Post: #1
Title: ** ياهذا .. استجير بك مني ..
Author: tmbis
Date: 04-14-2004, 05:03 PM
Parent: #0
(1) استجير بك .. مني
كل رسائلي كانت بتاريخ الشروق الأول
هل هو الآن موعد الغروب ؟
كلام أول
مرسومك الاول بمنحي وسام المحبة :
أنا لك ،، خذيني أو أتركيني
لحظتها لم يكن هناك من يفارحني ..
ومن يدعي هذا الطول الفرحي ، فليلاقينى أمام الشمس
على حد البحر.. عند ابتداء السماء
على عتباتك - أنت - يا سيدي
لك الفرح
........
كنت عندما الشمس بجلالها .. تاتيني
في زمان جميل ، أعجز عن الوقوف .. فاستوي جلوسا في حضرتها
واليوم يعجزني ..الحزن
تلك النجمة
المتراقصة الألوان
وحيدة
تطل عبر نافذتها .. على الأرض .. وتبقى هناك طويلا
وتلقي حبلا طويلا ..من ضفائر ضوئها
وتحلم ان يتعلق بها البحر
ذاك الأزرق المتلألئ
واذا وهنت جديلتها
فقد جدلت ما تبقى من شعرها .. حلما .. لا يتضعضع
تحلم ان تنزل على صدر ذاك الأزرق ، وتغوص هناك بعيدا
لتخرج أزهى
وبريقها مبلل
تساقط عنها النور
فيداعب سطح البحر .. مع انعكاس صورتها .. النابضة التراقص
يجعلها انعكاسها أبهى وأجمل
..
ضحكت منها سحابة عجوز
سألتها ان كانت ما تزال تطارد أوهامها وجنونها
قالت أنت نار .. وذاك ماء
كيف تظنين انه يمكنك البقاء هناك ، سينطفئ توهجك
وانوارك .. لن يبقى ذهبيها أو غيره
وستظلين هناك في القاع
حجر بارد في طين خامد
.. وتعالت ضحكاتها
احتجت النجمة بانها نور .. وليست نارا
وحتما .. لن تنطفئ ابدا
بل ستلمع اكثر وتبرق اكبر
قالت السحابة العجوز وهي تعاود ضحكها .. وتكركر
هل نسيت قصة عروس البحر وحبيبها الأمير الغريق
لفرطت حماقتها -مثلك تماما- طاردت أوهامها
حتى صارت زبدا ، وتلاشت سريعا
..
غمزت النجمة بضؤها
وابتسمت شعاعا فضيا .. وقالت
لن يكون .. بل سأزهى واجمل
وأزالت خصلة نور
واكملت
ولو بقيت زبدا على ذاك الصدر
يكفيني
هل تذكر يا سيدي؟
هل - الآن - تعيدني نجمة وحيدة ؟ مجرد زبد .. ؟
استرحام اول :
وانا قبلا سالتك ان تمنحني الأمان؟
اخبرتك عن تلك المشاعر السيئة التي تنتابني حينا
وتتملكني احيانا
فاذا لم يكن من ارتبط به محبا ومتسامحا
فاسدلق خارجا مع اول نظافة عيد
..
اليس هناك من يرحم ايام سيئة تنتاب النساء ؟
..
كنت قد وسطت السماء قبلا .. واليوم اوسط كل النجمات
وكل النرجسات الليلية الشروق .. وكل العصافير .. والمطر
واوسط .. روحك :اليفة روحي
لتدخل بيني وبين القسوة الصادرة منك
انا يا سيدي استجير بك .. مني ومنك
كلام أخير
وانت ما زلت باقي .. هنا
.....
والنيل الرائق الزرقة .. يرتدي وجهك : غامض الملامح
والشمس النائمة على السطح .. هناك : عينك .. تبرق
وهذه الموجة الصغيرة تتكسر على تجعيدة صغيرة
أسفل الخد .. قرب فمك ..
وهذا المكان الملئ بالظلال يصد عنه حاجبك الضوء
وترتاح ملامحك .. على وجه الصباح
على زجاج نظارتي
على غشاء عيني
على ..
............
وصلتني هذه الخاطرة عبر الإيميل ..
هي إلي شخص ما في هذا النسيج الكوني ..
يا هذا ... كم أنت محظوظ ..
يا هذه ...
سأرسل حروفك عبر المدى .. علها تجده ..
أعذريني
|
Post: #2
Title: Re: ** ياهذا .. استجير بك مني ..
Author: garjah
Date: 04-14-2004, 05:13 PM
Parent: #1
تمبس
اززززززياك
موشتاقييييين كتيييير
|
Post: #3
Title: Re: ** ياهذا .. استجير بك مني ..
Author: خالد الحاج
Date: 04-14-2004, 05:19 PM
Parent: #2
تمبس شكرا وصلت تب 
بالجد هذا سحر حرف ونغم..
بوست يريح الأعصاب يعلم الله..
لهذا أحبك يا إبن أختي يديك العافية.
|
Post: #9
Title: Re: ** ياهذا .. استجير بك مني ..
Author: tmbis
Date: 04-14-2004, 07:29 PM
Parent: #3
وصلت وين ياخال.. بطل صلبطه
تتخيل من ما بديت اقرا في الكلمات .. انا زاتي اتخيلتو لي
عليك الله الدنيا دي لسه فيها ناس كده ياخال
الكلامالسمح ده بيجيبوهو من وين ؟؟
|
Post: #4
Title: Re: ** ياهذا .. استجير بك مني ..
Author: tmbis
Date: 04-14-2004, 05:22 PM
Parent: #2
عمو قرجة ...
اخوي ..الحبيب
غيابك ..
هل يعني حضورك ..في اماكن تجيد الاحتفاظ بك ..
ياخ انا مشتاق ليك ياخ ..
يبقو علي اتنين
لا انت
لا كولا ؟؟
|
Post: #6
Title: Re: ** ياهذا .. استجير بك مني ..
Author: اساسي
Date: 04-14-2004, 05:40 PM
Parent: #4
|
Post: #10
Title: Re: ** ياهذا .. استجير بك مني ..
Author: tmbis
Date: 04-14-2004, 07:46 PM
Parent: #6
اساسي
ده ما انا والله .. عارفك لابد لي ..
اخوك صنديد ..
مع انو الراس مثقل بالشواكيش ..
الا انو يوم وجع القلب ما يجي ..
انت الله يبرد ليك قلبك..
|
Post: #5
Title: Re: ** ياهذا .. استجير بك مني ..
Author: THE RAIN
Date: 04-14-2004, 05:30 PM
Parent: #1
تمبس
يا علاء الدين
أراك الآن تمسح على مصباحك السحرى، فيرسل "الجنى" الذى بداخله هداياه إلينا، حديقة، نيل، شمس، نجمة، زرقة، فرحة، حزن، أمل، وأمل
ولن تنال منا يا علاء أجر المناولة فحسب، بل لك منا كامل المحبة، والود وكل ما فى المعزة من عطر
وانشاء الله تسعد
|
Post: #11
Title: Re: ** ياهذا .. استجير بك مني ..
Author: tmbis
Date: 04-14-2004, 08:00 PM
Parent: #5
المطر
صديقي الجميل ..
يكفيني فقط وجودي بينكم..
أنتم من تأكدون ان الوجود جميل ..
عشت دايما مشرق ..ودايما هطال ..
|
Post: #7
Title: Re: ** ياهذا .. استجير بك مني ..
Author: Raja
Date: 04-14-2004, 05:43 PM
Parent: #1
تمبو يا غالي يا فنان..
شكلو كده الربيع فعلا عندو سحره الخاص..
شكرا ليك وانت تهدينا الكلم والنغم والاحساس..
ما تقول لي الاحساس ده لقيتيهو وين..
..
وانا بدوري زي ما جبتو لينا هدية.. انا بهديه ليك..
أها قولك شنو..؟
|
Post: #12
Title: Re: ** ياهذا .. استجير بك مني ..
Author: tmbis
Date: 04-14-2004, 08:16 PM
Parent: #7
اتحداك ..
و
مقبولة منك يارجوية ..
وياريت كل المواسم ربيع .. علشان يحدفك علينا قدر كده ..
شكرا لعودة الروح ...للجسد الهزيل يارجاء ..
مليون وردة ..لروحك العذبة .
|
Post: #8
Title: Re: ** ياهذا .. استجير بك مني ..
Author: ودقاسم
Date: 04-14-2004, 06:07 PM
Parent: #1
تمبس
تفصح ، وللا أفتح ليك تلفون وأجرسك ؟
الماسينجر قفلو ، وترابو وين ودو ،،
وللا أقول ، خليهم يخمنوا ،،
بس أنا ناس البورد كلهم عاجبني ،، إلا شوية ..
وللا مش كده يا ......؟
|
Post: #13
Title: Re: ** ياهذا .. استجير بك مني ..
Author: tmbis
Date: 04-14-2004, 08:21 PM
Parent: #8
ياخال ..
ليه الارهاب ده بس ..
ياخ انا تمبس
نسيتني ؟؟
كدي خلينا من التلفونات دي .. انت عارفني الايامات دي عيان ومافيني حيل
يعني الا نقول الروب اون لاين والا شنو يعني ؟؟
طيب يا ابومروووووه كيف معاك ؟؟؟
المرة الجاية ح اجيب لي محامي..
|
Post: #14
Title: Re: ** ياهذا .. استجير بك مني ..
Author: عاصم الحزين
Date: 04-14-2004, 08:40 PM
Parent: #13
تمبس
اوّل الحنين هو الشوق لك نتناضم ونحكينا لرمل نيل الفتيحاب .
تاني حاجه قلت شنو ؟؟؟ قال بالايميل قال
اها انا من غمزة عين الجمة ديك و عرفتها
عندك تلاته غفوات و بعدها ربما سأفضح ضوء الفجّه الفيك الانغمرت بالمناسب من هديل .
اها
قلت شنو ؟
انا غايتو ما دايرك تقول الروب .. بس شوف كيف حتغيظ رئة اصابعي التي ربما ستكتبك هكذا في شكل حرف فضيحه حميمه طويييييييييييييييل.
و
يا سلام علي هذه الكتابه ال..... كتابه السمحه .
و
سلام الي مطلع الامر
|
Post: #15
Title: Re: ** ياهذا .. استجير بك مني ..
Author: Tumadir
Date: 04-14-2004, 08:53 PM
Parent: #14
تمبس...
اراك تتضور حبا..وتستغيث بالموسيقى..ونبع السحر..
ما اعذب زمن الجوع ببلاد مارواء الشعاع..
احببت هذا المنتجع البهى.. واحببت تدفقك الحزين.
شكرا لك عليك.
|
Post: #18
Title: Re: ** ياهذا .. استجير بك مني ..
Author: tmbis
Date: 04-17-2004, 08:33 AM
Parent: #14
عاصم .. صديقي الشهي ..
رضيان..
لو بقدر الشوق يمهلني . ثواني ..
عاصم ..
محظوظ انت بشارع النيل .. والفسحة القدام بيتنا..
جرب لي شاي عصرية..مع عمار
وشوف الدنيا دي بخير كيف ..
احبك
تماضر الحبيبة ..
دائما الغيمة جنحاتا الزاز ..
في زمن الجدب ..
تكون حروف موسيقي القلب .. بلسم .. لأي وخزة يتسرب منها الآلم ..
قرمبوز الأصلي ..
اديني زمن وردة ومنديل ..
اسقيني وطن عسلك .. ونخيلك ..
خالد عبد الله ..
وحزمة أخوان .. وشوارع فاتح زقاقات في محل الريد ..
انا مش اخر مرة كلمتك ياقرمبوز ..وقلت ليك عامل كيف ؟؟؟
اظنك عرفت..
الشقاوة تطير ياقرمبوز .. تطير
حنينة ...
عميقة جدا .. اعمق من ان تنهبش ..
عودي بكل اللغات .. المكان فسيح ..ويقبل اي وجود جميل ..
|
Post: #16
Title: Re: ** ياهذا .. استجير بك مني ..
Author: Ibrahim Algrefwi
Date: 04-15-2004, 12:58 PM
Parent: #1
تمبس انا في الحقيقه اذكرته لي قصيده قلت اقسم ليك معاي فجيت البوست ده لقيتك اصلاً قاسم لي من بدري
غايتو هو خالد عبدالله بتعرفو صاح بتاع ورده ومنديل
قال مره  ) الحمائم التي اهدت هديلها لعينيك
كنــــــــــت سانسف قلبي حنطة لها
لو لا أن القصيده قالت لاتكن متهوراً)
سؤال سغيروني : من أي لك كل هذا القلب الشاب كزنبقه؟؟؟
|
Post: #17
Title: Re: ** ياهذا .. استجير بك مني ..
Author: haneena
Date: 04-16-2004, 05:25 PM
Parent: #16
that was fabulous tmbis
it is more than words can say
sure will be back IN ARABIC
all the best
|
Post: #19
Title: Re: ** ياهذا .. استجير بك مني ..
Author: Ahlalawad
Date: 04-17-2004, 08:40 AM
Parent: #1
تمبس .. قبل أن أقرأ هذه الجرسة المجيهة ، تأملت المتداخلين .. فكرت أن أهرب من هذا البوست بأسرع ما يمكن ، لكن أبعدت هذا الخيار ، تأملت كلامك وكلامهم .. شي طاعم .. تحياتي ، وغطي رأسك كويس وإنت تتأمل بنات الناس . او لنقل تخل عن حروفك الندية وروحك الشفافة وأنت تمارس ذلك التأمل .
|
Post: #20
Title: Re: ** ياهذا .. استجير بك مني ..
Author: tmbis
Date: 04-17-2004, 09:45 AM
Parent: #19
اهل العوض..
الليلة عندي مزاج اقول ليك صباح الخير ..
طيب صباح الخير ..
انا زيك .. بضرب وبجري ..بهرب بسرعة ومن دون تفكير ..
بس الما بقدر عليهو وما اظني اوعدك ..
غطغطت الراس دي
ابيت عديل كده ..
|
Post: #21
Title: Re: ** ياهذا .. استجير بك مني ..
Author: tmbis
Date: 04-17-2004, 10:19 AM
Parent: #20
(2)
أنادي العصفور الأغبش
أول أمنية :
هل لي ان اعطيك بعض مما لا املك ؟
حزمة شمس تطرد تقطيبة وتستجدى بضع نور يومض في العينين
سرب غمامات بيضاء مثقلة بالمطر .. تسقى بضع ابتسامة علها تنمو
واغنية لليل يلفها الصمت والترقب
وبعض الحنين
هل لها بالقبول؟
....................
دوما نسعى للفرح ..
ونتطاول ربما نمسك باطراف أجنحته الفضية
نلح عليه حتى يبقى عندنا .. ولو قليلاً .. قليلا
علنا نخادع الحزن ونختبئ منه .. قليلا
ونفاجئ أننا عندما يأتينا الفرح
يملكنا الاضطراب والقلق والخوف
وتصينا الرعشة .. وتضربنا الحيرة ، فلا ندرى اين نضع ايدينا
وأين تستقر أعيننا
وكيف يكف القلب عن هذا الضجيج
ومن يلجم هذه الانفاس الجامحة الاضطراب
نفاجئ باننا مهما كان الحزن قوياً ومدمرا يمكننا السيطرة عليه .. وعلينا
لكن هذا الطارق أبواب الحلم
كيف لنا .. وكيف له معنا ؟ ..
نسعد جدا ان نحلم به على عتباتنا .. على أطراف نوافذنا ، على أسطحنا
لكن أن يقيم ؟
يا للروعة .. ويا للوجل
من أين لنا بهذه القدرة على الاحتمال ؟
البصر صار أوهن من امتصاص هذا البريق
والوجه أتعب من اتساع هذه الابتسامه
والايدي لا تقوى على ارتعاشة دفء ..
والخطو أوهن
يا للروع ..
نظل نكتب لخازن الأفراح
ونلح بقبول دعوتنا – فقط – للمرور
والآن
وهو قابل نداءاتنا ... يجيئنا
فتصيبنا " الدربكه"
كعيد أطل قبل موعده
لا نفرح به ، بل نظل نبحث عن اشياؤنا غير المرتبة
وعواطفنا المنسية التي لم نهيئها بعد
وأثوابنا الجديدة ، وامنياتنا المختبئة
فنترك بابنا مغلقا حتى نعيد ترتيبنا
وماذا بعد .. ؟
هل يظل الفرح طارق الباب طويلا ؟
هل ينتظرنا قليلا؟
أم يرحل فورا ؟
يتركنا .. لما نستطيعه ونحتمله
فقط ..
أحلامنا .
يا سيدي : هل كانت تلك نبؤتي الخاصة ؟
آخر صف الأمنيات:
سيدي ..
ناديت عصفورك
ليمنح نافذتي الصدئة بعض الالوان
ولو لون وحيد
فقط ينفض هذا الصدأ ... عني
...............
ياهذه...
اكرر .. سارسلك في المدي ..
|
Post: #22
Title: Re: ** ياهذا .. استجير بك مني ..
Author: صديق الموج
Date: 04-17-2004, 12:23 PM
Parent: #1
تمبس الجميل...والله يوم بتكتل ليك زول بى بوست!!!!!
وده الكلام البخلى شعرة جلد الزول تكلب...بالله فى اصدق من
تعبير السودانيين ديل.... شوف كلبت دى بت كلب كيف,سلمت.
|
Post: #23
Title: Re: ** ياهذا .. استجير بك مني ..
Author: بهاء بكري
Date: 04-17-2004, 01:18 PM
Parent: #1
تمبس يافنان ... وطبعا انا كشفتك لصديق الموج .. تحياتي لصديقي ودفعتي المهاجر
|
Post: #24
Title: Re: ** ياهذا .. استجير بك مني ..
Author: معتصم دفع الله
Date: 04-17-2004, 01:47 PM
Parent: #23
تمبس يا حبة
شكلها زهجة الخميس والجمعة شديدة خالس خالس ..
خلتك تطلع لينا الحاجات الجميلة دي ..
ومعاك نستجير بهذه الكلمات الرائعات ..
وسلم لي على الزول السمح ده ..
ويا حبة خليك زهجان على طول ..
|
Post: #28
Title: Re: ** ياهذا .. استجير بك مني ..
Author: tmbis
Date: 04-17-2004, 06:07 PM
Parent: #23
صديق الموج ..
وبهاء بكري
غايتو جميل انو البنبان ده بيطلع لينا الناس الجميلة
صديق . الموج يابهاء اتصل علي ومسح بي الواطه .. وما خلي لي زقاق اللف بيهو..
بينا ميعاد موجل .. وحكاوي من زمن جميل ..
يابهاء
بيني وبين صديقك 13 سنة.. لكن لحدي الآن البقدر اجزم ليك بيهوأنو بيحتفظ بي نفس الابتسامة الجميلة.. والروح العذبة ..
تحياتك بتوصل باقي الليل ده ان شاء الله.
وربما .اعمل علي توصيلك بيهو .. في اقرب فرصة
ياموج ..
ح تجيني مش كده ؟؟
محبتي ليكم ..
|
Post: #25
Title: Re: ** ياهذا .. استجير بك مني ..
Author: صديق الموج
Date: 04-17-2004, 02:09 PM
Parent: #1
معتصم والله انا مشيت وجيت للبوست ده زى عشرين مره..وفى كل مره
اضوق طعم شكل تانى..وكان ده الزهج بسوى كده ..انشاء الله تمبس طوالى
زهجان...ما عارف كده بدعى ليهو والا عليهو؟.؟.. والاعجب الموسيقى
البى تحت دى!!! من الاورغ للدم دون ان تمر بالقميص الله يعافيك
ياتمبس ،تمبس كبكبى....
|
Post: #26
Title: Re: ** ياهذا .. استجير بك مني ..
Author: walid taha
Date: 04-17-2004, 02:32 PM
Parent: #1
تمبس ازيك..
اسمع.. اخد الدوا واتغطى كويس لحدى ما نجيك..
فعلا الموضوع بستحق دخلت(المازدا) فى النفق وبعدين"يو تيرن"
انا..
|
Post: #27
Title: Re: ** ياهذا .. استجير بك مني ..
Author: شتات
Date: 04-17-2004, 05:39 PM
Parent: #26
تمبس ..
أيها العنقود ..
يا لهذا العنب المتهدل على كتف الأشواق ..
جديرة هي السامقة التى تسقيك الرحيق ..
وتنتظر على ربوة المنى ..
متى تتفتح البراعم على غصن الربيع ..
لا تتدعها تبرد الجمرات ..
ففي نار القلوب منجم العبرات ..
تنضج غوائش الفرح ..
ذهب .. في معصم الحلوين ..
وتسـلم يا منقة ..
صلاح / شتات
|
Post: #29
Title: Re: ** ياهذا .. استجير بك مني ..
Author: dreams
Date: 04-17-2004, 06:16 PM
Parent: #27
انا مع معتصم يا تمبس
خليك زهجان طوالى
تسلم
|
Post: #31
Title: Re: ** ياهذا .. استجير بك مني ..
Author: tmbis
Date: 04-18-2004, 05:12 PM
Parent: #27
صلاح شتات .. ومعتصم دفع الله ..
لااجيد فصل الرحيق من الورد..ساخبر عنكم النحل ..
يكفيني انكم بالجوار
وعند الفزعه .. حاضرين
ياحلوووووووووين
|
Post: #32
Title: Re: ** ياهذا .. استجير بك مني ..
Author: tmbis
Date: 04-18-2004, 05:29 PM
Parent: #26
وليد طه
..
لاياخ ما تتعب نفسك عليك الله ..
والله انا ما بحب تعبك ..
واذا كمان مصر خالص
حس شوية ياخ ..تعال داخل شايل ليك حاجه في ايدك ..
بعدين المازدا دي .. اخر مرة طعمتها ضد التتانوس متين ؟؟
كان داير تجي تعال
بس اعفيني من المازدا دي ..
هو انا ناقص مازدات عليك الله ؟؟
|
Post: #36
Title: Re: ** ياهذا .. استجير بك مني ..
Author: walid taha
Date: 04-21-2004, 03:53 PM
Parent: #32
تمبس ..ازيك
المرة الفاتت جينا شايلين آيسكريم شعلة ودقينا الباب لمن فترنا
وادبهدلنا بهدلة..
المازدا:
مش فى مكنيكى مسطول قالو ليه من فنانك العالمى قال (مايكل داتسن)
وطيب عربيا قال (مازدا الرومي) ..
دى ما هى مازدتى ذاتا
تحت ..تحت كده
الله يفضحك
شتت
|
Post: #30
Title: Re: ** ياهذا .. استجير بك مني ..
Author: الجندرية
Date: 04-18-2004, 12:57 PM
Parent: #1
قولوا / 3
صاح ؟ ولا لخبت العد
|
Post: #33
Title: Re: ** ياهذا .. استجير بك مني ..
Author: ZARIA
Date: 04-18-2004, 05:41 PM
Parent: #30
الأكثر من رائع
تمبس
بعد غيبه طويييييييييييييييييييله لي جميل إنو الزول يرجع ويبدأ ببوست زي الشهد أنا غايتو مع ناس دريمز خليك زهجااااااااااان وهنيئا للزهج ولينا بيك
الكلام السمح ده زي الدايره أقولو من زمااان بس كيف ومتين ولي منو ما عارفه عموما هو اتقال وإنشاءالله يصل
ولك جميع ودي
|
Post: #34
Title: Re: ** ياهذا .. استجير بك مني ..
Author: tmbis
Date: 04-18-2004, 08:24 PM
Parent: #33
دريمز..
انا متاكد اني كتبت ليك رد هنا .. وعملت ليهو ارسال وين مشي ما عارفو
اتصرفي
شوفي ردك مشي ياتو مكان..
الحوص الجانا في ىخر عمرنا ده
اماني.. صاح .. وكلك صاح .. وبركة الجيتي..منورة
Zariaحمد الله علي السلامة
وقبل كل شي ادينا الوصفة بتاعت الانقطاع من البورد ده .. في دواء محدد .. يا كبسولات ؟؟
حاولت كل الطرق .. مافي ..
غايتو بعترف انك منورة الحلة دي ..
والكلام العايزه تقوليهو ده .. كدي جربي وقوليهو ..
الايام دي عندي مزاجات صلبطه ..اول زول بتصلبط ليك .. ده كان الجماعة ادوني راحتي وكده
مرحب بيك تاني يازاريا.. وان شاء الله ما تنقطعي..
|
Post: #35
Title: Re: ** ياهذا .. استجير بك مني ..
Author: tmbis
Date: 04-21-2004, 10:54 AM
Parent: #34
(3)
متوضئا بشوقي
متيمما نحو قبلتك التي تناديني اليك
متلبسا أمنيات صبحي
وأحلام المساء
حافياً .. منتعلا حنيني
حالقاً ..
الاّ من شعيرات الدم
التي تفتح أبواب القلب .. اليك
هذا المساء عله المائة للقطيعة
والمدينة يلفها الظلام بالاكراه
ويغطيها السكون
والبرد ينبت في كل الفراغات
والقمر يسهر بعيدا .. والنجمات كسلى
وتنام -فقط- وحدتنا فينا
وهذا القلب منفلت أبدا
ويتاورني الحنين
هل تعرف -يا سيدي- كيف تمر أغنية
على حقل من الصمت
وانت تبلل ذاكرتي
تبلبل روحي
تتركني الآم لحزني وظنوني
وصرير نافذتي
وحلمي ببعض النرجس .. لو يجرح العتمة حولي
لو كلمة منك تأتيني
تقهر خوفي
يا سيدي: هل ستظل بعيدا
وانا أمارس هذا الاشتياق المفضوح .. اليك؟
هل كانت بالامس .. نجمتك تمر أمام نافذتي ؟
وما سمعته غناء عصفورك حقا ؟
أو هو بعض توهمي بانك ما زلت هنا
هل هو ما اخبرتك عنه ؟
ان الحب بعضه .. وبعضه .. وبعضه جنون
هل هذا أوان الجنون؟
كلام أخير
عد بي ..
كفاي سُرىً
وخذني في القبول لديك
يكفيني .. ابتعدت
لبيك
في هذا الدنو كفاي قرباً
قاب قوسين
اذا زدت .. احترقت
عالم عباس
|
Post: #37
Title: Re: ** ياهذا .. استجير بك مني ..
Author: ايهاب
Date: 04-24-2004, 06:23 PM
Parent: #35
Quote: حافياً .. منتعلا حنيني
حالقاً .. |
جميل يا جميل
|
Post: #38
Title: Re: ** ياهذا .. استجير بك مني ..
Author: tmbis
Date: 04-24-2004, 08:09 PM
Parent: #37
هووووبا العزيز ..
علها تصل بكل ما تحمل إلي من هي له ...
افتقدك بشدة يااحسن زول ..
|
Post: #39
Title: Re: ** ياهذا .. استجير بك مني ..
Author: tmbis
Date: 04-26-2004, 05:38 PM
Parent: #38
والدنيا مسا
وحته
مكانها من نص الشارع
وكتف التاني
في ملقاهم
كانت زحمة
ناس أكوام
وضجيجهم عم
كانوا هناك
سابقني ..
مترجين
سلاما منك
وشوق للحته
وبقدر الطالهم منك ..
اتبسطوا ..
لم ضجيجهم زاد
وافردوا ليك حنينا
لما يغطى جبينك
وضل رجلينك
وعطروا ليك بموية النيل
وزلط شمبات
وطيبة بحري
شوقا
فينا وفيهم
واتر خطواتك صوتو اطاول
سوي هتاف
امّا تجينا
او كاتلنا رجاك
..
|
Post: #40
Title: Re: ** ياهذا .. استجير بك مني ..
Author: dreams
Date: 04-27-2004, 01:17 AM
Parent: #39
Quote: دريمز..
انا متاكد اني كتبت ليك رد هنا .. وعملت ليهو ارسال وين مشي ما عارفو
اتصرفي
شوفي ردك مشي ياتو مكان..
الحوص الجانا في ىخر عمرنا ده |
ما بتشوف العين يا تمبس
حالتو عندك نضارة
|
Post: #41
Title: Re: ** ياهذا .. استجير بك مني ..
Author: tmbis
Date: 05-24-2004, 10:56 AM
Parent: #40
| Quote: ما بتشوف العين يا تمبس |
والما عندو حاجه تانية يشوف بيها .. قلب مثلا
ياجر ليهو قلب يشوف ليهو ؟؟ ويرجعو تاني .. والا يعمل شنو ؟؟؟
علما بأن القلوب عند بعضيها
وبرضو ما لقيت الرد بتاعك الكتبتو.. فتشيهو براك..
|
|