في مسالة العروب ديل .. لانو فيهم واحدين بجبروك تستمعي ليهم لانو فيهم ملامح قريبه جدا لينــا .. كدي حاولي جربي فيصل العلوي وهو من جماعتكم وشوفي احساسو السوداني حتى في طريقة اللعب على العــود بتلقيهو قريب جدا لي محمد الأمين أو شايل منو نفس الأحساس .. جربي وحاولي .. ابوبكر سالم كل أغانيه ممكن نتعامل معاها بي سودانية عالية جدا .. بوصيك لو وقعت في يدك أغنية ليهو بيقول فيها ( سر حبي فيك غامض .. سر حبي ما انكشف ) كدي حاوليها .. وكان ما لقيتيها بشوفه ليك .. بس بتكوني مطالبة بي رأيك وياحبذا لو كمان جاملتيني فيهو لانو فناني المفضل يعني ما تطلعيهو لي عربي ساكت

Post: #34
Title: Re: .. إنت بتفرقي شنــو من عافية حســن .. ؟
Author: tmbis
Date: 04-12-2007, 00:04 AM
Parent: #17

يا سمعة
مشتاقين والله .. وشوف بلاي منو الحارمنــا الجيه وحتى الصوت البتشيلو الاسلاك ..
وجودك فرحنــا واضاف لي متعة لي متعة عافية وأنغام
بلاي حافظ لي على الخيار بتاع الغناء في يوم العرس دا .. على شرط تكون الصبحية .. اعتمدنا مقدما

Post: #19
Title: Re: .. إنت بتفرقي شنــو من عافية حســن .. ؟
Author: معتصم الطاهر
Date: 04-10-2007, 09:41 PM
Parent: #1

الفرق يا تمبس

هو صناعة النجم

هل سمعت ( عذبة أنت )

لماذا سمعهت العالم العربى من محمد عبده

ولم يسمعها مننا ؟

Post: #36
Title: Re: .. إنت بتفرقي شنــو من عافية حســن .. ؟
Author: tmbis
Date: 04-12-2007, 00:52 AM
Parent: #19

Quote: هل سمعت ( عذبة أنت )
لماذا سمعهت العالم العربى من محمد عبده
ولم يسمعها مننا ؟
سلامات يا باشمهندس .. بلاي عذبة انتي دي برضــو داخل في برنامجه ده .. والله يا باشمهندس انا لما اسمعه عند محمد عبده .. بصاب بي كمية بتاعت احباط غريب جدا .. ده لو قدرت اسمع لي فيها مقطع واحد بس وركزت ليهو ..
بعدين انــا ما عارف الناس دي بتصنف ساكت كدا كيف ؟؟
والله يا هندسة كان ادونا فرقة صغيرة زي ما قلته وانطلقنــا في الناس ديل .. البيجري ورانــا ما يلحقنــا
بالمناسبة:
معاي مصري في الشركــة .. لقيتو قبل كم يوم خاتي السماعات في راسو ومسترخي .. بعمق وفي عالم تاني .. لما داهمتو قال لي تعال اسمع .. تتخيل لقيتــو بيسمع في مصطفى سيد أحمد غــدار دموعك ما بتفيد .. بعد شوية قعد يغني لي فيها زي ما هي في النوتة فتح لي الدرج .. طلع لي كمية بتاعت سيديهات سيد خليفة .. محمد الأمين .. عركي . تتخيل ؟؟
غايتو الزول ده في الأيامات الجاية .. مشروعي افرمطو ليك بي سيديهات غنانا السمح ده تاني كان بقى نازل مصر إلا ينزل بي مطــار الفاشــر

Post: #21
Title: Re: .. إنت بتفرقي شنــو من عافية حســن .. ؟
Author: abdulgafar mohd saeed
Date: 04-11-2007, 07:37 AM
Parent: #1

شكرا تمبس علي ( عش العصفورة ) ,, بالرغم من اني ما دارس موسيقي ,,لكن اول مرة عافية غنت في نجوم الغد قدمت عمل لهادية طلسم من الحان الموصلي و الله اليوم داك لقيت دموعي تجري غصبا عني ,,,لاني ايقنت يومها ان حواء السودان مازالت حبلي بالمبدعين و خلتني اعدل كتير من ارائي السالبة نحو الجيل القادم,,,
عافية رائعة كما ان انغام رائعة لكن تعالوا نشجع بتنا عشان تمشي لي قدام و تمتعنا كلنا ,,,,
عندي عدة تسجيلات لعافية و حاشوف ليك ( زوروني مرة ) و يارايت القاها ,,,,,
عافية الله يديك العافية ,,,,,,,,,,

Post: #24
Title: Re: .. إنت بتفرقي شنــو من عافية حســن .. ؟
Author: nadus2000
Date: 04-11-2007, 01:46 PM
Parent: #21

شكرا تمبس على كل هذا الجمال الذي ترفدنا به
طبعا كعادتي أدخل هذه البوستات بالصدفة،
ولكن وجود اسمك كعلامة جودة وضمان لمتعة ويحتاج التعاطي معه (لاضان نضيفة).

Post: #26
Title: Re: .. إنت بتفرقي شنــو من عافية حســن .. ؟
Author: Emad Abdulla
Date: 04-11-2007, 04:29 PM
Parent: #24

يا أصلي ..
أقعد بحّت في الملامح و الحاجات , لمن يوم تلقى ليك أسد .

الفرق في السّنَة المخلوفة ( الكانت ) ..
هسه كلو سيم سيم .
يعني الحريم ديل زي عوارتهم ما حصلت يا أصلي ..
واحدة الله مرقها كده .. دايرها كده , سِنّة مخلوفة تديك بيها إبتسامة تنسيك ما أرضعتك امك ..
تقوم تجي تعمل ليها تقويم .. تعديل .
ليه ياخ ؟؟ .. ياخي ليه ياخ ؟؟
ياخي انحنا دايرنها كده , مزاجنا كده .. زي ما الله ده سواها ..
مخلوووووووووووووووفة .

( و بعدين أشنا من عوضية بت عوض التوم دي الله زاتو ما خلق ) .

قلت لي يا تمبا ..
بالله أنغام دي لغاية قريب ده أخوك بيحمبك و يتنفش لو زول ساكت سمع أغنية ( سيدي وصالك ) ..
يسمع ليه ياخ ؟ .. السامع ليها شنو ؟
ياخي الله ما كتر إلا الغنا .. ما لقى إلا حقتي دي ؟؟
كنت قايلها حقتي أنا بس .. و جادي جدا , و مقرّض على كده ..
شفت الضيق الدخلنا فيهو يا طارة !!
و كلمة ( سيدي ) دي أصلو مافي زول معني بيها إلا نحن العبدلله و بس .
شفت الحتة بتاعت : آآآه من دلاااااااااااااااااااااااااااااالك .
واي علي يا كرعي يا تامبا .

يا أصلي ..
سوق سواقتك ما تعمل بينا حادث بالليل ده .

Post: #27
Title: Re: .. إنت بتفرقي شنــو من عافية حســن .. ؟
Author: عماد محمود علي
Date: 04-11-2007, 07:01 PM
Parent: #26

صديقي الوجيه النقي تمبا

مساءك فل وياسمين وكل ورد أبيض ،، ، ،

Quote: ياخي اتأمل زيي كدا وغوص في التفاصيل الصوت ، الملامح ، والتفاصيل الدقيقة جدا
صدقني ما بتفرق يا هندسة.

يا أخوي أنا كل ما أحاول أتأمل المدام تصر لي وجهها هسه ما قادر أشوف حاجة خالص بس بيني وبينك كده الصوت كمنجة عديل كده ويخلق من الشبه أربعين , شكراً يا جميل .

Post: #29
Title: Re: .. إنت بتفرقي شنــو من عافية حســن .. ؟
Author: Emad Abdulla
Date: 04-11-2007, 08:02 PM
Parent: #27

Quote: والهل يا نزار

شديدة يا صاحب ..

طيب هسه في رايك كده ( الهل ) شنو ؟؟
بتفرق و للا ما بتفرق ??

Post: #31
Title: Re: .. إنت بتفرقي شنــو من عافية حســن .. ؟
Author: Omayma Alfargony
Date: 04-11-2007, 08:30 PM
Parent: #29

تمبس

عش العصفور دي ما حصلت

طبيعي حقيقيي

"يا حنين زي عش العصفور"

دي ولا بعد قرن ما تلقاها في اغنية مصرية.

ياحنين

Post: #33
Title: Re: .. إنت بتفرقي شنــو من عافية حســن .. ؟
Author: محمد المرتضى حامد
Date: 04-11-2007, 11:43 PM
Parent: #31

علاء..
إنت انسحبت من معاهدة حظر انتشار الحاجات النووية؟ تابع لي ناس عماد ديل لما تلقى (البرادعي)
في خشم بابك.

Post: #69
Title: Re: .. إنت بتفرقي شنــو من عافية حســن .. ؟
Author: tmbis
Date: 04-19-2007, 09:29 AM
Parent: #33

Quote: علاء..
إنت انسحبت من معاهدة حظر انتشار الحاجات النووية؟ تابع لي ناس عماد ديل لما تلقى (البرادعي)
في خشم بابك
.. والله يا مولانــا عماد صرح قبل كدا قال عندو طبنجة تحت المخده للحالات الزي دي .. والراجل ( نيشنجي ) درجة أولى

والله يا مولانــا ( البرادعي ) حيرنا كان جمبنا ( فلير دامور ) يطلعوا لينا اسد
ومجبورين .. عاد نعمل شنــو

Post: #68
Title: Re: .. إنت بتفرقي شنــو من عافية حســن .. ؟
Author: tmbis
Date: 04-19-2007, 09:00 AM
Parent: #31

أميمية الفرجوني ..
عامله كيف ؟
Quote: دي ولا بعد قرن ما تلقاها في اغنية مصرية

دي شهادة موثقة من مكان الحدث

معتمدة شديد جدا يأأميمة

Post: #66
Title: Re: .. إنت بتفرقي شنــو من عافية حســن .. ؟
Author: tmbis
Date: 04-19-2007, 08:34 AM
Parent: #27

صباح الورد يا عماد محمود ..
Quote: أحاول أتأمل المدام تصر لي وجهها هسه ما قادر أشوف حاجة خالص بس بيني وبينك كده الصوت كمنجة عديل كده ويخلق من الشبه أربعين , شكراً يا جميل .
غلطان ياعماد .. إنت البوديك تحضر حاجات زي دي في اوقات ( الزرزة ) شنــو ؟؟ ياخي نحن العنقالة ديل قاعدين نتعرض لي الإرهاب دا .. خليكم من انتو اللوحاتكم حمرا ديل ..
أكان أنغام يا عماد أكان عافية الاتنين نداوة الحس الفيهم جدير بالمغامرة للاستامع ليهم في كل الأوقات ..
تشكر يا جميل ع المرور

Post: #53
Title: Re: .. إنت بتفرقي شنــو من عافية حســن .. ؟
Author: tmbis
Date: 04-14-2007, 10:22 AM
Parent: #26

Quote: الفرق في السّنَة المخلوفة ( الكانت ) ..

واله يا أصلي .. لو ما عملت الحركة دي كان أقول الزول ده ما سوداني
تتخيل أي واحد أحاول اتكلم معاهو في أنغام دي .. لازم يدخل لي المسالة بتاعت السنون دي ويطلعه لي غلطانه
والله ياحلات تقويم عند( خالد تنقو ) حقو أنغام تخليهو ليهو
Quote: واحدة الله مرقها كده .. دايرها كده , سِنّة مخلوفة تديك بيها إبتسامة تنسيك ما أرضعتك امك ..
تقوم تجي تعمل ليها تقويم .. تعديل .
ليه ياخ ؟؟ .. ياخي ليه ياخ ؟؟
ياخي انحنا دايرنها كده , مزاجنا كده .. زي ما الله ده سواها ..
مخلوووووووووووووووفة .
.. والله يا عمدة أخدت راحتك على الآخر .. وما راعيت لمشاعرنــا .. ما قال ليك ياخ اتكلم في الموسيقى وخليك من الحاجات التانية دي .. في متخصصين ليها
تعرف أنغام دي ضيعت فرصة عمرها أنها تكون مميزة .. حسع كان خلت الحركة بتاعته دي زي ما هي .. كان على الأقل تكون الوحيدة الشاذة في القاعدة .. نوال اظنها عملت ليها عملية كرمشت ( أضنينة ) شوية قالت شينات .. نانسي عجرم ( نخرته ) دي عملت منها شربات عديل كدا وكان ما مصدقني اسال شرووم .. والغريبة في ده كلو . مافي واحد هببو ليهن ولا قال تلت التلاتة كم .. بس نحن متنا بيها لانها حرقتنا عديل كدا
تعرف زمان يا عمدة .. كان ضربوني في الكورة .. يسوقوني ليك السلاح الطبي يقلعو لي ضرس .. كان القمرة خنقت .. يخموني ليك السلاح الطبي يقلعو لي ضرسين ... يوم وقعت بالعجلة .. الرصة القدامية دي كلها لقيته قدامي في الواطــة .. شلت ( سنوني كبيتهم في جيبي ) مشيت البيت ومعاي المعروضات دي .. قلت ليهم كدا كيف ؟
عندي حبوبتي الله يرحمه .. شالت المعروضات دي .. وجابت ليها عيش وفحم وشنو ما عارف .. قامت جدعت الحاجات دي مع السنون في راس البيت .. وقالت .. أديني سن الغزال أديك سن الحمــار ..
ومن اليوم داك وعيييييييك
Quote: بالله أنغام دي لغاية قريب ده أخوك بيحمبك و يتنفش لو زول ساكت سمع أغنية ( سيدي وصالك ) ..
يسمع ليه ياخ ؟ .. السامع ليها شنو ؟
.. بلاي يا عمدة CD وصالك دي حقتك ؟
تتخيل دي الفترة الوقفت اسمع فيها انغام .. طبعا كنت زهجان ليك منها خالص
لكن فجأة كدا تاني رجعت واتصالحنــا لما حضرت ليها جلسة استماع بالعود .. يا سلالالالالام ياخ ..
تتخيل كان عارفك من جماعتنا ...
كان حجزنا ليك لوووج ..

أدخــل لي جــوة ما تقع تكسر لينا سنونك عامل سنونك الشينة دي

Post: #38
Title: Re: .. إنت بتفرقي شنــو من عافية حســن .. ؟
Author: tmbis
Date: 04-12-2007, 01:12 AM
Parent: #24

Quote: ولكن وجود اسمك كعلامة جودة وضمان لمتعة ويحتاج التعاطي معه (لاضان نضيفة).

نادوس . صديقنــا الجميل جدا..
ياخي ده شرف عظيم جدا والله .. وفي نفس الوقت مسؤولية مرهقــة جدا شفت المعادلة دي معقدة كيف ؟؟
أشكرك يا صاحب .. وفي كل الأحوال المزيكا متاحة . وبيها بتتحلحل كل الحاجات الصعبة جدا
شكرا يا صاحب الأضان النضيفة والأحساس العالي دائما يا نادوس ..

Post: #37
Title: Re: .. إنت بتفرقي شنــو من عافية حســن .. ؟
Author: tmbis
Date: 04-12-2007, 01:08 AM
Parent: #21

Quote: و الله اليوم داك لقيت دموعي تجري غصبا عني ,,,لاني ايقنت يومها ان حواء السودان مازالت حبلي بالمبدعين و خلتني اعدل كتير من ارائي السالبة نحو الجيل القادم,,,
عافية رائعة كما ان انغام رائعة لكن تعالوا نشجع بتنا عشان تمشي لي قدام و تمتعنا كلنا ,,,,
العزيز عبد الغفــار ..
برنامج نجوم الغد اصبح المتنفس الوحيد . أو النافذة الوحيدة البنقدر نتابع بيها شكل الوعي الموسيقي في الجيل القايم الآن .. طبعا بعيد عن إرهاصات الواقع .. وغنــاء الشباك وبيوت المناسبات ...
ظهــور عافية بالشكل القوي ده فعلا ادى بصيص أمل انو في جيل قادم بالرغم من الجوطة الحاصلة دي .. وزي ما ذطرته في بوست نجمات الغد .. أنو الشباب ديل بس يدوهم شوية بتاعت اهتمام ومساحة يتحركوا فيها بشكل مريح .. بعيد عن الأحتكار .. وعن ممارسات الوسط الفني وعن ..السلوكيات الأخرتنا سنين وراجعه بينا لي ورى خالص ..
ياريت يا عبد الغفار لو لقيت لي التسجيل بتاع عافية ده .. والله تكون قدمت لينا خدمة كبيرة جدا .. وفي نفس الوقت تكون حليتني من أخونــا عبد اللطيف بكري لانو معلق لي الأغنية دي في رقبتي ..

Post: #39
Title: Re: .. إنت بتفرقي شنــو من عافية حســن .. ؟
Author: طارق عبد اللطيف نقد
Date: 04-12-2007, 08:46 AM
Parent: #1

والله يا تامبا جهجهتنا
كل واحده احلى من التانيه
والاتنين صوتهم دافئ
وبديك احساس جميل اوعميق بالغناء
و بي تطريب عالي جدا
وعافيه دي بت حلتنا
والله من اول يوم سمعتها
قلت ليها انت احسن صوت نسائي في السودان
لكن انغام بتتفوق عليها
بفارق الخبره والاحتراف والاعلام

Post: #40
Title: Re: .. إنت بتفرقي شنــو من عافية حســن .. ؟
Author: Mohamed Abdelgaleel
Date: 04-12-2007, 11:20 AM
Parent: #39

تامبا .. والله أنا خبرتي في أسماء
الفنانين والفنانات ضعيفة شديد
وعاوز أقفز كده وأديك سؤال فـــي
الفلسفة وهو كالتالي:
كلمة قالوا .. نطقتها الفنانة الو
وكانت أحلى من قالوا بتاعتنا .. ليه؟

أستبعد:
مغنية الحي لا تطرب من الإجابة ..

أما البوست بتاعك ده رهيب .. ما
شايف أخوك قام يتفلسف ..

Post: #57
Title: Re: .. إنت بتفرقي شنــو من عافية حســن .. ؟
Author: tmbis
Date: 04-14-2007, 11:20 AM
Parent: #40

Post: #58
Title: Re: .. إنت بتفرقي شنــو من عافية حســن .. ؟
Author: tmbis
Date: 04-14-2007, 11:24 AM
Parent: #40

Quote: أما البوست بتاعك ده رهيب .. ما
شايف أخوك قام يتفلسف ..

والله يا جنرال في حاجة ما عارفك . عارفه والا ماك عارفه
لما تتفلسف إنت تحديدا .. بتبقى لينا المسالة دي عاملة زي ( الــو ) الفوقانية دي بتلقى فيها حاجات كتار جدا حسب تخيلك
بالتالي:
نحن ناس مزيكا .. أنتو اتفلسفو لينــا .. ونحن بنمزكه ليكم .. ( الفلسفة ) طبعا

Post: #41
Title: Re: .. إنت بتفرقي شنــو من عافية حســن .. ؟
Author: نهال الطيب
Date: 04-12-2007, 11:56 AM
Parent: #39

تمبس الراقي
تصدق قبل فترة سمعت صحبتي فلسطينةعقد الجلاد في مسدارأبو السرة والحتة الفلسطينية فيها بالجد الزولة دي صقعت بقت ما قادرة تعبر وفضلت تحلف انها ما سمعت غناء زي ده الا عند مارسيل خليفة واتعجبت انو كيف ناس زي ديل ما مشهورين عربيا
بالجد أصبت الحقيقة نحنا بنضيف لحق غيرنا وبنجوده لكن هم مابيقدروا يضيفوا لينا ولا حتى بتذوق إبداعنا
وطبعا ما كل العروب سيئين لكن نسبة ما هو جميل قليلة جدا أنا شخصياالفنانين الممكن
اقتني ليهم شرايط بسيطين وغالبا بكونوا ماجدة الرومي ومارسيل خليفة وجوليا بطرس والباقين بفرضهم علي التلفزيون بجميلهم وقبحهم فالحظه حلو وكان مبدع وصادف أني قاعدة ليه يومها بمر علي ولا حقه راح
أبوبكر سالم وفيصل علوي بسمعهم في المواصلات هنا لانهم يمنين طبعا طوالي مدورين فينا بطرب احيانا لأبوبكر سالم لكن لانوأذني سودانية بالدرجة الأولى عشان كده ما بجتهد وراء غناء العروب شديد
ومستنية الغنية وحاضرة بالرأي

Post: #42
Title: Re: .. إنت بتفرقي شنــو من عافية حســن .. ؟
Author: مجدي مسعد حنفي
Date: 04-12-2007, 05:50 PM
Parent: #41

الجميل تمبس
تحياتي..لن اتحدث عن المقارنه والفرق لكني اود التحدث بالتحديد عن هذه العافيه الني اعادت لي انا شخصيا العافيه
والأمل فمنذ سنوات طويله والساحه الفنيه خاليه تماما من مثل هذا الحضور المتكامل فهي تمتلك بالاضافه للصوت الجميل
خفة الدم ولذة الآداء الذي يجعلك تتفاعل وتنسجم معها دون ارادتك وانا على يقين تام بان هناك العشرات بل الآلاف مثل
عافيه ولكن لا يجدن من يأخذ بأيديهن فشركات الانتاج لا تحب المجازفه والملحنون يبحثون عن الاصوات الجاهزه وانا اقول
وبصدق ان هذه العافيه جعلت شهيتي للكتابه تعود بعد غياب طويل ولكن مشكلتي ان طول ابتعادي عن الوطن قضى على معظم
علاقاتي بالوسط الفني ولم يتبقى سوى صداقتي التي اعتز بها بالأخ العزيز الموصلي فمن هذا البوست اقول له انا جاهز
هل انت جاهز؟

Post: #43
Title: Re: .. إنت بتفرقي شنــو من عافية حســن .. ؟
Author: حبيب نورة
Date: 04-12-2007, 07:05 PM
Parent: #42

تامبا

علي اليمين انت راجل عسل

شكرن كتيرن!

Post: #44
Title: Re: .. إنت بتفرقي شنــو من عافية حســن .. ؟
Author: ASAAD IBRAHIM
Date: 04-12-2007, 08:53 PM
Parent: #43

علاء شن جاب لجاب

ياخ عافية حسن الله يديها العافية مافي زيها

ادمنت علي youtube بسبب عافية حسن

زولة غناية وبتختار كلمات حلوة وتوزيع احلي

وفوق دة كلو زينة ومحتشمة

الله يديها العافية تاني

تمبس طلب شخصي :
غنية هاشم ميرغني "زولي" امانة عليك تجيبها في بوست منفصل وتهديها لي

Post: #45
Title: Re: .. إنت بتفرقي شنــو من عافية حســن .. ؟
Author: doma
Date: 04-13-2007, 03:48 AM
Parent: #44

يا تمبس بتنا صوت وصوره عسل عدديل كدا ما بعرف التانيه دي منو لكين عافيه انا عافيه منها

Post: #65
Title: Re: .. إنت بتفرقي شنــو من عافية حســن .. ؟
Author: tmbis
Date: 04-19-2007, 08:17 AM
Parent: #43

حبيب نورة ..
شكرا يا حبيبي انا ذاتي
ومقصرين معاك .. لكن في البـال والله ..

Post: #64
Title: Re: .. إنت بتفرقي شنــو من عافية حســن .. ؟
Author: tmbis
Date: 04-19-2007, 08:10 AM
Parent: #42

استاذ مجدي سعيد ..
سلامات وسعيد جدا أن ترد لك عافية .. عافية الكتابة وتفتح شهيتك .. بالغناء الموزون والاحساس العالي .. فلغة الموسيقى دائما هي اللغة المحببة للوجدان ولغة التخاطب الإنساني ..
Quote: العشرات بل الآلاف مثل عافيه ولكن لا يجدن من يأخذ بأيديهن فشركات الانتاج لا تحب المجازفه والملحنون يبحثون عن الاصوات الجاهزه
ما ذكرته يا استاذي هو عين الحقيقة .. هناك الكثير من الأصوات والمواهب المدفونة لم تجد حظها بالناحية المطلوبة في حين أن هناك العديد من الأصوات فرضت نفسها علينا بمحسوبية ، بإمكانيات مادية خاصة جدا .. في الفترة الأخيرة تحديدا اقتحم الوسط الفني العديد من الشخصيات لا علاقة لها بالمسالة الفنية وظفوا امكانياتهم المادية في سبيل السيطرة على بعض المنافذ الصغيرة التي أوصلتهم إلى المناطق الكبيرة جدا .. ساعدهم بعض ضعاف النفوس ومهدوا لهم الطريق .. عافية ومن هم على نهجها .. أو مجموعة نجوم الغد تحديدا . كنت ذكرت في بوست سابق أن يتم الرعاية والعناية بهم وتقديم كل متطلباتهم المرحلية حتى نخلق منهم جيل جديد يسهم في إعادة ما فقدناه خلال الفترة الماضية .. ويكونوا امتداد للفترة الذهبية وعصر العمالقة .. كنت خلال الفترة السابقة .. في حالة ترغب .. لهذه المجموعة وكنت اضعف الايمان اطمع في تسجيلات مختلفة لاكثر من نجم .. إذ لا نعاني من مشكلة الكلمة .. ولا نعاني من مشكلة الكادر التنفيذي ، ولا نعاني من مشكلة لحن ولا توزيع .. ولا نعاني من جهات تمويلية ( وإن أوضحت مخاوفك أعلاه )
إذا ما الأمر ..؟
Quote: مشكلتي ان طول ابتعادي عن الوطن قضى على معظم علاقاتي بالوسط الفني

أتمنى عودتك يا استاذي وكل الطيور المهاجرة فبعودة المتخصصين يمكن ترتيب الكثير من الأمور بشكل أجمل . وكما تعلم أن المسالة الفنية لا تقبل المزايدات ولا تقبل المتسللين من الأبواب الخلفية..
شكرا يا جميل

Post: #62
Title: Re: .. إنت بتفرقي شنــو من عافية حســن .. ؟
Author: tmbis
Date: 04-19-2007, 07:34 AM
Parent: #41

نهال الطيب يا فنانة:
كيفك؟
Quote: وغالبا بكونوا ماجدة الرومي ومارسيل خليفة وجوليا بطرس
.. عارفه يا نهال القلتيهم ديل كلهم متفق فيهم الشعب السوداني كلو مع إضافة البعض .. ودا طبعا على مستوى الغناء الجاد الملتزم وأعني بيهو الكلمة . اللحن .. المعالجة .. حتى الفنان ذات نفسه .. إذا قمنا بالتقليد دائما أو محاولةالنسخ بتكون من التجارب العظيمة دي .. نسمعه كويس ونجيد تكراره .. ويتعامل معاها المتلقى بقبول سوا كان سوداني أو آخــر ..
لما قلت ليك تجربة ابوبكر سالم وفيصل العلوي .. كنت على علم بي إرتباط ابوبكر سالم بفنان سوداني شهير .. وعلاقة الموده البيناتهم بل سمعت وما متأكد من الخبر ده انو في مجموعة اعمال كانت بيناتهم سواء ان كان توزيع أو لحن ما قادر اتأكد ..
أما الفلسطينية صديقتك فمعاها حق .. فرقة زي عقد الجلاد دي وبي شكلها الصغير ده مفترض تكون على راس الجماعات الموسيقية المعروفة ليس على نطاق الوطن العربي .. بل على نطاق العالم ..
عارفه:
في مهرجان الخرطوم عاصمة الثقافة ومن ضمن الليالي الغنائية .. كانت هناك مجموعة سورية ما متأكد منها بتتكون من عدد ( إتنين ساكس فون + عود + ايقاعت + كيبورد + تلاتة أصوات نسائية + صوت واحد رجالي ) الفرقة دي قدمت عمل للاستاذ عبد الكريم الكابلي .. ( عقبال بيك نفرح يا زينة ) بمعالجة بسيطة جدا وبالرغم من ( الشيطنة ) العملوها والتلاعب في التوزيع الموسيقي فكان صعب انو يفوت على فطنة المستمع ( السوداني ) من بداية العمل ..
الشباب ديل قدمو العمل بشكل جميل طبعا ما قدرو يحافظو على سودنة ( الاكسنت ) ودي من الأشياء برضو العايزه ليها مساحة للنقاش فيها .. لكن برضو حافظو على احساس الأغنية وطعم الكابلي ..
العمل ده بيأكد حاجة واحده .. من الممكن التعامل مع اغانينا بسهولة ، وطالما المجموعة دي اجتهدت وقعدت علشان تجود العمل ده .. أكيد حسو بي عمقو .. وبي القيمة العالية الفيهو..
ما عايز اكون بتاع وعود كاذبة لكن الفيديو ده برضو عندي منو مقطع صغير بحاول ارفقو في البوست ده ..
برضو استعدي للتعليق كده يبقى عليك صورة وصوت

Post: #55
Title: Re: .. إنت بتفرقي شنــو من عافية حســن .. ؟
Author: tmbis
Date: 04-14-2007, 10:40 AM
Parent: #39

Quote: والله يا تامبا جهجهتنا
كل واحده احلى من التانيه
والاتنين صوتهم دافئ
وبديك احساس جميل اوعميق بالغناء
و بي تطريب عالي جدا
وعافيه دي بت حلتنا
والله من اول يوم سمعتها
قلت ليها انت احسن صوت نسائي في السودان
.. والله يا طارق إنت الجهجهتنا .. ياخي إنت ما عندك أي خـوة .. قول في زولة اسمها عافية قاعدة تعرف حاجات كتيرة جدا .. وبعدين خلي الباقي علينــا. لكن تخلينا نفتش كدا ونكوس .. ونجي نلقاك باللفة ؟؟
والله يا ابو الطــا ماشاء الله عديل كدا.. ماشاء الله بس
ما تقوم تطلع لينا قريبه كمان

Post: #46
Title: Re: .. إنت بتفرقي شنــو من عافية حســن .. ؟
Author: abubakr
Date: 04-13-2007, 05:13 AM
Parent: #1

ياصحابي .. الحقولو جاف شوية ..
تنقص اعمالنا وافعالنا وسياستنا وغناؤنا وكتاباتنا ""الحس الصناعي "... الصناعة ليست شيئا جافا صلدا ولكن فيها ابداع وخلق منظم ... تشبيه النجار الكويس بان "مصنعيتو كويسة " وحيث اننا لا نكون موجوديين معه حين يقطع وينشر وينجر ويركب فالمقصود شكل المنتج وكيفية توضيبه للمشتري بحيث يجذب المنتوج نظره ثم يلي ذلك بحث او تدقبق في مواصفات اخري ...نحن لا نجييد تغليف اعمالنا بحس صناعي يجعلها قادرة علي المنافسة ..الانسان يتعامل اولا بحسه من نظر وسمع وشم وتذوق قبل ان يبدء العقل في ترتيب الاشياء ... اعمالنا تصر علي تخطي بعض الحواس فياتيالمغني مثلا بلبس لا يليق او سئ التوضيب ويجلس مثلا بوضع لا يليق امام الجمهور (مثلا) وومثل يبهدل حاله في المسرح مرة مكشر ومرة مبوز ومرة مطير عيونو لايصال ما يريد ومغني بديع الصوت لابس كرفته تشعر انو مضايق منها وفاكيها والالوان ما ليهو دعوة بيها والجزمة ممكن شبط مع بدلة وجاكت جلد احيانا في عز الصيف وكم البدلة فيهو العلامة التجارية ملصقة ووووووو نفس المجموعات من العازفيين الذين تراهم كلو واحد براهو في حفلة تلقاهم اخر حلاوة وقيافة وانضباط مع الفاتح حسين مثلا ..... توضيب وتغليف وكيفية تقديم المنتج للعميل او المتلقي نسبته هي الاعلي وليست الادني في الصناعة ...يعني ما ممكن مطعم يقدم لي احسن قطعة لحم مطبوخة ومسبوكة فوق حتة كرتونة .. اها الواحد بيمشي مطاعم كتيرة في الدنيا يشهووك في الحاجة ومقدمات وصور وكلام وبعديين تجييك قطعة زغنونة بتاعة لحم مسلوق وسط انواع من الخضار والميونييز ووووو واكيد اللحمة الفوق الكرتونة احلي واطعم لكن المسلوقة دييك ياها البتجيب زباين كتار ويشتهر بيها المطعم والسيد الشيف ...
اها اسالو دوما عن الدبايب البرية والبحرية البقدموها للواحد في مطاعم بكين او شنغهاي او الصراصير في بانكوك ... الريحة وطريقة العرض حاجة مش معقول ....

تنظيم الذوق العام بتوضيب طريقة عرض المنتج هو من اساسيات الحس الصناعي

Post: #47
Title: Re: .. إنت بتفرقي شنــو من عافية حســن .. ؟
Author: معتصم دفع الله
Date: 04-13-2007, 09:45 AM
Parent: #1

تعرف يا صاحب ..
أنغام دي إسم على مسمى ..
وانت عارف موقفي من الأغاني العربية لكن في حبة إشراقات كده بتعجب ..
لكن برضو مدمنين الزمن الجميل أم كلثوم وفيروز وفائزة أحمد وحليييم ..

بجي تاني صادي كان الله هون ..

Post: #48
Title: Re: .. إنت بتفرقي شنــو من عافية حســن .. ؟
Author: doma
Date: 04-13-2007, 01:37 PM
Parent: #47

Quote: ها اسالو دوما عن الدبايب البرية والبحرية البقدموها للواحد في مطاعم بكين او شنغهاي او الصراصير في بانكوك ... الريحة وطريقة العرض حاجة مش معقول ....

لول ابو بكر انت عارف اختك متحيزه ابدا ما ضقت اطعم من سمك النيل الطازج البتحمرو امي ولا اكلت اجمل من شيه خراف السودان وشرطا تكون في السودان مع الاهل والجيران وبتنا عافيه غناها يجيب العافيه وشوفتها تطول العمر والله حلوه شديد وصوتها بروي العطش

Post: #49
Title: Re: .. إنت بتفرقي شنــو من عافية حســن .. ؟
Author: غادة عبدالعزيز خالد
Date: 04-13-2007, 01:52 PM
Parent: #48

بالرغم من تعودى على الغناء العربى
و بحكم سماعى الكثير لة
خصوصا "ايام القاهرة"
إلا ان الغناء السودانى دوما بة شيئ أجمل
بدواخلى يمسنى

كل المودة يا تمبس

غادة

Post: #50
Title: Re: .. إنت بتفرقي شنــو من عافية حســن .. ؟
Author: معتصم الطاهر
Date: 04-13-2007, 02:00 PM
Parent: #1

كتب عماد غصن
"
Quote: واحدة الله مرقها كده .. دايرها كده , سِنّة مخلوفة تديك بيها إبتسامة تنسيك ما أرضعتك امك .."

انت بالله لسه واقف معاى هناك ..

Post: #51
Title: Re: .. إنت بتفرقي شنــو من عافية حســن .. ؟
Author: عزيز عيسى
Date: 04-13-2007, 02:06 PM
Parent: #1

صدقني يا تمبس إنت زول فنان وجميل جدا..
وبرتاح دائما كلما أدخل على بوستاتك لأني في كل مرة بجد فيها شيء جديد ومفيد..
على الرغم من أنني لم أستمع لعافية حسن أو أنغام من قبل لذلك لا أستطيع أن أحكم
بين المطربتين من أول أغنيتين..
لكن بقول شغلك نظيف وأرجو أن تستمر وتتحفنا بالمزيد المفيد.

مودتي وتقديري.

Post: #52
Title: Re: .. إنت بتفرقي شنــو من عافية حســن .. ؟
Author: Ashraf el-Halabi
Date: 04-14-2007, 09:48 AM
Parent: #1

الفرق الأهم
اهتمام الدولة بالفن في مصر كبير، وزي ما شايف يا تمبس، جيش العازفين بتاعين فرقة الموسيقى العربية الورا أنغام ديل ما عداد!! ديل موظفين دولة (تبع وزارة الثقافة والأعلام) يعني وظيفة ميري!!
يعني مرتبات
بدلات
حوافز
عطلات مدفوعة الأجر
معاش ما بعد الخدمة
والبرنامج بتاع الموسيقى العربية دا مستمر فترات طويلة من السنة، في أي وقت تمشي دار الأوبرا تلاقيهم عندهم برامج، وغيره برامج كتيرة
دا طبعاً غير مهرجان الموسيقى السنوي بتاع الصيف، البيستمر كذا أسبوع
وفيه سنوياً بيشارك من عندنا شرحبيل والفاتح حسين
الاهتمام بتاع بلد ناس أنغام دا يقابله في بلد ناس عافية مش غياب المهرجانات والبرامج الموسيقية بس كمان محاربة الفنون (تدمير مكتبة الإذاعة والتلفزيون على يد مديرها السابق)
(تدمير المنحوتات (الأصنام) بمبنى وزارة الثقافة على يد وزيرها)
(اغتيال خوجلي عثمان)
تقول لي "تفرقي شنو عن عافية"!!!

Post: #54
Title: Re: .. إنت بتفرقي شنــو من عافية حســن .. ؟
Author: إسماعيل وراق
Date: 04-14-2007, 10:26 AM
Parent: #52

عافية الله يديها العافية وأنت برضو معاها يا تمبس
.
.

Post: #56
Title: Re: .. إنت بتفرقي شنــو من عافية حســن .. ؟
Author: عثمان حسن الزبير
Date: 04-14-2007, 10:52 AM
Parent: #54

الصديق الفنان تمبس

عافية الردت لينا العافية
صوت ماشاء الله عليه يتقطر حنية
نجمة ولا شك وجميع نجمات البرنامج كل واحدة لديها تفرد تتميز به والدور والباقي على الفنانين أحمد المك والماحي سليمان وعبد اللطيف خضر وبقية الملحنين الكبار في دعم هؤلاء الشباب الواعدين..

وإنت الله يديك العافية لتعطيرك هذا المكان بالجمال مما يبقينا فيه ...
أمض قدما في نثر الفرح والجمال ولا تلتفت للوراء ....

Post: #60
Title: Re: .. إنت بتفرقي شنــو من عافية حســن .. ؟
Author: محمد سنى دفع الله
Date: 04-14-2007, 11:40 AM
Parent: #56

تــمــبــســكــووووو
الجمال جمالك
وانت سيدو

Post: #59
Title: Re: .. إنت بتفرقي شنــو من عافية حســن .. ؟
Author: محمد أبوجودة
Date: 04-14-2007, 11:27 AM
Parent: #1

وأنتَ إذا أرســلتَ طـَرفك رائداً ،،، لقـلبك يوماً، أتعبتك المناظر
رأيتَ الذي، لا كُلّه أنتَ قادرٌ عليه،،، ولا عن بعضــِـه أنتَ صـــابرُ !!

يا تمبس .. سلامات ..

بوستك جميل ، نغمَـك أصيل ، حرفَـك نبيل ، وكمان "غضبك جميل زي بسمتك "

والسمحة ، الـ " عافية " ..

كأنّكم ما سمعتو [ لالوبنا ولا تمر الناس ] وبارك الله في الخالة Doma
وكمان للباشمهندس أبوبكر، في ضـرورة جماليات التغليف والتقديم حتى تتصاعد قيمة
المعروض ..وبالطبع، عدم تزويق المعروض ، فيه من شبهة الجفا ما فيه وأهلنا بقولوا [قِلّة المعروض جـَـفا ] ..

هل هذا يقودنا للبحث في معايير تقييمنا السودانية ؟ .. ربما ..

وفي الأخير ، انا من ناس الـ " عافية " بانغامها ، وأدائها جميل ، قطع شك

Post: #61
Title: Re: .. إنت بتفرقي شنــو من عافية حســن .. ؟
Author: doma
Date: 04-14-2007, 05:14 PM
Parent: #59

والله يا ابو جوده ولدي عافيه تمممام غننننننايه وسووووووووووووووووووووووكره يوميا بسمعها

Post: #63
Title: Re: .. إنت بتفرقي شنــو من عافية حســن .. ؟
Author: خالد الطيب أحمد
Date: 04-19-2007, 07:52 AM
Parent: #61

عافية دي بي عشرة شروق ..لو يسمع بروف معز ..

لكن يا علاء عنوان بوستك ده

مبالغة ..

تسلم..

Post: #67
Title: Re: .. إنت بتفرقي شنــو من عافية حســن .. ؟
Author: الملك
Date: 04-19-2007, 08:46 AM
Parent: #1

Quote: إنت بتفرقي شنــو من عافية حســن .. ؟

تمبس السمح

عارف لو كتبتا إنتى بتفرقى من عافية حسن شنو كان معنى العبارة إختلف تماماً
إنغام صوتها سمح ...وما بقدر أوصفوا أكتر من عمر الفاروق
وعافية ..............صوتها ببل الروح

يهمنى رايك شنو إنت ذاتك

Post: #70
Title: Re: .. إنت بتفرقي شنــو من عافية حســن .. ؟
Author: Mohamed Abdelgaleel
Date: 04-19-2007, 12:48 PM
Parent: #67

لما راسي يجوط في المنبر .. برجع لبوستك
ده عشان أروق شويه .. فقد ورد في الأُثـر
الكريم ما معناه أن القلوب إذا كلــــت
عميت .. فالترويح عنها ساعة بعد ساعــة
ضروري .. فأذكرونا بالبوستات التي تشحذ
بالأمل