العيد في الغربة.. لهفة الشوق ومرارة الفرقة

عيد بأية حال عدت يا عيد بما مضى أم لأمر فيك تجديد
أما الأحبة فالبيداء دونهم فليت دونك بيداً دونها بيد
.
.
أيا متنبي، أتى عيدنا ولم يكن به جديد أو تجديد، الحال يغني عن السؤال، والإجابة تنبئك بها جباه الكبار ونظرات الأطفال.. وليت حالنا كحالك فأنت دونك بيد ونحن بيننا ومن نعشق بحار ومحيطات، والأمرّ من ذلك لهفة وشوق وإلتياع.
.
.
أحبابنا وأخواتنا
سجلوا إنطباعاتكم وانتم في أرض الغربة الواسعة عن أول يوم للعيد
هل له طعم؟
ما حال أطفالنا فلذات أكبادنا وهم بعيدون عن صوت الحبوبة والخالة والعمة؟
شعورك وأنت بعيد أن أهلك وأحبابك؟
ألم تشتاق إلى سماع صوت الأهل والجيران وهم يرددون عيدكم مبارك.. العفو والعافية؟
.
.
لمن يريد تسجيل إنطباعاته وإحساسه بالعيد دون أعضاء المنبر عليه المراسلة عبر البريد [email protected]
قبل الخروج:
ما أقسى الغربة.

سلام وراق وكل عام وانت بخير وربنا بجمع الشمل.....انه الحزن بعينة العيد فى الغربة انا هنا لوحدى اعتصر مرارة الغربة لارفيق ولاقريب ...يوم عمل عادى حتى الذين يعملون معى لايعرفوا اليوم عيدنا...

الأخ أدروب
تحياتي
نحن هنا بالسعودية جالية كبيرة جداً ولكن رغم ذلك نشعر بوحشة الغربة والبعد عن الأهل فكيف يكون حالك وأنت لوحدك.. أنه شعور مؤلم.

عيدك سعيد.،

الحبيب وراق


كل عام انت والاسرة بالف خير

Quote: نحن هنا بالسعودية جالية كبيرة جداً ولكن رغم ذلك نشعر بوحشة الغربة والبعد عن الأهل فكيف يكون حالك وأنت لوحدك.. أنه شعور مؤلم.

نعم وحشة الاهل حنما يدخلون دارك مهنين من غير بروتكولات حبمنا تعود من صلاة العيد الكل يقلد ويطلب منك العفو الذي تطلبة من حضن الام عندما تقلدك تدعو لك وتعفو عنك .

الحبيب يوسف السماني
تحياتي
العيد وسط لمة الأهل له طعم ومذاق خاص، تخيل الناس من صباح الرحمن وهم لابسين بيض الثياب يرددون الله اكبر الله أكبر والأطفال حولهم فرحين. دا.. كوم.. ومباركة العيد للأهل والجيران كوم تاني..
ربنا يرجعنا لبلدنا ويعدل حالها المايل دا

مكرر

اخى الكريم اسماعيل
كل عام وانت بخير وربنا يحقق كل الامانى ليك يارب
اما العيد فى الغربه بالنسبه لينا الجد فى قليل من بعض مظاهر العيد لكن للامانه مافى احساس
بيه اتخيل لمن العايشين فى الدول العربية والمسلمة يقولو العيد شكلو مختلف تفتكر احنا العايشين
فى دوله المطرة والضلمة والبرد الشديد يكون حالنا كيف الجو عندنا 4 تحت الصفر ..
الفرقة والاحساس بيها يوم واحد مافارقتنا لكن الاحساس بيزيد فى المناسبات الجميله والاسى بيملانا
لمن نتذكر كيف كنا ..بحتفل باعيادنا وكيف كنا بنستعد ليها قبل وكيف كانت بتاخد مننا.. الاستعدادت
من زمن مفرح وجميل ..وكيف كان يجى علينا صباح العيد والفرح لابسنا ولابسينو .. وفرحة الكبار قبل الصعار
وهم مشايين على الصلاة ياسلام احساس وجمال مناظر فاقدينو كتير ...
هنا طبعا فى صلاة للعيد فى كل الجوامع ..لكن بامانه بالرغم من انو الصلاة هى الصلاه لكن الاحساس بيها
ماذى عندنا فى بلدنا .. جد مفتقدة العيد فى السودان لى 15 سنه ماحضرت لى عيد فى السودان اها ونجى بعد
كده لحكاية الضحية القصة عندنا .. معكوسة شديد لانو الاغلب هنا استلام الضحية بيكون اول يوم بالليل دايما
مافى استلام الصباح .. اما حكايه الابناء دى ده فليم كبير براه خليه احسن .. تسلم يارب وشكرا ليك رجعتنا لزمن جميل انشالله ربنا يكتب لينا اننا نشوفو تانى

هذا العام الثاني عشر على التوالي
وطنا انفسنا ان نجعل ايامنا كلها عيد فى هذه الغربة
اليوم صحيت وصليت لوحدي فى البيت وحمدت الله على ما ادخره لنا من عمر لحضور هذا العيد السعيد سائلا المولى ان يعيده على عباده اجمعين بالخيرات والبركة
خرجت الى مطعم قريب تناولت فيه الطعام واتصلت على الاهل والاحبة فى هذا الكون مهنئا اياهم بالعيد وغفلت عائدا الى كوخي الدافئ لانعم بصحبة كتاب او مجلة او الاستماع لنغم يعادل مساحة الفرحة المفقودة فى هذه المناسبة...... وخلاص
عيد سعيد يا سمعة

الأخت ماجدة
تحية طيبة

Quote: اما العيد فى الغربه بالنسبه لينا الجد فى قليل من بعض مظاهر العيد لكن للامانه مافى احساس بيه اتخيل لمن العايشين فى الدول العربية والمسلمة يقولو العيد شكلو مختلف تفتكر احنا العايشين فى دوله المطرة والضلمة والبرد الشديد يكون حالنا كيف الجو عندنا 4 تحت الصفر ..

قطع شك حالكم يغني عن سؤالكم.. الغربة موحشة يا ماجدة وطعمها مر رغم أن أغلب السودانيين أغراب في وطنهم..

Quote: جد مفتقدة العيد فى السودان لى 15 سنه ماحضرت لى عيد فى السودان اها ونجى بعد كده لحكاية الضحية القصة عندنا .. معكوسة شديد لانو الاغلب هنا استلام الضحية بيكون اول يوم بالليل دايما مافى استلام الصباح .. اما حكايه الابناء دى ده فليم كبير براه خليه احسن .. تسلم يارب وشكرا ليك رجعتنا لزمن جميل انشالله ربنا يكتب لينا اننا نشوفو تانى

أسال الله أن يردك إلى بلدك سالمة غانمة والوطن ينعم بالحرية والديموقراطية..
شد ما يؤلمني إحساس الأطفال في هذا اليوم.. لهم الله.
.
.

الاخ الـحبيب الـحبوب،
الـوراق،

تـحـية طـيبة،
وتقبل اجـمل امنيـاتي القلبية، متـمنيآ من الله تعـالي ان يـجعله عيـدآ سـعيدآ علي الـجميع.

بـما انـنـي قـد قـضيـت 21 عامـآ فـي الغربة ولـم ازر فـيها السـودان ولامـرة ولـو ( بالغلـط )...

فاقول انـني لـو جـئت للسودان لشـعرت بالغربة فيـه!!!

مـلـحـوظة: اللـه يـجـازي (الناس الكانو ومازالـوا) السـبب وراء عـدم تـمكـنـي وزيارة السـودان،
وشـدة تزول باذن اللـه!!

الحبيب اسماعيل وراق

علينا وعليكم يتبارك العيد

ونسال الله ان يبدل الحال البلد باحسن حال ويفسح في الايام

ويعيد الجميع للبلد سالمين غانميين

يا سمعه بطل الجرس
حالك افضلنا منا كثير,,,,,,,,,,,,

انا من الفجرية بحاول اعيد علي ست الحبابيب ,, الشبكه مشغوله,, وبعد كمين محاوله
جاني الصوت ولكن بكل اسف مع فيه صدى,,فلم تصلني دعواتها المدخوره لمثل هذه المناسبات,,
عرجت في محاوله اخرى للنصف الحلو والعيال,, جائني رد المقسم هذا المشترك لايمكن الاتصال به حاليا
وصرت احاول كالمجنون فهواجس الخوف من النزفيه تارقني على الوليدات وفي كل مره اصدم بنفس الصوت هذا المشترك لا يمكن الوصول اليه حاليا , اخرجت النوته التي احتفظ فيها بارقام الموبايلات لاتاكد من الرقم, كتبته رقما رقمبعد ان لبست النظاره . الرقم صحيح وهذه المراة المكينه لا تمل من عبارة لايمكن الوصول اليه حالا,, لعنت الاختراع الاسم هاتف نقال بدلا من احمد الله عليه,,
جربت رقم اخي لعل الخطا من عندي رن الهاتف , بعد حق الله بق الله واسئلة التعسفيه عن العيد والخروف والنزفيهوكم سبه للحكومهعرجت لماربي الاساس عيال جو البيت الكبير ,, طمئن بانه موجودين اداني الولد عيدة علي وامرته بان يقول لامه تفتح موايلها,, صك اذني بضحكه وابلغني,,
بان ماما موبايل خطفوه منها الحراميه مع الشنطه,,

امتلئت توترا,,,,,
هربت الي البطانيه لا ادري هربا من دموعي , ام لا لعن حظي في الظلام,,
غبلني النوم , دخلت سودانيز اون لاين, وجدت عددا من المواضيع الجديده شعرة بان هنالك من يشترك معي في معاناة الغربه فشعرة بنوع من الارتياح فموت الجماعه عرس زي ما بقولوا,,

كفاية كده ما ابراكم
عيدكم سعيد