عاجل الي بورداب لندن والدكتور مصطفي محمود

الاخوه والاخوات

طبعا موضوع المدرسة البريطانيه ما حا ينتهي بترحيلها من السودان ... والقضيه حا تثار في جميع اجهزة الاعلام ... فور وصولها الي بلادها ... وانا اقول وكنت اؤويد اي قرار يصدر من اي جهة حتي حكومة الانقاذ طالما لصالح البلد .. ولكن الطريقة التي عوملت بها المدرسة البريطانية طريقة غير عاقلة وكان هناك الف طريق لتوضيع وجهة نظرها بطريقة سليمة عبر اجهزة الاعلام السودانية بدلا عن المتاجره السياسة .

وها هي صورة الاسلام والسودان تتشوه في كل اجهزة الاعلام العالمية .. ونحن كسودانيين في هذا المنبر يجب ان نكون غيوريين اسلامنا وعلي اسم بلدنا ونمثل بلدنا بالخير ...

اخوتي واخواتي ...

اقترح مبادره من الاخوه المشاركين في هذا المنبر في بريطانيا العظمي لتشكيل وفد منهم برئاسة الاخ الدكتور مصطفي محمود لزيارة هذه المدرسه عندما تصل الي بلادها لتطييب خاطرها ويتناقشوا معها وينقلوه لنا قضيتها كاملة بعيدا عن التشنج .

سمير كلامك كله سمح.
وياريت يقوموا بيه ناس بريطانيا فعلا.





اما الاقتراح ده فاعمل حسابك يا د.مصطفى محمود:

Quote: اقترح مبادره من الاخوه المشاركين في هذا المنبر في بريطانيا العظمي لتشكيل وفد منهم برئاسة الاخ الدكتور مصطفي محمود لزيارة هذه المدرسه عندما تصل الي بلادها لتطييب خاطرها ويتناقشوا معها وينقلوه لنا قضيتها كاملة بعيدا عن التشنج .

انها مكيده خرطوميه للتعرف على شخصك.

الفاضلة تراجي ..

احوالكم وكل سنه وانتو طيبين ... وشكرا علي المرور .. وده اقل واجب ممكن نقدموا للمدرسة البريطانية .. لانو ناسنا هناك طيبيين وما سبقتهم امه من الامم في حب الرسول عليه افضل الصلوات والتسليم ومدحه وتكرميه واكرامه ... لكن انا وانتي والكثير في دول الغرب بيشاهدوا وسائل التعليم المتقدمه البتحبب الطفل في الماده الدينيه والعلمية ... وناسنا هناك ما بيعرفوا قيمة الدب انو بيقدموه في اعياد الحب والخطوبه والزواج وزيارة المريض وابطاقات الاعتذار .. فاكيد المدرسه نظرت للدب كرمز للحب والوفاء حسب ثقافتها وعلمها وعاداتها .. والامهات والاباء في الغرب دايما بيشتروا دمية الدب للاطفال عشان يحضنوها وينوموا باطمئنان .

لكن نحن للاسف الشديد شعب متسرع ومتعصب بصوره عمياء ...

اقتراحي بانو الدكتور مصطفي يقود الوفد لانو راجل كتاباتو وطنية وراجل رصين وهو اول من حاول انزال الدب في كليبات عشان يعكس لينا مساهمة الدب في تعليم الاطفال .

وبرضو بقترح للدكتور مصطفي محمود حسب عاداتنا وتقاليدنا يشتري ليهو علبة ((حلاة ماكنتوش)) ويقدمها للمدرسه حسب عاداتنا.... لكن المصيبه البريطانيين يفتكروا نحن شمتانيين في المدرسه وبناكل في الحلاوة .

يلا يا بورداب لندن شدوا حيلكم ... ويا دكتور مصطفي في ميزان حسناتك انشاء الله ...

أتمنى أن يسارع بورداب لندن بتشكيل لجنة لإستقبال المعلمه على أن يترأس اللجنه الدكتور الهمام مصطفي محمود وكلي ثقه بأن د.مصطفي سيكون لن يتخاذل أبداً في القيام بعمل مهم مثل هذا .

مؤونة عام من الود أخ سمير

اختنا تراجي خرطوم شنو الدايره تعرف شخصية دكتور مصطفي مع احترامنا ليهم ... محمد ابراهيم نقد القاعد يختفي من زمن ايام الرئيس عبود قاعد في قلب الخرطوم ولقاءات تلفزيونية وعينك يا تاجر ... والناس الشايلة السلاح وبتقاتل في الجيش والشرطه صورهم منشوره في الجرايد والانترنت ولقاءاتهم في الفضائيات عينك يا تاجر ..... ..

عشان كده يا تراجي الدعوه قايمه لدكتور مصطفي محمود وبورداب لندن ..وان شاء الله يطولوا رقبتا مع الريطانيين .

اخي الفاضل ود فرح

تحيه يا غالي ...

وده اقل واجب نقدموا نحن رجل الشارع للمدرسه القطعت ملايين الاميال عشان تساهم في تعليم اطفالنا ..... وناسنا هناك حسب طيبتهم وحبهم للرسول صلي الله عليه وسلم وعدم معرفتهم لعادات الخواجات الانجليز اختلطت عليهم الامور ..

واجب المثفين والعايشين في قلب بريطانيا انوا يقوموا بالواجب نيابة عن الشعب السوداني وده اقل واجب لاحترام المعلم ... والقومه والتحيه لبورداب لندن والدكتور مصطفي

الاخ سمير

اؤيد فكرتك واتمنى من بورداب بريطانيا او من يتعاطف
معنا في هذا الموضوع وهو مقيم في بريطانيا ان يتبنوا
مثل هذه الفكرة

وان ينقلوا لها وليس منها فقط، ان ينقلوا لها ان هناك
كثيرون يعرفون انها ظلمت وان الاسلام دين يدعو الى مكارم
الاخلاق وطباعنا كسودانيين كانت اروع من هذا التشنج بكثير

Quote: وان ينقلوا لها وليس منها فقط، ان ينقلوا لها ان هناك كثيرون يعرفون انها ظلمت وان الاسلام دين يدعو الى مكارم الاخلاق وطباعنا كسودانيين كانت اروع من هذا التشنج بكثير

تسلم اخي الفاضل زول واحد ...

ويا ريت بورداب لندن نيابة عن جميع الجاليات السودانية والشعب السوداني يستقبلوا الاستاذه البريطانية وشكرها نيابة عن جميع اطفال السودان .. ويشرحوا ليها انو الموضوع اختلاف ثقافات واختلاف في طريقة تعليم الاطفال بين الغرب وبلادنا الحبيبة ...

واللهم صلي علي افضل خلق الله وعلي اهل بيته سيدنا محمد عليه افضل الصلوات والتسليم ...

أختنا الهلالابيه تراجى
مبروك اولا فوز الهلال ، لكن استوقفتنى (تصريجه) زى تصريجة (لاعبى المريخ)، كتبتى:-

Quote: اما الاقتراح ده فاعمل حسابك يا د.مصطفى محمود: انها مكيده خرطوميه للتعرف على شخصك.

هل هذا الكلام يعنى أن الدكتور/ مصطفى محمود شخصية غير معروفه ؟؟
او هل الدكتور مصطفى محمود، يكتب باسم شخص آخر ؟؟
خاصة وقد كانت بينكما علاقة مودة ووصال قبل موضوع الصداقة السودانيه مع اسرائيل، وانت صاحبة منبر دون شك تعرفى الكثير المثير .. ولا كيف ؟؟؟؟؟؟
_______

اذا كان ألأمر كذلك فسوف يصينى احباط كبير لأن الدكتور/ مصطفى محمود، كما هو واضح رجل مناضل ومنافح لنظام الأنقاذ بلا هواده !!

شكرا سمير لكماتك.


ويا تاج السر يل هلالابي يا متعصب
سلامات.

ويا اخوي عايز تشبكني مع اصحابي المريخاب ليه؟؟؟

Quote: أختنا الهلالابيه تراجى

يا اخوي كستاوي مريخابي
ودينق مريخابي
اها ببيع اهلي ديل وارابط مع اهلي الثانين ليه؟؟؟
كلكم اهلي عشان كد انا حي العرب سوكرتا


اما حديثك هذا.....

Quote: Quote: اما الاقتراح ده فاعمل حسابك يا د.مصطفى محمود: انها مكيده خرطوميه للتعرف على شخصك. هل هذا الكلام يعنى أن الدكتور/ مصطفى محمود شخصية غير معروفه ؟؟ او هل الدكتور مصطفى محمود، يكتب باسم شخص آخر ؟؟ خاصة وقد كانت بينكما علاقة مودة ووصال قبل موضوع الصداقة السودانيه مع اسرائيل، وانت صاحبة منبر دون شك تعرفى الكثير المثير .. ولا كيف ؟؟؟؟؟؟ _______ اذا كان ألأمر كذلك فسوف يصينى احباط كبير لأن الدكتور/ مصطفى محمود، كما هو واضح رجل مناضل ومنافح لنظام الأنقاذ بلا هواده !!

د.مصطفى محمود شخصيه حقيقيه ونعرفه انا وهباني ود.عبد الماجدر ود.راشد الحاج
وخالد الطيب ونتحدث معه باستمرار.....فقط ذكرت ما ذكرت لانه الجماعه كيزان المنبر
كثير ما تحرشوا به وادعو انه غير حقيقي...لذا من باب المكاواة لم ارغب لهم ان يشفى غليلهم ويتعرفوا عليه خليه كده مغلغل حنانهم.

Quote: لذا من باب المكاواة لم ارغب لهم ان يشفى غليلهم ويعرفوا عليه خليه كده مغلغل حنانهم.ت

اختنا تراجي ... اسع كلامنا ده كلو ... مولد وصاحبو غايب .... هو الدكتور ذاتو وينو ؟؟؟ فاقدين طلتو عشان يجي يورينا رايو في موضوع المدرسة دي ... بمناسبة انو كيزان المنبر شككوا في وجودوا كشخصية حقيقة .. افتكر انو اذا ظهر علنا فيهو رد كافي علي الجماعه المشككين ديل ... ونحن عايزنوا يظهر ويرفع راس السودان ... وخصوصا انو الولية المسكينة وصلت انجلترا ..

يا دكتور مصطفي انت وبورداب لندن عشمنا فيكم كبير ... ولازم تفتحوا لينا معاها خط ساخن عشان توضح الحقيقة عبر هذا المنبر ...

وبيني وبينك يا تراجي ما في غلغة حنان بتغير ليها حكومة .. ولكن بعد ما تنتهي المهمه دي خليهو يرجع يغلغل حنان كيزان السودان والشيشيان والبرازيل والذي منو ...

المهم يا اختنا العزيزه تراجي ... هذه الاستاذه رجعت الي انجلترا والاعلام كلو حا يتسابق عليها وياما حا نسمع روايات ...ونحن اصحاب الوجعة مفروض نوضح موقف رجل الشارع السوداني من هذه القضية وفي انتظار الجميع وخاصة الدكتور مصطفي محمود الذي يشرفنا ان يقوم هذا المسعي الكريم .

اقتراح سيكون له مردود طيب

تشكر سمير

Quote: Author: EL fahal Abdelatif اقتراح سيكون له مردود طيب تشكر سمير

اخي الفاضل الفحل ... تسلم انشاء الله ... واساليب التعليم بتختتلف بين الغرب والسودان ... وياحليل ايام الولد ضرب الجمل والجمل جمل الولد ... المدرسة البريطانية حاولت تنقل نفس اسلوب الغرب في تعليم الاطفال ... وان كانت صورة الحيوان معروفه في السودان من ايام كتب المطالعة ومواضيع الجمل جمل الولد والولد ضرب الجمل الخ ... وبالحرف الواحد حاول المدير يوضع من خلال البي بي سي ..

Quote: ويضيف بولس أن جيبونز تدرس وفقا للمنهج البريطاني الذي يرمي إلى تعليم الأطفال الصغار أشياء عن الحيوانات وكان الدب موضوع هذا العام . إنها قضية حساسة للغاية ونشعر بالخوف على سلامتها، إنها غلطة غير مقصودة وجيبونز لم تقصد ابدا إهانة الاسلام ويعتقد المدير "اختار الأطفال 3 أسماء هي عبد الله وحسن ومحمد وانتهى الأمر إلى التصويت على الأسماء حيث اختار 20 من 23 تلميذا إسم محمد". وقد سمح للأطفال بأخذ الدب في عطلة نهاية الأسبوع وطلب منهم كتابة يوميات عما يفعلونه به. ثم جمع ما كتبه الأطفال في كتاب على غلافه صورة الدب وملاحظة مكتوب عليها: "إسمي محمد".

اقترح كتابة رسالة اعتذار وشكر
من الزملاء الذين يتفقون معنا لارسالها اليها لنعبر عن:
ان الاسلام ليس كما ذهبت حكومتنا.
لا حرية تعبير للذين يتعاطفون معها في الداخل.
اننا ندرك انها تصرفت بحسن نية.
نعتذر لها ولاسرتها لما اصابهم.
ونشكر لها عباراتها الطيبة.
ونعبر عن انزعاجنا لفقد معلمة بخبرتها ولانسانة
كانت يمكن تفيد وتستفيد من مجتمعنا السوداني.


واي كلام اخر يراه اعضاء البورد الزملاء
ثم نقوم بترجمة الخطاب للانجليزية وارساله اليها.

الفاضل زول واحد

مع احترامي لاولياء الامور القدموا شكوي لادارة التعليم ... واحترامي لحماية اطفالهم ... المعروف انو مدرسة الاتحاد من اقدم المدارس المسيحية في السودان ... وعمرها اكثر من مائة سنه .. وكانت مدرسه متخصصه في تعليم البنات وكانت شراكه بين الجاليه القبطية والكنيسه الانجليزيه .. ولمن انشئت كانت متخصصه لتعليم المسيحيين لكن اهل الصفوه في السودان واصحاب المال بيتسابقوا الي علي تسجيل اطفالهم في الاتحاد والكمبوني والمدارس الخاصه .. خلاصة قولي ... اهل الصفوه الاشتكوا المدرسه دي يا ريت لو عملوا علي تطوير التعليم الحكومي ... علي الاقل ما كان حرموا الكثير من الاطفال من عطاء الولية دي ...

اقتراحك جميل وممتاز خاصة اخونا الدكتور مصطفي محمود غائب او عامل اضان الحامل طرشا ... وبرضو بنطالب الحكومه السودانية السماح للمدرسه دي بالرجوع للسودان ...


تخريمة .... عندنا ملايين المجرمين من قطاع طرق ونصابين ومراوقين ومتحايليين بيسيئوا الي اسم محمد والمصطفي واحمد ... لكن بقت علي الدب المسكين العايزه المدرسه تستخدموا كرمز للحب حسب عاداتها ...

Quote: اقترح مبادره من الاخوه المشاركين في هذا المنبر في بريطانيا العظمي لتشكيل وفد منهم برئاسة الاخ الدكتور مصطفي محمود لزيارة هذه المدرسه عندما تصل الي بلادها لتطييب خاطرها ويتناقشوا معها وينقلوه لنا قضيتها كاملة بعيدا عن التشنج .

الأخ/ سمير,

المعلمة جيليان قبينز, صرحت لحظة وصولها إنجلترا بأنها إستمتعت جد بوقتها فى الأربعة شهور التى قضتها فى السودان, وشجعت الناس للذهاب للعمل فى السودان, وقالت أن مدرستها فى حوجة لمعلمتين/معلمين, و لا يجب أن يؤثر ما حدث لها فى تخويف من يود الذهاب للسودان, وهى نفسها ستفعل لو سمح لها.

لاحوجة لأى بوردابى للذهاب لها, فهى تعرف أن الهوس الدينى مرض تعانى منها أقلية تربيها طقمة الإنقاذ وتستفيد منها وقت الحوجة, مثل محاولة منع قوات أوربية من الإنضمام لقوات الهجين .

هذة المعلمة تنتمى لحضارة هزمت الهوس الدينى قبل قرن من الزمان, ونظام ديمقراطى متفدم فيه سيادة القانون فوق كل شئ وهى لذلك لم تعمم ظاهرة الهوس على كل السودانيين. فأطمئن.

عادل

Quote: الأخ/ سمير, المعلمة جيليان قبينز, صرحت لحظة وصولها إنجلترا بأنها إستمتعت جد بوقتها فى الأربعة شهور التى قضتها فى السودان, وشجعت الناس للذهاب للعمل فى السودان, وقالت أن مدرستها فى حوجة لمعلمتين/معلمين, و لا يجب أن يؤثر ما حدث لها فى تخويف من يود الذهاب للسودان, وهى نفسها ستفعل لو سمح لها.

الاخ الكريم اسحق ...

ما قالته المدرسه البريطانيه ... كلام جميل في حق الشعب السوداني .. ويفضل الكبير كبير ... هذه الاستاذه انسانة عظيمه وعرفت قدر الشعب السوداني ... علي العكس من ذلك تماما هذا يشجع كل السودانيين في لندن وليس اعضاء هذا المنبر فقط ان يعملوا علي رد اعتبارها وتكريمها بالطريقه التي تليق بنا نحن السودانيين .. لاننا لا نظلم الناس ...

ومن هذا التكريم يجب ان نسعي ان تعود المدرسه للسودان عزيزه مكرمه ...

اخي الفاضل ... ان العدل من اسماء الله تعالي ... ويجب ان لا نظلم الناس ظلما وعدوانا ...

تخريمه ... اخونا مصطفي محمود رجع البلد لكنو ما معبرنا نحن رجل الشارع البسيط ... والناس مقامات ... وزي ما قلت المناسبه ما مناسبة بورداب لندن فقط ... ولا بد زيارة هذه المدرسه باي طريقه ..