Post: #1 Title: تعالوا نتخيّل لو كان فاز المريخ البعيوات كان كتبوا شنو ؟ Author: عمر الفاروق Date: 12-02-2007, 07:04 AM
أول حاجة كان فلقونا ليك بي صورة معز وهو مشربك داخل الشبكة ليحكوا عن عظمة هدف عالمي تاريخي ويحكوا لنا عن قصة هدف بطله هيثم طمبل الذي راوغ كل دفاع الهلال ولكان هيثم طمبل هو أفضل مهاجم في القارة السمراء ومحل ما نكتب لينا حاجة يجينا ليك كيجا ويوسف حسين يلصّقوا لينا الصورة دي..
تاني حاجة كانوا ركّزوا على هدف فيصل العجب وشبكونا ليك العجب نجم المباراة والعجب سيدو والعجب حبيبي في حين إنو فيصل العجب لم يقدم أي مردود إيجابي في المباراة خصوصاً في شوطها الأول ولكن هكذا هو العجب مرزّق الكورة تجيهو محل واقف ..
تالت حاجة كانوا قدّونا ليك بي حكاية قووون بي جاااااي وقون بي جااااااااااي ويتناسوا عمداً إنو الهلال بيسجّل قون بي جاي وقونين بي جاي !!!!
كانوا حا يقولوا إنو سعيد السعودي هو سبب فوز المريخ ولو شارك السعودي ضد الصفاقسي لجاء المريخ بي الكأس المحمول جوّاً ..
ولكان المدرب مازدا هو مدرب القرن وهو أفضل مدرب في العالم وأتوبفستر هو العجوز الذي ضيّع المريخ وكيف أن مازدا درس الهلال وقرأ الملعب بتبديلاته الناجحة وتحويله الرائع لإيداهور على الطرف ودخول سعيد السعودي للدفاع مع وجود دامر وسفاري..
اما عن الجمهور فكانت صور الباقات التي رمى بها جمهور المريخ ريتشارد وحكم الراية والتي سيفترضون أن من رماها هو جمهور الهلال فكانوا الان يسمون المباراة مباراة ذات الباقات واخر تصوير ولصق من الكمبيوتر للمنتديات ويشبكونا ليك جمهور الهلال ما محترم وجمهور الهلال إرهابي .. وطبعاً حا يقولوا الباقات والحجارة دي جابوها جمهور الهلال في جيوبهم لأنو الرد كاسل ما فيهو حجارة وباقات !!!!
الأخطر والأمرّ من كل ذلك كانوا تناسو فضائح شهر 11 والهزائم بي الأربعات والتلاتات والرايح جاي وعملوا حميل وركّزوا فقط على مباراة القمة ليقول لهم إعلامهم بأن المريخ بطل أفريقيا ولاعبو المريخ هم الأفضل في الساحة وجمهور المريخ هو الأروع ..
اما عن الإنبراشات فكانوا فلقونا بيها فلقة لو كانت إنبارشة من يقولون عنه برازيلي (باولينو) وهو ينبرش من محاورة ريتشارد له إنبرشها مثلاً قودوين لو حاوره أمير دامر ولكان أخونا كيجا جاك ناطي في أي موضوع إن شاء الله كان عن المعلمة البريطانية وتوووشك يقول ليك المعلمة البرطانية أهانت رسولنا الكريم والدليل على ذلك إنبراشة قودوين وتووووشك يجيك أخونا علي البشير ويقول ليهو أيوا يا ابو مصطفى وهاك الصورة (أضغط هنا للحفظ)..
أما عن سامي عبد الوهاب فحدّث ولا حرج !!!!!!كان حا يجينا في ثياب الواعظينا ويقول ليك المريخ نعم فاز ولكن الهلال فريق به نجوم والهلال فريق به مدرب شاطر ولكنها كرة القدم ويجب علينا نحن أهل المريخ وبالرغم من الفوز يجب علينا أن نعيد حساباتنا في بعض اللاعبين وأن لا ينسينا الفوز على الهلال الإهتمام بتسجيل لاعبين وعلى إدارة المريخ الإنتباه ,,
Post: #2 Title: Re: تعالوا نتخيّل لو كان فاز المريخ البعيوات كان كتبوا شنو ؟ Author: nadus2000 Date: 12-02-2007, 08:38 AM Parent: #1
الأخ عمر الفاروق
تعرف كنت أنتظر من يكتب هذا البوست، و ما سيكتبه المشجع/ مزمل، بالتحديد، وبعد رصدك الجميل لما كا سيكتبه الزملاء مشجعي المريخ بالبورد، بالله واصل ابداعك في الكتابة عن ما كان سيكتبه مشجعي صفحات الجرايد وخاصة ناس الصدى، وان كان قناعتي هنا فإن كثيرا من المريخاب الذين يكتبون هناأفضل بكثير من ناس مزمل.
Post: #3 Title: Re: تعالوا نتخيّل لو كان فاز المريخ البعيوات كان كتبوا شنو ؟ Author: tmbis Date: 12-02-2007, 09:07 AM Parent: #2
Quote: اما عن الجمهور فكانت صور الباقات التي رمى بها جمهور المريخ ريتشارد وحكم الراية والتي سيفترضون أن من رماها هو جمهور الهلال فكانوا الان يسمون المباراة مباراة ذات الباقات واخر تصوير ولصق من الكمبيوتر للمنتديات ويشبكونا ليك جمهور الهلال ما محترم وجمهور الهلال إرهابي ..
.. تعرف ياعمر: لما شفت الهدف بتاع طمبل السلفقه دا ,. والطريقة الدخلت بيها الكورة، ووقعت معز جوه الشبكة طوالي قلت لي معتصم .. تعرف: جماعتك ديل بيكونو جهزوا رسماتهم من حسع دي .. وقعت المعز دي ح يبدعوا فيها وهم اصلهم فنانين جدا .. تتذكر بتاعت قروشي بتاعت القاهرة لما المعز ضرب راسو من الزعل بالعراضة .. اهــا حقو تجيب لينا الفيديو كليب دا .. فنجرية منك ساكت كدا .. طالما طلعت ليهم المعز دا من الشبكة زي ( الشبكة ) من العجيبن. أقول ليك حاجة غريبة: تعرف لما قريت الباقات الفكو بيها ريتشارد دي .. والهل شعرت ليك بالدنيا ورديه .. والله بالجد قلت عمر دا جنا الليلة واللا شنــو ..؟ لاني اخدت المسالة من منظور .. كلاسيكي ورومانسي بحــت .. وقربت اعزف ليك عود ويغرد كماني .. والله بالجد كدا كنت قايل الباقات دي باقات ورد .. لاني الكورة ما حضرتها كلها .. قلت الجماعة ديل اصلهم متعودين يعملو الحاجات الكويسة دي .. قلت احتمال يكونو ادو ريتشارد من اول المباراة باقات ورد .. يا بين الشوطين .. والله الواحد بقى يتخيل كتير خلاص .. التقول مريخابي بس .. بعدين يا عمر ما بتستفيد من وجودك الجغرافي دا خالص ..؟ قول ( قارورات ) .. ( باقات ) دي هناك .. تاني قول قارورات ناس الريد كاسيل.. عشان الواحد يكون في الصورة من الأول.
ــــ
Post: #4 Title: Re: تعالوا نتخيّل لو كان فاز المريخ البعيوات كان كتبوا شنو ؟ Author: عمر الفاروق Date: 12-02-2007, 09:28 AM Parent: #1
الأخ نادوس: ياخ مالك عايز تجهجهنا معاك !! انا جني وجن البوست بتاعي يدخلو زول رايق يا لذيذ يا رايق ..
Quote: الأخ عمر الفاروق
تعرف كنت أنتظر من يكتب هذا البوست، و ما سيكتبه المشجع/ مزمل، بالتحديد، وبعد رصدك الجميل لما كا سيكتبه الزملاء مشجعي المريخ بالبورد، بالله واصل ابداعك في الكتابة عن ما كان سيكتبه مشجعي صفحات الجرايد وخاصة ناس الصدى، وان كان قناعتي هنا فإن كثيرا من المريخاب الذين يكتبون هناأفضل بكثير من ناس مزمل.
إعلام الضلال المريخي إعلام عجيب وغريب بيعمل من الفسيخ شربات وكسر من الثانية فقط يجعلهم يحولون الواقع لكذبة كبيرة .. يبيعون الوهم ويصدّرون لجماهيرهم (المغلوب) على أمرها تجارة فاسدة ويعمون الأبصار.. مباراة القمة الأخيرة لم يكن فيها نجماً للمباراة ورغماً عن ذلك جامهلم الإتحاد وأدخل العجب في فورمة التتويج حتى لا يخرجون من المولد دون حمص!!!
Post: #5 Title: Re: تعالوا نتخيّل لو كان فاز المريخ البعيوات كان كتبوا شنو ؟ Author: humida Date: 12-02-2007, 09:39 AM Parent: #4
ما كتبه إعلام ( الضلال ) بعد الهزيمة ..
- قناة ( الشروق ) تبدأ ( البث ) اليوم من مدينة ( دبي ) الإعلامية - المريخ ( العظيم ) صاحب الكاسات ( المحمولة جوا ) وخصوصا ( كاس دبي ) .. - هل سيذهب ( قودوين ) الي ( عجمان ) .. وخصوصا انه عجمان دي جنب ( دبي ) .. .. .. ولا استغرب تسجيل الفريق في ( اتحاد الكرة الاماراتي ) .. عشان يكون قريب من ( دبي ) ..!
Post: #6 Title: Re: تعالوا نتخيّل لو كان فاز المريخ البعيوات كان كتبوا شنو ؟ Author: humida Date: 12-02-2007, 09:41 AM Parent: #5
Quote: ولا استغرب تسجيل الفريق في ( اتحاد الكرة الاماراتي ) .. عشان يكون قريب من ( دبي ) ..!
و دي كلها ( تداعيات ) معسكر ( الهلال ) في ( الامارات ) .. الجاب ليهم الهوا ..!
Post: #7 Title: Re: تعالوا نتخيّل لو كان فاز المريخ البعيوات كان كتبوا شنو ؟ Author: عمر الفاروق Date: 12-02-2007, 09:58 AM Parent: #1
تامبا يا حبوب:
Quote: تعرف لما قريت الباقات الفكو بيها ريتشارد دي .. والهل شعرت ليك بالدنيا ورديه .. والله بالجد قلت عمر دا جنا الليلة واللا شنــو ..؟ لاني اخدت المسالة من منظور .. كلاسيكي ورومانسي بحــت .. وقربت اعزف ليك عود ويغرد كماني .. والله بالجد كدا كنت قايل الباقات دي باقات ورد .. لاني الكورة ما حضرتها كلها .. قلت الجماعة ديل اصلهم متعودين يعملو الحاجات الكويسة دي .. قلت احتمال يكونو ادو ريتشارد من اول المباراة باقات ورد .. يا بين الشوطين .. والله الواحد بقى يتخيل كتير خلاص .. التقول مريخابي بس .. بعدين يا عمر ما بتستفيد من وجودك الجغرافي دا خالص ..؟ قول ( قارورات ) .. ( باقات ) دي هناك .. تاني قول قارورات ناس الريد كاسيل.. عشان الواحد يكون في الصورة من الأول.
والله كلامك ده ذكرني بي أغنية الراحل إبراهيم عوض: أيوة جيتكم يا حبايب ..أحمل الأشواق هدايا والمناديل .. الناس تجيب في الهدوم والقروش وزولنا يجيب في الاشواق والمناديل والكتابات .. أسة ناس الهلال ديل يجيبوا ليهم في الكاسات وجماعتنا يحملوا الباقات هدايا والحجارات والتهاني.. بعدين مسول من الخير هي (باقة) ولا( باغة) لأنو الواحد بعد بقا يحضر عمر (النغي) لمن بقا يجيهو وجع حلق من قانا وغانا وباقة وباغة .. أما بخصوص(القوارير) فوالله يا تمبس انا خايف يتشابه عليك البقر وانت زول عزابي وتقوم تفهم لي القوارير دي بي معنى (الحريم) وانت زول قاعد على الهبشة .. رفقاً بالقوارير يا تمبس..
تخريمة : ياخ ما بلقا عندك لقطة المشجع اللابس ملابس فريق الهلال(فنيلة وشورت) وقاعد يدردق في نجيلة الجماعة .؟
Post: #8 Title: Re: تعالوا نتخيّل لو كان فاز المريخ البعيوات كان كتبوا شنو ؟ Author: Ahmed Alrayah Date: 12-02-2007, 10:11 AM Parent: #1
يا عمر
شوف الكاس قالت المريخ ده لا لا... صدت من تيهـا ودلالا __________________________
المريخ ما فاضي ليكم ذاتو... طوى ملف الممتاز.
Post: #9 Title: Re: تعالوا نتخيّل لو كان فاز المريخ البعيوات كان كتبوا شنو ؟ Author: عمر الفاروق Date: 12-02-2007, 10:31 AM Parent: #1
يا حميدة : والله (دبي) حكايتها حكاية .. أسة يقولوا ليك والمريخ كان قد لعب في تشاد والتي يترأسها إدريس(دبي) ويقوموا يقروها ليك دبي..
يعني أسة بي كلامك ده الهلال لو كان عسكر في القطينة كان حصل شنو طيب؟
Post: #10 Title: Re: تعالوا نتخيّل لو كان فاز المريخ البعيوات كان كتبوا شنو ؟ Author: humida Date: 12-02-2007, 10:34 AM Parent: #9
Quote: عسكر في القطينة
كانوا عملوا ( مهرجان ) لتكريم ( رواد شعراء الحقيبة ) ..!!
Post: #11 Title: Re: تعالوا نتخيّل لو كان فاز المريخ البعيوات كان كتبوا شنو ؟ Author: عمر الفاروق Date: 12-02-2007, 10:38 AM Parent: #1
ود الريح:
Quote: شوف الكاس قالت المريخ ده لا لا... صدت من تيهـا ودلالا
أنت السماء بدت لنا ..وأستعصمت بالبعد عنّا ..
Post: #12 Title: Re: تعالوا نتخيّل لو كان فاز المريخ البعيوات كان كتبوا شنو ؟ Author: humida Date: 12-02-2007, 11:13 AM Parent: #11
بمناسبة ( المباراة ) دي .. انت قصة ( الهلال ) مع ( التلاتة ) شنو .. اي فريق بعمل ( جعجة ) بيأخد ( تلاتة ) .. يكون يا ربي ماشين بـ( قانون الأحوال الشخصية ) .. و ( التلاتة ) طلقات لا رجوع فيها .. ألا اذا ( اقترنوا ) بطرف ( تالت ) وطلقهم برضو بـ( التلاتة ) .. وبعدها يجوا راجعين بـ( ادبهم ) .. وبلا ( سراميك ) بلا كلام فاضي ..!! .. .. ولكم في ( هالة المصرية ) خير مثال ..!
Post: #13 Title: Re: تعالوا نتخيّل لو كان فاز المريخ البعيوات كان كتبوا شنو ؟ Author: بشير حسـن بشـير Date: 12-02-2007, 11:19 AM Parent: #1
عمر الفاروق
خليك فى تخيلاتك ده ، وبكده الوصافه تكون ثابته بالسكوت اللا منافسى من المريخ !!!!
مع تحياتى ياخى .....
Post: #14 Title: Re: تعالوا نتخيّل لو كان فاز المريخ البعيوات كان كتبوا شنو ؟ Author: ALGARADABI Date: 12-02-2007, 11:20 AM Parent: #1
كان عنوان الصدأ حا يكون:
هلهلة الهلال في موقعة ذات الشباك
Post: #15 Title: Re: تعالوا نتخيّل لو كان فاز المريخ البعيوات كان كتبوا شنو ؟ Author: عامر تيتاوى Date: 12-02-2007, 12:32 PM Parent: #14
Quote: اما عن الجمهور فكانت صور الباقات التي رمى بها جمهور المريخ ريتشارد وحكم الراية والتي سيفترضون أن من رماها هو جمهور الهلال فكانوا الان يسمون المباراة مباراة ذات الباقات واخر تصوير ولصق من الكمبيوتر للمنتديات ويشبكونا ليك جمهور الهلال ما محترم وجمهور الهلال إرهابي .. وطبعاً حا يقولوا الباقات والحجارة دي جابوها جمهور الهلال في جيوبهم لأنو الرد كاسل ما فيهو حجارة وباقات !!!!
ذكرتنى صحبى راكوبة
Post: #16 Title: Re: تعالوا نتخيّل لو كان فاز المريخ البعيوات كان كتبوا شنو ؟ Author: فيصل محمد رشوان Date: 12-02-2007, 02:13 PM Parent: #15
ياعمر الصورة دي ولا غيرها
Post: #17 Title: Re: تعالوا نتخيّل لو كان فاز المريخ البعيوات كان كتبوا شنو ؟ Author: humida Date: 12-12-2007, 12:56 PM Parent: #16
راجين ( المطرة ) ..!!
Post: #18 Title: Re: تعالوا نتخيّل لو كان فاز المريخ البعيوات كان كتبوا شنو ؟ Author: Al-Sadig Yahya Abdall Date: 12-12-2007, 01:02 PM Parent: #17
Quote: ويحكوا لنا عن قصة هدف بطله هيثم طمبل الذي راوغ كل دفاع الهلال ولكان هيثم طمبل هو أفضل مهاجم في القارة السمراء
Post: #19 Title: Re: تعالوا نتخيّل لو كان فاز المريخ البعيوات كان كتبوا شنو ؟ Author: gamal Date: 12-12-2007, 01:11 PM Parent: #1
اسمع دي يا عمر
الهلال يقترب (باعتبار الاعادة) من الجلوس في الوصافه بعد هزيمته من مريخ اللطافه
