Post: #1
Title: إيمان توفيق .. جديد
Author: tmbis
Date: 11-17-2005, 02:30 AM
Parent: #0
قابلني يا الهاجر
هجرك
اضّر وطال واستمّر
..
بي سهر الليالي أمرتني
بي طرفي الموالي أسرتني
جمّدت حبي عزلتني
ما تقدر الموقف وتزورني مرة
وسيب المضرة
قابلني ياالهاجر
..
أنا قلبي عارف حبّو
ليك
إخلاصو ظاهر في عينيك
ومهما بعدت بيرجو فيك
قبل حاصل وما عليك
ماتقدر الموقف وتزورني مرة
عليك الله
قابلني يا الهاجر
..
بين زهور الروضة المبيضة لونه
وعدني
هناك كنت أقول وأأمل
المأمول
هل من المعقول يزورني
زهر الرياض
ميّل
مشاعري
تتخّيل
أشوف حبيب عمري والحالة تتغير
انا العشقتو وراح
عشقت بعضو والراح حبيبي
|
Post: #2
Title: Re: إيمان توفيق .. جديد
Author: Rakoba
Date: 11-17-2005, 02:39 AM
Parent: #1
يا سلام عليك يا تمبس
الهاجر دي حكاية، رحم الله شاعرها ود القرشي والعملاق عثمان الشفيع .
|
Post: #3
Title: Re: إيمان توفيق .. جديد
Author: tmbis
Date: 11-17-2005, 02:44 AM
Parent: #2
ياراكوبة
..
والله عايزين نفتح فيك بلاغ انا وتنقو..
..
انا بعتبر انك لسه ما جيت ..
كل سنة وأنت طيب ياراكوبة .. وحاول شد حيلك معانا وجيب من جوه ..
خليني نغير الصفحة الأولي دي شويتين ..
في انتظارك .. وشكرا للصورة .. طبعا من امس برازي في تنقو علشان الصور دي ..
|
Post: #9
Title: Re: إيمان توفيق .. جديد
Author: Rakoba
Date: 11-17-2005, 04:38 AM
Parent: #3
| Quote: وحاول شد حيلك معانا وجيب من جوه .. |
قلنا نحاول لكن شفت الخرمجة الحاصلة بيغادي
|
Post: #11
Title: Re: إيمان توفيق .. جديد
Author: tmbis
Date: 11-17-2005, 04:53 AM
Parent: #9
| Quote: قلنا نحاول لكن شفت الخرمجة الحاصلة بيغادي |
مش كدا
ياخ جهجهتني معاك
بقيت تجليها ثابته
|
Post: #18
Title: Re: إيمان توفيق .. جديد
Author: Rakoba
Date: 11-17-2005, 10:34 AM
Parent: #11
يا كافي البلاء الصور زاتا اختفت بيغادي  ، حكاية بطالة خالص!
|
Post: #4
Title: Re: إيمان توفيق .. جديد
Author: فيصل نوبي
Date: 11-17-2005, 02:44 AM
Parent: #2
فوق من اجل الابداع
التحايا لتامبا
وفوق لايمان
تهريجة:
وين الوردة يا تامبا ؟؟
|
Post: #6
Title: Re: إيمان توفيق .. جديد
Author: tmbis
Date: 11-17-2005, 03:08 AM
Parent: #4
التحية ليك يا فيصل ..
..
ولي ايمان توفيق ..
.
الـــوردة .. يافيصل راحت فيها.. الظاهر لي فيها حاجة كان الجهاز خماها طوالي وما شاورني ..
|
Post: #5
Title: Re: إيمان توفيق .. جديد
Author: حمزاوي
Date: 11-17-2005, 03:01 AM
Parent: #1
تمبس
ابو النسب
أبداع في أبداع
مخبأ ليه عننا الحاجات الحلوة دي
نزل لينا دايماً من الروائع عشان تفك عننا بعض ممغصات البورد
ويا ريت لو كان بالصورة والصوت
عشان يجي اخونا اساسي
ويجكس
دكين
يمتنع
|
Post: #7
Title: Re: إيمان توفيق .. جديد
Author: إسماعيل وراق
Date: 11-17-2005, 03:13 AM
Parent: #5
تامبا
كيفك
أحاول كتابة بوست عن الدويم بكل تفاصيلها، الجغرافية، الإجتماعية، الفنية، الرياضية، السياسية.
سبب التفكير في هذا البوست أنني كنت أستمع لمبارك الشيخ في رائعة أحمد دشين، وهي أغنية يا ظبي الريم كن حليم.. والتي غنتها أيضاً إيمان توفيق ولكن بلونية مختلفة..
كنت أود التنسيق معك لتجهيز المادة الصوتية للبوست..
وببوستك هذا أكون قد ضمنت بعض المادة الجيدة لبوستي القادم..
شعبطة: شفت الجهوية دي كيف.
|
Post: #10
Title: Re: إيمان توفيق .. جديد
Author: tmbis
Date: 11-17-2005, 04:43 AM
Parent: #7
العزيز وراق يا ابو اسيل
مع شعبطة الجهوية جابت ليها طائفيه كمان
طبعا متفقين يا وراق على صوت ايمان .. وتحمسك للفكرة من بدري وفي بالي المعلومات الكتيرة جدا عن ايمان توفيق ونشأتها الفنية من الاسرة ..
وفي انتظارك بي اسلوبك الجميل لتسليط الضوء اكتر على ايمان الفنان من كل الزوايا
وإلى حين عودتك انا جاهز ..
وطبعا الاغنية الذكرتها في الالبوم القديم وبجهزه ليك عند الطلب ..
|
Post: #8
Title: Re: إيمان توفيق .. جديد
Author: tmbis
Date: 11-17-2005, 04:34 AM
Parent: #5
يا ابو النسب
مسكاقمي
..
ياريت لو كان بالصورة والصوت ..
بجتهد ليك في الصورة دي .. عندي حلقة قديمة بحاول اشوفه
بس عجبني الشريط البي العود ده ويستاهل انو يتسمع
..
اساسي يمتنع يا ابو النسب .. زول بتاع خرمجة
|
Post: #12
Title: Re: إيمان توفيق .. جديد
Author: محمد السر
Date: 11-17-2005, 05:11 AM
Parent: #8
يعني يا تمبس لو خليتك في ناس عامر الجوهري وإيمان توفيق وقعدت صاقرت ناس النيل الأزرق ديل ما كان أخير لينا من كل يوم شايل عكازك وداخل بوست!!
بالمناسبة المزيكا والتوزيع في (جسمي المنحول) كانت في السلك (Pentium4) لمن مبدعنا بادي خلاها في حنانو.
تسلم
|
Post: #21
Title: Re: إيمان توفيق .. جديد
Author: tmbis
Date: 11-17-2005, 01:54 PM
Parent: #12
والله يامحمد السر ..
انا النيل الأزرق ما قاعد ابعد منها .. وتعبت تعب شديد خلاص علشان اجيبه من تاني واستمتع بيها ..
إلا لكن كمان ليس بالنيل الأزرق وحدهــا يحي الانسان
سيلان العكاكيز ده جزو من حياتنا اليومية وما بتبقى حلوة إلا لما يمسكوك من دا ويفكوك من دا .. ويعكنن عليك دا .. وتعكنن على دا .. تفاصيل الحياة العادية دي يا محمد
كنا بنغني بس طلعو لينا الغنا مواضيع انصرافية دخلنا السياسة من بوابة البورد قالو كيزان ..
والله يا محمد زوول عادي جدا بمارس في سودانيتي بي مزاج اغني واشيل عكازي ..طلقة في الماسورة ،، وكمنجة ..
تعرف ..
عندنا زول كان في الحلة عزيز علينا شلكاوي .. من ما قممنا لقيناهو قدامنا ده ممارس حياتو بي سهولة مقسم الشهر بي مزاجو .. عندو طبلية سجاير مشهورة جدا وفي فترة كانت اشهر من رونالدينو
اسبوع ...بيكون ( طاشم ) وأهم حاجة انو يفرتق لينا الدافوري في الاسبوع ده ونحن رضيانين
اسبوع ...بيصلي في الجامع
أسبوع .... شغل في الطبلية
اسبوع ... ركلسة في البيت بدون اي موضوع ..
وعلى هذا المنوال تسير الامور
اها حسع يا محمد وزع لي الحاجات بالشكل ده لما تلقاني شايل عكازي اعرفو ده اسبوع المشاكل .. ولما تلقى ناس ايمان توفيق اعرفو ده اسبوع الحاجات التانية..
..
بالنسبة للتوزيع فعلا عمك بادي .. عرف حاجة بالتوزيع ده .. وطبعا عامر الجوهري الميزة الفيهو بيجيه شغلو بي طريقتو الراجل بالرغم من انو ما خلص المعهد لكن متمكن شديد حتى اختيارو للمجموعة البتشتغل معاهو بيكون منسجم معاها تمام التمام
والمجموعة دي تحديدا فاهمه الشغل ومؤهلة بشكل جيد علشان كدا الشغل طلع تمام التمام
|
Post: #13
Title: Re: إيمان توفيق .. جديد
Author: ثروت سوار الدهب
Date: 11-17-2005, 05:14 AM
Parent: #8
الأخ تمبس،
تحية سمحة و متسامحة بقدر سماح ما جلبت
و الله لطَفت عليَ مزاجي بالصوت الشجي و اللحن المشغول.
متأكدين رحم السودان ماعقر من الفن و الابداع.
و اسمح لي أن احيي الاخ راكوبة و نتمنى أن نراه في بوستاته العابقة بالفن و الموسيقى ايضا.
و كتر خير يا اخوي.
|
Post: #22
Title: Re: إيمان توفيق .. جديد
Author: tmbis
Date: 11-17-2005, 03:52 PM
Parent: #13
الأخ العزيز ثروت سوار الدهب
سلامات وكل عام وأنت بخير
ومرحب بعودتك
..
من ما يسرني ياثروت ان احرك مكان النغم جواك .. واللطف ليك مزاجك .. بجميل الالحان ..
طالما انو متاحة لينا مساحة هنا لتبادل منافع واهتمامات زي دي .. نستقلها بالطريقة الممكن نستفيد منها ويستفيد الغير .. ونعكس كل المحاولات البتدفع بمسيرة الاغنية في السودان من خلال المحاولات المختلفة ..
احي معاك صديقي راكوبة .. والصديق تنقو وكل اصحاب الاهتمامات المشتركة في توصيل الفكرة ..
الف شكر وارجو لك المزيد من الاستمتاع .. مع ايمان توفيق
|
Post: #14
Title: Re: إيمان توفيق .. جديد
Author: abas
Date: 11-17-2005, 07:42 AM
Parent: #1
تامبا الحنيين
شكرا ليك يا ملك لكن ابداع عديل كده
يا البنت دي بتكسر حاجات جوه
نزل حاجات زي دي دايما يا مان
|
Post: #23
Title: Re: إيمان توفيق .. جديد
Author: tmbis
Date: 11-17-2005, 04:03 PM
Parent: #14
يا عبس ..
كيفن امورك ..؟؟ والمعاك
..
يعني في حاجات جوه لسه ما مكسرة ؟؟ دي اخبار سعيدة جدا ياعباس
بالمناسبة
في محاولات كتيرة جدا جديرة بالاستماع
الله يدينا المن الكافي والمزاج الكويس ليها
شكرا ياعبس
وليك حق الاستمتاع على قدر ما تقدر
|
Post: #15
Title: Re: إيمان توفيق .. جديد
Author: أبووجيدة
Date: 11-17-2005, 09:31 AM
Parent: #1
الغالي تمبس
تحية بلا حدود
وأنت تعودي بي موطن العشق حيث التضاريس والمكان هي حصة الإلفة ومعاني الحنين وقلعة الإبداع يكفيني فخراً أن يزورها النيل أمياً فلا يغادرها إلاّ لسناً فصيحاً..
شكراً على هذا الإبداع المتواصل إيمان توفيق.
|
Post: #16
Title: Re: إيمان توفيق .. جديد
Author: أبووجيدة
Date: 11-17-2005, 09:46 AM
Parent: #15
الغالي تمبس
تحية بلا حدود...
وأنت تعود بي إلى حصة الإلفة ومعاني الحنين وقلعة الإبداع يكفيني فخراً أن يزورها النيل أمياً فلا يغادرها إلى لسناً فصيحاً ... هكذا هي الدويم تنجب الأفذاذ ليعطروا الساحة إبداعاً وفناً ... شكراً لهذا الإبداع المتواصل إيمان توفيق.
|
Post: #24
Title: Re: إيمان توفيق .. جديد
Author: tmbis
Date: 11-17-2005, 04:14 PM
Parent: #16
الشهيد يوسف ابو وجيدة
والله بركة البقيت تظهر أون لاين .. الله يكتر من اللظات السعيدة دي
والواحد كان بقى شاعر زيكم كان قال كلام كتير خلاص في المناسبة السعيدة دي
تعرف يايوسف حقو الواحد يرد ليك مرتين شان يحيرك
..
إذن هاجت اشجانك من جديد يايوسف وشميت ريحة التراب والدويم في صوت ايمان توفيق الخرافي .. علب الاشواق ياصديقي وكبسله واسجنه في الورق .. وغير الاحساس العالي يايوسف وحيات الخوة مافي شي هادي حيلك كدا ومكملك من لحم الدنيا ..
ليك كميات خرافية من الحب ياصديقي العطوف
|
Post: #17
Title: Re: إيمان توفيق .. جديد
Author: 3mk-Tango
Date: 11-17-2005, 10:10 AM
Parent: #1
انا ما قلت ليك يا تامبا .. الناس دي عطشانه طرب لكن خجلانة
بجيك بي رواقة ماشي اجيب دكين من السكة حديد ..
|
Post: #25
Title: Re: إيمان توفيق .. جديد
Author: tmbis
Date: 11-17-2005, 04:31 PM
Parent: #17
ااي ياعمك ..
والحاجة الغريبة في نوعية كدا .. تسمع في الغناء ده .. وبي اللفة يطلعوك كافر وكوز
ناس ما عندها ذمة خالص ..
غايتو بنشتغله ياعمك مزازيك للناس البتحترم المزازيك وبتقدر المسالة دي والما فيهو نزعه جماليه جواهو بيحس بيها الاشياء الجميلة طبعا نحن ما مكلفين بي انو نخلقه ليهو من مافي ..
والله ياعمك معليش مفتر كان اكون ف يخطرات الزول ده .. لكن اتمشورت مشاوير كتيرة خلاص سرقت زمني كلو
نومة الخميس الكوته الاسبوعية اتقطعت في راسنا..
عاين
صاحبك ده امسكو معاكم بي هناك من السكة حديد ولي قدام
خلوهو يغير نفسيات ..
بس كترو ليهو من حساء القرديس بالبهارت الصينية.. طبعا من غير ما توروهو كنتاكي بي وين لانو ما من مصلحتكم ..
|
Post: #19
Title: Re: إيمان توفيق .. جديد
Author: عبد الله عقيد
Date: 11-17-2005, 10:53 AM
Parent: #1
يا تمبس ياخي انت زول رائع والله
انا بنتعش مع ابو الشفيع.. واي زول
يغني ليهو..
تشكر
|
Post: #26
Title: Re: إيمان توفيق .. جديد
Author: tmbis
Date: 11-17-2005, 04:54 PM
Parent: #19
العزيز عبد الله عقيد ..
سلامات ومليون مرحب
واشهد لك بحسن الاستماع
والحس العالي جدا في التذوق للالحان والكلمات الجميلة
قاعد اعالج في الشريطين التحفة الشلتهم منك وفي انتظار أن اوصلهم لاسماع الجميع
..
ادهشتني فعلا ايمان توفيق في الغناء للراحل الشفيع والراحل العاقب محمد حسن بالوصرة المعبرة دي ..
لانو من النادر جدا تعاطي اللونية دي بين الشباب بالذات الايامات دي ..
شكرا ياعقيد وسعيد بمرورك
|
Post: #20
Title: Re: إيمان توفيق .. جديد
Author: Mohamed Adam
Date: 11-17-2005, 11:32 AM
Parent: #1
ياولا ياتمبس
عودتنا دائماَ إنت جميًل..
واصـل بالله ما تحرمنا عطائك.
لك ولإيمان ما نمتلكه من الجمـال.
|
Post: #27
Title: Re: إيمان توفيق .. جديد
Author: tmbis
Date: 11-17-2005, 05:15 PM
Parent: #20
أخونا وصديقنا العزيز
محمد آدم
كل تحياتي وكل سنة وانت طيب
والتحية ليك ولي ايمان توفيق ..
والسنة الجاية زي ما تحب
|
Post: #28
Title: Re: إيمان توفيق .. جديد
Author: saadeldin abdelrahman
Date: 11-17-2005, 07:43 PM
Parent: #1
تمبسنا الغالي
اب ذوقا عالي
بركه الشفناك طيب ياالحبيب
وعودا جميلا حميدا مستطاب.
|
Post: #29
Title: Re: إيمان توفيق .. جديد
Author: tmbis
Date: 11-17-2005, 07:53 PM
Parent: #28
العزيز سعد
كل سنة وانت طيب ..والقابله على امانيك
ووين الحي بيك
مسجل غياب خبارك ؟؟
|
Post: #30
Title: Re: إيمان توفيق .. جديد
Author: قرشـــو
Date: 11-17-2005, 07:56 PM
Parent: #1
تمبس يا جميل
هكذا يكون السهر
تسلم لينا يا سيدى
|
Post: #31
Title: Re: إيمان توفيق .. جديد
Author: عاصم محمد شريف
Date: 11-17-2005, 08:35 PM
Parent: #30
الاخ العزيز تمبس
شكرا ليك على كل هذا الجمال..
وياخى انا عندى ليك طلب صغير..
منذ فترة شارفت على الستة سنوات..وانا ابحث عن اغنية(يا رشا يا كحيل)..بصوت المبدع وليد زاكى الدين..
ولو ما عندك بى صوته..ان شاء الله بصوت ايمن الظواهرى
|
Post: #32
Title: Re: إيمان توفيق .. جديد
Author: Marouf Sanad
Date: 11-17-2005, 10:29 PM
Parent: #31
قعدات الخريف التحت التبلديّات حليلا ** حليلك انت تشدو والسحب ظالاّت
التحية ليك يا تمبس ولود القرشي والشفيع .
يا تمبس اتمنى انو تكون عندك اغنية الشفيع (قابلني يا هاجر ) بصوت الكابلي .
|
Post: #33
Title: Re: إيمان توفيق .. جديد
Author: abuguta
Date: 11-17-2005, 11:42 PM
Parent: #32
قابلنى ياتمبا
فى شارع العليا
انا مشتاق
ليك يامبدع...
اشتقت لشوفتك
وانت لابد وفى
غياب معتصم
مضرع...
باعانيك الحلوة اطربتنى
وبمناقرتك لناس عجبتنى
جمدت عقلى حيرتنى
ما تحن شوية
تزورنى مرة
جنب الحديقة فى غبيرا...
انا عارف وين بلاقيك
وانت شارد منى
بعزمك فى مطعم الريم
ومعاك عمر الفاروق
تذكرنى ياتمبا
وانسى اساسى
دا ولد زهجان
بقلب الكراسى بدون ذنب..
وليد عمل نايم
مع عروستو
ونحن بكرة بنحصلو
ياعمى تنقو حنى على
كمان
كنت عاوز اتصل عليك
فى العيد
لكن جوالى القديم
سرقوه ناس البطجاء..
رجاء مسكلنى مرة
تمبس انت انسان ظريف
بس البت دى فى الاغنية الاولى عندها مشكلة مع ال القمرية
فى كلمة الشوادى...وبعدين عندها فلسفة فى نطق الكلمات
اعطتها حلاوة فوق لى صوتها الشنو كدا ما عارف
وكل هذا النسق فى اسمها البشبه لعيبة الكرة
عموما شاهدتها على الفضائية لكن ما اعرتها اهتمام
لكن ياتمبا مش مجاملة ليك. اصلا ما محتاج لمجاملة منى
البت دى انت ذتها رونق باعادة ما ابدعت
وعد متى ياتمبس...سوف اتوسط لك فى التلفزيون.. قسم المنتاج
فى حكومتنا الجديدة...طبعا كل الناس حكمت الا اهل العوض
ولا شنو رايك
خالص حبى لك
|
Post: #40
Title: Re: إيمان توفيق .. جديد
Author: tmbis
Date: 11-24-2005, 00:05 AM
Parent: #33
ابو قوتة ..
ازيك يا ما ناوي تظهر..
وشكراً للقصائد الاخوانية..المنجورة وفق حيثيات مناخ نجد اليومين ديل ..
بلاي الهمبريب بتاع اليومين دي وصلك والا لسه ؟؟
.
.
قلت لي عندها مشكلة مع ال القمرية والله يا ابوقوته كان مسكت الفنانين ديل كلهم نااادر تلقى البينطق مخارج الحروف صاح لكن في النهاية الفكرة بتوصل اصلو نحن قاعدين نشتغل حاجاتنا كلها بالنية ساكت ..
وايمان توفيق بالجد تستحق الوقفه والاستماع ليها اكتر من مرة ،، اول البوم صدر ليها قبل سنين نزلت منو أغنية وكنت منتظر ومتابع كل مرة الجديد منها ..
الكاسيت ده تحديدا جاني هدية من الصديق زميل البورد ( بدري ) وامتعني شديد ..
وطبعا ايمان توفيق من ابداعات الدورة المدرسية للمدارس الثانوية وظهرت بشكل قوي جدا وقتها بتمنى ليها المواصلة بشكل جيد بس تبطل الكسل ..
.
.
طبعا في انتظار الواسطة وان شاء الله كمان يا ابوقوته تشوف لينا معاها حواشة حواشتين لانو التلفزيون براهو ما بياكل الواحد عيش ولا حاجة ..
شكرا يا هندسة ونتمنى نشوفك .. غايتو معتصم قرب يجي راجع
|
Post: #37
Title: Re: إيمان توفيق .. جديد
Author: tmbis
Date: 11-21-2005, 02:15 AM
Parent: #32
العزيز جدا معروف
سلامات واتمنى انك بخير ..
والله انا برضو كنت بتمنى يكون عندي التسجيل ده بصوت الكابلي ..
مسجلة معاي حلقة الشفيع بصوت الكابلي تقريبا زي اربعة اعمال وللاسف الشديد قابلني ياهاجر ما من ضمن المجموعة
..
بتذكر في الحالم سبانا والذكريات بالاضافة لي عملين تاني
فإذا ما عندك مانع بنزل ليك اي من الاعمال دي .. وكمان بجتهد ليك إذا كان اساسا في شغل لي هاجر بي صوت الكابلي ..
اتفقنا ؟
|
Post: #39
Title: Re: إيمان توفيق .. جديد
Author: tmbis
Date: 11-21-2005, 03:10 AM
Parent: #32
|
Post: #36
Title: Re: إيمان توفيق .. جديد
Author: tmbis
Date: 11-21-2005, 01:39 AM
Parent: #31
العزيز عاصم محمد شريف
سلامات
والف مرحب بيك ..
من ما يسرني يا عاصم اجيب ليك حاجة رايحه منك من ستة سنوات ..
من لحظة قريت كلامك وانا في حالة بحث ما منعني منها إلا ظرف شوية صعب في اليومين الفاتو ديل ..
دورت عن كل ما يتعلق بي وليد زاكي الدين المعاي .. ما وجدت الاغنية حاولتها بي صوت ابوداؤد برضو ما نجحت معاي ..
لكن ده ما يعني انو المحاولات ما جارية .. وعلى كل حال اوعدك أنو تكون هنا في نفس البوست ده .. حتى لو اضطر الأمر اني اغنيها ليك بي نفسي ده طبعا بعدما تديني ضمانات كافية ..
وبكتب ليك إقرار بإني مسؤول عن إي اضرار جانبية.. شاملة التعويض
|
Post: #35
Title: Re: إيمان توفيق .. جديد
Author: tmbis
Date: 11-21-2005, 01:05 AM
Parent: #30
العزيز العمدة قرشو
..
اسعد الله لحظاتك بكل جميل
ومتعك بالعافية والذوق العالي ..
سلمت ..
|
Post: #34
Title: Re: إيمان توفيق .. جديد
Author: 3mk-Tango
Date: 11-20-2005, 10:26 AM
Parent: #1
ودي طلقة في وجه القبح
رفعة للصفحة الاولي عشان زهجان منها ..
تعرف يا تامبا معاهد نفسي ما اقول لي زول في المنبر دا انت صاح ولا انت غلط
البزهجني بديهو اغنية بس وامشي ..
خليني استعين بي سلاحك دا ..
|
Post: #38
Title: Re: إيمان توفيق .. جديد
Author: nashaat elemam
Date: 11-21-2005, 02:29 AM
Parent: #34
تمبس يا راقي.. يا سلام عليك يا سلام
|
Post: #42
Title: Re: إيمان توفيق .. جديد
Author: tmbis
Date: 11-24-2005, 00:24 AM
العزيز نشات
مليون سلام
وفاقداك بوستات الاغاني الجميلة ..
منور جدا بي مرورك ..
|
Post: #41
Title: Re: إيمان توفيق .. جديد
Author: tmbis
Date: 11-24-2005, 00:17 AM
Parent: #34
يا عمك
...
استعين بي اي سلاح .. وكان عايز اي دعم لوجستيكي بنمدك اصلو ما عندنا مشكلة
لكن ما عايز احبطك واقول ليك
اتحداك كان تصمد ..
لكن الاستماته كويسه .. ما ياهو نحن حسع قاعدين نستميت ..
ويوم غالبين ويوم مغلوبين ..
|
|
